꧙. ꦒꦺꦴꦭꦶꦪꦴꦤꦶꦱꦸꦠ꧀ꦠꦮꦟ꧀ꦟꦤꦴ

꧑꧗꧓. ꦥꦢꦱꦩꦴꦕꦴꦫꦺꦴꦠꦶ ꦠꦁꦠꦁꦥꦕ꧀ꦕꦪꦨꦺꦢꦢꦱ꧀ꦱꦤꦴꦪ ꦮꦶꦒꦠꦠ꧀ꦠꦴ ꦥꦏꦴꦫꦺꦲꦶ ꦢꦭꦶꦢ꧀ꦢꦱꦩꦴꦕꦴꦫꦺꦴ ꦱꦶꦡꦶꦭꦱꦩꦴꦕꦴꦫꦺꦴꦠꦶ ꦄꦠ꧀ꦡꦺꦴ. ꦪꦱ꧀ꦩꦴ ꦥꦤ ꦠꦴꦢꦶꦱꦺꦴ ꦱꦩꦴꦕꦴꦫꦺꦴ ꦡꦶꦫꦺꦴ ꦢꦭ꦳꧀ꦲꦺꦴ ꦤꦴꦩ ꦤ ꦲꦺꦴꦠꦶ, ꦠꦱ꧀ꦩꦴ ꦮꦸꦠ꧀ꦠꦁ ‘‘ꦢꦸꦧ꧀ꦧꦭꦱꦩꦴꦕꦴꦫꦺꦴ’’ꦠꦶ. ‘‘ꦱꦴꦑꦱꦩꦴꦕꦴꦫꦺꦴ’’ꦠꦶ ꦮꦴ ꦥꦴꦜꦺꦴ, ꦠꦠ꧀ꦡ ꦠꦠ꧀ꦡ ꦭꦒ꧀ꦒꦤꦛ꧀ꦜꦺꦤ ꦱꦴꦑꦴꦱꦢꦶꦱꦱꦷꦭꦺꦴꦠꦶ ꦄꦠ꧀ꦡꦺꦴ. ꦠꦺꦤꦴꦲ ‘‘ꦎꦭ꦳ꦴꦫꦶꦏꦴꦕꦴꦫꦺꦴ’’ꦠꦶ. ꦥꦕ꧀ꦕꦪꦺꦱꦸ ꦱꦴꦥꦺꦏ꧀ꦑꦺꦴꦠꦶ ꦥꦕ꧀ꦕꦪꦺꦱꦸ ꦱꦴꦥꦺꦏ꧀ꦑꦠꦴꦪ ꦌꦮ ꦲꦶꦱ꧀ꦱ ꦎꦭ꦳ꦴꦫꦶꦏꦴꦕꦴꦫꦠꦴ ꦮꦺꦢꦶꦠꦧ꧀ꦧꦴ. ꦒꦫꦸꦤꦴ ꦏꦶꦱ꧀ꦩꦶꦚ꧀ꦕꦶ ꦮꦸꦠ꧀ꦠꦺ ꦒꦴꦫꦮꦮꦱꦺꦤ ꦥꦠꦶꦱ꧀ꦱꦮꦤꦁ ꦥꦠꦶꦱ꧀ꦱꦺꦴ, ꦥꦠꦶꦱ꧀ꦱꦮꦕꦤꦨꦹꦠꦁ ꦠꦁꦱꦨꦴꦒꦚ꧀ꦕ ꦪꦁ ꦏꦶꦚ꧀ꦕꦶ ꦒꦴꦫꦮꦤ꧀ꦠꦶ ꦄꦠ꧀ꦡꦺꦴ. ꦱꦲ ꦥꦠꦶꦱ꧀ꦱꦺꦤꦴꦠꦶ ꦱꦥ꧀ꦥꦠꦶꦱ꧀ꦱꦺꦤ, ꦱꦥ꧀ꦥꦠꦶꦱ꧀ꦱꦮꦺꦤ ꦎꦮꦴꦢꦱꦩ꧀ꦥꦛꦶꦕ꧀ꦖꦤꦺꦤ. ꦥꦠꦶꦱ꧀ꦱꦷꦪꦠꦷꦠꦶ ꦮꦴ ꦥꦠꦶꦱ꧀ꦱꦺꦴ, ꦒꦫꦸꦏꦴꦠꦧ꧀ꦧꦺꦴ, ꦠꦺꦤ ꦱꦲ ꦥꦠꦶꦱ꧀ꦱꦺꦤꦴꦠꦶ ꦱꦧ꧀ꦧꦁ ꦥꦸꦧ꧀ꦧꦺ ꦮꦶꦪ. ꦠꦺꦤꦴꦲ ‘‘ꦱꦗꦺꦛ꧀ꦜꦏꦺꦤꦴ’’ꦠꦶ. ꦱꦺꦫꦶꦮꦶꦲꦴꦫꦺꦴ ꦤꦴꦩ ꦄꦠ꧀ꦠꦥ꧀ꦥꦣꦴꦤꦮꦴꦱꦺꦴ. ꦠꦺꦤꦴꦲ ‘‘ꦤꦶꦫꦔ꧀ꦏꦸꦱꦮꦶꦲꦴꦫꦺꦤꦴ’’ꦠꦶ.

ꦄꦤꦸꦥꦑꦗ꧀ꦗꦴꦠꦶ ꦄꦤꦸꦥꦏꦝ꧀ꦞꦶꦠ꧀ꦮꦴ. ꦒꦫꦸꦛ꧀ꦜꦴꦤꦶꦪꦴꦤꦁ ꦄꦤ꧀ꦠꦫꦁ ꦄꦤꦴꦥꦸꦕ꧀ꦖꦴ ꦄꦤꦸꦥꦮꦶꦱꦶꦠ꧀ꦮꦴꦠꦶ ꦆꦩꦩꦠ꧀ꦡꦁ ꦢꦱ꧀ꦱꦺꦠꦸꦁ ‘‘ꦠꦠ꧀ꦡ ꦪꦺꦴ’’ꦠꦶꦄꦴꦢꦶ ꦮꦸꦠ꧀ꦠꦁ.

ꦄꦴꦨꦶꦱꦩꦴꦕꦴꦫꦶꦏꦤ꧀ꦠꦶ ꦄꦨꦶꦱꦩꦴꦕꦴꦫꦺ ꦨꦮꦁ. ꦏꦶꦁ ꦥꦤ ꦠꦤ꧀ꦠꦶ ꦄꦴꦲ ‘‘ꦮꦠ꧀ꦠꦥꦛꦶꦥꦠ꧀ꦠꦶꦩꦠ꧀ꦠꦩ꧀ꦥꦷ’’ꦠꦶ. ꦤꦴꦠꦶꦏꦴꦭꦱ꧀ꦱꦺꦮ ꦱꦔ꧀ꦓꦱ꧀ꦱ ꦥꦸꦫꦠꦺꦴ ꦥꦮꦶꦱꦶꦠꦧ꧀ꦧꦁ, ꦤ ꦥꦕ꧀ꦖꦴ ꦥꦛꦶꦏ꧀ꦏꦩꦶꦠꦧ꧀ꦧꦤ꧀ꦠꦶ ꦄꦣꦶꦥ꧀ꦥꦴꦪꦺꦤ ꦄꦠꦶꦏꦴꦭꦺ ꦕ ꦒꦴꦩꦥ꧀ꦥꦮꦺꦱꦺꦴ ꦄꦠꦶꦢꦶꦮꦴ ꦥꦛꦶꦏ꧀ꦏꦩꦤꦚ꧀ꦕ ꦤꦶꦮꦴꦫꦶꦠꦁ, ꦠꦁ ꦢꦱ꧀ꦱꦺꦠꦸꦁ ‘‘ꦤ ꦄꦠꦶꦥꦴꦠꦺꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦈꦢ꧀ꦣꦕ꧀ꦕꦥꦏꦠꦶꦏꦺꦴꦠꦶ ꦮꦶꦧ꧀ꦨꦤ꧀ꦠꦕꦶꦠ꧀ꦠꦺꦴ. ꦄꦮꦕꦴꦥꦭ꧀ꦪꦺꦤꦴꦠꦶ ꦢꦭ꦳꧀ꦲꦮꦴꦠꦴꦥꦲꦠꦥꦭ꧀ꦭꦮꦱꦢꦶꦱꦺꦤ ꦭꦺꦴꦭꦨꦴꦮꦺꦤ.

ꦥꦚ꧀ꦚꦮꦠꦴꦠꦶ ꦆꦩꦶꦤꦴ ꦨꦶꦏ꧀ꦑꦸꦱꦴꦫꦸꦥ꧀ꦥꦺꦱꦸ ꦆꦠꦶꦏꦠ꧀ꦠꦧ꧀ꦧꦺꦱꦸ ꦈꦥꦴꦪꦥꦚ꧀ꦚꦴ ꦄꦣꦶꦥ꧀ꦥꦺꦠꦴ, ꦤ ꦱꦸꦠꦩꦪꦥꦚ꧀ꦚꦴ. ꦄꦨꦶꦣꦩ꧀ꦩꦺ ꦄꦨꦶꦮꦶꦤꦪꦺ ꦪꦺꦴꦒꦺꦴꦠꦶ ꦆꦩꦶꦤꦴ ꦨꦴꦮꦤꦴꦥꦚ꧀ꦚꦴꦈꦠ꧀ꦠꦫꦶꦩꦤꦸꦱ꧀ꦱꦣꦩ꧀ꦩꦺ ꦪꦺꦴꦒꦺꦴ ꦥꦏꦴꦱꦶꦠꦺꦴ. ꦪꦺꦴꦒꦺꦴꦠꦶ ꦕ ꦥꦫꦶꦕꦪꦺꦴ ꦈꦒ꧀ꦒꦟ꧀ꦲꦮꦱꦺꦤ.

ꦄꦴꦫꦸꦥ꧀ꦥꦴꦠꦶ ꦆꦩꦶꦤꦴ ꦕꦠꦱ꧀ꦱꦺꦴꦥꦶ ꦄꦫꦹꦥꦱꦩꦴꦥꦠ꧀ꦠꦶꦪꦺꦴ ꦒꦲꦶꦠꦴ, ꦠꦴ ꦥꦤ ꦕꦠꦹꦲꦶ ꦫꦹꦥꦱꦩꦴꦥꦠ꧀ꦠꦷꦲꦶ ꦮꦶꦤꦴ ꦤ ꦱꦩ꧀ꦥꦗ꧀ꦗꦤ꧀ꦠꦷꦠꦶ ꦄꦴꦲ – ‘‘ꦄꦴꦫꦸꦥ꧀ꦥꦴꦠꦶ ꦌꦠ꧀ꦠꦴꦮꦠꦴ ꦄꦛ꧀ꦜꦥꦶ ꦱꦩꦴꦥꦠ꧀ꦠꦶꦪꦺꦴ ꦮꦸꦠ꧀ꦠꦴ ꦲꦺꦴꦤ꧀ꦠꦷ’’ꦠꦶ. ꦏꦱꦶꦟꦺꦠꦶ ꦢꦱꦮꦶꦣꦺ ꦏꦱꦶꦟꦺ. ꦌꦏꦁ ꦥꦫꦶꦏꦩ꧀ꦩꦏꦩ꧀ꦩꦛ꧀ꦜꦴꦤꦤ꧀ꦠꦶ ꦪꦁ ꦏꦶꦚ꧀ꦕꦶ ꦌꦏꦨꦴꦮꦤꦴ ꦥꦫꦶꦏꦩ꧀ꦩꦢꦷꦥꦤꦁ ꦑꦤ꧀ꦣꦏꦩ꧀ꦩꦛ꧀ꦜꦴꦤꦁ. ꦠꦺꦤꦴꦲ ‘‘ꦥꦒꦸꦟꦁ ꦏꦠ꧀ꦮꦴ’’ꦠꦶ. ꦏꦱꦶꦟꦥꦫꦶꦏꦩ꧀ꦩꦁ ꦥꦤ ꦠꦒ꧀ꦒꦲꦟꦺꦤꦺꦮ ꦒꦲꦶꦠꦁ ꦲꦺꦴꦠꦶ, ꦭꦺꦴꦏꦶꦪꦴ ꦈꦠ꧀ꦠꦫꦶꦩꦤꦸꦱ꧀ꦱꦣꦩ꧀ꦩꦴ ꦲꦺꦛ꧀ꦜꦴ ꦒꦲꦶꦠꦴꦠꦶ ꦄꦴꦲ ‘‘ꦈꦠ꧀ꦠꦫꦶꦩꦤꦸꦱ꧀ꦱꦣꦩ꧀ꦩꦺꦠꦶ ꦆꦩꦶꦤꦴ ꦱꦧ꧀ꦧꦺꦥꦶ ꦭꦺꦴꦏꦸꦠ꧀ꦠꦫꦣꦩ꧀ꦩꦺ ꦢꦱ꧀ꦱꦺꦠꦷ’’ꦠꦶ. ꦤꦺꦪ꧀ꦪꦥꦸꦒ꧀ꦒꦭꦱ꧀ꦱ ꦮꦱꦺꦤꦴꦠꦶ ꦗꦴꦤꦶꦠ꧀ꦮꦴ ꦮꦶꦠ꧀ꦡꦴꦫꦺꦠ꧀ꦮꦴ ꦚꦴꦠꦧ꧀ꦧꦥꦸꦒ꧀ꦒꦭꦱ꧀ꦱ ꦮꦱꦺꦤꦴꦠꦶ.

ꦒꦺꦴꦭꦶꦪꦴꦤꦶꦱꦸꦠ꧀ꦠꦮꦟ꧀ꦟꦤꦴꦪ ꦭꦷꦤꦠ꧀ꦡꦥ꧀ꦥꦏꦴꦱꦤꦴ ꦱꦩꦠ꧀ꦠꦴ.