꧗. ꦕꦹꦭ꦳ꦲꦠ꧀ꦡꦶꦥꦢꦺꦴꦥꦩꦱꦸꦠ꧀ꦠꦮꦟ꧀ꦟꦤꦴ

꧒꧘꧘. ꦱꦺꦠꦥꦫꦶꦮꦴꦫꦺꦴꦠꦶ ꦱꦺꦠꦥꦛꦶꦕ꧀ꦖꦢꦺꦴ, ꦱꦺꦠꦮꦟ꧀ꦟꦴꦭꦔ꧀ꦏꦴꦫꦺꦴꦠꦶ ꦄꦠ꧀ꦡꦺꦴ. ꦥꦸꦧ꧀ꦧꦺ ꦥꦤ ‘‘ꦱꦺꦠꦴꦭꦔ꧀ꦏꦴꦫꦴ’’ꦠꦶ ꦄꦱ꧀ꦱꦴꦭꦔ꧀ꦏꦴꦫꦺꦴ ꦒꦲꦶꦠꦺꦴ, ꦆꦣ ꦕꦏ꧀ꦏꦥꦚ꧀ꦗꦫꦏꦸꦧ꧀ꦧꦫꦴꦢꦶꦫꦡꦴꦮꦪꦮꦺꦱꦸ ꦏꦴꦠꦧ꧀ꦧꦴꦭꦔ꧀ꦏꦴꦫꦺꦴ. ꦌꦮꦁ ꦮꦸꦠ꧀ꦠꦺꦤꦴꦠꦶ ꦌꦮꦁ ‘‘ꦱꦺꦠꦴꦪ ꦱꦸꦢ’’ꦤ꧀ꦠꦶꦄꦴꦢꦶꦤꦴ ꦥꦏꦴꦫꦺꦤ ꦱꦁꦪꦸꦠ꧀ꦠꦩꦲꦴꦮꦒ꧀ꦒꦺ (ꦱꦁ. ꦤꦶ. ꧕.꧔) ꦮꦸꦠ꧀ꦠꦺꦤ. ꦤꦴꦠꦶꦩꦲꦴ ꦪꦸꦢ꧀ꦣꦩꦟ꧀ꦝꦭꦺ ꦱꦚ꧀ꦕꦴꦫꦱꦸꦑꦠ꧀ꦡꦁ. ꦪꦺꦴꦣꦺꦴ ꦱꦴꦫꦡꦷꦠꦶ ꦢ꧀ꦮꦶꦤ꧀ꦤꦁ, ꦥꦲꦫꦟꦢꦴꦪꦏꦺꦤ ꦱꦢ꧀ꦣꦶꦁ ꦠꦶꦟ꧀ꦟꦁ ꦮꦴ.

ꦤꦒꦫꦁ ꦥꦢꦏ꧀ꦑꦶꦟꦁ ꦏꦫꦺꦴꦠꦶ ꦤꦒꦫꦱꦺꦴꦨꦤꦠ꧀ꦡꦁ. ꦆꦢꦁ ꦏꦶꦫ ꦠꦱ꧀ꦱ ꦧ꧀ꦫꦴꦲ꧀ꦩꦟꦱ꧀ꦱ ꦗꦴꦟꦸꦱ꧀ꦱꦺꦴꦟꦶꦛ꧀ꦜꦴꦤꦤ꧀ꦠꦫꦁ ꦗꦴꦠꦶꦱꦶꦢ꧀ꦣꦁ ꦥꦫꦩ꧀ꦥꦫꦴꦒꦠꦁ ꦕꦴꦫꦶꦠ꧀ꦠꦁ. ꦠꦺꦤꦴꦲ ‘‘ꦆꦠꦺꦴ ꦌꦠ꧀ꦠꦏꦺꦲꦶ ꦢꦶꦮꦱꦺꦲꦷ’’ꦠꦶꦄꦴꦢꦶ. ꦕꦴꦫꦶꦠ꧀ꦠꦮꦱꦺꦤ ꦤꦒꦫꦮꦴꦱꦶꦤꦺꦴꦥꦶ ꦠꦡꦴ ꦠꦡꦴ ꦥꦛꦶꦥꦗ꧀ꦗꦤ꧀ꦠꦶ. ꦥꦸꦚ꧀ꦚꦮꦴꦢꦶꦩꦔ꧀ꦒꦭꦏꦡꦤꦺ ꦤꦶꦪꦸꦠ꧀ꦠꦴ ꦩꦴꦔ꧀ꦒꦭꦶꦏꦴ. ꦱꦸꦮꦠ꧀ꦡꦶꦥꦠ꧀ꦠꦤꦴꦪ ꦱꦺꦴꦮꦠ꧀ꦡꦶꦏꦴ. ꦄꦴꦢꦶ-ꦱꦢ꧀ꦢꦺꦤ ꦮꦤ꧀ꦢꦷꦄꦴꦢꦷꦤꦁ ꦱꦔ꧀ꦒꦲꦺꦴ. ꦪꦱꦱꦶꦫꦶꦱꦩ꧀ꦥꦠ꧀ꦠꦶꦪꦴꦠꦶ ꦪꦱꦱꦩ꧀ꦥꦠ꧀ꦠꦶꦪꦴ ꦱꦶꦫꦶꦱꦩ꧀ꦥꦠ꧀ꦠꦶꦪꦴ ꦕ, ꦥꦫꦶꦮꦴꦫꦱꦩ꧀ꦥꦠ꧀ꦠꦶꦪꦴ ꦕꦺꦮ ꦮꦶꦨꦮꦱꦺꦴꦨꦴꦱꦩ꧀ꦥꦠ꧀ꦠꦶꦪꦴ ꦕꦴꦠꦶ ꦄꦠ꧀ꦡꦺꦴ.

ꦤꦒꦫꦴꦨꦶꦩꦸꦑꦺꦴ ꦥꦴꦪꦴꦱꦶ ꦄꦠ꧀ꦠꦤꦺꦴ ꦨꦶꦏ꧀ꦑꦴꦕꦴꦫꦮꦺꦭꦴꦪ. ꦥꦟ꧀ꦝꦶꦠꦺꦴ ꦩꦚ꧀ꦚꦺꦠꦶ ꦌꦠ꧀ꦡ ꦩꦚ꧀ꦚꦺꦠꦶ ꦆꦢꦁ ‘‘ꦩꦚ꧀ꦚꦠꦷ’’ꦠꦶ ꦆꦩꦶꦤꦴ ꦱꦩꦴꦤꦠ꧀ꦡꦁ ꦤꦶꦥꦴꦠꦥꦢꦁ. ꦠꦱ꧀ꦱ ꦆꦠꦶ-ꦱꦢ꧀ꦢꦁ ꦄꦴꦤꦺꦠ꧀ꦮꦴ ꦄꦠ꧀ꦡꦁ ꦢꦱ꧀ꦱꦺꦤ꧀ꦠꦺꦴ ‘‘ꦥꦟ꧀ꦝꦶꦠꦺꦴꦠꦶ ꦩꦚ꧀ꦚꦠꦷ’’ꦠꦶ ꦄꦴꦲ. ꦄꦤꦸꦩꦠꦶꦥꦸꦕ꧀ꦖꦴꦮꦱꦺꦤ ꦕꦺꦠꦁ ꦮꦸꦠ꧀ꦠꦁ. ꦠꦺꦤꦺꦮꦴꦲ ‘‘ꦈꦢꦴꦲꦸ ꦤꦺꦴ’’ꦠꦶ. ‘‘ꦠꦁ ꦏꦶꦁ ꦩꦚ꧀ꦚꦠꦶ ꦨꦮꦁ ꦮꦕ꧀ꦖꦴꦪꦤꦺꦴ ꦱꦩꦟꦱ꧀ꦱ ꦒꦺꦴꦠꦩꦱ꧀ꦱ ꦥꦚ꧀ꦚꦴꦮꦺꦪ꧀ꦪꦠ꧀ꦠꦶꦪ’’ꦤ꧀ꦠꦶ ꦲꦶ ꦮꦸꦠ꧀ꦠꦩꦺꦮꦠ꧀ꦡꦁ ꦥꦸꦤ ꦒꦟ꧀ꦲꦤ꧀ꦠꦺꦴ ‘‘ꦥꦟ꧀ꦝꦶꦠꦺꦴ ꦩꦚ꧀ꦚꦺ’’ꦠꦶ ꦄꦴꦲ. ꦠꦱ꧀ꦩꦴ ꦮꦸꦠ꧀ꦠꦁ ‘‘ꦨꦮꦁ ꦮꦕ꧀ꦖꦴꦪꦤꦺꦴ, ꦱꦩꦟꦁ ꦒꦺꦴꦠꦩꦁ ꦥꦟ꧀ꦝꦶꦠꦺꦴꦠꦶ ꦩꦚ꧀ꦚꦠꦶ, ꦈꦢꦴꦲꦸ ꦤꦺꦴ’’ꦠꦶ, ꦪꦡꦴ ꦠꦺ ꦑꦩꦺꦪ꧀ꦪ, ꦠꦡꦴ ꦤꦁ ꦏꦡꦺꦲꦷꦠꦶ ꦄꦣꦶꦥ꧀ꦥꦴꦪꦺꦴ.

ꦄꦲꦁ ꦏꦺꦴ ꦤꦴꦩ, ꦩꦩ ꦄꦮꦶꦱꦪꦺꦴ ꦌꦱꦺꦴꦠꦶ ꦢꦱ꧀ꦱꦺꦠꦶ. ꦏꦺꦴ ꦕꦴꦠꦶ ꦲꦺꦠꦸꦤꦶꦱ꧀ꦱꦏ꧀ꦏꦺ ꦥꦕ꧀ꦕꦠ꧀ꦠꦮꦕꦤꦤ꧀ꦠꦶ ꦄꦴꦲ ‘‘ꦏꦸꦠꦺꦴ ꦕꦴ’’ꦠꦶ. ꦠꦡꦴ ꦕꦴꦲ ‘‘ꦏꦺꦤ ꦏꦴꦫꦟꦺꦤ ꦗꦴꦤꦶꦱ꧀ꦱꦴꦩꦷ’’ꦠꦶ, ꦪꦺꦤ ꦏꦴꦫꦟꦺꦤ ꦱꦩꦟꦱ꧀ꦱ ꦒꦺꦴꦠꦩꦱ꧀ꦱ ꦥꦚ꧀ꦚꦴꦮꦺꦪ꧀ꦪꦠ꧀ꦠꦶꦪꦁ ꦗꦴꦤꦺꦪ꧀ꦪꦁ, ꦠꦁ ꦏꦴꦫꦟꦁ ꦩꦪꦶ ꦤꦠ꧀ꦡꦷꦠꦶ ꦄꦣꦶꦥ꧀ꦥꦴꦪꦺꦴ. ꦧꦸꦢ꧀ꦣꦺꦴꦪꦺꦮ ꦨꦮꦺꦪ꧀ꦪ, ꦄꦧꦸꦢ꧀ꦣꦱ꧀ꦱ ꦱꦧ꧀ꦧꦡꦴ ꦧꦸꦢ꧀ꦣꦚꦴꦟꦴꦤꦸꦨꦴꦮꦁ ꦗꦴꦤꦶꦠꦸꦁ ꦤ ꦱꦏ꧀ꦏꦴꦠꦶ. ꦮꦸꦠ꧀ꦠꦚ꧀ꦲꦺꦠꦁ – ‘‘ꦄꦥ꧀ꦥꦩꦠ꧀ꦠꦏꦁ ꦑꦺꦴ ꦥꦤꦺꦠꦁ, ꦨꦶꦏ꧀ꦑꦮꦺ, ꦎꦫꦩꦠ꧀ꦠꦏꦁ ꦱꦷꦭꦩꦠ꧀ꦠꦏꦁ, ꦪꦺꦤ ꦥꦸꦡꦸꦗ꧀ꦗꦤꦺꦴ ꦠꦡꦴꦒꦠꦱ꧀ꦱ ꦮꦟ꧀ꦟꦁ ꦮꦢꦩꦴꦤꦺꦴ ꦮꦢꦺꦪ꧀ꦪ (ꦢꦷ. ꦤꦶ. ꧑.꧗), ꦄꦠ꧀ꦡꦶ, ꦨꦶꦏ꧀ꦑꦮꦺ, ꦄꦚ꧀ꦚꦺꦮ ꦣꦩ꧀ꦩꦴ ꦒꦩ꧀ꦨꦷꦫꦴ ꦢꦸꦢ꧀ꦢꦱꦴ ꦢꦸꦫꦤꦸꦧꦺꦴꦣꦴ …ꦥꦺ… ꦪꦺꦲꦶ ꦠꦡꦴꦒꦠꦱ꧀ꦱ ꦪꦡꦴꦨꦸꦕ꧀ꦕꦁ ꦮꦟ꧀ꦟꦁ ꦱꦩ꧀ꦩꦴ ꦮꦢꦩꦴꦤꦺꦴ ꦮꦢꦺꦪ꧀ꦪꦴ’’ꦠꦶ (ꦢꦷ. ꦤꦶ. ꧑.꧒꧘) ꦕ. ꦌꦠ꧀ꦡꦴꦠꦶ ‘‘ꦱꦺꦴꦥꦶ ꦤꦹꦤꦱ꧀ꦱ ꦠꦴꦢꦶꦱꦺꦴꦮꦴ’’ꦠꦶ ꦌꦠꦱ꧀ꦩꦶꦁ ꦥꦢꦺ. ꦥꦱꦠ꧀ꦡ ꦥꦱꦠ꧀ꦡꦺꦴꦠꦶ ꦥꦱꦠ꧀ꦡꦺꦲꦶ ꦄꦠ꧀ꦠꦤꦺꦴ ꦒꦸꦟꦺꦲꦺꦮ ꦱꦺꦴ ꦥꦱꦠ꧀ꦡꦺꦴ, ꦤ ꦠꦱ꧀ꦱ ꦏꦶꦠ꧀ꦠꦶꦤꦴ, ꦥꦱꦁꦱꦴꦱꦨꦴꦮꦺꦤꦺꦮ ꦥꦴꦱꦁꦱꦺꦴꦠꦶ ꦄꦠ꧀ꦡꦺꦴ. ꦠꦺꦤꦴꦲ ‘‘ꦱꦧ꧀ꦧꦒꦸꦟꦴꦤ’’ꦤ꧀ꦠꦶꦄꦴꦢꦶ. ꦩꦟꦶꦫꦠꦤꦤ꧀ꦠꦶ ꦕꦏ꧀ꦏꦮꦠ꧀ꦠꦶꦤꦺꦴ ꦩꦟꦶꦫꦠꦤꦁ. ꦱꦢꦺꦮꦏꦺ ꦭꦺꦴꦏꦺ ꦥꦴꦱꦁꦱꦴꦤꦩ꧀ꦥꦶ ꦥꦴꦱꦁꦱꦺꦴꦠꦶ ꦢꦱ꧀ꦱꦺꦠꦸꦁ ‘‘ꦥꦱꦠ꧀ꦡꦺꦲꦶ ꦮꦴ’’ꦠꦶ ꦢꦸꦠꦶꦪꦮꦶꦏꦥ꧀ꦥꦺꦴ ꦒꦲꦶꦠꦺꦴ.

ꦄꦫꦟꦷꦪꦠꦺꦴ ꦄꦠ꧀ꦡꦺꦴ, ꦱꦺꦴ ꦌꦮ ꦮꦱꦠꦷꦠꦶ ꦮꦱꦺꦴꦠꦶ ꦄꦠ꧀ꦡꦮꦱꦺꦴ, ꦠꦱ꧀ꦱ ꦠꦱ꧀ꦱ ꦥꦪꦺꦴꦒꦱ꧀ꦱ ꦄꦴꦤꦶꦱꦁꦱꦨꦹꦠꦁ ꦦꦭꦤ꧀ꦠꦶ ꦄꦴꦲ ‘‘ꦄꦠ꧀ꦡꦮꦱꦤ꧀ꦠꦶ ꦄꦠ꧀ꦡꦴꦤꦶꦱꦁꦱ’’ꦤ꧀ꦠꦶ. ꦄꦠ꧀ꦡꦺꦴ ꦮꦴ ꦮꦸꦠ꧀ꦠꦭꦏ꧀ꦑꦟꦺꦴ ꦮꦱꦺꦴ ꦌꦠꦱ꧀ꦱꦴꦠꦶ ꦄꦠ꧀ꦡꦮꦱꦺꦴ, ꦏꦴꦫꦟꦁ. ꦤꦴꦒꦮꦤꦮꦴꦱꦶꦏꦺꦴꦠꦶ ꦲꦠ꧀ꦡꦶꦤꦴꦒꦴꦤꦁ ꦮꦶꦕꦫꦟꦮꦤꦺ ꦠꦺꦱꦁ ꦒꦲꦟꦠ꧀ꦡꦁ ꦮꦱꦤꦏꦺꦴ. ꦄꦤꦸꦒ꧀ꦒꦲꦶꦠꦱꦶꦥ꧀ꦥꦺꦴꦠꦶ ꦄꦱꦶꦏ꧀ꦑꦶꦠꦲꦠ꧀ꦡꦶꦱꦶꦥ꧀ꦥꦺꦴ ꦄꦴꦪꦠꦮꦶꦠ꧀ꦡꦠꦱ꧀ꦱ ꦥꦢꦩꦠ꧀ꦠꦱ꧀ꦱ ꦢꦱ꧀ꦱꦤꦺꦤ ‘‘ꦩꦲꦴ ꦮꦠ, ꦨꦺꦴ ꦤꦴꦒꦺꦴ’’ꦠꦶ ꦤꦶꦛ꧀ꦜꦴꦒꦩꦤꦠꦺꦴ. ꦥꦫꦠꦺꦴ ꦥꦤ ꦨꦒꦮꦠꦴ ꦮꦸꦠ꧀ꦠꦛ꧀ꦜꦴꦤꦺ. ꦈꦒ꧀ꦒꦲꦶꦠꦱꦶꦥ꧀ꦥꦺꦴ ꦥꦸꦫꦶꦱꦺꦴ ꦤꦴꦒꦮꦤꦶꦏꦺꦴꦠꦶ ꦄꦴꦒꦠꦺꦴ ꦄꦴꦪꦠꦮꦶꦠ꧀ꦡꦠꦱ꧀ꦱ ꦥꦢꦱ꧀ꦱ ꦈꦕ꧀ꦕꦱ꧀ꦱ ꦕ ꦤꦶꦱꦺꦮꦶꦠꦱ꧀ꦱ ꦧ꧀ꦪꦨꦶꦕꦴꦫꦨꦴꦮꦁ ꦚꦠ꧀ꦮꦴ ꦠꦠ꧀ꦠꦏꦺꦤ ꦤꦶꦛ꧀ꦜꦁ ꦄꦒꦤ꧀ꦠ꧀ꦮꦴ ꦩꦲꦴꦲꦠ꧀ꦡꦶꦁ ꦢꦶꦱ꧀ꦮꦴꦮ ꦤꦶꦛ꧀ꦜꦴꦒꦩꦤꦠꦺꦴ. ꦚꦴꦟꦁ ꦥꦗ꧀ꦗꦠꦶ ꦌꦠ꧀ꦡꦴꦠꦶ ꦚꦴꦟꦥꦢꦴꦤꦶ, ꦑꦠ꧀ꦠꦶꦪꦥꦟ꧀ꦝꦶꦠꦴꦢꦷꦤꦁ ꦣꦩ꧀ꦩꦮꦶꦤꦪꦺ ꦮꦶꦤꦷꦠꦠ꧀ꦠꦴ ꦮꦶꦤꦪꦺꦲꦶ ꦄꦣꦶꦒꦠꦗ꧀ꦙꦴꦤꦴꦢꦷꦤꦶ. ꦠꦴꦤꦶ ꦲꦶ ꦠꦡꦴꦒꦠꦒꦤ꧀ꦣꦲꦠ꧀ꦡꦶꦤꦺꦴ ꦢꦺꦱꦤꦴꦚꦴꦟꦺꦤ ꦄꦏ꧀ꦏꦤ꧀ꦠꦛ꧀ꦜꦴꦤꦴꦤꦶ. ꦕꦠ꧀ꦠꦴꦫꦷꦠꦶ ꦥꦤ ꦮꦶꦤꦺꦪ꧀ꦪꦴꦤꦁ ꦆꦣ ꦑꦠ꧀ꦠꦶꦪꦥꦟ꧀ꦝꦶꦠꦴꦢꦶꦮꦱꦺꦤ ꦕꦠꦸꦧ꧀ꦧꦶꦣꦴꦤꦁꦪꦺꦮ ꦒꦲꦶꦠꦠ꧀ꦠꦴ.

꧒꧘꧙. ꦥꦸꦒ꧀ꦒꦭꦺꦱꦸ ꦥꦚ꧀ꦚꦴꦪ ꦕ ꦤꦶꦥꦸꦟꦠꦴ ꦥꦟ꧀ꦝꦶꦠꦱꦩꦚ꧀ꦚꦴ ꦤꦶꦥꦸꦟꦠ꧀ꦡꦱ꧀ꦱ ꦢꦱ꧀ꦱꦤꦱꦩꦠ꧀ꦡꦠꦴꦮꦱꦺꦤꦺꦮꦴꦠꦶ ꦄꦴꦲ ‘‘ꦱꦸꦑꦸꦩꦄꦠ꧀ꦡꦤ꧀ꦠꦫꦥꦛꦶꦮꦶꦗ꧀ꦙꦤꦱꦩꦠ꧀ꦡꦺ’’ꦠꦶ. ꦏꦠ-ꦱꦢ꧀ꦢꦺꦴ ꦆꦣ ꦤꦶꦥ꧀ꦦꦤ꧀ꦤꦥꦫꦶꦪꦴꦪꦺꦴ. ꦥꦫꦺ ꦥꦮꦢꦤ꧀ꦠꦶ ꦌꦠ꧀ꦡ, ꦌꦠꦺꦤꦴꦠꦶ ꦥꦫꦥ꧀ꦥꦮꦴꦢꦺꦴ, ꦥꦫꦱꦩꦪꦺꦴ. ꦥꦫꦺꦲꦶ ꦥꦮꦢꦤꦁ ꦥꦫꦥ꧀ꦥꦮꦴꦢꦺꦴ, ꦮꦶꦒ꧀ꦒꦴꦲꦶꦏꦏꦡꦴꦪ ꦥꦫꦮꦴꦢꦩꦢ꧀ꦢꦤꦁ. ꦠꦢꦸꦨꦪꦩ꧀ꦥꦶ ꦌꦏꦠꦺꦴ ꦏꦠ꧀ꦮꦴ ꦥꦴꦭ꦳ꦶꦪꦁ ꦮꦸꦠ꧀ꦠꦤ꧀ꦠꦶ ꦄꦴꦲ ‘‘ꦮꦶꦚ꧀ꦚꦴꦠꦥꦫꦥ꧀ꦥꦮꦴꦢꦺ ꦕꦺꦮ ꦥꦫꦺꦲꦶ ꦱꦢ꧀ꦣꦶꦁ ꦏꦠꦮꦴꦢꦥꦫꦶꦕꦪꦺ ꦕꦴ’’ꦠꦶ, ꦥꦫꦱꦩꦪꦺꦱꦸ ꦥꦫꦮꦴꦢꦩꦢ꧀ꦢꦤꦺꦱꦸ ꦕ ꦤꦶꦥ꧀ꦦꦤ꧀ꦤꦺꦠꦶ ꦄꦠ꧀ꦡꦺꦴ. ꦮꦴꦭꦮꦺꦣꦶꦫꦹꦥꦺꦠꦶ ꦮꦴꦭꦮꦺꦣꦶꦥꦠꦶꦫꦹꦥꦺ. ꦠꦺꦤꦴꦲ ‘‘ꦮꦴꦭꦮꦺꦣꦶꦣꦤꦸꦒ꧀ꦒꦲꦱꦢꦶꦱꦺ’’ꦠꦶ. ꦮꦴꦭꦤ꧀ꦠꦶ ꦄꦤꦺꦏꦣꦴ ꦨꦶꦤ꧀ꦤꦱ꧀ꦱ ꦮꦴꦭꦱ꧀ꦱ ꦄꦁꦱꦸꦱꦔ꧀ꦑꦴꦠꦁ ꦮꦴꦭꦁ. ꦨꦶꦤ꧀ꦢꦤ꧀ꦠꦴ ꦮꦶꦪꦴꦠꦶ ꦓꦛꦴꦢꦶꦁ ꦱꦮꦶꦒ꧀ꦒꦲꦁ ꦩꦸꦒ꧀ꦒꦫꦴꦢꦶꦤꦴ ꦨꦶꦤ꧀ꦢꦤ꧀ꦠꦴ ꦮꦶꦪ, ꦢꦶꦛ꧀ꦜꦶꦒꦠꦴꦤꦶ ꦌꦏꦁꦱꦠꦺꦴ ꦨꦶꦤ꧀ꦢꦤ꧀ꦠꦴꦠꦶ ꦄꦣꦶꦥ꧀ꦥꦴꦪꦺꦴ. ‘‘ꦄꦠ꧀ꦡꦁ ꦒꦸꦪ꧀ꦲꦁ ꦥꦛꦶꦕ꧀ꦖꦤ꧀ꦤꦁ ꦏꦠ꧀ꦮꦴ ꦥꦸꦕ꧀ꦖꦶꦱ꧀ꦱꦴꦩꦴ’’ꦠꦶ ꦱꦔ꧀ꦑꦠꦁ ꦥꦢꦥꦚ꧀ꦲꦁ ꦥꦸꦕ꧀ꦖꦤ꧀ꦠꦷꦠꦶ ꦢꦱ꧀ꦱꦺꦠꦸꦁ ‘‘ꦢꦸꦥꦢꦩ꧀ꦥꦷ’’ꦠꦶꦄꦴꦢꦶ ꦮꦸꦠ꧀ꦠꦁ. ꦮꦢꦤ꧀ꦠꦶ ꦌꦠꦺꦤꦴꦠꦶ ꦮꦴꦢꦺꦴ, ꦢꦺꦴꦱꦺꦴ. ꦥꦸꦕ꧀ꦖꦷꦪꦠꦷꦠꦶ ꦥꦚ꧀ꦲꦺꦴ, ꦄꦠ꧀ꦡꦺꦴ. ꦥꦸꦕ꧀ꦖꦠꦶ ꦌꦠꦺꦤꦴꦠꦶ ꦥꦚ꧀ꦲꦺꦴ, ꦱꦢ꧀ꦢꦺꦴ. ꦠꦢꦸꦨꦪꦁ ꦌꦏꦠꦺꦴ ꦒꦲꦺꦠ꧀ꦮꦴ ꦄꦴꦲ ‘‘ꦌꦮꦫꦹꦥꦺ ꦥꦚ꧀ꦲꦺ’’ꦠꦶꦄꦴꦢꦶ. ‘‘ꦌꦮꦁ ꦥꦸꦕ꧀ꦖꦺꦪ꧀ꦪ, ꦌꦮꦁ ꦮꦶꦱ꧀ꦱꦗ꧀ꦗꦺꦪ꧀ꦪꦴ’’ꦠꦶ ꦕ ꦥꦸꦕ꧀ꦖꦴꦮꦶꦱ꧀ꦱꦗ꧀ꦗꦤꦴꦤꦁ ꦱꦶꦑꦴꦮꦒꦩꦤꦁ ꦢꦱ꧀ꦱꦺꦠꦶ. ꦱꦺꦪ꧀ꦪꦺꦴꦠꦶ ꦈꦠ꧀ꦠꦩꦺꦴ, ꦥꦫꦩꦺꦴ ꦭꦴꦨꦺꦴꦠꦶ ꦄꦣꦶꦥ꧀ꦥꦴꦪꦺꦴ.

ꦌꦮꦁ ꦄꦠ꧀ꦠꦤꦺꦴ ꦮꦴꦢꦮꦶꦣꦩꦤꦨꦪꦺꦤꦥꦶ ꦥꦫꦺ ꦨꦒꦮꦤ꧀ꦠꦁ ꦥꦚ꧀ꦲꦁ ꦥꦸꦕ꧀ꦖꦶꦠꦸꦁ ꦤ ꦮꦶꦱꦲꦤ꧀ꦠꦷꦠꦶ ꦮꦠ꧀ꦮꦴ ꦆꦢꦴꦤꦶ ꦮꦴꦢꦮꦶꦣꦩꦤꦺꦤ ꦮꦶꦤꦴꦥꦶ ꦤ ꦮꦶꦱꦲꦤ꧀ꦠꦶ ꦌꦮꦴꦠꦶ ꦢꦱ꧀ꦱꦺꦠꦸꦁ ‘‘ꦄꦥꦶꦕꦴ’’ꦠꦶꦄꦴꦢꦶ ꦄꦴꦫꦢ꧀ꦣꦁ. ꦕꦶꦠ꧀ꦠꦁ ꦥꦱꦷꦢꦠꦶ ꦥꦫꦺ ꦄꦠ꧀ꦠꦤꦺꦴ ꦄꦠ꧀ꦠꦨꦴꦮꦩ꧀ꦥꦶ ꦮꦶꦱ꧀ꦱꦠ꧀ꦡꦁ ꦤꦶꦪ꧀ꦪꦴꦢꦺꦠꦸꦏꦴꦩꦴ ꦲꦺꦴꦤ꧀ꦠꦶ ꦎꦣꦶꦱꦏꦩꦺꦠ꧀ꦠꦴꦦꦫꦟꦱꦢꦶꦱꦠ꧀ꦠꦴ ꦠꦱ꧀ꦱ ꦩꦺꦠ꧀ꦠꦴꦪꦤꦱ꧀ꦱ. ꦢꦱ꧀ꦱꦤꦱꦩ꧀ꦥꦤ꧀ꦤꦴꦠꦶ ꦢꦛ꧀ꦜꦧ꧀ꦧꦠꦴꦪ ꦱꦩ꧀ꦥꦤ꧀ꦤꦴ ꦢꦱ꧀ꦱꦤꦴꦤꦸꦠ꧀ꦠꦫꦶꦪꦨꦴꦮꦠꦺꦴ, ꦄꦠꦶꦮꦶꦪ ꦢꦱ꧀ꦱꦤꦷꦪꦴꦠꦶ ꦄꦠ꧀ꦡꦺꦴ.

ꦱꦫꦟꦒꦩꦤꦮꦱꦺꦤ ꦱꦴꦮꦏꦴꦠꦶ ꦭꦺꦴꦏꦶꦪꦱꦫꦟꦒꦩꦤꦺꦤ ꦱꦴꦮꦏꦴ, ꦭꦺꦴꦏꦸꦠ꧀ꦠꦫꦱꦫꦟꦒꦩꦤꦺꦤ ꦥꦤ ꦱꦴꦮꦏꦠ꧀ꦠꦁ ꦥꦫꦠꦺꦴ ꦄꦴꦒꦩꦶꦱ꧀ꦱꦠꦶ, ꦠꦚ꧀ꦕ ꦥꦧ꧀ꦧꦗꦶꦠꦮꦱꦺꦤ ꦮꦸꦕ꧀ꦕꦠꦶ, ꦆꦣ ꦒꦲꦛ꧀ꦜꦮꦱꦺꦤ, ꦈꦨꦪꦠ꧀ꦡꦴꦥꦶ ꦱꦫꦟꦒꦩꦤꦺꦤ ꦱꦴꦮꦏꦠ꧀ꦠꦁ ꦮꦺꦢꦶꦠꦧ꧀ꦧꦁ. ꦠꦺ ꦲꦶ ꦥꦫꦭꦺꦴꦏꦮꦗ꧀ꦗꦨꦪꦢꦱ꧀ꦱꦴꦮꦶꦤꦺꦴ ꦏꦸꦭꦥꦸꦠ꧀ꦠꦴ, ꦄꦴꦕꦴꦫꦏꦸꦭꦥꦸꦠ꧀ꦠꦴꦥꦶ ꦠꦴꦢꦶꦱꦴ ꦨꦮꦤ꧀ꦠꦶ. ꦡꦺꦴꦏꦺꦤꦴꦠꦶ ꦆꦩꦶꦤꦴ ‘‘ꦩꦤꦁ ꦄꦤꦱ꧀ꦱꦴꦩꦴ’’ꦠꦶ ꦥꦢꦱ꧀ꦱꦠ꧀ꦡꦁ ꦮꦢꦠꦶ.

꧒꧙꧐. ꦈꦢꦴꦲꦫꦷꦪꦠꦶ ꦈꦧ꧀ꦧꦺꦒꦥꦷꦠꦶꦮꦱꦺꦤꦴꦠꦶ, ꦠꦡꦴ ꦮꦴ ꦈꦢꦴꦲꦫꦟꦁ ꦈꦢꦴꦤꦁ. ꦠꦺꦤꦴꦲ ‘‘ꦈꦢꦴꦲꦴꦫꦁ ꦈꦢꦴꦲꦫꦷ’’ꦠꦶ. ꦄꦱ꧀ꦱ ꦣꦩ꧀ꦩꦱ꧀ꦱꦴꦠꦶ ꦄꦱ꧀ꦱ ꦥꦛꦶꦥꦠ꧀ꦠꦶꦱꦢ꧀ꦣꦩ꧀ꦩꦥꦸꦧ꧀ꦧꦏꦱ꧀ꦱ ꦥꦛꦶꦮꦺꦣꦱꦢ꧀ꦣꦩ꧀ꦩꦱ꧀ꦱ. ꦱꦺꦴꦠꦶ ꦲꦠ꧀ꦡꦶꦥꦢꦺꦴꦥꦩꦺꦴ ꦲꦠ꧀ꦡꦶꦥꦢꦺꦴꦥꦩꦨꦴꦮꦺꦤ ꦮꦸꦕ꧀ꦕꦩꦴꦤꦺꦴ ꦣꦩ꧀ꦩꦺꦴ. ꦌꦠ꧀ꦠꦴꦮꦠꦴꦠꦶ ꦌꦠ꧀ꦠꦏꦺꦤ ꦥꦫꦶꦧ꧀ꦧꦴꦗꦏꦺꦤ ꦮꦸꦠ꧀ꦠꦏꦡꦴꦩꦒ꧀ꦒꦩꦠ꧀ꦠꦺꦤ. ꦏꦴꦩꦁ ꦠꦺꦤ ꦮꦸꦠ꧀ꦠꦏꦡꦴꦩꦒ꧀ꦒꦺꦤꦥꦶ ꦲꦠ꧀ꦡꦶꦥꦢꦺꦴꦥꦩꦨꦴꦮꦺꦤ ꦮꦸꦕ꧀ꦕꦩꦴꦤꦺꦴ ꦣꦩ꧀ꦩꦺꦴ ꦥꦫꦶꦥꦸꦟ꧀ꦟꦺꦴꦮ ꦄꦫꦲꦠ꧀ꦠꦁ ꦥꦴꦥꦺꦠ꧀ꦮꦴ ꦥꦮꦺꦢꦶꦠꦠ꧀ꦠꦴ, ꦱꦺꦴ ꦕ ꦑꦺꦴ ꦱꦔ꧀ꦑꦺꦥꦠꦺꦴ, ꦤ ꦮꦶꦠ꧀ꦡꦴꦫꦠꦺꦴꦠꦶ ꦄꦴꦲ ‘‘ꦤ ꦌꦠ꧀ꦠꦴꦮꦠꦴ ꦮꦶꦠ꧀ꦡꦴꦫꦺꦤ ꦥꦫꦶꦥꦹꦫꦺꦴ ꦲꦺꦴꦠꦷ’’ꦠꦶ. ꦪꦢꦶ ꦪꦡꦴ ꦮꦶꦠ꧀ꦡꦴꦫꦺꦤ ꦲꦠ꧀ꦡꦶꦥꦢꦺꦴꦥꦩꦺꦴ ꦥꦫꦶꦥꦹꦫꦺꦴ ꦲꦺꦴꦠꦶ, ꦠꦡꦴ ꦢꦺꦱꦤꦴ ꦄꦴꦫꦢ꧀ꦣꦴ, ꦄꦡ ꦏꦱ꧀ꦩꦴ ꦏꦸꦱꦭꦺꦴꦠꦶ ꦤ ꦮꦸꦠ꧀ꦠꦺꦴꦠꦶ ꦕꦺꦴꦢꦤꦴ.

꧒꧙꧑. ꦄꦴꦪꦴꦩꦠꦺꦴꦥꦷꦠꦶ ꦥꦶ-ꦱꦢ꧀ꦢꦺꦤ ꦈꦧ꧀ꦧꦺꦣꦺꦤꦥꦶ ꦫꦱ꧀ꦱꦴꦠꦶ ꦢꦱ꧀ꦱꦺꦠꦶ. ꦤꦷꦕꦏꦴꦪꦴ ꦲꦶ ꦠꦴ ꦲꦺꦴꦤ꧀ꦠꦶ. ꦈꦕ꧀ꦕꦴꦠꦶ ꦈꦕ꧀ꦕꦏꦴ. ꦤꦶꦱꦺꦮꦤꦁ, ꦤꦶꦱꦺꦮꦠꦶ ꦌꦠ꧀ꦡꦴꦠꦶ ꦮꦴ ꦤꦶꦱꦺꦮꦶꦠꦁ. ꦤꦶꦱꦺꦮꦤꦚ꧀ꦕꦺꦠ꧀ꦡ ꦏꦟ꧀ꦝꦸꦪꦶꦠꦮꦶꦤꦺꦴꦢꦤꦠ꧀ꦡꦁ ꦓꦁꦱꦤꦁ. ꦠꦺꦤꦴꦲ ‘‘ꦑꦤ꧀ꦣꦥ꧀ꦥꦢꦺꦱꦺ ꦓꦁꦱꦶꦠꦛ꧀ꦜꦴꦤ’’ꦤ꧀ꦠꦶ. ꦈꦕ꧀ꦕꦴꦠꦶ ꦄꦤꦷꦕꦴ, ꦈꦧ꧀ꦧꦺꦣꦮꦤ꧀ꦠꦶꦪꦺꦴꦠꦶ ꦄꦠ꧀ꦡꦺꦴ. ꦏꦴꦭ꦳ꦴꦫꦶꦏꦴꦠꦶ ꦮꦶꦫꦭ꦳ꦢꦤ꧀ꦠꦴ, ꦮꦶꦱꦔ꧀ꦒꦠꦢꦤ꧀ꦠꦴꦠꦶ ꦄꦠ꧀ꦡꦺꦴ. ꦠꦺꦤꦴꦲ ‘‘ꦢꦤ꧀ꦠꦴꦤ’’ꦤ꧀ꦠꦶꦄꦴꦢꦶ. ꦏꦭ꦳ꦴꦫꦠꦴꦪꦴꦠꦶ ꦮꦶꦫꦭ꦳ꦠꦴꦪ. ꦄꦴꦫꦚ꧀ꦗꦶꦠꦴꦤꦷꦠꦶ ꦫꦚ꧀ꦗꦶꦠꦴꦤꦶ, ꦮꦶꦭꦶꦑꦶꦠꦴꦤꦷꦠꦶ ꦄꦠ꧀ꦡꦺꦴ. ꦏꦟꦺꦫꦸꦠꦴꦪꦴꦠꦶ ꦏꦸꦛꦸꦩꦭꦱꦟ꧀ꦜꦴꦤꦠꦴꦪ. ꦄꦪꦁ ꦮꦴꦠꦶ ꦌꦠ꧀ꦡ ꦮꦴ-ꦱꦢ꧀ꦢꦺꦴ ꦱꦁꦱꦪꦶꦠꦤꦶꦕ꧀ꦖꦪꦠ꧀ꦡꦺꦴ ꦪꦡꦴ ꦄꦚ꧀ꦚꦠ꧀ꦡꦴꦥꦶ ‘‘ꦄꦪꦁ ꦮꦴ ꦆꦩꦺꦱꦁ ꦱꦩꦟꦧ꧀ꦫꦴꦲ꧀ꦩꦟꦴꦤꦁ ꦱꦧ꧀ꦧꦧꦴꦭꦺꦴ ꦱꦧ꧀ꦧꦩꦹꦭ꦳꧀ꦲꦺꦴ’’ꦠꦶꦄꦴꦢꦷꦱꦸ (ꦢꦷ. ꦤꦶ. ꧑.꧑꧘꧑).

ꦤꦴꦒꦮꦤꦁ ꦮꦶꦪꦴꦠꦶ ꦩꦲꦴꦲꦠ꧀ꦡꦶꦤꦺꦴ ꦮꦴꦩꦤꦶꦏꦴꦢꦷꦤꦚ꧀ꦕ ꦥꦢꦢꦱ꧀ꦱꦤꦛ꧀ꦜꦴꦤꦨꦹꦠꦁ ꦤꦴꦒꦮꦤꦁ ꦮꦶꦪ. ꦄꦴꦢꦶꦠꦺꦴ ꦥꦛ꧀ꦜꦴꦪ ꦪꦴꦮ ꦤꦷꦮꦫꦟꦥ꧀ꦥꦲꦴꦤꦴ ꦣꦩ꧀ꦩꦢꦺꦱꦤꦴ ꦠꦡꦴꦒꦠꦱ꧀ꦱ ꦧꦴꦲꦶꦫꦥꦫꦶꦧ꧀ꦧꦴꦗꦏꦴꦢꦷꦤꦚ꧀ꦕ ꦥꦢꦢꦱ꧀ꦱꦤꦨꦴꦮꦠꦺꦴ. ꦄꦴꦢꦶꦠꦺꦴ ꦥꦛ꧀ꦜꦴꦪꦴꦠꦶ ꦕ ‘‘ꦠꦁ ꦱꦸꦟꦴꦲꦷ’’ꦠꦶ ꦥꦢꦠꦺꦴ ꦥꦛ꧀ꦜꦴꦪ. ꦏꦸꦱꦭꦺꦴ ꦤꦴꦒꦮꦤꦶꦏꦺꦴ ꦮꦶꦪ ꦪꦺꦴꦒꦴꦮꦕꦫꦺꦴ ꦥꦫꦶꦪꦺꦱꦤꦮꦱꦺꦤ ꦥꦩꦴꦟꦒ꧀ꦒꦲꦟꦠꦺꦴ. ꦩꦠ꧀ꦡꦏꦺ ꦜꦠ꧀ꦮꦴꦠꦶ ꦆꦩꦱ꧀ꦱ ꦱꦸꦠ꧀ꦠꦱ꧀ꦱ ꦥꦫꦶꦪꦺꦴꦱꦴꦤꦺ ꦜꦠ꧀ꦮꦴ. ꦆꦩꦱ꧀ꦩꦶꦩ꧀ꦥꦶ ꦜꦴꦤꦺꦠꦶ ‘‘ꦌꦮꦩꦺꦮ ꦑꦺꦴ ꦧ꧀ꦫꦴꦲ꧀ꦩꦟꦴ’’ꦠꦶꦄꦴꦢꦶꦤꦴ ꦈꦥꦩꦺꦪ꧀ꦪꦱ꧀ꦱ ꦄꦠ꧀ꦡꦱ꧀ꦱ ꦈꦥꦚ꧀ꦚꦴꦱꦤꦛ꧀ꦜꦴꦤꦺꦥꦶ.

ꦱ꧀ꦮꦴꦪꦤ꧀ꦠꦶ (ꦢꦷ. ꦤꦶ. ꦛꦷ. ꧑.꧑꧙꧐) ꦆꦣ-ꦱꦢ꧀ꦢꦩꦠ꧀ꦠꦁ ꦒꦟ꧀ꦲꦴꦠꦶ, ꦤ ꦪꦡꦴꦮꦶꦱꦺꦱꦶꦠꦧ꧀ꦧꦁ ꦆꦣ-ꦱꦢ꧀ꦢꦁ. ꦠꦡꦴ ꦲꦶ ꦮꦏ꧀ꦑꦠꦶ ‘‘ꦏꦠ꧀ꦡꦕꦶ ꦥꦢꦥꦹꦫꦟꦩꦠ꧀ꦠꦩꦺꦮꦴ’’ꦠꦶ. ꦭꦺꦴꦏꦁ ꦈꦥꦴꦢꦴꦪ ꦮꦸꦕ꧀ꦕꦠꦶ ꦭꦺꦴꦏ-ꦱꦢ꧀ꦢꦺꦤ ꦱꦩꦴꦤꦴꦣꦶꦏꦫꦟꦨꦴꦮꦺꦤ ꦮꦸꦠ꧀ꦠꦠ꧀ꦠꦴ. ꦱꦺꦱꦥꦢꦢ꧀ꦮꦪꦺ ꦥꦤ ꦱꦢ꧀ꦢꦤ꧀ꦠꦫꦱꦤ꧀ꦤꦶꦣꦴꦤꦩꦠ꧀ꦠꦺꦤ ꦠꦁ ꦠꦁ ꦈꦥꦴꦢꦴꦪ ꦮꦸꦠ꧀ꦠꦠꦴ ꦢꦛ꧀ꦜꦧ꧀ꦧꦴ. ꦎꦏꦴꦱꦤ꧀ꦠꦶ ꦏꦚ꧀ꦕꦶ ꦥꦢꦺꦱꦁ ꦆꦤ꧀ꦢꦱꦴꦭꦒꦸꦲꦴꦪ ꦄꦣꦶꦥ꧀ꦥꦺꦠꦠ꧀ꦠꦴ. ꦥꦢꦥꦹꦫꦟꦩꦠ꧀ꦠꦩꦺꦮ ꦎꦏꦴꦱꦴꦥꦢꦶꦱꦤꦱ꧀ꦱꦥꦶ ꦄꦱꦩ꧀ꦨꦮꦠꦺꦴ.

ꦠꦡꦴꦒꦠ-ꦱꦢ꧀ꦢꦴꦢꦷꦤꦁ ꦄꦠ꧀ꦡꦮꦶꦱꦺꦱꦺꦴ ꦩꦹꦭꦥꦫꦶꦪꦴꦪꦛ꧀ꦜꦏꦡꦴ(ꦩ. ꦤꦶ. ꦄꦛ꧀ꦜ. ꧑.꧑꧒) ꦮꦶꦱꦸꦢ꧀ꦣꦶꦩꦒ꧀ꦒꦱꦁꦮꦟ꧀ꦟꦤꦴꦱꦸ ꦮꦸꦠ꧀ꦠꦺꦴ ꦌꦮ. ꦠꦡꦴꦒꦠꦱ꧀ꦱ ꦱꦠ꧀ꦠꦤꦶꦏꦴꦪꦤ꧀ꦠꦺꦴꦒꦣꦠꦴꦪ ‘‘ꦆꦣ ꦥꦤ ꦱꦠ꧀ꦠꦭꦺꦴꦏꦺꦴ ꦄꦣꦶꦥ꧀ꦥꦺꦠꦺꦴ’’ꦠꦶ ꦮꦠ꧀ꦮꦴ ꦠꦠ꧀ꦡꦴꦪꦁ ꦪꦱ꧀ꦩꦶꦁ ꦱꦠ꧀ꦠꦤꦶꦏꦴꦪꦺ, ꦪꦱ꧀ꦩꦶꦚ꧀ꦕ ꦎꦏꦴꦱꦺ ꦈꦥ꧀ꦥꦗ꧀ꦗꦠꦶ, ꦠꦁ ꦢꦱ꧀ꦱꦺꦠꦸꦁ ‘‘ꦱꦠ꧀ꦠꦭꦺꦴꦏꦺ ꦈꦥ꧀ꦥꦗ꧀ꦗꦩꦴꦤꦺꦴꦥꦶ ꦕꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦠ꧀ꦡ ꦆꦩꦱ꧀ꦩꦶꦁꦪꦺꦮ ꦕꦏ꧀ꦏꦮꦴꦭ꦳ꦺꦠꦶ ꦆꦩꦶꦱ꧀ꦱꦴ ꦌꦮ ꦭꦺꦴꦏꦣꦴꦠꦸꦪꦴ. ‘‘ꦄꦛ꧀ꦜꦴꦤꦩꦺꦠꦁ, ꦨꦶꦏ꧀ꦑꦮꦺ, ꦄꦤꦮꦏꦴꦱꦺꦴ, ꦪꦁ ꦌꦏꦶꦱ꧀ꦱꦴ ꦭꦺꦴꦏꦣꦴꦠꦸꦪꦴ ꦢ꧀ꦮꦺ ꦄꦫꦲꦤ꧀ꦠꦺꦴ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ ꦄꦥꦸꦧ꧀ꦧꦁ ꦄꦕꦫꦶꦩꦁ ꦈꦥ꧀ꦥꦗ꧀ꦗꦺꦪ꧀ꦪꦸ’’ꦤ꧀ꦠꦶ (ꦢꦷ. ꦤꦶ. ꧓.꧑꧖꧑; ꦩ. ꦤꦶ. ꧓.꧑꧒꧙; ꦄ. ꦤꦶ. ꧑.꧒꧗꧘; ꦤꦺꦠ꧀ꦠꦶ. ꧕꧗; ꦩꦶ. ꦥ. ꧕.꧑.꧑) ꦌꦠ꧀ꦡ ꦗꦴꦠꦶꦑꦺꦠ꧀ꦠꦨꦹꦠꦴ ꦢꦱꦱꦲꦱ꧀ꦱꦶꦭꦺꦴꦏꦣꦴꦠꦸ ‘‘ꦌꦏꦶꦱ꧀ꦱꦴ ꦭꦺꦴꦏꦣꦴꦠꦸꦪꦴ’’ꦠꦶ ꦮꦸꦠ꧀ꦠꦴ. ꦆꦣ ꦥꦤ ꦆꦩꦁꦪꦺꦮ ꦭꦺꦴꦏꦣꦴꦠꦸꦁ ꦱꦤ꧀ꦣꦴꦪ ‘‘ꦆꦩꦱ꧀ꦩꦶꦁꦪꦺꦮ ꦕꦏ꧀ꦏꦮꦴꦭ꦳ꦺ’’ꦠꦶ ꦮꦸꦠ꧀ꦠꦁ. ꦠꦶꦱ꧀ꦱꦺꦴ ꦲꦶ ꦱꦔ꧀ꦒꦷꦠꦶꦪꦺꦴ ꦄꦴꦫꦸꦭ꦳꧀ꦲꦺ ꦠꦺꦥꦶꦛꦏꦺ ꦧꦸꦢ꧀ꦣꦮꦕꦤꦺ ꦮꦶꦱꦪꦑꦺꦠ꧀ꦠꦁ ꦄꦴꦟꦴꦑꦺꦠ꧀ꦠꦁ ꦗꦴꦠꦶꦑꦺꦠ꧀ꦠꦤ꧀ꦠꦶ ꦠꦶꦮꦶꦣꦺ ꦑꦺꦠ꧀ꦠꦺ ꦜꦥꦺꦠ꧀ꦮꦴ ꦆꦩꦁ ꦕꦏ꧀ꦏꦮꦴꦭ꦳ꦁ ꦄꦚ꧀ꦚꦱ꧀ꦩꦶꦁ ꦕꦏ꧀ꦏꦮꦴꦭ꦳ꦺ ꦧꦸꦢ꧀ꦣꦴ ꦈꦥ꧀ꦥꦗ꧀ꦗꦤ꧀ꦠꦷꦠꦶ ꦱꦸꦠ꧀ꦠꦁ ꦤꦠ꧀ꦡꦶ, ꦤ ꦈꦥ꧀ꦥꦗ꧀ꦗꦤ꧀ꦠꦷꦠꦶ ꦥꦤ ꦄꦠ꧀ꦡꦶ. ꦏꦡꦁ? ‘‘ꦤ ꦩꦺ ꦄꦴꦕꦫꦶꦪꦺꦴ ꦄꦠ꧀ꦡꦶ, ꦱꦢꦶꦱꦺꦴ ꦩꦺ ꦤ ꦮꦶꦗ꧀ꦗꦠꦶ (ꦩ. ꦤꦶ. ꧑.꧒꧘꧕; ꧒.꧓꧔꧑; ꦩꦲꦴꦮ. ꧑꧑; ꦏꦡꦴ. ꧔꧐꧕; ꦩꦶ. ꦥ. ꧔.꧕.꧑꧑), ꦌꦏꦺꦴꦩ꧀ꦲꦶ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ’’ꦠꦶ (ꦩ. ꦤꦶ. ꧑.꧒꧘꧕; ꧒.꧓꧔꧑; ꦏꦡꦴ. ꧔꧐꧕; ꦩꦲꦴꦮ. ꧑꧑) ꦌꦮꦩꦴꦢꦷꦤꦶ ꦆꦩꦶꦱ꧀ꦱꦴ ꦭꦺꦴꦏꦣꦴꦠꦸꦪꦴ ꦜꦠ꧀ꦮꦴ ꦮꦢꦤ꧀ꦠꦺꦤ ꦨꦒꦮꦠꦴ – ‘‘ꦏꦶꦁ ꦥꦤꦴꦮꦸꦱꦺꦴ, ꦱꦴꦫꦶꦥꦸꦠ꧀ꦠ, ꦄꦠ꧀ꦡꦺꦠꦫꦲꦶ ꦄꦚ꧀ꦚꦺꦴ ꦱꦩꦟꦺꦴ ꦮꦴ ꦧ꧀ꦫꦴꦲ꧀ꦩꦟꦺꦴ ꦮꦴ ꦨꦒꦮꦠꦴ ꦱꦩꦱꦩꦺꦴ ꦱꦩ꧀ꦧꦺꦴꦣꦶꦪꦤ꧀ꦠꦶ ꦌꦮꦁ ꦥꦸꦛ꧀ꦜꦴꦲꦁ, ꦨꦤ꧀ꦠꦺ, ꦤꦺꦴꦠꦶ ꦮꦢꦺꦪ꧀ꦪ’’ꦤ꧀ꦠꦶ ꦮꦠ꧀ꦮꦴ ꦠꦱ꧀ꦱ ꦏꦴꦫꦟꦁ ꦢꦱ꧀ꦱꦺꦠꦸꦁ – ‘‘ꦄꦛ꧀ꦜꦴꦤꦩꦺꦠꦁ ꦄꦤꦮꦏꦴꦱꦺꦴ, ꦪꦁ ꦌꦏꦶꦱ꧀ꦱꦴ ꦭꦺꦴꦏꦣꦴꦠꦸꦪꦴ ꦢ꧀ꦮꦺ ꦄꦫꦲꦤ꧀ꦠꦺꦴ ꦱꦩ꧀ꦩꦴꦱꦩ꧀ꦧꦸꦢ꧀ꦣꦴ’’ꦠꦶ ꦆꦩꦁ ꦱꦸꦠ꧀ꦠꦁ ꦢꦱ꧀ꦱꦺꦤ꧀ꦠꦺꦤ ꦣꦩ꧀ꦩꦱꦺꦤꦴꦥꦠꦶꦤꦴ ꦕ ꦧꦸꦢ꧀ꦣꦴꦤꦁ ꦈꦥ꧀ꦥꦠ꧀ꦠꦶꦛ꧀ꦜꦴꦤꦨꦹꦠꦁ ꦆꦩꦁ ꦭꦺꦴꦏꦣꦴꦠꦸꦁ ꦜꦥꦺꦠ꧀ꦮꦴ ꦄꦚ꧀ꦚꦠ꧀ꦡ ꦄꦤꦸꦥ꧀ꦥꦠ꧀ꦠꦶ ꦮꦸꦠ꧀ꦠꦴ ꦲꦺꦴꦠꦷꦠꦶ.

ꦱꦸꦗꦴꦠꦴꦪꦴꦠꦶꦄꦴꦢꦶꦤꦴ ꦮꦸꦠ꧀ꦠꦺꦱꦸ ꦕꦠꦹꦱꦸ ꦮꦶꦏꦥ꧀ꦥꦺꦱꦸ ꦥꦜꦩꦺꦴ ꦮꦶꦏꦥ꧀ꦥꦺꦴ ꦧꦸꦢ꧀ꦣꦨꦴꦮꦴꦪ ꦄꦴꦱꦤ꧀ꦤꦠꦫꦥꦛꦶꦥꦠ꧀ꦠꦶꦢꦱ꧀ꦱꦤꦮꦱꦺꦤ ꦮꦸꦠ꧀ꦠꦺꦴ. ꦄꦴꦱꦤ꧀ꦤꦠꦫꦴꦪ ꦲꦶ ꦥꦛꦶꦥꦠ꧀ꦠꦶꦪꦁ ꦜꦶꦠꦺꦴ ‘‘ꦈꦥ꧀ꦥꦗ꧀ꦗꦠꦷ’’ꦠꦶ ꦮꦸꦕ꧀ꦕꦠꦶ ꦈꦥ꧀ꦥꦴꦢꦱ꧀ꦱ ꦌꦏꦤ꧀ꦠꦶꦏꦠ꧀ꦠꦴ, ꦥꦒꦺꦮ ꦥꦛꦶꦥꦠ꧀ꦠꦶꦪꦴ ꦩꦠ꧀ꦡꦏꦺ ꦜꦶꦠꦺꦴ. ꦢꦸꦠꦶꦪꦺꦴ ꦧꦸꦢ꧀ꦣꦨꦴꦮꦴꦮꦲꦥꦧ꧀ꦧꦗ꧀ꦗꦠꦺꦴ ꦥꦛ꧀ꦜꦴꦪ ꦄꦴꦱꦤ꧀ꦤꦥꦛꦶꦥꦠ꧀ꦠꦶꦢꦱ꧀ꦱꦤꦮꦱꦺꦤ, ꦠꦠꦶꦪꦺꦴ ꦧꦸꦢ꧀ꦣꦏꦫꦣꦩ꧀ꦩꦥꦴꦫꦶꦥꦹꦫꦶꦠꦺꦴ ꦥꦛ꧀ꦜꦴꦪ ꦧꦸꦢ꧀ꦣꦨꦴꦮꦴꦪ ꦥꦛꦶꦥꦠ꧀ꦠꦶꦢꦱ꧀ꦱꦤꦮꦱꦺꦤ. ꦤ ꦲꦶ ꦩꦲꦴꦱꦠ꧀ꦠꦴꦤꦁ ꦠꦸꦱꦶꦠꦨꦮꦹꦥꦥꦠ꧀ꦠꦶꦠꦺꦴ ꦥꦛ꧀ꦜꦴꦪ ꦧꦺꦴꦣꦶꦱꦩ꧀ꦨꦴꦫꦱꦩ꧀ꦨꦫꦟꦁ ꦤꦴꦩ ꦄꦠ꧀ꦡꦶ. ꦕꦠꦸꦠ꧀ꦡꦺꦴ ꦧꦸꦢ꧀ꦣꦏꦫꦣꦩ꧀ꦩꦱꦩꦴꦫꦩ꧀ꦨꦠꦺꦴ ꦥꦛ꧀ꦜꦴꦪ. ꦧꦺꦴꦣꦶꦪꦴ ꦤꦶꦪꦠꦨꦴꦮꦴꦥꦠ꧀ꦠꦶꦠꦺꦴ ꦥꦨꦸꦠꦶ ꦲꦶ ꦮꦶꦚ꧀ꦚꦹꦲꦶ ‘‘ꦧꦸꦢ꧀ꦣꦺꦴ ꦈꦥ꧀ꦥꦗ꧀ꦗꦠꦷ’’ꦠꦶ ꦮꦠ꧀ꦠꦸꦁ ꦱꦏ꧀ꦏꦴ ꦈꦥ꧀ꦥꦴꦢꦱ꧀ꦱ ꦌꦏꦤ꧀ꦠꦶꦏꦠ꧀ꦠꦴ, ꦪꦡꦴ ꦥꦤ ‘‘ꦠꦶꦛ꧀ꦜꦤ꧀ꦠꦶ ꦥꦧ꧀ꦧꦠꦴ, ꦱꦤ꧀ꦢꦤ꧀ꦠꦶ ꦤꦢꦶꦪꦺꦴ’’ꦠꦶ ꦠꦶꦛ꧀ꦜꦤꦱꦤ꧀ꦢꦤꦏꦶꦫꦶꦪꦴꦤꦁ ꦄꦮꦶꦕ꧀ꦖꦺꦢꦩꦸꦥꦴꦢꦴꦪ ꦮꦠ꧀ꦠꦩꦴꦤꦥꦪꦺꦴꦒꦺꦴ, ꦌꦮꦁ ꦈꦥ꧀ꦥꦴꦢꦠ꧀ꦡꦴꦪ ꦥꦛꦶꦥꦗ꧀ꦗꦤꦏꦶꦫꦶꦪꦴꦪ ꦄꦮꦶꦕ꧀ꦖꦺꦢꦩꦸꦥꦴꦢꦴꦪ ꦕꦠꦹꦱꦸ ꦮꦶꦏꦥ꧀ꦥꦺꦱꦸ ‘‘ꦈꦥ꧀ꦥꦗ꧀ꦗꦠꦶ ꦤꦴꦩꦴ’’ꦠꦶ ꦮꦸꦠ꧀ꦠꦁ. ꦱꦧ꧀ꦧꦥꦜꦩꦁ ꦈꦥ꧀ꦥꦤ꧀ꦤꦨꦴꦮꦤ꧀ꦠꦶ ꦱꦧ꧀ꦧꦺꦲꦶ ꦈꦥꦫꦶ ꦮꦸꦕ꧀ꦕꦩꦴꦤꦺꦲꦶ ꦮꦶꦱꦺꦱꦺꦲꦶ ꦥꦜꦩꦁ ꦠꦡꦴꦒꦠꦱ꧀ꦱ ꦈꦥ꧀ꦥꦤ꧀ꦤꦠꦴꦱꦔ꧀ꦑꦴꦠꦁ ꦄꦠ꧀ꦡꦶꦠꦴꦮꦶꦱꦺꦱꦁ.

ꦱꦺꦴ ꦨꦒꦮꦴꦠꦶ (ꦄ. ꦤꦶ. ꦛꦷ. ꧒.꧓.꧖꧔) ꦪꦺꦴ ‘‘ꦠꦡꦴꦒꦠꦺꦴ ꦄꦫꦲ’’ꦤ꧀ꦠꦶꦄꦴꦢꦶꦤꦴ ꦏꦶꦠ꧀ꦠꦶꦠꦒꦸꦟꦺꦴ, ꦱꦺꦴ ꦨꦒꦮꦴ. ꦆꦩꦁ ꦭꦺꦴꦏꦤ꧀ꦠꦶ ꦤꦪꦶꦢꦁ ꦩꦲꦴꦗꦤꦱ꧀ꦱ ꦱꦩ꧀ꦩꦸꦑꦴꦩꦠ꧀ꦠꦁ ꦭꦺꦴꦏꦁ ꦱꦤ꧀ꦣꦴꦪ ꦮꦸꦠ꧀ꦠꦁ, ꦄꦡ ꦑꦺꦴ ꦄꦤꦮꦱꦺꦱꦁ ꦥꦫꦶꦪꦴꦢꦴꦪꦴꦠꦶ ꦢꦱ꧀ꦱꦺꦠꦸꦁ ‘‘ꦱꦢꦺꦮꦏ’’ꦤ꧀ꦠꦶꦄꦴꦢꦶ ꦮꦸꦠ꧀ꦠꦁ. ꦠꦺꦤꦴꦲ ‘‘ꦆꦢꦴꦤꦶ ꦮꦠ꧀ꦠꦧ꧀ꦧꦁ ꦤꦶꦢꦱ꧀ꦱꦺꦠꦷ’’ꦠꦶ. ꦥꦗꦴꦠꦠ꧀ꦠꦴꦠꦶ ꦪꦡꦴꦱꦏꦁ ꦏꦩ꧀ꦩꦏꦶꦭꦺꦱꦺꦲꦶ ꦤꦶꦧ꧀ꦧꦠ꧀ꦠꦠ꧀ꦠꦴ. ꦥꦚ꧀ꦕꦏꦴꦩꦴꦮꦕꦫꦢꦺꦮꦒ꧀ꦒꦲꦟꦁ ꦥꦴꦫꦶꦱꦺꦱꦚꦴꦪꦺꦤ ꦆꦠꦫꦺꦱꦁ ꦥꦢꦤ꧀ꦠꦫꦺꦲꦶ ꦱꦔ꧀ꦒꦲꦶꦠꦠ꧀ꦠꦴ. ꦱꦢꦺꦮꦏꦤ꧀ꦠꦶ ꦕ ꦄꦮꦪꦮꦺꦤ ꦮꦶꦒ꧀ꦒꦲꦺꦴ ꦱꦩꦸꦢꦴꦪꦺꦴ ꦱꦩꦴꦱꦠ꧀ꦡꦺꦴ. ꦖꦛ꧀ꦜꦏꦴꦩꦴꦮꦕꦫꦢꦺꦮꦒ꧀ꦒꦲꦟꦁ ꦥꦕ꧀ꦕꦴꦱꦠ꧀ꦠꦶꦚꦴꦪꦺꦤ. ꦠꦠ꧀ꦡ ꦲꦶ ꦱꦺꦴ ꦗꦴꦠꦺꦴ ꦠꦤ꧀ꦤꦶꦮꦴꦱꦷ ꦕ. ꦧ꧀ꦫꦲ꧀ꦩꦏꦴꦪꦶꦏꦴꦢꦶꦧ꧀ꦫꦲ꧀ꦩꦒ꧀ꦒꦲꦟꦤ꧀ꦠꦶ ꦌꦠ꧀ꦡꦴꦥꦶ ꦌꦱꦺꦮ ꦤꦪꦺꦴ. ꦥꦕ꧀ꦕꦠ꧀ꦡꦶꦏꦥꦕ꧀ꦕꦴꦩꦶꦠ꧀ꦠꦱꦩꦟꦧ꧀ꦫꦴꦲ꧀ꦩꦟꦒ꧀ꦒꦲꦟꦤ꧀ꦠꦶ ꦤꦶꦢꦱ꧀ꦱꦤꦩꦠ꧀ꦠꦩꦺꦠꦁ ꦄꦥꦕ꧀ꦕꦠ꧀ꦡꦶꦏꦴꦤꦁ ꦄꦱꦩꦶꦠꦴꦧꦴꦲꦶꦠꦥꦴꦥꦴꦤꦚ꧀ꦕ ꦱꦩꦟꦧ꧀ꦫꦴꦲ꧀ꦩꦟꦴꦤꦁ ꦱꦱ꧀ꦱꦩꦟꦧ꧀ꦫꦴꦲ꧀ꦩꦟꦶꦮꦕꦤꦺꦤ ꦒꦲꦶꦠꦠ꧀ꦠꦴ. ꦏꦴꦩꦁ ‘‘ꦱꦢꦺꦮꦏ’’ꦤ꧀ꦠꦶꦄꦴꦢꦶꦮꦶꦱꦺꦱꦤꦴꦤꦁ ꦮꦱꦺꦤ ꦱꦠ꧀ꦠꦮꦶꦱꦪꦺꦴ ꦭꦺꦴꦏ-ꦱꦢ꧀ꦢꦺꦴꦠꦶ ꦮꦶꦚ꧀ꦚꦴꦪꦠꦶ ꦠꦸꦭ꧀ꦪꦪꦺꦴꦒꦮꦶꦱꦪꦠ꧀ꦠꦴ ꦠꦺꦱꦁ, ‘‘ꦱꦭꦺꦴꦩꦏꦺꦴ ꦱꦥꦏ꧀ꦑꦏꦺꦴ’’ꦠꦶꦄꦴꦢꦷꦱꦸ ꦥꦤ ꦄꦠꦸꦭ꧀ꦪꦪꦺꦴꦒꦺꦥꦶ ꦄꦪꦁ ꦱꦩꦴꦱꦺꦴ ꦭꦧ꧀ꦨꦠꦷꦠꦶ ꦧ꧀ꦪꦨꦶꦕꦴꦫꦢꦱ꧀ꦱꦤꦠꦺꦴ ꦥꦗꦴꦒꦲꦟꦤ꧀ꦠꦶ ꦄꦴꦲ ‘‘ꦥꦗꦴꦮꦕꦤꦺꦤ ꦱꦠ꧀ꦠꦭꦺꦴꦏꦒ꧀ꦒꦲꦟ’’ꦤ꧀ꦠꦶ.

ꦄꦫꦹꦥꦶꦤꦺꦴ ꦱꦠ꧀ꦠꦴ ꦄꦠ꧀ꦠꦤꦺꦴ ꦄꦴꦤꦺꦚ꧀ꦗꦮꦶꦲꦴꦫꦺꦤ ꦮꦶꦲꦫꦤ꧀ꦠꦴ ‘‘ꦢꦶꦧ꧀ꦧꦤ꧀ꦠꦷꦠꦶ ꦢꦺꦮꦴ’’ꦠꦶ ꦆꦩꦁ ꦤꦶꦧ꧀ꦧꦕꦤꦁ ꦭꦨꦤ꧀ꦠꦷꦠꦶ ꦄꦴꦲ ‘‘ꦱꦢꦺꦮꦏꦒ꧀ꦒꦲꦟꦺꦤ ꦄꦫꦹꦥꦴꦮꦕꦫꦢꦺꦮꦭꦺꦴꦏꦺꦴ ꦒꦲꦶꦠꦺꦴ’’ꦠꦶ. ꦠꦺꦤꦺꦮꦴꦲ ‘‘ꦄꦴꦏꦴꦱꦴꦤꦚ꧀ꦕꦴꦪꦠꦤꦹꦥꦒꦴꦤꦁ ꦢꦺꦮꦴꦤꦁ ꦱꦲꦧ꧀ꦪꦠ’’ꦤ꧀ꦠꦶ (ꦄ. ꦤꦶ. ꧓.꧑꧑꧗). ꦱꦩꦴꦫꦏꦒ꧀ꦒꦲꦟꦺꦤ ꦖꦏꦴꦩꦴꦮꦕꦫꦢꦺꦮꦭꦺꦴꦏꦺꦴ ꦒꦲꦶꦠꦺꦴ ꦠꦱ꧀ꦱ ꦱꦮꦶꦱꦺꦱꦁ ꦩꦴꦫꦱ꧀ꦱ ꦮꦱꦺ ꦮꦠ꧀ꦠꦤꦠꦺꦴ. ꦫꦹꦥꦷ ꦧ꧀ꦫꦲ꧀ꦩꦭꦺꦴꦏꦺꦴ ꦒꦲꦶꦠꦺꦴ ꦄꦫꦹꦥꦷꦧ꧀ꦫꦲ꧀ꦩꦭꦺꦴꦏꦱ꧀ꦱ ꦮꦶꦱꦸꦁ ꦒꦲꦶꦠꦠ꧀ꦠꦴ. ꦕꦠꦸꦥꦫꦶꦱꦮꦱꦺꦤꦴꦠꦶ ꦑꦠ꧀ꦠꦶꦪꦴꦢꦶꦕꦠꦸꦥꦫꦶꦱꦮꦱꦺꦤ. ꦆꦠꦫꦴ ꦥꦤ ꦕꦠꦱ꧀ꦱꦺꦴ ꦥꦫꦶꦱꦴ ꦱꦩꦴꦫꦏꦴꦢꦶꦒ꧀ꦒꦲꦟꦺꦤ ꦒꦲꦶꦠꦴ ꦌꦮꦴꦠꦶ. ꦄꦮꦱꦺꦱꦱꦧ꧀ꦧꦱꦠ꧀ꦠꦭꦺꦴꦏꦺꦴ ꦤꦴꦒꦒꦫꦸꦭ꦳ꦴꦢꦶꦨꦺꦢꦺꦴ.

ꦌꦠ꧀ꦠꦴꦮꦠꦴ ꦨꦴꦒꦱꦺꦴ ꦭꦺꦴꦏꦁ ꦒꦲꦺꦠ꧀ꦮꦴ ꦪꦺꦴꦗꦤꦁ ꦢꦱ꧀ꦱꦺꦠ꧀ꦮꦴ ꦆꦢꦴꦤꦶ ꦠꦺꦤ ꦠꦺꦤ ꦮꦶꦱꦺꦱꦺꦤ ꦄꦨꦴꦒꦱꦺꦴꦮ ꦭꦺꦴꦏꦁ ꦒꦲꦺꦠ꧀ꦮꦴ ꦪꦺꦴꦗꦤꦁ ꦢꦱ꧀ꦱꦺꦠꦸꦁ ‘‘ꦄꦥꦶꦕꦺꦠ꧀ꦡꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦠ꧀ꦡ ꦈꦏ꧀ꦏꦛ꧀ꦜꦥꦫꦶꦕ꧀ꦖꦺꦢꦠꦺꦴꦠꦶ ꦈꦏ꧀ꦏꦁꦱꦒꦨꦶꦮꦶꦗꦴꦤꦤꦺꦤ. ꦥꦚ꧀ꦕꦱꦸ ꦲꦶ ꦒꦠꦷꦱꦸ ꦢꦺꦮꦭꦺꦴꦏꦺꦴꦮ ꦱꦺꦛ꧀ꦜꦺꦴ. ꦠꦠ꧀ꦡꦴꦥꦶ ꦄꦫꦹꦥꦶꦤꦺꦴ ‘‘ꦢꦹꦫꦱꦩꦸꦱ꧀ꦱꦴꦫꦶꦠꦏꦶꦭꦺꦱꦢꦸꦏ꧀ꦑꦠꦴꦪ, ꦱꦤ꧀ꦠꦥꦟꦷꦠꦄꦴꦤꦺꦚ꧀ꦗꦮꦶꦲꦴꦫꦱꦩꦔ꧀ꦒꦶꦠꦴꦪ, ꦄꦠꦶꦮꦶꦪ ꦢꦷꦓꦴꦪꦸꦏꦠꦴꦪꦴ’’ꦠꦶ ꦌꦮꦩꦴꦢꦷꦲꦶ ꦮꦶꦱꦺꦱꦺꦲꦶ ꦄꦠꦶꦮꦶꦪ ꦆꦠꦫꦺꦲꦶ ꦈꦏ꧀ꦏꦛ꧀ꦜꦴ. ꦧ꧀ꦫꦲ꧀ꦩꦴ ꦩꦲꦴꦤꦸꦨꦴꦮꦺꦴꦠꦶꦄꦴꦢꦶꦁ ꦢꦱꦱꦲꦱ꧀ꦱꦶꦪꦁ ꦩꦲꦴꦧ꧀ꦫꦲ꧀ꦩꦸꦤꦺꦴ ꦮꦱꦺꦤ ꦮꦢꦠꦶ. ‘‘ꦈꦏ꧀ꦏꦛ꧀ꦜꦥꦫꦶꦕ꧀ꦖꦺꦢꦠꦺꦴ’’ꦠꦶ ꦲꦶ ꦮꦸꦠ꧀ꦠꦁ. ꦄꦤꦸꦠ꧀ꦠꦫꦤ꧀ꦠꦶ ꦱꦺꦛ꧀ꦜꦁ ꦤꦮꦭꦺꦴꦏꦸꦠ꧀ꦠꦫꦁ. ꦨꦴꦮꦴꦤꦸꦏ꧀ꦏꦩꦺꦴ ꦨꦴꦮꦮꦱꦺꦤ ꦥꦫꦺꦱꦁ ꦄꦗ꧀ꦙꦴꦱꦪꦮꦱꦺꦤ ‘‘ꦱꦢꦺꦮꦏ’’ꦤ꧀ꦠꦶꦄꦴꦢꦷꦤꦁ ꦥꦢꦴꦤꦁ ꦄꦤꦸꦏ꧀ꦏꦩꦺꦴ. ꦠꦷꦲꦴꦏꦴꦫꦺꦲꦷꦠꦶ ꦢꦺꦮꦩꦴꦫꦧ꧀ꦫꦲ꧀ꦩꦱꦲꦶꦠꦠꦴꦱꦔ꧀ꦑꦴꦠꦺꦲꦶ ꦠꦷꦲꦶ ꦥꦏꦴꦫꦺꦲꦶ. ꦠꦷꦱꦸ ꦥꦢꦺꦱꦹꦠꦶ ‘‘ꦱꦢꦺꦮꦏ’’ꦤ꧀ꦠꦶꦄꦴꦢꦷꦱꦸ ꦠꦷꦱꦸ ꦥꦢꦺꦱꦸ. ꦠꦺꦤ ꦠꦺꦤꦴꦏꦴꦫꦺꦤꦴꦠꦶ ꦱꦢꦺꦮꦏꦠ꧀ꦠꦴꦢꦶꦤꦴ ꦠꦺꦤ ꦠꦺꦤ ꦥꦏꦴꦫꦺꦤ. ꦠꦺꦣꦴꦠꦸꦏꦩꦺꦮ ꦥꦫꦶꦪꦴꦢꦶꦤ꧀ꦤꦤ꧀ꦠꦶ ꦥꦺꦴꦫꦴꦟꦴ ꦥꦤꦴꦲꦹꦠꦶ ꦪꦺꦴꦗꦤꦴ.

ꦄꦨꦶꦚ꧀ꦚꦴꦠꦶ ꦪ-ꦏꦴꦫꦭꦺꦴꦥꦺꦤꦴꦪꦁ ꦤꦶꦢ꧀ꦢꦺꦱꦺꦴ, ꦄꦨꦶꦗꦴꦤꦶꦠ꧀ꦮꦴꦠꦶ ꦄꦪꦩꦺꦠ꧀ꦡ ꦄꦠ꧀ꦡꦺꦴꦠꦶ ꦄꦴꦲ ‘‘ꦄꦨꦶꦚ꧀ꦚꦴꦪ, ꦄꦣꦶꦏꦺꦤ ꦚꦴꦟꦺꦤ ꦚꦠ꧀ꦮꦴ’’ꦠꦶ. ꦄꦤꦸꦩꦴꦤꦴꦢꦶꦥꦛꦶꦏ꧀ꦑꦺꦥꦺꦴꦠꦶ ꦄꦤꦸꦩꦴꦤꦈꦥꦩꦴꦤꦄꦠ꧀ꦡꦴꦥꦠ꧀ꦠꦶꦄꦴꦢꦶꦥꦛꦶꦏ꧀ꦑꦺꦥꦺꦴ ꦌꦏꦥ꧀ꦥꦩꦴꦟꦠ꧀ꦠꦴ. ꦱꦧ꧀ꦧꦠ꧀ꦡ ꦄꦥ꧀ꦥꦛꦶꦲꦠꦚꦴꦟꦴꦕꦴꦫꦠꦴꦪ ꦲꦶ ꦱꦧ꧀ꦧꦥꦕ꧀ꦕꦏ꧀ꦑꦴ ꦧꦸꦢ꧀ꦣꦴ ꦨꦒꦮꦤ꧀ꦠꦺꦴ. ꦄꦤꦸꦠ꧀ꦠꦫꦁ ꦮꦶꦮꦺꦏꦱꦸꦑꦤ꧀ꦠꦶ ꦦꦭꦱꦩꦴꦥꦠ꧀ꦠꦶꦱꦸꦑꦁ. ꦠꦺꦤ ꦮꦷꦠꦶꦩꦶꦱ꧀ꦱꦴꦥꦶ ꦏꦢꦴꦕꦶ ꦨꦒꦮꦠꦺꦴ ꦣꦩ꧀ꦩꦢꦺꦱꦤꦴ ꦲꦺꦴꦠꦷꦠꦶ ꦄꦴꦲ ‘‘ꦲꦶꦠ꧀ꦮꦴꦥꦷ’’ꦠꦶ. ꦨꦒꦮꦴ ꦲꦶ ꦣꦩ꧀ꦩꦁ ꦢꦺꦱꦺꦤ꧀ꦠꦺꦴ ꦪꦱ꧀ꦩꦶꦁ ꦑꦟꦺ ꦥꦫꦶꦱꦴ ꦱꦴꦣꦸꦏꦴꦫꦁ ꦮꦴ ꦢꦺꦠꦶ, ꦪꦡꦴꦱꦸꦠꦁ ꦮꦴ ꦣꦩ꧀ꦩꦁ ꦥꦕ꧀ꦕꦮꦺꦏ꧀ꦑꦠꦶ, ꦠꦁ ꦑꦟꦁ ꦥꦸꦧ꧀ꦧꦨꦴꦒꦺꦤ ꦥꦫꦶꦕ꧀ꦖꦶꦤ꧀ꦢꦶꦠ꧀ꦮꦴ ꦦꦭꦱꦩꦴꦥꦠ꧀ꦠꦶꦁ ꦱꦩꦴꦥꦗ꧀ꦗꦠꦶ, ꦪꦡꦴꦥꦫꦶꦕ꧀ꦖꦺꦢꦚ꧀ꦕ ꦱꦩꦴꦥꦠ꧀ꦠꦶꦠꦺꦴ ꦮꦸꦛ꧀ꦜꦴꦪ ꦜꦶꦠꦛ꧀ꦜꦴꦤꦠꦺꦴ ꦥꦛ꧀ꦜꦴꦪ ꦣꦩ꧀ꦩꦁ ꦢꦺꦱꦺꦠꦶ.

ꦢꦺꦱꦏꦴꦪꦠ꧀ꦠꦺꦤ ꦄꦴꦟꦴꦢꦶꦮꦶꦣꦶꦤꦴ ꦄꦠꦶꦱꦗ꧀ꦗꦤꦁ ꦥꦧꦺꦴꦣꦤꦁ ꦢꦺꦱꦤꦴꦠꦶ ꦱꦴ ꦥꦫꦶꦪꦠ꧀ꦠꦶꦣꦩ꧀ꦩꦮꦱꦺꦤ ꦮꦺꦢꦶꦠꦧ꧀ꦧꦴꦠꦶ ꦄꦴꦲ ‘‘ꦢꦺꦱꦤꦴꦪ ꦠꦴꦮ ꦕꦠꦸꦥ꧀ꦥꦢꦶꦏꦴꦪꦥꦶ ꦒꦴꦡꦴꦪꦴ’’ꦠꦶꦄꦴꦢꦶ. ꦱꦴꦱꦶꦠꦧ꧀ꦧꦥꦸꦒ꧀ꦒꦭꦒꦠꦺꦤ ꦪꦡꦴꦥꦫꦴꦣꦴꦢꦶꦱꦴꦱꦶꦠꦧ꧀ꦧꦨꦴꦮꦺꦤ ꦄꦤꦸꦱꦴꦱꦤꦁ ꦠꦢꦔ꧀ꦒꦮꦶꦤꦪꦴꦢꦶꦮꦱꦺꦤ ꦮꦶꦤꦪꦤꦁ ꦱꦴꦱꦤꦤ꧀ꦠꦶ ꦠꦁ ꦥꦛꦶꦥꦠ꧀ꦠꦶꦣꦩ꧀ꦩꦮꦱꦺꦤ ꦮꦺꦢꦶꦠꦧ꧀ꦧꦤ꧀ꦠꦶ ꦄꦴꦲ ‘‘ꦱꦷꦭꦱꦩꦴꦣꦶꦮꦶꦥꦱ꧀ꦱꦤꦴ’’ꦠꦶꦄꦴꦢꦶ. ꦏꦸꦱꦭꦴꦤꦤ꧀ꦠꦶ ꦩꦒ꧀ꦒꦏꦸꦱꦭꦴꦤꦁ, ꦏꦸꦱꦭꦴꦤꦤ꧀ꦠꦶ ꦮꦴ ꦄꦤꦮꦗ꧀ꦗꦴꦤꦁ. ꦠꦺꦤ ꦦꦭꦣꦩ꧀ꦩꦴꦤꦩ꧀ꦥꦶ ꦱꦔ꧀ꦒꦲꦺꦴ ꦱꦶꦢ꧀ꦣꦺꦴ ꦲꦺꦴꦠꦶ. ꦄꦴꦢꦶꦨꦴꦮꦺꦴ ꦱꦷꦭꦢꦶꦛ꧀ꦜꦷꦤꦁ ꦠꦩ꧀ꦩꦹꦭꦏꦠ꧀ꦠꦴ ꦈꦠ꧀ꦠꦫꦶꦩꦤꦸꦱ꧀ꦱꦣꦩ꧀ꦩꦴꦤꦁ. ꦠꦱ꧀ꦩꦶꦁ ꦠꦱ꧀ꦩꦶꦁ ꦄꦠ꧀ꦡꦺ ꦏꦡꦴꦮꦣꦶꦱꦢ꧀ꦢꦥ꧀ꦥꦧꦤ꧀ꦣꦺꦴ ꦒꦴꦡꦴꦮꦱꦺꦤ ꦱꦸꦠ꧀ꦠꦮꦱꦺꦤ ꦕ ꦮꦮꦠ꧀ꦡꦶꦠꦺꦴ ꦥꦫꦶꦪꦠ꧀ꦠꦶꦣꦩ꧀ꦩꦺꦴ, ꦪꦺꦴ ꦆꦣꦺꦮ ‘‘ꦢꦺꦱꦤꦴ’’ꦠꦶ ꦮꦸꦠ꧀ꦠꦺꦴ. ꦠꦱ꧀ꦱ ꦥꦤ ꦄꦠ꧀ꦡꦺꦴ ꦮꦶꦱꦺꦱꦺꦤ ꦱꦷꦭꦴꦢꦶ ꦌꦮꦴꦠꦶ ꦄꦴꦲ ‘‘ꦨꦒꦮꦴ ꦲꦶ ꦣꦩ꧀ꦩꦁ ꦢꦺꦱꦺꦤ꧀ꦠꦺꦴ…ꦥꦺ… ꦤꦶꦧ꧀ꦧꦴꦤꦁ ꦢꦱ꧀ꦱꦺꦠꦷ’’ꦠꦶ. ꦠꦠ꧀ꦡ ꦱꦷꦭꦁ ꦢꦱ꧀ꦱꦺꦠ꧀ꦮꦴꦠꦶ ꦱꦷꦭꦒ꧀ꦒꦲꦟꦺꦤ ꦱꦱꦩ꧀ꦨꦴꦫꦁ ꦱꦷꦭꦁ ꦒꦲꦶꦠꦁ. ꦠꦡꦴ ꦩꦒ꧀ꦒꦒ꧀ꦒꦲꦟꦺꦤ ꦱꦱꦩ꧀ꦨꦴꦫꦺꦴ ꦩꦒ꧀ꦒꦺꦴꦠꦶ ꦠꦢꦸꦨꦪꦺꦤ ꦄꦤꦮꦱꦺꦱꦠꦺꦴ ꦥꦫꦶꦪꦠ꧀ꦠꦶꦄꦠ꧀ꦡꦁ ꦥꦫꦶꦪꦴꦢꦶꦪꦠꦶ. ꦠꦺꦤꦴꦠꦶ ꦱꦷꦭꦴꦢꦶꦢꦱ꧀ꦱꦤꦺꦤ. ꦄꦠ꧀ꦡꦮꦱꦺꦤ ꦲꦶ ꦆꦣ ꦢꦺꦱꦤꦴꦪ ꦄꦴꦢꦶꦏꦭ꧀ꦪꦴꦟꦴꦢꦶꦨꦴꦮꦺꦴ ꦄꦣꦶꦥ꧀ꦥꦺꦠꦺꦴ. ꦏꦡꦶꦏꦱꦟ꧀ꦜꦶꦠꦷꦠꦶ ꦏꦡꦶꦏꦱ꧀ꦱ ꦱꦟ꧀ꦜꦴꦤꦁ ꦏꦡꦤꦮꦱꦺꦤ ꦱꦩꦮꦛ꧀ꦜꦴꦤꦁ.

ꦤ ꦱꦺꦴ ꦱꦴꦠ꧀ꦡꦁ ꦢꦺꦱꦺꦠꦶ ꦤꦶꦪ꧀ꦪꦴꦤꦠ꧀ꦡꦮꦶꦫꦲꦠꦺꦴ ꦠꦱ꧀ꦱꦴ ꦢꦺꦱꦤꦴꦪ. ꦌꦏꦧ꧀ꦪꦚ꧀ꦗꦤꦴꦢꦶꦪꦸꦠ꧀ꦠꦴ ꦮꦴꦠꦶ ꦱꦶꦡꦶꦭꦴꦢꦶꦨꦺꦢꦺꦱꦸ ꦧ꧀ꦪꦚ꧀ꦗꦤꦺꦱꦸ ꦌꦏꦥ꧀ꦥꦏꦴꦫꦺꦤꦺꦮ, ꦢ꧀ꦮꦶꦥ꧀ꦥꦏꦴꦫꦺꦤꦺꦮ ꦮꦴ ꦧ꧀ꦪꦚ꧀ꦗꦤꦺꦤ ꦪꦸꦠ꧀ꦠꦴ ꦮꦴ ꦢꦩꦶꦭ꦳ꦨꦴꦱꦴ ꦮꦶꦪ. ꦱꦧ꧀ꦧꦠ꧀ꦡ ꦤꦶꦫꦺꦴꦛ꧀ꦜꦁ ꦏꦠ꧀ꦮꦴ ꦮꦠ꧀ꦠꦧ꧀ꦧꦠꦴꦪ ꦱꦧ꧀ꦧꦤꦶꦫꦺꦴꦛ꧀ꦜꦧ꧀ꦪꦚ꧀ꦗꦤꦴ ꦮꦴ ꦏꦶꦫꦴꦠꦨꦴꦱꦴ ꦮꦶꦪ. ꦱꦧ꧀ꦧꦠ꧀ꦡꦺꦮ ꦮꦶꦱ꧀ꦱꦗ꧀ꦗꦤꦷꦪꦪꦸꦠ꧀ꦠꦠꦴꦪ ꦱꦧ꧀ꦧꦮꦶꦱ꧀ꦱꦛ꧀ꦜꦧ꧀ꦪꦚ꧀ꦗꦤꦴ ꦮꦴ ꦪꦮꦤꦨꦴꦱꦴ ꦮꦶꦪ. ꦱꦧ꧀ꦧꦠ꧀ꦡꦺꦮ ꦱꦴꦤꦸꦱꦴꦫꦠꦴꦪ ꦱꦧ꧀ꦧꦤꦶꦒ꧀ꦒꦲꦶꦠꦧ꧀ꦪꦚ꧀ꦗꦤꦴ ꦮꦴ ꦥꦴꦫꦱꦶꦏꦴꦢꦶꦩꦶꦭꦏ꧀ꦑꦨꦴꦱꦴ ꦮꦶꦪ. ꦱꦧ꧀ꦧꦴꦥꦺꦱꦴ ꦌꦏꦢꦺꦱꦧ꧀ꦪꦚ꧀ꦗꦤꦮꦱꦺꦤꦺꦮ ꦥꦮꦠ꧀ꦠꦶꦪꦴ ꦄꦥꦫꦶꦥꦸꦟ꧀ꦟꦧ꧀ꦪꦚ꧀ꦗꦤꦴꦠꦶ ꦏꦠ꧀ꦮꦴ ‘‘ꦄꦧ꧀ꦪꦚ꧀ꦗꦤꦴ’’ꦠꦶ ꦮꦸꦠ꧀ꦠꦴ. ꦄꦩꦏ꧀ꦑꦺꦠ꧀ꦮꦴꦠꦶ ꦄꦥꦭꦶꦕ꧀ꦖꦺꦠ꧀ꦮꦴ ꦄꦮꦶꦤꦴꦱꦺꦠ꧀ꦮꦴ, ꦄꦲꦴꦥꦺꦠ꧀ꦮꦴꦠꦶ ꦮꦴ ꦄꦠ꧀ꦡꦺꦴ.

ꦨꦒꦮꦴ ꦪꦩꦠ꧀ꦡꦁ ꦚꦴꦥꦺꦠꦸꦁ ꦌꦏꦒꦴꦡꦩ꧀ꦥꦶ ꦌꦏꦮꦴꦏ꧀ꦪꦩ꧀ꦥꦶ ꦢꦺꦱꦺꦠꦶ, ꦠꦩꦠ꧀ꦡꦁ ꦠꦴꦪ ꦢꦺꦱꦤꦴꦪ ꦱꦧ꧀ꦧꦱꦺꦴ ꦥꦫꦶꦥꦸꦟ꧀ꦟꦩꦺꦮ ꦏꦠ꧀ꦮꦴ ꦢꦺꦱꦺꦠꦶ, ꦌꦮꦁ ꦱꦧ꧀ꦧꦠ꧀ꦡꦴꦠꦶ ꦄꦴꦲ ‘‘ꦌꦏꦢꦺꦱꦤꦴꦥꦶ ꦄꦥꦫꦶꦥꦸꦟ꧀ꦟꦴ ꦤꦠ꧀ꦡꦷ’’ꦠꦶ. ꦈꦭ꧀ꦭꦸꦩ꧀ꦥꦤꦱꦨꦴꦮꦱꦟ꧀ꦜꦶꦠꦺꦤꦴꦠꦶ ꦱꦁꦏꦶꦭꦺꦱꦥꦏ꧀ꦑꦠꦺꦴ ꦮꦛ꧀ꦛꦢꦸꦏ꧀ꦑꦠꦺꦴ ꦕ ꦈꦢ꧀ꦣꦫꦟꦱꦨꦴꦮꦴꦮꦛ꧀ꦜꦶꦠꦺꦤ ꦕꦶꦠ꧀ꦠꦺꦤ. ꦠꦱ꧀ꦩꦴꦠꦶ ꦪꦱ꧀ꦩꦴ ꦱꦶꦏ꧀ꦑꦴꦠ꧀ꦠꦪꦱꦔ꧀ꦒꦲꦁ ꦱꦏꦭꦁ ꦱꦴꦱꦤꦁ ꦆꦣ ‘‘ꦧ꧀ꦫꦲ꧀ꦩꦕꦫꦶꦪ’’ꦤ꧀ꦠꦶ ꦄꦣꦶꦥ꧀ꦥꦺꦠꦁ, ꦠꦱ꧀ꦩꦴ. ꦧ꧀ꦫꦲ꧀ꦩꦕꦫꦶꦪꦤ꧀ꦠꦶ ꦆꦩꦶꦤꦴ ꦱꦩꦴꦤꦴꦣꦶꦏꦫꦟꦴꦤꦶ ꦱꦧ꧀ꦧꦥꦢꦴꦤꦶ ꦪꦺꦴꦗꦺꦠ꧀ꦮꦴ ꦄꦠ꧀ꦡꦁ ꦢꦱ꧀ꦱꦺꦤ꧀ꦠꦺꦴ ‘‘ꦱꦺꦴ ꦣꦩ꧀ꦩꦁ ꦢꦺꦱꦺꦠꦶ…ꦥꦺ… ꦥꦏꦴꦱꦺꦠꦷꦠꦶ ꦌꦮꦩꦺꦠ꧀ꦡ ꦄꦠ꧀ꦡꦺꦴ ꦢꦛ꧀ꦜꦧ꧀ꦧꦺꦴ’’ꦠꦶ ꦄꦴꦲ.

ꦢꦹꦫꦱꦩꦸꦱ꧀ꦱꦴꦫꦶꦠꦩꦴꦤꦱ꧀ꦱꦺꦮ ꦱꦴꦱꦤꦺ ꦱꦩ꧀ꦩꦴꦥꦛꦶꦥꦠ꧀ꦠꦶ ꦱꦩ꧀ꦨꦮꦠꦶ, ꦤ ꦩꦴꦤ ꦗꦴꦠꦶꦏꦱ꧀ꦱꦴꦠꦶ ꦄꦴꦲ ‘‘ꦤꦶꦲꦠꦩꦴꦤꦠ꧀ꦠꦴ’’ꦠꦶ. ꦈꦱ꧀ꦱꦤ꧀ꦤꦠ꧀ꦠꦴꦠꦶ ꦧꦲꦸꦭꦨꦴꦮꦠꦺꦴ. ꦨꦺꦴꦒꦴꦫꦺꦴꦒ꧀ꦪꦴꦢꦶꦮꦠ꧀ꦡꦸꦏꦴ ꦩꦢꦴ ꦱꦸꦥ꧀ꦥꦲꦺꦪ꧀ꦪꦴ ꦲꦺꦴꦤ꧀ꦠꦶ ꦤꦶꦩꦶꦠ꧀ꦠꦱ꧀ꦱ ꦄꦤꦮꦛ꧀ꦜꦴꦤꦠꦺꦴ’ ꦤ ꦠꦡꦴ ꦏꦸꦭꦮꦶꦗ꧀ꦗꦴꦩꦢꦴꦠꦶ ꦑꦠ꧀ꦠꦶꦪꦧ꧀ꦫꦴꦲ꧀ꦩꦟꦏꦸꦭꦷꦤꦴꦤꦁ ꦥꦧ꧀ꦧꦗꦶꦠꦴꦤꦩ꧀ꦥꦶ ꦗꦴꦠꦶꦮꦶꦗ꧀ꦗꦴ ꦤꦶꦱ꧀ꦱꦴꦪ ꦩꦴꦤꦗꦥ꧀ꦥꦤꦁ ꦢꦸꦥ꧀ꦥꦗꦲꦤ꧀ꦠꦶ ꦄꦴꦲ ‘‘ꦪꦺꦨꦸꦪ꧀ꦪꦺꦤ ꦲꦶ…ꦥꦺ… ꦩꦴꦤꦁ ꦏꦫꦺꦴꦤ꧀ꦠꦷ’’ꦠꦶ. ꦮꦶꦗꦴꦠꦶꦠꦴꦪꦴꦠꦶ ꦤꦶꦲꦷꦤꦗꦴꦠꦶꦠꦴꦪ. ꦥꦠꦶꦛ꧀ꦜꦴꦠꦸꦁ ꦤ ꦱꦏ꧀ꦏꦺꦴꦤ꧀ꦠꦷꦠꦶ ꦱꦸꦮꦶꦱꦸꦢ꧀ꦣꦶꦁ ꦏꦠ꧀ꦮꦴ ꦱꦷꦭꦁ ꦫꦏ꧀ꦑꦶꦠꦸꦁ ꦤ ꦱꦏ꧀ꦏꦺꦴꦤ꧀ꦠꦶ. ꦱꦷꦭꦮꦱꦺꦤ ꦲꦶ ꦱꦴꦱꦤꦺ ꦥꦠꦶꦛ꧀ꦜꦴꦠꦶ. ꦥꦠꦶꦛ꧀ꦜꦴꦠꦸꦤ꧀ꦠꦶ ꦮꦴ ꦱꦕ꧀ꦕꦥꦛꦶꦮꦺꦣꦺꦤ ꦭꦺꦴꦏꦸꦠ꧀ꦠꦫꦴꦪ ꦥꦠꦶꦛ꧀ꦜꦴꦪ ꦥꦠꦶꦛ꧀ꦜꦴꦠꦸꦁ. ꦪꦺꦨꦸꦪ꧀ꦪꦺꦤ ꦲꦶ ꦈꦥꦤꦶꦱ꧀ꦱꦪꦱꦩ꧀ꦥꦤ꧀ꦤꦴ ꦱꦸꦗꦴꦠꦴ ꦌꦮ ꦲꦺꦴꦤ꧀ꦠꦶ, ꦤ ꦢꦸꦗ꧀ꦗꦴꦠꦴ.

ꦥꦫꦶꦱꦸꦢ꧀ꦣꦤ꧀ꦠꦶ ꦫꦴꦒꦴꦢꦷꦤꦁ ꦄꦕ꧀ꦕꦤ꧀ꦠꦩꦺꦮ ꦥꦲꦴꦤꦢꦷꦥꦤꦠꦺꦴ ꦤꦶꦫꦸꦥꦏ꧀ꦏꦶꦭꦺꦱꦠꦴꦪ ꦱꦧ꧀ꦧꦱꦺꦴ ꦮꦶꦱꦸꦢ꧀ꦣꦁ. ꦱꦢ꧀ꦣꦁ ꦥꦛꦶꦭꦨꦠꦷꦠꦶ ꦥꦺꦴꦡꦸꦗ꧀ꦗꦤꦶꦏꦱꦢ꧀ꦣꦴꦮꦱꦺꦤ ꦱꦢ꧀ꦢꦲꦠꦶ. ꦮꦶꦚ꧀ꦚꦸꦗꦴꦠꦶꦏꦴꦤꦚ꧀ꦲꦶ ꦣꦩ꧀ꦩꦱꦩ꧀ꦥꦠ꧀ꦠꦶꦒꦲꦟꦥꦸꦧ꧀ꦧꦶꦏꦴ ꦱꦢ꧀ꦣꦴꦱꦶꦢ꧀ꦣꦶ ꦣꦩ꧀ꦩꦥꦩꦴꦟꦣꦩ꧀ꦩꦥ꧀ꦥꦱꦤ꧀ꦤꦨꦴꦮꦠꦺꦴ. ꦗꦴꦪꦩ꧀ꦥꦠꦶꦏꦴ ꦮꦱꦤ꧀ꦠꦷꦠꦶ ꦏꦴꦩꦁ ‘‘ꦗꦴꦪꦩ꧀ꦥꦠꦶꦏꦴ’’ꦠꦶ ꦮꦸꦠ꧀ꦠꦺ ꦓꦫꦱꦴꦩꦶꦏꦓꦫꦱꦴꦩꦶꦤꦶꦮꦱꦺꦤ ꦢ꧀ꦮꦶꦤ꧀ꦤꦁꦪꦺꦮ ꦒꦲꦟꦁ ꦮꦶꦚ꧀ꦚꦴꦪꦠꦶ. ꦪꦱ꧀ꦱ ꦥꦤ ꦥꦸꦫꦶꦱꦱ꧀ꦱ ꦄꦤꦺꦏꦴ ꦥꦗꦴꦥꦠꦶꦪꦺꦴ ꦲꦺꦴꦤ꧀ꦠꦶ, ꦠꦠ꧀ꦡ ꦏꦶꦁ ꦮꦠ꧀ꦠꦧ꧀ꦧꦁ? ꦌꦏꦴꦪꦥꦶ ꦠꦴꦪ ꦮꦴꦱꦺꦴ ꦱꦩ꧀ꦧꦴꦣꦺꦴꦠꦶ ꦢꦱ꧀ꦱꦤꦠ꧀ꦡꦁ ‘‘ꦢ꧀ꦮꦺ’’ꦠꦶ ꦮꦸꦠ꧀ꦠꦁ. ꦫꦴꦒꦴꦢꦶꦤꦴ ꦱꦏꦶꦚ꧀ꦕꦤꦛ꧀ꦜꦺꦤ, ꦑꦺꦠ꧀ꦠꦮꦠ꧀ꦡꦸꦄꦴꦢꦶꦤꦴ ꦱꦥꦭꦶꦧꦺꦴꦣꦛ꧀ꦜꦺꦤ. ꦫꦴꦒꦫꦗꦴꦢꦷꦤꦁ ꦄꦴꦒꦩꦤꦥꦡꦠꦴꦥꦶ ꦈꦥ꧀ꦥꦗ꧀ꦗꦤꦛ꧀ꦜꦴꦤꦠꦴ ꦌꦮꦴꦠꦶ ꦢ꧀ꦮꦺꦥꦶ ꦮꦟ꧀ꦟꦤꦴ ꦌꦏꦠ꧀ꦡꦴ, ꦧ꧀ꦪꦚ꧀ꦗꦤꦩꦺꦮ ꦤꦴꦤꦁ. ꦄꦭꦒ꧀ꦒꦤꦛ꧀ꦜꦺꦤꦴꦠꦶ ꦄꦱꦗ꧀ꦗꦤꦛ꧀ꦜꦺꦤ ꦄꦥ꧀ꦥꦛꦶꦧꦢ꧀ꦣꦨꦴꦮꦺꦤ. ꦌꦮꦁ ꦄꦏꦸꦱꦭꦏꦸꦱꦭꦥ꧀ꦥꦮꦠ꧀ꦠꦷꦤꦁ ꦜꦴꦤꦨꦴꦮꦺꦤ ꦓꦫꦴꦮꦴꦱꦥꦧ꧀ꦧꦗ꧀ꦗꦴꦤꦁ ꦱꦩ꧀ꦧꦴꦣꦧ꧀ꦨꦺꦴꦏꦴꦱꦠꦁ ꦢꦱ꧀ꦱꦺꦠ꧀ꦮꦴ ꦆꦢꦴꦤꦶ ꦏꦸꦱꦭꦥ꧀ꦥꦮꦠ꧀ꦠꦶꦪꦴ ꦌꦮ ꦄꦛ꧀ꦜꦴꦤꦜꦴꦤꦨꦴꦮꦺꦤ ꦠꦺꦱꦁ ꦠꦁ ꦢꦱ꧀ꦱꦺꦠꦸꦁ ‘‘ꦄꦥꦶꦕꦴ’’ꦠꦶꦄꦴꦢꦶ ꦮꦸꦠ꧀ꦠꦁ.

ꦱꦔ꧀ꦑꦺꦥꦏꦡꦴꦠꦶ ꦮꦶꦱꦸꦁ ꦮꦶꦱꦸꦁ ꦥꦢꦸꦢ꧀ꦣꦴꦫꦁ ꦄꦏꦠ꧀ꦮꦴ ꦱꦔ꧀ꦑꦺꦥꦠꦺꦴ ꦄꦠ꧀ꦡꦮꦟ꧀ꦟꦤꦴ. ꦌꦏꦩ꧀ꦥꦶ ꦢꦶꦮꦱꦤ꧀ꦠꦶ ꦌꦏꦢꦶꦮꦱꦩꦠ꧀ꦠꦩ꧀ꦥꦶ. ꦄꦑꦟ꧀ꦝꦁ ꦏꦠ꧀ꦮꦴꦠꦶ ꦢꦸꦏ꧀ꦏꦛꦩꦠ꧀ꦠꦱ꧀ꦱꦥꦶ ꦄꦤꦴꦥꦗ꧀ꦗꦤꦺꦤ ꦄꦑꦟ꧀ꦝꦶꦠꦁ ꦏꦠ꧀ꦮꦴ. ꦏꦶꦭꦺꦱꦩꦭꦺꦤ ꦄꦩꦭꦷꦤꦤ꧀ꦠꦶ ꦠꦟ꧀ꦲꦴꦱꦁꦏꦶꦭꦺꦱꦴꦢꦶꦮꦱꦺꦤ ꦄꦱꦁꦏꦶꦭꦶꦛ꧀ꦜꦁ ꦏꦠ꧀ꦮꦴ. ꦥꦫꦶꦢꦲꦶꦠ꧀ꦮꦴꦠꦶ ꦤꦶꦮꦴꦱꦺꦠ꧀ꦮꦴ ꦕꦺꦮ ꦥꦴꦫꦸꦥꦶꦠ꧀ꦮꦴ ꦕ. ꦄꦒꦴꦫꦮꦴꦱꦺꦴ ꦄꦒꦴꦫꦁ ꦈꦠ꧀ꦠꦫꦥꦢꦭꦺꦴꦥꦺꦤ, ꦠꦱ꧀ꦱ ꦮꦝ꧀ꦞꦶꦄꦴꦮꦲꦁ ꦄꦒꦴꦫꦱ꧀ꦱ ꦲꦶꦠꦁ. ꦨꦺꦴꦒꦏ꧀ꦑꦤ꧀ꦣꦺꦴꦠꦶ ꦨꦺꦴꦒꦫꦴꦱꦶ ꦨꦺꦴꦒꦱꦩꦸꦢꦴꦪꦺꦴ. ꦄꦴꦧꦤ꧀ꦣꦤꦛ꧀ꦜꦺꦤꦴꦠꦶ ‘‘ꦥꦸꦠ꧀ꦠꦺꦴ ꦤꦠ꧀ꦠꦴ’’ꦠꦶꦄꦴꦢꦶꦤꦴ ꦥꦺꦩꦮꦱꦺꦤ ꦱꦥꦫꦶꦕ꧀ꦖꦺꦢꦁ ꦱꦩ꧀ꦧꦤ꧀ꦣꦤꦛ꧀ꦜꦺꦤ. ‘‘ꦄꦩ꧀ꦲꦴꦏꦩꦺꦠꦺ’’ꦠꦶ ꦚꦴꦪꦤ꧀ꦠꦷꦠꦶ ꦚꦴꦠꦷ. ꦥꦶꦠꦴꦩꦲꦥꦶꦠꦸꦥꦸꦠ꧀ꦠꦴꦢꦶꦮꦱꦺꦤ ꦥꦫꦶꦮꦠ꧀ꦠꦤꦛ꧀ꦜꦺꦤ ꦥꦫꦶꦮꦛ꧀ꦛꦺꦴ.

꧒꧙꧒. ꦱꦴꦩꦚ꧀ꦚꦮꦴꦕꦷꦥꦶ ꦱꦶꦏ꧀ꦑꦴ-ꦱꦢ꧀ꦢꦺꦴ ꦱꦴꦗꦷꦮ-ꦱꦢ꧀ꦢꦱꦤ꧀ꦤꦶꦣꦴꦤꦠꦺꦴ ꦈꦥꦫꦶ ꦮꦸꦕ꧀ꦕꦩꦴꦤꦮꦶꦱꦺꦱꦴꦥꦺꦏ꧀ꦑꦴꦪ ꦕ ꦮꦶꦱꦺꦱꦤꦶꦮꦶꦛ꧀ꦜꦺꦴꦮ ꦲꦺꦴꦠꦷꦠꦶ ꦮꦸꦠ꧀ꦠꦁ ‘‘ꦪꦴ ꦨꦶꦏ꧀ꦑꦹꦤꦁ ꦄꦣꦶꦱꦷꦭꦱꦔ꧀ꦑꦴꦠꦴ ꦱꦶꦏ꧀ꦑꦴ’’ꦠꦶ. ꦱꦶꦏ꧀ꦑꦶꦠꦧ꧀ꦧꦛ꧀ꦜꦺꦤ ꦱꦶꦏ꧀ꦑꦴ. ꦱꦲ ꦄꦴꦗꦷꦮꦤ꧀ꦠꦶ ꦌꦠ꧀ꦡꦴꦠꦶ ꦱꦴꦗꦷꦮꦺꦴ. ꦱꦶꦏ꧀ꦑꦤꦨꦴꦮꦺꦤꦴꦠꦶ ꦱꦶꦏ꧀ꦑꦴꦪ ꦱꦴꦗꦷꦮꦺ ꦕ ꦱꦶꦏ꧀ꦑꦤꦨꦴꦮꦺꦤ. ꦱꦶꦏ꧀ꦑꦁ ꦥꦫꦶꦥꦹꦫꦺꦤ꧀ꦠꦺꦴꦠꦶ ꦱꦷꦭꦱꦁꦮꦫꦁ ꦥꦫꦶꦥꦹꦫꦺꦤ꧀ꦠꦺꦴ. ꦱꦴꦗꦷꦮꦚ꧀ꦕ ꦄꦮꦷꦠꦶꦏ꧀ꦏꦩꦤ꧀ꦠꦺꦴꦠꦶ – ‘‘ꦤꦴꦩꦏꦴꦪꦺꦴ ꦥꦢꦏꦴꦪꦺꦴ ꦤꦶꦫꦸꦠ꧀ꦠꦶꦏꦴꦪꦺꦴ ꦧ꧀ꦪꦚ꧀ꦗꦤꦏꦴꦪꦺꦴ’’ꦠꦶ (ꦥꦴꦫꦴ. ꦄꦛ꧀ꦜ. ꧓꧙) ꦮꦸꦠ꧀ꦠꦱꦶꦏ꧀ꦑꦴꦥꦢꦁ ꦨꦒꦮꦠꦺꦴ ꦮꦕꦤꦁ ꦄꦮꦷꦠꦶꦏ꧀ꦏꦩꦤ꧀ꦠꦺꦴ ꦲꦸꦠ꧀ꦮꦴꦠꦶ ꦄꦠ꧀ꦡꦺꦴ. ꦆꦢꦩꦺꦮ ꦕ ꦢ꧀ꦮꦪꦁ ‘‘ꦱꦶꦏ꧀ꦑꦤ’’ꦤ꧀ꦠꦶ ꦮꦸꦠ꧀ꦠꦁ. ꦠꦠ꧀ꦡ ꦱꦴꦗꦷꦮꦴꦤꦠꦶꦏ꧀ꦏꦩꦺꦴ ꦱꦶꦏ꧀ꦑꦴꦥꦴꦫꦶꦥꦹꦫꦶꦪꦴ ꦥꦕ꧀ꦕꦪꦺꦴ. ꦠꦠꦺꦴ ꦲꦶ ꦪꦴꦮ ꦩꦒ꧀ꦒꦴ ꦱꦶꦏ꧀ꦑꦴꦥꦴꦫꦶꦥꦹꦫꦷ ꦲꦺꦴꦠꦷꦠꦶ.

ꦥꦗꦲꦶꦠ꧀ꦮꦴꦠꦶ ꦱꦩꦴꦢꦴꦤꦮꦱꦺꦤ ꦥꦫꦶꦕ꧀ꦕꦗꦶꦠ꧀ꦮꦴ. ꦥꦲꦷꦤꦏꦴꦭꦠꦺꦴ ꦥꦛ꧀ꦜꦴꦪ…ꦥꦺ… ꦮꦶꦫꦠꦺꦴꦮꦴꦠꦶ ꦌꦠꦺꦤ ꦥꦲꦴꦤꦱ꧀ꦱ ꦮꦶꦫꦠꦶꦪꦴ ꦕ ꦱꦩꦴꦤꦏꦴꦭꦠꦁ ꦢꦱ꧀ꦱꦺꦠꦶ. ꦪꦢꦶ ꦌꦮꦁ ‘‘ꦥꦲꦴꦪꦴ’’ꦠꦶ ꦏꦡꦁ ꦥꦸꦫꦶꦩꦏꦴꦭꦤꦶꦢ꧀ꦢꦺꦱꦺꦴꦠꦶ? ꦠꦡꦴ ꦒꦲꦺꦠꦧ꧀ꦧꦠꦁ ꦈꦥꦴꦢꦴꦪ. ꦣꦩ꧀ꦩꦴꦤꦚ꧀ꦲꦶ ꦥꦕ꧀ꦕꦪꦥꦕ꧀ꦕꦪꦸꦥ꧀ꦥꦤ꧀ꦤꦨꦴꦮꦺ ꦄꦥꦺꦏ꧀ꦑꦶꦠꦺ ꦱꦲꦗꦴꦠꦴꦤꦩ꧀ꦥꦶ ꦥꦕ꧀ꦕꦪꦥꦕ꧀ꦕꦪꦸꦥ꧀ꦥꦤ꧀ꦤꦨꦴꦮꦺꦤ ꦒꦲꦟꦁ ꦥꦸꦫꦶꦩꦥꦕ꧀ꦖꦶꦩꦨꦴꦮꦺꦤꦺꦮ ꦲꦺꦴꦠꦷꦠꦶ ꦒꦲꦟꦥꦮꦠ꧀ꦠꦶꦄꦴꦏꦴꦫꦮꦱꦺꦤ ꦥꦕ꧀ꦕꦪꦨꦹꦠꦺꦱꦸ ꦲꦶꦫꦺꦴꦠ꧀ꦠꦥ꧀ꦥꦚꦴꦟꦴꦢꦷꦱꦸ ꦥꦲꦴꦤꦏꦶꦫꦶꦪꦴꦪ ꦥꦸꦫꦶꦩꦏꦴꦭꦮꦺꦴꦲꦴꦫꦺꦴ, ꦥꦕ꧀ꦕꦪꦸꦥ꧀ꦥꦤ꧀ꦤꦴꦱꦸ ꦕ ꦮꦶꦫꦠꦷꦱꦸ ꦮꦶꦫꦩꦟꦏꦶꦫꦶꦪꦴꦪ ꦄꦥꦫꦏꦴꦭꦮꦺꦴꦲꦴꦫꦺꦴ ꦕ ꦲꦺꦴꦠꦷꦠꦶ ‘‘ꦥꦲꦴꦪ ꦥꦛꦶꦮꦶꦫꦠꦺꦴ ꦲꦺꦴꦠꦷ’’ꦠꦶ ꦮꦸꦠ꧀ꦠꦁ. ꦥꦲꦴꦪꦴꦠꦶ ꦮꦴ ꦱꦩꦴꦢꦴꦤꦏꦴꦭꦮꦱꦺꦤ ꦮꦸꦠ꧀ꦠꦁ, ꦥꦕ꧀ꦖꦴ ꦮꦷꦠꦶꦏ꧀ꦏꦩꦶꦠꦧ꧀ꦧꦮꦠ꧀ꦡꦸꦱꦩꦴꦪꦺꦴꦒꦮꦱꦺꦤ ꦥꦛꦶꦮꦶꦫꦠꦺꦴꦠꦶ. ꦥꦲꦴꦪꦴꦠꦶ ꦮꦴ –

‘‘ꦤꦶꦲꦤ꧀ꦠ꧀ꦮꦴꦤ ꦠꦩꦺꦴꦑꦤ꧀ꦣꦁ, ꦈꦢꦶꦠꦺꦴꦪꦁ ꦢꦶꦮꦴꦏꦫꦺꦴ;

ꦮꦟ꧀ꦟꦥꦨꦴꦪ ꦨꦴꦱꦺꦠꦶ, ꦎꦨꦴꦱꦺꦠ꧀ꦮꦴ ꦱꦩꦸꦒ꧀ꦒꦠꦺꦴ’’ꦠꦶ ꦕ. (ꦮꦶꦱꦸꦢ꧀ꦣꦶ. ꦩꦲꦴꦛꦷ. ꧒.꧕꧗꧘) –

ꦌꦮꦩꦴꦢꦷꦱꦸ ꦮꦶꦪ ꦱꦩꦴꦤꦏꦴꦭꦮꦱꦺꦤ ꦮꦺꦢꦶꦠꦧ꧀ꦧꦺꦴ. ꦄꦡ ꦮꦴ ꦥꦴꦟꦺꦴ ꦄꦠꦶꦥꦴꦠꦷꦪꦠꦶ ꦌꦠꦺꦤꦴꦠꦶ ꦥꦴꦟꦴꦠꦶꦥꦴꦠꦺꦴ, ꦥꦴꦟꦓꦴꦠꦲꦺꦠꦸꦨꦹꦠꦺꦴ ꦄꦲꦶꦫꦶꦏꦴꦤꦺꦴꦠ꧀ꦠꦥ꧀ꦥꦢꦺꦴꦱꦩꦺꦴꦲꦮꦶꦲꦶꦁ ꦱꦴꦢꦶꦏꦺꦴ ꦕꦺꦠꦤꦴꦥꦣꦴꦤꦺꦴ ꦱꦁꦏꦶꦭꦺꦱꦣꦩ꧀ꦩꦺꦴ, ꦠꦁ ꦱꦩꦴꦢꦴꦤꦮꦱꦺꦤ ꦥꦲꦴꦪ. ꦠꦠꦺꦴ…ꦥꦺ… ꦮꦶꦫꦠꦺꦴꦮ ꦲꦺꦴꦠꦷꦠꦶ ꦄꦮꦣꦴꦫꦟꦺꦤ ꦠꦱ꧀ꦱꦴ ꦮꦶꦫꦠꦶꦪꦴ ꦏꦴꦭꦴꦢꦶꦮꦱꦺꦤ ꦄꦥꦫꦶꦪꦤ꧀ꦠꦠꦁ ꦢꦱ꧀ꦱꦺꦠꦶ. ꦪꦡꦴ ꦲꦶ ꦄꦚ꧀ꦚꦺ ꦱꦩꦴꦢꦶꦤ꧀ꦤꦮꦶꦫꦠꦶꦏꦴꦥꦶ ꦄꦤꦮꦛ꧀ꦜꦶꦠꦕꦶꦠ꧀ꦠꦠꦴꦪ ꦭꦴꦨꦗꦷꦮꦶꦏꦴꦢꦶꦲꦺꦠꦸ ꦱꦩꦴꦢꦴꦤꦁ ꦨꦶꦤ꧀ꦢꦤ꧀ꦠꦺꦮ, ꦤ ꦌꦮꦩꦪꦁ. ꦄꦪꦁ ꦥꦤ ꦥꦲꦷꦤꦏꦴꦭꦠꦺꦴ ꦥꦛ꧀ꦜꦴꦪ ꦎꦫꦠꦺꦴ ꦮꦶꦫꦠꦺꦴꦠꦶ. ꦄꦢꦶꦤ꧀ꦤꦴꦢꦴꦤꦁ ꦥꦲꦴꦪꦴꦠꦶꦄꦴꦢꦷꦱꦸꦥꦶ ꦆꦩꦶꦤꦴ ꦤꦪꦺꦤ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ.

ꦢꦟ꧀ꦝꦤꦁ ꦢꦟ꧀ꦝꦤꦶꦥꦴꦠꦤꦁ ꦢꦟ꧀ꦝꦺꦴ. ꦩꦸꦒ꧀ꦒꦫꦴꦢꦶꦥꦲꦫꦟꦮꦶꦱꦺꦱꦺꦴꦥꦶ ꦆꦣ ꦥꦲꦫꦟꦮꦶꦱꦺꦱꦺꦴꦠꦶ ꦄꦣꦶꦥ꧀ꦥꦺꦠꦺꦴ. ꦠꦺꦤꦴꦲ ‘‘ꦜꦥꦺꦠ꧀ꦮꦴ ꦢꦟ꧀ꦝꦁ ꦱꦧ꧀ꦧꦩ꧀ꦥꦶ ꦄꦮꦱꦺꦱꦁ ꦈꦥꦏꦫꦟ’’ꦤ꧀ꦠꦶ. ꦢꦟ꧀ꦝꦤꦱꦔ꧀ꦑꦴꦠꦱ꧀ꦱ ꦥꦫꦮꦶꦲꦺꦜꦤꦱ꧀ꦱ ꦥꦫꦶꦮꦗ꧀ꦗꦶꦠꦨꦴꦮꦢꦷꦥꦤꦠ꧀ꦡꦁ ꦢꦟ꧀ꦝꦱꦠ꧀ꦡꦴꦤꦁ ꦤꦶꦏ꧀ꦑꦺꦥꦮꦕꦤꦤ꧀ꦠꦶ ꦄꦴꦲ ‘‘ꦥꦫꦹꦥꦓꦴꦠꦠ꧀ꦡꦴꦪꦴ’’ꦠꦶꦄꦴꦢꦶ. ꦮꦶꦲꦶꦁꦱꦤꦨꦴꦮꦠꦺꦴꦠꦶ ꦮꦶꦧꦴꦣꦤꦨꦴꦮꦠꦺꦴ. ꦭꦗ꧀ꦗꦷꦠꦶ ꦌꦠ꧀ꦡ ꦮꦸꦠ꧀ꦠꦭꦗ꧀ꦗꦴꦪ ꦎꦠ꧀ꦠꦥ꧀ꦥꦩ꧀ꦥꦶ ꦮꦸꦠ꧀ꦠꦤ꧀ꦠꦶ ꦢꦛ꧀ꦜꦧ꧀ꦧꦁ. ꦤ ꦲꦶ ꦥꦴꦥꦗꦶꦒꦸꦕ꧀ꦖꦤꦥꦴꦥꦸꦠ꧀ꦠꦴꦱꦫꦲꦶꦠꦁ, ꦥꦴꦥꦨꦪꦁ ꦮꦴ ꦄꦭꦗ꧀ꦗꦤꦁ ꦄꦠ꧀ꦡꦶ. ꦪꦱ꧀ꦱ ꦮꦴ ꦣꦩ꧀ꦩꦒꦫꦸꦠꦴꦪ ꦣꦩ꧀ꦩꦱ꧀ꦱ ꦕ ꦄꦠ꧀ꦠꦴꦣꦷꦤꦠ꧀ꦠꦴ ꦄꦠ꧀ꦠꦴꦣꦶꦥꦠꦶꦨꦹꦠꦴ ꦭꦗ꧀ꦗꦴꦏꦶꦕ꧀ꦕꦏꦴꦫꦷ, ꦠꦱ꧀ꦱ ꦭꦺꦴꦏꦴꦣꦶꦥꦠꦶꦨꦹꦠꦁ ꦎꦠ꧀ꦠꦥ꧀ꦥꦁ ꦏꦶꦕ꧀ꦕꦏꦫꦤ꧀ꦠꦶ ꦮꦠ꧀ꦠꦧ꧀ꦧꦩꦺꦮ ꦤꦠ꧀ꦡꦷꦠꦶ ‘‘ꦭꦗ꧀ꦗꦷ’’ꦆꦕ꧀ꦕꦺꦮ ꦮꦸꦠ꧀ꦠꦁ. ꦢꦪꦁ ꦩꦺꦠ꧀ꦠꦕꦶꦠ꧀ꦠꦠꦁ ꦄꦴꦥꦤ꧀ꦤꦺꦴꦠꦶ ꦏꦱ꧀ꦩꦴ ꦮꦸꦠ꧀ꦠꦁ, ꦤꦤꦸ ꦢꦪꦴ-ꦱꦢ꧀ꦢꦺꦴ ‘‘ꦄꦢꦪꦴꦥꦤ꧀ꦤꦺꦴ’’ꦠꦶꦄꦴꦢꦷꦱꦸ ꦏꦫꦸꦟꦴꦪ ꦮꦠ꧀ꦠꦠꦷꦠꦶ? ꦱꦕ꧀ꦕꦩꦺꦠꦁ, ꦄꦪꦁ ꦥꦤ ꦢꦪꦴ-ꦱꦢ꧀ꦢꦺꦴ ꦄꦤꦸꦫꦏ꧀ꦑꦟꦠ꧀ꦡꦁ ꦄꦤ꧀ꦠꦺꦴꦤꦷꦠꦁ ꦏꦠ꧀ꦮꦴ ꦥꦮꦠ꧀ꦠꦩꦴꦤꦺꦴ ꦩꦺꦠ꧀ꦠꦴꦪ ꦕ ꦏꦫꦸꦟꦴꦪ ꦕ ꦥꦮꦠ꧀ꦠꦠꦷꦠꦶ ꦆꦣ ꦩꦺꦠ꧀ꦠꦴꦪ ꦥꦮꦠ꧀ꦠꦩꦴꦤꦺꦴ ꦮꦸꦠ꧀ꦠꦺꦴ. ꦩꦶꦗ꧀ꦗꦠꦶ ꦱꦶꦤꦶꦪ꧀ꦲꦠꦷꦠꦶ ꦩꦺꦠ꧀ꦠꦴ, ꦱꦴ ꦌꦠꦱ꧀ꦱ ꦄꦠ꧀ꦡꦷꦠꦶ ꦩꦺꦠ꧀ꦠꦁ, ꦩꦺꦠ꧀ꦠꦁ ꦕꦶꦠ꧀ꦠꦁ ꦌꦠꦱ꧀ꦱ ꦄꦠ꧀ꦡꦷꦠꦶ ꦩꦺꦠ꧀ꦠꦕꦶꦠ꧀ꦠꦺꦴ, ꦠꦱ꧀ꦱ ꦨꦴꦮꦺꦴ ꦩꦺꦠ꧀ꦠꦕꦶꦠ꧀ꦠꦠꦴ, ꦩꦺꦠ꧀ꦠꦴꦆꦕ꧀ꦕꦺꦮ ꦄꦠ꧀ꦡꦺꦴ.

ꦱꦧ꧀ꦧꦥꦴꦟꦨꦹꦠꦲꦶꦠꦴꦤꦸꦏꦩ꧀ꦥꦷꦠꦶ ꦌꦠꦺꦤ ꦠꦱ꧀ꦱꦴ ꦮꦶꦫꦠꦶꦪꦴ ꦱꦠ꧀ꦠꦮꦱꦺꦤ ꦄꦥꦫꦶꦪꦤ꧀ꦠꦠꦁ ꦢꦱ꧀ꦱꦺꦠꦶ. ꦥꦴꦟꦨꦹꦠꦺꦠꦶ ꦥꦴꦟꦗꦴꦠꦺ. ꦄꦤꦸꦏꦩ꧀ꦥꦏꦺꦴꦠꦶ ꦏꦫꦸꦟꦴꦪꦤꦏꦺꦴ. ꦪꦱ꧀ꦩꦴ ꦥꦤ ꦩꦺꦠ꧀ꦠꦴ ꦏꦫꦸꦟꦴꦪ ꦮꦶꦱꦺꦱꦥꦕ꧀ꦕꦪꦺꦴ ꦲꦺꦴꦠꦶ, ꦠꦱ꧀ꦩꦴ ꦮꦸꦠ꧀ꦠꦁ ‘‘ꦠꦴꦪ ꦌꦮ ꦢꦪꦴꦥꦤ꧀ꦤꦠꦴꦪꦴ’’ꦠꦶ. ꦌꦮꦁ ꦪꦺꦲꦶ ꦣꦩ꧀ꦩꦺꦲꦶ ꦥꦴꦟꦴꦠꦶꦥꦴꦠꦴ ꦮꦶꦫꦠꦶ ꦱꦩ꧀ꦥꦗ꧀ꦗꦠꦶ, ꦠꦺꦲꦶ ꦭꦗ꧀ꦗꦴꦩꦺꦠ꧀ꦠꦴꦏꦫꦸꦟꦴꦣꦩ꧀ꦩꦺꦲꦶ ꦱꦩꦔ꧀ꦒꦶꦨꦴꦮꦺꦴ ꦢꦱ꧀ꦱꦶꦠꦺꦴ, ꦱꦢ꧀ꦣꦶꦁ ꦥꦶꦛ꧀ꦜꦶꦮꦛ꧀ꦛꦏꦣꦩ꧀ꦩꦺꦲꦷꦠꦶ ꦢꦛ꧀ꦜꦧ꧀ꦧꦁ. ꦌꦠ꧀ꦡꦴꦲ – ꦏꦱ꧀ꦩꦴ ‘‘ꦥꦴꦟꦴꦠꦶꦥꦴꦠꦁ ꦥꦲꦴꦪꦴ’’ꦠꦶ ꦌꦏꦮꦕꦤꦤꦶꦢ꧀ꦢꦺꦱꦺꦴ ꦏꦠꦺꦴ, ꦤꦤꦸ ꦤꦶꦫꦮꦱꦺꦱꦴꦤꦁ ꦥꦴꦟꦴꦤꦁ ꦄꦠꦶꦥꦴꦠꦠꦺꦴ ꦮꦶꦫꦠꦶ ꦆꦣꦴꦣꦶꦥ꧀ꦥꦺꦠꦴ? ꦠꦡꦴ ꦲꦶ ꦮꦸꦠ꧀ꦠꦁ ‘‘ꦱꦧ꧀ꦧꦥꦴꦟꦨꦹꦠꦲꦶꦠꦴꦤꦸꦏꦩ꧀ꦥꦷ ꦮꦶꦲꦫꦠꦷ’’ꦠꦶ. ꦠꦺꦤꦺꦮ ꦲꦶ ꦄꦛ꧀ꦜꦏꦡꦴꦪꦁ ‘‘ꦱꦧ꧀ꦧꦺ ꦥꦴꦟꦨꦹꦠꦺ ꦲꦶꦠꦺꦤ ꦄꦤꦸꦏꦩ꧀ꦥꦏꦺꦴ’’ꦠꦶ ꦥꦸꦡꦸꦮꦕꦤꦤꦶꦢ꧀ꦢꦺꦱꦺꦴꦠꦶ? ꦱꦕ꧀ꦕꦩꦺꦠꦁ, ꦥꦴꦟꦨꦴꦮꦱꦴꦩꦚ꧀ꦚꦮꦱꦺꦤ ꦥꦤꦺꦠ꧀ꦡ ꦥꦴꦭ꦳ꦶꦪꦁ ꦄꦴꦢꦶꦠꦺꦴ ꦌꦏꦮꦕꦤꦤꦶꦢ꧀ꦢꦺꦱꦺꦴ ꦏꦠꦺꦴ, ꦱꦧ꧀ꦧꦱꦢ꧀ꦢꦱꦤ꧀ꦤꦶꦣꦴꦤꦺꦤ ꦥꦸꦡꦸꦠ꧀ꦠꦁ ꦮꦶꦚ꧀ꦚꦴꦪꦩꦴꦤꦩꦺꦮꦴꦠꦶ ꦱꦴꦩꦚ꧀ꦚꦤꦶꦢ꧀ꦢꦺꦱꦁ ꦄꦏꦠ꧀ꦮꦴ ꦨꦺꦢꦮꦕꦤꦶꦕ꧀ꦖꦴꦮꦱꦺꦤ ꦢꦱ꧀ꦱꦺꦠꦸꦁ ꦄꦛ꧀ꦜꦏꦡꦴꦪꦁ ꦧꦲꦸꦮꦕꦤꦮꦱꦺꦤ ꦄꦠ꧀ꦡꦺꦴ ꦮꦸꦠ꧀ꦠꦺꦴ. ꦏꦶꦚ꧀ꦕ ꦨꦶꦪ꧀ꦪꦺꦴ – ꦱꦴꦩꦚ꧀ꦚꦠꦺꦴ ꦱꦁꦮꦫꦱꦩꦴꦢꦴꦤꦁ, ꦠꦧ꧀ꦧꦶꦱꦺꦱꦠꦺꦴ ꦱꦁꦮꦫꦨꦺꦢꦺꦴꦠꦶ ꦆꦩꦱ꧀ꦱ ꦮꦶꦱꦺꦱꦱ꧀ꦱ ꦢꦱ꧀ꦱꦤꦠ꧀ꦡꦁ ꦄꦪꦁ ꦮꦕꦤꦨꦺꦢꦺꦴ ꦏꦠꦺꦴꦠꦶ ꦮꦺꦢꦶꦠꦧ꧀ꦧꦁ. ꦮꦶꦲꦫꦠꦷꦠꦶ ꦮꦸꦠ꧀ꦠꦥ꧀ꦥꦏꦴꦫꦺꦴ ꦲꦸꦠ꧀ꦮꦴ ꦌꦏꦱ꧀ꦩꦶꦁ ꦆꦫꦶꦪꦴꦥꦡꦺ ꦈꦥ꧀ꦥꦤ꧀ꦤꦁ ꦢꦸꦏ꧀ꦑꦁ ꦄꦚ꧀ꦚꦺꦤ ꦆꦫꦶꦪꦴꦥꦡꦺꦤ ꦮꦶꦕ꧀ꦖꦶꦤ꧀ꦢꦶꦠ꧀ꦮꦴ ꦄꦠ꧀ꦠꦨꦴꦮꦁ ꦲꦫꦠꦶ ꦥꦮꦠ꧀ꦠꦺꦠꦷꦠꦶ ꦄꦠ꧀ꦡꦺꦴ. ꦠꦺꦤꦴꦲ ‘‘ꦆꦫꦶꦪꦠꦶ ꦥꦴꦭꦺꦠꦷ’’ꦠꦶ.

ꦤ ꦏꦺꦮꦭꦁ ꦏꦴꦪꦮꦕꦷꦥꦪꦺꦴꦒꦮꦱꦺꦤ ꦄꦴꦢꦴꦤꦩꦺꦮ, ꦄꦡ ꦑꦺꦴ ꦄꦴꦏꦔ꧀ꦑꦥꦶꦱ꧀ꦱ ꦥꦫꦶꦕ꧀ꦕꦠ꧀ꦠꦮꦠ꧀ꦡꦸꦮꦶꦱꦪꦴꦮꦴꦠꦶ ꦢꦱ꧀ꦱꦺꦠꦸꦁ ‘‘ꦕꦶꦠ꧀ꦠꦺꦤꦥꦷ’’ꦠꦶꦄꦴꦢꦶ ꦮꦸꦠ꧀ꦠꦁ. ꦡꦺꦤꦺꦠꦶ ꦡꦺꦪ꧀ꦪꦁ ꦏꦫꦺꦴꦠꦷꦠꦶ ꦡꦺꦤꦺꦴ, ꦕꦺꦴꦫꦺꦴ. ꦱꦸꦕꦶꦨꦹꦠꦺꦤꦴꦠꦶ ꦌꦠ꧀ꦡ ꦱꦸꦕꦶꦨꦴꦮꦺꦴ ꦄꦣꦶꦏꦴꦫꦠꦺꦴ ꦱꦢ꧀ꦢꦤ꧀ꦠꦫꦱꦤ꧀ꦤꦶꦣꦴꦤꦠꦺꦴ ꦕ ꦡꦺꦪ꧀ꦪꦱꦁꦏꦶꦭꦺꦱꦮꦶꦫꦩꦟꦤ꧀ꦠꦶ ꦄꦴꦲ ‘‘ꦄꦡꦺꦤꦠ꧀ꦠꦴꦪꦺꦮ ꦱꦸꦕꦶꦨꦹꦠꦺꦤꦴ’’ꦠꦶ. ꦏꦴꦩꦚ꧀ꦕꦺꦠ꧀ꦡ ‘‘ꦭꦗ꧀ꦗꦷ ꦢꦪꦴꦥꦤ꧀ꦤꦺꦴ’’ꦠꦶꦄꦴꦢꦶ ꦤ ꦮꦸꦠ꧀ꦠꦁ, ꦄꦣꦶꦏꦴꦫꦮꦱꦺꦤ ꦥꦤ ꦄꦠ꧀ꦡꦠꦺꦴ ꦮꦴ ꦮꦸꦠ꧀ꦠꦩꦺꦮꦴꦠꦶ ꦮꦺꦢꦶꦠꦧ꧀ꦧꦁ. ꦪꦡꦴ ꦲꦶ ꦭꦗ꧀ꦗꦴꦢꦪꦺꦴ ꦥꦴꦟꦴꦠꦶꦥꦴꦠꦥꦲꦴꦤꦱ꧀ꦱ ꦮꦶꦱꦺꦱꦥꦕ꧀ꦕꦪꦺꦴ, ꦌꦮꦁ ꦄꦢꦶꦤ꧀ꦤꦴꦢꦴꦤꦥꦲꦴꦤꦱ꧀ꦱꦥꦷꦠꦶ, ꦠꦱ꧀ꦩꦴ ꦱꦴꦥꦶ ꦥꦴꦭ꦳ꦶ ꦄꦴꦤꦺꦠ꧀ꦮꦴ ꦮꦠ꧀ꦠꦧ꧀ꦧꦴ. ꦌꦱ ꦤꦪꦺꦴ ꦆꦠꦺꦴ ꦥꦫꦺꦱꦸꦥꦶ. ꦄꦡ ꦮꦴ ꦱꦸꦕꦶꦨꦹꦠꦺꦤꦴꦠꦶ ꦌꦠꦺꦤ ꦲꦶꦫꦺꦴꦠ꧀ꦠꦥ꧀ꦥꦴꦢꦷꦲꦶ ꦱꦩꦤ꧀ꦤꦴꦒꦩꦺꦴ, ꦄꦲꦶꦫꦶꦏꦴꦢꦷꦤꦚ꧀ꦕ ꦥꦲꦴꦤꦁ ꦮꦸꦠ꧀ꦠꦩꦺꦮꦴꦠꦶ ‘‘ꦭꦗ꧀ꦗꦷ’’ꦠꦶꦄꦴꦢꦶ ꦤ ꦮꦸꦠ꧀ꦠꦤ꧀ꦠꦶ ꦢꦛ꧀ꦜꦧ꧀ꦧꦁ.

ꦄꦱꦺꦛ꧀ꦜꦕꦫꦶꦪꦤ꧀ꦠꦶ ꦄꦱꦺꦛ꧀ꦜꦴꦤꦁ ꦕꦫꦶꦪꦁ, ꦄꦱꦺꦛ꧀ꦜꦁ ꦮꦴ ꦕꦫꦶꦪꦁ. ꦩꦶꦡꦸꦤꦴꦤꦁ ꦮꦸꦠ꧀ꦠꦴꦏꦴꦫꦺꦤ ꦱꦢꦶꦱꦨꦹꦠꦴꦤꦁ ꦄꦪꦤ꧀ꦠꦶ ꦩꦶꦡꦸꦤꦺꦴ, ꦪꦡꦴꦮꦸꦠ꧀ꦠꦺꦴ ꦢꦸꦫꦴꦕꦴꦫꦺꦴ. ꦄꦴꦫꦴꦕꦴꦫꦷ ꦩꦺꦡꦸꦤꦴꦠꦶ ꦌꦠꦺꦤ – ‘‘ꦆꦣ ꦧ꧀ꦫꦴꦲ꧀ꦩꦟ, ꦌꦏꦕ꧀ꦕꦺꦴ…ꦥꦺ… ꦤ ꦲꦺꦮ ꦑꦺꦴ ꦩꦴꦠꦸꦒꦴꦩꦺꦤ ꦱꦢ꧀ꦣꦶꦁ ꦢ꧀ꦮꦪꦁꦢ꧀ꦮꦪꦱꦩꦴꦥꦠ꧀ꦠꦶꦁ ꦱꦩꦴꦥꦗ꧀ꦗꦠꦶ, ꦄꦥꦶꦕ ꦑꦺꦴ ꦩꦴꦠꦸꦒꦴꦩꦱ꧀ꦱ ꦈꦕ꧀ꦖꦴꦢꦤꦥꦫꦶꦩꦢ꧀ꦢꦤꦤ꧀ꦲꦴꦥꦤꦱꦩ꧀ꦧꦴꦲꦤꦁ ꦱꦴꦢꦶꦪꦠꦶ, ꦱꦺꦴ ꦠꦢꦱ꧀ꦱꦴꦢꦺꦠꦶ, ꦠꦁ ꦤꦶꦏꦴꦩꦺꦠꦶ, ꦠꦺꦤ ꦕ ꦮꦶꦠ꧀ꦠꦶꦁ ꦄꦴꦥꦗ꧀ꦗꦠꦷ’’ꦠꦶꦄꦴꦢꦶꦤꦴ (ꦄ. ꦤꦶ. ꧗.꧕꧐) ꦮꦸꦠ꧀ꦠꦴ ꦱꦠ꧀ꦠꦮꦶꦣꦩꦺꦡꦸꦤꦱꦁꦪꦺꦴꦒꦴꦥꦶ ꦥꦛꦶꦮꦶꦫꦠꦶ ꦢꦱ꧀ꦱꦶꦠꦴꦠꦶ ꦢꦛ꧀ꦜꦧ꧀ꦧꦁ.

ꦱꦕ꧀ꦕꦺꦤ ꦱꦕ꧀ꦕꦤ꧀ꦠꦶ ꦥꦸꦫꦶꦩꦺꦤ ꦮꦕꦷꦱꦕ꧀ꦕꦺꦤ ꦥꦕ꧀ꦖꦶꦩꦁ ꦮꦕꦷꦱꦕ꧀ꦕꦁ ꦱꦤ꧀ꦢꦲꦠꦶ ꦄꦱꦕ꧀ꦕꦺꦤ ꦄꦤꦤ꧀ꦠꦫꦶꦏꦠ꧀ꦠꦴ. ꦠꦺꦤꦴꦲ ‘‘ꦪꦺꦴ ꦲꦷ’’ꦠꦶꦄꦴꦢꦶ. ꦲꦭꦶꦢ꧀ꦢꦶꦫꦴꦒꦺꦴ ꦮꦶꦪ ꦤ ꦡꦶꦫꦏꦠꦺꦴ ꦲꦺꦴꦠꦷꦠꦶ ꦌꦠ꧀ꦡ ꦏꦡꦴꦪ ꦄꦤꦮꦛ꧀ꦜꦶꦠꦨꦴꦮꦺꦤ ꦲꦭꦶꦢ꧀ꦢꦶꦫꦴꦒꦱꦢꦶꦱꦠꦴ ꦮꦺꦢꦶꦠꦧ꧀ꦧꦴ, ꦤ ꦥꦸꦒ꧀ꦒꦭꦱ꧀ꦱ. ꦥꦴꦱꦴꦟꦭꦺꦑꦴ ꦮꦶꦪꦴꦠꦶ ꦌꦠ꧀ꦡꦴꦥꦶ ꦌꦱꦺꦮ ꦤꦪꦺꦴ. ꦱꦢ꧀ꦣꦴ ꦄꦪꦠꦶ ꦥꦮꦠ꧀ꦠꦠꦶ ꦌꦠ꧀ꦡꦴꦠꦶ ꦱꦢ꧀ꦣꦴꦪꦺꦴ, ꦱꦢ꧀ꦣꦴꦪꦺꦴ ꦌꦮ ꦱꦢ꧀ꦣꦴꦪꦶꦏꦺꦴ ꦪꦡꦴ ‘‘ꦮꦺꦤꦪꦶꦏꦺꦴ’’ꦠꦶ (ꦩ. ꦤꦶ. ꧑.꧒꧔꧖; ꦄ. ꦤꦶ. ꧘.꧑꧑; ꦥꦴꦫꦴ. ꧘), ꦱꦢ꧀ꦣꦴꦪ ꦮꦴ ꦄꦪꦶꦠꦧ꧀ꦧꦺꦴ ꦱꦢ꧀ꦣꦴꦪꦶꦏꦺꦴ, ꦱꦢ꧀ꦣꦺꦪ꧀ꦪꦺꦴꦠꦶ ꦄꦠ꧀ꦡꦺꦴ. ꦮꦠ꧀ꦠꦧ꧀ꦧꦠꦁ ꦄꦴꦥꦗ꧀ꦗꦠꦶꦮꦶꦱꦁꦮꦴꦢꦤꦠꦺꦴꦠꦶ ꦄꦣꦶꦥ꧀ꦥꦴꦪꦺꦴ.

ꦄꦤꦸꦥ꧀ꦥꦢꦴꦠꦴꦠꦶ (ꦢꦷ. ꦤꦶ. ꦛꦷ. ꧑.꧙; ꦄ. ꦤꦶ. ꦛꦷ. ꧒.꧔.꧑꧙꧘) ꦄꦤꦸꦧꦭꦥ꧀ꦥꦢꦴꦠꦴ, ꦄꦤꦸꦮꦠ꧀ꦠꦤꦮꦱꦺꦤ ꦮꦴ ꦥꦢꦴꦠꦴ. ꦏꦱ꧀ꦱ ꦥꦤ ꦄꦤꦸꦮꦠ꧀ꦠꦤꦁ ꦥꦢꦴꦤꦚ꧀ꦕꦴꦠꦶ? ‘‘ꦱꦲꦶꦠꦴꦤ’’ꦤ꧀ꦠꦶ ꦮꦸꦠ꧀ꦠꦠ꧀ꦠꦴ ꦱꦤ꧀ꦣꦴꦤꦱ꧀ꦱꦴꦠꦶ ꦮꦶꦚ꧀ꦚꦴꦪꦠꦶ. ꦠꦺꦤꦴꦲ ‘‘ꦱꦤ꧀ꦣꦴꦤꦴꦤꦸꦥ꧀ꦥꦢꦴꦠꦴ’’ꦠꦶ. ꦪꦱ꧀ꦩꦴ ꦥꦤ ꦄꦤꦸꦮꦠ꧀ꦠꦤꦮꦱꦺꦤ ꦱꦤ꧀ꦣꦴꦤꦱ꧀ꦱ ꦥꦢꦴꦤꦁ ꦄꦴꦣꦴꦤꦁ, ꦫꦏ꧀ꦑꦟꦁ ꦮꦴ ꦢꦭ꦳꧀ꦲꦷꦏꦫꦟꦁ ꦲꦺꦴꦠꦶ. ꦠꦺꦤ ꦮꦸꦠ꧀ꦠꦁ ‘‘ꦢ꧀ꦮꦺ ꦗꦤꦺ ꦱꦩꦒ꧀ꦒꦺ ꦢꦶꦱ꧀ꦮꦴ’’ꦠꦶꦄꦴꦢꦶ. ꦄꦴꦫꦩꦤ꧀ꦠꦶ ꦌꦠ꧀ꦡꦴꦠꦶ ꦄꦴꦫꦴꦩꦺꦴ, ꦫꦩꦶꦠꦧ꧀ꦧꦛ꧀ꦜꦴꦤꦁ. ꦪꦱ꧀ꦩꦴ ꦥꦤ ꦄꦴ-ꦏꦴꦫꦺꦤ ꦮꦶꦤꦴꦥꦶ ꦄꦪꦩꦠ꧀ꦡꦺꦴ ꦭꦧ꧀ꦨꦠꦶ, ꦠꦱ꧀ꦩꦴ ꦮꦸꦠ꧀ꦠꦁ ‘‘ꦱꦩꦒ꧀ꦒꦫꦴꦩꦺꦴꦠꦶꦥꦶ ꦥꦴꦭ꦳ꦶ, ꦄꦪꦩꦺꦮꦺꦠ꧀ꦡ ꦄꦠ꧀ꦡꦺꦴ’’ꦠꦶ.

ꦌꦠ꧀ꦡꦴꦠꦶ –

‘‘ꦤꦺꦭꦔ꧀ꦒꦺꦴ ꦱꦺꦠꦥꦕ꧀ꦖꦴꦢꦺꦴ, ꦌꦏꦴꦫꦺꦴ ꦮꦠ꧀ꦠꦠꦷ ꦫꦡꦺꦴ;

ꦄꦤꦷꦓꦁ ꦥꦱ꧀ꦱ ꦄꦴꦪꦤ꧀ꦠꦁ, ꦖꦶꦤ꧀ꦤꦱꦺꦴꦠꦁ ꦄꦧꦤ꧀ꦣꦤ’’ꦤ꧀ꦠꦶ. (ꦱꦁ. ꦤꦶ. ꧔.꧓꧔꧗; ꦈꦢꦴ. ꧖꧕; ꦥꦺꦛꦏꦺꦴ. ꧒꧕;ꦢꦷ. ꦤꦶ. ꦛꦷ. ꧑.꧙) –

ꦆꦩꦶꦱ꧀ꦱꦴ ꦒꦴꦡꦴꦪ. ꦱꦷꦭꦚ꧀ꦲꦺꦠ꧀ꦡ ‘‘ꦤꦺꦭꦔ꧀ꦒ’’ꦤ꧀ꦠꦶ ꦮꦸꦠ꧀ꦠꦁ. ꦠꦺꦤꦺꦮꦴꦲ – ꦕꦶꦠ꧀ꦠꦺꦴ ꦒꦲꦥꦠꦶ, ‘‘ꦤꦺꦭꦔ꧀ꦒꦤ꧀ꦠꦶ ꦑꦺꦴ, ꦨꦤ꧀ꦠꦺ, ꦱꦷꦭꦴꦤꦩꦺꦠꦁ ꦄꦣꦶꦮꦕꦤ’’ꦤ꧀ꦠꦶ (ꦱꦁ. ꦤꦶ. ꧔.꧓꧔꧗; ꦢꦷ. ꦤꦶ. ꦛꦷ. ꧑.꧙). ꦱꦸꦏꦸꦩꦴꦫꦴꦠꦶ ꦄꦦꦫꦸꦱꦠꦴꦪ ꦩꦸꦢꦸꦏꦴ. ꦥꦸꦫꦱ꧀ꦱ ꦌꦱꦴꦠꦶ ꦌꦠ꧀ꦡ ꦥꦸꦫ-ꦱꦢ꧀ꦢꦺꦴ ꦠꦤ꧀ꦤꦶꦮꦴꦱꦷꦮꦴꦕꦏꦺꦴ ꦢꦛ꧀ꦜꦧ꧀ꦧꦺꦴ ‘‘ꦒꦴꦩꦺꦴ ꦄꦴꦒꦠꦺꦴ’’ꦠꦶꦄꦴꦢꦷꦱꦸ (ꦢꦷ. ꦤꦶ. ꦛꦷ. ꧑.꧙) ꦮꦶꦪ. ꦠꦺꦤꦺꦮꦴꦲ ‘‘ꦤꦒꦫꦮꦴꦱꦷꦤ’’ꦤ꧀ꦠꦶ. ꦩꦤꦁ ꦄꦥ꧀ꦥꦴꦪꦠꦶ ꦮꦝ꧀ꦞꦺꦠꦷꦠꦶ ꦩꦤꦴꦥꦴ. ꦠꦺꦤ ꦮꦸꦠ꧀ꦠꦁ ‘‘ꦕꦶꦠ꧀ꦠꦮꦸꦢ꧀ꦣꦶꦏꦫꦴ’’ꦠꦶ.

ꦏꦴꦭꦮꦴꦢꦷꦠꦶꦄꦴꦢꦶ ꦱꦩ꧀ꦦꦥ꧀ꦥꦭꦴꦥꦴꦥꦛꦶꦮꦶꦫꦠꦱ꧀ꦱ ꦥꦛꦶꦥꦠ꧀ꦠꦶꦢꦱ꧀ꦱꦤꦁ. ꦄꦠ꧀ꦡꦱꦁꦲꦶꦠꦴꦥꦶ ꦲꦶ ꦮꦴꦕꦴ ꦄꦪꦸꦠ꧀ꦠꦏꦴꦭꦥꦪꦺꦴꦒꦺꦤ ꦄꦠ꧀ꦡꦴꦮꦲꦴ ꦤ ꦱꦶꦪꦴꦠꦶ ꦄꦤꦠ꧀ꦡꦮꦶꦚ꧀ꦚꦴꦥꦤꦮꦴꦕꦁ ꦄꦤꦸꦭꦺꦴꦩꦺꦠꦶ, ꦠꦱ꧀ꦩꦴ ꦱꦩ꧀ꦦꦥ꧀ꦥꦭꦴꦥꦁ ꦥꦗꦲꦤ꧀ꦠꦺꦤ ꦄꦏꦴꦭꦮꦴꦢꦶꦠꦴ ꦥꦫꦶꦲꦫꦶꦠꦧ꧀ꦧꦴꦠꦶ ꦮꦸꦠ꧀ꦠꦁ ‘‘ꦏꦴꦭꦮꦴꦢꦷ’’ꦠꦶ. ꦏꦴꦭꦺ ꦮꦢꦤ꧀ꦠꦺꦤꦥꦶ ꦈꦨꦪꦴꦤꦠ꧀ꦡꦱꦴꦣꦤꦠꦺꦴ ꦄꦨꦹꦠꦁ ꦥꦫꦶꦮꦗ꧀ꦗꦺꦠꦧ꧀ꦧꦤ꧀ꦠꦶ ꦄꦴꦲ ‘‘ꦨꦹꦠꦮꦴꦢꦷ’’ꦠꦶ. ꦨꦹꦠꦚ꧀ꦕ ꦮꦢꦤ꧀ꦠꦺꦤ ꦪꦁ ꦆꦣꦭꦺꦴꦏ-ꦥꦫꦭꦺꦴꦏ-ꦲꦶꦠꦱꦩ꧀ꦥꦴꦢꦏꦁ, ꦠꦢꦺꦮ ꦮꦠ꧀ꦠꦧ꧀ꦧꦤ꧀ꦠꦶ ꦢꦱ꧀ꦱꦺꦠꦸꦁ ‘‘ꦄꦠ꧀ꦡꦮꦴꦢꦷ’’ꦠꦶ ꦮꦸꦠ꧀ꦠꦁ. ꦄꦠ꧀ꦡꦁ ꦮꦢꦤ꧀ꦠꦺꦤꦥꦶ ꦭꦺꦴꦏꦶꦪꦣꦩ꧀ꦩꦱꦤ꧀ꦤꦶꦱ꧀ꦱꦶꦠꦩꦺꦮ ꦄꦮꦠ꧀ꦮꦴ ꦭꦺꦴꦏꦸꦠ꧀ꦠꦫꦣꦩ꧀ꦩꦱꦤ꧀ꦤꦶꦱ꧀ꦱꦶꦠꦁ ꦏꦠ꧀ꦮꦴ ꦮꦠ꧀ꦠꦧ꧀ꦧꦤ꧀ꦠꦶ ꦢꦱ꧀ꦱꦤꦠ꧀ꦡꦁ ‘‘ꦣꦩ꧀ꦩꦮꦴꦢꦷ’’ꦠꦶ ꦮꦸꦠ꧀ꦠꦁ. ꦪꦡꦴ ꦕ ꦄꦠ꧀ꦡꦺꦴ ꦭꦺꦴꦏꦸꦠ꧀ꦠꦫꦣꦩ꧀ꦩꦱꦤ꧀ꦤꦶꦱ꧀ꦱꦶꦠꦺꦴ ꦲꦺꦴꦠꦶ, ꦠꦁꦢꦱ꧀ꦱꦤꦠ꧀ꦡꦁ ‘‘ꦮꦶꦤꦪꦮꦴꦢꦷ’’ꦠꦶ ꦮꦸꦠ꧀ꦠꦁ. ꦥꦚ꧀ꦕꦤ꧀ꦤꦚ꧀ꦲꦶ ꦱꦁꦮꦫꦮꦶꦤꦪꦴꦤꦁ, ꦥꦚ꧀ꦕꦤ꧀ꦤꦚ꧀ꦕ ꦥꦲꦴꦤꦮꦶꦤꦪꦴꦤꦁ ꦮꦱꦺꦤ ꦮꦸꦕ꧀ꦕꦩꦴꦤꦺꦴ ꦄꦠ꧀ꦡꦺꦴ ꦤꦶꦧ꧀ꦧꦴꦤꦴꦣꦶꦒꦩꦲꦺꦠꦸꦨꦴꦮꦠꦺꦴ ꦭꦺꦴꦏꦸꦠ꧀ꦠꦫꦣꦩ꧀ꦩꦱꦤ꧀ꦤꦶꦱ꧀ꦱꦶꦠꦺꦴ ꦲꦺꦴꦠꦷꦠꦶ. ꦌꦮꦁ ꦒꦸꦟꦮꦶꦱꦺꦱꦪꦸꦠ꧀ꦠꦺꦴꦮ ꦄꦠ꧀ꦡꦺꦴ ꦮꦸꦕ꧀ꦕꦩꦴꦤꦺꦴ ꦢꦺꦱꦤꦴꦏꦺꦴꦱꦭ꧀ꦭꦺ ꦱꦠꦶ ꦱꦺꦴꦨꦠꦶ, ꦏꦶꦕ꧀ꦕꦏꦫꦺꦴ ꦕ ꦲꦺꦴꦠꦶ, ꦤ ꦄꦚ꧀ꦚꦡꦴꦠꦶ ꦢꦱ꧀ꦱꦺꦠꦸꦁ ‘‘ꦤꦶꦣꦴꦤꦮꦠꦶꦁ ꦮꦴꦕꦁ ꦨꦴꦱꦶꦠꦴ’’ꦠꦶ ꦮꦸꦠ꧀ꦠꦁ. ꦆꦢꦴꦤꦶ ꦠꦁ ꦢꦺꦱꦤꦴꦏꦺꦴꦱꦭ꧀ꦭꦁ ꦮꦶꦨꦴꦮꦺꦠꦸꦁ ‘‘ꦏꦴꦭꦺꦤꦴ’’ꦠꦶꦄꦴꦢꦶꦩꦴꦲ. ꦥꦸꦕ꧀ꦖꦴꦢꦶꦮꦱꦺꦤ ꦲꦶ ꦎꦠꦶꦟ꧀ꦟꦮꦴꦕꦴꦮꦠ꧀ꦡꦸꦱ꧀ꦩꦶꦁ ꦌꦏꦁꦱꦴꦢꦶꦧ꧀ꦪꦴꦏꦫꦟꦮꦶꦨꦴꦒꦁ ꦱꦭ꧀ꦭꦏ꧀ꦑꦺꦠ꧀ꦮꦴ ꦜꦥꦤꦴꦲꦺꦠꦸꦈꦢꦴꦲꦫꦟꦁ ꦱꦁꦱꦤ꧀ꦢꦤꦴꦢꦶꦁ ꦠꦁꦠꦁꦏꦴꦭꦴꦤꦸꦫꦹꦥꦁ ꦮꦶꦨꦴꦮꦺꦤ꧀ꦠꦶꦪꦴ ꦥꦫꦶꦩꦶꦠꦥꦫꦶꦕ꧀ꦖꦶꦤ꧀ꦤꦫꦹꦥꦴꦪ ꦮꦶꦥꦸꦭꦠꦫ-ꦒꦩ꧀ꦨꦷꦫꦺꦴꦢꦴꦫ-ꦥꦫꦩꦠ꧀ꦡ-ꦮꦶꦠ꧀ꦡꦴꦫꦱꦔ꧀ꦒꦴꦲꦶꦏꦴꦪ ꦏꦡꦴꦪ ꦚꦴꦟꦧꦭꦴꦤꦸꦫꦹꦥꦁ ꦥꦫꦺ ꦪꦴꦡꦴꦮꦠꦺꦴ ꦣꦩ꧀ꦩꦺ ꦥꦠꦶꦛ꧀ꦜꦴꦥꦺꦤ꧀ꦠꦺꦴ ‘‘ꦢꦺꦱꦤꦴꦏꦸꦱꦭꦺꦴ’’ꦠꦶ ꦮꦸꦕ꧀ꦕꦠꦷꦠꦶ ꦌꦮꦩꦺꦠ꧀ꦡ ꦄꦠ꧀ꦡꦪꦺꦴꦗꦤꦴ ꦮꦺꦢꦶꦠꦧ꧀ꦧꦴ.

꧒꧙꧓. ꦌꦮꦁ ꦥꦛꦶꦥꦴꦛꦶꦪꦴ ꦱꦠ꧀ꦠ ꦩꦹꦭꦱꦶꦏ꧀ꦑꦴꦥꦢꦴꦤꦶ ꦮꦶꦨꦴꦮꦺꦠ꧀ꦮꦴ ꦱꦠꦶꦥꦶ ꦄꦨꦶꦗ꧀ꦙꦴꦢꦶꦥꦲꦴꦤꦆꦤ꧀ꦢ꧀ꦫꦶꦪꦱꦁꦮꦫꦱꦠꦶꦱꦩ꧀ꦥꦗꦚ꧀ꦚꦗꦴꦒꦫꦶꦪꦴꦤꦸꦪꦺꦴꦒꦴꦢꦶꦏꦺ ꦈꦠ꧀ꦠꦫꦢꦺꦱꦤꦴꦪꦁ ꦮꦶꦨꦴꦮꦺꦠꦸꦁ ꦠꦁ ꦥꦫꦶꦲꦫꦶꦠ꧀ꦮꦴ ꦄꦴꦕꦴꦫꦱꦷꦭꦱ꧀ꦱꦺꦮ ꦮꦶꦨꦗꦤꦮꦱꦺꦤ ꦥꦴꦭ꦳ꦶ ꦥꦮꦠ꧀ꦠꦴꦠꦶ ꦠꦢꦠ꧀ꦡꦁ ꦮꦶꦮꦫꦶꦠꦸꦁ ‘‘ꦧꦷꦗꦒꦴꦩꦨꦹꦠꦒꦴꦩꦱꦩꦴꦫꦩ꧀ꦨꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦠ꧀ꦡ ꦧꦷꦗꦴꦤꦁ ꦒꦴꦩꦺꦴ ꦱꦩꦹꦲꦺꦴ ꦧꦷꦗꦒꦴꦩꦺꦴ. ꦨꦹꦠꦴꦤꦁ ꦗꦴꦠꦴꦤꦁ ꦤꦶꦧ꧀ꦧꦠ꧀ꦠꦴꦤꦁ ꦫꦸꦏ꧀ꦑꦒꦕ꧀ꦖꦭꦠꦴꦢꦷꦤꦁ ꦱꦩꦹꦲꦺꦴ ꦨꦹꦠꦒꦴꦩꦺꦴ. ꦤꦤꦸ ꦕ ꦫꦸꦏ꧀ꦑꦴꦢꦪꦺꦴ ꦕꦶꦠ꧀ꦠꦫꦲꦶꦠꦠꦴꦪ ꦤ ꦗꦷꦮꦴ, ꦕꦶꦠ꧀ꦠꦫꦲꦶꦠꦠꦴ ꦕ ꦥꦫꦶꦥ꧀ꦦꦤ꧀ꦢꦴꦨꦴꦮꦠꦺꦴ ꦖꦶꦤ꧀ꦤꦺ ꦮꦶꦫꦸꦲꦤꦠꦺꦴ ꦮꦶꦱꦢꦶꦱꦗꦴꦠꦶꦏꦨꦴꦮꦠꦺꦴ ꦕꦠꦸꦪꦺꦴꦤꦶꦄꦥꦫꦶꦪꦴꦥꦤ꧀ꦤꦠꦺꦴ ꦕ ꦮꦺꦢꦶꦠꦧ꧀ꦧꦴ, ꦮꦸꦝ꧀ꦞꦶ ꦥꦤ ꦥꦮꦴꦭ꦳ꦱꦶꦭꦴꦭꦮꦟꦴꦤꦩ꧀ꦥꦶ ꦮꦶꦗ꧀ꦗꦠꦷꦠꦶ ꦤ ꦠꦺꦱꦁ ꦗꦷꦮꦨꦴꦮꦺ ꦏꦴꦫꦟꦁ, ꦮꦶꦱꦪꦒ꧀ꦒꦲꦟꦚ꧀ꦕ ꦤꦺꦱꦁ ꦥꦫꦶꦏꦥ꧀ꦥꦤꦴꦩꦠ꧀ꦠꦁ ꦱꦸꦥꦤꦁ ꦮꦶꦪ ꦕꦶꦚ꧀ꦕꦴꦢꦺꦤꦁ, ꦠꦡꦴ ꦢꦺꦴꦲꦭ꦳ꦴꦢꦪꦺꦴ, ꦠꦠ꧀ꦡ ꦏꦱ꧀ꦩꦴ ꦧꦷꦗꦒꦴꦩꦨꦹꦠꦒꦴꦩꦱꦩꦴꦫꦩ꧀ꦨꦴ ꦥꦛꦶꦮꦶꦫꦠꦶ ꦆꦕ꧀ꦖꦶꦠꦴꦠꦶ? ꦱꦩꦟꦱꦴꦫꦸꦥ꧀ꦥꦠꦺꦴ ꦠꦤ꧀ꦤꦶꦮꦴꦱꦶꦱꦠ꧀ꦠꦴꦤꦸꦫꦏ꧀ꦑꦟꦠꦺꦴ ꦕ. ꦠꦺꦤꦺꦮꦴꦲ – ‘‘ꦗꦷꦮꦱꦚ꧀ꦚꦶꦤꦺꦴ ꦲꦶ ꦩꦺꦴꦓꦥꦸꦫꦶꦱ ꦩꦤꦸꦱ꧀ꦱꦴ ꦫꦸꦏ꧀ꦑꦱ꧀ꦩꦶ’’ꦤ꧀ꦠꦶꦄꦴꦢꦶ (ꦥꦴꦕꦶ. ꧘꧙).

ꦩꦹꦭꦩꦺꦮ ꦧꦷꦗꦁ ꦩꦹꦭꦧꦷꦗꦁ, ꦩꦹꦭꦧꦷꦗꦁ ꦌꦠꦱ꧀ꦱꦴꦠꦶꦥꦶ ꦩꦹꦭꦧꦷꦗꦁ. ꦱꦺꦱꦺꦱꦸꦥꦶ ꦌꦱꦺꦮ ꦤꦪꦺꦴ. ꦦꦭ꦳ꦸꦧꦷꦗꦤ꧀ꦠꦶ ꦥꦧ꧀ꦧꦧꦷꦗꦁ. ꦥꦕ꧀ꦕꦪꦤ꧀ꦠꦫꦱꦩꦮꦴꦪꦺ ꦱꦢꦶꦱꦦꦭꦸꦥ꧀ꦥꦠ꧀ꦠꦶꦪꦴ ꦮꦶꦱꦺꦱꦏꦴꦫꦟꦨꦴꦮꦠꦺꦴ ꦮꦶꦫꦸꦲꦟꦱꦩꦠ꧀ꦡꦺ ꦱꦴꦫꦦꦭꦺ ꦤꦶꦫꦸꦭ꦳꧀ꦲꦺꦴ ꦧꦷꦗꦱꦢ꧀ꦢꦺꦴ ꦠꦢꦠ꧀ꦡꦱꦁꦱꦶꦢ꧀ꦣꦶꦪꦴ ꦩꦹꦭꦴꦢꦷꦱꦸꦥꦶ ꦏꦺꦱꦸꦕꦶ ꦥꦮꦠ꧀ꦠꦠꦷꦠꦶ ꦩꦹꦭꦴꦢꦶꦠꦺꦴ ꦤꦶꦮꦠ꧀ꦠꦤꦠ꧀ꦡꦁ ꦌꦏꦺꦤ ꦧꦷꦗ-ꦱꦢ꧀ꦢꦺꦤ ꦮꦶꦱꦺꦱꦺꦠ꧀ꦮꦴ ꦮꦸꦠ꧀ꦠꦁ ‘‘ꦧꦷꦗꦧꦷꦗ’’ꦤ꧀ꦠꦶ ‘‘ꦫꦹꦥꦫꦹꦥꦁ (ꦮꦶꦱꦸꦢ꧀ꦣꦶ. ꧒.꧔꧔꧙), ꦢꦸꦏ꧀ꦑꦢꦸꦏ꧀ꦑ’’ꦤ꧀ꦠꦶ (ꦱꦁ. ꦤꦶ. ꧔.꧓꧒꧗; ꧕.꧑꧖꧕; ꦤꦺꦠ꧀ꦠꦶ. ꧑꧑) ꦕ ꦪꦡꦴ. ꦏꦱ꧀ꦩꦴ ꦥꦤꦺꦠ꧀ꦡ ꦧꦷꦗꦒꦴꦩꦨꦹꦠꦒꦴꦩꦁ ꦈꦢ꧀ꦣꦫꦶꦠ꧀ꦮꦴ ꦧꦷꦗꦒꦴꦩꦺꦴ ꦌꦮ ꦤꦶꦢ꧀ꦢꦶꦛ꧀ꦜꦺꦴꦠꦶ? ꦤ ꦑꦺꦴ ꦥꦤꦺꦠꦁ ꦌꦮꦁ ꦢꦛ꧀ꦜꦧ꧀ꦧꦁ, ꦤꦤꦸ ꦄꦮꦺꦴꦕꦸꦩ꧀ꦲ – ‘‘ꦩꦹꦭꦩꦺꦮ ꦧꦷꦗꦁ ꦩꦹꦭꦧꦷꦗꦁ, ꦩꦹꦭꦧꦷꦗꦁ ꦌꦠꦱ꧀ꦱꦴꦠꦶꦥꦶ ꦩꦹꦭꦧꦷꦗ’’ꦤ꧀ꦠꦶ. ꦠꦠ꧀ꦡ ꦥꦸꦫꦶꦩꦺꦤ ꦧꦷꦗꦒꦴꦩꦺꦴ ꦤꦶꦢ꧀ꦢꦶꦛ꧀ꦜꦺꦴ, ꦢꦸꦠꦶꦪꦺꦤ ꦨꦹꦠꦒꦴꦩꦺꦴ, ꦢꦸꦮꦶꦣꦺꦴꦥꦺꦱ ꦩꦹꦭꦧꦷꦗꦚ꧀ꦕ ꦩꦹꦭꦧꦷꦗꦚ꧀ꦕ ꦩꦹꦭꦧꦷꦗꦤ꧀ꦠꦶ ꦱꦴꦩꦚ꧀ꦚꦤꦶꦢ꧀ꦢꦺꦱꦺꦤ, ꦌꦏꦱꦺꦱꦤꦪꦺꦤ ꦮꦴ ꦈꦢ꧀ꦢꦶꦛ꧀ꦜꦺꦴꦠꦶ ꦮꦺꦢꦶꦠꦧ꧀ꦧꦺꦴ. ꦠꦺꦤꦺꦮꦴꦲ ‘‘ꦥꦚ꧀ꦕꦮꦶꦣꦱ꧀ꦱꦴ’’ꦠꦶꦄꦴꦢꦶ. ꦤꦷꦭꦠꦶꦟꦫꦸꦏ꧀ꦑꦴꦢꦶꦏꦱ꧀ꦱꦴꦠꦶ ꦄꦭ꧀ꦭꦠꦶꦟꦱ꧀ꦱ ꦕꦺꦮ ꦄꦭ꧀ꦭꦫꦸꦏ꧀ꦑꦴꦢꦶꦏꦱ꧀ꦱ ꦕ. ꦄꦴꦢꦶ-ꦱꦢ꧀ꦢꦺꦤ ꦎꦱꦣꦶꦒꦕ꧀ꦖꦭꦠꦴꦢꦷꦤꦁ ꦱꦔ꧀ꦒꦲꦺꦴ.

ꦌꦏꦁ ꦨꦠ꧀ꦠꦁ ꦌꦏꦨꦠ꧀ꦠꦁ, ꦠꦁ ꦄꦱ꧀ꦱ ꦄꦠ꧀ꦡꦷꦠꦶ ꦌꦏꦨꦠ꧀ꦠꦶꦏꦺꦴ. ꦱꦺꦴ ꦥꦤ ꦫꦠ꧀ꦠꦶꦨꦺꦴꦗꦤꦺꦤꦥꦶ ꦱꦶꦪꦴꦠꦶ ꦠꦤ꧀ꦤꦶꦮꦠ꧀ꦠꦤꦠ꧀ꦡꦁ ꦄꦴꦲ ‘‘ꦫꦠ꧀ꦠꦹꦥꦫꦠꦺꦴ’’ꦠꦶ. ꦌꦮꦩ꧀ꦥꦶ ꦄꦥꦫꦟ꧀ꦲꦨꦺꦴꦗꦷꦥꦶ ꦱꦶꦪꦴ ꦌꦏꦨꦠ꧀ꦠꦶꦏꦺꦴꦠꦶ ꦠꦤ꧀ꦤꦶꦮꦠ꧀ꦠꦤꦠ꧀ꦡꦁ ‘‘ꦮꦶꦫꦠꦺꦴ ꦮꦶꦏꦴꦭꦨꦺꦴꦗꦤꦴ’’ꦠꦶ ꦮꦸꦠ꧀ꦠꦁ. ꦄꦫꦸꦟꦸꦒ꧀ꦒꦩꦤꦏꦴꦭꦠꦺꦴ ꦥꦛ꧀ꦜꦴꦪ ꦪꦴꦮ ꦩꦗ꧀ꦙꦤ꧀ꦲꦶꦏꦴ ꦄꦪꦁ ꦧꦸꦢ꧀ꦣꦴꦢꦷꦤꦁ ꦄꦫꦶꦪꦴꦤꦁ ꦄꦴꦕꦶꦟ꧀ꦟꦱꦩꦴꦕꦶꦟ꧀ꦟꦺꦴ ꦨꦺꦴꦗꦤꦱ꧀ꦱ ꦏꦴꦭꦺꦴ ꦤꦴꦩ, ꦠꦢꦚ꧀ꦚꦺꦴ ꦮꦶꦏꦴꦭꦺꦴ. ꦄꦛ꧀ꦜꦏꦡꦴꦪꦁ ꦥꦤ ꦢꦸꦠꦶꦪꦥꦢꦺꦤ ꦫꦠ꧀ꦠꦶꦨꦺꦴꦗꦤꦱ꧀ꦱ ꦥꦛꦶꦏ꧀ꦑꦶꦠ꧀ꦠꦠ꧀ꦠꦴ ‘‘ꦄꦠꦶꦏ꧀ꦏꦤ꧀ꦠꦺ ꦩꦗ꧀ꦙꦤ꧀ꦲꦶꦏꦺ ꦪꦴꦮ ꦱꦹꦫꦶꦪꦠ꧀ꦡꦔ꧀ꦒꦩꦤꦴ ꦨꦺꦴꦗꦤꦁ ꦮꦶꦏꦴꦭꦨꦺꦴꦗꦤꦁ ꦤꦴꦩꦴ’’ꦠꦶ ꦮꦸꦠ꧀ꦠꦁ.

‘‘ꦱꦧ꧀ꦧꦥꦴꦥꦱ꧀ꦱ ꦄꦏꦫꦟ’’ꦤ꧀ꦠꦶꦄꦴꦢꦶꦤꦪꦥ꧀ꦥꦮꦠ꧀ꦠꦁ (ꦢꦷ. ꦤꦶ. ꧒.꧙꧐; ꦣ. ꦥ. ꧑꧘꧓; ꦤꦺꦠ꧀ꦠꦶ. ꧓꧐, ꧕꧐, ꧑꧑꧖, ꧑꧒꧔) ꦨꦒꦮꦠꦺꦴ ꦱꦴꦱꦤꦁ ꦄꦕ꧀ꦕꦤ꧀ꦠꦫꦴꦒꦸꦥ꧀ꦥꦠ꧀ꦠꦶꦪꦴ ꦤꦕ꧀ꦕꦴꦢꦶꦢꦱ꧀ꦱꦤꦁ ꦤ ꦄꦤꦸꦭꦺꦴꦩꦺꦠꦷꦠꦶ ꦄꦴꦲ ‘‘ꦱꦴꦱꦤꦱ꧀ꦱ ꦄꦤꦤꦸꦭꦺꦴꦩꦠ꧀ꦠꦴ’’ꦠꦶ. ꦄꦠ꧀ꦠꦤꦴ ꦥꦪꦺꦴꦗꦶꦪꦩꦴꦤꦁ, ꦥꦫꦺꦲꦶ ꦥꦪꦺꦴꦗꦴꦥꦶꦪꦩꦴꦤꦚ꧀ꦕ ꦤꦕ꧀ꦕꦁ ꦤꦕ꧀ꦕꦨꦴꦮꦱꦴꦩꦚ꧀ꦚꦺꦤ ꦥꦴꦭ꦳ꦶꦪꦁ ꦌꦏꦺꦤꦺꦮ ꦤꦕ꧀ꦕ-ꦱꦢ꧀ꦢꦺꦤ ꦒꦲꦶꦠꦁ, ꦠꦡꦴ ꦒꦷꦠꦮꦴꦢꦶꦠ-ꦱꦢ꧀ꦢꦺꦤ ꦕꦴꦠꦶ ꦄꦴꦲ ‘‘ꦤꦕ꧀ꦕꦤꦤꦕ꧀ꦕꦴꦥꦤꦴꦢꦶꦮꦱꦺꦤꦴ’’ꦠꦶ. ꦄꦴꦢꦶ-ꦱꦢ꧀ꦢꦺꦤ ꦒꦴꦪꦤꦒꦴꦪꦴꦥꦤꦮꦴꦢꦤꦮꦴꦢꦴꦥꦤꦴꦤꦶ ꦱꦔ꧀ꦒꦪ꧀ꦲꦤ꧀ꦠꦶ. ꦢꦱ꧀ꦱꦤꦺꦤ ꦕꦺꦠ꧀ꦡ ꦱꦮꦤꦩ꧀ꦥꦶ ꦱꦔ꧀ꦒꦲꦶꦠꦁ ꦮꦶꦫꦹꦥꦺꦏꦱꦺꦱꦤꦪꦺꦤ. ꦪꦡꦴꦱꦏꦁ ꦮꦶꦱꦪꦱ꧀ꦱ ꦄꦴꦭꦺꦴꦕꦤꦱꦨꦴꦮꦠꦴꦪ ꦮꦴ ꦥꦚ꧀ꦕꦤ꧀ꦤꦁ ꦮꦶꦚ꧀ꦚꦴꦟꦴꦤꦁ ꦱꦮꦤꦏꦶꦫꦶꦪꦴꦪꦥꦶ ꦢꦱ꧀ꦱꦤꦱꦔ꧀ꦑꦺꦥꦱꦧ꧀ꦨꦴꦮꦠꦺꦴ ‘‘ꦢꦱ꧀ꦱꦤꦴ’’ꦆꦕ꧀ꦕꦺꦮ ꦮꦸꦠ꧀ꦠꦁ. ꦠꦺꦤꦴꦲ ‘‘ꦥꦚ꧀ꦕꦲꦶ ꦮꦶꦚ꧀ꦚꦴꦟꦺꦲꦶ ꦤ ꦏꦚ꧀ꦕꦶ ꦣꦩ꧀ꦩꦁ ꦥꦛꦶꦮꦶꦗꦴꦤꦴꦠꦶ ꦄꦚ꧀ꦚꦠ꧀ꦫ ꦄꦨꦶꦤꦶꦥꦴꦠꦩꦠ꧀ꦠꦴ’’ꦠꦶ. ꦄꦮꦶꦱꦹꦏꦨꦹꦠꦱ꧀ꦱ ꦒꦷꦠꦱ꧀ꦱ ꦱꦮꦤꦁ ꦏꦢꦴꦕꦶ ꦮꦛ꧀ꦛꦠꦷꦠꦶ ꦄꦴꦲ ‘‘ꦮꦶꦱꦹꦏꦨꦹꦠꦴ ꦢꦱ꧀ꦱꦤꦴ’’ꦠꦶ. ꦠꦡꦴ ꦲꦶ ꦮꦸꦠ꧀ꦠꦁ ꦥꦫꦩꦠ꧀ꦡꦗꦺꦴꦠꦶꦏꦴꦪꦁ ꦑꦸꦢ꧀ꦢꦏꦛ꧀ꦜꦏꦡꦴꦪꦁ (ꦑꦸ. ꦥꦴ. ꦄꦛ꧀ꦜ. ꧒.ꦥꦕ꧀ꦖꦶꦩꦥꦚ꧀ꦕꦱꦶꦏ꧀ꦑꦴꦥꦢꦮꦟ꧀ꦟꦤꦴ) ‘‘ꦣꦩ꧀ꦩꦹꦥꦱꦁꦲꦶꦠꦁ ꦒꦷꦠꦁ ꦮꦛ꧀ꦛꦠꦶ, ꦒꦷꦠꦹꦥꦱꦁꦲꦶꦠꦺꦴ ꦣꦩ꧀ꦩꦺꦴ ꦤ ꦮꦛ꧀ꦛꦠꦷ’’ꦠꦶ. ꦪꦁ ꦏꦶꦚ꧀ꦕꦷꦠꦶ ꦒꦤ꧀ꦡꦶꦠꦁ ꦮꦴ ꦄꦒꦤ꧀ꦡꦶꦠꦁ ꦮꦴ ꦪꦁ ꦏꦶꦚ꧀ꦕꦶ ꦥꦸꦥ꧀ꦦꦁ. ꦒꦤ꧀ꦣꦗꦴꦠꦤ꧀ꦠꦶ ꦒꦤ꧀ꦣꦗꦴꦠꦶꦏꦁ. ꦠꦱ꧀ꦱꦥꦶ ‘‘ꦪꦁ ꦏꦶꦚ꧀ꦕꦷ’’ꦠꦶ ꦮꦕꦤꦠꦺꦴ ꦥꦶꦱꦶꦠꦱ꧀ꦱ ꦄꦥꦶꦱꦶꦠꦱ꧀ꦱꦥꦶ ꦪꦱ꧀ꦱ ꦏꦱ꧀ꦱꦕꦶ ꦮꦶꦭꦺꦥꦤꦴꦢꦶ ꦤ ꦮꦛ꧀ꦛꦠꦷꦠꦶ ꦢꦱ꧀ꦱꦺꦠꦶ.

ꦈꦕ꧀ꦕꦴꦠꦶ ꦈꦕ꧀ꦕ-ꦱꦢ꧀ꦢꦺꦤ ꦱꦩꦴꦤꦠ꧀ꦡꦁ ꦌꦏꦁ ꦱꦢ꧀ꦢꦤ꧀ꦠꦫꦁ. ꦱꦺꦠꦶ ꦌꦠ꧀ꦡꦴꦠꦶ ꦱꦪꦤꦁ. ꦈꦕ꧀ꦕꦴꦱꦪꦤꦁ ꦩꦲꦴꦱꦪꦤꦚ꧀ꦕ ꦱꦩꦟꦱꦴꦫꦸꦥ꧀ꦥꦫꦲꦶꦠꦁ ꦄꦣꦶꦥ꧀ꦥꦺꦠꦤ꧀ꦠꦶ ꦄꦴꦲ ‘‘ꦥꦩꦴꦟꦴꦠꦶꦏ꧀ꦏꦤ꧀ꦠꦁ ꦄꦏꦥ꧀ꦥꦶꦪꦠ꧀ꦡꦫꦟ’’ꦤ꧀ꦠꦶ. ꦄꦴꦱꦤꦚ꧀ꦕꦺꦠ꧀ꦡ ꦱꦪꦤꦺꦤꦺꦮ ꦱꦔ꧀ꦒꦲꦶꦠꦤ꧀ꦠꦶ ꦢꦛ꧀ꦜꦧ꧀ꦧꦁ. ꦪꦱ꧀ꦩꦴ ꦥꦤ ꦄꦴꦣꦴꦫꦺ ꦥꦛꦶꦏ꧀ꦑꦶꦠ꧀ꦠꦺ ꦠꦢꦴꦣꦴꦫꦴ ꦏꦶꦫꦶꦪꦴ ꦥꦛꦶꦏ꧀ꦑꦶꦠ꧀ꦠꦴꦮ ꦲꦺꦴꦠꦶ, ꦠꦱ꧀ꦩꦴ ‘‘ꦈꦕ꧀ꦕꦴꦱꦪꦤꦩꦲꦴꦱꦪꦤꦴ’’ꦆꦕ꧀ꦕꦺꦮ ꦮꦸꦠ꧀ꦠꦁ, ꦄꦠ꧀ꦡꦠꦺꦴ ꦥꦤ ꦠꦢꦸꦥꦨꦺꦴꦒꦨꦹꦠꦤꦶꦱꦗ꧀ꦗꦴꦤꦶꦥꦗ꧀ꦗꦤꦺꦲꦶ ꦮꦶꦫꦠꦶ ꦢꦱ꧀ꦱꦶꦠꦴꦠꦶ ꦢꦛ꧀ꦜꦧ꧀ꦧꦁ. ꦄꦡ ꦮꦴ ꦈꦕ꧀ꦕꦴꦱꦪꦤꦩꦲꦴꦱꦪꦤꦚ꧀ꦕ ꦈꦕ꧀ꦕꦴꦱꦪꦤꦩꦲꦴꦱꦪꦤꦚ꧀ꦕ ꦈꦕ꧀ꦕꦴꦱꦪꦤꦩꦲꦴꦱꦪꦤꦤ꧀ꦠꦶ ꦌꦠꦱ꧀ꦩꦶꦁ ꦄꦠ꧀ꦡꦺ ꦌꦏꦱꦺꦱꦺꦤ ꦄꦪꦁ ꦤꦶꦢ꧀ꦢꦺꦱꦺꦴ ꦏꦠꦺꦴ ꦪꦡꦴ ‘‘ꦤꦴꦩꦫꦹꦥꦥꦕ꧀ꦕꦪꦴ ꦱꦭ꦳ꦴꦪꦠꦤ’’ꦤ꧀ꦠꦶ (ꦩ. ꦤꦶ. ꧓.꧑꧒꧖; ꦱꦁ. ꦤꦶ. ꧒.꧑; ꦈꦢꦴ. ꧑), ꦄꦴꦱꦤꦏꦶꦫꦶꦪꦴꦥꦸꦧ꧀ꦧꦏꦠ꧀ꦠꦴ ꦮꦴ ꦱꦪꦤꦏꦶꦫꦶꦪꦴꦪ ꦱꦪꦤꦒ꧀ꦒꦲꦟꦺꦤ ꦄꦴꦱꦤꦩ꧀ꦥꦶ ꦒꦲꦶꦠꦤ꧀ꦠꦶ ꦮꦺꦢꦶꦠꦧ꧀ꦧꦁ.

ꦢꦴꦫꦸꦩꦴꦱꦏꦺꦴꦠꦶ ꦪꦺ ꦮꦺꦴꦲꦴꦫꦁ ꦒꦕ꧀ꦖꦤ꧀ꦠꦷꦠꦶ ꦆꦠꦶ-ꦱꦢ꧀ꦢꦺꦤ ꦌꦮꦁꦥꦏꦴꦫꦺ ꦢꦱ꧀ꦱꦺꦠꦶ. ꦄꦚ꧀ꦚꦺꦲꦶ ꦒꦴꦲꦴꦥꦤꦺ ꦈꦥꦤꦶꦏ꧀ꦑꦶꦠ꧀ꦠꦱꦴꦢꦶꦪꦤꦺ ꦕ ꦥꦛꦶꦒ꧀ꦒꦲꦟꦠ꧀ꦡꦺꦴ ꦭꦧ꧀ꦨꦠꦷꦠꦶ ꦄꦴꦲ ‘‘ꦤꦺꦮ ꦤꦁ ꦈꦒ꧀ꦒꦟ꧀ꦲꦴꦠꦶ, ꦤ ꦈꦒ꧀ꦒꦟ꧀ꦲꦴꦥꦺꦠꦶ, ꦤ ꦈꦥꦤꦶꦏ꧀ꦑꦶꦠ꧀ꦠꦁ ꦱꦴꦢꦶꦪꦠꦷ’’ꦠꦶ. ꦄꦡ ꦮꦴ ꦠꦶꦮꦶꦣꦁ ꦥꦛꦶꦒ꧀ꦒꦲꦟꦁ ꦏꦴꦪꦺꦤ ꦮꦴꦕꦴꦪ ꦩꦤꦱꦴꦠꦶ. ꦠꦠ꧀ꦡ ꦏꦴꦪꦺꦤ ꦥꦛꦶꦒ꧀ꦒꦲꦟꦁ ꦈꦒ꧀ꦒꦟ꧀ꦲꦤꦁ, ꦮꦴꦕꦴꦪ ꦥꦛꦶꦒ꧀ꦒꦲꦟꦁ ꦈꦒ꧀ꦒꦲꦴꦥꦤꦁ, ꦩꦤꦱꦴ ꦥꦛꦶꦒ꧀ꦒꦲꦟꦁ ꦱꦴꦢꦶꦪꦤꦤ꧀ꦠꦶ ꦠꦶꦮꦶꦣꦩ꧀ꦥꦶ ꦥꦛꦶꦒ꧀ꦒꦲꦟꦁ ꦌꦏꦗ꧀ꦙꦁ ꦒꦲꦺꦠ꧀ꦮꦴ ‘‘ꦥꦛꦶꦒ꧀ꦒꦲꦟꦴ’’ꦠꦶ ꦮꦸꦠ꧀ꦠꦤ꧀ꦠꦶ ꦄꦴꦲ ‘‘ꦤꦺꦮ ꦤꦁ ꦈꦒ꧀ꦒꦟ꧀ꦲꦴꦠꦷ’’ꦠꦶꦄꦴꦢꦶ. ꦌꦱ ꦤꦪꦺꦴ ꦄꦴꦩꦏꦣꦚ꧀ꦚꦥꦛꦶꦒ꧀ꦒꦲꦟꦴꦠꦶꦄꦴꦢꦷꦱꦸꦥꦶ. ꦤꦷꦮꦴꦫꦴꦢꦶꦈꦥꦣꦚ꧀ꦚꦱ꧀ꦱ ꦱꦴꦭꦶꦄꦴꦢꦶꦩꦹꦭꦣꦚ꧀ꦚꦤ꧀ꦠꦺꦴꦒꦣꦠ꧀ꦠꦴ ꦮꦸꦠ꧀ꦠꦁ ‘‘ꦱꦠ꧀ꦠꦮꦶꦣꦱ꧀ꦱꦴ’’ꦠꦶ. ‘‘ꦄꦤꦸꦗꦴꦤꦴꦩꦶ, ꦨꦶꦏ꧀ꦑꦮꦺ, ꦥꦚ꧀ꦕ ꦮꦱꦴꦤꦶ ꦨꦺꦱꦗ꧀ꦗꦴꦤꦶ ꦄꦕ꧀ꦖꦮꦱꦁ ꦩꦕ꧀ꦖꦮꦱꦁ ꦱꦸꦱꦸꦏꦴꦮꦱꦁ ꦱꦸꦏꦫꦮꦱꦁ ꦒꦢ꧀ꦫꦨꦮꦱ’’ꦤ꧀ꦠꦶ (ꦩꦲꦴꦮ. ꧒꧖꧒) ꦮꦸꦠ꧀ꦠꦠ꧀ꦠꦴ ꦆꦢꦁ ꦎꦢꦶꦱ꧀ꦱ ꦄꦤꦸꦚ꧀ꦚꦴꦠꦁ ꦤꦴꦩ, ꦠꦱ꧀ꦱ ꦥꦤ ‘‘ꦏꦴꦭꦺ ꦥꦛꦶꦒ꧀ꦒꦲꦶꦠ’’ꦤ꧀ꦠꦶ (ꦩꦲꦴꦮ. ꧒꧖꧒) ꦮꦸꦠ꧀ꦠꦠ꧀ꦠꦴ ꦥꦛꦶꦒ꧀ꦒꦲꦟꦁ ꦮꦛ꧀ꦛꦠꦶ. ꦱꦠꦶ ꦥꦕ꧀ꦕꦪꦺꦠꦶ ꦄꦴꦲ ‘‘ꦄꦚ꧀ꦚꦠ꧀ꦫ ꦎꦢꦶꦱ꧀ꦱ ꦄꦤꦸꦚ꧀ꦚꦴꦠꦴ’’ꦠꦶ.

ꦱꦫꦹꦥꦺꦤ ꦮꦚ꧀ꦕꦤꦁ ꦫꦹꦥꦏꦹꦛꦁ, ꦥꦠꦶꦫꦹꦥꦺꦤ ꦮꦚ꧀ꦕꦤꦴꦠꦶ ꦄꦠ꧀ꦡꦺꦴ. ꦄꦔ꧀ꦒꦺꦤ ꦄꦠ꧀ꦠꦤꦺꦴ ꦱꦫꦷꦫꦴꦮꦪꦮꦺꦤ ꦮꦚ꧀ꦕꦤꦁ ꦄꦔ꧀ꦒꦏꦹꦛꦁ. ꦒꦲꦟꦮꦱꦺꦤ ꦮꦚ꧀ꦕꦤꦁ ꦒꦲꦟꦏꦹꦛꦁ. ꦥꦛꦶꦕ꧀ꦖꦤ꧀ꦤꦁ ꦏꦠ꧀ꦮꦴ ꦮꦚ꧀ꦕꦤꦁ ꦥꦛꦶꦕ꧀ꦖꦤ꧀ꦤꦏꦹꦛꦁ. ꦄꦏ꧀ꦏꦩꦠꦷꦠꦶ ꦤꦶꦥ꧀ꦥꦷꦭ꦳ꦺꦠꦶ, ꦥꦸꦧ꧀ꦧꦨꦴꦒꦺ ꦄꦏ꧀ꦏꦩꦠꦷꦠꦶ ꦱꦩ꧀ꦧꦤ꧀ꦣꦺꦴ.

ꦲꦢꦪꦤ꧀ꦠꦶ ꦤꦴꦭ꦳ꦶꦄꦴꦢꦷꦤꦁ ꦩꦴꦤꦨꦴꦗꦤꦴꦤꦁ ꦄꦧ꧀ꦨꦤ꧀ꦠꦫꦁ. ꦠꦶꦭꦴꦢꦷꦤꦁ ꦤꦴꦭ꦳ꦶꦄꦴꦢꦷꦲꦶ ꦩꦶꦤꦤꦏꦴꦭꦺ ꦈꦱ꧀ꦱꦴꦥꦶꦠꦱꦶꦑꦴꦪꦺꦮ ꦱꦶꦑꦴ. ꦱꦶꦑꦴꦨꦺꦢꦺꦴ ꦠꦱ꧀ꦱꦴꦲꦴꦥꦤꦁ.

ꦏꦺꦕꦷꦠꦶ ꦱꦴꦫꦱꦩꦴꦱꦴꦕꦫꦶꦪꦴ, ꦈꦠ꧀ꦠꦫꦮꦶꦲꦴꦫꦮꦴꦱꦶꦤꦺꦴ ꦕ. ꦮꦣꦺꦴꦠꦶ ꦩꦸꦛ꧀ꦜꦶꦥꦲꦴꦫꦏꦱꦴꦠꦴꦭ꦳ꦤꦴꦢꦷꦲꦶ ꦮꦶꦲꦺꦱꦤꦁ, ꦮꦶꦧꦴꦣꦤꦤ꧀ꦠꦶ ꦄꦠ꧀ꦡꦺꦴ. ꦮꦶꦲꦺꦜꦤꦠ꧀ꦡꦺꦴꦥꦶ ꦲꦶ ꦮꦣ-ꦱꦢ꧀ꦢꦺꦴ ꦢꦶꦱ꧀ꦱꦠꦶ ‘‘ꦄꦠ꧀ꦠꦴꦤꦁꦮꦣꦶꦠ꧀ꦮꦴ ꦮꦣꦶꦠ꧀ꦮꦴ ꦫꦺꦴꦢꦠꦷ’’ꦠꦶꦄꦴꦢꦷꦱꦸ (ꦥꦴꦕꦶ. ꧘꧗꧙, ꧘꧘꧑). ꦪꦡꦴ ꦲꦶ ꦄꦥꦫꦶꦒ꧀ꦒꦲꦨꦴꦮꦱꦴꦩꦚ꧀ꦚꦺ ꦱꦠꦶꦥꦶ ꦥꦧ꧀ꦧꦗꦶꦠꦺꦲꦶ ꦄꦥ꧀ꦥꦛꦶꦒ꧀ꦒꦲꦶꦠꦧ꧀ꦧꦮꦠ꧀ꦡꦸꦮꦶꦨꦴꦒꦱꦤ꧀ꦢꦱ꧀ꦱꦤꦠ꧀ꦡꦁ ꦆꦠ꧀ꦡꦶꦏꦸꦩꦴꦫꦶꦢꦴꦱꦶꦢꦴꦱꦴꦢꦪꦺꦴ ꦮꦶꦨꦴꦒꦺꦤ ꦮꦸꦠ꧀ꦠꦴ. ꦌꦮꦁ ꦥꦫꦱ꧀ꦱ ꦲꦫꦟꦨꦴꦮꦠꦺꦴ ꦄꦢꦶꦤ꧀ꦤꦴꦢꦴꦤꦨꦴꦮꦱꦴꦩꦚ꧀ꦚꦺ ꦱꦠꦶꦥꦶ ꦠꦸꦭꦴꦏꦹꦛꦴꦢꦪꦺꦴ ꦄꦢꦶꦤ꧀ꦤꦴꦢꦴꦤꦮꦶꦱꦺꦱꦨꦴꦮꦢꦱ꧀ꦱꦤꦠ꧀ꦡꦁ ꦮꦶꦨꦴꦒꦺꦤ ꦮꦸꦠ꧀ꦠꦴ, ꦤ ꦌꦮꦁ ꦥꦴꦟꦴꦠꦶꦥꦴꦠꦥꦫꦶꦪꦴꦪꦱ꧀ꦱ ꦮꦣꦱ꧀ꦱ ꦥꦸꦤ ꦒꦲꦟꦺ ꦥꦪꦺꦴꦗꦤꦁ ꦄꦠ꧀ꦡꦶ, ꦠꦠ꧀ꦡ ꦱꦪꦁꦏꦴꦫꦺꦴ, ꦆꦣ ꦥꦫꦁꦏꦴꦫꦺꦴꦠꦶ ꦕ ꦤ ꦱꦏ꧀ꦏꦴ ꦮꦠ꧀ꦠꦸꦁ ‘‘ꦏꦴꦪꦮꦕꦷꦥꦪꦺꦴꦒꦱꦩꦸꦛ꧀ꦜꦴꦥꦶꦏꦴ ꦕꦺꦠꦤꦴ ꦖꦥ꧀ꦥꦪꦺꦴꦒꦴ’’ꦠꦶ ꦮꦕꦤꦠꦺꦴ. ꦠꦱ꧀ꦩꦴ ꦪꦡꦴꦮꦸꦠ꧀ꦠꦺꦴ ꦌꦮꦺꦠ꧀ꦡ ꦄꦠ꧀ꦡꦺꦴ ꦪꦸꦠ꧀ꦠꦺꦴ. ꦄꦛ꧀ꦜꦏꦡꦴꦪꦁ ꦥꦤ ‘‘ꦮꦣꦺꦴꦠꦶ ꦩꦴꦫꦟ’’ꦤ꧀ꦠꦶ ꦮꦸꦠ꧀ꦠꦁ, ꦠꦩ꧀ꦥꦶ ꦥꦺꦴꦡꦤꦩꦺꦮ ꦱꦤ꧀ꦣꦴꦪꦴꦠꦶ ꦕ ꦱꦏ꧀ꦏꦴ ꦮꦶꦚ꧀ꦚꦴꦠꦸꦁ ꦩꦴꦫꦟ-ꦱꦢ꧀ꦢꦱ꧀ꦱꦥꦶ ꦮꦶꦲꦶꦁꦱꦤꦺ ꦢꦶꦱ꧀ꦱꦤꦠꦺꦴ.

꧒꧙꧔. ꦕꦷꦮꦫꦥꦶꦟ꧀ꦝꦥꦴꦠꦴꦤꦁ ꦪꦡꦴꦏ꧀ꦏꦩꦁ ꦏꦴꦪꦏꦸꦕ꧀ꦖꦶꦥꦫꦶꦲꦫꦟꦩꦠ꧀ꦠꦗꦺꦴꦠꦤꦴꦪꦁ ꦄꦮꦶꦱꦺꦱꦠꦺꦴ ꦄꦛ꧀ꦜꦤ꧀ꦤꦁ ꦥꦫꦶꦏ꧀ꦑꦴꦫꦴꦤꦁ ꦄꦤ꧀ꦠꦫꦺ ꦠꦥ꧀ꦥꦪꦺꦴꦗꦤꦠꦴ ꦱꦩ꧀ꦨꦮꦠꦷꦠꦶ ꦢꦱ꧀ꦱꦺꦤ꧀ꦠꦺꦴ ‘‘ꦠꦺ ꦱꦧ꧀ꦧꦺꦥꦷ’’ꦠꦶꦄꦴꦢꦶꦩꦴꦲ. ꦌꦠꦺꦥꦷꦠꦶ ꦤꦮꦥꦫꦶꦏ꧀ꦑꦴꦫꦶꦏꦴꦢꦪꦺꦴꦥꦶ ꦄꦥ꧀ꦥꦶꦕ꧀ꦖꦴꦮ ꦱꦤ꧀ꦠꦸꦛ꧀ꦜꦴꦮ. ꦤ ꦲꦶ ꦠꦠ꧀ꦡꦏꦺꦤ ꦩꦲꦶꦕ꧀ꦖꦠꦴ, ꦄꦱꦤ꧀ꦠꦸꦛ꧀ꦜꦶꦠꦴ ꦮꦴ ꦲꦺꦴꦠꦷꦠꦶ.

ꦕꦠꦹꦱꦸ ꦢꦶꦱꦴꦱꦸ ꦱꦸꦑꦁ ꦮꦶꦲꦫꦠꦶ, ꦠꦠꦺꦴ ꦌꦮ ꦱꦸꦑꦮꦶꦲꦴꦫꦛ꧀ꦜꦴꦤꦨꦹꦠꦴ ꦕꦠꦱ꧀ꦱꦺꦴ ꦢꦶꦱꦴ ꦄꦱ꧀ꦱ ꦱꦤ꧀ꦠꦷꦠꦶ ꦮꦴ ꦕꦴꦠꦸꦢ꧀ꦢꦶꦱꦺꦴ. ꦠꦠ꧀ꦡ ꦕꦴꦪꦁ ꦱꦠ꧀ꦠꦺ ꦮꦴ ꦱꦔ꧀ꦑꦴꦫꦺ ꦮꦴ ꦨꦪꦺꦤ ꦤ ꦥꦛꦶꦲꦚ꧀ꦚꦠꦷꦠꦶ ꦄꦥ꧀ꦥꦛꦶꦓꦺꦴ. ꦢ꧀ꦮꦴꦢꦱꦮꦶꦣꦱ꧀ꦱ ꦱꦤ꧀ꦠꦺꦴꦱꦱ꧀ꦱ ꦮꦱꦺꦤ ꦱꦤ꧀ꦠꦸꦱ꧀ꦱꦤꦏꦺꦴ ꦱꦤ꧀ꦠꦸꦱ꧀ꦱꦩꦴꦤꦺꦴ. ꦆꦠꦫꦷꦠꦫꦺꦤꦴꦠꦶ ꦈꦕ꧀ꦕꦴꦮꦕꦺꦤ. ꦥꦫꦶꦱ꧀ꦱꦪꦴꦤꦁ ꦧꦴꦲꦶꦫꦴꦤꦁ ꦱꦷꦲꦧ꧀ꦪꦒ꧀ꦓꦴꦢꦷꦤꦁ, ꦄꦧ꧀ꦨꦤ꧀ꦠꦫꦴꦤꦚ꧀ꦕ ꦏꦴꦩꦕ꧀ꦖꦤ꧀ꦢꦴꦢꦷꦤꦁ ꦏꦴꦪꦕꦶꦠ꧀ꦠꦸꦥꦢ꧀ꦢꦮꦴꦤꦁ ꦄꦨꦶꦨꦮꦤꦠꦺꦴ ꦥꦫꦶꦱ꧀ꦱꦪꦴꦤꦁ ꦱꦲꦶꦠꦴ. ꦡꦢ꧀ꦣꦨꦴꦮꦏꦫꦨꦪꦴꦨꦴꦮꦺꦤ ꦄꦕ꧀ꦖꦩ꧀ꦨꦷ. ꦌꦏꦺꦴ ꦄꦱꦲꦴꦪꦺꦴ. ꦠꦠꦺꦴ ꦌꦮ ꦑꦒ꧀ꦒꦩꦶꦒꦱꦶꦔ꧀ꦒꦱꦢꦶꦱꦠꦴꦪ ꦑꦒ꧀ꦒꦮꦶꦱꦴꦟꦏꦥ꧀ꦥꦺꦴ ꦕꦫꦺꦪ꧀ꦪꦴꦠꦶ ꦄꦠ꧀ꦡꦺꦴ.

ꦖꦶꦤ꧀ꦤꦥꦏ꧀ꦑꦺꦴ, ꦄꦱꦚ꧀ꦗꦴꦠꦥꦏ꧀ꦑꦺꦴ ꦮꦴ ꦱꦏꦸꦟꦺꦴ ꦒꦤ꧀ꦠꦸꦁ ꦤ ꦱꦏ꧀ꦏꦺꦴꦠꦷꦠꦶ ‘‘ꦥꦏ꧀ꦑꦷ ꦱꦏꦸꦟꦺꦴ’’ꦠꦶ ꦥꦏ꧀ꦑꦶ-ꦱꦢ꧀ꦢꦺꦤ ꦮꦶꦱꦺꦱꦺꦠ꧀ꦮꦴ ꦱꦏꦸꦟꦺꦴ ꦥꦴꦭ꦳ꦶꦪꦁ ꦮꦸꦠ꧀ꦠꦺꦴꦠꦶ ꦄꦴꦲ ‘‘ꦥꦏ꧀ꦑꦪꦸꦠ꧀ꦠꦺꦴ ꦱꦏꦸꦟꦺꦴ’’ꦠꦶ. ꦪꦱ꧀ꦱ ꦱꦤ꧀ꦤꦶꦣꦶꦏꦴꦫꦥꦫꦶꦨꦺꦴꦒꦺꦴ ꦏꦶꦚ꧀ꦕꦶ ꦜꦥꦺꦠꦧ꧀ꦧꦁ ꦱꦴꦥꦺꦏ꧀ꦑꦴꦪ ꦜꦥꦤꦚ꧀ꦕ ꦤꦠ꧀ꦡꦶ, ꦠꦴꦢꦶꦱꦺꦴ ꦄꦪꦁ ꦨꦶꦏ꧀ꦑꦹꦠꦶ ꦢꦱ꧀ꦱꦺꦤ꧀ꦠꦺꦴ ‘‘ꦄꦪꦁ ꦥꦤꦺꦠ꧀ꦡ ꦱꦔ꧀ꦑꦺꦥꦠ꧀ꦡꦺꦴ’’ꦠꦶꦄꦴꦢꦶꦩꦴꦲ. ꦄꦫꦶꦪꦤ꧀ꦠꦶ ꦄꦥꦺꦤ꧀ꦠꦶ ꦠꦠꦺꦴ ꦢꦺꦴꦱꦴ, ꦠꦺꦲꦶ ꦮꦴ ꦄꦴꦫꦏꦴꦠꦶ ꦄꦫꦶꦪꦺꦴꦠꦶ ꦄꦴꦲ ‘‘ꦄꦫꦶꦪꦺꦤꦴꦠꦶ ꦤꦶꦢ꧀ꦢꦺꦴꦱꦺꦤꦴ’’ꦠꦶ. ꦄꦗ꧀ꦙꦠ꧀ꦠꦤ꧀ꦠꦶ ꦄꦠ꧀ꦠꦤꦶ. ꦤꦶꦢ꧀ꦢꦺꦴꦱꦱꦸꦑꦤ꧀ꦠꦶ ꦤꦶꦫꦴꦩꦶꦱꦱꦸꦑꦁ ꦏꦶꦭꦺꦱꦮꦗ꧀ꦗꦫꦲꦶꦠꦠ꧀ꦠꦴ.

꧒꧙꧕. ꦪꦡꦴꦮꦸꦠ꧀ꦠꦺ ꦱꦷꦭꦱꦁꦮꦫꦺ ꦥꦠꦶꦛ꧀ꦜꦶꦠꦱ꧀ꦱꦺꦮ ꦆꦤ꧀ꦢ꧀ꦫꦶꦪꦱꦁꦮꦫꦺꦴ ꦆꦕ꧀ꦖꦶꦠꦧ꧀ꦧꦺꦴ ꦠꦢꦣꦶꦛ꧀ꦜꦴꦤꦠꦺꦴ, ꦠꦱ꧀ꦱ ꦕ ꦥꦫꦶꦥꦴꦭꦏꦨꦴꦮꦠꦺꦴꦠꦶ ꦮꦸꦠ꧀ꦠꦁ ‘‘ꦱꦺꦴ ꦆꦩꦶꦤꦴ ꦄꦫꦶꦪꦺꦤ ꦱꦷꦭꦏ꧀ꦑꦤ꧀ꦣꦺꦤ ꦱꦩꦤ꧀ꦤꦴꦒꦠꦺꦴ ꦨꦶꦏ꧀ꦑꦹ’’ꦠꦶ. ꦱꦺꦱꦥꦢꦺꦱꦹꦠꦶ ‘‘ꦤ ꦤꦶꦩꦶꦠ꧀ꦠꦒ꧀ꦒꦴꦲꦷ ꦲꦺꦴꦠꦷ’’ꦠꦶꦄꦴꦢꦷꦱꦸ ꦥꦢꦺꦱꦸ. ꦪꦱ꧀ꦩꦴ ꦮꦶꦱꦸꦢ꧀ꦣꦶꦩꦒ꧀ꦒꦺ (ꦮꦶꦱꦸꦢ꧀ꦣꦶ. ꧑.꧑꧕) ꦮꦸꦠ꧀ꦠꦁ, ꦠꦱ꧀ꦩꦴ ꦠꦱ꧀ꦱ ꦭꦷꦤꦠ꧀ꦡꦥ꧀ꦥꦏꦴꦱꦶꦤꦶꦪꦁ ꦱꦁꦮꦟ꧀ꦟꦤꦴꦪꦁ (ꦮꦶꦱꦸꦢ꧀ꦣꦶ. ꦩꦲꦴꦛꦷ. ꧑.꧑꧕) ꦮꦸꦠ꧀ꦠꦤꦪꦺꦤꦺꦮ ꦮꦺꦢꦶꦠꦧ꧀ꦧꦁ. ꦫꦹꦥꦴꦢꦷꦱꦸ ꦤꦶꦩꦶꦠ꧀ꦠꦴꦢꦶꦒ꧀ꦒꦴꦲꦥꦫꦶꦮꦗ꧀ꦗꦤꦭꦏ꧀ꦑꦟꦠ꧀ꦠꦴ ꦆꦤ꧀ꦢ꧀ꦫꦶꦪꦱꦁꦮꦫꦱ꧀ꦱ ꦏꦶꦭꦺꦱꦺꦲꦶ ꦄꦤꦮꦱꦶꦠ꧀ꦠꦱꦸꦑꦠꦴ ꦄꦮꦶꦏꦶꦟ꧀ꦟꦱꦸꦑꦠꦴ ꦕꦱ꧀ꦱ ꦮꦸꦠ꧀ꦠꦴ.

꧒꧙꧖. ꦥꦕ꧀ꦕꦪꦱꦩ꧀ꦥꦠ꧀ꦠꦶꦤ꧀ꦠꦶ ꦥꦕ꧀ꦕꦪꦥꦴꦫꦶꦥꦹꦫꦶꦁ. ꦆꦩꦺ ꦕꦠ꧀ꦠꦴꦫꦺꦴꦠꦶ ꦱꦷꦭꦱꦁꦮꦫꦺꦴ ꦱꦤ꧀ꦠꦺꦴꦱꦺꦴ ꦆꦤ꧀ꦢ꧀ꦫꦶꦪꦱꦁꦮꦫꦺꦴ ꦱꦠꦶꦱꦩ꧀ꦥꦗꦚ꧀ꦚꦤ꧀ꦠꦶ ꦆꦩꦺ ꦕꦠ꧀ꦠꦴꦫꦺꦴ ꦄꦫꦚ꧀ꦚꦮꦴꦱꦱ꧀ꦱ ꦱꦩ꧀ꦨꦴꦫꦴ. ꦠꦶꦫꦕ꧀ꦖꦴꦤꦒꦠꦺꦲꦶ ꦮꦠ꧀ꦠꦧ꧀ꦧꦠꦁ ꦄꦴꦥꦗ꧀ꦗꦠꦶ ꦆꦱꦶꦱꦶꦔ꧀ꦒꦱ꧀ꦱ ꦥꦶꦠꦸꦄꦴꦢꦪꦺꦴ ꦮꦶꦪ. ꦮꦤꦕꦫꦏꦺꦲꦷꦠꦶ ꦮꦤꦕꦫꦏꦩꦴꦠꦸꦒꦴꦩꦺꦲꦶ. ꦨꦺꦫꦮꦱꦢ꧀ꦢꦁ ꦱꦴꦮꦺꦤ꧀ꦠꦶ, ꦠꦴꦮꦠꦴ ꦄꦥꦭꦴꦪꦤ꧀ꦠꦴꦤꦁ ꦲꦠ꧀ꦡꦺꦲꦶ ꦱꦷꦱꦁ…ꦥꦺ… ꦏꦫꦺꦴꦤ꧀ꦠꦶ. ꦥꦟ꧀ꦟꦠ꧀ꦠꦶꦮꦷꦠꦶꦏ꧀ꦏꦩꦱꦔ꧀ꦑꦴꦠꦁ ꦏꦴꦭ꦳ꦏꦁ ꦮꦴ. ꦩꦶꦕ꧀ꦖꦴꦮꦶꦠꦏ꧀ꦏꦱꦔ꧀ꦑꦴꦠꦁ ꦠꦶꦭꦏꦁ ꦮꦴ. ꦠꦤ꧀ꦠꦶ ꦥꦷꦠꦶꦁ ꦮꦶꦨꦹꦠꦨꦴꦮꦺꦤ ꦈꦥꦛ꧀ꦜꦴꦤꦠꦺꦴ ꦑꦪꦠꦺꦴ ꦱꦩ꧀ꦩꦱꦤ꧀ꦠꦺꦴ.

ꦮꦶꦮꦶꦠ꧀ꦠꦤ꧀ꦠꦶ ꦗꦤꦮꦶꦮꦶꦠ꧀ꦠꦁ. ꦠꦺꦤꦴꦲ ‘‘ꦱꦸꦚ꧀ꦚ’’ꦤ꧀ꦠꦶ. ꦱꦴ ꦕ ꦮꦶꦮꦶꦠ꧀ꦠꦠꦴ ꦤꦶꦱ꧀ꦱꦢ꧀ꦢꦨꦴꦮꦺꦤ ꦭꦏ꧀ꦑꦶꦠꦧ꧀ꦧꦴꦠꦶ ꦄꦴꦲ ‘‘ꦄꦥ꧀ꦥꦱꦢ꧀ꦢꦁ ꦄꦥ꧀ꦥꦤꦶꦒ꧀ꦓꦺꦴꦱ’’ꦤ꧀ꦠꦶ. ꦄꦴꦮꦱꦡꦨꦹꦠꦁ ꦱꦺꦤꦴꦱꦤꦁ ꦮꦶꦲꦫꦶꦠꦧ꧀ꦧꦛ꧀ꦜꦺꦤ ꦮꦶꦲꦴꦫꦱꦺꦤꦴꦱꦤꦁ. ꦩꦱꦴꦫꦏꦴꦢꦶ ꦩꦚ꧀ꦕꦥꦷꦜꦁ ꦠꦠ꧀ꦡ ꦄꦠ꧀ꦡꦫꦶꦠꦧ꧀ꦧꦁ ꦨꦶꦱꦶꦈꦥꦣꦴꦤꦚ꧀ꦕ ꦩꦚ꧀ꦕꦥꦷꦜꦱꦩ꧀ꦧꦤ꧀ꦣꦶꦠꦺꦴ ꦩꦚ꧀ꦕꦥꦷꦜꦱꦺꦤꦴꦱꦤꦁ. ꦕꦶꦩꦶꦭꦶꦏꦴꦢꦶ ꦨꦹꦩꦶꦪꦁ ꦱꦤ꧀ꦡꦫꦶꦠꦧ꧀ꦧꦠꦴꦪ ꦱꦤ꧀ꦡꦠꦱꦺꦤꦴꦱꦤꦁ. ꦫꦸꦏ꧀ꦑꦩꦹꦭꦴꦢꦶ ꦥꦛꦶꦏ꧀ꦏꦩꦶꦠꦧ꧀ꦧꦛ꧀ꦜꦴꦤꦁ ꦕꦔ꧀ꦏꦩꦤꦴꦢꦷꦤꦁ ꦎꦏꦴꦱꦨꦴꦮꦠꦺꦴ ꦎꦏꦴꦱꦱꦺꦤꦴꦱꦤꦁ.

‘‘ꦄꦤꦸꦕ꧀ꦖꦮꦶꦏꦁ ꦢꦱ꧀ꦱꦺꦤ꧀ꦠꦺꦴ’’ꦠꦶ ꦮꦠ꧀ꦮꦴ ꦠꦩꦺꦮ ꦄꦤꦸꦕ꧀ꦖꦮꦶꦏꦨꦴꦮꦁ ꦮꦶꦨꦴꦮꦺꦠꦸꦁ ‘‘ꦠꦠ꧀ꦡ ꦲꦷ’’ꦠꦶꦄꦴꦢꦶ ꦮꦸꦠ꧀ꦠꦁ. ꦄꦕ꧀ꦖꦤ꧀ꦤꦤ꧀ꦠꦶ ꦆꦛ꧀ꦜꦏꦖꦢꦤꦴꦢꦶꦤꦴ ꦄꦤ꧀ꦠꦩꦱꦺꦴ ꦫꦸꦏ꧀ꦑꦱꦴꦑꦴꦲꦶꦥꦶ ꦤ ꦖꦤ꧀ꦤꦁ.

ꦨꦠ꧀ꦠꦱ꧀ꦱ ꦥꦕ꧀ꦖꦠꦺꦴꦠꦶ ꦨꦠ꧀ꦠꦨꦸꦚ꧀ꦗꦤꦱ꧀ꦱ ꦥꦕ꧀ꦖꦠꦺꦴ. ꦈꦴꦫꦸꦧꦢ꧀ꦣꦴꦱꦤꦤ꧀ꦠꦶ ꦈꦴꦫꦹꦤꦁ ꦄꦣꦺꦴꦧꦤ꧀ꦣꦤꦮꦱꦺꦤ ꦤꦶꦱꦗ꧀ꦗꦁ. ꦲꦺꦛ꧀ꦜꦶꦩꦏꦴꦪꦱ꧀ꦱ ꦄꦤꦸꦗꦸꦏꦛ꧀ꦜꦥꦤꦁ ꦤꦶꦱꦗ꧀ꦗꦴꦮꦕꦤꦺꦤꦺꦮ ꦧꦺꦴꦣꦶꦠꦤ꧀ꦠꦶ. ꦈꦗꦸꦁ ꦏꦴꦪꦤ꧀ꦠꦶ ꦌꦠ꧀ꦡ ꦏꦴꦪ-ꦱꦢ꧀ꦢꦺꦴ ꦈꦥꦫꦶꦩꦏꦴꦪꦮꦶꦱꦪꦺꦴꦠꦶ ꦄꦴꦲ ‘‘ꦈꦥꦫꦶꦩꦁ ꦱꦫꦷꦫꦁ ꦈꦗꦸꦏꦁ ꦜꦥꦺꦠ꧀ꦮꦴ’’ꦠꦶ. ꦠꦁ ꦥꦤ ꦈꦗꦸꦏꦛ꧀ꦜꦥꦤꦁ ꦱꦫꦹꦥꦠꦺꦴ ꦥꦪꦺꦴꦗꦤꦠꦺꦴ ꦕ ꦢꦱ꧀ꦱꦺꦠꦸꦁ ‘‘ꦄꦛ꧀ꦜꦴꦫꦱꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦤ ꦥꦟꦩꦤ꧀ꦠꦷꦠꦶ ꦤ ꦎꦟꦩꦤ꧀ꦠꦶ. ꦤ ꦥꦫꦶꦥꦠꦠꦷꦠꦶ ꦤ ꦮꦶꦒꦕ꧀ꦖꦠꦶ, ꦮꦷꦡꦶꦁ ꦤ ꦮꦶꦭꦔ꧀ꦓꦺꦠꦶ. ꦠꦠꦺꦴ ꦌꦮ ꦥꦸꦧ꧀ꦧꦺꦤꦴꦥꦫꦁ ꦮꦶꦱꦺꦱꦥ꧀ꦥꦠ꧀ꦠꦶꦪꦴ ꦏꦩ꧀ꦩꦛ꧀ꦜꦴꦤꦁ ꦮꦸꦢ꧀ꦣꦶꦁ ꦦꦴꦠꦶꦁ ꦈꦥꦒꦕ꧀ꦖꦠꦶ. ꦩꦸꦑꦱꦩꦷꦥꦺꦠꦶ ꦩꦸꦑꦱ꧀ꦱ ꦱꦩꦷꦥꦺ ꦤꦴꦱꦶꦏꦒ꧀ꦒꦺ ꦮꦴ ꦈꦠ꧀ꦠꦫꦺꦴꦛ꧀ꦜꦺ ꦮꦴ. ꦆꦣ ꦥꦫꦶ-ꦱꦢ꧀ꦢꦺꦴ ꦄꦨꦶ-ꦱꦢ꧀ꦢꦺꦤ ꦱꦩꦴꦤꦠ꧀ꦡꦺꦴꦠꦶ ꦄꦴꦲ ‘‘ꦏꦩ꧀ꦩꦛ꧀ꦜꦴꦤꦴꦨꦶꦩꦸꦑ’’ꦤ꧀ꦠꦶ, ꦧꦲꦶꦢ꧀ꦣꦴ ꦥꦸꦡꦸꦠ꧀ꦠꦴꦫꦩ꧀ꦩꦟꦠꦺꦴ ꦤꦶꦮꦴꦫꦺꦠ꧀ꦮꦴ ꦏꦩ꧀ꦩꦛ꧀ꦜꦴꦤꦁꦪꦺꦮ ꦥꦸꦫꦏ꧀ꦑꦠ꧀ꦮꦴꦠꦶ ꦄꦠ꧀ꦡꦺꦴ. ꦥꦫꦷꦠꦶ ꦥꦫꦶꦒ꧀ꦒꦲꦛ꧀ꦜꦺꦴ ‘‘ꦥꦫꦶꦟꦴꦪꦶꦏꦴ’’ꦠꦶꦄꦴꦢꦷꦱꦸ (ꦣ. ꦱ. ꧑꧖) ꦮꦶꦪ. ꦤꦶꦪ꧀ꦪꦴꦤꦛ꧀ꦜꦺꦴ ꦥꦛꦶꦥꦏ꧀ꦑꦠꦺꦴ ꦤꦶꦒ꧀ꦒꦩꦤꦛ꧀ꦜꦺꦴ, ꦠꦱ꧀ꦩꦴ ꦥꦫꦶꦒ꧀ꦒꦲꦶꦠꦤꦶꦪ꧀ꦪꦴꦤꦱꦠꦶꦤ꧀ꦠꦶ ꦱꦧ꧀ꦧꦡꦴ ꦒꦲꦶꦠꦴꦱꦩ꧀ꦩꦺꦴꦱꦁ ꦥꦫꦶꦕ꧀ꦕꦠ꧀ꦠꦱꦩ꧀ꦩꦺꦴꦱꦁ ꦱꦠꦶꦁ ꦏꦠ꧀ꦮꦴ, ꦥꦫꦩꦁ ꦱꦠꦶꦤꦺꦥꦏ꧀ꦏꦁ ꦈꦥꦛ꧀ꦜꦥꦺꦠ꧀ꦮꦴꦠꦶ ꦄꦠ꧀ꦡꦺꦴ.

ꦮꦶꦏ꧀ꦑꦩ꧀ꦨꦤꦮꦱꦺꦤꦴꦠꦶ ꦌꦠ꧀ꦡ ꦮꦶꦏ꧀ꦑꦩ꧀ꦨꦤꦁ ꦄꦤꦸꦥ꧀ꦥꦴꦢꦤꦁ ꦄꦥ꧀ꦥꦮꦠ꧀ꦠꦤꦁ ꦤ ꦥꦛꦶꦥꦏ꧀ꦑꦺꦤ ꦱꦸꦥ꧀ꦥꦲꦷꦤꦠꦴ. ꦥꦲꦷꦤꦠ꧀ꦠꦴꦠꦶ ꦕ ꦥꦲꦷꦤꦱꦢꦶꦱꦠꦁ ꦱꦤ꧀ꦣꦴꦪ ꦮꦸꦠ꧀ꦠꦁ ꦙꦴꦤꦱ꧀ꦱ ꦄꦤꦣꦶꦒꦠꦠꦴ. ꦠꦡꦴꦥꦶ ꦤꦪꦶꦢꦁ ꦕꦏ꧀ꦑꦸꦮꦶꦚ꧀ꦚꦴꦟꦁ ꦮꦶꦪ ꦱꦨꦴꦮꦠꦺꦴ ꦮꦶꦒꦠꦴꦨꦶꦗ꧀ꦙꦁ, ꦄꦡ ꦑꦺꦴ ꦨꦴꦮꦤꦴꦮꦱꦺꦤ. ꦠꦺꦤꦴꦲ ‘‘ꦤ ꦕꦏ꧀ꦑꦸꦮꦶꦚ꧀ꦚꦴꦟꦱꦢꦶꦱꦺꦤꦴ’’ꦠꦶ. ꦌꦱꦺꦮ ꦤꦪꦺꦴꦠꦶ ꦪꦡꦴ ꦕꦏ꧀ꦑꦸꦮꦶꦚ꧀ꦚꦴꦟꦁ ꦱꦨꦴꦮꦺꦤ ꦮꦶꦒꦠꦴꦨꦶꦗ꧀ꦙꦁ ꦄꦧ꧀ꦪꦴꦥꦤ꧀ꦤꦚ꧀ꦕ, ꦤ ꦨꦴꦮꦤꦴꦪ ꦮꦶꦏ꧀ꦑꦩ꧀ꦨꦶꦠꦠ꧀ꦠꦴ, ꦤ ꦌꦮꦩꦶꦢꦁ. ꦆꦢꦁ ꦥꦤ ꦕꦶꦠ꧀ꦠꦁ ꦨꦴꦮꦤꦴꦪ ꦥꦫꦶꦱꦺꦴꦣꦶꦠꦠ꧀ꦠꦴ ꦄꦧ꧀ꦪꦴꦥꦤ꧀ꦤꦁ ꦮꦶꦒꦠꦡꦶꦤꦩꦶꦢ꧀ꦣꦁ ꦄꦤꦸꦢ꧀ꦣꦠꦁ ꦤꦶꦧ꧀ꦧꦶꦕꦶꦏꦶꦕ꧀ꦖꦚ꧀ꦕꦴꦠꦶ ꦄꦠ꧀ꦡꦺꦴ. ꦆꦢꦁ ꦈꦨꦪꦤ꧀ꦠꦶ ꦱꦠꦶꦱꦩ꧀ꦥꦗꦚ꧀ꦚꦩꦴꦲ.

꧒꧙꧗. ꦈꦕ꧀ꦖꦶꦤ꧀ꦢꦶꦠ꧀ꦮꦴ ꦥꦴꦠꦺꦤ꧀ꦠꦷꦠꦶ ꦌꦠ꧀ꦡ ꦈꦕ꧀ꦖꦶꦤ꧀ꦢꦤꦁ ꦥꦴꦠꦤꦚ꧀ꦕ ꦠꦴꦱꦁ ꦥꦚ꧀ꦚꦴꦤꦁ ꦄꦤꦸꦥ꧀ꦥꦤ꧀ꦤꦴꦤꦁ ꦈꦥ꧀ꦥꦗ꧀ꦗꦶꦠꦸꦁ ꦄꦥ꧀ꦥꦢꦴꦤꦩꦺꦮ. ꦆꦠꦶ ꦩꦲꦒ꧀ꦒꦠꦴꦤꦸꦠ꧀ꦠꦫꦥꦚ꧀ꦚꦴꦤꦁ ꦌꦏꦕ꧀ꦕꦴꦪ ꦕ ꦥꦫꦶꦠ꧀ꦠꦥꦚ꧀ꦚꦴꦪ ꦄꦤꦸꦥ꧀ꦥꦠ꧀ꦠꦶꦲꦺꦠꦸꦨꦹꦠꦴ ꦤꦷꦮꦫꦟꦴ ꦣꦩ꧀ꦩꦴ ꦆꦠꦫꦴꦪ ꦕ ꦱꦩꦠ꧀ꦡꦠꦁ ꦮꦶꦲꦤꦤ꧀ꦠꦶꦪꦺꦮꦴꦠꦶ ꦥꦚ꧀ꦚꦴꦪ ꦢꦸꦧ꧀ꦧꦭꦷꦏꦫꦟꦴ ꦮꦸꦠ꧀ꦠꦴ. ꦆꦢꦩ꧀ꦥꦶ ꦥꦜꦩꦗ꧀ꦙꦴꦤꦁ ꦮꦺꦤꦺꦪ꧀ꦪꦱꦤ꧀ꦠꦴꦤꦺ ꦥꦠꦶꦛ꧀ꦜꦴꦥꦶꦪꦩꦴꦤꦁ ꦚꦴꦟꦁ ꦥꦗ꧀ꦗꦠꦶ ꦌꦠ꧀ꦡꦴꦠꦶ ꦚꦴꦟꦥꦢꦁ. ꦚꦴꦟꦁ ꦮꦭ꦳ꦚ꧀ꦗꦺꦠꦶ ꦌꦠ꧀ꦡꦴꦠꦶ ꦚꦴꦟꦮꦭ꦳ꦚ꧀ꦗꦁ.

꧒꧙꧙. ꦤ ꦠꦴꦮ ꦤꦶꦛ꧀ꦜꦁ ꦒꦠꦺꦴ ꦧꦴꦲꦶꦫꦏꦴꦤꦁ ꦚꦴꦟꦺꦤ ꦄꦏ꧀ꦏꦤ꧀ꦠꦛ꧀ꦜꦴꦤꦴꦤꦶꦥꦶ ꦱꦶꦪꦸꦤ꧀ꦠꦶ. ꦪꦢꦶ ꦌꦮꦁ ꦄꦤꦚ꧀ꦚꦱꦴꦣꦴꦫꦟꦺ ꦩꦒ꧀ꦒꦚꦴꦟꦥꦢꦺ ꦏꦡꦁ ꦤ ꦤꦶꦛ꧀ꦜꦔ꧀ꦒꦠꦺꦴꦠꦶ ꦄꦴꦲ ‘‘ꦩꦒ꧀ꦒꦏ꧀ꦑꦟꦺꦥꦷ’’ꦠꦶꦄꦴꦢꦶ. ꦠꦷꦱꦸ ꦫꦠꦤꦺꦱꦸ ꦤꦶꦛ꧀ꦜꦁ ꦒꦠꦺꦴ ꦲꦺꦴꦠꦷꦠꦶ ꦧꦸꦢ꧀ꦣꦱꦸꦧꦸꦢ꧀ꦣꦠꦁ ꦣꦩ꧀ꦩꦱꦸꦣꦩ꧀ꦩꦠꦁ ꦱꦔ꧀ꦓꦱꦸꦥ꧀ꦥꦛꦶꦥꦠ꧀ꦠꦶꦠꦚ꧀ꦕ ꦄꦴꦫꦧ꧀ꦨ ꦚꦴꦟꦺꦤ ꦤꦶꦛ꧀ꦜꦁ ꦤꦶꦕ꧀ꦖꦪꦁ ꦈꦥꦒꦠꦺꦴ ꦲꦺꦴꦠꦶ. ꦏꦴꦩꦚ꧀ꦕꦺꦠ꧀ꦡ ꦥꦜꦩꦩꦒ꧀ꦒꦺꦤꦺꦮ ꦱꦧ꧀ꦧꦱꦺꦴ ꦮꦶꦕꦶꦏꦶꦕ꧀ꦖꦴꦪ ꦥꦲꦷꦤꦠ꧀ꦠꦴ ꦱꦧ꧀ꦧꦱ꧀ꦱꦥꦶ ꦄꦫꦶꦪꦱꦴꦮꦏꦱ꧀ꦱ ꦏꦔ꧀ꦑꦴ ꦮꦴ ꦮꦶꦩꦠꦶ ꦮꦴ ꦤꦠ꧀ꦡꦶ, ꦠꦠ꧀ꦡ ꦥꦤ ꦪꦡꦴ ꦥꦚ꧀ꦚꦴꦮꦺꦥꦸꦭ꧀ꦭꦥ꧀ꦥꦠ꧀ꦠꦱ꧀ꦱ ꦄꦫꦲꦠꦺꦴ ꦱꦮꦶꦱꦪꦺ ꦚꦴꦟꦁ ꦱꦮꦶꦱꦺꦱꦁ ꦎꦒꦴꦲꦠꦶ, ꦤ ꦠꦡꦴ ꦄꦤꦴꦒꦴꦩꦶꦄꦴꦢꦷꦤꦤ꧀ꦠꦶ ꦫꦠꦤꦠ꧀ꦠꦪꦺ ꦱꦴꦠꦶꦱꦪꦁ ꦚꦴꦟꦤꦶꦕ꧀ꦖꦪꦒꦩꦤꦁ ꦱꦤ꧀ꦣꦴꦪ ‘‘ꦄꦒ꧀ꦒꦩꦒ꧀ꦒꦮꦱꦺꦤ ꦠꦠ꧀ꦡꦤꦶꦛ꧀ꦜꦴꦒꦩꦤꦁ ꦮꦸꦠ꧀ꦠ’’ꦤ꧀ꦠꦶ ꦮꦸꦠ꧀ꦠꦁ. ꦪꦁ ꦥꦤꦺꦠ꧀ꦡ ꦄꦮꦶꦨꦠ꧀ꦠꦁ, ꦠꦁ ꦱꦸꦮꦶꦚ꧀ꦚꦺꦪ꧀ꦪꦩꦺꦮꦴꦠꦶ.

ꦕꦹꦭ꦳ꦲꦠ꧀ꦡꦶꦥꦢꦺꦴꦥꦩꦱꦸꦠ꧀ꦠꦮꦟ꧀ꦟꦤꦴꦪ ꦭꦷꦤꦠ꧀ꦡꦥ꧀ꦥꦏꦴꦱꦤꦴ ꦱꦩꦠ꧀ꦠꦴ.