꧑꧒. ꦥꦴꦕꦶꦠ꧀ꦠꦶꦪꦤꦶꦢ꧀ꦢꦺꦱꦮꦟ꧀ꦟꦤꦴ

꧑꧒꧑. ꦆꦢꦴꦤꦶ ꦥꦴꦕꦶꦠ꧀ꦠꦶꦪꦴꦤꦶ ꦢꦱ꧀ꦱꦺꦠꦸꦁ ‘‘ꦥꦴꦕꦶꦠ꧀ꦠꦷ’’ꦠꦶ ꦩꦴꦠꦶꦏꦴꦥꦢꦁ ꦈꦢ꧀ꦣꦫꦶꦠ꧀ꦮꦴ ‘‘ꦩꦸꦱꦴꦮꦴꦢꦺꦴꦩꦱꦴꦮꦴꦢꦺ, ꦥꦺꦱꦸꦚ꧀ꦚꦲꦫꦟꦺ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦠ꧀ꦡ ꦩꦸꦱꦴꦮꦴꦢꦺ ꦕ ꦎꦩꦱꦮꦴꦢꦺ ꦕ ꦥꦺꦱꦸꦚ꧀ꦚꦲꦫꦟꦺ ꦕ ꦥꦴꦕꦶꦠ꧀ꦠꦶ ꦮꦸꦠ꧀ꦠꦴꦠꦶ ꦱꦩ꧀ꦧꦤ꧀ꦣꦺꦴ. ꦌꦮꦁ ꦱꦺꦱꦺꦱꦸꦥꦶ. ꦌꦠ꧀ꦡ ꦥꦤ ‘‘ꦄꦢꦶꦛ꧀ꦜꦁ, ꦄꦱꦸꦠꦁ, ꦄꦩꦸꦠꦁ, ꦄꦮꦶꦚ꧀ꦚꦴꦠꦁ, ꦢꦶꦛ꧀ꦜꦁ, ꦱꦸꦠꦁ, ꦩꦸꦠꦁ, ꦮꦶꦚ꧀ꦚꦴꦠ’’ꦤ꧀ꦠꦶ (ꦥꦴꦕꦶ. ꧓; ꦥꦴꦕꦶ. ꦄꦛ꧀ꦜ. ꧓) ꦥꦸꦧ꧀ꦧꦺꦥꦶ ‘‘ꦩꦸꦱꦴ ꦨꦟꦶꦱ꧀ꦱꦴꦩꦷ’’ꦠꦶ ꦕꦺꦠꦺꦠ꧀ꦮꦴ ꦮꦕꦤꦏ꧀ꦑꦟꦺꦮ ‘‘ꦩꦸꦱꦴ ꦨꦟꦴꦩꦷ’’ꦠꦶ ꦗꦴꦤꦶꦠ꧀ꦮꦴ ꦗꦴꦤꦤ꧀ꦠꦱ꧀ꦱꦺꦮ ꦩꦸꦱꦴꦨꦟꦤꦺ ꦥꦴꦕꦶꦠ꧀ꦠꦶ ꦤꦴꦩ ꦄꦴꦥꦠ꧀ꦠꦶ ꦲꦺꦴꦠꦷꦠꦶ ꦄꦠ꧀ꦡꦺꦴ. ꦪꦱ꧀ꦱ ꦨꦟꦠꦶ, ꦱꦺꦴ ꦠꦁ ꦤ ꦱꦸꦟꦴꦠꦶ, ꦄꦴꦥꦠ꧀ꦠꦶ ꦤ ꦲꦺꦴꦠꦶ (ꦏꦔ꧀ꦑꦴ. ꦄꦛ꧀ꦜ. ꦩꦸꦱꦴꦮꦴꦢꦱꦶꦏ꧀ꦑꦴꦥꦢꦮꦟ꧀ꦟꦤꦴ).

‘‘ꦎꦩꦱꦮꦴꦢꦺꦴ ꦤꦴꦩ ꦢꦱꦲꦶ ꦄꦴꦏꦴꦫꦺꦲꦶ ꦎꦩꦱꦠꦶ ꦗꦴꦠꦶꦪꦴꦥꦶ ꦤꦴꦩꦺꦤꦥꦶ ꦒꦺꦴꦠ꧀ꦠꦺꦤꦥꦶ ꦏꦩ꧀ꦩꦺꦤꦥꦶ ꦱꦶꦥ꧀ꦥꦺꦤꦥꦶ ꦄꦴꦧꦴꦣꦺꦤꦥꦶ ꦭꦶꦔ꧀ꦒꦺꦤꦥꦶ ꦏꦶꦭꦺꦱꦺꦤꦥꦶ ꦄꦴꦥꦠ꧀ꦠꦶꦪꦴꦥꦶ ꦄꦏ꧀ꦏꦺꦴꦱꦺꦤꦥꦷ’’ꦠꦶ (ꦥꦴꦕꦶ. ꧑꧕) ꦌꦮꦁ ꦮꦸꦠ꧀ꦠꦺꦲꦶ ꦢꦱꦲꦶ ꦄꦴꦏꦴꦫꦺꦲꦶ ꦈꦥꦱꦩ꧀ꦥꦤ꧀ꦤꦁ ꦪꦺꦴ ꦑꦸꦁꦱꦺꦠꦶ ꦮꦩ꧀ꦨꦺꦠꦶ, ꦄꦪꦁ ꦎꦩꦱꦠꦶ ꦤꦴꦩ, ꦠꦱ꧀ꦱ ꦥꦴꦕꦶꦠ꧀ꦠꦷꦠꦶ ꦄꦠ꧀ꦡꦺꦴ. ꦥꦫꦩ꧀ꦩꦸꦑꦴ ꦨꦟꦤ꧀ꦠꦱ꧀ꦱ ꦢꦸꦏ꧀ꦏꦛꦁ, ꦠꦡꦴ ꦥꦴꦭ꦳ꦶꦪꦁ ꦄꦤꦴꦒꦠꦺꦲꦶ ‘‘ꦕꦺꦴꦫꦺꦴ’’ꦠꦶ ꦮꦴ ‘‘ꦒꦟ꧀ꦜꦶꦨꦺꦢꦏꦺꦴ’’ꦠꦶ ꦮꦴ ꦄꦴꦢꦷꦲꦶ ꦨꦟꦤ꧀ꦠꦱ꧀ꦱ. ‘‘ꦱꦤ꧀ꦠꦶ ꦆꦣꦺꦏꦕ꧀ꦕꦺ ꦑꦠ꧀ꦠꦶꦪꦴ ꦧ꧀ꦫꦴꦲ꧀ꦩꦟꦴ ꦕꦟ꧀ꦝꦴꦭꦴ’’ꦠꦶꦄꦴꦢꦶꦤꦴ ꦥꦫꦶꦪꦴꦪꦺꦤ ꦨꦟꦤ꧀ꦠꦱ꧀ꦱ ꦕ ꦄꦤꦸꦥꦱꦩ꧀ꦥꦤ꧀ꦤꦁ ꦨꦟꦤ꧀ꦠꦱ꧀ꦱ ꦕ ꦱꦧ꧀ꦧꦠ꧀ꦡꦥꦶ ꦢꦸꦏ꧀ꦏꦛꦩꦺꦮ.

ꦥꦶꦪꦏꦩ꧀ꦪꦠꦴꦪ ꦮꦴ ꦨꦺꦢꦴꦣꦶꦥ꧀ꦥꦴꦪꦺꦤ ꦮꦴ ꦈꦥꦱꦩ꧀ꦥꦤ꧀ꦤꦁ ꦗꦴꦠꦶꦄꦴꦢꦷꦲꦶ ꦎꦩꦱꦤ꧀ꦠꦱ꧀ꦱ ꦈꦥꦱꦩ꧀ꦥꦤ꧀ꦤꦱ꧀ꦱ ꦮꦕꦤꦁ ꦱꦸꦠ꧀ꦮꦴ ꦠꦱ꧀ꦱ ꦈꦥꦱꦁꦲꦫꦟꦁ ꦥꦺꦱꦸꦚ꧀ꦚꦲꦫꦟꦁ ꦤꦴꦩ. ꦌꦠ꧀ꦡꦴꦥꦶ ꦥꦫꦶꦪꦴꦪꦮꦕꦤꦺꦤ ꦕ ꦄꦤꦸꦥꦱꦩ꧀ꦥꦤ꧀ꦤꦱ꧀ꦱ ꦈꦥꦱꦁꦲꦫꦟꦺꦤ ꦕ ꦢꦸꦏ꧀ꦏꦛꦩꦺꦮ.

ꦥꦢꦱꦺꦴꦣꦩ꧀ꦩꦺꦴꦠꦶ ꦌꦠ꧀ꦡ ‘‘ꦣꦩ꧀ꦩꦺꦴ ꦤꦴꦩ ꦧꦸꦢ꧀ꦣꦨꦴꦱꦶꦠꦺꦴ ꦱꦴꦮꦏꦨꦴꦱꦶꦠꦺꦴ ꦆꦱꦶꦨꦴꦱꦶꦠꦺꦴ ꦢꦺꦮꦠꦴꦨꦴꦱꦶꦠꦺꦴ ꦄꦠ꧀ꦡꦹꦥꦱꦁꦲꦶꦠꦺꦴ ꦣꦩ꧀ꦩꦹꦥꦱꦁꦲꦶꦠꦺꦴ’’ꦠꦶ (ꦥꦴꦕꦶ. ꧔꧖) ꦌꦮꦁ ꦮꦸꦠ꧀ꦠꦁ ꦱꦔ꧀ꦒꦷꦠꦶꦠ꧀ꦠꦪꦩꦴꦫꦸꦭ꦳꧀ꦲꦁ ꦠꦶꦥꦶꦛꦏꦣꦩ꧀ꦩꦁ ꦥꦢꦄꦤꦸꦥꦢꦄꦤ꧀ꦮꦏ꧀ꦑꦫꦄꦤꦸꦧ꧀ꦪꦚ꧀ꦗꦤꦮꦱꦺꦤ ꦨꦶꦏ꧀ꦑꦸꦚ꧀ꦕ ꦨꦶꦏ꧀ꦑꦸꦤꦶꦚ꧀ꦕ ꦜꦥꦺꦠ꧀ꦮꦴ ꦄꦤꦸꦥꦱꦩ꧀ꦥꦤ꧀ꦤꦁ ꦌꦏꦠꦺꦴ ꦮꦴꦕꦺꦤ꧀ꦠꦱ꧀ꦱ ꦥꦴꦕꦶꦠ꧀ꦠꦶ ꦲꦺꦴꦠꦷꦠꦶ ꦄꦠ꧀ꦡꦺꦴ.

ꦱꦴꦒꦴꦫꦺꦠꦶ ꦪꦁ ꦥꦤ ꦱꦧ꧀ꦧꦤ꧀ꦠꦶꦩꦺꦤ ꦥꦫꦶꦪꦴꦪꦺꦤ ꦢꦶꦪꦝ꧀ꦞꦲꦠ꧀ꦡꦸꦧ꧀ꦧꦺꦣꦺꦤ ꦥꦴꦏꦴꦫꦴꦢꦶꦤꦴ ꦥꦫꦶꦏ꧀ꦑꦶꦠ꧀ꦠꦠ꧀ꦠꦴ ꦱꦧ꧀ꦧꦥꦫꦶꦕ꧀ꦖꦶꦤ꧀ꦤꦚ꧀ꦕ ꦪꦺꦤ ꦏꦺꦤꦕꦶ ꦮꦶꦠꦴꦤꦴꦢꦶꦤꦴ ꦄꦤ꧀ꦠꦩꦱꦺꦴ ꦮꦠ꧀ꦡꦺꦤꦥꦶ ꦖꦤ꧀ꦤꦠ꧀ꦠꦴ ꦱꦧ꧀ꦧꦕ꧀ꦖꦤ꧀ꦤꦚ꧀ꦕ ꦱꦺꦤꦴꦱꦤꦁ, ꦠꦡꦴꦫꦹꦥꦺ ꦱꦺꦤꦴꦱꦤꦺ ꦌꦏꦹꦥꦕꦴꦫꦛ꧀ꦜꦴꦤꦺ ꦄꦤꦸꦥꦱꦩ꧀ꦥꦤ꧀ꦤꦺꦤ ꦱꦲ ꦮꦱꦤ꧀ꦠꦱ꧀ꦱ ꦕꦠꦸꦠ꧀ꦡꦢꦶꦮꦱꦠꦺꦴ ꦥꦛ꧀ꦜꦴꦪ ꦤꦶꦥꦗ꧀ꦗꦤꦒꦟꦤꦴꦪ ꦕ ꦄꦤꦸꦥꦱꦩ꧀ꦥꦤ꧀ꦤꦒꦟꦤꦴꦪ ꦕ ꦢꦺꦮꦱꦶꦏꦁ ꦥꦴꦕꦶꦠ꧀ꦠꦶ ꦲꦺꦴꦠꦷꦠꦶ ꦄꦠ꧀ꦡꦺꦴ.

ꦈꦗ꧀ꦙꦴꦥꦤꦏꦑꦶꦪ꧀ꦪꦤꦺꦠꦶ ꦌꦠ꧀ꦡ ꦪꦺꦴ ꦈꦥꦱꦩ꧀ꦥꦤ꧀ꦤꦁ ꦱꦔ꧀ꦓꦺꦤ ꦱꦩ꧀ꦩꦠꦁ ꦱꦺꦤꦴꦱꦤꦥꦚ꧀ꦚꦴꦥꦏꦁ ꦮꦴ ꦨꦠ꧀ꦠꦸꦢ꧀ꦢꦺꦱꦏꦁ ꦮꦴ ꦪꦴꦒꦸꦨꦴꦗꦏꦁ ꦮꦴ ꦦꦭꦨꦴꦗꦏꦁ ꦮꦴ ꦑꦗ꧀ꦗꦨꦴꦗꦏꦁ ꦮꦴ ꦄꦥ꧀ꦥꦩꦠ꧀ꦠꦏꦮꦶꦱ꧀ꦱꦗ꧀ꦗꦏꦁ ꦮꦴ ꦩꦔ꧀ꦏꦸꦏꦠ꧀ꦠꦸꦏꦴꦩꦺꦴ ꦖꦤ꧀ꦢꦺꦤ ‘‘ꦆꦠ꧀ꦡꦤ꧀ꦤꦴꦩꦺꦴ ꦱꦺꦤꦴꦱꦤꦁ ꦥꦚ꧀ꦚꦴꦥꦺꦠꦶ, ꦨꦠ꧀ꦠꦴꦤꦶ ꦕ ꦈꦢ꧀ꦢꦶꦱꦠꦷ’’ꦠꦶ ꦮꦴ ꦮꦢꦤ꧀ꦠꦺꦴ ꦄꦚ꧀ꦚꦁ ꦈꦥꦱꦩ꧀ꦥꦤ꧀ꦤꦁ ꦈꦗ꧀ꦙꦴꦥꦺꦠꦶ ꦠꦺꦤ ꦄꦮꦗꦴꦤꦴꦥꦺꦠꦶ, ꦪꦺꦴ ꦥꦤ ꦠꦡꦺꦮ ꦮꦢꦤ꧀ꦠꦺꦴ ꦈꦥꦱꦩ꧀ꦥꦤ꧀ꦤꦱ꧀ꦱ ꦱꦤ꧀ꦠꦶꦏꦺ ꦠꦱ꧀ꦱ ꦄꦪꦱꦁ ꦥꦏꦴꦱꦺꦤ꧀ꦠꦺꦴ ꦑꦷꦪꦠꦶ, ꦠꦱ꧀ꦩꦶꦁ ꦈꦗ꧀ꦙꦴꦥꦤꦏꦺ ꦕ ꦑꦷꦪꦤꦏꦺ ꦕ ꦥꦴꦕꦶꦠ꧀ꦠꦶꦢ꧀ꦮꦪꦤ꧀ꦠꦶ ꦮꦺꦢꦶꦠꦧ꧀ꦧꦁ.

꧑꧒꧒. ꦠꦭꦱꦠ꧀ꦠꦶꦄꦤꦴꦢꦫ-ꦏꦸꦏ꧀ꦏꦸꦕ꧀ꦕꦸꦥ꧀ꦥꦴꦢꦤꦺꦱꦸ ꦕꦴꦠꦶ ꦌꦠ꧀ꦡ ꦪꦺꦴ ꦨꦶꦏ꧀ꦑꦸ ꦈꦥꦱꦩ꧀ꦥꦤ꧀ꦤꦱ꧀ꦱ ꦥꦲꦫꦟꦴꦏꦴꦫꦁ ꦢꦱ꧀ꦱꦺꦤ꧀ꦠꦺꦴ ꦏꦴꦪꦁ ꦮꦴ ꦏꦴꦪꦥ꧀ꦥꦛꦶꦧꦢ꧀ꦣꦁ ꦮꦴ ꦈꦕ꧀ꦕꦴꦫꦺꦠꦶ, ꦠꦱ꧀ꦱ ꦥꦴꦕꦶꦠ꧀ꦠꦶꦪꦁ. ꦱꦕꦺ ꦮꦶꦫꦢ꧀ꦣꦺꦴ ꦥꦲꦴꦫꦁ ꦢꦺꦠꦶ, ꦄꦥ꧀ꦥꦲꦫꦶꦠꦸꦏꦴꦩꦠꦴꦪ ꦢꦸꦏ꧀ꦏꦛꦁ, ꦠꦡꦴ ꦄꦤꦸꦥꦱꦩ꧀ꦥꦤ꧀ꦤꦺꦱꦸꦥꦶ ꦢꦸꦏ꧀ꦏꦛꦩꦺꦮ.

ꦈꦥꦱꦩ꧀ꦥꦤ꧀ꦤꦺꦤ ꦥꦚ꧀ꦚꦠ꧀ꦠꦺꦤ ꦮꦸꦕ꧀ꦕꦩꦴꦤꦺꦴ ꦠꦁ ꦄꦱꦶꦏ꧀ꦑꦶꦠꦸꦏꦴꦩꦠꦴꦪ ꦮꦴ ꦠꦱ꧀ꦱ ꦮꦕꦤꦁ ꦄꦱꦺꦴꦠꦸꦏꦴꦩꦠꦴꦪ ꦮꦴ ꦪꦺꦴ ꦄꦤꦴꦢꦫꦶꦪꦁ ꦏꦫꦺꦴꦠꦶ, ꦠꦱ꧀ꦱ ꦄꦤꦴꦢꦫꦏꦫꦟꦺ ꦥꦴꦕꦶꦠ꧀ꦠꦶꦪꦤ꧀ꦠꦶ ꦄꦠ꧀ꦡꦺꦴ. ꦄꦥꦚ꧀ꦚꦠ꧀ꦠꦺꦤ ꦮꦸꦕ꧀ꦕꦩꦴꦤꦱ꧀ꦱ ꦕ ꦄꦤꦸꦥꦱꦩ꧀ꦥꦤ꧀ꦤꦺꦤ ꦥꦚ꧀ꦚꦠ꧀ꦠꦺꦤ ꦮꦴ ꦄꦥꦚ꧀ꦚꦠ꧀ꦠꦺꦤ ꦮꦴ ꦮꦸꦕ꧀ꦕꦩꦴꦤꦱ꧀ꦱ ꦢꦸꦏ꧀ꦏꦛꦁ.

ꦈꦥꦱꦩ꧀ꦥꦤ꧀ꦤꦱ꧀ꦱ ‘‘ꦈꦴꦤꦮꦷꦱꦠꦶꦮꦱ꧀ꦱꦺꦴ ꦩꦚ꧀ꦚꦺ ꦠ꧀ꦮꦁ ꦈꦥꦱꦩ꧀ꦥꦤ꧀ꦤꦺꦴ, ꦮꦶꦏꦴꦭꦺ ꦩꦚ꧀ꦚꦺ ꦠꦪꦴ ꦨꦸꦠ꧀ꦠ’’ꦤ꧀ꦠꦶꦄꦴꦢꦶꦤꦴ ꦤꦪꦺꦤ ꦱꦚ꧀ꦕꦶꦕ꧀ꦕ ꦏꦸꦏ꧀ꦏꦸꦕ꧀ꦕꦁ ꦈꦥ꧀ꦥꦴꦢꦺꦤ꧀ꦠꦱ꧀ꦱ ꦥꦴꦕꦶꦠ꧀ꦠꦶꦪꦁ. ꦄꦤꦸꦥꦱꦩ꧀ꦥꦤ꧀ꦤꦱ꧀ꦱ ꦈꦥ꧀ꦥꦴꦢꦤꦺ ꦢꦸꦏ꧀ꦏꦛꦁ.

ꦒꦴꦩꦥ꧀ꦥꦮꦺꦱꦤꦴꦥꦸꦕ꧀ꦖꦴꦠꦶ ꦌꦠ꧀ꦡ ꦥꦤ ꦩꦗ꧀ꦙꦤ꧀ꦲꦶꦏꦴꦠꦶꦏ꧀ꦏꦩꦤꦠꦺꦴ ꦥꦛ꧀ꦜꦴꦪ ꦪꦴꦮ ꦄꦫꦸꦟꦸꦒ꧀ꦒꦩꦤꦴ ꦮꦶꦏꦴꦭꦺꦴ ꦤꦴꦩ, ꦌꦠ꧀ꦡꦤ꧀ꦠꦫꦺ ꦱꦕꦺ ꦱꦩ꧀ꦧꦲꦸꦭꦴ ꦏꦺꦤꦕꦶ ꦏꦩ꧀ꦩꦺꦤ ꦒꦴꦩꦁ ꦥꦮꦶꦱꦤ꧀ꦠꦶ, ‘‘ꦮꦶꦏꦴꦭꦺ ꦒꦴꦩꦥ꧀ꦥꦮꦺꦱꦤꦁ ꦄꦴꦥꦸꦕ꧀ꦖꦴꦩꦴ’’ꦠꦶ ꦱꦧ꧀ꦧꦺꦲꦶꦥꦶ ꦄꦚ꧀ꦚꦩꦚ꧀ꦚꦁ ꦄꦴꦥꦸꦕ꧀ꦖꦶꦠꦧ꧀ꦧꦁ. ꦱꦕꦺ ꦄꦤꦴꦥꦸꦕ꧀ꦖꦴ ꦥꦫꦶꦏ꧀ꦑꦶꦠ꧀ꦠꦱ꧀ꦱ ꦥꦫꦶꦏ꧀ꦑꦺꦥꦁ, ꦄꦥꦫꦶꦏ꧀ꦑꦶꦠ꧀ꦠꦱ꧀ꦱ ꦈꦥꦕꦴꦫꦁ ꦄꦠꦶꦏ꧀ꦏꦩꦤ꧀ꦠꦶ, ꦥꦜꦩꦥꦴꦢꦺ ꦢꦸꦏ꧀ꦏꦛꦁ, ꦢꦸꦠꦶꦪꦥꦴꦢꦸꦢ꧀ꦣꦴꦫꦺ ꦥꦴꦕꦶꦠ꧀ꦠꦶꦪꦁ. ꦄꦴꦥꦢꦴꦱꦸ ꦄꦤꦴꦥꦠ꧀ꦠꦶ.

ꦨꦺꦴꦗꦤꦺ ꦕ ꦥꦫꦩ꧀ꦥꦫꦴꦠꦶ ꦥꦫꦩ꧀ꦥꦫꦨꦺꦴꦗꦤꦺ ꦕ ꦥꦴꦕꦶꦠ꧀ꦠꦶꦪꦤ꧀ꦠꦶ ꦄꦠ꧀ꦡꦺꦴ. ꦌꦠ꧀ꦡ ꦥꦤ ꦥꦚ꧀ꦕꦱꦸ ꦨꦺꦴꦗꦤꦺꦱꦸ ꦄꦚ꧀ꦚꦠꦫꦁ ꦤꦴꦩꦁ ꦒꦲꦺꦠ꧀ꦮꦴ ‘‘ꦎꦢꦤꦺꦤ ꦮꦴ ꦱꦠ꧀ꦠꦸꦤꦴ ꦮꦴ ꦏꦸꦩ꧀ꦩꦴꦱꦺꦤ ꦮꦴ ꦩꦁꦱꦺꦤ ꦮꦴ ꦩꦕ꧀ꦖꦺꦤ ꦮꦴ ꦤꦶꦩꦤ꧀ꦠꦺꦩꦷ’’ꦠꦶꦄꦴꦢꦶꦤꦴ ꦤꦪꦺꦤ, ꦪꦺꦤ ꦏꦺꦤꦕꦶ ꦮꦺꦮꦕꦤꦺꦤ ꦮꦴ ꦄꦏꦥ꧀ꦥꦶꦪꦤꦶꦩꦤ꧀ꦠꦤꦴꦪ ꦤꦶꦩꦤ꧀ꦠꦶꦠꦱ꧀ꦱ ꦪꦺꦤ ꦪꦺꦤ ꦥꦜꦩꦁ ꦤꦶꦩꦤ꧀ꦠꦶꦠꦺꦴ, ꦠꦱ꧀ꦱ ꦠꦱ꧀ꦱ ꦨꦺꦴꦗꦤꦁ ꦜꦥꦺꦠ꧀ꦮꦴ ꦈꦥ꧀ꦥꦛꦶꦥꦴꦛꦶꦪꦴ, ꦄꦮꦶꦏꦥ꧀ꦥꦺꦠ꧀ꦮꦴ ꦮꦴ ꦥꦜꦩꦤꦶꦩꦤ꧀ꦠꦤꦁ ꦥꦫꦱ꧀ꦱ ꦥꦫꦱ꧀ꦱ ꦏꦸꦭꦱ꧀ꦱ ꦥꦚ꧀ꦕꦤ꧀ꦤꦁ ꦨꦺꦴꦗꦤꦴꦤꦁ ꦄꦚ꧀ꦚꦠꦫꦁ ꦥꦫꦶꦨꦸꦚ꧀ꦗꦤ꧀ꦠꦱ꧀ꦱ ꦥꦫꦩ꧀ꦥꦫꦨꦺꦴꦗꦤꦺ ꦥꦴꦕꦶꦠ꧀ꦠꦶ ꦲꦺꦴꦠꦶ. ꦒꦶꦭꦴꦤꦕꦷꦮꦫꦢꦴꦤꦕꦷꦮꦫꦏꦴꦭꦱꦩꦪꦺꦱꦸ ꦄꦤꦴꦥꦠ꧀ꦠꦶ, ꦠꦡꦴ ꦥꦚ꧀ꦕ ꦨꦺꦴꦗꦤꦴꦤꦶ ꦜꦥꦺꦠ꧀ꦮꦴ ꦱꦧ꧀ꦧꦠ꧀ꦡ.

꧑꧒꧓. ꦄꦤꦸꦢ꧀ꦣꦫꦶꦠ꧀ꦮꦴ ꦒꦩꦤꦺ ꦱꦺꦪ꧀ꦪꦤ꧀ꦠꦶ ꦌꦠ꧀ꦡ ꦢꦱꦮꦶꦣꦴ ꦱꦺꦪ꧀ꦪꦴ ꦨꦶꦱꦶ ꦕꦶꦩꦶꦭꦶꦏꦴ ꦈꦠ꧀ꦠꦫꦠ꧀ꦡꦫꦟꦁ ꦨꦹꦩꦠ꧀ꦡꦫꦟꦁ ꦠꦛ꧀ꦛꦶꦏꦴ ꦕꦩ꧀ꦩꦑꦟ꧀ꦝꦺꦴ ꦤꦶꦱꦷꦢꦤꦁ ꦥꦕ꧀ꦕꦠ꧀ꦡꦫꦟꦁ ꦠꦶꦟꦱꦤ꧀ꦡꦴꦫꦺꦴ ꦥꦟ꧀ꦟꦱꦤ꧀ꦡꦴꦫꦺꦴꦠꦶ. ꦌꦠꦺꦱꦸ ꦪꦁ ꦏꦶꦚ꧀ꦕꦶ ꦱꦔ꧀ꦓꦶꦏꦺ ꦮꦶꦲꦴꦫꦺ ꦒꦸꦠ꧀ꦠꦱꦺꦤꦴꦱꦤꦺ ꦄꦠ꧀ꦠꦤꦺꦴ ꦮꦱ꧀ꦱꦒ꧀ꦒꦺꦤ ꦒꦲꦶꦠꦁ ꦄꦠ꧀ꦠꦤꦴ ꦮꦴ ꦱꦤ꧀ꦡꦫꦶꦠ꧀ꦮꦴ, ꦄꦤꦸꦥꦱꦩ꧀ꦥꦤ꧀ꦤꦺꦤ ꦮꦴ ꦱꦤ꧀ꦡꦫꦴꦥꦺꦠ꧀ꦮꦴ ꦠꦁ ꦢꦶꦮꦱꦁ ꦒꦩꦶꦏꦮꦱꦺꦤ ꦥꦏ꧀ꦏꦩꦤ꧀ꦠꦺꦴ ꦤꦺꦮ ꦱꦪꦁ ꦈꦢ꧀ꦣꦫꦺꦪ꧀ꦪ ꦤ ꦄꦚ꧀ꦚꦁ ꦈꦢ꧀ꦣꦫꦴꦥꦺꦪ꧀ꦪ, ꦪꦡꦴ ꦈꦥꦕꦶꦏꦴꦢꦷꦲꦶ ꦤ ꦑꦗ꧀ꦗꦺꦪ꧀ꦪ, ꦌꦮꦁ ꦤ ꦜꦥꦺꦪ꧀ꦪ, ꦄꦚ꧀ꦚꦺꦤ ꦮꦴ ꦤ ꦈꦢ꧀ꦣꦫꦴꦥꦺꦪ꧀ꦪ, ꦥꦠꦶꦫꦹꦥꦁ ꦨꦶꦏ꧀ꦑꦸꦁ ꦮꦴ ꦱꦴꦩꦟꦺꦫꦁ ꦮꦴ ꦄꦴꦫꦴꦩꦶꦏꦩꦺꦮ ꦮꦴ ꦄꦤꦴꦥꦸꦕ꧀ꦖꦴ ꦮꦴ ꦒꦕ꧀ꦖꦺꦪ꧀ꦪ, ꦠꦱ꧀ꦱ ꦥꦫꦶꦏ꧀ꦑꦶꦠ꧀ꦠꦱ꧀ꦱ ꦮꦶꦲꦴꦫꦱ꧀ꦱ ꦥꦫꦶꦏ꧀ꦑꦺꦥꦁ, ꦄꦥꦫꦶꦏ꧀ꦑꦶꦠ꧀ꦠꦱ꧀ꦱ ꦢ꧀ꦮꦺ ꦭꦺꦝ꧀ꦝꦸꦥꦴꦠꦺ ꦄꦠꦶꦏ꧀ꦏꦩꦤ꧀ꦠꦱ꧀ꦱ ꦥꦴꦕꦶꦠ꧀ꦠꦶꦪꦁ. ꦩꦟ꧀ꦝꦥꦫꦸꦏ꧀ꦑꦩꦹꦭꦴꦢꦶꦄꦒꦸꦠ꧀ꦠꦱꦺꦤꦴꦱꦤꦺ ꦱꦤ꧀ꦡꦫꦶꦠ꧀ꦮꦴ ꦒꦕ꧀ꦖꦤ꧀ꦠꦱ꧀ꦱ ꦢꦸꦏ꧀ꦏꦛꦁ, ꦠꦡꦴ ꦩꦚ꧀ꦕꦥꦷꦜꦨꦶꦱꦶꦏꦺꦴꦕ꧀ꦖꦏꦺꦱꦸ, ꦒꦸꦠ꧀ꦠꦱꦺꦤꦴꦱꦤꦺꦥꦶ ꦢꦸꦏ꧀ꦏꦛꦩꦺꦮ.

ꦱꦺꦤꦴꦱꦤꦴꦤꦶ ꦮꦴꦠꦶ ꦌꦠ꧀ꦡ ꦄꦤꦸꦢ꧀ꦣꦫꦶꦠ꧀ꦮꦴ ꦒꦩꦤꦺꦠꦶ ꦱꦩ꧀ꦧꦤ꧀ꦣꦺꦴ. ꦌꦠ꧀ꦡ ꦥꦤ ꦩꦚ꧀ꦕꦺꦴ ꦥꦷꦜꦁ ꦨꦶꦱꦶ ꦏꦺꦴꦕ꧀ꦖꦏꦤ꧀ꦠꦶ ꦕꦠꦸꦧ꧀ꦧꦶꦣꦩ꧀ꦥꦶ ꦱꦺꦤꦴꦱꦤꦁ ꦮꦱ꧀ꦱꦴꦤꦲꦺꦩꦤ꧀ꦠꦴꦤꦁ ꦄꦛ꧀ꦜꦱꦸ ꦩꦴꦱꦺꦱꦸ ꦄꦗ꧀ꦙꦺꦴꦏꦴꦱꦺ ꦮꦴ ꦎꦮꦱ꧀ꦱꦏꦩꦟ꧀ꦝꦥꦺ ꦮꦴ ꦫꦸꦏ꧀ꦑꦩꦹꦭꦺ ꦮꦴ ꦱꦪꦁ ꦱꦤ꧀ꦡꦫꦶꦠ꧀ꦮꦴ ꦮꦴ ꦄꦤꦸꦥꦱꦩ꧀ꦥꦤ꧀ꦤꦺꦤ ꦱꦤ꧀ꦡꦫꦴꦥꦺꦠ꧀ꦮꦴ ꦮꦴ ꦠꦁ ꦄꦤꦸꦢ꧀ꦣꦫꦶꦠ꧀ꦮꦴ ꦮꦴ ꦄꦤꦸꦢ꧀ꦣꦫꦴꦥꦺꦠ꧀ꦮꦴ ꦮꦴ ꦠꦱ꧀ꦱ ꦱꦺꦤꦴꦱꦤꦱ꧀ꦱ ꦢ꧀ꦮꦶꦤ꧀ꦤꦁ ꦭꦺꦝ꧀ꦝꦸꦥꦴꦠꦴꦤꦁ ꦄꦠꦶꦏ꧀ꦏꦩꦤꦺ ꦥꦴꦕꦶꦠ꧀ꦠꦶꦪꦁ. ꦱꦩ꧀ꦩꦸꦚ꧀ꦗꦤꦷꦪꦴꦢꦶ ꦱꦺꦱꦥꦫꦶꦏ꧀ꦑꦴꦫꦺꦱꦸ ꦢꦸꦏ꧀ꦏꦛꦁ.

ꦆꦠ꧀ꦡꦶꦪꦴꦢ꧀ꦣꦴꦤꦒꦩꦤꦺꦠꦶ ꦌꦠ꧀ꦡ ꦩꦴꦠꦸꦒꦴꦩꦺꦤ ‘‘ꦒꦕ꧀ꦖꦴꦩ ꦨꦒꦶꦤꦶ, ꦒꦕ꧀ꦖꦴꦩ ꦄꦪ꧀ꦪꦴ’’ꦠꦶ ꦌꦮꦁ ꦱꦁꦮꦶꦢꦲꦶꦠ꧀ꦮꦴ ‘‘ꦄꦗ꧀ꦗ ꦮꦴ ꦱ꧀ꦮꦺ ꦮꦴ ꦥꦫꦱꦸꦮꦺ ꦮꦴ’’ꦠꦶ ꦤꦶꦪꦩꦶꦠꦏꦴꦭꦁ ꦮꦶꦱꦔ꧀ꦏꦺꦠꦁ ꦄꦏꦠ꧀ꦮꦴ ꦢ꧀ꦮꦴꦫꦮꦶꦱꦔ꧀ꦏꦺꦠꦁ ꦩꦒ꧀ꦒꦮꦶꦱꦔ꧀ꦏꦺꦠꦁ ꦏꦠ꧀ꦮꦴꦥꦶ ꦒꦕ꧀ꦖꦠꦺꦴ ꦒꦴꦩꦤ꧀ꦠꦫꦺ ꦒꦴꦩꦤ꧀ꦠꦫꦺ ꦥꦴꦕꦶꦠ꧀ꦠꦶꦪꦁ. ꦄꦒꦴꦩꦏꦺ ꦄꦫꦚ꧀ꦚꦺ ꦄꦢ꧀ꦣꦪꦺꦴꦗꦤꦺ ꦄꦢ꧀ꦣꦪꦺꦴꦗꦤꦺ ꦄꦴꦥꦠ꧀ꦠꦶ.

ꦌꦏꦺꦏꦴꦪ ꦤꦶꦱꦷꦢꦤꦺꦠꦶ ꦌꦠ꧀ꦡ ꦌꦏꦺꦴ ꦌꦏꦴꦪ ꦆꦠ꧀ꦡꦶꦪꦴ ꦤꦶꦱꦷꦢꦤꦺꦠꦶ ꦄꦠ꧀ꦡꦺꦴ.

꧑꧒꧔. ꦨꦶꦁꦱꦴꦥꦤꦺꦠꦶ ꦌꦠ꧀ꦡ ꦈꦥꦱꦩ꧀ꦥꦤ꧀ꦤꦺꦴ ꦈꦥꦱꦩ꧀ꦥꦤ꧀ꦤꦁ ꦨꦶꦁꦱꦴꦥꦺꦠꦸꦏꦴꦩꦺꦴ ꦕꦺꦴꦫꦏꦤ꧀ꦠꦴꦫꦮꦴꦭ꦳ꦏꦤ꧀ꦠꦴꦫꦴꦢꦷꦤꦶ ꦄꦴꦕꦶꦏ꧀ꦑꦠꦶ, ꦨꦪꦴꦤꦏꦁ ꦮꦴ ꦫꦹꦥꦱꦢ꧀ꦢꦴꦢꦶꦁ ꦢꦱ꧀ꦱꦺꦠꦶ, ꦱꦺꦴ ꦨꦴꦪꦠꦸ ꦮꦴ ꦩꦴ ꦮꦴ, ꦠꦱ꧀ꦱ ꦥꦪꦺꦴꦒꦺ ꦥꦪꦺꦴꦒꦺ ꦥꦴꦕꦶꦠ꧀ꦠꦶꦪꦁ. ꦄꦤꦸꦥꦱꦩ꧀ꦥꦤ꧀ꦤꦺ ꦢꦸꦏ꧀ꦏꦛꦁ.

ꦄꦴꦏꦺꦴꦛꦤꦺꦠꦶ ꦥꦲꦴꦫꦢꦴꦤꦺ. ꦈꦥꦱꦩ꧀ꦥꦤ꧀ꦤꦺꦴ ꦈꦥꦱꦩ꧀ꦥꦤ꧀ꦤꦱ꧀ꦱ ꦄꦤꦠ꧀ꦠꦩꦤꦺꦴ ꦲꦸꦠ꧀ꦮꦴ ꦱꦕꦺ ꦈꦥ꧀ꦥꦭꦥꦠ꧀ꦠꦺꦤꦥꦶ ꦥꦲꦴꦫꦁ ꦢꦺꦠꦶ, ꦥꦴꦕꦶꦠ꧀ꦠꦶꦪꦁ. ꦄꦤꦸꦥꦱꦩ꧀ꦥꦤ꧀ꦤꦱ꧀ꦱ ꦒꦲꦛ꧀ꦜꦱ꧀ꦱ ꦮꦴ ꦥꦧ꧀ꦧꦗꦶꦠꦱ꧀ꦱ ꦮꦴ ꦆꦠ꧀ꦡꦶꦪꦴ ꦮꦴ ꦥꦸꦫꦶꦱꦱ꧀ꦱ ꦮꦴ ꦄꦤ꧀ꦠꦩꦱꦺꦴ ꦠꦶꦫꦕ꧀ꦖꦴꦤꦒꦠꦱ꧀ꦱꦴꦥꦶ ꦥꦲꦴꦫꦁ ꦢꦺꦠꦶ, ꦢꦸꦏ꧀ꦏꦛꦩꦺꦮ.

ꦄꦤꦴꦕꦴꦫꦁ ꦄꦴꦕꦫꦶꦠ꧀ꦮꦴ ꦱꦔ꧀ꦓꦩꦗ꧀ꦙꦺ ꦄꦴꦥꦠ꧀ꦠꦶꦪꦴ ꦮꦴ ꦮꦠ꧀ꦡꦸꦤꦴ ꦮꦴ ꦄꦤꦸꦪꦸꦚ꧀ꦗꦶꦪꦩꦴꦤꦺꦴ ꦠꦁ ꦄꦏꦡꦺꦠꦸꦏꦴꦩꦺꦴ ‘‘ꦏꦺꦴ ꦄꦴꦥꦤ꧀ꦤꦺꦴ, ꦏꦶꦁ ꦄꦴꦥꦤ꧀ꦤꦺꦴ, ꦏꦶꦱ꧀ꦩꦶꦁ ꦄꦴꦥꦤ꧀ꦤꦺꦴ’’ꦠꦶꦄꦴꦢꦶꦤꦴ ꦤꦪꦺꦤ ꦄꦚ꧀ꦚꦺꦲꦶ ꦮꦕꦤꦺꦲꦶ ꦠꦁ ꦮꦕꦤꦁ ꦥꦛꦶꦕ꧀ꦖꦴꦢꦺꦤ꧀ꦠꦺꦴ ꦱꦺꦴ ꦄꦚ꧀ꦚꦁ ꦮꦢꦠꦶ, ꦄꦪꦁ ꦄꦚ꧀ꦚꦮꦴꦢꦏꦺꦴ, ꦠꦱ꧀ꦩꦶꦁ ꦄꦚ꧀ꦚꦮꦴꦢꦏꦺ ꦕ ꦏꦚ꧀ꦕꦶ ꦮꦷꦠꦶꦏ꧀ꦏꦩꦁ ꦢꦶꦱ꧀ꦮꦴ ‘‘ꦄꦴꦮꦸꦱꦺꦴ, ꦆꦢꦁ ꦤꦴꦩ ꦠꦪꦴ ꦏꦠ’’ꦤ꧀ꦠꦶ ꦮꦸꦠ꧀ꦠꦺ ꦠꦁ ꦤ ꦏꦡꦺꦠꦸꦏꦴꦩꦺꦴ ꦠꦸꦟ꧀ꦲꦷꦨꦹꦠꦺꦴꦮ ꦱꦔ꧀ꦓꦁ ꦮꦶꦲꦺꦱꦠꦷꦠꦶ ꦱꦔ꧀ꦓꦮꦶꦲꦺꦱꦏꦺꦴ, ꦠꦱ꧀ꦩꦶꦁ ꦮꦶꦲꦺꦱꦏꦺ ꦕ ꦥꦴꦕꦶꦠ꧀ꦠꦶ ꦲꦺꦴꦠꦷꦠꦶ ꦄꦠ꧀ꦡꦺꦴ. ꦆꦣ ꦥꦤ ꦚꦠ꧀ꦠꦶꦢꦸꦠꦶꦪꦺꦤ ꦏꦩ꧀ꦩꦺꦤ ꦄꦚ꧀ꦚꦮꦴꦢꦏꦺ ꦕ ꦮꦶꦲꦺꦱꦏꦺ ꦕ ꦄꦴꦫꦺꦴꦥꦶꦠꦺ ꦥꦸꦤ ꦄꦚ꧀ꦚꦁ ꦨꦟꦤ꧀ꦠꦱ꧀ꦱ, ꦮꦶꦲꦺꦱꦤ꧀ꦠꦱ꧀ꦱ ꦥꦴꦕꦶꦠ꧀ꦠꦶ. ꦄꦤꦴꦫꦺꦴꦥꦶꦠꦺ ꦢꦸꦏ꧀ꦏꦛꦤ꧀ꦠꦶ ꦮꦺꦢꦶꦠꦧ꧀ꦧꦁ.

ꦢꦸꦛ꧀ꦜꦸꦭ꧀ꦭꦥꦏꦴꦱꦖꦴꦢꦺꦠꦶ ꦌꦠ꧀ꦡ ꦏꦶꦚ꧀ꦕꦴꦥꦶ ‘‘ꦢꦸꦛ꧀ꦜꦸꦭ꧀ꦭꦴ ꦤꦴꦩ ꦄꦴꦥꦠ꧀ꦠꦶ ꦕꦠ꧀ꦠꦴꦫꦶ ꦕ ꦥꦴꦫꦴꦗꦶꦏꦴꦤꦶ ꦠꦺꦫꦱ ꦕ ꦱꦔ꧀ꦓꦴꦢꦶꦱꦺꦱꦴ’’ꦠꦶ (ꦥꦴꦕꦶ. ꧓꧙꧙) ꦮꦸꦠ꧀ꦠꦴ, ꦠꦡꦴꦥꦶ ꦆꦣ ꦱꦔ꧀ꦓꦴꦢꦶꦱꦺꦱꦴꦮ ꦄꦣꦶꦥ꧀ꦥꦺꦠꦴ. ꦠꦱ꧀ꦩꦴ ꦱꦔ꧀ꦓꦱꦩ꧀ꦩꦸꦠꦶꦁ ꦮꦶꦤꦴ ꦨꦶꦏ꧀ꦑꦸꦱ꧀ꦱ ꦢꦸꦛ꧀ꦜꦸꦭ꧀ꦭꦁ ꦄꦴꦥꦠ꧀ꦠꦶꦁ ‘‘ꦄꦪꦁ ꦄꦱꦸꦕꦶꦁ ꦩꦺꦴꦕꦺꦠ꧀ꦮꦴ ꦱꦔ꧀ꦓꦴꦢꦶꦱꦺꦱꦁ ꦄꦴꦥꦤ꧀ꦤꦺꦴ’’ꦠꦶꦄꦴꦢꦶꦤꦴ ꦤꦪꦺꦤ ꦮꦠ꧀ꦡꦸꦤꦴ ꦱꦢ꧀ꦣꦶꦁ ꦄꦴꦥꦠ꧀ꦠꦶꦁ ꦓꦛꦺꦠ꧀ꦮꦴ ꦨꦶꦏ꧀ꦑꦸꦚ꧀ꦕ ꦨꦶꦏ꧀ꦑꦸꦤꦶꦚ꧀ꦕ ꦜꦥꦺꦠ꧀ꦮꦴ ꦪꦱ꧀ꦱ ꦏꦱ꧀ꦱꦕꦶ ꦄꦤꦸꦥꦱꦩ꧀ꦥꦤ꧀ꦤꦱ꧀ꦱ ꦄꦴꦫꦺꦴꦕꦺꦤ꧀ꦠꦱ꧀ꦱ ꦥꦴꦕꦶꦠ꧀ꦠꦶꦪꦁ. ꦡꦸꦭ꧀ꦭꦕ꧀ꦕꦪꦴꦢꦶꦄꦢꦸꦛ꧀ꦜꦸꦭ꧀ꦭꦴꦫꦺꦴꦕꦤꦺ ꦢꦸꦏ꧀ꦏꦛꦁ. ꦢꦸꦛ꧀ꦜꦸꦭ꧀ꦭꦕ꧀ꦖꦴꦢꦤꦺꦥꦶ ꦱꦔ꧀ꦓꦴꦢꦶꦱꦺꦱꦺꦴꦮ ꦄꦣꦶꦥ꧀ꦥꦺꦠꦺꦴ. ꦪꦺꦴ ꦥꦤ ꦨꦶꦏ꧀ꦑꦸ ꦨꦶꦏ꧀ꦑꦸꦱ꧀ꦱ ꦢꦸꦛ꧀ꦜꦸꦭ꧀ꦭꦁ ꦄꦴꦥꦠ꧀ꦠꦶꦁ ꦱꦪꦁ ꦮꦴ ꦗꦴꦤꦶꦠ꧀ꦮꦴ ꦄꦚ꧀ꦚꦺꦱꦁ ꦮꦴ ꦱꦸꦠ꧀ꦮꦴ ‘‘ꦆꦩꦁ ꦗꦴꦤꦶꦠ꧀ꦮꦴ ꦕꦺꦴꦢꦺꦱ꧀ꦱꦤ꧀ꦠꦶ ꦱꦴꦫꦺꦱ꧀ꦱꦤ꧀ꦠꦶ ꦩꦔ꧀ꦏꦸꦁ ꦏꦫꦶꦱ꧀ꦱꦤ꧀ꦠꦶ, ꦤꦴꦫꦺꦴꦕꦶꦱ꧀ꦱꦴꦩꦷ’’ꦠꦶ ꦣꦸꦫꦁ ꦤꦶꦏ꧀ꦑꦶꦥꦠꦶ, ꦠꦱ꧀ꦱ ꦥꦴꦕꦶꦠ꧀ꦠꦶꦪꦁ. ꦣꦸꦫꦁ ꦤꦶꦏ꧀ꦑꦶꦥꦶꦠ꧀ꦮꦴ ꦥꦕ꧀ꦖꦴ ꦄꦴꦫꦺꦴꦕꦶꦠꦺꦥꦶ ꦤ ꦫꦏ꧀ꦑꦠꦶ ꦌꦮ.

ꦲꦴꦱꦺꦴꦢꦏꦺꦠꦶ ꦄꦔ꧀ꦒꦸꦭꦶꦥꦠꦺꦴꦢꦏꦺꦤ ꦲꦴꦱꦺꦴ ꦕ ꦈꦢꦏꦺ ꦲꦴꦱꦺꦴ ꦕꦴꦠꦶ ꦌꦮꦩꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ. ꦈꦥꦱꦩ꧀ꦥꦤ꧀ꦤꦺꦴ ꦈꦥꦱꦩ꧀ꦥꦤ꧀ꦤꦁ ꦲꦱꦴꦣꦶꦥ꧀ꦥꦴꦪꦺꦴ ꦏꦴꦪꦺꦤ ꦏꦴꦪꦁ ꦄꦴꦩꦱꦠꦶ, ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ, ꦏꦺꦴ ꦥꦤ ꦮꦴꦢꦺꦴ ꦈꦥꦏꦕ꧀ꦖꦏꦴꦢꦷꦱꦸ ꦓꦛ꧀ꦛꦤꦺ. ꦄꦤꦸꦥꦱꦩ꧀ꦥꦤ꧀ꦤꦺ ꦢꦸꦏ꧀ꦏꦛꦁ, ꦠꦡꦴ ꦨꦶꦏ꧀ꦑꦸꦱ꧀ꦱ ꦏꦴꦪꦥ꧀ꦥꦛꦶꦧꦢ꧀ꦣꦴꦩꦱꦤꦺ ꦕ ꦤꦶꦱ꧀ꦱꦒ꧀ꦒꦶꦪꦺꦤ ꦏꦴꦪꦥ꧀ꦥꦛꦶꦧꦢ꧀ꦣꦴꦩꦱꦤꦺ ꦕ. ꦌꦠ꧀ꦡ ꦨꦶꦏ꧀ꦑꦸꦤꦷꦥꦶ ꦄꦤꦸꦥꦱꦩ꧀ꦥꦤ꧀ꦤꦛ꧀ꦜꦴꦤꦺ ꦜꦶꦠꦴ. ꦈꦢꦏꦺ ꦲꦱꦤꦣꦩ꧀ꦩꦺꦴ ꦤꦴꦩ ꦈꦥꦫꦶꦒꦺꦴꦥ꧀ꦦꦏꦺ ꦈꦢꦏꦺ ꦏꦷꦭ꦳ꦴꦣꦶꦥ꧀ꦥꦴꦪꦱ꧀ꦱ ꦤꦶꦩ꧀ꦩꦸꦗ꧀ꦗꦤꦈꦩ꧀ꦩꦸꦗ꧀ꦗꦤꦥ꧀ꦭꦮꦤꦴꦢꦶꦏꦁ. ꦆꦣ ꦲꦴꦱꦺꦴ ꦤꦴꦩ ꦏꦷꦭ꦳ꦴ ꦮꦸꦕ꧀ꦕꦠꦶ.

ꦤꦶꦕ꧀ꦖꦸꦨꦤꦺ ꦮꦶꦲꦴꦫꦴꦠꦶ ꦱꦔ꧀ꦓꦶꦏꦴ ꦮꦶꦲꦴꦫꦴ ꦤꦶꦏ꧀ꦏꦝ꧀ꦞꦤꦺꦠꦶ ꦄꦠ꧀ꦡꦺꦴ. ꦌꦠ꧀ꦡ ꦥꦤ ꦪꦺꦴ ꦏꦸꦢ꧀ꦣꦺꦴ ꦲꦸꦠ꧀ꦮꦴ ꦈꦥꦱꦩ꧀ꦥꦤ꧀ꦤꦁ ꦲꦠ꧀ꦡꦴꦢꦷꦱꦸ ꦒꦲꦺꦠ꧀ꦮꦴ ꦮꦴ ‘‘ꦤꦶꦏ꧀ꦑꦩꦴ’’ꦠꦶ ꦮꦠ꧀ꦮꦴ ꦮꦴ ꦪꦠ꧀ꦠꦏꦴꦤꦶ ꦢ꧀ꦮꦴꦫꦴꦤꦶ ꦌꦏꦺꦤ ꦥꦪꦺꦴꦒꦺꦤ ꦄꦠꦶꦏ꧀ꦏꦴꦩꦺꦠꦶ, ꦠꦠ꧀ꦡ ꦢ꧀ꦮꦴꦫꦒꦟꦤꦴꦪ ꦄꦴꦥꦠ꧀ꦠꦶꦁ ꦄꦒ꧀ꦒꦲꦺꦠ꧀ꦮꦴ ꦥꦪꦺꦴꦒꦱ꧀ꦱ ꦌꦏꦠ꧀ꦠꦴ ꦌꦏꦴ ꦌꦮ ꦒꦲꦺꦠꦧ꧀ꦧꦴ. ꦱꦕꦺ ꦤꦴꦤꦴꦥꦪꦺꦴꦒꦺꦲꦶ ꦄꦠꦶꦏ꧀ꦏꦴꦩꦺꦠꦶ, ꦠꦠ꧀ꦡ ꦢ꧀ꦮꦴꦫꦒꦟꦤꦴꦪ ꦒꦲꦺꦠꦧ꧀ꦧꦁ. ꦠꦱ꧀ꦱ ꦥꦫꦶꦏ꧀ꦑꦴꦫꦤꦶꦏ꧀ꦏꦝ꧀ꦞꦤꦺ ꦢꦸꦏ꧀ꦏꦛꦁ, ꦠꦡꦴ ꦄꦤꦸꦥꦱꦩ꧀ꦥꦤ꧀ꦤꦺ, ꦠꦱ꧀ꦱ ꦥꦫꦶꦏ꧀ꦑꦴꦫꦤꦶꦏ꧀ꦏꦝ꧀ꦞꦤꦺ ꦕ. ꦄꦭꦗ꧀ꦗꦶꦄꦴꦢꦷꦱꦸ ꦥꦤ ꦄꦤꦴꦥꦠ꧀ꦠꦶ.

ꦄꦤꦸꦥꦑꦗ꧀ꦗ ꦱꦪꦤꦺꦠꦶ ꦱꦔ꧀ꦓꦶꦏꦺ ꦮꦶꦲꦴꦫꦺ ‘‘ꦮꦸꦝ꧀ꦞꦺꦴ’’ꦠꦶ ꦮꦴ ‘‘ꦒꦶꦭꦴꦤꦺꦴ’’ꦠꦶ ꦮꦴ ‘‘ꦱꦔ꧀ꦓꦺꦤ ꦢꦶꦤ꧀ꦤꦺꦴ’’ꦠꦶ ꦮꦴ ꦗꦴꦤꦶꦠ꧀ꦮꦴ ꦩꦚ꧀ꦕꦱ꧀ꦱ ꦮꦴ ꦥꦷꦜꦱ꧀ꦱ ꦮꦴ ꦥꦮꦶꦱꦤ꧀ꦠꦱ꧀ꦱ ꦮꦴ ꦤꦶꦏ꧀ꦑꦩꦤ꧀ꦠꦱ꧀ꦱ ꦮꦴ ꦈꦥꦕꦴꦫꦺ ꦱꦺꦪ꧀ꦪꦁ ꦱꦤ꧀ꦡꦫꦶꦠ꧀ꦮꦴ ꦮꦴ ꦱꦤ꧀ꦡꦫꦴꦥꦺꦠ꧀ꦮꦴ ꦮꦴ ‘‘ꦪꦱ꧀ꦱ ꦱꦩ꧀ꦧꦴꦣꦺꦴ ꦨꦮꦶꦱ꧀ꦱꦠꦶ, ꦱꦺꦴ ꦥꦏ꧀ꦏꦩꦶꦱ꧀ꦱꦠꦷ’’ꦠꦶ ꦄꦣꦶꦥ꧀ꦥꦴꦪꦺꦤ ꦄꦨꦶꦤꦶꦱꦷꦢꦤ꧀ꦠꦱ꧀ꦱ ꦕ ꦄꦨꦶꦤꦶꦥꦗ꧀ꦗꦤ꧀ꦠꦱ꧀ꦱ ꦕ ꦥꦪꦺꦴꦒꦒꦟꦤꦴꦪ ꦥꦴꦕꦶꦠ꧀ꦠꦶꦪꦁ ꦮꦺꦢꦶꦠꦧ꧀ꦧꦁ. ꦥꦴꦕꦶꦠ꧀ꦠꦶꦪꦮꦶꦤꦶꦕ꧀ꦖꦪꦺꦴ.

ꦥꦴꦕꦶꦠ꧀ꦠꦶꦪꦤꦶꦢ꧀ꦢꦺꦱꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.