꧕. ꦥꦴꦛꦶꦢꦺꦱꦤꦷꦪꦱꦶꦏ꧀ꦑꦴꦥꦢ-ꦄꦠ꧀ꦡꦪꦺꦴꦗꦤꦴ

ꦑꦸꦢ꧀ꦢꦏꦴꦤꦁ ꦄꦤꦤ꧀ꦠꦫꦴ ꦥꦴꦛꦶꦢꦺꦱꦤꦷꦪꦴ ꦤꦴꦩ ꦄꦛ꧀ꦜ ꦪꦺ ꦣꦩ꧀ꦩꦴ ꦱꦔ꧀ꦑꦺꦥꦺꦤꦺꦮ ꦱꦔ꧀ꦒꦲꦁ ꦄꦴꦫꦹꦭ꦳꧀ꦲꦴ ꦱꦔ꧀ꦒꦷꦠꦶꦏꦴꦫꦺꦲꦶ, ꦠꦺꦱꦁ ꦄꦛ꧀ꦜꦤ꧀ꦤꦁ ꦥꦴꦛꦶꦢꦺꦱꦤꦷꦪꦤꦴꦩꦏꦴꦤꦁ ꦣꦩ꧀ꦩꦴꦤꦁ ꦱꦔ꧀ꦑꦺꦥꦺꦤꦺꦮ ꦌꦱꦴ ꦮꦟ꧀ꦟꦤꦴ ꦥꦮꦠ꧀ꦠꦠꦺꦠꦶ ꦪꦺꦴꦗꦤꦴ.

꧑꧒꧒꧘. ꦪꦴꦤꦶ ꦱꦧ꧀ꦧꦶꦠꦺꦭꦴꦢꦷꦤꦷꦠꦶ ꦱꦩ꧀ꦧꦤ꧀ꦣꦺꦴ. ꦲꦷꦠꦶ ꦮꦶꦠ꧀ꦡꦴꦫꦺꦴ. ꦌꦠ꧀ꦡꦴꦠꦶ ꦄꦛ꧀ꦜꦱꦸ ꦥꦴꦛꦶꦢꦺꦱꦤꦷꦪꦺꦱꦸ. ꦥꦴꦭ꦳ꦶꦮꦶꦤꦶꦩꦸꦠ꧀ꦠꦏꦺꦱꦹꦠꦶ ꦥꦴꦭ꦳ꦶꦠꦺꦴ ꦮꦶꦤꦶꦩꦸꦠ꧀ꦠꦏꦺꦱꦸ. ꦱꦧ꧀ꦧꦺꦱꦹꦠꦶ ꦄꦑꦶꦭꦺꦱꦸ ꦱꦧ꧀ꦧꦶꦠꦺꦭꦴꦢꦷꦱꦹꦠꦶ.

ꦨꦶꦏ꧀ꦑꦸꦤꦶꦮꦶꦨꦔ꧀ꦒꦺ ꦥꦴꦛꦶꦢꦺꦱꦤꦷꦪꦮꦟ꧀ꦟꦤꦴꦪ ꦪꦺꦴꦗꦤꦴ ꦱꦩꦠ꧀ꦠꦴ.

ꦥꦤꦴꦠꦶ ꦥꦏ꧀ꦑꦤ꧀ꦠꦫꦗꦺꦴꦠꦏꦺꦴ. ꦪꦺ ꦣꦩ꧀ꦩꦴ ꦈꦢ꧀ꦢꦶꦛ꧀ꦜꦴꦠꦶ ꦱꦩ꧀ꦧꦤ꧀ꦣꦺꦴ. ꦠꦺꦱꦤ꧀ꦠꦶ ꦥꦴꦛꦶꦢꦺꦱꦤꦷꦪꦴꦤꦁ. ꦥꦸꦤ ꦠꦺꦱꦤ꧀ꦠꦶ ꦱꦺꦑꦶꦪꦄꦣꦶꦏꦫꦟꦱꦩꦡꦣꦩ꧀ꦩꦴꦤꦁ.

ꦠꦤ꧀ꦠꦶ ꦄꦠ꧀ꦡꦮꦶꦤꦶꦕ꧀ꦖꦪꦁ, ꦮꦶꦢꦹ ꦮꦢꦤ꧀ꦠꦷꦠꦶ ꦱꦩ꧀ꦧꦤ꧀ꦣꦺꦴ. ꦪꦏꦴꦫꦺꦴ ꦥꦢꦱꦤ꧀ꦣꦶꦏꦫꦺꦴ. ꦄꦪꦁ ꦥꦤꦺꦠ꧀ꦡ ꦪꦺꦴꦗꦤꦴ – ꦠꦺꦱꦁ ꦥꦴꦛꦶꦢꦺꦱꦤꦷꦪꦴꦤꦁ ꦄꦤꦤ꧀ꦠꦫꦴ ꦪꦺ ꦕ ꦱꦺꦑꦶꦪꦴ ꦥꦚ꧀ꦕꦱꦠ꧀ꦠꦠꦶ ꦪꦺ ꦕ ꦣꦩ꧀ꦩꦴ, ꦕꦱꦢ꧀ꦢꦺꦴ ꦭꦸꦠ꧀ꦠꦤꦶꦢ꧀ꦢꦶꦛ꧀ꦜꦺꦴ, ꦄꦣꦶꦏꦫꦟꦮ꧀ꦲꦪꦴ ꦄꦣꦶꦏꦫꦟꦱꦩꦡꦤꦴꦩꦏꦴ ꦱꦠ꧀ꦠ ꦪꦺ ꦕ ꦣꦩ꧀ꦩꦴ ꦨꦒꦮꦠꦴ ꦈꦢ꧀ꦢꦶꦛ꧀ꦜꦴ, ꦠꦺꦱꦁ ꦱꦺꦑꦶꦪꦄꦣꦶꦏꦫꦟꦱꦩꦡꦣꦩ꧀ꦩꦴꦤꦁ ꦪꦺꦴ ꦄꦠ꧀ꦡꦮꦶꦤꦶꦕ꧀ꦖꦪꦺꦴ ꦮꦶꦨꦔ꧀ꦒꦺ ꦩꦪꦴ ꦮꦸꦠ꧀ꦠꦺꦴ, ꦠꦴꦢꦶꦱꦩꦺꦮ ꦠꦁ ꦄꦠ꧀ꦡꦮꦶꦤꦶꦕ꧀ꦖꦪꦁ ꦨꦶꦏ꧀ꦑꦸꦤꦷꦤꦁ ꦮꦶꦨꦔ꧀ꦒꦺꦥꦶ ꦮꦶꦢꦹ ꦮꦢꦤ꧀ꦠꦶ ꦪꦱ꧀ꦩꦴ, ꦠꦱ꧀ꦩꦴ ꦠꦺꦱꦁ ꦣꦩ꧀ꦩꦴꦤꦁ ꦱꦺꦑꦶꦪꦄꦣꦶꦏꦫꦟꦱꦩꦡꦣꦩ꧀ꦩꦴꦤꦁ ꦪꦴ ꦄꦠ꧀ꦡꦮꦟ꧀ꦟꦤꦴ ꦠꦠ꧀ꦡ ꦩꦲꦴꦮꦶꦨꦔ꧀ꦒꦺ ꦮꦶꦱꦸꦁ ꦩꦪꦴ ꦤ ꦮꦸꦠ꧀ꦠꦴ. ꦆꦩꦴ ꦄꦠ꧀ꦡꦮꦟ꧀ꦟꦤꦴ ꦆꦣꦴꦥꦶ ꦨꦶꦏ꧀ꦑꦸꦤꦷꦤꦁ ꦮꦶꦨꦔ꧀ꦒꦺꦥꦶ, ꦥꦶꦱꦢ꧀ꦢꦺꦴ ꦭꦸꦠ꧀ꦠꦤꦶꦢ꧀ꦢꦶꦛ꧀ꦜꦺꦴ, ꦩꦪꦴ ꦤ ꦮꦸꦠ꧀ꦠꦴꦪꦺꦮꦴꦠꦶ. ꦤꦏꦴꦫꦺꦴ ꦢ꧀ꦮꦷꦱꦸ ꦏꦶꦫꦶꦪꦴꦱꦸ ꦪꦺꦴꦗꦺꦠꦧ꧀ꦧꦺꦴ.

‘‘ꦱꦧ꧀ꦧꦴꦱꦮꦥꦲꦁ ꦩꦒ꧀ꦒꦁ, ꦥꦸꦚ꧀ꦚꦏꦩ꧀ꦩꦺꦤ ꦕꦶꦩꦶꦤꦴ;

ꦈꦥ꧀ꦥꦴꦢꦺꦠ꧀ꦮꦴ ꦱꦱꦤ꧀ꦠꦴꦤꦺ, ꦱꦠ꧀ꦠꦴ ꦥꦱ꧀ꦱꦤ꧀ꦠꦸ ꦤꦶꦧ꧀ꦧꦸꦠꦶ’’ꦤ꧀ꦠꦶ.

ꦄꦪꦁ ꦒꦴꦡꦴ ꦌꦠꦫꦲꦶ ꦥꦺꦴꦠ꧀ꦡꦏꦺꦱꦸ ꦤꦠ꧀ꦡꦶ, ꦛꦷꦏꦴꦱꦸ ꦥꦤ ꦄꦠ꧀ꦡꦶ. ꦠꦱ꧀ꦩꦴ ꦌꦮꦩꦺꦠ꧀ꦡ ꦪꦺꦴꦗꦤꦴ ꦮꦺꦢꦶꦠꦧ꧀ꦧꦴ – ꦆꦩꦶꦤꦴ ꦥꦸꦚ꧀ꦚꦏꦩ꧀ꦩꦺꦤ ꦕ ꦮꦶꦨꦔ꧀ꦒꦮꦟ꧀ꦟꦤꦴꦪ ꦏꦠꦺꦤ ꦆꦩꦶꦤꦴ ꦥꦸꦚ꧀ꦚꦏꦩ꧀ꦩꦺꦤ ꦕ ꦄꦚ꧀ꦚꦺꦤ ꦥꦸꦚ꧀ꦚꦏꦩ꧀ꦩꦺꦤ ꦕ. ꦕꦱꦢ꧀ꦢꦺꦴ ꦲꦶ ꦄꦮꦸꦠ꧀ꦠꦱꦩ꧀ꦥꦶꦟ꧀ꦝꦤꦠ꧀ꦡꦺꦴ. ꦱꦠ꧀ꦠꦴ ꦱꦧ꧀ꦧꦺ ꦱꦠ꧀ꦠꦴ ꦱꦧ꧀ꦧꦴꦱꦮꦥꦲꦁ ꦱꦧ꧀ꦧꦺꦱꦁ ꦄꦴꦱꦮꦴꦤꦁ ꦮꦶꦓꦴꦠꦏꦁ ꦩꦒ꧀ꦒꦁ ꦄꦫꦲꦠ꧀ꦠꦩꦒ꧀ꦒꦁ ꦱꦱꦤ꧀ꦠꦴꦤꦺ ꦄꦠ꧀ꦠꦤꦺꦴ ꦤꦶꦪꦏꦗ꧀ꦙꦠ꧀ꦠꦺ ꦈꦥ꧀ꦥꦴꦢꦺꦠ꧀ꦮꦴ ꦗꦤꦺꦠ꧀ꦮꦴ ꦤꦶꦧ꧀ꦧꦸꦠꦶꦁ ꦑꦤ꧀ꦣꦥꦫꦶꦤꦶꦧ꧀ꦧꦴꦤꦁ ꦚꦴꦟꦴꦭꦺꦴꦕꦤꦺꦤ ꦥꦱ꧀ꦱꦤ꧀ꦠꦹꦠꦶ.

ꦆꦠꦶ ꦱꦩꦤ꧀ꦠꦥꦴꦱꦴꦢꦶꦏꦴꦪ ꦮꦶꦤꦪꦱꦁꦮꦟ꧀ꦟꦤꦴꦪ

ꦨꦶꦏ꧀ꦑꦸꦤꦶꦮꦶꦨꦔ꧀ꦒꦮꦟ꧀ꦟꦤꦴꦪ

ꦪꦺꦴꦗꦤꦴ ꦱꦩꦠ꧀ꦠꦴ.

ꦗꦴꦢꦶꦭꦚ꧀ꦖꦶꦠꦤꦴꦩꦺꦤ, ꦤꦺꦏꦴꦤꦁ ꦮꦴꦕꦶꦠꦺꦴ ꦩꦪꦴ;

ꦨꦶꦏ꧀ꦑꦸꦤꦷꦤꦁ ꦮꦶꦨꦔ꧀ꦒꦱ꧀ꦱ, ꦱꦩꦠ꧀ꦠꦺꦴ ꦪꦺꦴꦗꦤꦴꦤꦪꦺꦴꦠꦶ.

ꦤꦩꦺꦴ ꦠꦱ꧀ꦱ ꦨꦒꦮꦠꦺꦴ ꦄꦫꦲꦠꦺꦴ ꦱꦩ꧀ꦩꦴꦱꦩ꧀ꦧꦸꦢ꧀ꦣꦱ꧀ꦱ