꧙. ꦧꦲꦸꦮꦺꦢꦤꦶꦪꦱꦸꦠ꧀ꦠꦮꦟ꧀ꦟꦤꦴ

꧘꧘. ꦥꦚ꧀ꦕꦏꦔ꧀ꦒꦺꦴꦠꦶ ꦮꦝ꧀ꦞꦏꦷꦏꦶꦕ꧀ꦕꦱꦴꦣꦤꦺ ꦮꦴꦱꦶꦄꦴꦢꦶꦥꦚ꧀ꦕꦏꦁ ꦄꦔ꧀ꦒꦁ ꦱꦁꦣꦤꦁ ꦌꦠꦱ꧀ꦩꦶꦤ꧀ꦠꦶ ꦥꦚ꧀ꦕꦏꦔ꧀ꦒꦺꦴ. ꦡꦩ꧀ꦨꦴꦢꦶꦮꦠ꧀ꦡꦹꦤꦁ ꦡꦥꦤꦛ꧀ꦜꦺꦤ ꦡꦥꦠꦶ. ꦥꦟ꧀ꦝꦶꦠꦈꦢꦴꦪꦶꦠ꧀ꦡꦺꦫꦺꦴ, ꦤ ꦏꦴꦭ꦳ꦸꦢꦴꦪꦷ ꦡꦺꦫꦺꦴ.

꧘꧙. ꦥꦫꦶꦪꦴꦪꦠꦶ ꦄꦠ꧀ꦠꦤꦺꦴ ꦦꦭꦁ ꦮꦠ꧀ꦠꦺꦠꦷꦠꦶ ꦥꦫꦶꦪꦴꦪꦺꦴ, ꦏꦴꦫꦟꦁ. ꦮꦺꦢꦤꦴꦱꦤ꧀ꦤꦶꦱ꧀ꦱꦶꦠꦺꦴ ꦕ ꦏꦴꦪꦶꦏꦕꦺꦠꦱꦶꦏꦨꦴꦮꦺꦴ ꦏꦴꦫꦟꦁ. ꦠꦺꦤꦴꦲ – ‘‘ꦏꦴꦪꦶꦏꦕꦺꦠꦱꦶꦏꦮꦱꦺꦤ ꦢ꧀ꦮꦺ ꦮꦺꦢꦶꦠꦧ꧀ꦧꦴ’’ꦠꦶ. ꦠꦠ꧀ꦡ ꦥꦱꦴꦢꦏꦴꦪꦱꦤ꧀ꦤꦶꦱ꧀ꦱꦶꦠꦴ ꦏꦴꦪꦶꦏꦴ, ꦕꦺꦠꦺꦴꦱꦤ꧀ꦤꦶꦱ꧀ꦱꦶꦠꦴ ꦕꦺꦠꦱꦶꦏꦴ. ꦱꦸꦑꦴꦢꦶꦮꦱꦺꦤ ꦠꦶꦱ꧀ꦱꦺꦴꦠꦶ ꦌꦠ꧀ꦡ ꦱꦸꦑꦤꦢꦸꦏ꧀ꦑꦤꦸꦥꦺꦏ꧀ꦑꦤꦴꦤꦶ ꦱꦸꦑꦴꦢꦶꦮꦺꦢꦤꦴꦪ ꦏꦴꦫꦟꦁ. ꦠꦴꦤꦶ ꦲꦶ ꦥꦮꦠ꧀ꦠꦶꦤꦶꦩꦶꦠ꧀ꦠꦴꦤꦶ ꦏꦠ꧀ꦮꦴ ꦠꦠ꧀ꦡ ꦱꦸꦑꦴꦢꦶꦱꦢ꧀ꦢꦥ꧀ꦥꦮꦠ꧀ꦠꦶ, ꦆꦩꦶꦤꦴ ꦤꦪꦺꦤ ꦱꦺꦱꦺꦱꦸꦥꦶ ꦪꦡꦴꦫꦲꦁ ꦏꦴꦫꦟꦁ ꦤꦶꦢ꧀ꦣꦴꦫꦺꦠ꧀ꦮꦴ ꦮꦠ꧀ꦠꦧ꧀ꦧꦁ. ꦈꦥꦮꦶꦕꦴꦫꦮꦱꦺꦤꦴꦠꦶ ꦄꦴꦫꦩ꧀ꦩꦟꦁ ꦈꦥꦺꦕ꧀ꦕ ꦱꦮꦶꦱꦺꦱꦥꦮꦠ꧀ꦠꦶꦮꦱꦺꦤ. ꦪꦱ꧀ꦩꦶꦚ꧀ꦲꦶ ꦄꦴꦫꦩ꧀ꦩꦟꦺ ꦱꦺꦴꦩꦤꦱ꧀ꦱꦮꦺꦢꦤꦴ ꦥꦮꦠ꧀ꦠꦠꦶ, ꦄꦴꦫꦩ꧀ꦩꦟꦠꦴꦪ ꦠꦁ ꦈꦥꦒꦤ꧀ꦠ꧀ꦮꦴ ꦆꦠꦫꦮꦺꦢꦤꦴꦲꦶ ꦮꦶꦱꦶꦛ꧀ꦜꦠꦴꦪ ꦱꦮꦶꦱꦺꦱꦁ ꦠꦠ꧀ꦡ ꦥꦮꦠ꧀ꦠꦶ. ꦠꦺꦤꦴꦲ ‘‘ꦱꦺꦴꦩꦤꦱ꧀ꦱꦛ꧀ꦜꦴꦤꦶꦪꦁ ꦫꦹꦥꦁ ꦈꦥꦮꦶꦕꦫꦠꦷ’’ꦠꦶ. ꦌꦱ ꦤꦪꦺꦴ ꦱꦺꦱꦮꦺꦢꦤꦴꦱꦸ ꦒꦺꦲꦱ꧀ꦱꦶꦠꦴꦤꦷꦠꦶ ꦒꦺꦲꦤꦶꦱ꧀ꦱꦶꦠꦴꦤꦶ.

꧙꧐. ꦥꦫꦶꦪꦴꦪꦺꦤꦴꦠꦶ ‘‘ꦆꦢꦩꦺꦠ꧀ꦡ ꦢꦸꦏ꧀ꦑꦱ꧀ꦩꦶꦤ꧀ꦠꦶ ꦮꦢꦴꦩꦷ’’ꦠꦶ ꦮꦸꦠ꧀ꦠꦛ꧀ꦜꦴꦤꦁ ꦱꦤ꧀ꦣꦴꦪ ꦮꦢꦠꦶ. ꦠꦁ ꦢꦱ꧀ꦱꦺꦤ꧀ꦠꦺꦴꦠꦶ ꦏꦴꦩꦚ꧀ꦕꦺꦠ꧀ꦡ ꦱꦸꦠ꧀ꦠꦺ – ‘‘ꦢ꧀ꦮꦺꦥꦴꦤꦤ꧀ꦢ, ꦮꦺꦢꦤꦴ ꦮꦸꦠ꧀ꦠꦴ’’ꦠꦶ ꦢ꧀ꦮꦺ ꦄꦴꦢꦶꦁ ꦏꦠ꧀ꦮꦴ ꦮꦺꦢꦤꦴ ꦢꦱ꧀ꦱꦶꦠꦴ, ꦌꦏꦴꦥꦶ ꦥꦤ ꦢꦱ꧀ꦱꦶꦠꦴ ꦌꦮꦴꦠꦶ ꦢꦱ꧀ꦱꦺꦤ꧀ꦠꦺꦴ. ꦈꦥꦠ꧀ꦡꦩ꧀ꦨꦺꦠꦸꦤ꧀ꦠꦶ ꦌꦏꦴꦥꦶ ꦮꦺꦢꦤꦴ ꦮꦸꦠ꧀ꦠꦴ ꦩꦪꦴ ꦥꦫꦶꦪꦴꦪꦺꦤ, ꦌꦮꦁ ꦱꦠꦶ ꦢ꧀ꦮꦺꦥꦶ ꦮꦠ꧀ꦠꦧ꧀ꦧꦴꦠꦶ ꦌꦮꦁ ꦠꦱ꧀ꦱ ꦮꦴꦢꦁ ꦈꦥꦠ꧀ꦡꦩ꧀ꦨꦺꦠꦸꦁ. ꦏꦡꦁ ꦥꦤ ꦌꦏꦴ ꦮꦺꦢꦤꦴ ꦮꦸꦠ꧀ꦠꦴꦠꦶ? ꦪꦁ ꦏꦶꦚ꧀ꦕꦶ ꦮꦺꦢꦪꦶꦠꦁ ꦱꦸꦑꦁ ꦮꦴ ꦢꦸꦏ꧀ꦑꦁ ꦮꦴ ꦄꦢꦸꦏ꧀ꦑꦩꦱꦸꦑꦁ ꦮꦴ, ꦆꦢꦩꦺꦠ꧀ꦡ ꦢꦸꦏ꧀ꦑꦱ꧀ꦩꦶꦤ꧀ꦠꦶ ꦮꦢꦴꦩꦷꦠꦶ. ꦪꦁ ꦥꦤꦺꦠ꧀ꦡ ꦮꦠ꧀ꦠꦧ꧀ꦧꦁ, ꦠꦁ ꦆꦠꦶꦮꦸꦠ꧀ꦠꦏꦮꦟ꧀ꦟꦤꦴꦪꦁ (ꦆꦠꦶꦮꦸ. ꦄꦛ꧀ꦜ. ꧕꧒ ꦄꦴꦢꦪꦺꦴ) ꦥꦫꦩꦠ꧀ꦡꦢꦷꦥꦤꦶꦪꦁ ꦮꦸꦠ꧀ꦠꦤꦪꦺꦤ ꦮꦺꦢꦶꦠꦧ꧀ꦧꦁ.

ꦏꦡꦁ ꦥꦤꦺꦠ꧀ꦡ ꦫꦹꦥꦴꦮꦕꦫꦕꦠꦸꦠ꧀ꦡꦺ ꦄꦫꦹꦥꦺꦱꦸ ꦱꦚ꧀ꦚꦴꦮꦺꦢꦪꦶꦠꦤꦶꦫꦺꦴꦣꦺ ꦱꦸꦑꦁ ꦈꦢ꧀ꦣꦠꦤ꧀ꦠꦶ ꦄꦴꦲ ‘‘ꦌꦠ꧀ꦡ ꦕꦴ’’ꦠꦶꦄꦴꦢꦶ. ꦱꦤ꧀ꦠꦛ꧀ꦜꦺꦤꦴꦠꦶ ꦥꦛꦶꦥꦏ꧀ꦑꦣꦩ꧀ꦩꦴꦤꦁ ꦮꦹꦥꦱꦤ꧀ꦠꦨꦴꦮꦺꦤ. ꦥꦟꦷꦠꦛ꧀ꦜꦺꦤꦴꦠꦶ ꦨꦴꦮꦤꦴꦮꦶꦱꦺꦱꦮꦶꦱꦶꦛ꧀ꦜꦺꦤ ꦄꦠꦥ꧀ꦥꦏꦨꦴꦮꦺꦤꦺꦮ ꦱꦺꦛ꧀ꦜꦨꦴꦮꦺꦤ ꦕ, ꦥꦕ꧀ꦕꦪꦮꦶꦱꦺꦱꦺꦤ ꦥꦣꦴꦤꦨꦴꦮꦁ ꦤꦷꦠꦤ꧀ꦠꦶꦥꦶ ꦥꦟꦷꦠꦁ. ꦮꦺꦢꦪꦶꦠꦱꦸꦑꦁ ꦤꦴꦩ ꦮꦺꦢꦤꦴꦨꦹꦠꦁ ꦱꦸꦑꦤ꧀ꦠꦶ ꦏꦠ꧀ꦮꦴ. ꦄꦮꦺꦢꦪꦶꦠꦱꦸꦑꦁ ꦤꦴꦩ ꦪꦴꦮꦠꦴ ꦤꦶꦢ꧀ꦢꦸꦏ꧀ꦑꦠꦴ, ꦠꦴꦮꦠꦴ ꦱꦸꦑꦤ꧀ꦠꦶ ꦮꦸꦕ꧀ꦕꦠꦷꦠꦶ.ꦄꦡ ꦮꦴ ꦤꦶꦫꦺꦴꦣꦺꦴ ꦱꦸꦛ꧀ꦜꦸ ꦑꦴꦢꦠꦶ ꦑꦤꦠꦶ ꦏꦴꦪꦶꦏꦕꦺꦠꦱꦶꦏꦴꦧꦴꦣꦤ꧀ꦠꦶ ꦮꦠ꧀ꦠꦧ꧀ꦧꦠꦁ ꦄꦫꦲꦠꦶ ꦱꦠ꧀ꦠꦴꦲꦩ꧀ꦥꦶ ꦠꦠ꧀ꦡ ꦢꦸꦏ꧀ꦑꦱ꧀ꦱ ꦤꦶꦫꦸꦗ꧀ꦙꦤꦠꦺꦴ. ꦠꦺꦤꦴꦲ ‘‘ꦤꦶꦢ꧀ꦢꦸꦏ꧀ꦑꦨꦴꦮꦱꦔ꧀ꦑꦴꦠꦺꦤ ꦱꦸꦑꦛ꧀ꦜꦺꦤꦴ’’ꦠꦶ.

꧙꧑. ꦪꦱ꧀ꦩꦶꦁ ꦪꦱ꧀ꦩꦶꦁ ꦨꦮꦺ, ꦕꦶꦠ꧀ꦠꦸꦥ꧀ꦥꦴꦢꦺ, ꦄꦮꦠ꧀ꦡꦴꦪ ꦮꦴ ꦤꦶꦢ꧀ꦢꦸꦏ꧀ꦑꦨꦴꦮꦺꦴ, ꦢꦸꦏ꧀ꦑꦱ꧀ꦱ ꦥꦛꦶꦥꦏ꧀ꦑꦠꦴ ꦄꦤꦸꦥꦭꦧ꧀ꦨꦤꦺꦤ ꦢꦸꦏ꧀ꦑꦮꦶꦮꦶꦠ꧀ꦠꦁ, ꦠꦁ ꦱꦸꦑꦱ꧀ꦩꦶꦁꦪꦺꦮ ꦥꦚ꧀ꦚꦥꦺꦠꦶ. ꦱꦺꦱꦁ ꦱꦸꦮꦶꦚ꧀ꦚꦺꦪ꧀ꦪꦩꦺꦮ.

ꦧꦲꦸꦮꦺꦢꦤꦷꦪꦱꦸꦠ꧀ꦠꦮꦟ꧀ꦟꦤꦴꦪ ꦭꦷꦤꦠ꧀ꦡꦥ꧀ꦥꦏꦴꦱꦤꦴ ꦱꦩꦠ꧀ꦠꦴ.