ꦥꦴꦛꦶꦢꦺꦱꦤꦷꦪꦏꦟ꧀ꦝꦁ

꧒. ꦠꦺꦭꦮꦶꦚ꧀ꦚꦴꦥꦤꦴꦢꦶꦱꦶꦏ꧀ꦑꦴꦥꦢꦮꦟ꧀ꦟꦤꦴ

ꦥꦴꦭ꦳ꦶꦪꦁ ꦄꦤꦴꦒꦠꦺꦱꦸ ꦥꦤ ꦄꦛ꧀ꦜꦱꦸꦥꦷꦠꦶ ꦥꦴꦭ꦳ꦶꦩꦸꦠ꧀ꦠꦏꦺꦱꦸ ꦱꦥ꧀ꦥꦶꦄꦴꦢꦷꦱꦸ ꦄꦛ꧀ꦜꦱꦸꦥꦶ.

ꦠꦺꦭꦮꦶꦚ꧀ꦚꦴꦥꦤꦴꦢꦶꦱꦶꦏ꧀ꦑꦴꦥꦢꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦆꦠꦶ ꦏꦔ꧀ꦑꦴꦮꦶꦠꦫꦟꦶꦪꦴ ꦥꦴꦠꦶꦩꦺꦴꦏ꧀ꦑꦮꦟ꧀ꦟꦤꦴꦪ

ꦮꦶꦤꦪꦠ꧀ꦡꦩꦚ꧀ꦗꦹꦱꦴꦪꦁ ꦭꦷꦤꦠ꧀ꦡꦥ꧀ꦥꦏꦴꦱꦤꦶꦪꦁ

ꦨꦶꦏ꧀ꦑꦸꦤꦶꦥꦴꦠꦶꦩꦺꦴꦏ꧀ꦑꦺ ꦥꦴꦛꦶꦢꦺꦱꦤꦷꦪꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧑. ꦥꦫꦶꦩꦟ꧀ꦝꦭꦴꦢꦶꦱꦶꦏ꧀ꦑꦴꦥꦢꦮꦟ꧀ꦟꦤꦴ

ꦱꦺꦑꦶꦪꦴꦤꦶ ꦕꦺꦮꦴꦠꦶ ꦥꦚ꧀ꦕꦱꦠ꧀ꦠꦠꦶ ꦱꦺꦑꦶꦪꦴꦤꦶ ꦕꦺꦮ. ‘‘ꦨꦶꦏ꧀ꦑꦸꦥꦴꦠꦶꦩꦺꦴꦏ꧀ꦑꦮꦟ꧀ꦟꦤꦴꦪꦁ ꦮꦸꦠ꧀ꦠꦤꦪꦺꦤꦺꦮ ꦮꦺꦢꦶꦠꦧ꧀ꦧꦴ’’ꦠꦶ ꦆꦩꦶꦤꦴ ꦪꦱ꧀ꦩꦴ ꦠꦴꦢꦶꦱꦁꦪꦺꦮꦺꦠ꧀ꦡ ꦄꦠ꧀ꦡꦮꦶꦤꦶꦕ꧀ꦖꦪꦁ ꦮꦶꦢꦹ ꦮꦢꦤ꧀ꦠꦶ, ꦠꦱ꧀ꦩꦴ ꦮꦶꦱꦸꦁ ꦠꦺꦱꦁ ꦄꦠ꧀ꦡꦮꦟ꧀ꦟꦤꦴ ꦤ ꦮꦸꦠ꧀ꦠꦴ. ꦠꦠ꧀ꦡ ꦪꦴ ꦮꦸꦠ꧀ꦠꦴ, ꦱꦴ ꦆꦣꦴꦥꦶ ꦮꦸꦠ꧀ꦠꦴꦪꦺꦮꦴꦠꦶ ꦢꦱ꧀ꦱꦺꦠꦶ.

ꦥꦫꦶꦩꦟ꧀ꦝꦭꦴꦢꦶꦱꦶꦏ꧀ꦑꦴꦥꦢꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦆꦠꦶ ꦏꦔ꧀ꦑꦴꦮꦶꦠꦫꦟꦶꦪꦴ ꦥꦴꦠꦶꦩꦺꦴꦏ꧀ꦑꦮꦟ꧀ꦟꦤꦴꦪ

ꦮꦶꦤꦪꦠ꧀ꦡꦩꦚ꧀ꦗꦹꦱꦴꦪꦁ ꦭꦷꦤꦠ꧀ꦡꦥ꧀ꦥꦏꦴꦱꦤꦶꦪꦁ

ꦨꦶꦏ꧀ꦑꦸꦤꦶꦥꦴꦠꦶꦩꦺꦴꦏ꧀ꦑꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦤꦶꦒꦩꦤꦏꦡꦴꦮꦟ꧀ꦟꦤꦴ

ꦪꦁ ꦥꦴꦠꦶꦩꦺꦴꦏ꧀ꦑꦱ꧀ꦱ ꦮꦟ꧀ꦟꦤꦁ ꦄꦴꦫꦨꦶꦤ꧀ꦠꦶ ꦱꦩ꧀ꦧꦤ꧀ꦣꦺꦴ. ‘‘ꦩꦲꦴꦮꦶꦲꦴꦫꦮꦴꦱꦷꦤ’’ꦤ꧀ꦠꦶ ꦆꦢꦁ ꦥꦸꦫꦶꦩꦥꦕ꧀ꦖꦶꦩꦥꦢꦺꦲꦶ ꦱꦢ꧀ꦣꦶꦁ ꦱꦩ꧀ꦧꦤ꧀ꦣꦶꦠꦧ꧀ꦧꦁ, ꦩꦲꦴꦮꦶꦲꦴꦫꦮꦴꦱꦷꦤꦁ ꦥꦺꦴꦫꦴꦟꦛ꧀ꦜꦏꦡꦴꦲꦶ ꦮꦴꦠꦶ ꦕ. ꦥꦴꦭ꦳ꦶꦪꦠ꧀ꦡꦚ꧀ꦕ ꦏꦺꦮꦭꦤ꧀ꦠꦶ ꦱꦏꦭꦁ ꦥꦴꦭ꦳ꦶꦄꦠ꧀ꦡꦚ꧀ꦕ, ꦈꦨꦠꦺꦴꦮꦶꦨꦔ꧀ꦒꦚ꧀ꦕꦴꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦌꦠ꧀ꦡꦴꦠꦶ ꦌꦠꦶꦱ꧀ꦱꦁ ꦏꦔ꧀ꦑꦴꦮꦶꦠꦫꦟꦶꦪꦁ. ꦪꦱ꧀ꦩꦴ ꦤ ꦲꦶ ꦄꦠ꧀ꦡꦷꦠꦶ ꦱꦩ꧀ꦧꦤ꧀ꦣꦺꦴ. ꦪꦤ꧀ꦠꦶ ꦪꦁ ꦥꦢꦁ. ꦱꦷꦲꦭ꦳ꦛ꧀ꦜꦏꦡꦴꦤꦪꦤ꧀ꦠꦶ ꦱꦷꦲꦭ꦳ꦩꦴꦠꦶꦏꦛ꧀ꦜꦏꦡꦴꦤꦪꦁ. ꦄꦛ꧀ꦜꦏꦡꦴꦱꦴꦫꦤ꧀ꦠꦶ ꦱꦷꦲꦭ꦳ꦩꦴꦠꦶꦏꦛ꧀ꦜꦏꦡꦴꦪꦁ ꦄꦠ꧀ꦡꦱꦴꦫꦁ, ꦄꦡ ꦮꦴ ꦮꦶꦤꦪꦛ꧀ꦜꦏꦡꦴꦱꦸ ꦄꦠ꧀ꦡꦱꦴꦫꦁ. ꦠꦺꦤꦺꦠꦁ ꦢꦱ꧀ꦱꦺꦠꦶ – ꦱꦷꦲꦭ꦳ꦩꦴꦠꦶꦏꦛ꧀ꦜꦏꦡꦴꦪꦁ ꦄꦠ꧀ꦡꦱꦴꦫꦁ ꦄꦴꦢꦴꦪ ꦆꦩꦁ ꦏꦔ꧀ꦑꦴꦮꦶꦠꦫꦟꦶꦁ ꦏꦫꦺꦴꦤ꧀ꦠꦺꦴ ꦮꦶꦤꦪꦛ꧀ꦜꦏꦡꦴꦱꦸꦥꦶ ꦆꦣ ꦮꦶꦤꦶꦕ꧀ꦖꦪꦺ ꦪꦺꦴꦒꦏ꧀ꦑꦩꦁ ꦄꦠ꧀ꦡꦱꦴꦫꦁ ꦄꦴꦢꦴꦪꦺꦮ ꦄꦏꦴꦱꦶꦤ꧀ꦠꦶ.

ꦆꦢꦴꦤꦶ ꦱꦢꦺꦮꦏꦱ꧀ꦱ ꦭꦺꦴꦏꦱ꧀ꦱ ꦄꦕ꧀ꦕꦤ꧀ꦠꦱꦸꦑꦴꦣꦶꦒꦩꦴꦪ ꦄꦠ꧀ꦠꦤꦺꦴ ꦥꦸꦚ꧀ꦚꦁ ꦥꦫꦶꦟꦴꦩꦺꦤ꧀ꦠꦺꦴ ‘‘ꦪꦡꦴ ꦕ ꦤꦶꦛ꧀ꦜꦁ ꦱꦩ꧀ꦥꦠ꧀ꦠꦴ’’ꦠꦶꦄꦴꦢꦶꦒꦴꦡꦴꦢ꧀ꦮꦪꦩꦴꦲ. ꦏꦭ꧀ꦪꦴꦟꦤꦶꦱ꧀ꦱꦶꦠꦴꦠꦶ ꦏꦸꦱꦭꦤꦶꦱ꧀ꦱꦶꦠꦴ. ꦱꦧ꧀ꦧꦱꦠ꧀ꦠꦴꦤꦤ꧀ꦠꦶ ꦏꦴꦩꦴꦮꦕꦫꦴꦢꦶꦨꦺꦢꦴꦤꦁ ꦱꦧ꧀ꦧꦺꦱꦁ ꦱꦠ꧀ꦠꦴꦤꦁ.

ꦤꦶꦒꦩꦤꦏꦡꦴꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦤꦶꦒꦩꦤꦏꦡꦴ

ꦌꦠ꧀ꦠꦴꦮꦠꦴ ꦕ –

꧑. ꦭꦔ꧀ꦏꦶꦱ꧀ꦱꦫꦺꦴ ꦪꦺꦴ ꦮꦶꦗꦶꦠꦴꦫꦶꦫꦴꦗꦺꦴ;

ꦫꦴꦗꦴ ꦥꦫꦏ꧀ꦏꦤ꧀ꦠꦨꦸꦗꦺꦴ ꦪꦱꦱ꧀ꦱꦷ;

ꦠꦶꦣꦴꦒꦠꦁ ꦱꦷꦲꦭ꦳ꦩꦺꦏꦫꦗ꧀ꦗꦁ;

ꦄꦏꦴ ꦤꦶꦏꦴꦪꦚ꧀ꦕ ꦠꦡꦴ ꦱꦩꦒ꧀ꦒꦁ.

꧒. ꦥꦸꦫꦺ ꦥꦸꦭꦠ꧀ꦡꦶꦩ꧀ꦲꦶ ꦮꦫꦺ ꦥꦸꦫꦴꦤꦁ;

ꦩꦗ꧀ꦙꦩ꧀ꦲꦶ ꦤꦴꦤꦴꦫꦠꦤꦴꦏꦫꦴꦤꦁ;

ꦄꦤꦤ꧀ꦠꦱꦩ꧀ꦥꦠ꧀ꦠꦶꦨꦫꦴꦨꦶꦫꦴꦩꦺ;

ꦮꦫꦴꦕꦭꦸꦠ꧀ꦠꦔ꧀ꦒꦓꦫꦴꦨꦶꦫꦴꦩꦺ.

꧓. ꦄꦨꦺꦗ꧀ꦗꦥꦴꦏꦴꦫꦱꦸꦒꦺꦴꦥꦸꦫꦱ꧀ꦩꦶꦁ;

ꦤꦶꦫꦴꦏꦸꦭꦴꦤꦺꦏꦏꦸꦭꦴꦏꦸꦭꦱ꧀ꦩꦶꦁ;

ꦩꦸꦤꦶꦤ꧀ꦢꦢꦴꦜꦔ꧀ꦏꦸꦫꦮꦴꦱꦨꦹꦠꦺ;

ꦪꦺꦴ ꦭꦺꦴꦕꦤꦴꦤꦤ꧀ꦢꦮꦲꦺ ꦮꦱꦤ꧀ꦠꦺꦴ.

꧔. ꦱꦸꦦꦸꦭ꧀ꦭꦶꦠꦧ꧀ꦨꦺꦴꦫꦸꦲꦱꦴꦢꦸꦱꦷꦠ

ꦥꦱꦤ꧀ꦤꦤꦷꦫꦺꦲꦶ ꦗꦭꦴꦱꦪꦺꦲꦶ;

ꦱꦸꦥꦸꦥ꧀ꦦꦶꦠꦴꦤꦺꦏꦏꦢꦩ꧀ꦧꦗꦩ꧀ꦧꦸ-

ꦥꦸꦤ꧀ꦤꦴꦒꦤꦴꦒꦴꦢꦶꦲꦶ ꦮꦴꦨꦶꦫꦩ꧀ꦩꦺ.

꧕. ꦱꦸꦣꦴꦮꦢꦴꦠꦺꦲꦶ ꦩꦤꦺꦴꦲꦫꦺꦲꦶ;

ꦥꦴꦏꦴꦫꦥꦤ꧀ꦠꦷꦲꦶ ꦕ ꦒꦺꦴꦥꦸꦫꦺꦲꦶ;

ꦮꦶꦏꦶꦟ꧀ꦟꦩꦸꦠ꧀ꦠꦴꦦꦭꦱꦤ꧀ꦤꦶꦨꦺꦲꦶ;

ꦮꦶꦭꦺꦴꦏꦤꦷꦪꦺꦲꦶ ꦱꦸꦣꦴꦠꦭꦺꦲꦶ.

꧖. ꦏꦠ꧀ꦮꦴꦤ ꦥꦴꦱꦴꦢꦱꦲꦱ꧀ꦱꦫꦩ꧀ꦩꦺ;

ꦠꦲꦶꦁ ꦠꦲꦶꦁ ꦥꦷꦠꦶꦏꦫꦺ ꦮꦶꦲꦴꦫꦺ;

ꦩꦲꦴꦢꦪꦺꦴ ꦗꦺꦠꦮꦤꦴꦢꦪꦺꦴꦥꦶ;

ꦱꦸꦱꦁꦪꦩꦴꦤꦁ ꦪꦠꦶꦤꦁ ꦄꦢꦴꦱꦶ.

꧗. ꦪꦺꦴ ꦱꦴꦢꦸꦨꦹꦠꦁ ꦕꦠꦸꦥꦕ꧀ꦕꦪꦚ꧀ꦕ;

ꦒꦸꦟꦥ꧀ꦥꦱꦤ꧀ꦤꦺꦴ ꦱꦩꦟꦺꦱꦸ ꦠꦺꦱꦸ;

ꦤꦶꦕ꧀ꦕꦁ ꦩꦲꦺꦴꦓꦁ ꦮꦶꦪ ꦮꦠ꧀ꦠꦪꦤ꧀ꦠꦺꦴ;

ꦪꦺꦴꦗꦺꦠꦶ ꦠꦺ ꦒꦤ꧀ꦡꦮꦶꦥꦱ꧀ꦱꦤꦴꦱꦸ.

꧘. ꦏꦴꦫꦶꦠꦺꦱꦸ ꦮꦶꦲꦴꦫꦺꦱꦸ, ꦠꦺꦤ ꦠꦺꦱꦸ ꦪꦱꦱ꧀ꦱꦶꦤꦴ;

ꦫꦩ꧀ꦩꦺꦴ ꦪꦺꦴ ꦥꦕ꧀ꦖꦶꦩꦴꦫꦴꦩꦺꦴ, ꦥꦸꦥ꧀ꦦꦴꦫꦴꦩꦴꦢꦶꦱꦺꦴꦨꦶꦠꦺꦴ.

꧙. ꦥꦫꦶꦮꦺꦟꦩ꧀ꦲꦶ ꦤꦴꦩꦺꦤ, ꦠꦲꦶꦁ ꦕꦺꦴꦭ꦳ꦏꦸꦭꦤ꧀ꦠꦶꦏꦺ;

ꦥꦴꦱꦴꦢꦺ ꦢꦱ꧀ꦱꦤꦷꦪꦩ꧀ꦲꦶ, ꦮꦱꦤ꧀ꦠꦺꦴ ꦏꦫꦸꦟꦴꦥꦫꦺꦴ.

꧑꧐. ꦱꦶꦱ꧀ꦱꦺꦴ ꦱꦱꦷꦏꦫꦱ꧀ꦮꦕ꧀ꦖ-ꦱꦷꦭꦴꦕꦴꦫꦱ꧀ꦱ ꦣꦷꦩꦠꦺꦴ;

ꦱꦴꦫꦶꦥꦸꦠ꧀ꦠꦩꦲꦴꦡꦺꦫ-ꦩꦲꦴꦱꦴꦩꦶꦱ꧀ꦱ ꦠꦴꦢꦶꦤꦺꦴ.

꧑꧑. ꦣꦷꦫꦴꦤꦺꦏꦒꦸꦟꦺꦴꦓꦺꦤ, ꦡꦺꦫꦺꦤ ꦱꦸꦕꦶꦮꦸꦠ꧀ꦠꦶꦤꦴ;

ꦮꦶꦤꦪꦛ꧀ꦜꦶꦠꦶꦏꦴꦩꦺꦤ, ꦱꦸꦩꦺꦣꦺꦤꦴꦨꦶꦪꦴꦕꦶꦠꦺꦴ.

꧑꧒. ꦱꦺꦴ ꦧꦸꦢ꧀ꦣꦤꦴꦒꦠ꧀ꦡꦺꦫꦺꦴꦲꦁ, ꦨꦶꦏ꧀ꦑꦹꦤꦁ ꦥꦫꦩꦁ ꦲꦶꦠꦁ;

ꦩꦲꦴꦮꦶꦲꦴꦫꦮꦴꦱꦷꦤꦁ, ꦪꦠꦷꦤꦁ ꦱꦩꦪꦴꦤꦸꦒꦁ.

꧑꧓. ꦮꦶꦤꦪꦠ꧀ꦡꦴꦢꦶꦩꦚ꧀ꦗꦹꦱꦁ, ꦭꦷꦤꦠ꧀ꦡꦱ꧀ꦱ ꦥꦏꦴꦱꦤꦶꦁ;

ꦩꦴꦠꦶꦏꦛ꧀ꦜꦏꦡꦴꦪꦺꦩꦁ, ꦄꦏꦴꦱꦶꦁ ꦱꦴꦣꦸ ꦮꦟ꧀ꦟꦤꦁ.

꧑꧔. ꦱꦴꦪꦁ ꦱꦸꦧꦺꦴꦣꦴ ꦧꦸꦣꦮꦟ꧀ꦟꦤꦷꦪꦴ;

ꦱꦁꦮꦟ꧀ꦟꦤꦴ ꦱꦠ꧀ꦠꦱꦲꦱ꧀ꦱꦩꦠ꧀ꦠꦴ;

ꦤꦶꦫꦴꦏꦫꦺꦴꦤ꧀ꦠꦷ ꦮꦶꦤꦪꦩ꧀ꦲꦶ ꦩꦺꦴꦲꦁ;

ꦠꦩꦁ ꦕꦫꦤ꧀ꦠꦷ ꦱꦱꦶ ꦑꦺꦮ ꦨꦴꦠꦸ.

꧑꧕. ꦄꦴꦏꦔ꧀ꦑꦩꦴꦤꦺꦤ ꦥꦫꦠ꧀ꦡꦩꦶꦛ꧀ꦜꦁ;

ꦩꦲꦠ꧀ꦡꦱꦴꦫꦁ ꦱꦸꦮꦶꦤꦶꦕ꧀ꦖꦪꦚ꧀ꦕ;

ꦱꦁꦮꦟ꧀ꦟꦤꦁ ꦱꦴꦣꦸ ꦥꦏꦸꦧ꧀ꦧꦠꦴ ꦪꦁ;

ꦕꦶꦠꦁ ꦩꦪꦴ ꦥꦸꦚ꧀ꦚꦩꦤꦥ꧀ꦥꦨꦹꦠꦁ.

꧑꧖. ꦥꦸꦚ꧀ꦚꦺꦤ ꦠꦺꦤꦴꦕꦶꦠꦢꦴꦤꦱꦷꦭ-

ꦩꦪꦴꦢꦶꦤꦴꦤꦺꦏꦮꦶꦣꦺꦤ ꦕꦺꦮ;

ꦱꦠ꧀ꦠꦴ ꦄꦤꦷꦓꦴ ꦱꦸꦑꦶꦤꦺꦴ ꦄꦮꦺꦫꦴ;

ꦥꦥ꧀ꦥꦺꦴꦤ꧀ꦠꦸ ꦱꦧ꧀ꦧꦺ ꦱꦸꦒꦠꦶꦁ ꦱꦶꦮꦚ꧀ꦕ.

꧑꧗. ꦱꦢ꧀ꦣꦶꦁ ꦪꦡꦺꦴꦥꦢ꧀ꦢꦮꦩꦤ꧀ꦠꦫꦺꦤ;

ꦒꦠꦴ ꦲꦶ ꦭꦷꦤꦠ꧀ꦡꦥꦢꦷꦥꦤꦷꦪꦁ;

ꦠꦡꦴ ꦗꦤꦴꦤꦁ ꦄꦥꦶ ꦣꦩ꧀ꦩꦪꦸꦠ꧀ꦠꦴ;

ꦩꦤꦺꦴꦫꦡꦴ ꦱꦶꦢ꧀ꦣꦶꦩꦸꦥꦺꦤ꧀ꦠꦸ ꦤꦶꦕ꧀ꦕꦁ.

꧑꧘. ꦏꦴꦭꦺ ꦥꦮꦱ꧀ꦱꦤ꧀ꦠꦸ ꦱꦢꦴ ꦥꦪꦺꦴꦢꦴ;

ꦣꦩ꧀ꦩꦺꦤ ꦥꦴꦭꦺꦤ꧀ꦠꦸ ꦩꦲꦶꦁ ꦩꦲꦶꦤ꧀ꦢꦴ;

ꦱꦠ꧀ꦠꦴ ꦥꦱꦤ꧀ꦤꦴ ꦫꦠꦤꦠ꧀ꦠꦪꦱ꧀ꦩꦶꦁ;

ꦢꦴꦤꦴꦢꦶꦥꦸꦚ꧀ꦚꦴꦨꦶꦫꦠꦴ ꦨꦮꦤ꧀ꦠꦹꦠꦶ.

ꦮꦶꦤꦪꦠ꧀ꦡꦩꦚ꧀ꦗꦹꦱꦴ ꦭꦷꦤꦠ꧀ꦡꦥ꧀ꦥꦏꦴꦱꦤꦷꦤꦴꦩꦶꦏꦴꦏꦔ꧀ꦑꦴꦮꦶꦠꦫꦟꦷꦄꦨꦶꦤꦮꦛꦷꦏꦴ ꦤꦶꦛ꧀ꦜꦶꦠꦴ.