꧓. ꦩꦓꦢꦺꦮꦱꦸꦠ꧀ꦠꦮꦟ꧀ꦟꦤꦴ

꧓꧐꧘. ꦥꦸꦧ꧀ꦧꦺ ꦩꦓꦢꦺꦮꦺꦴ ꦤꦴꦩ ꦫꦴꦗꦴꦠꦶ ꦄꦠꦷꦠꦏꦴꦭꦺ ꦆꦩꦱ꧀ꦩꦶꦁꦪꦺꦮ ꦏꦥ꧀ꦥꦺ ꦄꦤꦺꦏꦮꦱ꧀ꦱꦱꦲꦱ꧀ꦱꦴꦪꦸꦏꦺꦱꦸ ꦩꦤꦸꦱ꧀ꦱꦺꦱꦸ ꦥꦛꦶꦥꦴꦛꦶꦪꦴ ꦈꦥ꧀ꦥꦤ꧀ꦤꦴꦤꦁ ꦕꦠꦸꦫꦴꦱꦷꦠꦶꦱꦲꦱ꧀ꦱꦴꦤꦁ ꦕꦏ꧀ꦏꦮꦠ꧀ꦠꦶꦫꦴꦗꦹꦤꦁ ꦄꦴꦢꦶꦥꦸꦫꦶꦱꦺꦴ ꦩꦓꦢꦺꦮꦺꦴꦠꦶ ꦌꦮꦁꦤꦴꦩꦺꦴ ꦫꦴꦗꦴ.

ꦣꦩ꧀ꦩꦺꦴꦠꦶ ꦫꦴꦗꦣꦩ꧀ꦩꦺꦴꦠꦶ ꦭꦺꦴꦏꦶꦏꦴ ꦮꦢꦤ꧀ꦠꦶ. ꦩꦲꦴꦧꦺꦴꦣꦶꦤꦶꦣꦴꦤꦥꦴꦫꦩꦶꦠꦴꦱꦔ꧀ꦑꦴꦠꦺꦴ ꦥꦤ ꦣꦩ꧀ꦩꦺꦴ ꦄꦠ꧀ꦡꦷꦠꦶ ꦣꦩ꧀ꦩꦶꦏꦺꦴ. ꦣꦩ꧀ꦩꦺꦤꦴꦠꦶ ꦚꦴꦪꦺꦤ. ꦠꦢꦴ ꦧ꧀ꦫꦲ꧀ꦩꦮꦶꦲꦴꦫꦴꦢꦶꦨꦴꦮꦤꦴꦣꦩ꧀ꦩꦱ꧀ꦱ ꦫꦚ꧀ꦚꦺꦴ ꦄꦤꦣꦶꦒꦠꦠ꧀ꦠꦴ ꦠꦱ꧀ꦱꦥꦶ ꦮꦴ ꦄꦤꦨꦶꦗ꧀ꦙꦴꦢꦷꦲꦶ ꦱꦩꦴꦤꦪꦺꦴꦒꦏ꧀ꦑꦩꦠ꧀ꦠꦴ ꦮꦸꦠ꧀ꦠꦁ ‘‘ꦢꦱꦏꦸꦱꦭꦏꦩ꧀ꦩꦥꦡꦺ ꦜꦶꦠꦺꦴ’’ꦠꦶ. ꦣꦩ꧀ꦩꦤ꧀ꦠꦶ ꦣꦩ꧀ꦩꦠꦺꦴ ꦄꦤꦥꦺꦠꦁ. ꦠꦡꦴ ꦲꦶ ꦕ ꦱꦺꦴ ꦥꦏ꧀ꦑꦥꦴꦠꦴꦨꦴꦮꦠꦺꦴ ‘‘ꦱꦩꦺꦴ’’ꦠꦶ ꦮꦸꦕ꧀ꦕꦠꦷꦠꦶ ꦄꦴꦲ ‘‘ꦱꦩꦁ ꦕꦫꦠꦷ’’ꦠꦶ. ꦥꦏꦠꦶꦤꦶꦪꦴꦩꦺꦤꦺꦮꦴꦠꦶ ꦥꦮꦺꦟꦶꦪꦴ ꦄꦴꦒꦠꦤꦶꦪꦴꦩꦺꦤꦺꦮ. ꦪꦱ꧀ꦩꦴ ꦤꦶꦒꦩꦗꦤꦥꦢꦺꦱꦸ ꦪꦺꦨꦸꦪ꧀ꦪꦺꦤ ꦒꦲꦥꦠꦷꦤꦁ ꦱꦔ꧀ꦒꦲꦺꦴ, ꦠꦱ꧀ꦩꦴ ꦄꦛ꧀ꦜꦏꦡꦴꦪꦁ ‘‘ꦒꦲꦥꦠꦶꦏꦴꦤ’’ꦤ꧀ꦠ꧀ꦮꦺꦮ ꦮꦸꦠ꧀ꦠꦁ. ꦥꦴꦭ꦳ꦶꦪꦁ ꦥꦤ ꦄꦚ꧀ꦚꦩꦺꦮ ꦤꦴꦒꦫꦕꦴꦫꦶꦠ꧀ꦠꦁ, ꦄꦚ꧀ꦚꦁ ꦤꦺꦒꦩꦗꦤꦥꦢꦕꦴꦫꦶꦠ꧀ꦠꦤ꧀ꦠꦶ ꦠꦺ ꦮꦶꦱꦸꦁ ꦒꦲꦶꦠꦴ ‘‘ꦤꦺꦒꦩꦺꦱꦸ ꦕꦺꦮ ꦗꦤꦥꦢꦺꦱꦸ ꦕꦴ’’ꦠꦶ. ꦥꦕ꧀ꦕꦸꦒ꧀ꦒꦩꦤꦤꦶꦒ꧀ꦒꦩꦤꦮꦱꦺꦤ ꦈꦥꦺꦴꦱꦡꦱ꧀ꦱ ꦥꦛꦶꦲꦫꦟꦁ ꦥꦴꦛꦶꦲꦴꦫꦶꦪꦺꦴ, ꦱꦺꦴ ꦌꦮ ꦥꦴꦛꦶꦲꦴꦫꦶꦏꦺꦴ, ꦥꦏ꧀ꦑꦺꦴ. ꦆꦩꦺ ꦢꦶꦮꦱꦴꦠꦶ ꦆꦩꦺ ꦕꦠ꧀ꦠꦴꦫꦺꦴ ꦢꦶꦮꦱꦴ.

꧓꧐꧙. ꦢꦺꦮꦺꦴꦠꦶ ꦩꦕ꧀ꦕꦸ ꦄꦨꦶꦨꦮꦤꦛ꧀ꦜꦺꦤ. ꦪꦡꦴ ꦲꦶ ꦢꦺꦮꦺꦴ ꦥꦏꦠꦶꦱꦠ꧀ꦠꦺ ꦄꦨꦶꦨꦮꦠꦶ, ꦌꦮꦁ ꦩꦕ꧀ꦕꦸ ꦱꦠ꧀ꦠꦺ ꦄꦨꦶꦨꦮꦠꦶ. ‘‘ꦄꦲꦁ ꦄꦱꦸꦏꦁ ꦩꦢ꧀ꦢꦶꦠꦸꦁ ꦄꦴꦒꦩꦶꦱ꧀ꦱꦴꦩꦶ, ꦠ꧀ꦮꦁ ꦠꦱ꧀ꦱ ꦏꦺꦱꦺ ꦒꦲꦺꦠ꧀ꦮꦴ ꦩꦴ ꦮꦶꦱ꧀ꦱꦗ꧀ꦗꦺꦲꦷ’’ꦠꦶ ꦩꦕ꧀ꦕꦸꦢꦺꦮꦱ꧀ꦱ ꦄꦴꦟꦴꦏꦫꦴ ꦢꦹꦠꦴ ꦮꦶꦪꦴꦠꦶ ꦢꦹꦠꦴꦠꦶ ꦮꦸꦕ꧀ꦕꦤ꧀ꦠꦶ. ꦄꦭꦔ꧀ꦏꦠꦥꦛꦶꦪꦠ꧀ꦠꦴꦪꦴꦠꦶ ꦆꦢꦁ ꦄꦠ꧀ꦠꦤꦺꦴ ꦢꦶꦧ꧀ꦧꦴꦤꦸꦨꦴꦮꦁ ꦄꦴꦮꦶꦏꦠ꧀ꦮꦴ ꦜꦶꦠꦴꦪꦴꦠꦶ ꦢꦱ꧀ꦱꦺꦠꦸꦁ ꦮꦸꦠ꧀ꦠꦁ. ꦢꦺꦮꦠꦴꦧ꧀ꦪꦴꦏꦫꦟꦱꦢꦶꦱꦩꦺꦮ ꦲꦺꦴꦠꦶ ꦤ ꦕꦶꦫꦺꦤꦺꦮ ꦩꦫꦟꦱꦩ꧀ꦨꦮꦠꦺꦴ. ꦮꦶꦱꦸꦢ꧀ꦣꦶꦢꦺꦮꦴꦤꦤ꧀ꦠꦶ ꦑꦷꦟꦴꦱꦮꦧ꧀ꦫꦲ꧀ꦩꦴꦤꦁ. ꦠꦺ ꦲꦶ ꦕꦫꦶꦩꦨꦮꦺ ꦧꦺꦴꦣꦶꦱꦠ꧀ꦠꦴꦤꦁ ꦗꦶꦟ꧀ꦟꦴꦢꦶꦏꦺ ꦢꦱ꧀ꦱꦺꦤ꧀ꦠꦶ.

ꦢꦸꦑꦶꦠꦚ꧀ꦕ ꦧ꧀ꦪꦴꦣꦶꦠꦤ꧀ꦠꦶ ꦧ꧀ꦪꦴꦣꦶꦨꦴꦮꦺꦤ ꦱꦚ꧀ꦗꦴꦠꦢꦸꦏ꧀ꦑꦤ꧀ꦠꦶ ꦄꦠ꧀ꦡꦺꦴ. ꦄꦤ꧀ꦠꦶꦩꦨꦮꦶꦏꦧꦺꦴꦣꦶꦱꦠ꧀ꦠꦴꦤꦁ ꦮꦶꦱꦸꦢ꧀ꦣꦶꦢꦺꦮꦺꦲꦶ ꦈꦥꦛ꧀ꦜꦴꦥꦶꦠꦨꦴꦮꦁ ꦈꦥꦴꦢꦴꦪ ꦠꦢꦚ꧀ꦚꦺꦱꦁ ꦠꦺꦲꦶ ꦄꦤꦸꦥꦛ꧀ꦜꦴꦥꦶꦠꦴꦤꦩ꧀ꦥꦶ ꦥꦟ꧀ꦝꦶꦠꦴꦤꦁ ꦠꦡꦴ ꦮꦺꦴꦲꦫꦶꦠꦧ꧀ꦧꦠꦴ ꦥꦫꦶꦪꦴꦪꦱꦶꦢ꧀ꦣꦴꦠꦶ ꦄꦴꦲ ‘‘ꦆꦩꦶꦤꦴ ꦥꦫꦶꦪꦴꦪꦺꦤꦴ’’ꦠꦶ.

ꦢꦶꦱꦩ꧀ꦥꦠꦷꦠꦶ ꦮꦶꦨꦠ꧀ꦠꦶꦄꦭꦺꦴꦥꦺꦤ ꦤꦶꦢ꧀ꦢꦺꦱꦺꦴ, ꦢꦶꦱꦴꦱꦷꦱꦺꦤ ꦢꦺꦱꦴ ꦮꦸꦠ꧀ꦠꦴꦠꦶ ꦢꦺꦱꦴꦤꦁ ꦄꦣꦶꦥꦠꦶꦫꦴꦗꦴꦠꦶ ꦄꦠ꧀ꦡꦺꦴ. ꦈꦠ꧀ꦠꦩꦔ꧀ꦒꦺ ꦱꦶꦫꦱꦶ ꦫꦸꦲꦤ꧀ꦠꦷꦠꦶ ꦈꦠ꧀ꦠꦩꦔ꧀ꦒꦫꦸꦲꦴ, ꦏꦺꦱꦴ. ꦠꦺ ꦥꦤꦺꦠ꧀ꦡ ꦪꦱ꧀ꦩꦴ ꦥꦭꦶꦠꦠ꧀ꦠꦴ ꦄꦮꦶꦱꦺꦱꦠꦺꦴ ꦱꦧ꧀ꦧꦥꦕ꧀ꦖꦶꦩꦮꦪꦱꦤ꧀ꦢꦱ꧀ꦱꦏꦴ ꦲꦺꦴꦤ꧀ꦠꦶ, ꦠꦱ꧀ꦩꦴ ‘‘ꦮꦪꦺꦴꦲꦫꦴ’’ꦠꦶ ꦮꦸꦠ꧀ꦠꦴ.

ꦥꦸꦫꦶꦱꦪꦸꦒꦺꦴ ꦪꦱ꧀ꦩꦴ ꦠꦱ꧀ꦩꦶꦁ ꦮꦁꦱꦺ ꦱꦚ꧀ꦗꦴꦠꦥꦸꦫꦶꦱꦛ꧀ꦜꦶꦠꦶꦪꦴ ꦥꦫꦶꦕ꧀ꦖꦶꦤ꧀ꦤꦺꦴ, ꦠꦱ꧀ꦩꦴ ꦄꦴꦲ ‘‘ꦮꦁꦱꦱꦩ꧀ꦨꦮꦺ ꦥꦸꦫꦶꦱꦺ’’ꦠꦶ. ꦫꦴꦗꦒꦺꦲꦠꦺꦴ ꦄꦴꦲꦛꦨꦶꦏ꧀ꦑꦴꦪ ꦪꦴꦥꦺꦤ꧀ꦠꦺꦴꦠꦶ ꦆꦩꦶꦤꦴ ꦏꦸꦩꦴꦫꦏꦥꦧ꧀ꦧꦗ꧀ꦗꦴꦪ ꦈꦥꦒꦠꦨꦴꦮꦁ ꦢꦱ꧀ꦱꦺꦠꦶ.

ꦥꦫꦶꦲꦫꦶꦪꦩꦴꦤꦺꦴꦮꦴꦠꦶ ꦄꦚ꧀ꦚꦺꦤ ꦄꦚ꧀ꦚꦺꦤ ꦥꦫꦶꦲꦫꦶꦪꦩꦴꦤꦺꦴ ꦮꦶꦪ ꦮꦺꦭꦴꦪ ꦮꦺꦭꦴꦪ ꦠꦺꦤ ꦩꦲꦠꦴ ꦥꦫꦶꦗꦤꦺꦤ ꦈꦥꦛ꧀ꦜꦶꦪꦩꦴꦤꦺꦴ ꦏꦸꦩꦴꦫꦏꦷꦭ꦳ꦁ ꦏꦷꦭ꦳ꦷꦠꦶ ꦄꦠ꧀ꦡꦺꦴ. ꦏꦺꦕꦶ ꦥꦤ ‘‘ꦥꦫꦶꦲꦫꦶꦪꦩꦴꦤꦺꦴ ꦌꦮꦴ’’ꦠꦶ ꦄꦮꦣꦴꦫꦟꦮꦱꦺꦤ ꦄꦠ꧀ꦡꦁ ꦮꦢꦤ꧀ꦠꦶ, ꦠꦡꦴ ꦱꦠꦶ ꦕꦠꦸꦫꦴꦱꦷꦠꦶꦮꦱ꧀ꦱꦱꦲꦱ꧀ꦱꦴꦤꦶ ꦡꦚ꧀ꦚꦥꦴꦪꦷ ꦠꦫꦸꦟꦢꦴꦫꦏꦺꦴ ꦄꦲꦺꦴꦱꦷꦠꦶ ꦄꦴꦥꦗ꧀ꦗꦠꦷꦠꦶ ꦠꦢꦪꦸꦠ꧀ꦠꦁ. ꦏꦸꦩꦴꦫꦏꦴꦭꦁ ꦮꦠ꧀ꦮꦴ ꦠꦢꦤꦤ꧀ꦠꦫꦁ ꦎꦥꦫꦗ꧀ꦗꦮꦕꦤꦠꦺꦴ ꦮꦶꦫꦸꦢ꧀ꦣꦚ꧀ꦕꦺꦠꦁ. (ꦥꦚ꧀ꦕꦩꦔ꧀ꦒꦭꦮꦕꦤꦺꦤ ꦈꦤ꧀ꦤꦔ꧀ꦒꦭꦩꦔ꧀ꦒꦭꦈꦏ꧀ꦏꦤ꧀ꦠꦤꦩꦔ꧀ꦒꦭꦏꦩ꧀ꦩꦲꦴꦪꦩꦔ꧀ꦒꦭꦢꦸꦱ꧀ꦱꦩꦔ꧀ꦒꦭꦴꦤꦶ ꦱꦩꦸꦥꦒꦠꦴꦤꦶ ꦌꦮ ꦄꦲꦺꦱꦸꦤ꧀ꦠꦶ ꦢꦛ꧀ꦜꦧ꧀ꦧꦁ).

꧓꧑꧑. ꦱꦮꦁꦱꦮꦱꦺꦤ ꦄꦴꦒꦠꦴ ꦥꦸꦠ꧀ꦠꦤꦠ꧀ꦠꦸꦄꦴꦢꦪꦺꦴ ꦥꦸꦠ꧀ꦠꦴ ꦕ ꦥꦥꦸꦠ꧀ꦠꦴ ꦕ ꦌꦠꦶꦱ꧀ꦱꦴꦠꦶ ꦥꦸꦠ꧀ꦠꦥꦥꦸꦠ꧀ꦠꦏꦴ ꦥꦫꦩ꧀ꦥꦫꦴ. ꦤꦶꦲꦠꦤ꧀ꦠꦶ ꦤꦶꦲꦶꦠꦁ ꦜꦥꦶꦠꦁ, ꦥꦮꦠ꧀ꦠꦶꦠꦤ꧀ꦠꦶ ꦄꦠ꧀ꦡꦺꦴ. ꦤꦶꦲꦠꦤ꧀ꦠꦶ ꦮꦴ ꦱꦠꦠꦁ ꦥꦠꦶꦛ꧀ꦜꦶꦠꦨꦴꦮꦺꦤ ꦮꦭ꦳ꦚ꧀ꦗꦶꦠꦤ꧀ꦠꦶ ꦄꦠ꧀ꦡꦺꦴ. ꦠꦺꦤꦴꦲ ‘‘ꦏꦭ꧀ꦪꦴꦟꦮꦠ꧀ꦠ’’ꦤ꧀ꦠꦶ. ꦄꦠꦶꦫꦺꦏꦠꦫꦴ ꦢ꧀ꦮꦺ ꦒꦸꦟꦴꦠꦶ ꦩꦲꦴꦱꦠ꧀ꦠꦱ꧀ꦱ ꦩꦓꦢꦺꦮꦏꦴꦭꦠꦺꦴ ꦄꦠꦶꦫꦺꦏꦠꦫꦴ ꦢ꧀ꦮꦺ ꦒꦸꦟꦴ ꦆꦠꦫꦫꦴꦗꦹꦲꦶ ꦥꦤ ꦄꦠꦶꦫꦺꦏꦠꦫꦴ ꦄꦤꦺꦏꦱꦠꦱꦲꦱ꧀ꦱꦥ꧀ꦥꦨꦺꦢꦴ ꦌꦮ ꦒꦸꦟꦴ ꦄꦲꦺꦱꦸꦤ꧀ꦠꦶ.

꧓꧑꧒. ꦠꦺꦠ꧀ꦠꦶꦁꦱ ꦱꦲꦥꦸꦚ꧀ꦚꦏꦴꦫꦶꦤꦺꦴ ꦌꦠ꧀ꦡ ꦤꦶꦧ꧀ꦧꦠ꧀ꦠꦴꦠꦶ ꦠꦁꦱꦲꦕꦫꦶꦠꦛ꧀ꦜꦴꦤꦁ ꦠꦺꦠ꧀ꦠꦶꦁꦱꦁ, ꦠꦢꦺꦮ ꦠꦴꦮꦠꦶꦁꦱꦁ, ꦠꦁꦤꦶꦮꦴꦱꦺꦴ ꦌꦠꦺꦱꦤ꧀ꦠꦶ ꦠꦴꦮꦠꦶꦁꦱꦴ. ꦤꦶꦮꦴꦱꦨꦴꦮꦺꦴ ꦕ ꦠꦺꦱꦁ ꦠꦠ꧀ꦡ ꦤꦶꦧ꧀ꦧꦠ꧀ꦠꦤꦥꦸꦧ꧀ꦧꦏꦺꦴꦠꦶ ꦄꦴꦲ – ‘‘ꦢꦺꦮꦴꦤꦁ ꦠꦴꦮꦠꦶꦁꦱꦴꦤꦤ꧀ꦠꦶ ꦠꦴꦮꦠꦶꦁꦱꦨꦮꦤꦺ ꦤꦶꦧ꧀ꦧꦠ꧀ꦠꦢꦺꦮꦴꦤ’’ꦤ꧀ꦠꦶ. ꦫꦚ꧀ꦚꦺꦴꦠꦶ ꦤꦶꦩꦶꦩꦲꦴꦫꦴꦗꦱ꧀ꦱ. ꦎꦮꦴꦢꦺ ꦜꦠ꧀ꦮꦴꦠꦶ ‘‘ꦱꦷꦭꦁ ꦄꦫꦏ꧀ꦑꦤ꧀ꦠꦺꦴ ꦩꦩ ꦱꦤ꧀ꦠꦶꦏꦁ ꦩꦴ ꦄꦴꦒꦕ꧀ꦖꦠꦹ’’ꦠꦶ ꦤꦶꦒ꧀ꦒꦟ꧀ꦲꦤꦮꦱꦺꦤꦥꦶ, ‘‘ꦌꦏꦤ꧀ꦠꦠꦺꦴ ꦩꦩ ꦮꦶꦗꦶꦠꦺ ꦮꦱꦤ꧀ꦠꦺꦤ ꦱꦷꦭꦁ ꦫꦏ꧀ꦑꦶꦠꦧ꧀ꦧ’’ꦤ꧀ꦠꦶ ꦌꦮꦁ ꦥꦮꦠ꧀ꦠꦶꦠꦎꦮꦴꦢꦮꦱꦺꦤꦥꦶ ꦎꦮꦴꦢꦺ ꦜꦠ꧀ꦮꦴ.

ꦄꦡ ꦤꦤ꧀ꦠꦶ ꦩꦲꦴꦗꦸꦠꦶꦏꦁ ꦩꦲꦴꦮꦶꦥ꧀ꦦꦴꦫꦁ ꦩꦲꦴꦤꦸꦨꦴꦮꦁ ꦤꦶꦩꦶꦫꦴꦗꦴꦤꦁ. ‘‘ꦱꦏ꧀ꦏꦺꦴꦲꦩꦱ꧀ꦩꦶ ꦢꦺꦮꦶꦤ꧀ꦢꦺꦴ, ꦠꦮ ꦱꦤ꧀ꦠꦶꦏꦩꦴꦒꦠꦺꦴ’’ꦠꦶ ꦄꦠ꧀ꦠꦤꦺꦴ ꦱꦏ꧀ꦏꦨꦴꦮꦁ ꦥꦮꦺꦢꦺꦠ꧀ꦮꦴ ‘‘ꦏꦔ꧀ꦑꦁ ꦠꦺ ꦥꦛꦶꦮꦶꦤꦺꦴꦢꦺꦱ꧀ꦱꦴꦩꦷ’’ꦠꦶ ꦄꦴꦲ. ꦠꦺꦤꦴꦲ ‘‘ꦱꦧ꧀ꦧꦨꦹꦠꦴꦤꦩꦶꦱ꧀ꦱꦫꦴ’’ꦠꦶꦄꦴꦢꦶ.

ꦱꦷꦭꦁ ꦈꦥꦴꦢꦴꦪ ꦎꦩꦏꦠꦴꦪ ‘‘ꦏꦶ’’ꦤ꧀ꦠꦶ ꦲꦷꦭ꦳ꦺꦤ꧀ꦠꦺꦴ ꦮꦢꦠꦶ. ꦒꦸꦟꦮꦶꦱꦶꦛ꧀ꦜꦠꦴꦪꦴꦠꦶ ꦭꦴꦨꦪꦱꦴꦢꦷꦤꦚ꧀ꦕꦺꦮ ꦥꦶꦪꦩꦤꦴꦥꦠꦴꦢꦷꦤꦚ꧀ꦕ ꦄꦴꦱꦮꦏ꧀ꦑꦪꦥꦫꦶꦪꦺꦴꦱꦴꦤꦴꦤꦁ ꦤꦶꦩꦶꦠ꧀ꦠꦨꦴꦮꦺꦤ ꦈꦠ꧀ꦠꦩꦒꦸꦟꦠꦴꦪ. ꦠꦢꦴ ꦱꦏ꧀ꦏꦺꦴ ꦄꦤꦸꦫꦸꦢ꧀ꦣꦠ꧀ꦡꦺꦫꦺꦴ, ꦱꦺꦴ ꦄꦠ꧀ꦠꦤꦺꦴ ꦥꦸꦫꦶꦩꦗꦴꦠꦶꦪꦁ ꦥꦕ꧀ꦕꦏ꧀ꦑꦱꦶꦢ꧀ꦣꦁꦮ ꦢꦴꦤꦠꦺꦴ ꦱꦷꦭꦁ ꦩꦲꦤ꧀ꦠꦁ ꦮꦶꦨꦴꦮꦺꦤ꧀ꦠꦺꦴ ‘‘ꦄꦲꦚ꧀ꦲꦷ’’ꦠꦶꦄꦴꦢꦶꦩꦴꦲ. ꦠꦠ꧀ꦡ ꦄꦠ꧀ꦠꦤꦴ ꦮꦱꦶꦪꦩꦴꦤꦁ ꦏꦴꦩꦴꦮꦕꦫꦢꦺꦮꦭꦺꦴꦏꦁ ꦱꦤ꧀ꦣꦴꦪ ‘‘ꦥꦺꦠ꧀ꦠꦶꦮꦶꦱꦪꦠꦺꦴ’’ꦠꦶ ꦮꦸꦠ꧀ꦠꦁ. ꦠꦱ꧀ꦱ ꦲꦶ ꦏꦥ꧀ꦥꦱꦠꦱꦲꦱ꧀ꦱꦁ ꦮꦶꦮꦛ꧀ꦛꦗ꧀ꦙꦴꦱꦪꦱ꧀ꦱ ꦥꦹꦫꦶꦠꦥꦴꦫꦩꦶꦱ꧀ꦱ ꦢꦺꦮꦭꦺꦴꦏꦺꦴ ꦥꦺꦠꦭꦺꦴꦏꦺꦴ ꦮꦶꦪ ꦈꦥꦛ꧀ꦜꦴꦱꦶ. ꦠꦺꦤꦺꦮꦴꦲ ‘‘ꦄꦕ꧀ꦖꦫꦴꦒꦟꦱꦔ꧀ꦓꦸꦛ꧀ꦜꦁ, ꦥꦶꦱꦴꦕꦒꦟꦱꦺꦮꦶꦠ’’ꦤ꧀ꦠꦶ (ꦱꦁ. ꦤꦶ. ꧑.꧔꧖).

ꦑꦠ꧀ꦠꦶꦪꦺꦠꦶ ꦑꦠ꧀ꦠꦶꦪꦗꦴꦠꦶꦪꦁ. ꦮꦶꦱꦸꦗ꧀ꦙꦠꦷꦠꦶ ꦧ꧀ꦫꦲ꧀ꦩꦭꦺꦴꦏꦹꦥꦥꦠ꧀ꦠꦶꦁ ꦱꦤ꧀ꦣꦴꦪ ꦮꦢꦠꦶ ꦏꦴꦩꦱꦁꦏꦶꦭꦺꦱꦮꦶꦱꦸꦗ꧀ꦙꦤꦠꦺꦴ. ꦏꦴꦪꦴꦠꦶ ꦕ ꦧ꧀ꦫꦲ꧀ꦩꦏꦴꦪꦩꦴꦲ.

ꦆꦩꦱ꧀ꦱ ꦩꦩ ꦄꦢꦶꦛ꧀ꦜꦥꦸꦧ꧀ꦧꦫꦹꦥꦁ ꦢꦶꦱ꧀ꦮꦴ ‘‘ꦄꦲꦸꦢꦺꦮ ꦨꦪ’’ꦤ꧀ꦠꦶ ꦕꦶꦤ꧀ꦠꦺꦠ꧀ꦮꦴ ꦄꦴꦲ ‘‘ꦄꦮꦶꦏꦩ꧀ꦥꦩꦴꦤꦺꦴ’’ꦠꦶ. ꦨꦴꦪꦤ꧀ꦠꦺꦴ ꦲꦶ ꦕꦶꦠ꧀ꦠꦱ꧀ꦱ ꦄꦚ꧀ꦚꦡꦠ꧀ꦠꦺꦤ ꦏꦴꦪꦱ꧀ꦱ ꦕ ꦖꦩ꧀ꦨꦶꦠꦠ꧀ꦠꦺꦤ ꦮꦶꦏꦩ꧀ꦥꦠꦶ ꦤꦴꦩ. ꦠꦺꦤꦴꦲ ‘‘ꦄꦨꦴꦪꦩꦴꦤꦺꦴ’’ꦠꦶ. ꦱꦸꦑꦁ ꦏꦡꦺꦠꦸꦁ ꦲꦺꦴꦠꦷꦠꦶ ꦥꦸꦚ꧀ꦚꦦꦭꦁ ꦏꦡꦺꦠꦸꦁ ꦱꦸꦑꦁ ꦲꦺꦴꦠꦶ.

꧓꧑꧓. ꦩꦤꦁ ꦄꦴꦒꦩ꧀ꦩ ꦪꦸꦠ꧀ꦠꦴꦪꦺꦮ ꦲꦺꦴꦤ꧀ꦠꦷꦠꦶ ꦩꦴꦠꦭꦶꦱ꧀ꦱ ꦱꦏ꧀ꦏꦱ꧀ꦱꦺꦮ ꦕꦶꦠ꧀ꦠꦁ ꦗꦴꦤꦶꦠ꧀ꦮꦴ ꦪꦸꦠ꧀ꦠꦴ ꦮꦶꦪ ꦲꦺꦴꦤ꧀ꦠꦶ, ꦫꦡꦺ ꦪꦸꦠ꧀ꦠꦄꦴꦗꦴꦤꦷꦪꦏꦶꦕ꧀ꦕꦁ ꦏꦫꦺꦴꦤ꧀ꦠꦶ ꦢꦺꦮꦥꦸꦠ꧀ꦠꦴ. ꦌꦮꦁ ꦠꦴꦢꦶꦱꦺ ꦏꦴꦭꦺ ꦠꦡꦴ ꦥꦛꦶꦥꦗ꧀ꦗꦤ꧀ꦠꦶ, ꦪꦡꦴ ꦌꦫꦴꦮꦟꦺꦴ ꦢꦺꦮꦥꦸꦠ꧀ꦠꦺꦴ ꦲꦠ꧀ꦡꦶꦏꦶꦕ꧀ꦕꦁ. ꦤꦢ꧀ꦣꦶꦠꦺꦴ ꦥꦛ꧀ꦜꦴꦪꦴꦠꦶ ꦫꦡꦥꦚ꧀ꦗꦫꦥꦫꦶꦪꦤ꧀ꦠꦺꦤ ꦄꦏ꧀ꦑꦱ꧀ꦱ ꦱꦩ꧀ꦧꦤ꧀ꦣꦛ꧀ꦜꦴꦤꦁ ꦤꦢ꧀ꦣꦷ, ꦠꦠꦺꦴ ꦥꦛ꧀ꦜꦴꦪ. ꦄꦏ꧀ꦑꦺꦴ ꦧꦗ꧀ꦙꦠꦶ ꦌꦠ꧀ꦡꦴꦠꦶ ꦄꦏ꧀ꦑꦧꦢ꧀ꦣꦺꦴ, ꦄꦏ꧀ꦑꦺꦤ ꦫꦡꦱ꧀ꦱ ꦧꦢ꧀ꦣꦛ꧀ꦜꦴꦤꦁ. ꦪꦡꦴ ꦢꦺꦮꦭꦺꦴꦏꦠꦺꦴ ꦪꦴꦮ ꦕꦤ꧀ꦢꦩꦟ꧀ꦝꦭꦱ꧀ꦱ ꦒꦩꦤꦮꦷꦡꦶ, ꦠꦴꦮ ꦄꦠ꧀ꦠꦤꦺꦴ ꦄꦴꦤꦸꦨꦴꦮꦺꦤ ꦲꦺꦛ꧀ꦜꦴꦩꦸꦑꦩꦺꦮ ꦫꦡꦁ ꦥꦺꦱꦺꦱꦶ, ꦌꦮꦁ ꦕꦤ꧀ꦢꦩꦟ꧀ꦝꦭꦱ꧀ꦱ ꦒꦩꦤꦮꦷꦡꦶꦠꦺꦴ ꦪꦴꦮ ꦫꦚ꧀ꦚꦺꦴ ꦥꦴꦱꦴꦢꦺꦴ, ꦠꦴꦮ ꦠꦡꦺꦮ ꦥꦺꦱꦺꦱꦶ. ꦢ꧀ꦮꦺ ꦩꦒ꧀ꦒꦺ ꦢꦱ꧀ꦱꦺꦠ꧀ꦮꦴꦠꦶ ꦥꦠꦺꦴꦢꦭꦛ꧀ꦜꦶꦪꦴ ꦄꦴꦏꦴꦱꦁ ꦮꦶꦭꦶꦑꦤ꧀ꦠꦺꦴ ꦮꦶꦪ ꦄꦠ꧀ꦠꦤꦺꦴ ꦄꦴꦤꦸꦨꦴꦮꦺꦤ ꦤꦶꦫꦪꦒꦴꦩꦷ ꦢꦺꦮꦭꦺꦴꦏꦒꦴꦩꦷ ꦕꦴꦠꦶ ꦢ꧀ꦮꦺ ꦩꦒ꧀ꦒꦺ ꦢꦱ꧀ꦱꦺꦠ꧀ꦮꦴ. ꦏꦠꦩꦺꦤꦴꦠꦶꦄꦴꦢꦶ ꦢꦺꦱꦤꦴꦩꦠ꧀ꦠꦁ, ꦪꦡꦴ ꦠꦺꦤ ꦫꦡꦺꦤ ꦒꦕ꧀ꦖꦤ꧀ꦠꦱ꧀ꦱ ꦤꦶꦫꦪꦺꦴ ꦢꦺꦮꦭꦺꦴꦏꦺꦴ ꦕ ꦥꦴꦏꦛꦴ ꦲꦺꦴꦤ꧀ꦠꦶ, ꦠꦡꦴ ꦏꦫꦟꦁ ꦄꦣꦶꦥ꧀ꦥꦺꦠꦁ.

ꦮꦸꦠ꧀ꦠꦏꦴꦫꦟꦩꦺꦮ ꦱꦤ꧀ꦣꦴꦪꦴꦲ ꦩꦲꦴꦱꦠ꧀ꦠꦺꦴ ‘‘ꦈꦨꦪꦺꦤꦺꦮ ꦩꦁ ꦩꦴꦠꦭꦶ ꦤꦺꦲꦷ’’ꦠꦶ. ꦢꦸꦒ꧀ꦒꦤ꧀ꦠꦶ ꦢꦸꦒ꧀ꦒꦩꦁ. ꦮꦺꦠ꧀ꦠꦫꦟꦶꦤ꧀ꦠꦶ ꦌꦮꦁꦤꦴꦩꦏꦁ ꦤꦶꦫꦪꦁ. ꦏꦸꦡꦶꦠꦤ꧀ꦠꦶ ꦥꦏ꧀ꦏꦸꦡꦶꦠꦁ ꦤꦶꦥꦏ꧀ꦏꦠꦺꦭꦱꦢꦶꦱꦗꦴꦭꦁ. ꦑꦴꦫꦱꦁꦪꦸꦠ꧀ꦠꦤ꧀ꦠꦶ ꦑꦴꦫꦺꦴꦢꦏꦱꦢꦶꦱꦁ.

ꦫꦡꦁ ꦤꦶꦮꦠ꧀ꦠꦺꦠ꧀ꦮꦴꦠꦶ ꦤꦶꦫꦪꦴꦨꦶꦩꦸꦑꦠꦺꦴ ꦤꦶꦮꦠ꧀ꦠꦺꦠ꧀ꦮꦴ. ꦧꦷꦫꦟꦷꦢꦺꦮꦣꦷꦠꦴꦪꦴꦠꦶ ‘‘ꦧꦷꦫꦟꦷ’’ꦠꦶ ꦌꦮꦁꦤꦴꦩꦶꦏꦴꦪ ꦄꦕ꧀ꦖꦫꦴꦪ. ꦱꦺꦴꦟꦢꦶꦤ꧀ꦤꦢꦺꦮꦥꦸꦠ꧀ꦠꦱ꧀ꦱꦴꦠꦶ ‘‘ꦱꦺꦴꦟꦢꦶꦤ꧀ꦤꦺꦴ’’ꦠꦶ ꦌꦮꦁꦤꦴꦩꦏꦱ꧀ꦱ ꦢꦺꦮꦥꦸꦠ꧀ꦠꦱ꧀ꦱ. ꦒꦟꦢꦺꦮꦥꦸꦠ꧀ꦠꦴꦤꦤ꧀ꦠꦶ ꦒꦟꦮꦱꦺꦤ ꦥꦸꦚ꧀ꦚꦁ ꦏꦠ꧀ꦮꦴ ꦒꦟꦮꦱꦺꦤꦺꦮ ꦤꦶꦧ꧀ꦧꦠ꧀ꦠꦢꦺꦮꦥꦸꦠ꧀ꦠꦴꦤꦁ.

ꦥꦠ꧀ꦠꦏꦴꦭꦺꦠꦶ ꦈꦥꦏꦛ꧀ꦜꦴꦪ ꦮꦺꦭꦴꦪ. ꦄꦠꦶꦡꦶꦤ꧀ꦠꦶ ꦥꦕ꧀ꦕꦺꦏꦱꦩ꧀ꦧꦸꦢ꧀ꦣꦁ. ꦏꦱ꧀ꦱꦥꦱ꧀ꦱ ꦨꦒꦮꦠꦺꦴ ꦱꦴꦱꦤꦺ ꦌꦏꦁ ꦑꦷꦟꦴꦱꦮꦠ꧀ꦡꦺꦫꦤ꧀ꦠꦶꦥꦶ ꦮꦢꦤ꧀ꦠꦶ. ꦩꦴꦠꦴꦮ ꦥꦸꦠ꧀ꦠꦁ ꦱꦏꦶꦩꦴꦨꦶꦤꦤ꧀ꦢꦷꦠꦶ ꦪꦡꦴ ꦥꦮꦴꦱꦠꦺꦴ ꦄꦴꦒꦠꦁ ꦥꦸꦠ꧀ꦠꦁ ꦩꦴꦠꦴ ꦱꦏꦶꦁ ꦌꦏꦮꦴꦫꦁ ꦄꦴꦒꦠꦏꦴꦭꦺ ꦄꦨꦶꦤꦤ꧀ꦢꦠꦶ, ꦠꦡꦴ ꦤꦶꦕ꧀ꦕꦏꦴꦭꦺ ꦄꦨꦶꦤꦤ꧀ꦢꦶ ꦱꦏ꧀ꦏꦕ꧀ꦕꦁ ꦥꦫꦶꦮꦶꦱꦶ. ꦱꦁꦪꦩꦴ ꦱꦁꦮꦶꦨꦴꦒꦴꦠꦶ ꦱꦷꦭꦱꦁꦪꦩꦴ ꦱꦁꦮꦶꦨꦴꦒꦱꦷꦭꦴ. ꦗꦴꦠꦏꦺꦠꦶ ꦤꦶꦩꦶꦗꦴꦠꦏꦺ.

ꦕꦶꦠ꧀ꦠꦏꦹꦛꦤ꧀ꦠꦶ ꦢꦺꦮꦤꦒꦫꦱ꧀ꦱ ꦢꦏ꧀ꦑꦶꦟꦢꦶꦱꦴꦪ ꦢ꧀ꦮꦴꦫꦏꦺꦴꦛ꧀ꦜꦏꦁ. ꦱꦏ꧀ꦏꦺꦴ ꦕꦶꦠ꧀ꦠꦁ ꦱꦤ꧀ꦣꦴꦫꦺꦠꦸꦁ ꦄꦱꦏ꧀ꦏꦺꦴꦤ꧀ꦠꦺꦴꦠꦶ ꦩꦲꦴꦱꦠ꧀ꦠꦺ ꦥꦮꦠ꧀ꦠꦁ ꦢꦺꦮꦠꦴꦤꦁ ꦱꦏ꧀ꦏꦴꦫꦱꦩ꧀ꦩꦴꦤꦁ ꦥꦛꦶꦕ꧀ꦕ ꦈꦥ꧀ꦥꦤ꧀ꦤꦁ ꦄꦠ꧀ꦠꦤꦺꦴ ꦈꦱꦹꦪꦕꦶꦠ꧀ꦠꦁ ꦧꦲꦶ ꦄꦤꦴꦮꦶꦏꦠ꧀ꦮꦴ ꦄꦧ꧀ꦨꦤ꧀ꦠꦫꦺꦪꦺꦮ ꦕ ꦤꦁ ꦜꦥꦺꦠꦸꦁ ꦄꦱꦏ꧀ꦏꦺꦴꦤ꧀ꦠꦺꦴ. ꦄꦚ꧀ꦚꦺꦱꦁ ꦥꦸꦚ꧀ꦚꦺꦤ ꦮꦱꦴꦲꦷꦠꦶ ꦱꦏ꧀ꦏꦱ꧀ꦱ ꦩꦲꦴꦱꦠ꧀ꦠꦁ ꦫꦺꦴꦱꦺꦠꦸꦏꦴꦩꦠꦴꦪ ꦄꦴꦫꦴꦣꦤꦁ ꦤꦶꦢꦱ꧀ꦱꦺꦠꦶ. ꦥꦸꦫꦴꦟꦱꦏ꧀ꦏꦺꦴ ꦢꦷꦓꦴꦪꦸꦏꦺꦴ, ꦠꦁ ꦈꦥꦴꦢꦴꦪ ꦗꦫꦴꦗꦶꦟ꧀ꦟꦁ ꦮꦶꦪ ꦏꦠ꧀ꦮꦴ ‘‘ꦗꦫꦱꦏ꧀ꦏꦺꦴ’’ꦠꦶ ꦮꦸꦠ꧀ꦠꦁ.

꧓꧑꧕. ꦱꦺꦱꦁ ꦱꦧ꧀ꦧꦤ꧀ꦠꦶ ꦥꦧ꧀ꦧꦗ꧀ꦗꦸꦥꦒꦩꦤꦴ ꦱꦺꦱꦁ ꦄꦠ꧀ꦠꦤꦺꦴ ꦮꦁꦱꦺ ꦥꦺꦴꦫꦴꦟꦫꦴꦗꦹꦤꦁ ꦫꦴꦗꦕꦴꦫꦶꦠ꧀ꦠꦁ. ꦥꦴꦏꦠꦶꦏꦤ꧀ꦠꦶ ꦥꦸꦤ ꦱꦨꦴꦮꦠ꧀ꦠꦩꦺꦮ ꦒꦠꦺꦴ ꦄꦲꦺꦴꦱꦶ, ꦄꦥꦧ꧀ꦧꦗꦶꦠꦨꦴꦮꦮꦕꦤꦺꦤꦺꦮꦱ꧀ꦱ ꦧ꧀ꦫꦲ꧀ꦩꦮꦶꦲꦴꦫꦨꦴꦮꦤꦴꦢꦷꦤꦁ ꦥꦧ꧀ꦧꦗ꧀ꦗꦴꦒꦸꦟꦴꦤꦁ ꦄꦨꦴꦮꦺꦴ ꦢꦷꦥꦶꦠꦺꦴ ꦲꦺꦴꦠꦶ.

꧓꧑꧖. ꦮꦷꦫꦶꦪꦁ ꦄꦏꦫꦺꦴꦤ꧀ꦠꦺꦴ ꦱꦩꦸꦕ꧀ꦖꦶꦤ꧀ꦢꦠꦶ, ꦤ ꦠꦴꦮ ꦱꦩꦸꦕ꧀ꦖꦶꦤ꧀ꦤꦁ, ꦏꦭ꧀ꦪꦴꦟꦩꦶꦠ꧀ꦠꦱꦁꦱꦒ꧀ꦒꦴꦢꦶꦥꦕ꧀ꦕꦪꦱꦩꦮꦴꦪꦺ ꦱꦠꦶ ꦱꦷꦭꦮꦠꦁ ꦏꦭ꧀ꦪꦴꦟꦮꦠ꧀ꦠꦁ ꦥꦮꦠ꧀ꦠꦺꦠꦸꦁ ꦱꦏ꧀ꦏꦺꦴꦠꦶ. ꦢꦸꦱ꧀ꦱꦷꦭꦺꦤ ꦱꦩꦸꦕ꧀ꦖꦶꦤ꧀ꦤꦁ ꦤꦴꦩ ꦲꦺꦴꦠꦶ ꦠꦱ꧀ꦱ ꦠꦠ꧀ꦡ ꦤꦶꦫꦴꦱꦨꦴꦮꦺꦤ ꦥꦛꦶꦥꦠ꧀ꦠꦶꦪꦴ ꦌꦮ ꦄꦱꦩ꧀ꦨꦮꦠꦺꦴ. ꦱꦠ꧀ꦠ ꦱꦺꦑꦴ ꦥꦮꦠ꧀ꦠꦺꦤ꧀ꦠꦶ ꦏꦭ꧀ꦪꦴꦟꦮꦠ꧀ꦠꦱ꧀ꦱ ꦄꦥꦫꦶꦤꦶꦛ꧀ꦜꦶꦠꦏꦶꦕ꧀ꦕꦠ꧀ꦠꦴ. ꦑꦷꦟꦴꦱꦮꦺꦤ ꦥꦮꦠ꧀ꦠꦶꦠꦁ ꦤꦴꦩ ꦥꦫꦶꦤꦶꦛ꧀ꦜꦶꦠꦏꦶꦕ꧀ꦕꦠ꧀ꦠꦴ. ꦱꦺꦱꦁ ꦱꦸꦮꦶꦚ꧀ꦚꦺꦪ꧀ꦪꦩꦺꦮ.

ꦩꦓꦢꦺꦮꦱꦸꦠ꧀ꦠꦮꦟ꧀ꦟꦤꦴꦪ ꦭꦷꦤꦠ꧀ꦡꦥ꧀ꦥꦏꦴꦱꦤꦴ ꦱꦩꦠ꧀ꦠꦴ.