꧕. ꦨꦺꦴꦗꦤꦥ꧀ꦥꦛꦶꦒ꧀ꦒꦲꦟꦥꦜꦩꦱꦶꦏ꧀ꦑꦴꦥꦢꦮꦟ꧀ꦟꦤꦴ

ꦌꦏꦠꦺꦴꦄꦮꦱ꧀ꦱꦸꦠꦺꦠꦶ ꦥꦸꦒ꧀ꦒꦭꦱ꧀ꦱ ꦮꦴ ꦨꦶꦏ꧀ꦑꦸꦤꦶꦪꦴ ꦮꦴ ꦄꦮꦱ꧀ꦱꦸꦠꦺ. ꦩꦲꦴꦥꦕ꧀ꦕꦫꦶꦪꦁ ꦥꦤꦺꦠ꧀ꦡ ‘‘ꦨꦶꦏ꧀ꦑꦸꦤꦶꦪꦴ ꦄꦮꦱ꧀ꦱꦸꦠꦨꦴꦮꦺꦠꦶ ꦢꦛ꧀ꦜꦧ꧀ꦧ’’ꦤ꧀ꦠꦶ (ꦥꦴꦕꦶ. ꦄꦛ꧀ꦜ. ꧗꧐꧑) ꦮꦸꦠ꧀ꦠꦁ. ꦠꦁ ‘‘ꦄꦤꦮꦱ꧀ꦱꦸꦠꦺꦴꦠꦶ ꦗꦴꦤꦤ꧀ꦠꦷ ꦥꦛꦶꦒ꧀ꦒꦟ꧀ꦲꦴꦠꦷ’’ꦠꦶ (ꦥꦴꦕꦶ. ꧗꧐꧓) ꦆꦩꦴꦪ ꦥꦴꦭ꦳ꦶꦪꦴ ꦤ ꦱꦩꦺꦠꦶ. ꦪꦢꦶ ꦲꦶ ꦥꦸꦒ꧀ꦒꦭꦱ꧀ꦱ ꦄꦮꦱ꧀ꦱꦸꦠꦨꦴꦮꦺꦴ ꦤꦥ꧀ꦥꦩꦴꦟꦁ, ꦏꦶꦁ ‘‘ꦄꦤꦮꦱ꧀ꦱꦸꦠꦺꦴꦠꦶ ꦗꦴꦤꦤ꧀ꦠꦷ’’ꦠꦶ ꦆꦩꦶꦤꦴ ꦮꦕꦤꦺꦤ, ‘‘ꦄꦤꦴꦥꦠ꧀ꦠꦶ ꦈꦨꦠꦺꦴꦄꦤꦮꦱ꧀ꦱꦸꦠꦴ ꦲꦺꦴꦤ꧀ꦠꦶ, ꦄꦤꦮꦱ꧀ꦱꦸꦠꦴ ꦥꦛꦶꦒ꧀ꦒꦟ꧀ꦲꦴꦠꦷ’’ꦠꦶ ꦌꦠ꧀ꦠꦏꦩꦺꦮ ꦮꦠ꧀ꦠꦧ꧀ꦧꦁ ꦱꦶꦪꦴ. ꦈꦨꦺꦴꦱꦸ ꦄꦤꦮꦱ꧀ꦱꦸꦠꦺꦱꦹꦠꦶ ꦥꦸꦒ꧀ꦒꦭꦺꦴ ꦕꦺꦮ ꦨꦶꦏ꧀ꦑꦸꦤꦷ ꦕꦴꦠꦶ ꦈꦨꦺꦴꦱꦸ ꦄꦤꦮꦱ꧀ꦱꦸꦠꦺꦱꦸ ꦒꦟ꧀ꦲꦤ꧀ꦠꦶꦪꦴ ꦱꦧ꧀ꦧꦡꦴꦥꦶ ꦄꦤꦴꦥꦠ꧀ꦠꦶ. ‘‘ꦄꦤꦮꦱ꧀ꦱꦸꦠꦺꦴ’’ꦠꦶ ꦮꦴ ꦚꦠ꧀ꦮꦴ ꦒꦟ꧀ꦲꦤ꧀ꦠꦶꦪꦴꦠꦶ ꦱꦪꦁ ꦄꦤꦮꦱ꧀ꦱꦸꦠꦴ ꦱꦩꦴꦤꦴ ꦄꦮꦱ꧀ꦱꦸꦠꦺꦥꦶ ‘‘ꦄꦤꦮꦱ꧀ꦱꦸꦠꦺꦴ ꦄꦪ’’ꦤ꧀ꦠꦶ ꦱꦚ꧀ꦚꦴꦪ ꦠꦱ꧀ꦱ ꦲꦠ꧀ꦡꦠꦺꦴ ꦥꦛꦶꦒ꧀ꦒꦟ꧀ꦲꦤ꧀ꦠꦶꦪꦴ. ꦄꦡ ꦱꦪꦁ ꦄꦤꦮꦱ꧀ꦱꦸꦠꦴꦥꦶ ꦄꦚ꧀ꦚꦁ ꦄꦮꦱ꧀ꦱꦸꦠꦁ ꦮꦴ ꦄꦤꦮꦱ꧀ꦱꦸꦠꦁ ꦮꦴ ‘‘ꦄꦮꦱ꧀ꦱꦸꦠꦺꦴ’’ꦠꦶ ꦚꦠ꧀ꦮꦴ ꦥꦛꦶꦒ꧀ꦒꦟ꧀ꦲꦴꦠꦶ, ꦢꦸꦏ꧀ꦏꦛꦩꦺꦮ. ꦮꦸꦠ꧀ꦠꦚ꧀ꦲꦺꦠꦁ ꦄꦤꦤ꧀ꦠꦫꦱꦶꦏ꧀ꦑꦴꦥꦢꦺ ‘‘ꦏꦶꦱ꧀ꦱ ꦠ꧀ꦮꦁ, ꦄꦪ꧀ꦪꦺ, ꦤ ꦥꦛꦶꦒ꧀ꦒꦟ꧀ꦲꦴꦱꦷꦠꦶ, ꦄꦮꦱ꧀ꦱꦸꦠꦴ, ꦄꦪ꧀ꦪꦺꦠꦶ, ꦠ꧀ꦮꦁ ꦥꦤ, ꦄꦪ꧀ꦪꦺ, ꦄꦮꦱ꧀ꦱꦸꦠꦴꦠꦶ, ꦤꦴꦲꦁ, ꦄꦪ꧀ꦪꦺ, ꦄꦮꦱ꧀ꦱꦸꦠꦴ’’ꦠꦶ.

ꦨꦺꦴꦗꦤꦥ꧀ꦥꦛꦶꦒ꧀ꦒꦲꦟꦥꦜꦩꦱꦶꦏ꧀ꦑꦴꦥꦢꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.