꧘. ꦏꦴꦭꦶꦏꦤꦶꦢ꧀ꦢꦺꦱꦺꦴ

ꦏꦴꦭꦶꦏꦴ ꦕꦴꦠꦶ –

꧘꧔. ꦥꦛꦶꦒ꧀ꦒꦲꦶꦠꦴ ꦕꦠ꧀ꦠꦴꦫꦺꦴ, ꦏꦴꦭꦶꦏꦴ ꦪꦴꦮꦏꦴꦭꦶꦏꦁ;

ꦪꦴꦩꦏꦴꦭꦶꦏꦁ ꦱꦠ꧀ꦠꦴꦲ-ꦏꦴꦭꦶꦏꦁ ꦪꦴꦮꦗꦷꦮꦶꦏꦁ.

꧘꧕. ꦥꦶꦛ꧀ꦜꦁ ꦩꦹꦭꦁ ꦦꦭꦁ ꦑꦗ꧀ꦗꦁ, ꦒꦺꦴꦫꦱꦺꦴ ꦣꦚ꧀ꦚꦨꦺꦴꦗꦤꦁ;

ꦪꦴꦒꦸꦱꦹꦥꦥ꧀ꦥꦨꦸꦠꦪꦺꦴ, ꦲꦺꦴꦤ꧀ꦠꦺꦠꦺ ꦪꦴꦮꦏꦴꦭꦶꦏꦴ.

꧘꧖. ꦩꦣꦸꦩꦸꦢ꧀ꦢꦶꦏꦱꦴꦭꦹꦏ-ꦕꦺꦴꦕꦩꦺꦴꦕꦩ꧀ꦧꦗꦩ꧀ꦧꦸꦗꦁ;

ꦦꦴꦫꦸꦱꦁ ꦤꦒ꧀ꦒꦶꦱꦤ꧀ꦠꦠ꧀ꦠꦁ, ꦥꦴꦤꦏꦁ ꦪꦴꦩꦏꦴꦭꦶꦏꦁ.

꧘꧗. ꦱꦴꦤꦸꦭꦺꦴꦩꦴꦤꦶ ꦣꦚ꧀ꦚꦴꦤꦶ, ꦜꦥꦺꦠ꧀ꦮꦴ ꦦꦭꦗꦺꦴ ꦫꦱꦺꦴ;

ꦩꦣꦹꦏꦥꦸꦥ꧀ꦦꦩꦚ꧀ꦚꦠ꧀ꦫ, ꦱꦧ꧀ꦧꦺꦴ ꦥꦸꦥ꧀ꦦꦫꦱꦺꦴꦥꦶ ꦕ.

꧘꧘. ꦱꦧ꧀ꦧꦥꦠ꧀ꦠꦫꦱꦺꦴ ꦕꦺꦮ, ꦜꦥꦺꦠ꧀ꦮꦴ ꦥꦏ꧀ꦏꦝꦴꦏꦗꦁ;

ꦱꦷꦠꦺꦴꦢꦩꦢ꧀ꦢꦶꦠꦺꦴꦢꦶꦕ꧀ꦕ-ꦥꦴꦏꦺꦴ ꦮꦴ ꦪꦴꦩꦏꦴꦭꦶꦏꦺꦴ.

꧘꧙. ꦱꦥ꧀ꦥꦶꦤꦺꦴꦤꦷꦠꦠꦺꦭꦴꦤꦶ, ꦩꦣꦸꦦꦴꦟꦶꦠꦩꦺꦮ ꦕ;

ꦱꦠ꧀ꦠꦴꦲꦏꦴꦭꦶꦏꦴ ꦱꦥ꧀ꦥꦶ, ꦪꦺꦱꦁ ꦩꦁꦱꦩꦮꦴꦫꦶꦠꦁ.

꧙꧐. ꦠꦺꦭꦁ ꦠꦶꦭꦮꦱꦺꦫꦟ꧀ꦝ-ꦩꦣꦸꦱꦴꦱꦥꦱꦩ꧀ꦨꦮꦁ;

ꦑꦸꦢ꧀ꦢꦴꦨꦩꦫꦩꦣꦸꦏꦫꦶ-ꦩꦏ꧀ꦑꦶꦏꦴꦲꦶ ꦏꦠꦁ ꦩꦣꦸ;

ꦫꦱꦴꦢꦶꦈꦕ꧀ꦖꦸꦮꦶꦏꦠꦶ, ꦥꦏ꧀ꦏꦴꦥꦏ꧀ꦏꦴ ꦕ ꦦꦴꦟꦶꦠꦁ.

꧙꧑. ꦱꦮꦠ꧀ꦡꦸꦥꦏ꧀ꦏꦴ ꦱꦴꦩꦁ ꦮꦴ, ꦮꦱꦴ ꦏꦴꦭꦺ ꦄꦩꦴꦤꦸꦱꦴ;

ꦄꦚ꧀ꦚꦺꦱꦁ ꦤ ꦥꦕꦺ ꦮꦠ꧀ꦡꦸꦁ, ꦪꦴꦮꦏꦴꦭꦶꦏꦮꦠ꧀ꦡꦸꦤꦁ.

꧙꧒. ꦲꦭꦶꦢ꧀ꦢꦶꦁ ꦱꦶꦔ꧀ꦒꦶꦮꦺꦫꦚ꧀ꦕ, ꦮꦕꦠ꧀ꦠꦁ ꦭꦱꦸꦟꦁ ꦮꦕꦴ;

ꦈꦱꦷꦫꦁ ꦨꦢ꧀ꦢꦩꦸꦠ꧀ꦠꦚ꧀ꦕꦴꦠꦶꦮꦶꦱꦴ ꦏꦛꦸꦫꦺꦴꦲꦶꦟꦷ;

ꦥꦚ꧀ꦕꦩꦹꦭꦴꦢꦶꦏꦚ꧀ꦕꦴꦥꦶ, ꦩꦹꦭꦁ ꦠꦁ ꦪꦴꦮꦗꦷꦮꦶꦏꦁ.

꧙꧓. ꦧꦶꦭ꦳ꦔ꧀ꦒꦁ ꦩꦫꦶꦕꦁ ꦒꦺꦴꦛ꧀ꦜ-ꦦꦭꦁ ꦥꦶꦥ꧀ꦦꦭꦶ ꦫꦴꦗꦶꦏꦴ;

ꦠꦶꦦꦭꦺꦫꦟ꧀ꦝꦏꦴꦢꦷꦤꦁ, ꦦꦭꦁ ꦠꦁ ꦪꦴꦮꦗꦷꦮꦶꦏꦁ.

꧙꧔. ꦏꦥ꧀ꦥꦴꦱꦤꦶꦩ꧀ꦧꦏꦸꦛꦗꦥꦛꦺꦴꦭꦱꦸꦭꦱꦴꦢꦶꦤꦁ;

ꦱꦹꦥꦺꦪ꧀ꦪꦥꦟ꧀ꦟꦁ ꦮꦗ꧀ꦗꦺꦠ꧀ꦮꦴ, ꦥꦟ꧀ꦟꦁ ꦠꦁ ꦪꦴꦮꦗꦷꦮꦶꦏꦁ.

꧙꧕. ꦜꦥꦺꦠ꧀ꦮꦴ ꦈꦕ꧀ꦖꦸꦤꦶꦪ꧀ꦪꦴꦱꦁ,

ꦱꦫꦱꦁ ꦈꦕ꧀ꦖꦸꦗꦁ ꦠꦕꦁ;

ꦤꦶꦪ꧀ꦪꦴꦱꦺꦴ ꦕ ꦠꦕꦺꦴ ꦱꦧ꧀ꦧꦺꦴ,

ꦭꦺꦴꦟꦁ ꦭꦺꦴꦲꦁ ꦱꦶꦭꦴ ꦠꦡꦴ.

꧙꧖. ꦱꦸꦢ꧀ꦣꦱꦶꦠ꧀ꦡꦚ꧀ꦕ ꦱꦺꦮꦴꦭꦺꦴ, ꦪꦚ꧀ꦕ ꦏꦶꦚ꧀ꦕꦶ ꦱꦸꦙꦴꦥꦶꦠꦁ;

ꦮꦶꦏꦛꦴꦢꦶꦥ꧀ꦥꦨꦺꦢꦚ꧀ꦕ, ꦚꦴꦠꦧ꧀ꦧꦁ ꦪꦴꦮꦗꦷꦮꦶꦏꦁ.

꧙꧗. ꦩꦹꦭꦁ ꦱꦴꦫꦁ ꦠꦕꦺꦴ ꦦꦺꦒ꧀ꦒꦸ, ꦥꦟ꧀ꦟꦁ ꦥꦸꦥ꧀ꦦꦁ ꦦꦭꦁ ꦭꦠꦴ;

ꦄꦴꦲꦴꦫꦠ꧀ꦡ ꦩꦱꦴꦣꦺꦤ꧀ꦠꦁ, ꦱꦧ꧀ꦧꦁ ꦠꦁ ꦪꦴꦮꦗꦷꦮꦶꦏꦁ.

꧙꧘. ꦱꦧ꧀ꦧꦏꦴꦭꦶꦏꦱꦩ꧀ꦨꦺꦴꦒꦺꦴ, ꦏꦴꦭꦺ ꦱꦧ꧀ꦧꦱ꧀ꦱ ꦏꦥ꧀ꦥꦠꦶ;

ꦱꦠꦶ ꦥꦕ꧀ꦕꦪꦺ ꦮꦶꦏꦴꦭꦺ, ꦏꦥ꧀ꦥꦠꦺ ꦏꦴꦭꦶꦏꦠ꧀ꦠꦪꦁ.

꧙꧙. ꦏꦴꦭꦪꦴꦩꦩꦠꦶꦏ꧀ꦏꦤ꧀ꦠꦴ, ꦥꦴꦕꦶꦠ꧀ꦠꦶꦁ ꦗꦤꦪꦤ꧀ꦠꦸꦨꦺꦴ;

ꦗꦤꦪꦤ꧀ꦠꦶ ꦈꦨꦺꦴꦥꦺꦠꦺ, ꦄꦤ꧀ꦠꦺꦴꦮꦸꦠ꧀ꦡꦚ꧀ꦕ ꦱꦤ꧀ꦤꦶꦣꦶꦁ.

꧑꧐꧐. ꦱꦠ꧀ꦠꦴꦲꦏꦴꦭꦶꦏꦺ ꦱꦠ꧀ꦠ, ꦄꦲꦴꦤꦶ ꦄꦠꦶꦤꦴꦩꦶꦠꦺ;

ꦥꦴꦕꦶꦠ꧀ꦠꦶ ꦥꦴꦭ꦳ꦶꦤꦴꦫꦸꦭ꦳꧀ꦲꦺ, ꦱꦥ꧀ꦥꦶꦄꦴꦢꦶꦩ꧀ꦲꦶ ꦢꦸꦏ꧀ꦏꦛꦁ.

꧑꧐꧑. ꦤꦶꦱ꧀ꦱꦛ꧀ꦜꦭꦢ꧀ꦣꦁ ꦩꦏ꧀ꦑꦺꦪ꧀ꦪ, ꦤꦔ꧀ꦒꦁ ꦤꦗ꧀ꦙꦺꦴꦲꦫꦺꦪ꧀ꦪ ꦕ;

ꦮꦶꦏꦥ꧀ꦥꦺꦤ꧀ꦠꦱ꧀ꦱ ꦱꦠ꧀ꦠꦴꦲꦺ, ꦱꦴꦩꦟꦺꦫꦱ꧀ꦱꦣꦶꦛ꧀ꦜꦠꦺꦴ;

ꦩꦏ꧀ꦑꦤꦴꦢꦶꦚ꧀ꦕ ꦤꦴꦥꦠ꧀ꦠꦶ, ꦄꦚ꧀ꦚꦱ꧀ꦱ ꦢꦢꦠꦺꦴꦥꦶ ꦕ.

꧑꧐꧒. ꦪꦴꦮꦏꦴꦭꦶꦏꦄꦴꦢꦷꦤꦶ, ꦱꦁꦱꦛ꧀ꦜꦴꦤꦶ ꦱꦲꦠ꧀ꦠꦤꦴ;

ꦒꦴꦲꦴꦥꦪꦤ꧀ꦠꦶ ꦱꦧ꧀ꦨꦴꦮꦁ, ꦠꦱ꧀ꦩꦴ ꦌꦮꦩꦸꦢꦷꦫꦶꦠꦁ.

꧑꧐꧓. ꦥꦸꦫꦺ ꦥꦛꦶꦒ꧀ꦒꦲꦶꦠꦚ꧀ꦕ, ꦱꦠ꧀ꦠꦴꦲꦁ ꦪꦴꦮꦗꦷꦮꦶꦏꦁ;

ꦱꦺꦱꦏꦴꦭꦶꦏꦱꦩ꧀ꦩꦶꦱ꧀ꦱꦁ, ꦥꦴꦕꦶꦠ꧀ꦠꦶ ꦥꦫꦶꦨꦸꦚ꧀ꦗꦠꦺꦴ.

꧑꧐꧔. ꦪꦴꦮꦏꦴꦭꦶꦏꦱꦩ꧀ꦩꦶꦱ꧀ꦱꦁ, ꦆꦠꦫꦁ ꦏꦴꦭꦶꦏꦠ꧀ꦠꦪꦁ;

ꦥꦛꦶꦒ꧀ꦒꦲꦶꦠꦁ ꦠꦢꦲꦸ, ꦠꦢꦲꦺꦮ ꦕ ꦨꦸꦚ꧀ꦗꦪꦺ.

꧑꧐꧕. ꦪꦴꦩꦏꦴꦭꦶꦏꦱꦩ꧀ꦩꦶꦱ꧀ꦱꦁ, ꦱꦺꦱꦩꦺꦮꦁ ꦮꦶꦗꦴꦤꦶꦪꦁ;

ꦱꦠ꧀ꦠꦴꦲꦏꦴꦭꦶꦏꦩꦶꦱ꧀ꦱꦚ꧀ꦕ, ꦱꦠ꧀ꦠꦴꦲꦁ ꦏꦥ꧀ꦥꦠꦺꦠꦫꦤ꧀ꦠꦶ.