꧔. ꦕꦠꦸꦠ꧀ꦡꦥꦴꦫꦴꦗꦶꦏꦮꦟ꧀ꦟꦤꦴ

ꦄꦤꦨꦶꦗꦴꦤꦤ꧀ꦠꦶ ꦤ ꦄꦨꦶꦗꦴꦤꦁ. ꦪꦺꦤ ꦲꦶ ꦪꦺꦴ ꦣꦩ꧀ꦩꦺꦴ ꦄꦣꦶꦒꦠꦺꦴ, ꦱꦺꦴ ꦠꦱ꧀ꦱ ꦥꦴꦏꦛꦺꦴ ꦲꦺꦴꦠꦷꦠꦶ ꦄꦴꦲ ‘‘ꦱꦏꦱꦤ꧀ꦠꦴꦤꦺ’’ꦠꦶꦄꦴꦢꦶ. ꦈꦠ꧀ꦠꦫꦶꦩꦤꦸꦱ꧀ꦱꦴꦤꦤ꧀ꦠꦶ ꦥꦏꦠꦶꦩꦤꦸꦱ꧀ꦱꦺꦲꦶ ꦈꦠ꧀ꦠꦫꦶꦠꦫꦴꦤꦁ ꦩꦤꦸꦱ꧀ꦱꦴꦤꦁ, ꦈꦏ꧀ꦏꦛ꧀ꦜꦩꦤꦸꦱ꧀ꦱꦴꦤꦤ꧀ꦠꦶ ꦄꦠ꧀ꦡꦺꦴ. ꦣꦩ꧀ꦩꦤ꧀ꦠꦶ ꦩꦲꦒ꧀ꦒꦠꦭꦺꦴꦏꦸꦠ꧀ꦠꦫꦨꦹꦠꦁ ꦄꦣꦶꦒꦠꦣꦩ꧀ꦩꦁ. ꦄꦡ ꦮꦴ ꦈꦠ꧀ꦠꦫꦶꦩꦤꦸꦱ꧀ꦱꦣꦩ꧀ꦩꦴꦠꦶ ꦈꦠ꧀ꦠꦫꦶꦩꦤꦸꦱ꧀ꦱꦣꦩ꧀ꦩꦺꦴ. ꦩꦤꦸꦱ꧀ꦱꦣꦩ꧀ꦩꦺꦴ ꦤꦴꦩ ꦮꦶꦤꦴ ꦨꦴꦮꦤꦴꦩꦤꦱꦶꦏꦴꦫꦺꦤ ꦥꦏꦠꦶꦪꦴ ꦩꦤꦸꦱ꧀ꦱꦺꦲꦶ ꦤꦶꦧ꧀ꦧꦠ꧀ꦠꦺꦠꦧ꧀ꦧꦺꦴ ꦢꦱꦏꦸꦱꦭꦏꦩ꧀ꦩꦥꦡꦣꦩ꧀ꦩꦺꦴ. ꦱꦺꦴ ꦲꦶ ꦩꦤꦸꦱ꧀ꦱꦴꦤꦁ ꦕꦶꦠ꧀ꦠꦴꦣꦶꦛ꧀ꦜꦴꦤꦩꦠ꧀ꦠꦺꦤ ꦆꦗ꧀ꦙꦤꦠꦺꦴ ꦠꦺꦱꦁ ꦱꦺꦴ ꦨꦴꦮꦶꦠꦣꦩ꧀ꦩꦺꦴ ꦮꦶꦪ ꦜꦶꦠꦺꦴꦠꦶ ꦠꦡꦴ ꦮꦸꦠ꧀ꦠꦺꦴ, ꦩꦤꦸꦱ꧀ꦱꦒ꧀ꦒꦲꦟꦚ꧀ꦕꦺꦠ꧀ꦡ ꦠꦺꦱꦸ ꦧꦲꦸꦭꦁ ꦥꦮꦠ꧀ꦠꦤꦠꦺꦴ. ꦙꦴꦤꦴꦢꦶꦏꦁ ꦥꦤ ꦠꦧ꧀ꦧꦶꦣꦸꦫꦤ꧀ꦠꦶ ꦠꦠꦸꦠ꧀ꦠꦫꦶ, ꦆꦠꦶ ꦈꦠ꧀ꦠꦫꦶ ꦩꦤꦸꦱ꧀ꦱꦣꦩ꧀ꦩꦴꦠꦶ ꦈꦠ꧀ꦠꦫꦶꦩꦤꦸꦱ꧀ꦱꦣꦩ꧀ꦩꦺꦴ, ꦠꦁ ꦈꦠ꧀ꦠꦫꦶꦩꦤꦸꦱ꧀ꦱꦣꦩ꧀ꦩꦤ꧀ꦠꦶ ꦌꦮꦩ꧀ꦥꦺꦠ꧀ꦡ ꦄꦠ꧀ꦡꦺꦴ ꦢꦛ꧀ꦜꦧ꧀ꦧꦺꦴ. ꦱꦩꦸꦢꦴꦕꦫꦤ꧀ꦠꦺꦴꦠꦶ ꦄꦴꦫꦺꦴꦕꦺꦤ꧀ꦠꦺꦴ.

ꦏꦶꦚ꧀ꦕꦴꦥꦶ ꦭꦺꦴꦏꦶꦪꦭꦺꦴꦏꦸꦠ꧀ꦠꦫꦴ ꦱꦧ꧀ꦧꦴꦮ ꦥꦚ꧀ꦚꦴ ‘‘ꦚꦴꦟ’’ꦤ꧀ꦠꦶ ꦮꦸꦕ꧀ꦕꦠꦶ, ꦆꦣ ꦥꦤ ꦩꦲꦒ꧀ꦒꦠꦭꦺꦴꦏꦸꦠ꧀ꦠꦫꦴꦮ ꦮꦺꦢꦶꦠꦧ꧀ꦧꦴꦠꦶ ꦄꦴꦲ ‘‘ꦩꦲꦒ꧀ꦒꦠꦭꦺꦴꦏꦸꦠ꧀ꦠꦫꦥꦚ꧀ꦚꦴ ꦗꦴꦤꦤꦛ꧀ꦜꦺꦤ ꦚꦴꦟ’’ꦤ꧀ꦠꦶ. ꦏꦶꦭꦺꦱꦺꦲꦶ ꦄꦴꦫꦏꦠ꧀ꦠꦴ ꦥꦫꦶꦱꦸꦢ꧀ꦣꦛ꧀ꦜꦺꦤ ꦄꦫꦶꦪꦤ꧀ꦠꦶ ꦄꦴꦲ ‘‘ꦄꦫꦶꦪꦁ ꦮꦶꦱꦸꦢ꧀ꦣꦁ ꦈꦠ꧀ꦠꦩ’’ꦤ꧀ꦠꦶ. ꦄꦫꦶꦪꦱꦢ꧀ꦢꦺꦴ ꦕꦺꦠ꧀ꦡ ꦮꦶꦱꦸꦢ꧀ꦣꦥꦫꦶꦪꦴꦪꦺꦴ, ꦤ ꦭꦺꦴꦏꦸꦠ꧀ꦠꦫꦥꦫꦶꦪꦴꦪꦺꦴ. ꦙꦴꦤꦴꦢꦶꦨꦺꦢꦺꦠꦶ ꦄꦴꦢꦶꦱꦢ꧀ꦢꦺꦤ ‘‘ꦮꦶꦩꦺꦴꦏ꧀ꦑꦺꦴ, ꦱꦩꦴꦣꦶ, ꦱꦩꦴꦥꦠ꧀ꦠꦶ, ꦚꦴꦟꦢꦱ꧀ꦱꦤꦁ, ꦩꦒ꧀ꦒꦨꦴꦮꦤꦴ, ꦦꦭꦱꦕ꧀ꦖꦶꦏꦶꦫꦶꦪꦴ, ꦏꦶꦭꦺꦱꦥ꧀ꦥꦲꦴꦤꦁ, ꦮꦶꦤꦷꦮꦫꦟꦠꦴ ꦕꦶꦠ꧀ꦠꦱ꧀ꦱ, ꦱꦸꦚ꧀ꦚꦴꦒꦴꦫꦺ ꦄꦨꦶꦫꦠꦷ’’ꦠꦶ (ꦥꦴꦫꦴ. ꧑꧙꧘) ꦆꦩꦺ ꦱꦔ꧀ꦒꦟ꧀ꦲꦴꦠꦶ. ꦮꦶꦚ꧀ꦚꦸꦱ꧀ꦱ ꦩꦤꦸꦱ꧀ꦱꦗꦴꦠꦶꦏꦱ꧀ꦱꦴꦠꦶ ꦄꦴꦫꦺꦴꦕꦺꦠꦧ꧀ꦧꦥꦸꦒ꧀ꦒꦭꦤꦶꦢꦱ꧀ꦱꦤꦁ. ꦌꦠꦱ꧀ꦱ ꦲꦶ ꦄꦴꦫꦺꦴꦕꦶꦠꦺ ꦄꦴꦫꦺꦴꦕꦶꦠꦁ ꦲꦺꦴꦠꦶ, ꦤ ꦢꦺꦮꦧ꧀ꦫꦲ꧀ꦩꦴꦤꦁ, ꦤꦴꦥꦶ ꦥꦺꦠꦪꦏ꧀ꦑꦠꦶꦫꦕ꧀ꦖꦴꦤꦒꦠꦴꦤꦤ꧀ꦠꦶ. ꦄꦴꦫꦺꦴꦕꦺꦪ꧀ꦪꦴꦠꦶ ꦮꦢꦺꦪ꧀ꦪ, ꦮꦶꦚ꧀ꦚꦴꦥꦺꦪ꧀ꦪꦴꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦮꦶꦤꦴ ꦄꦚ꧀ꦚꦴꦥꦢꦺꦱꦺꦤꦴꦠꦶ ‘‘ꦪꦺꦴ ꦠꦺ ꦮꦶꦲꦴꦫꦺ ꦮꦱꦠꦶ, ꦱꦺꦴ ꦨꦶꦏ꧀ꦑꦸ ꦥꦜꦩꦱ꧀ꦱ ꦙꦴꦤꦱ꧀ꦱ ꦭꦴꦨꦷ’’ꦠꦶꦄꦴꦢꦶꦤꦴ (ꦥꦴꦫꦴ. ꧒꧒꧐) ꦤꦪꦺꦤ ꦄꦚ꧀ꦚꦴꦥꦢꦺꦱꦁ ꦮꦶꦤꦴꦠꦶ ꦄꦠ꧀ꦡꦺꦴ. ꦆꦣꦺꦮꦴꦠꦶ ‘‘ꦆꦠꦶ ꦗꦴꦤꦴꦩꦶ, ꦆꦠꦶ ꦥꦱ꧀ꦱꦴꦩꦷ’’ꦠꦶ ꦆꦩꦱ꧀ꦩꦶꦁꦪꦺꦮ ꦥꦢꦺ. ‘‘ꦠꦺꦤ ꦮꦸꦠ꧀ꦠ’’ꦤ꧀ꦠꦶꦄꦴꦢꦶ ꦤꦶꦒꦩꦤꦁ.

ꦱꦩꦤꦸꦒ꧀ꦒꦴꦲꦷꦪꦩꦴꦤꦺꦴꦠꦶ ꦕꦺꦴꦢꦶꦪꦩꦴꦤꦺꦴ, ꦪꦁ ꦮꦠ꧀ꦡꦸ ꦄꦴꦫꦺꦴꦕꦶꦠꦁ ꦲꦺꦴꦠꦶ, ꦠꦱ꧀ꦩꦶꦁ ꦮꦠ꧀ꦡꦸꦱ꧀ꦩꦶꦁ ‘‘ꦏꦶꦁ ꦠꦺ ꦄꦣꦶꦒꦠꦁ, ꦏꦶꦤ꧀ꦠꦶ ꦠꦺ ꦄꦣꦶꦒꦠꦁ, ꦏꦢꦴ ꦠꦺ ꦄꦣꦶꦒꦠꦁ, ꦏꦠ꧀ꦡ ꦠꦺ ꦄꦣꦶꦒꦠꦁ, ꦏꦠꦩꦺ ꦠꦺ ꦏꦶꦭꦺꦱꦴ ꦥꦲꦷꦤꦴ, ꦏꦠꦩꦺꦱꦁ ꦠ꧀ꦮꦁ ꦣꦩ꧀ꦩꦴꦤꦁ ꦭꦴꦨꦷ’ꦠꦶ ꦏꦺꦤꦕꦶ ꦮꦸꦕ꧀ꦕꦩꦴꦤꦺꦴ’’ꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦄꦱꦩꦤꦸꦒ꧀ꦒꦴꦲꦷꦪꦩꦴꦤꦺꦴꦠꦶ ꦤ ꦏꦺꦤꦕꦶ ꦮꦸꦕ꧀ꦕꦩꦴꦤꦺꦴ.

‘‘ꦨꦶꦏ꧀ꦑꦸꦨꦴꦮꦺ ꦜꦠ꧀ꦮꦴ ꦄꦨꦧ꧀ꦧꦺꦴ ꦙꦴꦤꦴꦢꦷꦤꦶ ꦄꦣꦶꦒꦤ꧀ꦠꦸ’’ꦤ꧀ꦠꦶ ꦱꦶꦏ꧀ꦑꦴꦥꦢꦴꦠꦶꦏ꧀ꦏꦩꦱ꧀ꦱ ꦄꦤ꧀ꦠꦫꦴꦪꦏꦫꦠ꧀ꦠꦴ ꦮꦸꦠ꧀ꦠꦁ. ꦨꦶꦏ꧀ꦑꦸꦨꦴꦮꦺꦴ ꦲꦶꦱ꧀ꦱ ꦱꦒ꧀ꦒꦤ꧀ꦠꦫꦴꦪꦺꦴ ꦕꦺꦮ ꦲꦺꦴꦠꦶ ꦩꦒ꧀ꦒꦤ꧀ꦠꦫꦴꦪꦺꦴ ꦕ (ꦥꦴꦫꦴ. ꦄꦛ꧀ꦜ. ꧒.꧑꧙꧘). ꦮꦸꦠ꧀ꦠꦚ꧀ꦲꦺꦠꦁ ‘‘ꦱꦴꦩꦚ꧀ꦚꦁ ꦢꦸꦥ꧀ꦥꦫꦴꦩꦛ꧀ꦜꦁ, ꦤꦶꦫꦪꦴꦪꦸꦥꦏꦝ꧀ꦞꦠꦷ’’ꦠꦶ (ꦱꦁ. ꦤꦶ. ꧑.꧘꧙; ꦣ. ꦥ. ꧓꧑꧑). ꦄꦥꦫꦩ꧀ꦥꦶ ꦮꦸꦠ꧀ꦠꦁ ‘‘ꦱꦶꦡꦶꦭꦺꦴ ꦲꦶ ꦥꦫꦶꦧ꧀ꦧꦴꦗꦺꦴ, ꦨꦶꦪ꧀ꦪꦺꦴ ꦄꦴꦏꦶꦫꦠꦺ ꦫꦗ’’ꦤ꧀ꦠꦶ (ꦱꦁ. ꦤꦶ. ꧑.꧘꧙; ꦣ. ꦥ. ꧓꧑꧓). ꦨꦶꦏ꧀ꦑꦸꦨꦴꦮꦺꦴꦠꦶ ꦥꦴꦫꦴꦗꦶꦏꦁ ꦄꦴꦥꦗ꧀ꦗꦶꦠ꧀ꦮꦴ ‘‘ꦱꦩꦟꦺꦴ ꦄꦲ’’ꦤ꧀ꦠꦶ ꦥꦛꦶꦗꦴꦤꦤꦠꦺꦴ ꦮꦺꦴꦲꦴꦫꦩꦠ꧀ꦠꦱꦶꦢ꧀ꦣꦺꦴ ꦨꦶꦏ꧀ꦑꦸꦨꦴꦮꦺꦴ. ꦢꦴꦤꦴꦢꦷꦲꦷꦠꦶ ꦢꦴꦤꦱꦫꦟꦱꦷꦭꦱꦁꦮꦫꦴꦢꦷꦲꦶ.

ꦄꦗꦴꦤꦩꦺꦮꦴꦠꦶ ꦌꦠ꧀ꦡ ꦌꦮꦴꦠꦶ ꦄꦮꦣꦴꦫꦟꦠ꧀ꦡꦺ ꦤꦶꦥꦴꦠꦺꦴ. ‘‘ꦄꦗꦴꦤꦩꦺꦮ’’ꦤ꧀ꦠꦶꦥꦶ ꦥꦜꦤ꧀ꦠꦶ. ꦠꦠ꧀ꦡ ꦥꦤ ‘‘ꦌꦮꦁ ꦗꦴꦤꦴꦩꦶ, ꦌꦮꦁ ꦥꦱ꧀ꦱꦴꦩꦷ’’ꦠꦶ ꦄꦮꦕꦤ꧀ꦠꦶ ꦪꦺꦴꦗꦺꦠꦧ꧀ꦧꦁ. ꦮꦕꦤꦠ꧀ꦡꦮꦶꦫꦲꦠꦺꦴꦠꦶ ‘‘ꦥꦜꦩꦁ ꦙꦴꦤꦁ ꦱꦩꦴꦥꦗ꧀ꦗꦶ’’ꦤ꧀ꦠꦶ ꦄꦴꦢꦶꦮꦕꦤꦱ꧀ꦱ (ꦥꦴꦫꦴ. ꧒꧐꧙) ꦄꦠ꧀ꦡꦨꦹꦠꦺꦤ ꦙꦴꦤꦴꦢꦶꦤꦴ ꦮꦗ꧀ꦗꦶꦠꦠ꧀ꦠꦴ ꦠꦸꦕ꧀ꦖꦁ ꦈꦢꦏꦴꦢꦶꦱꦸꦚ꧀ꦚꦁ ꦨꦴꦗꦤꦁ ꦮꦶꦪ. ꦩꦸꦱꦴꦠꦶ ꦮꦶꦱꦁꦮꦴꦢꦤꦥꦸꦫꦺꦏ꧀ꦑꦴꦫꦱ꧀ꦱ ꦥꦫꦮꦶꦱꦁꦮꦴꦢꦏꦺꦴ ꦮꦕꦷꦥꦪꦺꦴꦒꦺꦴ, ꦏꦴꦪꦥꦪꦺꦴꦒꦺꦴ ꦮꦴ. ꦠꦺꦤꦴꦲ ‘‘ꦮꦚ꧀ꦕꦤꦴꦣꦶꦥ꧀ꦥꦴꦪꦠꦺꦴ ꦩꦸꦱꦴ’’ꦠꦶ. ꦩꦸꦱꦴ ꦕ ꦮꦚ꧀ꦕꦤꦴꦣꦶꦥ꧀ꦥꦴꦪꦺꦴ ꦕ ꦥꦸꦧ꧀ꦧꦨꦴꦒꦏ꧀ꦑꦟꦺ, ꦠꦔ꧀ꦑꦟꦺ ꦕ. ꦮꦸꦠ꧀ꦠꦚ꧀ꦲꦶ ‘‘ꦥꦸꦧ꧀ꦧꦺ ꦮꦴꦱ꧀ꦱ ꦲꦺꦴꦠꦶ ‘ꦩꦸꦱꦴ ꦨꦟꦶꦱ꧀ꦱ’ꦤ꧀ꦠꦶ, ꦨꦟꦤ꧀ꦠꦱ꧀ꦱ ꦲꦺꦴꦠꦶ ‘ꦩꦸꦱꦴ ꦨꦟꦴꦩꦷ’’’ꦠꦶ (ꦥꦴꦫꦴ. ꧒꧐꧐). ꦌꦠꦚ꧀ꦲꦶ ꦢ꧀ꦮꦪꦁ ꦄꦔ꧀ꦒꦨꦹꦠꦁ, ꦆꦠꦫꦁ ꦥꦤ ꦲꦺꦴꦠꦸ ꦮꦴ, ꦩꦴ ꦮꦴ, ꦄꦏꦴꦫꦟꦩꦺꦠꦁ. ꦄꦨꦟꦶꦤ꧀ꦠꦶ ꦮꦶꦚ꧀ꦚꦴꦥꦤꦁ ꦄꦏꦴꦱꦶꦁ.

ꦄꦚ꧀ꦚꦠ꧀ꦫ ꦄꦣꦶꦩꦴꦤꦴꦠꦶ ꦄꦣꦶꦒꦠꦺꦴ ꦩꦴꦤꦺꦴ, ꦄꦣꦶꦏꦺꦴ ꦮꦴ ꦩꦴꦤꦺꦴ ꦄꦣꦶꦩꦴꦤꦺꦴ, ꦡꦢ꧀ꦣꦩꦴꦤꦺꦴꦠꦶ ꦄꦠ꧀ꦡꦺꦴ, ꦠꦁ ꦮꦶꦤꦴꦠꦶ ꦄꦠ꧀ꦡꦺꦴ. ꦏꦱ꧀ꦱ ꦥꦤꦴꦪꦁ ꦄꦣꦶꦩꦴꦤꦺꦴ ꦈꦥ꧀ꦥꦗ꧀ꦗꦠꦶ, ꦏꦱ꧀ꦱ ꦤꦸꦥ꧀ꦥꦗ꧀ꦗꦠꦶ? ꦄꦫꦶꦪꦱꦴꦮꦏꦱ꧀ꦱ ꦠꦴꦮ ꦤꦸꦥ꧀ꦥꦗ꧀ꦗꦠꦶ (ꦥꦴꦫꦴ. ꦄꦛ꧀ꦜ. ꧒.꧑꧙꧖). ꦱꦺꦴ ꦲꦶ ꦩꦒ꧀ꦒꦦꦭꦤꦶꦧ꧀ꦧꦴꦤꦥꦲꦷꦤꦏꦶꦭꦺꦱꦴꦮꦱꦶꦛ꧀ꦜꦏꦶꦭꦺꦱꦥꦕ꧀ꦕꦮꦺꦏ꧀ꦑꦟꦺꦤ ꦱꦚ꧀ꦗꦴꦠꦱꦺꦴꦩꦤꦱ꧀ꦱꦺꦴ ꦄꦫꦶꦪꦒꦸꦟꦥ꧀ꦥꦛꦶꦮꦺꦣꦺ ꦤꦶꦏ꧀ꦏꦔ꧀ꦑꦺꦴ, ꦠꦱ꧀ꦩꦴ ꦱꦺꦴꦠꦴꦥꦤ꧀ꦤꦴꦢꦷꦤꦁ ‘‘ꦄꦲꦁ ꦱꦏꦢꦴꦒꦴꦩꦷ’’ꦠꦶꦄꦴꦢꦶꦮꦱꦺꦤ ꦩꦴꦤꦺꦴ ꦤꦸꦥ꧀ꦥꦗ꧀ꦗꦠꦶ. ꦢꦸꦱ꧀ꦱꦷꦭꦱ꧀ꦱ ꦤꦸꦥ꧀ꦥꦗ꧀ꦗꦠꦶ. ꦱꦺꦴ ꦲꦶ ꦄꦫꦶꦪꦒꦸꦟꦴꦣꦶꦒꦩꦺ ꦤꦶꦫꦴꦱꦺꦴꦮ. ꦱꦷꦭꦮꦠꦺꦴꦥꦶ ꦥꦫꦶꦕ꧀ꦕꦠ꧀ꦠꦏꦩ꧀ꦩꦛ꧀ꦜꦴꦤꦱ꧀ꦱ ꦤꦶꦢ꧀ꦢꦴꦫꦴꦩꦠꦴꦢꦶꦩꦤꦸꦪꦸꦠ꧀ꦠꦱ꧀ꦱ ꦤꦸꦥ꧀ꦥꦗ꧀ꦗꦠꦶ, ꦱꦸꦥꦫꦶꦱꦸꦢ꧀ꦣꦱꦷꦭꦱ꧀ꦱ ꦥꦤ ꦏꦩ꧀ꦩꦛ꧀ꦜꦴꦤꦺ ꦄꦥ꧀ꦥꦩꦠ꧀ꦠꦱ꧀ꦱ ꦤꦴꦩꦫꦹꦥꦁ ꦮꦮꦠ꧀ꦡꦥꦺꦠ꧀ꦮꦴ ꦥꦕ꧀ꦕꦪꦥꦫꦶꦒ꧀ꦒꦲꦺꦤ ꦮꦶꦠꦶꦟ꧀ꦟꦏꦔ꧀ꦑꦱ꧀ꦱ ꦠꦶꦭꦏ꧀ꦑꦟꦁ ꦄꦴꦫꦺꦴꦥꦺꦠ꧀ꦮꦴ ꦱꦔ꧀ꦑꦴꦫꦺ ꦱꦩ꧀ꦩꦱꦤ꧀ꦠꦱ꧀ꦱ ꦄꦴꦫꦢ꧀ꦣꦮꦶꦥꦱ꧀ꦱꦏꦱ꧀ꦱ ꦈꦥ꧀ꦥꦗ꧀ꦗꦠꦶ. ꦠꦺꦤꦴꦲ ‘‘ꦪ꧀ꦮꦴꦪ’’ꦤ꧀ꦠꦶꦄꦴꦢꦶ. ꦠꦠ꧀ꦡ ꦠꦶꦭꦏ꧀ꦑꦟꦁ ꦄꦴꦫꦺꦴꦥꦺꦠ꧀ꦮꦴꦠꦶ (ꦱꦴꦫꦠ꧀ꦡ. ꦛꦷ. ꧒.꧑꧙꧖) ꦏꦭꦴꦥꦱꦩ꧀ꦩꦱꦤꦮꦱꦺꦤ ꦄꦤꦶꦕ꧀ꦕꦴꦢꦶꦭꦏ꧀ꦑꦟꦠ꧀ꦠꦪꦁ ꦄꦴꦫꦺꦴꦥꦺꦠ꧀ꦮꦴ. ꦱꦩ꧀ꦩꦱꦤ꧀ꦠꦱ꧀ꦱꦴꦠꦶ ꦮꦶꦥꦱ꧀ꦱꦤ꧀ꦠꦱ꧀ꦱ. ꦄꦴꦫꦢ꧀ꦣꦮꦶꦥꦱ꧀ꦱꦏꦱ꧀ꦱꦴꦠꦶ ꦈꦢꦪꦧ꧀ꦧꦪꦴꦤꦸꦥꦱ꧀ꦱꦤꦴꦪ ꦄꦴꦫꦢ꧀ꦣꦮꦶꦥꦱ꧀ꦱꦏꦱ꧀ꦱ. ꦄꦥꦠ꧀ꦠꦺꦠꦶ ꦄꦠ꧀ꦠꦤꦺꦴ ꦱꦤ꧀ꦠꦴꦤꦺ ꦈꦥ꧀ꦥꦠ꧀ꦠꦶꦮꦱꦺꦤ ꦄꦥꦠ꧀ꦠꦺ, ꦄꦤꦣꦶꦒꦠꦺꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦥꦠ꧀ꦠꦱꦚ꧀ꦚꦶꦠꦴꦱꦔ꧀ꦑꦴꦠꦺꦴꦠꦶ ‘‘ꦥꦠ꧀ꦠꦺꦴ ꦩꦪꦴ ꦈꦠ꧀ꦠꦫꦶꦩꦤꦸꦱ꧀ꦱꦣꦩ꧀ꦩꦺꦴ’’ꦠꦶ ꦌꦮꦁꦱꦚ꧀ꦚꦶꦠꦴꦱꦔ꧀ꦑꦴꦠꦺꦴ ꦄꦣꦶꦩꦴꦤꦺꦴ ꦈꦥ꧀ꦥꦗ꧀ꦗꦠꦶ. ꦈꦥ꧀ꦥꦤ꧀ꦤꦺꦴ ꦕ ꦱꦸꦢ꧀ꦣꦱꦩꦡꦭꦴꦨꦶꦁ ꦮꦴ ꦱꦸꦢ꧀ꦣꦮꦶꦥꦱ꧀ꦱꦤꦴꦭꦴꦨꦶꦁ ꦮꦴ ꦄꦤ꧀ꦠꦫꦴ ꦜꦥꦺꦠꦶ. ꦱꦺꦴ ꦲꦶ ꦢꦱꦥꦶ ꦮꦷꦱꦩ꧀ꦥꦶ ꦠꦶꦁꦱꦩ꧀ꦥꦶ ꦮꦱ꧀ꦱꦴꦤꦶ ꦏꦶꦭꦺꦱꦱꦩꦸꦢꦴꦕꦴꦫꦁ ꦄꦥꦱ꧀ꦱꦤ꧀ꦠꦺꦴ ‘‘ꦄꦲꦁ ꦱꦺꦴꦠꦴꦥꦤ꧀ꦤꦺꦴ’’ꦠꦶ ꦮꦴ ‘‘ꦱꦏꦢꦴꦒꦴꦩꦷ’’ꦠꦶ ꦮꦴ ‘‘ꦄꦤꦴꦒꦴꦩꦷ’’ꦠꦶ ꦮꦴ ꦩꦚ꧀ꦚꦠꦶ. ꦱꦩꦡꦮꦶꦥꦱ꧀ꦱꦤꦴꦭꦴꦨꦶꦁ ꦥꦤ ꦄꦫꦲꦠ꧀ꦠꦺꦪꦺꦮ ꦜꦥꦺꦠꦶ. ꦠꦱ꧀ꦱ ꦲꦶ ꦱꦩꦴꦣꦶꦧꦭꦺꦤ ꦏꦶꦭꦺꦱꦴ ꦮꦶꦏ꧀ꦑꦩ꧀ꦨꦶꦠꦴ, ꦮꦶꦥꦱ꧀ꦱꦤꦴꦧꦭꦺꦤ ꦱꦔ꧀ꦑꦴꦫꦴ ꦱꦸꦥꦫꦶꦒ꧀ꦒꦲꦶꦠꦴ, ꦠꦱ꧀ꦩꦴ ꦱꦛ꧀ꦜꦶꦩ꧀ꦥꦶ ꦮꦱ꧀ꦱꦴꦤꦶ, ꦄꦱꦷꦠꦶꦩ꧀ꦥꦶ ꦮꦱ꧀ꦱꦴꦤꦶ, ꦮꦱ꧀ꦱꦱꦠꦩ꧀ꦥꦶ ꦏꦶꦭꦺꦱꦴ ꦤ ꦱꦩꦸꦢꦴꦕꦫꦤ꧀ꦠꦶ, ꦑꦷꦟꦴꦱꦮꦱ꧀ꦱꦺꦮ ꦕꦶꦠ꧀ꦠꦴꦕꦴꦫꦺꦴ ꦲꦺꦴꦠꦶ. ꦱꦺꦴ ꦌꦮꦁ ꦢꦷꦓꦫꦠ꧀ꦠꦁ ꦏꦶꦭꦺꦱꦱꦩꦸꦢꦴꦕꦴꦫꦁ ꦄꦥꦱ꧀ꦱꦤ꧀ꦠꦺꦴ ꦄꦤ꧀ꦠꦫꦴ ꦄꦛ꧀ꦜꦠ꧀ꦮꦴꦮ ‘‘ꦄꦫꦲꦴ ꦄꦲ’’ꦤ꧀ꦠꦶ ꦩꦚ꧀ꦚꦠꦷꦠꦶ. ‘‘ꦠꦁ ꦄꦣꦶꦩꦴꦤꦁ ꦜꦥꦺꦠ꧀ꦮꦴ’’ꦠꦶ ꦆꦩꦶꦤꦴ ‘‘ꦄꦚ꧀ꦚꦠ꧀ꦫꦴ’’ꦠꦶ ꦥꦢꦁ ꦄꦥꦺꦏ꧀ꦑꦶꦠ꧀ꦮꦴ ‘‘ꦄꦣꦶꦩꦴꦤꦴ’’ꦠꦶ ꦈꦥꦪꦺꦴꦒꦠ꧀ꦡꦺ ꦤꦶꦱ꧀ꦱꦏ꧀ꦏꦮꦕꦤꦤ꧀ꦠꦶ ꦢꦱ꧀ꦱꦺꦠꦶ.

ꦥꦴꦥꦶꦕ꧀ꦖꦠꦴꦪꦴꦠꦶ ꦥꦴꦥꦴ ꦆꦕ꧀ꦖꦴ ꦌꦠꦱ꧀ꦱꦴꦠꦶ ꦥꦴꦥꦶꦕ꧀ꦖꦺꦴ, ꦠꦱ꧀ꦱ ꦨꦴꦮꦺꦴ ꦥꦴꦥꦶꦕ꧀ꦖꦠꦴ, ꦠꦴꦪ, ꦥꦴꦥꦶꦏꦴꦪ ꦆꦕ꧀ꦖꦴꦪꦴꦠꦶ ꦄꦠ꧀ꦡꦺꦴ. ꦪꦴ ꦱꦴ ‘‘ꦆꦣꦺꦏꦕ꧀ꦕꦺꦴ ꦢꦸꦱ꧀ꦱꦷꦭꦺꦴꦮ ꦱꦩꦴꦤꦺꦴ ‘ꦱꦷꦭꦮꦴ’ꦠꦶ ꦩꦁ ꦗꦤꦺꦴ ꦗꦴꦤꦴꦠꦹ’’ꦠꦶꦄꦴꦢꦶꦤꦴ (ꦮꦶꦨ. ꧘꧕꧑) ꦤꦪꦺꦤ ꦮꦸꦠ꧀ꦠꦴ, ꦠꦴꦪ ꦄꦱꦤ꧀ꦠꦒꦸꦟꦱꦩ꧀ꦨꦴꦮꦤꦶꦕ꧀ꦖꦴꦪꦴꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦆꦩꦶꦤꦴ ꦥꦤ ꦩꦤ꧀ꦢꦠ꧀ꦠꦴ ꦩꦺꦴꦩꦹꦲꦠ꧀ꦠꦴ ꦱꦩꦸꦢꦴꦕꦫꦤ꧀ꦠꦱ꧀ꦱ ꦄꦤꦴꦥꦠ꧀ꦠꦷꦠꦶ ꦢꦱ꧀ꦱꦺꦠꦶ. ꦄꦪꦩ꧀ꦥꦷꦠꦶ ꦥꦶ-ꦱꦢ꧀ꦢꦺꦤ ꦤ ꦏꦺꦮꦭꦁ ꦥꦸꦫꦶꦩꦴ ꦠꦪꦺꦴꦮꦴꦠꦶ ꦢꦱ꧀ꦱꦺꦠꦶ.

ꦄꦱꦤ꧀ꦠꦤ꧀ꦠꦶ ꦄꦨꦹꦠꦁ. ꦙꦴꦤꦴꦢꦶꦣꦩ꧀ꦩꦤ꧀ꦠꦶ ꦙꦴꦤꦁ, ꦮꦶꦩꦺꦴꦏ꧀ꦑꦺꦴ, ꦱꦩꦴꦣꦶ, ꦱꦩꦴꦥꦠ꧀ꦠꦶ, ꦚꦴꦟꦢꦱ꧀ꦱꦤꦁ, ꦩꦒ꧀ꦒꦨꦴꦮꦤꦴ, ꦦꦭꦱꦕ꧀ꦖꦶꦏꦶꦫꦶꦪꦴ, ꦏꦶꦭꦺꦱꦥ꧀ꦥꦲꦴꦤꦁ, ꦮꦶꦤꦷꦮꦫꦟꦠꦴ ꦕꦶꦠ꧀ꦠꦱ꧀ꦱ, ꦱꦸꦚ꧀ꦚꦴꦒꦴꦫꦺ ꦄꦨꦶꦫꦠꦷ’’ꦠꦶ (ꦥꦴꦫꦴ. ꧑꧙꧘) ꦌꦮꦁ ꦮꦸꦠ꧀ꦠꦁ ꦈꦠ꧀ꦠꦫꦶꦩꦤꦸꦱ꧀ꦱꦣꦩ꧀ꦩꦁ. ꦪꦱ꧀ꦱ ꦄꦴꦫꦺꦴꦕꦺꦠꦷꦠꦶ (ꦥꦴꦫꦴ. ꦄꦛ꧀ꦜ. ꧒.꧒꧑꧕) ꦮꦴꦕꦴꦪ ꦮꦴ ꦲꦠ꧀ꦡꦮꦶꦏꦴꦫꦴꦢꦷꦲꦶ ꦮꦴ ꦄꦔ꧀ꦒꦥꦕ꧀ꦕꦔ꧀ꦒꦕꦺꦴꦥꦤꦺꦲꦶ ꦮꦶꦚ꧀ꦚꦠ꧀ꦠꦶꦥꦡꦺ ꦜꦶꦠꦱ꧀ꦱ ꦪꦱ꧀ꦱ ꦥꦸꦒ꧀ꦒꦭꦱ꧀ꦱ ꦄꦴꦫꦺꦴꦕꦺꦠꦶ. ꦮꦶꦚ꧀ꦚꦠ꧀ꦠꦶꦥꦡꦁ ꦥꦤ ꦄꦠꦶꦏ꧀ꦏꦩꦶꦠ꧀ꦮꦴ ꦜꦶꦠꦺꦴ ꦏꦺꦴꦕꦶ ꦕꦺ ꦢꦶꦧ꧀ꦧꦺꦤ ꦕꦏ꧀ꦑꦸꦤꦴ (ꦱꦴꦫꦠ꧀ꦡ. ꦛꦷ. ꧒.꧒꧑꧕), ꦢꦶꦧ꧀ꦧꦴꦪ ꦕ ꦱꦺꦴꦠꦣꦴꦠꦸꦪꦴ ꦢꦶꦱ꧀ꦮꦴ ꦕ ꦱꦸꦠ꧀ꦮꦴ ꦕ ꦗꦴꦤꦴꦠꦶ, ꦤ ꦥꦴꦫꦴꦗꦶꦏꦁ. ꦪꦺꦴꦥꦶ ‘‘ꦏꦶꦁ ꦄꦪꦁ ꦨꦟꦠꦷ’’ꦠꦶ ꦱꦁꦱꦪꦁ ꦮꦴ ꦄꦴꦥꦗ꧀ꦗꦠꦶ, ꦕꦶꦫꦁ ꦮꦷꦩꦁꦱꦶꦠ꧀ꦮꦴ ꦮꦴ ꦥꦕ꧀ꦖꦴ ꦗꦴꦤꦴꦠꦶ, ‘‘ꦄꦮꦶꦗꦴꦤꦤ꧀ꦠꦺꦴ’’ꦆꦕ꧀ꦕꦺꦮ ꦱꦔ꧀ꦑ꧀ꦪꦁ ꦒꦕ꧀ꦖꦠꦶ. ꦪꦺꦴ ꦥꦤ ꦙꦴꦤꦴꦢꦷꦤꦶ ꦄꦠ꧀ꦠꦤꦺꦴ ꦄꦣꦶꦒꦩꦮꦱꦺꦤ ꦮꦴ ꦈꦒ꧀ꦒꦲꦥꦫꦶꦥꦸꦕ꧀ꦖꦴꦢꦶꦮꦱꦺꦤ ꦮꦴ ꦤ ꦗꦴꦤꦴꦠꦶ, ꦏꦺꦮꦭꦁ ‘‘ꦙꦴꦤ’’ꦤ꧀ꦠꦶ ꦮꦴ ‘‘ꦮꦶꦩꦺꦴꦏ꧀ꦑꦺꦴ’’ꦠꦶ ꦮꦴ ꦮꦕꦤꦩꦠ꧀ꦠꦩꦺꦮ ꦱꦸꦠꦁ ꦲꦺꦴꦠꦶ, ꦱꦺꦴꦥꦶ ꦠꦺꦤ ꦮꦸꦠ꧀ꦠꦺ ‘‘ꦙꦴꦤꦁ ꦏꦶꦫ ꦱꦩꦴꦥꦗ꧀ꦗꦷ’’ꦠꦶ ꦌꦱ ꦮꦢꦠꦷꦠꦶ ꦪꦢꦶ ꦌꦠ꧀ꦠꦏꦩꦠ꧀ꦠꦩ꧀ꦥꦶ ꦗꦴꦤꦴꦠꦶ, ‘‘ꦗꦴꦤꦴꦠꦶ’’ꦕ꧀ꦕꦺꦮ ꦱꦔ꧀ꦑ꧀ꦪꦁ ꦒꦕ꧀ꦖꦠꦶ, ꦠꦱ꧀ꦱ ꦮꦸꦠ꧀ꦠꦺ ꦥꦴꦫꦴꦗꦶꦏꦩꦺꦮ. ꦱꦺꦱꦺꦴ ꦥꦤ ꦌꦏꦱ꧀ꦱ ꦮꦴ ꦢ꧀ꦮꦶꦤ꧀ꦤꦁ ꦮꦴ ꦧꦲꦹꦤꦁ ꦮꦴ ꦤꦶꦪꦩꦶꦠꦴꦤꦶꦪꦩꦶꦠꦮꦱꦺꦤ ꦮꦶꦱꦺꦱꦺꦴ ꦱꦧ꧀ꦧꦺꦴ ꦱꦶꦏ꧀ꦑꦴꦥꦕ꧀ꦕꦏ꧀ꦑꦴꦤꦏꦡꦴꦪꦁ ꦮꦸꦠ꧀ꦠꦤꦪꦺꦤꦺꦮ ꦮꦺꦢꦶꦠꦧ꧀ꦧꦺꦴ. ꦥꦫꦶꦪꦴꦪꦨꦴꦱꦤꦺ ꦥꦤ ‘‘ꦄꦲ’’ꦤ꧀ꦠꦶ ꦄꦮꦸꦠ꧀ꦠꦠ꧀ꦠꦴ ꦥꦛꦶꦮꦶꦗꦴꦤꦤ꧀ꦠꦱ꧀ꦱ ꦮꦸꦠ꧀ꦠꦺꦥꦶ ꦡꦸꦭ꧀ꦭꦕ꧀ꦕꦪꦁ. ꦮꦶꦱꦁꦮꦴꦢꦤꦴꦣꦶꦥ꧀ꦥꦴꦪꦺꦤ ꦩꦸꦱꦴꦮꦴꦢꦥꦪꦺꦴꦒꦱ꧀ꦱ ꦏꦠꦠ꧀ꦠꦴ ꦄꦥ꧀ꦥꦛꦶꦮꦶꦗꦴꦤꦤ꧀ꦠꦱ꧀ꦱꦴꦥꦶ ꦢꦸꦏ꧀ꦏꦛꦤ꧀ꦠꦶ ꦄꦴꦲ ‘‘ꦪꦺꦴ ꦠꦺ ꦮꦶꦲꦴꦫꦺ ꦮꦱꦠꦶ…ꦥꦺ… ꦢꦸꦏ꧀ꦏꦛ’’ꦤ꧀ꦠꦶ. ꦄꦤꦸꦭ꧀ꦭꦥꦤꦴꦣꦶꦥ꧀ꦥꦴꦪꦱ꧀ꦱꦴꦠꦶ ꦈꦭ꧀ꦭꦥꦤꦴꦣꦶꦥ꧀ꦥꦴꦪꦮꦶꦫꦲꦶꦠꦱ꧀ꦱ, ꦄꦨꦹꦠꦴꦫꦺꦴꦕꦤꦴꦣꦶꦥ꧀ꦥꦴꦪꦮꦶꦫꦲꦶꦠꦱ꧀ꦱꦴꦠꦶ ꦄꦠ꧀ꦡꦺꦴ. ꦈꦩ꧀ꦩꦠ꧀ꦠꦏꦴꦢꦪꦺꦴ ꦥꦸꦧ꧀ꦧꦺ ꦮꦸꦠ꧀ꦠꦤꦪꦴ ꦌꦮ. ꦆꦣ ꦥꦤ ꦄꦴꦢꦶꦏꦩ꧀ꦩꦶꦏꦴ ꦮꦒ꧀ꦒꦸꦩꦸꦢꦴꦠꦷꦫꦶꦪꦨꦶꦏ꧀ꦑꦹ, ꦠꦺꦱꦁ ꦄꦤꦴꦥꦠ꧀ꦠꦶ.

ꦕꦠꦸꦠ꧀ꦡꦥꦴꦫꦴꦗꦶꦏꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦥꦴꦫꦴꦗꦶꦏꦤꦶꦒꦩꦤꦮꦟ꧀ꦟꦤꦴ

ꦆꦣꦴꦠꦶ ꦆꦩꦱ꧀ꦩꦶꦁ ꦨꦶꦏ꧀ꦑꦸꦥꦴꦠꦶꦩꦺꦴꦏ꧀ꦑꦺ. ꦈꦢ꧀ꦢꦶꦛ꧀ꦜꦥꦴꦫꦴꦗꦶꦏꦥꦫꦶꦢꦷꦥꦤꦩꦺꦮꦴꦠꦶ ꦈꦢ꧀ꦢꦶꦛ꧀ꦜꦴꦤꦁ ꦕꦠꦸꦤ꧀ꦤꦁ ꦥꦴꦫꦴꦗꦶꦏꦴꦤꦁ ꦥꦫꦶꦢꦷꦥꦤꦮꦕꦤꦩꦺꦮ. ꦄꦮꦣꦴꦫꦟꦁ ꦥꦤ ꦤ ꦄꦚ꧀ꦚꦺꦱꦩ꧀ꦥꦷꦠꦶ ꦢꦱ꧀ꦱꦤꦠ꧀ꦡꦁ. ꦠꦺꦤꦴꦲ ‘‘ꦱꦩꦺꦴꦣꦴꦤꦺꦠ꧀ꦮꦴ ꦥꦤꦴ’’ꦠꦶꦄꦴꦢꦶ. ꦠꦠ꧀ꦡ ꦱꦩꦺꦴꦣꦴꦤꦺꦠ꧀ꦮꦴꦠꦶ ꦠꦠ꧀ꦡ ꦠꦠ꧀ꦡ ꦄꦴꦒꦠꦴꦤꦶ ꦌꦠ꧀ꦡꦺꦮ ꦱꦩꦺꦴꦢꦲꦶꦠ꧀ꦮꦴ, ꦥꦏ꧀ꦑꦶꦥꦶꦠ꧀ꦮꦴ ꦫꦴꦱꦶꦁ ꦏꦠ꧀ꦮꦴꦠꦶ ꦄꦠ꧀ꦡꦺꦴ. ꦥꦴꦭ꦳ꦶꦪꦁ ꦄꦴꦒꦠꦴꦤꦷꦠꦶ ꦈꦢ꧀ꦢꦺꦱꦥꦴꦭ꦳ꦶꦪꦁ ꦄꦴꦒꦠꦴꦤꦶ. ꦨꦶꦏ꧀ꦑꦸꦤꦷꦤꦁ ꦄꦱꦴꦣꦴꦫꦟꦴꦤꦶ ꦕꦠ꧀ꦠꦴꦫꦷꦠꦶ ꦈꦧ꧀ꦨꦗꦴꦟꦸꦩꦟ꧀ꦝꦭꦶꦏꦴ, ꦮꦗ꧀ꦗꦥ꧀ꦥꦛꦶꦕ꧀ꦖꦴꦢꦶꦏꦴ, ꦈꦏ꧀ꦑꦶꦠ꧀ꦠꦴꦤꦸꦮꦠ꧀ꦠꦶꦏꦴ, ꦄꦛ꧀ꦜꦮꦠ꧀ꦡꦸꦏꦴꦠꦶ ꦆꦩꦴꦤꦶ ꦨꦶꦏ꧀ꦑꦸꦤꦷꦤꦁ ꦨꦶꦏ꧀ꦑꦹꦲꦶ ꦄꦱꦴꦣꦴꦫꦟꦴꦤꦶ ꦕꦠ꧀ꦠꦴꦫꦶ. ꦥꦟ꧀ꦝꦏꦴꦢꦷꦤꦚ꧀ꦲꦶ ꦌꦏꦴꦢꦱꦤ꧀ꦤꦁ ꦄꦨꦧ꧀ꦧꦨꦴꦮꦺꦴ ꦥꦴꦫꦴꦗꦶꦏꦴꦥꦠ꧀ꦠꦶꦱꦢꦶꦱꦠ꧀ꦠꦴ ꦥꦴꦫꦴꦗꦶꦏꦺꦴꦠꦶ ꦄꦴꦲ ‘‘ꦌꦏꦴꦢꦱꦤ꧀ꦤ’’ꦤ꧀ꦠꦶꦄꦴꦢꦶ. ꦄꦨꦧ꧀ꦧꦨꦴꦮꦱꦔ꧀ꦑꦴꦠꦺꦲꦷꦠꦶ ꦮꦠ꧀ꦡꦸꦮꦶꦥꦤ꧀ꦤꦠꦴꦢꦶꦤꦴ ꦥꦧ꧀ꦧꦗ꧀ꦗꦹꦥꦱꦩ꧀ꦥꦢꦴꦪ ꦤꦄꦫꦲꦨꦴꦮꦱꦔ꧀ꦑꦴꦠꦺꦲꦶ. ꦥꦟ꧀ꦝꦏꦠꦶꦫꦕ꧀ꦖꦴꦤꦒꦠꦈꦨꦠꦺꦴꦧ꧀ꦪꦚ꧀ꦗꦤꦏꦴ (ꦥꦴꦫꦴ. ꦄꦛ꧀ꦜ. ꧒.꧒꧓꧓) ꦲꦶ ꦠꦪꦺꦴ ꦮꦠ꧀ꦡꦸꦮꦶꦥꦤ꧀ꦤꦴ ꦄꦲꦺꦠꦸꦏꦥ꧀ꦥꦛꦶꦱꦤ꧀ꦣꦶꦏꦴ, ꦠꦺꦱꦁ ꦱꦒ꧀ꦒꦺꦴ ꦄꦮꦴꦫꦶꦠꦺꦴ, ꦩꦒ꧀ꦒꦺꦴ ꦥꦤ ꦮꦴꦫꦶꦠꦺꦴ. ꦄꦨꦧ꧀ꦧꦴ ꦲꦶ ꦠꦺ ꦩꦒ꧀ꦒꦥ꧀ꦥꦛꦶꦭꦴꦨꦴꦪ ꦮꦠ꧀ꦡꦸꦮꦶꦥꦤ꧀ꦤꦠ꧀ꦠꦴ. ꦥꦧ꧀ꦧꦗ꧀ꦗꦴꦥꦶ ꦤꦺꦱꦁ ꦥꦛꦶꦏ꧀ꦑꦶꦠ꧀ꦠꦴ, ꦠꦱ꧀ꦩꦴ ꦠꦺꦥꦶ ꦥꦴꦫꦴꦗꦶꦏꦴꦮ. ꦡꦺꦪ꧀ꦪꦱꦁꦮꦴꦱꦏꦺꦴ, ꦠꦶꦠ꧀ꦡꦶꦪꦥꦏ꧀ꦏꦤ꧀ꦠꦏꦺꦴ, ꦩꦴꦠꦸꦓꦴꦠꦏꦺꦴ, ꦥꦶꦠꦸꦓꦴꦠꦏꦺꦴ, ꦄꦫꦲꦤ꧀ꦠꦓꦴꦠꦏꦺꦴ, ꦨꦶꦏ꧀ꦑꦸꦤꦶꦢꦹꦱꦏꦺꦴ, ꦭꦺꦴꦲꦶꦠꦸꦥ꧀ꦥꦴꦢꦏꦺꦴ, ꦱꦔ꧀ꦓꦨꦺꦢꦏꦺꦴꦠꦶ ꦆꦩꦺ ꦄꦛ꧀ꦜ ꦄꦠ꧀ꦠꦤꦺꦴ ꦏꦶꦫꦶꦪꦴꦪ ꦮꦶꦥꦤ꧀ꦤꦠ꧀ꦠꦴ ꦄꦨꦧ꧀ꦧꦛ꧀ꦜꦴꦤꦁ ꦥꦠ꧀ꦠꦴꦠꦶ ꦥꦴꦫꦴꦗꦶꦏꦴꦮ. ꦠꦺꦱꦸ ꦡꦺꦪ꧀ꦪꦱꦁꦮꦴꦱꦏꦺꦴ, ꦠꦶꦠ꧀ꦡꦶꦪꦥꦏ꧀ꦏꦤ꧀ꦠꦏꦺꦴ, ꦨꦶꦏ꧀ꦑꦸꦤꦶꦢꦹꦱꦏꦺꦴꦠꦶ ꦆꦩꦺꦱꦁ ꦠꦶꦟ꧀ꦟꦁ ꦱꦒ꧀ꦒꦺꦴ ꦄꦮꦴꦫꦶꦠꦺꦴ, ꦩꦒ꧀ꦒꦺꦴ ꦥꦤ ꦮꦴꦫꦶꦠꦺꦴꦮ. ꦆꦠꦫꦺꦱꦁ ꦥꦚ꧀ꦕꦤ꧀ꦤꦁ ꦈꦨꦪꦩ꧀ꦥꦶ ꦮꦴꦫꦶꦠꦁ. ꦠꦺ ꦲꦶ ꦄꦤꦤ꧀ꦠꦫꦴꦮ ꦤꦫꦏꦺ ꦤꦶꦧ꧀ꦧꦠ꧀ꦠꦤꦏꦱꦠ꧀ꦠꦴ. ꦪꦢꦴ ꦨꦶꦏ꧀ꦑꦸꦤꦷ ꦮꦶꦧ꧀ꦨꦩꦶꦠꦸꦏꦴꦩꦴ ꦲꦸꦠ꧀ꦮꦴ ꦏꦴꦱꦴꦮꦩꦺꦮ ꦮꦴ ꦒꦶꦲꦶꦮꦠ꧀ꦡꦁ ꦮꦴ ꦒꦶꦲꦶꦤꦶꦮꦴꦱꦤꦴꦏꦴꦫꦺꦤ ꦤꦶꦮꦴꦱꦺꦠꦶ, ꦠꦢꦴ ꦥꦴꦫꦴꦗꦶꦏꦩꦴꦥꦤ꧀ꦤꦴ ꦤꦴꦩ ꦲꦺꦴꦠꦷꦠꦶ ꦄꦴꦲ ‘‘ꦒꦶꦲꦶꦨꦴꦮꦁ ꦥꦠ꧀ꦡꦪꦩꦴꦤꦴꦪꦴ’’ꦠꦶꦄꦴꦢꦶ. ꦱꦴ ꦲꦶ ꦄꦗ꧀ꦙꦴꦕꦴꦫꦮꦷꦠꦶꦏ꧀ꦏꦩꦁ ꦄꦏꦠ꧀ꦮꦴꦥꦶ ꦌꦠ꧀ꦠꦴꦮꦠꦴ ꦄꦱ꧀ꦱꦩꦟꦷ ꦤꦴꦩ ꦲꦺꦴꦠꦶ.

ꦢꦷꦓꦠꦴꦪ ꦭꦩ꧀ꦧꦩꦴꦤꦁ ꦄꦔ꧀ꦒꦗꦴꦠꦩꦺꦠꦱ꧀ꦱꦴꦠꦶ ꦭꦩ꧀ꦧꦷ (ꦱꦴꦫꦠ꧀ꦡ. ꦛꦷ. ꧒.꧒꧓꧓). ꦤ ꦱꦺꦴ ꦌꦠ꧀ꦠꦴꦮꦠꦴ ꦥꦴꦫꦴꦗꦶꦏꦺꦴ, ꦄꦡ ꦑꦺꦴ ꦪꦢꦴ ꦄꦤꦨꦶꦫꦠꦶꦪꦴ ꦥꦷꦭ꦳ꦶꦠꦺꦴ ꦄꦠ꧀ꦠꦤꦺꦴ ꦄꦔ꧀ꦒꦗꦴꦠꦁ ꦩꦸꦑꦺ ꦮꦴ ꦮꦕ꧀ꦕꦩꦒ꧀ꦒꦺ ꦮꦴ ꦥꦮꦺꦱꦺꦠꦶ, ꦠꦢꦴ ꦥꦴꦫꦴꦗꦶꦏꦺꦴ ꦲꦺꦴꦠꦶ. ꦩꦸꦢꦸꦏꦠꦴ ꦥꦶꦛ꧀ꦜꦶ ꦌꦠꦱ꧀ꦱꦴꦠꦶ ꦩꦸꦢꦸꦥꦶꦛ꧀ꦜꦶꦏꦺꦴ, ꦏꦠꦥꦫꦶꦏꦩ꧀ꦩꦴꦪ ꦩꦸꦢꦸꦏꦴꦪ ꦥꦶꦛ꧀ꦜꦶꦪꦴ ꦱꦩꦤ꧀ꦤꦴꦒꦠꦺꦴ. ꦱꦺꦴꦥꦶ ꦪꦢꦴ ꦄꦤꦨꦶꦫꦠꦶꦪꦴ ꦥꦷꦭ꦳ꦶꦠꦺꦴ ꦄꦠ꧀ꦠꦤꦺꦴ ꦄꦔ꧀ꦒꦗꦴꦠꦁ ꦄꦠ꧀ꦠꦤꦺꦴ ꦩꦸꦑꦩꦒ꧀ꦒꦮꦕ꧀ꦕꦩꦒ꧀ꦒꦺꦱꦸ ꦄꦚ꧀ꦚꦠꦫꦁ ꦥꦮꦺꦱꦺꦠꦶ, ꦠꦢꦴ ꦥꦴꦫꦴꦗꦶꦏꦺꦴ ꦲꦺꦴꦠꦶ. ꦥꦫꦱ꧀ꦱ ꦄꦔ꧀ꦒꦗꦴꦠꦁ ꦩꦸꦑꦺꦤ ꦒꦟ꧀ꦲꦴꦠꦷꦠꦶ ꦪꦺꦴ ꦄꦤꦨꦶꦫꦠꦶꦪꦴ ꦥꦷꦭ꦳ꦶꦠꦺꦴ ꦥꦫꦱ꧀ꦱ ꦱꦸꦠ꧀ꦠꦱ꧀ꦱ ꦮꦴ ꦥꦩꦠ꧀ꦠꦱ꧀ꦱ ꦮꦴ ꦄꦔ꧀ꦒꦗꦴꦠꦁ ꦩꦸꦑꦺꦤ ꦒꦟ꧀ꦲꦴꦠꦶ. ꦥꦫꦱ꧀ꦱ ꦄꦔ꧀ꦒꦗꦴꦠꦺ ꦄꦨꦶꦤꦶꦱꦷꦢꦠꦷꦠꦶ ꦪꦺꦴ ꦄꦤꦨꦶꦫꦠꦶꦪꦴ ꦥꦷꦭ꦳ꦶꦠꦺꦴ ꦥꦫꦱ꧀ꦱ ꦄꦔ꧀ꦒꦗꦴꦠꦁ ꦏꦩ꧀ꦩꦤꦶꦪꦁ ꦢꦶꦱ꧀ꦮꦴ ꦄꦠ꧀ꦠꦤꦺꦴ ꦮꦕ꧀ꦕꦩꦒ꧀ꦒꦺꦤ ꦠꦱ꧀ꦱꦹꦥꦫꦶ ꦤꦶꦱꦷꦢꦠꦶ, ꦠꦁ ꦄꦠ꧀ꦠꦤꦺꦴ ꦮꦕ꧀ꦕꦩꦒ꧀ꦒꦁ ꦥꦮꦺꦱꦺꦠꦷꦠꦶ ꦄꦠ꧀ꦡꦺꦴ. ꦌꦠꦴꦤꦶ ꦲꦶ ꦕꦠ꧀ꦠꦴꦫꦶ ꦪꦱ꧀ꦩꦴ ꦈꦨꦶꦤ꧀ꦤꦁ ꦫꦴꦒꦮꦱꦺꦤ ꦱꦢꦶꦱꦨꦴꦮꦹꦥꦒꦠꦴꦤꦁ ꦣꦩ꧀ꦩꦺꦴ ‘‘ꦩꦺꦡꦸꦤꦣꦩ꧀ꦩꦺꦴ’’ꦠꦶ ꦮꦸꦕ꧀ꦕꦠꦶ, ꦠꦱ꧀ꦩꦴ ꦌꦏꦺꦤ ꦥꦫꦶꦪꦴꦪꦺꦤ ꦩꦺꦡꦸꦤꦣꦩ꧀ꦩꦁ ꦄꦥ꧀ꦥꦛꦶꦱꦺꦮꦶꦠ꧀ꦮꦴꦪꦺꦮ ꦏꦺꦮꦭꦁ ꦩꦒ꧀ꦒꦺꦤ ꦩꦒ꧀ꦒꦥ꧀ꦥꦮꦺꦱꦤꦮꦱꦺꦤ ꦄꦴꦥꦗ꧀ꦗꦶꦠꦧ꧀ꦧꦠ꧀ꦠꦴ ꦩꦺꦡꦸꦤꦣꦩ꧀ꦩꦥꦴꦫꦴꦗꦶꦏꦱ꧀ꦱ ꦄꦤꦸꦭꦺꦴꦩꦺꦤ꧀ꦠꦷꦠꦶ ‘‘ꦄꦤꦸꦭꦺꦴꦩꦥꦴꦫꦴꦗꦶꦏꦴꦤꦷ’’ꦠꦶ ꦮꦸꦕ꧀ꦕꦤ꧀ꦠꦶ.

ꦌꦠ꧀ꦡꦴꦲ – ꦩꦴꦠꦸꦓꦴꦠꦏꦥꦶꦠꦸꦓꦴꦠꦏꦄꦫꦲꦤ꧀ꦠꦓꦴꦠꦏꦴ ꦠꦠꦶꦪꦥꦴꦫꦴꦗꦶꦏꦁ ꦄꦴꦥꦤ꧀ꦤꦴ, ꦨꦶꦏ꧀ꦑꦸꦤꦶꦢꦹꦱꦏꦺꦴ, ꦭꦩ꧀ꦧꦶꦄꦴꦢꦪꦺꦴ ꦕꦠ꧀ꦠꦴꦫꦺꦴ ꦕ ꦥꦜꦩꦥꦴꦫꦴꦗꦶꦏꦁ ꦄꦴꦥꦤ꧀ꦤꦴ ꦌꦮꦴꦠꦶ ꦏꦠ꧀ꦮꦴ ꦏꦸꦠꦺꦴ ꦕꦠꦸꦮꦷꦱꦠꦷꦠꦶ (ꦱꦴꦫꦠ꧀ꦡ. ꦛꦷ. ꧒.꧒꧓꧓)? ꦮꦸꦕ꧀ꦕꦠꦺ – ꦩꦴꦠꦸꦓꦴꦠꦏꦴꦢꦪꦺꦴ ꦲꦶ ꦕꦠ꧀ꦠꦴꦫꦺꦴ ꦆꦣ ꦄꦤꦸꦥꦱꦩ꧀ꦥꦤ꧀ꦤꦴ ꦌꦮ ꦄꦣꦶꦥ꧀ꦥꦺꦠꦴ, ꦭꦩ꧀ꦧꦶꦄꦴꦢꦪꦺꦴ ꦕꦠ꧀ꦠꦴꦫꦺꦴ ꦏꦶꦚ꧀ꦕꦴꦥꦶ ꦥꦜꦩꦥꦴꦫꦴꦗꦶꦏꦺꦤ ꦱꦔ꧀ꦒꦲꦶꦠꦴ, ꦪꦱ꧀ꦩꦴ ꦥꦤ ꦌꦏꦺꦤ ꦥꦫꦶꦪꦴꦪꦺꦤ ꦩꦺꦡꦸꦤꦣꦩ꧀ꦩꦁ ꦄꦥ꧀ꦥꦛꦶꦱꦺꦮꦶꦤꦺꦴ ꦲꦺꦴꦤ꧀ꦠꦶ, ꦠꦱ꧀ꦩꦴ ꦮꦶꦱꦸꦁ ꦮꦸꦠ꧀ꦠꦴꦠꦶ. ꦢꦸꦠꦶꦪꦮꦶꦏꦥ꧀ꦥꦺ ꦏꦕ꧀ꦕꦶꦠ꧀ꦡꦴꦠꦶ ꦌꦠ꧀ꦡ ꦏꦕ꧀ꦕꦶ ꦄꦠ꧀ꦡꦴꦠꦶ ꦥꦢꦕ꧀ꦖꦺꦢꦺꦴ ꦏꦴꦠꦧ꧀ꦧꦺꦴ.

ꦆꦠꦶ ꦏꦔ꧀ꦑꦴꦮꦶꦠꦫꦟꦶꦪꦴ ꦥꦴꦠꦶꦩꦺꦴꦏ꧀ꦑꦮꦟ꧀ꦟꦤꦴꦪ

ꦮꦶꦤꦪꦠ꧀ꦡꦩꦚ꧀ꦗꦹꦱꦴꦪꦁ ꦭꦷꦤꦠ꧀ꦡꦥ꧀ꦥꦏꦴꦱꦤꦶꦪꦁ

ꦥꦴꦫꦴꦗꦶꦏꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.