꧖. ꦱꦤ꧀ꦢꦏꦱꦸꦠ꧀ꦠꦮꦟ꧀ꦟꦤꦴ

꧒꧒꧓. ꦢꦺꦮꦺꦤ ꦮꦱ꧀ꦱꦺꦤ ꦏꦠꦺꦴ ꦱꦺꦴꦧ꧀ꦨꦺꦴ ꦢꦺꦮꦏꦠꦱꦺꦴꦧ꧀ꦨꦺꦴ. ꦠꦺꦤꦴꦲ ‘‘ꦮꦱ꧀ꦱꦺꦴ…ꦥꦺ… ꦫꦲꦢꦺꦴ’’ꦠꦶ. ꦒꦸꦲꦴꦠꦶ ꦥꦁꦱꦸꦒꦸꦲꦴ ꦥꦴꦱꦴꦟꦒꦸꦲꦴ ꦩꦶꦱ꧀ꦱꦏꦒꦸꦲꦴꦠꦶ ꦠꦶꦱ꧀ꦱꦺꦴ ꦒꦸꦲꦴ. ꦠꦠ꧀ꦡ ꦥꦁꦱꦸꦒꦸꦲꦴ ꦈꦢꦏꦩꦸꦠ꧀ꦠꦛ꧀ꦜꦴꦤꦺ ꦄꦲꦺꦴꦱꦶ ꦤꦶꦤ꧀ꦤꦛ꧀ꦜꦴꦤꦁ ꦥꦤ ꦈꦢꦏꦺꦤ ꦄꦗ꧀ꦙꦺꦴꦠ꧀ꦡꦠꦁ. ꦈꦩꦔ꧀ꦒꦁ ꦏꦠ꧀ꦮꦴꦠꦶ ꦲꦺꦛ꧀ꦜꦴ ꦱꦸꦢꦸꦒ꧀ꦒꦁ ꦏꦠ꧀ꦮꦴ. ꦄꦤꦩꦠꦒ꧀ꦒꦶꦪꦁ ꦥꦕ꧀ꦕꦮꦺꦏ꧀ꦑꦶꦠ꧀ꦮꦴꦠꦶ ‘‘ꦤ ꦑꦺꦴ ꦱꦺꦴ ꦱꦠ꧀ꦠꦴꦮꦴꦱꦺꦴ ꦱꦸꦭꦨꦫꦹꦥꦺꦴ, ꦪꦺꦴ ꦆꦩꦶꦤꦴ ꦢꦷꦓꦺꦤ ꦄꦢ꧀ꦣꦸꦤꦴ ꦄꦤꦴꦮꦸꦛ꧀ꦜꦥꦸꦧ꧀ꦧꦺꦴ’’ꦠꦶꦄꦴꦢꦶꦤꦴ (ꦩ. ꦤꦶ. ꧑.꧑꧖꧐) ꦆꦢꦚ꧀ꦕ ꦠꦭ꦳ꦴꦏꦁ ꦩꦪꦴ ꦮꦸꦠ꧀ꦡꦥꦸꦧ꧀ꦧꦁ ꦨꦮꦶꦱ꧀ꦱꦠꦶ, ꦠꦩ꧀ꦥꦶ ꦜꦴꦤꦁ ꦱꦺꦴ ꦕ ꦄꦠ꧀ꦠꦨꦴꦮꦺꦴ ꦄꦥꦚ꧀ꦚꦠ꧀ꦠꦶꦏꦨꦴꦮꦁ ꦒꦠꦺꦴꦠꦶ ꦌꦮꦁ ꦄꦤꦩꦠꦒ꧀ꦒꦶꦪꦁ ꦥꦕ꧀ꦕꦮꦺꦏ꧀ꦑꦶꦠ꧀ꦮꦴ ꦠꦴꦢꦶꦱꦁ ꦜꦴꦤꦁ ꦒꦤ꧀ꦠꦸꦁ ꦮꦛ꧀ꦛꦠꦶ. ꦆꦩꦶꦤꦴ ꦤꦪꦺꦤ ꦱꦩꦸꦢ꧀ꦢꦥꦧ꧀ꦧꦠꦢꦱ꧀ꦱꦤꦴꦢꦷꦱꦸꦥꦶ ꦥꦕ꧀ꦕꦮꦺꦏ꧀ꦑꦟꦴꦮꦶꦣꦶ ꦮꦺꦢꦶꦠꦧ꧀ꦧꦺꦴ.

ꦈꦕ꧀ꦕꦁ ꦤꦢꦩꦴꦤꦴꦪꦴꦠꦶ ꦈꦕ꧀ꦕꦁ ꦏꦠ꧀ꦮꦴ ꦱꦢ꧀ꦢꦁ ꦏꦫꦺꦴꦤ꧀ꦠꦶꦪꦴ ꦏꦴꦩꦱ꧀ꦱꦴꦢꦨꦮꦱ꧀ꦱꦴꦢꦴꦢꦶꦮꦠ꧀ꦡꦸꦤ꧀ꦠꦶ ‘‘ꦄꦪꦚ꧀ꦕ ꦄꦪꦚ꧀ꦕ ꦏꦴꦩꦺꦴ ꦆꦛ꧀ꦜꦺꦴ ꦏꦤ꧀ꦠꦺꦴ ꦩꦤꦴꦥꦺꦴ, ꦄꦱꦸꦏꦺꦴ ꦨꦮꦺꦴ ꦆꦛ꧀ꦜꦺꦴ ꦏꦤ꧀ꦠꦺꦴ ꦩꦤꦴꦥꦺꦴ, ꦌꦮꦩꦪꦁ ꦭꦺꦴꦏꦺꦴ ꦥꦶꦪꦺꦲꦶ ꦥꦶꦪꦠꦫꦺꦴ’’ꦠꦶ ꦌꦮꦁ ꦏꦴꦩꦱ꧀ꦱꦴꦢꦨꦮꦱ꧀ꦱꦴꦢꦭꦺꦴꦏꦱ꧀ꦱꦴꦢꦴꦢꦶꦱꦔ꧀ꦑꦴꦠꦁ ꦮꦠ꧀ꦡꦸꦁ. ꦢꦸꦒ꧀ꦒꦠꦶꦠꦺꦴ ꦱꦁꦱꦴꦫꦠꦺꦴ ꦕ ꦤꦶꦪ꧀ꦪꦴꦠꦶ ꦌꦠꦺꦤꦴꦠꦶ ꦤꦶꦪ꧀ꦪꦴꦤꦁ, ꦱꦒ꧀ꦒꦩꦒ꧀ꦒꦺꦴ ꦩꦺꦴꦏ꧀ꦑꦩꦒ꧀ꦒꦺꦴ ꦕ, ꦠꦁ ꦤꦶꦪ꧀ꦪꦴꦤꦁ ꦄꦫꦲꦠꦶ, ꦤꦶꦪ꧀ꦪꦴꦤꦺ ꦮꦴ ꦤꦶꦪꦸꦠ꧀ꦠꦴꦠꦶ ꦤꦶꦪ꧀ꦪꦴꦤꦶꦏꦴ, ꦤꦶꦪ꧀ꦪꦴꦤꦁ ꦮꦴ ꦦꦭꦁ ꦌꦠꦶꦱ꧀ꦱꦴ ꦄꦠ꧀ꦡꦷꦠꦶ ꦤꦶꦪ꧀ꦪꦴꦤꦶꦏꦴ, ꦮꦕꦷꦢꦸꦕ꧀ꦕꦫꦶꦠꦴꦢꦶꦱꦁꦏꦶꦭꦺꦱꦠꦺꦴ ꦤꦶꦪ꧀ꦪꦴꦠꦷꦠꦶ ꦮꦴ ꦤꦶꦪ꧀ꦪꦴꦤꦷꦪꦴ, ꦇ-ꦏꦴꦫꦱ꧀ꦱ ꦫꦱ꧀ꦱꦠ꧀ꦠꦁ ꦪ-ꦏꦴꦫꦱ꧀ꦱ ꦕ ꦏ-ꦏꦴꦫꦁ ꦏꦠ꧀ꦮꦴ ꦤꦶꦪ꧀ꦪꦴꦤꦶꦏꦴ, ꦕꦺꦠꦤꦴꦪ ꦱꦢ꧀ꦣꦶꦁ ꦱꦩ꧀ꦦꦥ꧀ꦥꦭꦴꦥꦴ ꦮꦺꦫꦩꦟꦶ. ꦠꦥ꧀ꦥꦛꦶꦥꦏ꧀ꦑꦠꦺꦴ ꦄꦤꦶꦪ꧀ꦪꦴꦤꦶꦏꦴ, ꦠꦱ꧀ꦱꦴ ꦨꦴꦮꦺꦴ ꦄꦤꦶꦪ꧀ꦪꦴꦤꦶꦏꦠ꧀ꦠꦁ, ꦠꦱ꧀ꦩꦴ ꦄꦤꦶꦪ꧀ꦪꦴꦤꦶꦏꦠ꧀ꦠꦴ. ꦠꦶꦫꦕ꧀ꦖꦴꦤꦨꦹꦠꦴꦠꦶ ꦠꦶꦫꦺꦴꦏꦫꦟꦨꦹꦠꦴ. ꦒꦺꦲꦱ꧀ꦱꦶꦠꦏꦡꦴꦠꦶ ꦏꦴꦩꦥꦛꦶꦱꦁꦪꦸꦠ꧀ꦠꦏꦡꦴ. ꦏꦩ꧀ꦩꦛ꧀ꦜꦴꦤꦨꦴꦮꦺꦠꦶ ꦄꦤꦶꦕ꧀ꦕꦠꦴꦥꦛꦶꦱꦁꦪꦸꦠ꧀ꦠꦕꦠꦸꦱꦕ꧀ꦕꦏꦩ꧀ꦩꦛ꧀ꦜꦴꦤꦨꦴꦮꦺ. ꦱꦲ ꦄꦠ꧀ꦡꦺꦤꦴꦠꦶ ꦱꦴꦠ꧀ꦡꦏꦁ, ꦲꦶꦠꦥꦛꦶꦱꦁꦪꦸꦠ꧀ꦠꦤ꧀ꦠꦶ ꦄꦠ꧀ꦡꦺꦴ. ꦮꦶꦱꦶꦑꦴꦠꦶ ꦓꦫꦱꦤ꧀ꦤꦶꦮꦺꦱꦺꦴ, ꦮꦶꦱꦶꦑꦴꦒꦲꦟꦺꦤ ꦕ ꦠꦤ꧀ꦤꦶꦮꦴꦱꦶꦤꦺꦴ ꦒꦲꦶꦠꦴ ‘‘ꦒꦴꦩꦺꦴ ꦄꦴꦒꦠꦺꦴ’’ꦠꦶꦄꦴꦢꦷꦱꦸ (ꦱꦴꦫꦠ꧀ꦡ. ꦛꦷ. ꧑.ꦄꦴꦕꦫꦶꦪꦥꦫꦩ꧀ꦥꦫꦏꦡꦴꦮꦟ꧀ꦟꦤꦴ) ꦮꦶꦪ. ꦠꦺꦤꦺꦮꦴꦲ ‘‘ꦱꦹꦫꦴ ꦱꦩꦠ꧀ꦡꦴ’’ꦠꦶ ‘‘ꦱꦢ꧀ꦣꦴ ꦥꦱꦤ꧀ꦤꦴ’’ꦠꦶ ꦕ. ꦏꦸꦩ꧀ꦨꦛ꧀ꦜꦴꦤꦥ꧀ꦥꦢꦺꦱꦺꦤ ꦏꦸꦩ꧀ꦨꦢꦴꦱꦶꦪꦺꦴ ꦮꦸꦠ꧀ꦠꦴꦠꦶ ꦄꦴꦲ ‘‘ꦏꦸꦩ꧀ꦨꦢꦴꦱꦶꦏꦡꦴ ꦮꦴ’’ꦠꦶ.

꧒꧒꧘. ꦮꦺꦴꦲꦴꦫꦺꦴ ꦮꦶꦪ ꦠꦺꦱꦁ ꦠꦡꦴ ꦮꦺꦴꦲꦴꦫꦩꦠ꧀ꦠꦁ ꦒꦲꦺꦠ꧀ꦮꦴ ꦮꦸꦠ꧀ꦠꦁ ‘‘ꦧ꧀ꦫꦲ꧀ꦩꦕꦫꦶꦪꦮꦴꦱꦺ’’ꦠꦶ. ꦄꦏꦠꦴꦠꦶ ꦱꦩꦺꦤ, ꦮꦶꦱꦩꦺꦤ ꦮꦴ ꦏꦺꦤꦕꦶ ꦲꦺꦠꦸꦤꦴ ꦤ ꦏꦠꦴ ꦤ ꦮꦶꦲꦶꦠꦴ. ꦏꦠꦮꦶꦣꦺꦴ ꦏꦫꦟꦮꦶꦣꦶ ꦤꦠ꧀ꦡꦶ ꦌꦠꦺꦱꦤ꧀ꦠꦶ ꦄꦏꦛꦮꦶꦣꦴ. ꦥꦢꦢ꧀ꦮꦪꦺꦤꦥꦶ ꦭꦺꦴꦏꦺ ꦏꦺꦤꦕꦶ ꦲꦺꦠꦸꦥꦕ꧀ꦕꦪꦺꦤ ꦤꦺꦱꦁ ꦄꦤꦶꦧ꧀ꦧꦠ꧀ꦠꦠꦁ ꦢꦱ꧀ꦱꦺꦠꦶ. ꦆꦢ꧀ꦣꦶꦪꦴꦥꦶ ꦤ ꦤꦶꦩ꧀ꦩꦶꦠꦴꦠꦶ ꦏꦱ꧀ꦱꦕꦶ ꦆꦢ꧀ꦣꦶꦩꦠꦺꦴ ꦕꦺꦠꦺꦴꦮꦱꦶꦥ꧀ꦥꦠ꧀ꦠꦱ꧀ꦱ ꦢꦺꦮꦱ꧀ꦱ, ꦆꦱ꧀ꦱꦫꦴꦢꦶꦤꦺꦴ ꦮꦴ ꦆꦢ꧀ꦣꦶꦪꦴꦥꦶ ꦤ ꦤꦶꦩ꧀ꦩꦶꦠꦴ. ꦄꦤꦶꦩ꧀ꦩꦴꦠꦴꦠꦶ ꦏꦱ꧀ꦱꦕꦶ ꦄꦤꦶꦩ꧀ꦩꦴꦥꦶꦠꦴ. ꦫꦹꦥꦴꦢꦶꦗꦤꦏꦨꦴꦮꦤ꧀ꦠꦶ ꦫꦹꦥꦱꦢ꧀ꦢꦴꦢꦷꦤꦁ ꦥꦕ꧀ꦕꦪꦨꦴꦮꦁ, ꦫꦹꦥꦴꦢꦪꦺꦴꦥꦶ ꦥꦡꦮꦶꦪꦴꦢꦷꦲꦶ ꦄꦥ꧀ꦥꦛꦶꦧꦢ꧀ꦣꦮꦸꦠ꧀ꦠꦶꦏꦴꦠꦶ ꦠꦱ꧀ꦱ ꦄꦣꦶꦥ꧀ꦥꦴꦪꦺꦴ. ꦪꦡꦴ ꦥꦧ꧀ꦧꦠꦏꦹꦛꦁ ꦏꦺꦤꦕꦶ ꦄꦤꦶꦧ꧀ꦧꦠ꧀ꦠꦶꦠꦁ ꦏꦱ꧀ꦱꦕꦶ ꦕ ꦄꦤꦶꦧ꧀ꦧꦠ꧀ꦠꦤꦏꦁ, ꦌꦮꦩꦺꦠꦺꦥꦷꦠꦶ ꦄꦴꦲ ‘‘ꦥꦧ꧀ꦧꦠꦏꦹꦛꦴ ꦮꦶꦪ ꦜꦶꦠꦴꦠꦶ ꦏꦹꦛꦛ꧀ꦜꦴ’’ꦠꦶ. ꦪꦩꦶꦢꦁ ꦧꦷꦗꦠꦺꦴ ꦄꦔ꧀ꦏꦸꦫꦴꦢꦶ ꦗꦴꦪꦠꦷꦠꦶ ꦮꦸꦕ꧀ꦕꦠꦶ, ꦠꦁ ꦮꦶꦗ꧀ꦗꦩꦴꦤꦩꦺꦮ ꦠꦠꦺꦴ ꦤꦶꦏ꧀ꦑꦩꦠꦶ ꦤꦴꦮꦶꦗ꧀ꦗꦩꦴꦤꦁ, ꦄꦚ꧀ꦚꦡꦴ ꦄꦚ꧀ꦚꦠꦺꦴꦥꦶ ꦄꦚ꧀ꦚꦱ꧀ꦱ ꦈꦥꦭꦢ꧀ꦣꦶ ꦱꦶꦪꦴꦠꦶ ꦄꦣꦶꦥ꧀ꦥꦴꦪꦺꦴ. ꦌꦮꦁ ꦜꦶꦠꦴꦠꦶ ꦌꦮꦁ ꦤꦶꦧ꧀ꦧꦶꦏꦴꦫꦴ ꦜꦶꦠꦴ. ꦈꦨꦪꦺꦤꦥꦷꦠꦶ ꦄꦠ꧀ꦡꦢ꧀ꦮꦪꦺꦤꦥꦷꦠꦶ ꦮꦢꦤ꧀ꦠꦶ. ‘‘ꦏꦹꦛꦛ꧀ꦜꦴ ꦌꦱꦶꦏꦛ꧀ꦜꦴꦪꦶꦛ꧀ꦜꦶꦠꦴ’’ꦠꦶ ꦥꦢꦢ꧀ꦮꦪꦺꦤꦥꦶ. ꦠꦺꦱꦁ ꦱꦠ꧀ꦠꦤ꧀ꦤꦁ ꦏꦴꦪꦴꦤꦁ. ꦜꦶꦠꦠ꧀ꦠꦴꦠꦶ ꦤꦶꦧ꧀ꦧꦶꦏꦴꦫꦴꦨꦴꦮꦺꦤ ꦜꦶꦠꦠ꧀ꦠꦴ. ꦤ ꦕꦭꦤ꧀ꦠꦷꦠꦶ ꦮꦶꦏꦴꦫꦁ ꦤꦴꦥꦗ꧀ꦗꦤ꧀ꦠꦶ. ꦮꦶꦏꦴꦫꦴꦨꦴꦮꦠꦺꦴ ꦲꦶ ꦠꦺꦱꦁ ꦱꦠ꧀ꦠꦤ꧀ꦤꦁ ꦏꦴꦪꦴꦤꦁ ꦌꦱꦶꦏꦛ꧀ꦜꦴꦪꦶꦛ꧀ꦜꦶꦠꦠꦴ. ꦄꦤꦶꦚ꧀ꦗꦤꦚ꧀ꦕ ꦄꦠ꧀ꦡꦠꦺꦴ ꦥꦏꦠꦶꦪꦴ ꦄꦮꦛ꧀ꦜꦴꦤꦩꦺꦮꦴꦠꦶ ꦢꦱ꧀ꦱꦺꦠꦸꦁ ‘‘ꦤ ꦮꦶꦥꦫꦶꦟꦴꦩꦺꦤ꧀ꦠꦷ’’ꦠꦶ ꦮꦸꦠ꧀ꦠꦁ. ꦠꦡꦴ ꦄꦮꦶꦥꦫꦶꦟꦴꦩꦣꦩ꧀ꦩꦠ꧀ꦠꦴ ꦌꦮ ꦠꦺ ꦄꦚ꧀ꦚꦩꦚ꧀ꦚꦁ ꦤ ꦧ꧀ꦪꦴꦧꦴꦣꦺꦤ꧀ꦠꦶ. ꦱꦠꦶ ꦲꦶ ꦮꦶꦏꦴꦫꦁ ꦄꦴꦥꦴꦢꦺꦠꦧ꧀ꦧꦠꦴꦪ ꦧ꧀ꦪꦴꦧꦴꦣꦏꦠꦴꦥꦶ ꦱꦶꦪꦴ, ꦠꦡꦴ ꦄꦤꦸꦒ꧀ꦒꦲꦺꦠꦧ꧀ꦧꦠꦴꦪ ꦄꦤꦸꦒ꧀ꦒꦴꦲꦏꦠꦴꦠꦶ ꦠꦢꦨꦴꦮꦁ ꦢꦱ꧀ꦱꦺꦠꦸꦁ ꦥꦴꦭ꦳ꦶꦪꦁ ‘‘ꦤꦴꦭ’’ꦤ꧀ꦠꦶꦄꦴꦢꦶ ꦮꦸꦠ꧀ꦠꦁ.

ꦥꦡꦮꦷ ꦌꦮ ꦏꦴꦪꦺꦏꦢꦺꦱꦠ꧀ꦠꦴ ꦥꦡꦮꦷꦏꦴꦪꦺꦴ. ꦲꦤ꧀ꦠꦸꦁ ꦮꦴ ꦓꦴꦠꦺꦠꦸꦁ ꦮꦴ ꦱꦩꦠ꧀ꦡꦺꦴ ꦤꦴꦩ ꦤꦠ꧀ꦡꦶ ꦗꦷꦮꦱꦠ꧀ꦠꦩꦴꦤꦁ ꦏꦴꦪꦴꦤꦁ ꦤꦶꦕ꧀ꦕꦠꦴꦪ ꦤꦶꦧ꧀ꦧꦶꦏꦴꦫꦨꦴꦮꦠꦺꦴ, ꦌꦠꦺꦤꦺꦮ ꦤꦺꦱꦩꦲꦤ꧀ꦠꦧ꧀ꦧꦠꦴ ꦄꦓꦴꦠꦺꦠꦧ꧀ꦧꦠꦴ ꦄꦠ꧀ꦡꦠꦺꦴ ꦮꦸꦠ꧀ꦠꦴꦪꦺꦮꦴꦠꦶ ꦢꦛ꧀ꦜꦧ꧀ꦧꦴ. ꦠꦡꦴ ꦲꦶ ꦮꦸꦠ꧀ꦠꦁ ‘‘ꦱꦠ꧀ꦠꦤ꧀ꦤꦁꦠ꧀ꦮꦺꦮ ꦏꦴꦪꦴꦤ’’ꦤ꧀ꦠꦶꦄꦴꦢꦶ. ꦱꦺꦴꦠꦸꦁ ꦮꦴ ꦱꦴꦮꦺꦠꦸꦁ ꦮꦴ ꦱꦩꦠ꧀ꦡꦺꦴ ꦤꦴꦩ ꦤꦠ꧀ꦡꦷꦠꦶ ꦥꦕ꧀ꦕꦺꦏꦁ ꦤꦺꦱꦁ ꦱꦮꦤꦺꦱꦸ ꦄꦱꦩꦠ꧀ꦡꦠ꧀ꦠꦴ ꦠꦢꦺꦏꦢꦺꦱꦴꦢꦷꦱꦸꦥꦶ ꦄꦱꦩꦠ꧀ꦡꦠꦁ ꦢꦷꦥꦺꦠꦶ. ꦪꦢꦶ ꦏꦺꦴꦕꦶ ꦲꦤ꧀ꦠꦴ ꦤꦠ꧀ꦡꦶ, ꦏꦡꦁ ꦱꦠ꧀ꦡꦥ꧀ꦥꦲꦴꦫꦺꦴꦠꦶ ꦄꦴꦲ ‘‘ꦪꦡꦴ ꦩꦸꦒ꧀ꦒꦫꦴꦱꦶꦄꦴꦢꦷꦱꦹ’’ꦠꦶꦄꦴꦢꦶ. ꦏꦺꦮꦭꦁ ꦱꦚ꧀ꦚꦴꦩꦠ꧀ꦠꦩꦺꦮ ꦲꦺꦴꦠꦶ, ꦲꦤꦤꦓꦴꦠꦤꦴꦢꦶ ꦥꦤ ꦥꦫꦩꦠ꧀ꦡꦠꦺꦴ ꦤꦠ꧀ꦡꦺꦮ ꦏꦴꦪꦴꦤꦁ ꦄꦮꦶꦏꦺꦴꦥꦤꦷꦪꦨꦴꦮꦠꦺꦴꦠꦶ ꦄꦣꦶꦥ꧀ꦥꦴꦪꦺꦴ. ꦏꦺꦮꦭꦁ ꦠꦏ꧀ꦏꦩꦠ꧀ꦠꦺꦤ ꦤꦶꦫꦠ꧀ꦡꦏꦁ ꦢꦶꦛ꧀ꦜꦶꦁ ꦢꦷꦥꦺꦠꦷꦠꦶ ꦌꦠꦺꦤ ꦪꦱ꧀ꦩꦴ ꦠꦏ꧀ꦏꦶꦏꦴ ꦤꦶꦫꦔ꧀ꦏꦸꦱꦠꦴꦪ ꦥꦫꦶꦏꦥ꧀ꦥꦤꦱ꧀ꦱ ꦪꦁ ꦏꦶꦚ꧀ꦕꦶ ꦄꦠ꧀ꦠꦤꦴ ꦥꦫꦶꦏꦥ꧀ꦥꦶꦠꦁ ꦱꦴꦫꦠꦺꦴ ꦩꦚ꧀ꦚꦩꦴꦤꦴ ꦠꦡꦺꦮ ꦄꦨꦶꦤꦶꦮꦶꦱ꧀ꦱ ꦠꦏ꧀ꦏꦢꦶꦛ꧀ꦜꦶꦒ꧀ꦒꦴꦲꦁ ꦒꦟ꧀ꦲꦤ꧀ꦠꦶ, ꦠꦱ꧀ꦩꦴ ꦤ ꦠꦺꦱꦁ ꦢꦶꦛ꧀ꦜꦶꦮꦠ꧀ꦡꦸꦱ꧀ꦩꦶꦁ ꦮꦶꦚ꧀ꦚꦹꦲꦶ ꦮꦶꦕꦴꦫꦟꦴ ꦏꦠ꧀ꦠꦧ꧀ꦧꦴꦠꦶ ꦢꦱ꧀ꦱꦺꦠꦶ. ꦏꦺꦕꦷꦠꦶ ꦱꦴꦫꦱꦩꦴꦱꦴꦕꦫꦶꦪꦴ. ꦥꦚ꧀ꦕꦶꦤ꧀ꦢ꧀ꦫꦶꦪꦮꦱꦺꦤꦴꦠꦶ ꦥꦚ꧀ꦕꦫꦹꦥꦶꦤ꧀ꦢ꧀ꦫꦶꦪꦮꦱꦺꦤ. ꦏꦩ꧀ꦩꦤ꧀ꦠꦶ ꦭꦢ꧀ꦣꦶ ꦏꦩ꧀ꦩꦨꦴꦮꦺꦤ ꦱꦸꦥꦴꦏꦛꦠ꧀ꦠꦴ. ꦄꦮꦔ꧀ꦏꦏꦡꦴꦠꦴꦫꦟꦴꦢꦶꦏꦴ ꦢ꧀ꦮꦴꦱꦛ꧀ꦜꦶ ꦥꦛꦶꦥꦢꦴ. ꦌꦏꦱ꧀ꦩꦶꦁ ꦏꦥ꧀ꦥꦺꦠꦶ ꦌꦏꦱ꧀ꦩꦶꦁ ꦩꦲꦴꦏꦥ꧀ꦥꦺ.

ꦥꦸꦫꦶꦱꦨꦹꦩꦶꦪꦺꦴꦠꦶ ꦥꦣꦴꦤꦥꦸꦒ꧀ꦒꦭꦺꦤ ꦤꦶꦢ꧀ꦢꦺꦱꦺꦴ, ꦆꦠ꧀ꦡꦷꦤꦩ꧀ꦥꦺꦠꦴ ꦨꦹꦩꦶꦪꦺꦴ ꦆꦕ꧀ꦖꦤ꧀ꦠꦺꦮ. ꦨꦶꦏ꧀ꦑꦸ ꦕ ꦥꦤ꧀ꦤꦏꦺꦴꦠꦶꦄꦴꦢꦶ ꦠꦺꦱꦁ ꦥꦴꦭ꦳ꦶꦪꦺꦮ. ꦠꦠ꧀ꦡ ꦥꦤ꧀ꦤꦏꦺꦴꦠꦶ ꦨꦶꦏ꧀ꦑꦴꦪ ꦮꦶꦕꦫꦟꦏꦺꦴꦠꦶ ꦮꦢꦤ꧀ꦠꦶ, ꦠꦺꦱꦁ ꦮꦴ ꦥꦛꦶꦥꦠ꧀ꦠꦶꦁ ꦥꦛꦶꦥꦤ꧀ꦤꦏꦺꦴ. ꦗꦶꦤꦺꦴꦠꦶ ꦗꦶꦟ꧀ꦟꦺꦴ, ꦗꦫꦴꦮꦱꦺꦤ ꦤꦶꦲꦷꦤꦣꦴꦠꦸꦏꦺꦴꦠꦶ ꦮꦢꦤ꧀ꦠꦶ, ꦄꦠ꧀ꦠꦤꦺꦴ ꦮꦴ ꦥꦛꦶꦥꦠ꧀ꦠꦶꦪꦴ ꦥꦛꦶꦥꦏ꧀ꦑꦁ ꦗꦶꦤꦶꦠ꧀ꦮꦴ ꦜꦶꦠꦺꦴ. ꦱꦺꦴ ꦏꦶꦫ ꦠꦡꦴꦨꦹꦠꦺꦴ ꦏꦱ꧀ꦱꦕꦶꦥꦶ ꦣꦩ꧀ꦩꦁ ꦤ ꦏꦡꦺꦠꦶ, ꦠꦺꦤꦴꦲ ‘‘ꦤ ꦏꦶꦚ꧀ꦕꦶ ꦄꦴꦲꦴ’’ꦠꦶ. ꦄꦭꦴꦨꦶꦤ꧀ꦠꦶ ‘‘ꦱꦺꦴ ꦤ ꦏꦸꦩ꧀ꦨꦶꦩꦸꦑꦴ ꦥꦛꦶꦒ꧀ꦒꦟ꧀ꦲꦠꦷ’’ꦠꦶꦄꦴꦢꦶꦤꦴ (ꦢꦷ. ꦤꦶ. ꧑.꧓꧙꧔) ꦤꦪꦺꦤ ꦮꦸꦠ꧀ꦠꦄꦭꦴꦨꦲꦺꦠꦸꦱꦩꦴꦪꦺꦴꦒꦺꦤ ꦄꦭꦴꦨꦶꦁ. ꦠꦠꦺꦴ ꦌꦮ ꦗꦶꦓꦕ꧀ꦖꦴꦢꦸꦧ꧀ꦧꦭꦥꦫꦺꦠꦠꦴꦪ ꦱꦪꦤꦥꦫꦴꦪꦟꦁ ꦱꦩꦟꦁ ꦥꦤ꧀ꦤꦨꦹꦩꦷꦠꦶ ꦮꦢꦠꦶ.

ꦄꦴꦗꦷꦮꦮꦸꦠ꧀ꦠꦶꦱꦠꦴꦤꦷꦠꦶ ꦱꦠ꧀ꦠꦴꦤꦁ ꦄꦴꦗꦷꦮꦨꦹꦠꦴꦤꦶ ꦗꦷꦮꦶꦏꦴꦮꦸꦠ꧀ꦠꦶꦱꦠꦴꦤꦶ. ꦥꦱꦸꦒ꧀ꦒꦲꦟꦺꦤ ꦌꦭ꦳ꦏꦗꦴꦠꦶ ꦒꦲꦶꦠꦴ, ꦩꦶꦒꦒ꧀ꦒꦲꦟꦺꦤ ꦫꦸꦫꦸꦒꦮꦪꦴꦢꦶꦱꦧ꧀ꦧꦩꦶꦒꦗꦴꦠꦶ. ꦧꦲꦹ ꦢꦺꦮꦴꦠꦶ ꦕꦴꦠꦸꦩꦲꦴꦫꦴꦗꦶꦏꦴꦢꦶꦧ꧀ꦫꦲ꧀ꦩꦏꦴꦪꦶꦏꦴꦢꦶꦮꦱꦺꦤ ꦤꦺꦱꦁ ꦄꦤ꧀ꦠꦫꦨꦺꦢꦮꦱꦺꦤ ꦧꦲꦹ ꦢꦺꦮꦴ. ꦠꦠ꧀ꦡ ꦕꦴꦠꦸꦩꦲꦴꦫꦴꦗꦶꦏꦴꦤꦁ ꦌꦏꦕ꧀ꦕꦺꦴ ꦄꦤ꧀ꦠꦫꦨꦺꦢꦺꦴ ‘‘ꦩꦲꦴꦱꦩꦪꦱꦸꦠ꧀ꦠꦺꦤ’’ (ꦢꦷ. ꦤꦶ. ꧒.꧓꧓꧑ ꦄꦴꦢꦪꦺꦴ) ꦢꦷꦥꦺꦠꦧ꧀ꦧꦺꦴ. ꦩꦴꦤꦸꦱꦴꦥꦶ ꦄꦤꦤ꧀ꦠꦴꦠꦶ ꦢꦷꦥꦢꦺꦱꦏꦸꦭꦮꦁꦱꦴꦗꦷꦮꦴꦢꦶꦮꦶꦨꦴꦒꦮꦱꦺꦤ ꦩꦴꦤꦸꦱꦴꦥꦶ ꦄꦤꦤ꧀ꦠꦨꦺꦢꦴ. ꦥꦶꦱꦴꦕꦴ ꦌꦮ ꦥꦺꦱꦴꦕꦴ, ꦠꦺ ꦄꦥꦫꦥꦺꦠꦴꦢꦪꦺꦴ ꦩꦲꦤ꧀ꦠꦴ ꦮꦺꦢꦶꦠꦧ꧀ꦧꦴ.

ꦖꦢ꧀ꦢꦤ꧀ꦠꦢꦲꦩꦤ꧀ꦢꦴꦏꦶꦤꦶꦪꦺꦴ ꦏꦸꦭ꦳ꦷꦫꦩꦸꦕꦭꦶꦤ꧀ꦢꦤꦴꦩꦺꦤ ꦮꦢꦠꦶ. ꦒꦟ꧀ꦜꦶꦏꦴꦠꦶ ꦥꦧ꧀ꦧꦒꦟ꧀ꦜꦶꦏꦴ. ꦥꦟ꧀ꦝꦶꦠꦺꦴꦥꦶ…ꦥꦺ… ꦈꦢ꧀ꦣꦁ ꦤ ꦒꦕ꧀ꦖꦠꦶ, ꦏꦱ꧀ꦩꦴ? ꦱꦠ꧀ꦠꦴꦤꦁ ꦱꦁꦱꦫꦟꦏꦴꦭꦱ꧀ꦱ ꦤꦶꦪꦠꦨꦴꦮꦠꦺꦴ.

ꦄꦥꦫꦶꦥꦏ꧀ꦏꦁ ꦱꦁꦱꦫꦟꦤꦶꦩꦶꦠ꧀ꦠꦁ ꦱꦷꦭꦴꦢꦶꦤꦴ ꦥꦫꦶꦥꦴꦕꦺꦠꦶ ꦤꦴꦩ ꦱꦷꦓꦁꦪꦺꦮ ꦮꦶꦱꦸꦢ꧀ꦣꦶꦥ꧀ꦥꦠ꧀ꦠꦶꦪꦴ. ꦥꦫꦶꦥꦏ꧀ꦏꦁ ꦦꦸꦱ꧀ꦱ ꦦꦸꦱ꧀ꦱ ꦥꦠ꧀ꦮꦴ ꦥꦠ꧀ꦮꦴ ꦥꦫꦶꦥꦏ꧀ꦏꦨꦴꦮꦴꦥꦴꦢꦤꦺꦤ ꦧ꧀ꦪꦤ꧀ꦠꦶꦁ ꦏꦫꦺꦴꦠꦶ ꦤꦴꦩ. ꦱꦸꦠ꧀ꦠꦒꦸꦭ꦳ꦺꦠꦶ ꦱꦸꦠ꧀ꦠꦮꦛ꧀ꦛꦶꦪꦁ. ꦤꦶꦧ꧀ꦧꦺꦜꦶꦪꦩꦴꦤꦩꦺꦮ ꦥꦭꦺꦠꦷꦠꦶ ꦈꦥꦩꦴꦪ ꦱꦠ꧀ꦠꦴꦤꦁ ꦱꦁꦱꦴꦫꦺꦴ ꦄꦤꦸꦏ꧀ꦏꦩꦺꦤ ꦑꦷꦪꦠꦺꦮ, ꦤ ꦠꦱ꧀ꦱ ꦮꦢ꧀ꦣꦷꦠꦶ ꦢꦱ꧀ꦱꦺꦠꦶ ꦥꦫꦶꦕ꧀ꦖꦶꦤ꧀ꦤꦫꦹꦥꦠ꧀ꦠꦴ.

꧒꧒꧙. ꦤꦶꦪꦠꦶꦮꦴꦢꦺ ꦥꦏ꧀ꦑꦶꦥꦤ꧀ꦠꦺꦴꦠꦶ ꦱꦧ꧀ꦧꦚ꧀ꦚꦸꦠꦁ ꦥꦛꦶꦗꦴꦤꦶꦠ꧀ꦮꦴꦥꦶ ꦥꦢꦺꦱꦚ꧀ꦚꦸꦠꦴꦪ ꦄꦱꦩ꧀ꦥꦴꦪꦩꦴꦤꦺꦴ ꦠꦠ꧀ꦡ ꦄꦠ꧀ꦠꦤꦺꦴ ꦄꦚ꧀ꦚꦴꦟꦏꦶꦫꦶꦪꦁ ꦥꦫꦶꦲꦫꦶꦠꦸꦁ ꦄꦱꦏ꧀ꦏꦺꦴꦤ꧀ꦠꦺꦴ ꦕ ‘‘ꦌꦮꦩꦺꦱꦴ ꦤꦶꦪꦠꦷ’’ꦠꦶ ꦤꦶꦪꦠꦶꦮꦴꦢꦺ ꦥꦏ꧀ꦑꦶꦥꦤ꧀ꦠꦺꦴ.

꧒꧓꧐. ꦣꦩ꧀ꦩꦏꦡꦴꦪ ꦄꦥꦱ꧀ꦱꦪꦨꦹꦠꦺꦴ ꦄꦤꦸꦱ꧀ꦱꦮꦺꦴ ꦌꦠꦱ꧀ꦱ ꦄꦠ꧀ꦡꦷꦠꦶ ꦄꦤꦸꦱ꧀ꦱꦮꦷ, ꦠꦺꦤꦺꦮꦱ꧀ꦱ ꦄꦥꦱ꧀ꦱꦪꦮꦴꦢꦁ ꦢꦱ꧀ꦱꦺꦠꦸꦁ ‘‘ꦄꦤꦸꦱ꧀ꦱꦮꦤꦶꦱ꧀ꦱꦶꦠꦺꦴ’’ꦠꦶ ꦄꦴꦲ. ꦱꦮꦤꦁ ꦱꦕ꧀ꦕꦠꦺꦴꦠꦶ ꦪꦁ ꦏꦶꦚ꧀ꦕꦶ ꦄꦤꦸꦱ꧀ꦱꦮꦁ, ꦠꦁ ꦱꦮꦤꦁ ꦱꦕ꧀ꦕꦤ꧀ꦠꦶ ꦒꦲꦺꦠ꧀ꦮꦴ ꦜꦶꦠꦺꦴ. ꦥꦶꦛꦏꦱꦩ꧀ꦥꦢꦴꦪꦴꦠꦶ ꦒꦤ꧀ꦡꦱꦩ꧀ꦥꦴꦢꦤꦺꦤ, ꦠꦴꦢꦶꦱꦁ ꦒꦤ꧀ꦡꦁ ꦥꦒꦸꦟꦁ ꦮꦴꦕꦸꦒ꧀ꦒꦠꦁ ꦏꦠ꧀ꦮꦴ ꦠꦁ ꦤꦶꦱ꧀ꦱꦴꦪ ꦣꦩ꧀ꦩꦁ ꦏꦡꦺꦠꦶ. ꦠꦺꦤꦴꦲ ‘‘ꦮꦒ꧀ꦒꦥꦟ꧀ꦟꦴꦱꦏꦴꦪꦴ’’ꦠꦶꦄꦴꦢꦶ.

꧒꧓꧒. ꦩꦤ꧀ꦢꦥꦚ꧀ꦚꦺꦴꦠꦶ ꦥꦫꦶꦠ꧀ꦠꦥꦚ꧀ꦚꦺꦴ. ꦩꦺꦴꦩꦹꦲꦺꦴꦠꦶ ꦱꦩ꧀ꦩꦸꦪ꧀ꦲꦏꦺꦴ. ‘‘ꦌꦮꦤ꧀ꦠꦶꦥꦶ ꦩꦺ ꦤꦺꦴ’’ꦠꦶꦄꦴꦢꦶꦤꦴ ꦮꦶꦮꦶꦣꦺꦴ ꦤꦴꦤꦥ꧀ꦥꦏꦴꦫꦺꦴ ꦑꦺꦥꦺꦴ ꦮꦴꦕꦴꦪ ꦥꦫꦮꦴꦢꦴꦤꦁ ꦑꦷꦥꦤꦁ ꦮꦴꦕꦴꦮꦶꦏ꧀ꦑꦺꦥꦺꦴ, ꦠꦁ ꦮꦴꦕꦴꦮꦶꦏ꧀ꦑꦺꦥꦁ, ꦤ ꦩꦫꦠꦶ ꦤ ꦥꦕ꧀ꦖꦶꦗ꧀ꦗꦠꦶ ꦪꦡꦴꦮꦸꦠ꧀ꦠꦺꦴ ꦮꦴꦢꦮꦶꦏ꧀ꦑꦺꦥꦺꦴ ꦌꦠꦴꦪꦴꦠꦶ ꦄꦩꦫꦴ, ꦠꦠ꧀ꦡ ꦥꦮꦠ꧀ꦠꦴ ꦢꦶꦛ꧀ꦜꦶ ꦄꦩꦫꦴꦮꦶꦏ꧀ꦑꦺꦥꦺꦴ, ꦠꦁ ꦄꦩꦫꦴꦮꦶꦏ꧀ꦑꦺꦥꦁ. ꦄꦥꦫꦶꦪꦤ꧀ꦠꦮꦶꦏ꧀ꦑꦺꦥꦤ꧀ꦠꦶ ‘‘ꦌꦮꦩ꧀ꦥꦶ ꦩꦺ ꦤꦺꦴ’’ꦠꦶꦄꦴꦢꦶꦤꦴ ꦥꦸꦕ꧀ꦖꦶꦠꦱ꧀ꦱ ꦄꦥꦫꦶꦪꦺꦴꦱꦴꦥꦤꦮꦱꦺꦤ ꦮꦶꦏ꧀ꦑꦺꦥꦁ. ꦆꦠꦺꦴ ꦕꦶꦠꦺꦴ ꦕ ꦱꦤ꧀ꦣꦴꦮꦠꦶ ꦌꦏꦱ꧀ꦩꦶꦁ ꦱꦨꦴꦮꦺ ꦄꦤꦮꦛ꧀ꦜꦴꦤꦠꦺꦴ. ꦒꦴꦲꦁ ꦤ ꦈꦥꦒꦕ꧀ꦖꦠꦷꦠꦶ ꦩꦶꦕ꧀ꦖꦴꦒꦴꦲꦠꦴꦪ ꦈꦠ꧀ꦠꦫꦮꦶꦣꦴꦤꦴꦪ ꦥꦸꦫꦶꦩꦥꦏ꧀ꦑꦁ ꦜꦥꦺꦠ꧀ꦮꦴ ꦒꦴꦲꦁ ꦤ ꦈꦥꦒꦕ꧀ꦖꦠꦶ. ꦄꦩꦫꦴꦱꦢꦶꦱꦴꦪ ꦄꦩꦫꦴꦪ ꦮꦶꦏ꧀ꦑꦺꦥꦺꦴꦠꦶ ꦄꦩꦫꦴꦮꦶꦏ꧀ꦑꦺꦥꦺꦴ.

ꦆꦢꦁ ꦏꦸꦱꦭꦤ꧀ꦠꦶ ꦌꦠ꧀ꦡ ꦆꦠꦶ-ꦱꦢ꧀ꦢꦺꦴ ꦥꦏꦴꦫꦠ꧀ꦡꦺꦴ, ꦆꦩꦶꦤꦴ ꦥꦏꦴꦫꦺꦤꦴꦠꦶ ꦄꦠ꧀ꦡꦺꦴ. ꦄꦩꦫꦴꦮꦶꦏ꧀ꦑꦺꦥꦶꦏꦺꦴ ꦪꦡꦴ ꦏꦸꦱꦭꦺ, ꦌꦮꦁ ꦄꦚ꧀ꦚꦱ꧀ꦩꦶꦁ ꦪꦁ ꦏꦶꦚ꧀ꦕꦶ ꦏꦺꦤꦕꦶ ꦥꦸꦕ꧀ꦖꦶꦠꦁ ꦄꦠ꧀ꦡꦁ ꦄꦠ꧀ꦠꦤꦺꦴ ꦄꦫꦸꦕ꧀ꦕꦤꦠꦴꦪ ‘‘ꦌꦮꦤ꧀ꦠꦶꦥꦶ ꦩꦺ ꦤꦺꦴ’’ꦠꦶꦄꦴꦢꦶꦤꦴ ꦠꦠ꧀ꦡ ꦠꦠ꧀ꦡ ꦮꦶꦏ꧀ꦑꦺꦥꦚ꧀ꦚꦺꦮ ꦄꦴꦥꦗ꧀ꦗꦠꦶ, ꦠꦱ꧀ꦩꦴ ‘‘ꦌꦮꦤ꧀ꦠꦶꦥꦶ ꦩꦺ ꦤꦺꦴ’’ꦠꦶꦄꦴꦢꦶ ꦠꦠ꧀ꦡ ꦠꦠ꧀ꦡ ꦥꦸꦕ꧀ꦖꦶꦠꦴꦏꦴꦫꦥꦛꦶꦱꦺꦣꦤꦮꦱꦺꦤ ꦮꦶꦏ꧀ꦑꦶꦥꦤꦴꦏꦴꦫꦢꦱ꧀ꦱꦤꦁ. ꦤꦤꦸ ꦕꦺꦠ꧀ꦡ ꦮꦶꦏ꧀ꦑꦺꦥꦮꦴꦢꦶꦤꦺꦴ ꦮꦶꦏ꧀ꦑꦺꦥꦥꦏ꧀ꦑꦱ꧀ꦱ ꦄꦤꦤꦸꦗꦴꦤꦤꦁ ꦮꦶꦏ꧀ꦑꦺꦥꦥꦏ꧀ꦑꦺ ꦄꦮꦛ꧀ꦜꦴꦤꦁ ꦪꦸꦠ꧀ꦠꦤ꧀ꦠꦶ? ꦤ, ꦠꦠ꧀ꦡꦴꦥꦶ ꦠꦱ꧀ꦱ ꦱꦩ꧀ꦩꦹꦭ꦳꧀ꦲꦱ꧀ꦱ ꦥꦛꦶꦏ꧀ꦑꦺꦥꦮꦱꦺꦤꦺꦮ ꦮꦶꦏ꧀ꦑꦺꦥꦮꦴꦢꦱ꧀ꦱ ꦥꦮꦠ꧀ꦠꦤꦠꦺꦴ. ꦠꦺꦤ ꦮꦸꦠ꧀ꦠꦁ ‘‘ꦤꦺꦴ’’ꦠꦶ. ꦠꦡꦴ ꦲꦶ ꦱꦚ꧀ꦕꦪꦺꦴ ꦧꦺꦭꦛ꧀ꦜꦥꦸꦠ꧀ꦠꦺꦴ ꦫꦚ꧀ꦚꦴ ꦄꦗꦴꦠꦱꦠ꧀ꦠꦸꦤꦴ ꦱꦤ꧀ꦢꦶꦛ꧀ꦜꦶꦏꦁ ꦱꦴꦩꦚ꧀ꦚꦦꦭꦁ ꦥꦸꦛ꧀ꦜꦺꦴ ꦥꦫꦭꦺꦴꦏꦠ꧀ꦠꦶꦏꦴꦢꦷꦤꦁ ꦥꦛꦶꦱꦺꦣꦤꦩꦸꦑꦺꦤ ꦮꦶꦏ꧀ꦑꦺꦥꦁ ꦧ꧀ꦪꦴꦏꦴꦱꦶ.

ꦌꦠ꧀ꦡꦴꦲ – ‘‘ꦤꦤꦸ ꦕꦴꦪꦁ ꦱꦧ꧀ꦧꦺꦴꦥꦶ ꦄꦩꦫꦴꦮꦶꦏ꧀ꦑꦺꦥꦶꦏꦺꦴ ꦏꦸꦱꦭꦴꦢꦪꦺꦴ ꦣꦩ꧀ꦩꦺ ꦥꦫꦭꦺꦴꦏꦠ꧀ꦠꦶꦏꦴꦢꦷꦤꦶ ꦕ ꦪꦡꦴꦨꦹꦠꦁ ꦄꦤꦮꦧꦸꦗ꧀ꦙꦩꦴꦤꦺꦴ ꦠꦠ꧀ꦡ ꦠꦠ꧀ꦡ ꦥꦚ꧀ꦲꦁ ꦥꦸꦛ꧀ꦜꦺꦴ ꦱꦩꦴꦤꦺꦴ ꦥꦸꦕ꧀ꦖꦴꦪ ꦮꦶꦏ꧀ꦑꦺꦥꦩꦠ꧀ꦠꦁ ꦄꦴꦥꦗ꧀ꦗꦠꦶ, ꦠꦱ꧀ꦱ ꦏꦡꦁ ꦢꦶꦛ꧀ꦜꦶꦒꦠꦨꦴꦮꦺꦴ. ꦤ ꦲꦶ ꦄꦮꦠ꧀ꦠꦸꦏꦴꦩꦱ꧀ꦱ ꦮꦶꦪ ꦥꦸꦕ꧀ꦖꦶꦠꦩꦠ꧀ꦡꦁ ꦄꦗꦴꦤꦤ꧀ꦠꦱ꧀ꦱ ꦮꦶꦏ꧀ꦑꦺꦥꦏꦫꦟꦩꦠ꧀ꦠꦺꦤ ꦠꦱ꧀ꦱ ꦢꦶꦛ꧀ꦜꦶꦒꦠꦶꦏꦠꦴ ꦪꦸꦠ꧀ꦠꦴ’’ꦠꦶ? ꦮꦸꦕ꧀ꦕꦠꦺ – ꦤ ꦲꦺꦮ ꦑꦺꦴ ꦥꦸꦕ꧀ꦖꦴꦪ ꦮꦶꦏ꧀ꦑꦺꦥꦏꦫꦟꦩꦠ꧀ꦠꦺꦤ ꦠꦱ꧀ꦱ ꦢꦶꦛ꧀ꦜꦶꦒꦠꦶꦏꦠꦴ, ꦄꦡ ꦑꦺꦴ ꦩꦶꦕ꧀ꦖꦴꦨꦶꦤꦶꦮꦺꦱꦮꦱꦺꦤ. ꦱꦱ꧀ꦱꦠꦴꦨꦶꦤꦶꦮꦺꦱꦺꦤ ꦩꦶꦕ꧀ꦖꦴꦨꦶꦤꦶꦮꦶꦛ꧀ꦜꦺꦴꦪꦺꦮ ꦲꦶ ꦥꦸꦒ꧀ꦒꦭꦺꦴ ꦩꦤ꧀ꦢꦧꦸꦢ꧀ꦣꦶꦠꦴꦪ ꦏꦸꦱꦭꦴꦢꦶꦣꦩ꧀ꦩꦺ ꦥꦫꦭꦺꦴꦏꦠ꧀ꦠꦶꦏꦴꦢꦷꦤꦶ ꦕ ꦪꦴꦡꦴꦮꦠꦺꦴ ꦄꦥ꧀ꦥꦛꦶꦥꦗ꧀ꦗꦩꦴꦤꦺꦴ ꦄꦠ꧀ꦠꦤꦴ ꦄꦮꦶꦚ꧀ꦚꦴꦠꦱ꧀ꦱ ꦄꦠ꧀ꦡꦱ꧀ꦱ ꦥꦫꦁ ꦮꦶꦚ꧀ꦚꦴꦥꦺꦠꦸꦁ ꦄꦱꦏ꧀ꦏꦸꦟꦺꦪ꧀ꦪꦠꦴꦪ ꦩꦸꦱꦴꦮꦴꦢꦨꦪꦺꦤ ꦕ ꦮꦶꦏ꧀ꦑꦺꦥꦁ ꦄꦴꦥꦗ꧀ꦗꦠꦷꦠꦶ. ꦄꦡ ꦮꦴ ꦥꦸꦚ꧀ꦚꦥꦴꦥꦴꦤꦁ ꦠꦧ꧀ꦧꦶꦥꦴꦏꦴꦤꦚ꧀ꦕ ꦄꦤꦮꦧꦺꦴꦣꦺꦤ ꦄꦱꦢ꧀ꦢꦲꦤꦺꦤ ꦕ ꦠꦧ꧀ꦧꦶꦱꦪꦴꦪ ꦥꦸꦕ꧀ꦖꦴꦪ ꦮꦶꦏ꧀ꦑꦺꦥꦏꦫꦟꦁꦪꦺꦮ ꦱꦸꦤ꧀ꦢꦫꦤ꧀ꦠꦶ ꦑꦤ꧀ꦠꦶꦁ ꦫꦸꦕꦶꦁ ꦈꦥ꧀ꦥꦴꦢꦺꦠ꧀ꦮꦴ ꦄꦨꦶꦤꦶꦮꦶꦱꦤ꧀ꦠꦱ꧀ꦱ ꦈꦥ꧀ꦥꦤ꧀ꦤꦴ ꦮꦶꦱꦸꦁꦪꦺꦮ ꦱꦴ ꦌꦏꦴ ꦢꦶꦛ꧀ꦜꦶ ꦱꦠ꧀ꦠꦨꦔ꧀ꦒꦢꦶꦛ꧀ꦜꦶ ꦮꦶꦪꦴꦠꦶ ꦢꦛ꧀ꦜꦧ꧀ꦧꦴ, ꦆꦤ꧀ꦢ꧀ꦫꦶꦪꦧꦢ꧀ꦣꦠꦺꦴ ꦕ ꦠꦠꦶꦪꦛ꧀ꦜꦴꦤꦨꦴꦮꦺ ꦢꦱ꧀ꦱꦶꦠꦺꦴ.

꧒꧓꧔. ꦱꦤ꧀ꦤꦶꦣꦶꦏꦴꦫꦏꦁ ꦏꦴꦩꦺꦠꦶ ꦌꦠ꧀ꦡ ꦄꦤꦶꦤ꧀ꦢ꧀ꦫꦶꦪꦧꦢ꧀ꦣꦴꦤꦶ ꦄꦣꦶꦥ꧀ꦥꦺꦠꦴꦤꦷꦠꦶ ꦠꦶꦭꦠꦟ꧀ꦝꦸꦭꦴꦢꦶꦒ꧀ꦒꦲꦟꦁ, ꦠꦱ꧀ꦱ ꦭꦺꦴꦏꦱ꧀ꦱ ꦄꦥ꧀ꦥꦱꦴꦢꦥꦫꦶꦲꦴꦫꦠ꧀ꦡꦁ ꦏꦢꦴꦕꦶ ꦠꦟ꧀ꦝꦸꦭꦤꦴꦭ꦳ꦶꦄꦴꦢꦶꦱꦔ꧀ꦒꦲꦟꦏꦫꦟꦁ ꦱꦤ꧀ꦣꦴꦪ ꦮꦸꦠ꧀ꦠꦁ ‘‘ꦠꦶꦭꦠꦟ꧀ꦝꦸꦭꦴꦢꦪꦺꦴ ꦥꦚ꧀ꦚꦴꦪꦤ꧀ꦠꦷ’’ꦠꦶ.

꧒꧓꧖. ꦄꦴꦗꦷꦮꦏꦴ ꦩꦠꦴ ꦤꦴꦩꦴꦠꦶ ꦆꦩꦺ ꦄꦴꦗꦷꦮꦏꦴ ꦱꦧ꧀ꦧꦱꦺꦴ ꦱꦩ꧀ꦩꦴꦥꦛꦶꦥꦠ꧀ꦠꦶꦫꦲꦶꦠꦴ ꦩꦶꦕ꧀ꦖꦴ ꦌꦮ ꦕ ꦥꦛꦶꦥꦗ꧀ꦗꦩꦴꦤꦴ ꦄꦣꦶꦱꦷꦭꦱꦔ꧀ꦑꦴꦠꦱ꧀ꦱ ꦱꦷꦭꦗꦷꦮꦶꦠꦱ꧀ꦱ ꦄꦨꦴꦮꦺꦤ ꦩꦠꦴ ꦤꦴꦩ. ꦥꦸꦠ꧀ꦠꦩꦠꦴꦠꦶ ꦩꦠꦥꦸꦠ꧀ꦠꦴ. ꦱꦩꦟꦺ ꦒꦺꦴꦠꦩꦺ ꦧ꧀ꦫꦲ꧀ꦩꦕꦫꦶꦪꦮꦴꦱꦺꦴ ꦄꦠ꧀ꦡꦷꦠꦶ ꦱꦩꦟꦁ ꦌꦮ ꦒꦺꦴꦠꦩꦁ ꦥꦫꦶꦱꦸꦢ꧀ꦣꦺꦴ ꦱꦸꦥꦫꦶꦥꦸꦟ꧀ꦟꦺꦴ ꦠꦏ꧀ꦏꦫꦱ꧀ꦱ ꦱꦩ꧀ꦩꦴ ꦢꦸꦏ꧀ꦑꦏ꧀ꦑꦪꦴꦮꦲꦺꦴ ꦧ꧀ꦫꦲ꧀ꦩꦕꦫꦶꦪꦮꦴꦱꦺꦴ ꦄꦠ꧀ꦡꦶ. ꦌꦠꦺꦤꦺꦠ꧀ꦡ ꦣꦩ꧀ꦩꦱꦸꦣꦩ꧀ꦩꦠꦴꦢꦶꦢꦷꦥꦤꦺꦤ ꦧꦸꦢ꧀ꦣꦱꦸꦧꦸꦢ꧀ꦣꦠꦚ꧀ꦕ ꦢꦷꦥꦺꦠꦶ, ꦄꦚ꧀ꦚꦠ꧀ꦡ ꦤꦠ꧀ꦡꦷꦠꦶ ꦆꦩꦶꦤꦴ ꦧꦴꦲꦶꦫꦏꦺꦱꦸ ꦠꦱ꧀ꦱ ꦄꦨꦴꦮꦁ. ꦱꦺꦱꦁ ꦱꦸꦮꦶꦚ꧀ꦚꦺꦪ꧀ꦪꦩꦺꦮ.

ꦱꦤ꧀ꦢꦏꦱꦸꦠ꧀ꦠꦮꦟ꧀ꦟꦤꦴꦪ ꦭꦷꦤꦠ꧀ꦡꦥ꧀ꦥꦏꦴꦱꦤꦴ ꦱꦩꦠ꧀ꦠꦴ.