꧔꧕. ꦥꦮꦴꦫꦟꦴꦤꦶꦢ꧀ꦢꦺꦱꦮꦟ꧀ꦟꦤꦴ

꧔꧓꧓. ‘‘ꦄꦤꦸꦗꦴꦤꦴꦩꦶ, ꦨꦶꦏ꧀ꦑꦮꦺ, ꦥꦚ꧀ꦕꦤ꧀ꦤꦁ ꦱꦔ꧀ꦓꦺ ꦥꦮꦴꦫꦺꦠꦸ’’ꦤ꧀ꦠꦶ (ꦩꦲꦴꦮ. ꧒꧑꧕) ꦮꦸꦠ꧀ꦠꦠ꧀ꦠꦴ ‘‘ꦱꦺꦱꦴ ꦱꦔ꧀ꦓꦥ꧀ꦥꦮꦴꦫꦟꦴ’’ꦠꦶ (ꦩꦲꦴꦮ. ꧒꧑꧕ ꦄꦴꦢꦪꦺꦴ) ꦮꦸꦠ꧀ꦠꦴ.

꧔꧓꧔. ꦄꦗ꧀ꦗ ꦥꦮꦴꦫꦟꦴꦠꦶ ꦌꦠ꧀ꦡ (ꦩꦲꦴꦮ. ꧒꧑꧕ ꦄꦴꦢꦪꦺꦴ) ꦥꦤ ꦕꦴꦠꦸꦢ꧀ꦢꦱꦶꦏꦴꦪ ꦥꦮꦴꦫꦟꦴꦪ ‘‘ꦄꦗ꧀ꦗ ꦥꦮꦴꦫꦟꦴ ꦕꦴꦠꦸꦢ꧀ꦢꦱꦷ’’ꦠꦶ ꦥꦸꦧ꧀ꦧꦏꦶꦕ꧀ꦕꦁ ꦏꦴꦠꦧ꧀ꦧꦁ, ꦥꦤ꧀ꦤꦫꦱꦶꦪꦁ ‘‘ꦄꦗ꧀ꦗ ꦥꦮꦴꦫꦟꦴ ꦥꦤ꧀ꦤꦫꦱꦷ’’ꦠꦶ.

꧔꧓꧗. ꦡꦺꦫꦺꦱꦸ ꦈꦏ꧀ꦏꦸꦛꦶꦏꦁ ꦤꦶꦱꦗ꧀ꦗ ꦥꦮꦴꦫꦺꦤ꧀ꦠꦺꦱꦸ ꦱꦪꦁ ꦥꦤ ꦤꦮꦺꦴ ꦪꦴꦮ ꦥꦮꦴꦫꦺꦠꦶ, ꦠꦴꦮ ꦈꦏ꧀ꦏꦸꦛꦶꦏꦺꦴꦮ ꦄꦕ꧀ꦖꦠꦹꦠꦶ ꦄꦠ꧀ꦡꦺꦴ. ‘‘ꦤ ꦨꦶꦏ꧀ꦑꦮꦺ ꦡꦺꦫꦺꦱꦸ ꦈꦏ꧀ꦏꦸꦛꦶꦏꦁ ꦤꦶꦱꦶꦤ꧀ꦤꦺꦱꦸ ꦥꦮꦴꦫꦪꦩꦴꦤꦺꦱꦸ ꦄꦴꦱꦤꦺꦱꦸ ꦄꦕ꧀ꦖꦶꦠꦧ꧀ꦧꦁ. ꦪꦺꦴ ꦄꦕ꧀ꦖꦺꦪ꧀ꦪ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ. ꦄꦤꦸꦗꦴꦤꦴꦩꦶ, ꦨꦶꦏ꧀ꦑꦮꦺ, ꦠꦢꦩꦤ꧀ꦠꦫꦴ ꦈꦏ꧀ꦏꦸꦛꦶꦏꦁ ꦤꦶꦱꦷꦢꦶꦠꦸꦁ, ꦪꦴꦮ ꦥꦮꦴꦫꦺꦠꦶ, ꦥꦮꦴꦫꦺꦠ꧀ꦮꦴ ꦄꦴꦱꦤꦺ ꦤꦶꦱꦷꦢꦶꦠꦸ’’ꦤ꧀ꦠꦶ (ꦩꦲꦴꦮ. ꧒꧑꧑) ꦲꦶ ꦮꦸꦠ꧀ꦠꦁ.

꧔꧔꧐-꧒. ꦌꦮꦁ ꦠꦺꦮꦴꦕꦶꦏꦥ꧀ꦥꦮꦴꦫꦟꦁ ꦢꦱ꧀ꦱꦺꦠ꧀ꦮꦴ ꦆꦢꦴꦤꦶ ꦢ꧀ꦮꦺꦮꦴꦕꦶꦏꦌꦏꦮꦴꦕꦶꦏꦱꦩꦴꦤꦮꦱ꧀ꦱꦶꦏꦥ꧀ꦥꦮꦴꦫꦟꦴꦱꦸ ꦏꦠ꧀ꦠꦧ꧀ꦧꦁ ꦢꦱ꧀ꦱꦺꦠꦸꦁ ‘‘ꦢꦴꦤꦺꦤꦴ’’ꦠꦶꦄꦴꦢꦶꦩꦴꦲ. ꦠꦠ꧀ꦡ ꦢꦴꦤꦺꦤꦴꦠꦶ ꦢꦴꦤꦺꦤ ꦮꦴ. ꦣꦩ꧀ꦩꦱꦴꦏꦕ꧀ꦖꦴꦠꦶ ꦆꦩꦶꦤꦴ ꦣꦩ꧀ꦩꦏꦡꦴꦱꦸꦠ꧀ꦠꦱꦔ꧀ꦒꦴꦪꦤꦴꦮꦶꦤꦪꦮꦶꦤꦶꦕ꧀ꦖꦪꦴꦢꦪꦺꦴ ꦒꦲꦶꦠꦴ. ꦢꦴꦤꦺꦤ ꦮꦴ ꦣꦩ꧀ꦩꦱꦴꦏꦕ꧀ꦖꦴꦪ ꦮꦴ ꦏꦭꦲꦺꦤ ꦮꦴ ꦫꦠ꧀ꦠꦶꦪꦴ ꦑꦺꦥꦶꦠꦨꦴꦮꦠꦺꦴ ꦠꦺꦮꦴꦕꦶꦏꦴꦪ ꦎꦏꦴꦱꦺ ꦄꦱꦠꦶ ꦢꦱꦮꦶꦣꦺ ꦮꦴ ꦄꦤ꧀ꦠꦫꦴꦪꦺ ꦄꦤꦸꦫꦹꦥꦠꦺꦴ ꦈꦠ꧀ꦠꦶꦁ ꦜꦥꦺꦠ꧀ꦮꦴ ꦥꦮꦴꦫꦺꦪ꧀ꦪꦴꦠꦶ ꦱꦩ꧀ꦧꦤ꧀ꦣꦺꦴ.

ꦆꦢꦴꦤꦶ ꦪꦡꦴꦤꦸꦫꦹꦥꦠꦺꦴ ꦚꦠ꧀ꦠꦶ ꦜꦥꦶꦠꦴ, ꦠꦁ ꦢꦱ꧀ꦱꦺꦠꦸꦁ ‘‘ꦱꦸꦟꦴꦠꦸ ꦩꦺ’’ꦠꦶꦄꦴꦢꦶꦩꦴꦲ. ꦪꦡꦴꦜꦥꦶꦠꦚꦠ꧀ꦠꦶꦪꦴꦠꦶ ꦌꦠ꧀ꦡ ꦱꦧ꧀ꦧꦱꦔ꧀ꦒꦴꦲꦶꦏꦴꦕꦺꦚꦠ꧀ꦠꦶꦜꦥꦶꦠꦴ, ꦠꦺꦮꦴꦕꦶꦏꦢ꧀ꦮꦺꦮꦴꦕꦶꦏꦌꦏꦮꦴꦕꦶꦏꦴꦤꦁ ꦮꦱꦺꦤ ꦥꦮꦴꦫꦺꦠꦧ꧀ꦧꦁ, ꦱꦩꦴꦤꦮꦱ꧀ꦱꦶꦏꦥ꧀ꦥꦮꦴꦫꦟꦴꦮ ꦌꦏꦴ ꦤ ꦮꦛ꧀ꦛꦠꦶ. ꦱꦕꦺ ‘‘ꦱꦔ꧀ꦓꦺꦴ ꦠꦺꦮꦴꦕꦶꦏꦁ ꦥꦮꦴꦫꦺꦪ꧀ꦪꦴ’’ꦠꦶ ꦜꦥꦶꦠꦴ, ꦠꦺꦮꦴꦕꦶꦏꦴ ꦌꦮ ꦮꦛ꧀ꦛꦠꦶ, ꦢ꧀ꦮꦺꦮꦴꦕꦶꦏꦴꦢꦪꦺꦴ ꦤ ꦮꦛ꧀ꦛꦤ꧀ꦠꦶ. ‘‘ꦢ꧀ꦮꦺꦮꦴꦕꦶꦏꦁ ꦥꦮꦴꦫꦺꦪ꧀ꦪꦴ’’ꦠꦶ ꦮꦸꦠ꧀ꦠꦺ ꦢ꧀ꦮꦺꦮꦴꦕꦶꦏꦚ꧀ꦕ ꦠꦺꦮꦴꦕꦶꦏꦚ꧀ꦕ ꦮꦛ꧀ꦛꦠꦶ, ꦌꦏꦮꦴꦕꦶꦏꦱꦩꦴꦤꦮꦱ꧀ꦱꦶꦏꦴ ꦤ ꦮꦛ꧀ꦛꦤ꧀ꦠꦶ. ‘‘ꦌꦏꦮꦴꦕꦶꦏꦁ ꦥꦮꦴꦫꦺꦪ꧀ꦪꦴ’’ꦠꦶ ꦮꦸꦠ꧀ꦠꦺ ꦥꦤ ꦱꦩꦴꦤꦮꦱ꧀ꦱꦶꦏꦁ ꦜꦥꦺꦠ꧀ꦮꦴ ꦱꦺꦱꦴ ꦮꦛ꧀ꦛꦤ꧀ꦠꦶ. ‘‘ꦱꦩꦴꦤꦮꦱ꧀ꦱꦶꦏ’’ꦤ꧀ꦠꦶ ꦥꦤ ꦮꦸꦠ꧀ꦠꦺ ꦱꦧ꧀ꦧꦁ ꦮꦛ꧀ꦛꦠꦷꦠꦶ. ꦄꦴꦢꦶꦏꦺ ꦕꦺꦠ꧀ꦡ ꦄꦴꦲꦫꦺꦠꦶ ꦌꦠ꧀ꦡ ꦥꦮꦴꦫꦟꦴꦪꦥꦶ ꦥꦸꦧ꧀ꦧꦺ ꦈꦥꦺꦴꦱꦡꦺ ꦮꦸꦠ꧀ꦠꦺ ‘‘ꦪꦢꦶ ꦱꦩꦴ ꦄꦴꦒꦕ꧀ꦖꦺꦪ꧀ꦪꦸ’’ꦤ꧀ꦠꦶꦄꦴꦢꦶꦏꦺ ꦮꦴꦫꦺ ꦄꦴꦲꦫꦺꦠꦶ ꦄꦠ꧀ꦡꦺꦴ.

꧔꧔꧓. ꦆꦢꦴꦤꦶ ꦮꦠ꧀ꦠꦧ꧀ꦧꦁ ꦱꦤ꧀ꦣꦴꦪ ‘‘ꦌꦮ’’ꦤ꧀ꦠꦶ ꦮꦸꦠ꧀ꦠꦁ. ꦠꦶꦮꦒ꧀ꦒꦺꦴ ꦕ ꦕꦠꦸꦮꦒ꧀ꦒꦺꦴ ꦕ ꦠꦶꦕꦠꦸꦮꦒ꧀ꦒꦺꦴ.

꧔꧕꧐. ‘‘ꦤ ꦨꦶꦏ꧀ꦑꦮꦺ ꦱꦴꦥꦠ꧀ꦠꦶꦏꦺꦤ ꦥꦮꦴꦫꦺꦠꦧ꧀ꦧꦁ. ꦪꦺꦴ ꦥꦮꦴꦫꦺꦪ꧀ꦪ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱꦴ’’ꦠꦶ (ꦩꦲꦴꦮ. ꧒꧓꧕) ꦮꦸꦠ꧀ꦠꦠ꧀ꦠꦴ ꦱꦴꦥꦠ꧀ꦠꦶꦏꦺꦤꦥꦶ ꦮꦺꦩꦠꦶꦏꦺꦤꦥꦶ ꦥꦮꦴꦫꦶꦪꦩꦴꦤꦺ ꦄꦴꦥꦠ꧀ꦠꦶꦁ ꦱꦫꦤ꧀ꦠꦺꦤꦥꦶ ꦈꦥꦺꦴꦱꦡꦺ ꦮꦸꦠ꧀ꦠꦤꦪꦺꦤ ꦥꦛꦶꦥꦗ꧀ꦗꦶꦠꦧ꧀ꦧꦁ. ‘‘ꦮꦒ꧀ꦒꦺ ꦱꦩꦒ꧀ꦒꦺ ꦮꦒ꧀ꦒꦺꦴꦠꦶ-ꦱꦚ꧀ꦚꦶꦤꦺꦴ ꦮꦶꦩꦠꦶꦱ꧀ꦱ ꦮꦴ’’ꦠꦶꦄꦴꦢꦶꦒꦴꦡꦴꦠꦺꦴ ꦥꦛ꧀ꦜꦴꦪ ꦪꦴꦮ ‘‘ꦄꦤ꧀ꦠꦫꦴꦪꦁ ꦮ ꦱꦔ꧀ꦓꦁ ꦮꦴ-ꦣꦶꦛ꧀ꦜꦴꦠꦸꦁ ꦱꦷꦩꦩꦺꦮ ꦮꦴ’’ꦠꦶ ꦄꦮꦱꦴꦤꦒꦴꦡꦴ, ꦠꦴꦮ ꦱꦺꦱꦴ ꦈꦥꦺꦴꦱꦡꦺ ꦮꦸꦠ꧀ꦠꦴ ꦒꦴꦡꦴꦪꦺꦴꦠꦶ ꦄꦣꦶꦥ꧀ꦥꦺꦠꦴ.

꧔꧕꧑. ꦥꦮꦴꦫꦶꦠꦺ ꦕꦴꦠꦶ (ꦩꦲꦴꦮ. ꧒꧑꧓ ꦄꦴꦢꦪꦺꦴ) ꦥꦜꦩꦥꦮꦴꦫꦟꦴꦪ ꦱꦔ꧀ꦓꦩ꧀ꦲꦶ ꦥꦮꦴꦫꦶꦠꦺꦠꦶ ꦄꦣꦶꦥ꧀ꦥꦴꦪꦺꦴ. ꦌꦠ꧀ꦡ ꦄꦮꦸꦠ꧀ꦡꦺꦴꦠꦶ ꦥꦕ꧀ꦖꦶꦩꦶꦏꦴꦪ ꦈꦥꦒꦠꦺꦴ ꦄꦥꦫꦶꦤꦶꦛ꧀ꦜꦶꦠꦠ꧀ꦠꦴ ‘‘ꦄꦮꦸꦠ꧀ꦡꦺꦴ’’ꦠꦶ ꦮꦸꦕ꧀ꦕꦠꦶ.

꧔꧕꧒. ꦕꦴꦠꦸꦩꦴꦱꦶꦤꦷꦠꦶ ꦏꦠ꧀ꦠꦶꦏꦥꦸꦟ꧀ꦟꦩꦷ. ꦌꦠ꧀ꦡ ꦮꦸꦠ꧀ꦡꦮꦱ꧀ꦱꦴ ꦤꦴꦩ ꦥꦕ꧀ꦖꦶꦩꦶꦏꦴꦪ ꦈꦥꦒꦠꦴ. ꦥꦮꦴꦫꦟꦴꦮꦶꦤꦶꦕ꧀ꦖꦪꦺꦴ.

ꦥꦮꦴꦫꦟꦴꦤꦶꦢ꧀ꦢꦺꦱꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.