꧗. ꦠꦠꦸꦠ꧀ꦠꦫꦶꦱꦶꦏ꧀ꦑꦴꦥꦢꦮꦟ꧀ꦟꦤꦴ

ꦥꦏꦠꦶꦪꦴ ꦱꦤ꧀ꦠꦫꦸꦠ꧀ꦠꦫꦺꦤ ꦕꦫꦠꦶ ꦏꦡꦶꦤꦥꦭꦶꦧꦺꦴꦣꦮꦱꦺꦤ ꦮꦴ ꦱꦴꦱꦔ꧀ꦏꦱꦶꦏ꧀ꦑꦴꦥꦢꦮꦱꦺꦤ ꦮꦴ. ꦌꦠ꧀ꦡ ꦱꦶꦪꦴ – ‘‘ꦤ ꦩꦠ꧀ꦠꦁ ꦗꦴꦤꦶꦠ꧀ꦮꦴ ꦧꦲꦸꦁ ꦕꦷꦮꦫꦁ ꦮꦶꦚ꧀ꦚꦴꦥꦺꦱ꧀ꦱꦤ꧀ꦠꦶ, ꦢꦸꦱ꧀ꦱꦮꦴꦟꦶꦗ꧀ꦗꦁ ꦮꦴ’’ꦠꦶꦄꦴꦢꦶꦤꦴ (ꦥꦴꦫꦴ. ꧕꧒꧒) ꦈꦗ꧀ꦙꦴꦪꦤ꧀ꦠꦴꦤꦁ ꦱꦸꦠ꧀ꦮꦴ ꦨꦒꦮꦴꦥꦶ ꦖꦧ꧀ꦧꦒ꧀ꦒꦶꦪꦺ ꦨꦶꦏ꧀ꦑꦹ ‘‘ꦏꦡꦚ꧀ꦲꦶ ꦤꦴꦩ ꦠꦸꦩ꧀ꦲꦺ ꦩꦺꦴꦓꦥꦸꦫꦶꦱꦴ ꦤ ꦩꦠ꧀ꦠꦁ ꦗꦴꦤꦶꦠ꧀ꦮꦴ ꦧꦲꦸꦁ ꦕꦷꦮꦫꦁ ꦮꦶꦚ꧀ꦚꦴꦥꦺꦱ꧀ꦱꦡꦴ’’ꦠꦶ (ꦥꦴꦫꦴ. ꧕꧒꧒) ꦮꦠ꧀ꦮꦴ ꦱꦶꦏ꧀ꦑꦴꦥꦢꦱ꧀ꦱ ꦥꦚ꧀ꦚꦠ꧀ꦠꦠ꧀ꦠꦴ ꦕ ꦆꦩꦶꦱ꧀ꦱꦁ ꦏꦔ꧀ꦑꦴꦮꦶꦠꦫꦟꦶꦪꦁ ‘‘ꦧꦲꦸꦕꦷꦮꦫꦮꦶꦚ꧀ꦚꦴꦥꦤꦮꦠ꧀ꦡꦸꦱ꧀ꦩꦶꦁ ꦥꦚ꧀ꦚꦠ꧀ꦠ’’ꦤ꧀ꦠꦶ ꦮꦸꦠ꧀ꦠꦠ꧀ꦠꦴ, ꦱꦩꦤ꧀ꦠꦥꦴꦱꦴꦢꦶꦏꦴꦪꦁ ‘‘ꦤ ꦲꦶ ꦄꦤꦕ꧀ꦖꦶꦤ꧀ꦤꦕꦷꦮꦫꦴ ꦄꦠ꧀ꦠꦤꦺꦴ ꦄꦠ꧀ꦡꦴꦪ ꦱꦴꦑꦴꦥꦭꦴꦱꦁ ꦨꦚ꧀ꦗꦶꦠꦸꦁ ꦭꦨꦤ꧀ꦠꦶ, ꦄꦕ꧀ꦖꦶꦤ꧀ꦤꦕꦷꦮꦫꦴꦤꦁ ꦥꦤ ꦄꦠ꧀ꦡꦴꦪ ꦭꦨꦤ꧀ꦠꦷ’’ꦠꦶ ꦮꦸꦠ꧀ꦠꦠ꧀ꦠꦴ ꦕ ꦄꦚ꧀ꦚꦱ꧀ꦱꦠ꧀ꦡꦴꦪ ꦥꦩꦴꦟꦁ ꦮꦶꦚ꧀ꦚꦴꦥꦺꦠꦸꦁ ꦮꦛ꧀ꦛꦠꦷꦠꦶ ꦕꦺ? ꦤ, ꦏꦱ꧀ꦩꦴ? ꦄꦚ꧀ꦚꦴꦠꦏꦮꦶꦚ꧀ꦚꦠ꧀ꦠꦶꦱꦶꦏ꧀ꦑꦴꦥꦢꦱ꧀ꦱ ꦄꦛ꧀ꦜꦸꦥ꧀ꦥꦠ꧀ꦠꦶꦪꦴ ꦌꦮ ꦄꦚ꧀ꦚꦴꦠꦏꦮꦶꦚ꧀ꦚꦠ꧀ꦠꦶ ꦮꦴꦫꦶꦠꦴ. ꦠꦱ꧀ꦱ ꦱꦶꦏ꧀ꦑꦴꦥꦢꦱ꧀ꦱ ꦄꦤꦴꦥꦠ꧀ꦠꦶ. ꦥꦴꦭ꦳ꦶꦪꦁ (ꦥꦴꦫꦴ. ꧕꧒꧑) ‘‘ꦄꦚ꧀ꦚꦱ꧀ꦱꦠ꧀ꦡꦴꦪꦴ’’ꦠꦶ ꦆꦩꦶꦱ꧀ꦱꦴ ꦄꦤꦴꦥꦠ꧀ꦠꦶꦥꦴꦭ꦳ꦶꦪꦴ ꦄꦚ꧀ꦚꦱ꧀ꦱꦠ꧀ꦡꦴꦪ ꦮꦶꦚ꧀ꦚꦴꦥꦺꦤ꧀ꦠꦺꦴ ꦠꦱ꧀ꦱ ꦚꦴꦠꦏꦥ꧀ꦥꦮꦴꦫꦶꦠꦺ ꦌꦮ ꦮꦶꦚ꧀ꦚꦴꦥꦺꦠꦶ, ꦤ ꦄꦚ꧀ꦚꦺꦠꦶ ꦮꦕꦤꦠꦺꦴ ꦕ ꦮꦴꦫꦶꦠꦴ. ꦠꦱ꧀ꦩꦴ ꦨꦒꦮꦴꦥꦶ ‘‘ꦧꦲꦸꦁ ꦕꦷꦮꦫꦁ ꦮꦶꦚ꧀ꦚꦴꦥꦺꦱ꧀ꦱꦡꦴ’’ꦠꦶ (ꦥꦴꦫꦴ. ꧕꧒꧒) ꦮꦶꦒꦫꦲꦶꦠ꧀ꦮꦴ ꦱꦶꦏ꧀ꦑꦴꦥꦢꦁ ꦥꦚ꧀ꦚꦴꦥꦺꦤ꧀ꦠꦺꦴ ‘‘ꦄꦨꦶꦲꦛ꧀ꦜꦸꦁ ꦥꦮꦴꦫꦺꦪ꧀ꦪꦴ’’ꦠꦶ ꦮꦸꦠ꧀ꦠꦤꦪꦺꦤꦺꦮ ꦥꦩꦴꦟꦠꦺꦴ ꦒꦲꦟꦁ ꦄꦤꦸꦗꦴꦤꦶ, ꦤ ꦄꦚ꧀ꦚꦱ꧀ꦱꦠ꧀ꦡꦴꦪ ꦥꦩꦴꦟꦠꦺꦴ ꦮꦶꦚ꧀ꦚꦴꦥꦤꦁ. ꦪꦱ꧀ꦩꦴ ꦥꦤꦶꦩꦁ ꦱꦶꦏ꧀ꦑꦴꦥꦢꦁ ꦄꦚ꧀ꦚꦱ꧀ꦱꦠ꧀ꦡꦴꦪ ꦮꦶꦚ꧀ꦚꦴꦥꦤꦮꦠ꧀ꦡꦸꦱ꧀ꦩꦶꦁꦪꦺꦮ ꦥꦚ꧀ꦚꦠ꧀ꦠꦁ, ꦠꦱ꧀ꦩꦴ ꦆꦣ ‘‘ꦄꦚ꧀ꦚꦱ꧀ꦱꦠ꧀ꦡꦴꦪꦴ’’ꦠꦶ ꦤ ꦮꦸꦠ꧀ꦠꦁ, ꦤ ꦤ ꦭꦧ꧀ꦨꦠꦷꦠꦶ ꦏꦠ꧀ꦮꦴ.

ꦄꦛ꧀ꦜꦏꦡꦴꦱꦸ ‘‘ꦄꦚ꧀ꦚꦴꦠꦏꦥ꧀ꦥꦮꦴꦫꦶꦠꦛ꧀ꦜꦴꦤꦺ ꦥꦏꦠꦶꦪꦴ ꦧꦲꦸꦩ꧀ꦥꦶ ꦮꦛ꧀ꦛꦠꦶ, ꦄꦕ꧀ꦖꦶꦤ꧀ꦤꦏꦴꦫꦟꦴ ꦥꦩꦴꦟꦩꦺꦮ ꦮꦛ꧀ꦛꦠꦷ’’ꦠꦶ ꦮꦸꦠ꧀ꦠꦁ. ꦠꦁ ‘‘ꦄꦤꦴꦥꦠ꧀ꦠꦶ ꦚꦴꦠꦏꦴꦤꦁ ꦥꦮꦴꦫꦶꦠꦴꦤ’’ꦤ꧀ꦠꦶ (ꦥꦴꦫꦴ. ꧕꧒꧖) ꦮꦸꦠ꧀ꦠꦄꦤꦴꦥꦠ꧀ꦠꦶꦥꦴꦭ꦳ꦶꦪꦴ ꦤ ꦱꦩꦺꦠꦷꦠꦶ ꦱꦩꦤ꧀ꦠꦥꦴꦱꦴꦢꦶꦏꦴꦪꦁ (ꦥꦴꦫꦴ. ꦄꦛ꧀ꦜ. ꧒.꧕꧒꧖) ꦮꦸꦠ꧀ꦠꦠ꧀ꦠꦴ ꦆꦣꦴꦥꦶ ꦮꦸꦠ꧀ꦠꦤꦪꦺꦤꦺꦮ ꦚꦴꦠꦏꦥ꧀ꦥꦮꦴꦫꦶꦠꦺ ꦮꦶꦚ꧀ꦚꦴꦥꦺꦤ꧀ꦠꦱ꧀ꦱ ꦄꦠ꧀ꦠꦤꦺꦴ ꦣꦤꦺꦤ ꦒꦟ꧀ꦲꦤ꧀ꦠꦱ꧀ꦱ ꦄꦤꦴꦥꦠ꧀ꦠꦷꦠꦶ ꦭꦶꦑꦶꦠꦁ. ‘‘ꦄꦚ꧀ꦚꦱ꧀ꦱꦠ꧀ꦡꦴꦪꦴ’’ꦠꦶ ꦤꦶꦢꦴꦤꦮꦶꦫꦺꦴꦣꦠꦺꦴ ꦤ ꦮꦸꦠ꧀ꦠꦁ, ꦠꦡꦴꦥꦶ ꦄꦤꦤ꧀ꦠꦫꦺ ꦮꦸꦠ꧀ꦠꦤꦪꦺꦤꦺꦮ ꦭꦧ꧀ꦨꦠꦶ ꦌꦮꦴꦠꦶ ꦮꦢꦤ꧀ꦠꦶ.

ꦠꦠꦸꦠ꧀ꦠꦫꦶꦱꦶꦏ꧀ꦑꦴꦥꦢꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.