꧘. ꦱꦲꦣꦩ꧀ꦩꦶꦏꦮꦒ꧀ꦒꦺꦴ

꧑. ꦱꦲꦣꦩ꧀ꦩꦶꦏꦱꦶꦏ꧀ꦑꦴꦥꦢ-ꦄꦠ꧀ꦡꦪꦺꦴꦗꦤꦴ

꧔꧓꧔. ꦱꦲꦣꦩ꧀ꦩꦶꦏꦮꦒ꧀ꦒꦱ꧀ꦱ ꦥꦜꦩꦺ ꦪꦤ꧀ꦠꦶ ꦪꦁ ꦥꦚ꧀ꦚꦠ꧀ꦠꦁ. ‘‘ꦱꦶꦏ꧀ꦑꦩꦴꦤꦺꦤꦴ’’ꦠꦶ ꦌꦠ꧀ꦡ ꦩꦴꦤꦥꦕ꧀ꦕꦪꦱ꧀ꦱ ꦄꦤꦴꦒꦠꦠ꧀ꦡꦨꦴꦮꦁ ꦢꦱ꧀ꦱꦺꦠꦸꦁ ꦮꦸꦠ꧀ꦠꦁ ‘‘ꦱꦶꦏ꧀ꦑꦶꦠꦸꦏꦴꦩꦺꦤꦴ’’ꦠꦶ. ‘‘ꦱꦶꦏ꧀ꦑꦩꦴꦤꦺꦤꦴ’’ꦠꦶꦥꦢꦁ ‘‘ꦨꦶꦏ꧀ꦑꦸꦤꦴ’’ꦠꦶꦥꦢꦺ ꦌꦮ ꦤ ꦏꦺꦮꦭꦁ ꦏꦴꦫꦏꦮꦶꦱꦺꦱꦤꦁ ꦲꦺꦴꦠꦶ, ꦄꦡ ꦑꦺꦴ ‘‘ꦄꦚ꧀ꦚꦴꦠꦧ꧀ꦧ’’ꦤ꧀ꦠꦶꦄꦴꦢꦶꦥꦢꦺꦱꦸꦥꦶ ꦏꦶꦫꦶꦪꦴꦮꦶꦱꦺꦱꦤꦁ ꦲꦺꦴꦠꦷꦠꦶ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦲꦸꦠ꧀ꦮꦴ’’ꦠꦶ. ꦥꦢꦠ꧀ꦡꦠꦺꦴꦠꦶ ꦥꦢꦠꦺꦴ ꦕ ꦄꦠ꧀ꦡꦠꦺꦴ ꦕ, ꦥꦢꦴꦤꦁ ꦄꦠ꧀ꦡꦠꦺꦴ ꦮꦴꦠꦶ. ꦥꦜꦩꦁ.

꧒. ꦮꦶꦭꦺꦑꦤꦱꦶꦏ꧀ꦑꦴꦥꦢꦁ

꧔꧓꧘. ꦢꦸꦠꦶꦪꦺ ꦮꦶꦤꦪꦺ ꦥꦛꦶꦱꦁꦪꦸꦠ꧀ꦠꦴ ꦏꦡꦴ ꦮꦶꦤꦪꦏꦡꦴꦠꦶ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦮꦶꦤꦪꦏꦡꦴ ꦤꦴꦩꦴ’’ꦠꦶꦄꦴꦢꦶ. ꦠꦤ꧀ꦠꦶ ꦮꦶꦤꦪꦏꦡꦁ. ꦥꦢꦨꦴꦗꦤꦺꦤ ꦮꦟ꧀ꦟꦤꦴ ꦮꦶꦤꦪꦱ꧀ꦱ ꦮꦟ꧀ꦟꦺꦴ ꦤꦴꦩꦴꦠꦶ ꦪꦺꦴꦗꦤꦴ. ꦠꦤ꧀ꦠꦶ ꦮꦶꦤꦪꦱ꧀ꦱ ꦮꦟ꧀ꦟꦁ. ꦥꦫꦶꦪꦴꦥꦸꦟꦤꦁ ꦥꦫꦶꦪꦠ꧀ꦠꦶ, ꦮꦶꦤꦪꦱ꧀ꦱ ꦥꦫꦶꦪꦠ꧀ꦠꦶ ꦮꦶꦤꦪꦥꦫꦶꦪꦠ꧀ꦠꦶ, ꦮꦶꦤꦪꦥꦫꦶꦪꦠ꧀ꦠꦶꦱꦔ꧀ꦑꦴꦠꦁ ꦩꦹꦭꦩꦱ꧀ꦱ ꦮꦟ꧀ꦟꦱ꧀ꦱꦴꦠꦶ ꦮꦶꦤꦪꦥꦫꦶꦪꦠ꧀ꦠꦶꦩꦹꦭꦏꦺꦴ, ꦠꦁ. ꦮꦶꦤꦪꦣꦫꦺꦴ ꦭꦨꦠꦷꦠꦶ ꦱꦩ꧀ꦧꦤ꧀ꦣꦺꦴ. ꦲꦷꦠꦶ ꦮꦶꦠ꧀ꦡꦴꦫꦺꦴ. ꦠꦺ ꦱꦧ꧀ꦧꦺ ꦨꦒꦮꦴ ꦨꦴꦱꦠꦷꦠꦶ ꦱꦩ꧀ꦧꦤ꧀ꦣꦺꦴ. ꦲꦷꦠꦶ ꦱꦕ꧀ꦕꦁ.

ꦄꦱ꧀ꦱꦴꦠꦶ ꦮꦶꦤꦪꦣꦫꦱ꧀ꦱ. ꦆꦣꦴꦠꦶ ꦆꦩꦱ꧀ꦩꦶꦁ ꦱꦴꦱꦤꦺ. ꦄꦭꦗ꧀ꦗꦶꦠꦴꦠꦶꦄꦴꦢꦷꦱꦸ ꦏꦫꦟꦠ꧀ꦡꦺ ꦥꦕ꧀ꦕꦠ꧀ꦠꦮꦕꦤꦁ. ꦄꦭꦗ꧀ꦗꦶꦠꦴꦪꦴꦠꦶ ꦲꦶ ꦄꦠ꧀ꦡꦺꦴ. ꦠꦺꦤ ꦮꦸꦠ꧀ꦠꦁ ‘‘ꦏꦡꦁ ꦄꦭꦗ꧀ꦗꦶꦠꦴꦪꦴ’’ꦠꦶꦄꦴꦢꦶ. ꦕꦴꦠꦶ ꦱꦕ꧀ꦕꦁ. ‘‘ꦱꦚ꧀ꦕꦶꦕ꧀ꦕꦴ’’ꦠꦶ ꦥꦢꦁ ꦠꦷꦱꦸ ꦮꦴꦏ꧀ꦪꦺꦱꦸ ꦪꦺꦴꦗꦺꦠꦧ꧀ꦧꦁ. ꦱꦚ꧀ꦕꦶꦕ꧀ꦕ ꦄꦴꦥꦠ꧀ꦠꦶꦁ ꦄꦴꦥꦗ꧀ꦗꦠꦶ, ꦱꦚ꧀ꦕꦶꦕ꧀ꦕ ꦄꦴꦥꦠ꧀ꦠꦶꦁ ꦥꦫꦶꦒꦹꦲꦠꦶ, ꦱꦚ꧀ꦕꦶꦕ꧀ꦕ ꦄꦒꦠꦶꦒꦩꦤꦚ꧀ꦕ ꦒꦕ꧀ꦖꦠꦷꦠꦶ ꦄꦠ꧀ꦡꦺꦴ. ꦩꦤ꧀ꦢꦺꦴꦠꦶ ꦧꦴꦭꦺꦴ. ꦩꦺꦴꦩꦹꦲꦺꦴꦠꦶ ꦄꦠꦶꦱꦩ꧀ꦩꦹꦭ꦳꧀ꦲꦺꦴ. ꦮꦶꦫꦴꦣꦺꦠꦷꦠꦶ ꦮꦶꦫꦗ꧀ꦙꦴꦥꦺꦠꦶ. ꦏꦸꦏ꧀ꦏꦸꦕ꧀ꦕꦺ ꦈꦥ꧀ꦥꦤ꧀ꦤꦺꦠꦶ ‘‘ꦏꦥ꧀ꦥꦠꦶ ꦤꦸ ꦑꦺꦴ, ꦤꦺꦴ’’ꦠꦶ ꦮꦶꦤꦪꦏꦸꦏ꧀ꦏꦸꦕ꧀ꦕꦺ ꦈꦥ꧀ꦥꦤ꧀ꦤꦺ. ꦄꦪꦁ ꦥꦤꦴꦠꦶ ꦄꦪꦁ ꦥꦸꦒ꧀ꦒꦭꦺꦴ ꦥꦤ ꦮꦷꦠꦶꦏ꧀ꦏꦩꦠꦶꦪꦺꦮꦴꦠꦶ ꦱꦩ꧀ꦧꦤ꧀ꦣꦺꦴ. ꦄꦕ꧀ꦖꦩꦁꦱꦺꦤ ꦱꦹꦏꦫꦩꦁꦱꦱ꧀ꦱ ꦮꦟ꧀ꦟꦱꦟ꧀ꦜꦴꦤꦺꦤ ꦱꦢꦶꦱꦠ꧀ꦠꦴ, ꦢꦷꦥꦶꦩꦁꦱꦺꦤ ꦕ ꦩꦶꦒꦩꦁꦱꦱ꧀ꦱ ꦱꦢꦶꦱꦠ꧀ꦠꦴ ꦮꦸꦠ꧀ꦠꦁ ‘‘ꦄꦕ꧀ꦖꦩꦁꦱꦁ ꦱꦹꦏꦫꦩꦁꦱ’’ꦤ꧀ꦠꦶꦄꦴꦢꦶ.

ꦄꦴꦥꦠ꧀ꦠꦶꦁꦕ ꦱꦠꦶꦱꦩ꧀ꦩꦺꦴꦱꦴꦪꦴꦠꦶ ꦌꦠ꧀ꦡ ꦕꦱꦢ꧀ꦢꦺꦴ ꦄꦮꦸꦠ꧀ꦠꦮꦴꦏ꧀ꦪꦱꦩ꧀ꦥꦶꦟ꧀ꦝꦤꦠ꧀ꦡꦺꦴ, ꦏꦠ꧀ꦠꦧ꧀ꦧꦚ꧀ꦕ ꦤ ꦲꦶ ꦏꦫꦺꦴꦠꦷꦠꦶ ꦄꦠ꧀ꦡꦺꦴ. ꦌꦮꦤ꧀ꦠꦶꦄꦴꦢꦶ ꦤꦶꦒꦩꦤꦁ.

ꦌꦮꦁ ꦄꦮꦶꦤꦪꦣꦫꦱ꧀ꦱ ꦢꦺꦴꦱꦁ ꦢꦱ꧀ꦱꦺꦠ꧀ꦮꦴ ꦮꦶꦤꦪꦣꦫꦱ꧀ꦱ ꦒꦸꦟꦁ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦮꦶꦤꦪꦣꦫꦺꦴ ꦥꦤꦴ’’ꦠꦶꦄꦴꦢꦶ. ꦱꦺꦴꦠꦶ ꦮꦶꦤꦪꦣꦫꦺꦴ. ꦲꦷꦠꦶ ꦮꦶꦠ꧀ꦡꦴꦫꦺꦴ. ꦥꦫꦹꦥꦮꦴꦢꦤ꧀ꦠꦶ ꦥꦫꦺꦱꦁ ꦈꦥꦮꦴꦢꦁ. ꦱꦸꦢ꧀ꦣꦤ꧀ꦠꦺꦠꦶ ꦱꦸꦢ꧀ꦣꦱ꧀ꦱ ꦏꦺꦴꦛ꧀ꦜꦴꦱꦺ. ꦠꦠꦺꦴꦠꦶ ꦥꦠꦶꦛ꧀ꦜꦴꦤꦠꦺꦴ ꦥꦫꦤ꧀ꦠꦶ ꦱꦩ꧀ꦧꦤ꧀ꦣꦺꦴ. ꦄꦱ꧀ꦱꦴꦠꦶ ꦮꦶꦤꦪꦣꦫꦱ꧀ꦱ. ꦌꦮꦤ꧀ꦠꦶꦄꦴꦢꦶ ꦤꦶꦒꦩꦤꦁ. ꦄꦱ꧀ꦱꦴꦠꦶ ꦮꦶꦤꦪꦣꦫꦱ꧀ꦱ. ꦏꦸꦏ꧀ꦏꦸꦕ꧀ꦕꦥꦏꦠꦴꦤꦤ꧀ꦠꦶ ꦏꦸꦏ꧀ꦏꦸꦕ꧀ꦕꦺꦤ ꦄꦨꦶꦨꦹꦠꦴꦤꦁ. ꦱꦺꦴꦠꦶ ꦮꦶꦤꦪꦣꦫꦺꦴ. ꦠꦺꦲꦷꦠꦶ ꦏꦸꦏ꧀ꦏꦸꦕ꧀ꦕꦥꦏꦠꦺꦲꦶ. ꦱꦔ꧀ꦓꦩꦗ꧀ꦙꦺ ꦏꦡꦺꦤ꧀ꦠꦱ꧀ꦱ ꦄꦮꦶꦤꦪꦣꦫꦱ꧀ꦱꦴꦠꦶ ꦪꦺꦴꦗꦤꦴ. ꦠꦤ꧀ꦠꦶ ꦨꦪꦁ ꦱꦴꦫꦗ꧀ꦗꦁ.

ꦥꦛꦶꦥꦏ꧀ꦑꦁ, ꦥꦛꦶꦮꦶꦫꦸꦢ꧀ꦣꦁ ꦮꦴ ꦄꦠ꧀ꦡꦪꦤ꧀ꦠꦶ ꦆꦕ꧀ꦖꦤ꧀ꦠꦷꦠꦶ ꦥꦕ꧀ꦕꦠ꧀ꦡꦷꦏꦴ, ꦟ꧀ꦪꦱꦢ꧀ꦢꦺꦴ ꦧꦲꦸꦭꦁ ꦏꦠ꧀ꦠꦴꦨꦶꦣꦴꦪꦏꦺꦴ, ꦄꦠ꧀ꦠꦤꦺꦴ ꦥꦕ꧀ꦕꦠ꧀ꦡꦶꦏꦴ ꦄꦠ꧀ꦠꦥꦕ꧀ꦕꦠ꧀ꦡꦶꦏꦴ. ꦠꦠ꧀ꦡꦴꦠꦶ ꦢꦸꦮꦶꦣꦺꦱꦸ ꦥꦕ꧀ꦕꦠ꧀ꦡꦶꦏꦺꦱꦸ. ꦆꦩꦺꦠꦶ ꦩꦺꦠ꧀ꦠꦶꦪꦨꦸꦩ꧀ꦩꦗꦏꦮꦝ꧀ꦞꦭꦶꦕ꧀ꦖꦮꦶꦤꦺꦴ. ꦄꦚ꧀ꦚꦺꦥꦶ ꦪꦺ ꦮꦴ ꦥꦤ ꦨꦶꦏ꧀ꦑꦹꦠꦶ ꦱꦩ꧀ꦧꦤ꧀ꦣꦺꦴ. ꦄꦫꦶꦛ꧀ꦜꦨꦶꦏ꧀ꦑꦸ ꦕ ꦏꦟ꧀ꦛꦏꦱꦴꦩꦟꦺꦫꦺꦴ ꦕ ꦮꦺꦱꦴꦭꦶꦏꦮꦗ꧀ꦗꦶꦥꦸꦠ꧀ꦠꦏꦴ ꦕ ꦄꦫꦶꦛ꧀ꦜ…ꦥꦺ… ꦮꦗ꧀ꦗꦷꦥꦸꦠ꧀ꦠꦏꦴ. ꦠꦺ ꦕ ꦱꦴꦱꦤꦥꦕ꧀ꦕꦠ꧀ꦡꦶꦏꦴ ꦤꦴꦩꦴꦠꦶ ꦱꦩ꧀ꦧꦤ꧀ꦣꦺꦴ. ꦥꦫꦹꦥꦲꦴꦫꦺꦴ ꦕ ꦄꦚ꧀ꦚꦴꦟꦺꦴ ꦕ ꦏꦔ꧀ꦑꦴꦥꦫꦮꦶꦠꦫꦟꦺꦴ ꦕ ꦥꦫꦹ…ꦥꦺ… ꦮꦶꦠꦫꦟꦴ. ꦠꦺ ꦄꦴꦢꦪꦺꦴ ꦪꦺꦱꦁ ꦮꦴꦢꦴꦤꦤ꧀ꦠꦶ ꦥꦫꦹ…ꦥꦺ… ꦮꦶꦠꦫꦟꦴꦢꦪꦺꦴ. ꦠꦺ ꦌꦮ ꦮꦴꦢꦴ ꦌꦠꦺꦱꦤ꧀ꦠꦶ ꦥꦫꦹ…ꦥꦺ… ꦮꦶꦠꦫꦟꦴꦢꦶꦮꦴꦢꦴ. ꦠꦺ ꦕ ꦱꦴꦱꦤꦥꦕ꧀ꦕꦠ꧀ꦡꦶꦏꦴ ꦤꦴꦩꦴꦠꦶ ꦱꦩ꧀ꦧꦤ꧀ꦣꦺꦴ. ꦄꦧꦸꦢ꧀ꦣꦱꦴꦱꦤꦁ ꦧꦸꦢ꧀ꦣꦱꦴꦱꦤꦤ꧀ꦠꦶ ꦮꦠ꧀ꦮꦴ ꦏꦠꦥꦒ꧀ꦒꦲꦴ ꦩꦲꦴꦱꦔ꧀ꦓꦶꦏꦴꦢꦪꦺꦴ ꦕ ꦱꦴꦱꦤꦥꦕ꧀ꦕꦠ꧀ꦡꦶꦏꦴ ꦤꦴꦩꦴꦠꦶ ꦪꦺꦴꦗꦤꦴ. ꦏꦔ꧀ꦑꦴꦥꦫꦮꦶꦠꦫꦟꦴꦢꦷꦠꦶ ꦌꦠ꧀ꦡ ꦄꦴꦢꦶꦱꦢ꧀ꦢꦺꦤ ꦏꦡꦴꦮꦠ꧀ꦡꦸꦥꦏꦫꦟꦺ ꦄꦴꦒꦠꦴ ꦮꦴꦢꦴ ꦱꦔ꧀ꦒꦪ꧀ꦲꦤ꧀ꦠꦶ. ꦩꦲꦴꦱꦔ꧀ꦓꦶꦏꦴꦢꦪꦺꦴꦠꦶ ꦌꦠ꧀ꦡ ꦄꦴꦢꦶꦱꦢ꧀ꦢꦺꦤ ꦢꦷꦥꦮꦁꦱꦺ ꦄꦴꦒꦠꦴ ꦒꦟꦴ ꦱꦔ꧀ꦒꦪ꧀ꦲꦤ꧀ꦠꦶ. ꦄꦴꦢꦶꦩ꧀ꦲꦶ ‘‘ꦮꦶꦥꦫꦷꦠꦢꦱ꧀ꦱꦤꦴ’’ꦠꦶ ꦥꦢꦁ ꦱꦧ꧀ꦧꦥꦢꦺꦲꦶ ꦪꦺꦴꦗꦺꦠꦧ꧀ꦧꦁ. ‘‘ꦱꦲꦣꦩ꧀ꦩꦺꦤꦴ’’ꦠꦶ ꦥꦢꦱ꧀ꦱꦠ꧀ꦡꦁ ꦢꦱ꧀ꦱꦺꦠꦸꦁ ꦮꦸꦠ꧀ꦠꦁ ‘‘ꦱꦲ ꦏꦴꦫꦟꦺꦤꦴ’’ꦠꦶ. ꦪꦡꦴꦠꦶ ꦪꦺꦤꦴꦏꦴꦫꦺꦤ ꦤꦶꦒ꧀ꦒꦪ꧀ꦲꦩꦴꦤꦺꦠꦶ ꦱꦩ꧀ꦧꦤ꧀ꦣꦺꦴ.

ꦠꦠ꧀ꦡꦴꦠꦶ ꦠꦶꦮꦶꦣꦺꦱꦸ ꦱꦢ꧀ꦣꦩ꧀ꦩꦺꦱꦸ. ꦩꦲꦴꦮꦠ꧀ꦠꦴꦤꦶ ꦱꦤ꧀ꦠꦶ, ꦄꦪꦁ ꦱꦧ꧀ꦧꦺꦴꦠꦶ ꦪꦺꦴꦗꦤꦴ. ꦕꦠ꧀ꦠꦴꦫꦶ ꦦꦭꦴꦤꦶ ꦕꦴꦠꦶ ꦭꦶꦔ꧀ꦒꦮꦶꦥꦭ꧀ꦭꦴꦱꦺꦤ ꦪꦺꦴꦗꦺꦠꦧ꧀ꦧꦁ. ꦌꦠ꧀ꦡ ꦕꦏꦴꦫꦺꦤ ꦄꦨꦶꦚ꧀ꦚꦴꦥꦛꦶꦱꦩ꧀ꦨꦶꦢꦴ ꦱꦔ꧀ꦒꦲꦶꦠꦴ ꦠꦴꦱꦩ꧀ꦥꦶ ꦄꦣꦶꦒꦩꦱꦴꦱꦤꦨꦴꦮꦠꦺꦴ.

ꦠꦠ꧀ꦡꦴꦠꦶ ꦠꦶꦮꦶꦣꦺꦱꦸ ꦱꦢ꧀ꦣꦩ꧀ꦩꦺꦱꦸ. ꦏꦺꦕꦶ ꦡꦺꦫꦴꦠꦶ ꦣꦩ꧀ꦩꦏꦡꦶꦏꦴ ꦏꦺꦕꦶ ꦡꦺꦫꦴ. ‘‘ꦪꦺꦴ ꦑꦺꦴ’’ꦠꦶ ꦏꦟ꧀ꦜꦗꦢꦸꦠꦶꦪꦏ꧀ꦑꦫꦺꦤ ꦥꦜꦶꦠꦧ꧀ꦧꦺꦴ. ꦥꦺꦴꦠ꧀ꦡꦏꦺꦱꦸ ꦥꦤ ‘‘ꦪꦺꦴ ꦮꦺꦴ’’ꦠꦶ ꦮꦏꦴꦫꦺꦤ ꦥꦴꦜꦺꦴ ꦄꦠ꧀ꦡꦶ, ꦱꦺꦴ ꦄꦪꦸꦠ꧀ꦠꦺꦴ. ꦏꦱ꧀ꦩꦴ? ‘‘ꦱꦺꦴ ꦮꦺꦴ’’ꦠꦶ ꦥꦫꦠꦺꦴ ꦮꦸꦠ꧀ꦠꦠ꧀ꦠꦴ, ꦌꦏꦱ꧀ꦩꦶꦁ ꦮꦴꦏ꧀ꦪꦺ ꦢ꧀ꦮꦶꦤ꧀ꦤꦁ ꦱꦩꦴꦤꦱꦸꦠꦶꦱꦢ꧀ꦢꦴꦤꦁ ꦄꦪꦸꦠ꧀ꦠꦠ꧀ꦠꦴ ꦕ. ꦏꦺꦕꦶ ꦡꦺꦫꦴꦠꦶ ꦥꦁꦱꦸꦏꦹꦭꦶꦏꦴ ꦏꦺꦕꦶ ꦡꦺꦫꦴ ꦄꦴꦲꦁꦱꦹꦠꦶ ꦱꦩ꧀ꦧꦤ꧀ꦣꦺꦴ. ꦆꦠꦫꦺ ꦥꦤ ꦡꦺꦫꦴꦠꦶ ꦣꦩ꧀ꦩꦏꦡꦶꦏꦡꦺꦫꦺꦲꦶ ꦕ ꦥꦁꦱꦸꦏꦹꦭꦶꦏꦡꦺꦫꦺꦲꦶ ꦕ ꦄꦚ꧀ꦚꦺ ꦡꦺꦫꦴ. ꦠꦺꦠꦶ ꦥꦚ꧀ꦕ ꦨꦶꦏ꧀ꦑꦹ ꦏꦫꦶꦱ꧀ꦱꦤ꧀ꦠꦷꦠꦶ ꦱꦩ꧀ꦧꦤ꧀ꦣꦺꦴ. ꦗꦩ꧀ꦧꦸꦢꦷꦥꦱ꧀ꦱ ꦥꦕ꧀ꦕꦤ꧀ꦠꦺ ꦠꦶꦛ꧀ꦜꦠꦷꦠꦶ ꦥꦕ꧀ꦕꦤ꧀ꦠꦶꦩꦺꦴ, ꦠꦱ꧀ꦩꦶꦁ. ꦗꦩ꧀ꦧꦸꦢꦷꦥꦱ꧀ꦱ ꦩꦗ꧀ꦙꦺ ꦮꦺꦩꦗ꧀ꦙꦺ ꦠꦶꦛ꧀ꦜꦠꦷꦠꦶ ꦩꦗ꧀ꦙꦶꦩꦺꦴ. ꦄꦡ ꦮꦴ ꦩꦗ꧀ꦙꦴꦤꦁ ꦱꦸꦢ꧀ꦣꦴꦤꦁ ꦧꦸꦢ꧀ꦣꦴꦢꦷꦤꦁ ꦤꦶꦮꦴꦱꦺꦴ ꦩꦗ꧀ꦙꦶꦩꦺꦴ, ꦠꦱ꧀ꦩꦶꦁ. ꦮꦷꦱꦠꦶ ꦮꦒ꧀ꦒꦴ ꦆꦩꦱ꧀ꦱꦴꦠꦶ ꦮꦷꦱꦠꦶꦮꦒ꧀ꦒꦺꦴ, ꦱꦺꦴꦪꦺꦮ ꦒꦟꦺꦴ ꦮꦷꦱꦠꦶꦮꦒ꧀ꦒꦒꦟꦺꦴ, ꦠꦁ. ꦌꦮꦤ꧀ꦠꦶꦄꦴꦢꦶ ꦤꦶꦒꦩꦤꦁ.

ꦠꦱ꧀ꦱꦴꦣꦺꦪ꧀ꦪꦺꦴꦠꦶ ꦠꦱ꧀ꦱꦴꦪꦠ꧀ꦠꦺꦴ, ꦠꦱ꧀ꦱ ꦱꦤ꧀ꦠꦏꦺꦴꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦥꦮꦴꦫꦟꦴ ꦄꦴꦣꦺꦪ꧀ꦪꦴ, ꦱꦔ꧀ꦓꦏꦩ꧀ꦩꦁ ꦄꦴꦣꦺꦪ꧀ꦪꦁ, ꦥꦧ꧀ꦧꦗ꧀ꦗꦴ ꦄꦴꦣꦺꦪ꧀ꦪꦴ, ꦈꦥꦱꦩ꧀ꦥꦢꦴ ꦄꦴꦣꦺꦪ꧀ꦪꦴꦠꦶ ꦪꦺꦴꦗꦤꦴ.

ꦪꦺꦥꦶ ꦆꦩꦺ ꦤꦮ ꦈꦥꦺꦴꦱꦡꦴꦠꦶ ꦱꦩ꧀ꦧꦤ꧀ꦣꦺꦴ. ꦪꦴꦥꦶ ꦕ ꦆꦩꦴ ꦤꦮ ꦥꦮꦴꦫꦟꦴꦪꦺꦴꦠꦶ ꦪꦺꦴꦗꦤꦴ. ꦠꦱ꧀ꦱꦴꦠꦶ ꦮꦶꦤꦪꦣꦫꦱ꧀ꦱ. ꦠꦴꦱꦤ꧀ꦠꦶ ꦤꦮꦥꦮꦴꦫꦟꦴꦤꦁ.

ꦪꦴꦤꦶꦥꦶ ꦆꦩꦴꦤꦶ ꦕꦠ꧀ꦠꦴꦫꦶ ꦱꦔ꧀ꦓꦏꦩ꧀ꦩꦴꦤꦷꦠꦶ ꦪꦺꦴꦗꦺꦠꦧ꧀ꦧꦁ. ꦌꦠ꧀ꦡ ꦕ ꦠꦴꦤꦶ ꦮꦶꦤꦪꦣꦫꦴꦪꦠ꧀ꦠꦴꦤꦺꦮꦴꦠꦶ ꦥꦴꦜꦱꦺꦱꦺꦴ ꦄꦗ꧀ꦙꦴꦲꦫꦶꦠꦧ꧀ꦧꦺꦴ.

ꦪꦴꦥꦶ ꦕ ꦄꦪꦁ ꦥꦧ꧀ꦧꦗ꧀ꦗꦴ ꦕ ꦈꦥꦱꦩ꧀ꦥꦢꦴ ꦕ ꦏꦴꦠꦧ꧀ꦧꦴꦠꦶ ꦪꦺꦴꦗꦤꦴ. ꦲꦷꦠꦶ ꦱꦕ꧀ꦕꦁ. ꦄꦚ꧀ꦚꦺꦴꦠꦶ ꦮꦶꦤꦪꦣꦫꦠꦺꦴ ꦥꦫꦺꦴ. ꦱꦺꦴ ꦌꦮꦴꦠꦶ ꦮꦶꦤꦪꦣꦫꦺꦴ ꦌꦮ. ‘‘ꦈꦥꦗ꧀ꦙ’’ꦤ꧀ꦠꦶ ꦣꦴꦠꦸꦏꦩ꧀ꦩꦁ, ‘‘ꦱꦴꦩꦟꦺꦫꦺꦤꦴ’’ꦠꦶ ꦏꦴꦫꦶꦠꦏꦩ꧀ꦩꦁ ꦈꦥꦤꦺꦠꦧ꧀ꦧꦁ. ꦌꦠ꧀ꦡ ꦕꦴꦠꦶ ꦈꦥꦺꦴꦱꦡꦴꦢꦷꦱꦸ ꦕ. ꦤꦶꦱ꧀ꦱꦪꦢꦴꦤꦚ꧀ꦕ ꦱꦴꦩꦟꦺꦫꦹꦥꦛ꧀ꦜꦴꦤꦚ꧀ꦕ ꦮꦶꦱꦸꦁ ꦏꦠ꧀ꦮꦴ ꦢ꧀ꦮꦴꦢꦱꦴꦤꦶꦱꦁꦱꦺ ꦭꦨꦠꦷꦠꦶꦥꦶ ꦱꦏ꧀ꦏꦴ ꦮꦠ꧀ꦠꦸꦁ.

ꦮꦶꦱꦸꦁ ꦮꦶꦱꦸꦁ ꦏꦠ꧀ꦮꦴꦠꦶ ‘‘ꦥꦚ꧀ꦕꦴꦠꦶ ꦕ…ꦥꦺ… ꦌꦏꦴꦢꦱꦴ’’ꦠꦶ ꦕ ꦏꦺꦴꦛ꧀ꦜꦴꦱꦁ ꦏꦺꦴꦛ꧀ꦜꦴꦱꦁ ꦏꦠ꧀ꦮꦴ, ꦱꦠ꧀ꦠ ꦏꦺꦴꦛ꧀ꦜꦴꦱꦺ ꦏꦠ꧀ꦮꦴ ꦨꦴꦱꦠꦷꦠꦶ ꦄꦣꦶꦥ꧀ꦥꦴꦪꦺꦴ. ꦡꦺꦴꦩꦺꦠꦷꦠꦶ ꦱꦩ꧀ꦩꦸꦑꦴ ꦡꦺꦴꦩꦺꦠꦶ. ꦥꦱꦁꦱꦠꦷꦠꦶ ꦥꦫꦩ꧀ꦩꦸꦑꦴ ꦥꦱꦁꦱꦠꦶ. ‘‘ꦈꦒ꧀ꦒꦲꦺꦠꦧ꧀ꦧ’’ꦤ꧀ꦠꦶꦥꦢꦱ꧀ꦱꦠ꧀ꦡꦁ ꦢꦱ꧀ꦱꦺꦠꦸꦁ ꦮꦸꦠ꧀ꦠꦁ ‘‘ꦥꦫꦶꦪꦴꦥꦸꦟꦶꦠꦧ꧀ꦧ’’ꦤ꧀ꦠꦶ. ꦄꦢ꧀ꦣꦤꦶ ꦢꦷꦓꦺ ꦱꦴꦣꦹꦠꦶ ꦄꦢ꧀ꦣꦤꦶꦪꦁ ꦄꦢ꧀ꦣꦏ꧀ꦑꦩꦁ ꦄꦢ꧀ꦣꦪꦺꦴꦒ꧀ꦪꦤ꧀ꦠꦶ ꦄꦠ꧀ꦡꦺꦴ ꦱꦴꦣꦸꦄꦠ꧀ꦡꦺ ꦤꦶꦪꦥꦕ꧀ꦕꦪꦺꦴ (ꦩꦺꦴꦒ꧀ꦒꦭ꧀ꦭꦴꦤꦺ ꧔.꧓꧓.꧗꧓).

ꦡꦺꦫꦴ ꦕ ꦤꦮꦴ ꦕ ꦩꦗ꧀ꦙꦶꦩꦴ ꦕ ꦧꦲꦹ ꦠꦺ ꦨꦶꦏ꧀ꦑꦹ ꦥꦫꦶꦪꦴꦥꦸꦟꦤ꧀ꦠꦷꦠꦶ ꦪꦺꦴꦗꦤꦴ.

꧔꧓꧙. ‘‘ꦈꦢ꧀ꦢꦶꦱ꧀ꦱꦩꦴꦤꦺ’’ꦠꦶ ꦥꦢꦱ꧀ꦱ ꦏꦩ꧀ꦩꦫꦹꦥꦠ꧀ꦠꦁ ꦢꦱ꧀ꦱꦺꦠꦸꦁ ꦮꦸꦠ꧀ꦠꦁ ‘‘ꦈꦢ꧀ꦢꦶꦱꦶꦪꦩꦴꦤꦺ’’ꦠꦶ. ꦱꦺꦴ ꦥꦤꦴꦠꦶ ꦥꦴꦠꦶꦩꦺꦴꦏ꧀ꦑꦺꦴ ꦥꦤ. ꦪꦱ꧀ꦩꦴ ꦈꦢ꧀ꦢꦶꦱ꧀ꦱꦩꦴꦤꦺꦴ ꦤꦴꦩ ꦲꦺꦴꦠꦶ, ꦠꦱ꧀ꦩꦴꦠꦶ ꦪꦺꦴꦗꦤꦴ. ꦈꦢ꧀ꦢꦶꦱꦤ꧀ꦠꦺ ꦮꦴꦠꦶ ꦈꦢ꧀ꦢꦶꦱꦶꦪꦩꦴꦤꦺ ꦮꦴ. ꦈꦢ꧀ꦢꦶꦱꦴꦥꦺꦤ꧀ꦠꦺ ꦮꦴꦠꦶ ꦈꦢ꧀ꦢꦶꦱꦴꦥꦶꦪꦩꦴꦤꦺ ꦮꦴ. ꦄꦤ꧀ꦠꦱꦢ꧀ꦢꦺꦴ ꦲꦶ ꦩꦴꦤꦱꦢ꧀ꦢꦏꦴꦫꦶꦪꦺꦴ. ꦪꦺꦴꦠꦶ ꦨꦶꦏ꧀ꦑꦸ. ꦤꦤ꧀ꦠꦶ ꦠꦁ ꦥꦴꦠꦶꦩꦺꦴꦏ꧀ꦑꦁ. ꦕꦱꦢ꧀ꦢꦺꦴ ꦑꦸꦢ꧀ꦢꦴꦤꦸꦑꦸꦢ꧀ꦢꦏꦥꦢꦱ꧀ꦱ ꦢ꧀ꦮꦤ꧀ꦤꦮꦴꦏ꧀ꦪꦁ ꦢꦱ꧀ꦱꦺꦠꦶ, ꦥꦸꦧ꧀ꦧꦥꦢꦺ ꦏꦏꦴꦫꦭꦺꦴꦥꦺꦴ ꦢꦛ꧀ꦜꦧ꧀ꦧꦺꦴ. ꦠꦺꦱꦤ꧀ꦠꦶ ꦑꦸꦢ꧀ꦢꦴꦤꦸꦑꦸꦢ꧀ꦢꦴꦏꦴꦤꦁ. ꦲꦷꦠꦶ ꦱꦕ꧀ꦕꦁ. ꦌꦠꦴꦤꦷꦠꦶ ꦑꦸꦢ꧀ꦢꦴꦤꦸꦑꦸꦢ꧀ꦢꦏꦴꦤꦶ. ꦪꦺꦠꦶ ꦨꦶꦏ꧀ꦑꦹ. ‘‘ꦪꦴꦮ ꦈꦥ꧀ꦥꦗ꧀ꦗꦠꦶꦪꦺꦮ, ꦠꦴꦮ ꦱꦁꦮꦠ꧀ꦠꦤ꧀ꦠꦶ ꦆꦠꦶ ꦮꦸꦠ꧀ꦠꦁ ꦲꦺꦴꦠꦷꦠꦶ ꦪꦺꦴꦗꦤꦴ ꦆꦩꦱ꧀ꦱ ꦤꦪꦱ꧀ꦱ ꦥꦴꦜꦱꦺꦱꦺꦲꦶ ꦪꦺꦴꦗꦺꦠꦧ꧀ꦧꦠ꧀ꦠꦴ. ꦒꦫꦸꦏꦨꦴꦮꦁ ꦱꦭ꧀ꦭꦏ꧀ꦑꦺꦤ꧀ꦠꦺꦴ ꦭꦲꦸꦏꦨꦴꦮꦁ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦄꦡ ꦮꦴ’’ꦠꦶꦄꦴꦢꦶ. ꦄꦠꦶꦮꦶꦪꦴꦠꦶ ꦄꦠꦶ ꦆ ꦌꦮ. ꦆꦏꦴꦫꦺꦴ ꦲꦶ ꦱꦤ꧀ꦣꦶꦮꦱꦺꦤ ꦄꦢꦱ꧀ꦱꦤꦁ ꦒꦠꦺꦴ. ꦮꦶꦪꦱꦢ꧀ꦢꦺꦴ ꦌꦮꦏꦴꦫꦠ꧀ꦡꦮꦴꦕꦏꦺꦴ ‘‘ꦮꦫꦩ꧀ꦲꦴꦏꦁ ꦨꦸꦱꦴꦩꦶꦮꦴ’’ꦠꦶ ꦌꦠ꧀ꦡ (ꦗꦴ. ꧑.꧓.꧑꧐꧘) ꦆꦮꦱꦢ꧀ꦢꦺꦴ ꦮꦶꦪ, ꦄꦠꦶ ꦲꦸꦠ꧀ꦮꦴ ꦌꦮꦴꦠꦶ ꦄꦠ꧀ꦡꦺꦴ ꦢꦛ꧀ꦜꦧ꧀ꦧꦺꦴ. ‘‘ꦈꦥꦱꦩ꧀ꦥꦤ꧀ꦤꦱ꧀ꦱꦴ’’ꦠꦶ ꦌꦠ꧀ꦡ ꦱꦩꦷꦥꦺ ꦱꦴꦩꦶꦮꦕꦤꦤ꧀ꦠꦶ (ꦫꦸꦥꦱꦶꦢ꧀ꦣꦶꦪꦁ ꧓꧑꧖ ꦱꦸꦠ꧀ꦠꦺ) ꦄꦴꦲ ‘‘ꦈꦥꦱꦩ꧀ꦥꦤ꧀ꦤꦱ꧀ꦱ ꦱꦤ꧀ꦠꦶꦏꦺ’’ꦠꦶ. ꦠꦱ꧀ꦱꦴꦠꦶ ꦈꦥꦱꦩ꧀ꦥꦤ꧀ꦤꦱ꧀ꦱ. ꦠꦱ꧀ꦩꦶꦤ꧀ꦠꦶ ꦮꦶꦤꦪꦺ. ꦮꦶꦮꦟ꧀ꦟꦺꦠꦷꦠꦶ ꦤ ꦏꦺꦮꦭꦁ ꦠꦱ꧀ꦱꦺꦮ ꦮꦶꦮꦟ꧀ꦟꦩꦠ꧀ꦠꦩꦺꦮ, ꦄꦡ ꦑꦺꦴ ꦤꦶꦤ꧀ꦢꦠꦶꦪꦺꦮꦴꦠꦶ ꦄꦴꦲ ‘‘ꦤꦶꦤ꧀ꦢꦠꦷ’’ꦠꦶ. ꦒꦫꦲꦠꦷꦠꦶ ꦠꦱ꧀ꦱꦺꦮ ꦮꦺꦮꦕꦤꦁ. ꦄꦡ ꦮꦴ ꦤꦶꦤ꧀ꦢꦠꦷꦠꦶ ꦈꦥꦱꦩ꧀ꦥꦤ꧀ꦤꦱ꧀ꦱ ꦱꦩ꧀ꦩꦸꦑꦴ ꦤꦶꦤ꧀ꦢꦠꦶ. ꦒꦫꦲꦠꦷꦠꦶ ꦥꦫꦩ꧀ꦩꦸꦑꦴ ꦒꦫꦲꦠꦷꦠꦶ. ꦢꦸꦠꦶꦪꦁ.

꧓. ꦩꦺꦴꦲꦤꦱꦶꦏ꧀ꦑꦴꦥꦢꦁ

꧔꧔꧔. ꦠꦠꦶꦪꦺ ꦄꦤꦸꦱꦢ꧀ꦢꦺꦴ ꦥꦛꦶꦥꦴꦛꦶꦄꦠ꧀ꦡꦁ ꦄꦤ꧀ꦠꦺꦴꦏꦠ꧀ꦮꦴ ꦮꦶꦕ꧀ꦖꦠ꧀ꦡꦮꦴꦕꦏꦺꦴꦠꦶ ꦄꦴꦲ ‘‘ꦄꦤꦸꦥꦛꦶꦥꦴꦛꦶꦪꦴ ꦄꦢ꧀ꦣꦩꦴꦱꦺ ꦄꦢ꧀ꦣꦩꦴꦱꦺ’’ꦠꦶ. ꦱꦺꦴꦠꦶ ꦥꦴꦠꦶꦩꦺꦴꦏ꧀ꦑꦺꦴ. ꦈꦥꦺꦴꦱꦡꦺ ꦈꦥꦺꦴꦱꦡꦺ ꦈꦢ꧀ꦢꦶꦱꦶꦠꦧ꧀ꦧꦤ꧀ꦠꦶ ꦄꦤꦸꦥꦺꦴꦱꦡꦶꦏꦁ. ꦌꦠ꧀ꦡꦴꦥꦶ ꦲꦶ ꦄꦤꦸꦱꦢ꧀ꦢꦺꦴ ꦮꦶꦕ꧀ꦖꦠ꧀ꦡꦮꦴꦕꦏꦺꦴ. ꦱꦺꦴꦠꦶ ꦥꦴꦠꦶꦩꦺꦴꦏ꧀ꦑꦺꦴ. ꦈꦢ꧀ꦢꦶꦱꦶꦪꦩꦴꦤꦺꦴ ꦤꦴꦩ ꦲꦺꦴꦠꦷꦠꦶ ꦪꦺꦴꦗꦤꦴ. ‘‘ꦠꦱ꧀ꦩꦶꦁ ꦄꦤꦴꦕꦴꦫꦺ’’ꦠꦶ ꦥꦢꦺꦤ ‘‘ꦠꦠ꧀ꦡꦴ’’ꦠꦶ ꦥꦢꦱ꧀ꦱꦠ꧀ꦡꦁ ꦢꦱ꧀ꦱꦺꦠꦶ. ‘‘ꦪꦁ ꦄꦴꦥꦠ꧀ꦠꦶ’’ꦤ꧀ꦠꦶ ꦥꦢꦺꦤ ꦪꦁꦱꦢ꧀ꦢꦱ꧀ꦱ ꦮꦶꦱꦪꦁ ꦢꦱ꧀ꦱꦺꦠꦶ. ꦪꦡꦴꦣꦩ꧀ꦩꦺꦴꦠꦶ ꦌꦠ꧀ꦡ ꦣꦩ꧀ꦩꦱꦢ꧀ꦢꦺꦤ ꦣꦩ꧀ꦩꦺꦴ ꦕ ꦮꦶꦤꦪꦺꦴ ꦕ ꦄꦣꦶꦥ꧀ꦥꦺꦠꦺꦴꦠꦶ ꦄꦴꦲ ‘‘ꦣꦩ꧀ꦩꦺꦴ ꦕ ꦮꦶꦤꦪꦺꦴ ꦕꦴ’’ꦠꦶ. ꦪꦡꦴꦠꦶ ꦪꦺꦤꦴꦏꦴꦫꦺꦤ. ꦱꦴꦣꦸꦱꦢ꧀ꦢꦺꦴ ꦱꦸꦤ꧀ꦢꦫꦠ꧀ꦡꦺꦴ, ꦏꦱꦢ꧀ꦢꦺꦴ ꦥꦢꦥꦹꦫꦟꦺꦴꦠꦶ ꦄꦴꦲ ‘‘ꦱꦸꦛ꧀ꦜꦹ’’ꦠꦶ. ꦄꦛ꧀ꦜꦶꦤ꧀ꦠꦶ ꦕ ‘‘ꦏꦠ꧀ꦮꦴ’’ꦠꦶ ꦕ ꦢ꧀ꦮꦺ ꦥꦢꦴꦤꦶ ꦢꦛ꧀ꦜꦧ꧀ꦧꦴꦤꦶ. ‘‘ꦄꦛ꧀ꦜꦶꦏꦠ꧀ꦮꦴ’’ꦠꦶ ꦮꦴ ꦌꦏꦁ ꦥꦢꦁ. ꦠꦠ꧀ꦡ ꦥꦸꦧ꧀ꦧꦤꦪꦺ ꦄꦠ꧀ꦡꦺꦴ ꦪꦱ꧀ꦱꦠ꧀ꦡꦷꦠꦶ ꦄꦛ꧀ꦜꦶ ꦠ꧀ꦡꦏꦴꦫꦱ꧀ꦱ ꦛ꧀ꦜꦏꦴꦫꦁ ꦏꦠ꧀ꦮꦴ, ꦠꦁ ꦄꦛ꧀ꦜꦶꦁ. ꦏꦠ꧀ꦮꦴꦠꦶ ꦠ꧀ꦮꦴꦥꦕ꧀ꦕꦪꦤ꧀ꦠꦈꦠ꧀ꦠꦫꦥꦢꦺꦤ ꦱꦩꦴꦱꦺꦴ ꦤ ꦲꦺꦴꦠꦶ. ꦄꦛ꧀ꦜꦶꦏꦨꦴꦮꦤ꧀ꦠꦶ ꦌꦠ꧀ꦡ ꦆꦏꦱꦢ꧀ꦢꦺꦤ ‘‘ꦄꦛ꧀ꦜꦷ’’ꦠꦶ ꦌꦠ꧀ꦡ ꦇꦥꦕ꧀ꦕꦪꦁ ꦢꦱ꧀ꦱꦺꦠꦶ. ‘‘ꦨꦴꦮ’’ꦤ꧀ꦠꦶꦥꦢꦺꦤ ꦨꦴꦮꦥꦕ꧀ꦕꦪꦺꦤ ꦮꦶꦤꦴ ꦨꦴꦮꦠ꧀ꦡꦱ꧀ꦱ ꦚꦴꦥꦺꦠꦧ꧀ꦧꦠꦁ ꦢꦱ꧀ꦱꦺꦠꦶ. ꦄꦠ꧀ꦡꦺꦴ ꦥꦤꦺꦮꦁ ꦢꦛ꧀ꦜꦧ꧀ꦧꦺꦴ – ꦄꦛ꧀ꦜꦶꦨꦴꦮꦁ ꦏꦠ꧀ꦮꦴꦠꦶ. ꦥꦕ꧀ꦖꦶꦩꦤꦪꦺ ꦄꦠ꧀ꦡꦺꦴ ꦪꦱ꧀ꦱꦠ꧀ꦡꦷꦠꦶ ꦄꦛ꧀ꦜꦶꦏꦺꦴ ꦥꦸꦫꦶꦩꦤꦪꦺꦤꦺꦮ ꦠ꧀ꦡꦏꦴꦫꦱ꧀ꦱ ꦛ꧀ꦜꦏꦴꦫꦁ ꦏꦠ꧀ꦮꦴ. ꦄꦠ꧀ꦡꦪꦶꦠꦧ꧀ꦧꦺꦴ ꦆꦕ꧀ꦖꦶꦠꦧ꧀ꦧꦺꦴꦠꦶ ꦮꦴ ꦄꦛ꧀ꦜꦶꦏꦺꦴ, ꦄꦛ꧀ꦜꦶꦏꦆꦠꦶ ꦤꦴꦩꦱꦢ꧀ꦢꦠꦺꦴ ꦠ꧀ꦮꦴꦥꦕ꧀ꦕꦪꦺꦴ ꦏꦴꦠꦧ꧀ꦧꦺꦴ. ‘‘ꦄꦛ꧀ꦜꦶꦏꦠ꧀ꦮꦴ’’ꦠꦶ ꦆꦢꦁ ꦥꦢꦁ ꦏꦶꦫꦶꦪꦴꦮꦶꦱꦺꦱꦤꦁ. ꦏꦶꦫꦶꦪꦴꦮꦶꦱꦺꦱꦤꦺ ꦮꦠ꧀ꦠꦩꦴꦤꦺ ꦏꦫꦣꦴꦠꦸ ꦮꦴ ꦨꦹꦣꦴꦠꦸ ꦮꦴ ꦪꦺꦴꦗꦺꦠꦧ꧀ꦧꦴꦠꦶ ꦢꦱ꧀ꦱꦺꦨꦸꦁ ꦮꦸꦠ꧀ꦠꦁ ‘‘ꦏꦠ꧀ꦮꦴ ꦲꦸꦠ꧀ꦮꦴ’’ꦠꦶ. ꦠꦁ ꦱꦧ꧀ꦧꦁ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦄꦛ꧀ꦜꦶꦏꦠ꧀ꦮꦴꦠꦶ ꦄꦛ꧀ꦜꦶꦏꦨꦴꦮꦁ ꦏꦠ꧀ꦮꦴ, ꦄꦛ꧀ꦜꦶꦏꦺꦴ ꦲꦸꦠ꧀ꦮꦴ’’ꦠꦶ. ꦠꦠꦶꦪꦁ.

꧔. ꦥꦲꦴꦫꦱꦶꦏ꧀ꦑꦴꦥꦢꦁ

꧔꧔꧙. ꦕꦠꦸꦠ꧀ꦡꦺ ꦏꦱ꧀ꦩꦴ ꦖꦧ꧀ꦧꦒ꧀ꦒꦶꦪꦴ ꦱꦠ꧀ꦠꦫꦱꦮꦒ꧀ꦒꦶꦪꦴꦤꦁ ꦥꦲꦴꦫꦁ ꦢꦺꦤ꧀ꦠꦶ, ꦤꦤꦸ ꦄꦏꦴꦫꦟꦺꦤ ꦥꦲꦴꦫꦁ ꦢꦺꦤ꧀ꦠꦷꦠꦶ ꦄꦴꦲ ‘‘ꦄꦴꦮꦸꦱꦺꦴ’’ꦠꦶꦄꦴꦢꦶ. ꦆꦩꦶꦤꦴ ꦪꦡꦴ ꦮꦢꦤ꧀ꦠꦶ, ꦠꦡꦴ ꦄꦏꦠꦠ꧀ꦠꦴ ꦥꦲꦴꦫꦁ ꦢꦺꦤ꧀ꦠꦷꦠꦶ ꦢꦱ꧀ꦱꦺꦠꦶ.

꧔꧕꧑. ꦱꦕꦺꦥꦷꦠꦶ ꦌꦠ꧀ꦡ ꦥꦶꦱꦢ꧀ꦢꦺꦤ ꦱꦕꦺ ꦄꦩꦫꦠꦶ, ꦏꦴ ꦤꦴꦩ ꦏꦡꦴ, ꦥꦴꦕꦶꦠ꧀ꦠꦶꦪꦩꦺꦮꦴꦠꦶ ꦢꦱ꧀ꦱꦺꦠꦶ. ꦥꦲꦴꦫꦺꦤꦴꦠꦶ ꦥꦲꦴꦫꦲꦺꦠꦸꦤꦴ. ꦪꦡꦴꦠꦶ ꦪꦺꦤꦴꦏꦴꦫꦺꦤ. ꦄꦪꦤ꧀ꦠꦶ ꦨꦶꦏ꧀ꦑꦸ. ꦤ ꦮꦶꦫꦺꦴꦕꦠꦷꦠꦶ ꦤ ꦱꦺꦴꦨꦠꦶ.

꧔꧕꧒. ‘‘ꦄꦤꦸꦥꦱꦩ꧀ꦥꦤ꧀ꦤꦱ꧀ꦱꦴ’’ꦠꦶ ꦌꦠ꧀ꦡ ꦄꦏꦴꦫꦱ꧀ꦱ ꦄꦚ꧀ꦚꦠ꧀ꦡꦁ ꦢꦱ꧀ꦱꦺꦠꦸꦁ ꦮꦸꦠ꧀ꦠꦁ ‘‘ꦒꦲꦛ꧀ꦜꦱ꧀ꦱ ꦮꦴ’’ꦠꦶꦄꦴꦢꦶ. ꦥꦧ꧀ꦧꦗꦶꦠꦱ꧀ꦱ ꦮꦴꦠꦶ ꦥꦫꦶꦧ꧀ꦧꦴꦗꦏꦱ꧀ꦱ ꦮꦴ ꦱꦴꦩꦟꦺꦫꦱ꧀ꦱ ꦮꦴ.

꧔꧕꧓. ‘‘ꦏꦺꦤꦕꦷ’’ꦠꦶ ꦥꦢꦱ꧀ꦱ ꦄꦠ꧀ꦡꦁ ꦢꦱ꧀ꦱꦺꦠꦸꦁ ꦮꦸꦠ꧀ꦠꦁ ‘‘ꦩꦤꦸꦱ꧀ꦱꦺꦤ ꦮꦴ’’ꦠꦶꦄꦴꦢꦶ. ꦠꦠꦺꦴꦠꦶ ꦮꦶꦲꦺꦜꦤꦠꦺꦴ, ꦆꦩꦶꦤꦴ ꦩꦺꦴꦏ꧀ꦑꦱ꧀ꦱ ꦄꦥꦴꦢꦴꦤꦁ ꦢꦱ꧀ꦱꦺꦠꦶ, ‘‘ꦄꦠ꧀ꦠꦤꦺꦴ’’ꦠꦶ ꦆꦩꦶꦤꦴ ꦱꦩ꧀ꦧꦤ꧀ꦣꦁ ꦢꦱ꧀ꦱꦺꦠꦶ. ‘‘ꦥꦠ꧀ꦡꦪꦩꦴꦤꦺꦴ’’ꦠꦶ ꦆꦩꦶꦤꦴ ‘‘ꦄꦣꦶꦥ꧀ꦥꦴꦪꦺꦴ’’ꦠꦶ ꦥꦢꦱ꧀ꦱꦠ꧀ꦡꦁ ꦢꦱ꧀ꦱꦺꦠꦶ. ꦩꦸꦒ꧀ꦒꦫꦺꦤ ꦮꦴꦠꦶ ꦕꦠꦸꦲꦠ꧀ꦡꦢꦟ꧀ꦝꦱ꧀ꦱ ꦄꦢ꧀ꦣꦺꦤ ꦢꦟ꧀ꦝꦺꦤ ꦮꦴ. ꦱꦺꦴꦠꦶ ꦕꦺꦴꦫꦴꦢꦶꦏꦺꦴꦠꦶ. ꦕꦠꦸꦠ꧀ꦡꦁ.

꧕. ꦠꦭꦱꦠ꧀ꦠꦶꦏꦱꦶꦏ꧀ꦑꦴꦥꦢꦁ

꧔꧕꧔. ꦥꦚ꧀ꦕꦩꦺ ꦠꦭꦤ꧀ꦠꦶ ꦲꦠ꧀ꦡꦠꦭꦁ. ꦠꦚ꧀ꦲꦶ ꦠꦭꦠꦶ ꦪꦁꦏꦶꦚ꧀ꦕꦶ ꦒꦲꦶꦠꦮꦠ꧀ꦡꦸ ꦥꦠꦶꦛ꧀ꦜꦴꦠꦶ ꦌꦠ꧀ꦡꦴꦠꦶ ‘‘ꦠꦭ’’ꦤ꧀ꦠꦶ ꦮꦸꦕ꧀ꦕꦠꦶ. ꦱꦠ꧀ꦠꦷꦠꦶ ꦏꦸꦤ꧀ꦠꦺꦴ. ꦱꦺꦴ ꦲꦶ ꦱꦏꦠꦶ ꦮꦶꦗ꧀ꦙꦶꦠꦸꦁ ꦱꦩꦠ꧀ꦡꦺꦠꦷꦠꦶ ‘‘ꦱꦠ꧀ꦠꦷ’’ꦠꦶ ꦮꦸꦕ꧀ꦕꦠꦶ. ꦠꦭꦩꦺꦮ ꦱꦠ꧀ꦠꦶꦱꦢꦶꦱꦠ꧀ꦠꦴ ꦠꦭꦱꦠ꧀ꦠꦶꦏꦁ, ꦱꦢꦶꦱꦠ꧀ꦡꦺ ꦏꦺꦴ, ꦠꦁ ꦠꦭꦱꦠ꧀ꦠꦶꦏꦁ ꦈꦥꦕꦴꦫꦺꦤ ꦒꦲꦺꦠ꧀ꦮꦴ ‘‘ꦏꦴꦪꦩ꧀ꦥꦷ’’ꦠꦶ ꦮꦸꦠ꧀ꦠꦁ. ꦏꦴꦪꦠꦺꦴ ꦄꦚ꧀ꦚꦁ ꦮꦠ꧀ꦡꦸꦩ꧀ꦥꦶ ꦠꦭꦱꦠ꧀ꦠꦶꦏꦱꦔ꧀ꦑꦴꦠꦺꦤ ꦏꦴꦪꦺꦤ ꦒꦲꦺꦠ꧀ꦮꦴ ꦈꦒ꧀ꦒꦶꦫꦠ꧀ꦠꦴ ꦮꦸꦠ꧀ꦠꦁ ‘‘ꦏꦴꦪꦥꦛꦶꦧꦢ꧀ꦣꦩ꧀ꦥꦷ’’ꦠꦶ. ‘‘ꦥꦲꦴꦫꦱꦩꦸꦕ꧀ꦕꦶꦠꦴ’’ꦠꦶ ꦌꦠ꧀ꦡ ꦱꦁꦥꦸꦧ꧀ꦧꦺꦴ ꦕ ꦈꦥꦸꦧ꧀ꦧꦺꦴ ꦕ ꦕꦶꦱꦢ꧀ꦢꦺꦴ ꦥꦒꦸꦟꦤꦱꦔ꧀ꦑꦴꦠꦺ ꦥꦫꦶꦕꦶꦠꦺ ꦮꦠ꧀ꦠꦠꦷꦠꦶ ꦄꦴꦲ ‘‘ꦥꦲꦴꦫꦥꦫꦶꦕꦶꦠꦴ’’ꦠꦶ. ꦥꦲꦴꦫꦺꦤ ꦱꦁ ꦥꦸꦤꦥ꧀ꦥꦸꦤꦁ ꦈꦕ꧀ꦕꦶꦠꦴ ꦥꦫꦶꦕꦶꦠꦴꦠꦶ ꦄꦠ꧀ꦡꦺꦴ. ꦆꦩꦩꦺꦮꦠ꧀ꦡꦁ ꦱꦤ꧀ꦣꦴꦪ ꦮꦸꦠ꧀ꦠꦁ ‘‘ꦥꦸꦧ꧀ꦧꦺꦥꦶ…ꦥꦺ… ꦄꦠ꧀ꦡꦺꦴ’’ꦠꦶ. ꦄꦚ꧀ꦚꦩ꧀ꦥꦶ ꦱꦗ꧀ꦙꦴꦪꦤꦤꦪꦁ ꦢꦱ꧀ꦱꦺꦠꦸꦁ ꦮꦸꦠ꧀ꦠꦁ ‘‘ꦥꦲꦴꦫꦱ꧀ꦱ ꦈꦧ꧀ꦧꦶꦒꦴ’’ꦠꦶ. ꦠꦱ꧀ꦱꦴꦠꦶ ꦠꦱ꧀ꦱ ꦥꦴꦜꦱ꧀ꦱ. ꦥꦲꦴꦫꦱ꧀ꦱꦴꦠꦶ ꦥꦲꦴꦫꦠꦺꦴ. ꦤꦶꦱ꧀ꦱꦏ꧀ꦏꦠ꧀ꦡꦺ ꦕꦺꦠꦁ ꦱꦴꦩꦶꦮꦕꦤꦁ. ‘‘ꦨꦷꦠꦴ’’ꦠꦶ ꦆꦩꦶꦤꦴ ‘‘ꦈꦧ꧀ꦧꦶꦒꦴ’’ꦠꦶ ꦌꦠ꧀ꦡ ꦈꦥꦸꦧ꧀ꦧ ꦮꦶꦗꦣꦴꦠꦸꦱ꧀ꦱꦠ꧀ꦡꦁ ꦢꦱ꧀ꦱꦺꦠꦶ.

꧔꧕꧗-꧘. ꦮꦶꦫꦢ꧀ꦣꦺꦴꦠꦶ ꦥꦟ꧀ꦟꦏꦺꦴ ꦲꦸꦠ꧀ꦮꦴ. ꦥꦸꦧ꧀ꦧꦺꦠꦶ ꦥꦸꦫꦶꦩꦱꦶꦏ꧀ꦑꦴꦥꦢꦺ. ꦮꦸꦠ꧀ꦠꦺꦱꦸ ꦮꦠ꧀ꦡꦹꦱꦹꦠꦶ ‘‘ꦕꦺꦴꦫꦁ ꦮꦴ ꦥꦕ꧀ꦕꦠ꧀ꦡꦷꦏꦁ ꦮꦴ’’ꦠꦶꦄꦴꦢꦶꦤꦴ ꦮꦸꦠ꧀ꦠꦺꦱꦸ ꦮꦠ꧀ꦡꦹꦱꦹꦠꦶ. ꦥꦚ꧀ꦕꦩꦁ.

꧖. ꦄꦩꦹꦭꦏꦱꦶꦏ꧀ꦑꦴꦥꦢꦁ

꧔꧕꧙. ꦖꦛ꧀ꦜꦺ ꦠꦺꦠꦶ ꦖꦧ꧀ꦧꦒ꧀ꦒꦶꦪꦴ. ꦕꦺꦴꦢꦺꦤ꧀ꦠꦶ ꦏꦶꦫꦴꦠꦶ ꦱꦩ꧀ꦧꦤ꧀ꦣꦺꦴ. ꦄꦴꦏꦶꦟ꧀ꦟꦢꦺꦴꦱꦠ꧀ꦠꦴꦠꦶ ꦠꦺꦱꦁ ꦄꦴꦏꦸꦭꦄꦴꦢꦷꦤꦮꦠ꧀ꦠꦴ. ꦌꦮꦤ꧀ꦠꦶ ꦕꦺꦴꦢꦶꦪꦩꦴꦤꦺ. ꦄꦠ꧀ꦠꦥꦫꦶꦠ꧀ꦠꦴꦟꦤ꧀ꦠꦶ ꦄꦠ꧀ꦠꦤꦺꦴ ꦥꦫꦶꦱꦩꦤ꧀ꦠꦠꦺꦴ ꦠꦴꦟꦁ ꦫꦏ꧀ꦑꦤꦁ ꦏꦫꦺꦴꦤ꧀ꦠꦴ ꦕꦺꦴꦢꦺꦤ꧀ꦠꦷꦠꦶ ꦪꦺꦴꦗꦤꦴꦠꦶ. ꦖꦛ꧀ꦜꦁ.

꧗. ꦱꦚ꧀ꦕꦶꦕ꧀ꦕꦱꦶꦏ꧀ꦑꦴꦥꦢꦁ

꧔꧖꧔. ꦱꦠ꧀ꦠꦩꦺ ꦈꦥꦥꦸꦧ꧀ꦧꦢꦲꦣꦴꦠꦸꦱ꧀ꦱ ꦱꦏꦩ꧀ꦩꦶꦏꦠ꧀ꦠꦴ ꦏꦴꦫꦶꦠꦤ꧀ꦠꦺꦴꦒꦣꦨꦴꦮꦁ ꦢꦱ꧀ꦱꦺꦠꦸꦁ ꦮꦸꦠ꧀ꦠꦁ ‘‘ꦈꦥ꧀ꦥꦴꦢꦺꦤ꧀ꦠꦷ’’ꦠꦶ. ‘‘ꦄꦤꦸꦥꦱꦩ꧀ꦥꦤ꧀ꦤꦱ꧀ꦱꦴ’’ꦠꦶ ꦌꦠ꧀ꦡ ꦄꦏꦴꦫꦱ꧀ꦱ ꦱꦢꦶꦱꦠ꧀ꦡꦁ ꦢꦱ꧀ꦱꦺꦠꦸꦁ ꦮꦸꦠ꧀ꦠꦁ ‘‘ꦱꦴꦩꦟꦺꦫꦱ꧀ꦱꦴ’’ꦠꦶ. ꦱꦴꦩꦟꦺꦫꦺꦴꦥꦶ ꦲꦶ ꦈꦥꦱꦩ꧀ꦥꦤ꧀ꦤꦺꦤ ꦱꦢꦶꦱꦺꦴ ꦲꦺꦴꦠꦶ ꦱꦟ꧀ꦜꦴꦤꦺꦤ ꦕ ꦥꦸꦫꦶꦱꦨꦴꦮꦺꦤ ꦕ. ꦱꦴꦩꦟꦺꦫꦱ꧀ꦱ ꦏꦸꦏ꧀ꦏꦸꦕ꧀ꦕꦁ ꦈꦥꦢꦲꦠꦷꦠꦶ ꦱꦩ꧀ꦧꦤ꧀ꦣꦺꦴ. ꦤꦶꦱꦶꦤ꧀ꦤꦁ ꦩꦚ꧀ꦚꦺ, ꦤꦶꦥꦤ꧀ꦤꦁ ꦩꦚ꧀ꦚꦺ, ꦨꦸꦠ꧀ꦠꦁ ꦩꦚ꧀ꦚꦺ, ꦥꦷꦠꦁ ꦩꦚ꧀ꦚꦺ, ꦏꦠꦁ ꦩꦚ꧀ꦚꦺꦠꦶ ꦪꦺꦴꦗꦤꦴ. ꦤꦶꦱꦶꦤ꧀ꦤꦤ꧀ꦠꦶ ꦤꦶꦱꦷꦢꦶꦠꦁ. ꦤꦶꦥꦤ꧀ꦤꦤ꧀ꦠꦶ ꦤꦶꦥꦗ꧀ꦗꦶꦠꦤ꧀ꦠꦶ. ꦱꦠ꧀ꦠꦩꦁ.

꧘. ꦈꦥꦱ꧀ꦱꦸꦠꦶꦱꦶꦏ꧀ꦑꦴꦥꦢꦁ

꧔꧗꧑. ꦄꦛ꧀ꦜꦩꦺ ‘‘ꦄꦣꦶꦏꦫꦟꦗꦴꦠꦴꦤ’’ꦤ꧀ꦠꦶ ꦌꦠ꧀ꦡ ꦄꦣꦶꦏꦫꦟꦱ꧀ꦱ ꦥꦏꦫꦟꦠꦺꦴ ꦮꦶꦮꦴꦢꦴꦣꦶꦏꦫꦟꦨꦴꦮꦚ꧀ꦕ ꦮꦶꦱꦺꦱꦤꦥꦫꦥꦢꦨꦴꦮꦚ꧀ꦕ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦈꦥ꧀ꦥꦤ꧀ꦤꦮꦶꦮꦴꦢꦴꦣꦶꦏꦫꦟꦴꦤ’’ꦤ꧀ꦠꦶ. ꦠꦠ꧀ꦡ ꦈꦥ꧀ꦥꦤ꧀ꦤꦱꦢ꧀ꦢꦺꦤ ꦗꦴꦠꦱꦢ꧀ꦢꦱ꧀ꦱꦠ꧀ꦡꦁ ꦢꦱ꧀ꦱꦺꦠꦶ. ꦮꦶꦮꦴꦢꦱꦢ꧀ꦢꦺꦤ ꦄꦣꦶꦏꦫꦟꦱ꧀ꦱ ꦱꦫꦹꦥꦁ ꦢꦱ꧀ꦱꦺꦠꦶ. ꦱꦸꦪ꧀ꦪꦠꦷꦠꦶ ꦱꦸꦠꦶ ꦮꦕꦤꦁ, ꦱꦸꦠꦶꦪꦴ ꦱꦩꦷꦥꦁ ꦈꦥꦱ꧀ꦱꦸꦠꦶ ꦜꦴꦤꦤ꧀ꦠꦶ ꦄꦠ꧀ꦡꦁ ꦢꦱ꧀ꦱꦺꦠꦸꦁ ꦮꦸꦠ꧀ꦠꦁ ‘‘ꦱꦸꦠꦶꦱꦩꦷꦥ’’ꦤ꧀ꦠꦶ. ‘‘ꦱꦩꦷꦥ’’ꦤ꧀ꦠꦶ ꦆꦩꦶꦤꦴ ꦈꦥꦱꦢ꧀ꦢꦱ꧀ꦱꦠ꧀ꦡꦁ ꦢꦱ꧀ꦱꦺꦠꦶ. ‘‘ꦪꦠ꧀ꦡꦴ’’ꦠꦶꦄꦴꦢꦶꦤꦴ ‘‘ꦈꦥꦱ꧀ꦱꦸꦠꦷ’’ꦠꦶ ꦌꦠ꧀ꦡ ꦈꦥꦱꦢ꧀ꦢꦱ꧀ꦱ ꦥꦣꦴꦤꦠ꧀ꦠꦴ ꦠꦱ꧀ꦱ ꦱꦫꦹꦥꦁ ꦢꦱ꧀ꦱꦺꦠꦶ. ꦪꦠ꧀ꦡꦴꦠꦶ ꦪꦱ꧀ꦩꦶꦁ ꦜꦴꦤꦺ. ꦩꦤ꧀ꦠꦺꦤ꧀ꦠꦤ꧀ꦠꦶ ꦌꦠ꧀ꦡ ꦈꦥꦪꦺꦴꦒꦮꦕꦤꦱ꧀ꦱ ꦨꦸꦩ꧀ꦩꦠ꧀ꦡꦺ ꦄꦣꦶꦥ꧀ꦥꦺꦠꦠ꧀ꦠꦴ ꦮꦸꦠ꧀ꦠꦁ ‘‘ꦩꦤ꧀ꦠꦪꦩꦴꦤꦺ’’ꦠꦶ.

꧔꧗꧓. ‘‘ꦮꦹꦥꦱꦩꦶꦱ꧀ꦱꦴꦩꦷ’’ꦠꦶ ꦌꦠ꧀ꦡ ꦆꦣꦴꦠꦸꦪꦴ ꦒꦠ꧀ꦪꦠ꧀ꦡꦁ ꦢꦱ꧀ꦱꦺꦠꦸꦁ ꦮꦸꦠ꧀ꦠꦁ ‘‘ꦮꦹꦥꦱꦩꦁ ꦒꦩꦶꦱ꧀ꦱꦴꦩꦷ’’ꦠꦶ. ꦄꦏꦴꦫꦏꦨꦴꦮꦤ꧀ꦠꦶ ꦤꦶꦢ꧀ꦢꦺꦴꦱꦨꦴꦮꦁ. ꦱꦺꦴꦠꦸꦏꦴꦩꦠꦴꦪ ꦒꦩꦤꦮꦱꦺꦤ ꦱꦶꦪꦴ ꦏꦶꦫꦶꦪꦤ꧀ꦠꦶ ꦪꦺꦴꦗꦤꦴ. ꦥꦫꦠꦺꦴꦥꦶ ꦌꦱꦺꦮ ꦤꦪꦺꦴꦠꦶ. ꦄꦛ꧀ꦜꦩꦁ.

꧙. ꦏꦩ꧀ꦩꦥꦛꦶꦧꦴꦲꦤꦱꦶꦏ꧀ꦑꦴꦥꦢꦁ

꧔꧗꧔. ꦤꦮꦩꦺ ꦩꦪꦤ꧀ꦠꦶ ꦖꦧ꧀ꦧꦒ꧀ꦒꦶꦪꦤꦴꦩꦏꦴ ꦄꦩ꧀ꦲꦺ. ꦏꦠꦠ꧀ꦠꦴꦠꦶ ꦏꦩ꧀ꦩꦴꦤꦁ ꦏꦠꦠ꧀ꦠꦴ. ꦣꦩ꧀ꦩꦺꦴꦠꦶ ꦨꦹꦠꦺꦴ ꦱꦨꦴꦮꦺꦴ. ꦌꦠꦺꦱꦹꦠꦶ ꦕꦠꦹꦱꦸ ꦱꦔ꧀ꦓꦏꦩ꧀ꦩꦺꦱꦹꦠꦶ. ꦤꦮꦩꦁ.

꧑꧐. ꦖꦤ꧀ꦢꦁ ꦄꦢꦠ꧀ꦮꦴꦒꦩꦤꦱꦶꦏ꧀ꦑꦴꦥꦢꦁ

꧔꧘꧑. ꦢꦱꦩꦺ ꦕꦺꦴꦢꦺꦠꦶ ꦥꦫꦱ꧀ꦱ ꦢꦺꦴꦱꦁ ꦄꦴꦫꦺꦴꦥꦺꦠꦷꦠꦶ ꦕꦺꦴꦢꦏꦺꦴ. ꦠꦺꦤ ꦕ ꦕꦺꦴꦢꦏꦺꦤ ꦕꦺꦴꦢꦺꦠꦧ꧀ꦧꦺꦴ ꦢꦺꦴꦱꦁ ꦄꦴꦫꦺꦴꦥꦺꦠꦧ꧀ꦧꦺꦴꦠꦶ ꦕꦸꦢꦶꦠꦺꦴ, ꦱꦺꦴꦪꦺꦮ ꦕꦸꦢꦶꦠꦏꦺꦴ, ꦠꦺꦤ ꦕ. ‘‘ꦄꦤꦸꦮꦶꦗ꧀ꦗꦏꦺꦴꦠꦶ ꦕ ꦮꦶꦤꦪꦣꦫꦺꦴ. ꦱꦺꦴ ꦲꦶ ꦕꦺꦴꦢꦏꦕꦸꦢꦶꦠꦏꦴꦤꦁ ꦩꦠꦁ ꦄꦤꦸꦩꦶꦤꦺꦠ꧀ꦮꦴ ꦮꦶꦢꦠꦶ ꦗꦴꦤꦴꦠꦷꦠꦶ ꦄꦤꦸꦮꦶꦗ꧀ꦗꦏꦺꦴ. ꦌꦠ꧀ꦠꦴꦮꦠꦴꦥꦷꦠꦶ ꦌꦠ꧀ꦠꦏꦺꦤꦥꦶ ꦥꦩꦴꦟꦺꦤꦴꦠꦶ. ꦢꦱꦩꦁ.

꧑꧑. ꦢꦸꦧ꧀ꦧꦭꦱꦶꦏ꧀ꦑꦴꦥꦢꦁ

꧔꧘꧔. ꦌꦏꦴꦢꦱꦩꦺ ‘‘ꦄꦭꦗ꧀ꦗꦷꦠꦴ’’ꦠꦶꦄꦴꦢꦷꦱꦸ (ꦥꦫꦶ. ꧒꧙꧕) ꦮꦶꦪ ꦪꦏꦴꦫꦭꦺꦴꦥꦺꦤ ꦤꦶꦢ꧀ꦢꦺꦱꦺꦴꦠꦶ ꦄꦴꦲ ‘‘ꦪꦡꦴꦩꦶꦠ꧀ꦠꦠꦴꦪꦴ’’ꦠꦶ. ‘‘ꦪꦺꦴ ꦪꦺꦴ’’ꦠꦶ ꦆꦩꦶꦤꦴ ꦪꦡꦴꦱꦢ꧀ꦢꦱ꧀ꦱ ꦮꦶꦕ꧀ꦖꦠ꧀ꦡꦁ ꦢꦱ꧀ꦱꦺꦠꦶ. ꦪꦡꦴꦮꦸꦝ꧀ꦞꦤ꧀ꦠꦶꦄꦴꦢꦷꦱꦸ (ꦕꦹꦭ꦳ꦮ. ꧓꧑꧑ ꦄꦴꦢꦪꦺꦴ) ꦮꦶꦪ ꦪꦺꦴ ꦪꦺꦴ ꦩꦶꦠ꧀ꦠꦺꦴ ‘‘ꦪꦡꦴꦩꦶꦠ꧀ꦠ’’ꦤ꧀ꦠꦶ ꦮꦕꦤꦠ꧀ꦡꦺꦴ ꦏꦴꦠꦧ꧀ꦧꦺꦴ. ꦱꦧ꧀ꦧꦥꦢꦺꦱꦹꦠꦶ ‘‘ꦪꦡꦴꦱꦤ꧀ꦢꦶꦛ꧀ꦜꦠꦴ’’ꦠꦶꦄꦴꦢꦷꦱꦸ ꦱꦧ꧀ꦧꦺꦱꦸ ꦥꦢꦺꦱꦹꦠꦶ. ꦌꦏꦴꦢꦱꦩꦁ.

꧑꧒. ꦥꦫꦶꦟꦴꦩꦤꦱꦶꦏ꧀ꦑꦴꦥꦢꦁ

꧔꧘꧙. ꦢ꧀ꦮꦴꦢꦱꦩꦺ ꦪꦤ꧀ꦠꦶ ꦥꦢꦠ꧀ꦡꦮꦶꦤꦶꦕ꧀ꦖꦪꦠ꧀ꦡꦱꦔ꧀ꦑꦴꦠꦁ ꦪꦁ ꦮꦕꦤꦁ. ꦠꦠ꧀ꦡꦴꦠꦶ ꦠꦶꦁꦱꦏꦏꦟ꧀ꦝꦺ. ꦆꦣꦴꦠꦶ ꦢ꧀ꦮꦺꦤꦮꦸꦠꦶꦏꦟ꧀ꦝꦺ, ꦱꦶꦏ꧀ꦑꦴꦥꦢꦺ ꦮꦴ. ꦥꦸꦒ꧀ꦒꦭꦱ꧀ꦱꦴꦠꦶ ꦥꦫꦥꦸꦒ꧀ꦒꦭꦱ꧀ꦱꦴꦠꦶ. ꦢ꧀ꦮꦴꦢꦱꦩꦁ.

ꦱꦲꦣꦩ꧀ꦩꦶꦏꦮꦒ꧀ꦒꦺꦴ ꦄꦛ꧀ꦜꦩꦺꦴ.