꧒꧒. ꦈꦥꦴꦲꦤꦤꦶꦢ꧀ꦢꦺꦱꦮꦟ꧀ꦟꦤꦴ

꧑꧗꧕. ꦒꦸꦟꦔ꧀ꦒꦸꦟꦹꦥꦴꦲꦤꦴꦠꦶ (ꦩꦲꦴꦮ. ꦄꦛ꧀ꦜ. ꧒꧔꧕) ꦕꦠꦸꦥꦛꦭꦠꦺꦴ ꦥꦛ꧀ꦜꦴꦪ ꦮꦸꦕ꧀ꦕꦠꦶ, ꦤ ꦌꦏꦢ꧀ꦮꦶꦠꦶꦥꦛꦭꦠꦺꦴ ꦥꦛ꧀ꦜꦴꦪ ‘‘ꦄꦤꦸꦗꦴꦤꦴꦩꦶ, ꦨꦶꦏ꧀ꦑꦮꦺ, ꦌꦏꦥꦭꦴꦱꦶꦏꦁ ꦈꦥꦴꦲꦤꦁ, ꦤ ꦨꦶꦏ꧀ꦑꦮꦺ ꦢꦶꦒꦸꦟꦴ ꦈꦥꦴꦲꦤꦴ ꦣꦴꦫꦺꦠꦧ꧀ꦧꦴ, ꦤ ꦠꦶꦒꦸꦟꦴ ꦈꦥꦴꦲꦤꦴ ꦣꦴꦫꦺꦠꦧ꧀ꦧꦴ, ꦤ ꦒꦸꦟꦔ꧀ꦒꦸꦟꦹꦥꦴꦲꦤꦴ ꦣꦴꦫꦺꦠꦧ꧀ꦧꦴ, ꦪꦺꦴ ꦣꦴꦫꦺꦪ꧀ꦪ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱꦴ’’ꦠꦶ (ꦩꦲꦴꦮ. ꧒꧔꧕) ꦮꦸꦠ꧀ꦠꦠ꧀ꦠꦴ. ‘‘ꦄꦤꦸꦗꦴꦤꦴꦩꦶ, ꦨꦶꦏ꧀ꦑꦮꦺ, ꦎꦩꦸꦏ꧀ꦏꦁ ꦒꦸꦟꦔ꧀ꦒꦸꦟꦹꦥꦴꦲꦤꦁ, ꦤ ꦨꦶꦏ꧀ꦑꦮꦺ ꦤꦮꦴ ꦒꦸꦟꦔ꧀ꦒꦸꦟꦹꦥꦴꦲꦤꦴ ꦣꦴꦫꦺꦠꦧ꧀ꦧꦴ, ꦪꦺꦴ ꦣꦴꦫꦺꦪ꧀ꦪ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱꦴ’’ꦠꦶ (ꦩꦲꦴꦮ. ꧒꧔꧗) ꦮꦸꦠ꧀ꦠꦠ꧀ꦠꦴ ‘‘ꦤꦮꦴ’’ꦠꦶ ꦮꦸꦠ꧀ꦠꦁ. ꦱꦧ꧀ꦧꦠ꧀ꦡꦴꦥꦶ ꦩꦗ꧀ꦙꦶꦩꦢꦺꦱꦺ ꦒꦶꦭꦴꦤꦺꦴꦥꦶ ꦤꦮꦁ ꦒꦸꦟꦔ꧀ꦒꦸꦟꦹꦥꦴꦲꦤꦁ ꦤ ꦭꦨꦠꦶ, ꦌꦏꦮꦴꦫꦩ꧀ꦥꦶ ꦄꦚ꧀ꦚꦺꦲꦶ ꦥꦫꦶꦨꦸꦠ꧀ꦠꦁ ꦎꦩꦸꦏ꧀ꦏꦈꦥꦴꦲꦤꦱꦔ꧀ꦑꦴꦠꦁ ꦭꦨꦠꦶ, ꦥꦕ꧀ꦕꦤ꧀ꦠꦶꦩꦺꦱꦸ ꦗꦤꦥꦢꦺꦱꦸ ꦒꦶꦭꦴꦤꦺꦴ ꦤꦮꦩ꧀ꦥꦶ ꦭꦨꦠꦷꦠꦶ ꦮꦺꦢꦶꦠꦧ꧀ꦧꦁ ‘‘ꦄꦤꦸꦗꦴꦤꦴꦩꦶ, ꦨꦶꦏ꧀ꦑꦮꦺ, ꦱꦧ꧀ꦧꦥꦕ꧀ꦕꦤ꧀ꦠꦶꦩꦺꦱꦸ ꦗꦤꦥꦢꦺꦱꦸ ꦒꦸꦟꦔ꧀ꦒꦸꦟꦹꦥꦴꦲꦤ’’ꦤ꧀ꦠꦶ (ꦩꦲꦴꦮ. ꧒꧕꧙) ꦄꦮꦶꦱꦺꦱꦺꦤ ꦮꦸꦠ꧀ꦠꦠ꧀ꦠꦴ.

ꦱꦧ꧀ꦧꦱ꧀ꦱꦴꦠꦶ ꦒꦶꦭꦴꦤꦱ꧀ꦱꦴꦥꦶ ꦄꦒꦶꦭꦴꦤꦱ꧀ꦱꦴꦥꦷꦠꦶ ꦄꦠ꧀ꦡꦺꦴ. ꦩꦗ꧀ꦙꦶꦩꦢꦺꦱꦺꦥꦶ ꦥꦕ꧀ꦕꦤ꧀ꦠꦶꦩꦢꦺꦱꦺꦥꦶ ꦄꦴꦫꦴꦩꦺ ꦄꦴꦫꦴꦩꦹꦥꦕꦴꦫꦺ ꦒꦶꦭꦴꦤꦱ꧀ꦱꦴꦥꦶ ꦄꦒꦶꦭꦴꦤꦱ꧀ꦱꦴꦥꦶ ‘‘ꦄꦤꦸꦗꦴꦤꦴꦩꦶ, ꦨꦶꦏ꧀ꦑꦮꦺ, ꦄꦗ꧀ꦙꦴꦫꦴꦩꦺ ꦈꦥꦴꦲꦤꦁ ꦣꦴꦫꦺꦠꦸ’’ꦤ꧀ꦠꦶ (ꦩꦲꦴꦮ. ꧒꧔꧙) ꦮꦸꦠ꧀ꦠꦠ꧀ꦠꦴ ꦏꦥ꧀ꦥꦶꦪꦤ꧀ꦠꦶ ꦄꦠ꧀ꦡꦺꦴ. ꦱꦧ꧀ꦧꦠ꧀ꦡꦴꦠꦶ ꦄꦴꦫꦴꦩꦺꦥꦶ ꦒꦴꦩꦺꦥꦶ. ꦄꦏꦭ꧀ꦭꦏꦱ꧀ꦱꦴꦠꦶ ꦒꦶꦭꦴꦤꦱ꧀ꦱ. ꦌꦠ꧀ꦡ ꦥꦤ ꦩꦗ꧀ꦙꦶꦩꦢꦺꦱꦺ ꦒꦶꦭꦴꦤꦱ꧀ꦱ ꦒꦸꦟꦔ꧀ꦒꦸꦟꦹꦥꦴꦲꦤꦴ ꦥꦫꦶꦨꦸꦠ꧀ꦠꦴꦮ ꦄꦴꦫꦴꦩꦺꦥꦶ ꦒꦴꦩꦺꦥꦶ ꦮꦛ꧀ꦛꦠꦶ, ꦥꦕ꧀ꦕꦤ꧀ꦠꦶꦩꦢꦺꦱꦺ ꦄꦥꦫꦶꦨꦸꦠ꧀ꦠꦴꦥꦶ. ꦩꦗ꧀ꦙꦶꦩꦢꦺꦱꦺꦥꦶ ꦥꦕ꧀ꦕꦤ꧀ꦠꦶꦩꦢꦺꦱꦺꦥꦶ ꦨꦒꦮꦠꦴ ꦒꦶꦭꦴꦤꦱ꧀ꦱꦺꦮ ꦈꦥꦴꦲꦤꦴ ꦄꦤꦸꦚ꧀ꦚꦴꦠꦴ ‘‘ꦄꦤꦸꦗꦴꦤꦴꦩꦶ, ꦨꦶꦏ꧀ꦑꦮꦺ, ꦪꦱ꧀ꦱ ꦥꦴꦢꦴ ꦮꦴ ꦢꦸꦏ꧀ꦑꦴ, ꦥꦴꦢꦴ ꦮꦴ ꦦꦭꦶꦠꦴ, ꦥꦴꦢꦑꦶꦭꦺꦴ ꦮꦴ ꦄꦴꦧꦴꦣꦺꦴ, ꦈꦥꦴꦲꦤꦁ ꦣꦴꦫꦺꦠꦸ’’ꦤ꧀ꦠꦶ (ꦩꦲꦴꦮ. ꧒꧔꧙) ꦕ ‘‘ꦄꦤꦸꦗꦴꦤꦴꦩꦶ, ꦨꦶꦏ꧀ꦑꦮꦺ, ꦒꦶꦭꦴꦤꦺꦤ ꦨꦶꦏ꧀ꦑꦸꦤꦴ ꦱꦈꦥꦴꦲꦤꦺꦤ ꦒꦴꦩꦁ ꦥꦮꦶꦱꦶꦠꦸ’’ꦤ꧀ꦠꦶ (ꦩꦲꦴꦮ. ꧒꧕꧖) ꦮꦸꦠ꧀ꦠꦠ꧀ꦠꦴ ꦕ. ꦩꦗ꧀ꦙꦶꦩꦢꦺꦱꦺ ꦕ ꦒꦶꦭꦴꦤꦺꦴ ꦤꦮꦁ ꦒꦸꦟꦔ꧀ꦒꦸꦟꦹꦥꦴꦲꦤꦁ ꦣꦴꦫꦺꦠꦸꦁ ꦪꦢꦶ ꦭꦨꦠꦶ, ꦏꦡꦁ ꦥꦢꦺꦱꦥꦚ꧀ꦚꦠ꧀ꦠꦶ ꦲꦺꦴꦠꦷꦠꦶ? ꦱꦧ꧀ꦧꦠ꧀ꦡ ꦥꦤ ꦨꦒꦮꦠꦴ ꦒꦶꦭꦴꦤꦱ꧀ꦱꦺꦮ ꦈꦥꦴꦲꦤꦴ ꦄꦤꦸꦚ꧀ꦚꦴꦠꦴ, ꦠꦱ꧀ꦩꦴ ꦩꦗ꧀ꦙꦶꦩꦢꦺꦱꦺ ꦒꦶꦭꦴꦤꦺꦴ ꦤꦮꦁ ꦒꦸꦟꦔ꧀ꦒꦸꦟꦹꦥꦴꦲꦤꦁ ꦭꦨꦠꦷꦠꦶ ꦒꦲꦺꦠꦧ꧀ꦧꦤ꧀ꦠꦶ ꦮꦢꦤ꧀ꦠꦶ.

꧑꧗꧖-꧙. ꦱꦧ꧀ꦧꦴꦮ ꦤꦷꦭꦏꦴ (ꦩꦲꦴꦮ. ꧒꧔꧖; ꦩꦲꦴꦮ. ꦄꦛ꧀ꦜ. ꧒꧔꧖) ꦱꦧ꧀ꦧꦤꦷꦭꦏꦴ. ꦌꦱ ꦤꦪꦺꦴ ꦱꦧ꧀ꦧꦠ꧀ꦡ ꦎꦢꦴꦠꦏꦴꦢꦷꦱꦸꦥꦶ. ꦎꦢꦴꦠꦁ ꦥꦤ ꦤꦺꦮ ꦥꦴꦭ꦳ꦶꦪꦁ, ꦤ ꦄꦛ꧀ꦜꦏꦡꦴꦪꦁ ꦥꦛꦶꦏ꧀ꦑꦶꦠ꧀ꦠꦁ, ꦄꦤꦸꦭꦺꦴꦩꦮꦱꦺꦤ ꦥꦤ ꦆꦣ ꦥꦛꦶꦏ꧀ꦑꦶꦠ꧀ꦠꦤ꧀ꦠꦶ ꦮꦺꦢꦶꦠꦧ꧀ꦧꦁ. ꦩꦲꦴꦫꦔ꧀ꦒꦫꦠ꧀ꦠꦴ ꦱꦠꦥꦢꦶꦥꦶꦛ꧀ꦜꦶꦮꦟ꧀ꦟꦴ. ꦩꦲꦴꦤꦴꦩꦫꦔ꧀ꦒꦫꦠ꧀ꦠꦴ ꦩꦤ꧀ꦢꦫꦠ꧀ꦠꦴ. ꦩꦚ꧀ꦗꦺꦛ꧀ꦜꦶꦏꦴ ꦏꦟꦮꦺꦫꦥꦸꦥ꧀ꦦꦮꦟ꧀ꦟꦴ. ꦥꦸꦥ꧀ꦦꦭꦠꦴꦢꦷꦲꦶ ꦮꦶꦕꦶꦠ꧀ꦠꦴ ꦕꦶꦠ꧀ꦫꦴ. ꦤꦷꦭꦥꦷꦠꦴꦢꦶꦮꦢ꧀ꦣꦶꦏꦴꦠꦶ ꦌꦠ꧀ꦡ ꦄꦴꦢꦶ-ꦱꦢ꧀ꦢꦺꦤ ꦎꦢꦴꦠꦭꦺꦴꦲꦶꦠꦩꦚ꧀ꦗꦺꦛ꧀ꦜꦶꦏꦩꦲꦴꦫꦔ꧀ꦒꦩꦲꦴꦤꦴꦩꦫꦔ꧀ꦒꦫꦠ꧀ꦠꦴꦢꦶꦮꦱꦺꦤ ꦮꦢ꧀ꦣꦶꦏꦴ ꦒꦲꦶꦠꦴ. ꦱꦷꦲꦧ꧀ꦪꦒ꧀ꦓꦸꦢ꧀ꦢꦴꦗꦶꦤꦢꦷꦥꦷꦤꦁ ꦕꦩ꧀ꦩꦺꦲꦶ ꦕꦴꦠꦶ ꦱꦩ꧀ꦧꦤ꧀ꦣꦺꦴ. ꦏꦺꦴꦕꦷꦠꦶ ꦒꦶꦭꦴꦤꦺꦴꦥꦶ ꦄꦒꦶꦭꦴꦤꦺꦴꦥꦶ.

꧑꧘꧐. ꦱꦏꦭꦁ ꦮꦴ ꦌꦏꦢꦺꦱꦏꦁ ꦮꦴ ꦫꦗꦤꦁ ꦕꦺꦴꦭ꦳ꦺꦤ (ꦩꦲꦴꦮ. ꦄꦛ꧀ꦜ. ꧒꧔꧖) ꦥꦸꦚ꧀ꦖꦶꦠ꧀ꦮꦴ ꦮꦭ꦳ꦚ꧀ꦗꦺꦪ꧀ꦪꦴꦠꦶ ꦄꦠ꧀ꦡꦺꦴ. ꦑꦭ꧀ꦭꦏꦴꦢꦶꦏꦁ ꦥꦤ ꦱꦧ꧀ꦧꦁ ꦲꦴꦫꦶꦠ꧀ꦮꦴ ꦮꦭ꦳ꦚ꧀ꦗꦺꦠꦧ꧀ꦧꦁ. ꦈꦥꦴꦲꦤꦮꦶꦤꦶꦕ꧀ꦖꦪꦺꦴ.

ꦈꦥꦴꦲꦤꦤꦶꦢ꧀ꦢꦺꦱꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.