꧓. ꦩꦲꦴꦮꦺꦢꦭ꧀ꦭꦱꦸꦠ꧀ꦠꦮꦟ꧀ꦟꦤꦴ

꧔꧔꧙. ꦒꦫꦸꦨꦴꦮꦺꦴ ꦒꦴꦫꦮꦁ, ꦥꦴꦱꦴꦟꦕ꧀ꦖꦠ꧀ꦠꦁ ꦮꦶꦪ ꦒꦫꦸꦏꦫꦟꦷꦪꦠꦴ. ꦱꦲ ꦒꦴꦫꦮꦺꦤꦴꦠꦶ ꦱꦒꦴꦫꦮꦺꦴ, ꦒꦫꦸꦤꦴ ꦏꦶꦱ꧀ꦩꦶꦚ꧀ꦕꦶ ꦮꦸꦠ꧀ꦠꦺ ꦒꦴꦫꦮꦮꦱꦺꦤ ꦥꦠꦶꦱ꧀ꦱꦮꦤꦁ ꦥꦠꦶꦱ꧀ꦱꦮꦺꦴ, ꦱꦲ ꦥꦠꦶꦱ꧀ꦱꦮꦺꦤ ꦱꦥ꧀ꦥꦠꦶꦱ꧀ꦱꦮꦺꦴ, ꦥꦠꦶꦱ꧀ꦱꦮꦨꦹꦠꦁ ꦠꦁꦱꦨꦴꦒꦚ꧀ꦕ ꦪꦁ ꦏꦶꦚ꧀ꦕꦶ ꦒꦫꦸꦏꦫꦟꦁ. ꦱꦒꦴꦫꦮꦺ ꦱꦥ꧀ꦥꦠꦶꦱ꧀ꦱꦮꦕꦤꦁ ꦱꦒꦴꦫꦮꦱꦥ꧀ꦥꦠꦶꦱ꧀ꦱꦮꦕꦤꦁ. ꦒꦫꦸꦏꦫꦟꦁ ꦮꦴ ꦒꦴꦫꦮꦺꦴ, ꦱꦒꦴꦫꦮꦱ꧀ꦱ ꦱꦥ꧀ꦥꦠꦶꦱ꧀ꦱꦮꦕꦤꦁ ꦱꦒꦴꦫꦮꦱꦥ꧀ꦥꦠꦶꦱ꧀ꦱꦮꦕꦤꦁ. ꦌꦠꦺꦤ ꦱꦨꦴꦮꦺꦤꦺꦮ ꦱꦒꦴꦫꦮꦱ꧀ꦱ ꦠꦡꦴꦥꦮꦠ꧀ꦠꦁ ꦮꦕꦤꦤ꧀ꦠꦶ ꦢꦱ꧀ꦱꦺꦠꦶ. ꦄꦚ꧀ꦚꦠ꧀ꦡ ꦢꦸ-ꦱꦢ꧀ꦢꦺꦴ ꦒꦫꦲꦠ꧀ꦡꦺꦴꦥꦶ ꦲꦺꦴꦠꦶ ‘‘ꦢꦸꦏ꧀ꦑꦁ ꦢꦸꦥ꧀ꦥꦸꦠ꧀ꦠꦺꦴ’’ꦠꦶꦄꦴꦢꦷꦱꦸ ꦮꦶꦪ, ꦆꦣ ꦥꦤ ꦱꦺꦴ ꦤ ꦱꦩ꧀ꦨꦮꦠꦶ ꦏꦸꦕ꧀ꦖꦶꦠꦴꦪ ꦥꦚ꧀ꦚꦴꦪ ꦄꦨꦴꦮꦠꦺꦴꦠꦶ ꦄꦴꦲ ‘‘ꦥꦚ꧀ꦚꦴꦪ ꦢꦸꦛ꧀ꦜꦁ ꦤꦴꦩ ꦤꦠ꧀ꦡꦷ’’ꦠꦶ. ‘‘ꦢꦸꦱ꧀ꦱꦷꦭꦺꦴ’’ꦠꦶꦄꦴꦢꦷꦱꦸ ꦮꦶꦪ ꦄꦨꦴꦮꦠ꧀ꦡꦺꦴ ꦢꦸ-ꦱꦢ꧀ꦢꦺꦴꦠꦶ ꦮꦸꦠ꧀ꦠꦁ ‘‘ꦄꦥ꧀ꦥꦚ꧀ꦚꦺꦴ ꦤꦶꦥ꧀ꦥꦚ꧀ꦚꦺꦴꦠꦶ ꦄꦠ꧀ꦡꦺꦴ’’ꦠꦶ. ꦏꦶꦠ꧀ꦠꦏꦺꦤꦴꦠꦶ ꦏꦺꦤ ꦥꦫꦶꦩꦴꦟꦺꦤ. ꦠꦁ ꦥꦤ ꦥꦫꦶꦩꦴꦟꦁ ꦪꦱ꧀ꦩꦴ ꦥꦫꦶꦩꦺꦪ꧀ꦪꦱ꧀ꦱ ꦄꦠ꧀ꦡꦱ꧀ꦱ ꦥꦫꦶꦕ꧀ꦖꦶꦤ꧀ꦢꦤꦁ ꦲꦺꦴꦠꦶ, ꦤꦸ-ꦱꦢ꧀ꦢꦺꦴ ꦕ ꦥꦸꦕ꧀ꦖꦴꦪ ꦗꦺꦴꦠꦏꦺꦴ, ꦠꦱ꧀ꦩꦴ ‘‘ꦏꦶꦠ꧀ꦠꦴꦮꦠꦴ ꦤꦸ ꦑꦺꦴꦠꦶ ꦏꦴꦫꦟꦥꦫꦶꦕ꧀ꦖꦺꦢꦥꦸꦕ꧀ꦖꦴ’’ꦠꦶ ꦮꦠ꧀ꦮꦴ ‘‘ꦏꦶꦠ꧀ꦠꦏꦺꦤ ꦤꦸ ꦑꦺꦴ ꦌꦮꦁ ꦮꦸꦕ꧀ꦕꦠꦷꦠꦶ ꦄꦠ꧀ꦡꦺꦴ’’ꦠꦶ ꦄꦴꦲ. ‘‘ꦏꦴꦫꦟꦥꦫꦶꦕ꧀ꦖꦺꦢꦥꦸꦕ꧀ꦖꦴ’’ꦠꦶ ꦆꦩꦶꦤꦴ ‘‘ꦏꦶꦠ꧀ꦠꦴꦮꦠꦴ’’ꦠꦶ ꦱꦴꦩꦚ꧀ꦚꦠꦺꦴ ꦥꦸꦕ꧀ꦖꦴꦨꦴꦮꦺꦴ ꦢꦱ꧀ꦱꦶꦠꦺꦴ, ꦤ ꦮꦶꦱꦺꦱꦠꦺꦴ, ꦠꦱ꧀ꦱ ꦥꦸꦕ꧀ꦖꦴꦮꦶꦱꦺꦱꦨꦴꦮꦚꦴꦥꦤꦠ꧀ꦡꦁ ꦩꦲꦴꦤꦶꦢ꧀ꦢꦺꦱꦺ ꦄꦴꦒꦠꦴ ꦱꦧ꧀ꦧꦴꦮ ꦥꦸꦕ꧀ꦖꦴ ꦄꦠ꧀ꦡꦸꦢ꧀ꦣꦴꦫꦤꦪꦺꦤ ꦢꦱ꧀ꦱꦺꦠꦶ ‘‘ꦥꦸꦕ꧀ꦖꦴ ꦕ ꦤꦴꦩꦴ’’ꦠꦶꦄꦴꦢꦶꦤꦴ. ꦄꦢꦶꦛ꧀ꦜꦁ ꦗꦺꦴꦠꦷꦪꦠꦶ ꦌꦠꦴꦪꦴꦠꦶ ꦄꦢꦶꦛ꧀ꦜꦗꦺꦴꦠꦤꦴ, ꦥꦸꦕ꧀ꦖꦴ. ꦢꦶꦛ꧀ꦜꦱꦁꦱꦤ꧀ꦢꦤꦴ ꦱꦴꦏꦕ꧀ꦖꦴꦮꦱꦺꦤ ꦮꦶꦤꦶꦕ꧀ꦖꦪꦏꦫꦟꦁ. ꦮꦶꦩꦠꦶ ꦖꦶꦗ꧀ꦗꦠꦶ ꦌꦠꦴꦪꦴꦠꦶ ꦮꦶꦩꦠꦶꦕ꧀ꦖꦺꦢꦤꦴ. ꦄꦤꦸꦩꦠꦶꦪꦴ ꦥꦸꦕ꧀ꦖꦴ ꦄꦤꦸꦩꦠꦶꦥꦸꦕ꧀ꦖꦴ. ‘‘ꦠꦁ ꦏꦶꦁ ꦩꦚ꧀ꦚꦡ, ꦨꦶꦏ꧀ꦑꦮꦺ’’ꦠꦶꦄꦴꦢꦶꦥꦸꦕ꧀ꦖꦴꦪ ꦲꦶ ‘‘ꦏꦶꦁ ꦠꦸꦩ꧀ꦲꦴꦏꦁ ꦄꦤꦸꦩꦠꦷ’’ꦠꦶ ꦄꦤꦸꦩꦠꦶ ꦥꦸꦕ꧀ꦖꦶꦠꦴ ꦲꦺꦴꦠꦶ. ꦏꦡꦺꦠꦸꦁ ꦏꦩ꧀ꦪꦠꦴꦪ ꦥꦸꦕ꧀ꦖꦴ ꦏꦡꦺꦠꦸꦏꦩ꧀ꦪꦠꦴꦥꦸꦕ꧀ꦖꦴ.

ꦭꦏ꧀ꦑꦟꦤ꧀ꦠꦶ ꦚꦴꦠꦸꦁ ꦆꦕ꧀ꦖꦶꦠꦺꦴ ꦪꦺꦴ ꦏꦺꦴꦕꦶ ꦱꦨꦴꦮꦺꦴ. ꦄꦚ꧀ꦚꦴꦠꦤ꧀ꦠꦶ ꦪꦺꦤ ꦏꦺꦤꦕꦶ ꦚꦴꦟꦺꦤ ꦄꦚ꧀ꦚꦴꦠꦨꦴꦮꦁ ꦄꦴꦲ. ꦄꦢꦶꦛ꧀ꦜꦤ꧀ꦠꦶ ꦢꦱ꧀ꦱꦤꦨꦹꦠꦺꦤ ꦥꦕ꧀ꦕꦏ꧀ꦑꦁ ꦮꦶꦪ ꦄꦢꦶꦛ꧀ꦜꦠꦁ. ꦄꦠꦸꦭꦶꦠꦤ꧀ꦠꦶ ‘‘ꦌꦠ꧀ꦠꦏꦁ ꦆꦢ’’ꦤ꧀ꦠꦶ ꦠꦸꦭꦤꦨꦹꦠꦺꦤ ꦄꦠꦸꦭꦶꦠꦠꦁ. ꦄꦠꦷꦫꦶꦠꦤ꧀ꦠꦶ ꦠꦷꦫꦟꦨꦹꦠꦺꦤ ꦄꦏꦠꦚꦴꦟꦏꦶꦫꦶꦪꦴꦱꦩꦴꦥꦤꦠꦁ. ꦄꦮꦶꦨꦹꦠꦤ꧀ꦠꦶ ꦚꦴꦟꦱ꧀ꦱ ꦄꦥꦴꦏꦛꦨꦴꦮꦁ. ꦄꦮꦶꦨꦴꦮꦶꦠꦤ꧀ꦠꦶ ꦚꦴꦟꦺꦤ ꦄꦥꦴꦏꦛꦷꦏꦠꦨꦴꦮꦁ. ꦆꦣ ꦢꦶꦛ꧀ꦜꦱꦁꦱꦤ꧀ꦢꦤꦴꦥꦸꦕ꧀ꦖꦴ ꦄꦣꦶꦥ꧀ꦥꦺꦠꦴ, ꦤ ꦄꦢꦶꦛ꧀ꦜꦗꦺꦴꦠꦤꦴ ꦮꦶꦩꦠꦶꦕ꧀ꦖꦺꦢꦤꦴ ꦕꦴꦠꦶ.

ꦏꦡꦩꦪꦁ ꦄꦠ꧀ꦡꦺꦴ ꦮꦶꦚ꧀ꦚꦴꦪꦠꦷꦠꦶ ꦄꦴꦲ ‘‘ꦡꦺꦫꦺꦴ ꦲꦷ’’ꦠꦶꦄꦴꦢꦶ. ꦱꦪꦁ ꦮꦶꦤꦶꦕ꧀ꦖꦶꦤꦤ꧀ꦠꦺꦴꦠꦶ ꦱꦪꦩꦺꦮ ꦠꦺꦱꦁ ꦥꦚ꧀ꦲꦴꦤꦁ ꦄꦠ꧀ꦡꦁ ꦮꦶꦱꦺꦱꦺꦤ ꦤꦶꦕ꧀ꦖꦶꦤꦤ꧀ꦠꦺꦴ. ꦆꦢꦁ ꦱꦸꦠ꧀ꦠꦤ꧀ꦠꦶ ꦆꦢꦁ ꦥꦚ꧀ꦕꦮꦷꦱꦠꦶꦥꦚ꧀ꦲꦥꦛꦶꦩꦟ꧀ꦝꦶꦠꦱꦸꦠ꧀ꦠꦁ, ꦤ ꦪꦁ ꦏꦶꦚ꧀ꦕꦶ ꦄꦤꦮꦱꦺꦱꦺꦤꦺꦮ ꦩꦠ꧀ꦡꦏꦁ ꦥꦴꦥꦺꦱꦷꦠꦶ. ‘‘ꦱꦪꦩꦺꦮ ꦥꦚ꧀ꦲꦁ ꦱꦩꦸꦛ꧀ꦜꦴꦥꦺꦠ꧀ꦮꦴ ꦱꦪꦁ ꦮꦶꦤꦶꦕ꧀ꦖꦶꦤꦤ꧀ꦠꦺꦴ’’ꦠꦶ ꦌꦠ꧀ꦡ ꦕꦠꦸꦏ꧀ꦏꦺꦴꦛꦶꦏꦁ ꦨꦮꦠꦷꦠꦶ ꦢꦱ꧀ꦱꦺꦤ꧀ꦠꦺꦴ ‘‘ꦌꦏꦕ꧀ꦕꦺꦴ ꦲꦷ’’ꦠꦶꦄꦴꦢꦶꦩꦴꦲ. ꦥꦚ꧀ꦲꦁ ꦱꦩꦸꦛ꧀ꦜꦴꦥꦺꦠꦸꦁꦪꦺꦮ ꦱꦏ꧀ꦏꦺꦴꦠꦷꦠꦶ ꦥꦸꦕ꧀ꦖꦤꦮꦶꦣꦶꦁꦪꦺꦮ ꦗꦴꦤꦴꦠꦶ. ꦤ ꦤꦶꦕ꧀ꦖꦺꦠꦸꦤ꧀ꦠꦶ ꦤꦶꦕ꧀ꦖꦺꦠꦸꦁ ꦤ ꦱꦏ꧀ꦏꦺꦴꦠꦶ, ꦮꦶꦱ꧀ꦱꦗ꧀ꦗꦤꦮꦶꦣꦶꦁ ꦤ ꦗꦴꦤꦴꦠꦷꦠꦶ ꦄꦠ꧀ꦡꦺꦴ. ꦮꦶꦱꦺꦱꦛ꧀ꦜꦴꦤꦤ꧀ꦠꦶ ꦄꦚ꧀ꦚꦺꦲꦶ ꦄꦱꦢꦶꦱꦛ꧀ꦜꦴꦤꦁ. ꦡꦺꦫꦺꦤ ꦱꦢꦶꦱꦺꦴꦠꦶ ꦡꦺꦫꦺꦤ ꦱꦢꦶꦱꦺꦴ ꦱꦴꦮꦏꦺꦴ ꦤꦠ꧀ꦡꦶ.

ꦱꦁꦱꦤ꧀ꦢꦶꦠ꧀ꦮꦴꦠꦶ ꦱꦁꦪꦺꦴꦗꦺꦠ꧀ꦮꦴ ꦱꦩꦴꦤꦁ ꦏꦠ꧀ꦮꦴ, ꦪꦡꦴ ꦠꦠ꧀ꦡ ꦱꦧ꧀ꦧꦚ꧀ꦚꦸꦠꦚ꧀ꦚꦴꦟꦁ ꦥꦮꦠ꧀ꦠꦁ, ꦠꦡꦴ ꦠꦁ ꦄꦮꦶꦭꦺꦴꦩꦺꦠ꧀ꦮꦴꦠꦶ ꦄꦠ꧀ꦡꦺꦴ. ꦭꦷꦭ꦳ꦴꦪꦤ꧀ꦠꦺꦴꦠꦶ ꦭꦷꦭ꦳ꦁ ꦏꦫꦺꦴꦤ꧀ꦠꦺꦴ. ꦣꦩ꧀ꦩꦏꦡꦶꦏꦠꦴꦪ ꦄꦒ꧀ꦒꦨꦴꦮꦥ꧀ꦥꦠ꧀ꦠꦶꦪꦴ ꦠꦠ꧀ꦡ ꦄꦥ꧀ꦥꦛꦶꦲꦠꦚꦴꦟꦠꦴꦪ ꦧꦸꦢ꧀ꦣꦭꦷꦭ꦳ꦴꦪ ꦮꦶꦪ ꦕꦠꦸꦤ꧀ꦤꦁ ꦥꦫꦶꦱꦴꦤꦁ ꦒꦩꦤꦁ ꦒꦟ꧀ꦲꦤ꧀ꦠꦺꦴ ꦣꦩ꧀ꦩꦏꦡꦁ ꦏꦡꦺꦠꦶ.

ꦆꦠꦺꦴ ꦮꦴ ꦌꦠ꧀ꦠꦺꦴ ꦮꦴ ꦄꦤꦸꦏ꧀ꦏꦩꦶꦠ꧀ꦮꦴꦠꦶ ꦈꦒ꧀ꦒꦲꦶꦠꦏꦡꦴꦩꦒ꧀ꦒꦠꦺꦴ ꦪꦠ꧀ꦡ ꦏꦠ꧀ꦡꦕꦶ ꦇꦱꦏꦩ꧀ꦥꦶ ꦄꦤꦸꦏ꧀ꦏꦩꦶꦠ꧀ꦮꦴ ꦈꦒ꧀ꦒꦲꦶꦠꦤꦶꦪꦴꦩꦺꦤꦺꦮꦴꦠꦶ ꦄꦠ꧀ꦡꦺꦴ. ꦠꦺꦤꦴꦲ ‘‘ꦪꦛ꧀ꦜꦶꦏꦺꦴꦛꦶ’’ꦤ꧀ꦠꦶꦄꦴꦢꦶ. ꦌꦏꦥꦢꦶꦏꦤ꧀ꦠꦶ ꦌꦏꦥꦢꦤꦶꦏ꧀ꦑꦺꦥꦩꦠ꧀ꦠꦁ. ꦢꦟ꧀ꦝꦏꦱꦺꦠꦸꦤ꧀ꦠꦶ ꦌꦏꦢꦟ꧀ꦝꦏꦩꦪꦁ ꦱꦺꦠꦸꦁ. ꦲꦺꦛ꧀ꦜꦴ ꦕ ꦈꦥꦫꦶ ꦕ ꦱꦸꦠ꧀ꦠꦥꦢꦴꦤꦁ ꦄꦴꦲꦫꦟꦺꦤ ꦠꦺꦥꦶꦛꦏꦁ ꦧꦸꦢ꧀ꦣꦮꦕꦤꦁ ꦲꦺꦛ꧀ꦜꦸꦥꦫꦶꦪꦁ ꦏꦫꦺꦴꦤ꧀ꦠꦺꦴ. ꦗꦴꦠꦱ꧀ꦱꦫꦱꦢꦶꦱꦚ꧀ꦕ ꦒꦴꦡꦁ, ꦱꦸꦠ꧀ꦠꦥꦢꦁ ꦮꦴ ꦤꦶꦏ꧀ꦑꦶꦥꦶꦠ꧀ꦮꦴ ꦠꦠ꧀ꦡ ꦤꦴꦤꦴꦈꦥꦩꦴꦏꦴꦫꦟꦴꦤꦶ ꦄꦴꦲꦫꦤ꧀ꦠꦺꦴ ꦠꦴꦤꦶ ꦕ ꦠꦺꦲꦶ ꦱꦸꦠ꧀ꦠꦥꦢꦺꦲꦶ ꦧꦺꦴꦣꦺꦤ꧀ꦠꦺꦴ ꦱꦩꦸꦛ꧀ꦜꦴꦥꦺꦤ꧀ꦠꦺꦴ ‘‘ꦗꦴꦠꦱ꧀ꦱꦫꦺ ꦥꦚ꧀ꦕꦮꦟ꧀ꦟꦴꦤꦶ ꦏꦸꦱꦸꦩꦴꦤꦶ ꦦꦸꦭ꧀ꦭꦴꦥꦺꦤ꧀ꦠꦺꦴ ꦮꦶꦪ ꦱꦶꦤꦺꦫꦸꦩꦠ꧀ꦡꦏꦺ ꦮꦛ꧀ꦛꦶꦱꦲꦱ꧀ꦱꦁ ꦗꦴꦭꦺꦤ꧀ꦠꦺꦴ ꦮꦶꦪꦴ’’ꦠꦶ ꦮꦸꦠ꧀ꦠꦺꦴ.

ꦌꦏꦥꦢꦸꦢ꧀ꦣꦴꦫꦺꦠꦶ ꦌꦏꦱ꧀ꦩꦶꦁ ꦥꦢꦸꦢ꧀ꦣꦴꦫꦟꦏ꧀ꦑꦟꦺ. ꦥꦢꦮꦱꦺꦤ ꦱꦛ꧀ꦜꦶ ꦥꦢꦱꦠꦱꦲꦱ꧀ꦱꦴꦤꦶ ꦒꦴꦡꦴꦮꦱꦺꦤ ꦥꦤ꧀ꦤꦫꦱ ꦒꦴꦡꦴꦱꦲꦱ꧀ꦱꦴꦤꦶ. ꦄꦴꦏꦝ꧀ꦞꦶꦠ꧀ꦮꦴ ꦒꦟ꧀ꦲꦤ꧀ꦠꦺꦴ ꦮꦶꦪꦴꦠꦶ ꦥꦕ꧀ꦕꦺꦏꦁ ꦥꦸꦥ꧀ꦦꦴꦤꦶ ꦄꦤꦺꦴꦕꦶꦤꦶꦠ꧀ꦮꦴ ꦮꦭ꧀ꦭꦶꦩꦺꦮ ꦄꦴꦏꦝ꧀ꦞꦶꦠ꧀ꦮꦴ ꦌꦏꦗ꧀ꦙꦁ ꦥꦸꦥ꧀ꦦꦴꦤꦶ ꦏꦠ꧀ꦮꦴ ꦒꦟ꧀ꦲꦤ꧀ꦠꦺꦴ ꦮꦶꦪ. ꦠꦺꦤꦴꦲ ‘‘ꦌꦏꦥ꧀ꦥꦲꦴꦫꦺꦤꦺꦮꦴ’’ꦠꦶ. ꦒꦠꦶꦩꦤ꧀ꦠꦴꦤꦤ꧀ꦠꦶ ꦄꦠꦶꦱꦪꦴꦪ ꦚꦴꦟꦒꦠꦶꦪꦴ ꦪꦸꦠ꧀ꦠꦴꦤꦁ. ꦣꦶꦠꦶꦩꦤ꧀ꦠꦴꦤꦤ꧀ꦠꦶ ꦣꦴꦫꦟꦧꦭꦺꦤ ꦪꦸꦠ꧀ꦠꦴꦤꦁ.

ꦄꦤꦤ꧀ꦠꦤꦪꦸꦱ꧀ꦱꦢꦤ꧀ꦠꦶ ꦥꦕ꧀ꦕꦪꦸꦥ꧀ꦥꦤ꧀ꦤꦨꦴꦱꦶꦠꦠ꧀ꦡꦤꦶꦧ꧀ꦧꦴꦤꦮꦶꦥꦴꦏꦏꦶꦫꦶꦪꦴꦢꦶꦮꦱꦺꦤ ꦄꦤꦤ꧀ꦠꦥꦨꦺꦢꦺ ꦮꦶꦱꦪꦺ ꦥꦮꦠ꧀ꦠꦶꦪꦴ ꦄꦤꦤ꧀ꦠꦤꦪꦺꦲꦶ ꦈꦱ꧀ꦱꦤ꧀ꦤꦁ ꦈꦥꦕꦶꦠꦁ. ꦕꦠꦸꦫꦺꦴꦓꦤꦶꦠ꧀ꦡꦫꦟꦠ꧀ꦡꦶꦏꦴꦤꦁ ꦠꦶꦠ꧀ꦡꦺ ꦜꦥꦶꦠꦤꦴꦮꦴ ꦮꦶꦪꦴꦠꦶ ꦪꦺꦴꦗꦤꦴ. ꦱꦲꦱ꧀ꦱꦪꦸꦠ꧀ꦠꦄꦴꦗꦚ꧀ꦚꦫꦡꦺꦴꦠꦶ ꦮꦺꦗꦪꦤ꧀ꦠꦫꦡꦁ ꦱꦤ꧀ꦣꦴꦪ ꦮꦢꦠꦶ.

ꦪꦱ꧀ꦩꦴ ꦥꦸꦕ꧀ꦖꦴꦪꦁ ꦧ꧀ꦪꦴꦥꦤꦶꦕ꧀ꦖꦴꦤꦪꦺꦤ ‘‘ꦢꦸꦥ꧀ꦥꦚ꧀ꦚꦺꦴ ꦢꦸꦥ꧀ꦥꦚ꧀ꦚꦺꦴ’’ꦠꦶ ꦄꦴꦩꦺꦝꦶꦠꦮꦱꦺꦤ ꦮꦸꦠ꧀ꦠꦁ, ꦠꦱ꧀ꦩꦴ ꦣꦩ꧀ꦩꦱꦺꦤꦴꦥꦠꦶ ꦥꦸꦕ꧀ꦖꦶꦠꦩꦠ꧀ꦡꦁ ꦮꦶꦱ꧀ꦱꦗ꧀ꦗꦺꦤ꧀ꦠꦺꦴ ꦥꦸꦕ꧀ꦖꦴꦱꦨꦴꦒꦺꦤ ‘‘ꦤꦥ꧀ꦥꦗꦴꦤꦴꦠꦶ ꦤꦥ꧀ꦥꦗꦴꦤꦴꦠꦷ’’ꦠꦶ ꦄꦴꦩꦺꦝꦶꦠꦮꦱꦺꦤꦺꦮꦴꦲ. ꦠꦠ꧀ꦡ ꦆꦠꦶ-ꦱꦢ꧀ꦢꦺꦴ ꦏꦴꦫꦟꦠ꧀ꦡꦺꦴꦠꦶ ꦢꦱ꧀ꦱꦺꦤ꧀ꦠꦺꦴ ‘‘ꦪꦱ꧀ꦩꦴ ꦤꦥ꧀ꦥꦗꦴꦤꦴꦠꦶ, ꦠꦱ꧀ꦩꦴ ꦢꦸꦥ꧀ꦥꦚ꧀ꦚꦺꦴꦠꦶ ꦮꦸꦕ꧀ꦕꦠꦷ’’ꦠꦶ ꦄꦴꦲ. ꦆꦢꦁ ꦢꦸꦏ꧀ꦑꦤ꧀ꦠꦶ ꦆꦢꦁ ꦈꦥꦴꦢꦴꦤꦏ꧀ꦑꦤ꧀ꦣꦥꦚ꧀ꦕꦏꦁ ꦢꦸꦏ꧀ꦑꦁ ꦄꦫꦶꦪꦱꦕ꧀ꦕꦁ. ꦠꦚ꧀ꦕ ꦑꦺꦴ ꦫꦸꦥ꧀ꦥꦤꦁ ꦮꦺꦢꦶꦪꦤꦁ ꦱꦚ꧀ꦗꦴꦤꦤꦁ ꦄꦨꦶꦱꦔ꧀ꦑꦫꦟꦁ ꦮꦶꦗꦴꦤꦤꦤ꧀ꦠꦶ ꦱꦔ꧀ꦑꦺꦥꦠꦺꦴ ꦌꦠ꧀ꦠꦏꦁ. ꦆꦠꦺꦴ ꦈꦢ꧀ꦣꦁ ꦏꦶꦚ꧀ꦕꦶ ꦣꦩ꧀ꦩꦗꦴꦠꦁ ꦢꦸꦏ꧀ꦑꦁ ꦄꦫꦶꦪꦱꦕ꧀ꦕꦁ ꦤꦴꦩ ꦤꦠ꧀ꦡꦷꦠꦶ ꦪꦴꦡꦴꦮꦱꦫꦱꦭꦏ꧀ꦑꦟꦠꦺꦴ ꦥꦮꦠ꧀ꦠꦶꦏ꧀ꦏꦩꦠꦺꦴ ꦕꦺꦮ ꦥꦷꦭ꦳ꦤꦱꦔ꧀ꦑꦠꦱꦤ꧀ꦠꦴꦥꦮꦶꦥꦫꦶꦟꦴꦩꦭꦏ꧀ꦑꦟꦠꦺꦴ ꦕ ꦪꦡꦴꦨꦹꦠꦁ ꦄꦫꦶꦪꦩꦒ꧀ꦒꦥꦚ꧀ꦚꦴꦪ ꦤꦥ꧀ꦥꦗꦴꦤꦴꦠꦶ. ꦄꦮꦱꦺꦱꦥꦕ꧀ꦕꦪꦱꦩꦴꦒꦩꦺ ꦈꦢꦪꦠꦶ ꦈꦥ꧀ꦥꦗ꧀ꦗꦠꦶ, ꦱ꧀ꦮꦴꦪꦁ ꦱꦩꦸꦢꦪꦺꦴ ꦱꦁꦱꦴꦫꦥꦮꦠ꧀ꦠꦶꦨꦴꦮꦺꦤꦴꦠꦶ ꦄꦴꦲ ‘‘ꦥꦮꦠ꧀ꦠꦶꦢꦸꦏ꧀ꦑꦥꦨꦴꦮꦶꦏꦴ’’ꦠꦶ, ꦢꦸꦏ꧀ꦑꦱꦕ꧀ꦕꦱ꧀ꦱ ꦈꦥ꧀ꦥꦴꦢꦶꦏꦴꦠꦶ ꦄꦠ꧀ꦡꦺꦴ. ꦪꦴꦡꦴꦮꦱꦫꦱꦭꦏ꧀ꦑꦟꦠꦺꦴꦠꦶ ꦪꦡꦴꦨꦹꦠꦁ ꦄꦤꦸꦥꦕ꧀ꦖꦺꦢꦏꦫꦟꦫꦱꦠꦺꦴ ꦕꦺꦮ ꦱꦩ꧀ꦥꦶꦟ꧀ꦝꦤꦤꦶꦢꦴꦤꦱꦁꦪꦺꦴꦒꦥꦭꦶꦧꦺꦴꦣꦭꦏ꧀ꦑꦟꦠꦺꦴ ꦕ.

ꦆꦢꦁ ꦤꦴꦩ ꦜꦴꦤꦁ ꦥꦠ꧀ꦮꦴꦠꦶ ꦆꦢꦁ ꦤꦴꦩ ꦄꦥ꧀ꦥꦮꦠ꧀ꦠꦶꦏꦴꦫꦟꦁ ꦄꦴꦒꦩ꧀ꦩ. ꦤꦶꦫꦸꦗ꧀ꦙꦠꦷꦠꦶ ꦄꦤꦸꦥ꧀ꦥꦴꦢꦤꦶꦫꦺꦴꦣꦮꦱꦺꦤ ꦤꦶꦫꦸꦗ꧀ꦙꦠꦶ, ꦠꦺꦤꦴꦲ ‘‘ꦈꦨꦶꦤ꧀ꦤꦁ ꦄꦥ꧀ꦥꦮꦠ꧀ꦠꦷ’’ꦠꦶ. ꦪꦴꦡꦴꦮꦱꦫꦱꦭꦏ꧀ꦑꦟꦠꦺꦴꦠꦶ ꦪꦡꦴꦨꦹꦠꦁ ꦄꦕ꧀ꦕꦸꦠꦶꦫꦱꦠꦺꦴ ꦕꦺꦮ ꦤꦶꦱ꧀ꦱꦫꦟꦮꦶꦮꦺꦏꦴꦱꦔ꧀ꦑꦠꦴꦩꦠꦭꦏ꧀ꦑꦟꦠꦺꦴ ꦕ. ꦄꦪꦁ ꦥꦛꦶꦥꦢꦴꦠꦶ ꦄꦪꦁ ꦱꦩ꧀ꦩꦴꦢꦶꦛ꧀ꦜꦶꦄꦴꦢꦶꦏꦴ ꦱꦩꦺꦴꦣꦴꦤꦭꦏ꧀ꦑꦟꦴ ꦥꦛꦶꦥꦗ꧀ꦗꦠꦶ ꦌꦠꦴꦪꦴꦠꦶ ꦥꦛꦶꦥꦢꦴ. ꦢꦸꦏ꧀ꦑꦤꦶꦫꦺꦴꦣꦁ ꦒꦕ꧀ꦖꦠꦷꦠꦶ ꦢꦸꦏ꧀ꦑꦤꦶꦫꦺꦴꦣꦁ ꦤꦶꦧ꧀ꦧꦴꦤꦁ ꦱꦕ꧀ꦖꦶꦏꦶꦫꦶꦪꦴꦨꦶꦱꦩꦪꦮꦱꦺꦤ ꦒꦕ꧀ꦖꦠꦶ ꦄꦴꦫꦧ꧀ꦨ ꦥꦮꦠ꧀ꦠꦠꦶ. ꦪꦴꦡꦴꦮꦱꦫꦱꦭꦏ꧀ꦑꦟꦠꦺꦴꦠꦶ ꦪꦡꦴꦨꦹꦠꦁ ꦏꦶꦭꦺꦱꦥ꧀ꦥꦲꦴꦤꦏꦫꦟꦱꦫꦱꦠꦺꦴ ꦕꦺꦮ ꦤꦶꦪ꧀ꦪꦴꦤꦲꦺꦠꦸꦢꦱ꧀ꦱꦤꦴꦣꦶꦥꦠꦺꦪ꧀ꦪꦭꦏ꧀ꦑꦟꦠꦺꦴ ꦕ ꦤꦥ꧀ꦥꦗꦴꦤꦴꦠꦶ. ꦄꦤꦤ꧀ꦠꦫꦮꦴꦫꦺꦠꦶ ꦢꦸꦠꦶꦪꦮꦴꦫꦺ. ꦆꦩꦶꦤꦴꦮ ꦤꦪꦺꦤꦴꦠꦶ ‘‘ꦆꦢꦁ ꦢꦸꦏ꧀ꦑꦁ, ꦌꦠ꧀ꦠꦏꦁ ꦢꦸꦏ꧀ꦑ’’ꦤ꧀ꦠꦶꦄꦴꦢꦶꦤꦴ ꦥꦜꦩꦮꦴꦫꦺ ꦮꦸꦠ꧀ꦠꦤꦪꦺꦤ. ꦠꦠ꧀ꦡ ꦲꦶ ꦢꦸꦥ꧀ꦥꦚ꧀ꦚꦤꦶꦢ꧀ꦢꦺꦱꦠ꧀ꦠꦴ ꦥꦗꦴꦤꦤꦥꦛꦶꦏ꧀ꦑꦺꦥꦮꦱꦺꦤ ꦢꦺꦱꦤꦴ ꦄꦴꦒꦠꦴ, ꦆꦣ ꦥꦚ꧀ꦚꦮꦤ꧀ꦠꦤꦶꦢ꧀ꦢꦺꦱꦠ꧀ꦠꦴ ꦥꦗꦴꦤꦤꦮꦱꦺꦤꦴꦠꦶ ꦄꦪꦩꦺꦮ ꦮꦶꦱꦺꦱꦺꦴ. ꦌꦠ꧀ꦡꦴꦠꦶ ꦢꦸꦠꦶꦪꦮꦴꦫꦺ.

ꦱꦮꦤꦠꦺꦴꦠꦶ ꦏꦩ꧀ꦩꦛ꧀ꦜꦴꦤꦱ꧀ꦱ ꦱꦮꦤꦠꦺꦴ ꦈꦒ꧀ꦒꦟ꧀ꦲꦴꦠꦶ. ꦒꦤ꧀ꦡꦱꦮꦤꦩꦸꦑꦺꦤ ꦲꦶ ꦠꦢꦠ꧀ꦡꦱ꧀ꦱ ꦈꦒ꧀ꦒꦲꦟꦁ. ꦜꦥꦺꦠ꧀ꦮꦴ ꦠꦟ꧀ꦲꦤ꧀ꦠꦶꦄꦴꦢꦶ ꦠꦱ꧀ꦱ ꦈꦒ꧀ꦒꦲꦟꦴꦏꦴꦫꦤꦶꦢꦱ꧀ꦱꦤꦁ. ꦄꦨꦶꦤꦶꦮꦶꦱꦠꦷꦠꦶ ꦮꦶꦥꦱ꧀ꦱꦤꦴꦨꦶꦤꦶꦮꦺꦱꦮꦱꦺꦤ ꦄꦨꦶꦤꦶꦮꦶꦱꦠꦶ ꦮꦶꦥꦱ꧀ꦱꦤꦴꦏꦩ꧀ꦩꦛ꧀ꦜꦴꦤꦁ ꦥꦛ꧀ꦜꦥꦺꦠꦶ. ꦤꦺꦴ ꦮꦶꦮꦛ꧀ꦛꦺꦠꦶ ꦮꦶꦮꦛ꧀ꦛꦺ ꦄꦨꦶꦤꦶꦮꦺꦱꦺꦴ ꦤ ꦲꦺꦴꦠꦶ ꦄꦮꦶꦱꦪꦠ꧀ꦠꦴ. ꦄꦪꦤ꧀ꦠꦶ ꦕꦠꦸꦱꦕ꧀ꦕꦏꦩ꧀ꦩꦛ꧀ꦜꦴꦤꦶꦏꦺꦴ.

ꦥꦚ꧀ꦕꦏ꧀ꦑꦤ꧀ꦣꦴꦠꦶ ꦥꦚ꧀ꦕꦸꦥꦴꦢꦴꦤꦏ꧀ꦑꦤ꧀ꦣꦴ. ꦑꦤ꧀ꦣꦮꦱꦺꦤ ꦮꦶꦥꦱ꧀ꦱꦤꦴꦨꦶꦤꦶꦮꦺꦱꦱ꧀ꦱ ꦕꦏ꧀ꦑꦴꦢꦶꦮꦱꦺꦤ ꦮꦺꦢꦤꦴꦢꦶꦮꦱꦺꦤ ꦕ ꦱꦠꦶꦥꦶ ꦄꦤꦺꦏꦮꦶꦣꦠ꧀ꦠꦺ ꦱꦸꦏꦫꦁ ꦱꦸꦮꦶꦚ꧀ꦚꦺꦪ꧀ꦪꦤ꧀ꦠꦶ ꦕꦠꦸꦣꦴꦠꦸꦩꦸꦑꦺꦤ ꦠꦁ ꦢꦱ꧀ꦱꦺꦠꦸꦁ ‘‘ꦣꦴꦠꦸꦏꦩ꧀ꦩꦛ꧀ꦜꦴꦤꦮꦱꦺꦤ ꦎꦠꦫꦶꦠ꧀ꦮꦴ’’ꦠꦶ ꦄꦴꦲ. ꦫꦹꦥꦤ꧀ꦠꦶ ꦮꦮꦠ꧀ꦡꦥꦺꦠꦷꦠꦶ ꦫꦸꦥ꧀ꦥꦤꦛ꧀ꦜꦺꦤ ꦫꦹꦥꦤ꧀ꦠꦶ ꦄꦱꦔ꧀ꦏꦫꦠꦺꦴ ꦥꦫꦶꦕ꧀ꦖꦶꦤ꧀ꦢꦠꦶ. ꦠꦢꦴꦫꦩ꧀ꦩꦟꦴꦠꦶ ꦠꦁ ꦫꦹꦥꦁ ꦄꦴꦫꦩ꧀ꦩꦟꦁ ꦏꦠ꧀ꦮꦴ ꦥꦮꦠ꧀ꦠꦤꦏꦴ. ꦤꦴꦩꦤ꧀ꦠꦶ ꦮꦺꦢꦤꦴꦢꦶꦕꦠꦸꦏ꧀ꦏꦁ ꦤꦩꦤꦛ꧀ꦜꦺꦤ ꦤꦴꦩꦤ꧀ꦠꦶ ꦮꦮꦠ꧀ꦡꦴꦥꦺꦠꦶ. ꦪꦩꦏꦠꦴꦭꦏ꧀ꦑꦤ꧀ꦣꦁ ꦨꦶꦤ꧀ꦢꦤ꧀ꦠꦺꦴ ꦮꦶꦪ ꦪꦩꦏꦁ ꦨꦶꦤ꧀ꦢꦶꦠ꧀ꦮꦴ ‘‘ꦄꦫꦹꦥꦁ, ꦫꦹꦥꦚ꧀ꦕꦴ’’ꦠꦶ ꦢ꧀ꦮꦺꦮ ꦆꦩꦺ ꦣꦩ꧀ꦩꦴ, ꦤ ꦌꦠ꧀ꦡ ꦏꦺꦴꦕꦶ ꦄꦠ꧀ꦠꦴ ꦮꦴ ꦄꦠ꧀ꦠꦤꦶꦪꦁ ꦮꦴꦠꦶ ꦤꦴꦩꦫꦹꦥꦁ ꦮꦮꦠ꧀ꦡꦥꦺꦠꦶ ꦥꦫꦶꦕ꧀ꦖꦶꦤ꧀ꦢꦠꦶ ꦥꦫꦶꦒ꧀ꦒꦟ꧀ꦲꦴꦠꦶ. ꦌꦠ꧀ꦠꦴꦮꦠꦴ ꦢꦶꦛ꧀ꦜꦶꦮꦶꦱꦸꦢ꧀ꦣꦶ ꦢꦱ꧀ꦱꦶꦠꦴ. ꦠꦁ ꦥꦤꦺꦠꦁ ꦤꦴꦩꦫꦹꦥꦁ ꦤ ꦄꦲꦺꦠꦸꦏꦁ. ꦪꦱ꧀ꦩꦴ ꦱꦧ꧀ꦧꦁ ꦱꦧ꧀ꦧꦠ꧀ꦡ ꦱꦧ꧀ꦧꦢꦴ ꦕ ꦤꦠ꧀ꦡꦶ, ꦠꦱ꧀ꦩꦴ ꦱꦲꦺꦠꦸꦏꦁ. ꦏꦷꦢꦶꦱꦺꦤ ꦲꦺꦠꦸꦤꦴ? ꦤ ꦆꦱ꧀ꦱꦫꦴꦢꦶꦮꦶꦱꦩꦲꦺꦠꦸꦤꦴ. ꦪꦁ ꦥꦤꦺꦠ꧀ꦡ ꦮꦠ꧀ꦠꦧ꧀ꦧꦁ, ꦠꦁ ꦮꦶꦱꦸꦢ꧀ꦣꦶꦩꦒ꧀ꦒꦱꦁꦮꦟ꧀ꦟꦤꦴꦪꦁ (ꦮꦶꦱꦸꦢ꧀ꦣꦶ. ꦩꦲꦴꦛꦷ. ꧒.꧔꧔꧗) ꦮꦸꦠ꧀ꦠꦤꦪꦺꦤ ꦒꦲꦺꦠꦧ꧀ꦧꦁ. ꦱꦲꦺꦠꦸꦏꦠ꧀ꦠꦴ ꦌꦮ ꦱꦥꦕ꧀ꦕꦪꦁ. ꦄꦮꦶꦗ꧀ꦗꦴꦢꦪꦺꦴꦠꦶ ꦄꦮꦶꦗ꧀ꦗꦴꦠꦟ꧀ꦲꦸꦥꦴꦢꦴꦤꦏꦩ꧀ꦩꦴꦲꦴꦫꦴꦢꦪꦺꦴ. ꦌꦮꦤ꧀ꦠꦶ ‘‘ꦠꦁ ꦥꦤꦺꦠ’’ꦤ꧀ꦠꦶꦄꦴꦢꦶꦤꦴ ꦮꦸꦠ꧀ꦠꦥ꧀ꦥꦏꦴꦫꦺꦤ ꦄꦮꦶꦗ꧀ꦗꦴꦢꦶꦏꦺ ꦥꦕ꧀ꦕꦪꦺ ꦕꦺꦮ ꦫꦹꦥꦮꦺꦢꦤꦴꦢꦶꦏꦺ ꦥꦕ꧀ꦕꦪꦸꦥ꧀ꦥꦤ꧀ꦤꦣꦩ꧀ꦩꦺ ꦕ ꦮꦮꦠ꧀ꦡꦥꦺꦠ꧀ꦮꦴ ꦥꦫꦶꦕ꧀ꦖꦶꦤ꧀ꦢꦶꦠ꧀ꦮꦴ ꦥꦫꦶꦒ꧀ꦒꦲꦺꦠ꧀ꦮꦴ. ꦮꦸꦠ꧀ꦠꦚ꧀ꦲꦺꦠꦁ ‘‘ꦄꦮꦶꦗ꧀ꦗꦴꦱꦩꦸꦢꦪꦴ ꦫꦹꦥꦱꦩꦸꦢꦪꦺꦴ, ꦠꦟ꧀ꦲꦴꦱꦩꦸꦢꦪꦴ ꦫꦹꦥꦱꦩꦸꦢꦪꦺꦴ’’ꦠꦶ (ꦥꦛꦶ. ꦩ. ꧑.꧕꧐). ꦌꦠ꧀ꦠꦴꦮꦠꦴ ꦏꦔ꧀ꦑꦴꦮꦶꦠꦫꦟꦮꦶꦱꦸꦢ꧀ꦣꦶꦁ ꦢꦱ꧀ꦱꦺꦠꦶ.

ꦲꦸꦠ꧀ꦮꦴꦠꦶ ꦲꦺꦠꦸꦥꦕ꧀ꦕꦪꦱꦩꦮꦴꦪꦺ ꦈꦥ꧀ꦥꦗ꧀ꦗꦶꦠ꧀ꦮꦴ. ꦄꦨꦴꦮꦛ꧀ꦜꦺꦤꦴꦠꦶ ꦠꦢꦤꦤ꧀ꦠꦫꦩꦺꦮ ꦮꦶꦤꦱ꧀ꦱꦤꦛ꧀ꦜꦺꦤ. ꦄꦤꦶꦕ꧀ꦕꦴꦠꦶ ꦄꦤꦶꦕ꧀ꦕꦴ ꦄꦢ꧀ꦣꦸꦮꦴ. ꦄꦤꦶꦕ꧀ꦕꦭꦏ꧀ꦑꦟꦁ ꦄꦴꦫꦺꦴꦥꦺꦠꦷꦠꦶ ꦠꦺꦱꦸ ꦥꦚ꧀ꦕꦱꦸ ꦑꦤ꧀ꦣꦺꦱꦸ ꦄꦤꦶꦕ꧀ꦕꦠꦴꦱꦔ꧀ꦑꦴꦠꦁ ꦱꦴꦩꦚ꧀ꦚꦭꦏ꧀ꦑꦟꦁ ꦤꦶꦫꦺꦴꦥꦺꦠꦶ. ꦠꦠꦺꦴꦠꦶ ꦄꦤꦶꦕ꧀ꦕꦭꦏ꧀ꦑꦟꦴꦫꦺꦴꦥꦤꦠꦺꦴ ꦥꦫꦁ, ꦠꦠꦺꦴ ꦮꦴ ꦄꦤꦶꦕ꧀ꦕꦨꦴꦮꦠꦺꦴ. ꦈꦢꦪꦧ꧀ꦧꦪꦥ꧀ꦥꦛꦶꦥꦷꦭ꦳ꦤꦴꦏꦴꦫꦺꦤꦴꦠꦶ ꦈꦥ꧀ꦥꦴꦢꦤꦶꦫꦺꦴꦣꦺꦲꦶ ꦥꦠꦶ ꦥꦠꦶ ꦄꦨꦶꦏ꧀ꦑꦟꦁ ꦥꦷꦭ꦳ꦤꦴꦏꦴꦫꦺꦤ ꦲꦺꦠꦸꦤꦴ ꦢꦸꦏ꧀ꦑꦴ ꦄꦤꦶꦛ꧀ꦜꦴ, ꦢꦸꦏ꧀ꦑꦩꦴ ꦮꦴ. ꦄꦮꦱꦮꦠ꧀ꦠꦤꦴꦏꦴꦫꦺꦤꦴꦠꦶ ꦏꦱ꧀ꦱꦕꦶ ꦮꦱꦺꦤ ꦄꦮꦱꦮꦠ꧀ꦠꦤꦴꦏꦴꦫꦺꦤ. ꦄꦤꦠ꧀ꦠꦴꦠꦶ ꦤ ꦱꦪꦁ ꦄꦠ꧀ꦠꦴ, ꦤꦴꦥꦶ ꦤꦺꦱꦁ ꦏꦺꦴꦕꦶ ꦄꦠ꧀ꦠꦴ ꦄꦠ꧀ꦡꦷꦠꦶ ꦄꦤꦠ꧀ꦠꦴꦠꦶ. ꦠꦶꦭꦏ꧀ꦑꦟꦁꦄꦴꦫꦺꦴꦥꦺꦠ꧀ꦮꦴꦠꦶ ꦌꦮꦁ ꦄꦤꦶꦕ꧀ꦕꦱ꧀ꦱ ꦢꦸꦏ꧀ꦑꦨꦴꦮꦠꦺꦴ, ꦢꦸꦏ꧀ꦑꦱ꧀ꦱ ꦕ ꦄꦤꦠ꧀ꦠꦨꦴꦮꦠꦺꦴ ꦑꦤ꧀ꦣꦥꦚ꧀ꦕꦏꦺ ꦠꦶꦮꦶꦣꦩ꧀ꦥꦶ ꦱꦴꦩꦚ꧀ꦚꦭꦏ꧀ꦑꦟꦁ ꦄꦴꦫꦺꦴꦥꦺꦠ꧀ꦮꦴ. ꦱꦩ꧀ꦩꦱꦤ꧀ꦠꦺꦴꦠꦶ ꦈꦢꦪꦧ꧀ꦧꦪꦚꦴꦟꦸꦥ꧀ꦥꦠ꧀ꦠꦶꦪꦴ ꦈꦥ꧀ꦥꦤ꧀ꦤꦺ ꦮꦶꦥꦱ꧀ꦱꦤꦸꦥꦏ꧀ꦏꦶꦭꦺꦱꦺ ꦥꦲꦴꦪ ꦩꦒ꧀ꦒꦴꦩꦒ꧀ꦒꦁ ꦮꦮꦠ꧀ꦡꦥꦺꦠ꧀ꦮꦴ ꦈꦢꦪꦧ꧀ꦧꦪꦚꦴꦟꦴꦢꦶꦮꦶꦥꦱ꧀ꦱꦤꦴꦥꦛꦶꦥꦴꦛꦶꦪꦴ ꦱꦔ꧀ꦑꦴꦫꦺ ꦱꦩ꧀ꦩꦱꦤ꧀ꦠꦺꦴ ꦒꦺꦴꦠ꧀ꦫꦨꦸꦚꦴꦟꦴꦤꦤ꧀ꦠꦫꦁ ꦭꦺꦴꦏꦸꦠ꧀ꦠꦫꦩꦒ꧀ꦒꦁ ꦥꦴꦥꦸꦟꦴꦠꦶ.

ꦌꦏꦥꦛꦶꦮꦺꦣꦺꦤꦴꦠꦶ ꦌꦏꦺꦤꦺꦮ ꦚꦴꦟꦺꦤ ꦥꦛꦶꦮꦶꦗ꧀ꦙꦤꦺꦤ. ꦥꦛꦶꦮꦺꦣꦺꦴ ꦥꦛꦶꦓꦴꦠꦴꦨꦴꦮꦺꦤ ꦮꦶꦱꦪꦺ ꦤꦶꦱ꧀ꦱꦔ꧀ꦒꦕꦴꦫꦱꦔ꧀ꦑꦴꦠꦁ ꦤꦶꦧ꧀ꦧꦶꦗ꧀ꦙꦤꦁ. ꦄꦨꦶꦱꦩꦪꦺꦴ ꦄꦮꦶꦫꦗ꧀ꦙꦶꦠ꧀ꦮꦴ ꦄꦣꦶꦒꦩꦤꦱꦔ꧀ꦑꦴꦠꦺꦴ ꦄꦮꦧꦺꦴꦣꦺꦴ. ‘‘ꦆꦢꦁ ꦢꦸꦏ꧀ꦑꦁ, ꦌꦠ꧀ꦠꦁ ꦢꦸꦏ꧀ꦑꦁ, ꦤ ꦆꦠꦺꦴ ꦨꦶꦪ꧀ꦪꦺꦴ’’ꦠꦶ ꦥꦫꦶꦕ꧀ꦖꦶꦤ꧀ꦢꦶꦠ꧀ꦮꦴ ꦪꦴꦡꦴꦮꦠꦺꦴ ꦗꦴꦤꦤꦩꦺꦮ ꦮꦸꦠ꧀ꦠꦤꦪꦺꦤ ꦥꦛꦶꦮꦺꦣꦺꦴꦠꦶ ꦥꦫꦶꦚ꧀ꦚꦴꦥꦛꦶꦮꦺꦣꦺꦴ, ꦆꦢꦚ꧀ꦕ ꦪꦡꦴ ꦚꦴꦟꦺ ꦥꦮꦠ꧀ꦠꦺ ꦥꦕ꧀ꦖꦴ ꦢꦸꦏ꧀ꦑꦱ꧀ꦱ ꦱꦫꦹꦥꦴꦢꦶꦥꦫꦶꦕ꧀ꦖꦺꦢꦺ ꦱꦩ꧀ꦩꦺꦴꦲꦺꦴ ꦤ ꦲꦺꦴꦠꦶ, ꦠꦡꦴ ꦥꦮꦠ꧀ꦠꦶꦁ ꦒꦲꦺꦠ꧀ꦮꦴ ꦮꦸꦠ꧀ꦠꦁ, ꦤ ꦥꦤ ꦩꦒ꧀ꦒꦚꦴꦟꦱ꧀ꦱ ‘‘ꦆꦢꦁ ꦢꦸꦏ꧀ꦑ’’ꦤ꧀ꦠꦶꦄꦴꦢꦶꦤꦴ ꦥꦮꦠ꧀ꦠꦤꦠꦺꦴ. ꦠꦺꦤꦴꦲ ‘‘ꦠꦱ꧀ꦩꦶꦚ꧀ꦕꦱ꧀ꦱ ꦑꦟꦺ’’ꦠꦶꦄꦴꦢꦶ. ꦥꦲꦷꦤꦱ꧀ꦱ ꦥꦸꦤ ꦄꦥꦲꦴꦠꦧ꧀ꦧꦠꦴꦪ ꦥꦏꦛ꧀ꦜꦁ ꦲꦴꦤꦁ ꦕꦗꦤꦁ ꦱꦩꦸꦕ꧀ꦖꦶꦤ꧀ꦢꦤꦁ ꦥꦲꦴꦤꦁ, ꦥꦲꦴꦤꦩꦺꦮ ꦮꦸꦠ꧀ꦠꦤꦪꦺꦤ ꦥꦛꦶꦮꦺꦣꦺꦴꦠꦶ ꦥꦲꦴꦤꦥꦛꦶꦮꦺꦣꦺꦴ. ꦄꦪꦩ꧀ꦥꦶ ꦪꦺꦤ ꦏꦶꦭꦺꦱꦺꦤ ꦄꦥ꧀ꦥꦲꦷꦪꦩꦴꦤꦺꦤ ꦩꦒ꧀ꦒꦨꦴꦮꦤꦴꦪ ꦤ ꦨꦮꦶꦠꦧ꧀ꦧꦁ, ꦄꦱꦠꦶ ꦕ ꦩꦒ꧀ꦒꦨꦴꦮꦤꦴꦪ ꦪꦺꦴ ꦈꦥ꧀ꦥꦗ꧀ꦗꦺꦪ꧀ꦪ, ꦠꦱ꧀ꦱ ꦥꦢꦓꦴꦠꦁ ꦏꦫꦺꦴꦤ꧀ꦠꦱ꧀ꦱ ꦄꦤꦸꦥ꧀ꦥꦠ꧀ꦠꦶꦣꦩ꧀ꦩꦠꦁ ꦄꦴꦥꦴꦢꦺꦤ꧀ꦠꦱ꧀ꦱ ꦚꦴꦟꦱ꧀ꦱ ꦠꦡꦴꦥꦮꦠ꧀ꦠꦶꦪꦴ ꦥꦛꦶꦓꦴꦠꦴꦨꦴꦮꦺꦤ ꦤꦶꦱ꧀ꦱꦔ꧀ꦒꦕꦴꦫꦁ ꦈꦥꦴꦢꦴꦪ ꦌꦮꦁ ꦮꦸꦠ꧀ꦠꦺꦴ. ꦱꦕ꧀ꦖꦶꦏꦶꦫꦶꦪꦴ ꦥꦕ꧀ꦕꦏ꧀ꦑꦏꦫꦟꦁ ꦄꦤꦸꦱ꧀ꦱꦮꦴꦏꦴꦫꦥꦫꦶꦮꦶꦠꦏ꧀ꦏꦴꦢꦶꦏꦺ ꦩꦸꦚ꧀ꦕꦶꦠ꧀ꦮꦴꦮ ꦱꦫꦹꦥꦠꦺꦴ ꦄꦴꦫꦩ꧀ꦩꦟꦏꦫꦟꦁ ‘‘ꦆꦢꦁ ꦠ’’ꦤ꧀ꦠꦶ ꦪꦴꦡꦴꦮꦱꦨꦴꦮꦠꦺꦴ ꦒꦲꦟꦁ, ꦱꦴ ꦌꦮ ꦮꦸꦠ꧀ꦠꦤꦪꦺꦤ ꦥꦛꦶꦮꦺꦣꦺꦴꦠꦶ ꦱꦕ꧀ꦖꦶꦏꦶꦫꦶꦪꦴꦥꦛꦶꦮꦺꦣꦺꦴ. ꦄꦪꦩ꧀ꦥꦶ ꦪꦱ꧀ꦱ ꦄꦴꦮꦫꦟꦱ꧀ꦱ ꦄꦱꦩꦸꦕ꧀ꦖꦶꦤ꧀ꦢꦤꦠꦺꦴ ꦚꦴꦟꦁ ꦤꦶꦫꦺꦴꦣꦁ ꦄꦴꦭꦩ꧀ꦧꦶꦠꦸꦁ ꦤ ꦱꦏ꧀ꦏꦺꦴꦠꦶ, ꦠꦱ꧀ꦱ ꦱꦩꦸꦕ꧀ꦖꦶꦤ꧀ꦢꦤꦠꦺꦴ ꦠꦁ ꦱꦫꦹꦥꦠꦺꦴ ꦮꦶꦨꦴꦮꦶꦠꦩꦺꦮ ꦥꦮꦠ꧀ꦠꦠꦷꦠꦶ ꦌꦮꦁ ꦮꦸꦠ꧀ꦠꦺꦴ.

ꦨꦴꦮꦤꦴ ꦈꦥ꧀ꦥꦴꦢꦤꦴ ꦮꦝ꧀ꦞꦤꦴ ꦕ. ꦠꦠ꧀ꦡ ꦥꦜꦩꦩꦒ꧀ꦒꦺ ꦈꦥ꧀ꦥꦴꦢꦤꦛ꧀ꦜꦺꦤ ꦨꦴꦮꦤꦴ, ꦢꦸꦠꦶꦪꦴꦢꦷꦱꦸ ꦮꦝ꧀ꦞꦤꦛ꧀ꦜꦺꦤ, ꦈꦨꦪꦠ꧀ꦡꦴꦥꦶ ꦮꦴ ꦈꦨꦪꦁ ꦮꦺꦢꦶꦠꦧ꧀ꦧꦁ. ꦥꦜꦩꦩꦒ꧀ꦒꦺꦴꦥꦶ ꦲꦶ ꦪꦡꦴꦫꦲꦁ ꦮꦸꦛ꧀ꦜꦴꦤꦒꦴꦩꦶꦤꦶꦪꦁ ꦥꦮꦠ꧀ꦠꦁ ꦥꦫꦶꦗꦴꦤꦤꦴꦢꦶꦁ ꦮꦝ꧀ꦞꦺꦤ꧀ꦠꦺꦴ ꦥꦮꦠ꧀ꦠꦺꦴꦠꦶ ꦠꦠ꧀ꦡꦴꦥꦶ ꦮꦝ꧀ꦞꦤꦛ꧀ꦜꦺꦤ ꦨꦴꦮꦤꦴꦠꦶ ꦱꦏ꧀ꦏꦴ ꦮꦶꦚ꧀ꦚꦴꦠꦸꦁ. ꦢꦸꦠꦶꦪꦴꦢꦷꦱꦸꦥꦶ ꦄꦥ꧀ꦥꦲꦷꦤꦏꦶꦭꦺꦱꦥ꧀ꦥꦲꦴꦤꦠꦺꦴ ꦥꦸꦒ꧀ꦒꦭꦤ꧀ꦠꦫꦱꦴꦣꦤꦠꦺꦴ ꦕ ꦈꦥ꧀ꦥꦴꦢꦤꦛ꧀ꦜꦺꦤ ꦨꦴꦮꦤꦴ, ꦱꦴ ꦌꦮ ꦮꦸꦠ꧀ꦠꦤꦪꦺꦤ ꦥꦛꦶꦮꦺꦣꦺꦴꦠꦶ ꦨꦴꦮꦤꦴꦥꦛꦶꦮꦺꦣꦺꦴ. ꦄꦪꦩ꧀ꦥꦶ ꦪꦡꦴ ꦚꦴꦟꦺ ꦥꦮꦠ꧀ꦠꦺ ꦥꦕ꧀ꦖꦴ ꦩꦒ꧀ꦒꦣꦩ꧀ꦩꦴꦤꦁ ꦱꦫꦹꦥꦥꦫꦶꦕ꧀ꦖꦺꦢꦺ ꦱꦩ꧀ꦩꦺꦴꦲꦺꦴ ꦤ ꦲꦺꦴꦠꦶ, ꦠꦡꦴ ꦥꦮꦠ꧀ꦠꦶꦁ ꦒꦲꦺꦠ꧀ꦮꦴ ꦮꦸꦠ꧀ꦠꦺꦴ. ꦠꦶꦛ꧀ꦜꦤ꧀ꦠꦸ ꦠꦴꦮ ꦪꦡꦴꦣꦶꦒꦠꦴ ꦩꦒ꧀ꦒꦣꦩ꧀ꦩꦴ, ꦪꦡꦴꦥꦮꦠ꧀ꦠꦺꦱꦸ ꦦꦭꦺꦱꦸꦥꦶ ꦄꦪꦁ ꦪꦡꦴꦣꦶꦒꦠꦱꦕ꧀ꦕꦣꦩ꧀ꦩꦺꦱꦸ ꦮꦶꦪ ꦮꦶꦒꦠꦱꦩ꧀ꦩꦺꦴꦲꦺꦴꦮ ꦲꦺꦴꦠꦶ ꦱꦺꦏ꧀ꦑꦺꦴꦥꦶ ꦱꦩꦴꦤꦺꦴ. ꦠꦺꦤ ꦮꦸꦠ꧀ꦠꦁ – ‘‘ꦢꦶꦛ꧀ꦜꦣꦩ꧀ꦩꦺꦴ ꦥꦠ꧀ꦠꦣꦩ꧀ꦩꦺꦴ ꦮꦶꦢꦶꦠꦣꦩ꧀ꦩꦺꦴ ꦥꦫꦶꦪꦺꦴꦒꦴꦭ꦳꧀ꦲꦣꦩ꧀ꦩꦺꦴ’’ꦠꦶ (ꦩꦲꦴꦮ. ꧒꧗). ꦪꦡꦴ ꦕꦱ꧀ꦱ ꦣꦩ꧀ꦩꦴ ꦠꦴꦱꦁ ꦗꦺꦴꦠꦶꦠꦴ ꦪꦡꦴꦣꦶꦒꦠꦱꦕ꧀ꦕꦣꦩ꧀ꦩꦴꦮꦭꦩ꧀ꦧꦶꦤꦶꦪꦺꦴ ꦩꦒ꧀ꦒꦮꦷꦡꦶꦠꦺꦴ ꦥꦫꦠꦺꦴ ꦩꦒ꧀ꦒꦦꦭꦥꦲꦷꦤꦴꦮꦱꦶꦛ꧀ꦜꦏꦶꦭꦺꦱꦤꦶꦧ꧀ꦧꦴꦤꦴꦤꦁ ꦥꦕ꧀ꦕꦮꦺꦏ꧀ꦑꦟꦴ ꦥꦮꦠ꧀ꦠꦤ꧀ꦠꦶ. ꦢꦸꦏ꧀ꦑꦱꦕ꧀ꦕꦣꦩ꧀ꦩꦴ ꦲꦶ ꦱꦏ꧀ꦏꦴꦪꦢꦶꦛ꧀ꦜꦶꦄꦴꦢꦪꦺꦴ. ꦄꦪꦚ꧀ꦕ ꦄꦠ꧀ꦡꦮꦟ꧀ꦟꦤꦴ ꦥꦫꦶꦚ꧀ꦚꦴꦨꦶꦱꦩꦪꦺꦤꦴꦠꦶꦄꦴꦢꦷꦱꦸꦥꦶ ꦮꦶꦨꦴꦮꦺꦠꦧ꧀ꦧꦴ. ꦏꦶꦕ꧀ꦕꦠꦺꦴꦠꦶ ꦄꦱꦩ꧀ꦩꦺꦴꦲꦠꦺꦴ. ꦤꦶꦫꦺꦴꦣꦁ ꦄꦴꦫꦩ꧀ꦩꦟꦠꦺꦴꦠꦶ ꦌꦠ꧀ꦡ ‘‘ꦄꦴꦫꦩ꧀ꦩꦟꦠꦺꦴꦥꦷ’’ꦠꦶ ꦥꦶ-ꦱꦢ꧀ꦢꦺꦴ ꦭꦸꦠ꧀ꦠꦤꦶꦢ꧀ꦢꦶꦛ꧀ꦜꦺꦴ ꦢꦛ꧀ꦜꦧ꧀ꦧꦺꦴ ꦤꦶꦫꦺꦴꦣꦺꦥꦶ ꦄꦱꦩ꧀ꦩꦺꦴꦲꦥꦛꦶꦮꦺꦣꦱ꧀ꦱ ꦭꦧ꧀ꦨꦤꦠꦺꦴ. ꦌꦠꦱ꧀ꦱꦴꦠꦶ ꦕꦠꦸꦱꦕ꧀ꦕꦏꦩ꧀ꦩꦛ꧀ꦜꦴꦤꦶꦏꦱ꧀ꦱ ꦥꦸꦒ꧀ꦒꦭꦱ꧀ꦱ.

ꦥꦚ꧀ꦚꦮꦴꦠꦶ ꦤꦶꦢ꧀ꦢꦶꦛ꧀ꦜꦺꦴ ꦤꦶꦥ꧀ꦥꦫꦶꦪꦴꦪꦠꦺꦴ ꦥꦚ꧀ꦚꦮꦤ꧀ꦠꦠꦴꦪ ꦆꦣ ꦄꦣꦶꦥ꧀ꦥꦺꦠꦠ꧀ꦠꦴ. ꦥꦴꦭ꦳ꦶꦠꦺꦴꦠꦶ ꦣꦩ꧀ꦩꦠꦺꦴ. ꦄꦠ꧀ꦡꦠꦺꦴꦠꦶ ꦄꦛ꧀ꦜꦏꦡꦴꦠꦺꦴ. ꦄꦤꦸꦱꦤ꧀ꦣꦶꦠꦺꦴꦠꦶ ꦠꦱ꧀ꦩꦶꦁ ꦠꦱ꧀ꦩꦶꦁ ꦱꦸꦠ꧀ꦠꦺ ꦠꦁꦠꦁꦄꦤꦸꦱꦤ꧀ꦣꦶꦠꦺꦴ. ꦥꦸꦧ꧀ꦧꦴꦥꦫꦠꦺꦴꦠꦶ ꦥꦸꦧ꧀ꦧꦺꦤꦴꦥꦫꦱ꧀ꦱ ꦱꦁꦱꦤ꧀ꦢꦤꦠꦺꦴ. ꦱꦔ꧀ꦒꦷꦠꦶꦏ꧀ꦏꦩꦺꦤ ꦕꦺꦠ꧀ꦡ ꦥꦸꦧ꧀ꦧꦴꦥꦫꦠꦴ ꦮꦺꦢꦶꦠꦧ꧀ꦧꦴ. ꦠꦁꦠꦁꦢꦺꦱꦤꦴꦪꦩꦺꦮ ꦮꦴ ꦥꦸꦧ꧀ꦧꦨꦴꦒꦺꦤ ꦄꦥꦫꦨꦴꦒꦱ꧀ꦱ ꦱꦁꦱꦤ꧀ꦢꦤꦠꦺꦴ. ꦮꦶꦚ꧀ꦚꦴꦟꦕꦫꦶꦠꦺꦴꦠꦶ ꦮꦶꦗꦴꦤꦤꦕꦫꦶꦠꦺꦴ ꦮꦷꦩꦁꦱꦤꦕꦫꦶꦠꦺꦴ ꦠꦺꦥꦶꦛꦏꦺ ꦧꦸꦢ꧀ꦣꦮꦕꦤꦺ ꦮꦶꦕꦴꦫꦟꦴꦕꦴꦫꦮꦺꦥꦸꦭ꧀ꦭꦠꦺꦴ. ꦥꦚ꧀ꦚꦮꦴꦠꦶ ꦤ ꦮꦠ꧀ꦠꦧ꧀ꦧꦺꦴ ꦩꦒ꧀ꦒꦺꦤꦴꦒꦠꦴꦪ ꦥꦚ꧀ꦚꦴꦪ ꦄꦨꦴꦮꦠꦺꦴ. ꦄꦗ꧀ꦗ ꦄꦗ꧀ꦗꦺꦮ ꦄꦫꦲꦠ꧀ꦠꦤ꧀ꦠꦶ ꦆꦠ꧀ꦠꦫꦁ ꦄꦠꦶꦑꦶꦥ꧀ꦥꦩꦺꦮꦴꦠꦶ ꦄꦣꦶꦥ꧀ꦥꦴꦪꦺꦴ. ꦥꦚ꧀ꦚꦮꦴꦥꦏ꧀ꦑꦁ ꦨꦗꦠꦶ ꦱꦺꦏ꧀ꦑꦥꦫꦶꦪꦴꦪꦱꦧ꧀ꦨꦴꦮꦠꦺꦴ. ꦱꦸꦠ꧀ꦠꦺ ꦥꦤ ꦥꦛꦶꦮꦺꦣꦺꦴꦮ ꦏꦡꦶꦠꦺꦴ ꦱꦕ꧀ꦕꦴꦨꦶꦱꦩꦪꦮꦱꦺꦤ ꦄꦴꦒꦠꦠ꧀ꦠꦴ.

ꦌꦱꦴꦠꦶ ꦄꦤꦤ꧀ꦠꦫꦺ ꦮꦸꦠ꧀ꦠꦺꦴ ꦄꦫꦶꦪꦥꦸꦒ꧀ꦒꦭꦺꦴ. ꦏꦩ꧀ꦩꦏꦴꦫꦏꦕꦶꦠ꧀ꦠꦤ꧀ꦠꦶ ꦨꦴꦮꦤꦴꦏꦩ꧀ꦩꦱ꧀ꦱ ꦥꦮꦠ꧀ꦠꦤꦏꦕꦶꦠ꧀ꦠꦁ. ꦱꦸꦑꦮꦺꦢꦤꦩ꧀ꦥꦶ ꦮꦶꦗꦴꦤꦴꦠꦷꦠꦶ ꦏꦺꦴ ꦮꦺꦢꦶꦪꦠꦶ, ꦏꦱ꧀ꦱ ꦮꦺꦢꦤꦴ, ꦏꦶꦁꦏꦴꦫꦟꦴ ꦮꦺꦢꦤꦴ, ꦱꦺꦴꦥꦶ ꦏꦱ꧀ꦱꦕꦶ ꦄꦨꦴꦮꦒ꧀ꦒꦲꦟꦩꦸꦑꦺꦤ ꦱꦸꦑꦁ ꦮꦺꦢꦤꦁ ꦱꦨꦴꦮꦠꦺꦴ ꦱꦩꦸꦢꦪꦠꦺꦴ ꦄꦠ꧀ꦡꦔ꧀ꦒꦩꦠꦺꦴ ꦄꦱ꧀ꦱꦴꦢꦠꦺꦴ ꦄꦴꦢꦷꦤꦮꦠꦺꦴ ꦕ ꦪꦡꦴꦨꦹꦠꦁ ꦥꦫꦶꦕ꧀ꦖꦶꦤ꧀ꦢꦤ꧀ꦠꦺꦴ ꦥꦫꦶꦒ꧀ꦒꦟ꧀ꦲꦤ꧀ꦠꦺꦴ ꦱꦸꦑꦁ ꦮꦺꦢꦤꦁ ꦮꦶꦗꦴꦤꦴꦠꦶ ꦤꦴꦩ. ꦱꦺꦱꦥꦢꦢ꧀ꦮꦪꦺꦥꦶ ꦌꦱꦺꦮ ꦤꦪꦺꦴ. ꦪꦱ꧀ꦩꦴ ‘‘ꦱꦠꦶꦥꦛ꧀ꦜꦴꦤꦺ’’ꦠꦶ ꦆꦩꦶꦤꦴ ꦱꦠꦶꦥꦛ꧀ꦜꦴꦤꦏꦡꦁ ꦈꦥꦭꦏ꧀ꦑꦺꦠꦶ. ꦠꦴꦪ ꦲꦶ ꦠꦢꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ, ꦠꦱ꧀ꦩꦴ ꦠꦁꦱꦁꦮꦟ꧀ꦟꦤꦴꦪꦩ꧀ꦥꦶ (ꦢꦷ. ꦤꦶ. ꦛꦷ. ꧒.꧓꧘꧐) ꦮꦸꦠ꧀ꦠꦤꦪꦺꦤ ꦠꦱ꧀ꦱꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ. ꦏꦴꦩꦚ꧀ꦕꦺꦠꦁ ꦮꦶꦚ꧀ꦚꦴꦟꦁ ꦮꦺꦢꦤꦴꦠꦺꦴ ꦄꦚ꧀ꦚꦩ꧀ꦥꦶ ꦄꦴꦫꦩ꧀ꦩꦟꦁ ꦮꦶꦗꦴꦤꦴꦠꦶ, ꦄꦤꦤ꧀ꦠꦫꦮꦴꦫꦺ ꦥꦤ ꦫꦹꦥꦩꦸꦑꦺꦤ ꦮꦶꦥꦱ꧀ꦱꦤꦴꦨꦶꦤꦶꦮꦺꦱꦱ꧀ꦱ ꦢꦱ꧀ꦱꦶꦠꦠ꧀ꦠꦴ ꦆꦣ ꦄꦫꦹꦥꦩꦸꦑꦺꦤ ꦢꦱ꧀ꦱꦺꦠꦸꦁ ‘‘ꦱꦸꦑꦤ꧀ꦠꦶꦥꦶ ꦮꦶꦗꦴꦤꦴꦠꦷ’’ꦠꦶꦄꦴꦢꦶꦤꦴ ꦤꦶꦢ꧀ꦢꦶꦛ꧀ꦜꦁ, ꦥꦸꦕ꧀ꦖꦤ꧀ꦠꦱ꧀ꦱ ꦮꦴ ꦄꦗ꧀ꦙꦴꦱꦪꦮꦱꦺꦤ.

ꦱꦁꦱꦛ꧀ꦜꦴꦠꦶ ꦱꦩ꧀ꦥꦪꦸꦠ꧀ꦠꦴ. ꦠꦺꦤꦴꦲ ‘‘ꦌꦏꦸꦥ꧀ꦥꦴꦢꦴꦢꦶꦭꦏ꧀ꦑꦟꦺꦤ ꦱꦁꦪꦺꦴꦒꦛ꧀ꦜꦺꦤꦴ’’ꦠꦶ. ꦮꦶꦱꦁꦱꦛ꧀ꦜꦴꦠꦶ ꦮꦶꦥ꧀ꦥꦪꦸꦠ꧀ꦠꦴ. ꦨꦶꦤ꧀ꦢꦶꦠ꧀ꦮꦴꦠꦶ ꦄꦚ꧀ꦚꦨꦹꦩꦶꦏꦱ꧀ꦱ ꦄꦚ꧀ꦚꦨꦹꦩꦶꦢꦱ꧀ꦱꦤꦺꦤꦺꦮ ꦮꦶꦤꦴꦱꦺꦠ꧀ꦮꦴ, ꦱꦁꦨꦶꦤ꧀ꦢꦶꦠ꧀ꦮꦴ ꦮꦴ. ꦱꦁꦱꦛ꧀ꦜꦨꦴꦮꦁ ꦥꦸꦕ꧀ꦖꦠꦷꦠꦶ ꦠꦁꦕꦶꦠ꧀ꦠꦸꦥ꧀ꦥꦴꦢꦥꦫꦶꦪꦴꦥꦤ꧀ꦤꦴꦤꦁ ꦥꦚ꧀ꦕꦮꦶꦚ꧀ꦚꦴꦟꦴꦤꦁ ꦱꦁꦱꦛ꧀ꦜꦨꦴꦮꦁ ꦥꦸꦕ꧀ꦖꦠꦶ. ꦪꦢꦶ ꦌꦮꦁ ꦏꦡꦁ ꦥꦸꦕ꧀ꦖꦴꦪ ꦄꦮꦱꦫꦺꦴ ꦮꦶꦱꦁꦱꦛ꧀ꦜꦨꦴꦮꦴꦱꦔ꧀ꦏꦴꦪ ꦌꦮ ꦄꦨꦴꦮꦠꦺꦴ? ꦤ, ꦕꦶꦠ꧀ꦠꦸꦥ꧀ꦥꦴꦢꦤ꧀ꦠꦫꦒꦠꦴꦤꦁ ꦩꦒ꧀ꦒꦥꦚ꧀ꦚꦴꦩꦒ꧀ꦒꦮꦶꦚ꧀ꦚꦴꦟꦴꦤꦁ ꦮꦶꦥꦱ꧀ꦱꦤꦴꦥꦚ꧀ꦚꦴꦮꦶꦥꦱ꧀ꦱꦤꦴꦮꦶꦚ꧀ꦚꦴꦟꦴꦤꦚ꧀ꦕ ꦮꦺꦴꦩꦶꦱ꧀ꦱꦏꦱꦁꦱꦛ꧀ꦜꦨꦴꦮꦱ꧀ꦱ ꦭꦧ꧀ꦨꦩꦴꦤꦠ꧀ꦠꦴ. ꦮꦶꦤꦶꦮꦛ꧀ꦛꦺꦠ꧀ꦮꦴꦠꦶ ꦄꦚ꧀ꦚꦩꦚ꧀ꦚꦠꦺꦴ ꦮꦶꦮꦺꦕꦺꦠ꧀ꦮꦴ. ꦤꦴꦤꦴꦏꦫꦟꦁ ꦢꦱ꧀ꦱꦺꦠꦸꦁ ꦤ ꦱꦏ꧀ꦏꦴꦠꦶ ꦆꦢꦁ ꦏꦺꦮꦭꦁ ꦱꦁꦱꦛ꧀ꦜꦨꦴꦮꦩꦺꦮ ꦱꦤ꧀ꦣꦴꦪ ꦮꦸꦠ꧀ꦠꦁ, ꦤ ꦱꦨꦴꦮꦨꦺꦢꦁ, ꦱꦨꦴꦮꦨꦺꦢꦠꦺꦴ ꦥꦤ ꦤꦴꦤꦴꦏꦫꦟꦁ ꦤꦺꦱꦁ ꦥꦴꦏꦛꦩꦺꦮ. ꦠꦺꦤꦴꦲ ‘‘ꦄꦴꦫꦩ꧀ꦩꦟꦠꦺꦴ ꦮꦴ ꦮꦠ꧀ꦡꦸꦠꦺꦴ ꦮꦴ ꦈꦥ꧀ꦥꦴꦢꦠꦺꦴ ꦮꦴ ꦤꦶꦫꦺꦴꦣꦠꦺꦴ ꦮꦴ’’ꦠꦶ. ꦆꦢꦴꦤꦶ ꦠꦩꦺꦮ ꦱꦨꦴꦮꦨꦺꦢꦁ ꦮꦶꦱꦪꦨꦺꦢꦺꦤ ꦱꦸꦛ꧀ꦜꦸ ꦥꦴꦏꦛꦁ ꦏꦠ꧀ꦮꦴ ꦢꦱ꧀ꦱꦺꦠꦸꦁ ‘‘ꦠꦺꦱꦁ ꦠꦺꦱꦁ ꦥꦤꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦮꦶꦱꦪꦺꦴꦠꦶ ꦥꦮꦠ꧀ꦠꦶꦛ꧀ꦜꦴꦤꦁ ꦆꦱ꧀ꦱꦫꦶꦪꦨꦹꦩꦶ, ꦪꦺꦤ ꦕꦶꦠ꧀ꦠꦥꦚ꧀ꦚꦴꦤꦁ ꦠꦠ꧀ꦡ ꦠꦠ꧀ꦡ ꦥꦸꦧ꧀ꦧꦔ꧀ꦒꦩꦠꦴ ꦮꦸꦕ꧀ꦕꦠꦶ.

ꦏꦴꦩꦚ꧀ꦕ ꦮꦶꦥꦱ꧀ꦱꦤꦴꦥꦶ ꦥꦚ꧀ꦚꦴꦮꦱꦺꦤꦺꦮ ꦏꦶꦕ꧀ꦕꦏꦴꦫꦷ, ꦩꦒ꧀ꦒꦺꦴꦥꦶ ꦮꦶꦚ꧀ꦚꦴꦟꦱꦲꦶꦠꦺꦴꦮ, ꦤ ꦏꦺꦮꦭꦺꦴ, ꦪꦡꦴ ꦥꦤ ꦭꦺꦴꦏꦶꦪꦣꦩ꧀ꦩꦺꦱꦸ ꦕꦶꦠ꧀ꦠꦁ ꦥꦣꦴꦤꦁ ꦠꦠ꧀ꦡꦱ꧀ꦱ ꦣꦺꦴꦫꦪ꧀ꦲꦨꦴꦮꦺꦤ ꦥꦮꦠ꧀ꦠꦶꦱꦧ꧀ꦨꦴꦮꦠꦺꦴ. ꦠꦡꦴ ꦲꦶ ꦠꦁ ‘‘ꦖꦢ꧀ꦮꦴꦫꦴꦣꦶꦥꦠꦶ ꦫꦴꦗꦴ’’ꦠꦶ (ꦣ. ꦥ. ꦄꦛ꧀ꦜ. ꧒.꧑꧘꧑) ꦮꦸꦕ꧀ꦕꦠꦶ, ꦌꦮꦁ ꦭꦺꦴꦏꦸꦠ꧀ꦠꦫꦣꦩ꧀ꦩꦺꦱꦸ ꦥꦚ꧀ꦚꦴ ꦥꦣꦴꦤꦴ ꦥꦛꦶꦥꦏ꧀ꦑꦮꦶꦣꦩꦤꦱ꧀ꦱ ꦮꦶꦱꦺꦱꦠꦺꦴ ꦠꦢꦣꦷꦤꦠ꧀ꦠꦴ. ꦠꦡꦴ ꦲꦶ ꦩꦒ꧀ꦒꦣꦩ꧀ꦩꦺ ꦱꦩ꧀ꦩꦴꦢꦶꦛ꧀ꦜꦶ ꦌꦮ ꦥꦜꦩꦁ ꦒꦲꦶꦠꦴ. ꦄꦪꦚ꧀ꦕ ꦤꦺꦱꦁ ꦮꦶꦱꦪꦮꦱꦺꦤ ꦥꦮꦠ꧀ꦠꦶꦨꦺꦢꦺꦴ, ꦠꦡꦴ ꦕ ꦥꦚ꧀ꦚꦴꦥꦤꦮꦶꦣꦶ ꦤ ꦏꦺꦮꦭꦁ ꦡꦺꦫꦺꦲꦺꦮ ꦢꦱ꧀ꦱꦶꦠꦺꦴ, ꦄꦥꦶꦕ ꦑꦺꦴ ꦨꦒꦮꦠꦴꦥꦶ ꦢꦱ꧀ꦱꦶꦠꦺꦴꦠꦶ ꦮꦶꦨꦴꦮꦺꦤ꧀ꦠꦺꦴ ‘‘ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴꦥꦷ’’ꦠꦶꦄꦴꦢꦶꦩꦴꦲ. ꦪꦠ꧀ꦡ ꦥꦚ꧀ꦚꦴ ꦤ ꦭꦧ꧀ꦨꦠꦶ, ꦠꦠ꧀ꦡ ꦕꦶꦠ꧀ꦠꦮꦱꦺꦤ ꦥꦸꦕ꧀ꦖꦤꦺ ꦮꦠ꧀ꦠꦧ꧀ꦧꦩꦺꦮ ꦤꦠ꧀ꦡꦶ ꦪꦡꦴ ‘‘ꦏꦶꦁꦕꦶꦠ꧀ꦠꦺꦴ ꦠ꧀ꦮꦁ ꦨꦶꦏ꧀ꦑꦹ’’ꦠꦶꦄꦴꦢꦷꦱꦸ (ꦥꦴꦫꦴ. ꧑꧓꧒-꧑꧓꧕). ꦪꦠ꧀ꦡ ꦥꦤ ꦥꦚ꧀ꦚꦴ ꦭꦧ꧀ꦨꦠꦶ, ꦠꦠ꧀ꦡꦴꦥꦶ ꦕꦶꦠ꧀ꦠꦮꦱꦺꦤ ꦗꦺꦴꦠꦤꦴ ꦲꦺꦴꦠꦶ ꦪꦡꦴ – ‘‘ꦄꦗ꧀ꦙꦠ꧀ꦠꦩꦺꦮ ꦕꦶꦠ꧀ꦠꦁ ꦱꦟ꧀ꦜꦥꦺꦠꦶ ꦱꦤ꧀ꦤꦶꦱꦴꦢꦺꦠꦶ ꦌꦏꦺꦴꦢꦶꦁ ꦏꦫꦺꦴꦠꦶ ꦱꦩꦴꦢꦲꦠꦶ (ꦱꦁ. ꦤꦶ. ꧔.꧓꧓꧒), ꦪꦱ꧀ꦩꦶꦁ ꦱꦩꦪꦺ ꦏꦴꦩꦴꦮꦕꦫꦁ ꦏꦸꦱꦭꦁ ꦕꦶꦠ꧀ꦠꦁ ꦈꦥ꧀ꦥꦤ꧀ꦤꦁ ꦲꦺꦴꦠꦷ’’ꦠꦶꦄꦴꦢꦷꦱꦸ (ꦣ. ꦱ. ꧑). ꦄꦛ꧀ꦜꦏꦡꦴꦪꦁ ꦥꦤ ꦭꦺꦴꦏꦶꦪꦣꦩ꧀ꦩꦺꦱꦸ ꦕꦶꦠ꧀ꦠꦮꦱꦺꦤ, ꦭꦺꦴꦏꦸꦠ꧀ꦠꦫꦣꦩ꧀ꦩꦺꦱꦸ ꦥꦚ꧀ꦚꦴꦮꦱꦺꦤ ꦕꦺꦴꦢꦤꦁ ꦧ꧀ꦪꦠꦶꦫꦺꦏꦩꦸꦑꦺꦤ ꦢꦱ꧀ꦱꦺꦠꦸꦁ ‘‘ꦏꦠꦩꦴ ꦠꦺ ꦨꦶꦏ꧀ꦑꦸ ꦥꦚ꧀ꦚꦴ ꦄꦣꦶꦒꦠꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦪꦺꦨꦸꦪ꧀ꦪꦮꦱꦺꦤ ꦕꦺꦠꦁ ꦮꦸꦠ꧀ꦠꦤ꧀ꦠꦶ ꦢꦛ꧀ꦜꦧ꧀ꦧꦁ. ꦠꦡꦴ ꦲꦶ ꦏꦠ꧀ꦡꦕꦶ ꦭꦺꦴꦏꦶꦪꦣꦩ꧀ꦩꦴ ꦥꦚ꧀ꦚꦴꦱꦷꦱꦺꦤꦥꦶ ꦤꦶꦢ꧀ꦢꦶꦱꦷꦪꦤ꧀ꦠꦶ – ‘‘ꦥꦜꦩꦱ꧀ꦱ ꦙꦴꦤꦱ꧀ꦱ ꦭꦴꦨꦶꦤꦺꦴ ꦏꦴꦩꦱꦲꦒꦠꦴ ꦱꦚ꧀ꦚꦴꦩꦤꦱꦶꦏꦴꦫꦴ ꦱꦩꦸꦢꦴꦕꦫꦤ꧀ꦠꦶ ꦲꦴꦤꦨꦴꦒꦶꦤꦷ ꦥꦚ꧀ꦚꦴ’’ꦠꦶꦄꦴꦢꦷꦱꦸ (ꦥꦛꦶ. ꦩ. ꧑.꧑). ꦱꦚ꧀ꦚꦴꦱꦷꦱꦺꦤꦥꦶ – ‘‘ꦈꦢ꧀ꦣꦸꦩꦴꦠꦏꦱꦚ꧀ꦚꦴꦠꦶ ꦮꦴ ꦱꦺꦱꦫꦹꦥꦴꦫꦹꦥꦱꦚ꧀ꦚꦴꦠꦶ ꦮꦴ ꦆꦩꦺ ꦣꦩ꧀ꦩꦴ ꦌꦏꦠ꧀ꦡꦴ, ꦈꦢꦴꦲꦸ ꦤꦴꦤꦠ꧀ꦡꦴ’’ꦠꦶꦄꦴꦢꦷꦱꦸ (ꦥꦴꦫꦴ. ꦄꦛ꧀ꦜ. ꧔꧕.ꦥꦢꦨꦴꦗꦤꦷꦪꦮꦟ꧀ꦟꦤꦴ). ꦠꦡꦴ ꦭꦺꦴꦏꦸꦠ꧀ꦠꦫꦣꦩ꧀ꦩꦴꦥꦶ ꦏꦠ꧀ꦡꦕꦶ ꦕꦶꦠ꧀ꦠꦱꦷꦱꦺꦤ ꦤꦶꦢ꧀ꦢꦶꦱꦷꦪꦤ꧀ꦠꦶ – ‘‘ꦪꦱ꧀ꦩꦶꦁ ꦱꦩꦪꦺ ꦭꦺꦴꦏꦸꦠ꧀ꦠꦫꦁ ꦕꦶꦠ꧀ꦠꦁ ꦨꦴꦮꦺꦠꦷ’’ꦠꦶ (ꦣ. ꦱ. ꧒꧗꧗), ꦠꦡꦴ ꦦꦱ꧀ꦱꦴꦢꦶꦱꦷꦱꦺꦤꦥꦶ – ‘‘ꦪꦱ꧀ꦩꦶꦁ ꦱꦩꦪꦺ ꦭꦺꦴꦏꦸꦠ꧀ꦠꦫꦁ ꦦꦱ꧀ꦱꦁ ꦨꦴꦮꦺꦠꦶ, ꦮꦺꦢꦤꦁ ꦱꦚ꧀ꦚꦁ ꦕꦺꦠꦤꦁ ꦨꦴꦮꦺꦠꦷ’’ꦠꦶꦄꦴꦢꦷꦱꦸ (ꦣ. ꦱ. ꧒꧗꧗).

ꦕꦠꦹꦱꦸ ꦱꦺꦴꦠꦴꦥꦠ꧀ꦠꦶꦪꦔ꧀ꦒꦺꦱꦹꦠꦶ ꦱꦥ꧀ꦥꦸꦫꦶꦱꦱꦺꦮꦤꦴ, ꦱꦢ꧀ꦣꦩ꧀ꦩꦱ꧀ꦱꦮꦤꦁ, ꦪꦺꦴꦤꦶꦱꦺꦴꦩꦤꦱꦶꦏꦴꦫꦺꦴ, ꦣꦩ꧀ꦩꦴꦤꦸꦣꦩ꧀ꦩꦥꦛꦶꦥꦠ꧀ꦠꦷꦠꦶ ꦆꦩꦺꦱꦸ ꦕꦠꦹꦱꦸ ꦱꦺꦴꦠꦴꦥꦠ꧀ꦠꦶꦩꦒ꧀ꦒꦱ꧀ꦱ ꦏꦴꦫꦟꦺꦱꦸ. ꦏꦴꦩꦁ ꦕꦺꦠꦺꦱꦸ ꦱꦠꦶꦄꦴꦢꦪꦺꦴꦥꦶ ꦣꦩ꧀ꦩꦴ ꦆꦕ꧀ꦖꦶꦠꦧ꧀ꦧꦴꦮ ꦠꦺꦲꦶ ꦮꦶꦤꦴ ꦠꦺꦱꦁ ꦄꦱꦩ꧀ꦨꦮꦠꦺꦴ, ꦠꦡꦴꦥꦶ ꦕꦺꦠ꧀ꦡ ꦱꦢ꧀ꦣꦴ ꦮꦶꦱꦺꦱꦠꦺꦴ ꦏꦶꦕ꧀ꦕꦏꦴꦫꦷꦠꦶ ꦮꦺꦢꦶꦠꦧ꧀ꦧꦴ. ꦱꦢ꧀ꦢꦺꦴ ꦌꦮ ꦲꦶ ꦱꦥ꧀ꦥꦸꦫꦶꦱꦺ ꦥꦪꦶꦫꦸꦥꦴꦱꦠꦶ, ꦱꦢ꧀ꦣꦩ꧀ꦩꦁ ꦱꦸꦟꦴꦠꦶ, ꦪꦺꦴꦤꦶꦱꦺꦴ ꦕ ꦩꦤꦱꦶ ꦏꦫꦺꦴꦠꦶ, ꦄꦫꦶꦪꦩꦒ꧀ꦒꦱ꧀ꦱ ꦕ ꦄꦤꦸꦣꦩ꧀ꦩꦁ ꦥꦛꦶꦥꦗ꧀ꦗꦠꦶ, ꦠꦱ꧀ꦩꦴ ꦮꦸꦠ꧀ꦠꦁ ‘‘ꦌꦠ꧀ꦡ ꦱꦢ꧀ꦣꦶꦤ꧀ꦢ꧀ꦫꦶꦪꦁ ꦢꦛ꧀ꦜꦧ꧀ꦧ’’ꦤ꧀ꦠꦶ. ꦆꦩꦶꦤꦴ ꦤꦪꦺꦤ ꦱꦺꦱꦶꦤ꧀ꦢ꧀ꦫꦶꦪꦺꦱꦸꦥꦶ ꦄꦠ꧀ꦡꦺꦴ ꦢꦛ꧀ꦜꦧ꧀ꦧꦺꦴ. ꦕꦠꦹꦱꦸ ꦱꦩ꧀ꦩꦥ꧀ꦥꦣꦴꦤꦺꦱꦹꦠꦶ ꦕꦠꦸꦧ꧀ꦧꦶꦣꦱꦩ꧀ꦩꦥ꧀ꦥꦣꦴꦤꦨꦴꦮꦤꦴꦪ. ꦕꦠꦹꦱꦸ ꦱꦠꦶꦥꦛ꧀ꦜꦴꦤꦺꦱꦹꦠꦶꦄꦴꦢꦷꦱꦸꦥꦶ ꦌꦱꦺꦮ ꦤꦪꦺꦴ. ꦌꦠ꧀ꦡ ꦕ ꦱꦺꦴꦠꦴꦥꦠ꧀ꦠꦶꦪꦔ꧀ꦒꦺꦱꦸ ꦱꦢ꧀ꦣꦴ ꦮꦶꦪ ꦱꦩ꧀ꦩꦥ꧀ꦥꦣꦴꦤꦨꦴꦮꦤꦴꦪ ꦮꦷꦫꦶꦪꦁ ꦮꦶꦪ ꦕ ꦱꦠꦶꦥꦛ꧀ꦜꦴꦤꦨꦴꦮꦤꦴꦪ – ‘‘ꦱꦠꦶꦩꦴ ꦮꦶꦤꦺꦪ꧀ꦪ ꦭꦺꦴꦏꦺ ꦄꦨꦶꦗ꧀ꦙꦴꦢꦺꦴꦩꦤꦱ꧀ꦱ’’ꦤ꧀ꦠꦶ (ꦢꦷ. ꦤꦶ. ꧒.꧓꧗꧓; ꦩ. ꦤꦶ. ꧑.꧑꧐꧖; ꦱꦁ. ꦤꦶ. ꧕.꧓꧘꧔, ꧔꧐꧗) ꦮꦕꦤꦠꦺꦴ ꦥꦸꦧ꧀ꦧꦨꦴꦒꦺ ꦏꦶꦕ꧀ꦕꦠꦺꦴ ꦱꦠꦶ ꦄꦣꦶꦏꦴ ꦆꦕ꧀ꦖꦶꦠꦧ꧀ꦧꦴ. ꦌꦮꦁ ꦱꦩꦴꦣꦶꦏꦩ꧀ꦩꦶꦏꦱ꧀ꦱ ꦱꦩꦴꦣꦶ, ‘‘ꦄꦫꦶꦪꦱꦕ꧀ꦕꦨꦴꦮꦤꦴ ꦥꦚ꧀ꦚꦴꦨꦴꦮꦤꦴ’’ꦠꦶ ꦏꦠ꧀ꦮꦴ ꦠꦠ꧀ꦡ ꦥꦚ꧀ꦚꦴ ꦥꦸꦧ꧀ꦧꦨꦴꦒꦺ ꦄꦣꦶꦏꦴ ꦆꦕ꧀ꦖꦶꦠꦧ꧀ꦧꦴꦠꦶ ꦥꦴꦏꦛꦺꦴꦪꦩꦠ꧀ꦡꦺꦴ, ꦄꦣꦶꦒꦩꦏ꧀ꦑꦟꦺ ꦥꦤ ꦱꦩꦴꦣꦶꦥꦚ꧀ꦚꦴꦤꦁ ꦮꦶꦪ ꦱꦧ꧀ꦧꦺꦱꦩ꧀ꦥꦶ ꦆꦤ꧀ꦢ꧀ꦫꦶꦪꦴꦤꦁ ꦱꦢ꧀ꦣꦴꦢꦷꦤꦁ ꦱꦩꦫꦱꦠꦴꦮ ꦆꦕ꧀ꦖꦶꦠꦧ꧀ꦧꦴ. ꦠꦡꦴ ꦲꦶ ‘‘ꦌꦠ꧀ꦡ ꦱꦢ꧀ꦣꦶꦤ꧀ꦢ꧀ꦫꦶꦪ’’ꦤ꧀ꦠꦶꦄꦴꦢꦶꦤꦴ ꦠꦠ꧀ꦡ ꦠꦠ꧀ꦡ ꦌꦠ꧀ꦡꦒ꧀ꦒꦲꦟꦁ ꦏꦠꦁ. ꦌꦮꦤ꧀ꦠꦶ ꦪꦁ ꦜꦴꦤꦁ, ꦠꦁ ꦆꦤ꧀ꦢ꧀ꦫꦶꦪꦱꦩꦠ꧀ꦠꦴꦢꦶꦁ ꦥꦕ꧀ꦕꦴꦩꦱꦠꦶ. ꦱꦮꦶꦱꦪꦱ꧀ꦩꦶꦁꦪꦺꦮꦴꦠꦶ ꦄꦠ꧀ꦠꦤꦺꦴ ꦄꦠ꧀ꦠꦤꦺꦴ ꦮꦶꦱꦪꦺ ꦌꦮ. ꦭꦺꦴꦏꦶꦪꦭꦺꦴꦏꦸꦠ꧀ꦠꦫꦴ ꦣꦩ꧀ꦩꦴ ꦏꦡꦶꦠꦴꦠꦶ ꦭꦺꦴꦏꦶꦪꦣꦩ꧀ꦩꦴ ꦭꦺꦴꦏꦸꦠ꧀ꦠꦫꦣꦩ꧀ꦩꦴ ꦕ ꦠꦺꦤ ꦠꦺꦤ ꦥꦮꦠ꧀ꦠꦶꦮꦶꦱꦺꦱꦺꦤ ꦏꦡꦶꦠꦴ. ꦆꦢꦁ ꦮꦸꦠ꧀ꦠꦁ ꦲꦺꦴꦠꦶ – ꦱꦢ꧀ꦣꦴꦥꦚ꧀ꦕꦩꦺꦱꦸ ꦆꦤ꧀ꦢ꧀ꦫꦶꦪꦺꦱꦸ ꦱꦲ ꦥꦮꦠ꧀ꦠꦩꦴꦤꦺꦱꦸ ꦠꦠ꧀ꦡ ꦠꦠ꧀ꦡ ꦮꦶꦱꦪꦺ ꦱꦢ꧀ꦣꦴꦢꦷꦤꦁ ꦏꦶꦕ꧀ꦕꦴꦣꦶꦏꦠꦴꦪ ꦠꦱ꧀ꦱ ꦠꦱ꧀ꦱꦺꦮ ꦢꦛ꧀ꦜꦧ꧀ꦧꦠꦴ ꦮꦸꦠ꧀ꦠꦴ, ꦤ ꦱꦧ꧀ꦧꦺꦱꦁ. ꦌꦮꦁ ꦄꦚ꧀ꦚꦺꦥꦶ ꦭꦺꦴꦏꦶꦪꦭꦺꦴꦏꦸꦠ꧀ꦠꦫꦴ ꦣꦩ꧀ꦩꦴ ꦪꦡꦴꦱꦏꦁ ꦮꦶꦱꦪꦺ ꦥꦮꦠ꧀ꦠꦶꦮꦶꦱꦺꦱꦮꦱꦺꦤ ꦧꦺꦴꦣꦶꦠꦴꦠꦶ.

ꦆꦢꦴꦤꦶ ꦱꦢ꧀ꦣꦴꦢꦷꦤꦁ ꦆꦤ꧀ꦢ꧀ꦫꦶꦪꦴꦤꦁ ꦠꦠ꧀ꦡ ꦠꦠ꧀ꦡ ꦄꦠꦶꦫꦺꦏꦏꦶꦕ꧀ꦕꦠꦁ ꦈꦥꦩꦴꦪ ꦮꦶꦨꦴꦮꦺꦠꦸꦁ ‘‘ꦪꦡꦴ ꦲꦷ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦠ꧀ꦫꦶꦢꦁ ꦈꦥꦩꦴꦱꦁꦱꦤ꧀ꦢꦤꦁ ꦫꦴꦗꦥꦚ꧀ꦕꦩꦴ ꦱꦲꦴꦪꦴ ꦮꦶꦪ ꦮꦶꦩꦸꦠ꧀ꦠꦶꦥꦫꦶꦥꦴꦕꦏꦴꦤꦶ ꦥꦚ꧀ꦕꦶꦤ꧀ꦢ꧀ꦫꦶꦪꦴꦤꦶ. ꦤꦺꦱꦁ ꦏꦷꦭ꦳ꦤꦠ꧀ꦡꦁ ꦌꦏꦗ꧀ꦙꦁ ꦮꦷꦡꦶꦎꦠꦫꦟꦁ ꦮꦶꦪ ꦆꦤ꧀ꦢ꧀ꦫꦶꦪꦴꦤꦁ ꦌꦏꦗ꧀ꦙꦁ ꦮꦶꦥꦱ꧀ꦱꦤꦴꦮꦷꦡꦶꦎꦠꦫꦟꦁ. ꦱꦲꦴꦪꦺꦱꦸ ꦥꦜꦩꦴꦢꦷꦤꦁ ꦪꦡꦴꦱꦏꦒꦺꦲꦺꦮ ꦮꦶꦕꦴꦫꦟꦴ ꦮꦶꦪ ꦱꦢ꧀ꦣꦴꦢꦷꦤꦁ ꦱꦺꦴꦠꦴꦥꦠ꧀ꦠꦶꦄꦔ꧀ꦒꦴꦢꦷꦤꦶ ꦥꦠ꧀ꦮꦴ ꦥꦸꦧ꧀ꦧꦔ꧀ꦒꦩꦠꦴ. ꦱꦲꦴꦪꦺꦱꦸ ꦆꦠꦫꦺꦱꦁ ꦠꦠ꧀ꦡ ꦠꦠ꧀ꦡ ꦠꦸꦟ꧀ꦲꦷꦨꦴꦮꦺꦴ ꦮꦶꦪ ꦱꦺꦱꦶꦤ꧀ꦢ꧀ꦫꦶꦪꦴꦤꦁ ꦠꦠ꧀ꦡ ꦠꦠ꧀ꦡ ꦠꦢꦤ꧀ꦮꦪꦠꦴ. ꦠꦱ꧀ꦱ ꦥꦸꦧ꧀ꦧꦔ꧀ꦒꦩꦨꦹꦠꦱ꧀ꦱ ꦆꦤ꧀ꦢ꧀ꦫꦶꦪꦱ꧀ꦱ ꦏꦶꦕ꧀ꦕꦴꦤꦸꦒꦠꦠꦴ. ꦤ ꦲꦶ ꦠꦢꦴ ꦠꦺꦱꦁ ꦱꦱꦩ꧀ꦨꦴꦫꦥꦡꦮꦷꦄꦴꦢꦷꦱꦸ ꦄꦴꦥꦴꦢꦷꦤꦁ ꦮꦶꦪ ꦏꦶꦕ꧀ꦕꦁ ꦥꦴꦏꦛꦁ ꦲꦺꦴꦠꦶ, ꦱꦢ꧀ꦣꦴꦢꦷꦤꦁꦪꦺꦮ ꦥꦤ ꦏꦶꦕ꧀ꦕꦁ ꦮꦶꦨꦹꦠꦁ ꦲꦸꦠ꧀ꦮꦴ ꦠꦶꦛ꧀ꦜꦠꦶ ꦥꦸꦫꦺꦠꦫꦁ ꦠꦡꦴꦥꦕ꧀ꦕꦪꦺꦲꦶ ꦕꦶꦠ꧀ꦠꦱꦤ꧀ꦠꦴꦤꦱ꧀ꦱ ꦄꦨꦶꦱꦔ꧀ꦑꦠꦠ꧀ꦠꦴ. ꦌꦠ꧀ꦡ ꦕ ꦮꦶꦥꦱ꧀ꦱꦤꦴꦏꦩ꧀ꦩꦶꦏꦱ꧀ꦱ ꦨꦴꦮꦤꦴ ꦮꦶꦱꦺꦱꦠꦺꦴ ꦥꦚ꧀ꦚꦸꦠ꧀ꦠꦫꦴꦠꦶ ꦢꦱ꧀ꦱꦤꦠ꧀ꦡꦁ ꦫꦴꦗꦴꦤꦁ ꦤꦶꦢꦱ꧀ꦱꦤꦁ ꦏꦠ꧀ꦮꦴ ꦥꦚ꧀ꦚꦶꦤ꧀ꦢ꧀ꦫꦶꦪꦁ ꦮꦸꦠ꧀ꦠꦁ. ꦆꦠꦷꦠꦶꦄꦴꦢꦶ ꦪꦡꦴꦣꦶꦒꦠꦱ꧀ꦱ ꦄꦠ꧀ꦡꦱ꧀ꦱ ꦤꦶꦒꦩꦤꦁ.

ꦩꦒ꧀ꦒꦮꦶꦚ꧀ꦚꦴꦟꦩ꧀ꦥꦷꦠꦶ ꦄꦫꦶꦪꦩꦒ꧀ꦒꦱꦲꦒꦠꦁ ꦄꦥꦕꦪꦒꦴꦩꦶꦮꦶꦚ꧀ꦚꦴꦟꦩ꧀ꦥꦶ. ꦠꦡꦺꦮ ꦠꦁ ꦮꦶꦗꦴꦤꦴꦠꦷꦠꦶ ꦱꦕ꧀ꦕꦣꦩ꧀ꦩꦁ ‘‘ꦆꦢꦁ ꦢꦸꦏ꧀ꦑ’’ꦤ꧀ꦠꦶꦄꦴꦢꦶꦤꦴ ꦤꦪꦺꦤꦺꦮ ꦮꦶꦗꦴꦤꦴꦠꦶ ꦌꦏꦕꦶꦠ꧀ꦠꦸꦥ꧀ꦥꦴꦢꦥꦫꦶꦪꦴꦥꦤ꧀ꦤꦠ꧀ꦠꦴ ꦩꦒ꧀ꦒꦴꦤꦸꦏꦹꦭꦠ꧀ꦠꦴ ꦕ. ꦪꦁ ꦮꦶꦗꦴꦤꦴꦠꦷꦠꦶ ꦌꦠ꧀ꦡ ꦮꦶꦗꦴꦤꦤꦥꦗꦴꦤꦤꦴꦤꦶ ꦮꦶꦥꦱ꧀ꦱꦤꦴꦕꦶꦠ꧀ꦠꦸꦥ꧀ꦥꦴꦢꦥꦫꦶꦪꦴꦥꦤ꧀ꦤꦴꦤꦶ ꦄꦣꦶꦥ꧀ꦥꦺꦠꦴꦤꦶ, ꦤ ‘‘ꦪꦁ ꦥꦗꦴꦤꦴꦠꦷ’’ꦠꦶ ꦌꦠ꧀ꦡ ꦮꦶꦪ ꦩꦒ꧀ꦒꦕꦶꦠ꧀ꦠꦸꦥ꧀ꦥꦴꦢꦥꦫꦶꦪꦴꦥꦤ꧀ꦤꦴꦠꦶ ꦄꦴꦲ ‘‘ꦪꦁ ꦱꦔ꧀ꦑꦴꦫꦒꦠ’’ꦤ꧀ꦠꦶꦄꦴꦢꦶ. ꦠꦡꦺꦮꦴꦠꦶ ‘‘ꦄꦤꦶꦕ꧀ꦕ’’ꦤ꧀ꦠꦶꦄꦴꦢꦶꦤꦴ ꦤꦪꦺꦤ. ꦌꦏꦕꦶꦠ꧀ꦠꦸꦥ꧀ꦥꦴꦢꦥꦫꦶꦪꦴꦥꦤ꧀ꦤꦠ꧀ꦠꦴ ꦮꦶꦥꦱ꧀ꦱꦤꦴꦨꦴꦮꦠꦺꦴ ꦕ ꦱꦩꦴꦤꦥꦕ꧀ꦕꦪꦺꦲꦶ ꦱꦲ ꦥꦮꦠ꧀ꦠꦶꦏꦠꦴ ꦌꦏꦸꦥ꧀ꦥꦴꦢꦠꦴ, ꦠꦠꦺꦴ ꦌꦮ ꦌꦏꦗ꧀ꦙꦁ ꦱꦲꦺꦮ ꦤꦶꦫꦸꦗ꧀ꦙꦤꦁ ꦌꦏꦤꦶꦫꦺꦴꦣꦠꦴ, ꦌꦏꦁꦪꦺꦮ ꦮꦠ꧀ꦡꦸꦁ ꦤꦶꦱ꧀ꦱꦴꦪ ꦥꦮꦠ꧀ꦠꦶ ꦌꦏꦮꦠ꧀ꦡꦸꦏꦠꦴ, ꦌꦏꦁꦪꦺꦮ ꦄꦴꦫꦩ꧀ꦩꦟꦁ ꦄꦴꦫꦧ꧀ꦨ ꦥꦮꦠ꧀ꦠꦶ ꦌꦏꦴꦫꦩ꧀ꦩꦟꦠꦴ. ꦲꦺꦠꦸꦩ꧀ꦲꦶ ꦕꦺꦠꦁ ꦏꦫꦟꦮꦕꦤꦁ. ꦠꦺꦤ ꦌꦏꦸꦥ꧀ꦥꦴꦢꦴꦢꦶꦠꦴꦪ ꦱꦁꦱꦛ꧀ꦜꦨꦴꦮꦁ ꦱꦴꦣꦺꦠꦶ. ꦄꦤꦮꦱꦺꦱꦥꦫꦶꦪꦴꦢꦴꦤꦚ꧀ꦕꦺꦠꦁ, ꦆꦠꦺꦴ ꦠꦷꦲꦶꦥꦶ ꦱꦩ꧀ꦥꦪꦸꦠ꧀ꦠꦭꦏ꧀ꦑꦟꦁ ꦲꦺꦴꦠꦶꦪꦺꦮ.

ꦩꦒ꧀ꦒꦥꦚ꧀ꦚꦁ ꦱꦤ꧀ꦣꦴꦪ ꦮꦸꦠ꧀ꦠꦁ, ꦱꦴ ꦲꦶ ꦌꦏꦤ꧀ꦠꦠꦺꦴ ꦨꦴꦮꦺꦠꦧ꧀ꦧꦴ, ꦤ ꦥꦫꦶꦚ꧀ꦚꦺꦪ꧀ꦪꦴ, ꦥꦚ꧀ꦚꦴꦪ ꦥꦤ ꦨꦴꦮꦺꦠꦧ꧀ꦧꦠꦴꦪ ꦠꦁꦱꦩ꧀ꦥꦪꦸꦠ꧀ꦠꦣꦩ꧀ꦩꦴꦥꦶ ꦠꦒ꧀ꦒꦠꦶꦏꦴꦮ ꦲꦺꦴꦤ꧀ꦠꦷꦠꦶ ꦄꦴꦲ ‘‘ꦠꦁꦱꦩ꧀ꦥꦪꦸꦠ꧀ꦠꦁ ꦥꦤꦴ’’ꦠꦶꦄꦴꦢꦶ. ꦏꦶꦚ꧀ꦕꦴꦥꦶ ꦮꦶꦥꦱ꧀ꦱꦤꦴꦥꦚ꧀ꦚꦴꦪ ꦨꦴꦮꦤꦴꦮꦱꦺꦤ ꦥꦮꦠ꧀ꦠꦤꦠꦺꦴ ꦠꦁꦱꦩ꧀ꦥꦪꦸꦠ꧀ꦠꦮꦶꦚ꧀ꦚꦴꦟꦩ꧀ꦥꦶ ꦠꦡꦺꦮ ꦥꦮꦠ꧀ꦠꦠꦶ, ꦠꦱ꧀ꦱ ꦥꦤ ꦥꦫꦶꦚ꧀ꦚꦺꦪ꧀ꦪꦨꦴꦮꦴꦤꦠꦶꦮꦠ꧀ꦠꦤꦠꦺꦴ ꦥꦫꦶꦚ꧀ꦚꦺꦪ꧀ꦪꦠꦴ ꦮꦸꦠ꧀ꦠꦴ. ꦠꦺꦤꦺꦮꦴꦲ – ‘‘ꦪꦩ꧀ꦥꦶ ꦠꦁ ꦣꦩ꧀ꦩꦛ꧀ꦜꦶꦠꦶꦚꦴꦟꦁ, ꦠꦩ꧀ꦥꦶ ꦑꦪꦣꦩ꧀ꦩꦁ ꦮꦪꦣꦩ꧀ꦩꦁ ꦮꦶꦫꦴꦒꦣꦩ꧀ꦩꦁ ꦤꦶꦫꦺꦴꦣꦣꦩ꧀ꦩ’’ꦤ꧀ꦠꦶ.

꧔꧕꧐. ꦌꦮꦁ ꦱꦤ꧀ꦠꦺꦥꦷꦠꦶ ꦮꦺꦢꦤꦴꦠꦶ ꦌꦮꦁ ꦱꦴꦩꦚ꧀ꦚꦒ꧀ꦒꦲꦟꦺ ꦱꦠꦶꦥꦶ. ꦠꦺꦨꦹꦩꦶꦏꦱꦩ꧀ꦩꦱꦤꦕꦴꦫꦮꦺꦢꦤꦴꦮꦴꦠꦶ ꦨꦹꦩꦶꦠ꧀ꦠꦪꦥꦫꦶꦪꦴꦥꦤ꧀ꦤꦴ, ꦠꦠꦺꦴ ꦌꦮ ꦱꦩ꧀ꦩꦱꦤꦚꦴꦟꦱ꧀ꦱ ꦒꦺꦴꦕꦫꦨꦹꦠꦴ ꦮꦺꦢꦤꦴ ꦌꦮ ꦄꦣꦶꦥ꧀ꦥꦺꦠꦴ ꦱꦧ꧀ꦫꦲ꧀ꦩꦕꦴꦫꦷꦤꦁ ꦈꦥꦏꦴꦫꦴꦮꦲꦨꦴꦮꦺꦤ ꦢꦺꦱꦤꦴꦪ ꦄꦴꦫꦢ꧀ꦣꦠ꧀ꦠꦴ. ꦠꦡꦴ ꦲꦶ ꦮꦸꦠ꧀ꦠꦁ ‘‘ꦕꦠꦸꦫꦺꦴꦓꦤꦶꦠ꧀ꦡꦫꦟꦠ꧀ꦡꦶꦏꦴꦤ’’ꦤ꧀ꦠꦶꦄꦴꦢꦶ. ꦌꦱ ꦤꦪꦺꦴ ꦥꦚ꧀ꦚꦴꦪꦥꦶ. ꦆꦣ ꦱꦸꦑꦴꦢꦶꦱꦢ꧀ꦢꦴ ꦠꦢꦴꦫꦩ꧀ꦩꦟꦮꦶꦱꦪꦴꦠꦶ ꦆꦩꦩꦠ꧀ꦡꦁ ꦱꦸꦠ꧀ꦠꦺꦤ ꦱꦴꦣꦺꦠꦸꦁ ‘‘ꦫꦹꦥꦚ꧀ꦕ ꦲꦷ’’ꦠꦶꦄꦴꦢꦶ ꦮꦸꦠ꧀ꦠꦁ. ꦌꦏꦤ꧀ꦠꦢꦸꦏ꧀ꦑꦤ꧀ꦠꦶ ꦌꦏꦤ꧀ꦠꦺꦤꦺꦮ ꦄꦤꦶꦛ꧀ꦜꦁ, ꦠꦠꦺꦴ ꦌꦮ ꦢꦸꦏ꧀ꦑꦩꦠꦴꦪ ꦢꦸꦏ꧀ꦑꦁ. ꦄꦴꦫꦩ꧀ꦩꦟꦏꦫꦟꦮꦱꦺꦤ ꦢꦸꦏ꧀ꦑꦮꦺꦢꦤꦴꦪ ꦄꦤꦸꦥꦠꦶꦠꦁ, ꦎꦠꦶꦟ꧀ꦟꦚ꧀ꦕꦴꦠꦶ ꦢꦸꦏ꧀ꦑꦴꦤꦸꦥꦠꦶꦠꦁ, ꦢꦸꦏ꧀ꦑꦴꦮꦏ꧀ꦏꦤ꧀ꦠꦁ. ꦱꦸꦑꦺꦤ ꦄꦤꦮꦏ꧀ꦏꦤ꧀ꦠꦁ ꦄꦨꦮꦶꦱ꧀ꦱꦴꦠꦶ ꦪꦺꦴꦗꦤꦴ. ꦤꦪꦶꦢꦤ꧀ꦠꦶ ꦌꦠ꧀ꦡ ꦆꦢꦤ꧀ꦠꦶ ꦤꦶꦥꦴꦠꦩꦠ꧀ꦠꦁ. ꦱꦴꦫꦗ꧀ꦗꦺꦪ꧀ꦪꦸꦤ꧀ꦠꦶ ꦱꦴꦫꦴꦒꦁ ꦈꦥ꧀ꦥꦴꦢꦺꦪ꧀ꦪꦸꦁ. ꦱꦸꦑꦤ꧀ꦠꦶ ꦱꦨꦴꦮꦠꦺꦴ ꦕ ꦆꦛ꧀ꦜꦁ. ꦱꦴꦫꦴꦒꦴ ꦱꦁꦪꦸꦗ꧀ꦗꦤ꧀ꦠꦷꦠꦶ ꦧꦲꦭꦫꦴꦒꦲꦺꦠꦸ ꦪꦡꦴꦫꦲꦁ ꦢꦱꦲꦶꦥꦶ ꦱꦁꦪꦺꦴꦗꦤꦺꦲꦶ ꦱꦁꦪꦸꦗ꧀ꦗꦤ꧀ꦠꦶ. ꦱꦁꦪꦺꦴꦒꦴ ꦱꦁꦏꦶꦭꦶꦱ꧀ꦱꦤ꧀ꦠꦷꦠꦶ ꦠꦡꦴ ꦱꦁꦪꦸꦠ꧀ꦠꦠꦴꦪ ꦠꦟ꧀ꦲꦴꦱꦁꦏꦶꦭꦺꦱꦴꦢꦶꦮꦱꦺꦤ ꦱꦁꦏꦶꦭꦶꦱ꧀ꦱꦤ꧀ꦠꦶ, ꦮꦶꦧꦴꦣꦷꦪꦤ꧀ꦠꦶ ꦈꦥꦠꦴꦥꦷꦪꦤ꧀ꦠꦶ ꦕꦴꦠꦶ ꦄꦠ꧀ꦡꦺꦴ. ꦄꦴꦫꦩ꧀ꦩꦟꦤ꧀ꦠꦶ ꦆꦛ꧀ꦜꦁ, ꦄꦤꦶꦛ꧀ꦜꦁ, ꦩꦗ꧀ꦙꦠ꧀ꦠꦚ꧀ꦕ ꦄꦴꦫꦩ꧀ꦩꦟꦁ ꦪꦡꦴꦏ꧀ꦏꦩꦁ ꦱꦸꦑꦁ, ꦢꦸꦏ꧀ꦑꦁ, ꦄꦢꦸꦏ꧀ꦑꦩꦱꦸꦑꦤ꧀ꦠꦶ ꦏꦡꦶꦠꦁ. ꦌꦮꦁ ꦄꦮꦶꦱꦺꦱꦺꦤ ꦥꦚ꧀ꦕꦥꦶ ꦑꦤ꧀ꦣꦺ ꦱꦸꦑꦴꦢꦶꦄꦴꦫꦩ꧀ꦩꦟꦨꦴꦮꦺꦤ ꦢꦱ꧀ꦱꦺꦠ꧀ꦮꦴ ꦆꦢꦴꦤꦶ ꦮꦺꦢꦤꦴ ꦌꦮ ꦱꦸꦑꦴꦢꦶꦄꦴꦫꦩ꧀ꦩꦟꦨꦴꦮꦺꦤ ꦢꦱ꧀ꦱꦺꦠꦸꦁ ‘‘ꦄꦥꦶꦕꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦥꦴꦏꦠꦶꦏꦥꦕꦸꦫꦗꦤꦮꦱꦺꦤꦴꦪꦁ ꦏꦡꦶꦠꦴꦠꦶ ꦏꦠ꧀ꦮꦴ ‘‘ꦥꦸꦫꦶꦩꦁ ꦱꦸꦑꦁ ꦮꦺꦢꦤꦁ ꦄꦴꦫꦩ꧀ꦩꦟꦁ ꦏꦠ꧀ꦮꦴ’’ꦠꦶ ꦮꦸꦠ꧀ꦠꦁ. ꦮꦶꦱꦺꦱꦭꦴꦨꦷ ꦥꦤ ꦄꦤꦴꦒꦠꦩ꧀ꦥꦶ ꦱꦸꦑꦁ ꦮꦺꦢꦤꦁ ꦄꦴꦫꦩ꧀ꦩꦟꦁ ꦏꦫꦺꦴꦠꦺꦮ. ꦮꦸꦠ꧀ꦠꦩꦺꦠꦁ ꦱꦠꦶꦥꦛ꧀ꦜꦴꦤꦮꦟ꧀ꦟꦤꦴꦪꦁ (ꦢꦷ. ꦤꦶ. ꦄꦛ꧀ꦜ. ꧒.꧓꧘꧐; ꦩ. ꦤꦶ. ꦄꦛ꧀ꦜ. ꧑.꧗꧙). ꦮꦺꦢꦤꦴꦪ ꦲꦶ ꦄꦴꦫꦩ꧀ꦩꦟꦁ ꦮꦺꦢꦶꦪꦤ꧀ꦠꦶꦪꦴ ꦠꦁꦱꦩꦔ꧀ꦒꦷꦥꦸꦒ꧀ꦒꦭꦺꦴ ꦮꦺꦢꦺꦠꦷꦠꦶ ꦮꦺꦴꦲꦴꦫꦩꦠ꧀ꦠꦁ ꦲꦺꦴꦠꦶ.

ꦱꦧ꧀ꦧꦱꦚ꧀ꦚꦴꦪꦴꦠꦶ ꦱꦧ꧀ꦧꦴꦪꦥꦶ ꦕꦠꦸꦨꦹꦩꦶꦏꦱꦚ꧀ꦚꦴꦪ. ꦱꦧ꧀ꦧꦠ꧀ꦡꦏꦱꦚ꧀ꦚꦴꦪꦴꦠꦶ ꦱꦧ꧀ꦧꦱ꧀ꦩꦶꦁ ꦕꦶꦠ꧀ꦠꦸꦥ꧀ꦥꦴꦢꦺ ꦥꦮꦠ꧀ꦠꦤꦏꦱꦚ꧀ꦚꦴꦪ. ꦮꦠ꧀ꦡꦺ ꦮꦴꦠꦶ ꦮꦴ-ꦱꦢ꧀ꦢꦺꦤ ꦮꦟ꧀ꦟꦣꦴꦠꦸꦁ ꦱꦔ꧀ꦒꦟ꧀ꦲꦴꦠꦶ. ꦥꦴꦥꦺꦤ꧀ꦠꦺꦴꦠꦶ ꦨꦴꦮꦤꦁ ꦈꦥꦕꦴꦫꦁ ꦮꦴ ꦄꦥ꧀ꦥꦤꦁ ꦮꦴ ꦈꦥꦤꦺꦤ꧀ꦠꦺꦴ. ꦈꦥ꧀ꦥꦗ꧀ꦗꦤꦏꦱꦚ꧀ꦚꦴꦥꦷꦠꦶ ‘‘ꦤꦷꦭꦁ ꦫꦹꦥꦁ, ꦫꦹꦥꦴꦫꦩ꧀ꦩꦟꦁ ꦤꦷꦭ’’ꦤ꧀ꦠꦶ ꦈꦥ꧀ꦥꦗ꧀ꦗꦤꦏꦱꦚ꧀ꦚꦴꦥꦶ.

ꦄꦱꦧ꧀ꦧꦱꦔ꧀ꦒꦴꦲꦶꦏꦠ꧀ꦠꦴꦠꦶ ꦱꦧ꧀ꦧꦺꦱꦁ ꦮꦺꦢꦤꦴꦱꦚ꧀ꦚꦴꦮꦶꦚ꧀ꦚꦴꦟꦴꦤꦁ ꦄꦱꦔ꧀ꦒꦲꦶꦠꦠ꧀ꦠꦴ. ꦠꦏ꧀ꦏꦒꦠꦤ꧀ꦠꦶ ꦱꦸꦠ꧀ꦠꦏꦤ꧀ꦠꦤꦏꦠꦏ꧀ꦏꦩ꧀ꦲꦶ, ꦱꦸꦠ꧀ꦠꦮꦠ꧀ꦠꦤꦏꦠꦏ꧀ꦏꦩ꧀ꦲꦶ ꦮꦴ ꦮꦺꦜꦤꦮꦱꦺꦤ ꦜꦶꦠꦁ. ꦥꦫꦶꦮꦛ꧀ꦛꦏꦴꦢꦶꦒꦠꦤ꧀ꦠꦶ ꦱꦸꦠ꧀ꦠꦮꦺꦜꦤꦥꦫꦶꦮꦛ꧀ꦛꦏꦴꦢꦶꦒꦠꦁ. ꦮꦶꦱ꧀ꦱꦛ꧀ꦜꦠ꧀ꦠꦴꦮ ꦤ ꦒꦲꦶꦠꦴ, ꦪꦢꦒ꧀ꦒꦺꦤ ꦥꦚ꧀ꦚꦴ ꦮꦶꦚ꧀ꦚꦴꦟꦺꦤ ꦱꦢ꧀ꦣꦶꦁ ꦱꦩ꧀ꦥꦪꦺꦴꦒꦁ ꦭꦨꦴꦥꦶꦠꦴ, ꦠꦢꦒ꧀ꦒꦺꦤ ꦮꦺꦢꦤꦴꦱꦚ꧀ꦚꦴꦲꦶꦥꦶ ꦱꦩ꧀ꦥꦪꦺꦴꦒꦁ ꦭꦨꦴꦥꦶꦠꦴ ꦌꦮꦴꦠꦶ. ꦠꦢꦺꦮ ꦱꦚ꧀ꦗꦴꦤꦴꦠꦶ ꦱꦁꦱꦛ꧀ꦜꦨꦴꦮꦠꦺꦴ.

ꦱꦚ꧀ꦗꦴꦤꦴꦠꦶ ꦮꦶꦗꦴꦤꦴꦠꦷꦠꦶ ꦌꦠ꧀ꦡ ‘‘ꦥꦗꦴꦤꦴꦠꦷ’’ꦠꦶ ꦥꦢꦁ ꦄꦴꦤꦺꦠ꧀ꦮꦴ ꦮꦠ꧀ꦠꦧ꧀ꦧꦁ ꦥꦗꦴꦤꦤꦮꦱꦺꦤꦥꦶ ꦮꦶꦱꦺꦱꦱ꧀ꦱ ꦮꦏ꧀ꦑꦩꦴꦤꦠ꧀ꦠꦴ. ꦗꦴꦤꦴꦠꦷꦠꦶ ꦄꦪꦁ ꦱꦢ꧀ꦢꦺꦴ ꦕ ꦭꦢ꧀ꦢꦠꦺꦴꦪꦺꦮꦺꦠ꧀ꦡ ꦄꦮꦶꦱꦺꦱꦺꦴ, ꦄꦠ꧀ꦡꦠꦺꦴ ꦥꦤ ꦮꦶꦱꦺꦱꦠꦺꦴ ꦆꦕ꧀ꦖꦶꦠꦧ꧀ꦧꦺꦴ. ꦄꦤꦺꦏꦠ꧀ꦡꦠ꧀ꦠꦴ ꦲꦶ ꦣꦴꦠꦹꦤꦁ ꦠꦺꦤ ꦄꦴꦑ꧀ꦪꦴꦠꦥꦢꦺꦤ ꦤꦴꦩꦥꦢꦺꦤ ꦕ ꦮꦸꦠ꧀ꦠꦩꦠ꧀ꦡꦁ ꦈꦥꦱꦒ꧀ꦒꦥꦢꦁ ꦗꦺꦴꦠꦏꦨꦴꦮꦺꦤ ꦮꦶꦱꦺꦱꦺꦠꦶ, ꦤ ꦮꦴꦕꦏꦨꦴꦮꦺꦤ. ꦠꦺꦤꦴꦲ ‘‘ꦠꦱ꧀ꦱꦥꦶ ꦗꦴꦤꦤꦠ꧀ꦡꦺ ꦮꦶꦱꦺꦱꦺꦴ ꦮꦺꦢꦶꦠꦧ꧀ꦧꦺꦴ’’ꦠꦶ. ꦌꦠꦺꦤ ꦱꦚ꧀ꦚꦴꦮꦶꦚ꧀ꦚꦴꦟꦥꦚ꧀ꦚꦴꦥꦢꦴꦤꦶ ꦄꦤ꧀ꦠꦺꦴꦒꦣꦗꦴꦤꦤꦠ꧀ꦡꦺ ꦪꦡꦴꦱꦏꦁ ꦮꦶꦱꦶꦛ꧀ꦜꦮꦶꦱꦪꦺ ꦕ ꦤꦶꦛ꧀ꦜꦴꦤꦷꦠꦶ ꦢꦱ꧀ꦱꦺꦠꦶ. ꦠꦺꦤꦺꦮꦴꦲ ‘‘ꦱꦚ꧀ꦚꦴ ꦲꦷ’’ꦠꦶꦄꦴꦢꦶ. ꦱꦚ꧀ꦗꦴꦤꦤꦩꦠ꧀ꦠꦩꦺꦮꦴꦠꦶ ꦌꦠ꧀ꦡ ꦩꦠ꧀ꦠ-ꦱꦢ꧀ꦢꦺꦤ ꦮꦶꦱꦺꦱꦤꦶꦮꦠ꧀ꦠꦶꦄꦠ꧀ꦡꦺꦤ ꦮꦶꦗꦴꦤꦤꦥꦗꦴꦤꦤꦴꦏꦴꦫꦺ ꦤꦶꦮꦠ꧀ꦠꦺꦠꦶ, ꦌꦮ-ꦱꦢ꧀ꦢꦺꦤ ꦏꦢꦴꦕꦶꦥꦶ ꦆꦩꦶꦱ꧀ꦱꦴ ꦠꦺ ꦮꦶꦱꦺꦱꦴ ꦤꦠ꧀ꦡꦺꦮꦴꦠꦶ ꦄꦮꦣꦴꦫꦺꦠꦶ. ꦠꦺꦤꦺꦮꦴꦲ ‘‘ꦄꦤꦶꦕ꧀ꦕꦁ ꦢꦸꦏ꧀ꦑ’’ꦤ꧀ꦠꦶꦄꦴꦢꦶ. ꦠꦠ꧀ꦡ ꦮꦶꦚ꧀ꦚꦴꦟꦏꦶꦕ꧀ꦕꦩ꧀ꦥꦶ ꦏꦴꦠꦸꦁ ꦄꦱꦏ꧀ꦏꦺꦴꦤ꧀ꦠꦷ ꦱꦚ꧀ꦚꦴ ꦏꦸꦠꦺꦴ ꦥꦚ꧀ꦚꦴꦏꦶꦕ꧀ꦕꦁ ꦏꦫꦺꦪ꧀ꦪꦴꦠꦶ ‘‘ꦭꦏ꧀ꦑꦟꦥꦛꦶꦮꦺꦣꦁ ꦥꦴꦥꦺꦠꦸꦁ ꦤ ꦱꦏ꧀ꦏꦺꦴꦠꦶ’’ꦕ꧀ꦕꦺꦮ ꦮꦸꦠ꧀ꦠꦁ, ꦤ ꦮꦸꦠ꧀ꦠꦁ ‘‘ꦩꦒ꧀ꦒꦥꦴꦠꦸꦨꦴꦮ’’ꦤ꧀ꦠꦶ.

ꦄꦴꦫꦩ꧀ꦩꦟꦺ ꦥꦮꦠ꧀ꦠꦩꦴꦤꦁ ꦮꦶꦚ꧀ꦚꦴꦟꦁ ꦤ ꦱꦚ꧀ꦚꦴ ꦮꦶꦪ ꦤꦷꦭꦥꦷꦠꦴꦢꦶꦩꦠ꧀ꦠꦱꦚ꧀ꦗꦴꦤꦤꦮꦱꦺꦤ ꦥꦮꦠ꧀ꦠꦠꦶ, ꦄꦡ ꦑꦺꦴ ꦠꦠ꧀ꦡ ꦄꦚ꧀ꦚꦩ꧀ꦥꦶ ꦠꦴꦢꦶꦱꦁ ꦮꦶꦱꦺꦱꦁ ꦗꦴꦤꦤ꧀ꦠꦩꦺꦮ ꦥꦮꦠ꧀ꦠꦠꦷꦠꦶ ꦄꦴꦲ ‘‘ꦮꦶꦚ꧀ꦚꦴꦟ’’ꦤ꧀ꦠꦶꦄꦴꦢꦶ. ꦏꦡꦁ ꦥꦤ ꦮꦶꦚ꧀ꦚꦴꦟꦁ ꦭꦏ꧀ꦑꦟꦥꦛꦶꦮꦺꦣꦁ ꦥꦴꦥꦺꦠꦷꦠꦶ? ꦥꦚ꧀ꦚꦴꦪ ꦢꦱ꧀ꦱꦶꦠꦩꦒ꧀ꦒꦺꦤ. ꦭꦏ꧀ꦑꦟꦴꦫꦩ꧀ꦩꦟꦶꦏꦮꦶꦥꦱ꧀ꦱꦤꦴꦪ ꦲꦶ ꦄꦤꦺꦏꦮꦴꦫꦁ ꦭꦏ꧀ꦑꦟꦴꦤꦶ ꦥꦛꦶꦮꦶꦗ꧀ꦙꦶꦠ꧀ꦮꦴ ꦥꦮꦠ꧀ꦠꦩꦴꦤꦴꦪ ꦥꦒꦸꦟꦨꦴꦮꦠꦺꦴ ꦥꦫꦶꦕꦪꦮꦱꦺꦤ ꦚꦴꦟꦮꦶꦥ꧀ꦥꦪꦸꦠ꧀ꦠꦕꦶꦠ꧀ꦠꦺꦤꦥꦶ ꦮꦶꦥꦱ꧀ꦱꦤꦴ ꦱꦩ꧀ꦨꦮꦠꦶ, ꦪꦡꦴ ꦠꦁ ꦥꦒꦸꦟꦱ꧀ꦱ ꦒꦤ꧀ꦡꦱ꧀ꦱ ꦄꦗ꧀ꦙꦪꦤꦺ ꦠꦠ꧀ꦡ ꦠꦠ꧀ꦡ ꦒꦠꦴꦥꦶ ꦮꦴꦫꦴ ꦤ ꦈꦥꦣꦴꦫꦷꦪꦤ꧀ꦠꦶ. ‘‘ꦭꦏ꧀ꦑꦟꦥꦛꦶꦮꦺꦣ’’ꦤ꧀ꦠꦶ ꦕ ꦭꦏ꧀ꦑꦟꦴꦤꦁ ꦄꦴꦫꦩ꧀ꦩꦟꦏꦫꦟꦩꦠ꧀ꦠꦁ ꦱꦤ꧀ꦣꦴꦪ ꦮꦸꦠ꧀ꦠꦁ, ꦤ ꦥꦛꦶꦮꦶꦗ꧀ꦙꦤꦁ. ꦈꦱ꧀ꦱꦏ꧀ꦏꦶꦠ꧀ꦮꦴꦠꦶ ꦈꦢꦪꦧ꧀ꦧꦪꦚꦴꦟꦴꦢꦶꦚꦴꦟꦥꦛꦶꦥꦴꦛꦶꦪꦴ ꦄꦴꦫꦨꦶꦠ꧀ꦮꦴ. ꦩꦒ꧀ꦒꦥꦴꦠꦸꦨꦴꦮꦁ ꦥꦴꦥꦺꦠꦸꦁ ꦤ ꦱꦏ꧀ꦏꦺꦴꦠꦶ ꦄꦱꦩ꧀ꦧꦺꦴꦣꦱꦨꦴꦮꦠ꧀ꦠꦴ. ꦄꦴꦫꦩ꧀ꦩꦟꦩ꧀ꦥꦶ ꦱꦚ꧀ꦗꦴꦤꦴꦠꦶ ꦄꦮꦧꦸꦗ꧀ꦙꦤꦮꦱꦺꦤꦺꦮ, ꦤ ꦱꦚ꧀ꦗꦴꦤꦤꦩꦠ꧀ꦠꦺꦤ. ꦠꦡꦴ ꦭꦏ꧀ꦑꦟꦥꦛꦶꦮꦺꦣꦩ꧀ꦥꦶ ꦥꦴꦥꦺꦠꦶ, ꦤ ꦮꦶꦗꦴꦤꦤꦩꦠ꧀ꦠꦺꦤ, ꦄꦠ꧀ꦠꦤꦺꦴ ꦥꦤ ꦄꦚ꧀ꦚꦴꦱꦴꦣꦴꦫꦟꦺꦤ ꦄꦴꦤꦸꦨꦴꦮꦺꦤ ꦈꦱ꧀ꦱꦏ꧀ꦏꦶꦠ꧀ꦮꦴ ꦩꦒ꧀ꦒꦥꦴꦠꦸꦨꦴꦮꦩ꧀ꦥꦶ ꦥꦴꦥꦺꦠꦶ.

ꦆꦢꦴꦤꦶ ꦪꦡꦴꦮꦸꦠ꧀ꦠꦩꦠ꧀ꦡꦁ ꦈꦥꦩꦴꦪ ꦮꦶꦨꦴꦮꦺꦠꦸꦁ ‘‘ꦪꦡꦴ ꦲꦷ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦠ꧀ꦡ ꦄꦗꦴꦠꦧꦸꦢ꧀ꦣꦷꦠꦶ ꦄꦱꦚ꧀ꦗꦴꦠꦧ꧀ꦪꦮꦲꦴꦫꦧꦸꦢ꧀ꦣꦶ. ꦈꦥꦨꦺꦴꦒꦥꦫꦶꦨꦺꦴꦒꦤ꧀ꦠꦶ ꦈꦥꦨꦺꦴꦒꦥꦫꦶꦨꦺꦴꦒꦴꦫꦲꦁ, ꦈꦥꦨꦺꦴꦒꦥꦫꦶꦨꦺꦴꦒꦮꦠ꧀ꦡꦹꦤꦁ ꦥꦛꦶꦭꦴꦨꦪꦺꦴꦒ꧀ꦒꦤ꧀ꦠꦶ ꦄꦠ꧀ꦡꦺꦴ. ꦏꦹꦛꦺꦴꦠꦶ ꦏꦲꦴꦥꦟꦥꦠꦶꦫꦹꦥꦏꦺꦴ ꦠꦩ꧀ꦧꦏꦁꦱꦴꦢꦶꦩꦪꦺꦴ. ꦖꦺꦏꦺꦴꦠꦶ ꦩꦲꦴꦱꦴꦫꦺꦴ. ꦏꦫꦠꦺꦴꦠꦶ ꦄꦝ꧀ꦞꦱꦴꦫꦺꦴ. ꦱꦟ꧀ꦲꦺꦴꦠꦶ ꦩꦸꦢꦸꦗꦴꦠꦶꦏꦺꦴ ꦱꦩꦱꦴꦫꦺꦴ. ꦆꦠꦶ-ꦱꦢ꧀ꦢꦺꦴ ꦄꦴꦢꦶꦄꦠ꧀ꦡꦺꦴ. ꦠꦺꦤ ꦥꦴꦢꦱꦴꦫꦥꦫꦺꦴꦥꦴꦢꦱꦴꦫꦄꦝ꧀ꦞꦱꦴꦫꦴꦢꦷꦤꦁ ꦱꦔ꧀ꦒꦲꦺꦴ. ꦗꦴꦤꦤ꧀ꦠꦺꦴ ꦕ ꦥꦤ ꦤꦁ ꦫꦹꦥꦁ ꦢꦶꦱ꧀ꦮꦴꦥꦶ…ꦥꦺ… ꦄꦱꦸꦏꦴꦕꦫꦶꦪꦺꦤ ꦏꦠꦺꦴꦠꦶꦥꦶ ꦗꦴꦤꦴꦠꦶ ꦠꦡꦴ ꦲꦺꦫꦚ꧀ꦚꦶꦏꦒꦤ꧀ꦡꦱ꧀ꦱ ꦱꦸꦒ꧀ꦒꦲꦶꦠꦠ꧀ꦠꦴ. ꦌꦮꦩꦺꦮꦤ꧀ꦠꦶꦄꦴꦢꦶ ꦈꦥꦩꦴꦱꦁꦱꦤ꧀ꦢꦤꦁ. ꦱꦚ꧀ꦚꦴꦮꦶꦨꦴꦒꦁ ꦄꦏꦠ꧀ꦮꦴ ꦥꦶꦟ꧀ꦝꦮꦱꦺꦤꦺꦮ ꦄꦴꦫꦩ꧀ꦩꦟꦱ꧀ꦱ ꦒꦲꦟꦠꦺꦴ ꦢꦴꦫꦏꦱ꧀ꦱ ꦏꦲꦴꦥꦟꦢꦱ꧀ꦱꦤꦱꦢꦶꦱꦴ ꦮꦸꦠ꧀ꦠꦴ. ꦠꦡꦴ ꦲꦶ ꦱꦴ ꦪꦡꦴꦈꦥꦛ꧀ꦜꦶꦠꦮꦶꦱꦪꦥꦢꦛ꧀ꦜꦴꦤꦴ ꦮꦸꦕ꧀ꦕꦠꦶ. ꦮꦶꦚ꧀ꦚꦴꦟꦁ ꦄꦴꦫꦩ꧀ꦩꦟꦺ ꦌꦏꦕ꧀ꦕꦮꦶꦱꦺꦱꦒ꧀ꦒꦲꦟꦱꦩꦠ꧀ꦡꦨꦴꦮꦠꦺꦴ ꦒꦴꦩꦶꦏꦥꦸꦫꦶꦱꦏꦲꦴꦥꦟꦢꦱ꧀ꦱꦤꦱꦢꦶꦱꦁ ꦮꦸꦠ꧀ꦠꦁ. ꦥꦚ꧀ꦚꦴ ꦥꦤ ꦄꦴꦫꦩ꧀ꦩꦟꦺ ꦄꦤꦮꦱꦺꦱꦴꦮꦧꦺꦴꦣꦠꦺꦴ ꦲꦺꦫꦚ꧀ꦚꦶꦏꦏꦲꦴꦥꦟꦢꦱ꧀ꦱꦤꦱꦢꦶꦱꦴ ꦮꦸꦠ꧀ꦠꦴ. ꦤꦺꦱꦤ꧀ꦠꦶ ꦱꦚ꧀ꦚꦴꦮꦶꦚ꧀ꦚꦴꦟꦥꦚ꧀ꦚꦴꦤꦁ. ꦮꦶꦱꦺꦱꦺꦴꦠꦶ ꦱꦨꦴꦮꦮꦶꦱꦺꦱꦺꦴ. ꦢꦸꦥ꧀ꦥꦛꦶꦮꦶꦗ꧀ꦙꦺꦴ ꦥꦏꦠꦶꦥꦚ꧀ꦚꦴꦪ. ꦆꦩꦶꦤꦴꦮ ꦤꦺꦱꦁ ꦄꦕ꧀ꦕꦤ꧀ꦠꦱꦸꦑꦸꦩꦠꦁ ꦢꦱ꧀ꦱꦺꦠꦶ.

ꦌꦏꦴꦫꦩ꧀ꦩꦟꦺ ꦥꦮꦠ꧀ꦠꦩꦴꦤꦴꦤꦤ꧀ꦠꦶ ꦌꦏꦱ꧀ꦩꦶꦁꦪꦺꦮ ꦄꦴꦫꦩ꧀ꦩꦟꦺ ꦥꦮꦠ꧀ꦠꦩꦴꦤꦴꦤꦁ. ꦠꦺꦤ ꦄꦨꦶꦤ꧀ꦤꦮꦶꦱꦪꦴꦨꦶꦤ꧀ꦤꦏꦴꦭꦠꦴꦢꦱ꧀ꦱꦤꦺꦤ ꦄꦮꦶꦤꦶꦧ꧀ꦨꦺꦴꦒꦮꦸꦠ꧀ꦠꦶꦠꦁ ꦮꦶꦨꦴꦮꦺꦤ꧀ꦠꦺꦴ ꦢꦸꦥ꧀ꦥꦛꦶꦮꦶꦗ꧀ꦙꦠꦁꦪꦺꦮ ꦈꦭ꧀ꦭꦶꦔ꧀ꦒꦺꦠꦶ. ꦮꦮꦠ꧀ꦡꦴꦤꦤ꧀ꦠꦶ ꦄꦱꦔ꧀ꦏꦫꦠꦺꦴ ꦜꦥꦤꦁ. ꦄꦪꦁ ꦦꦱ꧀ꦱꦺꦴ…ꦥꦺ… ꦆꦢꦁ ꦕꦶꦠ꧀ꦠꦤ꧀ꦠꦶ ꦤꦶꦢꦱ꧀ꦱꦤꦩꦠ꧀ꦠꦩꦺꦠꦁ. ꦆꦠꦶ-ꦱꦢ꧀ꦢꦺꦴ ꦮꦴ ꦄꦴꦢꦶꦄꦠ꧀ꦡꦺꦴ. ꦠꦺꦤ ꦱꦺꦱꦣꦩ꧀ꦩꦴꦤꦩ꧀ꦥꦶ ꦱꦔ꧀ꦒꦲꦺꦴ ꦢꦛ꧀ꦜꦧ꧀ꦧꦺꦴ. ꦆꦢꦤ꧀ꦠꦶ ꦄꦫꦹꦥꦷꦤꦁ ꦣꦩ꧀ꦩꦴꦤꦁ ꦮꦮꦠ꧀ꦡꦴꦤꦏꦫꦟꦁ. ꦠꦠꦺꦴꦠꦶ ꦪꦁ ꦮꦸꦠ꧀ꦠꦁ ꦠꦶꦭꦠꦺꦭꦴꦢꦶꦈꦢ꧀ꦣꦫꦟꦁ, ꦠꦠꦺꦴ. ꦪꦢꦶ ꦢꦸꦏ꧀ꦏꦫꦠꦫꦁ, ꦏꦡꦁ ꦠꦤ꧀ꦠꦶ ꦄꦴꦲ ‘‘ꦨꦒꦮꦴ ꦥꦤꦴ’’ꦠꦶꦄꦴꦢꦶ.

꧔꧕꧑. ꦤꦶꦱ꧀ꦱꦛꦺꦤꦴꦠꦶ ꦤꦶꦏ꧀ꦑꦤ꧀ꦠꦺꦤ ꦄꦠꦁꦱꦩ꧀ꦧꦤ꧀ꦣꦺꦤ. ꦥꦫꦶꦕ꧀ꦕꦠ꧀ꦠꦺꦤꦴꦠꦶ ꦥꦫꦶꦕ꧀ꦕꦠ꧀ꦠꦱꦢꦶꦱꦺꦤ ꦥꦕ꧀ꦕꦪꦨꦴꦮꦴꦤꦸꦥꦒꦩꦤꦺꦤ ꦥꦕ꧀ꦕꦪꦸꦥ꧀ꦥꦤ꧀ꦤꦱꦩ꧀ꦧꦤ꧀ꦣꦴꦨꦴꦮꦠꦺꦴ. ꦤꦶꦱ꧀ꦱꦏ꧀ꦏꦮꦕꦤꦁ ꦄꦥꦴꦢꦴꦤꦢꦷꦥꦤꦠꦺꦴ. ꦏꦫꦟꦮꦕꦤꦁ ꦏꦠ꧀ꦠꦸꦄꦠ꧀ꦡꦢꦷꦥꦤꦠꦺꦴ. ꦏꦴꦩꦴꦮꦕꦫꦩꦤꦺꦴꦮꦶꦚ꧀ꦚꦴꦟꦁ ꦤ ꦤꦶꦪꦩꦠꦺꦴ ‘‘ꦆꦢꦁ ꦤꦴꦩ ꦥꦚ꧀ꦕꦢ꧀ꦮꦴꦫꦶꦏꦴꦱꦩ꧀ꦧꦤ꧀ꦣꦴ’’ꦠꦶ ꦱꦏ꧀ꦏꦴ ꦮꦠ꧀ꦠꦸꦁ, ꦫꦹꦥꦴꦮꦕꦫꦮꦶꦚ꧀ꦚꦴꦟꦁ ꦥꦤ ꦤ ꦠꦡꦴꦠꦶ, ꦠꦱ꧀ꦱꦺꦮ ꦥꦚ꧀ꦕꦲꦶ ꦆꦤ꧀ꦢ꧀ꦫꦶꦪꦺꦲꦶ ꦤꦶꦱ꧀ꦱꦛꦠꦴ ꦮꦸꦠ꧀ꦠꦴꦠꦶ ꦄꦴꦲ ‘‘ꦫꦹꦥꦴꦮꦕꦫꦕꦠꦸꦠ꧀ꦡꦗ꧀ꦙꦴꦤꦕꦶꦠ꧀ꦠꦺꦤꦴ’’ꦠꦶ. ꦕꦠꦸꦠ꧀ꦡꦗ꧀ꦙꦴꦤꦒ꧀ꦒꦲꦟꦁ ꦠꦱ꧀ꦱꦺꦮ ꦄꦫꦹꦥꦴꦮꦕꦫꦱ꧀ꦱ ꦥꦢꦛ꧀ꦜꦴꦤꦨꦴꦮꦠꦺꦴ. ꦥꦫꦶꦱꦸꦢ꧀ꦣꦺꦤꦴꦠꦶ ꦮꦶꦱꦺꦱꦠꦺꦴ ꦄꦱꦁꦏꦶꦭꦺꦱꦶꦏꦠ꧀ꦠꦴꦮ. ꦠꦚ꧀ꦲꦶ ꦮꦶꦒꦠꦹꦥꦏ꧀ꦏꦶꦭꦺꦱꦠꦴꦪ ꦮꦶꦱꦺꦱꦠꦺꦴ ꦥꦫꦶꦱꦸꦢ꧀ꦣꦁ. ꦠꦺꦤꦴꦲ ‘‘ꦤꦶꦫꦸꦥꦏ꧀ꦏꦶꦭꦺꦱꦺꦤꦴ’’ꦠꦶ. ꦗꦴꦤꦶꦠꦧ꧀ꦧꦁ ꦤꦺꦪ꧀ꦪꦁ, ꦱꦥꦫꦱꦤ꧀ꦠꦴꦤꦺꦱꦸ ꦆꦢꦁ ꦄꦠꦶꦱꦪꦁ ꦗꦴꦤꦶꦠꦧ꧀ꦧꦠꦺꦴ ꦧꦸꦗ꧀ꦙꦶꦠꦧ꧀ꦧꦁ ꦧꦺꦴꦣꦺꦠꦧ꧀ꦧꦁ ꦮꦴꦠꦶ ꦄꦠ꧀ꦡꦺꦴ. ꦤꦺꦪ꧀ꦪꦤ꧀ꦠꦶ ꦮꦴ ꦄꦠ꧀ꦠꦤꦺꦴ ꦱꦤ꧀ꦠꦴꦤꦺ ꦤꦺꦠꦧ꧀ꦧꦁ ꦥꦮꦠ꧀ꦠꦺꦠꦧ꧀ꦧꦤ꧀ꦠꦶ ꦄꦠ꧀ꦡꦺꦴ. ꦠꦺꦤꦴꦲ ‘‘ꦤꦶꦧ꧀ꦧꦠ꧀ꦠꦺꦠꦸꦁ ꦱꦏ꧀ꦏꦴ ꦲꦺꦴꦠꦶ. ꦌꦠ꧀ꦡ ꦜꦶꦠꦱ꧀ꦱ ꦲꦶ ꦱꦴ ꦆꦗ꧀ꦙꦠꦷ’’ꦠꦶ. ꦥꦴꦛꦶꦪꦺꦏ꧀ꦏꦤ꧀ꦠꦶ ꦮꦶꦱꦸꦁ ꦮꦶꦱꦸꦁ, ꦄꦤꦸꦥꦢꦣꦩ꧀ꦩꦮꦱꦺꦤꦴꦠꦶ ꦄꦠ꧀ꦡꦺꦴ. ꦄꦨꦶꦤꦶꦮꦺꦱꦴꦨꦴꦮꦠꦺꦴꦠꦶ ꦮꦶꦥꦱ꧀ꦱꦤꦴꦨꦶꦤꦶꦮꦺꦱꦱ꧀ꦱ ꦄꦱꦩ꧀ꦨꦮꦠꦺꦴ. ꦏꦭꦴꦥꦠꦺꦴ ꦤꦪꦠꦺꦴꦠꦶ ꦏꦭꦴꦥꦱꦩ꧀ꦩꦱꦤꦱꦔ꧀ꦑꦴꦠꦠꦺꦴ ꦤꦪꦮꦶꦥꦱ꧀ꦱꦤꦠꦺꦴ. ꦨꦶꦏ꧀ꦑꦸꦤꦺꦴꦠꦶ ꦱꦴꦮꦏꦱ꧀ꦱ. ꦱꦴꦮꦏꦱ꧀ꦱꦺꦮ ꦲꦶ ꦠꦠ꧀ꦫ ꦄꦤꦸꦥꦢꦣꦩ꧀ꦩꦮꦶꦥꦱ꧀ꦱꦤꦴ ꦤ ꦱꦩ꧀ꦨꦮꦠꦶ, ꦤ ꦱꦠ꧀ꦡꦸ. ꦠꦺꦤꦴꦲ ‘‘ꦠꦱ꧀ꦩꦴ’’ꦠꦶꦄꦴꦢꦶ. ꦮꦶꦱ꧀ꦱꦗ꧀ꦗꦺꦱꦷꦠꦶ ꦠꦥ꧀ꦥꦛꦶꦧꦢ꧀ꦣꦖꦤ꧀ꦢꦫꦴꦒꦥ꧀ꦥꦲꦴꦤꦺꦤ ꦥꦗꦲꦠꦶ.

ꦲꦠ꧀ꦡꦒꦠꦠ꧀ꦠꦴꦠꦶ ꦲꦠ꧀ꦡꦒꦠꦱꦢꦶꦱꦠ꧀ꦠꦴ, ꦄꦴꦱꦤ꧀ꦤꦠ꧀ꦠꦴꦠꦶ ꦄꦠ꧀ꦡꦺꦴ. ꦪꦢꦴ ꦲꦶ ꦭꦺꦴꦏꦤꦴꦡꦺꦴ ꦧꦺꦴꦣꦶꦩꦹꦭꦺ ꦄꦥꦫꦴꦗꦶꦠꦥꦭ꧀ꦭꦔ꧀ꦏꦺ ꦤꦶꦱꦶꦤ꧀ꦤꦺꦴ – ‘‘ꦏꦶꦕ꧀ꦖꦁ ꦮꦠꦴꦪꦁ ꦭꦺꦴꦏꦺꦴ ꦄꦴꦥꦤ꧀ꦤꦺꦴ’’ꦠꦶꦄꦴꦢꦶꦤꦴ (ꦢꦷ. ꦤꦶ. ꧒.꧕꧗; ꦱꦁ. ꦤꦶ. ꧒.꧔, ꧑꧐) ꦥꦛꦶꦕ꧀ꦕꦱꦩꦸꦥ꧀ꦥꦴꦢꦩꦸꦑꦺꦤ ꦮꦶꦥꦱ꧀ꦱꦤꦴꦨꦶꦤꦶꦮꦺꦱꦁ ꦏꦠ꧀ꦮꦴ ꦄꦣꦶꦒꦤ꧀ꦠꦧ꧀ꦧꦱꦧ꧀ꦧꦚ꧀ꦚꦸꦠꦚ꧀ꦚꦴꦟꦴꦤꦸꦫꦹꦥꦁ ꦖꦠ꧀ꦠꦶꦁꦱꦏꦺꦴꦛꦶꦱꦲꦱ꧀ꦱꦩꦸꦑꦺꦤ ꦩꦲꦴꦮꦗꦶꦫꦚꦴꦟꦁ ꦤꦴꦩ ꦩꦲꦴꦧꦺꦴꦣꦶꦱꦠ꧀ꦠꦱꦩ꧀ꦩꦱꦤꦁ ꦥꦮꦠ꧀ꦠꦺꦤ꧀ꦠꦺꦴ ꦄꦤꦺꦏꦴꦏꦴꦫꦱꦩꦴꦥꦠ꧀ꦠꦶꦣꦩ꧀ꦩꦱꦩ꧀ꦩꦱꦤꦺ ꦄꦤꦸꦥꦢꦩꦺꦮ ꦤꦺꦮꦱꦚ꧀ꦚꦴꦤꦴꦱꦚ꧀ꦚꦴꦪꦠꦤꦣꦩ꧀ꦩꦺꦥꦶ ꦄꦥꦫꦴꦥꦫꦁ ꦱꦩ꧀ꦩꦱꦶ. ꦠꦺꦤꦴꦲ ‘‘ꦨꦒꦮꦴ ꦥꦤꦴ’’ꦠꦶꦄꦴꦢꦶ. ꦥꦫꦺꦴꦥꦚ꧀ꦚꦴꦱꦴꦠꦶ ꦢ꧀ꦮꦺꦥꦚ꧀ꦚꦴꦱꦁ. ꦏꦴꦩꦚ꧀ꦕꦺꦠ꧀ꦡ ꦏꦺꦕꦶ ꦣꦩ꧀ꦩꦴ ꦮꦺꦢꦤꦴꦢꦪꦺꦴ ꦦꦱ꧀ꦱꦥꦚ꧀ꦕꦩꦏꦴꦢꦷꦱꦸ ꦮꦸꦠ꧀ꦠꦴꦥꦶ ꦙꦴꦤꦏꦺꦴꦛ꧀ꦜꦴꦱꦴꦢꦷꦱꦸꦥꦶ ꦱꦔ꧀ꦒꦲꦶꦠꦴ, ꦠꦁꦠꦁꦥꦕ꧀ꦕꦪꦨꦴꦮꦮꦶꦱꦶꦛ꧀ꦜꦺꦤ ꦥꦤ ꦄꦠ꧀ꦡꦮꦶꦱꦺꦱꦺꦤ ꦣꦩ꧀ꦩꦤ꧀ꦠꦫꦴꦤꦶ ꦮꦶꦪ ꦲꦺꦴꦤ꧀ꦠꦷꦠꦶ ꦌꦮꦁ ꦮꦸꦠ꧀ꦠꦁ. ꦠꦡꦴ ꦲꦶ ꦭꦺꦴꦏꦸꦠ꧀ꦠꦫꦕꦶꦠ꧀ꦠꦸꦥ꧀ꦥꦴꦢꦺꦱꦸ ꦤꦮꦶꦤ꧀ꦢ꧀ꦫꦶꦪꦠꦴ ꦮꦸꦕ꧀ꦕꦠꦶ. ꦄꦔ꧀ꦒꦸꦢ꧀ꦣꦴꦫꦺꦤꦴꦠꦶ ꦠꦠ꧀ꦡ ꦭꦧ꧀ꦨꦩꦴꦤꦙꦴꦤꦔ꧀ꦒꦧꦺꦴꦗ꧀ꦙꦔ꧀ꦒꦩꦒ꧀ꦒꦔ꧀ꦒꦴꦤꦁ ꦈꦢ꧀ꦣꦫꦟꦺꦤ. ꦄꦔ꧀ꦒ-ꦱꦢ꧀ꦢꦺꦴ ꦮꦴ ꦏꦺꦴꦛ꧀ꦜꦴꦱꦥꦫꦶꦪꦴꦪꦺꦴ, ꦠꦱ꧀ꦩꦴ ꦄꦔ꧀ꦒꦸꦢ꧀ꦣꦴꦫꦺꦤꦴꦠꦶ ꦦꦱ꧀ꦱꦥꦚ꧀ꦕꦩꦏꦴꦢꦶꦏꦺꦴꦛ꧀ꦜꦴꦱꦴꦤꦁ ꦱꦩꦸꦢ꧀ꦣꦫꦟꦺꦤ. ꦪꦴꦮꦠꦴ ꦱꦚ꧀ꦚꦴꦱꦩꦴꦥꦠ꧀ꦠꦶꦪꦺꦴꦠꦶ ꦪꦠ꧀ꦠꦏꦴ ꦱꦚ꧀ꦚꦴꦱꦲꦒꦠꦴ ꦙꦴꦤꦱꦩꦴꦥꦠ꧀ꦠꦶꦪꦺꦴ, ꦠꦴꦲꦶ ꦮꦸꦛ꧀ꦜꦴꦪ ꦄꦣꦶꦒꦤ꧀ꦣꦧ꧀ꦧꦠ꧀ꦠꦴ ꦠꦴꦮꦠꦶꦏꦴ ꦮꦺꦤꦺꦪ꧀ꦪꦴꦤꦁ ꦄꦚ꧀ꦚꦴꦥꦛꦶꦮꦺꦣꦺꦴ ꦄꦫꦲꦠ꧀ꦠꦱꦩꦣꦶꦒꦩꦺꦴ.

ꦢꦱ꧀ꦱꦤꦥꦫꦶꦟꦴꦪꦏꦛ꧀ꦜꦺꦤꦴꦠꦶ ꦄꦤ꧀ꦣꦱ꧀ꦱ ꦪꦛ꧀ꦜꦶꦏꦺꦴꦛꦶꦁ ꦒꦲꦺꦠ꧀ꦮꦴ ꦩꦒ꧀ꦒꦢꦺꦱꦏꦺꦴ ꦮꦶꦪ ꦣꦩ꧀ꦩꦴꦤꦁ ꦪꦡꦴꦱꦨꦴꦮꦢꦱ꧀ꦱꦤꦱꦔ꧀ꦑꦴꦠꦺꦤ ꦥꦫꦶꦟꦴꦪꦏꦨꦴꦮꦺꦤ. ꦪꦡꦴ ꦮꦴ ꦱꦺꦴ ꦠꦱ꧀ꦱ ꦕꦏ꧀ꦑꦸꦨꦹꦠꦺꦴ, ꦌꦮꦁ ꦱꦠ꧀ꦠꦴꦤꦁ ꦥꦚ꧀ꦚꦴ. ꦠꦺꦤꦴꦲ ‘‘ꦕꦏ꧀ꦑꦸꦨꦹꦠꦴꦪ ꦥꦚ꧀ꦚꦴꦪꦴ’’ꦠꦶ. ꦱꦩꦴꦣꦶꦱꦩ꧀ꦥꦪꦸꦠ꧀ꦠꦴ ꦥꦚ꧀ꦚꦴ ꦱꦩꦴꦣꦶꦥꦚ꧀ꦚꦴ. ꦱꦩꦴꦣꦶ ꦕꦺꦠ꧀ꦡ ꦄꦴꦫꦸꦥ꧀ꦥꦱꦩꦴꦣꦷꦠꦶ ꦮꦢꦤ꧀ꦠꦶ, ꦱꦩ꧀ꦩꦱꦤꦥꦪꦺꦴꦒꦺꦴ ꦥꦤ ꦏꦺꦴꦕꦶ ꦙꦴꦤꦱꦩꦴꦣꦷꦠꦶ ꦪꦸꦠ꧀ꦠꦁ. ꦮꦶꦥꦱ꧀ꦱꦤꦴꦨꦹꦠꦴ ꦥꦚ꧀ꦚꦴ ꦮꦶꦥꦱ꧀ꦱꦤꦴꦥꦚ꧀ꦚꦴ. ꦱꦩꦴꦣꦶꦥꦚ꧀ꦚꦴꦪ ꦄꦤ꧀ꦠꦺꦴꦱꦩꦴꦥꦠ꧀ꦠꦶꦪꦁ ꦏꦶꦕ꧀ꦕꦠꦺꦴ ꦥꦗꦴꦤꦴꦠꦶ, ‘‘ꦱꦩꦴꦲꦶꦠꦺꦴ ꦪꦡꦴꦨꦹꦠꦁ ꦥꦗꦴꦤꦴꦠꦷ’’ꦠꦶ ꦥꦤ ꦮꦕꦤꦠꦺꦴ (ꦱꦁ. ꦤꦶ. ꧓.꧕; ꧔.꧙꧙-꧑꧐꧐; ꧓.꧕.꧑꧐꧗꧑-꧑꧐꧗꧒; ꦤꦺꦠ꧀ꦠꦶ. ꧔꧐; ꦩꦶ. ꦥ. ꧒.꧑.꧑꧔) ꦄꦱꦩ꧀ꦩꦺꦴꦲꦠꦺꦴ ꦥꦗꦴꦤꦴꦠꦶ. ꦠꦠ꧀ꦡ ꦏꦶꦕ꧀ꦕꦠꦺꦴꦠꦶ ꦒꦺꦴꦕꦫꦗ꧀ꦙꦠ꧀ꦠꦺ ꦄꦴꦫꦩ꧀ꦩꦟꦏꦫꦟꦏꦶꦕ꧀ꦕꦠꦺꦴ. ꦄꦱꦩ꧀ꦩꦺꦴꦲꦠꦺꦴꦠꦶ ꦱꦩ꧀ꦥꦪꦸꦠ꧀ꦠꦣꦩ꧀ꦩꦺꦱꦸ ꦱꦩ꧀ꦩꦺꦴꦲꦮꦶꦣꦩꦤꦠꦺꦴ ꦪꦡꦴ ꦥꦷꦠꦶꦥꦛꦶꦱꦁꦮꦺꦢꦤꦴꦢꦷꦱꦸ. ꦏꦶꦩꦠ꧀ꦡꦶꦪꦴꦠꦶ ꦏꦶꦁꦥꦪꦺꦴꦗꦤꦴꦠꦶ ꦄꦴꦲ ‘‘ꦏꦺꦴ ꦌꦠꦶꦱ꧀ꦱꦴ ꦄꦠ꧀ꦡꦺꦴ’’ꦠꦶ. ꦄꦨꦶꦚ꧀ꦚꦺꦪ꧀ꦪꦺ ꦣꦩ꧀ꦩꦺꦠꦶ ꦪꦴꦡꦴꦮꦱꦫꦱꦭꦏ꧀ꦑꦟꦴꦮꦧꦺꦴꦣꦮꦱꦺꦤ ꦄꦨꦶꦩꦸꦑꦁ ꦚꦺꦪ꧀ꦪꦺ ꦗꦴꦤꦶꦠꦧ꧀ꦧꦺ ꦑꦤ꧀ꦣꦴꦪꦠꦤꦴꦢꦶꦣꦩ꧀ꦩꦺ. ꦄꦨꦶꦗꦴꦤꦴꦠꦷꦠꦶ ꦱꦭꦏ꧀ꦑꦟꦠꦺꦴ ꦱꦴꦩꦚ꧀ꦚꦭꦏ꧀ꦑꦟꦠꦺꦴ ꦕ ꦄꦨꦶꦩꦸꦑꦁ ꦄꦮꦶꦫꦗ꧀ꦙꦤꦮꦱꦺꦤ ꦗꦴꦤꦴꦠꦶ. ꦌꦠꦺꦤ ꦚꦴꦠꦥꦫꦶꦚ꧀ꦚꦴꦧ꧀ꦪꦴꦥꦴꦫꦩꦴꦲ. ꦥꦫꦶꦚ꧀ꦚꦺꦪ꧀ꦪꦺꦠꦶ ꦄꦤꦶꦕ꧀ꦕꦴꦠꦶꦥꦶ ꦢꦸꦏ꧀ꦑꦴꦠꦶꦥꦶ ꦄꦤꦠ꧀ꦠꦴꦠꦶꦥꦶ ꦥꦫꦶꦕ꧀ꦖꦶꦗ꧀ꦗ ꦗꦴꦤꦶꦠꦧ꧀ꦧꦺ. ꦥꦫꦶꦗꦴꦤꦴꦠꦷꦠꦶ ‘‘ꦪꦁ ꦏꦶꦚ꧀ꦕꦶ ꦫꦹꦥꦁ…ꦥꦺ… ꦄꦤꦶꦕ꧀ꦕꦁ ꦑꦪꦛ꧀ꦜꦺꦤꦴ’’ꦠꦶꦄꦴꦢꦶꦤꦴ (ꦥꦛꦶ. ꦩ. ꧑.꧔꧘) ꦥꦫꦶꦕ꧀ꦖꦶꦤ꧀ꦢꦶꦠ꧀ꦮꦴ ꦗꦴꦤꦴꦠꦶ. ꦆꦩꦶꦤꦴ ꦠꦷꦫꦟꦥꦫꦶꦚ꧀ꦚꦴꦧ꧀ꦪꦴꦥꦴꦫꦩꦴꦲ. ꦥꦲꦴꦠꦧ꧀ꦧꦺ ꦣꦩ꧀ꦩꦺꦠꦶ ꦤꦶꦕ꧀ꦕꦱꦚ꧀ꦚꦴꦢꦶꦏꦺ ꦪꦴꦮ ꦄꦫꦲꦠ꧀ꦠꦩꦒ꧀ꦒꦮꦗ꧀ꦙꦴ ꦱꦧ꧀ꦧꦺ ꦥꦴꦥꦣꦩ꧀ꦩꦺ. ꦥꦗꦲꦠꦶ ꦥꦏꦛ꧀ꦜꦠꦺꦴ ꦗꦲꦠꦶ, ꦮꦶꦏ꧀ꦑꦩ꧀ꦨꦺꦠꦶ ꦕꦺꦮ ꦱꦩꦸꦕ꧀ꦖꦶꦤ꧀ꦢꦠꦶ ꦕꦴꦠꦶ ꦄꦠ꧀ꦡꦺꦴ. ꦆꦩꦶꦤꦴ ꦥꦲꦴꦤꦥꦫꦶꦚ꧀ꦚꦴꦧ꧀ꦪꦴꦥꦴꦫꦩꦴꦲ. ꦱꦴ ꦥꦤꦺꦱꦴ ꦥꦚ꧀ꦚꦴ ꦭꦺꦴꦏꦶꦪꦴꦥꦶ ꦠꦶꦥ꧀ꦥꦏꦴꦫꦴ ꦭꦺꦴꦏꦸꦠ꧀ꦠꦫꦴꦥꦶ, ꦠꦴꦱꦁ ꦮꦶꦱꦺꦱꦁ ꦱꦪꦩꦺꦮꦴꦲ. ꦏꦶꦕ꧀ꦕꦠꦺꦴꦠꦶ ꦄꦨꦶꦗꦴꦤꦤꦮꦱꦺꦤ ꦄꦴꦫꦩ꧀ꦩꦟꦏꦶꦕ꧀ꦕꦠꦺꦴ. ꦄꦱꦩ꧀ꦩꦺꦴꦲꦠꦺꦴꦠꦶ ꦪꦡꦴꦧꦭꦁ ꦄꦨꦶꦚ꧀ꦚꦺꦪ꧀ꦪꦴꦢꦷꦱꦸ ꦱꦩ꧀ꦩꦺꦴꦲꦮꦶꦣꦩꦤꦠꦺꦴ. ꦤꦶꦧ꧀ꦧꦴꦤꦩꦴꦫꦩ꧀ꦩꦟꦁ ꦏꦠ꧀ꦮꦴ ꦥꦮꦠ꧀ꦠꦤꦠꦺꦴ ꦄꦨꦶꦚ꧀ꦚꦺꦪ꧀ꦪꦴꦢꦷꦱꦸ ꦮꦶꦒꦠꦱꦩ꧀ꦩꦺꦴꦲꦠꦺꦴ ꦌꦮꦴꦠꦶ ꦄꦴꦲ ‘‘ꦭꦺꦴꦏꦸꦠ꧀ꦠꦫꦴ ꦄꦱꦩ꧀ꦩꦺꦴꦲꦠꦺꦴ’’ꦠꦶ.

꧔꧕꧒. ꦏꦩ꧀ꦩꦱ꧀ꦱꦏꦠꦴ ꦱꦩ꧀ꦩꦴꦢꦶꦛ꧀ꦜꦶ ꦕ ꦮꦛ꧀ꦛꦤꦶꦱ꧀ꦱꦶꦠꦠ꧀ꦠꦴ ꦆꦣ ꦤꦴꦣꦶꦥ꧀ꦥꦺꦠꦴ, ꦮꦶꦮꦛ꧀ꦛꦏꦡꦴ ꦲꦺꦱꦴꦠꦶ ꦮꦸꦠ꧀ꦠꦁ ‘‘ꦮꦶꦥꦱ꧀ꦱꦤꦴꦱꦩ꧀ꦩꦴꦢꦶꦛ꧀ꦜꦶꦪꦴ ꦕ ꦩꦒ꧀ꦒꦱꦩ꧀ꦩꦴꦢꦶꦛ꧀ꦜꦶꦪꦴ ꦕꦴ’’ꦠꦶ. ꦥꦫꦠꦺꦴ ꦓꦺꦴꦱꦺꦴꦠꦶ ꦥꦫꦠꦺꦴ ꦱꦠ꧀ꦡꦸꦠꦺꦴ, ꦱꦴꦮꦏꦠꦺꦴ ꦮꦴ ꦭꦧ꧀ꦨꦩꦴꦤꦺꦴ ꦣꦩ꧀ꦩꦓꦺꦴꦱꦺꦴ. ꦠꦺꦤꦴꦲ ‘‘ꦱꦥ꧀ꦥꦴꦪꦣꦩ꧀ꦩꦱ꧀ꦱꦮꦤ’’ꦤ꧀ꦠꦶ. ꦠꦚ꧀ꦲꦶ ꦱꦩ꧀ꦩꦴꦢꦶꦛ꧀ꦜꦶꦪꦴ ꦥꦕ꧀ꦕꦪꦺꦴ ꦨꦮꦶꦠꦸꦁ ꦱꦏ꧀ꦏꦺꦴꦠꦶ, ꦤ ꦪꦺꦴ ꦏꦺꦴꦕꦶ ꦥꦫꦠꦺꦴꦓꦺꦴꦱꦺꦴ. ꦈꦥꦴꦪꦩꦤꦱꦶꦏꦴꦫꦺꦴꦠꦶ ꦪꦺꦤ ꦤꦴꦩꦫꦹꦥꦥꦫꦶꦒ꧀ꦒꦲꦴꦢꦶ ꦱꦶꦗ꧀ꦙꦠꦶ, ꦠꦴꦢꦶꦱꦺꦴ ꦥꦡꦩꦤꦱꦶꦏꦴꦫꦺꦴ. ꦄꦪꦚ꧀ꦕ ꦱꦩ꧀ꦩꦴꦢꦶꦛ꧀ꦜꦶꦪꦴ ꦥꦕ꧀ꦕꦪꦺꦴꦠꦶ ꦤꦶꦪꦩꦥꦏ꧀ꦑꦶꦏꦺꦴ, ꦤ ꦱꦧ꧀ꦧꦱꦁꦒꦴꦲꦏꦺꦴꦠꦶ ꦢꦱ꧀ꦱꦺꦤ꧀ꦠꦺꦴ ‘‘ꦥꦕ꧀ꦕꦺꦏꦧꦸꦢ꧀ꦣꦴꦤꦁ ꦥꦤꦴ’’ꦠꦶꦄꦴꦢꦶꦩꦴꦲ. ꦪꦺꦴꦤꦶꦱꦺꦴꦩꦤꦱꦶꦏꦴꦫꦱ꧀ꦩꦶꦁꦪꦺꦮꦴꦠꦶ ꦄꦮꦣꦴꦫꦟꦺꦤ ꦥꦫꦠꦺꦴꦓꦺꦴꦱꦩꦺꦮ ꦤꦶꦮꦠ꧀ꦠꦺꦠꦶ, ꦤ ꦥꦢꦛ꧀ꦜꦴꦤꦮꦶꦱꦺꦱꦁ ꦥꦛꦶꦪꦺꦴꦒꦷꦤꦶꦮꦠ꧀ꦠꦤꦠ꧀ꦡꦠ꧀ꦠꦴ ꦌꦮ-ꦱꦢ꧀ꦢꦱ꧀ꦱ.

ꦭꦢ꧀ꦣꦸꦥꦏꦴꦫꦴꦠꦶ (ꦄ. ꦤꦶ. ꦛꦷ. ꧓.꧕.꧒꧕) ꦪꦡꦴꦫꦲꦁ ꦤꦶꦱ꧀ꦱꦪꦴꦢꦶꦮꦱꦺꦤ ꦭꦢ꧀ꦣꦥꦕ꧀ꦕꦪꦴ. ꦮꦶꦥꦱ꧀ꦱꦤꦴꦱꦩ꧀ꦩꦴꦢꦶꦛ꧀ꦜꦶꦪꦴ ꦄꦤꦸꦒ꧀ꦒꦲꦶꦠꦨꦴꦮꦺꦤ ꦒꦲꦶꦠꦠ꧀ꦠꦴ ꦩꦒ꧀ꦒꦱꦩ꧀ꦩꦴꦢꦶꦛ꧀ꦜꦷꦱꦸ ꦕ ꦄꦫꦲꦠ꧀ꦠꦩꦒ꧀ꦒꦱꦩ꧀ꦩꦴꦢꦶꦛ꧀ꦜꦶ, ꦄꦤꦤ꧀ꦠꦫꦱ꧀ꦱ ꦲꦶ ꦮꦶꦣꦶ, ꦥꦛꦶꦱꦺꦣꦺꦴ ꦮꦴ. ꦄꦒ꧀ꦒꦦꦭꦱꦩꦴꦣꦶꦩ꧀ꦲꦶ ꦠꦥ꧀ꦥꦫꦶꦏ꧀ꦑꦴꦫꦣꦩ꧀ꦩꦺꦱꦸꦪꦺꦮ ꦕ ꦏꦺꦮꦭꦺꦴ ꦕꦺꦠꦺꦴꦥꦫꦶꦪꦴꦪꦺꦴ ꦤꦶꦫꦸꦭ꦳꧀ꦲꦺꦴꦠꦶ ꦱꦩ꧀ꦩꦴꦢꦶꦛ꧀ꦜꦷꦠꦶ ꦄꦫꦲꦠ꧀ꦠꦩꦒ꧀ꦒꦱꦩ꧀ꦩꦴꦢꦶꦛ꧀ꦜꦶ. ꦦꦭꦏ꧀ꦑꦟꦺꦠꦶ ꦄꦤꦤ꧀ꦠꦫꦺ ꦏꦴꦭꦤ꧀ꦠꦫꦺ ꦕꦴꦠꦶ ꦢꦸꦮꦶꦣꦺ ꦦꦭꦏ꧀ꦑꦟꦺ. ꦥꦛꦶꦥ꧀ꦥꦱ꧀ꦱꦢ꧀ꦣꦶꦮꦱꦺꦤ ꦱꦧ꧀ꦧꦱꦁꦏꦶꦭꦺꦱꦺꦲꦶ ꦕꦺꦠꦺꦴ ꦮꦶꦩꦸꦕ꧀ꦕꦠꦶ ꦌꦠꦴꦪꦴꦠꦶ ꦕꦺꦠꦺꦴꦮꦶꦩꦸꦠ꧀ꦠꦶ, ꦄꦒ꧀ꦒꦦꦭꦥꦚ꧀ꦚꦁ ꦜꦥꦺꦠ꧀ꦮꦴ ꦄꦮꦱꦺꦱꦴ ꦦꦭꦣꦩ꧀ꦩꦴ. ꦠꦺꦤꦴꦲ ‘‘ꦕꦺꦠꦺꦴꦮꦶꦩꦸꦠ꧀ꦠꦶ ꦦꦭꦁ ꦄꦱ꧀ꦱꦴꦠꦶ. ꦕꦺꦠꦺꦴꦮꦶꦩꦸꦠ꧀ꦠꦶꦱꦔ꧀ꦑꦴꦠꦁ ꦦꦭꦁ ꦄꦴꦤꦶꦱꦁꦱꦺꦴ’’ꦠꦶ, ꦱꦧ꧀ꦧꦱꦁꦏꦶꦭꦺꦱꦺꦲꦶ ꦕꦺꦠꦱꦺꦴ ꦮꦶꦩꦸꦕ꧀ꦕꦤꦱꦔ꧀ꦑꦴꦠꦁ ꦥꦛꦶꦥ꧀ꦥꦱ꧀ꦱꦩ꧀ꦨꦤꦱꦚ꧀ꦚꦶꦠꦁ ꦥꦲꦴꦤꦁ ꦦꦭꦁ ꦄꦴꦤꦶꦱꦁꦱꦺꦴ ꦕꦴꦠꦶ ꦪꦺꦴꦗꦤꦴ. ꦆꦣ ꦕ ꦕꦺꦠꦺꦴꦮꦶꦩꦸꦠ꧀ꦠꦶ-ꦱꦢ꧀ꦢꦺꦤ ꦥꦲꦴꦤꦩꦠ꧀ꦠꦁ ꦒꦲꦶꦠꦁ, ꦥꦸꦧ꧀ꦧꦺ ꦥꦲꦴꦪꦏꦣꦩ꧀ꦩꦴ, ꦄꦚ꧀ꦚꦡꦴ ꦦꦭꦣꦩ꧀ꦩꦴ ꦌꦮ ꦄꦴꦤꦶꦱꦁꦱꦺꦴꦠꦶ ꦒꦪ꧀ꦲꦩꦴꦤꦺ ꦥꦸꦤꦮꦕꦤꦁ ꦤꦶꦫꦠ꧀ꦡꦏꦁ ꦱꦶꦪꦴ.

ꦥꦚ꧀ꦚꦴꦮꦶꦩꦸꦠ꧀ꦠꦶꦦꦭꦴꦤꦶꦱꦁꦱꦴꦠꦶ ꦌꦠ꧀ꦡꦴꦥꦶ ꦌꦮꦩꦺꦮ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ. ꦱꦩ꧀ꦩꦴꦮꦴꦕꦴꦏꦩ꧀ꦩꦤ꧀ꦠꦴꦗꦷꦮꦴ ꦱꦷꦭꦱꦨꦴꦮꦠ꧀ꦠꦴ ꦮꦶꦱꦺꦱꦠꦺꦴ ꦱꦩꦴꦣꦶꦱ꧀ꦱ ꦈꦥꦏꦴꦫꦴ, ꦠꦡꦴ ꦱꦩ꧀ꦩꦴꦱꦔ꧀ꦏꦥ꧀ꦥꦺꦴ ꦙꦴꦤꦱꦨꦴꦮꦠ꧀ꦠꦴ. ꦠꦡꦴ ꦲꦶ ꦱꦺꦴ ‘‘ꦄꦥ꧀ꦥꦤꦴ’’ꦠꦶ ꦤꦶꦢ꧀ꦢꦶꦛ꧀ꦜꦺꦴ. ꦱꦩ꧀ꦩꦴꦱꦠꦶꦱꦩ꧀ꦩꦴꦮꦴꦪꦴꦩꦴ ꦥꦤ ꦱꦩꦴꦣꦶꦥꦏ꧀ꦑꦶꦪꦴ ꦌꦮꦴꦠꦶ ꦄꦴꦲ ‘‘ꦄꦮꦱꦺꦱꦴ ꦣꦩ꧀ꦩꦴ ꦕꦺꦠꦺꦴꦮꦶꦩꦸꦠ꧀ꦠꦷꦠꦶ ꦮꦺꦢꦶꦠꦧ꧀ꦧꦴ’’ꦠꦶ. ꦕꦠꦸꦥꦴꦫꦶꦱꦸꦢ꧀ꦣꦶꦱꦷꦭꦤ꧀ꦠꦶ ꦄꦫꦶꦪꦩꦒ꧀ꦒꦴꦣꦶꦒꦩꦱ꧀ꦱ ꦥꦢꦛ꧀ꦜꦴꦤꦨꦹꦠꦁ ꦕꦠꦸꦥꦴꦫꦶꦱꦸꦢ꧀ꦣꦶꦱꦷꦭꦁ. ꦱꦸꦠꦴꦢꦷꦱꦸꦥꦶ ꦌꦱꦺꦮ ꦤꦪꦺꦴ. ꦄꦠ꧀ꦠꦤꦺꦴ ꦕꦶꦠ꧀ꦠꦥ꧀ꦥꦮꦠ꧀ꦠꦶꦄꦴꦫꦺꦴꦕꦤꦮꦱꦺꦤ ꦱꦲ ꦏꦡꦤꦁ ꦱꦁꦏꦡꦴ, ꦱꦁꦏꦡꦴꦮ ꦱꦴꦏꦕ꧀ꦖꦴ. ꦆꦣ ꦥꦤ ꦏꦩ꧀ꦩꦛ꧀ꦜꦴꦤꦥꦛꦶꦧꦢ꧀ꦣꦴꦠꦶ ꦄꦴꦲ ‘‘ꦏꦩ꧀ꦩꦛ꧀ꦜꦴꦤꦺ…ꦥꦺ… ꦏꦡꦴ’’ꦠꦶ. ꦠꦠ꧀ꦡ ꦏꦩ꧀ꦩꦛ꧀ꦜꦴꦤꦱ꧀ꦱ ꦌꦏꦮꦴꦫꦁ ꦮꦷꦡꦶꦪꦴ ꦄꦥ꧀ꦥꦛꦶꦥꦗ꧀ꦗꦤꦁ ꦑꦭꦤꦁ, ꦄꦤꦺꦏꦮꦴꦫꦁ ꦥꦏ꧀ꦑꦭꦤꦁ, ꦠꦢꦸꦨꦪꦱ꧀ꦱ ꦮꦶꦕ꧀ꦖꦺꦢꦤꦷꦏꦡꦴ ꦑꦭꦤꦥꦏ꧀ꦑꦭꦤꦖꦺꦢꦤꦏꦡꦴ. ꦥꦹꦫꦺꦤ꧀ꦠꦱ꧀ꦱꦴꦠꦶ ꦮꦶꦮꦛ꧀ꦛꦤꦶꦱ꧀ꦱꦶꦠꦁ ꦏꦠ꧀ꦮꦴ ꦥꦴꦭꦺꦤ꧀ꦠꦱ꧀ꦱ ꦧ꧀ꦫꦹꦲꦺꦤ꧀ꦠꦱ꧀ꦱ ꦕ. ꦱꦸꦟꦤ꧀ꦠꦱ꧀ꦱꦴꦠꦶ ‘‘ꦪꦡꦴꦈꦒ꧀ꦒꦲꦶꦠꦏꦩ꧀ꦩꦛ꧀ꦜꦴꦤꦁ ꦦꦴꦠꦶꦁ ꦒꦩꦶꦱ꧀ꦱꦠꦷ’’ꦠꦶ ꦌꦮꦁ ꦱꦸꦟꦤ꧀ꦠꦱ꧀ꦱ. ꦠꦺꦤꦺꦮ ꦲꦶ ‘‘ꦱꦥ꧀ꦥꦴꦪꦣꦩ꧀ꦩꦱ꧀ꦱꦮꦤ’’ꦤ꧀ꦠꦶ ꦮꦸꦠ꧀ꦠꦁ. ꦏꦩ꧀ꦩꦁ ꦏꦫꦺꦴꦤ꧀ꦠꦱ꧀ꦱꦴꦠꦶ ꦨꦴꦮꦤꦴꦤꦸꦪꦺꦴꦒꦏꦩ꧀ꦩꦁ ꦏꦫꦺꦴꦤ꧀ꦠꦱ꧀ꦱ.

ꦥꦚ꧀ꦕꦱꦸꦥꦶ ꦜꦴꦤꦺꦱꦸ ꦄꦤ꧀ꦠ-ꦱꦢ꧀ꦢꦺꦴ ꦲꦺꦠꦸꦄꦠ꧀ꦡꦗꦺꦴꦠꦤꦺꦴ ꦢꦛ꧀ꦜꦧ꧀ꦧꦺꦴ. ꦌꦮꦚ꧀ꦲꦶ ‘‘ꦪꦡꦴ ꦲꦷ’’ꦠꦶꦄꦴꦢꦶꦤꦴ ꦮꦸꦕ꧀ꦕꦩꦴꦤꦴ ꦄꦩ꧀ꦧꦸꦥꦩꦴ ꦕ ꦪꦸꦗ꧀ꦗꦺꦪ꧀ꦪ. ꦈꦢꦏꦏꦺꦴꦛ꧀ꦜꦏꦤ꧀ꦠꦶ ꦄꦴꦭꦮꦴꦭꦁ. ꦡꦶꦫꦁ ꦏꦠ꧀ꦮꦴ ꦧꦤ꧀ꦣꦠꦷꦠꦶ ꦄꦱꦶꦡꦶꦭꦁ ꦢꦭ꦳꧀ꦲꦁ ꦤꦴꦠꦶꦩꦲꦤ꧀ꦠꦁ ꦤꦴꦠꦶꦑꦸꦢ꧀ꦢꦏꦁ ꦏꦠ꧀ꦮꦴ ꦪꦺꦴꦗꦺꦠꦶ. ꦡꦶꦫꦁ ꦏꦫꦺꦴꦠꦷꦠꦶ ꦈꦢꦏꦱꦶꦚ꧀ꦕꦤꦏꦴꦭꦺ ꦠꦠꦺꦴ ꦠꦠꦺꦴ ꦮꦶꦱ꧀ꦱꦫꦶꦠ꧀ꦮꦴ ꦈꦢꦏꦱ꧀ꦱ ꦄꦤꦶꦏ꧀ꦑꦩꦤꦠ꧀ꦡꦁ ꦄꦴꦭꦮꦴꦭꦁ ꦡꦶꦫꦠꦫꦁ ꦏꦫꦺꦴꦠꦶ. ꦱꦸꦏ꧀ꦑꦢꦟ꧀ꦝꦏꦺꦴꦠꦶ ꦠꦱ꧀ꦱꦺꦮ ꦄꦩ꧀ꦧꦒꦕ꧀ꦖꦏꦱ꧀ꦱ ꦱꦸꦏ꧀ꦑꦺꦴ ꦱꦴꦑꦴꦱꦷꦱꦏꦺꦴ. ꦏꦶꦥꦶꦭ꧀ꦭꦶꦏꦥꦸꦛꦺꦴꦠꦶ ꦠꦩ꧀ꦧꦏꦶꦥꦶꦭ꧀ꦭꦶꦏꦏꦸꦛꦗꦁ. ꦑꦟꦶꦠ꧀ꦠꦶꦤ꧀ꦠꦶ ꦏꦸꦢꦴꦭꦁ. ꦏꦺꦴꦛ꧀ꦜꦏꦧꦤ꧀ꦣꦤꦁ ꦮꦶꦪ ꦱꦷꦭꦁ ꦱꦩ꧀ꦩꦴꦢꦶꦛ꧀ꦜꦶꦪꦴ ꦮꦝ꧀ꦞꦤꦸꦥꦴꦪꦱ꧀ꦱ ꦩꦹꦭꦨꦴꦮꦠꦺꦴ. ꦈꦢꦏꦱꦶꦚ꧀ꦕꦤꦁ ꦮꦶꦪ ꦣꦩ꧀ꦩꦱ꧀ꦱꦮꦤꦁ ꦨꦴꦮꦤꦴꦪ ꦥꦫꦶꦧ꧀ꦫꦹꦲꦤꦠꦺꦴ. ꦩꦫꦶꦪꦴꦢꦴꦪ ꦡꦶꦫꦨꦴꦮꦏꦫꦟꦁ ꦮꦶꦪ ꦱꦩꦡꦺꦴ ꦪꦡꦴꦮꦸꦠ꧀ꦠꦨꦴꦮꦤꦴꦣꦶꦛ꧀ꦜꦴꦤꦴꦪ ꦱꦷꦭꦩꦫꦶꦪꦴꦢꦴꦪ ꦢꦭ꦳꧀ꦲꦨꦴꦮꦴꦥꦴꦢꦤꦠꦺꦴ. ꦱꦩꦴꦲꦶꦠꦱ꧀ꦱ ꦲꦶ ꦱꦷꦭꦁ ꦡꦶꦫꦠꦫꦁ ꦲꦺꦴꦠꦶ. ꦱꦩꦷꦥꦺ ꦮꦭ꧀ꦭꦶꦄꦴꦢꦷꦤꦁ ꦲꦫꦟꦁ ꦮꦶꦪ ꦏꦩ꧀ꦩꦛ꧀ꦜꦴꦤꦺ ꦑꦭꦤꦥꦏ꧀ꦑꦭꦤꦕ꧀ꦖꦺꦢꦤꦁ ꦆꦗ꧀ꦙꦶꦠꦧ꧀ꦧꦨꦴꦮꦤꦴꦪ ꦮꦶꦧꦤ꧀ꦣꦴꦥꦤꦪꦤꦠꦺꦴ. ꦩꦹꦭꦑꦟꦤꦁ ꦮꦶꦪ ꦱꦠ꧀ꦠꦤ꧀ꦤꦁ ꦄꦤꦸꦥꦱ꧀ꦱꦤꦴꦤꦁ ꦨꦴꦮꦤꦴ ꦠꦱ꧀ꦱꦴ ꦮꦶꦧꦤ꧀ꦣꦱ꧀ꦱ ꦩꦹꦭꦏꦴꦤꦁ ꦠꦟ꧀ꦲꦴꦩꦴꦤꦢꦶꦛ꧀ꦜꦷꦤꦁ ꦥꦭꦶꦑꦟꦤꦠꦺꦴ. ꦌꦠ꧀ꦡ ꦕ ꦪꦱ꧀ꦩꦴ ꦱꦸꦥꦫꦶꦱꦸꦢ꧀ꦣꦱꦷꦭꦱ꧀ꦱ ꦏꦩ꧀ꦩꦛ꧀ꦜꦴꦤꦁ ꦄꦤꦸꦪꦸꦚ꧀ꦗꦤ꧀ꦠꦱ꧀ꦱ ꦱꦥ꧀ꦥꦴꦪꦣꦩ꧀ꦩꦱ꧀ꦱꦮꦤꦁ ꦆꦕ꧀ꦖꦶꦠꦧ꧀ꦧꦁ, ꦠꦠꦺꦴ ꦪꦡꦴꦱꦸꦠꦺ ꦄꦠ꧀ꦡꦺ ꦱꦴꦏꦕ꧀ꦖꦴꦱꦩꦴꦥꦗ꧀ꦗꦤꦁ, ꦠꦠꦺꦴ ꦏꦩ꧀ꦩꦛ꧀ꦜꦴꦤꦮꦶꦱꦺꦴꦣꦤꦺꦤ ꦱꦩꦡꦤꦶꦥ꧀ꦦꦠ꧀ꦠꦶ, ꦠꦠꦺꦴ ꦱꦩꦴꦲꦶꦠꦱ꧀ꦱ ꦄꦴꦫꦢ꧀ꦣꦮꦶꦥꦱ꧀ꦱꦏꦱ꧀ꦱ ꦮꦶꦥꦱ꧀ꦱꦤꦴꦥꦴꦫꦶꦥꦹꦫꦶ. ꦥꦫꦶꦥꦸꦟ꧀ꦟꦮꦶꦥꦱ꧀ꦱꦤꦺꦴ ꦩꦒ꧀ꦒꦱꦩ꧀ꦩꦴꦢꦶꦛ꧀ꦜꦶꦁ ꦥꦫꦶꦧ꧀ꦫꦹꦲꦺꦠꦷꦠꦶ ꦌꦮꦩꦺꦠꦺꦱꦁ ꦄꦔ꧀ꦒꦴꦤꦁ ꦥꦫꦩ꧀ꦥꦫꦴꦪ ꦱꦩ꧀ꦩꦸꦑꦴ ꦕ ꦄꦤꦸꦒ꧀ꦒꦟ꧀ꦲꦤꦠꦺꦴ ꦄꦪꦩꦴꦤꦸꦥꦸꦧ꧀ꦧꦷ ꦏꦡꦶꦠꦴꦠꦶ ꦮꦺꦢꦶꦠꦧ꧀ꦧꦁ.

꧔꧕꧓. ꦆꦣ ꦏꦶꦁ ꦥꦸꦕ꧀ꦖꦠꦷꦠꦶ ꦆꦣ ꦌꦮꦁ ꦄꦫꦲꦠ꧀ꦠꦦꦭꦁ ꦥꦴꦥꦶꦠꦴꦪ ꦢꦺꦱꦤꦴꦪ ‘‘ꦏꦠꦶ ꦥꦤꦴꦮꦸꦱꦺꦴ, ꦨꦮꦴ’’ꦠꦶ ꦨꦮꦁ ꦥꦸꦕ꧀ꦖꦤ꧀ꦠꦺꦴ ꦏꦷꦢꦶꦱꦁ ꦄꦤꦸꦱꦤ꧀ꦣꦶꦁ ꦈꦥꦴꦢꦴꦪ ꦥꦸꦕ꧀ꦖꦠꦷꦠꦶ ꦄꦠ꧀ꦡꦺꦴ. ꦠꦺꦤꦺꦮ ꦲꦶ ‘‘ꦩꦹꦭꦩꦺꦮ ꦒꦠꦺꦴ ꦄꦤꦸꦱꦤ꧀ꦣꦷ’’ꦠꦶ ꦮꦠ꧀ꦮꦴ ꦄꦣꦶꦥ꧀ꦥꦴꦪꦁ ꦥꦏꦴꦱꦺꦤ꧀ꦠꦺꦴ ‘‘ꦢꦸꦥ꧀ꦥꦚ꧀ꦚꦺꦴ’’ꦠꦶꦄꦴꦢꦶꦩꦴꦲ. ꦢꦸꦥ꧀ꦥꦚ꧀ꦚꦺꦴꦠꦶ ꦲꦶ ꦆꦣ ꦄꦥ꧀ꦥꦛꦶꦮꦶꦢ꧀ꦣꦱꦕ꧀ꦕꦺꦴ ꦄꦣꦶꦥ꧀ꦥꦺꦠꦺꦴ, ꦤ ꦗꦭ꦳ꦺꦴ ꦌꦮ. ꦏꦴꦩꦨꦮꦺꦴꦠꦶꦄꦴꦢꦷꦱꦸ ꦏꦩ꧀ꦩꦺꦴꦥꦥꦠ꧀ꦠꦶꦨꦺꦢꦠꦺꦴ ꦢꦸꦮꦶꦣꦺꦴꦥꦶ ꦨꦮꦺꦴ ꦄꦣꦶꦥ꧀ꦥꦺꦠꦺꦴꦠꦶ ꦢꦱ꧀ꦱꦺꦤ꧀ꦠꦺꦴ ‘‘ꦏꦴꦩꦨꦮꦹꦥꦒꦁ ꦏꦩ꧀ꦩ’’ꦤ꧀ꦠꦶꦄꦴꦢꦶꦩꦴꦲ. ꦠꦠ꧀ꦡ ꦪꦁ ꦮꦠ꧀ꦠꦧ꧀ꦧꦁ, ꦠꦁ ꦮꦶꦱꦸꦢ꧀ꦣꦶꦩꦒ꧀ꦒꦺꦠꦁꦱꦁꦮꦟ꧀ꦟꦤꦴꦪꦁ (ꦮꦶꦱꦸꦢ꧀ꦣꦶ. ꧒.꧖꧔꧗; ꦮꦶꦱꦸꦢ꧀ꦣꦶ. ꦩꦲꦴꦛꦷ. ꧒.꧖꧔꧖-꧖꧔꧗) ꦮꦸꦠ꧀ꦠꦤꦪꦺꦤ ꦮꦺꦢꦶꦠꦧ꧀ꦧꦁ. ꦥꦸꦤꦧ꧀ꦨꦮꦱ꧀ꦱꦴꦠꦶ ꦥꦸꦤꦥ꧀ꦥꦸꦤꦁ ꦄꦥꦫꦴꦥꦫꦁ ꦨꦮꦤꦠꦺꦴ ꦗꦴꦪꦤꦠꦺꦴ ꦥꦸꦤꦧ꧀ꦨꦮꦺꦴꦠꦶ ꦭꦢ꧀ꦣꦤꦴꦩꦱ꧀ꦱ ꦮꦛ꧀ꦛꦥꦧꦤ꧀ꦣꦱ꧀ꦱ. ꦠꦺꦤꦴꦲ ‘‘ꦆꦣ ꦮꦛ꧀ꦛꦁ ꦥꦸꦕ꧀ꦖꦶꦱ꧀ꦱꦴꦩꦷ’’ꦠꦶ. ꦄꦨꦶꦤꦶꦧ꧀ꦧꦠ꧀ꦠꦷꦠꦶ ꦨꦮꦪꦺꦴꦤꦶꦒꦠꦶꦄꦴꦢꦶꦮꦱꦺꦤ ꦤꦶꦧ꧀ꦧꦠ꧀ꦠꦶ. ꦠꦲꦶꦁ ꦠꦲꦶꦁ ꦠꦱ꧀ꦩꦶꦁ ꦠꦱ꧀ꦩꦶꦁ ꦨꦮꦴꦢꦶꦏꦺ. ꦄꦨꦶꦤꦤ꧀ꦢꦤꦴꦠꦶ ꦠꦟ꧀ꦲꦴꦄꦨꦶꦤꦤ꧀ꦢꦤꦲꦺꦠꦸ. ꦒꦩꦤꦴꦒꦩꦤꦁ ꦲꦺꦴꦠꦷꦠꦶꦄꦴꦢꦶꦤꦴ ꦨꦮꦴꦢꦷꦱꦸ ꦱꦠ꧀ꦠꦴꦤꦁ ꦄꦥꦫꦴꦥꦫꦁ ꦕꦸꦠꦶꦥꦛꦶꦱꦤ꧀ꦣꦶꦪꦺꦴ ꦢꦱ꧀ꦱꦺꦠꦶ. ꦑꦪꦤꦶꦫꦺꦴꦣꦺꦤꦴꦠꦶ ꦄꦕ꧀ꦕꦤ꧀ꦠꦑꦪꦱꦔ꧀ꦑꦴꦠꦺꦤ ꦄꦤꦸꦥ꧀ꦥꦴꦢꦤꦶꦫꦺꦴꦣꦺꦤ. ꦈꦨꦪꦩꦺꦠꦁ ꦤ ꦮꦠ꧀ꦠꦧ꧀ꦧꦁ ꦥꦲꦴꦤꦴꦨꦶꦱꦩꦪꦨꦴꦮꦤꦴꦨꦶꦱꦩꦪꦴꦤꦁ ꦄꦕ꧀ꦕꦴꦱꦤ꧀ꦤꦏꦴꦭꦠ꧀ꦠꦴ. ꦮꦠ꧀ꦠꦧ꧀ꦧꦁ ꦠꦁ ꦲꦺꦠꦸꦦꦭꦣꦩ꧀ꦩꦹꦥꦕꦴꦫꦮꦱꦺꦤ. ꦪꦡꦴ ꦲꦶ ꦥꦢꦷꦥꦸꦗ꧀ꦗꦭꦤꦲꦺꦠꦸꦏꦺꦴ ꦄꦤ꧀ꦣꦏꦴꦫꦮꦶꦒꦩꦺꦴ, ꦌꦮꦁ ꦮꦶꦗ꧀ꦗꦸꦥ꧀ꦥꦴꦢꦲꦺꦠꦸꦏꦺꦴ ꦄꦮꦶꦗ꧀ꦗꦴꦤꦶꦫꦺꦴꦣꦺꦴ, ꦲꦺꦠꦸꦦꦭꦣꦩ꧀ꦩꦴ ꦕ ꦱꦩꦴꦤꦏꦴꦭꦴꦥꦶ ꦥꦸꦧ꧀ꦧꦴꦥꦫꦏꦴꦭꦴ ꦮꦶꦪ ꦮꦺꦴꦲꦫꦷꦪꦤ꧀ꦠꦶ ꦪꦡꦴ – ‘‘ꦕꦏ꧀ꦑꦸꦚ꧀ꦕ ꦥꦛꦶꦕ꧀ꦕ ꦫꦹꦥꦺ ꦕ ꦈꦥ꧀ꦥꦗ꧀ꦗꦠꦶ ꦕꦏ꧀ꦑꦸꦮꦶꦚ꧀ꦚꦴꦟ’’ꦤ꧀ꦠꦶ (ꦩ. ꦤꦶ. ꧑.꧒꧐꧔, ꧔꧐꧐; ꦩ. ꦤꦶ. ꧓.꧔꧒꧐, ꧔꧒꧕, ꧔꧒꧖; ꦱꦁ. ꦤꦶ. ꧒.꧔꧓-꧔꧕; ꧒.꧔.꧖꧐; ꦏꦡꦴ. ꧔꧖꧕, ꧔꧖꧗) ꦥꦕ꧀ꦕꦪꦥꦕ꧀ꦕꦪꦸꦥ꧀ꦥꦤ꧀ꦤꦏꦶꦫꦶꦪꦴ. ꦒꦩꦤꦁ ꦈꦥꦕ꧀ꦖꦶꦗ꧀ꦗꦠꦶ ꦆꦣ ꦏꦴꦩꦨꦮꦺ ꦥꦫꦶꦤꦶꦧ꧀ꦧꦴꦤꦺꦤ. ꦄꦴꦒꦩꦤꦁ ꦈꦥꦕ꧀ꦖꦶꦗ꧀ꦗꦠꦶ ꦠꦠ꧀ꦡ ꦫꦹꦥꦴꦫꦹꦥꦺꦱꦸ ꦥꦫꦶꦤꦶꦧ꧀ꦧꦴꦤꦺꦤ. ꦒꦩꦤꦴꦒꦩꦤꦁ ꦈꦥꦕ꧀ꦖꦶꦗ꧀ꦗꦠꦶ ꦱꦧ꧀ꦧꦱꦺꦴ ꦄꦥꦫꦴꦥꦫꦸꦥ꧀ꦥꦠ꧀ꦠꦶꦪꦴ ꦄꦨꦴꦮꦠꦺꦴ.

꧔꧕꧔. ꦮꦶꦮꦛ꧀ꦛꦏꦡꦴꦪ ꦥꦫꦠꦺꦴ ꦗꦺꦴꦠꦶꦠꦁ ꦥꦜꦩꦁ ꦙꦴꦤꦁ ꦮꦶꦮꦛ꧀ꦛꦁ ꦥꦠ꧀ꦮꦴ ꦜꦶꦠꦱ꧀ꦱ ꦈꦏ꧀ꦏꦛ꧀ꦜꦤꦶꦢ꧀ꦢꦺꦱꦺꦤ ꦈꦨꦠꦺꦴꦨꦴꦒꦮꦶꦩꦸꦠ꧀ꦠꦱ꧀ꦱ ꦤꦶꦫꦺꦴꦣꦱꦴꦣꦏꦁ ꦮꦶꦨꦴꦮꦶꦠꦸꦁ ꦪꦸꦠ꧀ꦠꦤ꧀ꦠꦶ ꦄꦴꦲ ‘‘ꦏꦠꦩꦁ ꦥꦤꦴꦮꦸꦱꦺꦴꦠꦶ ꦆꦣ ꦏꦶꦁ ꦥꦸꦕ꧀ꦖꦠꦷ’’ꦠꦶꦄꦴꦢꦶ. ꦠꦡꦴ ꦲꦶ ꦄꦤꦤ꧀ꦠꦫꦁ ꦤꦶꦫꦺꦴꦣꦱꦩꦴꦥꦗ꧀ꦗꦤꦏꦺꦤ ꦨꦶꦏ꧀ꦑꦸꦤꦴ ꦗꦴꦤꦶꦠꦧ꧀ꦧꦴꦤꦶ ꦥꦜꦩꦱ꧀ꦱ ꦙꦴꦤꦱ꧀ꦱ ꦱꦩ꧀ꦥꦪꦺꦴꦒꦥꦲꦴꦤꦔ꧀ꦒꦴꦤꦶ ꦥꦸꦕ꧀ꦖꦶꦠꦴꦤꦶ. ꦄꦔ꧀ꦒꦮꦮꦠ꧀ꦡꦴꦤꦤ꧀ꦠꦶ ꦙꦴꦤꦔ꧀ꦒꦮꦮꦠ꧀ꦡꦴꦤꦁ. ꦏꦺꦴꦛ꧀ꦜꦴꦱꦥꦫꦶꦕ꧀ꦖꦺꦢꦺꦴꦠꦶ ꦠꦠ꧀ꦡ ꦭꦧ꧀ꦨꦩꦴꦤꦦꦱ꧀ꦱꦥꦚ꧀ꦕꦩꦏꦴꦢꦶꦣꦩ꧀ꦩꦏꦺꦴꦛ꧀ꦜꦴꦱꦥꦫꦶꦕ꧀ꦖꦺꦢꦺꦴ ꦗꦴꦤꦶꦠꦧ꧀ꦧꦺꦴ. ꦆꦩꦱ꧀ꦩꦶꦁ ꦙꦴꦤꦺ ꦌꦠ꧀ꦠꦏꦴ ꦣꦩ꧀ꦩꦴ ꦱꦁꦮꦶꦗ꧀ꦗꦤ꧀ꦠꦶ, ꦌꦠ꧀ꦠꦏꦴ ꦤꦶꦫꦺꦴꦣꦶꦠꦴꦠꦶ ꦗꦴꦤꦶꦠꦧ꧀ꦧꦁ. ꦈꦥꦏꦴꦫꦴꦤꦸꦥꦏꦴꦫꦴꦤꦶ ꦄꦔ꧀ꦒꦴꦤꦷꦠꦶ ꦤꦶꦫꦺꦴꦣꦱꦩꦴꦥꦠ꧀ꦠꦶꦪꦴ ꦈꦥꦏꦴꦫꦴꦤꦶ ꦕ ꦄꦤꦸꦥꦏꦴꦫꦴꦤꦶ ꦕ ꦄꦔ꧀ꦒꦴꦤꦶ. ꦤꦶꦫꦺꦴꦣꦱꦩꦴꦥꦠ꧀ꦠꦶꦪꦴ ꦲꦶ ꦱꦺꦴꦭ꦳ꦱꦲꦶ ꦚꦴꦟꦕꦫꦶꦪꦴꦲꦶ ꦤꦮꦲꦶ ꦱꦩꦴꦣꦶꦕꦫꦶꦪꦴꦲꦶ ꦕ ꦥꦠ꧀ꦠꦧ꧀ꦧꦠ꧀ꦠꦴ ꦠꦁꦠꦁꦚꦴꦟꦱ꧀ꦱ ꦱꦩꦴꦣꦶꦕꦫꦶꦪꦴꦲꦶ ꦱꦩꦠꦶꦏ꧀ꦏꦩꦶꦠꦧ꧀ꦧꦴ ꦣꦩ꧀ꦩꦴ ꦄꦤꦸꦥꦏꦴꦫꦏꦔ꧀ꦒꦴꦤꦶ, ꦱꦩꦠꦶꦏ꧀ꦏꦩꦏꦴ ꦈꦥꦏꦴꦫꦏꦔ꧀ꦒꦴꦤꦶ. ꦠꦺꦱꦚ꧀ꦲꦶ ꦮꦱꦺꦤ ꦪꦡꦴꦤꦸꦥꦸꦧ꧀ꦧꦁ ꦈꦥꦱꦤ꧀ꦠꦸꦥꦱꦤ꧀ꦠꦎꦭ꦳ꦴꦫꦶꦏꦨꦴꦮꦴꦪ ꦨꦮꦒ꧀ꦒꦱꦩꦴꦥꦠ꧀ꦠꦶꦪꦴ ꦱꦔ꧀ꦑꦴꦫꦴꦮꦱꦺꦱꦱꦸꦑꦸꦩꦠꦁ ꦥꦠ꧀ꦠꦴ ꦕꦶꦠ꧀ꦠꦕꦺꦠꦱꦶꦏꦴ ꦪꦡꦴꦥꦫꦶꦕ꧀ꦖꦶꦤ꧀ꦤꦁ ꦏꦴꦭꦁ ꦤꦶꦫꦸꦗ꧀ꦙꦤ꧀ꦠꦶ, ꦄꦥ꧀ꦥꦮꦠ꧀ꦠꦶꦁ ꦒꦕ꧀ꦖꦤ꧀ꦠꦶ. ꦠꦱ꧀ꦱꦴꦠꦶ ꦤꦶꦫꦺꦴꦣꦱ꧀ꦱ. ꦄꦤꦤ꧀ꦠꦫꦥꦕ꧀ꦕꦪꦤ꧀ꦠꦶ ꦄꦤꦤ꧀ꦠꦫꦥꦕ꧀ꦕꦪꦱꦢꦶꦱꦁ. ꦤ ꦲꦶ ꦤꦶꦫꦺꦴꦣꦱ꧀ꦱ ꦏꦺꦴꦕꦶ ꦣꦩ꧀ꦩꦺꦴ ꦄꦤꦤ꧀ꦠꦫꦥꦕ꧀ꦕꦪꦺꦴ ꦤꦴꦩ ꦄꦠ꧀ꦡꦶ. ꦪꦚ꧀ꦲꦶ ꦠꦢꦴ ꦕꦶꦠ꧀ꦠꦕꦺꦠꦱꦶꦏꦴꦤꦁ ꦠꦡꦴ ꦤꦶꦫꦸꦗ꧀ꦙꦤꦁ, ꦠꦁ ꦪꦡꦴꦮꦸꦠ꧀ꦠꦥꦸꦧ꧀ꦧꦴꦨꦶꦱꦔ꧀ꦑꦴꦫꦲꦺꦠꦸꦏꦴꦪ ꦤꦺꦮꦱꦚ꧀ꦚꦴꦤꦴꦱꦚ꧀ꦚꦴꦪꦠꦤꦱꦩꦴꦥꦠ꧀ꦠꦶꦪꦴ ꦄꦲꦺꦴꦱꦷꦠꦶ ꦱꦴ ꦠꦱ꧀ꦱ ꦄꦤꦤ꧀ꦠꦫꦥꦕ꧀ꦕꦪꦺꦴ ꦮꦶꦪ ꦲꦺꦴꦠꦷꦠꦶ ꦠꦁ ꦮꦸꦠ꧀ꦠꦁ. ꦖ ꦱꦩꦴꦥꦠ꧀ꦠꦶꦪꦺꦴꦠꦶ ꦱꦸꦠ꧀ꦠꦤ꧀ꦠꦤꦪꦺꦤ ꦮꦸꦠ꧀ꦠꦱꦸꦠ꧀ꦠꦤ꧀ꦠꦥꦶꦛꦏꦱꦁꦮꦟ꧀ꦟꦤꦴꦠꦶ ꦏꦠ꧀ꦮꦴ. ‘‘ꦱꦠ꧀ꦠ ꦱꦩꦴꦥꦠ꧀ꦠꦶꦪꦺꦴ’’ꦠꦶ ꦥꦤ ꦮꦠ꧀ꦠꦧ꧀ꦧꦁ, ꦄꦚ꧀ꦚꦡꦴ ꦆꦢꦁ ‘‘ꦕꦠꦸꦫꦔ꧀ꦒꦶꦏ’’ꦤ꧀ꦠꦶ ꦤ ꦮꦠ꧀ꦠꦧ꧀ꦧꦁ ꦱꦶꦪꦴ. ꦤꦪꦁ ꦮꦴ ꦢꦱ꧀ꦱꦺꦠ꧀ꦮꦴꦠꦶ ꦄꦴꦢꦶꦄꦤ꧀ꦠꦢꦱ꧀ꦱꦤꦮꦱꦺꦤ ꦤꦪꦢꦱ꧀ꦱꦤꦁ ꦏꦠ꧀ꦮꦴ.

꧔꧕꧕. ꦌꦮꦁ ꦤꦶꦫꦺꦴꦣꦱ꧀ꦱ ꦥꦴꦢꦏꦁ ꦮꦶꦨꦴꦮꦺꦠ꧀ꦮꦴ ꦆꦢꦴꦤꦶ ꦄꦤ꧀ꦠꦺꦴꦤꦶꦫꦺꦴꦣꦺ ꦄꦤꦸꦥꦧꦤ꧀ꦣꦨꦴꦮꦠꦺꦴ ꦥꦚ꧀ꦕꦤ꧀ꦤꦁ ꦥꦱꦴꦢꦴꦤꦁ ꦥꦕ꧀ꦕꦪꦥꦸꦕ꧀ꦖꦤꦺ ꦥꦜꦩꦁ ꦠꦴꦮ ꦠꦺ ꦱꦫꦹꦥꦠꦺꦴ ꦄꦴꦮꦺꦟꦶꦏꦠꦺꦴ ꦄꦴꦮꦺꦟꦶꦏꦮꦶꦱꦪꦠꦺꦴ ꦥꦛꦶꦱ꧀ꦱꦫꦟꦠꦺꦴ ꦕ ꦥꦸꦕ꧀ꦖꦤꦮꦱꦺꦤ ꦥꦴꦭ꦳ꦶ ꦥꦮꦠ꧀ꦠꦴꦠꦶ ꦢꦱ꧀ꦱꦺꦤ꧀ꦠꦺꦴ ‘‘ꦮꦶꦚ꧀ꦚꦴꦟꦤꦶꦱ꧀ꦱꦪꦺ ꦥꦚ꧀ꦕ ꦥꦱꦴꦢꦺ ꦥꦸꦕ꧀ꦖꦤ꧀ꦠꦺꦴ’’ꦠꦶ ꦄꦴꦲ. ꦒꦺꦴꦕꦫꦮꦶꦱꦪꦤ꧀ꦠꦶ ꦌꦠ꧀ꦡ ꦏꦴꦩꦁ ꦠꦧ꧀ꦧꦲꦸꦭꦕꦴꦫꦶꦠꦴꦥꦺꦏ꧀ꦑꦁ ꦒꦺꦴꦕꦫꦒ꧀ꦒꦲꦟꦁ, ꦄꦤꦚ꧀ꦚꦠ꧀ꦡꦨꦴꦮꦴꦥꦺꦏ꧀ꦑꦁ ꦮꦶꦱꦪꦒ꧀ꦒꦲꦟꦤ꧀ꦠꦶ ꦄꦠ꧀ꦡꦺꦮ ꦒꦺꦴꦕꦫꦮꦶꦱꦪꦨꦴꦮꦴꦤꦁ ꦮꦶꦱꦺꦱꦺꦴ, ꦮꦶꦮꦫꦶꦪꦩꦴꦤꦁ ꦥꦤ ꦈꦨꦪꦩ꧀ꦥꦶ ꦄꦴꦫꦩ꧀ꦩꦟꦱꦨꦴꦮꦩꦺꦮꦴꦠꦶ ꦄꦴꦲ ‘‘ꦒꦺꦴꦕꦫꦨꦹꦠꦁ ꦮꦶꦱꦪ’’ꦤ꧀ꦠꦶ. ꦌꦏꦺꦏꦱ꧀ꦱꦴꦠꦶ ꦌꦏꦺꦴ ꦌꦏꦱ꧀ꦱ, ꦄꦚ꧀ꦚꦺꦴ ꦄꦚ꧀ꦚꦱ꧀ꦱꦴꦠꦶ ꦄꦠ꧀ꦡꦺꦴ. ꦄꦚ꧀ꦚꦠ꧀ꦡꦺꦴ ꦲꦶ ꦄꦪꦁ ꦌꦏ-ꦱꦢ꧀ꦢꦺꦴ ‘‘ꦆꦠ꧀ꦡꦺꦏꦺ ꦄꦨꦶꦮꦢꦤ꧀ꦠꦷ’’ꦠꦶꦄꦴꦢꦷꦱꦸ (ꦩ. ꦤꦶ. ꧓.꧒꧗) ꦮꦶꦪ. ꦱꦕꦺ ꦲꦷꦠꦶꦄꦴꦢꦶ ꦄꦨꦹꦠꦥꦫꦶꦏꦥ꧀ꦥꦤꦮꦕꦤꦩꦺꦠꦁ. ꦠꦠ꧀ꦡ ꦱꦩꦺꦴꦣꦴꦤꦺꦠ꧀ꦮꦴꦠꦶ ꦌꦏꦗ꧀ꦙꦁ ꦏꦠ꧀ꦮꦴ. ꦮꦶꦤꦴꦥꦶ ꦩꦸꦑꦺꦤꦴꦠꦶꦄꦴꦢꦶꦤꦴ ꦄꦠ꧀ꦡꦱꦭ꧀ꦭꦴꦥꦶꦏꦤꦶꦢꦱ꧀ꦱꦤꦁ ꦤꦴꦩ ꦢꦱ꧀ꦱꦺꦠꦶ. ꦪꦡꦴ ꦮꦶꦚ꧀ꦚꦴꦟꦴꦣꦶꦛ꧀ꦜꦶꦠꦩꦺꦮ ꦕꦏ꧀ꦑꦸ ꦫꦹꦥꦁ ꦥꦱ꧀ꦱꦠꦶ, ꦤ ꦏꦺꦮꦭꦁ, ꦌꦮꦁ ꦕꦏ꧀ꦑꦸꦤꦶꦱ꧀ꦱꦪꦩꦺꦮ ꦮꦶꦚ꧀ꦚꦴꦟꦁ ꦠꦁ ꦥꦱ꧀ꦱꦠꦶ, ꦤ ꦆꦠꦫꦤ꧀ꦠꦶ ꦄꦴꦲ ‘‘ꦕꦏ꧀ꦑꦸꦥꦱꦴꦢꦺ ꦈꦥꦤꦺꦲꦷ’’ꦠꦶ. ꦠꦺꦤ ꦠꦺꦱꦁ ꦠꦠ꧀ꦡ ꦱꦁꦲꦕ꧀ꦕꦏꦴꦫꦶꦠꦁ ꦢꦱ꧀ꦱꦺꦠꦶ. ꦪꦢꦶ ꦮꦴ ꦤꦷꦭꦁ ꦪꦢꦶ ꦮꦴ ꦥꦷꦠꦏꦤ꧀ꦠꦶ ꦆꦢꦁ ꦤꦷꦭꦥꦷꦠꦴꦢꦶꦱꦨꦴꦮꦗꦴꦤꦤꦩꦠ꧀ꦠꦁ ꦱꦤ꧀ꦣꦴꦪꦴꦲ. ꦤꦷꦭꦁ ꦥꦷꦠꦏꦤ꧀ꦠꦶ ꦥꦗꦴꦤꦤꦁ ꦕꦏ꧀ꦑꦸꦮꦶꦚ꧀ꦚꦴꦟꦱ꧀ꦱ ꦤꦠ꧀ꦡꦺꦮ ꦄꦮꦶꦏꦥ꧀ꦥꦏꦨꦴꦮꦠꦺꦴ. ꦌꦠꦺꦱꦁ ꦕꦏ꧀ꦑꦸꦮꦶꦚ꧀ꦚꦴꦟꦴꦢꦷꦤꦁ. ꦤꦶꦱ꧀ꦱꦪꦱꦷꦱꦺꦤ ꦤꦶꦱ꧀ꦱꦶꦠꦥꦸꦕ꧀ꦖꦴ ꦲꦺꦱꦴ, ꦌꦮꦚ꧀ꦲꦶ ꦮꦶꦱꦪꦴꦤꦸꦨꦮꦤꦕꦺꦴꦢꦤꦴ ꦱꦩꦠ꧀ꦡꦶꦠꦴ ꦲꦺꦴꦠꦶ. ꦠꦺꦤꦴꦲ ‘‘ꦕꦏ꧀ꦑꦸꦮꦶꦚ꧀ꦚꦴꦟꦁ ꦲꦷ’’ꦠꦶꦄꦴꦢꦶ. ꦪꦡꦴꦱꦏꦁ ꦮꦶꦱꦪꦁ ꦫꦗ꧀ꦗꦤꦴꦢꦶꦮꦱꦺꦤ ꦄꦤꦸꦨꦮꦶꦠꦸꦁ ꦄꦱꦩꦠ꧀ꦡꦴꦤꦶ ꦕꦏ꧀ꦑꦸꦮꦶꦚ꧀ꦚꦴꦟꦴꦢꦷꦤꦶ, ꦠꦠ꧀ꦡ ꦱꦩꦠ꧀ꦡꦠꦴꦪꦺꦮ ꦕ ꦤꦠ꧀ꦡꦶ, ꦤ ꦏꦶꦚ꧀ꦕꦶ ꦄꦠ꧀ꦡꦠꦺꦴ ꦥꦛꦶꦱꦫꦤ꧀ꦠꦴꦤꦶ ꦮꦶꦪ ꦲꦺꦴꦤ꧀ꦠꦷꦠꦶ ꦮꦸꦠ꧀ꦠꦁ ‘‘ꦏꦶꦁ ꦌꦠꦴꦤꦶ ꦥꦛꦶꦱꦫꦤ꧀ꦠꦷ’’ꦠꦶ. ꦗꦮꦤꦩꦤꦺꦴ ꦥꦛꦶꦱꦫꦟꦤ꧀ꦠꦶ ꦥꦚ꧀ꦕꦢ꧀ꦮꦴꦫꦶꦏꦁ ꦆꦠꦫꦚ꧀ꦕ ꦱꦴꦣꦴꦫꦟꦠꦺꦴ ꦮꦠ꧀ꦮꦴ ꦥꦸꦤ ꦪꦴꦪ’ꦱ꧀ꦱ ꦫꦗ꧀ꦗꦤꦴꦢꦶꦥꦮꦠ꧀ꦠꦶꦪꦴ ꦥꦛꦶꦱꦫꦟꦠꦴ, ꦱꦴ ꦱꦮꦶꦱꦺꦱꦴ ꦪꦠ꧀ꦡ ꦭꦧ꧀ꦨꦠꦶ, ꦠꦁ ꦢꦱ꧀ꦱꦺꦤ꧀ꦠꦺꦴ ‘‘ꦩꦤꦺꦴꦢ꧀ꦮꦴꦫꦶꦏꦗꦮꦤꦩꦤꦺꦴ ꦮꦴ’’ꦠꦶ ꦄꦴꦲ. ꦌꦠꦱ꧀ꦩꦶꦁ ꦥꦤ ꦢ꧀ꦮꦴꦫꦺꦠꦶ ꦕꦏ꧀ꦑꦸꦢ꧀ꦮꦴꦫꦺ ꦗꦮꦤꦁ ꦫꦗ꧀ꦗꦠꦶ ꦮꦴ ꦢꦸꦱ꧀ꦱꦠꦶ ꦮꦴ ꦩꦸꦪ꧀ꦲꦠꦶ ꦮꦴ, ꦪꦠꦺꦴ ꦠꦠ꧀ꦡ ꦄꦚ꧀ꦚꦴꦟꦴꦢꦶꦄꦱꦁꦮꦫꦺꦴ ꦥꦮꦠ꧀ꦠꦠꦶ.

ꦠꦠ꧀ꦫꦴꦠꦶ ꦠꦱ꧀ꦩꦶꦁ ꦗꦮꦤꦩꦤꦱ꧀ꦱꦺꦮ ꦥꦛꦶꦱꦫꦟꦨꦴꦮꦺ. ꦢꦸꦧ꧀ꦧꦭꦨꦺꦴꦗꦏꦴꦠꦶ ꦲꦷꦤꦱꦴꦩꦠ꧀ꦡꦶꦪꦴ ꦫꦴꦗꦨꦺꦴꦒ꧀ꦒꦴ. ꦱꦺꦮꦏꦴꦤꦁ ꦒꦟꦤꦴꦪ ꦪꦺꦴꦗꦶꦠꦢꦶꦮꦱꦺ ꦭꦧ꧀ꦨꦩꦴꦤꦏꦲꦴꦥꦟꦺꦴ ꦪꦸꦠ꧀ꦠꦶꦏꦲꦴꦥꦟꦺꦴ. ꦄꦤ꧀ꦢꦸꦧꦤ꧀ꦣꦤꦺꦤ ꦧꦢ꧀ꦣꦱ꧀ꦱ ꦮꦶꦱ꧀ꦱꦗ꧀ꦗꦤꦺꦤ ꦭꦧ꧀ꦨꦩꦴꦤꦏꦲꦴꦥꦟꦺꦴ ꦧꦤ꧀ꦣꦏꦲꦴꦥꦟꦺꦴ. ꦏꦶꦚ꧀ꦕꦶ ꦥꦲꦫꦤ꧀ꦠꦺ ꦩꦴ ꦥꦲꦫꦤ꧀ꦠꦹꦠꦶ ꦥꦛꦶꦏ꧀ꦑꦶꦥꦠꦺꦴ ꦢꦴꦠꦧ꧀ꦧꦢꦟ꧀ꦝꦺꦴ ꦩꦴꦥꦲꦴꦫꦏꦲꦴꦥꦟꦺꦴ. ꦱꦺꦴ ꦱꦧ꧀ꦧꦺꦴꦥꦶ ꦥꦫꦶꦠ꧀ꦠꦏꦺꦱꦸ ꦒꦴꦩꦶꦏꦩꦤꦸꦱ꧀ꦱꦺꦱꦸ ꦠꦡꦴ ꦭꦧ꧀ꦨꦩꦴꦤꦺꦴ ꦌꦠ꧀ꦠꦏꦺꦴ ꦲꦺꦴꦠꦷꦠꦶ ꦄꦴꦲ ‘‘ꦄꦛ꧀ꦜꦏꦲꦴꦥꦟꦺꦴ ꦮꦴ’’ꦠꦶꦄꦴꦢꦶ. ꦱꦠꦮꦠ꧀ꦡꦸꦏꦤ꧀ꦠꦶ ꦱꦠꦏꦫꦷꦱꦮꦠ꧀ꦡꦸꦏꦁ. ꦌꦱ ꦤꦪꦺꦴ ꦱꦺꦱꦥꦢꦢ꧀ꦮꦪꦺꦥꦶ. ꦠꦠ꧀ꦡꦴꦠꦶꦄꦴꦢꦶ ꦈꦥꦩꦴꦱꦁꦱꦤ꧀ꦣꦤꦁ, ꦠꦁ ꦱꦸꦮꦶꦚ꧀ꦚꦺꦪ꧀ꦪꦩꦺꦮ.

꧔꧕꧖. ꦄꦤ꧀ꦠꦺꦴꦤꦶꦫꦺꦴꦣꦱ꧀ꦩꦶꦁ ꦥꦚ꧀ꦕ ꦥꦱꦴꦢꦺꦠꦶ ꦤꦶꦫꦺꦴꦣꦱꦩꦴꦥꦤ꧀ꦤꦱ꧀ꦱ ꦥꦮꦠ꧀ꦠꦩꦴꦤꦺ ꦥꦚ꧀ꦕ ꦥꦱꦴꦢꦺ. ꦏꦶꦫꦶꦪꦩꦪꦥꦮꦠ꧀ꦠꦱ꧀ꦩꦶꦤ꧀ꦠꦶ ꦗꦮꦤꦴꦢꦶꦏꦶꦫꦶꦪꦴꦤꦶꦧ꧀ꦧꦠ꧀ꦠꦏꦣꦩ꧀ꦩꦥ꧀ꦥꦮꦠ꧀ꦠꦶꦪꦁ. ꦧꦭꦮꦥꦕ꧀ꦕꦪꦴ ꦲꦺꦴꦤ꧀ꦠꦷꦠꦶ ꦥꦕ꧀ꦖꦴꦗꦴꦠꦮꦶꦥ꧀ꦥꦪꦸꦠ꧀ꦠꦄꦠ꧀ꦡꦶꦄꦮꦶꦒꦠꦥꦕ꧀ꦕꦪꦺꦲꦶ ꦥꦕ꧀ꦕꦪꦴ ꦲꦺꦴꦤ꧀ꦠꦶ, ꦈꦥꦠ꧀ꦡꦩ꧀ꦨꦏꦨꦴꦮꦺꦤ ꦧꦭꦮꦥꦕ꧀ꦕꦪꦴ ꦲꦺꦴꦤ꧀ꦠꦶ. ꦗꦷꦮꦶꦠꦶꦤ꧀ꦢ꧀ꦫꦶꦪꦁ ꦥꦛꦶꦕ꧀ꦕꦴꦠꦶ ꦆꦤ꧀ꦢ꧀ꦫꦶꦪꦄꦠ꧀ꦡꦶꦄꦮꦶꦒꦠꦥꦕ꧀ꦕꦪꦮꦱꦺꦤ ꦥꦕ꧀ꦕꦪꦨꦹꦠꦁ ꦗꦷꦮꦶꦠꦶꦤ꧀ꦢ꧀ꦫꦶꦪꦁ ꦥꦛꦶꦕ꧀ꦕ ꦥꦚ꧀ꦕꦮꦶꦣꦺꦴꦥꦶ ꦥꦱꦴꦢꦺꦴ ꦠꦶꦛ꧀ꦜꦠꦶ. ꦗꦷꦮꦶꦠꦶꦤ꧀ꦢ꧀ꦫꦶꦪꦺꦤ ꦮꦶꦤꦴ ꦤ ꦠꦶꦛ꧀ꦜꦠꦶ ꦗꦷꦮꦶꦠꦶꦤ꧀ꦢ꧀ꦫꦶꦪꦫꦲꦶꦠꦱ꧀ꦱ ꦏꦩ꧀ꦩꦱꦩꦸꦛ꧀ꦜꦴꦤꦫꦹꦥꦏꦭꦴꦥꦱ꧀ꦱ ꦄꦨꦴꦮꦠꦺꦴ. ꦠꦱ꧀ꦩꦴꦠꦶ ꦪꦱ꧀ꦩꦴ ꦄꦤꦸꦥꦴꦭꦤꦭꦏ꧀ꦑꦟꦺꦤ ꦗꦷꦮꦶꦠꦺꦤ ꦄꦤꦸꦥꦴꦭꦶꦠꦴ ꦌꦮ ꦈꦱ꧀ꦩꦴ ꦥꦮꦠ꧀ꦠꦠꦶ, ꦤ ꦠꦺꦤ ꦄꦤꦤꦸꦥꦴꦭꦶꦠꦴ, ꦠꦱ꧀ꦩꦴ ꦈꦱ꧀ꦩꦴ ꦄꦴꦪꦸꦁ ꦥꦛꦶꦕ꧀ꦕ ꦠꦶꦛ꧀ꦜꦠꦶ. ꦗꦴꦭꦱꦶꦑꦁ ꦥꦛꦶꦕ꧀ꦕ ꦄꦴꦨꦴ ꦥꦚ꧀ꦚꦴꦪꦠꦷꦠꦶ ꦗꦴꦭꦱꦶꦑꦴꦱꦔ꧀ꦑꦴꦠꦨꦹꦠꦱꦔ꧀ꦓꦴꦠꦁ ꦱꦲꦺꦮ ꦥꦮꦠ꧀ꦠꦩꦴꦤꦁ ꦤꦶꦱ꧀ꦱꦴꦪ ‘‘ꦄꦴꦨꦴ’’ꦠꦶ ꦭꦢ꧀ꦣꦤꦴꦩꦴ ꦮꦟ꧀ꦟꦣꦴꦠꦸ ‘‘ꦈꦗ꧀ꦗꦭꦠꦶ, ꦄꦤ꧀ꦣꦏꦴꦫꦁ ꦮꦶꦣꦩꦠꦶ, ꦫꦹꦥꦒꦠꦴꦤꦶ ꦕ ꦮꦶꦢꦁꦱꦺꦠꦷ’’ꦠꦶꦄꦴꦢꦷꦲꦶ ꦥꦏꦴꦫꦺꦲꦶ ꦚꦴꦪꦠꦶ. ꦠꦁ ꦄꦴꦭꦺꦴꦏꦁ ꦥꦛꦶꦕ꧀ꦕꦴꦠꦶ ꦠꦁ ꦮꦸꦠ꧀ꦠꦥ꧀ꦥꦏꦴꦫꦁ ꦄꦴꦭꦺꦴꦏꦁ ꦥꦕ꧀ꦕꦪꦁ ꦭꦨꦶꦠ꧀ꦮꦴ. ꦗꦴꦭꦱꦶꦑꦴ ꦥꦚ꧀ꦚꦴꦪꦠꦷꦠꦶ ‘‘ꦄꦥ꧀ꦥꦶꦏꦴ, ꦩꦲꦠꦷ, ꦈꦗꦸ, ꦏꦸꦛꦶꦭꦴ’’ꦠꦶꦄꦴꦢꦶꦤꦴ ꦥꦴꦏꦛꦴ ꦲꦺꦴꦠꦶ.

ꦗꦴꦭꦱꦶꦑꦴ ꦮꦶꦪ ꦏꦩ꧀ꦩꦗꦠꦺꦗꦺꦴ ꦤꦶꦱ꧀ꦱꦪꦨꦴꦮꦠꦺꦴ. ꦄꦴꦭꦺꦴꦏꦺꦴ ꦮꦶꦪ ꦗꦷꦮꦶꦠꦶꦤ꧀ꦢ꧀ꦫꦶꦪꦁ ꦠꦤ꧀ꦤꦶꦱ꧀ꦱꦶꦠꦨꦴꦮꦠꦺꦴ. ꦆꦢꦴꦤꦶ ꦈꦥꦩꦺꦴꦥꦩꦶꦠꦧ꧀ꦧꦴꦤꦁ ꦱꦩ꧀ꦧꦤ꧀ꦣꦁ ꦢꦱ꧀ꦱꦺꦠꦸꦁ ‘‘ꦗꦴꦭꦱꦶꦑꦴ ꦲꦷ’’ꦠꦶꦄꦴꦢꦶ ꦮꦸꦠ꧀ꦠꦁ. ꦄꦴꦭꦺꦴꦏꦁ ꦒꦲꦺꦠ꧀ꦮꦴꦮ ꦈꦥ꧀ꦥꦗ꧀ꦗꦠꦷꦠꦶ ꦆꦩꦶꦤꦴ ꦪꦡꦴ ꦗꦴꦭꦱꦶꦑꦴꦪ ꦱꦲꦺꦮ ꦄꦴꦭꦺꦴꦏꦺꦴ ꦈꦥ꧀ꦥꦗ꧀ꦗꦠꦶ, ꦌꦮꦁ ꦏꦩ꧀ꦩꦗꦸꦱ꧀ꦩꦤꦴ ꦱꦲꦺꦮ ꦗꦷꦮꦶꦠꦶꦤ꧀ꦢ꧀ꦫꦶꦪꦁ ꦈꦥ꧀ꦥꦗ꧀ꦗꦠꦷꦠꦶ ꦢꦱ꧀ꦱꦺꦠꦶ. ꦗꦴꦭꦱꦶꦑꦴꦱꦤ꧀ꦤꦶꦱ꧀ꦱꦪꦺꦴ ꦠꦱ꧀ꦱꦴ ꦱꦠꦶꦪꦺꦮ ꦲꦺꦴꦤ꧀ꦠꦺꦴ ꦄꦴꦭꦺꦴꦏꦺꦴ ꦠꦴꦪ ꦈꦥ꧀ꦥꦴꦢꦶꦠꦺꦴ ꦮꦶꦪ ꦲꦺꦴꦠꦷꦠꦶ ꦄꦴꦲ ‘‘ꦄꦠ꧀ꦠꦤꦴ ꦗꦤꦶꦠꦄꦴꦭꦺꦴꦏꦺꦤꦺꦮꦴ’’ꦠꦶ. ꦈꦱ꧀ꦩꦴ ꦤꦴꦩꦺꦠ꧀ꦡ ꦏꦩ꧀ꦩꦱꦩꦸꦛ꧀ꦜꦴꦤꦴ ꦠꦺꦗꦺꦴꦣꦴꦠꦸ ꦠꦤ꧀ꦤꦶꦱ꧀ꦱꦶꦠꦚ꧀ꦕ ꦗꦷꦮꦶꦠꦶꦤ꧀ꦢ꧀ꦫꦶꦪꦁ ꦠꦢꦤꦸꦥꦴꦭꦏꦚ꧀ꦕꦴꦠꦶ ꦄꦴꦲ ‘‘ꦏꦩ꧀ꦩꦗꦩꦲꦴꦨꦹꦠꦱꦩ꧀ꦨꦮꦺꦤ ꦗꦷꦮꦶꦠꦶꦤ꧀ꦢ꧀ꦫꦶꦪꦺꦤ ꦈꦱ꧀ꦩꦴꦪ ꦄꦤꦸꦥꦴꦭꦤ’’ꦤ꧀ꦠꦶ. ꦤ ꦏꦺꦮꦭꦁ ꦑꦟꦛ꧀ꦜꦶꦠꦶꦪꦴ ꦌꦮ, ꦄꦡ ꦑꦺꦴ ꦥꦧꦤ꧀ꦣꦴꦤꦸꦥꦕ꧀ꦖꦺꦢꦱ꧀ꦱꦥꦶ ꦗꦷꦮꦶꦠꦶꦤ꧀ꦢ꧀ꦫꦶꦪꦁ ꦏꦴꦫꦟꦤ꧀ꦠꦶ ꦄꦴꦲ ‘‘ꦮꦱ꧀ꦱꦱꦠꦩ꧀ꦥꦶ ꦏꦩ꧀ꦩꦗꦠꦺꦗꦥꦮꦠ꧀ꦠꦁ ꦥꦴꦭꦺꦠꦷ’’ꦠꦶ. ꦈꦱ꧀ꦩꦴ ꦄꦴꦪꦸꦤꦺꦴ ꦥꦕ꧀ꦕꦪꦺꦴ ꦲꦺꦴꦤ꧀ꦠꦺꦴ ꦱꦺꦱꦨꦹꦠꦱꦲꦶꦠꦺꦴ ꦌꦮ ꦲꦺꦴꦠꦷꦠꦶ ꦄꦴꦲ ‘‘ꦩꦲꦴꦨꦹꦠꦴꦤꦷ’’ꦠꦶ. ꦠꦡꦴ ꦄꦴꦪꦸꦥꦶ ꦱꦲꦗꦴꦠꦫꦹꦥꦁ ꦥꦴꦭꦺꦤ꧀ꦠꦩꦺꦮ ꦈꦱ꧀ꦩꦴꦪ ꦥꦕ꧀ꦕꦪꦺꦴ ꦲꦺꦴꦠꦷꦠꦶ ꦮꦸꦠ꧀ꦠꦁ ‘‘ꦩꦲꦴꦨꦹꦠꦴꦤꦶ ꦥꦴꦭꦺꦠꦷ’’ꦠꦶ.

꧔꧕꧗. ꦄꦴꦪꦸ ꦌꦮ ꦆꦤ꧀ꦢ꧀ꦫꦶꦪꦥꦕ꧀ꦕꦪꦴꦢꦶꦮꦱꦺꦤ ꦱꦲꦗꦴꦠꦣꦩ꧀ꦩꦴꦤꦁ ꦄꦤꦸꦥꦴꦭꦤꦮꦱꦺꦤ ꦱꦔ꧀ꦑꦫꦟꦠꦺꦴ ꦄꦴꦪꦸꦱꦔ꧀ꦑꦴꦫꦺꦴ. ꦧꦲꦸꦮꦕꦤꦤꦶꦢ꧀ꦢꦺꦱꦺꦴ ꦥꦤ ꦄꦤꦺꦏꦱꦠꦱꦲꦱ꧀ꦱꦨꦺꦢꦺꦱꦸ ꦫꦹꦥꦏꦭꦴꦥꦺꦱꦸ ꦥꦮꦠ꧀ꦠꦶꦪꦴ ꦄꦤꦺꦏꦨꦺꦢꦤ꧀ꦠꦶ ꦏꦠ꧀ꦮꦴ. ꦄꦴꦫꦩ꧀ꦩꦟꦫꦱꦁ ꦄꦤꦸꦨꦮꦤ꧀ꦠꦷꦠꦶ ꦮꦺꦢꦤꦶꦪꦴ ꦪꦡꦴ ‘‘ꦤꦶꦪ꧀ꦪꦴꦤꦶꦏꦴ’’ꦠꦶ. ꦠꦺꦤꦴꦲ ‘‘ꦮꦺꦢꦤꦴ ꦣꦩ꧀ꦩꦴꦮꦴ’’ꦠꦶ. ꦱꦸꦑꦴꦢꦶꦨꦺꦢꦨꦶꦤ꧀ꦤꦠ꧀ꦠꦴ ꦧꦲꦸꦮꦕꦤꦤꦶꦢ꧀ꦢꦺꦱꦺꦴ. ꦆꦩꦺꦱꦁ ꦄꦴꦪꦸꦱꦔ꧀ꦑꦴꦫꦮꦺꦢꦤꦴꦤꦁ ꦌꦏꦤ꧀ꦠꦤꦶꦫꦺꦴꦣꦁ ꦱꦩꦴꦥꦤ꧀ꦤꦱ꧀ꦱ ꦩꦫꦟꦺꦤ ꦨꦮꦶꦠꦧ꧀ꦧꦁ ꦮꦺꦢꦤꦴꦪ ꦤꦶꦫꦸꦢ꧀ꦣꦠ꧀ꦠꦴ. ꦄꦴꦪꦸꦱꦔ꧀ꦑꦴꦫꦴꦤꦁ ꦠꦡꦴ ꦄꦤꦶꦫꦸꦢ꧀ꦣꦠ꧀ꦠꦴ ꦤꦶꦫꦺꦴꦣꦱ꧀ꦱ ꦱꦩꦴꦥꦗ꧀ꦗꦤꦩꦺꦮ ꦤ ꦱꦶꦪꦴ, ꦏꦸꦠꦺꦴ ꦮꦸꦛ꧀ꦜꦴꦤꦁ. ꦠꦺꦤ ꦮꦸꦠ꧀ꦠꦁ ꦥꦴꦭ꦳ꦶꦪꦁ ‘‘ꦠꦺ ꦕ ꦲꦴꦮꦸꦱꦺꦴ’’ꦠꦶꦄꦴꦢꦶ. ꦮꦸꦛ꧀ꦜꦴꦤꦁ ꦥꦚ꧀ꦚꦴꦪꦠꦶ ꦱꦚ꧀ꦚꦴꦮꦺꦢꦤꦴꦢꦷꦤꦁ ꦈꦥ꧀ꦥꦠ꧀ꦠꦶꦪꦴ. ꦆꦢꦴꦤꦶ ꦠꦩꦠ꧀ꦡꦁ ꦮꦶꦠ꧀ꦡꦴꦫꦠꦺꦴ ꦈꦥꦩꦴꦪ ꦮꦶꦨꦴꦮꦺꦠꦸꦁ ‘‘ꦪꦺꦴ ꦲꦷ’’ꦠꦶꦄꦴꦢꦶ ꦮꦸꦠ꧀ꦠꦁ. ꦈꦏ꧀ꦏꦟ꧀ꦜꦶꦠ꧀ꦮꦴꦠꦶ ꦤꦴꦤꦴꦫꦩ꧀ꦩꦟꦴꦥꦴꦠꦠꦺꦴ ꦤꦶꦧ꧀ꦧꦶꦤ꧀ꦢꦶꦠ꧀ꦮꦴ. ꦪꦡꦴꦥꦫꦶꦕ꧀ꦖꦶꦤ꧀ꦤꦏꦴꦭꦮꦱꦺꦤꦴꦠꦶ ꦪꦡꦴꦥꦫꦶꦕ꧀ꦖꦶꦤ꧀ꦤꦺ ꦏꦴꦭꦺ ꦱꦩ꧀ꦥꦠ꧀ꦠꦺ. ꦫꦹꦥꦗꦷꦮꦶꦠꦶꦤ꧀ꦢ꧀ꦫꦶꦪꦥꦕ꧀ꦕꦪꦴꦠꦶ ꦆꦤ꧀ꦢ꧀ꦫꦶꦪꦥꦕ꧀ꦕꦪꦨꦹꦠꦴ. ꦗꦴꦭꦴꦥꦮꦠ꧀ꦠꦁ ꦮꦶꦪ ꦄꦫꦹꦥꦣꦩ꧀ꦩꦴ ꦠꦺꦗꦸꦱ꧀ꦱꦢꦨꦴꦮꦠꦺꦴ ꦮꦶꦱꦪꦺꦴꦨꦴꦱꦤꦠꦺꦴ ꦕ. ꦈꦢꦏꦥ꧀ꦥꦲꦴꦫꦺꦴ ꦮꦶꦪ ꦤꦶꦫꦺꦴꦣꦱꦩꦴꦥꦠ꧀ꦠꦶꦪꦴ ꦥꦸꦧ꧀ꦧꦴꦨꦶꦱꦔ꧀ꦑꦴꦫꦺꦴ. ꦥꦶꦲꦶꦠꦄꦔ꧀ꦒꦴꦫꦴ ꦮꦶꦪ ꦫꦹꦥꦗꦷꦮꦶꦠꦶꦤ꧀ꦢ꧀ꦫꦶꦪꦁ ꦈꦱ꧀ꦩꦴꦩꦠ꧀ꦠꦠꦴꦪ ꦄꦤꦺꦴꦨꦴꦱꦤꦠꦺꦴ. ꦪꦡꦴꦥꦫꦶꦕ꧀ꦖꦶꦤ꧀ꦤꦏꦴꦭꦴꦒꦩꦤꦤ꧀ꦠꦶ ꦪꦡꦴꦥꦫꦶꦕ꧀ꦖꦶꦤ꧀ꦤꦏꦴꦭꦱ꧀ꦱ ꦈꦥꦒꦩꦤꦁ. ꦄꦤꦸꦫꦹꦥꦥꦠ꧀ꦠꦶꦮꦱꦺꦤꦺꦮ ꦫꦹꦥꦥꦮꦠ꧀ꦠꦶꦒ꧀ꦒꦲꦟꦁ. ꦆꦩꦁ ꦫꦹꦥꦏꦴꦪꦁ ꦗꦲꦤ꧀ꦠꦷꦠꦶ ꦆꦩꦱ꧀ꦩꦴ ꦫꦹꦥꦏꦴꦪꦴ ꦏꦭ꦳ꦺꦮꦫꦴ ꦮꦶꦒꦕ꧀ꦖꦤ꧀ꦠꦶ ꦤꦥ꧀ꦥꦮꦠ꧀ꦠꦤ꧀ꦠꦶ.

ꦏꦴꦪꦺꦤ ꦱꦔ꧀ꦑꦫꦷꦪꦤ꧀ꦠꦷꦠꦶ ꦏꦴꦪꦱꦔ꧀ꦑꦴꦫꦴ ꦠꦥ꧀ꦥꦛꦶꦧꦢ꧀ꦣꦮꦸꦠ꧀ꦠꦶꦠꦴꦪ. ꦮꦴꦕꦁ ꦱꦔ꧀ꦑꦫꦺꦴꦤ꧀ꦠꦷꦠꦶ ꦮꦕꦷꦱꦔ꧀ꦑꦴꦫꦴ. ꦮꦶꦠꦏ꧀ꦏꦺꦠ꧀ꦮꦴ ꦮꦶꦕꦴꦫꦺꦠ꧀ꦮꦴ ꦲꦶ ꦮꦴꦕꦁ ꦨꦶꦤ꧀ꦢꦠꦶ ꦏꦡꦺꦠꦶ. ꦕꦶꦠ꧀ꦠꦺꦤ ꦱꦔ꧀ꦑꦫꦷꦪꦤ꧀ꦠꦷꦠꦶ ꦕꦶꦠ꧀ꦠꦱꦔ꧀ꦑꦴꦫꦴ ꦠꦥ꧀ꦥꦛꦶꦧꦢ꧀ꦣꦮꦸꦠ꧀ꦠꦶꦠꦺꦴ. ꦕꦶꦠ꧀ꦠꦱꦔ꧀ꦑꦴꦫꦤꦶꦫꦺꦴꦣꦕꦺꦴꦢꦤꦴꦪ ꦫꦹꦥꦤꦶꦫꦺꦴꦣꦺꦴ ꦮꦶꦪ ꦕꦶꦠ꧀ꦠꦤꦶꦫꦺꦴꦣꦺꦴ ꦄꦕꦺꦴꦢꦶꦠꦺꦴ ꦠꦺꦱꦁ ꦠꦠꦺꦴ ꦄꦚ꧀ꦚꦠ꧀ꦠꦴꦠꦶ ꦤ ꦕꦶꦠ꧀ꦠꦱꦩ꧀ꦥꦪꦸꦠ꧀ꦠꦤꦶꦫꦺꦴꦣꦺꦴ ꦌꦏꦤ꧀ꦠꦶꦏꦺꦴ ꦮꦶꦠꦏ꧀ꦏꦴꦢꦶꦤꦶꦫꦺꦴꦣꦺ ꦠꦢꦨꦴꦮꦠꦺꦴ. ꦪꦁ ꦥꦤ ꦮꦸꦠ꧀ꦠꦁ ‘‘ꦮꦴꦕꦴ ꦄꦤꦶꦫꦸꦢ꧀ꦣꦴ ꦲꦺꦴꦠꦷ’’ꦠꦶ, ꦠꦩ꧀ꦥꦶ ꦤ. ꦮꦴꦕꦁ ꦱꦔ꧀ꦑꦫꦺꦴꦤ꧀ꦠꦷꦠꦶ ꦲꦶ ꦮꦕꦷꦱꦔ꧀ꦑꦴꦫꦴ, ꦠꦺꦱꦸ ꦤꦶꦫꦸꦢ꧀ꦣꦺꦱꦸ ꦏꦡꦁ ꦮꦴꦕꦴꦪ ꦄꦤꦶꦫꦺꦴꦣꦺꦴ. ꦕꦶꦠ꧀ꦠꦁ ꦥꦤ ꦤꦶꦫꦸꦢ꧀ꦣꦺꦱꦸꦥꦶ ꦕꦶꦠ꧀ꦠꦱꦔ꧀ꦑꦴꦫꦺꦱꦸ ꦠꦺꦲꦶ ꦄꦤꦨꦶꦱꦔ꧀ꦑꦠꦠ꧀ꦠꦴ ꦮꦶꦠꦏ꧀ꦏꦴꦢꦶꦤꦶꦫꦺꦴꦣꦺꦴ ꦮꦶꦪ ꦥꦮꦠ꧀ꦠꦠꦶꦪꦺꦮꦴꦠꦶ ꦄꦪꦩꦺꦠ꧀ꦡ ꦥꦫꦱ꧀ꦱ ꦄꦣꦶꦥ꧀ꦥꦴꦪꦺꦴ. ꦄꦴꦤꦤ꧀ꦠꦫꦶꦪꦏꦩ꧀ꦩꦁ ꦏꦠꦁ ꦨꦮꦺꦪ꧀ꦪ, ꦕꦶꦠ꧀ꦠꦱ꧀ꦱ ꦄꦤꦶꦫꦸꦢ꧀ꦣꦠ꧀ꦠꦴ ꦠꦁ ꦤꦶꦱ꧀ꦱꦴꦪ ꦕ ꦫꦹꦥꦣꦩ꧀ꦩꦴꦤꦁ ꦄꦤꦥꦒꦠꦠ꧀ꦠꦴ ꦠꦺ ꦗꦷꦮꦤ꧀ꦠꦶ ꦌꦮ ꦤꦴꦩꦴꦠꦶ. ꦧ꧀ꦪꦚ꧀ꦗꦤꦺ ꦄꦨꦶꦤꦶꦮꦺꦱꦁ ꦄꦏꦠ꧀ꦮꦴꦠꦶ ‘‘ꦕꦶꦠ꧀ꦠꦱꦔ꧀ꦑꦴꦫꦴ ꦤꦶꦫꦸꦢ꧀ꦣꦴ’’ꦠꦶ ꦮꦕꦤꦠꦺꦴ ꦠꦺꦮ ꦤꦶꦫꦸꦢ꧀ꦣꦴ, ꦤ ꦕꦶꦠ꧀ꦠꦤ꧀ꦠꦶ ꦌꦮꦁ ꦤꦺꦪ꧀ꦪꦠ꧀ꦡꦁ ꦱꦸꦠ꧀ꦠꦁ ‘‘ꦤꦷꦠꦠ꧀ꦡ’’ꦤ꧀ꦠꦶ ꦄꦨꦶꦤꦶꦮꦺꦱꦁ ꦄꦏꦠ꧀ꦮꦴ. ꦄꦴꦕꦫꦶꦪꦴꦤꦁ ꦤꦪꦺ ꦜꦠ꧀ꦮꦴꦠꦶ ꦥꦫꦩ꧀ꦥꦫꦴꦒꦠꦴꦤꦁ ꦄꦴꦕꦫꦶꦪꦴꦤꦁ ꦄꦣꦶꦥ꧀ꦥꦴꦪꦺ ꦜꦠ꧀ꦮꦴꦠꦶ ꦄꦠ꧀ꦡꦺꦴ. ꦈꦥꦥꦫꦶꦏ꧀ꦑꦶꦠꦧ꧀ꦧꦺꦴꦠꦶ ꦱꦸꦠ꧀ꦠꦤ꧀ꦠꦫꦴꦒꦩꦠꦺꦴ ꦱꦸꦠ꧀ꦠꦤ꧀ꦠꦫꦥꦢꦱ꧀ꦱ ꦄꦮꦶꦥꦫꦷꦠꦺꦴ ꦄꦠ꧀ꦡꦺꦴ ꦮꦷꦩꦁꦱꦶꦠꦧ꧀ꦧꦺꦴ. ꦪꦡꦴ ꦲꦶ ‘‘ꦄꦱꦚ꧀ꦚꦨꦮꦺꦴ’’ꦠꦶ ꦮꦕꦤꦠꦺꦴ ‘‘ꦱꦚ꧀ꦚꦴꦮ ꦠꦠ꧀ꦡ ꦤꦠ꧀ꦡꦶ, ꦆꦠꦫꦺ ꦥꦤ ꦕꦶꦠ꧀ꦠꦕꦺꦠꦱꦶꦏꦴ ꦱꦤ꧀ꦠꦷ’’ꦠꦶ ꦄꦪꦩꦺꦠ꧀ꦡ ꦄꦠ꧀ꦡꦺꦴ ꦤ ꦒꦪ꧀ꦲꦠꦶ. ꦪꦡꦴ ꦕ ‘‘ꦤꦺꦮꦱꦚ꧀ꦚꦴꦤꦴꦱꦚ꧀ꦚꦴꦪꦠꦤ’’ꦤ꧀ꦠꦶ ꦮꦕꦤꦠꦺꦴ ‘‘ꦱꦚ꧀ꦚꦴꦮ ꦠꦠ꧀ꦡ ꦠꦴꦢꦶꦱꦷ, ꦤ ꦦꦱ꧀ꦱꦴꦢꦪꦺꦴ’’ꦠꦶ ꦄꦪꦩꦺꦠ꧀ꦡ ꦄꦠ꧀ꦡꦺꦴ ꦤ ꦒꦪ꧀ꦲꦠꦶ ꦱꦚ꧀ꦚꦴꦱꦷꦱꦺꦤ ꦢꦺꦱꦤꦴꦠꦶ ꦏꦠ꧀ꦮꦴ, ꦌꦮꦩꦶꦣꦴꦥꦶ ‘‘ꦕꦶꦠ꧀ꦠꦱꦔ꧀ꦑꦴꦫꦴ ꦤꦶꦫꦸꦢ꧀ꦣꦴ’’ꦠꦶ, ‘‘ꦱꦚ꧀ꦚꦴꦮꦺꦢꦪꦶꦠꦤꦶꦫꦺꦴꦣꦺꦴ’’ꦠꦶ ꦕ ꦢꦺꦱꦤꦴꦱꦷꦱꦩꦺꦮ. ꦱꦧ꧀ꦧꦺꦥꦶ ꦥꦤ ꦕꦶꦠ꧀ꦠꦕꦺꦠꦱꦶꦏꦴ ꦠꦠ꧀ꦡ ꦤꦶꦫꦸꦗ꧀ꦙꦤ꧀ꦠꦺꦮꦴꦠꦶ ꦄꦪꦩꦺꦠ꧀ꦡ ꦄꦮꦶꦥꦫꦷꦠꦺꦴ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ, ꦠꦡꦴꦥꦸꦧ꧀ꦧꦴꦨꦶꦱꦔ꧀ꦑꦴꦫꦺꦤ ꦱꦧ꧀ꦧꦺꦱꦁꦪꦺꦮ ꦕꦶꦠ꧀ꦠꦕꦺꦠꦱꦶꦏꦴꦤꦁ ꦠꦠ꧀ꦡ ꦤꦶꦫꦸꦗ꧀ꦙꦤꦠꦺꦴ. ꦌꦠꦺꦤ ꦪꦁ ꦥꦸꦧ꧀ꦧꦺ ‘‘ꦄꦚ꧀ꦚꦠ꧀ꦠꦴ, ꦠꦢꦨꦴꦮꦠꦺꦴ’’ꦠꦶ ꦕ ꦪꦸꦠ꧀ꦠꦶꦮꦕꦤꦁ, ꦠꦢꦪꦸꦠ꧀ꦠꦁ ꦄꦣꦶꦥ꧀ꦥꦴꦪꦴꦤꦮꦧꦺꦴꦣꦠꦺꦴꦠꦶ ꦢꦱ꧀ꦱꦶꦠꦁ ꦲꦺꦴꦠꦶ. ꦠꦺꦤꦴꦲ ‘‘ꦄꦠ꧀ꦡꦺꦴ ꦲꦶ ꦥꦛꦶꦱꦫꦟꦁ, ꦤ ꦧ꧀ꦪꦚ꧀ꦗꦤ’’ꦤ꧀ꦠꦶ.

ꦈꦥꦲꦠꦴꦤꦷꦠꦶ ꦧꦴꦣꦶꦠꦴꦤꦶ. ꦩꦏ꧀ꦑꦶꦠꦴꦤꦷꦠꦶ ꦣꦁꦱꦶꦠꦴꦤꦶ. ꦄꦴꦫꦩ꧀ꦩꦟꦓꦛ꧀ꦛꦤꦴꦪ ꦆꦤ꧀ꦢ꧀ꦫꦶꦪꦴꦤꦁ ꦏꦶꦭꦩꦡꦺꦴ ꦕꦏ꧀ꦑꦸꦤꦴ ꦨꦴꦱꦸꦫꦫꦹꦥꦱꦸꦑꦸꦩꦫꦗꦢꦱ꧀ꦱꦤꦺꦤ ꦮꦶꦨꦴꦮꦺꦠꦧ꧀ꦧꦺꦴ. ꦠꦡꦴ ꦲꦶ ꦈꦟ꧀ꦲꦏꦴꦭꦺ ꦥꦸꦫꦠꦺꦴ ꦄꦒ꧀ꦒꦶꦩ꧀ꦲꦶ ꦗꦭꦤ꧀ꦠꦺ ꦑꦫꦱ꧀ꦱꦫꦺ ꦕ ꦥꦟꦮꦺ ꦄꦴꦏꦺꦴꦛꦶꦠꦺ ꦄꦏ꧀ꦑꦷꦤꦶ ꦨꦺꦢꦴꦤꦶ ꦮꦶꦪ ꦤ ꦱꦲꦤ꧀ꦠꦶ ꦱꦺꦴꦠꦴꦤꦶ ‘‘ꦱꦶꦑꦫꦺꦤ ꦮꦶꦪ ꦄꦨꦶꦲꦚ꧀ꦚꦤ꧀ꦠꦷ’’ꦠꦶ ꦮꦠ꧀ꦠꦴꦫꦺꦴ ꦲꦺꦴꦤ꧀ꦠꦶ.

꧔꧕꧘. ꦫꦹꦥꦴꦮꦕꦫꦕꦠꦸꦠ꧀ꦡꦗ꧀ꦙꦴꦤꦩꦺꦮ ꦫꦹꦥꦮꦶꦫꦴꦒꦨꦴꦮꦤꦴꦮꦱꦺꦤ ꦥꦮꦠ꧀ꦠꦁ ꦄꦫꦹꦥꦗ꧀ꦙꦴꦤꦤ꧀ꦠꦶ ꦤꦺꦮꦱꦚ꧀ꦚꦴꦤꦴꦱꦚ꧀ꦚꦴꦪꦠꦤꦁ ꦮꦶꦱ꧀ꦱꦗ꧀ꦗꦺꦤ꧀ꦠꦺꦴ ꦣꦩ꧀ꦩꦱꦺꦤꦴꦥꦠꦶ ‘‘ꦱꦸꦑꦱ꧀ꦱ ꦕ ꦥꦲꦴꦤꦴ’’ꦠꦶꦄꦴꦢꦶꦤꦴ ꦮꦶꦱ꧀ꦱꦗ꧀ꦗꦺꦱꦶ. ꦄꦥꦒꦩꦤꦺꦤ ꦮꦶꦒꦩꦺꦤ ꦥꦕ꧀ꦕꦪꦴ ꦄꦥꦒꦩꦤꦥꦕ꧀ꦕꦪꦴ ꦱꦸꦑꦴꦢꦶꦥ꧀ꦥꦲꦴꦤꦴꦤꦶ. ꦄꦣꦶꦒꦩꦥꦕ꧀ꦕꦪꦴ ꦥꦤ ꦏꦱꦶꦟꦺꦱꦸ ꦫꦹꦥꦴꦮꦕꦫꦕꦠꦸꦠ꧀ꦡꦗ꧀ꦙꦴꦤꦁ ꦲꦺꦛ꧀ꦜꦶꦩꦴ ꦠꦪꦺꦴ ꦕ ꦄꦴꦫꦸꦥ꧀ꦥꦴ. ꦤ ꦲꦶ ꦱꦏ꧀ꦏꦴ ꦠꦴꦤꦶ ꦄꦤꦣꦶꦒꦤ꧀ꦠ꧀ꦮꦴ ꦤꦺꦮꦱꦚ꧀ꦚꦴꦤꦴꦱꦚ꧀ꦚꦴꦪꦠꦤꦩꦣꦶꦒꦤ꧀ꦠꦸꦁ. ꦤꦶꦫꦺꦴꦣꦠꦺꦴ ꦮꦸꦛ꧀ꦜꦴꦤꦏꦦꦭꦱꦩꦴꦥꦠ꧀ꦠꦶꦤ꧀ꦠꦶ ꦤꦶꦫꦺꦴꦣꦠꦺꦴ ꦮꦸꦛ꧀ꦜꦴꦤꦨꦹꦠꦁ ꦄꦤꦶꦕ꧀ꦕꦴꦤꦸꦥꦱ꧀ꦱꦤꦴꦱꦩꦸꦢꦴꦒꦠꦦꦭꦱꦩꦴꦥꦠ꧀ꦠꦶꦁ. ꦱꦴ ꦲꦶ ‘‘ꦄꦤꦶꦩꦶꦠ꧀ꦠꦴ ꦕꦺꦠꦺꦴꦮꦶꦩꦸꦠ꧀ꦠꦷ’’ꦠꦶ ꦮꦸꦕ꧀ꦕꦠꦶ. ꦪꦡꦴ ꦱꦩꦡꦤꦶꦱ꧀ꦱꦤ꧀ꦢꦺꦴ ꦄꦨꦶꦚ꧀ꦚꦴ, ꦩꦺꦠ꧀ꦠꦴꦏꦫꦸꦟꦴꦩꦸꦢꦶꦠꦴꦧ꧀ꦫꦲ꧀ꦩꦮꦶꦲꦴꦫꦤꦶꦱ꧀ꦱꦤ꧀ꦢꦺꦴ ꦈꦥꦺꦏ꧀ꦑꦴꦧ꧀ꦫꦲ꧀ꦩꦮꦶꦲꦴꦫꦺꦴ, ꦏꦱꦶꦟꦤꦶꦱ꧀ꦱꦤ꧀ꦢꦺꦴ ꦄꦴꦫꦸꦥ꧀ꦥꦴ, ꦱꦩꦡꦮꦶꦥꦱ꧀ꦱꦤꦴꦤꦶꦱ꧀ꦱꦤ꧀ꦢꦺꦴ ꦤꦶꦫꦺꦴꦣꦱꦩꦴꦥꦠ꧀ꦠꦶ, ꦌꦮꦁ ꦮꦶꦥꦱ꧀ꦱꦤꦴꦪ ꦤꦶꦱ꧀ꦱꦤ꧀ꦢꦦꦭꦨꦹꦠꦁ ꦱꦴꦩꦚ꧀ꦚꦦꦭꦤ꧀ꦠꦶ ꦄꦴꦲ ‘‘ꦮꦶꦥꦱ꧀ꦱꦤꦴꦤꦶꦱ꧀ꦱꦤ꧀ꦢꦴꦪ ꦦꦭꦱꦩꦴꦥꦠ꧀ꦠꦶꦪꦴ’’ꦠꦶ. ꦄꦴꦫꦩ꧀ꦩꦟꦴ ꦤꦴꦩ ꦱꦴꦫꦩ꧀ꦩꦟꦣꦩ꧀ꦩꦴꦤꦁ ꦮꦶꦱꦺꦱꦠꦺꦴ ꦈꦥ꧀ꦥꦠ꧀ꦠꦶꦤꦶꦩꦶꦠ꧀ꦠꦤ꧀ꦠꦶ ꦄꦴꦲ ‘‘ꦱꦧ꧀ꦧꦤꦶꦩꦶꦠ꧀ꦠꦴꦤꦤ꧀ꦠꦶ ꦫꦹꦥꦴꦢꦷꦤꦁ ꦱꦧ꧀ꦧꦴꦫꦩ꧀ꦩꦟꦴꦤ’’ꦤ꧀ꦠꦶ. ꦤꦠ꧀ꦡꦶ ꦌꦠ꧀ꦡ ꦏꦶꦚ꧀ꦕꦶ ꦱꦔ꧀ꦑꦴꦫꦤꦶꦩꦶꦠ꧀ꦠꦤ꧀ꦠꦶ ꦄꦤꦶꦩꦶꦠ꧀ꦠꦴ, ꦄꦱꦔ꧀ꦑꦠꦴ ꦣꦴꦠꦹꦠꦶ ꦄꦴꦲ ‘‘ꦱꦧ꧀ꦧꦤꦶꦩꦶꦠ꧀ꦠꦴꦥꦒꦠꦴꦪ ꦤꦶꦧ꧀ꦧꦴꦤꦣꦴꦠꦸꦪꦴ’’ꦠꦶ. ꦦꦭꦱꦩꦴꦥꦠ꧀ꦠꦶꦱꦲꦗꦴꦠꦁ ꦩꦤꦱꦶꦏꦴꦫꦁ ꦱꦤ꧀ꦣꦴꦪꦴꦲ, ꦤ ꦄꦴꦮꦗ꧀ꦗꦤꦩꦤꦱꦶꦏꦴꦫꦁ. ꦤ ꦲꦺꦠ꧀ꦡ ꦠꦱ꧀ꦱ ꦱꦩ꧀ꦨꦮꦺꦴ ꦄꦤꦸꦭꦺꦴꦩꦴꦤꦤ꧀ꦠꦫꦁ ꦈꦥ꧀ꦥꦗ꧀ꦗꦤꦠꦺꦴ.

ꦆꦩꦱ꧀ꦩꦶꦁ ꦜꦴꦤꦺꦠꦶ ꦆꦣ ꦮꦸꦠ꧀ꦠꦤꦶꦫꦺꦴꦣꦱ꧀ꦱ ꦄꦴꦢꦶꦩꦗ꧀ꦙꦥꦫꦶꦪꦺꦴꦱꦴꦤꦴꦤꦁ ꦒꦲꦶꦠꦴꦤꦁ ꦆꦩꦱ꧀ꦩꦶꦁ ꦥꦫꦶꦪꦺꦴꦱꦴꦤꦱ꧀ꦱ ꦒꦲꦶꦠꦛ꧀ꦜꦴꦤꦺ. ꦢ꧀ꦮꦷꦲꦶ ꦧꦭꦺꦲꦷꦠꦶ ꦱꦩꦡꦮꦶꦥꦱ꧀ꦱꦤꦴꦧꦭꦺꦲꦶ. ꦠꦪꦺꦴ ꦕ ꦱꦔ꧀ꦑꦴꦫꦴꦤꦤ꧀ꦠꦶ ꦏꦴꦪꦱꦔ꧀ꦑꦴꦫꦴꦢꦷꦤꦁ ꦠꦶꦟ꧀ꦟꦁ ꦱꦔ꧀ꦑꦴꦫꦴꦤꦁ. ꦱꦺꦴꦭ꦳ꦱꦲꦶ ꦚꦴꦟꦕꦫꦶꦪꦴꦲꦷꦠꦶ ꦄꦤꦶꦕ꧀ꦕꦴꦤꦸꦥꦱ꧀ꦱꦤꦴ, ꦢꦸꦏ꧀ꦑꦴ, ꦄꦤꦠ꧀ꦠꦴ, ꦤꦶꦧ꧀ꦧꦶꦢꦴ, ꦮꦶꦫꦴꦒꦴ, ꦤꦶꦫꦺꦴꦣꦴ, ꦥꦛꦶꦤꦶꦱ꧀ꦱꦒ꧀ꦒꦴ, ꦮꦶꦮꦛ꧀ꦛꦴꦤꦸꦥꦱ꧀ꦱꦤꦴ, ꦱꦺꦴꦠꦴꦥꦠ꧀ꦠꦶꦩꦒ꧀ꦒꦺꦴ…ꦥꦺ… ꦄꦫꦲꦠ꧀ꦠꦦꦭꦱꦩꦴꦥꦠ꧀ꦠꦷꦠꦶ ꦆꦩꦴꦲꦶ ꦱꦺꦴꦭ꦳ꦱꦲꦶ ꦚꦴꦟꦕꦫꦶꦪꦴꦲꦶ. ꦤꦮꦲꦶ ꦱꦩꦴꦣꦶꦕꦫꦶꦪꦴꦲꦷꦠꦶ ꦥꦜꦩꦗ꧀ꦙꦴꦤꦱꦩꦴꦣꦶꦄꦴꦢꦷꦲꦶ ꦤꦮꦲꦶ ꦱꦩꦴꦣꦶꦕꦫꦶꦪꦴꦲꦶ. ꦪꦺꦴ ꦪꦡꦴꦮꦸꦠ꧀ꦠꦴꦱꦸ ꦕꦫꦶꦪꦴꦱꦸ ꦥꦸꦒ꧀ꦒꦭꦱ꧀ꦱ ꦮꦱꦷꦨꦴꦮꦺꦴ, ꦱꦴ ꦮꦱꦷꦨꦴꦮꦠꦴꦥꦚ꧀ꦚꦴ. ꦄꦱ꧀ꦱꦴ ꦱꦴ ꦏꦡꦶꦠꦴꦠꦶ ꦪꦺꦴꦗꦤꦴ. ꦮꦶꦤꦶꦕ꧀ꦖꦪꦏꦡꦴꦠꦶ ꦮꦶꦤꦶꦕ꧀ꦖꦪꦮꦱꦺꦤ ꦥꦮꦠ꧀ꦠꦴ ꦄꦛ꧀ꦜꦏꦡꦴ ꦏꦡꦶꦠꦴ. ꦠꦱ꧀ꦩꦴ ꦮꦶꦱꦸꦢ꧀ꦣꦶꦩꦒ꧀ꦒꦺ (ꦮꦶꦱꦸꦢ꧀ꦣꦶ. ꧒.꧘꧖꧘-꧘꧖꧙) ꦠꦁꦱꦁꦮꦟ꧀ꦟꦤꦴꦪꦚ꧀ꦕ (ꦮꦶꦱꦸꦢ꧀ꦣꦶ. ꦩꦲꦴꦛꦷ. ꧒.꧘꧖꧘) ꦮꦸꦠ꧀ꦠꦤꦪꦺꦤ ꦮꦺꦢꦶꦠꦧ꧀ꦧꦴ.

ꦮꦭꦚ꧀ꦗꦤꦱꦩꦴꦥꦠ꧀ꦠꦶ ꦄꦫꦶꦪꦮꦶꦲꦴꦫꦮꦱꦺꦤ ꦮꦶꦲꦫꦟꦱꦩꦴꦥꦠ꧀ꦠꦶ. ꦜꦶꦠꦶꦪꦴꦠꦶ ꦌꦠ꧀ꦡ ꦥꦧꦤ꧀ꦣꦛ꧀ꦜꦶꦠꦶ ꦄꦣꦶꦥ꧀ꦥꦺꦠꦴ, ꦤ ꦑꦟꦛ꧀ꦜꦶꦠꦶ. ꦏꦱ꧀ꦩꦴ? ꦱꦩꦴꦥꦗ꧀ꦗꦤꦠ꧀ꦠꦴ. ꦠꦺꦤꦴꦲ ‘‘ꦜꦶꦠꦶꦪꦴꦠꦶ ꦕꦶꦫꦛ꧀ꦜꦶꦠꦠ꧀ꦡ’’ꦤ꧀ꦠꦶ. ꦄꦢ꧀ꦣꦴꦤꦥꦫꦶꦕ꧀ꦖꦺꦢꦺꦴꦠꦶ ꦌꦠ꧀ꦠꦏꦁ ꦏꦴꦭꦁ ꦱꦩꦴꦥꦠ꧀ꦠꦶꦪꦴ ꦮꦷꦠꦶꦤꦴꦩꦺꦱ꧀ꦱꦴꦩꦷꦠꦶ ꦥꦒꦺꦮ ꦏꦴꦭꦥꦫꦶꦕ꧀ꦖꦺꦢꦺꦴ. ꦫꦹꦥꦴꦢꦶꦤꦶꦩꦶꦠ꧀ꦠꦮꦱꦺꦤꦴꦠꦶ ꦏꦩ꧀ꦩꦏꦩ꧀ꦩꦤꦶꦩꦶꦠ꧀ꦠꦒꦠꦶꦤꦶꦩꦶꦠ꧀ꦠꦺꦱꦸ ꦪꦡꦴꦫꦲꦁ ꦭꦧ꧀ꦨꦩꦴꦤꦫꦹꦥꦴꦢꦶꦤꦶꦩꦶꦠ꧀ꦠꦮꦱꦺꦤ. ꦠꦠ꧀ꦡ ꦪꦱ꧀ꦩꦴ ꦏꦩ꧀ꦩꦤꦶꦩꦶꦠ꧀ꦠꦺ ꦖꦧ꧀ꦧꦶꦣꦩ꧀ꦥꦶ ꦄꦴꦫꦩ꧀ꦩꦟꦁ ꦭꦧ꧀ꦨꦠꦶ, ꦠꦱ꧀ꦩꦴ ‘‘ꦱꦧ꧀ꦧꦤꦶꦩꦶꦠ꧀ꦠꦴꦤ’’ꦤ꧀ꦠꦶ ꦮꦸꦠ꧀ꦠꦁ, ꦤ ꦱꦧ꧀ꦧꦺꦱꦁ ꦄꦴꦫꦩ꧀ꦩꦟꦴꦤꦁ ꦌꦏꦗ꧀ꦙꦁ, ꦌꦏꦤ꧀ꦠꦠꦺꦴ ꦮꦴ ꦩꦤꦱꦶꦏꦴꦠꦧ꧀ꦧꦠꦺꦴ. ꦭꦏ꧀ꦑꦟꦮꦕꦤꦚ꧀ꦲꦺꦠꦁ ꦪꦡꦴ ‘‘ꦢꦴꦠꦧ꧀ꦧꦩꦺꦠꦁ ꦨꦺꦱꦗ꧀ꦗꦁ, ꦪꦢꦶ ꦩꦺ ꦧ꧀ꦪꦴꦣꦶꦠꦴ ꦱꦶꦪꦸ’’ꦤ꧀ꦠꦶ.

꧔꧕꧙. ꦤꦷꦭꦩ꧀ꦥꦶ ꦱꦚ꧀ꦗꦴꦤꦴꦠꦷꦠꦶꦄꦴꦢꦶꦤꦴ ꦤꦷꦭꦴꦢꦶꦒ꧀ꦒꦲꦟꦩꦸꦑꦺꦤ ꦠꦁꦮꦟ꧀ꦟꦴꦤꦁ ꦱꦠ꧀ꦠꦴꦤꦁ ꦱꦚ꧀ꦗꦴꦤꦤꦁ ꦄꦮꦺꦫꦴꦢꦶꦨꦴꦮꦩꦤꦱꦶꦏꦫꦟꦁ ꦗꦺꦴꦠꦶꦠꦤ꧀ꦠꦶ ꦄꦴꦲ ‘‘ꦌꦠꦱ꧀ꦩꦶꦚ꧀ꦲꦶ ꦜꦴꦤꦺ ꦄꦥ꧀ꦥꦩꦴꦟꦴ ꦕꦺꦠꦺꦴꦮꦶꦩꦸꦠ꧀ꦠꦶ ꦏꦡꦶꦠꦴ’’ꦠꦶ. ꦌꦠ꧀ꦡ ꦄꦴꦏꦶꦚ꧀ꦕꦚ꧀ꦚꦁ ꦏꦡꦶꦠꦤ꧀ꦠꦶ ꦱꦩ꧀ꦧꦤ꧀ꦣꦺꦴ. ‘‘ꦌꦠ꧀ꦡ ꦱꦸꦚ꧀ꦚꦠꦴ’’ꦠꦶ, ‘‘ꦌꦠ꧀ꦡ ꦄꦤꦶꦩꦶꦠ꧀ꦠꦴ’’ꦠꦶ ꦌꦠ꧀ꦡꦴꦥꦶ ꦌꦱꦺꦮ ꦤꦪꦺꦴ. ꦤ꧀ꦠꦶ ‘‘ꦆꦣ ꦄꦚ꧀ꦚꦁ ꦄꦨꦶꦤꦮꦁ ꦤꦴꦩ ꦤꦠ꧀ꦡꦷ’’ꦠꦶꦄꦴꦢꦶꦤꦴ ꦮꦸꦠ꧀ꦠꦁ ꦄꦠ꧀ꦡꦮꦕꦤꦁ. ꦌꦠꦴꦠꦶ ꦄꦥ꧀ꦥꦩꦴꦟꦕꦺꦠꦺꦴꦮꦶꦩꦸꦠ꧀ꦠꦶꦄꦴꦢꦪꦺꦴ. ꦌꦏꦤꦴꦩꦏꦴꦠꦶ ꦌꦏꦺꦏꦤꦴꦩꦏꦴ, ꦪꦺ ꦤꦴꦤꦴꦧ꧀ꦪꦚ꧀ꦗꦤꦴꦠꦶ ꦄꦣꦶꦥ꧀ꦥꦺꦠꦴ. ꦌꦏꦺꦴ ꦣꦩ꧀ꦩꦺꦴꦠꦶ ꦄꦫꦲꦠ꧀ꦠꦦꦭꦱꦩꦴꦥꦠ꧀ꦠꦶ. ꦕꦠꦸꦤꦴꦩꦏꦺꦴꦠꦶ ꦄꦥ꧀ꦥꦩꦴꦟꦕꦺꦠꦺꦴꦮꦶꦩꦸꦠ꧀ꦠꦶꦄꦴꦢꦶꦤꦴꦩꦏꦺꦴ. ꦌꦠꦤ꧀ꦠꦶ ꦌꦠꦩꦠ꧀ꦡꦁ. ꦄꦥ꧀ꦥꦩꦴꦟꦴꦠꦶ ꦄꦤꦺꦴꦣꦶꦱꦺꦴ, ꦎꦣꦶꦱꦺꦴꦥꦶ ꦮꦴ ‘‘ꦌꦠ꧀ꦠꦏꦴ’’ꦠꦶ ꦄꦥꦫꦶꦩꦶꦠꦴ. ꦄꦱꦺꦱꦺꦠ꧀ꦮꦴꦠꦶ ꦄꦱꦸꦨꦱꦩꦴꦥꦠ꧀ꦠꦶ ꦮꦶꦪ ꦌꦏꦱ꧀ꦱꦺꦮ ꦄꦒ꧀ꦒꦲꦟꦠꦺꦴ.

ꦏꦶꦚ꧀ꦕꦴꦥꦶ ꦄꦱꦸꦨꦤꦶꦩꦶꦠ꧀ꦠꦴꦫꦩ꧀ꦩꦟꦩ꧀ꦥꦶ ꦏꦶꦚ꧀ꦕꦤꦁ ꦲꦺꦴꦠꦶ, ꦄꦴꦫꦩ꧀ꦩꦟꦱꦔ꧀ꦓꦛ꧀ꦛꦤꦱ꧀ꦱ ꦏꦶꦚ꧀ꦕꦤꦱ꧀ꦱ ꦄꦱꦸꦨꦱꦩꦴꦥꦠ꧀ꦠꦷꦤꦩ꧀ꦥꦶ ꦥꦛꦶꦨꦴꦒꦤꦶꦩꦶꦠ꧀ꦠꦱꦔ꧀ꦑꦴꦠꦁ ꦄꦴꦫꦩ꧀ꦩꦟꦁ ꦱꦧꦶꦩ꧀ꦧꦁ ꦮꦶꦪ ꦮꦶꦒ꧀ꦒꦲꦁ ꦏꦶꦚ꧀ꦕꦤꦁ ꦲꦸꦠ꧀ꦮꦴ ꦈꦥꦛ꧀ꦜꦴꦠꦶ, ꦤ ꦠꦡꦴ ꦆꦩꦱ꧀ꦱꦴꦠꦶ. ꦤꦤꦸ ꦧ꧀ꦫꦲ꧀ꦩꦮꦶꦲꦴꦫꦥꦜꦩꦴꦫꦸꦥ꧀ꦥꦴꦤꦩ꧀ꦥꦶ ꦥꦛꦶꦨꦴꦒꦤꦶꦩꦶꦠ꧀ꦠꦨꦹꦠꦁ ꦏꦶꦚ꧀ꦕꦶ ꦄꦴꦫꦩ꧀ꦩꦟꦁ ꦤꦠ꧀ꦡꦷꦠꦶ? ꦱꦕ꧀ꦕꦁ ꦤꦠ꧀ꦡꦶ, ꦄꦪꦁ ꦥꦤ ꦥꦜꦩꦴꦫꦸꦥ꧀ꦥꦮꦶꦚ꧀ꦚꦴꦟꦁ ꦮꦶꦪ ꦤ ꦥꦛꦶꦨꦴꦒꦤꦶꦩꦶꦠ꧀ꦠꦨꦹꦠꦄꦴꦫꦩ꧀ꦩꦟꦠꦴꦪ ꦌꦮꦁ ꦮꦸꦠ꧀ꦠꦴ. ꦄꦠ꧀ꦠꦺꦤꦴꦠꦶ ꦄꦠ꧀ꦠꦤꦴ. ꦨꦮꦠꦶ ꦌꦠꦺꦤ ꦄꦠ꧀ꦠꦴꦠꦶ ꦄꦨꦶꦣꦴꦤꦁ ꦧꦸꦢ꧀ꦣꦶ ꦕꦴꦠꦶ ꦨꦴꦮꦺꦴ, ꦄꦠ꧀ꦠꦴ. ꦨꦴꦮ-ꦱꦢ꧀ꦢꦺꦴꦥꦶ ꦄꦠ꧀ꦠꦥꦫꦶꦪꦴꦪꦺꦴꦠꦶ ꦄꦴꦲ ‘‘ꦨꦴꦮꦥꦺꦴꦱꦥꦸꦒ꧀ꦒꦭꦴꦢꦶꦱꦔ꧀ꦑꦴꦠꦺꦤꦴ’’ꦠꦶ. ꦤꦺꦱꦁ ꦄꦥ꧀ꦥꦩꦴꦟꦱꦩꦴꦣꦶꦄꦴꦢꦷꦤꦁ ꦕꦠꦸꦤ꧀ꦤꦁ. ‘‘ꦤꦴꦤꦠꦴ ꦥꦴꦏꦛꦴꦮꦴ’’ꦠꦶ ꦮꦸꦠ꧀ꦠꦁ ꦤꦴꦤꦠ꧀ꦠꦁ ꦨꦹꦩꦶꦠꦺꦴ ꦄꦴꦫꦩ꧀ꦩꦟꦠꦺꦴ ꦕ ꦢꦱ꧀ꦱꦺꦠꦸꦁ ‘‘ꦄꦠ꧀ꦡꦺꦴ ꦥꦤꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦥꦫꦶꦠ꧀ꦠꦴꦢꦶꦨꦴꦮꦺꦤ ꦄꦠꦷꦠꦴꦢꦶꦨꦴꦮꦺꦤ ꦄꦗ꧀ꦙꦠ꧀ꦠꦴꦢꦶꦨꦴꦮꦺꦤ ꦕ ꦤ ꦮꦠ꧀ꦠꦧ꧀ꦧꦁ ꦄꦴꦫꦩ꧀ꦩꦟꦁ ꦌꦠꦶꦱ꧀ꦱꦴꦠꦶ ꦤꦮꦠ꧀ꦠꦧ꧀ꦧꦴꦫꦩ꧀ꦩꦟꦴ ꦤꦶꦧ꧀ꦧꦴꦤꦴꦫꦩ꧀ꦩꦟꦦꦭꦱꦩꦴꦥꦠ꧀ꦠꦶꦨꦴꦮꦠꦺꦴ.

ꦌꦠ꧀ꦠꦏꦺꦴꦠꦶ ꦫꦴꦒꦴꦢꦷꦲꦶ ꦱꦁꦏꦶꦭꦶꦛ꧀ꦜꦠꦴꦪ ꦌꦠ꧀ꦠꦏꦥ꧀ꦥꦩꦴꦟꦺꦴ, ꦈꦠ꧀ꦠꦴꦤꦺꦴ ꦥꦫꦶꦠ꧀ꦠꦕꦺꦠꦱꦺꦴꦠꦶ ꦄꦠ꧀ꦡꦺꦴ. ꦤꦶꦧ꧀ꦧꦴꦤꦩ꧀ꦥꦶ ꦄꦥ꧀ꦥꦩꦴꦟꦩꦺꦮ ꦥꦩꦴꦟꦏꦫꦟꦴꦤꦁ ꦄꦨꦴꦮꦺꦤꦴꦠꦶ ꦄꦴꦤꦺꦠ꧀ꦮꦴ ꦱꦩ꧀ꦧꦤ꧀ꦣꦺꦴ. ꦄꦏꦸꦥ꧀ꦥꦴꦠꦶ ꦄꦫꦲꦠ꧀ꦠꦦꦭꦕꦺꦠꦺꦴꦮꦶꦩꦸꦠ꧀ꦠꦶ ꦥꦛꦶꦥꦏ꧀ꦑꦺꦲꦶ ꦄꦏꦺꦴꦥꦤꦷꦪꦠꦴꦪ. ꦏꦶꦚ꧀ꦕꦠꦷꦠꦶ ꦏꦠ꧀ꦠꦫꦶ ꦥꦜꦶꦠꦺꦴ ꦣꦴꦠꦸ ꦩꦢ꧀ꦢꦤꦠ꧀ꦡꦺꦴꦠꦶ ꦄꦴꦲ ‘‘ꦏꦶꦚ꧀ꦕꦠꦶ ꦩꦢ꧀ꦢꦠꦷ’’ꦠꦶ. ꦠꦱ꧀ꦱ ꦥꦪꦺꦴꦒꦁ ꦢꦱ꧀ꦱꦺꦠꦸꦁ ‘‘ꦩꦤꦸꦱ꧀ꦱꦴ ꦏꦶꦫꦴ’’ꦠꦶꦄꦴꦢꦶ ꦮꦸꦠ꧀ꦠꦁ.

ꦱꦩꦹꦲꦴꦢꦶꦓꦤꦮꦱꦺꦤ ꦱꦏꦶꦕ꧀ꦕꦥꦫꦶꦕ꧀ꦖꦺꦢꦠꦴꦪ ꦕ ꦱꦮꦶꦒ꧀ꦒꦲꦴ ꦮꦶꦪ ꦈꦥꦛ꧀ꦜꦶꦠꦴ ꦱꦔ꧀ꦑꦴꦫꦴ ꦤꦶꦕ꧀ꦕꦴꦢꦶꦒ꧀ꦒꦴꦲꦱ꧀ꦱ ꦮꦠ꧀ꦡꦸꦠꦴꦪ ‘‘ꦤꦶꦕ꧀ꦕꦤꦶꦩꦶꦠ꧀ꦠꦁ ꦱꦸꦑꦴꦢꦶꦤꦶꦩꦶꦠ꧀ꦠ’’ꦤ꧀ꦠꦶ ꦕ ꦮꦸꦕ꧀ꦕꦠꦶ. ꦮꦶꦥꦱ꧀ꦱꦤꦴ ꦥꦤ ꦠꦠ꧀ꦡ ꦓꦤꦮꦶꦤꦶꦧ꧀ꦨꦺꦴꦒꦁ ꦏꦫꦺꦴꦤ꧀ꦠꦷ ꦤꦶꦕ꧀ꦕꦴꦢꦶꦒ꧀ꦒꦴꦲꦁ ꦮꦶꦣꦩꦺꦤ꧀ꦠꦷ ‘‘ꦤꦶꦩꦶꦠ꧀ꦠꦁ ꦱꦩꦸꦒ꧀ꦓꦴꦠꦺꦠꦷ’’ꦠꦶ ꦮꦸꦠ꧀ꦠꦴ ꦓꦤꦤꦶꦩꦶꦠ꧀ꦠꦱ꧀ꦱ ꦄꦴꦫꦩ꧀ꦩꦟꦨꦹꦠꦱ꧀ꦱ ꦄꦨꦴꦮꦴ. ꦤ ꦒꦲꦶꦠꦴꦠꦶ ꦌꦏꦠ꧀ꦡꦥꦢꦤꦶꦢ꧀ꦢꦺꦱꦺ ꦥꦴꦭ꦳ꦶꦪꦁ ꦏꦱ꧀ꦩꦴ ꦤ ꦒꦲꦶꦠꦴ? ꦱꦴꦠꦶ ꦱꦸꦚ꧀ꦚꦠꦴ ꦕꦺꦠꦺꦴꦮꦶꦩꦸꦠ꧀ꦠꦶ. ꦱꦧ꧀ꦧꦠ꧀ꦡꦴꦠꦶ ꦄꦥ꧀ꦥꦩꦴꦟꦴꦕꦺꦠꦺꦴꦮꦶꦩꦸꦠ꧀ꦠꦶꦄꦴꦢꦶꦤꦶꦢ꧀ꦢꦺꦱꦺꦱꦸ. ꦄꦴꦫꦩ꧀ꦩꦟꦮꦱꦺꦤꦴꦠꦶ ꦄꦴꦫꦩ꧀ꦩꦟꦮꦱꦺꦤꦥꦶ ꦌꦏꦠ꧀ꦡꦴ, ꦤ ꦏꦺꦮꦭꦁ ꦱꦨꦴꦮꦱꦫꦱꦠꦺꦴꦮ. ꦆꦩꦶꦤꦴ ꦥꦫꦶꦪꦴꦪꦺꦤꦴꦠꦶ ꦄꦥ꧀ꦥꦩꦴꦟꦠꦺꦴꦠꦶꦄꦴꦢꦶꦤꦴ ꦄꦴꦫꦩ꧀ꦩꦟꦠꦺꦴ ꦭꦢ꧀ꦣꦥꦫꦶꦪꦴꦪꦺꦤ. ꦄꦚ꧀ꦚꦱ꧀ꦩꦶꦁ ꦥꦤ ꦜꦴꦤꦺꦠꦶ ꦄꦴꦏꦶꦚ꧀ꦕꦚ꧀ꦚꦴꦢꦶꦱꦢ꧀ꦢꦥꦮꦠ꧀ꦠꦶꦲꦺꦠꦸꦠꦺꦴ ꦄꦚ꧀ꦚꦺꦤ ꦲꦺꦠꦸꦤꦴ ꦄꦥ꧀ꦥꦩꦴꦟꦴꦠꦶꦱꦢ꧀ꦢꦥ꧀ꦥꦮꦠ꧀ꦠꦶꦪꦁ ꦌꦠꦱ꧀ꦱ ꦕꦺꦠꦺꦴꦮꦶꦩꦸꦠ꧀ꦠꦶꦪꦴ ꦲꦺꦴꦤ꧀ꦠꦶ. ꦌꦱ ꦤꦪꦺꦴ ꦱꦺꦱꦺꦱꦸꦥꦶ. ꦆꦩꦶꦤꦴ ꦥꦫꦶꦪꦴꦪꦺꦤꦴꦠꦶ ꦆꦩꦶꦤꦴ ꦠꦴꦪ ꦠꦴꦪ ꦱꦩꦚ꧀ꦚꦴꦪ ꦮꦺꦴꦲꦫꦶꦠꦧ꧀ꦧꦠꦴꦥꦫꦶꦪꦴꦪꦺꦤ. ꦱꦕ꧀ꦕꦴꦤꦁ ꦢꦱ꧀ꦱꦤꦩꦸꦑꦺꦤ ꦮꦛ꧀ꦛꦮꦱꦺꦤ ꦈꦛ꧀ꦜꦶꦠꦢꦺꦱꦤꦁ ꦄꦫꦲꦠ꧀ꦠꦺꦤ ꦏꦹꦛꦁ ꦒꦟ꧀ꦲꦤ꧀ꦠꦺꦴ ꦪꦡꦴꦤꦸꦱꦤ꧀ꦣꦶꦤꦴꦮ ꦢꦺꦱꦤꦁ ꦤꦶꦛ꧀ꦜꦥꦺꦱꦶ. ꦪꦁ ꦥꦤꦺꦠ꧀ꦡ ꦄꦠ꧀ꦡꦠꦺꦴ ꦄꦮꦶꦨꦠ꧀ꦠꦁ, ꦠꦁ ꦱꦸꦮꦶꦚ꧀ꦚꦺꦪ꧀ꦪꦩꦺꦮ.

ꦩꦲꦴꦮꦺꦢꦭ꧀ꦭꦱꦸꦠ꧀ꦠꦮꦟ꧀ꦟꦤꦴꦪ ꦭꦷꦤꦠ꧀ꦡꦥ꧀ꦥꦏꦴꦱꦤꦴ ꦱꦩꦠ꧀ꦠꦴ.