꧓. ꦌꦏꦒꦴꦩꦤ꧀ꦠꦫꦒꦩꦤꦱꦶꦏ꧀ꦑꦴꦥꦢꦮꦟ꧀ꦟꦤꦴ

ꦄꦚ꧀ꦚꦺꦴ ꦒꦴꦩꦺꦴ ꦒꦴꦩꦤ꧀ꦠꦫꦁ. ꦤꦢꦶꦥꦴꦫꦤ꧀ꦠꦶ ꦤꦢꦶꦪꦴ ꦥꦴꦫꦶꦩꦠꦷꦫꦁ. ‘‘ꦒꦴꦩꦤ꧀ꦠꦫꦁ ꦒꦕ꧀ꦖꦺꦪ꧀ꦪꦴ’’ꦠꦶ (ꦥꦴꦕꦶ. ꧖꧘꧗, ꧖꧙꧑) ꦮꦸꦠ꧀ꦠꦠ꧀ꦠꦴ ꦄꦚ꧀ꦚꦱ꧀ꦩꦶꦁ ꦒꦴꦩꦺꦪꦺꦮ ꦄꦴꦥꦠ꧀ꦠꦶ, ꦤ ꦱꦏꦒꦴꦩꦺꦠꦶ ꦄꦴꦲ ‘‘ꦱꦏꦒꦴꦩꦠꦺꦴ ꦠꦴꦮꦴ’’ꦠꦶꦄꦴꦢꦶ. ꦥꦫꦶꦏ꧀ꦑꦺꦥꦺ ꦮꦴ ꦈꦥꦕꦴꦫꦺ ꦮꦴ ꦄꦠꦶꦏ꧀ꦏꦤ꧀ꦠꦺꦠꦶ ꦥꦫꦶꦏ꧀ꦑꦶꦠ꧀ꦠꦱ꧀ꦱ ꦒꦴꦩꦱ꧀ꦱ ꦥꦫꦶꦏ꧀ꦑꦺꦥꦺ ꦮꦴ ꦄꦥꦫꦶꦏ꧀ꦑꦶꦠ꧀ꦠꦱ꧀ꦱ ꦒꦴꦩꦱ꧀ꦱ ꦥꦫꦶꦏ꧀ꦑꦺꦥꦴꦫꦲꦛ꧀ꦜꦴꦤꦺ ꦮꦴ ꦄꦠꦶꦏ꧀ꦏꦤ꧀ꦠꦺ. ꦢꦸꦠꦶꦪꦺꦤ ꦄꦠꦶꦏ꧀ꦏꦤ꧀ꦠꦩꦠ꧀ꦠꦺꦠꦶ ꦢꦸꦠꦶꦪꦺꦤ ꦥꦴꦢꦺꦤ ꦆꦠꦫꦱ꧀ꦱ ꦒꦴꦩꦱ꧀ꦱ ꦥꦫꦶꦏ꧀ꦑꦺꦥꦺ ꦮꦴ ꦈꦥꦕꦴꦫꦺ ꦮꦴ ꦄꦠꦶꦏ꧀ꦏꦤ꧀ꦠꦩꦠ꧀ꦠꦺ. ꦪꦺꦱꦸ ꦥꦤ ꦥꦺꦴꦠ꧀ꦡꦏꦺꦱꦸ ‘‘ꦌꦏꦺꦤ ꦥꦴꦢꦺꦤ ꦆꦠꦫꦱ꧀ꦱ ꦒꦴꦩꦱ꧀ꦱ ꦥꦫꦶꦏ꧀ꦑꦺꦥꦺ ꦮꦴ ꦄꦠꦶꦏ꧀ꦏꦤ꧀ꦠꦺ, ꦈꦥꦕꦴꦫꦺ ꦮꦴ ꦎꦏ꧀ꦏꦤ꧀ꦠꦺ ꦡꦸꦭ꧀ꦭꦕ꧀ꦕꦪꦁ, ꦢꦸꦠꦶꦪꦺꦤ ꦄꦠꦶꦏ꧀ꦏꦤ꧀ꦠꦩꦠ꧀ꦠꦺ, ꦎꦏ꧀ꦏꦤ꧀ꦠꦩꦠ꧀ꦠꦺ ꦮꦴ ꦱꦔ꧀ꦓꦴꦢꦶꦱꦺꦱꦺꦴ’’ꦠꦶ ꦥꦴꦜꦺꦴ ꦢꦶꦱ꧀ꦱꦠꦶ, ꦠꦠ꧀ꦡ ‘‘ꦎꦏ꧀ꦏꦤ꧀ꦠꦺ, ꦎꦏ꧀ꦏꦤ꧀ꦠꦩꦠ꧀ꦠꦺ ꦮꦴ’’ꦠꦶ ꦌꦠꦴꦤꦶ ꦢ꧀ꦮꦺ ꦥꦢꦴꦤꦶ ꦥꦴꦭ꦳ꦶꦪꦴ ꦮꦶꦫꦸꦗ꧀ꦙꦤ꧀ꦠꦶ. ‘‘ꦄꦥꦫꦶꦏ꧀ꦑꦶꦠ꧀ꦠꦱ꧀ꦱ ꦒꦴꦩꦱ꧀ꦱ ꦈꦥꦕꦴꦫꦁ ꦄꦠꦶꦏ꧀ꦏꦴꦩꦺꦤ꧀ꦠꦶꦪꦴ’’ꦠꦶ (ꦥꦴꦕꦶ. ꧖꧙꧒) ꦲꦶ ꦥꦴꦭ꦳ꦶ. ꦠꦡꦴ ꦱꦩꦤ꧀ꦠꦥꦴꦱꦴꦢꦶꦏꦴꦪꦥꦶ ꦮꦶꦫꦸꦗ꧀ꦙꦤ꧀ꦠꦶ. ꦠꦠ꧀ꦡ ꦲꦶ –

‘‘ꦥꦫꦶꦏ꧀ꦑꦺꦥꦴꦫꦲꦛ꧀ꦜꦴꦤꦁ ꦌꦏꦺꦤ ꦥꦴꦢꦺꦤ ꦄꦠꦶꦏ꧀ꦏꦩꦠꦶ, ꦡꦸꦭ꧀ꦭꦕ꧀ꦕꦪꦁ. ꦢꦸꦠꦶꦪꦺꦤ ꦄꦠꦶꦏ꧀ꦏꦤ꧀ꦠꦩꦠ꧀ꦠꦺ ꦱꦔ꧀ꦓꦴꦢꦶꦱꦺꦱꦺꦴ. ꦄꦥꦶꦕꦺꦠ꧀ꦡ ꦱꦏꦒꦴꦩꦠꦺꦴ…ꦥꦺ… ꦌꦏꦺꦤ ꦥꦴꦢꦺꦤ ꦆꦠꦫꦱ꧀ꦱ ꦒꦴꦩꦱ꧀ꦱ ꦥꦫꦶꦏ꧀ꦑꦺꦥꦺ ꦮꦴ ꦈꦥꦕꦴꦫꦺꦮꦴ ꦄꦠꦶꦏ꧀ꦏꦤ꧀ꦠꦩꦠ꧀ꦠꦺ ꦡꦸꦭ꧀ꦭꦕ꧀ꦕꦪꦁ, ꦢꦸꦠꦶꦪꦺꦤ ꦄꦠꦶꦏ꧀ꦏꦤ꧀ꦠꦩꦠ꧀ꦠꦺ ꦱꦔ꧀ꦓꦴꦢꦶꦱꦺꦱꦺꦴ’’ꦠꦶ –

ꦮꦸꦠ꧀ꦠꦁ. ‘‘ꦥꦜꦩꦁ ꦥꦴꦢꦁ ꦄꦠꦶꦏ꧀ꦏꦴꦩꦺꦤ꧀ꦠꦶꦪꦴ’’ꦠꦶꦄꦴꦢꦶꦮꦕꦤꦠꦺꦴ (ꦥꦴꦕꦶ. ꧖꧙꧒) ꦥꦢꦱꦴ ꦒꦩꦤꦩꦺꦮ ꦆꦣꦴꦣꦶꦥ꧀ꦥꦺꦠꦤ꧀ꦠꦶ ꦄꦴꦲ ‘‘ꦥꦢꦱꦴ ꦥꦮꦶꦱꦤ꧀ꦠꦶꦪꦴ ꦄꦴꦥꦠ꧀ꦠꦷ’’ꦠꦶ. ꦆꦩꦶꦤꦴ ꦱꦕꦺꦥꦶ ꦲꦠ꧀ꦡꦶꦥꦶꦛ꧀ꦜꦶꦄꦴꦢꦷꦲꦶ ꦮꦴ ꦆꦢ꧀ꦣꦶꦪꦴ ꦮꦴ ꦥꦮꦶꦱꦠꦶ, ꦮꦛ꧀ꦛꦠꦶꦪꦺꦮꦴꦠꦶ ꦢꦱ꧀ꦱꦺꦠꦶ. ꦄꦪꦩꦺꦠ꧀ꦡ ꦱꦔ꧀ꦑꦺꦥꦺꦴ, ꦮꦶꦠ꧀ꦡꦴꦫꦺꦴ ꦥꦤ ꦱꦩꦤ꧀ꦠꦥꦴꦱꦴꦢꦶꦏꦴꦪ (ꦥꦴꦕꦶ. ꦄꦛ꧀ꦜ. ꧖꧙꧒) ꦮꦸꦠ꧀ꦠꦺꦴꦠꦶ ꦄꦣꦶꦥ꧀ꦥꦴꦪꦺꦴ.

ꦤꦢꦶꦥꦴꦫꦒꦩꦤꦺ ꦮꦸꦠ꧀ꦠꦭꦏ꧀ꦑꦟꦴꦪ ꦤꦢꦶꦪꦴꦠꦶ ‘‘ꦤꦢꦷ ꦤꦴꦩ ꦠꦶꦩꦟ꧀ꦝꦭꦁ ꦥꦛꦶꦕ꧀ꦖꦴꦢꦺꦠ꧀ꦮꦴ ꦪꦠ꧀ꦡ ꦏꦠ꧀ꦡꦕꦶ ꦈꦠ꧀ꦠꦫꦤ꧀ꦠꦶꦪꦴ ꦄꦤ꧀ꦠꦫꦮꦴꦱꦏꦺꦴ ꦠꦺꦩꦶꦪꦠꦷ’’ꦠꦶ (ꦥꦴꦕꦶ. ꧖꧙꧒) ꦤꦢꦶꦥꦴꦫꦒꦩꦤꦮꦶꦨꦔ꧀ꦒꦺ ꦮꦸꦠ꧀ꦠꦭꦏ꧀ꦑꦟꦴꦪ ꦤꦢꦶꦪꦴ. ꦤꦢꦶꦥꦴꦫꦒꦩꦤꦮꦶꦨꦔ꧀ꦒꦺꦴ ꦲꦶ ꦆꦣ ꦤꦢꦶꦥꦴꦫꦒꦩꦤꦱꦢ꧀ꦢꦺꦤ ꦮꦸꦠ꧀ꦠꦺꦴ. ꦥꦸꦤ ꦎꦫꦶꦩꦠꦷꦫꦩꦺꦮ ꦥꦕ꧀ꦕꦸꦠ꧀ꦠꦫꦤ꧀ꦠꦶꦪꦴ ꦮꦴꦠꦶ ꦥꦫꦠꦷꦫꦁ ꦒꦤ꧀ꦠꦸꦏꦴꦩꦠꦴꦪ ꦎꦠꦶꦟ꧀ꦟꦠ꧀ꦠꦴ ꦮꦸꦠ꧀ꦠꦁ. ꦆꦠꦫꦶꦱ꧀ꦱꦴ ꦥꦤ ꦄꦪꦁ ꦥꦏ꧀ꦏꦤ꧀ꦠꦛ꧀ꦜꦴꦤꦺ ꦜꦶꦠꦴ ꦲꦺꦴꦠꦶ, ꦠꦱ꧀ꦩꦴ ꦥꦫꦠꦷꦫꦁ ꦒꦕ꧀ꦖꦤ꧀ꦠꦶꦪꦴ ꦄꦤꦴꦥꦠ꧀ꦠꦶ. ꦱꦕꦺ ꦱꦗ꧀ꦙꦴꦪꦁ ꦮꦴ ꦥꦣꦴꦤꦁ ꦮꦴ ꦄꦚ꧀ꦚꦁ ꦮꦴ ꦏꦶꦚ꧀ꦕꦶ ꦏꦩ꧀ꦩꦁ ꦏꦸꦫꦸꦩꦴꦤꦴ ‘‘ꦥꦸꦫꦺ ꦄꦫꦸꦟꦺꦪꦺꦮ ꦢꦸꦠꦶꦪꦶꦏꦴꦪ ꦱꦤ꧀ꦠꦶꦏꦁ ꦒꦩꦶꦱ꧀ꦱꦴꦩꦷ’’ꦠꦶ (ꦥꦴꦕꦶ. ꦄꦛ꧀ꦜ. ꧖꧙꧒) ꦄꦴꦨꦺꦴꦒꦁ ꦏꦫꦺꦴꦠꦶ, ꦄꦗꦴꦤꦤ꧀ꦠꦶꦪꦴ ꦌꦮ ꦠꦱ꧀ꦱꦴ ꦄꦫꦸꦟꦺꦴ ꦈꦒ꧀ꦒꦕ꧀ꦖꦠꦶ, ꦄꦤꦴꦥꦠ꧀ꦠꦷꦠꦶ ꦄꦴꦲ ‘‘ꦥꦸꦫꦺ ꦄꦫꦸꦟꦺꦪꦺꦮꦴ’’ꦠꦶꦄꦴꦢꦶ. ꦄꦡ ꦥꦤ ‘‘ꦪꦴꦮ ꦄꦫꦸꦟꦸꦒ꧀ꦒꦩꦤꦴ ꦆꦣꦺꦮ ꦨꦮꦶꦱ꧀ꦱꦴꦩꦷ’’ꦠꦶ ꦮꦴ ꦄꦤꦴꦨꦺꦴꦒꦺꦤ ꦮꦴ ꦮꦶꦲꦴꦫꦱ꧀ꦱ ꦌꦏꦢꦺꦱꦺ ꦄꦕ꧀ꦖꦠꦶ, ꦢꦸꦠꦶꦪꦶꦏꦴꦪ ꦲꦠ꧀ꦡꦥꦴꦱꦁ ꦤ ꦎꦠꦫꦠꦶ, ꦄꦫꦸꦟꦸꦒ꧀ꦒꦩꦤꦺ ꦱꦔ꧀ꦓꦴꦢꦶꦱꦺꦱꦺꦴ. ꦲꦠ꧀ꦡꦥꦴꦱꦺꦴꦪꦺꦮ ꦲꦶ ꦆꦣ ꦥꦩꦴꦟꦁ. ꦲꦠ꧀ꦡꦥꦴꦱꦴꦠꦶꦏ꧀ꦏꦩꦺ ꦌꦏꦒꦧ꧀ꦨꦺꦴꦥꦶ ꦤ ꦫꦏ꧀ꦑꦠꦶ. ꦠꦺꦤꦴꦲ ‘‘ꦌꦏꦒꦧ꧀ꦨꦺ…ꦥꦺ… ꦄꦴꦥꦠ꧀ꦠꦷ’’ꦠꦶ.

ꦢꦱ꧀ꦱꦤꦹꦥꦕꦴꦫꦁ ꦮꦴ ꦱꦮꦤꦹꦥꦕꦴꦫꦁ ꦮꦴꦠꦶ ꦌꦠ꧀ꦡ ꦢꦱ꧀ꦱꦤꦹꦥꦕꦴꦫꦺꦴ ꦤꦴꦩ ꦪꦠ꧀ꦡ ꦜꦶꦠꦁ ꦢꦸꦠꦶꦪꦶꦏꦴ ꦥꦱ꧀ꦱꦠꦶ. ꦱꦮꦤꦹꦥꦕꦴꦫꦺꦴ ꦤꦴꦩ ꦪꦠ꧀ꦡ ꦜꦶꦠꦴ ꦩꦒ꧀ꦒꦩꦹꦭ꦳꧀ꦲꦱꦢ꧀ꦢꦺꦤ ꦮꦶꦪ, ꦣꦩ꧀ꦩꦱ꧀ꦱꦮꦤꦴꦫꦺꦴꦕꦤꦱꦢ꧀ꦢꦺꦤ ꦮꦶꦪ ꦕ ‘‘ꦄꦪ꧀ꦪꦺ’’ꦠꦶ ꦱꦢ꧀ꦢꦴꦪꦤ꧀ꦠꦶꦪꦴ ꦱꦢ꧀ꦢꦁ ꦱꦸꦟꦴꦠꦶ. ꦠꦱ꧀ꦩꦴꦠꦶ ꦪꦱ꧀ꦩꦴ ꦎꦲꦷꦪꦤꦁ ꦤꦴꦩ ꦢꦱ꧀ꦱꦤꦹꦥꦕꦴꦫꦱꦮꦤꦹꦥꦕꦴꦫꦴꦤꦩꦚ꧀ꦚꦠꦫꦱ꧀ꦱ ꦮꦶꦗꦲꦤꦁ, ꦠꦱ꧀ꦩꦴ. ꦄꦤ꧀ꦠꦺꦴꦒꦴꦩꦺ ꦥꦤ ꦎꦲꦷꦪꦤꦁ ꦮꦛ꧀ꦛꦠꦷꦠꦶ ꦄꦴꦲ ‘‘ꦆꦤ꧀ꦢꦑꦷꦭꦴꦠꦶꦏ꧀ꦏꦩꦠꦺꦴ ꦥꦛ꧀ꦜꦴꦪꦴ’’ꦠꦶ ꦄꦴꦢꦶ. ꦠꦠ꧀ꦡ ꦆꦤ꧀ꦢꦑꦷꦭꦴꦠꦶꦏ꧀ꦏꦩꦠꦺꦴꦠꦶ ꦈꦩ꧀ꦩꦴꦫꦴꦠꦶꦏ꧀ꦏꦩꦠꦺꦴ. ꦧꦲꦶꦒꦴꦩꦺꦠꦶ ꦒꦴꦩꦱ꧀ꦱ ꦧꦲꦶꦥꦢꦺꦱꦺ. ꦩꦒ꧀ꦒꦩꦹꦭ꦳꧀ꦲꦴ ꦈꦕ꧀ꦕꦴꦱꦢ꧀ꦢꦁ ꦏꦫꦺꦴꦤ꧀ꦠꦷꦠꦶ ꦄꦴꦲ ‘‘ꦩꦒ꧀ꦒꦩꦹꦭ꦳꧀ꦲꦱꦢ꧀ꦢꦺꦤ ꦮꦶꦪꦴ’’ꦠꦶ. ꦩꦒ꧀ꦒꦩꦹꦭ꦳꧀ꦲꦁ ꦄꦮ꧀ꦲꦴꦪꦤ꧀ꦠꦱ꧀ꦱ ꦱꦢ꧀ꦢꦺꦤ ꦮꦶꦪꦴꦠꦶꦥꦶ ꦮꦢꦤ꧀ꦠꦶ. ꦱꦢ꧀ꦢꦴꦪꦤ꧀ꦠꦶꦪꦴꦠꦶ ꦱꦢ꧀ꦢꦁ ꦏꦫꦺꦴꦤ꧀ꦠꦶꦪꦴ. ‘‘ꦱꦢ꧀ꦢꦱ꧀ꦱꦮꦤꦴꦠꦶꦏ꧀ꦏꦩꦺ ꦄꦴꦥꦠ꧀ꦠꦶꦪꦺꦮꦴ’’ꦠꦶ ꦆꦩꦶꦤꦴ ꦢꦱ꧀ꦱꦤꦹꦥꦕꦴꦫꦺꦴ ꦌꦮꦫꦹꦥꦺ ꦱꦮꦤꦹꦥꦕꦴꦫꦺ ꦮꦶꦗꦲꦶꦠꦺ ꦤ ꦫꦏ꧀ꦑꦠꦶ, ꦗꦲꦶꦠꦩꦠ꧀ꦠꦺꦮ ꦄꦴꦥꦠ꧀ꦠꦶ ꦱꦔ꧀ꦓꦴꦢꦶꦱꦺꦱꦱ꧀ꦱꦴꦠꦶ ꦢꦱ꧀ꦱꦺꦠꦶ.

ꦩꦒ꧀ꦒꦁ ꦒꦕ꧀ꦖꦤ꧀ꦠꦷꦠꦶ ꦌꦏꦩꦒ꧀ꦒꦁ ꦒꦕ꧀ꦖꦤ꧀ꦠꦶ. ꦱꦕꦺ ꦥꦸꦫꦶꦩꦴꦪꦺꦴ ꦄꦚ꧀ꦚꦺꦤ ꦩꦒ꧀ꦒꦺꦤ ꦒꦕ꧀ꦖꦤ꧀ꦠꦶ, ꦥꦏ꧀ꦏꦤ꧀ꦠꦴ ꦤꦴꦩ ꦲꦺꦴꦤ꧀ꦠꦶ, ꦄꦤꦴꦥꦠ꧀ꦠꦶꦪꦺꦮ. ꦢ꧀ꦮꦶꦤ꧀ꦤꦁ ꦒꦕ꧀ꦖꦤ꧀ꦠꦷꦤꦁ ꦌꦏꦴ ꦄꦤꦸꦧꦤ꧀ꦣꦶꦠꦸꦁ ꦄꦱꦏ꧀ꦏꦺꦴꦤ꧀ꦠꦷ ‘‘ꦒꦕ꧀ꦖꦠꦸ ꦄꦪ’’ꦤ꧀ꦠꦶ ꦎꦲꦷꦪꦠꦶ, ꦆꦠꦫꦴꦥꦶ ‘‘ꦎꦲꦷꦪꦠꦸ ꦄꦪ’’ꦤ꧀ꦠꦶ ꦒꦕ꧀ꦖꦠꦶ, ꦢ꧀ꦮꦶꦤ꧀ꦤꦩ꧀ꦥꦶ ꦄꦴꦥꦠ꧀ꦠꦶ. ꦱꦕꦺ ꦥꦤ ꦒꦕ꧀ꦖꦤ꧀ꦠꦷꦱꦸ ꦥꦸꦫꦶꦩꦴꦥꦶ ꦄꦚ꧀ꦚꦁ ꦩꦒ꧀ꦒꦁ ꦒꦟ꧀ꦲꦴꦠꦶ, ꦥꦕ꧀ꦖꦶꦩꦴꦥꦶ ꦄꦚ꧀ꦚꦁ, ꦌꦏꦴ ꦌꦏꦶꦱ꧀ꦱꦴ ꦥꦏ꧀ꦏꦤ꧀ꦠꦛ꧀ꦜꦴꦤꦺ ꦠꦶꦛ꧀ꦜꦠꦶ, ꦢ꧀ꦮꦶꦤ꧀ꦤꦩ꧀ꦥꦶ ꦄꦤꦴꦥꦠ꧀ꦠꦶ.

‘‘ꦱꦔ꧀ꦓꦴꦢꦶꦱꦺꦱꦴ ꦕꦠꦸꦫꦺꦴ’’ꦠꦶ (ꦥꦫꦶ. ꦄꦛ꧀ꦜ. ꧔꧗꧙) ꦄꦪꦁ ꦥꦚ꧀ꦲꦺꦴ ꦄꦫꦸꦟꦸꦒ꧀ꦒꦩꦤꦺ ꦒꦴꦩꦤ꧀ꦠꦫꦥꦫꦶꦪꦴꦥꦤ꧀ꦤꦁ ꦤꦢꦶꦥꦴꦫꦁ ꦎꦏ꧀ꦏꦤ꧀ꦠꦨꦶꦏ꧀ꦑꦸꦤꦶꦁ ꦱꦤ꧀ꦣꦴꦪ ꦮꦸꦠ꧀ꦠꦺꦴ. ꦱꦴ ꦲꦶ ꦱꦏꦒꦴꦩꦠꦺꦴ ꦥꦕ꧀ꦕꦹꦱꦱꦩꦪꦺ ꦤꦶꦏ꧀ꦑꦩꦶꦠ꧀ꦮꦴ ꦄꦫꦸꦟꦸꦒ꧀ꦒꦩꦤꦏꦴꦭꦺ ꦮꦸꦠ꧀ꦠꦥ꧀ꦥꦏꦴꦫꦁ ꦤꦢꦶꦥꦴꦫꦁ ꦎꦏ꧀ꦏꦤ꧀ꦠꦩꦠ꧀ꦠꦴꦮ ꦫꦠ꧀ꦠꦶꦮꦶꦥ꧀ꦥꦮꦴꦱꦒꦴꦩꦤ꧀ꦠꦫꦤꦢꦶꦥꦴꦫꦒꦩꦤꦒꦟꦩ꧀ꦲꦴꦎꦲꦷꦪꦤꦭꦏ꧀ꦑꦟꦺ ꦌꦏꦥ꧀ꦥꦲꦴꦫꦺꦤꦺꦮ ꦕꦠꦸꦫꦺꦴ ꦱꦔ꧀ꦓꦴꦢꦶꦱꦺꦱꦺ ꦄꦴꦥꦗ꧀ꦗꦠꦶ.

ꦥꦏ꧀ꦑꦱꦔ꧀ꦏꦤ꧀ꦠꦴꦪ ꦮꦴꦠꦶ ꦠꦶꦠ꧀ꦡꦴꦪꦠꦤꦁ ꦱꦔ꧀ꦏꦤ꧀ꦠꦴꦪ. ꦄꦤꦤ꧀ꦠꦫꦴꦪꦺꦤꦴꦠꦶ ꦲꦠ꧀ꦡꦶꦩꦺꦴꦕꦤꦴꦢꦶꦄꦤ꧀ꦠꦫꦴꦪꦁ ꦮꦶꦤꦴ.

ꦌꦏꦒꦴꦩꦤ꧀ꦠꦫꦒꦩꦤꦱꦶꦏ꧀ꦑꦴꦥꦢꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.