꧗. ꦩꦲꦴꦤꦴꦩꦱꦶꦏ꧀ꦑꦴꦥꦢꦮꦟ꧀ꦟꦤꦴ

ꦱꦧ꧀ꦧꦚ꧀ꦕꦺꦠꦁ ꦮꦠ꧀ꦡꦸꦮꦱꦺꦤ ꦮꦸꦠ꧀ꦠꦤ꧀ꦠꦶ ‘‘ꦄꦒꦶꦭꦴꦤꦺꦤ ꦨꦶꦏ꧀ꦑꦸꦤꦴ ꦕꦠꦸꦩꦴꦱꦥꦕ꧀ꦕꦪꦥꦮꦴꦫꦟꦴ ꦱꦴꦢꦶꦠꦧ꧀ꦧꦴ ꦄꦚ꧀ꦚꦠ꧀ꦫ ꦥꦸꦤꦥꦮꦴꦫꦟꦴꦪ ꦄꦚ꧀ꦚꦠ꧀ꦫ ꦤꦶꦕ꧀ꦕꦥꦮꦴꦫꦟꦴꦪꦴ’’ꦠꦶ (ꦥꦴꦕꦶ. ꧓꧐꧖) ꦌꦠꦁ ꦱꦧ꧀ꦧꦁ ꦱꦶꦏ꧀ꦑꦴꦥꦢꦤꦶꦢꦴꦤꦱꦔ꧀ꦑꦴꦠꦱ꧀ꦱ ꦮꦠ꧀ꦡꦸꦤꦺꦴ ꦮꦱꦺꦤ ꦮꦸꦠ꧀ꦠꦁ. ꦠꦠ꧀ꦡ ꦲꦶ ꦩꦲꦴꦤꦴꦩꦺꦤ ꦱꦏ꧀ꦏꦺꦤ ‘‘ꦆꦕ꧀ꦖꦴꦩꦲꦁ, ꦨꦤ꧀ꦠꦺ, ꦱꦔ꧀ꦓꦁ ꦕꦠꦸꦩꦴꦱꦁ ꦨꦺꦱꦗ꧀ꦗꦺꦤ ꦥꦮꦴꦫꦺꦠꦸ’’ꦤ꧀ꦠꦶꦄꦴꦢꦶꦤꦴ (ꦥꦴꦕꦶ. ꧓꧐꧓) ꦈꦱ꧀ꦱꦤ꧀ꦤꦸꦱ꧀ꦱꦤ꧀ꦤꦺꦤ ꦕ ꦨꦺꦱꦗ꧀ꦗꦺꦤ ꦕꦠꦸꦩꦴꦱꦁ ꦥꦸꦤ ꦤꦶꦕ꧀ꦕꦁ ꦥꦮꦴꦫꦟꦴ ꦏꦠꦴ, ꦠꦱ꧀ꦩꦴ ꦨꦒꦮꦠꦴ ꦠꦱ꧀ꦱ ꦮꦱꦺꦤ ꦌꦮꦁ ꦮꦸꦠ꧀ꦠꦤ꧀ꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦄꦚ꧀ꦚꦠ꧀ꦫ ꦥꦸꦤꦥꦮꦴꦫꦟꦴꦪꦴꦠꦶ ꦪꦢꦶ ꦥꦸꦤꦥꦮꦴꦫꦟꦴ ꦄꦠ꧀ꦡꦶ, ꦠꦁ ꦜꦥꦺꦠ꧀ꦮꦴ. ꦄꦚ꧀ꦚꦠ꧀ꦫ ꦤꦶꦕ꧀ꦕꦥꦮꦴꦫꦟꦴꦪꦴꦠꦶ ꦌꦠ꧀ꦡꦴꦥꦶ ꦌꦱꦺꦮ ꦤꦪꦺꦴ. ꦪꦢꦶ ꦥꦤ ꦠꦴꦥꦶ ꦄꦠ꧀ꦡꦶ, ꦱꦴꦢꦶꦠꦧ꧀ꦧꦴꦮꦴꦠꦶ ꦄꦣꦶꦥ꧀ꦥꦴꦪꦺꦴ. ꦠꦺꦤꦴꦲ ‘‘ꦄꦪꦁ ꦥꦤꦺꦠ꧀ꦡ ꦄꦠ꧀ꦡꦺꦴ’’ꦠꦶꦄꦴꦢꦶ. ꦠꦠ꧀ꦡꦴꦠꦶ ꦠꦶꦱ꧀ꦱꦁ ꦥꦮꦴꦫꦟꦴꦪꦁ. ꦨꦺꦱꦗ꧀ꦗꦺꦲꦶ ꦮꦴ ꦥꦫꦶꦕ꧀ꦖꦺꦢꦺꦴ ꦏꦠꦺꦴ ꦲꦺꦴꦠꦷꦠꦶ ‘‘ꦱꦥ꧀ꦥꦶ ꦠꦺꦭ’’ꦤ꧀ꦠꦶ ꦌꦮꦩꦴꦢꦶꦤꦴ ꦤꦴꦩꦮꦱꦺꦤ ꦮꦴ ‘‘ꦥꦠ꧀ꦡꦺꦤ ꦤꦴꦭ꦳ꦶꦪꦴ ꦄꦴꦭ꦳꧀ꦲꦏꦺꦤꦴ’’ꦠꦶꦄꦴꦢꦶꦤꦴ ꦥꦫꦶꦩꦴꦟꦮꦱꦺꦤ ꦮꦴ ‘‘ꦌꦠ꧀ꦠꦏꦴꦤꦶ ꦮꦴ ꦨꦺꦱꦗ꧀ꦗꦴꦤꦶ ꦮꦶꦚ꧀ꦚꦴꦥꦺꦠꦧ꧀ꦧꦴꦤꦷ’’ꦠꦶ ꦨꦺꦱꦗ꧀ꦗꦺꦲꦶ ꦥꦫꦶꦕ꧀ꦖꦺꦢꦺꦴ ꦏꦠꦺꦴ ꦲꦺꦴꦠꦶ. ꦤꦨꦺꦱꦗ꧀ꦗꦏꦫꦟꦷꦪꦺꦠꦶ ꦩꦶꦱ꧀ꦱꦏꦨꦠ꧀ꦠꦺꦤꦴꦥꦶ ꦕꦺ ꦪꦴꦥꦺꦠꦸꦁ ꦱꦏ꧀ꦏꦺꦴꦠꦶ, ꦤꦨꦺꦱꦗ꧀ꦗꦏꦫꦟꦷꦪꦁ ꦤꦴꦩ ꦲꦺꦴꦠꦶ. ꦄꦚ꧀ꦚꦁ ꦨꦺꦱꦗ꧀ꦗꦤ꧀ꦠꦶ ꦱꦥ꧀ꦥꦶꦤꦴ ꦥꦮꦴꦫꦶꦠꦺꦴ ꦠꦺꦭꦁ, ꦄꦴꦭ꦳꧀ꦲꦏꦺꦤ ꦥꦮꦴꦫꦶꦠꦺꦴ ꦢꦺꦴꦟꦁ.

ꦪꦡꦴꦨꦹꦠꦁ ꦄꦴꦕꦶꦏ꧀ꦑꦶꦠ꧀ꦮꦴꦠꦶ ‘‘ꦆꦩꦺꦲꦶ ꦠꦪꦴ ꦨꦺꦱꦗ꧀ꦗꦺꦲꦶ ꦥꦮꦴꦫꦶꦠꦩ꧀ꦲꦴ, ꦄꦩ꧀ꦲꦴꦏꦚ꧀ꦕ ꦆꦩꦶꦤꦴ ꦕ ꦆꦩꦶꦤꦴ ꦕ ꦨꦺꦱꦗ꧀ꦗꦺꦤ ꦄꦠ꧀ꦡꦺꦴ, ꦪꦴꦱꦸ ꦠꦪꦴ ꦫꦠ꧀ꦠꦷꦱꦸ ꦥꦮꦴꦫꦶꦠꦩ꧀ꦲꦴ, ꦠꦴ ꦫꦠ꧀ꦠꦶꦪꦺꦴ ꦮꦷꦠꦶꦮꦠ꧀ꦠꦴ, ꦄꦩ꧀ꦲꦴꦏꦚ꧀ꦕ ꦨꦺꦱꦗ꧀ꦗꦺꦤ ꦄꦠ꧀ꦡꦺꦴ’’ꦠꦶ ꦪꦡꦴꦨꦹꦠꦁ ꦄꦴꦫꦺꦴꦕꦺꦠ꧀ꦮꦴ. ꦌꦮꦚ꧀ꦕ ꦮꦶꦚ꧀ꦚꦴꦥꦺꦠꦸꦁ ꦒꦶꦭꦴꦤꦺꦴꦮ ꦭꦨꦠꦶ, ꦤ ꦆꦠꦫꦺꦴ.

ꦩꦲꦴꦤꦴꦩꦱꦶꦏ꧀ꦑꦴꦥꦢꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.