ꦤꦩꦺꦴ ꦠꦱ꧀ꦱ ꦨꦒꦮꦠꦺꦴ ꦄꦫꦲꦠꦺꦴ ꦱꦩ꧀ꦩꦴꦱꦩ꧀ꦧꦸꦢ꧀ꦣꦱ꧀ꦱ
ꦩꦗ꧀ꦙꦶꦩꦤꦶꦏꦴꦪꦺ
ꦈꦥꦫꦶꦥꦟ꧀ꦟꦴꦱ-ꦛꦷꦏꦴ
꧑. ꦢꦺꦮꦢꦲꦮꦒ꧀ꦒꦺꦴ
꧑. ꦢꦺꦮꦢꦲꦱꦸꦠ꧀ꦠꦮꦟ꧀ꦟꦤꦴ
꧑. ꦢꦶꦧ꧀ꦧꦤ꧀ꦠꦶ ꦏꦴꦩꦒꦸꦟꦺꦲꦶ ꦏꦷꦭ꦳ꦤ꧀ꦠꦶ, ꦭꦭ꦳ꦤ꧀ꦠꦶ, ꦠꦺꦱꦸ ꦮꦴ ꦮꦶꦲꦫꦤ꧀ꦠꦶ, ꦮꦶꦗꦪꦱꦩꦠ꧀ꦡꦠꦴꦪꦺꦴꦒꦺꦤ ꦥꦕ꧀ꦕꦠ꧀ꦡꦶꦏꦺ ꦮꦶꦗꦺꦠꦸꦁ ꦆꦕ꧀ꦖꦤ꧀ꦠꦶ; ꦆꦱ꧀ꦱꦫꦶꦪꦛ꧀ꦜꦴꦤꦴꦢꦶꦱꦏ꧀ꦏꦴꦫꦢꦴꦤꦒ꧀ꦒꦲꦟꦁ ꦠꦁꦠꦁꦄꦠ꧀ꦡꦴꦤꦸꦱꦴꦱꦤꦚ꧀ꦕ ꦏꦫꦺꦴꦤ꧀ꦠꦴ ꦮꦺꦴꦲꦫꦤ꧀ꦠꦶ, ꦥꦸꦚ꧀ꦚꦴꦤꦸꦨꦴꦮꦥ꧀ꦥꦠ꧀ꦠꦴꦪ ꦗꦸꦠꦶꦪꦴ ꦗꦺꦴꦠꦺꦤ꧀ꦠꦶ ꦮꦴꦠꦶ ꦢꦺꦮꦴ ꦮꦸꦕ꧀ꦕꦤ꧀ꦠꦶ ꦫꦴꦗꦴꦤꦺꦴ. ꦠꦡꦴ ꦲꦶ ꦠꦺ ꦕꦠꦹꦲꦶ ꦱꦔ꧀ꦒꦲꦮꦠ꧀ꦡꦹꦲꦶ ꦗꦤꦁ ꦫꦚ꧀ꦗꦪꦤ꧀ꦠꦴ ꦱꦪꦁ ꦪꦡꦴꦮꦸꦠ꧀ꦠꦺꦲꦶ ꦮꦶꦱꦺꦱꦺꦲꦶ ꦫꦴꦗꦤ꧀ꦠꦶ ꦢꦶꦧ꧀ꦧꦤ꧀ꦠꦶ ꦱꦺꦴꦨꦤ꧀ꦠꦷꦠꦶ ꦕ, ‘‘ꦫꦴꦗꦴꦤꦺꦴ’’ꦠꦶ ꦮꦸꦕ꧀ꦕꦤ꧀ꦠꦶ. ꦠꦠ꧀ꦡꦴꦠꦶ ꦠꦱ꧀ꦩꦶꦁ ꦤꦶꦒꦩꦢꦺꦱꦺ. ꦱꦴꦠꦶ ꦥꦺꦴꦏ꧀ꦑꦫꦟꦷ. ꦠꦤ꧀ꦠꦶ ꦠꦁ, ‘‘ꦢꦺꦮꦢꦲ’’ꦤ꧀ꦠꦶ ꦭꦢ꧀ꦣꦤꦴꦩꦁ ꦥꦺꦴꦏ꧀ꦑꦫꦟꦶꦁ ꦈꦥꦴꦢꦴꦪ, ꦠꦱ꧀ꦱ ꦄꦢꦹꦫꦨꦮꦠ꧀ꦠꦴꦠꦶ ꦏꦺꦕꦶ. ꦱꦧ꧀ꦧꦁ ꦱꦸꦑꦴꦢꦶꦨꦺꦢꦁ ꦮꦺꦢꦪꦶꦠꦁ. ꦥꦸꦧ꧀ꦧꦺꦠꦶ ꦥꦸꦫꦶꦩꦗꦴꦠꦶꦪꦁ. ꦏꦠꦏꦩ꧀ꦩꦥꦕ꧀ꦕꦪꦴꦠꦶ ꦏꦠꦱ꧀ꦱ ꦏꦩ꧀ꦩꦱ꧀ꦱ ꦥꦕ꧀ꦕꦪꦨꦴꦮꦠꦺꦴ ꦗꦴꦠꦁ ꦏꦩ꧀ꦩꦁ ꦥꦛꦶꦕ꧀ꦕ. ꦠꦺꦤ ꦱꦧ꧀ꦧꦴꦥꦶ ꦮꦺꦢꦤꦴ ꦏꦩ꧀ꦩꦦꦭꦨꦹꦠꦴ ꦌꦮ ꦄꦤꦸꦨꦮꦶꦠꦧ꧀ꦧꦴꦠꦶ ꦢꦱ꧀ꦱꦺꦠꦶ. ꦠꦺꦤꦴꦲ ‘‘ꦆꦩꦶꦤꦴ’’ꦠꦶꦄꦴꦢꦶ. ꦄꦤꦶꦪꦩꦺꦠ꧀ꦮꦴ ꦮꦸꦠ꧀ꦠꦤ꧀ꦠꦶ, ‘‘ꦱꦤ꧀ꦠꦶ, ꦨꦶꦏ꧀ꦑꦮꦺ, ꦌꦏꦺ ꦱꦩꦟꦧ꧀ꦫꦴꦲ꧀ꦩꦟꦴ ꦌꦮꦁꦮꦴꦢꦶꦤꦺꦴ’’ꦠꦶ ꦌꦮꦁ ꦆꦩꦺ ꦤꦴꦩꦴꦠꦶ ꦄꦮꦶꦱꦺꦱꦺꦠ꧀ꦮꦴ ꦮꦸꦠ꧀ꦠꦩꦠ꧀ꦡꦁ. ꦤꦶꦪꦩꦺꦠ꧀ꦮꦴꦠꦶ, ‘‘ꦌꦮꦁꦮꦴꦢꦶꦤꦺꦴ, ꦨꦶꦏ꧀ꦑꦮꦺ, ꦤꦶꦒꦟ꧀ꦜꦴ’’ꦠꦶ ꦌꦮꦁ ꦮꦶꦱꦺꦱꦺꦠ꧀ꦮꦴ ꦢꦱ꧀ꦱꦺꦠꦶ.
ꦏꦭꦶꦱꦴꦱꦤꦤ꧀ꦠꦶ ꦥꦫꦴꦗꦪꦁ. ꦏꦭꦷꦠꦶ ꦲꦶ ꦄꦤꦠ꧀ꦡꦺꦴ ꦮꦸꦕ꧀ꦕꦠꦶ, ꦏꦭꦷꦠꦶ ꦱꦱꦠꦶ ꦮꦶꦥ꧀ꦦꦫꦠꦷꦠꦶ ꦏꦭꦶꦱꦴꦱꦤꦁ, ꦥꦫꦴꦗꦪꦺꦴ. ꦏꦭꦷꦠꦶ ꦮꦴ ꦏꦺꦴꦣꦩꦴꦤꦴꦢꦶꦏꦶꦭꦺꦱꦗꦴꦠꦶ, ꦠꦴꦪ ꦥꦤ ꦄꦪꦸꦠ꧀ꦠꦮꦴꦢꦶꦠꦴ ꦏꦭꦶꦱꦴꦱꦤꦁ. ꦠꦁ ꦄꦴꦫꦺꦴꦥꦺꦠꦸꦏꦴꦩꦺꦴ ꦮꦶꦨꦴꦮꦺꦠꦸꦏꦴꦩꦺꦴ. ꦪꦺ ꦏꦩ꧀ꦩꦁ ꦏꦠꦁ ꦄꦏꦠꦁ ꦮꦴꦠꦶ ꦤ ꦗꦴꦤꦤ꧀ꦠꦶ, ꦠꦺ ꦏꦡꦁ ꦠꦁ ꦌꦢꦶꦱꦤ꧀ꦠꦶ ꦗꦴꦤꦶꦱ꧀ꦱꦤ꧀ꦠꦶ. ꦪꦺ ꦕ ꦏꦩ꧀ꦩꦁ ꦥꦨꦺꦢꦠꦺꦴ ꦤ ꦗꦴꦤꦤ꧀ꦠꦶ, ꦠꦺ ꦏꦡꦁ ꦠꦱ꧀ꦱ ꦮꦶꦥꦴꦏꦁ ꦗꦴꦤꦶꦱ꧀ꦱꦤ꧀ꦠꦶ; ꦮꦶꦥꦴꦏꦥꦫꦶꦪꦺꦴꦱꦶꦠꦨꦴꦮꦁ ꦗꦴꦤꦶꦱ꧀ꦱꦤ꧀ꦠꦶ, ꦪꦺ ꦕ ꦥꦴꦥꦱ꧀ꦱ ꦏꦩ꧀ꦩꦱ꧀ꦱ ꦥꦛꦶꦥꦏ꧀ꦑꦩꦺꦮ ꦤ ꦗꦴꦤꦤ꧀ꦠꦶ; ꦠꦺ ꦏꦡꦁ ꦠꦱ꧀ꦱ ꦥꦲꦴꦤꦁ ꦏꦸꦱꦭꦏꦩ꧀ꦩꦱ꧀ꦱ ꦕ ꦱꦩ꧀ꦥꦴꦢꦤꦮꦶꦣꦶꦁ ꦗꦴꦤꦶꦱ꧀ꦱꦤ꧀ꦠꦷꦠꦶ ꦆꦩꦩꦠ꧀ꦡꦁ ꦢꦱ꧀ꦱꦺꦤ꧀ꦠꦺꦴ, ‘‘ꦈꦠ꧀ꦠꦫꦶ ꦥꦸꦕ꧀ꦖꦴꦪꦥꦶ ꦌꦱꦺꦮ ꦤꦪꦺꦴ’’ꦠꦶ ꦄꦴꦲ.
꧒. ꦏꦶꦚ꧀ꦕꦴꦥꦶ ꦕꦹꦭ꦳ꦢꦸꦏ꧀ꦑꦏ꧀ꦑꦤ꧀ꦣꦺꦥꦶ, (ꦩ. ꦤꦶ. ꧑.꧑꧘꧐) ‘‘ꦌꦮꦁ ꦱꦤ꧀ꦠꦺ’’ꦠꦶ ꦆꦩꦶꦤꦴ ꦠꦺꦱꦁ ꦤꦶꦒꦟ꧀ꦜꦴꦤꦁ ꦄꦗꦴꦤꦤꦨꦴꦮꦺꦴ ꦌꦮ ꦈꦗꦸꦏꦁ ꦥꦏꦴꦱꦶꦠꦺꦴ ꦲꦺꦛ꧀ꦜꦴ ꦢꦺꦱꦤꦴꦪ ꦠꦡꦴ ꦥꦮꦠ꧀ꦠꦠ꧀ꦠꦴ. ꦠꦡꦴ ꦲꦶ ꦄꦛ꧀ꦜꦏꦡꦴꦪꦁ (ꦩ. ꦤꦶ. ꦄꦛ꧀ꦜ. ꧑.꧑꧘꧐) ꦮꦸꦠ꧀ꦠꦁ – ‘‘ꦌꦮꦁ ꦱꦤ꧀ꦠꦺꦠꦶ ꦠꦸꦩ꧀ꦲꦴꦏꦁ ꦌꦮꦁ ꦄꦗꦴꦤꦤꦨꦴꦮꦺ ꦱꦠꦷ’’ꦠꦶ, ꦠꦡꦴꦥꦶ ꦠꦠ꧀ꦡ ꦈꦥꦫꦶꦢꦺꦱꦤꦴꦪ ꦱꦩ꧀ꦧꦢ꧀ꦣꦺꦴ ꦌꦮꦩꦠ꧀ꦡꦺꦴ ꦮꦸꦕ꧀ꦕꦩꦴꦤꦺꦴ ꦪꦸꦗ꧀ꦗꦠꦶ, ꦤ ꦄꦚ꧀ꦚꦡꦴꦠꦶ ꦢꦱ꧀ꦱꦺꦠꦸꦁ ꦆꦣ, ‘‘ꦩꦲꦴꦤꦶꦒꦟ꧀ꦜꦱ꧀ꦱ ꦮꦕꦤꦺ ꦱꦕ꧀ꦕꦺ ꦱꦤ꧀ꦠꦺꦠꦶ ꦄꦠ꧀ꦡꦺꦴ’’ꦠꦶ ꦮꦸꦠ꧀ꦠꦁ. ꦌꦠ꧀ꦠꦏꦱ꧀ꦱ ꦜꦴꦤꦱ꧀ꦱꦴꦠꦶ ꦪꦡꦴꦮꦸꦠ꧀ꦠꦱ꧀ꦱ ꦥꦚ꧀ꦕꦥꦫꦶꦩꦴꦟꦱ꧀ꦱ ꦏꦴꦫꦟꦱ꧀ꦱ.
꧓. ꦄꦤꦺꦏꦮꦴꦫꦁ ꦮꦶꦱꦫꦚ꧀ꦗꦤꦁ ꦆꦣ ꦒꦴꦭ꦳꧀ꦲꦴꦥꦭꦺꦥꦤꦁ, ꦤ ꦱꦴꦛꦏꦱ꧀ꦱ ꦮꦶꦪ ꦭꦶꦠ꧀ꦠꦠꦴꦠꦶ ꦄꦴꦲ – ‘‘ꦧꦲꦭꦹꦥ…ꦥꦺ… ꦭꦶꦠ꧀ꦠꦺꦤ ꦮꦶꦪꦴ’’ꦠꦶ. ꦮꦸꦠ꧀ꦠꦩꦺꦮ, ꦤ ꦥꦸꦤ ꦮꦠ꧀ꦠꦧ꧀ꦧꦁ, ꦠꦠ꧀ꦡ ꦮꦸꦠ꧀ꦠꦤꦪꦺꦤꦺꦮ ꦮꦺꦢꦶꦠꦧ꧀ꦧꦤ꧀ꦠꦶ ꦄꦣꦶꦥ꧀ꦥꦴꦪꦺꦴ.
ꦆꦩꦺꦱꦁ ꦤꦶꦒꦟ꧀ꦜꦴꦤꦁ ꦠꦴꦢꦶꦱꦱ꧀ꦱ ꦠꦺꦱꦁ ꦄꦨꦴꦮꦠꦺꦴ, ‘‘ꦗꦴꦤꦤꦏꦴꦭꦺꦴ ꦱꦶꦪꦴ’’ꦠꦶ ꦥꦫꦶꦏꦥ꧀ꦥꦮꦱꦺꦤ ꦮꦢꦠꦶ. ꦠꦺꦤ ꦌꦮꦁ ꦗꦴꦤꦶꦠꦸꦁ ꦠꦺꦲꦶ ꦱꦏ꧀ꦏꦴ ꦱꦶꦪꦴ, ꦠꦺꦱꦚ꧀ꦕ ꦢꦱ꧀ꦱꦤꦁ ꦱꦕ꧀ꦕꦁ ꦱꦶꦪꦴ. ꦪꦱ꧀ꦩꦴ ꦠꦺꦱꦁ ꦢꦱ꧀ꦱꦤꦁ ꦄꦱꦕ꧀ꦕꦁ, ꦠꦱ꧀ꦩꦴ ꦠꦺ ꦤ ꦗꦴꦤꦶꦁꦱꦹꦠꦶ ꦢꦱ꧀ꦱꦺꦠꦶ. ꦕꦠꦹꦱꦸ ꦏꦴꦭꦺꦱꦹꦠꦶ ꦮꦟꦩꦸꦑꦱ꧀ꦱ ꦥꦫꦶꦏꦤ꧀ꦠꦤꦏꦴꦭꦺꦴ, ꦱꦭ꧀ꦭꦱ꧀ꦱ ꦌꦱꦤꦏꦴꦭꦺꦴ, ꦄꦧ꧀ꦧꦸꦲꦤꦏꦴꦭꦺꦴ, ꦮꦟꦩꦸꦑꦺ ꦄꦒꦢꦔ꧀ꦒꦴꦫꦎꦢꦲꦤꦏꦴꦭꦺꦴꦠꦶ ꦆꦩꦺꦱꦸ ꦕꦠꦹꦱꦸ ꦏꦴꦭꦺꦱꦸ. ꦱꦸꦢ꧀ꦣꦤ꧀ꦠꦺꦠꦶ ꦱꦸꦢ꧀ꦣꦏꦺꦴꦛ꧀ꦜꦴꦱꦺ, ꦢꦸꦏ꧀ꦑꦱ꧀ꦱ ꦄꦤꦮꦱꦺꦱꦠꦺꦴ ꦤꦶꦗ꧀ꦗꦷꦫꦟꦛ꧀ꦜꦺꦤ ꦤꦶꦢ꧀ꦢꦸꦏ꧀ꦑꦨꦴꦮꦺꦠꦶ ꦄꦠ꧀ꦡꦺꦴ. ꦌꦏꦴꦪ ꦈꦥꦩꦴꦪꦴꦠꦶ, ‘‘ꦱꦭ꧀ꦭꦺꦤ ꦮꦶꦢ꧀ꦣꦱ꧀ꦱ ꦲꦶ ꦮꦶꦢ꧀ꦣꦏꦴꦭꦺ ꦮꦺꦢꦤꦴꦪ ꦥꦴꦏꦛꦏꦴꦭꦺꦴ ꦮꦶꦪꦴ’’ꦠꦶ ꦆꦩꦴꦪ ꦌꦏꦴꦪ ꦈꦥꦩꦴꦪ. ꦠꦪꦺꦴ ꦄꦠ꧀ꦡꦴꦠꦶ ꦥꦸꦧ꧀ꦧꦺ ꦄꦲꦸꦮꦩ꧀ꦲꦴ ꦮꦴ ꦤꦺꦴ ꦮꦴ, ꦥꦴꦥꦏꦩ꧀ꦩꦁ ꦄꦏꦫꦶꦩ꧀ꦲꦴ ꦮꦴ ꦤꦺꦴ ꦮꦴ, ꦌꦮꦫꦹꦥꦁ ꦮꦴ ꦥꦴꦥꦏꦩ꧀ꦩꦁ ꦄꦏꦫꦶꦩ꧀ꦲꦴꦠꦶ ꦆꦩꦺ ꦠꦪꦺꦴ ꦄꦠ꧀ꦡꦴ. ꦕꦠꦹꦲꦶ ꦈꦥꦩꦴꦲꦷꦠꦶ ꦮꦟꦩꦸꦑꦥꦫꦶꦏꦤ꧀ꦠꦤꦴꦢꦷꦲꦶ ꦕꦠꦹꦲꦶ ꦈꦥꦩꦴꦲꦶ. ꦌꦏꦺꦴ ꦄꦠ꧀ꦡꦺꦴꦠꦶ, ‘‘ꦌꦠ꧀ꦠꦏꦁ ꦢꦸꦏ꧀ꦑꦁ ꦤꦶꦗ꧀ꦗꦶꦟ꧀ꦟ’’ꦤ꧀ꦠꦶꦄꦴꦢꦶꦤꦴ ꦮꦸꦠ꧀ꦠꦺꦴ ꦌꦏꦺꦴ ꦄꦠ꧀ꦡꦺꦴ. ꦱꦺꦴ ꦲꦶ ꦢꦸꦏ꧀ꦑꦤꦶꦗ꧀ꦗꦷꦫꦟꦨꦴꦮꦱꦴꦩꦚ꧀ꦚꦴ ꦌꦏꦺꦴ ꦄꦠ꧀ꦡꦺꦴꦠꦶ ꦮꦸꦠ꧀ꦠꦺꦴ.
꧔. ꦆꦩꦺ ꦥꦤ ꦤꦶꦒꦟ꧀ꦜꦴ. ꦄꦴꦱꦔ꧀ꦏꦴꦪ ꦮꦶꦢ꧀ꦣꦺꦴꦱ꧀ꦩꦷꦠꦶ ꦱꦚ꧀ꦚꦁ ꦈꦥ꧀ꦥꦴꦢꦺꦠ꧀ꦮꦴ. ꦥꦕ꧀ꦕꦴꦲꦫꦶꦠꦸꦤ꧀ꦠꦶ ꦥꦕ꧀ꦕꦴꦮꦠ꧀ꦠꦶꦠꦸꦁ, ꦥꦫꦶꦲꦫꦶꦠꦸꦤ꧀ꦠꦶ ꦄꦠ꧀ꦡꦺꦴ.
꧕. ꦄꦠꦷꦠꦮꦴꦢꦁ ꦱꦢ꧀ꦢꦲꦤ꧀ꦠꦴꦤꦤ꧀ꦠꦶ, ‘‘ꦄꦠ꧀ꦡꦶ ꦑꦺꦴ, ꦨꦺꦴ, ꦤꦶꦒꦟ꧀ꦜꦴ ꦥꦸꦧ꧀ꦧꦺ ꦥꦴꦥꦏꦩ꧀ꦩꦁ ꦏꦠ’’ꦤ꧀ꦠꦶ ꦌꦮꦁ ꦄꦠꦷꦠꦁꦱꦁ ꦄꦴꦫꦧ꧀ꦨ ꦥꦮꦠ꧀ꦠꦁ ꦩꦲꦴꦤꦶꦒꦟ꧀ꦜꦱ꧀ꦱ ꦮꦴꦢꦁ ꦱꦢ꧀ꦢꦲꦤ꧀ꦠꦴꦤꦁ. ꦨꦹꦠꦠ꧀ꦠꦴꦠꦶ ꦪꦡꦴꦨꦹꦠꦠ꧀ꦠꦴ ꦏꦶꦁ ꦄꦮꦶꦥꦫꦷꦠꦩꦺꦮ ꦄꦠ꧀ꦡꦁ ꦄꦴꦫꦩ꧀ꦩꦟꦁ ꦏꦠ꧀ꦮꦴ ꦥꦮꦠ꧀ꦠꦴꦠꦶ ꦥꦸꦕ꧀ꦖꦠꦶ. ꦱꦺꦱꦥꦢꦺꦱꦸꦥꦶ ꦌꦱꦺꦮ ꦤꦪꦺꦴ. ꦱꦲ ꦣꦩ꧀ꦩꦺꦤꦴꦠꦶ ꦱꦲꦣꦩ꧀ꦩꦺꦴ, ꦱꦺꦴ ꦌꦮ ꦱꦲꦣꦩ꧀ꦩꦶꦏꦺꦴ ꦪꦡꦴ ‘‘ꦮꦺꦤꦪꦶꦏꦺꦴ’’ꦠꦶ (ꦄ. ꦤꦶ. ꧘.꧑꧑; ꦥꦴꦫꦴ. ꧘). ‘‘ꦣꦩ꧀ꦩꦺꦴ’’ꦠꦶ ꦌꦠ꧀ꦡ ꦏꦴꦫꦟꦁ ꦄꦣꦶꦥ꧀ꦥꦺꦠꦤ꧀ꦠꦶ ꦄꦴꦲ – ‘‘ꦱꦲꦺꦠꦸꦏꦁ ꦱꦏꦴꦫꦟ’’ꦤ꧀ꦠꦶ. ꦥꦛꦶꦲꦫꦠꦶ ꦥꦛꦶꦮꦠ꧀ꦠꦺꦠꦷꦠꦶ ꦥꦛꦶꦲꦴꦫꦺꦴ, ꦮꦴꦢꦺꦴ ꦌꦮ ꦥꦛꦶꦲꦴꦫꦺꦴ ꦮꦴꦢꦥꦛꦶꦲꦴꦫꦺꦴ; ꦠꦁ, ꦈꦠ꧀ꦠꦫꦤ꧀ꦠꦶ ꦄꦠ꧀ꦡꦺꦴ. ꦠꦺꦤꦴꦲ – ‘‘ꦥꦕ꧀ꦕꦴꦒꦩꦤꦏꦮꦴꦢ’’ꦤ꧀ꦠꦶ, ꦕꦺꦴꦢꦤꦁ ꦥꦫꦶꦮꦠ꧀ꦠꦺꦠ꧀ꦮꦴ ꦥꦛꦶꦥꦴꦏꦠꦶꦏꦏꦫꦟꦤ꧀ꦠꦶ ꦄꦠ꧀ꦡꦺꦴ. ꦠꦺꦱꦤ꧀ꦠꦶ ꦆꦢꦁ ꦄꦴꦮꦸꦠ꧀ꦠꦶꦮꦱꦺꦤ ꦒꦲꦺꦠꦧ꧀ꦧꦁ, ‘‘ꦠꦺꦱꦁ ꦱꦢ꧀ꦣꦴꦖꦺꦢꦏꦮꦴꦢꦁ ꦤꦴꦩ ꦠꦺꦱꦁ ꦢꦱ꧀ꦱꦺꦠꦷ’’ꦠꦶ.
꧖. ꦄꦮꦶꦗ꧀ꦗꦴ ꦄꦚ꧀ꦚꦴꦟꦴ ꦱꦩ꧀ꦩꦺꦴꦲꦴꦠꦶ ꦥꦫꦶꦪꦴꦪꦮꦕꦤꦩꦺꦠꦁ. ꦄꦮꦶꦗ꧀ꦗꦴꦠꦶ ꦮꦴ ꦄꦮꦶꦗ꧀ꦗꦴꦪ ꦏꦫꦟꦨꦹꦠꦴꦪ. ꦄꦚ꧀ꦚꦴꦟꦺꦤꦴꦠꦶ ꦄꦗꦴꦤꦤꦺꦤ. ꦱꦩ꧀ꦩꦺꦴꦲꦺꦤꦴꦠꦶ ꦱꦩ꧀ꦩꦸꦪ꧀ꦲꦤꦺꦤ ꦩꦲꦴꦩꦸꦭ꦳꧀ꦲꦠꦴꦪ. ꦱꦴꦩꦁꦪꦺꦮ ꦎꦥꦏ꧀ꦏꦩꦶꦏꦴ ꦌꦠꦫꦲꦶ ꦄꦠ꧀ꦠꦤꦺꦴ ꦈꦥꦏ꧀ꦏꦩꦲꦺꦠꦸ ꦢꦸꦏ꧀ꦑꦮꦺꦢꦤꦁ ꦮꦺꦢꦶꦪꦩꦴꦤꦁ – ‘‘ꦪꦁꦏꦶꦚ꧀ꦕꦴꦪꦁ…ꦥꦺ… ꦥꦸꦧ꧀ꦧꦺꦏꦠꦲꦺꦠꦹ’’ꦠꦶ ꦮꦶꦥꦫꦷꦠꦠꦺꦴ ꦱꦢ꧀ꦢꦲꦡ. ꦥꦸꦧ꧀ꦧꦺꦏꦠꦲꦺꦠꦸꦮꦴꦢꦱꦚ꧀ꦚꦶꦠꦁ ꦮꦶꦥꦭ꧀ꦭꦴꦱꦒ꧀ꦒꦴꦲꦁ ꦒꦟ꧀ꦲꦡ.
꧗. ꦢꦶꦛ꧀ꦜꦣꦩ꧀ꦩꦺꦴ ꦮꦸꦕ꧀ꦕꦠꦶ ꦥꦕ꧀ꦕꦏ꧀ꦑꦨꦹꦠꦺꦴ, ꦠꦠ꧀ꦡ ꦮꦺꦢꦶꦠꦧ꧀ꦧꦁ ꦦꦭꦁ ꦢꦶꦛ꧀ꦜꦣꦩ꧀ꦩꦮꦺꦢꦤꦷꦪꦁ. ꦠꦺꦤꦴꦲ – ‘‘ꦆꦩꦱ꧀ꦩꦶꦁꦪꦺꦮ ꦄꦠ꧀ꦠꦨꦴꦮꦺ ꦮꦶꦥꦴꦏꦢꦴꦪꦏ’’ꦤ꧀ꦠꦶ. ꦥꦪꦺꦴꦒꦺꦤꦴꦠꦶ ꦏꦴꦪꦶꦏꦺꦤ ꦥꦪꦺꦴꦒꦺꦤ ꦮꦴ ꦮꦴꦕꦱꦶꦏꦺꦤ ꦮꦴ ꦥꦪꦺꦴꦒꦺꦤ. ꦥꦣꦴꦤꦺꦤꦴꦠꦶ ꦥꦢꦲꦤꦺꦤ ꦕꦺꦠꦱꦶꦏꦺꦤ ꦈꦱ꧀ꦱꦴꦲꦤꦺꦤ. ꦄꦴꦱꦤ꧀ꦤꦺ ꦨꦮꦤ꧀ꦠꦫꦺ ꦮꦶꦥꦴꦕꦺꦠꦸꦁ ꦤ ꦱꦏ꧀ꦏꦴ, ꦥꦒꦺꦮ ꦢꦹꦫꦺꦠꦶ ꦢꦱ꧀ꦱꦺꦠꦸꦁ, ‘‘ꦢꦸꦠꦶꦪꦺ ꦮꦴ ꦠꦠꦶꦪꦺ ꦮꦴ ꦄꦠ꧀ꦠꦨꦴꦮꦺ’’ꦠꦶ ꦮꦸꦠ꧀ꦠꦁ. ꦤꦶꦧ꧀ꦧꦠ꧀ꦠꦏꦨꦴꦮꦠꦺꦴ ꦱꦸꦑꦮꦺꦢꦤꦴꦪ ꦲꦶꦠꦤ꧀ꦠꦶ ꦱꦸꦑꦮꦺꦢꦤꦷꦪꦁ. ꦱꦴ ꦥꦤ ꦮꦶꦥꦴꦏꦮꦺꦢꦤꦴꦨꦴꦮꦠꦺꦴ ꦌꦏꦤ꧀ꦠꦠꦺꦴ ꦆꦛ꧀ꦜꦴꦫꦩ꧀ꦩꦟꦴ ꦌꦮ ꦲꦺꦴꦠꦷꦠꦶ ꦄꦴꦲ ‘‘ꦆꦛ꧀ꦜꦴꦫꦩ꧀ꦩꦟꦮꦶꦥꦴꦏꦢꦴꦪꦏ’’ꦤ꧀ꦠꦶ. ꦮꦶꦥꦫꦷꦠꦤ꧀ꦠꦶ ꦄꦤꦶꦛ꧀ꦜꦴꦫꦩ꧀ꦩꦟꦮꦶꦥꦴꦏꦢꦴꦪꦏꦁ. ꦤꦶꦥ꧀ꦦꦤ꧀ꦤꦺꦠꦶ ꦱꦢ꧀ꦣꦶꦁ ꦄꦚ꧀ꦚꦺꦤ ꦏꦩ꧀ꦩꦺꦤ ꦤꦶꦧ꧀ꦧꦠ꧀ꦠꦺ. ꦱꦩ꧀ꦥꦫꦴꦪꦮꦺꦢꦤꦷꦪꦱ꧀ꦱꦴꦠꦶ ꦈꦥꦥꦗ꧀ꦗꦮꦺꦢꦤꦷꦪꦱ꧀ꦱ ꦄꦥꦫꦴꦥꦫꦶꦪꦮꦺꦢꦤꦷꦪꦱ꧀ꦱ. ꦌꦮꦁ ꦱꦤ꧀ꦠꦺꦥꦷꦠꦶ ꦏꦴꦩꦁ ꦥꦫꦶꦥꦏ꧀ꦏꦮꦺꦢꦤꦷꦪꦤ꧀ꦠꦶ ꦢꦶꦛ꧀ꦜꦣꦩ꧀ꦩꦮꦺꦢꦤꦷꦪꦩꦺꦮ ꦮꦸꦕ꧀ꦕꦠꦶ, ꦠꦡꦴꦥꦶ ꦄꦠ꧀ꦡꦺꦠ꧀ꦡ ꦄꦠꦶꦱꦪꦺꦴ ꦢꦶꦛ꧀ꦜꦣꦩ꧀ꦩꦮꦶꦱꦺꦱꦨꦴꦮꦠꦺꦴ ꦥꦫꦶꦥꦏ꧀ꦏꦮꦺꦢꦤꦷꦪꦱ꧀ꦱꦴꦠꦶ ꦢꦱ꧀ꦱꦺꦠꦸꦁ, ‘‘ꦄꦪꦩꦺꦠ꧀ꦡꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦪꦱ꧀ꦩꦶꦁ ꦢꦶꦮꦱꦺ ꦏꦠꦁ, ꦠꦠꦺꦴ ꦱꦠ꧀ꦠꦢꦶꦮꦱꦧ꧀ꦨꦤ꧀ꦠꦫꦺ.
ꦠꦠ꧀ꦫꦴꦠꦶ ꦠꦱ꧀ꦩꦶꦁ ꦥꦫꦶꦥꦏ꧀ꦏꦮꦺꦢꦤꦷꦪꦏꦩ꧀ꦩꦱ꧀ꦱ ꦱꦠ꧀ꦠꦢꦶꦮꦱꦧ꧀ꦨꦤ꧀ꦠꦫꦺ ꦮꦶꦥꦴꦏꦢꦴꦤꦺ. ꦌꦏꦮꦴꦫꦁ ꦏꦱꦶꦠ꧀ꦮꦴ ꦤꦶꦱꦷꦢꦶ ꦖꦴꦠꦗ꧀ꦙꦠ꧀ꦠꦺꦴ ꦲꦸꦠ꧀ꦮꦴ. ꦄꦴꦒꦕ꧀ꦖꦤ꧀ꦠꦷ ꦄꦴꦲ – ‘‘ꦈꦱ꧀ꦱꦹꦫꦺ ꦨꦠ꧀ꦠꦁ ꦄꦴꦲꦫꦷꦪꦶꦠ꧀ꦡꦴ’’ꦠꦶ ꦢꦺꦴꦩꦤꦱ꧀ꦱꦁ ꦄꦤꦸꦥ꧀ꦥꦴꦢꦺꦠ꧀ꦮꦴ ꦪꦡꦴ ꦏꦠꦥꦸꦚ꧀ꦚꦁ ꦄꦤꦸꦩꦺꦴꦢꦠꦶ. ꦮꦶꦗ꧀ꦗꦺꦴꦠꦩꦴꦤꦁ ꦢꦶꦱ꧀ꦮꦴ, ‘‘ꦏꦶꦁ ꦤꦸ ꦑꦺꦴ ꦆꦢꦩ꧀ꦥꦶ ꦠꦥ꧀ꦥꦏꦴꦫꦺꦴ, ꦩꦩ ꦕꦶꦠ꧀ꦠꦮꦶꦏꦥ꧀ꦥꦩꦠ꧀ꦠꦁ, ꦈꦢꦴꦲꦸ ꦱꦸꦮꦟ꧀ꦟꦩꦺꦮꦴ’’ꦠꦶ ꦮꦷꦩꦁꦱꦤ꧀ꦠꦺꦴ ꦪꦛ꧀ꦜꦶꦪꦴ ꦥꦲꦫꦶꦠ꧀ꦮꦴ.
ꦮꦴꦭ꦳ꦪꦏ꧀ꦑꦱꦚ꧀ꦕꦫꦟꦠ꧀ꦠꦴ ꦫꦴꦗꦒꦲꦹꦥꦕꦴꦫꦱ꧀ꦱ ꦤꦒꦫꦺ ꦱꦲꦱ꧀ꦱꦨꦟ꧀ꦝꦶꦏꦁ ꦕꦴꦫꦺꦱꦸꦁ. ꦈꦥ꧀ꦥꦤ꧀ꦤꦫꦴꦒꦺꦴ ꦕꦹꦭ꦳ꦴꦪ ꦝꦁꦱꦶ. ꦫꦚ꧀ꦚꦺꦴ ꦄꦴꦕꦶꦏ꧀ꦑꦶꦠ꧀ꦮꦴꦠꦶ ꦠꦁ ꦥꦮꦠ꧀ꦠꦶꦁ ꦫꦚ꧀ꦚꦺꦴ ꦄꦴꦕꦶꦏ꧀ꦑꦶꦠ꧀ꦮꦴ. ꦩꦭ꧀ꦭꦶꦏꦴꦪ ꦮꦠ꧀ꦡꦸ ꦣꦩ꧀ꦩꦥꦢꦮꦠ꧀ꦡꦸꦩ꧀ꦲꦶ (ꦣ. ꦥ. ꦄꦛ꧀ꦜ. ꧒.ꦩꦭ꧀ꦭꦶꦏꦴꦢꦺꦮꦷꦮꦠ꧀ꦡꦸ) ꦄꦴꦒꦠꦺꦤ ꦤꦪꦺꦤ ꦏꦡꦺꦠꦧ꧀ꦧꦁ.
ꦩꦫꦟꦱꦤ꧀ꦠꦶꦏꦺꦥꦶ ꦏꦠꦁ, ꦥꦒꦺꦮ ꦠꦠꦺꦴ ꦥꦸꦫꦺꦠꦫꦁ ꦄꦠꦷꦠꦠ꧀ꦠꦨꦴꦮꦺꦱꦸ ꦕ ꦏꦠꦁ. ꦆꦣ ꦤꦶꦧ꧀ꦧꦠ꧀ꦠꦶꦠꦮꦶꦥꦴꦏꦺꦴꦠꦶ ꦮꦸꦠ꧀ꦠꦺꦴ ꦄꦮꦱ꧀ꦱꦁꦨꦴꦮꦶꦨꦴꦮꦠꦺꦴ. ꦱꦩ꧀ꦥꦫꦴꦪꦮꦺꦢꦤꦷꦪꦩꦺꦮ ꦨꦮꦤ꧀ꦠꦫꦺ ꦮꦶꦥꦴꦏꦢꦴꦪꦏꦨꦴꦮꦠꦺꦴ. ꦆꦣ ꦤꦶꦧ꧀ꦧꦠ꧀ꦠꦶꦠꦒꦸꦟꦺꦴꦠ꧀ꦮꦺꦮ ꦮꦸꦠ꧀ꦠꦺꦴ, ꦤ ꦆꦣ ꦤꦶꦧ꧀ꦧꦠ꧀ꦠꦶꦠꦮꦶꦥꦴꦏꦺꦴꦠꦶ ꦮꦶꦩꦸꦠ꧀ꦠꦶꦨꦴꦮꦠꦺꦴ. ꦥꦫꦶꦥꦏ꧀ꦏꦮꦺꦢꦤꦷꦪꦤ꧀ꦠꦶ ꦮꦺꦢꦶꦠꦧ꧀ꦧꦁ ꦲꦺꦛ꧀ꦜꦴ ꦮꦸꦠ꧀ꦠꦥꦫꦶꦥꦏ꧀ꦏꦮꦺꦢꦤꦷꦪꦭꦏ꧀ꦑꦟꦴꦤꦠꦶꦮꦠ꧀ꦠꦤꦠꦺꦴ. ꦱꦧ꧀ꦧꦭꦲꦸꦁ ꦦꦭꦢꦴꦪꦶꦏꦴꦠꦶ ꦌꦠꦺꦤ ꦦꦭꦸꦥ꧀ꦥꦴꦢꦤꦱꦩꦠ꧀ꦡꦠꦴꦪꦺꦴꦒꦺꦤ ꦏꦩ꧀ꦩꦱ꧀ꦱ ꦥꦫꦶꦥꦏ꧀ꦏꦮꦺꦢꦤꦷꦪꦠꦴꦠꦶ ꦢꦱ꧀ꦱꦺꦠꦶ.
ꦕꦠꦸꦥ꧀ꦥꦚ꧀ꦕꦏ꧀ꦑꦤ꧀ꦣꦦꦭꦠꦴꦪ ꦱꦚ꧀ꦚꦴꦨꦮꦹꦥꦒꦁ ꦏꦩ꧀ꦩꦁ ꦧꦲꦸꦮꦺꦢꦤꦷꦪꦤ꧀ꦠꦶ ꦮꦸꦠ꧀ꦠꦁ. ꦌꦏꦑꦤ꧀ꦣꦦꦭꦠ꧀ꦠꦴ ꦄꦱꦚ꧀ꦚꦴꦨꦮꦹꦥꦒꦁ ꦏꦩ꧀ꦩꦁ ꦄꦥ꧀ꦥꦮꦺꦢꦤꦷꦪꦁ. ꦏꦺꦕꦶ ꦥꦤ, ‘‘ꦄꦫꦹꦥꦴꦮꦕꦫꦏꦩ꧀ꦩꦁ ꦧꦲꦸꦏꦴꦭꦁ ꦮꦺꦢꦶꦠꦧ꧀ꦧꦦꦭꦠ꧀ꦠꦴ ꦧꦲꦸꦮꦺꦢꦤꦷꦪꦁ, ꦆꦠꦫꦁ ꦄꦥ꧀ꦥꦮꦺꦢꦤꦷꦪꦁ. ꦫꦹꦥꦴꦫꦹꦥꦴꦮꦕꦫꦏꦩ꧀ꦩꦁ ꦮꦴ ꦧꦲꦸꦮꦺꦢꦤꦷꦪꦁ, ꦥꦫꦶꦠ꧀ꦠꦏꦩ꧀ꦩꦁ ꦄꦥ꧀ꦥꦮꦺꦢꦤꦷꦪ’’ꦤ꧀ꦠꦶ ꦮꦢꦤ꧀ꦠꦶ. ꦱꦮꦶꦥꦴꦏꦁ ꦏꦩ꧀ꦩꦤ꧀ꦠꦶ ꦥꦕ꧀ꦕꦪꦤ꧀ꦠꦫꦱꦩꦮꦴꦪꦺ ꦮꦶꦥꦴꦏꦸꦥ꧀ꦥꦴꦢꦤꦱꦩꦠ꧀ꦡꦁ, ꦤ ꦄꦴꦫꦢ꧀ꦣꦮꦶꦥꦴꦏꦩꦺꦮ. ꦄꦮꦶꦥꦴꦏꦁ ꦏꦩ꧀ꦩꦤ꧀ꦠꦶ ꦥꦕ꧀ꦕꦪꦮꦺꦏꦭ꧀ꦭꦺꦤ ꦮꦶꦥꦕ꧀ꦕꦶꦠꦸꦁ ꦄꦱꦩꦠ꧀ꦡꦁ ꦄꦲꦺꦴꦱꦶꦏꦩ꧀ꦩꦴꦢꦶꦨꦺꦢꦁ.
꧘. ꦢꦶꦛ꧀ꦜꦣꦩ꧀ꦩꦮꦺꦢꦤꦷꦪꦴꦢꦷꦤꦤ꧀ꦠꦶ ꦢꦶꦛ꧀ꦜꦣꦩ꧀ꦩꦮꦺꦢꦤꦷꦪꦴꦢꦷꦤꦁ ꦢꦱꦤ꧀ꦤꦁ ꦏꦩ꧀ꦩꦴꦤꦁ ꦈꦥꦏ꧀ꦏꦩꦺꦤ ꦏꦩ꧀ꦩꦴꦤꦁ ꦄꦚ꧀ꦚꦴꦡꦴꦨꦴꦮꦱ꧀ꦱ ꦄꦤꦴꦥꦴꦢꦤꦷꦪꦠ꧀ꦠꦴ ꦪꦡꦴꦱꦨꦴꦮꦺꦤꦺꦮ ꦏꦩ꧀ꦩꦴꦤꦶ ꦠꦶꦛ꧀ꦜꦤ꧀ꦠꦶ. ꦠꦠ꧀ꦡ ꦤꦶꦒꦟ꧀ꦜꦴꦤꦁ ꦈꦥꦏ꧀ꦏꦩꦺꦴ ꦤꦶꦥ꧀ꦥꦪꦺꦴꦗꦤꦺꦴꦠꦶ ꦄꦴꦲ ‘‘ꦄꦦꦭꦺꦴ’’ꦠꦶ. ꦤꦶꦒꦟ꧀ꦜꦴꦤꦁ ꦥꦢꦲꦤꦱ꧀ꦱ ꦩꦶꦕ꧀ꦖꦴꦮꦴꦪꦴꦩꦱ꧀ꦱ ꦤꦶꦥ꧀ꦦꦭꦨꦴꦮꦥ꧀ꦥꦮꦺꦢꦤꦺꦴ ꦥꦣꦴꦤꦕ꧀ꦖꦺꦢꦏꦮꦴꦢꦺꦴ. ꦥꦫꦺꦲꦶ ꦮꦸꦠ꧀ꦠꦏꦴꦫꦟꦺꦲꦷꦠꦶ ꦪꦺꦲꦶ ꦏꦴꦫꦟꦺꦲꦶ ꦤꦶꦒꦟ꧀ꦜꦴꦤꦁ ꦮꦴꦢꦺꦱꦸ ꦢꦺꦴꦱꦁ ꦢꦱ꧀ꦱꦺꦤ꧀ꦠꦶ. ꦠꦺꦲꦶ ꦥꦫꦺꦲꦶ ꦮꦸꦠ꧀ꦠꦏꦴꦫꦟꦺꦲꦶ. ꦤ ꦲꦶ ꦭꦏ꧀ꦑꦟꦪꦸꦠ꧀ꦠꦺꦤ ꦲꦺꦠꦸꦤꦴ ꦮꦶꦤꦴ ꦥꦫꦮꦴꦢꦺꦱꦸ ꦢꦺꦴꦱꦁ ꦢꦱ꧀ꦱꦺꦠꦸꦁ ꦱꦏ꧀ꦏꦴ. ꦠꦺꦤꦴꦲ ‘‘ꦱꦏꦴꦫꦟꦴ ꦲꦸꦠ꧀ꦮꦴ’’ꦠꦶ. ꦤꦶꦒꦟ꧀ꦜꦴꦤꦁ ꦮꦴꦢꦴ ꦕ ꦄꦤꦸꦮꦴꦢꦴ ꦕꦴꦠꦶ ꦤꦶꦒꦟ꧀ꦜꦺꦲꦶ ꦮꦸꦕ꧀ꦕꦩꦴꦤꦴ ꦱꦏꦱꦏꦱꦩꦪꦥ꧀ꦥꦮꦺꦢꦶꦏꦴ ꦮꦴꦢꦴꦕꦺꦮ ꦱꦴꦮꦏꦺꦲꦶ ꦮꦸꦕ꧀ꦕꦩꦴꦤꦴ ꦠꦺꦱꦁ ꦄꦤꦸꦮꦴꦢꦴ ꦕ. ꦮꦶꦚ꧀ꦚꦹꦲꦶ ꦒꦫꦲꦶꦠꦧ꧀ꦧꦁ ꦏꦴꦫꦟꦁ ꦄꦴꦒꦕ꧀ꦖꦤ꧀ꦠꦷꦠꦶ, ‘‘ꦄꦪꦩꦺꦠ꧀ꦡ ꦢꦺꦴꦱꦺꦴ’’ꦠꦶ ꦠꦠ꧀ꦡ ꦠꦠ꧀ꦡ ꦮꦶꦚ꧀ꦚꦹꦲꦶ ꦥꦟ꧀ꦝꦶꦠꦺꦲꦶ ꦒꦫꦲꦴꦫꦲꦁ ꦏꦴꦫꦟꦁ ꦈꦥꦒꦕ꧀ꦖꦤ꧀ꦠꦶ, ꦥꦴꦥꦸꦟꦤ꧀ꦠꦷꦠꦶ ꦄꦠ꧀ꦡꦺꦴ. ꦠꦱ꧀ꦱꦠ꧀ꦡꦺꦴꦠꦶꦄꦴꦢꦷꦱꦸ ꦄꦪꦁ ꦱꦔ꧀ꦑꦺꦥꦠ꧀ꦡꦺꦴ, ‘‘ꦮꦸꦠ꧀ꦠꦤꦪꦺꦤ ꦥꦫꦺꦲꦶ ꦮꦸꦠ꧀ꦠꦺꦤ ꦏꦴꦫꦟꦺꦤ ꦱꦏꦴꦫꦟꦴ ꦲꦸꦠ꧀ꦮꦴ ꦢꦺꦴꦱꦢꦱ꧀ꦱꦤꦮꦱꦺꦤ ꦤꦶꦒꦟ꧀ꦜꦴꦤꦁ ꦮꦴꦢꦴ ꦄꦤꦸꦥ꧀ꦥꦠ꧀ꦠꦴ, ꦠꦠꦺꦴ ꦌꦮ ꦠꦁ ꦮꦴꦢꦁ ꦄꦥ꧀ꦥꦱꦴꦢꦤꦷꦪꦨꦴꦮꦢꦱ꧀ꦱꦤꦺꦤ ꦱꦺꦴꦱꦺꦤ꧀ꦠꦴ ꦲꦺꦠꦸꦱꦩ꧀ꦥꦠ꧀ꦠꦶꦮꦺꦴꦲꦴꦫꦱꦸꦏ꧀ꦑꦤꦺꦤ ꦩꦶꦭꦴꦥꦺꦤ꧀ꦠꦴ ꦢꦸꦏ꧀ꦏꦛꦏꦩ꧀ꦩꦏꦴꦫꦶꦤꦺꦴꦠꦶꦄꦴꦢꦪꦺꦴ ꦢꦱ ꦒꦴꦫꦪ꧀ꦲꦴꦥꦢꦺꦱꦴ ꦈꦥꦒꦕ꧀ꦖꦤ꧀ꦠꦷ’’ꦠꦶ.
꧙. ꦱꦔ꧀ꦒꦠꦶꦨꦴꦮꦲꦺꦠꦹꦠꦶ ꦠꦠ꧀ꦡ ꦠꦠ꧀ꦡ ꦪꦢꦶꦕ꧀ꦖꦴꦪ ꦱꦩꦸꦛ꧀ꦜꦶꦠꦱꦔ꧀ꦒꦠꦶꦤꦶꦩꦶꦠ꧀ꦠꦁ. ꦱꦴ ꦥꦤ ꦱꦔ꧀ꦒꦠꦶ ꦤꦶꦪꦠꦶꦭꦏ꧀ꦑꦟꦴꦠꦶ ꦄꦴꦲ ‘‘ꦤꦶꦪꦠꦶꦨꦴꦮꦏꦴꦫꦟꦴ’’ꦠꦶ. ꦄꦕ꧀ꦖꦺꦗ꧀ꦗꦱꦸꦠ꧀ꦠꦴꦮꦸꦠꦄꦨꦺꦗ꧀ꦗꦩꦟꦶ ꦮꦶꦪ ꦲꦶ ꦥꦛꦶꦤꦶꦪꦠꦠꦴ ꦤꦶꦪꦠꦶꦥꦮꦠ꧀ꦠꦷꦠꦶ. ꦖꦭ꦳ꦨꦶꦗꦴꦠꦶꦲꦺꦠꦹꦠꦶ ꦏꦟ꧀ꦲꦴꦨꦶꦗꦴꦠꦶ ꦤꦷꦭꦴꦨꦶꦗꦴꦠꦶ ꦭꦺꦴꦲꦶꦠꦴꦨꦶꦗꦴꦠꦶ ꦲꦭꦶꦢ꧀ꦢꦴꦨꦶꦗꦴꦠꦶ ꦱꦸꦏ꧀ꦏꦴꦨꦶꦗꦴꦠꦶ ꦥꦫꦩꦱꦸꦏ꧀ꦏꦴꦨꦶꦗꦴꦠꦷꦠꦶ ꦆꦩꦴꦱꦸ ꦄꦨꦶꦗꦴꦠꦷꦱꦸ ꦗꦴꦠꦶꦤꦶꦩꦶꦠ꧀ꦠꦁ. ꦥꦴꦥꦱꦔ꧀ꦒꦠꦶꦏꦴꦠꦶ ꦤꦶꦲꦷꦤꦱꦔ꧀ꦒꦠꦶꦏꦴ.
꧑꧐. ꦄꦤꦢ꧀ꦣꦨꦹꦠꦤ꧀ꦠꦶ ꦌꦠ꧀ꦡ ꦄꦣꦶ-ꦱꦢ꧀ꦢꦺꦤ ꦱꦩꦴꦤꦠ꧀ꦡꦺꦴ ꦄꦢ꧀ꦣ-ꦱꦢ꧀ꦢꦺꦴꦠꦶ ꦄꦴꦲ – ‘‘ꦄꦤꦢ꧀ꦣꦨꦹꦠꦤ꧀ꦠꦶ ꦄꦤꦣꦶꦨꦹꦠ’’ꦤ꧀ꦠꦶ. ꦪꦡꦴ ꦄꦴꦥꦴꦪꦶꦏꦺꦴ ꦄꦠ꧀ꦠꦨꦴꦮꦺꦴ ꦩꦲꦠꦴ ꦢꦸꦏ꧀ꦑꦺꦤ ꦄꦨꦶꦨꦸꦪ꧀ꦪꦠꦶ, ꦤ ꦠꦡꦴ ꦄꦪꦤ꧀ꦠꦶ ꦄꦴꦲ – ‘‘ꦢꦸꦏ꧀ꦑꦺꦤ ꦄꦤꦣꦶꦨꦹꦠꦺꦴ ꦤꦴꦩ ꦩꦤꦸꦱ꧀ꦱꦠ꧀ꦠꦨꦴꦮꦺꦴ ꦮꦸꦕ꧀ꦕꦠꦷ’’ꦠꦶ. ‘‘ꦄꦕꦺꦭꦏꦺꦴ ꦲꦺꦴꦠꦷ’’ꦠꦶꦄꦴꦢꦶꦤꦴ (ꦢꦷ. ꦤꦶ. ꧑.꧓꧙꧔) ꦮꦸꦠ꧀ꦠꦴꦪ ꦤꦴꦤꦥ꧀ꦥꦏꦴꦫꦴꦪ ꦢꦸꦏ꧀ꦏꦫꦏꦴꦫꦶꦏꦴꦪ ꦏꦶꦭꦩꦡꦺꦤ. ꦪꦢꦶ ꦌꦮꦁ ꦏꦡꦁ ꦣꦸꦠꦔ꧀ꦒꦣꦫꦴꦠꦶ ꦄꦴꦲ ‘‘ꦪꦺ ꦥꦤꦴ’’ꦠꦶꦄꦴꦢꦶ. ꦤꦶꦪ꧀ꦪꦴꦤꦶꦏꦱꦴꦱꦤꦱ꧀ꦩꦶꦚ꧀ꦲꦶ ꦮꦷꦫꦶꦪꦤ꧀ꦠꦶ ꦮꦶꦮꦛ꧀ꦛꦱꦤ꧀ꦤꦶꦱ꧀ꦱꦶꦠꦁ ꦏꦠ꧀ꦮꦴ ꦥꦮꦠ꧀ꦠꦶꦪꦩꦴꦤꦁ ꦮꦷꦫꦶꦪꦁ ꦱꦫꦷꦫꦁ ꦑꦺꦢꦤ꧀ꦠꦩ꧀ꦥꦶ ꦱꦩ꧀ꦩꦴꦮꦴꦪꦴꦩꦺꦴ ꦤꦴꦩ ꦲꦺꦴꦠꦶ ꦚꦴꦪꦴꦫꦢ꧀ꦣꦨꦴꦮꦠꦺꦴ.
ꦡꦺꦫꦺꦴꦠꦶ ꦌꦠ꧀ꦡ ꦄꦴꦒꦠꦩꦲꦴꦫꦏ꧀ꦑꦶꦠꦠ꧀ꦡꦺꦫꦺꦴ. ꦠꦶꦱ꧀ꦱꦺꦴ ꦱꦩ꧀ꦥꦠ꧀ꦠꦶꦪꦺꦴ ꦩꦤꦸꦱ꧀ꦱꦢꦺꦮꦤꦶꦧ꧀ꦧꦴꦤꦱꦩ꧀ꦥꦠ꧀ꦠꦶꦪꦺꦴ, ꦱꦷꦭꦱꦩꦴꦣꦶꦥꦚ꧀ꦚꦴꦱꦩ꧀ꦥꦠ꧀ꦠꦶꦪꦺꦴ ꦮꦴ. ꦑꦸꦫꦒ꧀ꦒꦺꦪꦺꦮꦴꦠꦶ ꦑꦸꦫꦺ ꦱꦷꦱꦒ꧀ꦒꦺ ꦌꦮ, ꦑꦸꦫꦺ ꦱꦷꦱꦒ꧀ꦒꦠꦺꦴ ꦄꦥꦤꦷꦠꦺ ꦌꦮꦴꦠꦶ ꦄꦣꦶꦥ꧀ꦥꦴꦪꦺꦴ. ꦄꦪꦤ꧀ꦠꦶ, ‘‘ꦆꦱ꧀ꦱꦫꦏꦸꦭꦺ ꦤꦶꦧ꧀ꦧꦠ꧀ꦠꦺꦴ’’ꦠꦶꦄꦴꦢꦶꦤꦴ ꦮꦸꦠ꧀ꦠꦺꦴ. ꦤ ꦱꦧ꧀ꦧꦺ ꦌꦮ ꦱꦏ꧀ꦏꦴꦫꦥꦸꦧ꧀ꦧꦏꦁ ꦥꦧ꧀ꦧꦗꦶꦠ꧀ꦮꦴ ꦄꦫꦲꦠ꧀ꦠꦁ ꦥꦴꦥꦸꦟꦤ꧀ꦠꦷꦠꦶ ꦄꦴꦲ ‘‘ꦪꦺꦴ ꦢꦴꦱꦶꦏꦸꦕ꧀ꦖꦶꦪ’’ꦤ꧀ꦠꦶꦄꦴꦢꦶ. ꦫꦗꦠꦩꦸꦢ꧀ꦢꦶꦏꦤ꧀ꦠꦶ ꦫꦗꦠꦩꦪꦁ ꦄꦔ꧀ꦒꦸꦭꦶꦩꦸꦢ꧀ꦢꦶꦏꦁ. ꦒꦺꦴꦫꦏꦥꦶꦪꦔ꧀ꦒꦸꦩꦠ꧀ꦠꦺꦤꦥꦷꦠꦶ ꦏꦥꦶꦠ꧀ꦡꦖꦭ꧀ꦭꦶꦏꦔ꧀ꦒꦸꦥꦸꦥ꧀ꦦꦒꦤ꧀ꦣꦩꦠ꧀ꦠꦺꦤꦥꦶ.
ꦣꦩ꧀ꦩꦺꦤ ꦚꦴꦪꦺꦤ ꦄꦴꦒꦠꦱꦸꦑꦁ ꦣꦩ꧀ꦩꦱꦸꦑꦤ꧀ꦠꦶ ꦄꦴꦲ – ‘‘ꦱꦔ꧀ꦓꦠꦺꦴ ꦮꦴ…ꦥꦺ… ꦥꦕ꧀ꦕꦪꦱꦸꦑ’’ꦤ꧀ꦠꦶ. ꦄꦩꦸꦕ꧀ꦖꦶꦠꦺꦴꦠꦶ ꦄꦤꦗ꧀ꦙꦴꦥꦤ꧀ꦤꦺꦴ. ꦆꦢꦴꦤꦶ ꦠꦁ ꦄꦤꦗ꧀ꦙꦴꦥꦤ꧀ꦤꦠꦁ ꦠꦱ꧀ꦱ ꦕ ꦦꦭꦁ ꦢꦱ꧀ꦱꦺꦠꦸꦁ ‘‘ꦣꦩ꧀ꦩꦶꦏꦁ ꦲꦷ’’ꦠꦶꦄꦴꦢꦶ ꦮꦸꦠ꧀ꦠꦁ. ꦆꦩꦱ꧀ꦱꦴꦠꦶ ꦱꦩꦸꦢꦪꦱ꧀ꦱ. ꦱꦺꦴ ꦲꦶ ꦥꦚ꧀ꦕꦏ꧀ꦑꦤ꧀ꦣꦱ꧀ꦱ ꦢꦸꦏ꧀ꦑꦱ꧀ꦱ ꦏꦴꦫꦟꦨꦹꦠꦠ꧀ꦠꦴ ꦄꦴꦱꦤ꧀ꦤꦺꦴ ꦥꦕ꧀ꦕꦏ꧀ꦑꦺꦴ ꦏꦠ꧀ꦮꦴ ꦮꦸꦠ꧀ꦠꦺꦴ. ꦠꦺꦤꦴꦲ ‘‘ꦥꦕ꧀ꦕꦸꦥ꧀ꦥꦤ꧀ꦤꦴꦤ’’ꦤ꧀ꦠꦶꦄꦴꦢꦶ. ꦱꦔ꧀ꦑꦴꦫꦤ꧀ꦠꦶ ꦪꦡꦴꦫꦢ꧀ꦣꦴꦪ ꦱꦴꦠꦶꦱꦪꦁ ꦏꦫꦟꦠꦺꦴ ꦱꦔ꧀ꦑꦴꦫꦤ꧀ꦠꦶ ꦭꦢ꧀ꦣꦤꦴꦩꦁ ꦧꦭꦮꦮꦷꦫꦶꦪꦁ ꦈꦱ꧀ꦱꦺꦴꦭ꦳꧀ꦲꦶꦁ. ꦥꦢꦲꦠꦺꦴꦠꦶ ꦥꦪꦸꦚ꧀ꦗꦤ꧀ꦠꦱ꧀ꦱ ꦥꦮꦠ꧀ꦠꦺꦤ꧀ꦠꦱ꧀ꦱ. ꦩꦒ꧀ꦒꦺꦤ ꦮꦶꦫꦴꦒꦺꦴ ꦲꦺꦴꦠꦷꦠꦶ ꦄꦫꦶꦪꦩꦒ꧀ꦒꦺꦤ ꦢꦸꦏ꧀ꦑꦤꦶꦢꦴꦤꦱ꧀ꦱ ꦮꦶꦫꦗ꧀ꦗꦤꦴ ꦲꦺꦴꦠꦶ. ꦠꦺꦤꦴꦲ ‘‘ꦆꦢꦁ ꦮꦸꦠ꧀ꦠꦁ ꦲꦺꦴꦠꦷ’’ꦠꦶ. ꦆꦩꦶꦤꦴ ꦱꦸꦑꦴꦥꦛꦶꦥꦢꦴ ꦑꦶꦥ꧀ꦥꦴꦨꦶꦚ꧀ꦚꦴ ꦏꦡꦶꦠꦴ ꦄꦏꦱꦶꦫꦺꦤꦺꦮ ꦱꦷꦓꦠꦫꦁ ꦩꦒ꧀ꦒꦥꦗꦴꦤꦠꦴꦪ ꦧꦺꦴꦣꦶꦠꦠ꧀ꦠꦴ. ꦩꦗ꧀ꦙꦠ꧀ꦠꦠꦴꦏꦴꦫꦺꦴꦠꦶ ꦮꦷꦫꦶꦪꦹꦥꦺꦏ꧀ꦑꦩꦴꦲ. ꦱꦔ꧀ꦑꦴꦫꦁ ꦠꦠ꧀ꦡ ꦥꦢꦲꦠꦷꦠꦶ ꦥꦣꦴꦤꦱꦔ꧀ꦑꦴꦫꦁ ꦠꦠ꧀ꦡ ꦢꦸꦏ꧀ꦑꦤꦶꦢꦴꦤꦱ꧀ꦱ ꦮꦶꦫꦗ꧀ꦗꦤꦤꦶꦩꦶꦠ꧀ꦠꦁ ꦮꦶꦫꦗ꧀ꦗꦤꦠ꧀ꦡꦁ ꦥꦢꦲꦠꦶ. ꦏꦡꦁ? ꦩꦒ꧀ꦒꦥ꧀ꦥꦣꦴꦤꦺꦤ ꦕꦠꦸꦏꦶꦕ꧀ꦕꦥ꧀ꦥꦣꦴꦤꦺ ꦄꦫꦶꦪꦩꦒ꧀ꦒꦺ ꦮꦴꦪꦴꦩꦺꦤ ꦥꦢꦲꦠꦶ ꦮꦴꦪꦩꦠꦶ. ꦄꦗ꧀ꦙꦸꦥꦺꦏ꧀ꦑꦠꦺꦴꦠꦶ ꦮꦷꦫꦶꦪꦱ꧀ꦱ ꦄꦤꦕ꧀ꦕꦴꦫꦢ꧀ꦣꦤꦴꦠꦶꦱꦶꦡꦶꦭꦠꦴꦪ ꦮꦷꦫꦶꦪꦱꦩꦠꦴꦪꦺꦴꦗꦤꦺ ꦧ꧀ꦪꦴꦥꦴꦫꦴꦏꦫꦟꦺꦤ ꦄꦗ꧀ꦙꦸꦥꦺꦏ꧀ꦑꦠꦺꦴ. ꦠꦺꦤꦴꦲ ‘‘ꦈꦥꦺꦏ꧀ꦑꦁ ꦨꦴꦮꦺꦤ꧀ꦠꦱ꧀ꦱꦴ’’ꦠꦶ. ꦈꦥꦺꦏ꧀ꦑꦴꦨꦴꦮꦤꦴ ꦕ ꦤꦴꦩꦺꦠ꧀ꦡ ꦠꦡꦴꦥꦮꦠ꧀ꦠꦴ ꦄꦫꦶꦪꦩꦒ꧀ꦒꦨꦴꦮꦤꦴ ꦌꦮꦴꦠꦶ ꦄꦴꦲ – ‘‘ꦩꦒ꧀ꦒꦨꦴꦮꦤꦴꦪ ꦨꦴꦮꦺꦠꦷ’’ꦠꦶ.
ꦌꦠ꧀ꦡ ꦕ ꦌꦮꦁ ꦥꦴꦭ꦳ꦶꦪꦴ ꦥꦢꦪꦺꦴꦗꦤꦴ ꦮꦺꦢꦶꦠꦧ꧀ꦧꦴ, – ‘‘ꦱꦺꦴ ꦌꦮꦁ ꦥꦗꦴꦤꦴꦠꦶ. ꦏꦡꦁ? ꦱꦔ꧀ꦑꦴꦫꦁ ꦩꦺ ꦥꦢꦲꦠꦺꦴ ꦱꦔ꧀ꦑꦴꦫꦥꦢꦲꦤꦴ ꦆꦩꦱ꧀ꦱ ꦢꦸꦏ꧀ꦑꦤꦶꦢꦴꦤꦱ꧀ꦱ ꦮꦶꦫꦴꦒꦺꦴ ꦲꦺꦴꦠꦶ, ꦄꦗ꧀ꦙꦸꦥꦺꦏ꧀ꦑꦠꦺꦴ ꦩꦺ ꦈꦥꦺꦏ꧀ꦑꦤꦴ ꦆꦩꦱ꧀ꦱ ꦢꦸꦏ꧀ꦑꦤꦶꦢꦴꦤꦱ꧀ꦱ ꦮꦶꦫꦴꦒꦺꦴ ꦲꦺꦴꦠꦷ’’ꦠꦶ. ꦥꦛꦶꦥꦗ꧀ꦗꦩꦴꦤꦱ꧀ꦱ ꦕꦴꦪꦁ ꦥꦸꦧ꧀ꦧꦨꦴꦒꦮꦷꦩꦁꦱꦱ꧀ꦱꦴꦠꦶ ꦒꦲꦺꦠꦧ꧀ꦧꦁ. ꦠꦠ꧀ꦡ ꦱꦔ꧀ꦑꦴꦫꦥ꧀ꦥꦣꦴꦤꦴꦠꦶ ꦱꦩ꧀ꦩꦱꦤꦥꦢꦺꦤ ꦱꦸꦑꦺꦤꦺꦮ ꦑꦶꦥ꧀ꦥꦠꦫꦁ ꦨꦴꦮꦤꦴꦈꦱ꧀ꦱꦸꦏ꧀ꦏꦴꦥꦤꦮꦷꦫꦶꦪꦁ ꦢꦱ꧀ꦱꦶꦠꦤ꧀ꦠꦶ ꦱꦸꦑꦴꦥꦛꦶꦥꦢꦴ ꦑꦶꦥ꧀ꦥꦴꦨꦶꦚ꧀ꦚꦴ ꦢꦱ꧀ꦱꦶꦠꦴ. ꦄꦗ꧀ꦙꦸꦥꦺꦏ꧀ꦑꦠꦺꦴꦠꦶ ꦌꦠ꧀ꦡ ꦏꦱ꧀ꦱꦕꦶ ꦤꦴꦠꦶꦢꦭ꦳꧀ꦲꦁ ꦏꦠ꧀ꦮꦴ ꦥꦮꦠ꧀ꦠꦶꦠꦮꦷꦫꦶꦪꦺꦤꦥꦶ ꦢꦸꦏ꧀ꦑꦤꦶꦢꦴꦤꦱ꧀ꦱ ꦮꦶꦫꦴꦒꦺꦴ ꦲꦺꦴꦠꦶ ꦮꦶꦥꦱ꧀ꦱꦤꦩꦤꦸꦪꦸꦚ꧀ꦗꦠꦷꦠꦶ ꦢꦱ꧀ꦱꦶꦠꦁ. ꦈꦨꦪꦠ꧀ꦡꦴꦥꦶ ꦕꦠꦸꦠ꧀ꦡꦷꦪꦺꦮ ꦥꦛꦶꦥꦢꦴ ꦮꦶꦨꦴꦮꦶꦠꦴꦠꦶ ꦢꦛ꧀ꦜꦧ꧀ꦧꦁ. ꦆꦢꦴꦤꦶ, ‘‘ꦪꦱ꧀ꦱ ꦲꦶ ꦑ꧀ꦮꦴꦱ꧀ꦱ…ꦥꦺ… ꦈꦥꦺꦏ꧀ꦑꦁ ꦠꦠ꧀ꦡ ꦨꦴꦮꦺꦠꦷ’’ꦠꦶ ꦮꦴꦫꦺꦲꦶ ꦠꦴꦱꦁꦪꦺꦮ ꦥꦛꦶꦥꦢꦴꦤꦁ ꦮꦱꦺꦤ ꦠꦺꦱꦁ ꦥꦸꦒ꧀ꦒꦭꦴꦤꦁ ꦥꦛꦶꦥꦠ꧀ꦠꦶ ꦢꦱ꧀ꦱꦶꦠꦴ. ꦮꦛ꧀ꦛꦢꦸꦏ꧀ꦑꦤꦶꦢꦴꦤꦱ꧀ꦱ ꦥꦫꦶꦗꦶꦟ꧀ꦟꦁ ꦆꦩꦺꦲꦶ ꦮꦴꦫꦺꦲꦶ ꦢꦸꦏ꧀ꦑꦏ꧀ꦑꦪꦺꦴ ꦮꦶꦨꦴꦮꦶꦠꦺꦴ.
꧑꧑. ꦧꦢ꧀ꦣꦕꦶꦠ꧀ꦠꦺꦴꦠꦶ ꦱꦩ꧀ꦧꦢ꧀ꦣꦕꦶꦠ꧀ꦠꦺꦴ. ꦧꦲꦭꦕ꧀ꦖꦤ꧀ꦢꦺꦴꦠꦶ ꦧꦲꦭꦠꦟ꧀ꦲꦴꦖꦤ꧀ꦢꦺꦴ. ꦄꦠꦶꦕꦫꦶꦠ꧀ꦮꦴꦠꦶ ꦄꦠꦶꦏ꧀ꦏꦩꦶꦠ꧀ꦮꦴ. ꦤꦛꦱꦠ꧀ꦡꦮꦶꦣꦶꦤꦴ ꦤꦕ꧀ꦕꦤꦏꦴ ꦤꦛꦴ, ꦤꦕ꧀ꦕꦏꦴ ꦆꦠꦫꦺ. ꦱꦺꦴꦩꦤꦱ꧀ꦱꦁ ꦈꦥ꧀ꦥꦗ꧀ꦗꦠꦶ, ‘‘ꦇꦢꦶꦱꦁ ꦤꦴꦩ ꦆꦠ꧀ꦡꦶꦁ ꦥꦫꦶꦕ꧀ꦕꦗꦶ’’ꦤ꧀ꦠꦶ. ꦖꦶꦗ꧀ꦗꦴꦠꦶ ꦢ꧀ꦮꦶꦣꦴ ꦲꦺꦴꦠꦸ. ꦨꦶꦗ꧀ꦗꦴꦠꦶ ꦨꦶꦗ꧀ꦗꦠꦸ. ‘‘ꦖꦶꦗ꧀ꦗ ꦮꦴ ꦨꦶꦗ꧀ꦗꦮꦴ’’ꦠꦶ ꦥꦢꦢ꧀ꦮꦪꦺꦤꦥꦶ ꦮꦶꦤꦴꦱꦩꦺꦮ ꦮꦢꦠꦶ. ꦚꦠ꧀ꦮꦴꦠꦶ ꦥꦸꦧ꧀ꦧꦨꦴꦒꦚꦴꦟꦺꦤ ꦗꦴꦤꦶꦠ꧀ꦮꦴ. ꦠꦢꦸꦨꦪꦤ꧀ꦠꦶ ꦱꦔ꧀ꦑꦴꦫꦥꦢꦲꦤꦈꦥꦺꦏ꧀ꦑꦴꦨꦴꦮꦤꦁ.
꧑꧒. ꦥꦺꦱꦺꦤ꧀ꦠꦱ꧀ꦱꦴꦠꦶ ꦮꦴꦪꦩꦤ꧀ꦠꦱ꧀ꦱ. ꦠꦁ ꦱꦤ꧀ꦣꦴꦪꦴꦠꦶ ꦢꦸꦏ꧀ꦑꦴꦪ ꦥꦛꦶꦥꦢꦴꦪ ꦤꦶꦪ꧀ꦪꦴꦤꦠꦁ ꦱꦤ꧀ꦣꦴꦪ.
ꦈꦱꦸꦏꦴꦫꦺꦴ ꦮꦶꦪ ꦪꦺꦴꦒꦷ ꦠꦺꦗꦤꦱ꧀ꦱ ꦮꦶꦪ ꦕꦶꦠ꧀ꦠꦱ꧀ꦱ ꦈꦗꦸꦏꦫꦟꦠꦺꦴ. ꦒꦺꦴꦩꦸꦠ꧀ꦠꦮꦔ꧀ꦏꦁ, ꦕꦤ꧀ꦢꦭꦺꦑꦴꦏꦸꦛꦶꦭꦁ, ꦤꦔ꧀ꦒꦭꦏꦺꦴꦛꦶꦗꦶꦩ꧀ꦲꦁ ꦕꦶꦠ꧀ꦠꦁ. ꦄꦭꦴꦠꦴ ꦮꦶꦪ ꦮꦷꦫꦶꦪꦁ ꦄꦴꦠꦴꦥꦤ-ꦥꦫꦶꦠꦴꦥꦤꦠꦺꦴ. ꦏꦚ꧀ꦕꦶꦏꦠꦺꦭꦁ ꦮꦶꦪ ꦱꦢ꧀ꦣꦴ ꦱꦶꦤꦺꦲꦤꦠꦺꦴ. ꦤꦩꦤꦢꦟ꧀ꦝꦏꦺꦴ ꦮꦶꦪ ꦭꦺꦴꦏꦸꦠ꧀ꦠꦫꦩꦒ꧀ꦒꦺꦴ ꦤꦶꦧ꧀ꦧꦴꦤꦴꦫꦩ꧀ꦩꦟꦺ ꦕꦶꦠ꧀ꦠꦱ꧀ꦱ ꦤꦴꦩꦤꦠꦺꦴ. ꦭꦺꦴꦏꦸꦠ꧀ꦠꦫꦩꦒ꧀ꦒꦺꦤ ꦕꦶꦠ꧀ꦠꦱ꧀ꦱ ꦈꦗꦸꦏꦫꦟꦁ ꦨꦴꦮꦤꦴꦨꦶꦱꦩꦪꦠꦺꦴ ꦢꦛ꧀ꦜꦧ꧀ꦧꦁ. ꦄꦤ꧀ꦠꦢ꧀ꦮꦪꦮꦗ꧀ꦗꦶꦠꦴ ꦩꦗ꧀ꦙꦶꦩꦴ ꦥꦛꦶꦥꦠ꧀ꦠꦷꦠꦶ ꦏꦠ꧀ꦮꦴ ꦏꦶꦭꦺꦱꦒꦟꦮꦶꦗ꧀ꦙꦤꦁ ꦥꦲꦴꦤꦴꦨꦶꦱꦩꦪꦺꦴ. ꦆꦠꦫꦴ ꦥꦤ ꦥꦛꦶꦥꦢꦴ ꦢꦤ꧀ꦣꦴꦨꦶꦚ꧀ꦚꦴꦠꦶ ꦆꦩꦺꦱꦁ ꦢ꧀ꦮꦶꦤ꧀ꦤꦁ ꦨꦶꦏ꧀ꦑꦹꦤꦁ ꦆꦩꦴꦱꦸ ꦢ꧀ꦮꦷꦱꦸ ꦪꦡꦴꦮꦸꦠ꧀ꦠꦴꦱꦸ ꦑꦶꦥ꧀ꦥꦴꦨꦶꦚ꧀ꦚꦴꦱꦸ ꦏꦡꦶꦠꦴꦱꦸ, ꦆꦠꦫꦴꦥꦶ ꦏꦡꦶꦠꦴꦮ ꦲꦺꦴꦤ꧀ꦠꦶ ꦭꦏ꧀ꦑꦟꦲꦴꦫꦤꦪꦺꦤ ꦥꦛꦶꦥꦢꦴꦱꦴꦩꦚ꧀ꦚꦠꦺꦴ. ꦱꦲꦴꦒꦩꦤꦷꦪꦴꦥꦶ ꦮꦴ ꦥꦛꦶꦥꦢꦴ ꦏꦡꦶꦠꦴꦮ, ‘‘ꦤ ꦲꦺꦮ ꦄꦤꦢ꧀ꦣꦨꦹꦠꦁ ꦄꦠ꧀ꦡꦴꦤ’’ꦤ꧀ꦠꦶꦄꦴꦢꦶꦤꦴ ꦥꦸꦧ꧀ꦧꦨꦴꦒꦥꦛꦶꦥꦢꦴꦪ ꦏꦡꦶꦠꦠ꧀ꦠꦴ. ‘‘ꦄꦴꦒꦩꦤꦷꦪꦥꦛꦶꦥꦢꦴ ꦥꦤ ꦤ ꦏꦡꦶꦠꦴ’’ꦠꦶ ꦆꦢꦁ ꦱꦮꦶꦱꦺꦱꦁ ꦄꦗ꧀ꦙꦸꦥꦺꦏ꧀ꦑꦱ꧀ꦱ ꦄꦏꦡꦶꦠꦠꦁ ꦱꦤ꧀ꦣꦴꦪ ꦮꦸꦠ꧀ꦠꦤ꧀ꦠꦶ ꦢꦛ꧀ꦜꦧ꧀ꦧꦁ. ꦤꦶꦏ꧀ꦑꦩꦤꦢꦺꦱꦤꦤ꧀ꦠꦶ ꦤꦶꦏ꧀ꦑꦩꦤꦸꦥꦴꦪꦁ ꦢꦺꦱꦤꦁ. ꦱꦺꦱꦁ ꦱꦸꦮꦶꦚ꧀ꦚꦺꦪ꧀ꦪꦩꦺꦮ.
ꦢꦺꦮꦢꦲꦱꦸꦠ꧀ꦠꦮꦟ꧀ꦟꦤꦴꦪ ꦭꦷꦤꦠ꧀ꦡꦥ꧀ꦥꦏꦴꦱꦤꦴ ꦱꦩꦠ꧀ꦠꦴ.
꧒. ꦥꦚ꧀ꦕꦠ꧀ꦠꦪꦱꦸꦠ꧀ꦠꦮꦟ꧀ꦟꦤꦴ
꧒꧑. ꦌꦏꦺꦠꦶ ꦌꦠ꧀ꦡ ꦌꦏ-ꦱꦢ꧀ꦢꦺꦴ ꦄꦚ꧀ꦚꦠ꧀ꦡꦺꦴ, ꦤ ꦒꦟꦤꦴꦢꦶꦄꦠ꧀ꦡꦺꦴꦠꦶ ꦠꦁ ꦢꦱ꧀ꦱꦺꦤ꧀ꦠꦺꦴ ‘‘ꦌꦏꦕ꧀ꦕꦺ’’ꦠꦶ ꦄꦴꦲ. ꦪꦁ ꦥꦤ ꦥꦴꦭ꦳ꦶꦪꦁ ‘‘ꦱꦤ꧀ꦠꦷ’’ꦠꦶ ꦮꦸꦠ꧀ꦠꦁ. ꦠꦺꦤ ꦠꦺꦱꦁ ꦢꦶꦛ꧀ꦜꦶꦒꦠꦶꦏꦴꦤꦁ ꦮꦶꦗ꧀ꦗꦩꦴꦤꦠꦴꦪ ꦄꦮꦶꦕ꧀ꦖꦶꦤ꧀ꦤꦠꦴ; ꦠꦠꦺꦴ ꦕ ꦤꦺꦱꦁ ꦩꦶꦕ꧀ꦖꦴꦒꦲꦟꦠꦺꦴ ꦱꦶꦡꦶꦭꦏꦫꦟꦮꦶꦮꦺꦕꦤꦺꦲꦶ ꦄꦠ꧀ꦠꦤꦺꦴ ꦢꦺꦱꦤꦴꦪ ꦏꦶꦕ꧀ꦕꦏꦴꦫꦶꦠꦴ ꦄꦮꦶꦠꦡꦠꦴ ꦕ ꦢꦷꦥꦶꦠꦴ ꦲꦺꦴꦠꦶ. ꦥꦫꦩꦠ꧀ꦡꦱꦩꦟꦧ꧀ꦫꦴꦲ꧀ꦩꦟꦺꦱꦸ ꦄꦥꦫꦤ꧀ꦠꦏꦥ꧀ꦥꦶꦏꦠꦴꦪ ꦭꦺꦱꦺꦴꦥꦶ ꦤꦠ꧀ꦡꦷꦠꦶ ꦄꦴꦲ ‘‘ꦥꦫꦶꦧ꧀ꦧꦗꦸꦥꦒꦠꦨꦴꦮꦺꦤꦴ’’ꦠꦶꦄꦴꦢꦶ. ꦱꦱ꧀ꦱꦠꦴꦢꦶꦮꦱꦺꦤ ꦄꦥꦫꦤ꧀ꦠꦁ ꦏꦥ꧀ꦥꦺꦤ꧀ꦠꦷꦠꦶ ꦄꦥꦫꦤ꧀ꦠꦏꦥ꧀ꦥꦶꦤꦺꦴ, ꦠꦺ ꦌꦮ ꦄꦥꦫꦤ꧀ꦠꦏꦥ꧀ꦥꦶꦏꦴ. ꦪꦱ꧀ꦩꦴ ꦠꦺꦲꦶ ꦄꦥꦫꦤ꧀ꦠꦁ ꦥꦸꦫꦶꦩꦠꦫꦱꦶꦢ꧀ꦣꦺꦲꦶ ꦠꦟ꧀ꦲꦴꦢꦶꦛ꧀ꦜꦶꦏꦥ꧀ꦥꦺꦲꦶ ꦏꦥ꧀ꦥꦺꦠ꧀ꦮꦴ ꦄꦴꦱꦺꦮꦤꦧꦭꦮꦠꦴꦪ ꦕ ꦮꦶꦏꦥ꧀ꦥꦺꦠ꧀ꦮꦴ ꦄꦥꦫꦨꦴꦒꦱꦶꦢ꧀ꦣꦺꦲꦶ ꦄꦨꦶꦤꦶꦮꦺꦱꦨꦹꦠꦺꦲꦶ ꦠꦟ꧀ꦲꦴꦢꦶꦛ꧀ꦜꦶꦒ꧀ꦒꦴꦲꦺꦲꦶ ꦒꦟ꧀ꦲꦤ꧀ꦠꦶ ꦄꦨꦶꦤꦶꦮꦶꦱꦤ꧀ꦠꦶ ꦥꦫꦴꦩꦱꦤ꧀ꦠꦶ; ꦠꦱ꧀ꦩꦴ ꦮꦸꦠ꧀ꦠꦁ – ‘‘ꦄꦥꦫꦤ꧀ꦠꦁ ꦏꦥ꧀ꦥꦺꦠ꧀ꦮꦴ ꦮꦶꦏꦥ꧀ꦥꦺꦠ꧀ꦮꦴ ꦒꦟ꧀ꦲꦤ꧀ꦠꦷ’’ꦠꦶ. ꦠꦟ꧀ꦲꦸꦥꦴꦢꦴꦤꦮꦱꦺꦤ ꦏꦥ꧀ꦥꦤꦒꦲꦟꦴꦤꦶ ꦮꦺꦢꦶꦠꦧ꧀ꦧꦴꦤꦶ. ꦠꦟ꧀ꦲꦴꦥꦕ꧀ꦕꦪꦴ ꦲꦶ ꦈꦥꦴꦢꦴꦤꦁ. ꦮꦸꦠ꧀ꦠꦩ꧀ꦥꦶ ꦕꦺꦠꦁ ꦩꦲꦴꦤꦶꦢ꧀ꦢꦺꦱꦺ ꦈꦢ꧀ꦢꦴꦤꦠꦺꦴ ꦱꦔ꧀ꦑꦺꦥꦠꦺꦴ. ꦠꦟ꧀ꦲꦴꦢꦶꦛ꧀ꦜꦶꦮꦱꦺꦤꦴꦠꦶ ꦠꦟ꧀ꦲꦴꦪ ꦢꦶꦛ꧀ꦜꦶꦪꦴ ꦕ ꦮꦱꦺꦤ. ꦢꦶꦛ꧀ꦛꦶꦪꦴ ꦮꦴ ꦈꦥꦤꦶꦱ꧀ꦱꦪꦨꦹꦠꦴꦪ ꦱꦲꦗꦴꦠꦴꦪ ꦄꦨꦶꦤꦤ꧀ꦢꦤꦏꦴꦪ ꦕ ꦠꦟ꧀ꦲꦴꦪ ꦱꦱ꧀ꦱꦠꦴꦢꦶꦄꦴꦏꦴꦫꦺꦤ ꦄꦨꦶꦤꦶꦮꦶꦱꦤ꧀ꦠꦱ꧀ꦱ ꦩꦶꦕ꧀ꦖꦴꦒꦴꦲꦱ꧀ꦱ ꦕ ꦮꦱꦺꦤ. ꦄꦤꦴꦒꦠꦣꦩ꧀ꦩꦮꦶꦱꦪꦴꦪ ꦄꦣꦶꦥ꧀ꦥꦺꦠꦠ꧀ꦠꦴ ꦄꦤꦴꦒꦠꦏꦴꦭꦮꦴꦕꦏꦺꦴ ꦆꦣ ꦄꦥꦫ-ꦱꦢ꧀ꦢꦺꦴ. ꦫꦹꦥꦴꦢꦶꦑꦤ꧀ꦣꦮꦶꦤꦶꦩꦸꦠ꧀ꦠꦱ꧀ꦱ ꦏꦥ꧀ꦥꦤꦮꦠ꧀ꦡꦸꦤꦺꦴ ꦄꦨꦴꦮꦴ ꦄꦤ꧀ꦠ-ꦱꦢ꧀ꦢꦺꦴ ꦨꦴꦒꦮꦴꦕꦏꦺꦴꦠꦶ ꦄꦴꦲ – ‘‘ꦄꦤꦴꦒꦠꦁ ꦑꦤ꧀ꦣꦏꦺꦴꦛ꧀ꦜꦴꦱ’’ꦤ꧀ꦠꦶ. ꦏꦥ꧀ꦥꦺꦠ꧀ꦮꦴꦠꦶ ꦕ ꦠꦱ꧀ꦩꦶꦁ ꦄꦥꦫꦤ꧀ꦠꦺ ꦠꦟ꧀ꦲꦴꦪ ꦤꦴꦨꦶꦤꦶꦮꦺꦱꦴꦤꦁ ꦱꦩꦠ꧀ꦠꦤꦁ ꦥꦫꦶꦤꦶꦛ꧀ꦜꦴꦥꦤꦩꦴꦲ. ꦜꦶꦠꦴꦠꦶ ꦠꦱ꧀ꦱꦴ ꦭꦢ꧀ꦣꦶꦪꦴ ꦄꦮꦶꦗꦲꦤꦁ.
ꦄꦤꦸꦒꦠꦴꦠꦶ ꦄꦴꦫꦩ꧀ꦩꦟꦏꦫꦟꦮꦱꦺꦤ ꦄꦤꦸ ꦄꦤꦸ ꦒꦠꦴ ꦄꦥꦫꦤ꧀ꦠꦺ ꦥꦮꦠ꧀ꦠꦴ. ꦄꦴꦫꦧ꧀ꦨꦴꦠꦶ ꦄꦴꦭꦩ꧀ꦧꦶꦠ꧀ꦮꦴ. ꦮꦶꦱꦪꦺꦴ ꦲꦶ ꦠꦱ꧀ꦱꦴ ꦢꦶꦛ꧀ꦜꦶꦪꦴ ꦄꦥꦫꦤ꧀ꦠꦺꦴ. ꦮꦶꦱꦪꦨꦴꦮꦠꦺꦴ ꦌꦮ ꦲꦶ ꦱꦺꦴ ꦠꦱ꧀ꦱꦴ ꦄꦴꦒꦩꦤꦛ꧀ꦜꦴꦤꦁ ꦄꦴꦫꦩ꧀ꦩꦟꦥꦕ꧀ꦕꦪꦺꦴ ꦕꦴꦠꦶ ꦮꦸꦠ꧀ꦠꦁ ‘‘ꦄꦴꦒꦩ꧀ꦩ ꦥꦛꦶꦕ꧀ꦕꦴ’’ꦠꦶ. ꦄꦣꦶꦮꦕꦤꦥꦢꦴꦤꦷꦠꦶ ꦥꦚ꧀ꦚꦠ꧀ꦠꦶꦥꦢꦴꦤꦶ, ꦢꦴꦱꦴꦢꦷꦱꦸ ꦱꦶꦫꦶꦮꦝ꧀ꦞꦏꦴꦢꦶꦱꦢ꧀ꦢꦺꦴ ꦮꦶꦪ ꦮꦕꦤꦩꦠ꧀ꦠꦩꦺꦮ ꦄꦣꦶꦏꦴꦫꦁ ꦏꦠ꧀ꦮꦴ ꦥꦮꦠ꧀ꦠꦶꦪꦴ ꦄꦣꦶꦮꦕꦤꦁ ꦥꦚ꧀ꦚꦠ꧀ꦠꦶ. ꦄꦡ ꦮꦴ ꦄꦣꦶ-ꦱꦢ꧀ꦢꦺꦴ ꦈꦥꦫꦶꦨꦴꦮꦺ, ꦮꦸꦕ꧀ꦕꦠꦷꦠꦶ ꦮꦕꦤꦁ, ꦈꦥꦫꦶ ꦮꦕꦤꦁ ꦄꦣꦶꦮꦕꦤꦁ, ꦈꦥꦴꦢꦴꦤꦨꦹꦠꦫꦹꦥꦴꦢꦷꦤꦁ ꦈꦥꦫꦶ ꦥꦚ꧀ꦚꦴꦥꦶꦪꦩꦴꦤꦴ ꦈꦥꦴꦢꦴꦥꦚ꧀ꦚꦠ꧀ꦠꦷꦠꦶ ꦄꦠ꧀ꦡꦺꦴ, ꦠꦱ꧀ꦩꦴ ꦥꦚ꧀ꦚꦠ꧀ꦠꦶꦢꦷꦥꦏꦥꦢꦴꦤꦷꦠꦶ ꦄꦠ꧀ꦡꦺꦴ. ꦥꦚ꧀ꦚꦠ꧀ꦠꦶꦩꦠ꧀ꦠꦚ꧀ꦲꦺꦠꦁ ꦮꦸꦕ꧀ꦕꦠꦶ, ꦪꦢꦶꦢꦁ, ‘‘ꦄꦠ꧀ꦠꦴ ꦭꦺꦴꦏꦺꦴ’’ꦠꦶ ꦕ, ꦤ ꦫꦹꦥꦮꦺꦢꦤꦴꦢꦪꦺꦴ ꦮꦶꦪ ꦥꦫꦩꦠ꧀ꦡꦺꦴ. ꦄꦣꦶꦏꦮꦸꦠ꧀ꦠꦶꦠꦴꦪ ꦮꦴ ꦄꦣꦶꦩꦸꦠ꧀ꦠꦶꦪꦺꦴꦠꦶ ꦢꦶꦛ꧀ꦜꦶꦪꦺꦴ ꦮꦸꦕ꧀ꦕꦤ꧀ꦠꦶ. ꦄꦣꦶꦏꦚ꧀ꦲꦶ ꦱꦨꦴꦮꦣꦩ꧀ꦩꦺꦱꦸ ꦱꦱ꧀ꦱꦠꦴꦢꦶꦁ ꦥꦏꦠꦶꦄꦴꦢꦶꦁ ꦢ꧀ꦫꦧ꧀ꦪꦴꦢꦶꦁ ꦗꦷꦮꦴꦢꦶꦁ ꦏꦴꦪꦴꦢꦶꦚ꧀ꦕ ꦄꦨꦹꦠꦩꦠ꧀ꦡꦁ ꦄꦗ꧀ꦙꦴꦫꦺꦴꦥꦺꦠ꧀ꦮꦴ ꦢꦶꦛ꧀ꦜꦶꦪꦺꦴ ꦥꦮꦠ꧀ꦠꦤ꧀ꦠꦷꦠꦶ. ꦄꦨꦶꦮꦢꦤ꧀ꦠꦷꦠꦶ, ‘‘ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚ’’ꦤ꧀ꦠꦶ ꦄꦨꦶꦤꦶꦮꦶꦱꦶꦠ꧀ꦮꦴ ꦮꦢꦤ꧀ꦠꦶ, ‘‘ꦄꦪꦁ ꦣꦩ꧀ꦩꦺꦴ, ꦤꦴꦪꦁ ꦣꦩ꧀ꦩꦺꦴ’’ꦠꦶꦄꦴꦢꦶꦤꦴ ꦮꦶꦮꦢꦤ꧀ꦠꦶ. ꦄꦨꦶꦮꦢꦤꦏꦶꦫꦶꦪꦴꦪ ꦄꦗ꧀ꦗꦴꦥꦶ ꦄꦮꦶꦕ꧀ꦖꦺꦢꦨꦴꦮꦢꦱ꧀ꦱꦤꦠ꧀ꦡꦁ ꦮꦠ꧀ꦠꦩꦴꦤꦏꦴꦭꦮꦕꦤꦁ.
ꦱꦚ꧀ꦚꦴ ꦌꦠꦱ꧀ꦱ ꦄꦠ꧀ꦡꦷꦠꦶ ꦱꦚ꧀ꦚꦷꦠꦶ ꦄꦴꦲ ‘‘ꦱꦚ꧀ꦚꦴꦱꦩꦔ꧀ꦒꦷ’’ꦠꦶ. ꦤꦠ꧀ꦡꦶ ꦌꦠꦱ꧀ꦱ ꦫꦺꦴꦒꦺꦴ ꦨꦔ꧀ꦒꦺꦴꦠꦶ ꦄꦫꦺꦴꦒꦺꦴꦠꦶ ꦄꦫꦺꦴꦒꦱꦢ꧀ꦢꦱ꧀ꦱ ꦤꦶꦕ꧀ꦕꦥꦫꦶꦪꦴꦪꦠꦴ ꦮꦺꦢꦶꦠꦧ꧀ꦧꦴ. ꦫꦺꦴꦒꦫꦲꦶꦠꦠꦴꦱꦷꦱꦺꦤ ꦮꦴ ꦤꦶꦧ꧀ꦧꦶꦏꦴꦫꦠꦴꦪ ꦤꦶꦕ꧀ꦕꦠꦁ ꦥꦛꦶꦗꦴꦤꦴꦠꦶ ꦢꦶꦛ꧀ꦜꦶꦒꦠꦶꦏꦺꦴꦠꦶ ꦄꦴꦲ ‘‘ꦄꦫꦺꦴꦒꦺꦴꦠꦶ ꦤꦶꦕ꧀ꦕꦺꦴ’’ꦠꦶ. ꦆꦩꦶꦤꦴꦠꦶ, ‘‘ꦱꦚ꧀ꦚꦷ ꦄꦠ꧀ꦠꦴ ꦄꦫꦺꦴꦒꦺꦴ ꦥꦫꦁ ꦩꦫꦟꦴ’’ꦠꦶ ꦆꦩꦶꦤꦴ ꦮꦕꦤꦺꦤ. ꦱꦺꦴꦭ꦳ꦱ ꦱꦚ꧀ꦚꦷꦮꦴꦢꦴꦠꦶ – ꦫꦹꦥꦷꦕꦠꦸꦏ꧀ꦏꦁ, ꦄꦫꦹꦥꦷꦕꦠꦸꦏ꧀ꦏꦁ, ꦄꦤ꧀ꦠꦮꦴꦕꦠꦸꦏ꧀ꦏꦁ, ꦌꦏꦤ꧀ꦠꦱꦸꦑꦷꦕꦠꦸꦏ꧀ꦏꦤ꧀ꦠꦶ – ꦆꦩꦺꦱꦁ ꦕꦠꦸꦤ꧀ꦤꦁ ꦕꦠꦸꦏ꧀ꦏꦴꦤꦁ ꦮꦱꦺꦤ ꦱꦺꦴꦭ꦳ꦱ ꦱꦚ꧀ꦚꦷꦮꦴꦢꦴ ꦏꦡꦶꦠꦴ. ꦆꦩꦺꦱꦸꦪꦺꦮ ꦥꦸꦫꦶꦩꦴꦤꦁ ꦢ꧀ꦮꦶꦤ꧀ꦤꦁ ꦕꦠꦸꦏ꧀ꦏꦴꦤꦁ ꦮꦱꦺꦤ ꦄꦛ꧀ꦜ ꦱꦚ꧀ꦚꦷꦮꦴꦢꦴ ꦄꦛ꧀ꦜ ꦕ ꦤꦺꦮꦱꦚ꧀ꦚꦷꦤꦴꦱꦚ꧀ꦚꦷꦮꦴꦢꦴ ꦮꦺꦢꦶꦠꦧ꧀ꦧꦴ. ꦱꦠ꧀ꦠ ꦈꦕ꧀ꦖꦺꦢꦮꦴꦢꦴꦠꦶ ꦩꦤꦸꦱ꧀ꦱꦠ꧀ꦠꦨꦴꦮꦺ ꦏꦴꦩꦴꦮꦕꦫꦢꦺꦮꦠ꧀ꦠꦨꦴꦮꦺ ꦫꦹꦥꦴꦮꦕꦫꦢꦺꦮꦠ꧀ꦠꦨꦴꦮꦺ ꦕꦠꦸꦧ꧀ꦧꦶꦣꦴꦫꦸꦥ꧀ꦥꦠ꧀ꦠꦨꦴꦮꦺ ꦕꦮꦶꦠ꧀ꦮꦴ ꦱꦠ꧀ꦠꦱ꧀ꦱ ꦈꦕ꧀ꦖꦺꦢꦥꦚ꧀ꦚꦴꦥꦤꦮꦱꦺꦤ ꦱꦠ꧀ꦠ ꦈꦕ꧀ꦖꦺꦢꦮꦴꦢꦴ ꦏꦡꦶꦠꦴ. ꦄꦱꦠꦺꦴ ꦮꦶꦤꦴꦱꦴꦱꦩ꧀ꦨꦮꦠꦺꦴ ꦄꦠ꧀ꦡꦶꦨꦴꦮꦤꦶꦧꦤ꧀ꦣꦤꦺꦴ ꦈꦕ꧀ꦖꦺꦢꦮꦴꦢꦺꦴꦠꦶ ꦮꦸꦠ꧀ꦠꦁ ‘‘ꦱꦠꦺꦴꦠꦶ ꦮꦶꦗ꧀ꦗꦩꦴꦤꦱ꧀ꦱꦴ’’ꦠꦶ. ꦪꦴꦮꦴꦪꦁ ꦄꦠ꧀ꦠꦴ ꦤ ꦈꦕ꧀ꦖꦶꦗ꧀ꦗꦠꦶ, ꦠꦴꦮ ꦮꦶꦗ꧀ꦗꦠꦶ ꦌꦮꦴꦠꦶ ꦒꦲꦟꦠꦺꦴ ꦤꦶꦫꦸꦢꦪꦮꦶꦤꦴꦱꦺꦴ ꦆꦣ ꦈꦕ꧀ꦖꦺꦢꦺꦴꦠꦶ ꦄꦣꦶꦥ꧀ꦥꦺꦠꦺꦴꦠꦶ ꦄꦴꦲ ‘‘ꦈꦥꦕ꧀ꦖꦺꦢ’’ꦤ꧀ꦠꦶ. ꦮꦶꦱꦺꦱꦺꦤ ꦤꦴꦱꦺꦴ ꦮꦶꦤꦴꦱꦺꦴ, ꦄꦨꦴꦮꦺꦴ, ꦱꦺꦴ ꦥꦤ ꦩꦁꦱꦕꦏ꧀ꦑꦸ-ꦥꦚ꧀ꦚꦴꦕꦏ꧀ꦑꦸ-ꦢꦱ꧀ꦱꦤꦥꦡꦴꦠꦶꦏ꧀ꦏꦩꦺꦴꦮꦴꦠꦶ ꦄꦴꦲ ‘‘ꦄꦢꦱ꧀ꦱꦤ’’ꦤ꧀ꦠꦶ. ꦄꦢꦱ꧀ꦱꦤꦺ ꦲꦶ ꦤꦴꦱ-ꦱꦢ꧀ꦢꦺꦴ ꦭꦺꦴꦏꦺ ꦤꦶꦫꦸꦭ꦳꧀ꦲꦺꦴ. ꦨꦮꦮꦶꦒꦩꦤ꧀ꦠꦶ ꦱꦨꦴꦮꦴꦥꦒꦩꦤꦁ ꦪꦺꦴ ꦲꦶ ꦤꦶꦫꦸꦢꦪꦮꦶꦤꦴꦱꦮꦱꦺꦤ ꦈꦕ꧀ꦖꦶꦗ꧀ꦗꦠꦶ, ꦤ ꦱꦺꦴ ꦄꦠ꧀ꦠꦤꦺꦴ ꦱꦨꦴꦮꦺꦤꦺꦮ ꦠꦶꦛ꧀ꦜꦠꦶ.
ꦥꦚ꧀ꦕ ꦢꦶꦛ꧀ꦜꦣꦩ꧀ꦩꦤꦶꦧ꧀ꦧꦴꦤꦮꦴꦢꦴꦠꦶ ꦥꦚ꧀ꦕꦏꦴꦩꦒꦸꦟꦱꦸꦑꦩꦤꦸꦨꦺꦴꦒꦮꦱꦺꦤ ꦕꦠꦸꦧ꧀ꦧꦶꦣꦫꦹꦥꦗ꧀ꦙꦴꦤꦱꦸꦑꦥꦫꦶꦨꦺꦴꦒꦮꦱꦺꦤ ꦕ ꦢꦶꦛ꧀ꦜꦣꦩ꧀ꦩꦺ ꦤꦶꦧ꧀ꦧꦴꦤꦥ꧀ꦥꦠ꧀ꦠꦶꦥꦚ꧀ꦚꦴꦥꦤꦮꦴꦢꦴ. ꦢꦶꦛ꧀ꦜꦣꦩ꧀ꦩꦺꦴꦠꦶ ꦢꦱ꧀ꦱꦤꦨꦹꦠꦺꦤ ꦚꦴꦟꦺꦤ ꦈꦥꦭꦢ꧀ꦣꦣꦩ꧀ꦩꦺꦴ. ꦠꦠ꧀ꦡ ꦪꦺꦴ ꦄꦤꦶꦤ꧀ꦢ꧀ꦫꦶꦪꦮꦶꦱꦪꦺꦴ, ꦱꦺꦴꦥꦶ ꦱꦸꦥꦴꦏꦛꦨꦴꦮꦺꦤ ꦆꦤ꧀ꦢ꧀ꦫꦶꦪꦮꦶꦱꦪꦺꦴ ꦮꦶꦪ ꦲꦺꦴꦠꦷꦠꦶ ꦄꦴꦲ – ‘‘ꦢꦶꦛ꧀ꦜꦣꦩ꧀ꦩꦺꦴꦠꦶ ꦥꦕ꧀ꦕꦏ꧀ꦑꦣꦩ꧀ꦩꦺꦴ ꦮꦸꦕ꧀ꦕꦠꦷ’’ꦠꦶ. ꦠꦺꦤꦺꦮ ꦕ, ‘‘ꦠꦠ꧀ꦡ ꦠꦠ꧀ꦡ ꦥꦛꦶꦭꦢ꧀ꦣꦄꦠ꧀ꦠꦨꦴꦮꦱ꧀ꦱꦺꦠꦁ ꦄꦣꦶꦮꦕꦤ’’ꦤ꧀ꦠꦶ ꦮꦸꦠ꧀ꦠꦁ. ꦱꦚ꧀ꦚꦷꦠꦶ ꦄꦴꦢꦶꦮꦱꦺꦤ ꦠꦷꦲꦴꦏꦴꦫꦺꦲꦶ ꦱꦤ꧀ꦠꦤ꧀ꦠꦶ ꦱꦚ꧀ꦚꦷ ꦄꦱꦚ꧀ꦚꦷ ꦤꦺꦮꦱꦚ꧀ꦚꦷꦤꦴꦱꦚ꧀ꦚꦷꦠꦶ ꦆꦩꦺꦲꦶ ꦄꦴꦏꦴꦫꦺꦲꦶ ꦮꦶꦗ꧀ꦗꦩꦴꦤꦁ, ꦱꦢꦴ ꦈꦥꦭꦧ꧀ꦨꦩꦴꦤꦁ ꦱꦱ꧀ꦱꦠꦤ꧀ꦠꦶ ꦄꦠ꧀ꦡꦺꦴ. ꦱꦚ꧀ꦚꦷ ꦄꦠ꧀ꦠꦴꦠꦶꦄꦴꦢꦷꦤꦶ ꦠꦷꦟꦶ ꦢꦱ꧀ꦱꦤꦴꦤꦶ. ꦱꦤ꧀ꦠꦄꦠ꧀ꦡꦮꦱꦺꦤ ꦌꦏꦤ꧀ꦠꦶ ꦱꦱ꧀ꦱꦠꦱ꧀ꦱ ꦄꦠ꧀ꦠꦤꦺꦴ ꦮꦱꦺꦤ ꦌꦏꦁ ꦢꦱ꧀ꦱꦤꦁ. ꦆꦠꦫꦴꦤꦶ ꦢ꧀ꦮꦺꦠꦶ ꦈꦕ꧀ꦖꦺꦢꦮꦴꦢ-ꦢꦶꦛ꧀ꦜꦣꦩ꧀ꦩꦤꦶꦧ꧀ꦧꦴꦤꦮꦴꦢꦱꦚ꧀ꦚꦶꦠꦴꦤꦶ ꦢ꧀ꦮꦺ ꦢꦱ꧀ꦱꦤꦴꦤꦶ. ꦠꦷꦟꦶ ꦲꦸꦠ꧀ꦮꦴ ꦥꦚ꧀ꦕ ꦲꦺꦴꦤ꧀ꦠꦷꦠꦶ ꦆꦢꦁ, ‘‘ꦱꦤ꧀ꦠꦄꦠ꧀ꦡꦮꦱꦺꦤ ꦌꦏ’’ꦤ꧀ꦠꦶ ꦱꦔ꧀ꦒꦲꦮꦱꦺꦤ ꦮꦸꦠ꧀ꦠꦱ꧀ꦱ ꦱꦚ꧀ꦚꦷꦠꦶ ꦄꦴꦢꦶꦮꦶꦨꦴꦒꦮꦱꦺꦤ ꦮꦸꦠ꧀ꦠꦠ꧀ꦠꦴ ꦱꦸꦮꦶꦚ꧀ꦚꦺꦪ꧀ꦪꦤ꧀ꦠꦶ ꦄꦛ꧀ꦜꦏꦡꦴꦪꦁ ꦤ ꦈꦢ꧀ꦣꦛꦁ.
꧒꧒. ꦫꦹꦥꦷꦁ ꦮꦴꦠꦶ ꦌꦠ꧀ꦡ (ꦢꦷ. ꦤꦶ. ꦛꦷ. ꧑.꧗꧖-꧗꧗) ꦪꦢꦶ ꦫꦹꦥꦁ ꦄꦱ꧀ꦱ ꦄꦠ꧀ꦡꦷꦠꦶ ꦫꦹꦥꦷꦠꦶ ꦄꦪꦩꦠ꧀ꦡꦺꦴ ꦄꦣꦶꦥ꧀ꦥꦺꦠꦺꦴ. ꦌꦮꦁ ꦱꦠꦶ ꦫꦹꦥꦮꦶꦤꦶꦩꦸꦠ꧀ꦠꦺꦤ ꦄꦠ꧀ꦠꦤꦴ ꦨꦮꦶꦠꦧ꧀ꦧꦁ ꦱꦚ꧀ꦚꦴꦪ ꦮꦶꦪ ꦫꦹꦥꦱ꧀ꦱꦥꦶ ꦄꦠ꧀ꦠꦤꦶꦪꦠ꧀ꦠꦴ. ꦤ ꦲꦶ ꦱꦚ꧀ꦚꦷ ꦄꦠ꧀ꦠꦴꦠꦶ ꦌꦠ꧀ꦡ ꦱꦚ꧀ꦚꦴ ꦄꦠ꧀ꦠꦴ. ꦠꦡꦴ ꦲꦶ ꦮꦸꦠ꧀ꦠꦁ ꦱꦸꦩꦔ꧀ꦒꦭꦮꦶꦭꦴꦱꦶꦤꦶꦪꦁ (ꦢꦷ. ꦤꦶ. ꦄꦛ꧀ꦜ. ꧑.꧗꧖-꧗꧗) ‘‘ꦠꦠ꧀ꦡ ꦥꦮꦠ꧀ꦠꦱꦚ꧀ꦚꦚ꧀ꦕꦱ꧀ꦱ ꦱꦚ꧀ꦚꦴꦠꦶ ꦒꦲꦺꦠ꧀ꦮꦴꦠꦶ ꦮꦸꦠ꧀ꦠ’’ꦤ꧀ꦠꦶ. ꦌꦮꦁ ꦱꦤ꧀ꦠꦺ, ‘‘ꦏꦱꦶꦟꦫꦹꦥꦁ ꦄꦠ꧀ꦠꦴꦠꦶ ꦒꦟ꧀ꦲꦴꦠꦷ’’ꦠꦶ ꦆꦢꦁ ꦏꦡꦤ꧀ꦠꦶ? ꦤ ꦑꦺꦴ ꦥꦤꦺꦠꦁ ꦌꦮꦁ ꦢꦛ꧀ꦜꦧ꧀ꦧꦁ – ‘‘ꦫꦹꦥꦁ ꦄꦱ꧀ꦱ ꦄꦠ꧀ꦡꦷꦠꦶ ꦫꦹꦥꦷ’’ꦠꦶ, ꦄꦡ ꦑꦺꦴ ‘‘ꦫꦸꦥ꧀ꦥꦤꦱꦷꦭꦺꦴ ꦫꦹꦥꦷ’’ꦠꦶ. ꦫꦸꦥ꧀ꦥꦤꦚ꧀ꦕꦺꦠ꧀ꦡ ꦫꦹꦥꦱꦫꦶꦏ꧀ꦑꦠꦴꦪ ꦏꦱꦶꦟꦫꦹꦥꦱ꧀ꦱ ꦮꦝ꧀ꦞꦶꦠꦴꦮꦝ꧀ꦞꦶꦠꦏꦴꦭꦮꦱꦺꦤ ꦮꦶꦱꦺꦱꦴꦥꦠ꧀ꦠꦶ, ꦱꦴ ꦕ ꦤꦠ꧀ꦡꦷꦠꦶ ꦤ ꦱꦏ꧀ꦏꦴ ꦮꦠ꧀ꦠꦸꦁ ꦥꦫꦶꦠ꧀ꦠꦮꦶꦥꦸꦭꦠꦴꦢꦶꦮꦶꦱꦺꦱꦱꦧ꧀ꦨꦴꦮꦠꦺꦴ. ꦪꦢꦶ ꦌꦮꦁ ꦆꦩꦱ꧀ꦱ ꦮꦴꦢꦱ꧀ꦱ ꦱꦱ꧀ꦱꦠꦢꦶꦛ꧀ꦜꦶꦱꦔ꧀ꦒꦲꦺꦴ ꦤ ꦪꦸꦗ꧀ꦗꦠꦷꦠꦶ? ꦤꦺꦴ ꦤ ꦪꦸꦗ꧀ꦗꦠꦶ ꦏꦴꦪꦨꦺꦢꦠꦺꦴ ꦈꦢ꧀ꦣꦁ ꦄꦠ꧀ꦠꦤꦺꦴ ꦤꦶꦧ꧀ꦧꦶꦏꦴꦫꦠꦴꦪ ꦠꦺꦤ ꦄꦣꦶꦥ꧀ꦥꦺꦠꦠ꧀ꦠꦴ. ꦠꦡꦴ ꦲꦶ ꦮꦸꦠ꧀ꦠꦁ ‘‘ꦄꦫꦺꦴꦒꦺꦴ ꦥꦫꦁ ꦩꦫꦟꦴ’’ꦠꦶ. ꦄꦡ ꦮꦴ ‘‘ꦫꦹꦥꦁ ꦄꦱ꧀ꦱ ꦄꦠ꧀ꦡꦷꦠꦶ ꦫꦹꦥꦷ’’ꦠꦶ ꦮꦸꦕ꧀ꦕꦩꦴꦤꦺꦥꦶ ꦤ ꦢꦺꦴꦱꦺꦴ. ꦏꦥ꧀ꦥꦤꦴꦱꦶꦢ꧀ꦣꦺꦤꦥꦶ ꦲꦶ ꦨꦺꦢꦺꦤ ꦱꦴꦩꦶꦤꦶꦢ꧀ꦢꦺꦱꦢꦱ꧀ꦱꦤꦠꦺꦴ ꦪꦡꦴ ‘‘ꦱꦶꦭꦴꦥꦸꦠ꧀ꦠꦏꦱ꧀ꦱ ꦱꦫꦷꦫ’’ꦤ꧀ꦠꦶ. ꦫꦸꦥ꧀ꦥꦤꦁ ꦮꦴ ꦫꦸꦥ꧀ꦥꦤꦱꦨꦴꦮꦺꦴ ꦫꦹꦥꦁ, ꦠꦁ ꦌꦠꦱ꧀ꦱ ꦄꦠ꧀ꦡꦷꦠꦶ ꦫꦹꦥꦷ, ꦄꦠ꧀ꦠꦴ ‘‘ꦫꦹꦥꦶꦤꦺꦴ ꦣꦩ꧀ꦩꦴ’’ꦠꦶꦄꦴꦢꦷꦱꦸ (ꦣ. ꦱ. ꧑꧑ ꦢꦸꦏꦩꦴꦠꦶꦏꦴ) ꦮꦶꦪ. ꦌꦮꦚ꧀ꦕ ꦏꦠ꧀ꦮꦴ ꦫꦹꦥꦱꦨꦴꦮꦠ꧀ꦠꦴ ꦄꦠ꧀ꦠꦤꦺꦴ ‘‘ꦫꦹꦥꦁ ꦄꦠ꧀ꦠꦴ’’ꦠꦶ ꦮꦕꦤꦁ ꦚꦴꦪꦴꦒꦠꦩꦺꦮꦴꦠꦶ ‘‘ꦏꦱꦶꦟꦫꦹꦥꦁ ꦄꦠ꧀ꦠꦴꦠꦶ ꦒꦟ꧀ꦲꦴꦠꦷ’’ꦠꦶ ꦮꦸꦠ꧀ꦠꦁ. ꦄꦫꦹꦥꦶꦤ꧀ꦠꦶ ꦌꦠ꧀ꦠꦴꦥꦶ ꦮꦸꦠ꧀ꦠꦤꦪꦴꦤꦸꦱꦴꦫꦺꦤ ꦪꦡꦴꦫꦲꦁ ꦄꦠ꧀ꦡꦺꦴ ꦮꦠ꧀ꦠꦧ꧀ꦧꦺꦴ. ꦱꦤ꧀ꦠꦱꦸꦑꦸꦩꦁ ꦩꦸꦚ꧀ꦕꦶꦠ꧀ꦮꦴ ꦠꦧ꧀ꦧꦶꦥꦫꦷꦠꦱ꧀ꦱ ꦒꦲꦟꦺ ꦏꦴꦫꦟꦁ ꦤꦠ꧀ꦡꦷꦠꦶ ꦭꦴꦨꦷ, ‘‘ꦏꦱꦶꦟꦫꦹꦥꦁ ꦄꦠ꧀ꦠꦴ’’ꦠꦶ ꦒꦟ꧀ꦲꦴꦠꦷꦠꦶ ꦭꦴꦨꦶꦠꦏ꧀ꦏꦶꦤꦺꦴ ꦜꦥꦺꦠ꧀ꦮꦴ, ꦱꦺꦱꦠꦏ꧀ꦏꦷ ꦭꦴꦨꦶꦒ꧀ꦒꦲꦟꦺꦤꦺꦮ ꦒꦲꦶꦠꦴ. ꦄꦤꦸꦱ꧀ꦱꦸꦠꦶꦠꦏ꧀ꦏꦶꦏꦺꦴꦥꦶ ꦱꦸꦢ꧀ꦣꦠꦏ꧀ꦏꦶꦏꦺꦴꦥꦶ ꦮꦴ ꦤꦶꦫꦔ꧀ꦏꦸꦱꦠ꧀ꦠꦴ ꦠꦏ꧀ꦏꦤꦱ꧀ꦱ ꦏꦱꦶꦟꦫꦹꦥꦩ꧀ꦥꦶ ꦄꦠ꧀ꦠꦴꦠꦶ ꦏꦢꦴꦕꦶꦥꦶ ꦒꦟ꧀ꦲꦺꦪ꧀ꦪꦴꦠꦶ ꦮꦸꦠ꧀ꦠꦁ – ‘‘ꦈꦨꦺꦴꦥꦶ ꦫꦹꦥꦴꦤꦶ ꦒꦟ꧀ꦲꦴꦠꦶꦪꦺꦮꦴ’’ꦠꦶ. ꦱꦸꦢ꧀ꦣꦠꦏ꧀ꦏꦶꦏꦱ꧀ꦱ ꦈꦨꦪꦒ꧀ꦒꦲꦟꦁ ꦤ ꦏꦠꦁ, ꦠꦱ꧀ꦩꦴ ꦱꦴꦱꦔ꧀ꦏꦮꦕꦤꦁ.
ꦏꦱꦶꦟꦸꦒ꧀ꦓꦴꦛꦶꦩꦴꦏꦴꦱ-ꦥꦜꦩꦴꦫꦸꦥ꧀ꦥꦮꦶꦚ꧀ꦚꦴꦟ-ꦤꦠ꧀ꦡꦶꦨꦴꦮꦄꦴꦏꦶꦚ꧀ꦕꦚ꧀ꦚꦴꦪꦠꦤꦴꦤꦶ ꦄꦫꦹꦥꦱꦩꦴꦥꦠ꧀ꦠꦶꦤꦶꦩꦶꦠ꧀ꦠꦁ. ꦜꦥꦺꦠ꧀ꦮꦴ ꦱꦚ꧀ꦚꦴꦏ꧀ꦑꦤ꧀ꦣꦤ꧀ꦠꦶ ꦆꦢꦁ ꦱꦚ꧀ꦚꦴꦪ ꦄꦠ꧀ꦠꦤꦶꦪꦠꦁ ꦲꦢꦪꦺ ꦏꦠ꧀ꦮꦴ ꦮꦸꦠ꧀ꦠꦁ. ‘‘ꦫꦹꦥꦶꦁ ꦮꦴ’’ꦠꦶ ꦌꦠ꧀ꦡ ꦮꦸꦠ꧀ꦠꦤꦪꦺꦤ ꦥꦤ ꦄꦠ꧀ꦡꦺ ꦮꦸꦕ꧀ꦕꦩꦴꦤꦺ ꦱꦚ꧀ꦚꦴꦏ꧀ꦑꦤ꧀ꦣꦁ ꦧꦲꦶꦢ꧀ꦣꦴ ꦄꦏꦠ꧀ꦮꦴ ‘‘ꦄꦫꦹꦥꦣꦩ꧀ꦩꦺ’’ꦆꦕ꧀ꦕꦺꦮ ꦮꦠ꧀ꦠꦧ꧀ꦧꦁ ꦱꦶꦪꦴ. ꦩꦶꦱ꧀ꦱꦏꦒ꧀ꦒꦴꦲꦮꦱꦺꦤꦴꦠꦶ ꦫꦹꦥꦴꦫꦹꦥꦱꦩꦴꦥꦠ꧀ꦠꦷꦤꦁ ꦤꦶꦩꦶꦠ꧀ꦠꦴꦤꦶ ꦌꦏꦗ꧀ꦙꦁ ꦏꦠ꧀ꦮꦴ, ‘‘ꦌꦏꦺꦴ ꦄꦠ꧀ꦠꦴ’’ꦠꦶ, ꦠꦠ꧀ꦡ ꦥꦮꦠ꧀ꦠꦱꦚ꧀ꦚꦚ꧀ꦕꦱ꧀ꦱ, ‘‘ꦱꦚ꧀ꦚꦴ’’ꦠꦶ ꦒꦲꦟꦮꦱꦺꦤ. ꦄꦪꦚ꧀ꦲꦶ ꦢꦶꦛ꧀ꦜꦶꦒꦠꦶꦏꦺꦴ ꦫꦹꦥꦴꦫꦹꦥꦱꦩꦴꦥꦠ꧀ꦠꦶꦭꦴꦨꦶꦠꦴꦪ ꦠꦁꦤꦶꦩꦶꦠ꧀ꦠꦁ ꦫꦹꦥꦨꦴꦮꦺꦤ ꦄꦫꦹꦥꦨꦴꦮꦺꦤ ꦕ ꦒꦲꦺꦠ꧀ꦮꦴ ꦈꦥꦠꦶꦛ꧀ꦜꦠꦶ, ꦠꦱ꧀ꦩꦴ, ‘‘ꦫꦹꦥꦷ ꦄꦫꦹꦥꦷ ꦕꦴ’’ꦠꦶ ꦄꦨꦶꦤꦶꦮꦺꦱꦁ ꦗꦤꦺꦠꦶ ꦄꦗ꧀ꦙꦠ꧀ꦠꦮꦴꦢꦶꦤꦺꦴ ꦮꦶꦪ ꦠꦏ꧀ꦏꦩꦠ꧀ꦠꦺꦤꦺꦮ ꦮꦴ ꦫꦹꦥꦴꦫꦹꦥꦣꦩ꧀ꦩꦺ ꦩꦶꦱ꧀ꦱꦏꦮꦱꦺꦤ ꦒꦲꦺꦠ꧀ꦮꦴ, ‘‘ꦫꦹꦥꦷ ꦕ ꦄꦫꦹꦥꦷꦕ ꦄꦠ꧀ꦠꦴ ꦲꦺꦴꦠꦷ’’ꦠꦶ. ꦠꦏ꧀ꦏꦒꦴꦲꦺꦤꦺꦮꦴꦠꦶ ꦱꦔ꧀ꦑꦴꦫꦴꦮꦱꦺꦱꦱꦸꦑꦸꦩꦨꦴꦮꦥ꧀ꦥꦠ꧀ꦠꦣꦩ꧀ꦩꦴ ꦮꦶꦪ ꦕ ꦄꦕ꧀ꦕꦤ꧀ꦠꦱꦸꦑꦸꦩꦨꦴꦮꦥꦠ꧀ꦠꦶꦪꦴ ꦱꦏꦶꦕ꧀ꦕꦱꦴꦣꦤꦴꦱꦩꦠ꧀ꦡꦠꦴꦪ ꦡꦩ꧀ꦨꦏꦸꦛ꧀ꦛꦲꦠ꧀ꦡꦥꦴꦢꦴꦤꦁ ꦱꦔ꧀ꦓꦴꦠꦺꦴ ꦮꦶꦪ ꦤꦺꦮ ꦫꦹꦥꦷ, ꦫꦹꦥꦱꦨꦴꦮꦴꦤꦠꦶꦮꦠ꧀ꦠꦤꦠꦺꦴ ꦤ ꦄꦫꦹꦥꦷꦠꦶ ꦌꦮꦁ ꦥꦮꦠ꧀ꦠꦠꦏ꧀ꦏꦒꦴꦲꦺꦤ. ꦭꦴꦨꦶꦮꦱꦺꦤꦥꦶ ꦮꦴ ꦄꦤ꧀ꦠꦴꦤꦤ꧀ꦠꦶꦏꦕꦠꦸꦠ꧀ꦡꦮꦴꦢꦺ ꦮꦏ꧀ꦑꦩꦴꦤꦤꦪꦺꦤ ꦄꦚ꧀ꦚꦩꦚ꧀ꦚꦥꦛꦶꦥꦏ꧀ꦑꦮꦱꦺꦤ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ. ꦏꦺꦮꦭꦁ ꦥꦤ ꦠꦠ꧀ꦡ ꦢꦺꦱꦏꦴꦭꦨꦺꦢꦮꦱꦺꦤ ꦠꦠꦶꦪꦕꦠꦸꦠ꧀ꦡꦮꦴꦢꦴ ꦆꦕ꧀ꦖꦶꦠꦴ; ꦆꦣ ꦏꦴꦭꦮꦠ꧀ꦡꦸ ꦨꦺꦢꦮꦱꦺꦤꦴꦠꦶ ꦄꦪꦩꦺꦮ ꦮꦶꦱꦺꦱꦺꦴ. ꦏꦴꦭꦨꦺꦢꦮꦱꦺꦤ ꦕꦺꦠ꧀ꦡ ꦠꦠꦶꦪꦮꦴꦢꦱ꧀ꦱ ꦥꦮꦠ꧀ꦠꦶ ꦫꦹꦥꦴꦫꦹꦥꦤꦶꦩꦶꦠ꧀ꦠꦴꦤꦁ ꦱꦲ ꦄꦤꦸꦥꦛ꧀ꦜꦴꦤꦠꦺꦴ; ꦕꦠꦸꦠ꧀ꦡꦮꦴꦢꦱ꧀ꦱ ꦥꦤ ꦮꦠ꧀ꦡꦸꦨꦺꦢꦮꦱꦺꦤ ꦥꦮꦠ꧀ꦠꦶ ꦫꦹꦥꦴꦫꦹꦥꦣꦩ꧀ꦩꦴꦤꦁ ꦱꦩꦹꦲꦠꦺꦴ, ‘‘ꦌꦏꦺꦴ ꦄꦠ꧀ꦠꦴ’’ꦠꦶ ꦠꦏ꧀ꦏꦮꦱꦺꦤꦴꦠꦶ ꦠꦠ꧀ꦡ ꦮꦏ꧀ꦑꦩꦴꦤꦤꦪꦴꦤꦸꦱꦴꦫꦺꦤ ꦮꦺꦢꦶꦠꦧ꧀ꦧꦁ.
ꦪꦢꦶꦥꦶ ꦄꦛ꧀ꦜꦱꦩꦴꦥꦠ꧀ꦠꦶꦭꦴꦨꦶꦤꦺꦴ ꦢꦶꦛ꧀ꦜꦶꦒꦠꦶꦏꦱ꧀ꦱ ꦮꦱꦺꦤ ꦱꦩꦴꦥꦠ꧀ꦠꦶꦨꦺꦢꦺꦤ ꦱꦚ꧀ꦚꦴꦤꦴꦤꦠ꧀ꦠꦱꦩ꧀ꦨꦮꦠꦺꦴ ꦢꦸꦠꦶꦪꦢꦶꦛ꧀ꦜꦶꦥꦶ ꦱꦩꦴꦥꦤ꧀ꦤꦏꦮꦱꦺꦤ ꦭꦧ꧀ꦨꦠꦶ; ꦠꦡꦴꦥꦶ ꦱꦩꦴꦥꦠ꧀ꦠꦶꦪꦁ ꦌꦏꦫꦹꦥꦺꦤꦺꦮ ꦱꦚ꧀ꦚꦴꦪ ꦈꦥꦛ꧀ꦜꦴꦤꦠꦺꦴ, ‘‘ꦥꦜꦩꦢꦶꦛ꧀ꦜꦶ ꦱꦩꦴꦥꦤ꧀ꦤꦏꦮꦴꦫꦺꦤ ꦏꦡꦶꦠꦴ’’ꦠꦶ ꦄꦴꦲ. ꦠꦺꦤꦺꦮꦺꦠ꧀ꦡ ꦱꦩꦴꦥꦤ꧀ꦤꦏꦒ꧀ꦒꦲꦟꦁ ꦏꦠꦁ. ꦌꦏꦱꦩꦴꦥꦠ꧀ꦠꦶꦭꦴꦨꦶꦤꦺꦴ ꦌꦮ ꦮꦴ ꦮꦱꦺꦤ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ. ꦱꦩꦴꦥꦠ꧀ꦠꦶ ꦨꦺꦢꦺꦤ ꦱꦚ꧀ꦚꦴꦨꦺꦢꦱꦩ꧀ꦨꦮꦺꦥꦶ ꦧꦲꦶꦢ꧀ꦣꦴ ꦥꦸꦡꦸꦠ꧀ꦠꦴꦫꦩ꧀ꦩꦟꦺ ꦱꦚ꧀ꦚꦴꦤꦴꦤꦠ꧀ꦠꦺꦤ ꦎꦭ꦳ꦴꦫꦶꦏꦺꦤ ꦤꦴꦤꦠ꧀ꦠꦱꦚ꧀ꦚꦷꦠꦶ, ‘‘ꦢꦸꦠꦶꦪꦢꦶꦛ꧀ꦜꦶ ꦄꦱꦩꦴꦥꦤ꧀ꦤꦏꦮꦴꦫꦺꦤꦴ’’ꦠꦶ ꦄꦴꦲ. ꦄꦮꦝ꧀ꦞꦶꦠꦏꦱꦶꦟꦮꦱꦺꦤ ꦥꦫꦶꦠ꧀ꦠꦱꦚ꧀ꦚꦶꦠꦁ, ꦮꦝ꧀ꦞꦶꦠꦏꦱꦶꦟꦮꦱꦺꦤ ꦄꦥ꧀ꦥꦩꦴꦟꦱꦚ꧀ꦚꦶꦠꦁ ꦢꦱ꧀ꦱꦺꦠꦸꦁ, ‘‘ꦠꦠꦶꦪꦢꦶꦛ꧀ꦜꦶ ꦱꦸꦥ꧀ꦥꦩꦠ꧀ꦠꦺꦤ ꦮꦴ ꦱꦫꦴꦮꦩꦠ꧀ꦠꦺꦤ ꦮꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ‘‘ꦄꦔ꧀ꦒꦸꦛ꧀ꦜꦥ꧀ꦥꦩꦴꦟꦺꦴ ꦮꦴ ꦄꦠ꧀ꦠꦴ ꦪꦮꦥ꧀ꦥꦩꦴꦟꦺꦴ, ꦄꦟꦸꦩꦠ꧀ꦠꦺꦴ ꦮꦴ ꦄꦠ꧀ꦠꦴ’’ꦠꦶꦄꦴꦢꦶꦢꦱ꧀ꦱꦤꦮꦱꦺꦤ (ꦈꦢꦴ. ꦄꦛ꧀ꦜ. ꧕꧔; ꦢꦷ. ꦤꦶ. ꦛꦷ. ꧑.꧗꧖-꧗꧗) ꦥꦫꦶꦠ꧀ꦠꦺꦴ ꦱꦚ꧀ꦚꦷꦠꦶ ꦥꦫꦶꦠ꧀ꦠꦱꦚ꧀ꦚꦷ. ꦏꦥꦶꦭꦏꦟꦴꦢꦴꦢꦪꦺꦴ (ꦮꦶꦨ. ꦄꦤꦸꦛꦷ. ꧑꧘꧙) ꦮꦶꦪ ꦄꦠ꧀ꦠꦤꦺꦴ ꦱꦧ꧀ꦧꦒꦠꦨꦴꦮꦥꦛꦶꦗꦴꦤꦤꦮꦱꦺꦤ ꦄꦥ꧀ꦥꦩꦴꦟꦺꦴ ꦱꦚ꧀ꦚꦷꦠꦶ ꦄꦥ꧀ꦥꦩꦴꦟꦱꦚ꧀ꦚꦷꦠꦶ ꦌꦮꦩ꧀ꦥꦺꦠ꧀ꦡ ꦄꦠ꧀ꦡꦺꦴ ꦢꦛ꧀ꦜꦧ꧀ꦧꦺꦴ.
ꦌꦠꦤ꧀ꦠꦶ, ‘‘ꦫꦹꦥꦶꦁ ꦮꦴ’’ꦠꦶꦄꦴꦢꦶꦤꦴ ꦪꦡꦴꦮꦸꦠ꧀ꦠꦄꦠ꧀ꦠꦮꦴꦢꦁ. ꦌꦏꦺꦱꦤ꧀ꦠꦶ ꦌꦏꦕ꧀ꦕꦴꦤꦁ. ꦈꦥꦴꦠꦶꦮꦠ꧀ꦠꦠꦤ꧀ꦠꦶ ꦄꦠꦶꦏ꧀ꦏꦩꦤ꧀ꦠꦴꦤꦁ. ꦤꦶꦢ꧀ꦣꦴꦫꦟꦺ ꦕꦺꦠꦁ ꦱꦴꦩꦶꦮꦕꦤꦁ. ꦮꦶꦚ꧀ꦚꦴꦟꦏꦱꦶꦟꦩꦺꦏꦺ ꦄꦨꦶꦮꦢꦤ꧀ꦠꦷꦠꦶ ꦪꦺꦴꦗꦤꦴ. ꦠꦺꦤꦴꦲ – ‘‘ꦱꦚ꧀ꦚꦁ…ꦥꦺ… ꦄꦨꦶꦮꦢꦤ꧀ꦠꦷ’’ꦠꦶ. ꦠꦠ꧀ꦡ ‘‘ꦱꦚ꧀ꦚꦁ ꦜꦥꦺꦠ꧀ꦮꦴ ꦱꦺꦱꦴꦤꦶ ꦠꦷꦟꦷ’’ꦠꦶ ꦆꦢꦁ ꦱꦚ꧀ꦚꦴꦪ ꦕꦠꦸꦏ꧀ꦏꦩ꧀ꦥꦶ ꦥꦫꦶꦥꦸꦟ꧀ꦟꦩꦺꦮ ꦒꦲꦺꦠ꧀ꦮꦴ, ꦄꦥꦫꦺ ꦄꦛ꧀ꦜꦏꦤ꧀ꦠꦶ ꦮꦢꦤ꧀ꦠꦶ. ꦠꦢꦸꦨꦪꦤ꧀ꦠꦶ ꦠꦁ ꦱꦚ꧀ꦚꦴꦄꦛ꧀ꦜꦏꦤ꧀ꦠꦶ ꦮꦸꦠ꧀ꦠꦁ ꦈꦨꦪꦁ. ꦥꦫꦠꦺꦴ ꦄꦴꦮꦶ ꦨꦮꦶꦱ꧀ꦱꦠꦷꦠꦶ, ‘‘ꦕꦠꦱ꧀ꦱꦺꦴ ꦫꦹꦥꦱꦚ꧀ꦚꦷ’’ꦠꦶꦄꦴꦢꦶꦤꦴ ꦈꦥꦫꦶ ꦥꦏꦴꦱꦺꦱ꧀ꦱꦠꦶ. ꦮꦏ꧀ꦑꦠꦶ ꦲꦶ – ‘‘ꦏꦺꦴꦛ꧀ꦜꦴꦱꦠꦺꦴ ꦄꦛ꧀ꦜ, ꦄꦠ꧀ꦡꦠꦺꦴ ꦥꦤ ꦱꦠ꧀ꦠ ꦱꦚ꧀ꦚꦴ ꦲꦺꦴꦤ꧀ꦠꦷ’’ꦠꦶ (ꦩ. ꦤꦶ. ꦄꦛ꧀ꦜ. ꧓.꧒꧒). ꦌꦠ꧀ꦡꦴꦠꦶ, ‘‘ꦌꦠꦁ ꦮꦴ ꦥꦤꦴ’’ꦠꦶ ꦌꦠꦱ꧀ꦩꦶꦁ ꦮꦴꦏ꧀ꦪꦺ. ꦱꦩꦠꦶꦏ꧀ꦏꦩꦶꦠꦸꦁ ꦱꦏ꧀ꦏꦺꦴꦤ꧀ꦠꦶ ꦠꦠ꧀ꦡ ꦄꦴꦢꦷꦤꦮꦢꦱ꧀ꦱꦤꦺꦤ ꦠꦢꦸꦢ꧀ꦣꦁ ꦄꦴꦤꦶꦱꦁꦱꦢꦱ꧀ꦱꦤꦺꦤ ꦕ ꦧ꧀ꦫꦹꦲꦶꦠꦱꦢ꧀ꦣꦴꦢꦶ ꦒꦸꦟꦠ꧀ꦠꦴ, ꦮꦶꦥꦫꦶꦪꦴꦪꦺꦤ ꦄꦱꦏ꧀ꦏꦸꦟꦤꦁ ꦮꦺꦢꦶꦠꦧ꧀ꦧꦁ. ꦪꦺ ꦱꦏ꧀ꦏꦺꦴꦤ꧀ꦠꦶ, ꦠꦺꦮ ꦒꦲꦶꦠꦴ ꦠꦺꦱꦁꦪꦺꦮ ꦮꦱꦺꦤ ꦮꦏ꧀ꦑꦩꦴꦤꦱ꧀ꦱ ꦮꦶꦱꦺꦱꦱ꧀ꦱ ꦮꦠ꧀ꦠꦸꦁ ꦱꦏ꧀ꦏꦸꦟꦺꦪ꧀ꦪꦠ꧀ꦠꦴ. ꦱꦏ꧀ꦏꦺꦴꦤ꧀ꦠꦴꦤꦚ꧀ꦕ ꦤꦺꦱꦁ ꦈꦥꦴꦠꦶꦮꦠ꧀ꦠꦤꦁ ꦄꦠ꧀ꦠꦤꦺꦴ ꦚꦴꦟꦧꦭꦴꦤꦸꦫꦹꦥꦤ꧀ꦠꦶ ꦆꦩꦩꦠ꧀ꦡꦁ ꦈꦥꦩꦴꦪ ꦢꦱ꧀ꦱꦺꦠꦸꦁ, ‘‘ꦠꦺꦱꦁ ꦥꦤꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦠ꧀ꦡ ꦄꦥ꧀ꦥꦩꦴꦟꦤ꧀ꦠꦶ ꦄꦥ꧀ꦥꦩꦴꦟꦴꦫꦩ꧀ꦩꦟꦺꦴ, ꦄꦥ꧀ꦥꦩꦴꦟꦴꦫꦩ꧀ꦩꦟꦠꦴ ꦕꦱ꧀ꦱ ꦄꦴꦒꦩꦤꦮꦱꦺꦤ ꦮꦺꦢꦶꦠꦧ꧀ꦧꦴ ꦄꦤꦤ꧀ꦠꦴꦫꦩ꧀ꦩꦟꦠꦺꦴ ꦮꦴ. ꦤ ꦲꦶ ꦄꦴꦫꦩ꧀ꦩꦟꦺ ꦄꦤꦤ꧀ꦠꦤ꧀ꦠꦶ ꦥꦫꦩꦴꦤꦤ꧀ꦠꦱ꧀ꦱ ꦥꦩꦴꦟꦁ ꦮꦴ ꦒꦟ꧀ꦲꦴꦠꦶ. ꦱꦸꦑꦢꦸꦏ꧀ꦑꦺꦲꦶ ꦄꦤꦶꦚ꧀ꦗꦤꦠꦺꦴ ꦫꦹꦥꦮꦶꦫꦴꦒꦨꦴꦮꦤꦴꦮꦶꦱꦺꦱꦠꦴꦪ ꦕ ꦄꦴꦤꦺꦚ꧀ꦗꦁ ꦥꦠ꧀ꦮꦴ ꦠꦶꦛ꧀ꦜꦠꦶ, ꦄꦪꦁ ꦤꦺꦴ ꦄꦠ꧀ꦠꦴꦠꦶ ꦄꦨꦶꦮꦢꦤ꧀ꦠꦴ ꦠꦶꦛ꧀ꦜꦤ꧀ꦠꦶ. ꦮꦶꦚ꧀ꦚꦴꦟꦏꦱꦶꦟꦩꦺꦏꦺꦠꦶ ꦮꦶꦚ꧀ꦚꦴꦟꦚ꧀ꦕꦴꦪꦠꦤꦁ ꦌꦏꦺ ꦢꦶꦛ꧀ꦜꦶꦒꦠꦶꦏꦴ ꦄꦠ꧀ꦠꦴꦠꦶ ꦮꦢꦤ꧀ꦠꦶ. ꦠꦺꦤꦴꦲ – ‘‘ꦮꦶꦚ꧀ꦚꦴꦟꦚ꧀ꦕꦴꦪꦠꦤꦁ ꦠꦴꦮ ꦢꦱ꧀ꦱꦺꦠꦸ’’ꦤ꧀ꦠꦶ. ꦠꦱ꧀ꦱ ꦥꦤ ꦄꦴꦫꦩ꧀ꦩꦟꦨꦹꦠꦁ ꦏꦱꦶꦟꦸꦒ꧀ꦓꦴꦛꦶꦩꦴꦏꦴꦱꦺ ꦥꦮꦠ꧀ꦠꦮꦶꦚ꧀ꦚꦴꦟꦤ꧀ꦠꦶ ꦄꦥꦫꦺ. ꦠꦚ꧀ꦲꦶ ꦏꦱꦶꦟꦁ ꦩꦤꦱꦶꦏꦴꦫꦮꦱꦺꦤ, ‘‘ꦮꦶꦚ꧀ꦚꦴꦟꦏꦱꦶꦟ’’ꦤ꧀ꦠꦶ, ꦮꦶꦚ꧀ꦚꦴꦟꦚ꧀ꦕ ꦠꦁ ꦄꦴꦫꦩ꧀ꦩꦟꦛ꧀ꦜꦺꦤ ꦄꦴꦪꦠꦤꦚ꧀ꦕꦴꦠꦶ, ‘‘ꦮꦶꦚ꧀ꦚꦴꦟꦚ꧀ꦕꦴꦪꦠꦤ’’ꦤ꧀ꦠꦶ ꦕ ꦮꦸꦕ꧀ꦕꦠꦶ. ꦄꦴꦏꦶꦚ꧀ꦕꦚ꧀ꦚꦴꦪꦠꦤꦩꦺꦏꦺꦠꦶ ꦌꦠ꧀ꦡꦴꦥꦶ ꦌꦱꦺꦮ ꦤꦪꦺꦴ.
ꦠꦪꦶꦢꦤ꧀ꦠꦶ ꦪ-ꦏꦴꦫꦺꦴ ꦥꦢꦱꦤ꧀ꦣꦶꦏꦫꦺꦴꦠꦶ ꦄꦴꦲ ‘‘ꦠꦁ ꦆꦢ’’ꦤ꧀ꦠꦶ. ꦢꦶꦛ꧀ꦜꦶꦒꦠꦤ꧀ꦠꦶ ꦪꦡꦴ ꦮꦸꦠ꧀ꦠꦁ ‘‘ꦱꦚ꧀ꦚꦷ ꦄꦠ꧀ꦠꦴ’’ꦠꦶ ꦌꦮꦁ ꦮꦸꦠ꧀ꦠꦁ ꦢꦶꦛ꧀ꦜꦶꦁ. ꦢꦶꦛ꧀ꦜꦶꦪꦺꦮ ꦲꦶ ꦢꦶꦛ꧀ꦜꦶꦒꦠꦁ ‘‘ꦩꦸꦠ꧀ꦠꦒꦠꦁ (ꦩ. ꦤꦶ. ꧒.꧑꧑꧙; ꦄ. ꦤꦶ. ꧙.꧑꧑), ꦱꦔ꧀ꦑꦴꦫꦒꦠ’’ꦤ꧀ꦠꦶꦄꦴꦢꦷꦱꦸ (ꦩꦲꦴꦤꦶ. ꧔꧑) ꦮꦶꦪ. ꦒꦤ꧀ꦠꦧ꧀ꦧꦴꦨꦴꦮꦠꦺꦴ ꦮꦴ ꦢꦶꦛ꧀ꦜꦶꦪꦴ ꦒꦠꦩꦠ꧀ꦠꦁ ꦢꦶꦛ꧀ꦜꦶꦒꦠꦁ, ꦢꦶꦛ꧀ꦜꦶꦪꦴ ꦒꦲꦟꦩꦠ꧀ꦠꦤ꧀ꦠꦶ ꦄꦠ꧀ꦡꦺꦴ. ꦢꦶꦛ꧀ꦜꦶꦥꦏꦴꦫꦺꦴ ꦮꦴ ꦢꦶꦛ꧀ꦜꦶꦒꦠꦁ. ꦭꦺꦴꦏꦶꦪꦴ ꦲꦶ ꦮꦶꦣꦪꦸꦠ꧀ꦠꦒꦠꦥꦏꦴꦫꦱꦢ꧀ꦢꦺ ꦱꦩꦴꦤꦠ꧀ꦡꦺ ꦆꦕ꧀ꦖꦤ꧀ꦠꦶ. ꦢꦶꦛ꧀ꦜꦶꦥꦕ꧀ꦕꦪꦺꦴ ꦢꦶꦛ꧀ꦜꦶꦏꦴꦫꦟꦁ, ꦄꦮꦶꦗ꧀ꦗꦴꦢꦶ ꦢꦶꦛ꧀ꦜꦶꦛ꧀ꦜꦴꦤꦤ꧀ꦠꦶ ꦄꦠ꧀ꦡꦺꦴ. ꦠꦠ꧀ꦡ ꦄꦮꦶꦗ꧀ꦗꦴꦥꦶ ꦲꦶ ꦢꦶꦛ꧀ꦜꦶꦛ꧀ꦜꦴꦤꦁ ꦈꦥꦤꦶꦱ꧀ꦱꦪꦴꦢꦶꦨꦴꦮꦠꦺꦴ. ꦪꦡꦴꦲ – ‘‘ꦄꦱ꧀ꦱꦸꦠꦮꦴ, ꦨꦶꦏ꧀ꦑꦮꦺ, ꦥꦸꦡꦸꦗ꧀ꦗꦤꦺꦴ ꦄꦫꦶꦪꦴꦤꦁ ꦄꦢꦱ꧀ꦱꦴꦮꦷ ꦄꦫꦶꦪꦣꦩ꧀ꦩꦱ꧀ꦱ ꦄꦏꦺꦴꦮꦶꦢꦺꦴ’’ꦠꦶꦄꦴꦢꦶ (ꦣ. ꦱ. ꧑꧐꧐꧗). ꦦꦱ꧀ꦱꦺꦴꦥꦶ ꦢꦶꦛ꧀ꦜꦶꦛ꧀ꦜꦴꦤꦁ. ꦪꦡꦴꦲ ‘‘ꦠꦢꦥꦶ ꦦꦱ꧀ꦱꦥꦕ꧀ꦕꦪꦴ’’ꦠꦶ (ꦢꦷ. ꦤꦶ. ꧑.꧑꧑꧘-꧑꧒꧔). ꦱꦚ꧀ꦚꦴꦥꦶ ꦢꦶꦛ꧀ꦜꦶꦛ꧀ꦜꦴꦤꦁ. ꦪꦡꦴꦲ ‘‘ꦱꦚ꧀ꦚꦴꦤꦶꦢꦴꦤꦴ ꦲꦶ ꦥꦥꦚ꧀ꦕꦱꦔ꧀ꦑꦴ’’ꦠꦶ (ꦱꦸ. ꦤꦶ. ꧘꧘꧐; ꦩꦲꦴꦤꦶ. ꧑꧐꧙). ꦮꦶꦠꦏ꧀ꦏꦺꦴꦥꦶ ꦢꦶꦛ꧀ꦜꦶꦛ꧀ꦜꦴꦤꦁ. ꦪꦡꦴꦲ – ‘‘ꦠꦏ꧀ꦏꦚ꧀ꦕ ꦢꦶꦛ꧀ꦜꦷꦱꦸ ꦥꦏꦥ꧀ꦥꦪꦶꦠ꧀ꦮꦴ, ꦱꦕ꧀ꦕꦁ ꦩꦸꦱꦴꦠꦶ ꦢ꧀ꦮꦪꦣꦩ꧀ꦩꦩꦴꦲꦹ’’ꦠꦶ (ꦱꦸ. ꦤꦶ. ꧘꧙꧒; ꦩꦲꦴꦤꦶ. ꧑꧒꧑). ꦄꦪꦺꦴꦤꦶꦱꦺꦴꦩꦤꦱꦶꦏꦴꦫꦺꦴꦥꦶ ꦢꦶꦛ꧀ꦜꦶꦛ꧀ꦜꦴꦤꦁ. ꦪꦡꦴꦲ – ‘‘ꦠꦱ꧀ꦱꦺꦮꦁ ꦩꦤꦱꦶꦏꦫꦺꦴꦠꦺꦴ ꦖꦤ꧀ꦤꦁ ꦢꦶꦛ꧀ꦜꦷꦤꦁ ꦄꦚ꧀ꦚꦠꦫꦴ ꦢꦶꦛ꧀ꦜꦶ ꦈꦥ꧀ꦥꦗ꧀ꦗꦠꦶ, ꦄꦠ꧀ꦡꦶ ꦩꦺ ꦄꦠ꧀ꦠꦴꦠꦶ ꦠꦱ꧀ꦱ ꦱꦕ꧀ꦕꦠꦺꦴ ꦡꦺꦠꦠꦺꦴ ꦢꦶꦛ꧀ꦜꦶ ꦈꦥ꧀ꦥꦗ꧀ꦗꦠꦷ’’ꦠꦶ (ꦩ. ꦤꦶ. ꧑.꧑꧙). ꦢꦶꦛ꧀ꦜꦴꦫꦩ꧀ꦩꦟꦤ꧀ꦠꦶ ꦢꦶꦛ꧀ꦜꦶꦄꦴꦫꦩ꧀ꦩꦟꦨꦹꦠꦁ ꦈꦥꦴꦢꦴꦤꦏ꧀ꦑꦤ꧀ꦣꦥꦚ꧀ꦕꦏꦁ. ꦠꦺꦤꦴꦲ – ‘‘ꦫꦹꦥꦁ ꦄꦠ꧀ꦠꦠꦺꦴ ꦱꦩꦤꦸꦥꦱ꧀ꦱꦠꦷ’’ꦠꦶꦄꦴꦢꦶ (ꦥꦛꦶ. ꦩ. ꧑.꧑꧓꧐). ꦫꦹꦥꦮꦺꦢꦤꦴꦢꦶꦮꦶꦤꦶꦩꦸꦠ꧀ꦠꦱ꧀ꦱ ꦢꦶꦛ꧀ꦜꦶꦪꦴ ꦄꦴꦫꦩ꧀ꦩꦟꦱ꧀ꦱ ꦄꦨꦴꦮꦠꦺꦴ ꦄꦤꦴꦢꦶꦪꦶꦠ꧀ꦮꦴ ꦆꦢꦩꦺꦮ ꦢꦱ꧀ꦱꦺꦠꦶ – ‘‘ꦆꦩꦶꦤꦴ ꦥꦕ꧀ꦕꦪꦺꦤ ꦆꦢꦁ ꦤꦴꦩ ꦢꦱ꧀ꦱꦤꦁ ꦒꦲꦶꦠ’’ꦤ꧀ꦠꦶ. ꦆꦩꦶꦤꦴ ꦥꦕ꧀ꦕꦪꦺꦤꦴꦠꦶ ꦮꦴ ꦌꦠ꧀ꦡ ꦥꦕ꧀ꦕꦪꦒ꧀ꦒꦲꦟꦺꦤ ꦄꦴꦫꦩ꧀ꦩꦟꦩ꧀ꦥꦶ ꦒꦲꦶꦠꦩꦺꦮꦴꦠꦶ ꦢꦛ꧀ꦜꦧ꧀ꦧꦁ.
ꦠꦢꦺꦮꦴꦠꦶ ꦢꦶꦛ꧀ꦜꦶꦒꦠꦚ꧀ꦕꦺꦮ ꦢꦶꦛ꧀ꦜꦶꦥꦕ꧀ꦕꦪꦚ꧀ꦕ. ꦫꦹꦥꦱꦚ꧀ꦚꦴꦤꦤ꧀ꦠꦶ ꦌꦠ꧀ꦡ ꦆꦠꦶ-ꦱꦢ꧀ꦢꦺꦴ ꦄꦴꦢꦶꦄꦠ꧀ꦡꦺꦴ. ꦌꦮꦁ-ꦱꦢ꧀ꦢꦺꦴ ꦥꦏꦴꦫꦠ꧀ꦡꦺꦴ, ‘‘ꦪꦢꦶ ꦫꦹꦥꦱꦚ꧀ꦚꦴꦤ’’ꦤ꧀ꦠꦶꦄꦴꦢꦶꦤꦴ ꦥꦏꦴꦫꦺꦤ ꦮꦸꦠ꧀ꦠꦱꦚ꧀ꦚꦴꦤꦤ꧀ꦠꦶ ꦄꦠ꧀ꦡꦺꦴ. ꦤꦶꦫꦸꦥꦏ꧀ꦏꦶꦭꦺꦱꦴ ꦤꦷꦮꦫꦟꦴꦢꦶ ꦈꦥꦏ꧀ꦏꦶꦭꦺꦱꦮꦶꦩꦸꦠ꧀ꦠꦶꦠꦺꦴ. ꦈꦠ꧀ꦠꦩꦴ ꦥꦟꦷꦠꦨꦴꦮꦥ꧀ꦥꦠ꧀ꦠꦶꦠꦺꦴ, ꦠꦠꦺꦴ ꦌꦮ ꦱꦺꦛ꧀ꦜꦴ, ꦱꦺꦛ꧀ꦜꦠ꧀ꦠꦴ ꦌꦮ ꦈꦠ꧀ꦠꦫꦶꦠꦫꦴꦨꦴꦮꦠꦺꦴ ꦄꦤꦸꦠ꧀ꦠꦫꦶꦪꦴ. ꦄꦏ꧀ꦑꦴꦪꦠꦷꦠꦶ ꦈꦥꦛ꧀ꦜꦴꦠꦶ. ꦄꦴꦏꦶꦚ꧀ꦕꦚ꧀ꦚꦴꦪꦠꦤꦱꦚ꧀ꦚꦴꦪ ꦮꦶꦱꦸꦁ ꦮꦸꦕ꧀ꦕꦩꦴꦤꦠ꧀ꦠꦴ ꦕꦠꦸꦠ꧀ꦡꦴꦫꦸꦥ꧀ꦥꦱꦚ꧀ꦚꦴꦪ ꦕ ꦆꦩꦱ꧀ꦩꦶꦁ ꦱꦚ꧀ꦚꦷꦮꦴꦢꦺ ꦄꦤꦺꦴꦠꦫꦟꦠꦺꦴ, ‘‘ꦪꦢꦶ ꦄꦴꦫꦸꦥ꧀ꦥꦱꦚ꧀ꦚꦴꦤꦤ꧀ꦠꦶ ꦆꦩꦶꦤꦴ ꦄꦴꦏꦴꦱꦴꦤꦚ꧀ꦕꦴꦪꦠꦤ-ꦮꦶꦚ꧀ꦚꦴꦟꦚ꧀ꦕꦴꦪꦠꦤꦱꦚ꧀ꦚꦴ’’ꦆꦕ꧀ꦕꦺꦮ ꦮꦸꦠ꧀ꦠꦁ. ꦆꦠꦫꦺꦲꦶ ꦥꦤ ꦢ꧀ꦮꦷꦲꦷꦠꦶ, ‘‘ꦪꦢꦶ ꦌꦏꦠ꧀ꦠꦱꦚ꧀ꦚꦴꦤꦁ, ꦪꦢꦶ ꦤꦴꦤꦠ꧀ꦠꦱꦚ꧀ꦚꦴꦤ’’ꦤ꧀ꦠꦶ ꦆꦩꦺꦲꦶ ꦢ꧀ꦮꦷꦲꦶ ꦥꦢꦺꦲꦶ. ꦱꦩꦴꦥꦤ꧀ꦤꦏꦮꦴꦫꦺꦴ ꦕ ꦠꦡꦴ ꦆꦣ ꦏꦡꦶꦠꦺꦴꦠꦶ ꦄꦣꦶꦥ꧀ꦥꦴꦪꦺꦴ. ꦏꦺꦴꦛ꧀ꦜꦴꦱꦠꦺꦴ ꦄꦛ꧀ꦜ ꦱꦚ꧀ꦚꦴ ꦕꦠꦸꦏ꧀ꦏꦢ꧀ꦮꦪꦱꦔ꧀ꦒꦲꦠꦺꦴ. ꦌꦏꦠ꧀ꦠꦱꦚ꧀ꦚꦷꦥꦢꦁ ꦜꦥꦺꦠ꧀ꦮꦴ ꦄꦠ꧀ꦡꦠꦺꦴ ꦥꦤ ꦱꦠ꧀ꦠ ꦱꦚ꧀ꦚꦴ ꦲꦺꦴꦤ꧀ꦠꦶ ꦄꦒ꧀ꦒꦲꦶꦠꦒ꧀ꦒꦲꦟꦺꦤꦴꦠꦶ ꦄꦣꦶꦥ꧀ꦥꦴꦪꦺꦴ. ꦠꦺꦤꦴꦲ – ‘‘ꦱꦩꦴꦥꦤ꧀ꦤꦏ…ꦥꦺ… ꦱꦔ꧀ꦒꦲꦶꦠꦺꦴꦪꦺꦮꦴ’’ꦠꦶ.
ꦱꦚ꧀ꦚꦴꦒꦠꦤ꧀ꦠꦶ ꦱꦚ꧀ꦚꦴꦮꦱꦺꦤ ꦒꦠꦁ, ꦱꦚ꧀ꦚꦴꦱꦔ꧀ꦒꦲꦁ ꦒꦠꦁ ꦮꦴ. ꦠꦱ꧀ꦱ ꦥꦤ ꦄꦢꦶꦛ꧀ꦜꦶꦒꦠꦱ꧀ꦱꦥꦶ ꦈꦥꦭꦧ꧀ꦨꦩꦴꦤꦠ꧀ꦠꦴ, ‘‘ꦱꦢ꧀ꦣꦶꦁ ꦢꦶꦛ꧀ꦜꦶꦒꦠꦺꦤꦴ’’ꦠꦶ ꦮꦸꦠ꧀ꦠꦁ. ꦥꦕ꧀ꦕꦪꦺꦲꦶ ꦱꦩꦴꦒꦤ꧀ꦠ꧀ꦮꦴ ꦏꦠꦤ꧀ꦠꦶ ꦱꦲ ꦏꦴꦫꦟꦨꦹꦠꦺꦲꦶ ꦥꦕ꧀ꦕꦪꦺꦲꦶ ꦠꦺꦤꦺꦮ ꦱꦲ ꦏꦴꦫꦟꦨꦴꦮꦺꦤ ꦱꦩꦴꦒꦤ꧀ꦠ꧀ꦮꦴ ꦤꦶꦧ꧀ꦧꦠ꧀ꦠꦶꦠꦁ; ꦥꦛꦶꦕ꧀ꦕꦱꦩꦸꦥ꧀ꦥꦤ꧀ꦤꦤ꧀ꦠꦶ ꦄꦠ꧀ꦡꦺꦴ. ꦱꦔ꧀ꦑꦠꦠ꧀ꦠꦴ ꦎꦭ꦳ꦴꦫꦶꦏꦁ ꦈꦥ꧀ꦥꦴꦢꦮꦪꦚ꧀ꦚꦡꦠ꧀ꦠꦱꦧ꧀ꦨꦴꦮꦠꦺꦴ. ꦪꦱ꧀ꦱ ꦲꦶ ꦈꦥ꧀ꦥꦴꦢꦺꦴ ꦥꦚ꧀ꦚꦴꦪꦠꦶ, ꦮꦪꦺꦴ ꦥꦚ꧀ꦚꦴꦪꦠꦶ, ꦜꦶꦠꦱ꧀ꦱ ꦄꦚ꧀ꦚꦡꦠ꧀ꦠꦁ ꦥꦚ꧀ꦚꦴꦪꦠꦶ, ꦠꦁ ꦑꦟꦺ ꦑꦟꦺ ꦨꦶꦗ꧀ꦗꦤꦱꦨꦴꦮꦠꦺꦴ ꦥꦱ꧀ꦱꦤ꧀ꦠꦱ꧀ꦱ ꦥꦴꦏꦛꦨꦹꦠꦮꦶꦏꦴꦫꦁ ꦎꦭ꦳ꦴꦫꦶꦏꦁ ꦱꦶꦪꦴ. ꦤ ꦕꦺꦠ꧀ꦡ ꦩꦒ꧀ꦒꦦꦭꦣꦩ꧀ꦩꦴ ꦤꦶꦢꦱ꧀ꦱꦺꦠꦧ꧀ꦧꦴ ꦠꦺꦱꦁ ꦠꦡꦴ ꦄꦤꦤꦸꦥꦱ꧀ꦱꦶꦠꦧ꧀ꦧꦠꦺꦴ; ꦠꦺꦱꦩ꧀ꦥꦶ ꦱꦔ꧀ꦑꦠꦨꦴꦮꦺꦤ ꦆꦠꦫꦺꦲꦶ ꦱꦩꦴꦤꦪꦺꦴꦒꦏ꧀ꦑꦩꦠꦴꦪ ꦢꦸꦤ꧀ꦤꦶꦮꦴꦫꦪꦨꦴꦮꦠꦺꦴ. ꦠꦡꦴ ꦲꦶ ‘‘ꦄꦱꦺꦱꦮꦶꦫꦴꦒꦤꦶꦫꦺꦴꦣꦴ’’ꦠꦶ (ꦈꦢꦴ. ꧓) ꦮꦕꦤꦠꦺꦴ ꦩꦒ꧀ꦒꦱ꧀ꦱꦥꦶ ꦤꦶꦱ꧀ꦱꦫꦟꦨꦴꦮꦺꦤ ‘‘ꦄꦠ꧀ꦡꦶ ꦑꦺꦴ ꦥꦤ ꦱꦔ꧀ꦑꦴꦫꦴꦤꦁ ꦤꦶꦫꦺꦴꦣꦺꦴ’’ꦠꦶ ꦤꦶꦧ꧀ꦧꦴꦤꦩꦺꦮꦺꦠ꧀ꦡ ꦥꦛꦶꦪꦺꦴꦒꦨꦴꦮꦺꦤ ꦈꦢ꧀ꦣꦛꦁ ‘‘ꦤꦶꦫꦸꦗ꧀ꦙꦤ꧀ꦠꦶ ꦌꦠ꧀ꦡꦴ’’ꦠꦶ ꦏꦠ꧀ꦮꦴ. ꦤꦶꦫꦺꦴꦣꦱꦔ꧀ꦑꦴꦠꦁ ꦤꦶꦧ꧀ꦧꦴꦤꦁ ꦤꦴꦩ ꦄꦠ꧀ꦡꦷꦠꦶ ꦌꦠ꧀ꦡ, – ‘‘ꦄꦠ꧀ꦡꦶ, ꦨꦶꦏ꧀ꦑꦮꦺ, ꦄꦗꦴꦠꦁ ꦄꦨꦹꦠꦁ ꦄꦱꦔ꧀ꦑꦠ’’ꦤ꧀ꦠꦶ ꦱꦸꦠ꧀ꦠꦥꦢꦁ (ꦈꦢꦴ. ꧗꧓) ꦄꦴꦤꦺꦠ꧀ꦮꦴ ꦮꦠ꧀ꦠꦧ꧀ꦧꦁ. ꦤꦶꦧ꧀ꦧꦴꦤꦢꦱ꧀ꦱꦷꦠꦶ ꦱꦕ꧀ꦖꦶꦏꦶꦫꦶꦪꦴꦨꦶꦱꦩꦪꦮꦱꦺꦤ ꦤꦶꦧ꧀ꦧꦴꦤꦢꦱ꧀ꦱꦷ, ꦠꦠꦺꦴ ꦌꦮ ꦆꦠꦫꦴꦨꦶꦱꦩꦪꦠ꧀ꦡꦱꦶꦢ꧀ꦣꦶꦪꦴ ꦠꦁ ꦱꦔ꧀ꦑꦠꦁ ꦄꦠꦶꦏ꧀ꦏꦤ꧀ꦠꦺꦴ.
꧒꧓. ꦄꦛ꧀ꦜꦱꦸ ꦄꦱꦚ꧀ꦚꦷꦮꦴꦢꦺꦱꦹꦠꦶ ꦆꦢꦁ ꦧ꧀ꦫꦲ꧀ꦩꦗꦴꦭꦺ (ꦢꦷ. ꦤꦶ. ꧑.꧗꧘-꧘꧐) ꦄꦴꦒꦠꦤꦪꦺꦤ ꦮꦸꦠ꧀ꦠꦩꦺꦮ ꦲꦶ ꦱꦤ꧀ꦣꦴꦪ ꦲꦺꦛ꧀ꦜꦴ, ‘‘ꦱꦚ꧀ꦚꦷꦠꦶ ꦆꦩꦶꦤꦴ ꦄꦛ꧀ꦜ ꦄꦱꦚ꧀ꦚꦷꦮꦴꦢꦴ ꦏꦡꦶꦠꦴ’’ꦠꦶ ꦮꦸꦠ꧀ꦠꦁ. ꦆꦣ ꦥꦤ ꦕꦠ꧀ꦠꦴꦫꦺꦴ ꦮꦴꦢꦴ ꦌꦮ ꦈꦢ꧀ꦣꦛꦴ. ꦠꦺꦤꦴꦲ ‘‘ꦄꦱꦚ꧀ꦚꦷ’’ꦠꦶꦄꦴꦢꦶ. ꦌꦱ ꦤꦪꦺꦴ ꦥꦫꦠꦺꦴ ‘‘ꦄꦛ꧀ꦜꦱꦸ ꦤꦺꦮꦱꦚ꧀ꦚꦷꦤꦴꦱꦚ꧀ꦚꦷꦮꦴꦢꦺꦱꦹ’’ꦠꦶ ꦌꦠ꧀ꦡꦴꦥꦶ. ꦱꦚ꧀ꦚꦴꦪ ꦱꦠꦶ ꦠꦴꦪ ꦮꦺꦢꦤꦴꦒꦴꦲꦱꦧ꧀ꦨꦴꦮꦠꦺꦴ ‘‘ꦄꦴꦧꦴꦣꦤꦛ꧀ꦜꦺꦤ ꦱꦚ꧀ꦚꦴ ꦫꦺꦴꦒꦺꦴ’’ꦠꦶ ꦮꦸꦠ꧀ꦠꦁ. ꦢꦸꦏ꧀ꦑꦠꦴꦱꦹꦭꦪꦺꦴꦒꦠꦺꦴ ꦏꦶꦭꦺꦱꦴꦱꦸꦕꦶꦥꦒ꧀ꦓꦫꦟꦠꦺꦴ ꦈꦥ꧀ꦥꦴꦢꦗꦫꦴꦨꦔ꧀ꦒꦺꦲꦶ ꦈꦢ꧀ꦣꦸꦩꦴꦠꦥꦏ꧀ꦏꦥꦨꦶꦗ꧀ꦗꦤꦠꦺꦴ ꦕ ꦱꦚ꧀ꦚꦴ ꦒꦟ꧀ꦝꦺꦴ; ꦱ꧀ꦮꦴꦪꦩꦠ꧀ꦡꦺꦴ ꦢꦺꦴꦱꦢꦸꦛ꧀ꦜꦠꦴꦪ ꦌꦮ ꦲꦺꦴꦠꦷꦠꦶ ꦄꦴꦲ – ‘‘ꦱꦢꦺꦴꦱꦛ꧀ꦜꦺꦤ ꦒꦟ꧀ꦝꦺꦴ’’ꦠꦶ. ꦥꦷꦭ꦳ꦴꦗꦤꦤꦠꦺꦴ ꦄꦤ꧀ꦠꦺꦴꦠꦸꦢꦤꦠꦺꦴ ꦢꦸꦫꦸꦢ꧀ꦣꦫꦟꦠꦺꦴ ꦕ ꦱꦚ꧀ꦚꦴ ꦱꦭ꧀ꦭꦁ; ꦱ꧀ꦮꦴꦪꦩꦠ꧀ꦡꦺꦴ ꦄꦠ꧀ꦠꦨꦴꦮꦁ ꦄꦤꦸꦥꦮꦶꦱꦶꦠ꧀ꦮꦴ ꦄꦮꦛ꧀ꦜꦴꦤꦺꦤꦴꦠꦶ ꦄꦴꦲ ‘‘ꦄꦤꦸꦥꦮꦶꦛ꧀ꦜꦛ꧀ꦜꦺꦤ ꦱꦭ꧀ꦭ’’ꦤ꧀ꦠꦶ. ꦥꦛꦶꦱꦤ꧀ꦣꦶꦒ꧀ꦒꦲꦟꦺ ꦮꦶꦚ꧀ꦚꦴꦟꦁ ꦏꦸꦠꦺꦴꦕꦶ ꦄꦴꦒꦠꦁ ꦮꦶꦪ ꦲꦺꦴꦠꦷꦠꦶ ꦮꦸꦠ꧀ꦠꦁ ‘‘ꦥꦛꦶꦱꦤ꧀ꦣꦶꦮꦱꦺꦤ ꦄꦴꦒꦠꦶ’’ꦤ꧀ꦠꦶ. ꦒꦠꦶꦤ꧀ꦠꦶ ꦥꦮꦠ꧀ꦠꦶꦁ. ꦱꦴ ꦥꦤ ꦠꦴꦱꦸ ꦠꦴꦱꦸ ꦒꦠꦷꦱꦸ ꦮꦸꦠ꧀ꦠꦶ ꦲꦺꦴꦠꦷꦠꦶ ꦮꦸꦠ꧀ꦠꦁ – ‘‘ꦕꦸꦠꦶꦮꦱꦺꦤ ꦒꦠꦶ’’ꦤ꧀ꦠꦶ; ꦮꦝ꧀ꦞꦤꦮꦱꦺꦤ ꦓꦤꦥꦧꦤ꧀ꦣꦮꦱꦺꦤꦴꦠꦶ ꦄꦠ꧀ꦡꦺꦴ. ꦠꦺꦤꦴꦲ ‘‘ꦄꦥꦫꦴꦥꦫ’’ꦤ꧀ꦠꦶ. ꦄꦥꦫꦴꦥꦫꦚ꧀ꦲꦶ ꦥꦧꦤ꧀ꦣꦮꦱꦺꦤ ꦥꦮꦠ꧀ꦠꦩꦴꦤꦁ ꦮꦶꦚ꧀ꦚꦴꦟꦁ ꦤꦤ꧀ꦢꦹꦥꦱꦺꦕꦤꦁ; ꦆꦠꦫꦁ ꦑꦤ꧀ꦣꦠ꧀ꦠꦪꦁ ꦮꦴ ꦤꦶꦱ꧀ꦱꦴꦪ ꦄꦨꦶꦮꦸꦢ꧀ꦣꦶꦁ ꦥꦠꦶꦛ꧀ꦜꦁ ꦩꦲꦤ꧀ꦠꦚ꧀ꦕ ꦥꦴꦥꦸꦟꦴꦠꦷꦠꦶ. ꦥꦮꦝ꧀ꦞꦮꦱꦺꦤ ꦮꦴ ꦒꦠꦶꦁ, ꦤꦶꦏ꧀ꦑꦺꦥꦮꦱꦺꦤ ꦕꦸꦠꦶꦁ, ꦠꦠꦺꦴ ꦄꦥꦫꦴꦥꦫꦚ꧀ꦕ ꦫꦹꦥꦥꦮꦠ꧀ꦠꦤꦮꦱꦺꦤ ꦈꦥꦥꦠ꧀ꦠꦶꦁ, ꦆꦤ꧀ꦢ꧀ꦫꦶꦪꦥꦫꦶꦥꦴꦏꦮꦱꦺꦤ ꦮꦸꦝ꧀ꦞꦶꦁ ꦠꦱ꧀ꦱ ꦠꦱ꧀ꦱ ꦏꦩ꧀ꦩꦱ꧀ꦱ ꦏꦠꦹꦥꦕꦶꦠꦨꦴꦮꦺꦤ ꦮꦶꦫꦸꦭ꦳꧀ꦲꦶꦁ; ꦠꦱ꧀ꦱ ꦏꦩ꧀ꦩꦱ꧀ꦱ ꦦꦭꦤꦶꦧ꧀ꦧꦠ꧀ꦠꦶꦪꦴ ꦮꦺꦥꦸꦭ꧀ꦭꦤ꧀ꦠꦶ ꦪꦺꦴꦗꦺꦠꦧ꧀ꦧꦁ.
ꦏꦴꦩꦚ꧀ꦕꦴꦠꦶꦄꦴꦢꦶꦤꦴ ‘‘ꦄꦚ꧀ꦚꦠ꧀ꦫ ꦫꦹꦥꦴ’’ꦠꦶꦄꦴꦢꦶꦏꦴ ꦕꦺꦴꦢꦤꦴ ꦭꦏ꧀ꦑꦟꦮꦱꦺꦤ ꦮꦸꦠ꧀ꦠꦴꦠꦶ ꦢꦱ꧀ꦱꦺꦠ꧀ꦮꦴ ꦄꦪꦚ꧀ꦕ ꦤꦪꦺꦴ ꦕꦺꦴꦢꦤꦴꦪ ꦄꦮꦶꦱꦶꦛ꧀ꦜꦮꦶꦱꦪꦠꦴꦪ ꦱꦶꦪꦴ; ꦮꦶꦱꦶꦛ꧀ꦜꦮꦶꦱꦪꦴ ꦥꦤꦴꦪꦁ ꦕꦺꦴꦢꦤꦴꦠꦶ ꦢꦱ꧀ꦱꦺꦠꦸꦁ, ‘‘ꦄꦪꦁ ꦥꦤ ꦥꦚ꧀ꦲꦺꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦌꦠ꧀ꦠꦏꦺ ꦑꦤ꧀ꦣꦺꦠꦶ ꦪꦡꦴꦮꦸꦠ꧀ꦠꦺ ꦫꦹꦥꦮꦺꦢꦤꦴꦢꦶꦏꦺ ꦕꦠ꧀ꦠꦴꦫꦺꦴ ꦑꦤ꧀ꦣꦺ. ꦄꦚ꧀ꦚꦠ꧀ꦫ ꦫꦹꦥꦴꦠꦶ ꦆꦩꦶꦤꦴ ꦪꦠ꧀ꦡ ꦏꦠ꧀ꦡꦕꦶ ꦫꦹꦥꦺꦤ ꦮꦶꦤꦴ ꦮꦶꦚ꧀ꦚꦴꦟꦱ꧀ꦱ ꦥꦮꦠ꧀ꦠꦶ ꦤꦠ꧀ꦡꦷꦠꦶ ꦢꦷꦥꦶꦠꦁ ꦲꦺꦴꦠꦶ. ꦨꦮꦮꦶꦱꦺꦱꦕꦺꦴꦢꦤꦴꦪ ꦱꦨꦴꦮꦠꦺꦴ ꦌꦮ ꦮꦶꦚ꧀ꦚꦴꦟꦺꦤ ꦮꦶꦤꦴ ꦫꦹꦥꦱ꧀ꦱꦥꦶ ꦥꦮꦠ꧀ꦠꦶ ꦤꦠ꧀ꦡꦷꦠꦶ ꦢꦷꦥꦶꦠꦁ ꦲꦺꦴꦠꦷꦠꦶ ꦄꦴꦲ – ‘‘ꦄꦫꦹꦥꦨꦮꦺꦥꦶ ꦫꦹꦥꦁ, ꦄꦱꦚ꧀ꦚꦴꦨꦮꦺ ꦕ ꦮꦶꦚ꧀ꦚꦴꦟꦁ ꦄꦠ꧀ꦡꦷ’’ꦠꦶ. ꦤꦶꦫꦺꦴꦣꦱꦩꦴꦥꦤ꧀ꦤꦱ꧀ꦱꦴꦠꦶ ꦱꦚ꧀ꦚꦴꦮꦺꦢꦪꦶꦠꦤꦶꦫꦺꦴꦣꦁ ꦱꦩꦴꦥꦤ꧀ꦤꦱ꧀ꦱꦥꦶ ꦮꦶꦚ꧀ꦚꦴꦟꦁ ꦄꦠ꧀ꦡꦶ. ꦧ꧀ꦪꦚ꧀ꦗꦤꦕ꧀ꦖꦴꦪꦴꦪ ꦕꦺ ꦄꦠ꧀ꦡꦁ ꦥꦛꦶꦧꦴꦲꦱꦷꦠꦶ ꦪꦢꦶ ꦱꦢ꧀ꦢꦠ꧀ꦡꦩꦺꦮ ꦒꦲꦺꦠ꧀ꦮꦴ ꦄꦣꦶꦥ꧀ꦥꦴꦪꦁ ꦤ ꦒꦟ꧀ꦲꦱꦶ ꦤꦺꦪ꧀ꦪꦠ꧀ꦡꦁ ꦱꦸꦠ꧀ꦠꦤ꧀ꦠꦶ. ꦌꦠ꧀ꦡ ꦕ ꦄꦱꦚ꧀ꦚꦨꦮꦺ ꦤꦶꦧ꧀ꦧꦠ꧀ꦠꦱꦠ꧀ꦠꦮꦱꦺꦤ ꦥꦜꦩꦮꦴꦢꦺꦴ; ꦱꦚ꧀ꦚꦁ ꦄꦠ꧀ꦠꦠꦺꦴ ꦱꦩꦤꦸꦥꦱ꧀ꦱꦠꦷꦠꦶ ꦌꦠ꧀ꦡ ꦮꦸꦠ꧀ꦠꦤꦪꦺꦤ ꦱꦚ꧀ꦚꦁꦪꦺꦮ ꦄꦠ꧀ꦠꦴꦠꦶ ꦒꦲꦺꦠ꧀ꦮꦴ ꦠꦱ꧀ꦱ ꦏꦶꦚ꧀ꦕꦤꦨꦴꦮꦺꦤ ꦜꦶꦠꦴꦪ ꦄꦚ꧀ꦚꦴꦪ ꦱꦚ꧀ꦚꦴꦪ ꦄꦨꦴꦮꦠꦺꦴ ꦄꦱꦚ꧀ꦚꦷꦠꦶ ꦥꦮꦠ꧀ꦠꦺꦴ ꦢꦸꦠꦶꦪꦮꦴꦢꦺꦴ; ꦠꦡꦴ ꦱꦚ꧀ꦚꦴꦪ ꦱꦲ ꦫꦹꦥꦣꦩ꧀ꦩꦺ ꦱꦧ꧀ꦧꦺ ꦌꦮ ꦮꦴ ꦫꦹꦥꦴꦫꦹꦥꦣꦩ꧀ꦩꦺ ꦄꦠ꧀ꦠꦴꦠꦶ ꦒꦲꦺꦠ꧀ꦮꦴ ꦥꦮꦠ꧀ꦠꦺꦴ ꦠꦠꦶꦪꦮꦴꦢꦺꦴ; ꦠꦏ꧀ꦏꦒ꧀ꦒꦴꦲꦮꦱꦺꦤꦺꦮ ꦥꦮꦠ꧀ꦠꦺꦴ ꦕꦠꦸꦠ꧀ꦡꦮꦴꦢꦺꦴ. ꦠꦺꦱꦸ ꦪꦁ ꦮꦠ꧀ꦠꦧ꧀ꦧꦁ, ꦠꦁ ꦲꦺꦛ꧀ꦜꦴ ꦮꦸꦠ꧀ꦠꦤꦪꦺꦤꦺꦮ ꦮꦺꦢꦶꦠꦧ꧀ꦧꦁ. ꦤꦺꦮꦱꦚ꧀ꦚꦷꦤꦴꦱꦚ꧀ꦚꦷꦮꦴꦢꦺꦥꦶ ꦄꦱꦚ꧀ꦚꦨꦮꦺ ꦤꦶꦧ꧀ꦧꦠ꧀ꦠꦱ꧀ꦱ ꦱꦠ꧀ꦠꦱ꧀ꦱ ꦕꦸꦠꦶꦥꦛꦶꦱꦤ꧀ꦣꦷꦱꦸ; ꦱꦧ꧀ꦧꦠ꧀ꦡ ꦮꦴ ꦥꦛꦸꦱꦚ꧀ꦚꦴꦏꦶꦕ꧀ꦕꦁ ꦏꦴꦠꦸꦁ ꦄꦱꦩꦠ꧀ꦡꦴꦪ ꦱꦸꦑꦸꦩꦴꦪ ꦱꦚ꧀ꦚꦴꦪ ꦄꦠ꧀ꦡꦶꦨꦴꦮꦥꦛꦶꦗꦴꦤꦤꦮꦱꦺꦤ ꦥꦜꦩꦮꦴꦢꦺꦴ; ꦄꦱꦚ꧀ꦚꦷꦮꦴꦢꦺ ꦮꦸꦠ꧀ꦠꦤꦪꦺꦤ ꦱꦸꦑꦸꦩꦴꦪ ꦱꦚ꧀ꦚꦴꦪ ꦮꦱꦺꦤ ꦱꦚ꧀ꦗꦴꦤꦤꦱꦨꦴꦮꦠꦴꦥꦛꦶꦗꦴꦤꦤꦮꦱꦺꦤ ꦕ ꦢꦸꦠꦶꦪꦮꦴꦢꦴꦢꦪꦺꦴ ꦥꦮꦠ꧀ꦠꦴꦠꦶ. ꦌꦮꦩꦺꦠ꧀ꦡ ꦌꦠꦺꦱꦁ ꦮꦴꦢꦴꦤꦁ ꦱꦧ꧀ꦨꦴꦮꦺꦴ ꦮꦺꦢꦶꦠꦧ꧀ꦧꦺꦴ. ꦱꦺꦱꦁ ꦮꦸꦠ꧀ꦠꦤꦪꦩꦺꦮ.
꧒꧔. ꦪꦠ꧀ꦡ ꦤ ꦱꦚ꧀ꦚꦴ, ꦠꦠ꧀ꦡ ꦚꦴꦟꦱ꧀ꦱ ꦱꦩ꧀ꦨꦮꦺꦴ ꦌꦮ ꦤꦠ꧀ꦡꦷꦠꦶ ꦄꦴꦲ – ‘‘ꦄꦱꦚ꧀ꦚꦴ ꦱꦩ꧀ꦩꦺꦴꦲꦺꦴ’’ꦠꦶ, ꦄꦱꦚ꧀ꦚꦨꦴꦮꦺꦴ ꦤꦴꦩ ꦱꦩ꧀ꦩꦺꦴꦲꦥ꧀ꦥꦮꦠ꧀ꦠꦷꦠꦶ ꦄꦠ꧀ꦡꦺꦴ. ꦪꦡꦴ ꦤꦶꦪ꧀ꦪꦤ꧀ꦠꦷꦠꦶ ꦤꦶꦪ꧀ꦪꦴꦤꦶꦪꦴꦠꦶ ꦧꦲꦸꦭꦁ ꦮꦕꦤꦠꦺꦴ ꦏꦠ꧀ꦠꦸꦱꦴꦣꦤꦺꦴ ꦤꦶꦪ꧀ꦪꦴꦤꦶꦪꦱꦢ꧀ꦢꦺꦴ, ꦌꦮꦁ ꦆꦣ ꦮꦶꦚ꧀ꦚꦴꦠꦧ꧀ꦧꦱꦢ꧀ꦢꦺꦴꦠꦶ ꦄꦴꦲ – ‘‘ꦮꦶꦗꦴꦤꦴꦠꦷꦠꦶ ꦮꦶꦚ꧀ꦚꦴꦠꦧ꧀ꦧ’’ꦤ꧀ꦠꦶ, ꦮꦶꦗꦴꦤꦤꦁ ꦮꦶꦚ꧀ꦚꦴꦟꦤ꧀ꦠꦶ ꦄꦠ꧀ꦡꦺꦴ. ꦠꦺꦤ ꦢꦶꦛ꧀ꦜꦱꦸꦠꦩꦸꦠꦮꦶꦚ꧀ꦚꦴꦠꦧ꧀ꦧꦩꦠ꧀ꦠꦺꦤꦴꦠꦶ ꦢꦶꦛ꧀ꦜꦱꦸꦠꦩꦸꦠꦮꦶꦚ꧀ꦚꦴꦟꦥ꧀ꦥꦩꦴꦟꦺꦤꦴꦠꦶ ꦄꦠ꧀ꦡꦺꦴ ꦢꦛ꧀ꦜꦧ꧀ꦧꦺꦴ. ꦠꦺꦤꦴꦲ – ‘‘ꦥꦚ꧀ꦕꦢ꧀ꦮꦴꦫꦶꦏꦱꦚ꧀ꦚꦴꦥꦮꦠ꧀ꦠꦶꦩꦠ꧀ꦠꦺꦤꦴ’’ꦠꦶ, ꦤꦶꦧ꧀ꦧꦶꦏꦥ꧀ꦥꦨꦴꦮꦠꦺꦴ ꦥꦚ꧀ꦕꦢ꧀ꦮꦴꦫꦶꦏꦱꦚ꧀ꦚꦴꦥꦮꦠ꧀ꦠꦶꦱꦩꦺꦤ ꦨꦴꦮꦤꦴꦨꦶꦤꦷꦲꦴꦫꦺꦤꦴꦠꦶ ꦄꦠ꧀ꦡꦺꦴ. ꦎꦭ꦳ꦴꦫꦶꦏꦱꦔ꧀ꦑꦴꦫꦥ꧀ꦥꦮꦠ꧀ꦠꦶꦩꦠ꧀ꦠꦺꦤꦴꦠꦶ ꦎꦭ꦳ꦴꦫꦶꦏꦴꦤꦁ ꦱꦔ꧀ꦑꦴꦫꦴꦤꦁ ꦥꦮꦠ꧀ꦠꦶꦪꦴ. ꦎꦭ꦳ꦴꦫꦶꦏꦱꦔ꧀ꦑꦴꦫꦴꦠꦶ ꦕꦺꦠ꧀ꦡ ꦄꦴꦏꦶꦚ꧀ꦕꦚ꧀ꦚꦴꦪꦠꦤꦥꦫꦶꦪꦺꦴꦱꦴꦤꦴ ꦱꦩꦴꦥꦠ꧀ꦠꦶꦣꦩ꧀ꦩꦴ ꦄꦣꦶꦥ꧀ꦥꦺꦠꦴ. ꦈꦥꦱꦩ꧀ꦥꦢꦤ꧀ꦠꦶ ꦪꦺ ꦱꦚ꧀ꦚꦴꦪ, ꦄꦱꦚ꧀ꦚꦶꦨꦴꦮꦺ ꦕ ꦢꦺꦴꦱꦁ ꦢꦶꦱ꧀ꦮꦴ ꦤꦺꦮꦱꦚ꧀ꦚꦴꦤꦴꦱꦚ꧀ꦚꦴꦪꦠꦤꦁ ꦮꦟ꧀ꦟꦺꦤ꧀ꦠꦴꦥꦶ ꦫꦹꦥꦗ꧀ꦙꦴꦤꦥꦛꦶꦭꦴꦨꦩꦠ꧀ꦠꦺꦤ ꦠꦱ꧀ꦱ ꦱꦩ꧀ꦥꦴꦢꦤꦁ ꦥꦛꦶꦭꦴꦨꦁ ꦄꦣꦶꦒꦩꦁ ꦥꦚ꧀ꦚꦥꦺꦤ꧀ꦠꦶ, ꦠꦺꦱꦁ ꦠꦱ꧀ꦱ ꦧ꧀ꦪꦱꦤꦁ ꦄꦏ꧀ꦑꦴꦪꦠꦶ ꦄꦤꦸꦥꦴꦪꦨꦴꦮꦠꦺꦴ. ꦠꦺꦤꦴꦲ ‘‘ꦮꦶꦤꦴꦱꦺꦴ’’ꦠꦶꦄꦴꦢꦶ. ꦮꦸꦛ꧀ꦜꦴꦤꦤ꧀ꦠꦶ ꦱꦢꦶꦱꦱꦩꦴꦥꦗ꧀ꦗꦤꦥꦸꦧ꧀ꦧꦏꦁ ꦥꦫꦶꦮꦸꦛ꧀ꦜꦴꦤꦁ. ꦱꦩꦴꦥꦠ꧀ꦠꦶ ꦌꦮ ꦠꦺꦱꦁ ꦤꦠ꧀ꦡꦶ ꦄꦤꦣꦶꦒꦠꦠ꧀ꦠꦴ. ꦎꦭ꦳ꦴꦫꦶꦏꦱꦔ꧀ꦑꦴꦫꦥ꧀ꦥꦮꦠ꧀ꦠꦶꦪꦴ ꦄꦤ꧀ꦠꦩꦱꦺꦴ ꦄꦴꦏꦶꦚ꧀ꦕꦚ꧀ꦚꦴꦪꦠꦤꦱꦔ꧀ꦑꦴꦫꦥ꧀ꦥꦮꦠ꧀ꦠꦶꦪꦴꦥꦶ ꦥꦠ꧀ꦠꦧ꧀ꦧꦤ꧀ꦠꦶ ꦤ ꦄꦏ꧀ꦑꦴꦪꦠꦶ ꦠꦺꦥꦶ ꦱꦩꦠꦶꦏ꧀ꦏꦩꦶꦠ꧀ꦮꦴ ꦥꦠ꧀ꦠꦧ꧀ꦧꦠꦺꦴ. ꦱꦔ꧀ꦑꦴꦫꦴꦤꦤ꧀ꦠꦶ ꦤꦶꦢ꧀ꦣꦴꦫꦟꦺ ꦱꦴꦩꦶꦮꦕꦤꦁ. ꦄꦮꦱꦺꦱꦴꦠꦶ ꦆꦠꦺꦴ ꦥꦫꦁ ꦱꦸꦑꦸꦩꦨꦴꦮꦺꦴ ꦤꦴꦩ ꦤꦠ꧀ꦡꦷꦠꦶ ꦱꦸꦑꦸꦩꦨꦴꦮꦴꦥꦠ꧀ꦠꦶꦪꦴ ꦄꦮꦱꦺꦱꦴ. ꦠꦺꦤꦴꦲ – ‘‘ꦨꦴꦮꦤꦴꦮꦱꦺꦤ ꦱꦧ꧀ꦧꦱꦸꦑꦸꦩꦨꦴꦮꦁ ꦥꦠ꧀ꦠꦴ ꦱꦔ꧀ꦑꦴꦫꦴ’’ꦠꦶ. ꦌꦠꦤ꧀ꦠꦶ ꦤꦺꦮꦱꦚ꧀ꦚꦴꦤꦴꦱꦚ꧀ꦚꦴꦪꦠꦤꦁ, ꦥꦠ꧀ꦠꦧ꧀ꦧꦁ ꦤꦴꦩ ꦲꦺꦴꦠꦶ ꦠꦴꦢꦶꦱꦱꦔ꧀ꦑꦴꦫꦥ꧀ꦥꦠ꧀ꦠꦶꦪꦁ ꦠꦧ꧀ꦧꦺꦴꦲꦴꦫꦠꦺꦴ. ꦱꦔ꧀ꦑꦠꦁ ꦱꦩꦺꦕ꧀ꦕ ꦱꦩ꧀ꦨꦸꦪ꧀ꦪ ꦥꦕ꧀ꦕꦪꦺꦲꦶ ꦏꦠꦠ꧀ꦠꦴ.
꧒꧕. ‘‘ꦪꦺ ꦠꦺ ꦱꦩꦟꦧ꧀ꦫꦴꦲ꧀ꦩꦟꦴ ꦱꦠꦺꦴ ꦱꦠ꧀ꦠꦱ꧀ꦱ ꦈꦕ꧀ꦖꦺꦢꦁ ꦮꦶꦤꦴꦱꦁ ꦮꦶꦨꦮꦁ ꦥꦚ꧀ꦚꦥꦺꦤ꧀ꦠꦷ’’ꦠꦶ (ꦩ. ꦤꦶ. ꧓.꧒꧕) ꦮꦏ꧀ꦑꦩꦴꦤꦠ꧀ꦠꦴ ꦱꦧꦸꦢ꧀ꦣꦶꦪꦁ ꦮꦶꦥꦫꦶꦮꦠ꧀ꦠꦩꦴꦤꦺ ꦌꦏꦗ꧀ꦙꦁ ꦒꦲꦺꦠ꧀ꦮꦴ, ‘‘ꦠꦠ꧀ꦫꦴ’’ꦠꦶ ꦨꦒꦮꦠꦴ ꦮꦸꦠ꧀ꦠꦤ꧀ꦠꦶ ꦄꦴꦲ – ‘‘ꦠꦠ꧀ꦫꦴꦠꦶ ꦱꦠ꧀ꦠꦱꦸ ꦈꦕ꧀ꦖꦺꦢꦮꦴꦢꦺꦱꦸ ꦨꦸꦩ꧀ꦩ’’ꦤ꧀ꦠꦶ. ꦈꦢ꧀ꦣꦁ ꦱꦫꦤ꧀ꦠꦶ ꦈꦢ꧀ꦣꦁ ꦒꦠꦁ ꦱꦫꦤ꧀ꦠꦴꦠꦶ ꦠꦁ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦈꦢ꧀ꦣꦁ ꦮꦸꦕ꧀ꦕꦠꦷ’’ꦠꦶꦄꦴꦢꦶ. ꦱꦫꦤ꧀ꦠꦴꦠꦶ ꦪꦠ꧀ꦡ ꦥꦠ꧀ꦡꦺꦤ꧀ꦠꦶ ꦤ ꦭꦨꦤ꧀ꦠꦶ, ꦠꦁ ꦗꦴꦤꦤ꧀ꦠꦴ. ꦄꦴꦱꦠ꧀ꦠꦶꦤ꧀ꦠꦶ ꦄꦴꦱꦷꦱꦤꦁ. ꦥꦺꦕ꧀ꦕꦴꦠꦶ ꦥꦫꦭꦺꦴꦏꦺ. ꦮꦴꦟꦶꦗꦹꦥꦩꦴ ꦮꦶꦪꦴꦠꦶ ꦨꦮꦥꦫꦶꦪꦴꦥꦤ꧀ꦤꦦꦭꦮꦶꦱꦺꦱꦴꦥꦺꦏ꧀ꦑꦴꦪ ꦥꦛꦶꦥꦗ꧀ꦗꦤꦠꦺꦴ. ꦱꦏ꧀ꦏꦴꦪꦱ꧀ꦱ ꦨꦪꦴꦠꦶ ꦱꦤ꧀ꦠꦺꦴ ꦏꦴꦪꦺꦴꦠꦶ ꦱꦏ꧀ꦏꦴꦪꦺꦴ, ꦥꦫꦩꦠ꧀ꦡꦠꦺꦴ ꦮꦶꦗ꧀ꦗꦩꦴꦤꦺꦴ ꦣꦩ꧀ꦩꦱꦩꦹꦲꦺꦴꦠꦶ ꦏꦠ꧀ꦮꦴ ꦈꦥꦴꦢꦴꦤꦏ꧀ꦑꦤ꧀ꦣꦥꦚ꧀ꦕꦏꦁ, ꦠꦠꦺꦴ ꦨꦴꦪꦤꦺꦤ. ꦩꦴ ꦑꦷꦪꦶ ꦩꦴ ꦥꦫꦶꦏ꧀ꦑꦪꦁ ꦄꦒꦩꦴꦱꦶ. ꦩꦴ ꦎꦱꦷꦢꦶ ꦩꦴ ꦲꦺꦛ꧀ꦜꦴ ꦨꦱ꧀ꦱꦶ. ꦄꦧ꧀ꦨꦤ꧀ꦠꦶ ꦄꦴꦏꦴꦱꦁ ꦩꦴ ꦈꦤ꧀ꦢ꧀ꦫꦶꦪꦶ ꦩꦴ ꦨꦶꦗ꧀ꦗꦶꦠ꧀ꦮꦴ ꦥꦠꦶ. ꦒꦢ꧀ꦢꦸꦭꦺꦤ ꦧꦢ꧀ꦣꦺꦴ ꦒꦢ꧀ꦢꦸꦭꦧꦢ꧀ꦣꦺꦴ. ꦢꦭ꦳꧀ꦲꦡꦩ꧀ꦨꦺꦴ ꦮꦶꦪ ꦑꦷꦭꦺꦴ ꦮꦶꦪ ꦕ ꦱꦏ꧀ꦏꦴꦪꦺꦴ ꦢꦸꦩ꧀ꦩꦺꦴꦕꦤꦷꦪꦠꦺꦴ. ꦱꦴ ꦮꦶꦪ ꦢꦶꦛ꧀ꦜꦶꦒꦠꦶꦏꦺꦴ ꦠꦱ꧀ꦱ ꦄꦤꦸꦥꦫꦶꦮꦠ꧀ꦠꦤꦠꦺꦴ. ꦢꦟ꧀ꦝꦏꦺꦴ ꦮꦶꦪ ꦢꦶꦛ꧀ꦜꦶ ꦖꦺꦢꦤꦏꦫꦟꦴꦪ ꦄꦱꦩꦠ꧀ꦡꦨꦴꦮꦏꦫꦟꦠꦺꦴ. ꦫꦗ꧀ꦗꦸ ꦮꦶꦪ ꦠꦟ꧀ꦲꦴ ꦧꦤ꧀ꦣꦤꦠꦺꦴ ꦕ, ꦄꦴꦫꦩ꧀ꦩꦟꦏꦫꦟꦮꦱꦺꦤ ꦱꦩꦤ꧀ꦤꦴꦒꦩꦤꦮꦱꦺꦤ ꦕ ꦱꦩ꧀ꦧꦢ꧀ꦣꦨꦴꦮꦠꦺꦴ. ꦠꦺꦤ ꦮꦸꦠ꧀ꦠꦁ – ‘‘ꦢꦶꦛ꧀ꦜꦶꦢꦟ꧀ꦝꦏꦺ ꦥꦮꦺꦱꦶꦠꦴꦪ ꦠꦟ꧀ꦲꦴꦫꦗ꧀ꦗꦸꦪꦴ’’ꦠꦶ.
꧒꧖. ꦨꦒꦮꦴ ꦄꦠ꧀ꦠꦤꦺꦴ ꦢꦺꦱꦤꦴꦮꦶꦭꦴꦱꦺꦤ ꦮꦺꦤꦺꦪ꧀ꦪꦗ꧀ꦙꦴꦱꦪꦮꦱꦺꦤ (ꦕꦠꦸꦕꦠ꧀ꦠꦴꦫꦷꦱ ꦄꦥꦫꦤ꧀ꦠꦏꦥ꧀ꦥꦶꦏꦮꦴꦢꦴ ꦠꦠ꧀ꦡ ꦠꦠ꧀ꦡ ꦄꦤ꧀ꦠꦺꦴꦒꦣꦴꦠꦶ) ꦈꦢ꧀ꦢꦺꦱꦮꦱꦺꦤ ꦥꦚ꧀ꦕꦺꦮ ꦱꦔ꧀ꦒꦲꦺꦠ꧀ꦮꦴ ꦪꦡꦸꦢ꧀ꦢꦺꦱꦁ ꦤꦶꦒꦩꦺꦤ꧀ꦠꦺꦴ, ‘‘ꦆꦩꦴꦤꦺꦮ ꦥꦚ꧀ꦕꦴꦪꦠꦤꦴꦤꦷ’’ꦠꦶ ꦄꦴꦲ. ꦠꦠ꧀ꦡ ꦢꦸꦏ꧀ꦑꦱ꧀ꦱ ꦤꦶꦩꦶꦠ꧀ꦠꦨꦴꦮꦠꦺꦴ ꦢꦶꦛ꧀ꦜꦶꦒꦠꦴꦤꦁ ꦏꦴꦫꦟꦛ꧀ꦜꦺꦤ ꦄꦴꦪꦠꦤꦠ꧀ꦡꦺꦴꦠꦶ ꦮꦸꦠ꧀ꦠꦁ – ‘‘ꦆꦩꦴꦤꦺꦮ ꦥꦚ꧀ꦕ ꦏꦴꦫꦟꦴꦤꦷ’’ꦠꦶ. ꦱꦚ꧀ꦚꦷꦄꦴꦢꦶꦮꦱꦺꦤ ꦠꦷꦟꦶ ꦈꦕ꧀ꦖꦺꦢꦮꦴꦢꦺꦴꦠꦶ ꦕꦠ꧀ꦠꦴꦫꦶ ꦨꦴꦗꦶꦠꦴꦤꦶ. ꦆꦠꦫꦁ ꦥꦤ ꦢꦶꦛ꧀ꦜꦣꦩ꧀ꦩꦤꦶꦧ꧀ꦧꦴꦤꦁ ꦏꦸꦲꦶꦁ ꦥꦮꦶꦛ꧀ꦜꦁ? ꦱꦫꦹꦥꦠꦺꦴ ꦄꦨꦴꦗꦶꦠꦠ꧀ꦠꦴ ꦪꦡꦴꦨꦴꦗꦶꦠꦺꦱꦸ ꦮꦴꦢꦺꦱꦸ ꦏꦠ꧀ꦡ ꦄꦤ꧀ꦠꦺꦴꦒꦣꦤ꧀ꦠꦶ ꦥꦸꦕ꧀ꦖꦠꦶ. ꦈꦢ꧀ꦢꦺꦱꦺ ꦥꦤ ꦱꦫꦹꦥꦠꦺꦴ ꦒꦲꦶꦠꦩꦺꦮ, ‘‘ꦢꦶꦛ꧀ꦜꦣꦩ꧀ꦩꦤꦶꦧ꧀ꦧꦴꦤꦁ ꦮꦴ ꦥꦤꦺꦏꦺ ꦄꦨꦶꦮꦢꦤ꧀ꦠꦷ’’ꦠꦶ. ꦆꦠꦫꦺꦴ ꦌꦏꦠ꧀ꦠꦱꦚ꧀ꦚꦷꦮꦴꦢꦺ ꦤꦴꦤꦠ꧀ꦠꦱꦚ꧀ꦚꦷꦮꦴꦢꦺ ꦄꦤ꧀ꦠꦺꦴꦒꦣꦤ꧀ꦠꦶ ꦢꦱ꧀ꦱꦺꦤ꧀ꦠꦺꦴ ‘‘ꦌꦏꦠ꧀ꦠ…ꦥꦺ… ꦮꦺꦢꦶꦠꦧ꧀ꦧ’’ꦤ꧀ꦠꦶ ꦄꦴꦲ ꦪꦡꦴꦱꦸꦑꦚ꧀ꦕꦺꦠꦁ ꦮꦸꦠ꧀ꦠꦁ. ꦥꦜꦩꦺꦴ ꦲꦶ ꦢꦶꦛ꧀ꦜꦣꦩ꧀ꦩꦤꦶꦧ꧀ꦧꦴꦤꦮꦴꦢꦺꦴ ꦤꦴꦤꦠ꧀ꦠꦱꦚ꧀ꦚꦷꦮꦴꦢꦺ ꦄꦤ꧀ꦠꦺꦴꦒꦣꦺꦴ, ꦆꦠꦫꦺ ꦕꦠ꧀ꦠꦴꦫꦺꦴ ꦌꦏꦠ꧀ꦠꦱꦚ꧀ꦚꦷꦮꦴꦢꦺ.
꧒꧗. ꦄꦠꦷꦠꦏꦺꦴꦛ꧀ꦜꦴꦱꦱꦔ꧀ꦑꦴꦠꦤ꧀ꦠꦶ ꦄꦠꦷꦠꦁ ꦑꦤ꧀ꦣꦏꦺꦴꦛ꧀ꦜꦴꦱꦱꦔ꧀ꦑꦴꦠꦁ ꦥꦸꦧ꧀ꦧꦤ꧀ꦠꦁ. ꦥꦸꦧ꧀ꦧꦺ ꦤꦶꦮꦸꦠ꧀ꦡꦣꦩ꧀ꦩꦮꦶꦱꦪꦴ ꦏꦥ꧀ꦥꦤꦴ ꦆꦣꦴꦣꦶꦥ꧀ꦥꦺꦠꦴ, ꦠꦱ꧀ꦩꦴ ꦄꦠꦷꦠꦏꦴꦭꦮꦴꦕꦏꦺꦴ ꦆꦣ ꦥꦸꦧ꧀ꦧꦱꦢ꧀ꦢꦺꦴ, ꦫꦹꦥꦴꦢꦶꦑꦤ꧀ꦣꦮꦶꦤꦶꦩꦸꦠ꧀ꦠꦚ꧀ꦕ ꦏꦥ꧀ꦥꦤꦴꦮꦠ꧀ꦡꦸ ꦤꦠ꧀ꦡꦶ, ꦄꦤ꧀ꦠꦱꦢ꧀ꦢꦺꦴ ꦕ ꦏꦺꦴꦛ꧀ꦜꦴꦱꦮꦴꦕꦏꦺꦴ. ꦠꦺꦤ ꦮꦸꦠ꧀ꦠꦁ ‘‘ꦄꦠꦷꦠꦏꦺꦴꦛ꧀ꦜꦴꦱꦱꦔ꧀ꦑꦴꦠꦁ ꦥꦸꦧ꧀ꦧꦤ꧀ꦠꦁ ꦏꦥ꧀ꦥꦺꦠ꧀ꦮꦴ’’ꦠꦶ. ‘‘ꦏꦥ꧀ꦥꦺꦠ꧀ꦮꦴ’’ꦠꦶ ꦕ ꦠꦱ꧀ꦩꦶꦁ ꦥꦸꦧ꧀ꦧꦤ꧀ꦠꦺ ꦠꦟ꧀ꦲꦴꦪꦤꦴꦨꦶꦤꦶꦮꦶꦱꦴꦤꦁ ꦱꦩꦠ꧀ꦡꦤꦁ ꦥꦫꦶꦤꦶꦛ꧀ꦜꦴꦥꦤꦁ ꦮꦢꦠꦶ. ꦱꦺꦱꦩ꧀ꦥꦷꦠꦶ ‘‘ꦥꦸꦧ꧀ꦧꦤ꧀ꦠꦴꦤꦸꦢꦶꦛ꧀ꦜꦷ’’ꦠꦶ ꦌꦮꦩꦴꦢꦶꦏꦁ. ꦥꦸꦧ꧀ꦧꦺ ꦮꦸꦠ꧀ꦠꦥ꧀ꦥꦏꦴꦫꦤ꧀ꦠꦶ ‘‘ꦄꦥꦫꦤ꧀ꦠꦴꦤꦸꦢꦶꦛ꧀ꦜꦶꦤꦺꦴ’’ꦠꦶꦄꦴꦢꦷꦱꦸ ꦮꦸꦠ꧀ꦠꦥ꧀ꦥꦏꦴꦫꦁ. ꦌꦏꦺꦏꦱ꧀ꦩꦶꦚ꧀ꦕ ꦄꦠ꧀ꦠꦴꦠꦶ ꦄꦴꦲꦶꦠꦺꦴ ꦄꦲꦁꦩꦴꦤꦺꦴ ꦌꦠ꧀ꦡꦴꦠꦶ ꦏꦠ꧀ꦮꦴ, ꦭꦺꦴꦏꦺꦴꦠꦶ ꦭꦺꦴꦏꦶꦪꦤ꧀ꦠꦶ ꦌꦠ꧀ꦡ ꦥꦸꦚ꧀ꦚꦥꦴꦥꦴꦤꦶ ꦠꦧ꧀ꦧꦶꦥꦴꦏꦴ ꦕꦴꦠꦶ ꦏꦠ꧀ꦮꦴ, ꦠꦁ ꦠꦁ ꦒꦲꦟꦮꦶꦱꦺꦱꦁ ꦈꦥꦴꦢꦴꦪ ꦥꦚ꧀ꦚꦴꦥꦤꦁ ꦲꦺꦴꦠꦷꦠꦶ ꦄꦴꦲ – ‘‘ꦫꦹꦥꦴꦢꦷꦱꦸ ꦄꦚ꧀ꦚꦠꦫꦁ ꦄꦠ꧀ꦠꦴꦠꦶ ꦕ ꦭꦺꦴꦏꦺꦴꦠꦶ ꦕ ꦒꦲꦺꦠ꧀ꦮꦴ’’ꦠꦶ. ꦱꦧ꧀ꦧꦢꦴꦨꦴꦮꦺꦤ ꦱꦱ꧀ꦱꦠꦺꦴ. ꦄꦩꦫꦺꦴ ꦤꦶꦕ꧀ꦕꦺꦴ ꦣꦸꦮꦺꦴꦠꦶ ꦠꦱ꧀ꦱꦺꦮ ꦮꦺꦮꦕꦤꦴꦤꦶ. ꦩꦫꦟꦴꦨꦴꦮꦺꦤ ꦄꦩꦫꦺꦴ, ꦈꦥ꧀ꦥꦴꦢꦴꦨꦴꦮꦺꦤ ꦱꦧ꧀ꦧꦏꦴꦭꦁ ꦮꦠ꧀ꦠꦤꦠꦺꦴ ꦤꦶꦕ꧀ꦕꦺꦴ, ꦡꦶꦫꦛ꧀ꦜꦺꦤ ꦮꦶꦏꦴꦫꦴꦨꦴꦮꦺꦤ ꦣꦸꦮꦺꦴ, ꦪꦡꦴꦲꦴꦠꦶꦄꦴꦢꦶꦤꦴ ꦪꦡꦴꦮꦸꦠ꧀ꦠꦩꦠ꧀ꦡꦁ ꦤꦶꦢ꧀ꦢꦺꦱꦥꦛꦶꦱꦩ꧀ꦨꦶꦢꦴꦥꦴꦭ꦳ꦷꦲꦶ ꦮꦶꦨꦴꦮꦺꦠꦶ. ꦄꦪꦚ꧀ꦕ ꦄꦠ꧀ꦡꦺꦴ ‘‘ꦫꦹꦥꦁ ꦄꦠ꧀ꦠꦠꦺꦴ ꦱꦩꦤꦸꦥꦱ꧀ꦱꦠꦶ, ꦮꦺꦢꦤꦁ… ꦱꦚ꧀ꦚꦁ… ꦱꦔ꧀ꦑꦴꦫꦺ… ꦮꦶꦚ꧀ꦚꦴꦟꦁ ꦄꦠ꧀ꦠꦠꦺꦴ ꦱꦩꦤꦸꦥꦱ꧀ꦱꦠꦷ’’ꦠꦶ (ꦥꦛꦶ. ꦩ. ꧑.꧑꧓꧐-꧑꧓꧑) ꦆꦩꦶꦱ꧀ꦱꦴ ꦥꦚ꧀ꦕꦮꦶꦣꦴꦪ ꦱꦏ꧀ꦏꦴꦪꦢꦶꦛ꧀ꦜꦶꦪꦴ ꦮꦱꦺꦤ ꦮꦸꦠ꧀ꦠꦺꦴ. ‘‘ꦫꦹꦥꦮꦤ꧀ꦠ’’ꦤ꧀ꦠꦶꦄꦴꦢꦶꦏꦴꦪ (ꦥꦛꦶ. ꦩ. ꧑.꧑꧓꧐-꧑꧓꧑) ꦥꦤ ꦥꦚ꧀ꦕꦢꦱꦮꦶꦣꦴꦪ ꦱꦏ꧀ꦏꦴꦪꦢꦶꦛ꧀ꦜꦶꦪꦴ ꦮꦱꦺꦤ ꦕꦠ꧀ꦠꦴꦫꦺꦴ ꦕꦠ꧀ꦠꦴꦫꦺꦴ ꦑꦤ꧀ꦣꦺ, ‘‘ꦄꦠ꧀ꦠꦴ’’ꦠꦶ ꦒꦲꦺꦠ꧀ꦮꦴ ꦠꦢꦚ꧀ꦚꦁ – ‘‘ꦭꦺꦴꦏꦺꦴ’’ꦠꦶ ꦥꦚ꧀ꦚꦥꦺꦤ꧀ꦠꦷꦠꦶ ꦄꦪꦩ꧀ꦥꦶ ꦄꦠ꧀ꦡꦺꦴ ꦭꦧ꧀ꦨꦠꦶ, ꦠꦡꦴ ꦌꦏꦁ ꦑꦤ꧀ꦣꦁ, ‘‘ꦄꦠ꧀ꦠꦴ’’ꦠꦶ ꦒꦲꦺꦠ꧀ꦮꦴ ꦠꦢꦚ꧀ꦚꦺ ‘‘ꦭꦺꦴꦏꦺꦴ’’ꦠꦶ ꦥꦚ꧀ꦚꦥꦺꦤ꧀ꦠꦷꦠꦶ ꦌꦮꦩꦺꦠ꧀ꦡ ꦄꦠ꧀ꦡꦺꦴ ꦢꦛ꧀ꦜꦧ꧀ꦧꦺꦴ. ꦌꦱꦺꦮ ꦤꦪꦺꦴꦠꦶ ꦆꦩꦶꦤꦴ ꦪꦡꦴ ‘‘ꦫꦹꦥꦴꦢꦷꦱꦸ ꦄꦚ꧀ꦚꦠꦫꦁ ꦄꦠ꧀ꦠꦴꦠꦶ ꦕ ꦭꦺꦴꦏꦺꦴꦠꦶ ꦕ ꦒꦲꦺꦠ꧀ꦮꦴ ꦱꦱ꧀ꦱꦠꦺꦴ…ꦥꦺ… ꦣꦸꦮꦺꦴ’’ꦠꦶ ꦄꦠ꧀ꦡꦺꦴ ꦮꦸꦠ꧀ꦠꦺꦴ; ꦌꦮꦁ ꦄꦱꦱ꧀ꦱꦠꦺꦴ ꦄꦤꦶꦕ꧀ꦕꦺꦴ ꦄꦣꦸꦮꦺꦴ ꦈꦕ꧀ꦖꦶꦗ꧀ꦗꦠꦶ ꦮꦶꦤꦱ꧀ꦱꦠꦶ ꦤ ꦲꦺꦴꦠꦶ ꦥꦫꦁ ꦩꦫꦟꦴ; ꦤꦶꦕ꧀ꦕꦺꦴ ꦕ ꦄꦤꦶꦕ꧀ꦕꦺꦴ ꦕ ꦤꦺꦮꦤꦶꦕ꧀ꦕꦺꦴ ꦤꦴꦤꦶꦕ꧀ꦕꦺꦴꦠꦶ ꦌꦮꦩꦴꦢꦶꦩꦠ꧀ꦡꦁ ꦄꦠꦶꦢꦶꦱꦠꦶ.
ꦕꦠ꧀ꦠꦴꦫꦺꦴ ꦱꦱ꧀ꦱꦠꦮꦴꦢꦴꦠꦶ ꦭꦴꦨꦷꦮꦱꦺꦤ ꦠꦪꦺꦴ, ꦠꦏ꧀ꦏꦷꦮꦱꦺꦤ ꦌꦏꦺꦴꦠꦶ ꦌꦮꦁ ꦕꦠ꧀ꦠꦴꦫꦺꦴ. ꦥꦸꦧ꧀ꦧꦺꦤꦶꦮꦴꦱꦚꦴꦟꦭꦴꦨꦷ ꦠꦶꦠ꧀ꦡꦶꦪꦺꦴ ꦩꦤ꧀ꦢꦥꦚ꧀ꦚꦺꦴ ꦄꦤꦺꦏꦗꦴꦠꦶꦱꦠꦱꦲꦱ꧀ꦱꦩꦠ꧀ꦠꦁ ꦄꦤꦸꦱ꧀ꦱꦫꦠꦶ, ꦩꦗ꧀ꦙꦶꦩꦥꦚ꧀ꦚꦺꦴ ꦢꦱ ꦱꦁꦮꦛ꧀ꦛꦮꦶꦮꦛ꧀ꦛꦏꦥ꧀ꦥꦴꦤꦶ, ꦠꦶꦏ꧀ꦑꦥꦚ꧀ꦚꦺꦴ ꦕꦠ꧀ꦠꦴꦫꦷꦱ ꦱꦁꦮꦛ꧀ꦛꦮꦶꦮꦛ꧀ꦛꦏꦥ꧀ꦥꦴꦤꦶ, ꦤ ꦠꦠꦺꦴ ꦥꦫꦁ. ꦱꦺꦴ ꦌꦮꦁ ꦄꦤꦸꦱ꧀ꦱꦫꦤ꧀ꦠꦺꦴ ꦄꦠ꧀ꦠꦴ ꦕ ꦭꦺꦴꦏꦺꦴ ꦕꦴꦠꦶ ꦄꦨꦶꦮꦢꦠꦶ. ꦠꦏ꧀ꦏꦷ ꦥꦤ ꦠꦏ꧀ꦏꦥꦫꦶꦪꦴꦲꦠꦁ ꦮꦷꦩꦁꦱꦴꦤꦸꦕꦫꦶꦠꦁ ꦱꦪꦁꦥꦛꦶꦨꦴꦤꦁ ꦱꦱ꧀ꦱꦠꦺꦴ ꦄꦠ꧀ꦠꦴ ꦕ ꦭꦺꦴꦏꦺꦴ ꦕꦴꦠꦶ ꦄꦨꦶꦮꦢꦠꦶ. ꦠꦺꦤ ꦮꦸꦠ꧀ꦠꦁ – ‘‘ꦭꦴꦨꦷꦮꦱꦺꦤ ꦠꦪꦺꦴ, ꦠꦏ꧀ꦏꦷꦮꦱꦺꦤ ꦌꦏꦺꦴꦠꦶ ꦌꦮꦁ ꦕꦠ꧀ꦠꦴꦫꦺꦴ ꦱꦱ꧀ꦱꦠꦮꦴꦢꦴ’’ꦠꦶ. ꦌꦠꦺꦤꦺꦮ ꦕ ꦄꦣꦶꦕ꧀ꦕꦱꦩꦸꦥ꧀ꦥꦠ꧀ꦠꦶꦏꦮꦴꦢꦺꦴ ꦮꦶꦪ ꦱꦱ꧀ꦱꦠꦮꦴꦢꦺꦴ ꦏꦱ꧀ꦩꦴ ꦢꦸꦮꦶꦣꦺꦤ ꦤ ꦮꦶꦨꦠ꧀ꦠꦺꦴꦠꦶ ꦕꦺ? ꦥꦛꦶꦏ꧀ꦑꦶꦠ꧀ꦠꦠ꧀ꦠꦴꦠꦶ ꦢꦛ꧀ꦜꦧ꧀ꦧꦁ.
ꦌꦠ꧀ꦡ ꦕ, ‘‘ꦱꦱ꧀ꦱꦠꦺꦴ ꦄꦠ꧀ꦠꦴ ꦕ ꦭꦺꦴꦏꦺꦴ ꦕꦴ’’ꦠꦶ ꦮꦴꦢꦺ ꦄꦪꦩꦪꦸꦠ꧀ꦠꦠꦴꦮꦶꦨꦴꦮꦤꦴ – ꦪꦢꦶ ꦲꦶ ꦥꦫꦺꦤ ꦥꦫꦶꦏꦥ꧀ꦥꦶꦠꦺꦴ ꦄꦠ꧀ꦠꦴ, ꦭꦺꦴꦏꦺꦴ ꦮꦴ ꦱꦱ꧀ꦱꦠꦺꦴ ꦱꦶꦪꦴ, ꦠꦱ꧀ꦱ ꦤꦶꦧ꧀ꦧꦶꦏꦴꦫꦠꦴꦪ ꦥꦸꦫꦶꦩꦫꦹꦥꦴꦮꦶꦗꦲꦤꦠꦺꦴ ꦏꦱ꧀ꦱꦕꦶ ꦮꦶꦱꦺꦱꦴꦣꦴꦤꦱ꧀ꦱ ꦏꦴꦠꦸꦁ ꦄꦱꦏ꧀ꦏꦸꦟꦺꦪ꧀ꦪꦠꦴꦪ ꦄꦲꦶꦠꦠꦺꦴ ꦤꦶꦮꦠ꧀ꦠꦤꦠ꧀ꦡꦁ ꦲꦶꦠꦺ ꦕ ꦥꦛꦶꦥꦠ꧀ꦠꦶꦄꦠ꧀ꦡꦁ ꦈꦥꦢꦺꦱꦺꦴ ꦌꦮ ꦤꦶꦥ꧀ꦥꦪꦺꦴꦗꦤꦺꦴ ꦱꦶꦪꦴ ꦱꦱ꧀ꦱꦠꦮꦴꦢꦶꦤꦺꦴ. ꦏꦡꦁ ꦮꦴ ꦱꦺꦴ ꦈꦥꦢꦺꦱꦺꦴ ꦥꦮꦠ꧀ꦠꦷꦪꦠꦶ ꦮꦶꦏꦴꦫꦴꦨꦴꦮꦠꦺꦴ; ꦌꦮꦚ꧀ꦕ ꦄꦠ꧀ꦠꦤꦺꦴ ꦄꦗꦛꦴꦏꦴꦱꦱ꧀ꦱ ꦮꦶꦪ ꦢꦴꦤꦴꦢꦶꦏꦶꦫꦶꦪꦴ ꦲꦶꦁꦱꦴꦢꦶꦏꦶꦫꦶꦪꦴ ꦕ ꦤ ꦱꦩ꧀ꦨꦮꦠꦶ; ꦠꦡꦴ ꦱꦸꦑꦱ꧀ꦱ ꦢꦸꦏ꧀ꦑꦱ꧀ꦱ ꦕ ꦄꦤꦸꦨꦮꦤꦤꦶꦧꦤ꧀ꦣꦺꦴ ꦌꦮ ꦱꦱ꧀ꦱꦠꦮꦴꦢꦶꦤꦺꦴ ꦤ ꦪꦸꦗ꧀ꦗꦠꦶ ꦏꦩ꧀ꦩꦧꦢ꧀ꦣꦴꦨꦴꦮꦠꦺꦴ, ꦗꦴꦠꦶꦄꦴꦢꦷꦤꦁ ꦄꦱꦩ꧀ꦨꦮꦠꦺꦴ ꦏꦸꦠꦺꦴ ꦮꦶꦩꦺꦴꦏ꧀ꦑꦺꦴ. ꦄꦡ ꦥꦤ ꦣꦩ꧀ꦩꦩꦠ꧀ꦠꦁ ꦠꦱ꧀ꦱ ꦈꦥ꧀ꦥꦗ꧀ꦗꦠꦶ ꦕꦺꦮ ꦮꦶꦤꦱ꧀ꦱꦠꦶ ꦕ, ꦪꦱ꧀ꦱ ꦮꦱꦺꦤꦴꦪꦁ ꦏꦶꦫꦶꦪꦴꦢꦶꦮꦺꦴꦲꦴꦫꦺꦴꦠꦶ ꦮꦢꦺꦪ꧀ꦪ. ꦌꦮꦩ꧀ꦥꦶ ꦥꦸꦫꦶꦩꦫꦹꦥꦴꦮꦶꦗꦲꦤꦺꦤ ꦄꦮꦛ꧀ꦜꦶꦠꦱ꧀ꦱ ꦄꦠ꧀ꦠꦤꦺꦴ ꦣꦩ꧀ꦩꦩꦠ꧀ꦠꦤ꧀ꦠꦶ ꦤ ꦱꦏ꧀ꦏꦴ ꦱꦩ꧀ꦨꦴꦮꦺꦠꦸꦁ; ꦠꦺ ꦮꦴ ꦥꦤꦱ꧀ꦱ ꦣꦩ꧀ꦩꦴ ꦄꦮꦠ꧀ꦡꦴꦨꦹꦠꦴ ꦠꦠꦺꦴ ꦄꦚ꧀ꦚꦺ ꦮꦴ ꦱꦶꦪꦸꦁ ꦄꦤꦚ꧀ꦚꦺ ꦮꦴ, ꦪꦢꦶ ꦄꦚ꧀ꦚꦺ, ꦤ ꦠꦴꦲꦶ ꦠꦱ꧀ꦱ ꦈꦥ꧀ꦥꦤ꧀ꦤꦴꦲꦶꦥꦶ ꦏꦺꦴꦕꦶ ꦮꦶꦱꦺꦱꦺꦴ ꦄꦠ꧀ꦡꦶ. ꦪꦺꦴ ꦲꦶ ꦏꦫꦺꦴꦠꦶ ꦥꦛꦶꦱꦁꦮꦺꦢꦺꦠꦶ ꦕꦮꦠꦶ ꦈꦥꦥꦗ꧀ꦗꦠꦶ ꦕꦴꦠꦶ ꦆꦕ꧀ꦖꦶꦠꦁ. ꦠꦱ꧀ꦩꦴ ꦠꦢꦮꦠ꧀ꦡꦺꦴ ꦌꦮ ꦪꦡꦴꦮꦸꦠ꧀ꦠꦢꦺꦴꦱꦺꦴ, ꦏꦶꦚ꧀ꦕ ꦣꦩ꧀ꦩꦏꦥ꧀ꦥꦤꦴꦥꦶ ꦤꦶꦫꦠ꧀ꦡꦏꦴ ꦱꦶꦪꦴ. ꦄꦡ ꦄꦤꦚ꧀ꦚꦺ, ꦈꦥ꧀ꦥꦴꦢꦮꦶꦤꦴꦱꦮꦤ꧀ꦠꦷꦲꦶ ꦄꦮꦠ꧀ꦡꦴꦲꦶ ꦄꦤꦚ꧀ꦚꦱ꧀ꦱ ꦄꦠ꧀ꦠꦤꦺꦴ ꦠꦴꦱꦁ ꦮꦶꦪ ꦈꦥ꧀ꦥꦴꦢꦮꦶꦤꦴꦱꦱꦩ꧀ꦨꦮꦴꦥꦠ꧀ꦠꦶꦠꦺꦴ ꦏꦸꦠꦺꦴ ꦤꦶꦕ꧀ꦕꦠꦴꦮꦏꦴꦱꦺꦴ. ꦠꦴꦱꦩ꧀ꦥꦶ ꦮꦴ ꦄꦠ꧀ꦠꦤꦺꦴ ꦮꦶꦪ ꦤꦶꦕ꧀ꦕꦠꦴꦠꦶ ꦧꦤ꧀ꦣꦤꦮꦶꦩꦺꦴꦏ꧀ꦑꦴꦤꦁ ꦄꦱꦩ꧀ꦨꦮꦺꦴ ꦌꦮꦴꦠꦶ ꦤ ꦪꦸꦗ꧀ꦗꦠꦶ ꦌꦮ ꦱꦱ꧀ꦱꦠꦮꦴꦢꦺꦴ; ꦤ ꦕꦺꦠ꧀ꦡ ꦏꦺꦴꦕꦶ ꦮꦴꦢꦷ ꦣꦩ꧀ꦩꦴꦤꦁ ꦱꦱ꧀ꦱꦠꦨꦴꦮꦺ ꦥꦫꦶꦱꦸꦢ꧀ꦣꦁ ꦪꦸꦠ꧀ꦠꦶꦁ ꦮꦠ꧀ꦠꦸꦁ ꦱꦩꦠ꧀ꦡꦺꦴ ꦄꦠ꧀ꦡꦶ; ꦪꦸꦠ꧀ꦠꦶꦫꦲꦶꦠꦚ꧀ꦕ ꦮꦕꦤꦁ ꦤ ꦥꦟ꧀ꦝꦶꦠꦴꦤꦁ ꦕꦶꦠ꧀ꦠꦩꦴꦫꦴꦣꦺꦠꦷꦠꦶ ꦮꦶꦚ꧀ꦚꦹꦲꦶ ꦖꦝ꧀ꦝꦶꦠꦺꦴ ꦌꦮꦴꦪꦁ ꦱꦱ꧀ꦱꦠꦮꦴꦢꦺꦴꦠꦶ.
ꦱꦠ꧀ꦠ ꦈꦕ꧀ꦖꦺꦢꦮꦴꦢꦴꦠꦶ ꦌꦠ꧀ꦡ ꦠꦺ ꦱꦫꦹꦥꦩꦠ꧀ꦠꦠꦺꦴ ꦲꦺꦛ꧀ꦜꦴ ꦢꦱ꧀ꦱꦶꦠꦴ ꦌꦮ, ꦠꦠ꧀ꦡ ꦢ꧀ꦮꦺ ꦗꦤꦴ ꦈꦕ꧀ꦖꦺꦢꦢꦶꦛ꧀ꦜꦶꦁ ꦒꦟ꧀ꦲꦤ꧀ꦠꦶ ꦭꦴꦨꦷ ꦕ ꦄꦭꦴꦨꦷ ꦕ. ꦠꦠ꧀ꦡ ꦭꦴꦨꦷ ꦤꦴꦩ ꦢꦶꦧ꧀ꦧꦕꦏ꧀ꦑꦸꦚꦴꦟꦭꦴꦨꦷ ꦢꦶꦧ꧀ꦧꦺꦤ ꦕꦏ꧀ꦑꦸꦤꦴ ꦄꦫꦲꦠꦺꦴ ꦕꦸꦠꦶꦁ ꦢꦶꦱ꧀ꦮꦴ ꦈꦥꦥꦠ꧀ꦠꦶꦁ ꦄꦥꦱ꧀ꦱꦤ꧀ꦠꦺꦴ. ꦪꦺꦴ ꦮꦴ ꦥꦸꦡꦸꦗ꧀ꦗꦤꦴꦤꦩ꧀ꦥꦶ ꦕꦸꦠꦶꦩꦠ꧀ꦠꦩꦺꦮ ꦢꦛ꧀ꦜꦸꦁ ꦱꦏ꧀ꦏꦺꦴꦠꦶ, ꦥꦸꦧ꧀ꦧꦪꦺꦴꦒꦴꦨꦴꦮꦺꦤ ꦥꦫꦶꦏꦩ꧀ꦩꦴꦏꦫꦟꦺꦤ ꦮꦴ ꦈꦥꦥꦴꦠꦁ ꦢꦛ꧀ꦜꦸꦁ ꦤ ꦱꦏ꧀ꦏꦺꦴꦠꦶ. ꦱꦺꦴ ‘‘ꦠꦠ꧀ꦡ ꦠꦠ꧀ꦡꦺꦮ ꦄꦠ꧀ꦠꦴ ꦈꦕ꧀ꦖꦶꦗ꧀ꦗꦠꦷ’’ꦠꦶ ꦈꦕ꧀ꦖꦺꦢꦢꦶꦛ꧀ꦜꦶꦁ ꦒꦟ꧀ꦲꦴꦠꦶ. ꦄꦭꦴꦨꦷ – ‘‘ꦏꦺꦴ ꦥꦫꦭꦺꦴꦏꦁ ꦗꦴꦤꦴꦠꦶ, ꦌꦠ꧀ꦠꦏꦺꦴ ꦗꦷꦮꦮꦶꦱꦪꦺꦴ, ꦪꦴꦮ ꦆꦤ꧀ꦢ꧀ꦫꦶꦪꦒꦺꦴꦕꦫꦺꦴ’’ꦠꦶ ꦄꦠ꧀ꦠꦤꦺꦴ ꦣꦷꦠꦸꦪꦴ ꦲꦠ꧀ꦡꦒ꧀ꦒꦟ꧀ꦲꦤꦏꦫꦴꦗꦴ ꦮꦶꦪ ꦏꦴꦩꦱꦸꦑꦒꦶꦢ꧀ꦣꦠꦴꦪ ꦮꦴ, ‘‘ꦪꦡꦴ ꦫꦸꦏ꧀ꦑꦥꦟ꧀ꦟꦴꦤꦶ ꦫꦸꦏ꧀ꦑꦠꦺꦴ ꦥꦠꦶꦠꦴꦤꦶ ꦤ ꦥꦛꦶꦱꦤ꧀ꦣꦶꦪꦤ꧀ꦠꦶ, ꦌꦮꦁ ꦱꦧ꧀ꦧꦺꦥꦶ ꦱꦠ꧀ꦠꦴ ꦄꦥ꧀ꦥꦛꦶꦱꦤ꧀ꦣꦶꦏꦩꦫꦟꦩꦺꦮ ꦒꦕ꧀ꦖꦤ꧀ꦠꦶ, ꦗꦭꦧꦸꦧ꧀ꦧꦸꦭ꦳ꦏꦹꦥꦩꦴ ꦱꦠ꧀ꦠꦴ’’ꦠꦶ ꦠꦏ꧀ꦏꦩꦠ꧀ꦠꦮꦱꦺꦤ ꦮꦴ ꦈꦕ꧀ꦖꦺꦢꦢꦶꦛ꧀ꦜꦶꦁ ꦒꦟ꧀ꦲꦴꦠꦶ. ꦠꦠ꧀ꦡ ꦪꦁ ꦲꦺꦛ꧀ꦜꦴ ꦮꦸꦠ꧀ꦠꦁ – ‘‘ꦩꦤꦸꦱ꧀ꦱꦠ꧀ꦠꦨꦴꦮꦺ ꦏꦴꦩꦴꦮꦕꦫꦢꦺꦮꦠ꧀ꦠꦨꦴꦮꦺ ꦫꦹꦥꦴꦮꦕꦫꦢꦺꦮꦠ꧀ꦠꦨꦴꦮꦺ ꦕꦠꦸꦧ꧀ꦧꦶꦣꦄꦫꦹꦥꦠ꧀ꦠꦨꦴꦮꦺ ꦕꦮꦶꦠ꧀ꦮꦴ ꦱꦠ꧀ꦠꦱ꧀ꦱ ꦈꦕ꧀ꦖꦺꦢꦥꦚ꧀ꦚꦴꦥꦤꦮꦱꦺꦤ ꦱꦠ꧀ꦠ ꦈꦕ꧀ꦖꦺꦢꦮꦴꦢꦴ ꦏꦡꦶꦠꦴ’’ꦠꦶ. ꦠꦠ꧀ꦡ ꦪꦸꦠ꧀ꦠꦁ ꦠꦴꦮ ꦥꦸꦫꦶꦩꦺꦱꦸ ꦠꦷꦱꦸ ꦮꦴꦢꦺꦱꦸ ‘‘ꦏꦴꦪꦱ꧀ꦱ ꦨꦺꦢꦴ’’ꦠꦶ ꦮꦸꦠ꧀ꦠꦁ; ꦥꦚ꧀ꦕꦮꦺꦴꦏꦴꦫꦨꦮꦥꦫꦶꦪꦴꦥꦤ꧀ꦤꦁ ꦄꦠ꧀ꦠꦨꦴꦮꦁ ꦄꦴꦫꦧ꧀ꦨ ꦥꦮꦠ꧀ꦠꦠ꧀ꦠꦴ ꦠꦺꦱꦁ ꦮꦴꦢꦴꦤꦁ, ꦤ ꦪꦸꦠ꧀ꦠꦁ ꦕꦠꦸꦮꦺꦴꦏꦴꦫꦨꦮꦥꦫꦶꦪꦴꦥꦤ꧀ꦤꦁ ꦄꦠ꧀ꦠꦨꦴꦮꦁ ꦤꦶꦱ꧀ꦱꦴꦪ ꦥꦮꦠ꧀ꦠꦺꦱꦸ ꦕꦠꦸꦠ꧀ꦡꦴꦢꦷꦱꦸ ꦕꦠꦹꦱꦸ ꦮꦴꦢꦺꦱꦸ, ‘‘ꦏꦴꦪꦱ꧀ꦱ ꦨꦺꦢꦴ’’ꦠꦶ ꦮꦸꦠ꧀ꦠꦁ. ꦤ ꦲꦶ ꦄꦫꦹꦥꦷꦤꦁ ꦏꦴꦪꦺꦴ ꦄꦠ꧀ꦡꦷꦠꦶ? ꦱꦕ꧀ꦕꦩꦺꦠꦁ, ꦫꦹꦥꦨꦮꦺ ꦥꦮꦠ꧀ꦠꦮꦺꦴꦲꦴꦫꦺꦤꦺꦮ ꦢꦶꦛ꧀ꦜꦶꦒꦠꦶꦏꦺꦴ ꦄꦫꦹꦥꦨꦮꦺꦥꦶ ꦏꦴꦪꦮꦺꦴꦲꦴꦫꦩꦴꦫꦺꦴꦥꦺꦠ꧀ꦮꦴ ꦄꦴꦲ ‘‘ꦏꦴꦪꦱ꧀ꦱ ꦨꦺꦢꦴ’’ꦠꦶ. ꦪꦡꦴ ꦢꦶꦛ꧀ꦜꦶꦒꦠꦶꦏꦺꦲꦶ ꦢꦶꦛ꧀ꦜꦶꦪꦺꦴ ꦥꦚ꧀ꦚꦠ꧀ꦠꦴ, ꦠꦡꦺꦮ ꦨꦒꦮꦴ ꦢꦱ꧀ꦱꦺꦱꦷꦠꦶ. ꦄꦫꦹꦥꦏꦴꦪꦨꦴꦮꦠꦺꦴ ꦮꦴ ꦦꦱ꧀ꦱꦴꦢꦶꦣꦩ꧀ꦩꦱꦩꦹꦲꦨꦹꦠꦺ ꦄꦫꦹꦥꦠ꧀ꦠꦨꦴꦮꦺ ꦏꦴꦪꦤꦶꦢ꧀ꦢꦺꦱꦺꦴ ꦢꦛ꧀ꦜꦧ꧀ꦧꦺꦴ.
ꦌꦠ꧀ꦡꦴꦲ – ‘‘ꦏꦴꦩꦴꦮꦕꦫꦢꦺꦮꦠ꧀ꦠꦨꦴꦮꦴꦢꦶꦤꦶꦫꦮꦱꦺꦱꦮꦶꦨꦮꦥꦠꦶꦛ꧀ꦜꦴꦥꦏꦴꦤꦁ ꦢꦸꦠꦶꦪꦮꦴꦢꦴꦢꦷꦤꦁ ꦪꦸꦠ꧀ꦠꦺꦴ ꦄꦥꦫꦤ꧀ꦠꦏꦥ꧀ꦥꦶꦏꦨꦴꦮꦺꦴ ꦄꦤꦴꦒꦠꦢ꧀ꦣꦮꦶꦱꦪꦠ꧀ꦠꦴ ꦠꦺꦱꦁ ꦮꦴꦢꦴꦤꦁ; ꦤ ꦥꦤ ꦢꦶꦛ꧀ꦜꦶꦒꦠꦶꦏ-ꦥꦕ꧀ꦕꦏ꧀ꦑꦨꦹꦠ-ꦩꦤꦸꦱ꧀ꦱꦠ꧀ꦠꦨꦴꦮ-ꦱꦩꦸꦕ꧀ꦖꦺꦢꦥꦠꦶꦛ꧀ꦜꦴꦥꦏꦱ꧀ꦱ ꦥꦜꦩꦮꦴꦢꦱ꧀ꦱ ꦥꦕ꧀ꦕꦸꦥ꧀ꦥꦤ꧀ꦤꦮꦶꦱꦪꦠ꧀ꦠꦴ’’ꦠꦶ. ꦪꦢꦶ ꦌꦮꦁ ꦪꦡꦴ ꦲꦶ ꦢꦸꦠꦶꦪꦴꦢꦶꦮꦴꦢꦴꦤꦁ, ꦥꦸꦫꦶꦩꦥꦸꦫꦶꦩꦮꦴꦢꦱꦔ꧀ꦒꦲꦶꦠꦱ꧀ꦱꦺꦮ ꦄꦠ꧀ꦠꦤꦺꦴ ꦈꦠ꧀ꦠꦫꦸꦠ꧀ꦠꦫꦨꦮꦺꦴꦥꦥꦠ꧀ꦠꦶꦪꦴ ꦱꦩꦸꦕ꧀ꦖꦺꦢꦤꦠꦺꦴ ꦪꦸꦗ꧀ꦗꦠꦶ ꦄꦥꦫꦤ꧀ꦠꦏꦥ꧀ꦥꦶꦏꦠꦴ, ꦠꦡꦴ ꦕ ‘‘ꦤꦺꦴ ꦕ ꦑꦺꦴ, ꦨꦺꦴ, ꦄꦪꦁ ꦄꦠ꧀ꦠꦴ ꦌꦠ꧀ꦠꦴꦮꦠꦴ ꦱꦩ꧀ꦩꦴ ꦱꦩꦸꦕ꧀ꦖꦶꦤ꧀ꦤꦺꦴ ꦲꦺꦴꦠꦷ’’ꦠꦶꦄꦴꦢꦶ ꦮꦸꦠ꧀ꦠꦁ. ꦌꦮꦁ ꦄꦤꦴꦒꦠꦱ꧀ꦱꦺꦮ ꦩꦤꦸꦱ꧀ꦱꦠ꧀ꦠꦨꦴꦮꦱꦩꦸꦕ꧀ꦖꦺꦢꦱ꧀ꦱ ꦄꦣꦶꦥ꧀ꦥꦺꦠꦠ꧀ꦠꦴ ꦥꦜꦩꦮꦴꦢꦱ꧀ꦱꦥꦶ ꦄꦥꦫꦤ꧀ꦠꦏꦥ꧀ꦥꦶꦏꦠꦴ ꦪꦸꦗ꧀ꦗꦠꦶ. ꦌꦮꦁ ꦱꦧ꧀ꦧꦱ꧀ꦱꦥꦶ ꦥꦸꦧ꧀ꦧꦤ꧀ꦠꦠꦺꦴ ꦄꦴꦒꦠꦱ꧀ꦱ ꦈꦕ꧀ꦖꦺꦢꦥꦚ꧀ꦚꦴꦥꦤꦮꦱꦺꦤ ꦆꦣ ꦥꦸꦧ꧀ꦧꦤ꧀ꦠꦏꦥ꧀ꦥꦶꦏꦺꦱꦸ ꦢꦺꦱꦤꦴ ꦒꦠꦴ. ꦌꦠꦺ ꦈꦕ꧀ꦖꦺꦢꦮꦴꦢꦴ ꦲꦺꦛ꧀ꦜꦴ ꦄꦥꦫꦤ꧀ꦠꦏꦥ꧀ꦥꦶꦏꦺꦱꦸ ꦢꦺꦱꦤꦴ ꦒꦠꦴ. ꦌꦠꦺ ꦈꦕ꧀ꦖꦺꦢꦮꦴꦢꦴ ꦲꦺꦛ꧀ꦜꦴ ꦄꦥꦫꦤ꧀ꦠꦏꦥ꧀ꦥꦶꦏꦺꦱꦸ ꦠꦠ꧀ꦡ ꦠꦠ꧀ꦡꦺꦮ ꦈꦕ꧀ꦖꦶꦗ꧀ꦗꦠꦶ, ꦤ ꦠꦠꦺꦴ ꦈꦢ꧀ꦣꦁ ꦥꦮꦠ꧀ꦠꦶ ꦄꦠ꧀ꦡꦷꦠꦶ ꦢꦱ꧀ꦱꦤꦠ꧀ꦡꦁ ꦮꦸꦠ꧀ꦠꦴ. ꦗꦭꦧꦸꦧ꧀ꦧꦸꦭ꦳ꦏꦹꦥꦩꦴ ꦲꦶ ꦱꦠ꧀ꦠꦴꦠꦶ ꦠꦱ꧀ꦱ ꦭꦢ꧀ꦣꦶ.
ꦆꦣꦴꦠꦶ ꦥꦸꦧ꧀ꦧꦤ꧀ꦠꦏꦥ꧀ꦥꦶꦏꦺꦱꦸ. ꦆꦣꦺꦮ ꦩꦤꦸꦱ꧀ꦱꦠ꧀ꦠꦨꦴꦮꦴꦢꦶꦏꦺ ꦈꦕ꧀ꦖꦶꦗ꧀ꦗꦠꦶ ꦮꦶꦤꦛ꧀ꦜꦮꦶꦤꦴꦱꦮꦱꦺꦤ. ꦌꦮꦁ ꦄꦤꦴꦒꦠꦺ ꦄꦤꦸꦥ꧀ꦥꦠ꧀ꦠꦶꦢꦱ꧀ꦱꦤꦥꦫꦴꦤꦁ ꦈꦕ꧀ꦖꦺꦢꦮꦴꦢꦴꦤꦁ ꦄꦥꦫꦤ꧀ꦠꦏꦥ꧀ꦥꦶꦏꦺꦱꦸ ꦒꦲꦟꦁ; ꦥꦸꦧ꧀ꦧꦤ꧀ꦠꦠꦺꦴ ꦥꦤ ꦄꦴꦒꦠꦱ꧀ꦱ ꦄꦠ꧀ꦠꦤꦺꦴ ꦆꦣꦺꦮ ꦈꦕ꧀ꦖꦺꦢꦢꦱ꧀ꦱꦤꦥꦫꦴꦤꦁ ꦥꦸꦧ꧀ꦧꦤ꧀ꦠꦏꦥ꧀ꦥꦶꦏꦺꦱꦸ ꦒꦲꦟꦁ. ꦆꦠꦺꦴ ꦥꦫꦁ ꦤ ꦒꦕ꧀ꦖꦠꦷꦠꦶ ꦥꦤ ꦆꦢꦁ ꦄꦠ꧀ꦡꦠꦺꦴ ꦄꦴꦥꦤ꧀ꦤꦱ꧀ꦱ ꦄꦠ꧀ꦡꦱ꧀ꦱ ꦢꦱ꧀ꦱꦤꦁ. ꦱꦠ꧀ꦠꦺꦱꦸ ꦱꦔ꧀ꦑꦴꦫꦺꦱꦸ ꦕ ꦌꦏꦕ꧀ꦕꦱꦱ꧀ꦱꦠꦤ꧀ꦠꦶ ꦥꦮꦠ꧀ꦠꦺꦴ ꦌꦏꦕ꧀ꦕꦱꦱ꧀ꦱꦠꦮꦴꦢꦺꦴ. ꦱꦺꦴ ꦥꦤ ꦧ꧀ꦫꦲ꧀ꦩꦏꦴꦪꦶꦏ-ꦑꦶꦝ꧀ꦝꦴꦥꦢꦺꦴꦱꦶꦏ-ꦩꦤꦺꦴꦥꦢꦺꦴꦱꦶꦏꦠ꧀ꦠꦨꦴꦮꦠꦺꦴ ꦕꦮꦶꦠ꧀ꦮꦴ ꦆꦣꦴꦒꦠꦴꦤꦁ ꦠꦏ꧀ꦏꦶꦤꦺꦴ ꦕ ꦈꦥ꧀ꦥꦗ꧀ꦗꦤꦮꦱꦺꦤ ꦕꦠꦸꦧ꧀ꦧꦶꦣꦺꦴꦠꦶ ꦄꦴꦲ ‘‘ꦕꦠ꧀ꦠꦴꦫꦺꦴ ꦌꦏꦕ꧀ꦕꦱꦱ꧀ꦱꦠꦮꦴꦢꦴ’’ꦠꦶ. ‘‘ꦱꦔ꧀ꦑꦴꦫꦺꦏꦕ꧀ꦕꦱꦱ꧀ꦱꦠꦶꦏꦴ’’ꦠꦶ ꦆꦢꦁ ꦠꦺꦲꦶ ꦱꦱ꧀ꦱꦠꦨꦴꦮꦺꦤ ꦒꦪ꧀ꦲꦩꦴꦤꦴꦤꦁ ꦣꦩ꧀ꦩꦴꦤꦁ ꦪꦡꦴꦱꦨꦴꦮꦢꦱ꧀ꦱꦤꦮꦱꦺꦤ ꦮꦸꦠ꧀ꦠꦁ, ꦤ ꦥꦤꦺꦏꦕ꧀ꦕꦱꦱ꧀ꦱꦠꦶꦏꦩꦠꦢꦱ꧀ꦱꦤꦮꦱꦺꦤ. ꦠꦱ꧀ꦱ ꦲꦶ ꦱꦱ꧀ꦱꦠꦴꦨꦶꦩꦠꦁ ꦄꦱꦔ꧀ꦑꦠꦩꦺꦮꦴꦠꦶ ꦭꦢ꧀ꦣꦶ. ꦠꦡꦴ ꦲꦶ ꦮꦸꦠ꧀ꦠꦁ (ꦢꦷ. ꦤꦶ. ꧑.꧔꧙) ꦧ꧀ꦫꦲ꧀ꦩꦗꦴꦭꦺ – ‘‘ꦕꦶꦠ꧀ꦠꦤ꧀ꦠꦶ ꦮꦴ ꦩꦤꦺꦴꦠꦶ ꦮꦴ ꦮꦶꦚ꧀ꦚꦴꦟꦤ꧀ꦠꦶ ꦮꦴ ꦄꦪꦁ ꦄꦠ꧀ꦠꦴ ꦤꦶꦕ꧀ꦕꦺꦴ ꦣꦸꦮꦺꦴ ꦱꦱ꧀ꦱꦠꦺꦴ ꦄꦮꦶꦥꦫꦶꦟꦴꦩꦣꦩ꧀ꦩꦺꦴ ꦱꦱ꧀ꦱꦠꦶꦱꦩꦁ ꦠꦡꦺꦮ ꦜꦱ꧀ꦱꦠꦷ’’ꦠꦶ. ꦤ ꦲꦶ ꦪꦱ꧀ꦱ ꦨꦴꦮꦱ꧀ꦱ ꦥꦕ꧀ꦕꦪꦺꦲꦶ ꦄꦨꦶꦱꦔ꧀ꦑꦠꦨꦴꦮꦁ ꦥꦛꦶꦗꦴꦤꦴꦠꦶ; ꦠꦱ꧀ꦱꦺꦮ ꦤꦶꦕ꧀ꦕꦣꦸꦮꦴꦢꦶꦨꦴꦮꦺꦴ ꦄꦤꦸꦩ꧀ꦩꦠ꧀ꦠꦏꦺꦤ ꦤ ꦱꦏ꧀ꦏꦴ ꦥꦛꦶꦚ꧀ꦚꦴꦠꦸꦁ. ꦌꦠꦺꦤ, ‘‘ꦈꦥ꧀ꦥꦴꦢꦮꦪꦣꦸꦮꦠꦴꦪꦸꦠ꧀ꦠꦨꦴꦮꦴ ꦱꦶꦪꦴ ꦤꦶꦕ꧀ꦕꦴ, ꦱꦶꦪꦴ ꦄꦤꦶꦕ꧀ꦕꦴ, ꦱꦶꦪꦴ ꦤ ꦮꦠ꧀ꦠꦧ꧀ꦧꦴ’’ꦠꦶꦄꦴꦢꦶꦤꦴ ꦥꦮꦠ꧀ꦠꦱ꧀ꦱ ꦱꦠ꧀ꦠꦨꦔ꧀ꦒꦮꦴꦢꦱ꧀ꦱ ꦄꦪꦸꦠ꧀ꦠꦠꦴ ꦮꦶꦨꦴꦮꦶꦠꦴ ꦲꦺꦴꦠꦶ.
ꦠꦠ꧀ꦡꦴꦪꦁ (ꦢꦷ. ꦤꦶ. ꦛꦷ. ꧑.꧓꧘) ꦄꦪꦸꦠ꧀ꦠꦠꦴꦮꦶꦨꦴꦮꦤꦴ – ꦪꦢꦶ, ‘‘ꦪꦺꦤ ꦱꦨꦴꦮꦺꦤ ꦪꦺꦴ ꦣꦩ꧀ꦩꦺꦴ ꦄꦠ꧀ꦡꦷꦠꦶ ꦮꦸꦕ꧀ꦕꦠꦶ, ꦠꦺꦤꦺꦮ ꦱꦨꦴꦮꦺꦤ ꦱꦺꦴ ꦣꦩ꧀ꦩꦺꦴ ꦤꦠ꧀ꦡꦷ’’ꦠꦶꦄꦴꦢꦶꦤꦴ ꦮꦸꦕ꧀ꦕꦺꦪ꧀ꦪ, ꦱꦶꦪꦴ ꦄꦤꦺꦏꦤ꧀ꦠꦮꦴꦢꦺꦴ; ꦄꦡ ꦄꦚ꧀ꦚꦺꦤ, ꦱꦶꦪꦴ ꦤ ꦄꦤꦺꦏꦤ꧀ꦠꦮꦴꦢꦺꦴ; ꦤ ꦕꦺꦠ꧀ꦡ ꦢꦺꦱꦤ꧀ꦠꦫꦴꦢꦶꦱꦩ꧀ꦧꦢ꧀ꦣꦨꦴꦮꦺꦴ ꦪꦸꦠ꧀ꦠꦺꦴ ꦮꦠ꧀ꦠꦸꦁ ꦠꦱ꧀ꦱ ꦱꦧ꧀ꦧꦭꦺꦴꦏꦱꦶꦢ꧀ꦣꦠ꧀ꦠꦴ ꦮꦶꦮꦴꦢꦴꦨꦴꦮꦠꦺꦴ. ꦪꦺ ꦥꦤ ꦮꦢꦤ꧀ꦠꦶ – ‘‘ꦪꦡꦴ ꦱꦸꦮꦟ꧀ꦟꦓꦛꦺ ꦩꦏꦸꦛꦺ ꦏꦠꦺ ꦓꦛꦨꦴꦮꦺꦴ ꦤꦱ꧀ꦱꦠꦶ, ꦩꦏꦸꦛꦨꦴꦮꦺꦴ ꦈꦥ꧀ꦥꦗ꧀ꦗꦠꦶ, ꦱꦸꦮꦟ꧀ꦟꦨꦴꦮꦺꦴ ꦠꦶꦛ꧀ꦜꦠꦶꦪꦺꦮ, ꦌꦮꦁ ꦱꦧ꧀ꦧꦨꦴꦮꦴꦤꦁ ꦏꦺꦴꦕꦶ ꦣꦩ꧀ꦩꦺꦴ ꦤꦱ꧀ꦱꦠꦶ, ꦏꦺꦴꦕꦶ ꦈꦥ꧀ꦥꦗ꧀ꦗꦠꦶ, ꦱꦨꦴꦮꦺꦴ ꦥꦤ ꦠꦶꦛ꧀ꦜꦠꦷ’’ꦠꦶ. ꦠꦺ ꦮꦠ꧀ꦠꦧ꧀ꦧꦴ – ꦏꦶꦁ ꦠꦁ ꦱꦸꦮꦟ꧀ꦟꦁ, ꦪꦁ ꦓꦛꦺ ꦩꦏꦸꦛꦺ ꦕ ꦄꦮꦛ꧀ꦜꦶꦠꦁ? ꦪꦢꦶ ꦫꦹꦥꦴꦢꦶ, ꦱꦺꦴ ꦱꦢ꧀ꦢꦺꦴ ꦮꦶꦪ ꦄꦤꦶꦕ꧀ꦕꦺꦴ, ꦄꦡ ꦫꦹꦥꦴꦢꦶꦱꦩꦹꦲꦺꦴ, ꦱꦩꦹꦲꦺꦴ ꦤꦴꦩ ꦱꦩ꧀ꦩꦸꦠꦶꦩꦠ꧀ꦠꦁ. ꦠꦱ꧀ꦱ ꦮꦺꦴꦲꦴꦫꦩꦠ꧀ꦠꦱ꧀ꦱ ꦄꦠ꧀ꦡꦶꦠꦴ ꦤꦠ꧀ꦡꦶꦠꦴ ꦤꦶꦕ꧀ꦕꦠꦴ ꦮꦴ ꦤ ꦮꦠ꧀ꦠꦧ꧀ꦧꦴ. ꦠꦱ꧀ꦱ ꦥꦫꦩꦠ꧀ꦡꦱꦨꦴꦮꦺꦤ ꦄꦤꦸꦥꦭꦧ꧀ꦨꦤꦠꦺꦴꦠꦶ ꦄꦤꦺꦏꦤ꧀ꦠꦮꦴꦢꦺꦴ ꦤ ꦱꦶꦪꦴ. ꦣꦩ꧀ꦩꦴ ꦕ ꦣꦩ꧀ꦩꦶꦠꦺꦴ ꦄꦚ꧀ꦚꦺ ꦮꦴ ꦱꦶꦪꦸꦁ ꦄꦤꦚ꧀ꦚꦺ ꦮꦴ. ꦪꦢꦶ ꦄꦚ꧀ꦚꦺ, ꦤ ꦠꦺꦱꦁ ꦄꦤꦶꦕ꧀ꦕꦠꦴꦪ ꦣꦩ꧀ꦩꦷ ꦄꦤꦶꦕ꧀ꦕꦺꦴ ꦄꦚ꧀ꦚꦠ꧀ꦠꦴ. ꦤ ꦲꦶ ꦫꦹꦥꦴ ꦕꦏ꧀ꦑꦸꦮꦶꦚ꧀ꦚꦴꦟꦁ ꦄꦚ꧀ꦚꦠ꧀ꦠꦴ, ꦤ ꦕ ꦫꦹꦥꦺ ꦕꦏ꧀ꦑꦸꦮꦶꦚ꧀ꦚꦴꦟꦱꦢ꧀ꦢꦺꦴ ꦲꦺꦴꦠꦶ; ꦏꦶꦚ꧀ꦕ ꦣꦩ꧀ꦩꦏꦥ꧀ꦥꦤꦴꦥꦶ ꦤꦶꦫꦠ꧀ꦡꦶꦏꦴ ꦱꦶꦪꦴ ꦣꦩ꧀ꦩꦶꦤꦺꦴ ꦤꦶꦕ꧀ꦕꦴꦤꦶꦕ꧀ꦕꦠꦴꦪ ꦄꦱꦶꦗ꧀ꦙꦤꦠꦺꦴ ꦄꦡ ꦄꦤꦚ꧀ꦚꦺ; ꦈꦥ꧀ꦥꦴꦢꦮꦶꦤꦴꦱꦮꦤ꧀ꦠꦺꦲꦶ ꦄꦤꦚ꧀ꦚꦱ꧀ꦱ ꦣꦩ꧀ꦩꦶꦤꦺꦴ ꦠꦺꦱꦁ ꦮꦶꦪ ꦈꦥ꧀ꦥꦴꦢꦮꦶꦤꦴꦱꦱꦧ꧀ꦨꦴꦮꦠꦺꦴ ꦏꦸꦠꦺꦴ ꦤꦶꦕ꧀ꦕꦠꦴꦮꦏꦴꦱꦺꦴ, ꦠꦺꦱꦩ꧀ꦥꦶ ꦮꦴ ꦣꦩ꧀ꦩꦶꦤꦺꦴ ꦮꦶꦪ ꦤꦶꦕ꧀ꦕꦠꦴꦥꦠ꧀ꦠꦶ ꦱꦶꦪꦴ. ꦄꦥꦶꦕ ꦤꦶꦕ꧀ꦕꦴꦤꦶꦕ꧀ꦕꦤꦮꦠ꧀ꦠꦧ꧀ꦧꦫꦹꦥꦺꦴ ꦄꦠ꧀ꦠꦴ ꦕ ꦭꦺꦴꦏꦺꦴ ꦕ ꦥꦫꦩꦠ꧀ꦡꦠꦺꦴ ꦮꦶꦗ꧀ꦗꦩꦴꦤꦠꦴꦥꦛꦶꦗꦴꦤꦤꦠꦺꦴ ꦪꦡꦴ ꦤꦶꦕ꧀ꦕꦴꦢꦷꦤꦁ ꦄꦚ꧀ꦚꦠꦫꦁ ꦫꦹꦥꦁ, ꦪꦡꦴ ꦮꦴ ꦢꦷꦥꦴꦢꦪꦺꦴ. ꦤ ꦲꦶ ꦢꦷꦥꦴꦢꦷꦤꦁ ꦈꦢꦪꦧ꧀ꦧꦪꦱꦨꦴꦮꦴꦤꦁ ꦤꦶꦕ꧀ꦕꦴꦤꦶꦕ꧀ꦕꦤꦮꦠ꧀ꦠꦧ꧀ꦧꦱꦨꦴꦮꦠꦴ ꦱꦏ꧀ꦏꦴ ꦮꦠ꧀ꦠꦸꦁ ꦗꦷꦮꦱ꧀ꦱ ꦤꦶꦕ꧀ꦕꦴꦢꦷꦱꦸ ꦄꦚ꧀ꦚꦠꦫꦁ ꦫꦹꦥꦁ ꦮꦶꦪꦴꦠꦶ ꦌꦮꦁ ꦱꦠ꧀ꦠꦨꦔ꧀ꦒꦱ꧀ꦱ ꦮꦶꦪ ꦱꦺꦱꦨꦔ꧀ꦒꦴꦤꦩ꧀ꦥꦶ ꦄꦱꦩ꧀ꦨꦮꦺꦴꦪꦺꦮꦴꦠꦶ ꦱꦠ꧀ꦠꦨꦔ꧀ꦒꦮꦴꦢꦱ꧀ꦱ ꦄꦪꦸꦠ꧀ꦠꦠꦴ ꦮꦺꦢꦶꦠꦧ꧀ꦧꦴꦠꦶ.
ꦌꦠ꧀ꦡ ꦕ, ‘‘ꦆꦱ꧀ꦱꦫꦺꦴ ꦤꦶꦕ꧀ꦕꦺꦴ, ꦄꦚ꧀ꦚꦺ ꦱꦠ꧀ꦠꦴ ꦄꦤꦶꦕ꧀ꦕꦴ’’ꦠꦶ ꦌꦮꦁ ꦥꦮꦠ꧀ꦠꦮꦴꦢꦴ ꦱꦠ꧀ꦠꦺꦏꦕ꧀ꦕꦱꦱ꧀ꦱꦠꦮꦴꦢꦴ; ꦱꦺꦪ꧀ꦪꦡꦴꦥꦶ ꦆꦱ꧀ꦱꦫꦮꦴꦢꦴꦢꦪꦺꦴ. ‘‘ꦥꦫꦩꦴꦟꦮꦺꦴ ꦤꦶꦕ꧀ꦕꦴ ꦣꦸꦮꦴ, ꦢ꧀ꦮꦶꦄꦟꦸꦏꦴꦢꦪꦺꦴ ꦄꦤꦶꦕ꧀ꦕꦴ’’ꦠꦶ ꦌꦮꦁ ꦥꦮꦠ꧀ꦠꦮꦴꦢꦴ ꦱꦔ꧀ꦑꦴꦫꦺꦏꦕ꧀ꦕꦱꦱ꧀ꦱꦠꦮꦴꦢꦴ; ꦱꦺꦪ꧀ꦪꦡꦴꦥꦶ ꦏꦟꦴꦢꦮꦴꦢꦴꦢꦪꦺꦴ. ꦤꦤꦸ ꦕ ‘‘ꦌꦏꦕ꧀ꦕꦺ ꦣꦩ꧀ꦩꦴ ꦱꦱ꧀ꦱꦠꦴ, ꦌꦏꦕ꧀ꦕꦺ ꦄꦱꦱ꧀ꦱꦠꦴ’’ꦠꦶ; ꦌꦠꦱ꧀ꦩꦶꦁ ꦮꦴꦢꦺ ꦕꦏ꧀ꦑꦴꦢꦷꦤꦁ ꦄꦱꦱ꧀ꦱꦠꦠꦴꦱꦤ꧀ꦤꦶꦛ꧀ꦜꦴꦤꦁ ꦪꦡꦴꦱꦨꦴꦮꦴꦮꦧꦺꦴꦣꦺꦴ ꦌꦮ, ꦠꦪꦶꦢꦁ ꦏꦡꦁ ꦩꦶꦕ꧀ꦖꦴꦢꦱ꧀ꦱꦤꦤ꧀ꦠꦶ, ꦏꦺꦴ ꦌꦮꦩꦴꦲ – ‘‘ꦕꦏ꧀ꦑꦴꦢꦷꦤꦁ ꦄꦱꦱ꧀ꦱꦠꦨꦴꦮꦱꦤ꧀ꦤꦶꦛ꧀ꦜꦴꦤꦁ ꦩꦶꦕ꧀ꦖꦴꦢꦱ꧀ꦱꦤ’’ꦤ꧀ꦠꦶ? ꦄꦱꦱ꧀ꦱꦠꦺꦱꦸꦪꦺꦮ ꦥꦤ ꦏꦺꦱꦚ꧀ꦕꦶ ꦣꦩ꧀ꦩꦴꦤꦁ ꦱꦱ꧀ꦱꦠꦨꦴꦮꦴꦨꦶꦤꦶꦮꦺꦱꦺꦴ ꦆꦣ ꦩꦶꦕ꧀ꦖꦴꦢꦱ꧀ꦱꦤꦁ; ꦠꦺꦤ ꦥꦤ ꦌꦏꦮꦴꦫꦺ ꦥꦮꦠ꧀ꦠꦩꦴꦤꦺꦤ ꦕꦏ꧀ꦑꦴꦢꦷꦤꦁ ꦄꦱꦱ꧀ꦱꦠꦨꦴꦮꦴꦮꦧꦺꦴꦣꦺꦴ ꦮꦶꦢꦹꦱꦶꦠꦺꦴ ꦱꦁꦱꦛ꧀ꦜꦨꦴꦮꦠꦺꦴ; ꦮꦶꦱꦱꦁꦱꦛ꧀ꦜꦺꦴ ꦮꦶꦪ ꦱꦥ꧀ꦥꦶꦩꦟ꧀ꦝꦺꦴ ꦱꦏꦶꦕ꧀ꦕꦏꦴꦫꦟꦴꦱꦩꦠ꧀ꦠꦠꦴꦪ ꦱꦩ꧀ꦩꦴꦢꦱ꧀ꦱꦤꦥꦏ꧀ꦑꦺ ꦜꦥꦺꦠꦧ꧀ꦧꦠꦁ ꦤꦴꦫꦲꦠꦶ. ꦄꦡ ꦮꦴ ꦄꦱꦱ꧀ꦱꦠꦨꦴꦮꦺꦤ ꦤꦶꦕ꧀ꦖꦶꦠꦴꦥꦶ ꦕꦏ꧀ꦑꦸꦄꦴꦢꦪꦺꦴ ꦱꦩꦴꦫꦺꦴꦥꦶꦠꦗꦷꦮꦱꦨꦴꦮꦴ ꦌꦮ ꦢꦶꦛ꧀ꦜꦶꦒꦠꦶ ꦏꦺꦲꦶ ꦒꦪ꧀ꦲꦤ꧀ꦠꦷꦠꦶ ꦠꦢꦮꦧꦺꦴꦣꦱ꧀ꦱ ꦩꦶꦕ꧀ꦖꦴꦢꦱ꧀ꦱꦤꦨꦴꦮꦺꦴ ꦤ ꦱꦏ꧀ꦏꦴ ꦤꦶꦮꦴꦫꦺꦠꦸꦁ. ꦠꦡꦴ ꦲꦶ ꦮꦸꦠ꧀ꦠꦁ ꦧ꧀ꦫꦲ꧀ꦩꦗꦴꦭꦺ (ꦢꦷ. ꦤꦶ. ꧑.꧔꧙) – ‘‘ꦕꦏ꧀ꦑꦸꦤ꧀ꦠꦶ ꦮꦴ…ꦥꦺ… ꦏꦴꦪꦺꦴꦠꦶ ꦮꦴ ꦄꦪꦁ ꦩꦺ ꦄꦠ꧀ꦠꦴ’’ꦠꦶꦄꦴꦢꦶ. ꦌꦮꦚ꧀ꦕ ꦏꦠ꧀ꦮꦴ ꦄꦱꦔ꧀ꦑꦠꦴꦪ ꦱꦔ꧀ꦑꦠꦴꦪ ꦕ ꦣꦴꦠꦸꦪꦴ ꦮꦱꦺꦤ ꦪꦡꦴꦏ꧀ꦏꦩꦁ ꦌꦏꦕ꧀ꦕꦺ ꦣꦩ꧀ꦩꦴ ꦱꦱ꧀ꦱꦠꦴ; ꦌꦏꦕ꧀ꦕꦺ ꦄꦱꦱ꧀ꦱꦠꦴꦠꦶ ꦌꦮꦁ ꦥꦮꦠ꧀ꦠꦺꦴ ꦮꦶꦨꦗ꧀ꦗꦮꦴꦢꦺꦴꦥꦶ ꦌꦏꦕ꧀ꦕꦱꦱ꧀ꦱꦠꦮꦴꦢꦺꦴ ꦄꦴꦥꦗ꧀ꦗꦠꦷꦠꦶ ꦌꦮꦁꦥꦏꦴꦫꦴ ꦕꦺꦴꦢꦤꦴ ꦄꦤꦺꦴꦏꦴꦱꦴ ꦲꦺꦴꦠꦶ ꦄꦮꦶꦥꦫꦷꦠꦣꦩ꧀ꦩꦱꦨꦴꦮꦱꦩ꧀ꦥꦛꦶꦥꦠ꧀ꦠꦶꦨꦴꦮꦠꦺꦴ.
ꦤ ꦩꦫꦠꦷꦠꦶ ꦄꦩꦫꦴ. ꦏꦴ ꦱꦴ? ‘‘ꦌꦮꦤ꧀ꦠꦶꦥꦶ ꦩꦺ ꦤꦺꦴ’’ꦠꦶꦄꦴꦢꦶꦤꦴ (ꦢꦷ. ꦤꦶ. ꧑.꧖꧒) ꦤꦪꦺꦤ ꦥꦫꦶꦪꦤ꧀ꦠꦫꦲꦶꦠꦴ ꦢꦶꦛ꧀ꦜꦶꦒꦠꦶꦏꦱ꧀ꦱ ꦢꦶꦛ꧀ꦜꦶ ꦕ ꦮꦴꦕꦴ ꦕ, ꦄꦩꦫꦴꦪ ꦢꦶꦛ꧀ꦜꦶꦪꦴ ꦮꦴꦕꦴꦪ ꦮꦶꦮꦶꦣꦺꦴ ꦑꦺꦥꦺꦴꦠꦶ ꦄꦩꦫꦴꦮꦶꦏ꧀ꦑꦺꦥꦺꦴ. ꦱꦺꦴ ꦌꦠꦱ꧀ꦱ ꦄꦠ꧀ꦡꦷꦠꦶ ꦄꦩꦫꦴꦮꦶꦏ꧀ꦑꦺꦥꦺꦴ. ꦄꦡ ꦮꦴ ꦄꦩꦫꦴꦠꦶ ꦌꦏꦴ ꦩꦕ꧀ꦖꦗꦴꦠꦶ, ꦱꦴ ꦈꦩ꧀ꦩꦸꦗ꧀ꦗꦤꦤꦶꦩ꧀ꦩꦸꦗ꧀ꦗꦤꦴꦢꦶꦮꦱꦺꦤ ꦈꦢꦏꦺ ꦱꦤ꧀ꦣꦴꦮꦩꦴꦤꦴ ꦒꦴꦲꦁ ꦤ ꦒꦕ꧀ꦖꦠꦶ; ꦌꦮꦩꦺꦮꦁ ꦄꦪꦩ꧀ꦥꦶ ꦮꦴꦢꦺꦴ ꦆꦠꦺꦴ ꦕꦶꦠꦺꦴ ꦕ ꦱꦤ꧀ꦣꦴꦮꦠꦶ, ꦒꦴꦲꦁ ꦤꦴꦒꦕ꧀ꦖꦠꦷꦠꦶ ꦄꦩꦫꦴꦮꦶꦏ꧀ꦑꦺꦥꦺꦴ, ꦱꦺꦴ ꦌꦮ ꦄꦩꦫꦴꦮꦶꦏ꧀ꦑꦺꦥꦶꦏꦺꦴ. ꦱ꧀ꦮꦴꦪꦁ ꦮꦴꦢꦺꦴ ꦩꦸꦱꦴꦮꦴꦢꦄꦤꦸꦪꦺꦴꦒꦖꦤ꧀ꦢꦫꦴꦒꦩꦺꦴꦲꦲꦺꦠꦸꦏꦠꦴꦪ ꦕꦠꦸꦣꦴ ꦥꦮꦠ꧀ꦠꦺꦴꦠꦶ ꦄꦴꦲ – ‘‘ꦕꦠ꧀ꦠꦴꦫꦺꦴ ꦄꦩꦫꦴꦮꦶꦏ꧀ꦑꦺꦥꦶꦏꦴ ꦮꦸꦠ꧀ꦠꦴ’’ꦠꦶ. ꦤꦤꦸ ꦕꦺꦠ꧀ꦡ (ꦢꦷ. ꦤꦶ. ꦛꦷ. ꧑.꧖꧕-꧖꧖) ꦕꦠꦸꦧ꧀ꦧꦶꦣꦺꦴꦥꦶ ꦄꦩꦫꦴꦮꦶꦏ꧀ꦑꦺꦥꦶꦏꦺꦴ ꦏꦸꦱꦭꦴꦢꦶꦏꦺ ꦣꦩ꧀ꦩꦺ ꦥꦫꦭꦺꦴꦏꦠ꧀ꦠꦶꦏꦴꦢꦷꦤꦶ ꦕ ꦪꦡꦴꦨꦹꦠꦁ ꦄꦤꦮꦧꦸꦗ꧀ꦙꦩꦴꦤꦺꦴ, ꦠꦠ꧀ꦡ ꦠꦠ꧀ꦡ ꦥꦚ꧀ꦲꦁ ꦥꦸꦛ꧀ꦜꦺꦴ ꦥꦸꦕ꧀ꦖꦴꦪ ꦮꦶꦏ꧀ꦑꦺꦥꦤꦩꦠ꧀ꦠꦁ ꦄꦴꦥꦗ꧀ꦗꦠꦷꦠꦶ ꦠꦱ꧀ꦱ ꦏꦡꦁ ꦢꦶꦛ꧀ꦜꦶꦒꦠꦶꦏꦨꦴꦮꦺꦴ. ꦤ ꦲꦶ ꦄꦮꦠ꧀ꦠꦸꦏꦴꦩꦱ꧀ꦱ ꦮꦶꦪ ꦥꦸꦕ꧀ꦖꦶꦠꦩꦠ꧀ꦡꦁ ꦄꦗꦴꦤꦤ꧀ꦠꦱ꧀ꦱ ꦮꦶꦏ꧀ꦑꦺꦥꦏꦫꦟꦩꦠ꧀ꦠꦺꦤ ꦢꦶꦛ꧀ꦜꦶꦒꦠꦶꦏꦠꦴ ꦪꦸꦠ꧀ꦠꦴꦠꦶ? ꦤ ꦲꦺꦮꦁ ꦥꦸꦕ꧀ꦖꦴꦮꦶꦏ꧀ꦑꦺꦥꦏꦫꦟꦩꦠ꧀ꦠꦺꦤ ꦠꦱ꧀ꦱ ꦢꦶꦛ꧀ꦜꦶꦒꦠꦶꦏꦠꦴ ꦆꦕ꧀ꦖꦶꦠꦴ, ꦄꦡ ꦑꦺꦴ ꦩꦶꦕ꧀ꦖꦴꦨꦶꦤꦶꦮꦺꦱꦺꦤ. ꦱꦱ꧀ꦱꦠꦮꦱꦺꦤ ꦩꦶꦕ꧀ꦖꦴꦨꦶꦤꦶꦮꦶꦛ꧀ꦜꦺꦴꦪꦺꦮ ꦲꦶ ꦩꦤ꧀ꦢꦧꦸꦢ꧀ꦣꦶꦠꦴꦪ ꦏꦸꦱꦭꦴꦢꦶꦣꦩ꧀ꦩꦺ ꦥꦫꦭꦺꦴꦏꦠ꧀ꦠꦶꦏꦴꦢꦷꦤꦶ ꦕ, ꦪꦴꦡꦴꦮꦠꦺꦴ ꦄꦥ꧀ꦥꦛꦶꦥꦗ꧀ꦗꦩꦴꦤꦺꦴ ꦄꦠ꧀ꦠꦤꦴ ꦄꦮꦶꦚ꧀ꦚꦴꦠꦱ꧀ꦱ ꦄꦠ꧀ꦡꦱ꧀ꦱ ꦥꦫꦁ ꦮꦶꦚ꧀ꦚꦴꦥꦺꦠꦸꦁ ꦄꦱꦩꦠ꧀ꦡꦠꦴꦪ ꦩꦸꦱꦴꦮꦴꦢꦴꦢꦶꦨꦪꦺꦤ ꦕ ꦮꦶꦏ꧀ꦑꦺꦥꦁ ꦄꦴꦥꦗ꧀ꦗꦠꦷꦠꦶ. ꦠꦡꦴ ꦲꦶꦱ꧀ꦱ ꦮꦴꦢꦱ꧀ꦱ ꦱꦱ꧀ꦱꦠꦢꦶꦛ꧀ꦜꦶꦱꦔ꧀ꦒꦲꦺꦴ ꦮꦸꦠ꧀ꦠꦺꦴ. ꦄꦡ ꦮꦴ ꦥꦸꦚ꧀ꦚꦥꦴꦥꦴꦤꦁ, ꦠꦧ꧀ꦧꦶꦥꦴꦏꦴꦤꦚ꧀ꦕ ꦄꦤꦮꦧꦺꦴꦣꦺꦤ, ꦄꦱꦢ꧀ꦢꦲꦤꦺꦤ ꦕ, ‘‘ꦠꦧ꧀ꦧꦶꦱꦪꦴꦪ ꦥꦸꦕ꧀ꦖꦴꦪ ꦮꦶꦏ꧀ꦑꦺꦥꦏꦫꦟꦁꦪꦺꦮ ꦪꦸꦠ꧀ꦠꦁ ꦱꦸꦤ꧀ꦢꦫꦚ꧀ꦕꦴ’’ꦠꦶ, ꦑꦤ꧀ꦠꦶꦁ ꦫꦸꦕꦶꦁ ꦈꦥ꧀ꦥꦴꦢꦺꦠ꧀ꦮꦴ ꦄꦨꦶꦤꦶꦮꦶꦱꦤ꧀ꦠꦱ꧀ꦱ ꦈꦥ꧀ꦥꦤ꧀ꦤꦴ ꦮꦶꦱꦸꦁꦪꦺꦮꦺꦏꦴ ꦌꦱꦴ ꦢꦶꦛ꧀ꦜꦶ ꦱꦠ꧀ꦠꦨꦔ꧀ꦒꦢꦶꦛ꧀ꦜꦶ ꦮꦶꦪꦴꦠꦶ ꦢꦛ꧀ꦜꦧ꧀ꦧꦴ. ꦠꦡꦴ ꦕꦺꦮ ꦮꦸꦠ꧀ꦠꦁ – ‘‘ꦥꦫꦶꦪꦤ꧀ꦠꦫꦲꦶꦠꦴ ꦢꦶꦛ꧀ꦜꦶꦒꦠꦶꦏꦱ꧀ꦱ ꦢꦶꦛ꧀ꦜꦶ ꦕꦺꦮ ꦮꦴꦕꦴ ꦕꦴ’’ꦠꦶ (ꦢꦷ. ꦤꦶ. ꦄꦛ꧀ꦜ. ꧑.꧖꧑). ꦏꦡꦁ ꦥꦤꦱ꧀ꦱꦴ ꦱꦱ꧀ꦱꦠꦢꦶꦛ꧀ꦜꦶꦱꦔ꧀ꦒꦲꦺꦴ? ꦈꦕ꧀ꦖꦺꦢꦮꦱꦺꦤ ꦄꦤꦨꦶꦤꦶꦮꦺꦱꦠꦺꦴ. ‘‘ꦤꦠ꧀ꦡꦶ ꦏꦺꦴꦕꦶ ꦣꦩ꧀ꦩꦴꦤꦁ ꦪꦡꦴꦨꦹꦠꦮꦺꦢꦷ ꦮꦶꦮꦴꦢꦧꦲꦸꦭꦠ꧀ꦠꦴ ꦭꦺꦴꦏꦱ꧀ꦱ; ‘ꦌꦮꦩꦺꦮ’ꦤ꧀ꦠꦶ ꦥꦤ ꦱꦢ꧀ꦢꦤ꧀ꦠꦫꦺꦤ ꦣꦩ꧀ꦩꦺ ꦤꦶꦗ꧀ꦙꦴꦤꦤꦴ ꦄꦤꦴꦢꦶꦏꦴꦭꦶꦏꦴ ꦭꦺꦴꦏꦺ’’ꦠꦶ ꦒꦴꦲꦮꦱꦺꦤ ꦱꦱ꧀ꦱꦠꦭꦺꦱꦺꦴꦥꦺꦠ꧀ꦡ ꦭꦧ꧀ꦨꦠꦶꦪꦺꦮ.
ꦄꦩꦠꦶ ꦒꦕ꧀ꦖꦠꦶ ꦌꦠ꧀ꦡ ꦱꦨꦴꦮꦺꦴ ꦎꦱꦴꦤꦤ꧀ꦠꦶ ꦄꦤ꧀ꦠꦺꦴ, ꦩꦫꦶꦪꦴꦢꦺꦴ, ꦱꦺꦴ ꦌꦠꦱ꧀ꦱ ꦄꦠ꧀ꦡꦷꦠꦶ ꦄꦤ꧀ꦠꦮꦴ. ꦠꦺꦤꦴꦲ ‘‘ꦱꦥꦫꦶꦪꦤ꧀ꦠꦺꦴ’’ꦠꦶ. ꦄꦮꦝ꧀ꦞꦶꦠꦏꦱꦶꦟꦱ꧀ꦱ ꦥꦸꦒ꧀ꦒꦭꦱ꧀ꦱ ꦌꦮꦁ ꦲꦺꦴꦠꦷꦠꦶ ꦪꦺꦴꦗꦤꦴ. ꦢꦸꦠꦶꦪꦮꦴꦢꦺꦴ ‘‘ꦄꦤꦤ꧀ꦠꦮꦴ ꦭꦺꦴꦏꦺꦴ’’ꦠꦶ ꦮꦴꦢꦺꦴ. ꦠꦠꦶꦪꦮꦴꦢꦺꦴ ‘‘ꦄꦤ꧀ꦠꦮꦴ ꦕ ꦄꦤꦤ꧀ꦠꦮꦴ ꦕꦴ’’ꦠꦶ ꦮꦴꦢꦺꦴ. ꦕꦠꦸꦠ꧀ꦡꦮꦴꦢꦺꦴ ‘‘ꦤꦺꦮꦤ꧀ꦠꦮꦴ ꦤꦴꦤꦤ꧀ꦠꦮꦴ’’ꦠꦶ ꦮꦴꦢꦺꦴ. ꦌꦠꦺ ꦌꦮ ꦕꦠ꧀ꦠꦴꦫꦺꦴ ꦮꦴꦢꦶꦤꦺꦴ ꦱꦤ꧀ꦣꦴꦪ ꦧ꧀ꦫꦲ꧀ꦩꦗꦴꦭꦺ (ꦢꦷ. ꦤꦶ. ꧑.꧕꧓) – ‘‘ꦄꦤ꧀ꦠꦴꦤꦤ꧀ꦠꦶꦏꦴ ꦄꦤ꧀ꦠꦴꦤꦤ꧀ꦠꦁ ꦭꦺꦴꦏꦱ꧀ꦱ ꦥꦚ꧀ꦚꦥꦺꦤ꧀ꦠꦶ ꦕꦠꦹꦲꦶ ꦮꦠ꧀ꦡꦹꦲꦷ’’ꦠꦶ ꦮꦸꦠ꧀ꦠꦁ. ꦠꦠ꧀ꦡ (ꦢꦷ. ꦤꦶ. ꦛꦷ. ꧑.꧕꧓) ꦪꦸꦠ꧀ꦠꦁ ꦠꦴꦮ ꦥꦸꦫꦶꦩꦴꦤꦁ ꦠꦶꦟ꧀ꦟꦁ ꦮꦴꦢꦷꦤꦁ ꦄꦤ꧀ꦠꦠ꧀ꦠꦚ꧀ꦕ ꦄꦤꦤ꧀ꦠꦠ꧀ꦠꦚ꧀ꦕ ꦄꦤ꧀ꦠꦴꦤꦤ꧀ꦠꦠ꧀ꦠꦚ꧀ꦕ ꦄꦴꦫꦧ꧀ꦨ ꦥꦮꦠ꧀ꦠꦮꦴꦢꦠ꧀ꦠꦴ ꦄꦤ꧀ꦠꦴꦤꦤ꧀ꦠꦶꦏꦠ꧀ꦠꦁ. ꦥꦕ꧀ꦖꦶꦩꦱ꧀ꦱ ꦥꦤ ꦠꦢꦸꦨꦪꦥꦛꦶꦱꦺꦣꦮꦱꦺꦤ ꦥꦮꦠ꧀ꦠꦮꦴꦢꦠ꧀ꦠꦴ ꦏꦡꦩꦤ꧀ꦠꦴꦤꦤ꧀ꦠꦶꦏꦠ꧀ꦠꦤ꧀ꦠꦶ? ꦠꦢꦸꦨꦪꦥꦛꦶꦱꦺꦣꦮꦱꦺꦤ ꦥꦮꦠ꧀ꦠꦮꦴꦢꦠ꧀ꦠꦴ ꦌꦮ. ꦪꦱ꧀ꦩꦴ ꦥꦛꦶꦱꦺꦣꦮꦴꦢꦺꦴꦥꦶ ꦄꦤ꧀ꦠꦴꦤꦤ꧀ꦠꦮꦶꦱꦪꦺꦴ ꦌꦮ ꦠꦁ ꦄꦴꦫꦧ꧀ꦨ ꦥꦮꦠ꧀ꦠꦠ꧀ꦠꦴ. ꦄꦥꦫꦺ ꦄꦴꦲꦸ – ‘‘ꦪꦡꦴ ꦠꦠꦶꦪꦮꦴꦢꦺ ꦱꦩ꧀ꦨꦺꦢꦮꦱꦺꦤ ꦌꦠꦱ꧀ꦱꦺꦮ ꦄꦤ꧀ꦠꦮꦤ꧀ꦠꦠꦴ ꦄꦤꦤ꧀ꦠꦠꦴ ꦕ ꦱꦩ꧀ꦨꦮꦠꦶ, ꦌꦮꦁ ꦠꦏ꧀ꦏꦷꦮꦴꦢꦺꦥꦶ ꦏꦴꦭꦨꦺꦢꦮꦱꦺꦤ ꦈꦨꦪꦱꦩ꧀ꦨꦮꦠꦺꦴ ꦄꦚ꧀ꦚꦩꦚ꧀ꦚꦥꦛꦶꦱꦺꦣꦺꦤ ꦈꦨꦪꦚ꧀ꦚꦺꦮ ꦮꦸꦕ꧀ꦕꦠꦶ. ꦏꦡꦁ? ꦄꦤ꧀ꦠꦮꦤ꧀ꦠꦠꦴꦥꦛꦶꦱꦺꦣꦺꦤ ꦲꦶ ꦄꦤꦤ꧀ꦠꦠꦴ ꦮꦸꦕ꧀ꦕꦠꦶ, ꦄꦤꦤ꧀ꦠꦠꦴꦥꦛꦶꦱꦺꦣꦺꦤ ꦕ ꦄꦤ꧀ꦠꦮꦤ꧀ꦠꦠꦴ, ꦄꦤ꧀ꦠꦴꦤꦤ꧀ꦠꦴꦤꦚ꧀ꦕ ꦠꦠꦶꦪꦮꦴꦢꦨꦴꦮꦺꦴ ꦏꦴꦭꦨꦺꦢꦱ꧀ꦱ ꦄꦣꦶꦥ꧀ꦥꦺꦠꦠ꧀ꦠꦴ. ꦆꦢꦁ ꦮꦸꦠ꧀ꦠꦁ ꦲꦺꦴꦠꦶ ꦪꦱ꧀ꦩꦴ ꦄꦪꦁ ꦭꦺꦴꦏꦱꦚ꧀ꦚꦶꦠꦺꦴ ꦄꦠ꧀ꦠꦴ ꦙꦴꦪꦷꦲꦶ ꦄꦣꦶꦒꦠꦮꦶꦱꦺꦱꦺꦲꦶ ꦄꦤꦤ꧀ꦠꦺꦴ ꦏꦢꦴꦕꦶ ꦱꦏ꧀ꦑꦶ ꦢꦶꦛ꧀ꦜꦺꦴ ꦄꦤꦸꦱꦸꦪ꧀ꦪꦠꦶ; ꦠꦱ꧀ꦩꦴ ꦤꦺꦮꦤ꧀ꦠꦮꦴ. ꦪꦱ꧀ꦩꦴ ꦥꦤ ꦠꦺꦲꦶ ꦌꦮ ꦏꦢꦴꦕꦶ ꦄꦤ꧀ꦠꦮꦴ ꦱꦏ꧀ꦑꦶ ꦢꦶꦛ꧀ꦜꦺꦴ ꦄꦤꦸꦱꦸꦪ꧀ꦪꦠꦶ, ꦠꦱ꧀ꦩꦴ ꦤ ꦥꦤ ꦄꦤꦤ꧀ꦠꦮꦴ’’ꦠꦶ. ꦪꦡꦴ ꦕ ꦄꦤꦸꦱ꧀ꦱꦸꦠꦶꦠꦏ꧀ꦏꦷꦮꦱꦺꦤ, ꦌꦮꦁ ꦗꦴꦠꦶꦱ꧀ꦱꦫꦠꦏ꧀ꦏꦶꦄꦴꦢꦷꦤꦚ꧀ꦕ ꦮꦱꦺꦤ ꦪꦡꦴꦱꦩ꧀ꦨꦮꦁ ꦪꦺꦴꦗꦺꦠꦧ꧀ꦧꦁ. ꦄꦪꦚ꧀ꦲꦶ ꦠꦏ꧀ꦏꦶꦏꦺꦴ ꦄꦮꦝ꧀ꦞꦶꦠꦨꦴꦮꦥꦸꦧ꧀ꦧꦏꦠ꧀ꦠꦴ ꦥꦛꦶꦨꦴꦒꦤꦶꦩꦶꦠ꧀ꦠꦴꦤꦁ ꦮꦝ꧀ꦞꦶꦠꦨꦴꦮꦱ꧀ꦱ ꦮꦝ꧀ꦞꦶꦠꦏꦴꦭꦮꦱꦺꦤ ꦄꦥꦕ꧀ꦕꦏ꧀ꦑꦏꦴꦫꦶꦠꦴꦪ ꦄꦤꦸꦱ꧀ꦱꦮꦴꦢꦶꦩꦠ꧀ꦠꦺ ꦜꦠ꧀ꦮꦴ – ‘‘ꦤꦺꦮꦤ꧀ꦠꦮꦴ’’ꦠꦶ ꦥꦛꦶꦏ꧀ꦑꦶꦥꦠꦶ, ꦄꦮꦝ꧀ꦞꦶꦠꦏꦴꦭꦮꦱꦺꦤ ꦥꦤ ‘‘ꦤꦴꦤꦤ꧀ꦠꦺꦴ’’ꦠꦶ. ꦤ ꦥꦤ ꦄꦤ꧀ꦠꦮꦤ꧀ꦠꦠꦴꦤꦤ꧀ꦠꦠꦴꦤꦁ ꦄꦕ꧀ꦕꦤ꧀ꦠꦩꦨꦴꦮꦺꦤ ꦪꦡꦴ ꦠꦁ ‘‘ꦤꦺꦮꦱꦚ꧀ꦚꦷꦤꦴꦱꦚ꧀ꦚꦷ’’ꦠꦶ, ꦄꦮꦱ꧀ꦱꦚ꧀ꦕ ꦌꦠꦁ ꦌꦮꦁ ꦮꦶꦚ꧀ꦚꦴꦠꦧ꧀ꦧꦁ, ꦄꦚ꧀ꦚꦡꦴ ꦮꦶꦏ꧀ꦑꦺꦥꦥꦏ꧀ꦑꦁꦪꦺꦮ ꦨꦗꦺꦪ꧀ꦪ ꦕꦠꦸꦠ꧀ꦡꦮꦴꦢꦺꦴ. ꦤ ꦲꦶ ꦄꦤ꧀ꦠꦮꦤ꧀ꦠꦠꦴꦤꦤ꧀ꦠꦠꦴꦠꦢꦸꦨꦪꦮꦶꦤꦶꦩꦸꦠ꧀ꦠꦺꦴ ꦄꦠ꧀ꦠꦤꦺꦴ ꦥꦏꦴꦫꦺꦴ ꦄꦠ꧀ꦡꦶ, ꦠꦏ꧀ꦏꦷꦮꦴꦢꦷ ꦕ ꦪꦸꦠ꧀ꦠꦶꦩꦒ꧀ꦒꦏꦺꦴ, ꦏꦴꦭꦨꦺꦢꦮꦱꦺꦤ ꦕ ꦠꦢꦸꦨꦪꦩ꧀ꦥꦶ ꦌꦏꦱ꧀ꦩꦶꦁ ꦤ ꦤ ꦪꦸꦗ꧀ꦗꦠꦷꦠꦶ. ꦄꦤꦤ꧀ꦠꦫꦕꦠꦸꦏ꧀ꦏꦤ꧀ꦠꦶ ꦌꦏꦠ꧀ꦠꦱꦚ꧀ꦚꦷꦠꦶ ꦄꦴꦒꦠꦱꦚ꧀ꦚꦷꦕꦠꦸꦏ꧀ꦏꦁ.
ꦌꦏꦤ꧀ꦠꦱꦸꦑꦷꦠꦶ ꦌꦏꦤ꧀ꦠꦺꦤꦺꦮ ꦱꦸꦑꦷ. ꦠꦁ ꦥꦤꦱ꧀ꦱ ꦱꦸꦑꦁ ꦢꦸꦏ꧀ꦑꦺꦤ ꦄꦮꦺꦴꦩꦶꦱ꧀ꦱꦁ ꦲꦺꦴꦠꦷꦠꦶ ꦄꦴꦲ ‘‘ꦤꦶꦫꦤ꧀ꦠꦫꦱꦸꦑꦷ’’ꦠꦶ. ꦌꦏꦤ꧀ꦠꦱꦸꦑꦩꦺꦮꦴꦠꦶ ꦆꦢꦁ ꦱꦸꦑꦧꦲꦸꦭꦠꦁ ꦱꦤ꧀ꦣꦴꦪ ꦮꦸꦠ꧀ꦠꦁ. ꦄꦠꦷꦠꦴꦱꦸ ꦱꦠ꧀ꦠꦱꦸ ꦗꦴꦠꦷꦱꦹꦠꦶ ꦆꦢꦁ ꦠꦠꦺꦴ ꦥꦫꦁ ꦗꦴꦠꦶꦱ꧀ꦱꦫꦚꦴꦟꦺꦤ ꦄꦤꦸꦱ꧀ꦱꦫꦶꦠꦸꦁ ꦤ ꦱꦏ꧀ꦏꦴꦠꦶ ꦏꦠ꧀ꦮꦴ ꦮꦸꦠ꧀ꦠꦁ. ꦠꦴꦢꦶꦱꦩꦺꦮꦴꦠꦶ ꦱꦸꦑꦱꦩꦔ꧀ꦒꦶꦩꦺꦮ ꦄꦠ꧀ꦠꦨꦴꦮꦁ. ‘‘ꦌꦮꦁ ꦱꦸꦑꦱꦩꦔ꧀ꦒꦷ’’ꦠꦶ ꦠꦁ ꦄꦤꦸꦱ꧀ꦱꦫꦤ꧀ꦠꦱ꧀ꦱ ꦗꦴꦠꦶꦱ꧀ꦱꦫꦱ꧀ꦱ ꦄꦠꦷꦠꦗꦴꦠꦶꦪꦩ꧀ꦥꦶ ꦆꦣ ꦮꦶꦪ ꦢꦸꦏ꧀ꦑꦦꦸꦛ꧀ꦜꦱ꧀ꦱ ꦠꦁ ꦄꦤꦸꦱ꧀ꦱꦫꦤ꧀ꦠꦱ꧀ꦱ.
ꦱꦧ꧀ꦧꦺꦱꦩ꧀ꦥꦷꦠꦶ ꦭꦴꦨꦷꦤꦁ ꦠꦏ꧀ꦏꦷꦤꦩ꧀ꦥꦶ. ꦠꦡꦴꦠꦶ ꦆꦩꦶꦤꦴ ‘‘ꦱꦧ꧀ꦧꦺꦱꦩ꧀ꦥꦷ’’ꦠꦶ ꦆꦢꦁ ꦥꦢꦁ ꦄꦴꦏꦝ꧀ꦞꦠꦶ. ꦏꦴꦩꦴꦮꦕꦫꦁ ꦤꦴꦩ ꦄꦢꦸꦏ꧀ꦑꦩꦱꦸꦑꦁ ꦄꦤꦸꦭ꦳ꦴꦫꦁ ꦄꦮꦶꦨꦹꦠꦤ꧀ꦠꦶ ꦄꦴꦲ ‘‘ꦕꦠꦸꦠ꧀ꦡꦗ꧀ꦙꦴꦤꦮꦱꦺꦤꦴ’’ꦠꦶ. ꦕꦠꦸꦠ꧀ꦡꦗ꧀ꦙꦴꦤꦁ ꦏꦴꦫꦟꦨꦹꦠꦁ ꦌꦠꦱ꧀ꦱ ꦄꦠ꧀ꦡꦶ, ꦠꦺꦤ ꦮꦴ ꦤꦶꦧ꧀ꦧꦠ꧀ꦠꦤ꧀ꦠꦶ ꦕꦠꦸꦠ꧀ꦡꦗ꧀ꦙꦴꦤꦶꦏꦁ. ꦩꦗ꧀ꦙꦠ꧀ꦠꦱ꧀ꦱꦴꦠꦶ ꦩꦗ꧀ꦙꦠ꧀ꦠꦨꦹꦠꦱ꧀ꦱ ꦩꦗ꧀ꦙꦠ꧀ꦠꦮꦺꦢꦤꦴꦧꦲꦸꦭꦱ꧀ꦱ. ꦩꦗ꧀ꦙꦠ꧀ꦠꦨꦹꦠꦛ꧀ꦜꦴꦤꦩꦺꦮ ꦄꦠ꧀ꦠꦤꦺꦴ ꦩꦗ꧀ꦙꦠ꧀ꦠꦠꦴꦥꦠ꧀ꦠꦩꦺꦮ ꦨꦹꦠꦥꦸꦧ꧀ꦧꦁ ꦄꦤꦸꦱ꧀ꦱꦫꦤ꧀ꦠꦱ꧀ꦱ. ꦌꦏꦕ꧀ꦕꦱꦱ꧀ꦱꦠꦶꦏꦴꦠꦶ ꦌꦏꦕ꧀ꦕꦱꦱ꧀ꦱꦠꦮꦴꦢꦶꦤꦺꦴ ꦮꦸꦠ꧀ꦠꦴ. ꦥꦸꦒ꧀ꦒꦭꦴꦣꦶꦛ꧀ꦜꦴꦤꦺꦤ ꦲꦶ ꦌꦏꦕ꧀ꦕꦱꦱ꧀ꦱꦠꦶꦏꦴ. ꦌꦱ ꦤꦪꦺꦴ ꦱꦺꦱꦺꦱꦸꦥꦶ. ꦄꦣꦶꦕ꧀ꦕꦱꦩꦸꦥ꧀ꦥꦤ꧀ꦤꦮꦴꦢꦺꦴ ꦱꦱ꧀ꦱꦠꦮꦴꦢꦱꦩꦸꦢ꧀ꦢꦶꦛ꧀ꦜꦺꦴꦠꦶ ꦏꦠ꧀ꦮꦴ ‘‘ꦢ꧀ꦮꦺ ꦄꦣꦶꦕ꧀ꦕꦱꦩꦸꦥ꧀ꦥꦤ꧀ꦤꦶꦏꦴ’’ꦠꦶ ꦕ ꦮꦸꦠ꧀ꦠꦁ.
꧒꧘. ꦢꦶꦛ꧀ꦜꦸꦢ꧀ꦣꦴꦫꦤ꧀ꦠꦶ ꦪꦡꦴꦮꦸꦠ꧀ꦠꦴꦤꦁ ꦢꦶꦛ꧀ꦜꦷꦤꦁ ꦄꦤꦶꦪ꧀ꦪꦴꦤꦶꦏꦨꦴꦮꦢꦱ꧀ꦱꦤꦮꦱꦺꦤ ꦥꦢꦸꦢ꧀ꦣꦫꦟꦁ. ꦥꦕ꧀ꦕꦠ꧀ꦠꦁꦪꦺꦮ ꦚꦴꦟꦤ꧀ꦠꦶ ꦄꦥꦫꦥ꧀ꦥꦕ꧀ꦕꦪꦁ ꦄꦠ꧀ꦠꦤꦶꦪꦺꦮ ꦚꦴꦟꦁ. ꦠꦁ ꦥꦤ ꦄꦠ꧀ꦠꦥꦕ꧀ꦕꦏ꧀ꦑꦁ ꦲꦺꦴꦠꦷꦠꦶ ꦄꦴꦲ ‘‘ꦥꦕ꧀ꦕꦏ꧀ꦑꦚꦴꦟ’’ꦤ꧀ꦠꦶ. ꦱꦸꦮꦟ꧀ꦟꦱ꧀ꦱ ꦮꦶꦪ ꦢꦺꦴꦱꦴꦥꦒꦩꦺꦤ ꦈꦥꦏ꧀ꦏꦶꦭꦺꦱꦮꦶꦒꦩꦺꦤ ꦚꦴꦟꦱ꧀ꦱ ꦮꦶꦱꦸꦢ꧀ꦣꦤ꧀ꦠꦶ ꦄꦴꦲ ‘‘ꦥꦫꦶꦱꦸꦢ꧀ꦣꦤ꧀ꦠꦶ ꦤꦶꦫꦸꦥꦏ꧀ꦏꦶꦭꦺꦱ’’ꦤ꧀ꦠꦶ. ꦏꦶꦭꦺꦱꦤ꧀ꦣꦏꦴꦫꦮꦶꦒꦩꦠꦺꦴ ꦱꦥ꧀ꦥꦨꦴꦱꦩꦸꦗ꧀ꦗꦭꦩꦺꦮ ꦲꦺꦴꦠꦷꦠꦶ ꦮꦸꦠ꧀ꦠꦁ – ‘‘ꦥꦫꦶꦪꦺꦴꦢꦴꦠꦤ꧀ꦠꦶ ꦥꦨꦱ꧀ꦱꦫ’’ꦤ꧀ꦠꦶ ꦧꦴꦲꦶꦫꦱꦩꦪꦱ꧀ꦩꦶꦩ꧀ꦥꦶ ꦲꦺꦴꦤ꧀ꦠꦶ ꦙꦴꦤꦱ꧀ꦱ ꦱꦩꦶꦗ꧀ꦙꦤꦠꦺꦴ. ꦩꦪꦩꦶꦢꦁ ꦗꦴꦤꦴꦩꦴꦠꦶ ‘‘ꦱꦱ꧀ꦱꦠꦺꦴ ꦄꦠ꧀ꦠꦴ ꦕ ꦭꦺꦴꦏꦺꦴ ꦕ ꦆꦢꦩꦺꦮ ꦱꦕ꧀ꦕꦁ ꦩꦺꦴꦓꦩꦚ꧀ꦚ’’ꦤ꧀ꦠꦶ ꦕ ꦩꦶꦕ꧀ꦖꦴꦒꦴꦲꦮꦱꦺꦤ ꦄꦚ꧀ꦚꦴꦟꦨꦴꦒꦩꦺꦮ ꦥꦫꦶꦧ꧀ꦫꦹꦲꦺꦠ꧀ꦮꦴ ꦠꦠꦺꦴ ꦌꦮ ꦪꦡꦴꦒꦲꦶꦠꦁ ꦒꦴꦲꦁ ꦱꦤ꧀ꦣꦴꦪ – ‘‘ꦩꦪꦩꦶꦢꦁ ꦄꦠ꧀ꦡꦁ ꦠꦠ꧀ꦡ ꦗꦴꦤꦴꦩꦴ’’ꦠꦶ ꦌꦮꦁ ꦠꦠ꧀ꦡ ꦩꦶꦕ꧀ꦖꦴꦒꦴꦲꦺ ꦄꦮꦶꦗ꧀ꦗꦩꦴꦤꦁ ꦚꦴꦟꦏꦺꦴꦛ꧀ꦜꦴꦱꦁ ꦎꦠꦴꦫꦺꦤ꧀ꦠꦶꦪꦺꦮ ꦄꦤꦸꦥ꧀ꦥꦮꦺꦱꦺꦤ꧀ꦠꦶꦪꦺꦮ. ꦤ ꦠꦁ ꦚꦴꦟꦁ, ꦩꦶꦕ꧀ꦖꦴꦢꦱ꧀ꦱꦤꦁ ꦤꦴꦩꦺꦠꦁ, ꦏꦶꦁ ꦥꦤ ꦠꦁ ꦩꦶꦕ꧀ꦖꦴꦢꦱ꧀ꦱꦤꦁ ꦤꦴꦩ? ꦱꦱ꧀ꦱꦠꦺꦴ ꦄꦠ꧀ꦠꦴ ꦕ ꦭꦺꦴꦏꦺꦴ ꦕꦴꦠꦶꦄꦴꦢꦶꦤꦴ ꦩꦶꦕ꧀ꦖꦴꦨꦶꦤꦶꦮꦺꦱꦨꦴꦮꦠꦺꦴ. ꦠꦺꦤꦴꦲ ‘‘ꦠꦢꦥꦶ…ꦥꦺ… ꦄꦠ꧀ꦡꦺꦴ’’ꦠꦶ. ꦪꦁ ꦠꦁ ꦢꦶꦛ꧀ꦜꦶꦪꦴ ꦈꦥꦤꦶꦱ꧀ꦱꦪꦨꦹꦠꦁ ꦚꦴꦟꦁ, ꦠꦁ ꦱꦤ꧀ꦣꦴꦪꦴꦲ – ‘‘ꦗꦴꦤꦤꦩꦠ꧀ꦠꦭꦏ꧀ꦑꦟꦠ꧀ꦠꦴ ꦚꦴꦟꦨꦴꦒꦩꦠ꧀ꦠꦩꦺꦮꦴ’’ꦠꦶ. ꦚꦴꦟꦩ꧀ꦥꦶ ꦲꦶ ꦢꦶꦛ꧀ꦜꦶꦪꦴ ꦈꦥꦤꦶꦱ꧀ꦱꦪꦺꦴ ꦲꦺꦴꦠꦶꦪꦺꦮ ꦭꦴꦨꦶꦤꦺꦴ ꦆꦠꦫꦱ꧀ꦱ ꦕ ꦠꦡꦴ ꦠꦡꦴ ꦩꦶꦕ꧀ꦖꦴꦨꦶꦤꦶꦮꦺꦱꦠꦺꦴ. ꦄꦤꦸꦥꦴꦠꦶꦮꦠ꧀ꦠꦤꦠꦺꦴ ꦄꦤꦠꦶꦏ꧀ꦏꦩꦤꦠꦺꦴ. ꦄꦱꦴꦣꦴꦫꦟꦠꦺꦴ ꦤ ꦈꦥꦴꦠꦶꦮꦠ꧀ꦠꦤ꧀ꦠꦶ ꦌꦠꦺꦤꦴꦠꦶ ꦄꦤꦸꦥꦴꦠꦶꦮꦠ꧀ꦠꦤꦁ, ꦠꦠꦺꦴ. ꦈꦥꦴꦢꦴꦤꦥꦕ꧀ꦕꦪꦠꦺꦴꦠꦶ ꦈꦥꦴꦢꦴꦤꦱ꧀ꦱ ꦥꦕ꧀ꦕꦪꦨꦴꦮꦠꦺꦴ. ꦌꦠꦺꦤ ꦦꦭꦹꦥꦕꦴꦫꦺꦤꦺꦮ ꦈꦥꦴꦢꦴꦤꦩꦴꦲ. ꦪꦢꦶ ꦧ꧀ꦫꦲ꧀ꦩꦗꦴꦭꦺ ꦄꦴꦒꦠꦴ ꦱꦧ꧀ꦧꦴꦥꦶ ꦢꦶꦛ꧀ꦜꦶꦪꦺꦴ ꦆꦣ ꦏꦡꦶꦠꦴ ꦲꦺꦴꦤ꧀ꦠꦶ, ꦌꦮꦁ ꦱꦤ꧀ꦠꦺ ꦆꦢꦁ ꦱꦸꦠ꧀ꦠꦁ ꦧ꧀ꦫꦲ꧀ꦩꦗꦴꦭꦱꦸꦠ꧀ꦠꦺꦤ ꦌꦏꦱꦢꦶꦱꦤ꧀ꦠꦶ ꦄꦴꦲ – ‘‘ꦧ꧀ꦫꦲ꧀ꦩꦗꦴꦭꦺ ꦥꦤꦴ’’ꦠꦶꦄꦴꦢꦶ. ‘‘ꦄꦚ꧀ꦚꦠ꧀ꦫ ꦫꦹꦥꦁ ꦄꦚ꧀ꦚꦠ꧀ꦫ ꦮꦺꦢꦤꦴ ꦱꦏ꧀ꦏꦴꦪꦁꦪꦺꦮ ꦄꦤꦸꦥꦫꦶꦣꦴꦮꦤ꧀ꦠꦷ’’ꦠꦶ ꦮꦕꦤꦠꦺꦴ ꦆꦣ ꦱꦏ꧀ꦏꦴꦪꦢꦶꦛ꧀ꦜꦶ ꦄꦴꦒꦠꦴ. ꦧ꧀ꦫꦲ꧀ꦩꦗꦴꦭꦁ ꦏꦡꦶꦠꦩꦺꦮ ꦲꦺꦴꦠꦶ ꦠꦠ꧀ꦡ ꦄꦴꦒꦠꦴꦤꦁ ꦢ꧀ꦮꦴꦱꦛ꧀ꦜꦶꦪꦴꦥꦶ ꦢꦶꦛ꧀ꦜꦷꦤꦁ ꦆꦣꦴꦒꦠꦠ꧀ꦠꦴ. ꦱꦱ꧀ꦱꦠꦸꦕ꧀ꦖꦺꦢꦴꦨꦶꦤꦶꦮꦺꦱꦺꦴ ꦄꦠ꧀ꦠꦴꦨꦶꦤꦶꦮꦺꦱꦥꦸꦧ꧀ꦧꦏꦺꦴ, ‘‘ꦄꦠ꧀ꦠꦴ ꦱꦱ꧀ꦱꦠꦺꦴ ꦄꦠ꧀ꦠꦴ ꦈꦕ꧀ꦖꦺꦢꦺꦴ’’ꦠꦶ ꦥꦮꦠ꧀ꦠꦤꦠꦺꦴ.
꧓꧐. ꦢ꧀ꦮꦴꦱꦛ꧀ꦜꦶ…ꦥꦺ… ꦢꦱ꧀ꦱꦺꦠꦸꦤ꧀ꦠꦶ ꦏꦡꦁ ꦥꦤꦴꦪꦩꦠ꧀ꦡꦺꦴ ‘‘ꦆꦣ, ꦨꦶꦏ꧀ꦑꦮꦺ, ꦌꦏꦕ꧀ꦕꦺꦴ’’ꦠꦶꦄꦴꦢꦶꦥꦴꦭ꦳ꦶꦪꦴ ꦢꦱ꧀ꦱꦶꦠꦺꦴ ꦲꦺꦴꦠꦷꦠꦶ? ꦄꦥ꧀ꦥꦲꦷꦤꦱꦏ꧀ꦏꦴꦪꦢꦶꦛ꧀ꦜꦶꦏꦱ꧀ꦱ ꦥꦸꦧ꧀ꦧꦤ꧀ꦠꦴꦥꦫꦤ꧀ꦠꦢꦶꦛ꧀ꦜꦶꦈꦥꦴꦢꦶꦪꦤꦗꦺꦴꦠꦤꦠꦺꦴ. ꦥꦫꦶꦕ꧀ꦕꦴꦒꦺꦤꦴꦠꦶ ꦮꦶꦏ꧀ꦑꦩ꧀ꦨꦤꦺꦤ. ꦕꦠꦸꦠ꧀ꦡꦗ꧀ꦙꦴꦤꦤꦶꦫꦺꦴꦣꦴ ꦠꦠꦶꦪꦗ꧀ꦙꦴꦤꦁ ꦈꦥꦱꦩ꧀ꦥꦗ꧀ꦗ ꦮꦶꦲꦫꦠꦷꦠꦶ ꦌꦠ꧀ꦡ ꦤ ꦥꦫꦶꦲꦷꦤꦕꦠꦸꦠ꧀ꦡꦗ꧀ꦙꦴꦤꦱ꧀ꦱ ꦠꦠꦶꦪꦗ꧀ꦙꦴꦤꦁ ꦨꦮꦠꦶ, ꦠꦠꦶꦪꦗ꧀ꦙꦴꦤꦴ ꦮꦸꦛ꧀ꦜꦶꦠꦱ꧀ꦱ ꦥꦤ ꦕꦠꦸꦠ꧀ꦡꦗ꧀ꦙꦴꦤꦴ ꦮꦸꦛ꧀ꦜꦶꦠꦱ꧀ꦱ ꦕ ꦠꦠꦶꦪꦁ ꦥꦛꦶꦭꦺꦴꦩꦤꦪꦺꦤ ꦱꦩ꧀ꦨꦮꦠꦶ. ꦠꦺꦤꦴꦲ ‘‘ꦄꦪꦁ ꦥꦤꦺꦠ꧀ꦡꦴ’’ꦠꦶꦄꦴꦢꦶ. ꦌꦮꦁꦱꦩ꧀ꦥꦢꦩꦶꦢꦁ ꦮꦺꦢꦶꦠꦧ꧀ꦧꦤ꧀ꦠꦶ ‘‘ꦥꦮꦶꦮꦺꦏꦴ ꦥꦷꦠꦶ ꦤꦶꦫꦸꦗ꧀ꦙꦠꦷ’’ꦠꦶ ꦆꦢꦁ, ‘‘ꦤꦶꦫꦴꦩꦶꦱꦱꦸꦑꦱ꧀ꦱꦤꦶꦫꦺꦴꦣꦴ’’ꦠꦶ ꦌꦠ꧀ꦡ ꦮꦶꦪ ꦮꦸꦛ꧀ꦜꦴꦤꦤꦶꦫꦺꦴꦣꦮꦱꦺꦤ ꦮꦸꦠ꧀ꦠꦤ꧀ꦠꦶ ꦮꦺꦢꦶꦠꦧ꧀ꦧꦤ꧀ꦠꦶ ꦄꦠ꧀ꦡꦺꦴ. ꦲꦷꦤꦗ꧀ꦙꦴꦤꦥꦫꦶꦪꦴꦢꦴꦤꦏꦢꦺꦴꦩꦤꦱ꧀ꦱꦤ꧀ꦠꦶ ꦤꦷꦮꦫꦟꦱꦲꦒꦠꦢꦺꦴꦩꦤꦱ꧀ꦱꦩꦴꦲ. ꦠꦚ꧀ꦲꦶ ꦙꦴꦤꦥꦫꦶꦪꦴꦢꦴꦤꦏꦫꦁ. ꦏꦩ꧀ꦩꦤꦷꦪꦨꦴꦮꦺꦴꦠꦶ ꦱꦩꦴꦥꦠ꧀ꦠꦶꦁ ꦥꦠ꧀ꦠꦺꦴ ꦮꦶꦪ ꦱꦩꦴꦥꦠ꧀ꦠꦶꦱꦩꦴꦥꦗ꧀ꦗꦤꦨꦴꦮꦺ ꦏꦩ꧀ꦩꦏ꧀ꦑꦩꦨꦴꦮꦺꦴ. ꦱꦺꦴꦩꦤꦱ꧀ꦱꦮꦶꦣꦸꦫꦠ꧀ꦠꦴ ꦢꦺꦴꦩꦤꦱ꧀ꦱꦁ ꦮꦶꦪꦴꦠꦶ ꦢꦺꦴꦩꦤꦱ꧀ꦱꦤ꧀ꦠꦶ ꦮꦸꦠ꧀ꦠꦁ. ‘‘ꦈꦥ꧀ꦥꦗ꧀ꦗꦠꦶ ꦥꦮꦶꦮꦺꦏꦴ ꦥꦷꦠꦷ’’ꦠꦶ ꦥꦸꦤ ꦮꦸꦠ꧀ꦠꦴ ꦥꦷꦠꦶ ꦙꦴꦤꦢ꧀ꦮꦪꦥꦷꦠꦶ. ꦪꦁ ꦜꦴꦤꦁ ꦖꦴꦪꦴ ꦗꦲꦠꦷꦠꦶ ꦪꦁ ꦥꦢꦺꦱꦁ ꦄꦴꦠꦥꦺꦤ ꦄꦨꦶꦨꦸꦪ꧀ꦪꦩꦴꦤꦁ ꦖꦴꦪꦴ ꦗꦲꦠꦶ. ꦠꦠ꧀ꦡ ꦄꦴꦠꦥꦺ ꦖꦴꦪꦴꦠꦶ ꦥꦢꦺꦱꦺꦤ ꦄꦴꦠꦥꦱꦚ꧀ꦚꦶꦠꦴꦤꦁ ꦨꦹꦠꦱꦔ꧀ꦑꦠꦴꦤꦁ ꦥꦲꦴꦤꦛ꧀ꦜꦴꦤꦩꦴꦲ. ꦠꦺꦤꦴꦲ ‘‘ꦪꦱ꧀ꦩꦶꦁ ꦜꦴꦤꦺ’’ꦠꦶꦄꦴꦢꦶ.
꧓꧑. ꦤꦶꦫꦴꦩꦶꦱꦁ ꦱꦸꦑꦤ꧀ꦠꦶ ꦠꦠꦶꦪꦗ꧀ꦙꦴꦤꦱꦸꦑꦁ ꦢꦹꦫꦱꦩꦸꦱ꧀ꦱꦴꦫꦶꦠꦏꦴꦩꦴꦩꦶꦱꦠ꧀ꦠꦴ.
꧓꧒. ꦄꦢꦸꦏ꧀ꦑꦩꦱꦸꦑꦤ꧀ꦠꦶ ꦕꦠꦸꦠ꧀ꦡꦗ꧀ꦙꦴꦤꦮꦺꦢꦤꦁ, ꦤ ꦪꦁ ꦏꦶꦚ꧀ꦕꦶ ꦈꦥꦺꦏ꧀ꦑꦴꦮꦺꦢꦤꦁ.
꧓꧓. ꦤꦶꦒ꧀ꦒꦲꦟꦺꦴꦠꦶ ꦩꦩꦁꦏꦴꦫꦨꦴꦮꦺꦤ ꦏꦶꦚ꧀ꦕꦶꦥꦶ ꦄꦒꦟ꧀ꦲꦤ꧀ꦠꦺꦴ. ꦤꦶꦧ꧀ꦧꦴꦤꦱ꧀ꦱ ꦱꦥ꧀ꦥꦴꦪꦤ꧀ꦠꦶ ꦤꦶꦧ꧀ꦧꦴꦤꦴꦣꦶꦒꦩꦱ꧀ꦱ, ꦤꦶꦧ꧀ꦧꦴꦤꦱ꧀ꦱꦺꦮ ꦮꦴ ꦄꦮꦶꦭꦺꦴꦩꦮꦱꦺꦤ ꦌꦏꦤ꧀ꦠꦶꦏꦸꦥꦴꦪꦠꦴꦪ ꦱꦥ꧀ꦥꦴꦪꦁ. ꦠꦺꦤꦴꦲ ‘‘ꦈꦥꦏꦴꦫꦨꦹꦠ’’ꦤ꧀ꦠꦶ. ꦱꦧ꧀ꦧꦠ꧀ꦡꦴꦠꦶ ꦱꦧ꧀ꦧꦺꦱꦸ ꦠꦺꦨꦹꦩꦏꦣꦩ꧀ꦩꦺꦱꦸ. ꦌꦠꦤ꧀ꦠꦶ ꦌꦠꦁ ꦪꦡꦴꦮꦸꦠ꧀ꦠꦱꦩꦡꦨꦴꦮꦤꦴꦪ ꦏꦶꦭꦺꦱꦴꦤꦁ ꦮꦶꦏ꧀ꦑꦩ꧀ꦨꦤꦁ. ꦱꦧ꧀ꦧꦠ꧀ꦡ ꦤꦶꦏꦤ꧀ꦠꦶꦪꦴ ꦄꦱꦸꦏ꧀ꦑꦴꦥꦶꦠꦠ꧀ꦠꦴ ꦏꦡꦁ ꦤꦶꦧ꧀ꦧꦴꦤꦱ꧀ꦱ ꦈꦥꦏꦴꦫꦥꦛꦶꦥꦢꦴ ꦤꦴꦩ ꦗꦴꦠꦁ? ꦤ ꦗꦴꦪꦠꦺ ꦮꦴꦠ꧀ꦪꦣꦶꦥ꧀ꦥꦴꦪꦺꦴ. ꦱꦧ꧀ꦧꦠ꧀ꦡꦴꦠꦶ ꦥꦸꦧ꧀ꦧꦤ꧀ꦠꦴꦤꦸꦢꦶꦛ꧀ꦜꦶꦄꦴꦢꦶꦏꦺ ꦱꦧ꧀ꦧꦱ꧀ꦩꦶꦁ. ꦄꦒ꧀ꦒꦟ꧀ꦲꦤꦮꦱꦺꦤꦴꦠꦶ ꦠꦟ꧀ꦲꦴꦒꦴꦲꦺꦤ ꦄꦒ꧀ꦒꦲꦟꦮꦱꦺꦤ. ꦪꦠ꧀ꦡ ꦲꦶ ꦠꦟ꧀ꦲꦴꦒꦴꦲꦺꦴ ꦮꦶꦩꦺꦴꦕꦶꦠꦺꦴ, ꦠꦠ꧀ꦡ ꦢꦶꦛ꧀ꦜꦶꦩꦴꦤꦒ꧀ꦒꦴꦲꦴ ꦱꦸꦏ꧀ꦑꦴ ꦮꦶꦪ ꦲꦺꦴꦤ꧀ꦠꦶ ꦠꦢꦺꦏꦛ꧀ꦜꦨꦴꦮꦠꦺꦴ. ꦠꦴꦢꦶꦱꦱ꧀ꦱ ꦤꦶꦧ꧀ꦧꦴꦤꦒꦴꦩꦶꦤꦷ ꦥꦛꦶꦥꦢꦴ ꦌꦮ ꦄꦴꦱꦤ꧀ꦤꦺ, ꦤ ꦢꦹꦫꦺ. ꦠꦺꦤ ꦮꦸꦠ꧀ꦠꦁ – ‘‘ꦈꦥꦏꦴꦫꦥꦛꦶꦥꦢꦴ ꦤꦴꦩ ꦗꦴꦠ’’ꦤ꧀ꦠꦶ. ꦠꦴꦢꦶꦱꦱ꧀ꦱ ꦕ ꦱꦤ꧀ꦠꦺꦴꦲꦩꦱ꧀ꦩꦷꦠꦶꦄꦴꦢꦶꦏꦴ ꦱꦩꦤꦸꦥꦱ꧀ꦱꦤꦴ ꦄꦣꦶꦩꦴꦤꦥꦏ꧀ꦑꦺ ꦠꦶꦛ꧀ꦜꦠꦷꦠꦶ ꦄꦴꦲ – ‘‘ꦄꦨꦶꦮꦢꦠꦷꦠꦶ ꦄꦨꦶꦩꦴꦤꦺꦤ ꦈꦥꦮꦢꦠꦷ’’ꦠꦶ. ꦆꦢꦩꦺꦮ ꦈꦥꦴꦢꦶꦪꦠꦷꦠꦶ ꦤꦶꦪꦩꦴꦨꦴꦮꦠꦺꦴ ‘‘ꦄꦛ꧀ꦜꦴꦫꦱꦮꦶꦣꦩ꧀ꦥꦷ’’ꦠꦶ ꦮꦸꦠ꧀ꦠꦁ. ꦱꦺꦱꦥꦢꦺꦥꦶ ꦌꦱꦺꦮ ꦤꦪꦺꦴ. ꦢꦶꦛ꧀ꦜꦸꦥꦴꦢꦴꦤꦺ ꦱꦠꦶ ꦱꦺꦱꦈꦥꦴꦢꦴꦤꦱꦩ꧀ꦨꦮꦺꦴ ꦄꦮꦸꦠ꧀ꦠꦱꦶꦢ꧀ꦣꦺꦴꦠꦶ ꦠꦢꦺꦮ ꦈꦢ꧀ꦣꦛꦁ.
ꦱꦺ ꦄꦴꦪꦠꦤꦺ ꦮꦺꦢꦶꦠꦧ꧀ꦧꦺꦠꦶ ꦤꦶꦫꦺꦴꦣꦱ꧀ꦱ ꦏꦴꦫꦟꦁ ꦤꦶꦧ꧀ꦧꦴꦤꦁ ꦮꦺꦢꦶꦠꦧ꧀ꦧꦁ. ꦢ꧀ꦮꦶꦤ꧀ꦤꦁ ꦄꦴꦪꦠꦤꦴꦤꦤ꧀ꦠꦶ ꦕꦏ꧀ꦑꦴꦪꦠꦤꦴꦢꦷꦤꦁ ꦢ꧀ꦮꦶꦤ꧀ꦤꦁ ꦄꦴꦪꦠꦤꦴꦤꦁ. ꦥꦛꦶꦏ꧀ꦑꦺꦥꦺꦤ ꦤꦶꦧ꧀ꦧꦴꦤꦁ ꦢꦱ꧀ꦱꦶꦠꦁ ꦮꦺꦤꦺꦪ꧀ꦪꦗ꧀ꦙꦴꦱꦪꦮꦱꦺꦤ.
ꦤ ꦒꦴꦣꦠꦷꦠꦶ ꦤ ꦥꦠꦶꦛ꧀ꦜꦴꦠꦶ. ꦄꦠꦺꦴꦠꦶ ꦄꦱ꧀ꦩꦴ ꦤꦶꦧ꧀ꦧꦴꦤꦴ. ꦱꦫꦴꦠꦶ ꦠꦟ꧀ꦲꦴ. ꦱꦔ꧀ꦑꦴꦫꦥꦛꦶꦏ꧀ꦑꦺꦥꦺꦤꦴꦠꦶ ꦱꦔ꧀ꦑꦴꦫꦺꦏꦢꦺꦱꦨꦹꦠꦴꦤꦁ ꦕꦠꦸꦤ꧀ꦤꦁ ꦩꦲꦴꦨꦹꦠꦴꦤꦁ ꦥꦛꦶꦏ꧀ꦑꦺꦥꦺꦤ.
ꦮꦶꦚ꧀ꦚꦴꦟꦤ꧀ꦠꦶ ꦮꦶꦱꦶꦛ꧀ꦜꦺꦤ ꦚꦴꦟꦺꦤ ꦗꦴꦤꦶꦠꦧ꧀ꦧꦁ. ꦠꦠꦺꦴ ꦌꦮ ꦄꦤꦶꦢꦱ꧀ꦱꦤꦁ ꦄꦕꦏ꧀ꦑꦸꦮꦶꦚ꧀ꦚꦺꦪ꧀ꦪꦁ ꦄꦤꦶꦤ꧀ꦢ꧀ꦫꦶꦪꦒꦺꦴꦕꦫꦁ. ꦄꦤꦤ꧀ꦠꦤ꧀ꦠꦶ ꦄꦤ꧀ꦠꦫꦲꦶꦠꦁ, ꦤꦶꦕ꧀ꦕꦤ꧀ꦠꦶ ꦄꦠ꧀ꦡꦺꦴ. ꦱꦧ꧀ꦧꦠꦺꦴ ꦥꦨꦤ꧀ꦠꦶ ꦏꦶꦭꦺꦱꦤ꧀ꦣꦏꦴꦫꦴꦨꦴꦮꦠꦺꦴ ꦕ ꦱꦩꦤ꧀ꦠꦠꦺꦴ ꦥꦨꦱ꧀ꦱꦫꦁ. ‘‘ꦱꦧ꧀ꦧꦠꦺꦴ ꦥꦥ’’ꦤ꧀ꦠꦶ ꦮꦴ ꦥꦴꦜꦺꦴ, ꦱꦧ꧀ꦧꦠꦺꦴ ꦥꦠꦠꦶꦠ꧀ꦡꦤ꧀ꦠꦶ ꦄꦠ꧀ꦡꦺꦴ. ꦕꦠ꧀ꦠꦴꦫꦷꦱꦏꦩ꧀ꦩꦛ꧀ꦜꦴꦤꦱꦔ꧀ꦑꦴꦠꦺꦲꦶ ꦠꦶꦠ꧀ꦡꦺꦲꦶ ꦎꦠꦫꦶꦠ꧀ꦮꦴ ꦄꦤꦸꦥꦮꦶꦱꦶꦠꦧ꧀ꦧꦁ ꦄꦩꦠꦱꦫꦤ꧀ꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦄꦤꦸꦥꦴꦢꦴ ꦏꦚ꧀ꦕꦶ ꦣꦩ꧀ꦩꦁ ꦄꦒ꧀ꦒꦲꦺꦠ꧀ꦮꦴ ꦮꦶꦩꦸꦕ꧀ꦕꦤ꧀ꦠꦶ ꦌꦠ꧀ꦡꦴꦠꦶ ꦄꦤꦸꦥꦴꦢꦴꦮꦶꦩꦺꦴꦏ꧀ꦑꦺꦴ, ꦤꦶꦧ꧀ꦧꦴꦤꦁ. ꦄꦤꦸꦥꦴꦢꦴ ꦮꦶꦩꦸꦕ꧀ꦕꦠꦶ ꦌꦠꦺꦤꦴꦠꦶ ꦄꦤꦸꦥꦴꦢꦴꦮꦶꦩꦺꦴꦏ꧀ꦑꦺꦴ, ꦄꦒ꧀ꦒꦩꦒ꧀ꦒꦺꦴ. ꦄꦤꦸꦥꦴꦢꦴꦮꦶꦩꦺꦴꦏ꧀ꦑꦤ꧀ꦠꦶꦏꦠꦴꦪ ꦥꦤ ꦄꦫꦲꦠ꧀ꦠꦦꦭꦁ ꦄꦤꦸꦥꦴꦢꦴꦮꦶꦩꦺꦴꦏ꧀ꦑꦺꦴꦠꦶ ꦮꦸꦠ꧀ꦠꦁ. ꦱꦺꦱꦁ ꦱꦸꦮꦶꦚ꧀ꦚꦺꦪ꧀ꦪꦩꦺꦮ.
ꦥꦚ꧀ꦕꦠ꧀ꦠꦪꦱꦸꦠ꧀ꦠꦮꦟ꧀ꦟꦤꦴꦪ ꦭꦷꦤꦠ꧀ꦡꦥ꧀ꦥꦏꦴꦱꦤꦴ ꦱꦩꦠ꧀ꦠꦴ.
꧓. ꦏꦶꦤ꧀ꦠꦶꦱꦸꦠ꧀ꦠꦮꦟ꧀ꦟꦤꦴ
꧓꧔. ꦨꦮꦺꦴꦠꦶ ꦥꦫꦶꦠ꧀ꦠꦺꦴ. ꦄꦨꦮꦺꦴꦠꦶ ꦩꦲꦤ꧀ꦠꦺꦴ. ꦮꦸꦢ꧀ꦣꦶꦄꦠ꧀ꦡꦺꦴ ꦲꦶ ꦄꦪꦁ ꦄ-ꦏꦴꦫꦺꦴ, ‘‘ꦱꦁꦮꦫꦴꦱꦁꦮꦫꦺꦴ, ꦦꦭꦴꦦꦭ’’ꦤ꧀ꦠꦶꦄꦴꦢꦷꦱꦸ ꦮꦶꦪ, ꦠꦱ꧀ꦩꦴ ꦨꦮꦴꦨꦮꦲꦺꦠꦹꦠꦶ ꦑꦸꦢ꧀ꦢꦏꦱ꧀ꦱ ꦩꦲꦤ꧀ꦠꦱ꧀ꦱ ꦮꦴ ꦨꦮꦱ꧀ꦱ ꦲꦺꦠꦸ, ꦠꦁ ꦥꦕ꧀ꦕꦴꦱꦷꦱꦩꦴꦤꦺꦴꦠꦶ ꦄꦠ꧀ꦡꦺꦴ. ꦠꦺꦤꦴꦲ – ‘‘ꦠꦱ꧀ꦩꦶꦁ ꦠꦱ꧀ꦩꦶꦁ ꦨꦮꦺ ꦱꦸꦑꦁ ꦮꦺꦢꦶꦱ꧀ꦱꦴꦩꦷ’’ꦠꦶꦄꦴꦢꦶ.
꧓꧕. ꦭꦺꦴꦏꦸꦠ꧀ꦠꦫꦧꦺꦴꦣꦶꦥꦏ꧀ꦑꦶꦪꦣꦩ꧀ꦩꦺ ꦈꦢ꧀ꦢꦶꦱ꧀ꦱ ꦥꦸꦡꦸꦗ꧀ꦗꦤꦴꦤꦁ ꦮꦶꦮꦴꦢꦺꦴ ꦱꦩ꧀ꦨꦮꦠꦷꦠꦶ ꦄꦴꦲ – ‘‘ꦭꦺꦴꦏꦶꦪꦭꦺꦴꦏꦸꦠ꧀ꦠꦫꦴꦮ ꦏꦡꦶꦠꦴ’’ꦠꦶ. ꦭꦺꦴꦏꦶꦪꦴꦥꦶ ꦲꦶ ꦧꦺꦴꦣꦶꦥꦏ꧀ꦑꦶꦪꦣꦩ꧀ꦩꦴ ꦭꦺꦴꦏꦸꦠ꧀ꦠꦫꦣꦩ꧀ꦩꦴꦣꦶꦒꦩꦱ꧀ꦱ ꦄꦴꦱꦤ꧀ꦤꦏꦴꦫꦟꦠ꧀ꦠꦴ ꦮꦶꦱꦺꦱꦏꦴꦫꦟꦤ꧀ꦠꦶ ꦪꦴꦮ ꦄꦚ꧀ꦚꦺꦲꦶ ꦭꦺꦴꦏꦶꦪꦣꦩ꧀ꦩꦺꦲꦶ ꦄꦨꦶꦮꦶꦱꦶꦛ꧀ꦜꦺꦴꦠꦶ ꦏꦠ꧀ꦮꦴ, ‘‘ꦆꦩꦺꦱꦸ ꦱꦠ꧀ꦠꦠꦶꦁꦱꦧꦺꦴꦣꦶꦥꦏ꧀ꦑꦶꦪꦣꦩ꧀ꦩꦺꦱꦹ’’ꦠꦶ ꦄꦮꦶꦱꦺꦱꦺꦤ ꦮꦸꦠ꧀ꦠꦁ. ꦄꦠ꧀ꦡꦠꦺꦴ ꦤꦴꦤꦁ ꦲꦺꦴꦠꦷꦠꦶ ꦄꦠ꧀ꦡꦠꦺꦴ ꦨꦺꦢꦺꦴ ꦲꦺꦴꦠꦶ ꦧꦺꦴꦣꦶꦥꦏ꧀ꦑꦶꦪꦣꦩ꧀ꦩꦴꦤꦁ ꦱꦩꦣꦶꦒꦠꦠ꧀ꦠꦴ. ꦤ ꦲꦶ ꦏꦴꦪꦴꦢꦪꦺꦴ ꦨꦴꦮꦺꦠꦧ꧀ꦧꦴ, ꦱꦠꦶꦪꦺꦮ ꦥꦤ ꦨꦴꦮꦺꦠꦧ꧀ꦧꦴꦠꦶ. ꦧ꧀ꦪꦚ꧀ꦗꦤꦠꦺꦴ ꦤꦴꦤꦁ ꦨꦺꦢꦁ. ꦆꦩꦶꦤꦴꦥꦶ ꦏꦴꦫꦟꦺꦤꦴꦠꦶ ꦆꦩꦴꦪꦥꦶ ꦪꦸꦠ꧀ꦠꦶꦪꦴ. ꦆꦢꦴꦤꦶ ꦠꦁ ꦪꦸꦠ꧀ꦠꦶꦁ ꦢꦱ꧀ꦱꦺꦤ꧀ꦠꦺꦴ – ‘‘ꦄꦠ꧀ꦡꦚ꧀ꦕ ꦧ꧀ꦪꦚ꧀ꦗꦤꦚ꧀ꦕꦴ’’ꦠꦶꦄꦴꦢꦶꦩꦴꦲ. ꦠꦠ꧀ꦡ ꦱꦩꦴꦤꦺꦠ꧀ꦮꦴꦠꦶ ꦱꦸꦠ꧀ꦠꦤ꧀ꦠꦫꦠꦺꦴ ꦱꦩꦴꦤꦺꦠ꧀ꦮꦴ, ꦱꦸꦠ꧀ꦠꦤ꧀ꦠꦫꦥꦢꦺꦲꦶ ꦕ ꦱꦩꦴꦤꦺꦠ꧀ꦮꦴ. ꦄꦚ꧀ꦚꦡꦴꦠꦶ ꦄꦚ꧀ꦚꦠꦺꦴ, ꦨꦹꦠꦠꦺꦴ ꦄꦥꦒꦠꦁ ꦏꦠ꧀ꦮꦴꦠꦶ ꦄꦠ꧀ꦡꦺꦴ. ꦩꦶꦕ꧀ꦖꦴ ꦫꦺꦴꦥꦶꦠꦨꦴꦮꦺꦴꦠꦶ ꦄꦪꦴꦡꦴꦮꦠꦺꦴ ꦜꦥꦶꦠꦨꦴꦮꦺꦴ. ꦄꦠ꧀ꦡꦚ꧀ꦕ ꦧ꧀ꦪꦚ꧀ꦗꦤꦚ꧀ꦕ ꦮꦶꦚ꧀ꦚꦴꦥꦤꦏꦴꦫꦟꦩꦺꦮꦴꦠꦶ ꦄꦮꦶꦥꦫꦷꦠꦠ꧀ꦡꦱ꧀ꦱ ꦱꦢ꧀ꦢꦱ꧀ꦱ ꦕ ꦧꦸꦗ꧀ꦙꦤꦲꦺꦠꦸꦠꦴꦪ.
꧓꧗. ꦆꦣ ꦣꦩ꧀ꦩꦮꦶꦤꦪꦛ꧀ꦜꦴꦤꦺ ꦱꦠꦶꦪꦺꦮ ꦱꦠꦶꦥꦛ꧀ꦜꦴꦤꦤ꧀ꦠꦶ ꦒꦲꦶꦠꦴ, ꦄꦠ꧀ꦡꦠꦺꦴ ꦱꦩꦺꦠꦶ ꦤꦴꦩ ꦪꦴꦡꦴꦮꦠꦺꦴ ꦄꦠ꧀ꦡꦱ꧀ꦱ ꦒꦲꦶꦠꦠ꧀ꦠꦴ. ꦄꦱꦨꦴꦮꦤꦶꦫꦸꦠ꧀ꦠꦶꦨꦴꦮꦠꦺꦴ ꦧ꧀ꦪꦚ꧀ꦗꦤꦠꦺꦴ ꦤꦴꦤꦠ꧀ꦠꦤ꧀ꦠꦶ ꦠꦁ ꦭꦶꦔ꧀ꦒꦨꦺꦢꦺꦤ ꦮꦕꦤꦨꦺꦢꦺꦤ ꦕ ꦢꦱ꧀ꦱꦺꦤ꧀ꦠꦺꦴ, ‘‘ꦱꦠꦶꦥꦛ꧀ꦜꦴꦤꦺꦴꦠꦶ ꦮꦴ ꦱꦠꦶꦥꦛ꧀ꦜꦴꦤꦴꦠꦶ ꦮꦴ ꦩꦶꦕ꧀ꦖꦴ ꦫꦺꦴꦥꦺꦡꦴ’’ꦠꦶ ꦄꦴꦲ. ꦄꦥ꧀ꦥꦩꦠ꧀ꦠꦏꦤ꧀ꦠꦶ ꦄꦟꦸꦩꦠ꧀ꦠꦁ ꦱꦭ꧀ꦭꦲꦸꦏꦁ, ꦤ ꦒꦫꦸꦠꦫꦁ ꦄꦣꦤꦶꦠꦁ ꦏꦠ꧀ꦮꦴ ꦮꦠ꧀ꦠꦧ꧀ꦧꦩ꧀ꦥꦶ ꦣꦤꦶꦠꦁ ꦓꦺꦴꦱꦮꦤ꧀ꦠꦁ ꦏꦠ꧀ꦮꦴ ꦫꦺꦴꦥꦶꦠꦺ ꦮꦸꦠ꧀ꦠꦢꦺꦴꦱꦴꦨꦴꦮꦠꦺꦴꦠꦶ ꦠꦺꦤꦴꦲ – ‘‘ꦤꦶꦧ꧀ꦧꦸꦠꦶꦁ ꦥꦠ꧀ꦠꦸꦁ ꦱꦏ꧀ꦏꦴ ꦲꦺꦴꦠꦷ’’ꦠꦶ.
ꦧ꧀ꦪꦚ꧀ꦗꦤꦱ꧀ꦱ ꦩꦶꦕ꧀ꦖꦴꦫꦺꦴꦥꦤꦁ ꦤ ꦮꦶꦱꦺꦱꦤ꧀ꦠꦫꦴꦪꦏꦫꦁ ꦲꦺꦴꦠꦷꦠꦶ ꦚꦴꦥꦤꦠ꧀ꦡꦁ, ꦕꦠꦸꦱꦸ ꦩꦒ꧀ꦒꦺꦱꦸ ꦥꦚ꧀ꦲꦁ ꦏꦡꦺꦠ꧀ꦮꦴꦮ ꦥꦫꦶꦤꦶꦧ꧀ꦧꦸꦠꦺꦴ. ꦱꦸꦠ꧀ꦠꦤ꧀ꦠꦧ꧀ꦪꦚ꧀ꦗꦤꦁ ꦱꦤ꧀ꦣꦴꦪꦺꦠꦁ ꦮꦸꦠ꧀ꦠꦁ – ‘‘ꦄꦥ꧀ꦥꦩꦠ꧀ꦠꦏꦁ ꦑꦺꦴ ꦥꦤꦴ’’ꦠꦶ.
꧓꧘. ꦄꦡ ꦕꦠꦸꦠ꧀ꦡꦮꦴꦫꦺ ꦮꦶꦮꦴꦢꦺꦴ ꦏꦱ꧀ꦩꦴ ꦗꦴꦠꦺꦴ? ꦪꦴꦮꦠꦴ ꦤꦺꦱꦁ ꦮꦕꦤꦁ ꦄꦠ꧀ꦡꦠꦺꦴ ꦕꦺꦮ ꦱꦩꦺꦠꦶ ꦧ꧀ꦪꦚ꧀ꦗꦤꦠꦺꦴ ꦕꦴꦠꦶ ꦄꦣꦶꦥ꧀ꦥꦴꦪꦺꦴ. ꦱꦚ꧀ꦚꦴꦪ ꦮꦶꦮꦴꦢꦺꦴꦠꦶ ꦏꦶꦚ꧀ꦕꦴꦥꦶ ꦱꦩꦺꦠꦶ ꦄꦠ꧀ꦡꦠꦺꦴ ꦕꦺꦮ ꦧ꧀ꦪꦚ꧀ꦗꦤꦠꦺꦴ ꦕ, ꦱꦚ꧀ꦚꦴ ꦥꦤ ꦤꦺꦱꦁ ꦄꦮꦶꦱꦸꦢ꧀ꦣꦴ, ꦠꦴꦪ ꦱꦚ꧀ꦚꦴꦪ ꦮꦱꦺꦤ ꦮꦶꦮꦴꦢꦺꦴ ꦗꦴꦠꦺꦴꦠꦶ ꦢꦱ꧀ꦱꦺꦤ꧀ꦠꦺꦴ ‘‘ꦄꦲ’’ꦤ꧀ꦠꦶꦄꦴꦢꦶꦩꦴꦲ. ꦄꦲꦁ ꦱꦠꦶꦥꦛ꧀ꦜꦴꦤꦤ꧀ꦠꦶ ꦮꦢꦴꦩꦶ, ꦄꦪꦁ ꦱꦠꦶꦥꦛ꧀ꦜꦴꦤꦺꦴꦠꦶ ꦮꦢꦠꦷꦠꦶ ꦌꦮꦁ ꦠꦺꦱꦁ ꦚꦴꦟꦁ ꦲꦺꦴꦠꦷꦠꦶ ꦆꦩꦩꦠ꧀ꦡꦁ, ‘‘ꦌꦱꦺꦮ ꦤꦪꦺꦴ’’ꦠꦶ ꦆꦩꦶꦤꦴ ꦄꦠꦶꦢꦶꦱꦠꦶ.
꧓꧙. ꦤ ꦕꦺꦴꦢꦤꦠ꧀ꦡꦴꦪ ꦮꦺꦒꦴꦪꦶꦠꦧ꧀ꦧꦤ꧀ꦠꦶ ꦱꦷꦓꦁ ꦱꦷꦓꦁ ꦤ ꦕꦺꦴꦢꦤꦴ ꦏꦴꦠꦧ꧀ꦧꦴꦠꦶ ꦄꦠ꧀ꦡꦺꦴ. ꦠꦱ꧀ꦩꦴꦠꦶ ꦪꦱ꧀ꦩꦴ ꦌꦏꦕ꧀ꦕꦺꦴ ꦏꦺꦴꦣꦤꦨꦴꦮꦺꦤ ꦌꦮꦁ ꦥꦛꦶꦥ꧀ꦦꦫꦶ, ꦠꦱ꧀ꦩꦴ. ꦄꦤꦴꦢꦴꦤꦢꦶꦛ꧀ꦜꦷꦠꦶ ꦄꦴꦢꦶꦪꦶꦠ꧀ꦮꦴ ꦄꦤꦨꦶꦤꦶꦮꦶꦱꦤꦠꦺꦴ ꦄꦤꦴꦢꦴꦤꦢꦶꦛ꧀ꦜꦷ ꦄꦢꦭ꦳꧀ꦲꦒ꧀ꦒꦴꦲꦷ. ꦥꦏ꧀ꦑꦶꦥꦤ꧀ꦠꦺꦴ ꦮꦶꦪꦴꦠꦶ ꦒꦶꦭꦶꦠ꧀ꦮꦴ ꦥꦏ꧀ꦑꦶꦥꦤ꧀ꦠꦺꦴ ꦮꦶꦪ.
ꦈꦥꦓꦴꦠꦺꦴꦠꦶ ꦕꦶꦠ꧀ꦠꦥ꧀ꦥꦓꦴꦠꦺꦴ ꦦꦫꦱꦸꦥꦓꦴꦠꦺꦴ ꦮꦶꦪ. ꦮꦟꦓꦛ꧀ꦛꦶꦠꦱ꧀ꦱ ꦮꦶꦪꦴꦠꦶ ꦮꦟꦺ ꦓꦛ꧀ꦛꦶꦠꦱ꧀ꦱ ꦮꦶꦪ ꦢꦸꦏ꧀ꦑꦸꦥ꧀ꦥꦠ꧀ꦠꦶ ꦕꦶꦠ꧀ꦠꦢꦸꦏ꧀ꦑꦸꦥ꧀ꦥꦠ꧀ꦠꦶ. ꦢ꧀ꦮꦺ ꦮꦴꦫꦺ ꦮꦠ꧀ꦮꦴꦥꦶ ꦮꦶꦱꦗ꧀ꦗꦺꦠꦷꦠꦶ ꦱꦸꦥ꧀ꦥꦛꦶꦤꦶꦱ꧀ꦱꦒ꧀ꦒꦷ ꦌꦮꦁ ꦥꦒꦺꦮ ꦕꦺꦴꦢꦶꦠꦩꦠ꧀ꦠꦺ ꦮꦶꦱ꧀ꦱꦗ꧀ꦗꦺꦠꦶ ꦕꦺꦠꦶ ꦄꦣꦶꦥ꧀ꦥꦴꦪꦺꦴ. ꦏꦡꦤꦮꦱꦺꦤ ꦕ ꦏꦴꦪꦕꦶꦠ꧀ꦠꦏꦶꦭꦩꦡꦺꦴ. ꦌꦮꦫꦹꦥꦺꦴꦠꦶ ꦱꦲꦱꦴ ꦄꦮꦶꦱ꧀ꦱꦗ꧀ꦗꦺꦤ꧀ꦠꦺꦤ ꦕꦺꦴꦢꦏꦱ꧀ꦱ ꦮꦶꦲꦺꦱꦴꦮꦴꦢꦺꦴ ꦲꦸꦠ꧀ꦮꦴꦥꦶ ꦄꦏ꧀ꦏꦺꦴꦣꦤꦴꦢꦶꦱꦨꦴꦮꦺꦴ.
ꦈꦥꦺꦏ꧀ꦑꦴꦠꦶ ꦱꦏꦺꦤ ꦏꦩ꧀ꦩꦺꦤ ꦥꦚ꧀ꦚꦴꦪꦶꦱ꧀ꦱꦠꦷꦠꦶ ꦠꦱ꧀ꦩꦶꦁ ꦥꦸꦒ꧀ꦒꦭꦺ ꦄꦗ꧀ꦙꦸꦥꦺꦏ꧀ꦑꦟꦴ. ꦈꦥꦺꦏ꧀ꦑꦁ ꦄꦠꦶꦩꦚ꧀ꦚꦠꦶ ꦤꦴꦩ ꦠꦱ꧀ꦱ ꦄꦤꦴꦕꦴꦫꦱ꧀ꦱ ꦄꦤꦗ꧀ꦙꦸꦥꦺꦏ꧀ꦑꦟꦠꦺꦴ.
꧔꧐. ꦮꦕꦤꦱꦚ꧀ꦕꦴꦫꦺꦴꦠꦶ ꦥꦺꦱꦸꦚ꧀ꦚꦮꦱꦺꦤ ꦄꦚ꧀ꦚꦡꦴꦮꦕꦤꦸꦥꦱꦁꦲꦴꦫꦺꦴ. ꦢꦶꦛ꧀ꦜꦶꦥꦭ꦳ꦴꦱꦺꦴꦠꦶ ꦪꦸꦒꦒ꧀ꦒꦴꦲꦮꦱꦺꦤ ꦭꦢ꧀ꦣꦶ. ꦱꦴ ꦥꦤ ꦕꦶꦠ꧀ꦠꦱ꧀ꦱ ꦄꦤꦴꦫꦴꦣꦤꦶꦪꦨꦴꦮꦺꦴ ꦱꦠ꧀ꦡꦸꦕꦶꦠ꧀ꦠꦱ꧀ꦱ ꦄꦤꦴꦫꦴꦣꦏꦨꦴꦮꦺꦴ. ꦏꦭꦲꦺꦴꦠꦶ ꦄꦣꦶꦏꦫꦟꦸꦥ꧀ꦥꦴꦢꦮꦱꦺꦤ ꦥꦮꦠ꧀ꦠꦺꦴ ꦮꦶꦒ꧀ꦒꦲꦺꦴ ꦨꦟ꧀ꦝꦤꦱ꧀ꦱ ꦥꦸꦧ꧀ꦧꦨꦴꦒꦺꦴ.
ꦪꦺꦤ ꦏꦴꦫꦟꦺꦤꦴꦠꦶ ꦪꦺꦤ ꦣꦩ꧀ꦩꦺꦤ ꦱꦠ꧀ꦡꦸꦱꦴꦱꦤꦺꦤ. ꦠꦩꦺꦮ ꦲꦶ ꦱꦤ꧀ꦣꦴꦪ ꦮꦢꦠꦶ – ‘‘ꦣꦩ꧀ꦩꦺꦴꦠꦶ ꦱꦴꦫꦟꦷꦪꦣꦩ꧀ꦩꦺꦴ ꦄꦣꦶꦥ꧀ꦥꦺꦠꦺꦴ’’ꦠꦶ. ꦌꦠ꧀ꦡꦴꦠꦶ ‘‘ꦣꦩ꧀ꦩꦱ꧀ꦱ ꦕꦴꦤꦸꦣꦩ꧀ꦩ’’ꦤ꧀ꦠꦶ ꦌꦠ꧀ꦡ. ꦣꦩ꧀ꦩꦺꦴꦠꦶ ꦱꦩ꧀ꦧꦸꦢ꧀ꦣꦱ꧀ꦱ ꦠꦱ꧀ꦱ ꦠꦡꦴ ꦥꦮꦠ꧀ꦠꦁ ꦧ꧀ꦪꦴꦏꦫꦟꦁ ꦪꦡꦴ ꦮꦶꦮꦴꦢꦴꦥꦤ꧀ꦤꦴ ꦱꦚ꧀ꦚꦠ꧀ꦠꦶꦁ ꦒꦕ꧀ꦖꦤ꧀ꦠꦶ. ꦠꦺꦤꦴꦲ – ‘‘ꦠꦺꦱꦁ ꦨꦶꦏ꧀ꦑꦹꦤꦁ ꦱꦚ꧀ꦚꦠ꧀ꦠꦶꦏꦫꦟ’’ꦤ꧀ꦠꦶ. ꦠꦢꦺꦮ ꦧ꧀ꦪꦴꦏꦫꦟꦁ ꦄꦤꦸꦣꦩ꧀ꦩꦺꦴꦠꦶ ꦨꦶꦏ꧀ꦑꦸꦤꦴ ꦮꦸꦕ꧀ꦕꦩꦴꦤꦺꦴ ꦄꦤꦸꦥꦮꦠ꧀ꦠꦺꦴ ꦣꦩ꧀ꦩꦺꦴ. ꦠꦺꦤꦴꦲ – ‘‘ꦠꦢꦺꦮ ꦧ꧀ꦪꦴꦏꦫꦺꦴꦠꦶ ꦤꦴꦩꦴ’’ꦠꦶ. ꦏꦺꦴꦕꦷꦠꦶ ꦪꦺꦴ ꦏꦺꦴꦕꦶ. ꦱꦲꦣꦩ꧀ꦩꦶꦏꦺꦴ ꦱꦏꦴꦫꦟꦺꦴ. ꦄꦚ꧀ꦚꦠ꧀ꦡꦺꦴ ꦄꦪꦁ ꦏꦶꦁ ꦱꦢ꧀ꦢꦺꦴꦠꦶ ꦄꦴꦲ ‘‘ꦄꦚ꧀ꦚꦺꦴ’’ꦠꦶ. ꦄꦱ꧀ꦱꦴꦠꦶ ꦮꦸꦠ꧀ꦠꦤꦪꦺꦤ ꦥꦛꦶꦥꦤ꧀ꦤꦨꦶꦏ꧀ꦑꦸꦤꦺꦴ, ꦠꦱ꧀ꦱ ꦥꦛꦶꦥꦠ꧀ꦠꦶ ꦤ ꦏꦺꦤꦕꦶ ꦒꦫꦲꦟꦷꦪꦴ ꦲꦺꦴꦠꦷꦠꦶ ꦄꦠ꧀ꦡꦺꦴ. ꦱꦺꦱꦁ ꦱꦧ꧀ꦧꦁ ꦱꦸꦮꦶꦚ꧀ꦚꦺꦪ꧀ꦪꦩꦺꦮ.
ꦏꦶꦤ꧀ꦠꦶꦱꦸꦠ꧀ꦠꦮꦟ꧀ꦟꦤꦴꦪ ꦭꦷꦤꦠ꧀ꦡꦥ꧀ꦥꦏꦴꦱꦤꦴ ꦱꦩꦠ꧀ꦠꦴ.
꧔. ꦱꦴꦩꦒꦴꦩꦱꦸꦠ꧀ꦠꦮꦟ꧀ꦟꦤꦴ
꧔꧑. ꦢ꧀ꦮꦺꦣꦶꦏꦗꦴꦠꦴꦠꦶ ꦗꦴꦠꦢ꧀ꦮꦺꦣꦶꦏꦴ ꦱꦚ꧀ꦗꦴꦠꦨꦺꦢꦴ. ꦢ꧀ꦮꦺꦗ꧀ꦙꦗꦴꦠꦴꦠꦶ ꦢꦸꦮꦶꦣꦨꦴꦮꦁ ꦥꦠ꧀ꦠꦴ. ꦨꦟ꧀ꦝꦤ꧀ꦠꦶ ꦥꦫꦶꦨꦴꦱꦤ꧀ꦠꦶ ꦌꦠꦺꦤꦴꦠꦶ ꦨꦟ꧀ꦝꦤꦁ, ꦮꦶꦫꦸꦢ꧀ꦣꦕꦶꦠ꧀ꦠꦠꦴ. ꦠꦤ꧀ꦠꦶ ꦨꦟ꧀ꦝꦤꦁ. ꦣꦩ꧀ꦩꦮꦶꦤꦪꦤ꧀ꦠꦶ ꦥꦴꦮꦕꦤꦁ. ꦮꦶꦠꦸꦗ꧀ꦗꦤ꧀ꦠꦴ ꦩꦸꦑꦱꦠ꧀ꦠꦷꦲꦶ. ꦱꦲꦶꦠꦁ ꦩꦺꦠꦶ ꦩꦪ꧀ꦲꦁ ꦮꦕꦤꦁ ꦱꦲꦶꦠꦁ ꦱꦶꦭꦶꦛ꧀ꦜꦁ ꦥꦸꦧ꧀ꦧꦴꦥꦫꦱꦩ꧀ꦧꦤ꧀ꦣꦁ ꦄꦠ꧀ꦡꦪꦸꦠ꧀ꦠꦁ. ꦠꦺꦤꦴꦲ ‘‘ꦄꦠ꧀ꦡꦱꦁꦲꦶꦠ’’ꦤ꧀ꦠꦶ. ꦄꦣꦶꦕꦶꦟ꧀ꦟꦤ꧀ꦠꦶ ꦄꦴꦕꦶꦟ꧀ꦟꦁ. ꦮꦶꦥꦫꦴꦮꦠ꧀ꦠꦤ꧀ꦠꦶ ꦮꦶꦫꦺꦴꦣꦢꦱ꧀ꦱꦤꦮꦱꦺꦤ ꦥꦫꦴꦮꦠ꧀ꦠꦶꦠꦁ, ꦥꦫꦴꦮꦠ꧀ꦠꦁ ꦢꦹꦱꦶꦠꦤ꧀ꦠꦶ ꦄꦠ꧀ꦡꦺꦴ. ꦠꦺꦤꦴꦲ – ‘‘ꦕꦶꦫꦏꦴꦭꦮꦱꦺꦤ…ꦥꦺ… ꦤꦶꦮꦠ꧀ꦠ’’ꦤ꧀ꦠꦶ. ꦥꦫꦶꦪꦺꦱꦩꦴꦤꦺꦴ ꦕꦫ, ꦠꦠ꧀ꦡ ꦠꦠ꧀ꦡ ꦒꦤ꧀ꦠ꧀ꦮꦴ ꦱꦶꦏ꧀ꦑꦴꦲꦷꦠꦶ ꦄꦠ꧀ꦡꦺꦴ. ꦱꦕꦺ ꦱꦏ꧀ꦏꦺꦴꦱꦶ, ꦆꦢꦴꦤꦶꦩꦺꦮ ꦩꦪꦴ ꦮꦺꦜꦶꦠꦢꦺꦴꦱꦁ ꦤꦶꦧ꧀ꦧꦺꦜꦺꦲꦶ. ꦩꦫꦟꦩꦺꦮꦴꦠꦶ ꦄꦚ꧀ꦚꦩꦚ꧀ꦚꦓꦴꦠꦮꦱꦺꦤ ꦩꦫꦟꦩꦺꦮ.
ꦤꦴꦛꦥꦸꦠ꧀ꦠꦱ꧀ꦱ ꦆꦩꦺꦠꦶ ꦤꦴꦛꦥꦸꦠ꧀ꦠꦶꦪꦴ. ꦠꦺ ꦥꦤ ꦠꦱ꧀ꦱ ꦱꦶꦱ꧀ꦱꦴꦠꦶ ꦄꦴꦲ ‘‘ꦄꦤ꧀ꦠꦺꦮꦴꦱꦶꦏꦺꦱꦹ’’ꦠꦶ. ꦥꦸꦫꦶꦩꦥꦛꦶꦥꦠ꧀ꦠꦶꦠꦺꦴ ꦥꦛꦶꦤꦶꦮꦠ꧀ꦠꦤꦁ ꦥꦛꦶꦮꦴꦤꦁ, ꦠꦁ ꦫꦹꦥꦁ ꦱꦨꦴꦮꦺꦴ ꦌꦠꦺꦱꦤ꧀ꦠꦶ ꦥꦛꦶꦮꦴꦤꦫꦹꦥꦴ. ꦠꦺꦤꦴꦲ ‘‘ꦤꦶꦮꦠ꧀ꦠꦤꦱꦨꦴꦮꦴ’’ꦠꦶ. ꦏꦡꦤꦁ ꦄꦠ꧀ꦡꦱ꧀ꦱ ꦄꦴꦕꦶꦏ꧀ꦑꦤꦁ. ꦥꦮꦺꦢꦤꦁ ꦠꦱ꧀ꦱ ꦲꦺꦠꦸꦢꦴꦲꦫꦟꦴꦤꦶ ꦄꦴꦲꦫꦶꦠ꧀ꦮꦴ ꦧꦺꦴꦣꦤꦁ. ꦤ ꦈꦥꦱꦩꦴꦪ ꦱꦁꦮꦠ꧀ꦠꦠꦷꦠꦶ ꦄꦤꦸꦥꦱꦩꦱꦁꦮꦠ꧀ꦠꦤꦁ, ꦠꦢꦺꦮ ꦄꦤꦸꦥꦱꦩꦱꦁꦮꦠ꧀ꦠꦤꦶꦏꦁ, ꦠꦱ꧀ꦩꦶꦁ. ꦱꦩꦸꦱ꧀ꦱꦶꦠꦁ ꦲꦸꦠ꧀ꦮꦴ ꦥꦠꦶꦛ꧀ꦜꦴꦲꦺꦠꦸꦨꦴꦮꦠꦺꦴ ꦡꦹꦥꦁ ꦥꦠꦶꦛ꧀ꦜꦴꦠꦶ ꦄꦴꦲ – ‘‘ꦨꦶꦤ꧀ꦤꦡꦹꦥꦺꦠꦶ ꦨꦶꦤ꧀ꦤꦥꦠꦶꦛ꧀ꦜꦺ’’ꦠꦶ. ꦡꦹꦥꦺꦴꦠꦶ ꦮꦴ ꦣꦩ꧀ꦩꦱ꧀ꦱ ꦤꦶꦪ꧀ꦪꦴꦤꦨꦴꦮꦺꦴ ꦮꦺꦢꦶꦠꦧ꧀ꦧꦺꦴ, ꦄꦚ꧀ꦚꦣꦩ꧀ꦩꦺ ꦄꦨꦶꦨꦸꦪ꧀ꦪ ꦱꦩꦸꦱ꧀ꦱꦶꦠꦛ꧀ꦜꦺꦤ. ꦱꦺꦴ ꦤꦶꦒꦟ꧀ꦜꦱ꧀ꦱ ꦱꦩꦪꦺ ꦏꦺꦲꦶꦕꦶ ꦄꦨꦶꦤ꧀ꦤꦱꦩ꧀ꦩꦠꦺꦴꦥꦶ ꦨꦶꦤ꧀ꦤꦺꦴ ꦮꦶꦤꦛ꧀ꦜꦺꦴꦪꦺꦮ ꦱꦧ꧀ꦧꦺꦤ ꦱꦧ꧀ꦧꦁ ꦄꦨꦴꦮꦠꦺꦴꦠꦶ ꦨꦶꦤ꧀ꦤꦡꦹꦥꦺꦴ. ꦱꦺꦴ ꦌꦮ ꦤꦶꦪ꧀ꦪꦴꦤꦨꦴꦮꦺꦴ ꦮꦛ꧀ꦛꦢꦸꦏ꧀ꦑꦠꦺꦴ ꦩꦸꦕ꧀ꦕꦶꦠꦸꦏꦴꦩꦴꦤꦁ ꦥꦛꦶꦱꦫꦟꦁ, ꦠꦁ ꦌꦠ꧀ꦡ ꦤꦠ꧀ꦡꦷꦠꦶ ꦄꦥ꧀ꦥꦛꦶꦱꦫꦟꦺꦴ, ꦠꦱ꧀ꦩꦶꦁ ꦨꦶꦤ꧀ꦤꦡꦹꦥꦺ ꦄꦥ꧀ꦥꦛꦶꦱꦫꦟꦺꦠꦶ ꦌꦮꦩꦺꦠ꧀ꦡ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ.
ꦄꦴꦕꦫꦶꦪꦥ꧀ꦥꦩꦴꦟꦤ꧀ꦠꦶ ꦄꦴꦕꦫꦶꦪꦩꦸꦛ꧀ꦜꦶ ꦲꦸꦠ꧀ꦮꦴ ꦥꦩꦴꦟꦨꦹꦠꦁ. ꦤꦴꦤꦴꦤꦷꦲꦴꦫꦺꦤꦴꦠꦶ ꦤꦴꦤꦴꦏꦴꦫꦺꦤ. ‘‘ꦮꦶꦮꦴꦢꦺꦴ ꦤ ꦈꦥ꧀ꦥꦗ꧀ꦗꦷ’’ꦠꦶ ꦮꦠ꧀ꦮꦴ ꦠꦱ꧀ꦱ ꦄꦤꦸꦥ꧀ꦥꦠ꧀ꦠꦶꦏꦴꦫꦟꦁ ꦢꦱ꧀ꦱꦺꦤ꧀ꦠꦺꦴ, ‘‘ꦱꦠ꧀ꦡꦴ ꦲꦶ…ꦥꦺ… ꦄꦮꦶꦮꦴꦢꦏꦴꦫꦟꦁ ꦏꦠ꧀ꦮꦴꦮ ꦥꦫꦶꦤꦶꦧ꧀ꦧꦴꦪꦷ’’ꦠꦶ ꦮꦠ꧀ꦮꦴ ꦠꦁ ꦮꦶꦮꦫꦶꦠꦸꦁ ‘‘ꦨꦒꦮꦠꦴ ꦲꦷ’’ꦠꦶꦄꦴꦢꦶ ꦮꦸꦠ꧀ꦠꦁ. ꦥꦠꦶꦛ꧀ꦜꦴ ꦕ ꦄꦮꦱ꧀ꦱꦪꦺꦴ ꦕ, ‘‘ꦄꦪꦁ ꦣꦩ꧀ꦩꦺꦴ ꦄꦪꦁ ꦮꦶꦤꦪꦺꦴ ꦆꦢꦁ ꦱꦠ꧀ꦡꦸꦱꦴꦱꦤ’’ꦤ꧀ꦠꦶ ꦮꦶꦤꦶꦕ꧀ꦖꦪꦤꦺ ꦩꦲꦴꦥꦢꦺꦱꦴ, ꦥꦚ꧀ꦲꦧ꧀ꦪꦴꦏꦫꦟꦴꦤꦶ ꦕ, ꦪꦱ꧀ꦩꦴ ꦠꦺꦱꦸ ꦥꦠꦶꦛ꧀ꦜꦴꦪ ꦠꦺ ꦄꦮꦱ꧀ꦱꦴꦪ ꦣꦩ꧀ꦩꦮꦶꦤꦪꦣꦫꦴ ꦕ ꦤꦶꦕ꧀ꦖꦪꦁ ꦒꦕ꧀ꦖꦤ꧀ꦠꦶ. ꦠꦡꦴ ꦲꦶ ꦱꦸꦠ꧀ꦠꦤ꧀ꦠꦩꦲꦴꦥꦢꦺꦱꦠꦺꦴ ꦮꦶꦤꦪꦺ ꦏꦺꦤꦕꦶ ꦥꦸꦕ꧀ꦖꦶꦠꦺꦴ ꦄꦠ꧀ꦡꦺꦴ ꦕꦠꦸꦤ꧀ꦤꦁ ꦥꦚ꧀ꦲꦧ꧀ꦪꦴꦏꦫꦟꦴꦤꦁ ꦮꦱꦺꦤ ꦱꦸꦮꦶꦤꦶꦕ꧀ꦖꦶꦠꦫꦹꦥꦺꦴ, ꦠꦱ꧀ꦩꦴ ꦣꦩ꧀ꦩꦮꦶꦤꦪꦺꦴ ꦆꦣ ꦱꦠ꧀ꦡꦸ ꦏꦶꦕ꧀ꦕꦁ ꦏꦴꦠꦸꦁ ꦱꦏ꧀ꦏꦺꦴꦠꦷꦠꦶ ꦄꦴꦲ – ‘‘ꦠꦺꦤꦺꦮꦴ’’ꦠꦶꦄꦴꦢꦶ, ꦠꦱ꧀ꦩꦴ ꦈꦭ꦳ꦴꦫꦴꦪ ꦢꦺꦱꦤꦴꦪ ꦨꦴꦗꦤꦤ꧀ꦠꦶ ꦄꦣꦶꦥ꧀ꦥꦴꦪꦺꦴ.
꧔꧒. ꦥꦛꦶꦥꦮꦶꦛ꧀ꦜꦁ ꦏꦠ꧀ꦮꦴ ꦄꦴꦲꦫꦶꦠꦧ꧀ꦧꦠꦺꦴ, ꦱꦕ꧀ꦕꦁ ꦏꦴꦫꦶꦠꦧ꧀ꦧꦠꦺꦴ ꦥꦴꦨꦠꦁ ꦩꦹꦭꦤ꧀ꦠꦶ ꦄꦴꦲ – ‘‘ꦏꦡꦴꦥꦴꦨꦠ’’ꦤ꧀ꦠꦶ, ꦣꦩ꧀ꦩꦏꦡꦴꦪ ꦩꦹꦭꦏꦴꦫꦟꦤ꧀ꦠꦶ ꦄꦠ꧀ꦡꦺꦴ. ꦪꦺꦱꦁ ꦮꦱꦺꦤ ꦮꦶꦮꦴꦢꦺꦴ ꦈꦥ꧀ꦥꦤ꧀ꦤꦺꦴ, ꦠꦺꦪꦺꦮ ꦄꦣꦩ꧀ꦩꦮꦴꦢꦶꦤꦺꦴ, ꦠꦺꦱꦁ ꦠꦴꦮ ꦱꦺꦴ ꦄꦲꦶꦠꦴꦪ ꦢꦸꦏ꧀ꦑꦴꦪ ꦱꦁꦮꦠ꧀ꦠꦠꦸ, ꦠꦠꦺꦴ ꦄꦚ꧀ꦚꦺꦱꦁ ꦢꦺꦮꦩꦤꦸꦱ꧀ꦱꦴꦤꦁ ꦏꦡꦤ꧀ꦠꦶ, ꦕꦺꦴꦢꦤꦴ ꦥꦫꦩ꧀ꦥꦫꦴꦪ ꦱꦁꦏꦶꦭꦺꦱꦮꦠ꧀ꦡꦸꦨꦴꦮꦠꦺꦴꦠꦶ ꦥꦫꦶꦲꦴꦫꦺꦴ. ꦠꦺꦤꦴꦲ – ‘‘ꦏꦺꦴꦱꦩ꧀ꦧꦏꦏ꧀ꦑꦤ꧀ꦣꦏꦺ ꦮꦶꦪꦴ’’ꦠꦶꦄꦴꦢꦶ.
꧔꧓. ꦄꦨꦶꦚ꧀ꦚꦴ ꦢꦺꦱꦶꦠꦴꦠꦶ ꦄꦨꦶꦮꦶꦱꦶꦛ꧀ꦜꦴꦪ ꦥꦚ꧀ꦚꦴꦪ ꦗꦴꦤꦶꦠ꧀ꦮꦴ ꦧꦺꦴꦣꦶꦠꦴ. ꦥꦠꦶꦱ꧀ꦱꦪꦩꦴꦤꦫꦹꦥꦴꦠꦶ ꦄꦥꦢꦶꦱ꧀ꦱ ꦥꦠꦶꦱ꧀ꦱꦪꦩꦴꦤꦴ ꦒꦫꦸꦏꦮꦱꦺꦤ ꦤꦶꦱ꧀ꦱꦪꦩꦴꦤꦱꦨꦴꦮꦴ. ꦠꦺꦤꦴꦲ – ‘‘ꦈꦥꦤꦶꦱ꧀ꦱꦴꦪ ꦮꦶꦲꦫꦤ꧀ꦠꦷ’’ꦠꦶ, ꦒꦫꦸꦠꦫꦁ ꦤꦶꦱ꧀ꦱꦪꦁ ꦏꦠ꧀ꦮꦴ ꦮꦶꦲꦫꦤ꧀ꦠꦷꦠꦶ ꦄꦠ꧀ꦡꦺꦴ. ꦥꦫꦶꦮꦴꦫꦺ ꦥꦚ꧀ꦚꦠ꧀ꦠꦴꦤꦷꦠꦶ, ‘‘ꦄꦴꦗꦷꦮꦲꦺꦠꦸ ꦄꦴꦗꦷꦮꦏꦴꦫꦟꦴ’’ꦠꦶ, ꦌꦮꦁ ꦤꦶꦢ꧀ꦣꦴꦫꦺꦠ꧀ꦮꦴ ꦥꦫꦶꦮꦴꦫꦥꦴꦭ꦳ꦶꦪꦁ (ꦥꦫꦶ. ꧓꧓꧖) ꦄꦴꦱꦔ꧀ꦏꦫꦮꦱꦺꦤ ꦜꦥꦶꦠꦴꦤꦶ. ‘‘ꦌꦮꦚ꧀ꦕ ꦥꦤ, ꦨꦶꦏ꧀ꦑꦮꦺ, ꦆꦩꦁ ꦱꦶꦏ꧀ꦑꦴꦥꦢꦁ ꦈꦢ꧀ꦢꦶꦱꦺꦪ꧀ꦪꦴ’’ꦠꦶ (ꦥꦴꦫꦴ. ꧓꧙, ꧔꧒, ꧔꧓) ꦮꦶꦨꦔ꧀ꦒꦥꦴꦜꦮꦱꦺꦤꦺꦮ ꦲꦶ ꦠꦴꦤꦶ ꦨꦒꦮꦠꦴ ꦥꦚ꧀ꦚꦠ꧀ꦠꦴꦤꦶ. ꦠꦴꦤꦶ ꦜꦥꦺꦠ꧀ꦮꦴ ꦱꦺꦱꦴꦤꦶ ꦱꦧ꧀ꦧꦱꦶꦏ꧀ꦑꦴꦥꦢꦴꦤꦶ ꦄꦣꦶꦥꦴꦠꦶꦩꦺꦴꦏ꧀ꦑꦁ ꦤꦴꦩꦴꦠꦶ, ꦆꦢꦁ ꦒꦺꦴꦧꦭꦷꦧꦢ꧀ꦢꦚꦴꦪꦺꦤ ꦮꦸꦠ꧀ꦠꦤ꧀ꦠꦶ ꦢꦛ꧀ꦜꦧ꧀ꦧꦁ ꦠꦺꦱꦩ꧀ꦥꦶ ꦄꦣꦶꦥꦴꦠꦶꦩꦺꦴꦏ꧀ꦑꦨꦴꦮꦠꦺꦴ.
ꦠꦠ꧀ꦫꦴꦪꦁ ꦤꦪꦺꦴꦠꦶ ꦠꦱ꧀ꦩꦶꦁ ꦱꦸꦥ꧀ꦥꦗꦲꦤꦴꦪ ꦄꦥ꧀ꦥꦩꦠ꧀ꦠꦏꦨꦴꦮꦺ ꦄꦪꦁ ꦮꦏ꧀ꦑꦩꦴꦤꦺꦴ. ꦠꦴꦤꦷꦠꦶ ꦥꦟꦷꦠꦨꦺꦴꦗꦤꦴꦤꦶ. ꦪꦺꦴ ꦏꦺꦴꦕꦷꦠꦶ ꦨꦶꦏ꧀ꦑꦸ ꦮꦴ ꦨꦶꦏ꧀ꦑꦸꦤꦷ ꦮꦴ. ꦢꦸꦏ꧀ꦏꦛꦮꦠ꧀ꦡꦸꦏꦤ꧀ꦠꦶ ꦪꦁ ꦏꦶꦚ꧀ꦕꦶ ꦢꦸꦏ꧀ꦏꦛꦴꦥꦠ꧀ꦠꦶꦮꦠ꧀ꦡꦸꦏꦁ. ꦠꦺꦤꦴꦠꦶ ꦱꦸꦥ꧀ꦥꦗꦲꦤꦨꦴꦮꦺꦤ ꦩꦹꦭꦴꦥꦠ꧀ꦠꦶꦮꦷꦠꦶꦏ꧀ꦏꦩꦱ꧀ꦱ ꦄꦟꦸꦩꦠ꧀ꦠꦠꦴꦪ.
ꦥꦸꦧ꧀ꦧꦨꦴꦒꦩꦒ꧀ꦒꦤ꧀ꦠꦶ ꦭꦺꦴꦏꦶꦪꦩꦒ꧀ꦒꦁ. ꦠꦠ꧀ꦫꦴꦠꦶ ꦠꦱ꧀ꦩꦶꦁ ꦥꦸꦧ꧀ꦧꦨꦴꦒꦩꦒ꧀ꦒꦁ ꦤꦶꦱ꧀ꦱꦴꦪ ꦮꦶꦮꦴꦢꦸꦥ꧀ꦥꦴꦢꦺ. ꦎꦨꦴꦱꦚꦴꦟꦤ꧀ꦠꦶ ꦎꦨꦴꦱꦱ꧀ꦱ ꦈꦥ꧀ꦥꦠ꧀ꦠꦶꦲꦺꦠꦸꦨꦹꦠꦁ ꦚꦴꦟꦁ. ꦠꦠ꧀ꦡ ꦥꦤ ꦱꦺꦴ ꦩꦒ꧀ꦒꦱꦚ꧀ꦚꦶꦨꦴꦮꦺꦤ ꦩꦒ꧀ꦒꦺꦴ ꦕ ꦕꦠꦸꦧ꧀ꦧꦶꦣꦺꦴꦠꦶ ꦱꦸꦠꦠ꧀ꦠꦴ, ‘‘ꦥꦛ꧀ꦜꦩꦩꦒ꧀ꦒꦺꦴ ꦤꦴꦩꦴ’’ꦠꦶꦄꦴꦢꦶꦩꦴꦲ. ꦌꦮꦤ꧀ꦠꦶ ꦌꦮꦁ ꦄꦱꦤ꧀ꦢꦶꦢ꧀ꦣꦁ ꦄꦥꦫꦶꦱꦔ꧀ꦏꦶꦠꦁ ꦥꦫꦶꦕ꧀ꦕꦠ꧀ꦠꦁ ꦏꦠ꧀ꦮꦴ ꦏꦩ꧀ꦩꦛ꧀ꦜꦴꦤꦁ ꦏꦡꦺꦠꦸꦁ ꦤ ꦱꦏ꧀ꦏꦺꦴꦠꦶ.
ꦕꦺꦠꦶꦪꦁ ꦤ ꦢꦶꦛ꧀ꦜꦤ꧀ꦠꦶ ꦠꦱ꧀ꦱ ꦏꦠꦁ ꦡꦹꦥꦁ ꦮꦢꦠꦶ. ꦤꦶꦤ꧀ꦢꦶꦪꦺ ꦥꦸꦡꦸꦗ꧀ꦗꦤꦨꦴꦮꦺ ꦜꦶꦠꦁ ꦥꦴꦱꦁꦱꦁ ꦄꦫꦶꦪꦨꦴꦮꦁ ꦄꦴꦫꦺꦴꦥꦺꦠ꧀ꦮꦴ ꦠꦁ ꦩꦶꦕ꧀ꦖꦴꦭꦢ꧀ꦣꦶꦁ ꦄꦨꦶꦤꦶꦮꦶꦱ꧀ꦱ ꦥꦒ꧀ꦒꦪ꧀ꦲ ꦮꦺꦴꦲꦫꦟꦠꦺꦴ ꦱꦒ꧀ꦒꦺꦴꦥꦶ ꦩꦒ꧀ꦒꦺꦴꦥꦶ ꦮꦴꦫꦶꦠꦺꦴꦪꦺꦮꦴꦠꦶ. ꦮꦸꦠ꧀ꦠꦚ꧀ꦲꦺꦠꦁ –
‘‘ꦪꦺꦴ ꦤꦶꦤ꧀ꦢꦶꦪꦁ ꦥꦱꦁꦱꦠꦶ, ꦠꦁ ꦮꦴ ꦤꦶꦤ꧀ꦢꦠꦶ ꦪꦺꦴ ꦥꦱꦁꦱꦶꦪꦺꦴ;
ꦮꦶꦕꦶꦤꦴꦠꦶ ꦩꦸꦑꦺꦤ ꦱꦺꦴ ꦏꦭꦶꦁ, ꦏꦭꦶꦤꦴ ꦠꦺꦤ ꦱꦸꦑꦁ ꦤ ꦮꦶꦤ꧀ꦢꦠꦷ’’ꦠꦶ. (ꦱꦸ. ꦤꦶ. ꧖꧖꧓; ꦱꦁ. ꦤꦶ. ꧑.꧑꧘꧐-꧑꧘꧑; ꦄ. ꦤꦶ. ꧔.꧓; ꦤꦺꦠ꧀ꦠꦶ. ꧙꧒);
‘‘ꦑꦟꦺꦤꦺꦮ ꦄꦫꦲꦠ꧀ꦠꦁ ꦥꦴꦥꦸꦟꦶꦠꦸꦁ ꦱꦩꦠ꧀ꦡꦏꦩ꧀ꦩꦛ꧀ꦜꦴꦤꦏꦡꦁ ꦄꦴꦕꦶꦏ꧀ꦑꦶꦱ꧀ꦱꦴꦩꦷ’’ꦠꦶ ꦲꦶ ꦆꦩꦶꦤꦴ ꦠꦠ꧀ꦡ ꦏꦺꦴꦲꦚ꧀ꦚꦩ꧀ꦥꦶ ꦢꦶꦱ꧀ꦱꦠꦶ; ꦆꦠꦫꦺꦱꦸ ꦥꦤ ꦮꦠ꧀ꦠꦧ꧀ꦧꦩꦺꦮ ꦤꦠ꧀ꦡꦶ. ꦈꦥ꧀ꦥꦴꦛꦺꦠ꧀ꦮꦴꦠꦶ ꦈꦢ꧀ꦣꦫꦶꦠ꧀ꦮꦴ. ‘‘ꦄꦡ ꦠꦺ ꦨꦶꦏ꧀ꦑꦹ’’ꦠꦶꦄꦴꦢꦶ ꦱꦺꦱꦁ ꦤꦴꦩ. ‘‘ꦄꦩꦠꦁ ꦠꦺ ꦥꦫꦶꦨꦸꦚ꧀ꦗꦤ꧀ꦠꦶ, ꦪꦺ ꦏꦴꦪꦒꦠꦴꦱꦠꦶꦁ ꦥꦫꦶꦨꦸꦚ꧀ꦗꦤ꧀ꦠꦷ’’ꦠꦶ (ꦄ. ꦤꦶ. ꧑.꧖꧐꧐) ꦮꦕꦤꦁ ꦢꦸꦒ꧀ꦒꦲꦶꦠꦁ ꦒꦟ꧀ꦲꦴꦥꦺꦠ꧀ꦮꦴ, ‘‘ꦌꦠ꧀ꦠꦴꦮꦠꦴ ꦮꦺꦴ ꦄꦩꦠꦁ ꦥꦫꦶꦨꦸꦠ꧀ꦠꦁ ꦤꦴꦩ ꦨꦮꦶꦱ꧀ꦱꦠꦷ’’ꦠꦶ ꦄꦴꦲ.
꧔꧔. ꦌꦮꦤ꧀ꦠꦶ ꦄꦴꦏꦴꦫꦭꦏ꧀ꦑꦟꦩꦺꦠꦁ, ꦤ ꦄꦴꦏꦴꦫꦤꦶꦪꦩꦤꦁ. ꦠꦺꦤ ꦆꦩꦶꦤꦴꦮ ꦏꦴꦫꦟꦺꦤ ꦕ ꦪꦺꦴ ꦮꦶꦮꦴꦢꦺꦴ ꦈꦥ꧀ꦥꦗ꧀ꦗꦺꦪ꧀ꦪꦴꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦒꦫꦸꦱ꧀ꦩꦶꦁ ꦒꦫꦹꦠꦶ ꦥꦮꦠ꧀ꦠꦁ ꦕꦶꦠ꧀ꦠꦁ ꦒꦫꦸꦮꦶꦱꦪꦠ꧀ꦠꦴ ꦠꦁꦱꦲꦕꦫꦶꦠꦠ꧀ꦠꦴ ꦒꦫꦸ, ꦠꦱ꧀ꦱ ꦨꦴꦮꦺꦴ ꦒꦴꦫꦮꦁ, ꦒꦫꦸꦏꦫꦟꦁ, ꦠꦁ ꦌꦠ꧀ꦡ ꦤꦠ꧀ꦡꦷꦠꦶ ꦄꦒꦴꦫꦮꦺꦴ. ꦠꦺꦤꦴꦲ ‘‘ꦒꦴꦫꦮꦮꦶꦫꦲꦶꦠꦺꦴ’’ꦠꦶ. ꦒꦫꦸꦱ꧀ꦱ ꦒꦴꦫꦮꦮꦱꦺꦤ ꦥꦠꦶꦱ꧀ꦱꦪꦤꦁ ꦥꦠꦶꦱ꧀ꦱꦺꦴꦠꦶ ꦮꦸꦕ꧀ꦕꦠꦶ ꦤꦷꦕꦮꦸꦠ꧀ꦠꦶꦠꦴ, ꦠꦥ꧀ꦥꦛꦶꦥꦏ꧀ꦑꦠꦺꦴ ꦄꦥ꧀ꦥꦠꦶꦱ꧀ꦱꦺꦴꦠꦶ ꦄꦴꦲ – ‘‘ꦄꦥ꧀ꦥꦠꦶꦱ꧀ꦱꦪꦺꦴ ꦄꦤꦷꦕꦮꦸꦠ꧀ꦠꦷ’’ꦠꦶ. ꦌꦠ꧀ꦡ ꦪꦡꦴꦪꦁ ꦥꦸꦒ꧀ꦒꦭꦺꦴ ꦱꦠ꧀ꦡꦫꦶ ꦄꦒꦴꦫꦮꦺꦴ ꦤꦴꦩ ꦲꦺꦴꦠꦶ, ꦠꦁ ꦢꦱ꧀ꦱꦺꦠꦸꦁ, ‘‘ꦌꦠ꧀ꦡ ꦥꦤꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦠ꧀ꦡ ꦠꦷꦱꦸꦏꦴꦭꦺꦱꦸ ꦈꦥꦛ꧀ꦜꦴꦤꦁ ꦤ ꦪꦴꦠꦷꦠꦶꦄꦴꦢꦶ ꦱꦩꦸꦢꦴꦪꦏꦶꦠ꧀ꦠꦤꦄꦤꦮꦱꦺꦱꦢꦱ꧀ꦱꦤꦁ, ꦄꦮꦪꦮꦠꦺꦴ ꦥꦤ ꦄꦒꦴꦫꦮꦱꦶꦢ꧀ꦣꦶ ꦪꦡꦴ ꦠꦁ ꦱꦴꦩꦚ꧀ꦚꦠꦺꦴ ꦱꦶꦏ꧀ꦑꦴꦥꦢꦱꦩꦴꦢꦴꦤꦁ ꦠꦧ꧀ꦧꦶꦱꦺꦱꦺꦴ ꦨꦺꦢꦺꦴ. ꦌꦱ ꦤꦪꦺꦴ ꦱꦺꦱꦺꦱꦸꦥꦶ.
ꦱꦏ꧀ꦏꦕ꧀ꦕꦁ ꦤ ꦒꦕ꧀ꦖꦠꦷꦠꦶ ꦄꦴꦢꦫꦮꦱꦺꦤ ꦤ ꦒꦕ꧀ꦖꦠꦶ. ꦱꦔ꧀ꦓꦺ ꦏꦠꦺꦴꦪꦺꦮ ꦲꦺꦴꦠꦶ ꦱꦔ꧀ꦓꦥꦫꦶꦪꦴꦥꦤ꧀ꦤꦠ꧀ꦠꦴ ꦠꦱ꧀ꦱ, ꦪꦡꦴ ꦱꦔ꧀ꦓꦁ ꦈꦢ꧀ꦢꦶꦱ꧀ꦱ ꦢꦶꦤ꧀ꦤꦁ ꦌꦏꦺꦤ ꦨꦶꦏ꧀ꦑꦸꦤꦴ ꦥꦛꦶꦒ꧀ꦒꦲꦶꦠꦁ ꦱꦔ꧀ꦓꦱ꧀ꦱ ꦢꦶꦤ꧀ꦤꦩꦺꦮ ꦲꦺꦴꦠꦶ. ꦄꦥꦫꦶꦥꦹꦫꦪꦩꦴꦤꦺꦴꦮ ꦱꦶꦏ꧀ꦑꦴꦪ ꦄꦒꦴꦫꦮꦺꦴ. ꦠꦺꦤꦴꦲ ꦨꦒꦮꦴ – ‘‘ꦱꦶꦏ꧀ꦑꦴꦪ ꦤ ꦥꦫꦶꦥꦹꦫꦏꦴꦫꦷ’’ꦠꦶ (ꦩ. ꦤꦶ. ꧒.꧑꧓꧕). ꦄꦠ꧀ꦠꦤꦺꦴ ꦥꦫꦶꦱꦴꦪ ꦈꦥ꧀ꦥꦤ꧀ꦤꦁ ꦮꦶꦮꦴꦢꦩꦹꦭꦁ ꦮꦶꦱꦺꦱꦠꦺꦴ ꦄꦠ꧀ꦠꦤꦴ ꦮꦹꦥꦱꦩꦺꦠꦧ꧀ꦧꦠꦺꦴ ꦄꦠ꧀ꦠꦤꦺꦴ ꦕ ꦄꦤꦠ꧀ꦡꦴꦮꦲꦠꦺꦴ ‘‘ꦄꦗ꧀ꦙꦠ꧀ꦠ’’ꦤ꧀ꦠ꧀ꦮꦺꦮ ꦮꦸꦠ꧀ꦠꦁ. ꦌꦱ ꦤꦪꦺꦴ ꦧꦲꦶꦢ꧀ꦣꦴꦠꦶ ꦌꦠ꧀ꦡꦴꦥꦶ.
꧔꧖. ꦖꦜꦴꦤꦴꦤꦷꦠꦶ ꦖꦩꦹꦭꦴꦤꦶ. ꦪꦡꦴ ꦱꦩꦤꦮꦱꦺꦤ ꦱꦩꦡꦴꦤꦁ ꦮꦶꦮꦴꦢꦴꦢꦷꦱꦸ ꦄꦣꦶꦏꦠ꧀ꦠꦸꦨꦴꦮꦺꦴ, ꦌꦮꦁ ꦮꦶꦮꦴꦢꦴꦢꦷꦤꦁ ꦠꦺꦲꦶ ꦄꦣꦶꦏꦠ꧀ꦠꦧ꧀ꦧꦠꦴꦥꦷꦠꦶ ꦄꦴꦲ – ‘‘ꦮꦹꦥꦱꦩꦤꦠ꧀ꦡꦴꦪ…ꦥꦺ… ꦄꦣꦶꦏꦫꦟꦴꦤꦷ’’ꦠꦶ. ꦠꦺꦤ ꦄꦣꦶꦏꦫꦟꦱꦢ꧀ꦢꦱ꧀ꦱ ꦏꦩ꧀ꦩꦠ꧀ꦡꦠꦁ ꦄꦴꦲ. ꦱꦩꦡꦴ ꦮꦴ ꦱꦩꦤꦮꦱꦺꦤ ꦄꦣꦶꦏꦫꦷꦪꦤ꧀ꦠꦶ ꦌꦠ꧀ꦡꦴꦠꦶ ꦄꦣꦶꦏꦫꦟꦴꦤꦶ, ꦮꦶꦮꦴꦢꦴꦢꦪꦺꦴ.
ꦮꦶꦮꦴꦢꦺꦴ ꦈꦥ꧀ꦥꦤ꧀ꦤꦩꦠ꧀ꦠꦺꦴꦮ ꦲꦸꦠ꧀ꦮꦴ ꦥꦫꦠꦺꦴ ꦏꦏ꧀ꦑꦭ꦳ꦠ꧀ꦡꦴꦪ ꦱꦁꦮꦠ꧀ꦠꦤꦠꦺꦴ ꦪꦁ ꦮꦠ꧀ꦡꦸꦁ ꦤꦶꦱ꧀ꦱꦴꦪ ꦥꦜꦩꦁ ꦈꦥ꧀ꦥꦤ꧀ꦤꦺꦴ ꦮꦶꦮꦴꦢꦴꦤꦸꦱꦴꦫꦺꦤ ꦩꦹꦭꦏꦁ ꦮꦶꦪ ꦄꦤꦸꦧꦤ꧀ꦣꦫꦺꦴꦒꦺꦴ ꦠꦩꦺꦮ ꦠꦢꦚ꧀ꦚꦁ ꦮꦴ ꦮꦠ꧀ꦡꦸꦁ ꦏꦠ꧀ꦮꦴ ꦥꦮꦝ꧀ꦞꦤ꧀ꦠꦺꦴ ꦮꦶꦮꦴꦢꦴꦣꦶꦏꦫꦟꦁ ꦥꦠ꧀ꦮꦴ ꦈꦥꦫꦶ ꦮꦝ꧀ꦞꦠꦶ ꦤꦴꦩ, ꦄꦤꦸꦮꦴꦢꦴꦥꦠ꧀ꦠꦶꦏꦶꦕ꧀ꦕꦴꦣꦶꦏꦫꦟꦁ ꦥꦠ꧀ꦮꦴ ꦮꦶꦮꦴꦢꦱ꧀ꦱ ꦕ ꦮꦝ꧀ꦞꦤꦁ ꦥꦴꦏꦛꦩꦺꦮ. ꦠꦺꦤ ꦮꦸꦠ꧀ꦠꦁ – ‘‘ꦕꦠ꧀ꦠꦴꦫꦶ ꦄꦣꦶꦏꦫꦟꦴꦤꦶ ꦥꦠ꧀ꦮꦴ ꦈꦥꦫꦶ ꦮꦝ꧀ꦞꦤ꧀ꦠꦺꦴ ꦱꦺꦴ ꦮꦶꦮꦴꦢꦺꦴ’’ꦠꦶ. ꦈꦥ꧀ꦥꦤ꧀ꦤꦴꦤꦁ ꦈꦥ꧀ꦥꦤ꧀ꦤꦴꦤꦤ꧀ꦠꦶ (ꦢꦷ. ꦤꦶ. ꦛꦷ. ꧓.꧓꧓꧑) ꦈꦛ꧀ꦜꦶꦠꦴꦤꦁ ꦈꦛ꧀ꦜꦶꦠꦴꦤꦁ. ꦱꦩꦡꦠ꧀ꦡꦤ꧀ꦠꦶ ꦱꦩꦤꦠ꧀ꦡꦁ.
ꦄꦛ꧀ꦜꦴꦫꦱꦲꦶ ꦮꦠ꧀ꦡꦹꦲꦷꦠꦶ ꦭꦏ꧀ꦑꦟꦮꦕꦤꦩꦺꦠꦁ ꦪꦡꦴ ‘‘ꦪꦢꦶ ꦩꦺ ꦧ꧀ꦪꦴꦣꦷ ꦢꦴꦲꦺꦪ꧀ꦪꦸꦁ. ꦢꦴꦠꦧ꧀ꦧꦩꦶꦢꦩꦺꦴꦱꦣ’’ꦤ꧀ꦠꦶ (ꦱꦁ. ꦤꦶ. ꦛꦷ. ꧒.꧓.꧓꧙-꧔꧒; ꦏꦔ꧀ꦑꦴ. ꦄꦨꦶ. ꦛꦷ. ꦄꦣꦶꦏꦫꦟꦱꦩꦡꦮꦟ꧀ꦟꦤꦴ), ꦠꦱ꧀ꦩꦴ ꦠꦺꦱꦸ ꦄꦚ꧀ꦚꦠꦫꦺꦤ ꦮꦶꦮꦢꦤ꧀ꦠꦴ, ‘‘ꦄꦛ꧀ꦜꦴꦫꦱꦲꦶ ꦮꦠ꧀ꦡꦹꦲꦶ ꦮꦶꦮꦢꦤ꧀ꦠꦷ’’ꦠꦶ ꦮꦸꦕ꧀ꦕꦤ꧀ꦠꦶ. ꦈꦥꦮꦢꦤꦴꦠꦶ ꦄꦏ꧀ꦏꦺꦴꦱꦺꦴ. ꦕꦺꦴꦢꦤꦴꦠꦶ ꦄꦤꦸꦪꦺꦴꦒꦺꦴ.
ꦄꦣꦶꦏꦫꦟꦱ꧀ꦱ ꦱꦩ꧀ꦩꦸꦑꦴꦮ ꦮꦶꦤꦪꦤꦠꦺꦴ ꦱꦩ꧀ꦩꦸꦑꦴꦮꦶꦤꦪꦺꦴ. ꦱꦤ꧀ꦤꦶꦥꦠꦶꦠꦥꦫꦶꦱꦴꦪ ꦣꦩ꧀ꦩꦮꦴꦢꦷꦤꦁ ꦪꦺꦨꦸꦪ꧀ꦪꦠꦴꦪ ꦪꦺꦨꦸꦪ꧀ꦪꦱꦶꦏꦏꦩ꧀ꦩꦱ꧀ꦱ ꦏꦫꦟꦁ ꦪꦺꦨꦸꦪ꧀ꦪꦱꦶꦏꦴ. ꦏꦴꦫꦏꦱꦔ꧀ꦓꦱ꧀ꦱ ꦱꦴꦩꦒ꧀ꦒꦶꦮꦱꦺꦤ ꦱꦩ꧀ꦩꦸꦑꦷꦨꦴꦮꦺꦴ, ꦤ ꦪꦡꦴ ꦠꦡꦴ ꦏꦴꦫꦏꦥꦸꦒ꧀ꦒꦭꦴꦤꦁ ꦱꦩ꧀ꦩꦸꦑꦠꦴꦩꦠ꧀ꦠꦁ. ꦨꦹꦠꦠꦴꦠꦶ ꦠꦕ꧀ꦖꦠꦴ. ꦱꦕ꧀ꦕꦥꦫꦶꦪꦴꦪꦺꦴ ꦲꦶ ꦆꦣ ꦣꦩ꧀ꦩ-ꦱꦢ꧀ꦢꦺꦴ ‘‘ꦣꦩ꧀ꦩꦮꦴꦢꦷ’’ꦠꦶꦄꦴꦢꦷꦱꦸ (ꦢꦷ. ꦤꦶ. ꧑.꧙) ꦮꦶꦪ. ꦮꦶꦤꦺꦠꦶ ꦌꦠꦺꦤꦴꦠꦶ ꦮꦶꦤꦪꦺꦴ, ꦠꦱ꧀ꦱ ꦠꦱ꧀ꦱ ꦄꦣꦶꦏꦫꦟꦱ꧀ꦱ ꦮꦹꦥꦱꦩꦴꦪ ꦨꦒꦮꦠꦴ ꦮꦸꦠ꧀ꦠꦮꦶꦣꦶ, ꦠꦱ꧀ꦱ ꦮꦶꦤꦪꦱ꧀ꦱ ꦱꦩ꧀ꦩꦸꦑꦠꦴ ꦮꦶꦤꦪꦱꦩ꧀ꦩꦸꦑꦠꦴ. ꦮꦶꦮꦴꦢꦮꦠ꧀ꦡꦸꦱꦔ꧀ꦑꦴꦠꦺ ꦄꦠ꧀ꦡꦺ ꦥꦕ꧀ꦕꦠ꧀ꦡꦶꦏꦴ ꦄꦠ꧀ꦡꦥꦕ꧀ꦕꦠ꧀ꦡꦶꦏꦴ, ꦠꦺꦱꦁ ꦄꦠ꧀ꦡꦥꦕ꧀ꦕꦠ꧀ꦡꦶꦏꦴꦤꦁ. ꦱꦔ꧀ꦓꦱꦩ꧀ꦩꦸꦑꦠꦴ ꦥꦫꦶꦲꦴꦪꦠꦶ ꦱꦩ꧀ꦩꦠꦥꦸꦒ꧀ꦒꦭꦺꦲꦺꦮ ꦮꦹꦥꦱꦩꦤꦠꦺꦴ.
ꦤꦤ꧀ꦠꦶ ꦮꦶꦮꦴꦢꦴꦣꦶꦏꦫꦟꦁ. ‘‘ꦤ ꦖꦤ꧀ꦢꦴꦒꦠꦶꦁ ꦒꦕ꧀ꦖꦠꦷ’’ꦠꦶꦄꦴꦢꦶꦤꦴ (ꦥꦫꦶ. ꧓꧘꧓) ꦮꦸꦠ꧀ꦠꦁ ꦥꦚ꧀ꦕꦔ꧀ꦒꦱꦩꦤ꧀ꦤꦴꦒꦠꦁ. ꦒꦸꦭ꦳꧀ꦲꦏꦴꦢꦷꦱꦸ ꦄꦭꦗ꧀ꦗꦸꦱ꧀ꦱꦤ꧀ꦤꦴꦪ ꦥꦫꦶꦱꦴꦪ ꦒꦸꦭ꦳꧀ꦲꦏꦺꦴ ꦱꦭꦴꦏꦒ꧀ꦒꦴꦲꦺꦴ ꦏꦴꦠꦧ꧀ꦧꦺꦴ; ꦭꦗ꧀ꦗꦸꦱ꧀ꦱꦤ꧀ꦤꦴꦪ ꦮꦶꦮꦛꦏꦺꦴ, ꦧꦴꦭꦸꦱ꧀ꦱꦤ꧀ꦤꦴꦪ ꦱꦏꦟ꧀ꦟꦗꦥ꧀ꦥꦏꦺꦴ. ꦪꦱ꧀ꦱꦴ ꦏꦶꦫꦶꦪꦴꦪ ꦣꦩ꧀ꦩꦮꦴꦢꦶꦤꦺꦴ ꦧꦲꦸꦠꦫꦴ, ꦱꦴ ꦪꦺꦨꦸꦪ꧀ꦪꦱꦶꦏꦴꦠꦶ ꦄꦴꦲ – ‘‘ꦣꦩ꧀ꦩꦮꦴꦢꦷꦤꦁ ꦪꦺꦨꦸꦪ꧀ꦪꦠꦴꦪꦴ’’ꦠꦶꦄꦴꦢꦶ.
ꦌꦮꦁ ꦮꦶꦤꦶꦕ꧀ꦖꦶꦠꦤ꧀ꦠꦶ ꦄꦴꦥꦠ꧀ꦠꦶꦁ ꦢꦱ꧀ꦱꦺꦠ꧀ꦮꦴ ꦫꦺꦴꦥꦤꦮꦱꦺꦤ ꦮꦶꦤꦶꦕ꧀ꦖꦶꦠꦁ, ꦥꦛꦶꦏꦩ꧀ꦩꦁ ꦥꦤ ꦄꦴꦥꦠ꧀ꦠꦴꦣꦶꦏꦫꦟꦱꦩꦡꦺ ꦥꦫꦠꦺꦴ ꦄꦴꦒꦩꦶꦱ꧀ꦱꦠꦶ. ꦤ ꦱꦩꦟꦱꦴꦫꦸꦥ꧀ꦥꦁ ꦄꦱ꧀ꦱꦴꦩꦟꦏꦁ, ꦱꦩꦟꦺꦲꦶ ꦄꦏꦴꦠꦧ꧀ꦧꦁ, ꦠꦱ꧀ꦩꦶꦁ. ꦄꦗ꧀ꦙꦴꦕꦴꦫꦺ ꦮꦷꦠꦶꦏ꧀ꦏꦩꦺꦱꦠꦶ. ꦥꦛꦶꦕꦫꦠꦺꦴꦠꦶ ꦥꦛꦶꦕ꧀ꦖꦴꦢꦺꦤ꧀ꦠꦱ꧀ꦱ. ꦥꦴꦥꦸꦱ꧀ꦱꦤ꧀ꦤꦠꦴꦪ ꦥꦴꦥꦶꦪꦺꦴ, ꦥꦸꦒ꧀ꦒꦭꦺꦴ, ꦠꦱ꧀ꦱ ꦏꦴꦠꦧ꧀ꦧꦏꦩ꧀ꦩꦁ ꦠꦱ꧀ꦱꦥꦴꦥꦶꦪꦱꦶꦏꦁ.
ꦱꦩ꧀ꦩꦸꦑꦴꦮꦶꦤꦪꦺꦤꦺꦮ ꦮꦹꦥꦱꦩꦺꦴ ꦤꦠ꧀ꦡꦶ ꦥꦛꦶꦚ꧀ꦚꦴꦪ, ꦠꦡꦴꦫꦹꦥꦴꦪ ꦑꦤ꧀ꦠꦶꦪꦴ ꦮꦴ ꦮꦶꦤꦴ ꦄꦮꦹꦥꦱꦩꦤꦠꦺꦴ. ꦌꦠ꧀ꦡꦴꦠꦶ ꦄꦴꦥꦠ꧀ꦠꦶꦢꦺꦱꦤꦴꦪꦁ. ꦥꦛꦶꦚ꧀ꦚꦴꦠꦺ ꦄꦴꦥꦤ꧀ꦤꦨꦴꦮꦴꦢꦶꦏꦺ ꦏꦫꦟꦏꦶꦫꦶꦪꦴ, ‘‘ꦄꦴꦪꦠꦶꦁ ꦱꦁꦮꦫꦺꦪ꧀ꦪꦴꦱꦷ’’ꦠꦶ, ꦥꦫꦶꦮꦴꦱꦢꦴꦤꦴꦢꦶꦮꦱꦺꦤ ꦕ ꦥꦮꦠ꧀ꦠꦁ ꦮꦕꦷꦏꦩ꧀ꦩꦁ ꦥꦛꦶꦚ꧀ꦚꦴꦠꦏꦫꦟꦁ.
ꦪꦡꦴꦤꦸꦫꦹꦥꦤ꧀ꦠꦶ ‘‘ꦢ꧀ꦮꦷꦲꦶ ꦕꦠꦹꦲꦶ ꦠꦶꦲꦶ ꦌꦏꦺꦤꦴ’’ꦠꦶ ꦌꦮꦁ ꦮꦸꦠ꧀ꦠꦤꦪꦺꦤ ꦪꦡꦴꦤꦸꦫꦹꦥꦁ. ꦌꦠ꧀ꦡꦴꦠꦶ ꦆꦩꦱ꧀ꦩꦶꦁ ꦱꦸꦠ꧀ꦠꦺ, ꦌꦠꦱ꧀ꦩꦶꦁ ꦮꦴ ꦱꦩꦡꦮꦶꦕꦴꦫꦺ. ꦮꦶꦤꦶꦕ꧀ꦖꦪꦤꦪꦺꦴꦠꦶ ꦮꦶꦤꦶꦕ꧀ꦖꦪꦺ ꦤꦪꦩꦠ꧀ꦠꦁ. ꦠꦺꦤꦴꦲ ‘‘ꦮꦶꦠ꧀ꦡꦴꦫꦺꦴ ꦥꦤꦴ’’ꦠꦶꦄꦴꦢꦶ.
꧔꧗. ꦱꦔ꧀ꦑꦺꦥꦠꦺꦴꦮ ꦮꦸꦠ꧀ꦠꦺꦴ, ꦤ ꦱꦩꦡꦏ꧀ꦑꦤ꧀ꦣꦏꦺ ꦮꦶꦪ ꦮꦶꦠ꧀ꦡꦴꦫꦠꦺꦴ. ꦠꦡꦴꦠꦶ ꦆꦩꦶꦤꦴ ‘‘ꦣꦩ꧀ꦩꦴ’’ꦠꦶ ꦥꦢꦁ ꦄꦴꦏꦝ꧀ꦞꦠꦶ, ꦌꦠ꧀ꦡ ꦆꦠꦶ-ꦱꦢ꧀ꦢꦺꦴ ꦄꦴꦢꦶꦄꦠ꧀ꦡꦺꦴ, ꦌꦮꦩꦴꦢꦶꦤꦴ ꦆꦩꦶꦤꦴ ꦥꦏꦴꦫꦺꦤꦴꦠꦶ ꦮꦴꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦧꦺꦴꦣꦶꦥꦏ꧀ꦑꦶꦪꦣꦩ꧀ꦩꦴꦤꦁ ꦌꦏꦤ꧀ꦠꦴꦤꦮꦗ꧀ꦗꦨꦴꦮꦠꦺꦴ ꦤꦠ꧀ꦡꦶ ꦄꦣꦩ꧀ꦩꦨꦴꦮꦺꦴ, ꦨꦒꦮꦠꦺꦴ ꦢꦺꦱꦶꦠꦴꦏꦴꦫꦁ ꦲꦴꦥꦺꦠ꧀ꦮꦴ ꦮꦝ꧀ꦞꦺꦠ꧀ꦮꦴ ꦮꦴ ꦏꦡꦤꦁ ꦪꦡꦴꦣꦩ꧀ꦩꦁ ꦄꦏꦠꦤ꧀ꦠꦶ ꦏꦠ꧀ꦮꦴ ꦄꦣꦩ꧀ꦩꦨꦴꦮꦺꦴꦠꦶ ꦢꦱ꧀ꦱꦺꦤ꧀ꦠꦺꦴ ꦄꦴꦲ – ‘‘ꦠꦪꦺꦴ ꦱꦠꦶꦥꦛ꧀ꦜꦴꦤꦴ’’ꦠꦶꦄꦴꦢꦶ.
ꦤꦶꦪ꧀ꦪꦴꦤꦶꦏꦤ꧀ꦠꦶ ꦱꦥꦴꦛꦶꦲꦷꦫꦁ ꦄꦥ꧀ꦥꦛꦶꦮꦴꦤꦁ ꦲꦸꦠ꧀ꦮꦴ ꦥꦮꦠ꧀ꦠꦠꦶ. ꦠꦡꦺꦮꦴꦠꦶ ꦆꦩꦶꦤꦴ ‘‘ꦌꦮꦁ ꦄꦩ꧀ꦲꦴꦏ’’ꦤ꧀ꦠꦶꦄꦴꦢꦶꦤꦴ ꦮꦸꦠ꧀ꦠꦩꦠ꧀ꦡꦁ ꦄꦴꦏꦝ꧀ꦞꦠꦶ. ꦨꦹꦠꦺꦤ…ꦥꦺ… ꦏꦴꦠꦧ꧀ꦧꦏꦩ꧀ꦩꦁ ꦣꦩ꧀ꦩꦺꦴ ꦤꦴꦩ ꦪꦡꦴꦣꦩ꧀ꦩꦁ ꦏꦫꦟꦠꦺꦴ, ꦮꦸꦠ꧀ꦠꦮꦶꦥꦫꦶꦪꦴꦪꦠꦺꦴ ꦆꦠꦺꦴ ꦥꦫꦁ ꦄꦣꦩ꧀ꦩꦺꦴ. ꦄꦪꦁ ꦮꦶꦤꦪꦺꦴ ꦤꦴꦩ ꦫꦴꦒꦴꦢꦷꦤꦁ ꦱꦁꦮꦫꦟꦠꦺꦴ ꦥꦲꦴꦤꦠꦺꦴ ꦥꦛꦶꦱꦔ꧀ꦑꦴꦤꦠꦺꦴ ꦕ. ꦄꦪꦁ ꦄꦮꦶꦤꦪꦺꦴ ꦤꦴꦩ ꦫꦴꦒꦴꦢꦷꦤꦁ ꦄꦮꦶꦤꦪꦤꦠꦺꦴ. ꦄꦪꦁ ꦮꦶꦤꦪꦺꦴ ꦤꦴꦩ ꦪꦡꦴꦮꦶꦤꦪꦏꦫꦟꦠꦺꦴ, ꦮꦸꦠ꧀ꦠꦮꦶꦥꦫꦶꦪꦴꦪꦺꦤ ꦆꦠꦫꦺꦴ ꦄꦮꦶꦤꦪꦺꦴ. ꦮꦠ꧀ꦡꦸꦱꦩ꧀ꦥꦠ꧀ꦠꦶꦄꦴꦢꦶꦤꦴ ꦌꦮ ꦱꦧ꧀ꦧꦺꦱꦁ ꦮꦶꦤꦪꦏꦩ꧀ꦩꦴꦤꦁ ꦄꦏꦸꦥ꧀ꦥꦠꦴꦠꦶ ꦄꦴꦲ – ‘‘ꦮꦠ꧀ꦡꦸꦱꦩ꧀ꦥꦠ꧀ꦠꦶ…ꦥꦺ… ꦄꦪꦁ ꦮꦶꦤꦪꦺꦴ ꦤꦴꦩꦴ’’ꦠꦶ, ꦠꦥ꧀ꦥꦛꦶꦥꦏ꧀ꦑꦠꦺꦴ ꦄꦮꦶꦤꦪꦺꦴ ꦮꦺꦢꦶꦠꦧ꧀ꦧꦺꦴ. ꦠꦺꦤꦴꦲ ‘‘ꦮꦠ꧀ꦡꦸꦮꦶꦥꦠ꧀ꦠꦷ’’ꦠꦶꦄꦴꦢꦶ.
ꦱꦩ꧀ꦩꦴꦥꦛꦶꦥꦠ꧀ꦠꦶꦪꦴ ꦤꦪꦤꦛ꧀ꦜꦺꦤ ꦪꦡꦴꦮꦸꦠ꧀ꦠꦺꦴ ꦣꦩ꧀ꦩꦺꦴ ꦌꦮ ꦤꦺꦠ꧀ꦠꦶ, ꦠꦠꦺꦴ ꦌꦮ ꦱꦠ꧀ꦠꦱ꧀ꦱ ꦮꦶꦪ ꦫꦗ꧀ꦗꦸ ꦄꦱꦶꦡꦶꦭꦥꦮꦠ꧀ꦠꦶꦲꦺꦠꦸꦠꦴꦪ ꦣꦩ꧀ꦩꦫꦗ꧀ꦗꦹꦠꦶ ꦄꦠ꧀ꦡꦺꦴ ꦮꦸꦠ꧀ꦠꦺꦴ. ꦱꦸꦠ꧀ꦠꦤ꧀ꦠꦥꦫꦶꦪꦴꦪꦺꦤ ꦠꦴꦮ ꦢꦱ ꦏꦸꦱꦭꦏꦩ꧀ꦩꦥꦡꦴ ꦣꦩ꧀ꦩꦺꦴꦠꦶ ꦌꦮꦁ ꦮꦸꦠ꧀ꦠꦴ. ꦱꦴ ꦌꦮ ꦮꦴ ꦲꦺꦴꦠꦸ ꦣꦩ꧀ꦩꦤꦺꦠ꧀ꦠꦶ, ꦪꦺꦴ ꦆꦣ ꦆꦩꦶꦱ꧀ꦱꦴ ꦮꦟ꧀ꦟꦤꦴꦪ, ‘‘ꦖꦠ꧀ꦠꦶꦁꦱ ꦧꦺꦴꦣꦶꦥꦏ꧀ꦑꦶꦪꦣꦩ꧀ꦩꦴ’’ꦠꦶꦄꦴꦢꦶꦤꦴ ꦣꦩ꧀ꦩꦺꦤ ꦕ ꦮꦶꦤꦪꦺꦤ ꦕ ꦮꦸꦠ꧀ꦠꦺꦴ, ꦱꦺꦴ ꦌꦮ ꦮꦴ ꦣꦩ꧀ꦩꦤꦺꦠ꧀ꦠꦶ ꦲꦺꦴꦠꦹꦠꦶ ꦄꦴꦤꦺꦠ꧀ꦮꦴ ꦪꦺꦴꦗꦤꦴ. ꦠꦴꦪ ꦣꦩ꧀ꦩꦤꦺꦠ꧀ꦠꦶꦪꦴ ꦱꦩꦺꦠꦶ ꦠꦴꦪ ꦪꦡꦴꦮꦸꦠ꧀ꦠꦴꦪ ꦣꦩ꧀ꦩꦤꦺꦠ꧀ꦠꦶꦪꦴ ꦱꦁꦱꦤ꧀ꦢꦠꦶ, ꦌꦏꦭꦏ꧀ꦑꦟꦩꦺꦮ ꦲꦺꦴꦠꦷꦠꦶ ꦄꦠ꧀ꦡꦺꦴ. ꦌꦮꦁ ꦮꦶꦮꦴꦢꦮꦠ꧀ꦡꦸꦨꦹꦠꦺꦴ ꦣꦩ꧀ꦩꦺꦴ ꦕꦺ ‘‘ꦣꦩ꧀ꦩꦺꦴ’’ꦠꦶ, ꦄꦣꦩ꧀ꦩꦺꦴ ꦕꦺ ‘‘ꦄꦣꦩ꧀ꦩꦺꦴ’’ꦠꦶ, ꦮꦶꦤꦪꦺꦴ ꦕꦺ ‘‘ꦮꦶꦤꦪꦺꦴ’’ꦠꦶ, ꦄꦮꦶꦤꦪꦺꦴ ꦕꦺ ‘‘ꦄꦮꦶꦤꦪꦺꦴ’’ꦠꦶ ꦤꦶꦕ꧀ꦖꦶꦤꦤ꧀ꦠꦺꦤ ꦌꦏꦕ꧀ꦕꦴꦤꦁ ꦮꦶꦮꦴꦢꦴꦣꦶꦏꦫꦟꦩꦺꦮ ꦢꦱ꧀ꦱꦶꦠꦁ ꦠꦱ꧀ꦱ ꦮꦹꦥꦱꦩꦣꦩ꧀ꦩꦴꦤꦁ ꦄꦥꦫꦶꦪꦺꦴꦱꦴꦥꦶꦠꦠ꧀ꦠꦴ.
꧔꧘. ꦠꦁ ꦥꦤꦺꦠꦤ꧀ꦠꦶ ꦮꦶꦮꦴꦢꦴꦣꦶꦏꦫꦟꦁ ꦥꦕ꧀ꦕꦴꦩꦱꦠꦶ. ꦮꦴꦫꦺ ꦄꦠ꧀ꦡꦱꦁꦮꦟ꧀ꦟꦤꦴꦮꦱꦺꦤ ꦥꦠ꧀ꦠꦺꦥꦶ. ꦢ꧀ꦮꦷꦲꦷꦠꦶ ꦪꦱ꧀ꦩꦶꦁ ꦄꦴꦮꦴꦱꦺ ꦮꦶꦮꦴꦢꦴꦣꦶꦏꦫꦟꦁ ꦈꦥ꧀ꦥꦤ꧀ꦤꦁ, ꦠꦠ꧀ꦡ ꦮꦴꦱꦷꦲꦶ ꦢ꧀ꦮꦷꦲꦶꦥꦶ ꦨꦶꦏ꧀ꦑꦹꦲꦶ ꦄꦠꦶꦫꦺꦏꦠꦫꦴ.
꧔꧙. ꦑꦤ꧀ꦣꦱꦴꦩꦤ꧀ꦠꦤ꧀ꦠꦶ ꦄꦴꦥꦠ꧀ꦠꦶꦏ꧀ꦑꦤ꧀ꦣꦨꦴꦮꦺꦤ ꦱꦩꦷꦥꦁ. ꦄꦴꦥꦠ꧀ꦠꦶꦱꦴꦩꦤ꧀ꦠꦁ ꦤꦴꦩ ꦥꦸꦧ꧀ꦧꦨꦴꦒꦴ ꦄꦴꦥꦗ꧀ꦗꦶꦠꦧ꧀ꦧꦄꦴꦥꦠ꧀ꦠꦶ. ꦩꦺꦡꦸꦤꦫꦴꦒꦮꦱꦺꦤ ꦏꦴꦪꦱꦁꦱꦒ꧀ꦒꦺ ꦢꦸꦏ꧀ꦏꦛꦱ꧀ꦱ ꦮꦠ꧀ꦡꦹꦠꦶ ꦄꦴꦲ – ‘‘ꦥꦜꦩꦥꦴꦫꦴꦗꦶꦏꦱ꧀ꦱ ꦥꦸꦧ꧀ꦧꦨꦴꦒꦺ ꦢꦸꦏ꧀ꦏꦛ’’ꦤ꧀ꦠꦶ. ꦱꦺꦱꦴꦤꦁ ꦠꦶꦟ꧀ꦟꦁ ꦥꦴꦫꦴꦗꦶꦏꦴꦤꦁ ꦥꦸꦧ꧀ꦧꦨꦴꦒꦺ ꦡꦸꦭ꧀ꦭꦕ꧀ꦕꦪꦩꦺꦮ.
꧕꧐. ꦥꦫꦶꦏ꧀ꦏꦩꦶꦠ꧀ꦮꦴ ꦈꦥꦏ꧀ꦏꦩꦶꦠ꧀ꦮꦴ. ꦄꦴꦥꦠ꧀ꦠꦴꦣꦶꦏꦫꦟꦁ ꦢꦱ꧀ꦱꦶꦠꦁ ꦠꦠ꧀ꦡꦺꦮ ꦮꦶꦱꦺꦱꦠꦺꦴ ꦥꦛꦶꦚ꧀ꦚꦴꦪ ꦏꦴꦫꦺꦠꦧ꧀ꦧꦠꦴꦪ ꦆꦕ꧀ꦖꦶꦠꦧ꧀ꦧꦠ꧀ꦠꦴ.
꧕꧒. ꦏꦩ꧀ꦩꦱ꧀ꦱ ꦮꦠ꧀ꦡꦸ ꦢꦱ꧀ꦱꦶꦠꦁ ꦤ ꦱꦩꦡꦺꦴꦠꦶ ꦄꦣꦶꦥ꧀ꦥꦴꦪꦺꦴ. ꦤꦤꦸ ꦕꦴꦪꦁ ꦱꦩꦡꦴꦣꦶꦏꦴꦫꦺꦴꦠꦶ? ꦱꦕ꧀ꦕꦁ, ꦱꦩꦡꦱ꧀ꦱ ꦥꦤ ꦏꦴꦫꦟꦺ ꦢꦱ꧀ꦱꦶꦠꦺ ꦱꦩꦡꦺꦴ ꦢꦱ꧀ꦱꦶꦠꦺꦴꦮ ꦲꦺꦴꦠꦷꦠꦶ ꦢꦱ꧀ꦱꦺꦠꦸꦁ ‘‘ꦌꦮꦫꦹꦥꦱ꧀ꦱ ꦲꦷ’’ꦠꦶꦄꦴꦢꦶ ꦮꦸꦠ꧀ꦠꦁ.
꧕꧓. ꦆꦢꦁ ꦏꦩ꧀ꦩꦤ꧀ꦠꦶ ‘‘ꦆꦢꦁ ꦄꦩ꧀ꦲꦴꦏꦁ ꦨꦟ꧀ꦝꦤꦗꦴꦠꦴꦤ’’ꦤ꧀ꦠꦶꦄꦴꦢꦶꦤꦴ ꦮꦸꦠ꧀ꦠꦏꦩ꧀ꦩꦁ. ꦠꦶꦟꦮꦠ꧀ꦡꦴꦫꦏꦱꦢꦶꦱꦠ꧀ꦠꦴꦠꦶ ꦠꦁꦱꦢꦶꦱꦠꦴꦪ ꦠꦧ꧀ꦧꦺꦴꦲꦴꦫꦺꦴꦠꦶ ꦢꦱ꧀ꦱꦺꦠꦶ ꦪꦡꦴ – ‘‘ꦌꦱ ꦧ꧀ꦫꦲ꧀ꦩꦢꦠ꧀ꦠꦺꦴ’’ꦠꦶ. ꦄꦴꦏꦴꦫꦩꦠ꧀ꦠꦩꦺꦮ ꦠꦶꦟꦮꦠ꧀ꦡꦴꦫꦏꦏꦩ꧀ꦩꦁ ꦤꦴꦩ, ꦤ ꦥꦤ ꦠꦱ꧀ꦱ ꦱꦧ꧀ꦧꦱꦺꦴ ꦏꦫꦟꦮꦶꦣꦴꦤꦁ. ꦠꦺꦤꦴꦲ ‘‘ꦑꦤ꧀ꦣꦏꦺ’’ꦠꦶꦄꦴꦢꦶ. ꦒꦶꦲꦷꦤꦁ ꦲꦷꦤꦺꦤ ꦑꦸꦁꦱꦤꦮꦩ꧀ꦨꦤꦁ ꦪꦡꦴ ‘‘ꦠꦶꦭꦱꦁꦒꦸꦭ꦳ꦶꦏꦴ ꦤꦠ꧀ꦡꦷ’’ꦠꦶ. ꦣꦩ꧀ꦩꦶꦏꦥꦛꦶꦱ꧀ꦱꦮꦺꦱꦸ ꦮꦶꦱꦁꦮꦴꦢꦤꦮꦱꦺꦤ ꦄꦴꦥꦤ꧀ꦤꦴ ꦄꦴꦥꦠ꧀ꦠꦶ. ꦄꦱ꧀ꦱꦴꦠꦶ ꦏꦶꦕ꧀ꦕꦴꦣꦶꦏꦫꦟꦱ꧀ꦱ. ꦱꦩ꧀ꦩꦸꦑꦴꦮꦶꦤꦪꦺꦤꦺꦮ ꦮꦹꦥꦱꦩꦺꦴ ꦱꦔ꧀ꦓꦱꦩ꧀ꦩꦸꦑꦠꦴꦢꦶꦤꦴꦮ ꦮꦹꦥꦱꦩꦤꦠꦺꦴ.
꧕꧔. ꦱꦺꦴꦠꦴꦥꦠ꧀ꦠꦶꦦꦭꦱꦕ꧀ꦖꦶꦏꦶꦫꦶꦪꦮꦕꦤꦠꦺꦴ ꦏꦺꦴꦱꦩ꧀ꦧꦶꦪꦱꦸꦠ꧀ꦠꦺ (ꦩ. ꦤꦶ. ꧑.꧔꧙꧒) ꦱꦺꦴꦠꦴꦥꦠ꧀ꦠꦶꦩꦒ꧀ꦒꦱꦩ꧀ꦩꦴꦢꦶꦛ꧀ꦜꦶ ꦏꦡꦶꦠꦴ, ꦆꦣ ꦥꦤ ‘‘ꦢꦶꦛ꧀ꦜꦶꦱꦴꦩꦚ꧀ꦚꦒꦠꦺꦴ ꦮꦶꦲꦫꦠꦶ’’ꦕ꧀ꦕꦺꦮ ꦮꦸꦠ꧀ꦠꦠ꧀ꦠꦴ, ‘‘ꦆꦩꦱ꧀ꦩꦶꦁ ꦱꦸꦠ꧀ꦠꦺ ꦱꦺꦴꦠꦴꦥꦠ꧀ꦠꦶꦦꦭꦱꦩ꧀ꦩꦴꦢꦶꦛ꧀ꦜꦶ ꦮꦸꦠ꧀ꦠꦴꦠꦶ ꦮꦺꦢꦶꦠꦧ꧀ꦧꦴ’’ꦠꦶ ꦮꦸꦠ꧀ꦠꦁ. ꦥꦴꦥꦏꦩ꧀ꦩꦱ꧀ꦱ ꦄꦥ꧀ꦥꦠꦴ ꦩꦲꦤ꧀ꦠꦠꦴ ꦱꦴꦮꦗ꧀ꦗꦨꦴꦮꦱ꧀ꦱ ꦩꦸꦢꦸꦠꦶꦏ꧀ꦑꦨꦴꦮꦺꦤ ꦮꦺꦢꦶꦠꦧ꧀ꦧꦴꦠꦶ ꦄꦴꦲ ‘‘ꦄꦟꦸꦤ꧀ꦠꦶ ꦄꦥ꧀ꦥꦱꦴꦮꦗ꧀ꦗꦁ. ꦡꦹꦭꦤ꧀ꦠꦶ ꦩꦲꦴꦱꦴꦮꦗ꧀ꦗ’’ꦤ꧀ꦠꦶ. ꦱꦺꦱꦁ ꦱꦸꦮꦶꦚ꧀ꦚꦺꦪ꧀ꦪꦩꦺꦮ.
ꦱꦴꦩꦒꦴꦩꦱꦸꦠ꧀ꦠꦮꦟ꧀ꦟꦤꦴꦪ ꦭꦷꦤꦠ꧀ꦡꦥ꧀ꦥꦏꦴꦱꦤꦴ ꦱꦩꦠ꧀ꦠꦴ.
꧕. ꦱꦸꦤꦏ꧀ꦑꦠ꧀ꦠꦱꦸꦠ꧀ꦠꦮꦟ꧀ꦟꦤꦴ
꧕꧕. ꦲꦺꦛ꧀ꦜꦶꦩꦩꦒ꧀ꦒꦺꦲꦶ ꦚꦴꦠꦩꦫꦶꦪꦴꦢꦴꦪ ꦥꦗꦴꦤꦤꦠꦺꦴ ꦄꦚ꧀ꦚꦴ, ꦩꦒ꧀ꦒꦥꦚ꧀ꦚꦴ. ꦠꦱ꧀ꦱ ꦦꦭꦨꦴꦮꦠꦺꦴ ꦄꦒ꧀ꦒꦦꦭꦥꦚ꧀ꦚꦴ, ꦠꦁꦱꦲꦒꦠꦴ ꦱꦩ꧀ꦩꦴꦱꦔ꧀ꦏꦥ꧀ꦥꦴꦢꦪꦺꦴ ꦕ ‘‘ꦄꦚ꧀ꦚꦴ’’ꦠꦶ ꦮꦸꦠ꧀ꦠꦴꦠꦶ ꦄꦴꦲ ‘‘ꦄꦚ꧀ꦚꦴꦠꦶ ꦄꦫꦲꦠ꧀ꦠ’’ꦤ꧀ꦠꦶ. ꦕꦠꦹꦲꦶ ꦥꦢꦺꦲꦶ ꦏꦡꦶꦠꦴ, ‘‘ꦥꦫꦶꦕꦶꦟ꧀ꦟꦴ ꦩꦺ ꦨꦒꦮꦴ’’ꦠꦶꦄꦴꦢꦷꦱꦸ ꦮꦶꦪ ꦤ ꦌꦏꦥꦢꦺꦤꦺꦮ. ‘‘ꦭꦺꦴꦏꦸꦠ꧀ꦠꦫꦺꦴ ꦣꦩ꧀ꦩꦺꦴ ꦄꦣꦶꦒꦠꦺꦴ ꦩꦪꦴ’’ꦠꦶ ꦩꦚ꧀ꦚꦤꦴꦩꦠ꧀ꦠꦁ ꦄꦣꦶꦩꦴꦤꦺꦴꦠꦶ ꦢꦱ꧀ꦱꦺꦤ꧀ꦠꦺꦴ, ‘‘ꦄꦥ꧀ꦥꦠ꧀ꦠꦺ ꦥꦠ꧀ꦠꦱꦚ꧀ꦚꦶꦤꦺꦴ’’ꦠꦶꦄꦴꦢꦶꦩꦴꦲ.
꧕꧖. ꦆꦢꦁ ꦜꦴꦤꦤ꧀ꦠꦶ ꦆꦢꦁ ꦎꦨꦴꦱꦴꦢꦶꦱꦩ꧀ꦩꦸꦠꦶꦲꦺꦠꦸꦨꦹꦠꦁ ꦈꦭ꦳ꦴꦫꦠꦫꦁ ꦈꦢꦪꦧ꧀ꦧꦪꦚꦴꦟꦁ. ꦈꦭ꦳ꦴꦫꦠꦫꦨꦴꦮꦺꦤ ꦲꦶ ꦠꦁ ꦩꦒ꧀ꦒꦦꦭꦥꦚ꧀ꦚꦴꦪ ꦥꦕ꧀ꦕꦪꦺꦴ ꦲꦸꦠ꧀ꦮꦴ ꦪꦴꦡꦴꦮꦠꦺꦴ ꦢꦸꦧ꧀ꦧꦶꦚ꧀ꦚꦺꦪ꧀ꦪꦠꦴꦪ ꦮꦶꦥꦱ꧀ꦱꦏꦁ ꦮꦶꦱꦁꦮꦴꦢꦺꦠꦶ. ꦠꦺꦤꦴꦲ ‘‘ꦄꦮꦶꦨꦹꦠꦁ ꦄꦤ꧀ꦣꦏꦴꦫ’’ꦤ꧀ꦠꦶ. ꦆꦩꦁ ꦥꦚ꧀ꦲꦤ꧀ꦠꦶ ꦆꦩꦁ ꦱꦸꦠ꧀ꦠꦁ ꦒꦩ꧀ꦨꦷꦫꦁ ꦭꦺꦴꦏꦸꦠ꧀ꦠꦫꦥꦛꦶꦱꦁꦪꦸꦠ꧀ꦠꦁ ꦄꦠ꧀ꦠꦤꦴ ꦚꦴꦠꦸꦁ ꦆꦕ꧀ꦖꦶꦠꦁ ꦄꦠ꧀ꦡꦁ. ꦈꦒ꧀ꦒꦲꦺꦠ꧀ꦮꦴꦠꦶ ꦏꦺꦮꦭꦁ ꦥꦶꦛꦏꦱꦩ꧀ꦥꦴꦢꦤꦮꦱꦺꦤꦺꦮ ꦈꦒ꧀ꦒꦟ꧀ꦲꦶꦠ꧀ꦮꦴ. ꦠꦺꦤꦴꦲ ‘‘ꦄꦗꦴꦤꦶꦠ꧀ꦮꦴ’’ꦠꦶ. ꦮꦶꦱꦺꦮꦩꦴꦤꦴꦠꦶ ꦏꦶꦭꦺꦱꦮꦶꦱꦺ ꦄꦮꦩꦴꦤꦺꦤ꧀ꦠꦴ, ꦱꦴꦱꦤꦱ꧀ꦱ ꦮꦴ ꦄꦤꦸꦥꦏꦴꦫꦮꦶꦫꦹꦥꦥꦕ꧀ꦕꦪꦺ ꦱꦺꦮꦩꦴꦤꦴ. ꦌꦮꦩꦱ꧀ꦱꦴꦠꦶ ꦌꦮꦁ ꦮꦸꦠ꧀ꦠꦤꦪꦺꦤ ꦠꦺꦱꦁ ꦏꦫꦟꦲꦺꦠꦸ ꦄꦱ꧀ꦱ ꦕꦶꦠ꧀ꦠꦱ꧀ꦱ ꦣꦩ꧀ꦩꦢꦺꦱꦤꦴꦮꦱꦺꦤ ꦥꦮꦠ꧀ꦠꦱ꧀ꦱ. ꦄꦚ꧀ꦚꦡꦴꦨꦴꦮꦺꦴ ꦄꦢꦺꦱꦺꦠꦸꦏꦴꦩꦠꦴ ꦲꦺꦴꦠꦶ. ꦠꦤ꧀ꦠꦶ ꦪꦡꦴꦮꦸꦠ꧀ꦠꦩꦠ꧀ꦡꦁ ꦱꦤ꧀ꦣꦴꦪ. ꦌꦠꦤ꧀ꦠꦶ ‘‘ꦠꦱ꧀ꦱꦥꦶ ꦲꦺꦴꦠꦶ ꦄꦚ꧀ꦚꦡꦠ꧀ꦠ’’ꦤ꧀ꦠꦶ ꦌꦮꦁ ꦮꦸꦠ꧀ꦠꦁ.
꧕꧘. ꦏꦶꦭꦺꦱꦺꦲꦶ ꦄꦴꦩꦱꦷꦪꦠꦷꦠꦶ ꦄꦴꦩꦶꦱꦁ, ꦭꦺꦴꦏꦺꦥꦫꦶꦪꦴꦥꦤ꧀ꦤꦁ ꦄꦴꦩꦶꦱꦤ꧀ꦠꦶ ꦆꦣ ꦥꦚ꧀ꦕ ꦏꦴꦩꦒꦸꦟꦴ ꦄꦣꦶꦥ꧀ꦥꦺꦠꦴꦠꦶ ꦠꦺꦱꦸ ꦮꦛ꧀ꦛꦴꦩꦶꦱꦨꦴꦮꦺꦥꦶ ꦭꦨꦶꦠꦺ ꦏꦴꦩꦴꦩꦶꦱꦨꦴꦮꦺꦴ ꦱꦶꦢ꧀ꦣꦺꦴꦠꦶ ꦄꦴꦲ – ‘‘ꦮꦛ꧀ꦛꦴꦩꦶꦱꦏꦴꦩꦴꦩꦶꦱꦭꦺꦴꦏꦴꦩꦶꦱꦨꦹꦠꦺꦱꦹ’’ꦠꦶ. ꦏꦴꦩꦒꦸꦟꦴ ꦲꦶ ꦮꦛ꧀ꦛꦱ꧀ꦱ ꦮꦝ꧀ꦞꦤꦠꦺꦴ ꦮꦛ꧀ꦛꦴꦩꦶꦱꦁ, ꦏꦴꦩꦺꦠꦧ꧀ꦧꦠꦺꦴ ꦏꦴꦩꦠꦟ꧀ꦲꦴꦪ ꦄꦴꦩꦱꦶꦠꦧ꧀ꦧꦠꦺꦴ ꦏꦴꦩꦴꦩꦶꦱꦁ, ꦪꦺꦨꦹꦪ꧀ꦪꦠꦺꦴ ꦱꦠ꧀ꦠꦭꦺꦴꦏꦱ꧀ꦱ ꦄꦴꦩꦶꦱꦨꦴꦮꦠꦺꦴ ꦭꦺꦴꦏꦴꦩꦶꦱꦁ. ꦏꦴꦩꦒꦸꦟꦱꦨꦴꦒꦴꦠꦶ ꦏꦴꦩꦒꦸꦟꦴꦤꦸꦭꦺꦴꦩꦴ ꦏꦴꦩꦒꦸꦟꦥꦛꦶꦱꦁꦪꦸꦠ꧀ꦠꦴ. ꦄꦴꦤꦺꦚ꧀ꦗꦱꦩꦴꦥꦠ꧀ꦠꦶꦥꦛꦶꦱꦁꦪꦸꦠ꧀ꦠꦴꦪꦴꦠꦶ ꦏꦶꦭꦺꦱꦶꦚ꧀ꦗꦤꦫꦲꦶꦠꦠꦴꦪ ꦆꦣ ꦄꦴꦤꦺꦚ꧀ꦗꦴꦠꦶ ꦄꦣꦶꦥ꧀ꦥꦺꦠꦴꦲꦶ ꦲꦺꦛ꧀ꦜꦶꦩꦴꦲꦶ ꦄꦫꦹꦥꦱꦩꦴꦥꦠ꧀ꦠꦷꦲꦶ ꦥꦛꦶꦱꦁꦪꦸꦠ꧀ꦠꦴꦪ. ꦌꦮꦫꦹꦥꦺꦴꦠꦶ ꦭꦺꦴꦏꦴꦩꦶꦱꦨꦹꦠꦺꦱꦸ ꦥꦕ꧀ꦕꦪꦺꦱꦸ ꦄꦣꦶꦩꦸꦠ꧀ꦠꦺꦴ ꦠꦤ꧀ꦤꦶꦤ꧀ꦤꦺꦴ ꦠꦒ꧀ꦒꦫꦸꦏꦺꦴ ꦠꦥ꧀ꦥꦧ꧀ꦨꦴꦫꦺꦴ. ꦌꦠ꧀ꦠꦴꦮꦠꦴꦠꦶ ꦌꦮꦁ ꦱꦢ꧀ꦣꦴꦤꦁ ꦩꦤꦸꦱ꧀ꦱꦴꦤꦁ ꦢꦱ꧀ꦱꦤꦺꦤ ꦠꦺꦱꦁ ꦥꦮꦠ꧀ꦠꦶꦠꦴꦱꦪꦺꦤ ꦕ. ꦱꦷꦱꦁ ꦤꦶꦏ꧀ꦑꦤ꧀ꦠꦁ ꦲꦺꦴꦠꦷꦠꦶ ꦭꦴꦨꦴꦱꦴꦪ ꦱꦷꦱꦁ ꦧꦲꦶ ꦤꦶꦏ꧀ꦑꦤ꧀ꦠꦁ ꦮꦶꦪ ꦲꦺꦴꦠꦶ. ꦈꦢꦫꦁ ꦦꦭꦶꦠꦤ꧀ꦠꦶ ꦄꦠꦶꦧꦲꦸꦨꦟ꧀ꦝꦁ ꦥꦏ꧀ꦑꦶꦥꦶꦪꦩꦴꦤꦁ ꦥꦱꦶꦧ꧀ꦧꦏꦁ ꦮꦶꦪ ꦭꦢ꧀ꦣꦧ꧀ꦧꦱ꧀ꦱ ꦄꦠꦶꦥꦲꦹꦠꦨꦴꦮꦺꦤ ꦈꦢꦫꦁ ꦦꦷꦠꦁ ꦲꦺꦴꦠꦶ.
꧕꧙. ꦪꦡꦴ ꦥꦸꦫꦶꦩꦴ ꦢ꧀ꦮꦺ ꦄꦫꦹꦥꦱꦩꦴꦥꦠ꧀ꦠꦶꦪꦺꦴ ꦄꦠ꧀ꦠꦤꦺꦴ ꦥꦕ꧀ꦕꦤꦷꦏꦏꦶꦭꦺꦱꦺꦲꦶ ꦄꦤꦶꦚ꧀ꦗꦤꦠꦺꦴ ‘‘ꦄꦤꦶꦚ꧀ꦗꦴ’’ꦠꦶ ꦮꦸꦕ꧀ꦕꦤ꧀ꦠꦶ, ꦌꦮꦁ ꦆꦠꦫꦴꦥꦶ. ꦠꦁ ꦥꦮꦸꦠ꧀ꦠꦤ꧀ꦠꦶ ꦭꦺꦴꦏꦴꦩꦶꦱꦱꦁꦪꦺꦴꦗꦤꦁ ꦮꦶꦒꦠꦁ.
꧖꧐. ꦤꦶꦓꦁꦱꦤ꧀ꦠꦶ ‘‘ꦌꦠ꧀ꦠꦏꦺꦴ ꦄꦪ’’ꦤ꧀ꦠꦶ ꦥꦫꦶꦕ꧀ꦖꦺꦢꦤ꧀ꦠꦶ ꦄꦠ꧀ꦡꦺꦴ. ꦱꦶꦭꦺꦱꦺꦤꦴꦠꦶ ꦕꦩ꧀ꦩꦏꦴꦫꦱꦶꦭꦺꦱꦴꦢꦶꦱꦶꦭꦺꦱꦺꦤ, ꦮꦗꦶꦫꦭꦺꦥꦱꦶꦭꦺꦱꦺ ꦮꦠ꧀ꦠꦧ꧀ꦧꦩꦺꦮ ꦤꦠ꧀ꦡꦶ. ꦠꦁ ꦨꦶꦤ꧀ꦤꦤ꧀ꦠꦶ ꦄꦴꦤꦺꦚ꧀ꦗꦱꦁꦪꦺꦴꦗꦤꦁ ꦨꦶꦤ꧀ꦤꦁ ꦮꦶꦣꦩꦶꦠꦁ ꦱꦩꦠꦶꦏ꧀ꦏꦤ꧀ꦠꦁ ꦠꦴꦱꦸ ꦱꦩꦴꦥꦠ꧀ꦠꦷꦱꦸ ꦄꦥꦺꦏ꧀ꦑꦴꦨꦴꦮꦠꦺꦴ. ꦄꦗ꧀ꦙꦴꦱꦪꦺꦤ ꦄꦱꦩ꧀ꦧꦢ꧀ꦣꦠ꧀ꦠꦴ ꦮꦸꦠ꧀ꦠꦁ – ‘‘ꦢ꧀ꦮꦺꦣꦴꦨꦶꦤ꧀ꦤꦴ ꦱꦺꦭꦴ ꦮꦶꦪ ꦲꦺꦴꦠꦷ’’ꦠꦶ. ꦠꦺꦤꦴꦲ – ‘‘ꦠꦁ ꦱꦩꦴꦥꦗ꧀ꦗꦶꦱ꧀ꦱꦴꦩꦷꦠꦶ ꦕꦶꦠ꧀ꦠꦁ ꦤ ꦈꦥ꧀ꦥꦗ꧀ꦗꦠꦷ’’ꦠꦶ.
꧖꧑. ꦮꦤ꧀ꦠꦤ꧀ꦠꦶ ꦖꦝ꧀ꦝꦶꦠꦁ, ꦮꦶꦱ꧀ꦱꦛ꧀ꦜꦤ꧀ꦠꦶ ꦄꦠ꧀ꦡꦺꦴ.
꧖꧒. ꦈꦥꦫꦶꦱꦩꦴꦥꦠ꧀ꦠꦶꦭꦴꦨꦶꦤꦺꦴꦠꦶ ꦌꦠ꧀ꦡ ꦈꦥꦫꦶꦱꦩꦴꦥꦠ꧀ꦠꦷꦠꦶ ꦄꦫꦲꦠ꧀ꦠꦦꦭꦱꦩꦴꦥꦠ꧀ꦠꦶ ꦄꦣꦶꦥ꧀ꦥꦺꦠꦴ, ꦄꦫꦲꦠꦺꦴ ꦕ ꦩꦒ꧀ꦒꦴꦣꦶꦒꦩꦺꦤꦺꦮ ꦄꦤꦴꦒꦴꦩꦶꦦꦭꦱꦩꦴꦥꦠ꧀ꦠꦶ, ꦱꦺꦏ꧀ꦑꦴꦤꦁ ꦮꦶꦱꦪꦴ ꦲꦺꦛ꧀ꦜꦶꦩꦴ ꦦꦭꦱꦩꦴꦥꦠ꧀ꦠꦶꦪꦺꦴ ꦥꦛꦶꦥ꧀ꦥꦱ꧀ꦱꦢ꧀ꦣꦴ. ꦭꦺꦴꦏꦶꦪꦴ ꦥꦤ ꦤꦶꦏꦤ꧀ꦠꦶꦥ꧀ꦥꦲꦴꦤꦺꦤ ꦥꦛꦶꦤꦶꦱ꧀ꦱꦛ꧀ꦜꦴꦠꦶ ꦄꦴꦲ – ‘‘ꦲꦺꦛ꧀ꦜꦴ…ꦥꦺ… ꦤ ꦈꦥ꧀ꦥꦗ꧀ꦗꦠꦷ’’ꦠꦶ.
꧖꧓. ‘‘ꦥꦚ꧀ꦕ ꦑꦺꦴ ꦆꦩꦺ, ꦱꦸꦤꦏ꧀ꦑꦠ꧀ꦠ, ꦏꦴꦩꦒꦸꦟꦴ’’ꦠꦶꦄꦴꦢꦶꦤꦴ ꦄꦴꦫꦢ꧀ꦣꦢꦺꦱꦤꦴ, ‘‘ꦱꦩ꧀ꦩꦴ ꦤꦶꦧ꧀ꦧꦴꦤꦴꦣꦶꦩꦸꦠ꧀ꦠꦺꦴ ꦥꦸꦫꦶꦱꦥꦸꦒ꧀ꦒꦭꦺꦴ’’ꦠꦶ ꦄꦫꦲꦠ꧀ꦠꦏꦶꦠ꧀ꦠꦤꦺꦤ ꦤꦶꦛ꧀ꦜꦴꦥꦶꦠꦴꦠꦶ ꦠꦠꦺꦴ ꦥꦫꦁ, ‘‘ꦜꦴꦤꦁ ꦑꦺꦴ ꦥꦤꦴ’’ꦠꦶꦄꦴꦢꦶꦏꦴ ꦢꦺꦱꦤꦴ, ‘‘ꦥꦴꦛꦶꦪꦺꦏ꧀ꦏꦺꦴ ꦄꦤꦸꦱꦤ꧀ꦣꦷ’’ꦠꦶ ꦮꦸꦠ꧀ꦠꦴ. ꦠꦺꦤꦴꦲ ‘‘ꦲꦺꦛ꧀ꦜꦴ ꦲꦷ’’ꦠꦶꦄꦴꦢꦶ. ꦠꦠ꧀ꦡ ꦪꦡꦴ ꦑꦷꦟꦴꦱꦮꦱ꧀ꦱ ꦱꦩꦴꦥꦠ꧀ꦠꦶꦭꦴꦨꦶꦤꦺꦴꦠꦶ ꦪꦺꦴꦗꦤꦴ, ꦌꦮꦁ ꦮꦴ ꦑꦷꦟꦴꦱꦮꦱ꧀ꦱ ꦱꦸꦏ꧀ꦑꦮꦶꦥꦱ꧀ꦱꦏꦱ꧀ꦱꦴꦠꦶ ꦪꦺꦴꦗꦺꦠꦧ꧀ꦧꦴ. ꦥꦛꦶꦏ꧀ꦑꦶꦠ꧀ꦠꦁ ꦄꦛ꧀ꦜꦏꦡꦴꦪꦁ. ꦠꦱ꧀ꦱ ꦥꦛꦶꦏ꧀ꦑꦺꦥꦱ꧀ꦱ ꦏꦴꦫꦟꦁ ꦢꦱ꧀ꦱꦺꦠꦸꦁ ‘‘ꦱꦩꦴꦥꦠ꧀ꦠꦶꦭꦴꦨꦶꦤꦺꦴ ꦲꦷ’’ꦠꦶꦄꦴꦢꦶ ꦮꦸꦠ꧀ꦠꦁ. ꦪꦡꦴ ꦱꦸꦏ꧀ꦑꦮꦶꦥꦱ꧀ꦱꦏꦺꦴ ꦄꦣꦶꦩꦴꦤꦶꦏꦺꦴ ꦱꦩꦴꦥꦠ꧀ꦠꦶꦭꦴꦨꦶꦤꦺꦴ ꦱꦩꦴꦤꦪꦺꦴꦒꦏ꧀ꦑꦩꦺꦴ ꦄꦥ꧀ꦥꦠ꧀ꦠꦺ ꦥꦠ꧀ꦠꦱꦚ꧀ꦚꦶꦠꦴꦪ ꦨꦺꦢꦴꦨꦴꦮꦠꦺꦴ, ꦌꦮꦁ ꦱꦸꦏ꧀ꦑꦮꦶꦥꦱ꧀ꦱꦏꦺꦴ ꦑꦷꦟꦴꦱꦮꦺꦴ ꦱꦩꦴꦤꦪꦺꦴꦒꦏ꧀ꦑꦩꦺꦴ ꦑꦷꦟꦴꦱꦮꦨꦴꦮꦺꦤ ꦮꦶꦱꦺꦱꦴꦨꦴꦮꦠꦺꦴ, ꦠꦱ꧀ꦩꦴ ‘‘ꦱꦩꦴꦥꦠ꧀ꦠꦶꦭꦴꦨꦶꦩ꧀ꦲꦶ ꦏꦡꦶꦠꦺ ꦆꦠꦫꦺꦴꦥꦶ ꦏꦡꦶꦠꦺꦴꦮ ꦲꦺꦴꦠꦷ’’ꦠꦶ ꦮꦸꦠ꧀ꦠꦁ. ꦢ꧀ꦮꦶꦤ꧀ꦤꦁ ꦨꦶꦏ꧀ꦑꦹꦤꦤ꧀ꦠꦶ ꦱꦩꦴꦥꦠ꧀ꦠꦶꦭꦴꦨꦶꦤꦺꦴ ꦄꦣꦶꦩꦴꦤꦶꦏꦱ꧀ꦱ ꦑꦷꦟꦴꦱꦮꦱ꧀ꦱ ꦕ. ꦠꦺꦤꦺꦮꦴꦲ ‘‘ꦥꦸꦡꦸꦗ꧀ꦗꦤꦱ꧀ꦱ ꦠꦴꦮꦴ’’ꦠꦶꦄꦴꦢꦶ.
ꦪꦢꦒ꧀ꦒꦺꦤꦴꦠꦶ ꦪꦺꦤ ꦨꦴꦒꦺꦤ. ꦪꦢꦶꦥꦶ ꦑꦷꦟꦴꦱꦮꦱ꧀ꦱ ꦄꦱꦥ꧀ꦥꦴꦪꦴꦫꦩ꧀ꦩꦟꦁ ꦏꦶꦭꦺꦱꦴꦤꦁ ꦈꦥ꧀ꦥꦠ꧀ꦠꦶꦪꦴ ꦥꦕ꧀ꦕꦪꦺꦴ ꦤ ꦲꦺꦴꦠꦶ ꦠꦺꦱꦁ ꦱꦧ꧀ꦧꦱꦺꦴ ꦱꦩꦸꦕ꧀ꦖꦶꦤ꧀ꦤꦠ꧀ꦠꦴ. ꦱꦤ꧀ꦠꦮꦶꦲꦴꦫꦥꦫꦶꦥꦤ꧀ꦡꦺꦴ ꦥꦤ ꦱꦶꦪꦴ ꦮꦶꦱꦨꦴꦒꦠꦺꦴꦠꦶ ꦮꦸꦠ꧀ꦠꦁ – ‘‘ꦑꦷꦟꦴꦱꦮꦱ꧀ꦱꦥꦶ ꦄꦱꦥ꧀ꦥꦴꦪꦩꦺꦮꦴ’’ꦠꦶ. ꦠꦺꦤꦴꦲ – ‘‘ꦮꦶꦱꦁ ꦤꦴꦩ…ꦥꦺ… ꦮꦶꦱꦩꦺꦮꦴ’’ꦠꦶ. ꦌꦠꦺꦤ ‘‘ꦪꦡꦴ ꦮꦶꦱꦗꦴꦤꦤꦁ ꦄꦥ꧀ꦥꦩꦴꦟꦁ, ꦮꦶꦏꦴꦫꦸꦥ꧀ꦥꦴꦢꦤꦠꦺꦴ ꦥꦤ ꦠꦁ ꦥꦫꦶꦲꦫꦶꦠꦧ꧀ꦧꦁ, ꦌꦮꦁ ꦥꦫꦶꦚ꧀ꦚꦴꦠꦩ꧀ꦥꦶ ꦮꦠ꧀ꦠꦸ ꦄꦠ꧀ꦡꦮꦶꦱꦺꦱꦴꦨꦴꦮꦺꦤ ꦌꦏꦫꦹꦥꦩꦺꦮꦴꦠꦶ ꦠꦁ ꦥꦫꦶꦲꦫꦶꦠꦧ꧀ꦧꦩꦺꦮꦴ’’ꦠꦶ ꦢꦱ꧀ꦱꦺꦠꦶ. ꦠꦺꦤꦴꦲ ‘‘ꦤ ꦲꦷ’’ꦠꦶꦄꦴꦢꦶ. ꦤ ꦲꦶ ꦄꦱꦁꦮꦸꦠꦺꦤ ꦨꦮꦶꦠꦧ꧀ꦧꦁ ꦄꦱꦴꦫꦸꦥ꧀ꦥꦨꦴꦮꦠꦺꦴ. ꦪꦸꦠ꧀ꦠꦥꦪꦸꦠ꧀ꦠꦺꦤꦺꦮꦴꦠꦶ ꦱꦨꦴꦒꦴꦫꦩ꧀ꦩꦟꦱ꧀ꦱ ꦄꦴꦭꦺꦴꦏꦤꦴꦢꦷꦱꦸ ꦪꦸꦠ꧀ꦠꦺꦤꦺꦮ ꦨꦮꦶꦠꦸꦁ ꦮꦛ꧀ꦛꦠꦶ.
꧖꧔. ꦪꦠ꧀ꦡ ꦱꦪꦁ ꦤꦶꦥꦠꦠꦶ ꦈꦥ꧀ꦥꦗ꧀ꦗꦠꦶ, ꦠꦱ꧀ꦱ ꦱꦤ꧀ꦠꦴꦤꦱ꧀ꦱ ꦮꦶꦥ꧀ꦥꦱꦤ꧀ꦤꦮꦱꦺꦤ ꦫꦸꦥ꧀ꦥꦤꦠꦺꦴ, ꦮꦶꦱꦱꦔ꧀ꦑꦴꦠꦱ꧀ꦱ ꦢꦸꦏ꧀ꦑꦱ꧀ꦱ ꦩꦹꦭꦨꦴꦮꦠꦺꦴ ꦕ ‘‘ꦄꦮꦶꦗ꧀ꦗꦴꦱꦔ꧀ꦑꦴꦠꦺꦴ ꦮꦶꦱꦢꦺꦴꦱꦺꦴ’’ꦠꦶ ꦮꦸꦠ꧀ꦠꦁ. ꦫꦸꦥ꧀ꦥꦠꦷꦠꦶ ꦏꦠ꧀ꦠꦧ꧀ꦧꦴꦢꦶꦩꦸꦕ꧀ꦖꦴꦥꦴꦢꦤꦺꦤ ꦮꦶꦏꦴꦫꦁ ꦈꦥ꧀ꦥꦴꦢꦺꦠꦶ. ꦄꦤꦸꦢ꧀ꦣꦁꦱꦺꦪ꧀ꦪꦴꦠꦶ ꦮꦶꦧꦴꦣꦺꦪ꧀ꦪ. ꦫꦴꦒꦺꦴ ꦲꦶ ꦈꦥ꧀ꦥꦗ꧀ꦗꦩꦴꦤꦺꦴꦮ ꦏꦸꦱꦭꦕꦶꦠ꧀ꦠꦥ꧀ꦥꦮꦠ꧀ꦠꦶꦪꦴ ꦎꦏꦴꦱꦁ ꦄꦢꦺꦤ꧀ꦠꦺꦴ ꦠꦁ ꦮꦶꦧꦴꦣꦠꦶ; ꦠꦡꦴꦨꦹꦠꦺꦴ ꦱꦢ꧀ꦣꦴꦱꦶꦤꦺꦲꦱ꧀ꦱ ꦱꦩꦡꦮꦶꦥꦱ꧀ꦱꦤꦴꦨꦶꦮꦸꦝ꧀ꦞꦶꦪꦴ ꦮꦩꦤꦺꦤ ꦕ ꦠꦁ ꦮꦶꦱꦺꦴꦱꦺꦠꦶ ꦩꦶꦭꦴꦥꦺꦠꦶ. ꦠꦺꦤꦴꦲ ‘‘ꦱꦺꦴꦱꦺꦪ꧀ꦪ ꦩꦶꦭꦴꦥꦺꦪ꧀ꦪꦴ’’ꦠꦶ. ꦱꦒꦲꦟꦱꦺꦱꦤ꧀ꦠꦶ ꦒꦲꦺꦠꦧ꧀ꦧꦮꦶꦱꦁ ꦱꦴꦮꦱꦺꦱꦁ ꦏꦠ꧀ꦮꦴꦠꦶ ꦄꦠ꧀ꦡꦺꦴ. ꦤ ꦄꦭꦁ ꦤ ꦱꦩꦠ꧀ꦡꦤ꧀ꦠꦶ ꦄꦤꦭꦁ. ꦱꦹꦏꦥꦫꦶꦪꦴꦪꦺꦴ ꦥꦴꦭ꦳ꦶꦪꦁ ꦮꦸꦠ꧀ꦠꦺꦴ ꦱꦸꦏ-ꦱꦢ꧀ꦢꦺꦴꦠꦶ ꦄꦴꦲ – ‘‘ꦮꦷꦲꦶꦱꦸꦏꦴꦢꦶ ꦕ ꦱꦹꦏ’’ꦤ꧀ꦠꦶ.
ꦱꦈꦥꦴꦢꦴꦤꦱꦭ꧀ꦭꦸꦢ꧀ꦣꦴꦫꦺꦴ ꦮꦶꦪ ꦄꦥ꧀ꦥꦲꦷꦤꦺꦴ ꦄꦮꦶꦗ꧀ꦗꦴꦮꦶꦱꦢꦺꦴꦱꦺꦴ ꦢꦛ꧀ꦜꦧ꧀ꦧꦺꦴ ꦩꦲꦴꦤꦠ꧀ꦡꦸꦥ꧀ꦥꦴꦢꦤꦠꦺꦴ. ꦄꦱꦥ꧀ꦥꦴꦪ…ꦥꦺ… ꦄꦱꦁꦮꦸꦠꦏꦴꦭꦺꦴ ꦢꦛ꧀ꦜꦧ꧀ꦧꦺꦴ ꦄꦠ꧀ꦠꦨꦴꦮꦱ꧀ꦱ ꦄꦥꦫꦶꦲꦫꦟꦨꦴꦮꦠꦺꦴ. ꦩꦫꦟꦁ ꦮꦶꦪ ꦱꦶꦏ꧀ꦑꦁ ꦥꦕ꧀ꦕꦏ꧀ꦑꦴꦪ ꦲꦷꦤꦴꦪꦴꦮꦠ꧀ꦠꦤꦁ ꦄꦣꦶꦱꦷꦭꦱꦔ꧀ꦑꦴꦠꦱ꧀ꦱ ꦄꦴꦪꦸꦤꦺꦴ ꦄꦥꦺꦠꦠ꧀ꦠꦴ. ꦩꦫꦟꦩꦠ꧀ꦠꦁ ꦢꦸꦏ꧀ꦑꦁ ꦮꦶꦪ ꦄꦴꦥꦠ꧀ꦠꦶꦪꦴ ꦄꦴꦥꦗ꧀ꦗꦤꦁ ꦪꦡꦴꦮꦸꦠ꧀ꦠꦱ꧀ꦱ ꦄꦴꦪꦸꦤꦺꦴ ꦈꦥꦥꦷꦭ꦳ꦤꦏꦨꦴꦮꦠꦺꦴ. ꦆꦩꦶꦤꦴꦮ ꦤꦪꦺꦤ ꦎꦥꦩ꧀ꦩꦱꦁꦱꦤ꧀ꦢꦤꦤ꧀ꦠꦶ ꦌꦠ꧀ꦡ ꦄꦤꦸꦥꦴꦢꦶꦱꦺꦱꦱꦭ꧀ꦭꦸꦢ꧀ꦣꦴꦫꦺꦴ ꦮꦶꦪ ꦥꦲꦷꦤꦺꦴ ꦄꦮꦶꦗ꧀ꦗꦴꦮꦶꦱꦢꦺꦴꦱꦺꦴ; ꦱꦥ꧀ꦥꦴꦪ…ꦥꦺ… ꦱꦸꦱꦁꦮꦸꦠꦏꦴꦭꦺꦴ, ꦠꦢꦸꦨꦪꦺꦤ ꦮꦟꦺ ꦥꦸꦡꦸꦠ꧀ꦠꦁ ꦤ ꦒꦠꦺ ꦩꦫꦟꦴꦨꦴꦮꦺꦴ ꦮꦶꦪ ꦱꦶꦏ꧀ꦑꦴꦪ ꦄꦥꦕ꧀ꦕꦏ꧀ꦑꦴꦤꦁ, ꦩꦫꦟꦩꦠ꧀ꦠꦢꦸꦏ꧀ꦑꦴꦨꦴꦮꦺꦴ ꦮꦶꦪ ꦄꦚ꧀ꦚꦠꦫꦴꦪ ꦱꦁꦏꦶꦭꦶꦛ꧀ꦜꦴꦪ ꦄꦴꦥꦠ꧀ꦠꦶꦪꦴ ꦄꦤꦴꦥꦗ꧀ꦗꦤꦤ꧀ꦠꦶ ꦪꦺꦴꦗꦤꦴ ꦮꦺꦢꦶꦠꦧ꧀ꦧꦴ.
꧖꧕. ꦱꦠꦶꦪꦴꦠꦶ ꦌꦠ꧀ꦡ ꦪꦱ꧀ꦩꦴ ‘‘ꦄꦫꦶꦪꦴꦪꦴ’’ꦠꦶ ꦤ ꦮꦶꦱꦺꦱꦶꦠꦤ꧀ꦠꦶ ꦄꦴꦲ – ‘‘ꦱꦠꦶ ꦥꦚ꧀ꦚꦴꦒꦠꦶꦏꦴ’’ꦠꦶꦄꦴꦢꦶ. ꦥꦚ꧀ꦚꦴ ꦕꦺꦠ꧀ꦡ ꦭꦺꦴꦏꦶꦪꦴ ꦄꦣꦶꦥ꧀ꦥꦺꦠꦴ, ꦤ ꦭꦺꦴꦏꦸꦠ꧀ꦠꦫꦴꦠꦶ ꦄꦴꦲ – ‘‘ꦥꦫꦶꦱꦸꦢ꧀ꦣꦴꦪ ꦮꦶꦥꦱ꧀ꦱꦤꦴꦥꦚ꧀ꦚꦴꦪꦴ’’ꦠꦶ.
ꦑꦷꦟꦴꦱꦮꦱ꧀ꦱ ꦧꦭꦤ꧀ꦠꦶ ꦈꦭ꦳ꦴꦫꦠꦩꦺꦱꦸ ꦢꦶꦧ꧀ꦧꦱꦢꦶꦱꦺꦱꦸꦥꦶ ꦄꦴꦫꦩ꧀ꦩꦟꦺꦱꦸ ꦩꦤꦕ꧀ꦖꦛ꧀ꦜꦴꦤꦁ ꦆꦤ꧀ꦢ꧀ꦫꦶꦪꦴꦤꦁ ꦄꦤꦸꦥꦤꦩꦤꦲꦺꦠꦸꦨꦹꦠꦁ ꦱꦸꦱꦁꦮꦸꦠꦏꦴꦫꦶꦱꦔ꧀ꦑꦴꦠꦁ ꦑꦷꦟꦴꦱꦮꦧꦭꦁ ꦢꦱ꧀ꦱꦺꦤ꧀ꦠꦺꦴ, ‘‘ꦱꦁꦮꦸꦠꦏꦴꦫꦷ’’ꦠꦶ ꦮꦸꦠ꧀ꦠꦁ, ꦈꦏ꧀ꦏꦁꦱꦒꦠꦱꦠꦶꦮꦺꦥꦸꦭ꧀ꦭꦠ꧀ꦠꦴ ꦪꦡꦴ ꦄꦱꦁꦮꦫꦱ꧀ꦱ ꦄꦱꦁꦮꦫꦺꦴ ꦲꦺꦴꦠꦶ, ꦌꦮꦁ ꦱꦠꦶꦱꦩ꧀ꦥꦗꦚ꧀ꦚꦧꦭꦺꦤ ꦕꦏ꧀ꦑꦴꦢꦶꦢ꧀ꦮꦴꦫꦴꦤꦶ ꦱꦁꦮꦫꦶꦠ꧀ꦮꦴ ꦢꦱ꧀ꦱꦤꦴꦢꦶꦏꦶꦕ꧀ꦕꦏꦴꦫꦷ. ꦌꦮꦁ ꦗꦴꦤꦶꦠ꧀ꦮꦴꦠꦶ ‘‘ꦈꦥꦣꦶ ꦢꦸꦏ꧀ꦑꦱ꧀ꦱ ꦩꦹꦭ’’ꦤ꧀ꦠꦶ ꦌꦮꦁ ꦮꦶꦥꦱ꧀ꦱꦤꦴꦥꦚ꧀ꦚꦴꦱꦲꦶꦠꦴꦪ ꦩꦒ꧀ꦒꦥꦚ꧀ꦚꦴꦪ ꦗꦴꦤꦶꦠ꧀ꦮꦴ. ꦈꦥꦣꦷꦪꦠꦶ ꦢꦸꦏ꧀ꦑꦁ ꦌꦠꦺꦲꦷꦠꦶ ꦈꦥꦣꦷ, ꦏꦶꦭꦺꦱꦴꦠꦶ ꦄꦴꦲ – ‘‘ꦏꦶꦭꦺꦱꦸꦥꦣꦶꦥꦲꦴꦤꦴ ꦤꦶꦫꦸꦥꦣꦷ’’ꦠꦶ. ꦠꦠꦺꦴ ꦌꦮ ꦈꦥꦴꦢꦷꦪꦠꦶ ꦢꦸꦏ꧀ꦑꦁ ꦌꦠꦺꦲꦷꦠꦶ ꦏꦶꦭꦺꦱꦴ ‘‘ꦈꦥꦴꦢꦴꦤꦴ’’ꦠꦶꦥꦶ ꦮꦸꦕ꧀ꦕꦤ꧀ꦠꦷꦠꦶ ꦄꦴꦲ – ‘‘ꦤꦶꦫꦸꦥꦴꦢꦴꦤꦺꦴꦠꦶ ꦄꦠ꧀ꦡꦺꦴ’’ꦠꦶ. ꦈꦥꦣꦷ ꦱꦩ꧀ꦩꦢꦺꦮ ꦑꦷꦪꦤ꧀ꦠꦶ ꦌꦠ꧀ꦠꦴꦠꦶ ꦈꦥꦣꦶꦱꦔ꧀ꦑꦪꦺꦴ, ꦤꦶꦧ꧀ꦧꦴꦤꦤ꧀ꦠꦶ ꦄꦴꦲ – ‘‘ꦈꦥꦣꦷꦤꦁ ꦱꦔ꧀ꦑꦪꦨꦹꦠꦺ ꦤꦶꦧ꧀ꦧꦴꦤꦺ’’ꦠꦶ. ꦄꦴꦫꦩ꧀ꦩꦟꦠꦺꦴꦠꦶ ꦄꦴꦫꦩ꧀ꦩꦟꦁ ꦏꦠ꧀ꦮꦴ ꦠꦢꦴꦫꦩ꧀ꦩꦟꦴꦪ ꦦꦭꦮꦶꦩꦸꦠ꧀ꦠꦶꦪꦴ ꦮꦶꦩꦸꦠ꧀ꦠꦺꦴ. ꦏꦴꦩꦸꦥꦣꦶꦱ꧀ꦩꦶꦁ ꦏꦴꦪꦁ ꦈꦥꦱꦁꦲꦫꦶꦱ꧀ꦱꦠꦷꦠꦶ ‘‘ꦏꦴꦩꦺꦱꦺꦮꦶꦱ꧀ꦱꦴꦩꦷ’’ꦠꦶ ꦠꦠ꧀ꦡ ꦏꦴꦪꦁ ꦈꦥꦤꦴꦩꦺꦱ꧀ꦱꦠꦶ; ꦏꦴꦪꦹꦥꦱꦁꦲꦴꦫꦺꦴ ꦠꦴꦮ ꦠꦶꦛ꧀ꦜꦠꦸ, ꦠꦡꦴ ꦕꦶꦠ꧀ꦠꦁ ꦮꦴ ꦈꦥ꧀ꦥꦴꦢꦺꦱ꧀ꦱꦠꦷꦠꦶ ꦌꦠꦁ ꦏꦴꦫꦟꦁ ꦤꦠ꧀ꦡꦷꦠꦶ. ꦱꦺꦱꦁ ꦱꦸꦮꦶꦚ꧀ꦚꦺꦪ꧀ꦪꦩꦺꦮ.
ꦱꦸꦤꦏ꧀ꦑꦠ꧀ꦠꦱꦸꦠ꧀ꦠꦮꦟ꧀ꦟꦤꦴꦪ ꦭꦷꦤꦠ꧀ꦡꦥ꧀ꦥꦏꦴꦱꦤꦴ ꦱꦩꦠ꧀ꦠꦴ.
꧖. ꦄꦴꦤꦺꦚ꧀ꦗꦱꦥ꧀ꦥꦴꦪꦱꦸꦠ꧀ꦠꦮꦟ꧀ꦟꦤꦴ
꧖꧖. ꦑꦟꦥꦨꦔ꧀ꦒꦸꦠꦴꦪ ꦤ ꦤꦶꦕ꧀ꦕꦴ ꦤ ꦣꦸꦮꦴꦠꦶ ꦄꦤꦶꦕ꧀ꦕꦴ. ꦠꦠꦺꦴ ꦌꦮ ꦥꦟ꧀ꦝꦶꦠꦺꦲꦶ ꦤ ꦆꦕ꧀ꦕꦴ ꦤ ꦈꦥꦒꦤ꧀ꦠꦧ꧀ꦧꦴꦠꦶꦥꦶ ꦄꦤꦶꦕ꧀ꦕꦴ. ꦱꦺꦴ ꦕꦴꦪꦁ ꦄꦤꦶꦕ꧀ꦕꦠ꧀ꦡꦺꦴ ꦈꦢꦪꦮꦪꦥꦫꦶꦕ꧀ꦖꦶꦤ꧀ꦤꦠꦴꦪ ꦮꦺꦢꦶꦠꦧ꧀ꦧꦺꦴꦠꦶ ꦢꦱ꧀ꦱꦺꦤ꧀ꦠꦺꦴ, ‘‘ꦲꦸꦠ꧀ꦮꦴ ꦄꦨꦴꦮꦛ꧀ꦜꦺꦤ ꦄꦤꦶꦕ꧀ꦕꦴ’’ꦠꦶ ꦄꦴꦲ; ꦈꦥ꧀ꦥꦗ꧀ꦗꦶꦠ꧀ꦮꦴ ꦮꦶꦤꦱ꧀ꦱꦤꦠꦺꦴꦠꦶ ꦄꦠ꧀ꦡꦺꦴ. ꦄꦪꦚ꧀ꦕ ꦄꦤꦶꦕ꧀ꦕꦠꦴ ꦮꦏ꧀ꦑꦩꦴꦤꦴ ꦕ ꦠꦸꦕ꧀ꦖꦴꦢꦶꦠꦴ ꦢ꧀ꦮꦶꦤ꧀ꦤꦩ꧀ꦥꦶ ꦏꦴꦩꦴꦤꦁ ꦱꦴꦣꦴꦫꦟꦺꦴꦠꦶ ꦄꦴꦲ – ‘‘ꦮꦠ꧀ꦡꦸꦏꦴꦩꦴꦥꦶ ꦏꦶꦭꦺꦱꦏꦴꦩꦴꦥꦷ’’ꦠꦶ. ꦫꦶꦠ꧀ꦠꦴ ꦮꦶꦮꦶꦠ꧀ꦠꦴ, ꦠꦺꦱꦁ ꦤꦶꦕ꧀ꦕꦱꦴꦫꦴꦢꦷꦤꦁ ꦄꦠ꧀ꦠꦤꦶ ꦄꦨꦴꦮꦠꦺꦴ ꦠꦺꦲꦶ ꦮꦶꦱꦸꦁꦨꦹꦠꦴ. ꦪꦡꦴ ꦥꦤ ꦱꦧ꧀ꦧꦱꦺꦴ ꦱꦨꦴꦮꦫꦲꦶꦠꦩꦴꦏꦴꦱꦁ ‘‘ꦠꦸꦕ꧀ꦖꦁ ꦫꦶꦠ꧀ꦠ’’ꦤ꧀ꦠꦶ ꦮꦸꦕ꧀ꦕꦠꦶ, ꦤ ꦌꦮꦩꦺꦠꦺ. ꦌꦠꦺ ꦥꦤ ꦏꦺꦮꦭꦁ ꦤꦶꦕ꧀ꦕꦱꦴꦫꦴꦢꦶꦮꦶꦫꦲꦠꦺꦴ ꦌꦮ ꦠꦸꦕ꧀ꦖꦴ ꦫꦶꦠ꧀ꦠꦴꦠꦶ ꦢꦱ꧀ꦱꦺꦤ꧀ꦠꦺꦴ ‘‘ꦤ ꦥꦤꦴ’’ꦠꦶꦄꦴꦢꦶꦩꦴꦲ. ‘‘ꦤ ꦲꦶ ꦠꦸꦕ꧀ꦖꦩꦸꦛ꧀ꦜꦶ ꦤꦴꦩ ꦤꦠ꧀ꦡꦷ’’ꦠꦶ ꦆꦢꦁ ꦭꦺꦴꦏꦱꦩꦚ꧀ꦚꦴꦮꦱꦺꦤ ꦮꦸꦠ꧀ꦠꦁ, ꦭꦺꦴꦏꦱꦩꦚ꧀ꦚꦴ ꦭꦺꦴꦏꦶꦪꦏꦡꦴ ꦤ ꦭꦔ꧀ꦓꦶꦠꦧ꧀ꦧꦴ.
ꦩꦸꦱꦴꦠꦶ ꦆꦠ꧀ꦠꦫꦥꦕ꧀ꦕꦸꦥꦛ꧀ꦜꦴꦤꦠꦴꦪ ꦤ ꦢꦶꦱ꧀ꦱꦠꦷꦠꦶ ꦄꦴꦲ ‘‘ꦩꦸꦱꦴꦠꦶ ꦤꦴꦱꦤꦏꦴ’’ꦠꦶ. ꦮꦶꦱꦁꦮꦴꦢꦤꦛ꧀ꦜꦺꦤ ꦮꦴ ꦩꦸꦱꦴ. ꦌꦠꦺ ꦲꦶ ꦄꦱꦸꦨꦴꦢꦶꦱꦨꦴꦮꦴꦥꦶ ꦧꦴꦭꦴꦤꦁ ꦱꦸꦨꦴꦢꦶꦨꦴꦮꦺꦤ ꦈꦥꦛ꧀ꦜꦲꦤ꧀ꦠꦴ ꦱꦸꦨꦴꦢꦶꦒ꧀ꦒꦲꦟꦱ꧀ꦱ ꦥꦕ꧀ꦕꦏ꧀ꦑꦨꦴꦮꦺꦤ ꦱꦠ꧀ꦠꦺ ꦮꦶꦱꦁꦮꦴꦢꦺꦤ꧀ꦠꦶ. ꦤꦱ꧀ꦱꦤꦱꦨꦴꦮꦴꦠꦶ ꦑꦟꦨꦔ꧀ꦒꦠ꧀ꦠꦴ ꦆꦠ꧀ꦠꦫꦥꦕ꧀ꦕꦸꦥꦛ꧀ꦜꦴꦤꦠꦴꦪ ꦢꦶꦱ꧀ꦱꦩꦴꦤꦴ ꦮꦶꦪꦥꦶ ꦲꦸꦠ꧀ꦮꦴ ꦄꦥꦚ꧀ꦚꦴꦪꦤꦏꦥꦏꦠꦶꦏꦴ. ꦠꦺꦤꦴꦲ ‘‘ꦑꦺꦠ꧀ꦠꦁ ꦮꦶꦪꦴ’’ꦠꦶꦄꦴꦢꦶ. ꦣꦩ꧀ꦩꦱꦢ꧀ꦢꦺꦴ ꦕꦺꦠ꧀ꦡ ‘‘ꦗꦴꦠꦶꦣꦩ꧀ꦩꦴꦤ’’ꦤ꧀ꦠꦶꦄꦴꦢꦷꦱꦸ (ꦢꦷ. ꦤꦶ. ꧒.꧓꧙꧘) ꦮꦶꦪ ꦥꦏꦠꦶꦥꦫꦶꦪꦴꦪꦺꦴ, ꦠꦡꦴ ꦱꦨꦴꦮꦱꦢ꧀ꦢꦺꦴ ꦕꦴꦠꦶ ꦢꦛ꧀ꦜꦧ꧀ꦧꦁ. ꦩꦺꦴꦱꦣꦩ꧀ꦩꦴꦠꦶ ꦩꦺꦴꦱꦤꦥꦏꦠꦶꦏꦴ, ꦏꦸꦱꦭꦨꦟ꧀ꦝꦲꦫꦟꦱꦨꦴꦮꦴꦠꦶ ꦄꦠ꧀ꦡꦺꦴ. ꦩꦴꦪꦴꦏꦠꦤ꧀ꦠꦶ ꦩꦴꦪꦴꦪ ꦏꦠꦁ ꦈꦢꦏꦴꦢꦶꦩꦟꦶꦄꦴꦢꦶꦄꦴꦏꦴꦫꦺꦤ ꦩꦴꦪꦴꦢꦶꦤꦴ ꦈꦥꦛ꧀ꦜꦴꦥꦶꦠꦁ; ꦩꦴꦪꦴꦏꦠꦁ ꦮꦶꦪ ꦩꦴꦪꦴꦏꦠꦁ ꦄꦚ꧀ꦚꦱꦨꦴꦮꦴ ꦲꦸꦠ꧀ꦮꦴ ꦄꦠꦡꦴ ꦈꦥꦛ꧀ꦜꦲꦤꦠꦺꦴ. ꦠꦺꦤꦴꦲ ‘‘ꦪꦡꦴ’’ꦠꦶꦄꦴꦢꦶ. ꦕꦏ꧀ꦑꦸꦥꦡꦺ ꦌꦮ ꦏꦠꦮꦶꦗ꧀ꦗꦴꦪ, ꦤ ꦠꦠꦺꦴ ꦥꦫꦤ꧀ꦠꦶ ꦮꦸꦠ꧀ꦠꦁ – ‘‘ꦢꦱ꧀ꦱꦤꦹꦥꦕꦴꦫꦺ ꦜꦶꦠꦱ꧀ꦱꦺꦮ ꦠꦡꦴ ꦥꦚ꧀ꦚꦴꦪꦠꦷ’’ꦠꦶ. ꦠꦪꦶꦢꦁ ꦱꦩ꧀ꦧꦫꦮꦶꦗ꧀ꦗꦴꦮꦱꦺꦤ ꦮꦸꦠ꧀ꦠꦁ.
ꦌꦮꦁ ꦠꦴꦮꦏꦴꦭꦶꦏꦨꦴꦮꦺꦤ ꦏꦴꦩꦴꦤꦁ ꦩꦴꦪꦴꦏꦠꦨꦴꦮꦁ ꦢꦱ꧀ꦱꦺꦠ꧀ꦮꦴ ꦆꦢꦴꦤꦶ ꦠꦠꦺꦴ ꦄꦚ꧀ꦚꦺꦤꦥꦶ ꦥꦏꦴꦫꦺꦤ ꦢꦱ꧀ꦱꦺꦠꦸꦁ ‘‘ꦪꦡꦴ ꦕꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦄꦤꦶꦕ꧀ꦕꦴꦢꦶꦱꦨꦴꦮꦴꦤꦁ ꦏꦴꦩꦴꦤꦁ ꦤꦶꦕ꧀ꦕꦴꦢꦶꦱꦨꦴꦮꦢꦱ꧀ꦱꦤꦁ ꦮꦶꦥꦭ꧀ꦭꦴꦱꦱꦲꦒꦠꦠꦴꦪ ꦮꦺꦢꦶꦠꦧ꧀ꦧꦁ. ꦧꦴꦭꦴꦤꦁ ꦭꦴꦥꦤꦠꦺꦴꦠꦶ ꦄꦥꦫꦶꦚ꧀ꦚꦴꦠꦮꦠ꧀ꦡꦸꦏꦴꦤꦁ ꦄꦤ꧀ꦣꦧꦴꦭꦴꦤꦁ ꦥꦸꦒ꧀ꦒꦭꦴꦤꦁ ꦮꦶꦥꦭ꧀ꦭꦴꦱꦲꦺꦠꦸꦠꦺꦴ. ꦩꦤꦸꦱ꧀ꦱꦭꦺꦴꦏꦺ ꦜꦠ꧀ꦮꦴ ꦩꦤꦸꦱ꧀ꦱꦴꦤꦁ ꦮꦴ ꦮꦱꦺꦤ ꦨꦒꦮꦠꦴ ꦨꦴꦱꦶꦠꦠ꧀ꦠꦴ ꦮꦸꦠ꧀ꦠꦁ – ‘‘ꦢꦶꦛ꧀ꦜꦣꦩ꧀ꦩꦶꦏꦴ ꦏꦴꦩꦴꦠꦶ ꦩꦴꦤꦸꦱꦏꦴ ꦥꦚ꧀ꦕ ꦏꦴꦩꦒꦸꦟꦴ’’ꦠꦶ. ꦠꦠꦺꦴ ꦌꦮ ꦕ ‘‘ꦱꦩ꧀ꦥꦫꦴꦪꦶꦏꦴꦠꦶ ꦠꦺ ꦜꦥꦺꦠ꧀ꦮꦴ ꦄꦮꦱꦺꦱꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦠ꧀ꦡ ꦢꦶꦛ꧀ꦜꦣꦩ꧀ꦩꦴ ꦥꦕ꧀ꦕꦏ꧀ꦑꦱꦨꦴꦮꦴ ꦄꦴꦫꦩ꧀ꦩꦟꦨꦹꦠꦴ ꦌꦠꦴꦱꦁ ꦄꦠ꧀ꦡꦷꦠꦶ ꦢꦶꦛ꧀ꦜꦣꦩ꧀ꦩꦶꦏꦴ. ꦱꦩ꧀ꦥꦫꦴꦪꦶꦏꦺ ꦏꦴꦩꦺ ꦄꦴꦫꦧ꧀ꦨ ꦈꦥ꧀ꦥꦤ꧀ꦤꦱꦚ꧀ꦚꦴ ꦱꦩ꧀ꦥꦫꦴꦪꦶꦏꦴ. ꦠꦺ ꦱꦩꦺꦕ꧀ꦕ ꦣꦷꦪꦠꦶ ꦌꦠ꧀ꦡ ꦄꦴꦟꦴꦠꦶ ꦣꦺꦪ꧀ꦪꦁ, ꦄꦴꦟꦴꦥꦮꦠ꧀ꦠꦶꦛ꧀ꦜꦴꦤꦁ. ꦩꦴꦫꦱ꧀ꦱ ꦣꦺꦪ꧀ꦪꦤ꧀ꦠꦶ ꦩꦴꦫꦣꦺꦪ꧀ꦪꦁ ꦠꦱ꧀ꦱ ꦆꦱ꧀ꦱꦫꦶꦪꦥꦮꦠ꧀ꦠꦤꦠ꧀ꦠꦴ. ꦠꦺꦤꦴꦲ ‘‘ꦪꦺꦲꦷ’’ꦠꦶꦄꦴꦢꦶ. ꦒꦲꦶꦠꦤ꧀ꦠꦶ ꦮꦶꦱꦪꦮꦶꦱꦪꦷꦨꦴꦮꦺꦤ ꦒꦲꦶꦠꦁ, ꦄꦴꦫꦩ꧀ꦩꦟꦮꦱꦺꦤ ꦄꦴꦫꦩ꧀ꦩꦟꦏꦫꦟꦮꦱꦺꦤ ꦕ ꦒꦲꦶꦠꦤ꧀ꦠꦶ ꦄꦠ꧀ꦡꦺꦴ. ꦠꦠ꧀ꦡ ꦄꦴꦫꦩ꧀ꦩꦟꦏꦫꦟꦮꦱꦺꦤ ꦒꦲꦟꦁ ꦤꦴꦩ ‘‘ꦆꦢꦁ ꦩꦪ꧀ꦲ’’ꦤ꧀ꦠꦶ ꦄꦮꦶꦨꦴꦒꦺꦤ ꦥꦫꦶꦒ꧀ꦒꦲꦏꦫꦟꦁ; ꦄꦴꦫꦩ꧀ꦩꦟꦮꦱꦺꦤ ꦥꦤ ꦒꦲꦟꦁ ꦨꦴꦒꦱꦺꦴ ꦄꦴꦫꦩ꧀ꦩꦟꦴꦤꦸꦨꦮꦤꦤ꧀ꦠꦶ ꦮꦢꦤ꧀ꦠꦶ. ꦈꦨꦪꦱ꧀ꦱꦥꦶ ꦥꦤ ꦠꦟ꧀ꦲꦴꦫꦴꦒꦮꦱꦺꦤ ꦒꦲꦟꦁ ꦱꦤ꧀ꦣꦴꦪ, ‘‘ꦈꦨꦪꦩꦺꦠꦁ ꦒꦲꦶꦠ’’ꦤ꧀ꦠꦶ ꦮꦸꦠ꧀ꦠꦁ. ꦩꦴꦫꦺꦴꦠꦶ ꦏꦶꦭꦺꦱꦩꦴꦫꦺꦴ. ꦪꦢꦒ꧀ꦒꦺꦤ ꦏꦶꦭꦺꦱꦩꦴꦫꦺꦴ, ꦠꦢꦒ꧀ꦒꦺꦤ ꦢꦺꦮꦥꦸꦠ꧀ꦠꦩꦴꦫꦺꦴꦥꦶ ꦠꦺ ꦄꦠ꧀ꦠꦤꦺꦴ ꦮꦱꦁ ꦮꦠ꧀ꦠꦺꦠꦶ. ꦠꦁ ꦱꦤ꧀ꦣꦴꦪꦴꦠꦶ ꦣꦩ꧀ꦩꦩꦸꦑꦺꦤ ꦥꦸꦒ꧀ꦒꦭꦒ꧀ꦒꦲꦟꦁ ꦱꦤ꧀ꦣꦴꦪ.
ꦄꦥ꧀ꦥꦲꦷꦤꦮꦶꦥꦭ꧀ꦭꦴꦱꦴ ꦲꦶ ꦥꦸꦒ꧀ꦒꦭꦴ ꦏꦴꦩꦴꦣꦶꦩꦸꦠ꧀ꦠꦴ ꦩꦴꦫꦱ꧀ꦱ ꦆꦱ꧀ꦱꦫꦶꦪꦮꦠ꧀ꦠꦤꦛ꧀ꦜꦴꦤꦠꦴꦪ ‘‘ꦩꦴꦫꦣꦺꦪ꧀ꦪ’’ꦤ꧀ꦠꦶ ꦮꦸꦠ꧀ꦠꦴ, ꦠꦡꦴ ꦩꦴꦫꦱ꧀ꦱ ꦤꦶꦮꦴꦥꦒꦺꦴꦕꦫꦥꦫꦶꦪꦴꦪꦺꦲꦶꦥꦶ ꦠꦺ ꦌꦮꦁ ꦮꦸꦠ꧀ꦠꦴꦠꦶ ꦢꦱ꧀ꦱꦺꦤ꧀ꦠꦺꦴ, ‘‘ꦪꦡꦴ ꦕꦺꦴꦭ꦳ꦱ꧀ꦱꦴ’’ꦠꦶꦄꦴꦢꦶꦩꦴꦲ. ꦤꦶꦮꦥꦠꦷꦠꦶ ꦤꦶꦮꦴꦥꦺꦴ, ꦱꦺꦴ ꦌꦮ ꦧꦷꦗꦤ꧀ꦠꦶ ꦤꦶꦮꦴꦥꦧꦷꦗꦁ. ꦠꦺꦠꦶ ꦏꦴꦩꦒꦸꦟꦴ. ꦪꦠ꧀ꦡꦴꦠꦶ ꦪꦱ꧀ꦩꦶꦁ ꦥꦢꦺꦱꦺ.
ꦩꦤꦱꦶ ꦨꦮꦴꦠꦶ ꦩꦴꦤꦱꦴꦠꦶ ꦄꦴꦲ ‘‘ꦕꦶꦠ꧀ꦠꦱꦩ꧀ꦨꦹꦠꦴ’’ꦠꦶ. ꦠꦺ ꦥꦤ ꦄꦮꦶꦗ꧀ꦗꦴꦢꦪꦺꦴ ꦥꦴꦭ꦳ꦶꦪꦁ ꦄꦴꦒꦠꦴ. ꦌꦮꦚ꧀ꦲꦶ ꦭꦺꦴꦲꦶꦠꦱꦤ꧀ꦤꦶꦱ꧀ꦱꦪꦺꦴ ꦥꦸꦧ꧀ꦧꦺꦴ ꦮꦶꦪ ꦄꦤꦸꦫꦺꦴꦣꦹꦥꦤꦶꦱ꧀ꦱꦪꦺꦴ ꦮꦶꦫꦺꦴꦣꦺꦴꦠꦶ ꦢꦱ꧀ꦱꦺꦤ꧀ꦠꦺꦴ, ‘‘ꦩꦩꦴꦪꦶꦠꦺ ꦮꦠ꧀ꦡꦸꦱ꧀ꦩꦶ’’ꦤ꧀ꦠꦶꦄꦴꦢꦶꦩꦴꦲ. ꦠꦺꦣꦴꦠꦶ ꦌꦠ꧀ꦡ ꦆꦣꦴꦠꦶ ꦤꦶꦥꦴꦠꦩꦠ꧀ꦠꦁ ‘‘ꦆꦣꦴꦲꦁ, ꦨꦶꦏ꧀ꦑꦮꦺ, ꦨꦸꦠ꧀ꦠꦴꦮꦷ ꦄꦱ꧀ꦱ’’ꦤ꧀ꦠꦶꦄꦴꦢꦷꦱꦸ (ꦩ. ꦤꦶ. ꧑.꧓꧐) ꦮꦶꦪ. ꦏꦴꦩꦭꦺꦴꦏꦤ꧀ꦠꦶ ꦏꦴꦩꦒꦸꦟꦱꦔ꧀ꦑꦴꦠꦁ ꦱꦔ꧀ꦑꦴꦫꦭꦺꦴꦏꦁ, ꦪꦠ꧀ꦡ ꦮꦴ ꦭꦺꦴꦏꦺ ꦏꦴꦩꦒꦸꦟꦮꦤ꧀ꦠꦁ ꦭꦺꦴꦏꦁ. ꦕꦶꦠ꧀ꦠꦺꦤ ꦄꦣꦶꦛ꧀ꦜꦲꦶꦠ꧀ꦮꦴꦠꦶ ꦙꦴꦤꦴꦫꦩ꧀ꦩꦟꦁ ꦥꦛꦶꦨꦴꦒꦤꦶꦩꦶꦠ꧀ꦠꦁ ꦨꦴꦮꦤꦴꦕꦶꦠ꧀ꦠꦺꦤ ꦈꦥ꧀ꦥꦴꦢꦺꦠ꧀ꦮꦴ. ꦥꦫꦶꦠ꧀ꦠꦁ ꦤꦴꦩ ꦮꦶꦏ꧀ꦑꦩ꧀ꦨꦤꦄꦱꦩꦠ꧀ꦡꦠ꧀ꦠꦴ ꦏꦶꦭꦺꦱꦺꦲꦶ ꦥꦫꦶꦠꦺꦴ ꦑꦟ꧀ꦝꦶꦠꦁ ꦮꦶꦪ ꦲꦺꦴꦠꦶ. ꦠꦱ꧀ꦱ ꦥꦛꦶꦏ꧀ꦑꦺꦥꦺꦤꦴꦠꦶ ꦥꦫꦶꦠ꧀ꦠꦨꦴꦮꦥꦛꦶꦏ꧀ꦑꦺꦥꦺꦤ. ꦥꦩꦴꦟꦤ꧀ꦠꦶꦥꦶ ꦏꦴꦩꦴꦮꦕꦫꦩꦺꦮ ꦥꦴꦥꦏꦴꦤꦁ ꦥꦩꦴꦟꦏꦫꦟꦣꦩ꧀ꦩꦴꦤꦁ ꦮꦶꦏ꧀ꦑꦩ꧀ꦨꦤꦮꦱꦺꦤ ꦄꦥ꧀ꦥꦗꦲꦤꦠꦺꦴ. ꦠꦥ꧀ꦥꦛꦶꦏ꧀ꦑꦺꦥꦮꦱꦺꦤ ꦄꦥ꧀ꦥꦩꦴꦟꦁ ꦤꦴꦩ ꦩꦲꦒ꧀ꦒꦠꦤ꧀ꦠꦶ ꦄꦴꦲ – ‘‘ꦫꦹꦥꦴꦮꦕꦫꦁ ꦄꦫꦹꦥꦴꦮꦕꦫ’’ꦤ꧀ꦠꦶ. ꦱꦩꦸꦕ꧀ꦖꦺꦢꦮꦱꦺꦤ ꦏꦶꦭꦺꦱꦴꦤꦁ ꦄꦥ꧀ꦥꦲꦴꦤꦺꦤ ꦩꦲꦒ꧀ꦒꦠꦗ꧀ꦙꦴꦤꦩ꧀ꦥꦶ ꦱꦸꦨꦴꦮꦶꦠꦁ ꦤꦴꦩ ꦤ ꦲꦺꦴꦠꦶ, ꦥꦒꦺꦮ ꦥꦫꦶꦠ꧀ꦠꦗ꧀ꦙꦴꦤꦤ꧀ꦠꦶ ꦄꦴꦲ – ‘‘ꦱꦸꦨꦴꦮꦶꦠꦤ꧀ꦠꦶ…ꦥꦺ… ꦭꦺꦴꦏꦸꦠ꧀ꦠꦫꦱ꧀ꦱꦺꦮꦺꦠꦁ ꦤꦴꦩ’’ꦤ꧀ꦠꦶ. ꦌꦠꦱ꧀ꦱ ꦮꦱꦺꦤꦴꦠꦶ ‘‘ꦱꦸꦨꦴꦮꦶꦠ’’ꦤ꧀ꦠꦶ ꦥꦢꦱ꧀ꦱ ꦮꦱꦺꦤ.
ꦠꦩꦺꦮ ꦥꦛꦶꦥꦢꦤ꧀ꦠꦶ ꦠꦩꦺꦮ ꦄꦨꦶꦗ꧀ꦙꦴꦢꦶꦥꦲꦴꦤꦴꦮꦲꦁ ꦙꦴꦤꦥꦛꦶꦥꦢꦁ. ꦄꦫꦲꦠ꧀ꦠꦺ ꦠꦱ꧀ꦱ ꦈꦥꦴꦪꦨꦹꦠꦴꦪ ꦮꦶꦥꦱ꧀ꦱꦤꦴꦪ ꦮꦴ ꦕꦠꦸꦠ꧀ꦡꦗ꧀ꦙꦴꦤꦺ ꦠꦱ꧀ꦱ ꦈꦥꦴꦪꦨꦹꦠꦺ ꦈꦥꦕꦴꦫꦺ ꦮꦴ ꦱꦠꦶ ꦕꦶꦠ꧀ꦠꦁ ꦥꦱꦤ꧀ꦤꦩꦺꦮ ꦲꦺꦴꦠꦷꦠꦶ ꦄꦴꦲ – ‘‘ꦄꦫꦲꦠ꧀ꦠꦁ ꦮꦴ…ꦥꦺ… ꦈꦥꦕꦴꦫꦁ ꦮꦴ’’ꦠꦶ. ꦄꦣꦶꦩꦺꦴꦏ꧀ꦑꦱꦩ꧀ꦥꦱꦴꦢꦺꦴꦠꦶ ‘‘ꦄꦗ꧀ꦗꦺꦮ ꦄꦫꦲꦠ꧀ꦠꦁ ꦒꦟ꧀ꦲꦶꦱ꧀ꦱꦴꦩꦷ’’ꦠꦶ ꦮꦴ ꦮꦶꦥꦱ꧀ꦱꦤꦴꦪ ꦮꦷꦡꦶꦥꦛꦶꦥꦤ꧀ꦤꦠ꧀ꦠꦴ; ‘‘ꦄꦗ꧀ꦗꦺꦮ ꦕꦠꦸꦠ꧀ꦡꦗ꧀ꦙꦴꦤꦁ ꦤꦶꦧ꧀ꦧꦠ꧀ꦠꦺꦱ꧀ꦱꦴꦩꦷ’’ꦠꦶ ꦮꦴ ꦈꦥꦕꦴꦫꦱꦩꦴꦣꦶꦤꦴ ꦕꦶꦠ꧀ꦠꦱ꧀ꦱ ꦱꦩꦴꦲꦶꦠꦠ꧀ꦠꦴ ꦄꦣꦶꦩꦸꦕ꧀ꦕꦤꦨꦹꦠꦺꦴ ꦱꦩ꧀ꦥꦱꦴꦢꦺꦴ. ꦥꦛꦶꦭꦴꦨꦱꦩ꧀ꦥꦱꦴꦢꦺꦴꦠꦶ ꦄꦫꦲꦠ꧀ꦠꦱ꧀ꦱ ꦕꦠꦸꦠ꧀ꦡꦗ꧀ꦙꦴꦤꦱ꧀ꦱ ꦮꦴ ꦄꦣꦶꦒꦩꦱꦔ꧀ꦑꦴꦠꦺꦴ ꦱꦩ꧀ꦥꦱꦴꦢꦺꦴ. ꦥꦛꦶꦭꦴꦨꦺꦴꦥꦶ ꦲꦶ ꦏꦶꦭꦺꦱꦏꦴꦭꦸꦱꦶꦪꦴꦨꦶꦨꦮꦤꦠꦺꦴ ꦕꦶꦠ꧀ꦠꦱ꧀ꦱ ꦱꦸꦥ꧀ꦥꦱꦤ꧀ꦤꦨꦴꦮꦴꦮꦲꦠ꧀ꦠꦴ ‘‘ꦱꦩ꧀ꦥꦱꦴꦢꦺꦴ’’ꦠꦶ ꦮꦸꦠ꧀ꦠꦺꦴ. ꦥꦕ꧀ꦕꦪꦴꦠꦶ ꦤꦴꦩꦫꦹꦥꦥꦕ꧀ꦕꦪꦴ ꦄꦮꦶꦗ꧀ꦗꦴꦢꦪꦺꦴ. ꦱꦧ꧀ꦧꦡꦴꦠꦶ ꦱꦩꦸꦢꦪꦠꦺꦴ ꦄꦠ꧀ꦡꦔ꧀ꦒꦩꦠꦺꦴ ꦄꦱ꧀ꦱꦴꦢꦠꦺꦴ ꦄꦴꦢꦷꦤꦮꦠꦺꦴ ꦤꦶꦱ꧀ꦱꦫꦟꦠꦺꦴꦠꦶ ꦱꦧ꧀ꦧꦥ꧀ꦥꦏꦴꦫꦺꦤ. ꦄꦴꦱꦴꦠꦶ ꦄꦣꦶꦩꦸꦕ꧀ꦕꦤꦮꦱꦺꦤ ꦄꦴꦱꦷꦱꦤꦴ. ꦠꦺꦤꦴꦲ – ‘‘ꦄꦴꦱꦴ ꦱꦤ꧀ꦠꦶꦛ꧀ꦜꦠꦶ, ꦄꦣꦶꦩꦺꦴꦏ꧀ꦑꦁ ꦥꦛꦶꦭꦨꦠꦷ’’ꦠꦶ.
ꦥꦴꦢꦏꦤ꧀ꦠꦶ ꦥꦢꦛ꧀ꦜꦴꦤꦁ. ꦏꦶꦭꦺꦱꦴ ꦱꦤ꧀ꦤꦶꦱꦷꦢꦤ꧀ꦠꦷꦠꦶ ꦤꦷꦮꦫꦟꦱꦲꦒꦠꦴ ꦌꦮ ꦏꦶꦭꦺꦱꦴ ꦮꦶꦏ꧀ꦑꦩ꧀ꦨꦤꦮꦱꦺꦤ ꦮꦹꦥꦱꦩꦤ꧀ꦠꦶ. ꦱꦠꦷꦠꦶ ꦈꦥꦕꦴꦫꦗ꧀ꦙꦴꦤꦴꦮꦲꦴ ꦱꦠꦶ ꦱꦤ꧀ꦠꦶꦛ꧀ꦜꦠꦶ. ꦱꦔ꧀ꦑꦴꦫꦒꦠꦤ꧀ꦠꦶ ꦨꦴꦮꦤꦴꦪ ꦱꦩꦠꦴꦪ ꦥꦮꦠ꧀ꦠꦩꦴꦤꦠ꧀ꦠꦴ, ꦆꦩꦺ ꦣꦩ꧀ꦩꦮꦶꦕꦪꦱꦩ꧀ꦧꦺꦴꦗ꧀ꦙꦔ꧀ꦒꦴꦢꦪꦺꦴ ꦌꦏꦫꦱꦴ ꦲꦸꦠ꧀ꦮꦴ ꦥꦮꦠ꧀ꦠꦤ꧀ꦠꦷꦠꦶ, ꦨꦴꦮꦤꦴꦕꦶꦠ꧀ꦠꦸꦥ꧀ꦥꦴꦢꦥꦫꦶꦪꦴꦥꦤ꧀ꦤꦁ ꦱꦔ꧀ꦑꦴꦫꦒꦠꦁ ꦮꦶꦨꦹꦠꦁ ꦥꦴꦏꦛꦁ ꦲꦸꦠ꧀ꦮꦴ ꦈꦥꦛ꧀ꦜꦴꦠꦶ. ꦕꦶꦠ꧀ꦠꦸꦥ꧀ꦥꦴꦢꦺꦴꦠꦶ ꦨꦴꦮꦤꦴꦕꦶꦠ꧀ꦠꦸꦥ꧀ꦥꦴꦢꦺꦴ. ꦭꦺꦥꦥꦶꦟ꧀ꦝꦺꦠꦶ ꦱꦶꦭꦺꦱꦥꦶꦟ꧀ꦝꦺ ꦭꦒ꧀ꦒꦩꦴꦤꦺꦴ ꦮꦶꦪ ꦄꦥ꧀ꦥꦶꦠꦺꦴ ꦮꦶꦪ ꦲꦺꦴꦠꦶ. ꦈꦥꦕꦴꦫꦺꦤ ꦱꦩꦴꦣꦶꦪꦠꦶ ꦈꦥꦕꦴꦫꦗ꧀ꦙꦴꦤꦺꦤ ꦱꦩꦴꦣꦶꦪꦠꦶ. ꦄꦪꦤ꧀ꦠꦶ ꦄꦪꦁ ꦢꦸꦮꦶꦣꦺꦴꦥꦶ ꦄꦣꦶꦩꦸꦕ꧀ꦕꦤꦴꦏꦴꦫꦺꦴ ꦄꦣꦶꦩꦺꦴꦏ꧀ꦑꦱꦩ꧀ꦥꦱꦴꦢꦺꦴ ꦤꦴꦩ. ꦠꦱ꧀ꦩꦶꦁ ꦱꦩ꧀ꦥꦱꦴꦢꦺ ꦱꦠꦷꦠꦶ ꦌꦠꦱ꧀ꦩꦶꦁ ꦮꦶꦥꦱ꧀ꦱꦤꦴꦭꦏ꧀ꦑꦟꦺ, ꦈꦥꦕꦴꦫꦗ꧀ꦙꦴꦤꦺ ꦮꦴ ꦄꦣꦶꦩꦺꦴꦏ꧀ꦑꦱꦩ꧀ꦥꦱꦴꦢꦺ ꦱꦠꦶ. ꦪꦺꦴ ꦥꦤ ꦄꦫꦲꦠ꧀ꦠꦁ ꦮꦴ ꦥꦛꦶꦭꦨꦠꦶ ꦕꦠꦸꦠ꧀ꦡꦗ꧀ꦙꦴꦤꦁ ꦮꦴ, ꦠꦱ꧀ꦱ ꦕꦶꦠ꧀ꦠꦁ ꦮꦶꦥ꧀ꦥꦱꦤ꧀ꦤꦁ ꦲꦺꦴꦠꦶꦪꦺꦮ, ꦄꦪꦁ ꦤꦶꦥ꧀ꦥꦫꦶꦪꦴꦪꦠꦺꦴ ꦥꦛꦶꦭꦴꦨꦱꦩ꧀ꦥꦱꦴꦢꦺꦴ, ꦌꦮꦁ ꦱꦤ꧀ꦠꦺꦥꦶ ꦆꦣꦴꦩꦶꦥ꧀ꦥꦺꦠꦩꦺꦮ ꦢꦱ꧀ꦱꦺꦠꦸꦁ, ‘‘ꦆꦣ ꦥꦤꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦮꦶꦥꦱ꧀ꦱꦤꦴ ꦲꦷꦠꦶꦄꦴꦢꦶ ꦮꦸꦠ꧀ꦠꦱ꧀ꦱ ꦱꦩꦠ꧀ꦡꦤꦁ. ꦠꦠ꧀ꦡ ꦥꦚ꧀ꦚꦴꦪꦴꦠꦶ ꦄꦫꦲꦠ꧀ꦠꦥꦚ꧀ꦚꦴꦪ. ꦄꦣꦶꦩꦸꦕ꧀ꦕꦤꦱ꧀ꦱꦴꦠꦶ ꦱꦢ꧀ꦢꦲꦤꦁ ꦈꦱ꧀ꦱꦸꦏ꧀ꦏꦴꦥꦗ꧀ꦗꦤꦱ꧀ꦱ. ꦈꦥꦕꦴꦫꦤ꧀ꦠꦶ ꦈꦥꦕꦴꦫꦗ꧀ꦙꦴꦤꦁ. ꦄꦴꦤꦺꦚ꧀ꦗꦱꦩꦴꦥꦠ꧀ꦠꦶꦪꦴ ꦄꦣꦶꦩꦸꦕ꧀ꦕꦤꦱ꧀ꦱ ꦏꦴꦫꦟꦤ꧀ꦠꦶ ꦪꦺꦴꦗꦤꦴ.
ꦌꦠꦫꦲꦶ ꦮꦴꦠꦶ ꦆꦢꦴꦤꦶꦩꦺꦮ. ꦄꦴꦤꦺꦚ꧀ꦗꦁ ꦮꦴꦠꦶ ꦕꦠꦸꦠ꧀ꦡꦗ꧀ꦙꦴꦤꦁ ꦮꦴ. ꦱꦩꦴꦥꦗ꧀ꦗꦠꦷꦠꦶ ꦄꦣꦶꦒꦕ꧀ꦖꦠꦶ. ꦆꦢꦁ ꦲꦷꦠꦶꦄꦴꦢꦶꦤꦴ ꦱꦔ꧀ꦑꦺꦥꦠꦺꦴ ꦮꦸꦠ꧀ꦠꦩꦠ꧀ꦡꦁ ꦮꦶꦮꦫꦠꦶ. ꦄꦫꦲꦠ꧀ꦠꦱꦕ꧀ꦖꦶꦏꦶꦫꦶꦪꦴ ꦤꦴꦩ ꦄꦒ꧀ꦒꦩꦒ꧀ꦒꦨꦴꦮꦤꦴꦪ ꦱꦠꦶ ꦄꦠ꧀ꦡꦠꦺꦴ ꦄꦴꦥꦤ꧀ꦤꦴ ꦲꦺꦴꦠꦶ, ꦄꦒ꧀ꦒꦩꦒ꧀ꦒꦥꦚ꧀ꦚꦴ ꦌꦮ ꦠꦢꦠ꧀ꦡꦁ ꦄꦣꦶꦩꦸꦕ꧀ꦕꦶꦠꦧ꧀ꦧꦴꦠꦶ ꦢꦱ꧀ꦱꦺꦤ꧀ꦠꦺꦴ, ‘‘ꦄꦡ ꦮꦴ’’ꦠꦶ ꦮꦶꦏꦥ꧀ꦥꦤ꧀ꦠꦫꦩꦴꦲ. ꦠꦠ꧀ꦡ ꦪꦡꦴ ꦤꦴꦩ ꦥꦴꦱꦴꦢꦱ꧀ꦱ ꦄꦠ꧀ꦡꦴꦪ ꦱꦩꦴꦤꦷꦠꦢꦧ꧀ꦧꦱꦩ꧀ꦨꦴꦫꦴꦮꦪꦮꦺ ꦄꦥ꧀ꦥꦲꦺꦴꦤ꧀ꦠꦺ ꦏꦹꦛꦴꦒꦴꦫꦁ ꦏꦴꦠꦸꦁ ꦤ ꦥꦲꦺꦴꦤ꧀ꦠꦶꦪꦺꦮ, ꦌꦮꦁꦱꦩ꧀ꦥꦢꦩꦶꦢꦤ꧀ꦠꦶ ꦢꦱ꧀ꦱꦺꦤ꧀ꦠꦺꦴ, ‘‘ꦠꦁ ꦄꦤꦨꦶꦱꦩ꧀ꦨꦸꦟꦤ꧀ꦠꦺꦴ ꦄꦴꦤꦺꦚ꧀ꦗꦁ ꦮꦴ ꦱꦩꦴꦥꦗ꧀ꦗꦠꦷ’’ꦠꦶ ꦄꦴꦲ. ꦕꦠꦸꦱꦕ꧀ꦕꦁ ꦮꦴ ꦱꦕ꧀ꦖꦶꦏꦫꦺꦴꦠꦶ ꦲꦺꦛ꧀ꦜꦶꦩꦩꦒ꧀ꦒꦴꦣꦶꦒꦩꦤꦮꦱꦺꦤ ꦄꦴꦤꦺꦚ꧀ꦗꦁ ꦮꦴ ꦱꦩꦴꦥꦗ꧀ꦗꦠꦶ ꦈꦨꦪꦱ꧀ꦱꦥꦶ ꦲꦺꦠꦸꦥꦫꦶꦒ꧀ꦒꦲꦶꦠꦠ꧀ꦠꦴ.
ꦠꦠ꧀ꦫꦴꦠꦶ ꦠꦱ꧀ꦩꦶꦁ ‘‘ꦥꦚ꧀ꦚꦴꦪ ꦮꦴ ꦄꦣꦶꦩꦸꦕ꧀ꦕꦠꦶ, ꦄꦴꦤꦺꦚ꧀ꦗꦁ ꦮꦴ ꦱꦩꦴꦥꦗ꧀ꦗꦠꦷ’’ꦠꦶ ꦪꦡꦴꦮꦸꦠ꧀ꦠꦺ ꦮꦶꦱꦺꦱꦴꦣꦶꦒꦩꦺ ꦄꦪꦁ ꦆꦢꦴꦤꦶ ꦮꦸꦕ꧀ꦕꦩꦴꦤꦺꦴ ꦪꦺꦴꦗꦤꦴꦤꦪꦺꦴ. ꦌꦮꦁ ꦲꦺꦴꦠꦷꦠꦶ ꦆꦢꦴꦤꦶ ꦮꦸꦕ꧀ꦕꦩꦴꦤꦴꦏꦴꦫꦺꦤ ꦕꦶꦠ꧀ꦠꦴꦨꦶꦤꦷꦲꦴꦫꦺꦴ ꦲꦺꦴꦠꦶ. ꦏꦶꦕ꧀ꦕꦤ꧀ꦠꦶ ꦥꦧ꧀ꦧꦗꦶꦠꦏꦶꦕ꧀ꦕꦁ. ꦠꦠꦺꦴꦠꦶ ꦄꦫꦲꦠ꧀ꦠꦴꦣꦶꦒꦩꦤꦠꦺꦴ. ꦎꦱꦏ꧀ꦏꦶꦠꦩꦴꦤꦱꦺꦴꦠꦶ ꦱꦁꦏꦸꦕꦶꦠꦕꦶꦠ꧀ꦠꦺꦴ. ꦄꦤ꧀ꦠꦫꦴ ꦤ ꦠꦶꦛ꧀ꦜꦠꦷꦠꦶ ꦄꦱꦩꦴꦲꦶꦠꦨꦹꦩꦶꦪꦁ ꦤ ꦠꦶꦛ꧀ꦜꦠꦶ. ꦆꦢꦴꦤꦶ ꦪꦡꦴꦮꦸꦠ꧀ꦠꦩꦠ꧀ꦡꦁ ꦈꦥꦩꦴꦪ ꦮꦶꦨꦴꦮꦺꦠꦸꦁ ‘‘ꦪꦡꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦠ꧀ꦫꦴꦪꦁ ꦱꦔ꧀ꦑꦺꦥꦠ꧀ꦡꦺꦴ – ꦪꦡꦴ ꦠꦱ꧀ꦱ ꦥꦸꦫꦶꦱꦱ꧀ꦱ ꦮꦤꦩꦲꦶꦁꦱꦁ ꦒꦲꦺꦠꦸꦁ ꦈꦱ꧀ꦱꦴꦲꦮꦠꦺꦴ ꦎꦱꦏ꧀ꦏꦤ꧀ꦠꦱ꧀ꦱ ꦱꦱꦒꦺꦴꦣꦴꦢꦶꦒ꧀ꦒꦲꦟꦺ ꦮꦠ꧀ꦠꦧ꧀ꦧꦩꦺꦮ ꦤꦠ꧀ꦡꦶ, ꦌꦮꦁ ꦆꦩꦱ꧀ꦱꦥꦶ ꦨꦶꦏ꧀ꦑꦸꦤꦺꦴ ꦄꦫꦲꦠ꧀ꦠꦁ ꦒꦲꦺꦠꦸꦁ ꦈꦱ꧀ꦱꦴꦲꦮꦠꦺꦴ ꦠꦠꦺꦴ ꦎꦱꦏ꧀ꦏꦶꦠ꧀ꦮꦴ ꦕꦠꦸꦠ꧀ꦡꦗ꧀ꦙꦴꦤꦱꦩꦴꦥꦗ꧀ꦗꦤꦺ ꦮꦠ꧀ꦠꦧ꧀ꦧꦩꦺꦮ ꦤꦠ꧀ꦡꦷꦠꦶ. ꦌꦱꦺꦮ ꦤꦪꦺꦴꦠꦶ ꦪꦡꦴꦮꦸꦠ꧀ꦠꦁ ꦈꦥꦩꦁ ꦈꦥꦩꦴꦱꦁꦱꦤ꧀ꦢꦤꦚ꧀ꦕ ꦩꦒ꧀ꦒꦨꦴꦮꦤꦴꦪꦺꦴꦗꦤꦴꦪꦁ ꦕꦠꦸꦱꦕ꧀ꦕꦱꦕ꧀ꦖꦶꦏꦶꦫꦶꦪꦴꦪꦺꦴꦗꦤꦴꦪꦚ꧀ꦕ ꦄꦠꦶꦢꦶꦱꦠꦶ.
ꦲꦺꦠꦸꦄꦠ꧀ꦡꦗꦺꦴꦠꦤꦺꦴ ꦪꦤ꧀ꦠꦶ ꦤꦶꦥꦴꦠꦺꦴ, ꦏꦫꦟꦺ ꦮꦴ ꦌꦠꦁ ꦥꦕ꧀ꦕꦠ꧀ꦠꦮꦕꦤꦤ꧀ꦠꦶ ꦄꦴꦲ ‘‘ꦪꦺꦤ ꦏꦴꦫꦟꦺꦤꦴ’’ꦠꦶ. ꦠꦱ꧀ꦱ ꦱꦁꦮꦠ꧀ꦠꦤꦁ ꦄꦫꦲꦠꦶ, ꦠꦁ ꦮꦴ ꦥꦪꦺꦴꦗꦤꦁ ꦌꦠꦱ꧀ꦱꦴꦠꦶ ꦠꦁꦱꦁꦮꦠ꧀ꦠꦤꦶꦏꦁ. ꦮꦶꦚ꧀ꦚꦴꦟꦤ꧀ꦠꦶ ꦮꦶꦥꦴꦏꦮꦶꦚ꧀ꦚꦴꦟꦁ. ꦄꦴꦤꦺꦚ꧀ꦗꦱꦨꦴꦮꦁ ꦈꦥꦒꦕ꧀ꦖꦠꦷꦠꦶ ꦄꦴꦤꦺꦚ꧀ꦗꦹꦥꦒꦁ. ꦪꦡꦴ ꦏꦸꦱꦭꦁ ꦄꦴꦤꦺꦚ꧀ꦗꦱꦨꦴꦮꦁ, ꦌꦮꦁ ꦠꦁ ꦮꦶꦥꦴꦏꦮꦶꦚ꧀ꦚꦴꦟꦩ꧀ꦥꦶ ꦄꦴꦤꦺꦚ꧀ꦗꦱꦨꦴꦮꦁ ꦈꦥꦒꦠꦁ ꦄꦱ꧀ꦱ ꦨꦮꦺꦪ꧀ꦪ. ꦠꦺꦤꦴꦲ – ‘‘ꦏꦴꦢꦶꦱꦩꦺꦮ ꦨꦮꦺꦪ꧀ꦪꦴꦠꦶ ꦄꦠ꧀ꦡꦺꦴ’’ꦠꦶ. ꦏꦺꦕꦷꦠꦶ ꦄꦨꦪꦒꦶꦫꦶꦮꦴꦱꦶꦤꦺꦴ. ꦏꦸꦱꦭꦮꦶꦚ꧀ꦚꦴꦟꦤ꧀ꦠꦶ ꦮꦶꦥꦴꦏꦮꦶꦚ꧀ꦚꦴꦟꦩ꧀ꦥꦶ ꦠꦁ ꦏꦸꦱꦭꦁ ꦮꦶꦪ ꦮꦢꦤ꧀ꦠꦶ. ꦠꦤ꧀ꦤꦴꦩꦏꦩꦺꦮꦴꦠꦶ ꦏꦸꦱꦭꦁ ꦮꦶꦪ ꦄꦴꦤꦺꦚ꧀ꦗꦤꦴꦩꦏꦩꦺꦮ ꦱꦶꦪꦴ. ꦌꦠ꧀ꦡ ꦕ ꦥꦸꦫꦶꦩꦮꦶꦏꦥ꧀ꦥꦺ ‘‘ꦄꦴꦤꦺꦚ꧀ꦗꦹꦥꦒ’’ꦤ꧀ꦠꦶ ꦠꦁꦱꦢꦶꦱꦠꦴ ꦮꦸꦠ꧀ꦠꦴ, ꦢꦸꦠꦶꦪꦮꦶꦏꦥ꧀ꦥꦺ ꦠꦠꦺꦴ ꦌꦮ ꦠꦁꦱꦩꦚ꧀ꦚꦠꦴ. ꦱꦺꦴ ꦥꦤꦴꦪꦩꦠ꧀ꦡꦺꦴꦠꦶ ꦄꦴꦤꦺꦚ꧀ꦗꦱꦢꦶꦱꦠꦴꦪ ꦮꦶꦥꦴꦏꦏꦴꦭꦺꦥꦶ ꦠꦁꦤꦴꦩꦏꦩꦺꦮ ꦄꦱ꧀ꦱꦴꦠꦶ ꦪꦡꦴꦮꦸꦠ꧀ꦠꦺꦴ ꦄꦠ꧀ꦡꦺꦴ. ꦆꦩꦶꦤꦴ ꦤꦪꦺꦤꦴꦠꦶ ꦆꦩꦶꦤꦴ ꦮꦸꦠ꧀ꦠꦤꦪꦺꦤ. ꦌꦠ꧀ꦡ ꦲꦶ ꦄꦴꦤꦺꦚ꧀ꦗꦴꦨꦶꦱꦔ꧀ꦑꦴꦫꦲꦺꦠꦸꦮꦶꦥꦴꦏꦮꦶꦚ꧀ꦚꦴꦟꦁ ‘‘ꦄꦴꦤꦺꦚ꧀ꦗꦹꦥꦒꦁ ꦲꦺꦴꦠꦶ ꦮꦶꦚ꧀ꦚꦴꦟ’’ꦤ꧀ꦠꦶ ꦮꦸꦠ꧀ꦠꦠ꧀ꦠꦴ ꦠꦁꦤꦴꦩꦏꦩꦺꦮ ꦏꦠ꧀ꦮꦴ ꦢꦷꦥꦶꦠꦁ. ꦄꦫꦲꦠ꧀ꦠꦱ꧀ꦱꦴꦥꦷꦠꦶ ꦄꦥꦶꦱꦢ꧀ꦢꦺꦤ ꦄꦒ꧀ꦒꦩꦒ꧀ꦒꦨꦴꦮꦤꦴꦪꦥꦶ ꦲꦺꦛ꧀ꦜꦶꦩꦩꦒ꧀ꦒꦨꦴꦮꦤꦴꦪꦥꦷꦠꦶ ꦄꦠ꧀ꦡꦺꦴ ꦱꦔ꧀ꦒꦲꦶꦠꦺꦴꦠꦶ ꦢꦛ꧀ꦜꦧ꧀ꦧꦺꦴ. ꦱꦩꦴꦣꦶꦮꦱꦺꦤ ꦎꦱꦏ꧀ꦏꦤꦴ ꦏꦡꦶꦠꦴꦠꦶ ‘‘ꦮꦶꦥꦸꦭꦺꦤ ꦩꦲꦒ꧀ꦒꦠꦺꦤ ꦕꦺꦠꦱꦴ ꦮꦶꦲꦫꦺꦪ꧀ꦪ’’ꦤ꧀ꦠꦶ ꦱꦩꦡꦤꦪꦁ ꦢꦱ꧀ꦱꦺꦠ꧀ꦮꦴ ꦢꦺꦱꦤꦴ ꦏꦡꦶꦠꦴ.
꧖꧗. ꦄꦪꦚ꧀ꦲꦶ ꦨꦶꦏ꧀ꦑꦹꦠꦶ ꦪꦁ ꦈꦢ꧀ꦢꦶꦱ꧀ꦱ ꦄꦪꦁ ꦢꦸꦠꦶꦪꦴꦤꦺꦚ꧀ꦗꦱꦥ꧀ꦥꦴꦪꦢꦺꦱꦤꦴꦪ ꦨꦶꦏ꧀ꦑꦸ ꦮꦸꦠ꧀ꦠꦺꦴ. ꦥꦚ꧀ꦚꦮꦤ꧀ꦠꦠꦫꦺꦴꦠꦶ ꦮꦠ꧀ꦮꦴ ꦠꦁ ꦢꦱ꧀ꦱꦺꦠꦸꦁ, ‘‘ꦢ꧀ꦮꦶꦤ꧀ꦤꦩ꧀ꦥꦶ ꦏꦩ꧀ꦩꦛ꧀ꦜꦴꦤꦁ ꦌꦏꦠꦺꦴ ꦏꦠ꧀ꦮꦴ ꦱꦩ꧀ꦩꦱꦠꦷ’’ꦠꦶ ꦮꦸꦠ꧀ꦠꦁ. ꦲꦺꦛ꧀ꦜꦶꦩꦱ꧀ꦱ ꦲꦶ ‘‘ꦪꦺ ꦕ ꦢꦶꦛ꧀ꦜꦣꦩ꧀ꦩꦶꦏꦴ ꦏꦴꦩꦴ’’ꦠꦶꦄꦴꦢꦶꦤꦴ ꦫꦹꦥꦱꦢ꧀ꦢꦒꦤ꧀ꦣꦫꦱꦦꦺꦴꦛ꧀ꦜꦧ꧀ꦧꦴꦤꦺꦮ ꦫꦹꦥꦩꦸꦑꦺꦤ ꦮꦶꦥꦱ꧀ꦱꦤꦴꦨꦶꦤꦶꦮꦺꦱꦺꦴ ꦏꦠꦺꦴ, ꦆꦩꦱ꧀ꦱ ꦥꦤ ‘‘ꦪꦁ ꦏꦶꦚ꧀ꦕꦶ ꦫꦹꦥ’’ꦤ꧀ꦠꦶꦄꦴꦢꦶꦤꦴ ꦱꦏꦭꦫꦹꦥꦣꦩ꧀ꦩꦮꦱꦺꦤ. ꦨꦒꦮꦴ ꦲꦶ ꦏꦩ꧀ꦩꦛ꧀ꦜꦴꦤꦁ ꦏꦡꦺꦤ꧀ꦠꦺꦴ ꦏꦩ꧀ꦩꦛ꧀ꦜꦴꦤꦶꦏꦱ꧀ꦱ ꦨꦶꦏ꧀ꦑꦸꦤꦺꦴ ꦏꦴꦫꦟꦧꦭꦴꦤꦸꦫꦹꦥꦩꦺꦮ ꦥꦜꦩꦁ ꦨꦴꦮꦤꦴꦨꦶꦤꦶꦮꦺꦱꦁ ꦢꦱ꧀ꦱꦺꦠꦶ; ꦱꦺꦴ ꦥꦕ꧀ꦖꦴ ꦚꦴꦟꦺ ꦮꦶꦥꦸꦭꦁ ꦒꦕ꧀ꦖꦤ꧀ꦠꦺ ꦄꦤꦮꦱꦺꦱꦠꦺꦴ ꦣꦩ꧀ꦩꦁ ꦥꦫꦶꦒ꧀ꦒꦟ꧀ꦲꦴꦠꦶ. ꦫꦹꦥꦥꦛꦶꦧꦴꦲꦤꦺꦤꦴꦠꦶ ꦫꦹꦥꦮꦶꦫꦴꦒꦨꦴꦮꦤꦴꦪ ꦱꦧ꧀ꦧꦱꦺꦴ ꦱꦩꦠꦶꦏ꧀ꦏꦩꦺꦤ. ꦱꦧ꧀ꦧꦠ꧀ꦡꦴꦠꦶ ꦱꦧ꧀ꦧꦺꦱꦸ ꦠꦠꦶꦪꦴꦤꦺꦚ꧀ꦗꦴꦢꦷꦱꦸ.
ꦥꦚ꧀ꦚꦮꦤ꧀ꦠꦠꦫꦺꦴꦠꦶ ꦥꦚ꧀ꦚꦸꦠ꧀ꦠꦫꦺꦴ. ꦠꦶꦟ꧀ꦟꦩ꧀ꦥꦶ ꦏꦩ꧀ꦩꦛ꧀ꦜꦴꦤꦁ ꦌꦏꦠꦺꦴ ꦏꦠ꧀ꦮꦴꦠꦶ ꦏꦴꦩꦒꦸꦟꦴ ꦱꦧ꧀ꦧꦫꦹꦥꦣꦩ꧀ꦩꦴ ꦏꦴꦩꦱꦚ꧀ꦚꦴꦠꦶ ꦌꦮꦁ ꦠꦶꦟ꧀ꦟꦁ ꦥꦸꦒ꧀ꦒꦭꦴꦤꦁ ꦏꦩ꧀ꦩꦛ꧀ꦜꦴꦤꦮꦱꦺꦤ ꦠꦶꦣꦴ ꦮꦸꦠ꧀ꦠꦺ ꦱꦩ꧀ꦩꦱꦤꦹꦥꦒꦣꦩ꧀ꦩꦺ ꦌꦏꦠꦺꦴ ꦏꦠ꧀ꦮꦴ, ‘‘ꦱꦧ꧀ꦧꦩꦺꦠꦁ ꦄꦤꦶꦕ꧀ꦕ’’ꦤ꧀ꦠꦶ ꦌꦏꦗ꧀ꦙꦁ ꦒꦲꦺꦠ꧀ꦮꦴ, ꦱꦩ꧀ꦩꦱꦠꦶ ꦪꦡꦴ – ‘‘ꦪꦁ ꦏꦶꦚ꧀ꦕꦶ ꦱꦩꦸꦢꦪꦣꦩ꧀ꦩꦁ, ꦱꦧ꧀ꦧꦁ ꦠꦁ ꦤꦶꦫꦺꦴꦣꦣꦩ꧀ꦩ’’ꦤ꧀ꦠꦶ (ꦢꦷ. ꦤꦶ. ꧑.꧒꧙꧘; ꦱꦁ. ꦤꦶ. ꧕.꧑꧐꧘꧑; ꦩꦲꦴꦮ. ꧑꧖; ꦕꦹꦭ꦳ꦤꦶ. ꦄꦗꦶꦠꦩꦴꦟꦮꦥꦸꦕ꧀ꦖꦴꦤꦶꦢ꧀ꦢꦺꦱ ꧔, ꧗, ꧘; ꦠꦶꦱ꧀ꦱꦩꦺꦠ꧀ꦠꦺꦪ꧀ꦪꦩꦴꦟꦮꦥꦸꦕ꧀ꦖꦴꦤꦶꦢ꧀ꦢꦺꦱ ꧑꧐, ꧑꧑; ꦥꦛꦶ. ꦩ. ꧒.꧓꧐). ꦠꦺꦤꦴꦲ – ‘‘ꦈꦨꦪꦩꦺꦠꦁ ꦄꦤꦶꦕ꧀ꦕ’’ꦤ꧀ꦠꦶꦄꦴꦢꦶ. ꦏꦴꦩꦫꦹꦥꦱꦚ꧀ꦚꦴꦮꦱꦺꦤ ꦢꦶꦛ꧀ꦜꦣꦩ꧀ꦩꦶꦏꦱꦩ꧀ꦥꦫꦴꦪꦶꦏꦨꦺꦢꦠꦺꦴ ꦄꦛ꧀ꦜ ꦌꦏꦺꦏꦏꦺꦴꦛ꧀ꦜꦴꦱꦴꦠꦶ ꦌꦮꦁ ꦏꦠꦁ ꦈꦨꦪꦤ꧀ꦠꦶ ꦮꦸꦠ꧀ꦠꦤ꧀ꦠꦶ ꦄꦴꦲ – ‘‘ꦢꦶꦛ꧀ꦜꦣꦩ꧀ꦩꦶꦏ…ꦥꦺ… ꦮꦱꦺꦤ ꦱꦔ꧀ꦑꦶꦥꦶꦠ꧀ꦮꦴ ꦈꦨꦪꦤ꧀ꦠꦶ ꦮꦸꦠ꧀ꦠ’’ꦤ꧀ꦠꦶ. ꦠꦟ꧀ꦲꦴꦢꦶꦛ꧀ꦜꦶꦮꦱꦺꦤꦴꦠꦶ ꦠꦟ꧀ꦲꦴꦨꦶꦤꦤ꧀ꦢꦤꦴꦮꦱꦺꦤ ‘‘ꦌꦠꦁ ꦩꦩꦴ’’ꦠꦶ, ꦢꦶꦛ꧀ꦜꦴꦨꦶꦤꦤ꧀ꦢꦤꦴꦮꦱꦺꦤ ‘‘ꦌꦱꦺꦴ ꦩꦺ ꦄꦠ꧀ꦠꦴ’’ꦠꦶ ꦌꦮꦁ ꦄꦨꦶꦤꦤ꧀ꦢꦶꦠꦸꦁ. ꦌꦱꦺꦮ ꦤꦪꦺꦴꦠꦶ ꦆꦩꦶꦤꦴ ꦠꦟ꧀ꦲꦴꦢꦶꦛ꧀ꦜꦶꦮꦱꦺꦤ ‘‘ꦌꦠꦁ ꦩꦩ, ꦌꦱꦺꦴ ꦩꦺ ꦄꦠ꧀ꦠꦴ’’ꦠꦶ ꦄꦨꦶꦤꦤ꧀ꦢꦶꦠꦸꦁ ꦄꦗ꧀ꦙꦺꦴꦱꦴꦪ ꦒꦶꦭꦶꦠ꧀ꦮꦴ ꦥꦫꦶꦤꦶꦛ꧀ꦜꦴꦥꦺꦠ꧀ꦮꦴ ꦜꦴꦠꦸꦤ꧀ꦠꦶ ꦆꦩꦩꦠ꧀ꦡꦁ ꦄꦠꦶꦢꦶꦱꦠꦶ. ꦏꦴꦩꦥꦛꦶꦧꦴꦲꦤꦺꦤꦴꦠꦶ ꦆꦢꦁ ꦄꦴꦒꦩꦤꦥꦛꦶꦥꦢꦴꦢꦱ꧀ꦱꦤꦠ꧀ꦡꦁ, ꦮꦟ꧀ꦟꦨꦟꦤꦠ꧀ꦡꦚ꧀ꦕ ꦮꦸꦠ꧀ꦠꦁ. ꦫꦹꦥꦥꦛꦶꦧꦴꦲꦤꦁ ꦲꦶꦱ꧀ꦱ ꦄꦴꦱꦤ꧀ꦤꦁ, ꦠꦠꦺꦴꦥꦶ ꦄꦴꦏꦴꦱꦴꦤꦚ꧀ꦕꦴꦪꦠꦤꦱꦩꦠꦶꦏ꧀ꦏꦩꦺꦴ, ꦠꦁꦱꦩꦠꦶꦏ꧀ꦏꦩꦺꦤ ꦱꦲꦺꦮ ꦱꦧ꧀ꦧꦺ ꦠꦴ ꦮꦶꦥꦱ꧀ꦱꦤꦴꦮꦱꦺꦤ ꦎꦱꦏ꧀ꦏꦤꦴ ꦏꦡꦶꦠꦴ ‘‘ꦈꦨꦪꦩꦺꦠꦁ ꦄꦤꦶꦕ꧀ꦕ’’ꦤ꧀ꦠꦶꦄꦴꦢꦶꦮꦕꦤꦠꦺꦴ.
꧖꧘. ꦆꦣ ꦄꦠ꧀ꦠꦤꦺꦴ ꦕꦴꦠꦶ ꦄꦴꦏꦶꦚ꧀ꦕꦚ꧀ꦚꦴꦪꦠꦤꦏꦩ꧀ꦩꦛ꧀ꦜꦴꦤꦁ ꦱꦤ꧀ꦣꦴꦪꦴꦲ. ꦤꦶꦫꦸꦗ꧀ꦙꦤ꧀ꦠꦶ ꦠꦥ꧀ꦥꦛꦶꦧꦢ꧀ꦣꦖꦤ꧀ꦢꦫꦴꦒꦤꦶꦫꦺꦴꦣꦺꦤ, ꦱꦩꦴꦥꦗ꧀ꦗꦤꦏ꧀ꦑꦟꦺ ꦥꦤ ꦄꦤꦸꦥ꧀ꦥꦴꦢꦤꦺꦤꦥꦶ. ꦠꦺꦤꦴꦲ ‘‘ꦄꦴꦏꦶꦚ꧀ꦕꦚ꧀ꦚꦴꦪꦠꦤꦁ ꦥꦠ꧀ꦮꦴ’’ꦠꦶ. ꦄꦠꦥ꧀ꦥꦏꦛ꧀ꦜꦺꦤꦴꦠꦶ ꦈꦭ꦳ꦴꦫꦠꦫꦨꦴꦮꦺꦤ ꦙꦴꦤꦱꦩꦴꦥꦠ꧀ꦠꦶꦪꦴ ꦄꦠꦶꦠ꧀ꦠꦶꦏꦫꦨꦴꦮꦺꦤ. ꦠꦩꦺꦮ ꦥꦛꦶꦥꦢꦤ꧀ꦠꦶ ꦄꦴꦏꦶꦚ꧀ꦕꦚ꧀ꦚꦴꦪꦠꦤꦨꦴꦮꦤꦩꦴꦲ. ꦱꦩꦴꦣꦶꦮꦱꦺꦤ ꦎꦱꦏ꧀ꦏꦤꦴ ꦏꦡꦶꦠꦴ ꦠꦠꦶꦪꦴꦫꦸꦥ꧀ꦥꦏꦩ꧀ꦩꦛ꧀ꦜꦴꦤꦱ꧀ꦱ ꦮꦸꦠ꧀ꦠꦠ꧀ꦠꦴ ‘‘ꦪꦠ꧀ꦡꦺꦠꦴ’’ꦠꦶꦄꦴꦢꦶꦤꦴ.
ꦆꦣ ꦄꦠ꧀ꦠꦤꦺꦴꦠꦶ ꦢ꧀ꦮꦶꦏꦺꦴꦛꦶꦏꦱꦸꦚ꧀ꦚꦠꦴꦩꦤꦱꦶꦏꦴꦫꦱꦔ꧀ꦑꦴꦠꦁ ꦮꦶꦥꦱ꧀ꦱꦤꦴꦏꦩ꧀ꦩꦛ꧀ꦜꦴꦤꦁ. ꦲꦺꦛ꧀ꦜꦴ ꦮꦸꦠ꧀ꦠꦥꦛꦶꦥꦢꦤ꧀ꦠꦶ ꦄꦤꦤ꧀ꦠꦫꦁ ꦮꦸꦠ꧀ꦠꦄꦴꦏꦶꦚ꧀ꦕꦚ꧀ꦚꦴꦪꦠꦤꦏꦩ꧀ꦩꦛ꧀ꦜꦴꦤꦁ. ꦱꦠꦶ ꦱꦩꦡꦨꦴꦮꦤꦴꦪꦁ ꦱꦸꦚ꧀ꦚꦠꦴꦩꦤꦱꦶꦏꦴꦫꦱ꧀ꦱ ꦆꦣ ꦱꦴꦠꦶꦱꦪꦠ꧀ꦠꦴ ꦮꦸꦠ꧀ꦠꦁ. ‘‘ꦢꦸꦠꦶꦪꦴꦏꦶꦚ꧀ꦕꦚ꧀ꦚꦴꦪꦠꦤꦺ ꦮꦶꦥꦱ꧀ꦱꦤꦴꦮꦱꦺꦤ ꦎꦱꦏ꧀ꦏꦤꦴ ꦏꦡꦶꦠꦴ’’ꦠꦶ.
꧗꧐. ꦠꦠꦶꦪꦴꦏꦶꦚ꧀ꦕꦚ꧀ꦚꦴꦪꦠꦤꦺ ꦄꦠ꧀ꦠꦤꦺꦴꦠꦶ ꦕꦠꦸꦏꦺꦴꦛꦶꦏꦱꦸꦚ꧀ꦚꦠꦴꦩꦤꦱꦶꦏꦴꦫꦱꦔ꧀ꦑꦴꦠꦁ ꦮꦶꦥꦱ꧀ꦱꦤꦴꦏꦩ꧀ꦩꦛ꧀ꦜꦴꦤꦁ. ꦌꦠ꧀ꦡꦴꦠꦶ ꦌꦠꦱ꧀ꦩꦶꦁ ꦱꦸꦚ꧀ꦚꦠꦴꦤꦸꦥꦱ꧀ꦱꦤꦴꦣꦶꦏꦴꦫꦺ. ꦏ꧀ꦮꦕꦷꦠꦶ ꦏꦠ꧀ꦡꦕꦶ ꦜꦴꦤꦺ, ꦏꦴꦭꦺ, ꦣꦩ꧀ꦩꦺ ꦮꦴ. ꦄꦡ ꦮꦴ ꦏ꧀ꦮꦕꦷꦠꦶ ꦄꦗ꧀ꦙꦠ꧀ꦠꦁ, ꦧꦲꦶꦢ꧀ꦣꦴ ꦮꦴ. ꦄꦠ꧀ꦠꦤꦺꦴ ꦄꦠ꧀ꦠꦴꦤꦤ꧀ꦠꦶ ꦱꦏꦠ꧀ꦠꦴꦤꦁ. ‘‘ꦄꦪꦁ ꦑꦺꦴ, ꦨꦺꦴ ꦧ꧀ꦫꦲ꧀ꦩꦴ…ꦥꦺ… ꦮꦱꦷ ꦥꦶꦠꦴ ꦨꦹꦠꦨꦧ꧀ꦪꦴꦤ’’ꦤ꧀ꦠꦶꦄꦴꦢꦶꦤꦴ (ꦢꦷ. ꦤꦶ. ꧑.꧔꧒) ꦥꦫꦥꦫꦶꦏꦥ꧀ꦥꦶꦠꦁ ꦄꦠ꧀ꦠꦴꦤꦚ꧀ꦕ ꦏꦱ꧀ꦱꦕꦶ ꦏꦶꦚ꧀ꦕꦤꦨꦹꦠꦁ ꦤ ꦥꦱ꧀ꦱꦠꦷꦠꦶ ꦢꦱ꧀ꦱꦺꦤ꧀ꦠꦺꦴ ‘‘ꦏꦱ꧀ꦱꦕꦷ’’ꦠꦶꦄꦴꦢꦶꦩꦴꦲ. ꦠꦠ꧀ꦡ ꦥꦫꦱ꧀ꦱꦴꦠꦶ ‘‘ꦥꦫꦴ ꦥꦗꦴ’’ꦠꦶ ‘‘ꦥꦫꦺꦴ ꦥꦸꦫꦶꦱꦺꦴ’’ꦠꦶ ꦕ ꦌꦮꦁ ꦒꦲꦶꦠꦱ꧀ꦱ. ꦤ ꦕ ꦩꦩ ꦏ꧀ꦮꦕꦤꦷꦠꦶ ꦌꦠ꧀ꦡ ꦩꦩ-ꦱꦢ꧀ꦢꦺꦴ ꦄꦛ꧀ꦜꦴꦤꦥꦪꦸꦠ꧀ꦠꦺꦴꦠꦶ ꦄꦴꦲ ‘‘ꦩꦩꦱꦢ꧀ꦢꦁ ꦠꦴꦮ ꦜꦥꦺꦠ꧀ꦮꦴ’’ꦠꦶ. ꦥꦫꦱ꧀ꦱ ꦕꦴꦠꦶ ꦄꦠ꧀ꦠꦠꦺꦴ ꦄꦚ꧀ꦚꦱ꧀ꦱ, ‘‘ꦥꦫꦺꦴ ꦥꦸꦫꦶꦱꦺꦴ ꦤꦴꦩ ꦄꦠ꧀ꦡꦶ ꦩꦩꦠ꧀ꦡꦴꦪ ꦱꦗꦶꦠꦺꦴ, ꦠꦱ꧀ꦱ ꦮꦱꦺꦤ ꦩꦪ꧀ꦲꦁ ꦱꦧ꧀ꦧꦁ ꦆꦗ꧀ꦙꦠꦷ’’ꦠꦶ ꦌꦮꦁ ꦌꦏꦕ꧀ꦕꦢꦶꦛ꧀ꦜꦶꦒꦠꦶꦏꦥꦫꦶꦏꦥ꧀ꦥꦶꦠꦮꦱꦺꦤ ꦥꦫꦁ ꦄꦠ꧀ꦠꦴꦤꦁ, ꦠꦚ꧀ꦕ ꦄꦠ꧀ꦠꦤꦺꦴ ꦏꦶꦚ꧀ꦕꦤꦨꦹꦠꦁ ꦤ ꦥꦱ꧀ꦱꦠꦷꦠꦶ ꦢꦱ꧀ꦱꦺꦤ꧀ꦠꦺꦴ, ‘‘ꦤ ꦕ ꦏ꧀ꦮꦕꦤꦷ’’ꦠꦶꦄꦴꦢꦶꦩꦴꦲ. ꦌꦠ꧀ꦡ ꦕ ꦤꦴꦲꦁ ꦏ꧀ꦮꦕꦤꦷꦠꦶ ꦱꦏꦄꦠ꧀ꦠꦤꦺꦴ ꦄꦨꦴꦮꦁ ꦥꦱ꧀ꦱꦠꦶ. ꦤ ꦏꦱ꧀ꦱꦕꦶ ꦏꦶꦚ꧀ꦕꦤꦠꦱ꧀ꦩꦶꦤ꧀ꦠꦶ ꦱꦏꦄꦠ꧀ꦠꦤꦺꦴ ꦌꦮ ꦏꦱ꧀ꦱꦕꦶ ꦄꦤꦠ꧀ꦠꦤꦶꦪꦠꦁ ꦥꦱ꧀ꦱꦠꦶ. ꦤ ꦕ, ꦩꦩꦴꦠꦶ ꦌꦠꦁ ꦢ꧀ꦮꦪꦁ ꦪꦡꦴꦱꦔ꧀ꦑ꧀ꦪꦁ ꦱꦩ꧀ꦧꦤ꧀ꦣꦶꦠꦧ꧀ꦧꦁ, ꦄꦠ꧀ꦡꦷꦠꦶ ꦥꦕ꧀ꦕꦺꦏꦁ. ‘‘ꦤ ꦕ ꦏ꧀ꦮꦕꦤꦶ ꦥꦫꦱ꧀ꦱ ꦄꦠ꧀ꦠꦴ ꦄꦠ꧀ꦡꦷ’’ꦠꦶ ꦥꦫꦱ꧀ꦱ ꦄꦠ꧀ꦠꦤꦺꦴ ꦄꦨꦴꦮꦁ ꦥꦱ꧀ꦱꦠꦶ, ‘‘ꦠꦱ꧀ꦱ ꦥꦫꦱ꧀ꦱ ꦄꦠ꧀ꦠꦤꦺꦴ ꦩꦩ ꦏꦶꦱ꧀ꦩꦶꦚ꧀ꦕꦶ ꦏꦶꦚ꧀ꦕꦤꦠꦴ ꦤ ꦕꦠ꧀ꦡꦷ’’ꦠꦶ ꦥꦫꦱ꧀ꦱ ꦄꦠ꧀ꦠꦤꦺꦴ ꦄꦤꦠ꧀ꦠꦤꦶꦪꦠꦁ ꦥꦱ꧀ꦱꦠꦶ. ꦌꦮꦁ ꦄꦗ꧀ꦙꦠ꧀ꦠꦁ ꦧꦲꦶꦢ꧀ꦣꦴ ꦕ ꦑꦤ꧀ꦣꦴꦤꦁ ꦄꦠ꧀ꦠꦠ꧀ꦠꦤꦶꦪꦱꦸꦚ꧀ꦚꦠꦴ ꦱꦸꦢ꧀ꦣꦱꦔ꧀ꦑꦴꦫꦥꦸꦚ꧀ꦗꦠꦴ ꦕꦠꦸꦏꦺꦴꦛꦶꦏꦱꦸꦚ꧀ꦚꦠꦴꦥꦫꦶꦒ꧀ꦒꦟ꧀ꦲꦤꦺꦤ ꦢꦶꦛ꧀ꦜꦴ ꦲꦺꦴꦠꦶ. ꦲꦺꦛ꧀ꦜꦴ ꦮꦸꦠ꧀ꦠꦥꦛꦶꦥꦢꦤ꧀ꦠꦶ ꦆꦣꦴꦥꦶ ꦄꦴꦏꦶꦚ꧀ꦕꦚ꧀ꦚꦴꦪꦠꦤꦏꦩ꧀ꦩꦛ꧀ꦜꦴꦤꦩꦺꦮ ꦮꦢꦠꦶ. ꦮꦶꦥꦱ꧀ꦱꦤꦴꦮꦱꦺꦤꦺꦮ ꦎꦱꦏ꧀ꦏꦤꦴ ꦏꦡꦶꦠꦴ ꦕꦠꦸꦏꦺꦴꦛꦶꦏꦱꦸꦚ꧀ꦚꦠꦴꦢꦱ꧀ꦱꦤꦮꦶꦱꦺꦱꦨꦴꦮꦠꦺꦴ, ꦠꦥ꧀ꦥꦣꦴꦤꦠ꧀ꦠꦴ ꦕꦱ꧀ꦱ ꦩꦤꦱꦶꦏꦴꦫꦱ꧀ꦱ.
ꦆꦣ ꦄꦠ꧀ꦠꦤꦺꦴꦠꦶ ꦤꦺꦮꦱꦚ꧀ꦚꦴꦤꦴꦱꦚ꧀ꦚꦴꦪꦠꦤꦏꦩ꧀ꦩꦛ꧀ꦜꦴꦤꦩꦴꦲ. ꦱꦧ꧀ꦧꦱꦚ꧀ꦚꦴꦠꦶ ꦫꦹꦥꦱꦚ꧀ꦚꦴ ꦥꦛꦶꦓꦱꦚ꧀ꦚꦴ ꦤꦴꦤꦠ꧀ꦠꦱꦚ꧀ꦚꦴ ꦲꦺꦛ꧀ꦜꦶꦩꦴ ꦠꦶꦱ꧀ꦱꦺꦴ ꦄꦫꦹꦥꦱꦚ꧀ꦚꦴꦠꦶ ꦌꦮꦁ ꦱꦧ꧀ꦧꦱꦚ꧀ꦚꦴ ꦄꦤꦮꦱꦺꦱꦴ ꦤꦶꦫꦸꦗ꧀ꦙꦤ꧀ꦠꦷꦠꦶ ꦮꦢꦤ꧀ꦠꦶ. ‘‘ꦲꦺꦛ꧀ꦜꦴ ꦮꦸꦠ꧀ꦠꦴ’’ꦠꦶ ꦥꦤ ꦮꦶꦱꦺꦱꦶꦠꦠ꧀ꦠꦴ ꦆꦩꦱ꧀ꦩꦶꦁ ꦄꦴꦒꦠꦴ ꦕꦠꦸꦠ꧀ꦡꦗ꧀ꦙꦴꦤꦱꦚ꧀ꦚꦴꦢꦪꦺꦴ ꦄꦥꦶ ꦱꦚ꧀ꦚꦴꦠꦶ ꦄꦥꦫꦺ. ꦠꦤ꧀ꦠꦶ ꦱꦩ꧀ꦩꦸꦠꦶꦩꦠ꧀ꦠꦁ ꦏꦴꦩꦱꦚ꧀ꦚꦴꦥꦛꦶꦧꦴꦲꦤꦮꦱꦺꦤꦺꦮ ꦠꦺꦱꦁ ꦤꦴꦤꦠ꧀ꦠꦱꦚ꧀ꦚꦴꦢꦶꦤꦶꦫꦺꦴꦣꦱ꧀ꦱ ꦄꦠ꧀ꦡꦱꦶꦢ꧀ꦣꦠ꧀ꦠꦴ. ꦱꦩꦴꦣꦶꦮꦱꦺꦤ ꦎꦱꦏ꧀ꦏꦤꦴ ꦏꦡꦶꦠꦴ ꦤꦺꦮꦱꦚ꧀ꦚꦴꦤꦴꦱꦚ꧀ꦚꦴꦪꦠꦤꦨꦴꦮꦤꦴꦪ ꦱꦩꦡꦏꦩ꧀ꦩꦛ꧀ꦜꦴꦤꦨꦴꦮꦠꦺꦴ.
꧗꧑. ꦥꦸꦧ꧀ꦧꦺ ꦥꦚ꧀ꦕꦮꦶꦣꦁ ꦏꦩ꧀ꦩꦮꦛ꧀ꦛꦤ꧀ꦠꦶ ꦥꦸꦫꦶꦩꦏꦩ꧀ꦩꦨꦮꦱ꧀ꦩꦶꦁ ꦩꦺꦴꦲꦺꦴ ꦄꦮꦶꦗ꧀ꦗꦴ ꦄꦴꦪꦹꦲꦤꦴ ꦱꦔ꧀ꦑꦴꦫꦴ ꦤꦶꦏꦤ꧀ꦠꦶꦠꦟ꧀ꦲꦴ ꦈꦥꦒꦩꦤꦁ ꦈꦥꦴꦢꦴꦤꦁ ꦕꦺꦠꦤꦴ ꦨꦮꦺꦴꦠꦶ ꦌꦮꦩꦴꦒꦠꦺꦴ ꦱꦥꦫꦶꦏ꧀ꦑꦴꦫꦺꦴ ꦏꦩ꧀ꦩꦥ꧀ꦥꦧꦤ꧀ꦣꦺꦴ. ꦤ ꦄꦴꦪꦹꦲꦶꦠꦁ ꦄꦱ꧀ꦱꦴꦠꦶ ꦤ ꦕꦺꦠꦶꦠꦁ ꦥꦏꦥ꧀ꦥꦶꦠꦁ ꦨꦮꦺꦪ꧀ꦪ. ꦌꦠꦫꦲꦶ ꦌꦮꦁ ꦥꦚ꧀ꦕꦮꦶꦣꦁ ꦮꦶꦥꦴꦏꦮꦛ꧀ꦛꦤ꧀ꦠꦶ ꦮꦶꦚ꧀ꦚꦴꦟꦤꦴꦩꦫꦹꦥꦱꦭ꦳ꦴꦪꦠꦤꦦꦱ꧀ꦱꦮꦺꦢꦤꦴꦱꦔ꧀ꦑꦴꦠꦺꦴ ꦥꦕ꧀ꦕꦸꦥ꧀ꦥꦤ꧀ꦤꦺꦴ ꦮꦶꦥꦴꦏꦥ꧀ꦥꦧꦤ꧀ꦣꦺꦴ ꦤꦥ꧀ꦥꦮꦠ꧀ꦠꦺꦪ꧀ꦪ ꦏꦴꦫꦟꦱ꧀ꦱ ꦄꦤꦶꦥ꧀ꦦꦤ꧀ꦤꦠ꧀ꦠꦴ. ꦱꦕꦺ ꦄꦴꦪꦹꦲꦶꦠꦁ ꦤ ꦨꦮꦶꦱ꧀ꦱꦠꦷꦠꦶ ꦪꦢꦶ ꦕꦺꦠꦶꦠꦁ ꦥꦏꦥ꧀ꦥꦶꦠꦁ ꦤ ꦱꦶꦪꦴ. ꦪꦁ ꦄꦠ꧀ꦡꦷꦠꦶ ꦪꦁ ꦥꦫꦩꦠ꧀ꦡꦠꦺꦴ ꦮꦶꦗ꧀ꦗꦩꦴꦤꦏꦁ. ꦠꦺꦤꦴꦲ ‘‘ꦨꦹꦠ’’ꦤ꧀ꦠꦶ. ꦠꦚ꧀ꦲꦶ ꦥꦕ꧀ꦕꦪꦤꦶꦧ꧀ꦧꦠ꧀ꦠꦠꦴꦪ ‘‘ꦨꦹꦠ’’ꦤ꧀ꦠꦶ ꦮꦸꦕ꧀ꦕꦠꦶ. ꦠꦁ ꦥꦗꦲꦴꦩꦷꦠꦶ ꦠꦥ꧀ꦥꦛꦶꦧꦢ꧀ꦣꦖꦤ꧀ꦢꦫꦴꦒꦥ꧀ꦥꦲꦴꦤꦺꦤ ꦠꦠꦺꦴ ꦌꦮ ꦄꦴꦪꦠꦶꦁ ꦄꦤꦸꦥ꧀ꦥꦠ꧀ꦠꦶꦣꦩ꧀ꦩꦠꦴꦥꦴꦢꦤꦮꦱꦺꦤ ꦥꦗꦲꦴꦩꦶ ꦥꦫꦶꦕ꧀ꦕꦗꦴꦩꦶ.
ꦥꦫꦶꦤꦶꦧ꧀ꦧꦴꦪꦷꦠꦶ ꦱꦲ ꦥꦫꦶꦏꦥ꧀ꦥꦤꦺꦤ ꦄꦠꦷꦠꦠ꧀ꦡꦺꦠꦶ ꦄꦴꦲ ‘‘ꦥꦫꦶꦤꦶꦧ꧀ꦧꦴꦪꦺꦪ꧀ꦪꦴ’’ꦠꦶ. ꦥꦫꦶꦤꦶꦧ꧀ꦧꦴꦪꦺꦪ꧀ꦪ ꦤꦸ ꦑꦺꦴꦠꦶ ꦮꦴ ꦥꦴꦜꦺꦴ, ꦱꦺꦴ ꦌꦮꦠ꧀ꦡꦺꦴ. ꦤ ꦏꦶꦚ꧀ꦕꦶ ꦏꦡꦶꦠꦤ꧀ꦠꦶ ꦤꦺꦮꦱꦚ꧀ꦚꦴꦤꦴꦱꦚ꧀ꦚꦴꦪꦠꦤꦱꦩꦴꦥꦠ꧀ꦠꦶꦪꦴ ꦱꦔ꧀ꦑꦴꦫꦴꦮꦱꦺꦱꦱꦸꦑꦸꦩꦨꦴꦮꦺꦤ ꦚꦴꦟꦸꦠ꧀ꦠꦫꦱ꧀ꦱꦺꦮ ꦮꦶꦱꦪꦨꦴꦮꦠꦺꦴ ꦱꦫꦹꦥꦠꦺꦴ ꦤ ꦏꦶꦚ꧀ꦕꦶ ꦏꦡꦶꦠꦁ, ꦤꦪꦺꦤ ꦥꦤꦱ꧀ꦱ ꦮꦶꦱꦺꦱꦁ ꦚꦴꦥꦺꦠꦸꦏꦴꦩꦠ꧀ꦠꦴ. ꦨꦒꦮꦠꦺꦴ ꦏꦶꦫ ꦌꦠꦢꦲꦺꦴꦱꦶ – ‘‘ꦆꦩꦶꦱ꧀ꦱꦁꦪꦺꦮ ꦥꦫꦶꦱꦠꦶ ꦤꦶꦱꦶꦤ꧀ꦤꦺꦴ ꦄꦴꦤꦤ꧀ꦢꦺꦴ ꦄꦤꦸꦱꦤ꧀ꦣꦶꦏꦸꦱꦭꦠꦴꦪ ꦤꦺꦮꦱꦚ꧀ꦚꦴꦤꦴꦱꦚ꧀ꦚꦴꦪꦠꦤꦁ ꦥꦴꦢꦏꦁ ꦏꦠ꧀ꦮꦴ ꦜꦶꦠꦱ꧀ꦱ ꦨꦶꦏ꧀ꦑꦸꦤꦺꦴ ꦥꦛꦶꦱꦤ꧀ꦣꦶꦁ ꦄꦫꦲꦠ꧀ꦠꦚ꧀ꦕ ꦱꦤ꧀ꦣꦴꦪ ꦥꦚ꧀ꦲꦁ ꦥꦸꦕ꧀ꦖꦶꦱ꧀ꦱꦠꦶ, ꦆꦩꦶꦤꦴ ꦥꦸꦕ꧀ꦖꦴꦤꦸꦱꦤ꧀ꦣꦶꦤꦴ ꦠꦩꦠ꧀ꦡꦁ ꦢꦺꦱꦺꦱ꧀ꦱꦴꦩꦷ’’ꦠꦶ. ꦎꦱꦏ꧀ꦏꦤꦴꦪ ꦕ ꦆꦣꦴꦣꦶꦥ꧀ꦥꦺꦠꦠ꧀ꦠꦴ ꦨꦶꦤ꧀ꦤꦫꦱꦢꦺꦱꦤꦴ ꦲꦺꦴꦠꦷꦠꦶ ꦥꦸꦕ꧀ꦖꦴꦤꦸꦱꦤ꧀ꦣꦶ ꦥꦸꦕ꧀ꦖꦶꦠꦴ. ꦠꦱ꧀ꦩꦶꦚ꧀ꦲꦶ ꦄꦱꦠꦶ ꦄꦤꦸꦱꦤ꧀ꦣꦶꦨꦺꦢꦨꦶꦤ꧀ꦤꦺꦱꦴ ꦢꦺꦱꦤꦴ, ꦤ ꦕ ꦧꦸꦢ꧀ꦣꦴꦕꦶꦟ꧀ꦟꦴ ꦨꦶꦤ꧀ꦤꦫꦱꦢꦺꦱꦤꦴꦠꦶ. ꦮꦶꦥꦱ꧀ꦱꦤꦴꦤꦶꦱ꧀ꦱꦶꦠꦤ꧀ꦠꦶ ꦠꦤ꧀ꦤꦶꦱ꧀ꦱꦶꦠꦁ. ꦠꦱ꧀ꦱ ꦨꦶꦏ꧀ꦑꦸꦤꦺꦴ. ꦈꦥꦴꦢꦶꦪꦠꦶ ꦌꦠꦺꦤꦴꦠꦶ ꦕ ꦈꦥꦴꦢꦴꦤꦁ. ꦤ ꦥꦫꦶꦤꦶꦧ꧀ꦧꦴꦪꦠꦶ ꦥꦲꦴꦠꦧ꧀ꦧꦱ꧀ꦱ ꦄꦥ꧀ꦥꦗꦲꦤꦠꦺꦴ. ꦠꦺꦤꦴꦲ ꦨꦒꦮꦴ – ‘‘ꦣꦩ꧀ꦩꦴꦥꦶ ꦑꦺꦴ, ꦨꦶꦏ꧀ꦑꦮꦺ, ꦥꦲꦴꦠꦧ꧀ꦧꦴ, ꦥꦒꦺꦮ ꦄꦣꦩ꧀ꦩꦴ’’ꦠꦶ (ꦩ. ꦤꦶ. ꧑.꧒꧔꧐). ꦈꦥꦴꦢꦴꦤꦱꦺꦛ꧀ꦜꦤ꧀ꦠꦶ ꦆꦢꦁ ꦤꦺꦮꦱꦚ꧀ꦚꦴꦤꦴꦱꦚ꧀ꦚꦴꦪꦠꦤꦨꦮꦱ꧀ꦱ ꦱꦧ꧀ꦧꦨꦮꦒ꧀ꦒꦠꦴꦢꦱ꧀ꦱꦤꦥꦫꦁ, ꦤ ꦥꦤ ꦄꦫꦶꦪꦨꦮꦒ꧀ꦒꦱ꧀ꦱ ꦈꦥꦴꦢꦴꦤꦱꦺꦛ꧀ꦜꦠꦴꦥꦛꦶꦱꦺꦣꦥꦫꦁ.
꧗꧓. ꦤꦶꦱ꧀ꦱꦴꦪꦴꦠꦶ ꦨꦮꦥꦫꦶꦪꦴꦥꦤ꧀ꦤꦁ ꦤꦴꦩ ꦣꦩ꧀ꦩꦁ ꦤꦶꦱ꧀ꦱꦴꦪ ꦠꦥ꧀ꦥꦫꦶꦪꦴꦥꦤ꧀ꦤꦁ ꦤꦴꦩ ꦤꦶꦱ꧀ꦱꦴꦪ ꦎꦓꦤꦶꦠ꧀ꦡꦫꦟꦴ ꦨꦒꦮꦠꦴ ꦄꦏ꧀ꦑꦴꦠꦴ; ꦄꦲꦺꦴ ꦄꦕ꧀ꦖꦫꦶꦪꦩꦺꦠꦁ, ꦄꦲꦺꦴ ꦄꦧ꧀ꦨꦸꦠꦩꦺꦠꦤ꧀ꦠꦶ.
ꦤꦮꦱꦸꦥꦶ ꦜꦴꦤꦺꦱꦸ ꦱꦩꦡꦪꦴꦤꦶꦏꦱ꧀ꦱꦺꦮ ꦮꦱꦺꦤ ꦢꦺꦱꦤꦴꦪ ꦄꦴꦒꦠꦠ꧀ꦠꦴ, ꦆꦣ ꦕ ꦏꦱ꧀ꦱꦕꦶꦥꦶ ꦥꦴꦢꦏꦗ꧀ꦙꦴꦤꦱ꧀ꦱ ꦄꦤꦴꦩꦛ꧀ꦜꦠ꧀ꦠꦴ ꦮꦸꦠ꧀ꦠꦁ – ‘‘ꦄꦫꦶꦪꦱꦴꦮꦏꦺꦴꦠꦶ ꦱꦸꦏ꧀ꦑꦮꦶꦥꦱ꧀ꦱꦏꦺꦴ ꦄꦫꦶꦪꦱꦴꦮꦏꦺꦴ’’ꦠꦶ. ꦤꦮꦤ꧀ꦤꦩ꧀ꦥꦶ ꦏꦩ꧀ꦩꦛ꧀ꦜꦴꦤꦁ ꦌꦏꦠꦺꦴ ꦏꦠ꧀ꦮꦴ ꦱꦩ꧀ꦩꦱꦠꦷꦠꦶ ꦆꦢꦁ ꦙꦴꦤꦣꦩ꧀ꦩꦺꦥꦶ ꦄꦤꦸꦱ꧀ꦱꦮꦭꦢ꧀ꦣꦺ ꦒꦲꦺꦠ꧀ꦮꦴ ꦱꦩ꧀ꦩꦱꦤꦁ ꦱꦩ꧀ꦨꦮꦠꦷꦠꦶ ꦏꦠ꧀ꦮꦴ ꦮꦸꦠ꧀ꦠꦁ; ꦠꦺꦨꦹꦩꦏꦱꦔ꧀ꦑꦴꦫꦒꦠꦁ ꦆꦣ ꦮꦸꦠ꧀ꦠꦤ꧀ꦠꦶ ꦄꦤꦮꦱꦺꦱꦠꦺꦴ ꦥꦫꦶꦒ꧀ꦒꦲꦟꦁ ꦱꦤ꧀ꦣꦴꦪ ꦮꦸꦠ꧀ꦠꦁ – ‘‘ꦪꦴꦮꦠꦴ ꦱꦏ꧀ꦏꦴꦪꦺꦴ’’ꦠꦶ.
ꦌꦠꦁ ꦄꦩꦠꦤ꧀ꦠꦶ ꦄꦩꦠꦁ ꦤꦶꦧ꧀ꦧꦴꦤꦁ ꦄꦴꦫꦧ꧀ꦨ ꦥꦮꦠ꧀ꦠꦶꦪꦴ ꦌꦠꦁ ꦄꦫꦲꦠ꧀ꦠꦁ ꦄꦩꦠꦫꦱꦁ. ꦠꦺꦤꦴꦲ – ‘‘ꦌꦠꦁ ꦄꦩꦠꦁ ꦱꦤ꧀ꦠꦁ, ꦌꦠꦁ ꦥꦟꦷꦠ’’ꦤ꧀ꦠꦶ. ‘‘ꦄꦤꦸꦥꦴꦢꦴꦪ ꦏꦶꦚ꧀ꦕꦶꦥꦶ ꦄꦒ꧀ꦒꦲꦺꦠ꧀ꦮꦴ ꦕꦶꦠ꧀ꦠꦁ ꦮꦶꦩꦸꦕ꧀ꦕꦷ’’ꦠꦶ ꦮꦸꦠ꧀ꦠꦠ꧀ꦠꦴꦥꦶ ꦄꦤꦸꦥꦴꦢꦴ ꦕꦶꦠ꧀ꦠꦱ꧀ꦱ ꦮꦶꦩꦺꦴꦏ꧀ꦑꦺꦴ ꦤꦶꦧ꧀ꦧꦴꦤꦁ ꦄꦚ꧀ꦚꦠ꧀ꦡ ꦱꦸꦠ꧀ꦠꦺ ꦮꦸꦕ꧀ꦕꦠꦶ.
ꦠꦶꦟ꧀ꦟꦁ ꦨꦶꦏ꧀ꦑꦹꦤꦤ꧀ꦠꦶ ꦄꦨꦶꦤꦶꦮꦺꦱꦨꦺꦢꦺꦤ ꦠꦶꦮꦶꦣꦴꦤꦁ. ꦥꦴꦢꦏꦁ ꦏꦠ꧀ꦮꦴ ꦜꦶꦠꦱ꧀ꦱ ꦎꦱꦏ꧀ꦏꦤꦴꦪ ꦄꦨꦴꦮꦺ ꦏꦴꦫꦟꦁ ꦲꦺꦛ꧀ꦜꦴ ꦮꦸꦠ꧀ꦠꦤꦪꦺꦤꦺꦮ ꦮꦺꦢꦶꦠꦧ꧀ꦧꦁ. ꦱꦩꦺꦴꦣꦴꦤꦺꦠ꧀ꦮꦴꦠꦶ ꦱꦩ꧀ꦩꦢꦺꦮ ꦎꦢꦲꦶꦠ꧀ꦮꦴ ꦠꦱ꧀ꦩꦶꦁ ꦠꦱ꧀ꦩꦶꦁ ꦜꦴꦤꦺ ꦄꦱꦔ꧀ꦏꦫꦠꦺꦴ ꦮꦮꦠ꧀ꦡꦥꦺꦠ꧀ꦮꦴ. ꦱꦸꦏꦡꦶꦠꦁ ꦤꦴꦩ ꦲꦺꦴꦠꦶ ꦏꦡꦺꦠꦧ꧀ꦧꦱ꧀ꦱ ꦄꦤꦮꦱꦺꦱꦺꦠ꧀ꦮꦴ ꦏꦡꦶꦠꦠ꧀ꦠꦴ.
ꦄꦴꦤꦺꦚ꧀ꦗꦱꦥ꧀ꦥꦴꦪꦱꦸꦠ꧀ꦠꦮꦟ꧀ꦟꦤꦴꦪ ꦭꦷꦤꦠ꧀ꦡꦥ꧀ꦥꦏꦴꦱꦤꦴ ꦱꦩꦠ꧀ꦠꦴ.