꧒꧗꧑. ꦏꦺꦴꦱꦩ꧀ꦧꦏꦮꦶꦮꦴꦢꦏꦡꦴ

꧔꧕꧑. ꦏꦺꦴꦱꦩ꧀ꦧꦏꦏ꧀ꦑꦤ꧀ꦣꦏꦺ ꦄꦪꦩꦤꦸꦥꦸꦧ꧀ꦧꦶꦏꦡꦴ ꦌꦮꦁ ꦮꦺꦢꦶꦠꦧ꧀ꦧꦴꦠꦶ ꦪꦺꦴꦗꦤꦴ. ꦮꦶꦤꦪꦁ ꦥꦴꦭ꦳ꦶꦠꦺꦴ ꦕ, ꦠꦢꦠ꧀ꦡꦠꦺꦴ ꦕ ꦣꦴꦫꦺꦠꦷꦠꦶ ꦮꦶꦤꦪꦣꦫꦺꦴ, ꦠꦡꦴ ꦱꦸꦠ꧀ꦠꦤ꧀ꦠꦁ ꦣꦴꦫꦺꦠꦷꦠꦶ ꦱꦸꦠ꧀ꦠꦤ꧀ꦠꦶꦏꦺꦴ. ꦠꦺꦱꦹꦠꦶ ꦢ꧀ꦮꦷꦱꦸ ꦨꦶꦏ꧀ꦑꦹꦱꦸ. ꦱꦸꦠ꧀ꦠꦤ꧀ꦠꦶꦏꦺꦴ ꦨꦶꦏ꧀ꦑꦸ ꦤꦶꦏ꧀ꦑꦩꦷꦠꦶ ꦱꦩ꧀ꦧꦤ꧀ꦣꦺꦴ. ꦄꦴꦕꦩꦤꦈꦢꦏꦴꦮꦱꦺꦱꦤ꧀ꦠꦶ ꦄꦴꦕꦩꦺꦠꦶ ꦣꦺꦴꦮꦠꦶ ꦄꦤꦺꦤꦴꦠꦶ ꦄꦴꦕꦩꦤꦁ, ꦠꦩꦺꦮ ꦈꦢꦏꦁ ꦄꦴꦕꦩꦤꦈꦢꦏꦁ, ꦠꦩꦺꦮ ꦄꦮꦱꦺꦱꦁ ꦄꦴꦕꦩꦤꦈꦢꦏꦴꦮꦱꦺꦱꦁ, ꦄꦮꦱꦺꦱꦄꦴꦕꦩꦤꦈꦢꦏꦤ꧀ꦠꦶ ꦄꦠ꧀ꦡꦺꦴ. ꦠꦁ ꦨꦶꦏ꧀ꦑꦸꦤ꧀ꦠꦶ ꦱꦸꦠ꧀ꦠꦤ꧀ꦠꦶꦏꦁ ꦨꦶꦏ꧀ꦑꦸꦁ. ꦌꦠ꧀ꦡꦴꦠꦶ ꦄꦴꦕꦩꦤꦈꦢꦏꦴꦮꦱꦺꦱꦛ꧀ꦜꦥꦤꦺ. ‘‘ꦱꦕꦺ ꦲꦺꦴꦠꦶ, ꦢꦺꦱꦺꦱ꧀ꦱꦴꦩꦷ’’ꦠꦶ ꦆꦩꦶꦤꦴ ꦄꦠ꧀ꦠꦤꦺꦴ ꦱꦸꦧ꧀ꦧꦕꦨꦴꦮꦚ꧀ꦕ ꦱꦶꦏ꧀ꦑꦴꦏꦴꦩꦠꦚ꧀ꦕ ꦢꦱ꧀ꦱꦺꦠꦶ. ꦠꦺꦠꦶ ꦠꦪꦴ, ꦏꦡꦤ꧀ꦠꦶ ꦱꦩ꧀ꦧꦤ꧀ꦣꦺꦴ. ꦄꦡ ꦮꦴ ꦠꦺꦠꦶ ꦠꦸꦪ꧀ꦲꦁ, ꦤꦠ꧀ꦡꦷꦠꦶ ꦱꦩ꧀ꦧꦤ꧀ꦣꦺꦴ. ꦄꦱꦚ꧀ꦕꦶꦕ꧀ꦕ ꦄꦱꦠꦶꦪꦴ ꦏꦠꦠ꧀ꦠꦴ ꦄꦤꦴꦥꦠ꧀ꦠꦶꦥꦏ꧀ꦑꦺꦴꦥꦶ ꦨꦮꦺꦪ꧀ꦪꦴꦠꦶ ꦄꦴꦲ ‘‘ꦤꦠ꧀ꦡꦶ ꦄꦴꦥꦠ꧀ꦠꦷ’’ꦠꦶ. ꦌꦠ꧀ꦡ ꦥꦤ ꦄꦴꦥꦠ꧀ꦠꦶꦪꦺꦮ. ꦱꦺꦴꦠꦶ ꦱꦸꦠ꧀ꦠꦤ꧀ꦠꦶꦏꦺꦴ.

ꦮꦶꦤꦪꦣꦫꦺꦴꦥꦷꦠꦶ ꦮꦶꦤꦪꦣꦫꦺꦴ ꦥꦤ, ꦄꦴꦫꦺꦴꦕꦺꦱꦷꦠꦶ ꦱꦩ꧀ꦧꦤ꧀ꦣꦺꦴ. ꦄꦴꦥꦗ꧀ꦗꦩꦴꦤꦺꦴꦥꦷꦠꦶ ꦥꦶꦱꦢ꧀ꦢꦺꦴ ꦒꦫꦲꦠ꧀ꦡꦺꦴ. ꦠꦺꦠꦶ ꦮꦶꦤꦪꦣꦫꦱ꧀ꦱ ꦤꦶꦱ꧀ꦱꦶꦠꦏꦴ, ꦄꦴꦲꦁꦱꦹꦠꦶ ꦱꦩ꧀ꦧꦤ꧀ꦣꦺꦴ. ꦠꦱ꧀ꦱꦴꦠꦶ ꦱꦸꦠ꧀ꦠꦤ꧀ꦠꦶꦏꦱ꧀ꦱ. ꦠꦺꦠꦶ ꦱꦸꦠ꧀ꦠꦤ꧀ꦠꦶꦏꦱ꧀ꦱ ꦤꦶꦱ꧀ꦱꦶꦠꦏꦴ, ꦄꦴꦫꦺꦴꦕꦺꦱꦸꦤ꧀ꦠꦶ ꦱꦩ꧀ꦧꦤ꧀ꦣꦺꦴ. ꦱꦺꦴꦠꦶ ꦱꦸꦠ꧀ꦠꦤ꧀ꦠꦶꦏꦺꦴ. ꦩꦸꦱꦴꦮꦴꦢꦷꦠꦶ ꦄꦨꦹꦠꦠꦺꦴ, ꦄꦨꦹꦠꦁ ꦮꦴ ꦮꦕꦤꦁ ꦮꦢꦤꦱꦷꦭꦺꦴ. ꦌꦱꦺꦴꦠꦶ ꦮꦶꦤꦪꦣꦫꦺꦴ. ꦠꦺꦠꦶ ꦱꦸꦠ꧀ꦠꦤ꧀ꦠꦶꦏꦱ꧀ꦱ ꦤꦶꦱ꧀ꦱꦶꦠꦏꦴ, ꦄꦴꦲꦁꦱꦹꦠꦶ ꦱꦩ꧀ꦧꦤ꧀ꦣꦺꦴ. ꦠꦠꦺꦴꦠꦶ ꦏꦭꦲꦮꦝ꧀ꦞꦤꦏꦴꦫꦟꦴ. ꦮꦶꦤꦪꦣꦫꦺꦴ ꦄꦏꦴꦱꦷꦠꦶ ꦱꦩ꧀ꦧꦤ꧀ꦣꦺꦴ.

꧔꧕꧓. ‘‘ꦤ ꦠꦴꦮ ꦨꦶꦤ꧀ꦤꦺꦴ’’ꦠꦶ ꦆꦩꦶꦤꦴ ꦨꦶꦤ꧀ꦤꦺꦴꦠꦶ ꦌꦠ꧀ꦡ ꦠꦥꦕ꧀ꦕꦪꦱ꧀ꦱ ꦄꦮꦱ꧀ꦱꦩ꧀ꦨꦴꦮꦶꦪꦠ꧀ꦡꦺ ꦄꦤꦴꦒꦠꦏꦴꦭꦶꦏꦠꦁ ꦢꦱ꧀ꦱꦺꦠꦶ. ꦠꦩꦺꦮꦠ꧀ꦡꦁ ꦱꦲ ꦈꦥꦩꦴꦪ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦄꦥꦶꦕꦴ’’ꦠꦶꦄꦴꦢꦶ. ꦠꦤ꧀ꦠꦶ ꦱꦱ꧀ꦱꦁ. ‘‘ꦨꦶꦗ꧀ꦗꦶꦱ꧀ꦱꦠꦷ’’ꦠꦶ ꦆꦩꦶꦤꦴ ꦨꦶꦗ꧀ꦗꦶꦱ꧀ꦱꦠꦷꦠꦶ ꦨꦶꦤ꧀ꦤꦺꦴꦠꦶ ꦮꦕꦤꦠ꧀ꦡꦁ ꦢꦱ꧀ꦱꦺꦠꦶ. ꦱꦺꦴ ꦕ ꦑꦺꦴꦠꦶ ꦱꦔ꧀ꦓꦺꦴ. ꦏꦭꦲꦮꦱꦺꦤ ꦨꦶꦗ꧀ꦗꦶꦱ꧀ꦱꦠꦷꦠꦶ ꦱꦩ꧀ꦧꦤ꧀ꦣꦺꦴ. ꦱꦩ꧀ꦨꦩꦄꦠ꧀ꦡꦮꦱꦺꦤꦴꦠꦶ ꦱꦁꦮꦺꦒꦄꦠ꧀ꦡꦮꦱꦺꦤ. ꦱꦩ꧀ꦨꦩꦱꦢ꧀ꦢꦺꦴ ꦲꦶ ꦠꦷꦱꦸ ꦄꦠ꧀ꦡꦺꦱꦸ ꦮꦠ꧀ꦠꦠꦶ ꦒꦴꦫꦮꦺ, ꦨꦷꦠꦶꦪꦁ, ꦱꦁꦮꦺꦒꦺ ꦕꦴꦠꦶ. ꦆꦣ ꦥꦤ ꦱꦁꦮꦺꦒꦺ ꦮꦠ꧀ꦠꦠꦶ. ꦨꦶꦏ꧀ꦑꦸꦱꦔ꧀ꦓꦱ꧀ꦱ ꦨꦶꦤ꧀ꦤꦺ ꦱꦁꦮꦺꦒꦄꦠ꧀ꦡꦮꦱꦺꦤꦴꦠꦶ ꦄꦣꦶꦥ꧀ꦥꦴꦪꦺꦴ. ꦆꦢꦁ ꦲꦺꦛ꧀ꦜꦴ ꦏꦡꦶꦠꦴꦪ ‘‘ꦨꦪꦺ ꦏꦺꦴꦣꦺ ꦥꦱꦁꦱꦴꦪ’’ꦤ꧀ꦠꦶ ꦒꦴꦡꦴꦪ (ꦥꦴꦫꦴ. ꦄꦛ꧀ꦜ. ꧑.꧑꧕) ꦕꦱꦢ꧀ꦢꦺꦤ ꦱꦩ꧀ꦥꦶꦟ꧀ꦝꦶꦠꦁ ꦱꦩ꧀ꦨꦩꦄꦠ꧀ꦡꦁ ꦱꦤ꧀ꦣꦴꦪ ꦮꦸꦠ꧀ꦠꦤ꧀ꦠꦶ ꦢꦛ꧀ꦜꦧ꧀ꦧꦁ. ꦌꦠ꧀ꦡꦴꦠꦶ ‘‘ꦨꦶꦤ꧀ꦤꦺꦴ ꦨꦶꦏ꧀ꦑꦸꦱꦔ꧀ꦓꦺꦴ ꦨꦶꦤ꧀ꦤꦺꦴ ꦨꦶꦏ꧀ꦑꦸꦱꦔ꧀ꦓꦺꦴ’’ꦠꦶ ꦥꦴꦜꦺ. ꦄꦴꦩꦺꦝꦶꦠꦤ꧀ꦠꦶ ꦄꦴ ꦥꦸꦤꦥ꧀ꦥꦸꦤꦁ ꦨꦪꦴꦢꦶꦥꦷꦭ꦳ꦶꦠꦠ꧀ꦠꦴ ꦩꦺꦝꦺꦤ ꦈꦩ꧀ꦩꦴꦢꦺꦤ ꦆꦠꦁ ꦏꦡꦶꦠꦁ ꦄꦴꦩꦺꦝꦶꦠꦁ.

꧔꧕꧔. ꦲꦷꦠꦶ ꦮꦶꦠ꧀ꦡꦴꦫꦺꦴ. ꦨꦒꦮꦴ ꦮꦢꦺꦪ꧀ꦪꦴꦠꦶ ꦱꦩ꧀ꦧꦤ꧀ꦣꦺꦴ. ꦈꦏ꧀ꦑꦶꦥꦤ꧀ꦠꦶ ꦄꦥꦤꦺꦤ꧀ꦠꦷꦠꦶ ꦈꦏ꧀ꦑꦺꦥꦏꦴ. ꦈꦏ꧀ꦑꦶꦠ꧀ꦠꦩꦤꦸꦮꦠ꧀ꦠꦤ꧀ꦠꦷꦠꦶ ꦈꦏ꧀ꦑꦶꦠ꧀ꦠꦴꦤꦸꦮꦠ꧀ꦠꦏꦴ. ꦌꦠꦺꦱꦤ꧀ꦠꦶ ꦈꦏ꧀ꦑꦶꦠ꧀ꦠꦴꦤꦸꦮꦠ꧀ꦠꦏꦴꦤꦁ. ꦥꦸꦤ ꦌꦠꦺꦱꦤ꧀ꦠꦶ ꦈꦏ꧀ꦑꦺꦥꦏꦴꦤꦁ. ꦥꦏ꧀ꦑꦺꦴꦠꦶ ꦱꦑꦴ. ꦠꦤ꧀ꦠꦶꦩꦺꦮꦴꦠꦶ ꦥꦴꦭ꦳ꦶꦩꦺꦮ, ꦧ꧀ꦪꦴꦥꦴꦫꦩꦺꦮ ꦮꦴ.

꧔꧕꧕. ꦪꦺꦴꦠꦶ ꦨꦶꦏ꧀ꦑꦸ. ꦕꦶꦠ꧀ꦠꦁ ꦈꦥ꧀ꦥꦴꦢꦺꦠꦷꦠꦶ ꦱꦩ꧀ꦧꦤ꧀ꦣꦺꦴ. ꦠꦸꦩ꧀ꦲꦺꦠꦶ ꦣꦩ꧀ꦩꦮꦴꦢꦶꦤꦺꦴ ꦱꦤ꧀ꦣꦴꦪ ꦮꦸꦠ꧀ꦠꦁ. ꦏꦶꦁ ꦨꦟꦡꦴꦠꦶ ꦏꦶꦁ ꦮꦕꦤꦁ ꦨꦟꦡ. ꦆꦠꦶ ꦥꦸꦕ꧀ꦖꦶꦠ꧀ꦮꦴꦠꦶ ꦱꦩ꧀ꦧꦤ꧀ꦣꦺꦴ. ꦠꦺꦱꦚ꧀ꦕꦴꦠꦶ ꦣꦩ꧀ꦩꦮꦴꦢꦷꦤꦚ꧀ꦕ. ꦆꦠꦫꦺꦱꦚ꧀ꦕꦴꦠꦶ ꦄꦣꦩ꧀ꦩꦮꦴꦢꦷꦤꦚ꧀ꦕ. ꦆꦩꦺꦠꦶ ꦄꦠ꧀ꦠꦤꦺꦴ ꦥꦏ꧀ꦑꦺ ꦆꦩꦺ ꦨꦶꦏ꧀ꦑꦹ. ꦠꦺꦱꦤ꧀ꦠꦶ ꦄꦣꦩ꧀ꦩꦮꦴꦢꦷꦤꦁ. ‘‘ꦏꦩ꧀ꦩꦁ ꦏꦺꦴꦥꦺꦠꦷ’’ꦠꦶ ‘‘ꦤꦴꦤꦴꦱꦁꦮꦴꦱꦏꦕꦠꦸꦠ꧀ꦡꦺꦴ ꦕꦺ ꦨꦶꦏ꧀ꦑꦮꦺ ꦏꦩ꧀ꦩꦁ ꦏꦫꦺꦪ꧀ꦪ, ꦄꦏꦩ꧀ꦩꦁ, ꦤ ꦕ ꦏꦫꦟꦷꦪ’’ꦤ꧀ꦠꦶ ꦮꦕꦤꦠꦺꦴ (ꦩꦲꦴꦮ. ꧓꧘꧙) ꦏꦩ꧀ꦩꦁ ꦏꦺꦴꦥꦺꦠꦶ. ꦆꦠꦫꦺꦱꦩ꧀ꦥꦷꦠꦶ ꦣꦩ꧀ꦩꦮꦴꦢꦷꦤꦩ꧀ꦥꦶ. ꦣꦩ꧀ꦩꦮꦴꦢꦷꦤꦁ ꦥꦏ꧀ꦑꦺ ꦤꦶꦱꦷꦢꦶꦠ꧀ꦮꦴ ꦄꦣꦩ꧀ꦩꦮꦴꦢꦷꦤꦁ ꦭꦢ꧀ꦣꦶꦁ ꦒꦟ꧀ꦲꦤ꧀ꦠꦺꦴꦥꦶ ꦣꦩ꧀ꦩꦮꦴꦢꦷꦤꦁ ꦤꦴꦤꦴꦱꦁꦮꦴꦱꦏꦺꦴ ꦲꦺꦴꦠꦶꦪꦺꦮ, ꦄꦪꦁ ꦤꦪꦺꦴ ꦮꦸꦠ꧀ꦠꦤꦪꦱ꧀ꦱ ꦄꦠ꧀ꦡꦠꦺꦴ ꦱꦶꦢ꧀ꦣꦺꦴꦠꦶ ꦏꦠ꧀ꦮꦴ ꦆꦣ ꦤ ꦮꦸꦠ꧀ꦠꦺꦴ. ꦌꦮꦤ꧀ꦠꦶꦄꦴꦢꦶ ꦤꦶꦒꦩꦤꦁ. ꦪꦺꦴꦠꦶ ꦨꦶꦏ꧀ꦑꦸ, ꦥꦮꦶꦱꦠꦶ ꦒꦟ꧀ꦲꦴꦠꦷꦠꦶ ꦱꦩ꧀ꦧꦤ꧀ꦣꦺꦴ. ꦤꦶꦱꦶꦤ꧀ꦤꦺꦴ ꦲꦸꦠ꧀ꦮꦴꦠꦶ ꦪꦺꦴꦗꦤꦴ. ꦆꦩꦺꦠꦶ ꦄꦠ꧀ꦠꦤꦺꦴ ꦥꦏ꧀ꦑꦺ ꦆꦩꦺ ꦨꦶꦏ꧀ꦑꦹ. ꦆꦠꦫꦺꦠꦶ ꦥꦫꦥꦏ꧀ꦑꦺ ꦆꦠꦫꦺ ꦨꦶꦏ꧀ꦑꦹ. ꦠꦺꦱꦤ꧀ꦠꦶ ꦣꦩ꧀ꦩꦮꦴꦢꦷꦤꦁ. ꦪꦠ꧀ꦡ ꦠꦠ꧀ꦡ ꦮꦴ ꦥꦤ ꦥꦏ꧀ꦑꦺꦠꦶ ꦪꦱ꧀ꦩꦶꦁ ꦏꦱ꧀ꦩꦶꦁꦕꦶ ꦮꦴ ꦣꦩ꧀ꦩꦮꦴꦢꦷꦤꦁ ꦥꦏ꧀ꦑꦺ. ꦆꦩꦺ ꦣꦩ꧀ꦩꦮꦴꦢꦶꦤꦺꦴꦠꦶ ꦒꦟ꧀ꦲꦴꦠꦷꦠꦶ ꦠꦁꦠꦁꦥꦏ꧀ꦑꦒꦠꦺ ꦨꦶꦏ꧀ꦑꦹ ꦪꦴꦡꦴꦮꦠꦺꦴ ꦮꦴ ꦄꦪꦴꦡꦴꦮꦠꦺꦴ ꦮꦴ ‘‘ꦆꦩꦺ ꦣꦩ꧀ꦩꦮꦴꦢꦶꦤꦺꦴ’’ꦠꦶ ꦒꦟ꧀ꦲꦴꦠꦶ.

꧔꧕꧖. ꦏꦴꦪꦺꦤ ꦏꦠꦁ ꦏꦩ꧀ꦩꦁ ꦏꦴꦪꦏꦩ꧀ꦩꦁ, ꦮꦕꦶꦪꦴ ꦏꦠꦁ ꦏꦩ꧀ꦩꦁ ꦮꦕꦷꦏꦩ꧀ꦩꦁ. ꦠꦠ꧀ꦡ ꦏꦴꦪꦏꦩ꧀ꦩꦁ ꦈꦥꦢꦁꦱꦺꦤ꧀ꦠꦴ ꦨꦶꦏ꧀ꦑꦹ ꦥꦲꦫꦤ꧀ꦠꦴ ꦈꦥꦢꦁꦱꦺꦤ꧀ꦠꦶ. ꦮꦕꦷꦏꦩ꧀ꦩꦁ ꦈꦥꦢꦁꦱꦺꦤ꧀ꦠꦴ ꦨꦶꦏ꧀ꦑꦹ ꦦꦫꦸꦱꦁ ꦮꦢꦤ꧀ꦠꦴ ꦈꦥꦢꦁꦱꦺꦤ꧀ꦠꦶ. ꦠꦺꦤ ꦮꦸꦠ꧀ꦠꦁ ‘‘ꦏꦴꦪꦺꦤ ꦥꦲꦫꦤ꧀ꦠꦴ’’ꦠꦶꦄꦴꦢꦶ. ꦈꦥꦢꦁꦱꦺꦤ꧀ꦠꦷꦠꦶ ꦥꦮꦠ꧀ꦠꦺꦤ꧀ꦠꦶ. ‘‘ꦏꦺꦴꦣꦮꦱꦺꦤꦴ’’ꦠꦶ ꦆꦩꦶꦤꦴ ꦥꦺꦩꦮꦱꦺꦤꦴꦠꦶ ꦄꦠ꧀ꦡꦁ ꦤꦶꦮꦠ꧀ꦠꦺꦠꦶ. ꦄꦣꦩ꧀ꦩꦶꦪꦴꦤꦷꦠꦶ ꦄꦣꦩ꧀ꦩꦺꦤ ꦏꦠ꧀ꦠꦧ꧀ꦧꦴꦤꦶ. ‘‘ꦏꦶꦕ꧀ꦕꦴꦤꦷ’’ꦠꦶ ꦆꦩꦶꦤꦴ ꦆꦪꦥꦕ꧀ꦕꦪꦱ꧀ꦱ ꦱꦫꦹꦥꦁ ꦢꦱ꧀ꦱꦺꦠꦶ. ꦄꦱꦩ꧀ꦩꦺꦴꦢꦶꦏꦴꦠꦶ ꦌꦠ꧀ꦡ ꦪꦏꦴꦫꦭꦺꦴꦥꦺꦴꦠꦶ ꦄꦴꦲ ‘‘ꦄꦱꦩ꧀ꦩꦺꦴꦢꦶꦏꦴꦪꦴ’’ꦠꦶ. ‘‘ꦏꦡꦴꦪꦴ’’ꦠꦶ ꦆꦩꦶꦤꦴ ꦄꦱꦩ꧀ꦩꦺꦴꦢꦁ ꦗꦤꦺꦠꦷꦠꦶ ꦄꦱꦩ꧀ꦩꦺꦴꦢꦶꦏꦴꦠꦶ ꦏꦠ꧀ꦮꦴ ꦟꦶꦏꦥꦕ꧀ꦕꦪꦱ꧀ꦱ ꦱꦫꦹꦥꦁ ꦢꦱ꧀ꦱꦺꦠꦶ. ꦈꦥꦕꦴꦫꦁ ꦩꦸꦚ꧀ꦕꦶꦠ꧀ꦮꦴꦠꦶ ꦌꦠ꧀ꦡ ꦈꦥꦕꦴꦫꦺꦴ ꦤꦴꦩ ꦄꦚ꧀ꦚꦩꦚ꧀ꦚꦁ ꦥꦲꦫꦤ꧀ꦠꦴꦤꦁ ꦲꦠ꧀ꦡꦱ꧀ꦱ ꦥꦴꦥꦸꦟꦤꦛ꧀ꦜꦴꦤꦁ, ꦠꦁ ꦩꦸꦚ꧀ꦕꦶꦠ꧀ꦮꦴꦠꦶ ꦄꦠ꧀ꦡꦺꦴ. ꦄꦴꦱꦤꦤ꧀ꦠꦫꦶꦏꦴꦪꦴꦠꦶ ꦌꦠ꧀ꦡ ꦌꦏꦁ ꦄꦴꦱꦤꦁ ꦄꦤ꧀ꦠꦫꦁ ꦧ꧀ꦪꦮꦲꦶꦠꦁ ꦆꦩꦶꦱ꧀ꦱꦴ ꦤꦶꦱꦶꦤ꧀ꦤꦏꦶꦫꦶꦪꦴꦪꦴꦠꦶ ꦄꦴꦱꦤꦤ꧀ꦠꦫꦶꦏꦴꦠꦶ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦌꦏꦺꦏꦁ ꦄꦴꦱꦤꦁ ꦄꦤ꧀ꦠꦫ’’ꦤ꧀ꦠꦶ. ‘‘ꦏꦠ꧀ꦮꦴ’’ꦠꦶ ꦆꦩꦶꦤꦴ ꦏꦶꦫꦶꦪꦴꦮꦶꦱꦺꦱꦤꦨꦴꦮꦁ ꦢꦱ꧀ꦱꦺꦠꦶ.

꧔꧕꧗-꧘. ꦄꦪꦁ ꦄꦱ꧀ꦱ ꦨꦶꦏ꧀ꦑꦸꦤꦺꦴ ꦄꦣꦶꦥ꧀ꦥꦴꦪꦺꦴ ꦏꦶꦫꦴꦠꦶ ꦪꦺꦴꦗꦤꦴ. ꦌꦠꦺꦠꦶ ꦏꦺꦴꦣꦴꦨꦶꦨꦹꦠꦺ ꦨꦶꦏ꧀ꦑꦹ. ꦨꦒꦮꦴ ꦥꦤ ꦏꦡꦺꦱꦷꦠꦶ ꦱꦩ꧀ꦧꦤ꧀ꦣꦺꦴ. ‘‘ꦄꦤꦠ꧀ꦡꦺꦴ ꦄꦠꦺꦴ’’ꦠꦶ ꦆꦩꦶꦤꦴ ꦄꦤꦠ꧀ꦡꦠꦺꦴꦠꦶ ꦥꦢꦱ꧀ꦱ ꦎꦏꦴꦫꦭꦺꦴꦥꦱꦤ꧀ꦣꦶꦁ ꦢꦱ꧀ꦱꦺꦠꦶ. ꦠꦺꦱꦁ ꦥꦢꦴꦤꦩꦠ꧀ꦡꦁ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦌꦠꦱ꧀ꦩꦴ’’ꦠꦶꦄꦴꦢꦶ. ‘‘ꦄꦡ ꦮꦴ’’ꦠꦶꦄꦴꦢꦶꦤꦴ ‘‘ꦄꦤꦠ꧀ꦡꦢꦺꦴ’’ꦠꦶ ꦮꦠ꧀ꦠꦧ꧀ꦧꦺ ‘‘ꦱꦸꦒꦠꦺꦴ’’ꦠꦶꦄꦴꦢꦷꦱꦸ ꦮꦶꦪ ꦢ-ꦏꦴꦫꦱ꧀ꦱ ꦠ-ꦏꦴꦫꦁ ꦏꦠ꧀ꦮꦴ ꦄꦤꦠ꧀ꦡꦠꦺꦴꦠꦶ ꦮꦸꦠ꧀ꦠꦤ꧀ꦠꦶ ꦢꦱ꧀ꦱꦺꦠꦶ. ꦄꦤꦠ꧀ꦡꦢꦺꦴꦠꦶ ꦄꦤꦠ꧀ꦡꦁ ꦢꦢꦴꦠꦷꦠꦶ ꦄꦤꦠ꧀ꦡꦢꦺꦴ.

꧔꧖꧔. ꦥꦸꦡꦸꦱꦢ꧀ꦢꦺꦴꦠꦶ ꦌꦠ꧀ꦡ ꦥꦸꦡꦸꦱꦢ꧀ꦢꦺꦴ ꦩꦲꦤ꧀ꦠꦥꦫꦶꦪꦴꦪꦺꦴꦠꦶ ꦄꦴꦲ ‘‘ꦩꦲꦴ’’ꦠꦶ. ꦄꦱ꧀ꦱꦴꦠꦶ ꦨꦟ꧀ꦝꦤꦏꦴꦫꦏꦱ꧀ꦱ ꦗꦤꦱ꧀ꦱ. ꦱꦩꦗꦤꦺꦴꦠꦶ ꦌꦠ꧀ꦡ ꦱꦩꦱꦢ꧀ꦢꦺꦴ ꦱꦢꦶꦱꦥꦫꦶꦪꦴꦪꦺꦴꦠꦶ ꦄꦴꦲ ‘‘ꦌꦏꦱꦢꦶꦱꦺꦴ’’ꦠꦶ, ꦠꦸꦭ꧀ꦪꦴꦣꦶꦏꦫꦟꦱꦩꦴꦱꦺꦴꦪꦁ. ꦨꦟ꧀ꦝꦤꦏꦴꦫꦏꦺꦴ ꦄꦪꦁ ꦗꦤꦺꦴꦠꦶ ꦪꦺꦴꦗꦤꦴ. ꦠꦠ꧀ꦡꦴꦠꦶ ꦨꦟ꧀ꦝꦤꦏꦴꦫꦏꦺꦱꦸ ꦗꦤꦺꦱꦸ. ꦄꦚ꧀ꦚꦩ꧀ꦥꦶ ꦌꦏꦁ ꦆꦢꦁ ꦏꦴꦫꦟꦤ꧀ꦠꦶ ꦱꦩ꧀ꦧꦤ꧀ꦣꦺꦴ. ꦤ ꦩꦚ꧀ꦚꦶꦠ꧀ꦡꦴꦠꦶ ꦏꦺꦴꦕꦶ ꦌꦏꦺꦴꦥꦶ ꦤ ꦩꦚ꧀ꦚꦶꦠ꧀ꦡꦴꦠꦶ ꦪꦺꦴꦗꦤꦴ. ꦆꦩꦶꦤꦴ ꦄꦩꦚ꧀ꦚꦫꦸꦤ꧀ꦠꦶ ꦌꦠ꧀ꦡ ꦄꦴꦮꦶꦨꦠ꧀ꦠꦶꦪꦴ ‘‘ꦫꦸ’’ꦤ꧀ꦠꦶ ꦄꦴꦢꦺꦱꦺꦴ ꦢꦱ꧀ꦱꦶꦠꦺꦴ.

ꦥꦫꦶꦩꦸꦛ꧀ꦜꦴꦠꦶ ꦥꦫꦶꦩꦸꦛ꧀ꦜꦴ ꦱꦠꦶ ꦌꦠꦺꦱꦤ꧀ꦠꦶ ꦥꦫꦶꦩꦸꦛ꧀ꦜꦴꦠꦶ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦥꦫꦶꦩꦸꦛ꧀ꦜꦱꦠꦶꦤꦺꦴ’’ꦠꦶ. ꦄꦛ꧀ꦜꦏ꧀ꦑꦫꦒꦴꦡꦴꦪꦁ ‘‘ꦥꦚ꧀ꦕꦩꦁ ꦭꦓꦸ ꦱꦧ꧀ꦧꦠ꧀ꦡꦴ’’ꦠꦶ ꦮꦸꦠ꧀ꦠꦠ꧀ꦠꦴ ꦥꦚ꧀ꦕꦩꦱ꧀ꦱ ꦫꦴꦏꦴꦫꦱ꧀ꦱ ꦫꦱ꧀ꦱꦺꦴ ꦲꦺꦴꦠꦶ. ꦠꦺꦤ ꦮꦸꦠ꧀ꦠꦁ ‘‘ꦫꦴꦏꦴꦫꦱ꧀ꦱ ꦫꦱ꧀ꦱꦴꦢꦺꦱꦺꦴ ꦏꦠꦺꦴ’’ꦠꦶ. ꦏꦡꦁ ꦨꦴꦟꦶꦤꦺꦴꦠꦶ ꦮꦴꦕꦁ ꦨꦴꦟꦶꦤꦺꦴ. ꦩꦸꦑꦴꦪꦴꦩꦤ꧀ꦠꦶ ꦌꦠ꧀ꦡ ꦄꦴꦪꦴꦩꦱꦢ꧀ꦢꦺꦴ ꦮꦶꦠ꧀ꦡꦴꦫꦥꦫꦶꦪꦴꦪꦺꦴ, ꦮꦶꦠ꧀ꦡꦴꦫꦺꦴ ꦕ ꦤꦴꦩ ꦥꦱꦴꦫꦟꦤ꧀ꦠꦶ ꦄꦴꦲ ‘‘ꦥꦱꦴꦫꦺꦠꦸ’’ꦤ꧀ꦠꦶ. ꦱꦩ꧀ꦥꦢꦴꦤꦠ꧀ꦡꦗꦺꦴꦠꦏꦺꦤ ꦠꦸꦁꦥꦕ꧀ꦕꦪꦺꦤ ꦱꦩ꧀ꦥꦢꦴꦤꦠ꧀ꦡꦺ ꦈꦥꦪꦺꦴꦒꦮꦕꦤꦤ꧀ꦠꦶ ꦢꦱ꧀ꦱꦺꦠꦶ. ꦤꦷꦠꦴꦠꦶ ꦏꦩ꧀ꦩꦮꦴꦕꦏꦱ꧀ꦱ ꦏꦶꦠꦱ꧀ꦱ ꦄꦥ꧀ꦥꦣꦴꦤꦏꦩ꧀ꦩꦁ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦆꦩꦁ ꦤꦶꦭ꧀ꦭꦗ꧀ꦗꦨꦴꦮ’’ꦤ꧀ꦠꦶ. ꦢ꧀ꦮꦶꦏꦩ꧀ꦩꦏꦣꦴꦠꦸꦨꦴꦮꦠꦺꦴ ‘‘ꦄꦠ꧀ꦠꦤꦺꦴ’’ꦠꦶ ꦥꦣꦴꦤꦏꦩ꧀ꦩꦩ꧀ꦥꦶ ꦄꦗ꧀ꦙꦴꦲꦫꦶꦠꦧ꧀ꦧꦁ. ꦠꦤ꧀ꦠꦶ ꦏꦭꦲꦁ. ‘‘ꦗꦴꦤ’’ꦤ꧀ꦠꦶ ꦥꦢꦺꦤ ‘‘ꦮꦶꦢꦹ’’ꦠꦶ ꦥꦢꦱ꧀ꦱ ꦄꦠ꧀ꦡꦚ꧀ꦕ ꦮꦴꦏ꧀ꦪꦚ꧀ꦕ ꦢꦱ꧀ꦱꦺꦠꦶ. ꦮꦶꦢꦤ꧀ꦠꦶ ꦗꦴꦤꦤ꧀ꦠꦷꦠꦶ ꦮꦶꦢꦹꦠꦶ ꦮꦕꦤꦠ꧀ꦡꦺꦴ ꦏꦴꦠꦧ꧀ꦧꦺꦴꦠꦶ ꦄꦣꦶꦥ꧀ꦥꦴꦪꦺꦴ. ꦱꦴꦢꦷꦤꦮꦺꦴꦠꦶꦄꦴꦢꦷꦤꦮꦺꦤ ꦢꦺꦴꦱꦺꦤ ꦱꦲ ꦥꦮꦠ꧀ꦠꦺꦴ. ꦄꦪꦤ꧀ꦠꦶ ꦏꦭꦲꦺꦴ.

ꦪꦺ ꦕ ꦠꦁ ꦈꦥꦤꦪ꧀ꦲꦤ꧀ꦠꦷꦠꦶ ꦌꦠ꧀ꦡ ꦠꦱꦢ꧀ꦢꦱ꧀ꦱ ꦮꦶꦱꦪꦁ ꦢꦱ꧀ꦱꦺꦠꦸꦁ ꦮꦸꦠ꧀ꦠꦁ ‘‘ꦄꦴꦓꦴꦠ’’ꦤ꧀ꦠꦶ. ꦪꦺꦠꦶ ꦗꦤꦴ. ꦈꦥꦤꦪ꧀ꦲꦤ꧀ꦠꦶ ꦈꦥꦤꦲꦤ꧀ꦠꦶ ꦧꦤ꧀ꦣꦤ꧀ꦠꦶ. ꦱꦤꦤ꧀ꦠꦤꦺꦴꦠꦶ ꦌꦠ꧀ꦡ ꦱꦤꦤ꧀ꦠꦤꦱꦢ꧀ꦢꦺꦴ ꦥꦸꦫꦴꦟꦥꦫꦶꦪꦴꦪꦺꦴꦠꦶ ꦄꦴꦲ ‘‘ꦥꦺꦴꦫꦴꦟꦺꦴ’’ꦠꦶ.

‘‘ꦄꦚ꧀ꦚꦺ’’ꦠꦶ ꦆꦩꦶꦤꦴ ꦥꦫꦺꦠꦶ ꦌꦠ꧀ꦡ ꦥꦫꦱꦢ꧀ꦢꦱ꧀ꦱ ꦥꦕ꧀ꦖꦴꦨꦴꦒꦠ꧀ꦡꦴꦢꦪꦺꦴ ꦤꦶꦮꦴꦫꦺꦠꦶ. ꦩꦪꦩꦺꦠ꧀ꦡ ꦪꦩꦴꦩꦱꦺꦠꦶ ꦌꦠ꧀ꦡ ꦌꦠꦱꦢ꧀ꦢꦱ꧀ꦱ ꦮꦶꦱꦪꦁ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦱꦔ꧀ꦓꦩꦗ꧀ꦙꦺ’’ꦠꦶ. ꦪꦩꦸꦣꦴꦠꦸ ꦈꦥꦪꦩꦤꦠ꧀ꦡꦺꦴ ꦱꦺꦏꦴꦫꦺꦴ ꦤꦶꦥꦴꦠꦩꦠ꧀ꦠꦺꦴꦠꦶ ꦄꦴꦲ ‘‘ꦈꦥꦪꦩꦴꦩꦴ’’ꦠꦶ. ‘‘ꦱꦠꦠꦁ ꦱꦩꦶꦠꦁ ꦩꦕ꧀ꦕꦸꦱꦤ꧀ꦠꦶꦏꦁ ꦒꦕ꧀ꦖꦴꦩꦴ’’ꦠꦶ ꦆꦩꦶꦤꦴ ‘‘ꦤ ꦗꦴꦤꦤ꧀ꦠꦷ’’ꦠꦶ ꦥꦢꦱ꧀ꦱ ꦄꦴꦏꦴꦫꦁ ꦢꦱ꧀ꦱꦺꦠꦶ. ꦠꦠ꧀ꦡꦴꦠꦶ ꦩꦲꦴꦗꦤꦏꦴꦪꦺ ꦪꦺ ꦥꦟ꧀ꦝꦶꦠꦴꦠꦶ ꦪꦺꦴꦗꦤꦴ. ꦌꦮꦁ ꦲꦷꦠꦶ ꦌꦮꦩꦺꦮ. ꦗꦴꦤꦤ꧀ꦠꦴ ꦠꦺ ꦥꦟ꧀ꦝꦶꦠꦴ ꦥꦛꦶꦥꦗ꧀ꦗꦤ꧀ꦠꦷꦠꦶ ꦪꦺꦴꦗꦤꦴ. ꦩꦺꦣꦤ꧀ꦠꦴ ꦲꦶꦁꦱꦤ꧀ꦠꦴ ꦒꦕ꧀ꦖꦤ꧀ꦠꦶ ꦥꦮꦠ꧀ꦠꦤ꧀ꦠꦷꦠꦶ ꦩꦺꦣꦒꦴ ꦏꦭꦲꦴ. ꦏꦺꦕꦶ ꦩꦺꦣꦣꦴꦠꦸꦠꦺꦴ ꦟ꧀ꦮꦸꦥꦕ꧀ꦕꦪꦁ ꦮꦢꦤ꧀ꦠꦶ, ꦠꦺꦱꦁ ꦩꦠꦺꦤ ꦩꦺꦣꦏꦴꦠꦶ ꦥꦜꦩꦏ꧀ꦑꦫꦺꦤ ꦥꦴꦜꦺꦴ ꦨꦮꦺꦪ꧀ꦪ.

ꦠꦺꦱꦩ꧀ꦥꦷꦠꦶ ꦧ꧀ꦫꦲ꧀ꦩꦢꦠ꧀ꦠꦢꦷꦓꦴꦮꦸꦏꦸꦩꦴꦫꦴꦤꦩ꧀ꦥꦶ. ꦱꦔ꧀ꦒꦠꦷꦠꦶ ꦱꦩꦴꦒꦩꦺꦴ. ꦮꦺꦴꦠꦶ ꦠꦸꦩ꧀ꦲꦴꦏꦁ. ꦪꦺꦱꦁ ꦠꦸꦩ꧀ꦲꦴꦏꦁ ꦤꦺꦮ ꦩꦴꦠꦴꦥꦶꦠꦹꦤꦁ ꦄꦛ꧀ꦜꦷꦤꦶ ꦖꦶꦤ꧀ꦤꦴꦤꦶ, ꦤ ꦥꦴꦟꦴ ꦲꦠꦴ, ꦤ ꦒꦮꦱ꧀ꦱꦣꦤꦴꦤꦶ ꦲꦛꦴꦤꦶ. ꦠꦺꦱꦁ ꦠꦸꦩ꧀ꦲꦴꦏꦁ ꦏꦱ꧀ꦩꦴ ꦱꦔ꧀ꦒꦠꦶ ꦤ ꦲꦺꦴꦠꦷꦠꦶ ꦪꦺꦴꦗꦤꦴ.

ꦱꦧ꧀ꦧꦴꦤꦶ ꦥꦫꦶꦱ꧀ꦱꦪꦴꦤꦷꦠꦶ ꦌꦠ꧀ꦡ ꦱꦧ꧀ꦧꦴꦤꦷꦠꦶ ꦮꦸꦠ꧀ꦠꦏꦴꦫꦟꦚ꧀ꦕ ꦭꦶꦔ꧀ꦒꦮꦶꦥꦭ꧀ꦭꦴꦱꦚ꧀ꦕ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦥꦴꦏꦛꦥꦫꦶꦱ꧀ꦱꦪꦺ ꦕ ꦥꦛꦶꦕ꧀ꦖꦤ꧀ꦤꦥꦫꦶꦱ꧀ꦱꦪꦺ ꦕꦴ’’ꦠꦶ. ‘‘ꦄꦨꦶꦨꦮꦶꦠ꧀ꦮꦴ’’ꦠꦶ ꦆꦩꦶꦤꦴ ꦄꦨꦶꦨꦸꦪ꧀ꦪꦴꦠꦶ ꦥꦢꦱ꧀ꦱ ꦠ꧀ꦮꦴꦥꦕ꧀ꦕꦪꦤ꧀ꦠꦨꦴꦮꦁ ꦢꦱ꧀ꦱꦺꦠꦶ. ꦠꦺꦤꦴꦠꦶ ꦤꦶꦥꦏꦺꦤ ꦱꦲꦴꦪꦺꦤ.

ꦫꦴꦗꦴꦮꦴꦠꦶ ꦌꦠ꧀ꦡ ꦫꦴꦗꦴ ꦆꦮꦴꦠꦶ ꦥꦢꦮꦶꦨꦴꦒꦁ ꦏꦠ꧀ꦮꦴ ꦫꦴꦗꦱꦢ꧀ꦢꦱ꧀ꦱ ꦈꦥꦭꦏ꧀ꦑꦟꦮꦱꦺꦤ ꦩꦲꦴꦗꦤꦏ, ꦄꦫꦶꦤ꧀ꦢꦩꦫꦴꦗꦴꦤꦺꦴ ꦕ ꦆꦮꦱꦢ꧀ꦢꦱ꧀ꦱ ꦎꦥꦩ꧀ꦩꦠ꧀ꦡꦗꦺꦴꦠꦏꦚ꧀ꦕ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦪꦡꦴ’’ꦠꦶꦄꦴꦢꦶ. ꦫꦛ꧀ꦜꦮꦶꦗꦶꦠꦱꦢ꧀ꦢꦴ ꦄꦚ꧀ꦚꦩꦚ꧀ꦚꦥꦫꦶꦪꦴꦪꦴ. ꦮꦶꦱꦺꦱꦤꦮꦶꦱꦺꦱ꧀ꦪꦴꦤꦁ ꦏꦴꦩꦴꦕꦴꦫꦠꦺꦴ ꦒꦩ꧀ꦪꦩꦴꦤꦠ꧀ꦠꦴ ꦮꦸꦠ꧀ꦠꦁ ‘‘ꦮꦶꦗꦶꦠꦁ ꦫꦛ꧀ꦜ’’ꦤ꧀ꦠꦶ. ‘‘ꦩꦴꦠꦔ꧀ꦒꦺꦴ ꦄꦫꦚ꧀ꦚꦺ ꦤꦴꦒꦺꦴ ꦆꦮꦴ’’ꦠꦶ ꦆꦩꦶꦤꦴ ꦥꦢꦮꦶꦨꦴꦒꦁ ꦢꦱ꧀ꦱꦺꦠꦶ. ꦠꦺꦱꦁ ꦥꦢꦴꦤꦁ ꦄꦠ꧀ꦡꦁ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦩꦴꦠꦔ꧀ꦒꦺꦴꦠꦶ ꦲꦠ꧀ꦡꦷ ꦮꦸꦕ꧀ꦕꦠꦷ’’ꦠꦶꦄꦴꦢꦶ. ‘‘ꦲꦠ꧀ꦡꦷ ꦮꦸꦕ꧀ꦕꦠꦷ’’ꦠꦶ ꦆꦩꦶꦤꦴ ꦩꦲꦤ꧀ꦠꦺꦴ ꦄꦔ꧀ꦒꦺꦴ ꦱꦫꦷꦫꦩꦺꦠꦱ꧀ꦱꦴꦠꦶ ꦩꦴꦠꦔ꧀ꦒꦺꦴꦠꦶ ꦮꦕꦤꦠ꧀ꦡꦺꦤ ꦲꦠ꧀ꦡꦷ ꦩꦴꦠꦔ꧀ꦒꦺꦴ ꦤꦴꦩꦴꦠꦶ ꦢꦱ꧀ꦱꦺꦠꦶ. ꦩꦲꦤ꧀ꦠꦱꦢ꧀ꦢꦱ꧀ꦱ ꦩꦴꦠꦴꦢꦺꦱꦺꦴ. ꦤꦴꦒꦱꦢ꧀ꦢꦺꦴ ꦈꦫꦒꦺ ꦕ ꦲꦠ꧀ꦡꦶꦩ꧀ꦲꦶ ꦕ ꦤꦴꦒꦫꦸꦏ꧀ꦑꦺ ꦕ ꦈꦠ꧀ꦠꦩꦺ ꦕ ꦤꦴꦩꦥꦚ꧀ꦚꦠ꧀ꦠꦶꦪꦚ꧀ꦕꦴꦠꦶ ꦥꦚ꧀ꦕꦱꦸ ꦄꦠ꧀ꦡꦺꦱꦸ ꦮꦠ꧀ꦠꦠꦶ, ꦆꦣ ꦈꦠ꧀ꦠꦩꦠ꧀ꦡꦺꦠꦶ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦤꦴꦒꦺꦴꦠꦶ ꦩꦲꦤ꧀ꦠꦴꦣꦶꦮꦕꦤꦩꦺꦠ’’ꦤ꧀ꦠꦶ. ꦩꦴꦠꦔ꧀ꦒꦫꦚ꧀ꦚꦺꦮꦴꦠꦶ ꦌꦠ꧀ꦡ ꦆꦮꦱꦢ꧀ꦢꦱ꧀ꦱ ꦎꦥꦩ꧀ꦩꦠ꧀ꦡꦗꦺꦴꦠꦏꦨꦴꦮꦁ ꦢꦱ꧀ꦱꦺꦠ꧀ꦮꦴ ꦄꦠ꧀ꦡꦪꦺꦴꦗꦤꦁ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦪꦡꦴ ꦲꦷ’’ꦠꦶꦄꦴꦢꦶ. ‘‘ꦪꦡꦴ ꦕ ꦥꦴꦭꦶꦭꦺꦪ꧀ꦪꦏꦺꦴ’’ꦠꦶ ꦆꦩꦶꦤꦴ ꦩꦴꦠꦔ꧀ꦒꦤꦴꦒꦱ꧀ꦱ ꦱꦫꦹꦥꦁ ꦈꦥꦭꦏ꧀ꦑꦟꦺꦤ ꦢꦱ꧀ꦱꦺꦠꦶ.