꧒. ꦒꦟꦨꦺꦴꦗꦤꦱꦶꦏ꧀ꦑꦴꦥꦢꦮꦟ꧀ꦟꦤꦴ

ꦢꦸꦠꦶꦪꦺ ꦒꦟꦨꦺꦴꦗꦤꦺꦠꦶ ꦒꦟꦱ꧀ꦱ ꦨꦺꦴꦗꦤꦺ. ꦆꦣ ꦕ ꦒꦟꦺꦴꦠꦶ ꦕꦠ꧀ꦠꦴꦫꦺꦴ ꦮꦴ ꦠꦠꦸꦠ꧀ꦠꦫꦶ ꦮꦴ ꦨꦶꦏ꧀ꦑꦹ, ꦠꦺꦱꦁ ꦤꦶꦩꦤ꧀ꦠꦤꦠꦺꦴ ꦮꦴ ꦮꦶꦚ꧀ꦚꦠ꧀ꦠꦶꦠꦺꦴ ꦮꦴ ꦭꦢ꧀ꦣꦺ ꦎꦢꦤꦴꦢꦷꦤꦁ ꦥꦚ꧀ꦕꦤ꧀ꦤꦁ ꦨꦺꦴꦗꦤꦴꦤꦁ ꦄꦚ꧀ꦚꦠꦫꦨꦺꦴꦗꦤꦺꦠꦶ ꦄꦠ꧀ꦡꦺꦴ. ꦠꦠ꧀ꦡꦴꦪꦁ ꦮꦶꦤꦶꦕ꧀ꦖꦪꦺꦴ – ꦱꦕꦺ ꦲꦶ ꦏꦺꦴꦕꦶ ꦕꦠ꧀ꦠꦴꦫꦺꦴ ꦨꦶꦏ꧀ꦑꦹ ꦈꦥꦱꦔ꧀ꦏꦩꦶꦠ꧀ꦮꦴ ꦪꦺꦤ ꦏꦺꦤꦕꦶ ꦮꦺꦮꦕꦤꦺꦤ ꦮꦴ ꦨꦴꦱꦤ꧀ꦠꦫꦺꦤ ꦮꦴ ꦥꦚ꧀ꦕꦤ꧀ꦤꦁ ꦨꦺꦴꦗꦤꦴꦤꦁ ꦤꦴꦩꦁ ꦒꦲꦺꦠ꧀ꦮꦴ ‘‘ꦎꦢꦤꦺꦤ ꦤꦶꦩꦤ꧀ꦠꦺꦩꦶ, ꦎꦢꦤꦁ ꦩꦺ ꦒꦟ꧀ꦲꦡꦴ’’ꦠꦶꦄꦴꦢꦶꦤꦴ ꦤꦪꦺꦤ ꦤꦶꦩꦤ꧀ꦠꦺꦠꦶ, ꦠꦺ ꦕꦺ ꦌꦮꦁ ꦌꦏꦠꦺꦴ ꦮꦴ ꦤꦴꦤꦴꦠꦺꦴ ꦮꦴ ꦤꦶꦩꦤ꧀ꦠꦶꦠꦴ ꦌꦏꦠꦺꦴ ꦮꦴ ꦤꦴꦤꦴꦠꦺꦴ ꦮꦴ ꦒꦤ꧀ꦠ꧀ꦮꦴ ꦌꦏꦠꦺꦴ ꦒꦟ꧀ꦲꦤ꧀ꦠꦶ, ꦥꦕ꧀ꦖꦴ ꦌꦏꦠꦺꦴ ꦮꦴ ꦤꦴꦤꦴꦠꦺꦴ ꦮꦴ ꦨꦸꦚ꧀ꦗꦤ꧀ꦠꦶ, ꦒꦟꦨꦺꦴꦗꦤꦁ ꦲꦺꦴꦠꦶ. ꦥꦛꦶꦒ꧀ꦒꦲꦟꦩꦺꦮ ꦲꦺꦠ꧀ꦡ ꦥꦩꦴꦟꦁ. ꦱꦕꦺ ꦎꦢꦤꦴꦢꦷꦤꦁ ꦤꦴꦩꦁ ꦒꦲꦺꦠ꧀ꦮꦴ ꦌꦏꦠꦺꦴ ꦮꦴ ꦤꦴꦤꦴꦠꦺꦴ ꦮꦴ ꦮꦶꦚ꧀ꦚꦴꦥꦺꦠ꧀ꦮꦴ ꦕ ꦒꦤ꧀ꦠ꧀ꦮꦴ ꦕ ꦌꦏꦠꦺꦴ ꦒꦟ꧀ꦲꦤ꧀ꦠꦶ, ꦌꦮꦩ꧀ꦥꦶ ꦒꦟꦨꦺꦴꦗꦤꦩꦺꦮ. ꦠꦱ꧀ꦱ ꦢꦸꦮꦶꦣꦱ꧀ꦱꦴꦥꦶ ꦌꦮꦁ ꦥꦛꦶꦒ꧀ꦒꦲꦟꦺ ꦢꦸꦏ꧀ꦏꦛꦁ, ꦄꦗ꧀ꦙꦺꦴꦲꦴꦫꦺ ꦄꦗ꧀ꦙꦺꦴꦲꦴꦫꦺ ꦥꦴꦕꦶꦠ꧀ꦠꦶꦪꦁ. ꦒꦶꦭꦴꦤꦱꦩꦪꦴꦢꦷꦱꦸ ꦪꦢꦴ ꦥꦴꦢꦴꦤꦩ꧀ꦥꦶ ꦦꦭꦶꦠꦠ꧀ꦠꦴ ꦤ ꦱꦏ꧀ꦏꦴ ꦥꦶꦟ꧀ꦝꦴꦪ ꦕꦫꦶꦠꦸꦁ, ꦄꦪꦁ ꦒꦶꦭꦴꦤꦱꦩꦪꦺꦴ. ꦄꦠ꧀ꦡꦠꦏꦡꦶꦤꦴꦤꦁ ꦥꦚ꧀ꦕ ꦩꦴꦱꦴ, ꦆꦠꦫꦺꦱꦁ ꦏꦠ꧀ꦠꦶꦏꦩꦴꦱꦺꦴꦠꦶ ꦄꦪꦁ ꦕꦷꦮꦫꦢꦴꦤꦱꦩꦪꦺꦴ. ꦪꦢꦴ ꦪꦺꦴ ꦕꦷꦮꦫꦺ ꦏꦫꦶꦪꦩꦴꦤꦺ ꦏꦶꦚ꧀ꦕꦶꦢꦺꦮ ꦕꦷꦮꦫꦺ ꦏꦠ꧀ꦠꦧ꧀ꦧꦁ ꦏꦩ꧀ꦩꦁ ꦏꦫꦺꦴꦠꦶ, ꦄꦪꦁ ꦕꦷꦮꦫꦏꦴꦫꦱꦩꦪꦺꦴ. ꦪꦢꦴ ꦄꦢ꧀ꦣꦪꦺꦴꦗꦤꦩ꧀ꦥꦶ ꦒꦤ꧀ꦠꦸꦏꦴꦩꦺꦴ ꦮꦴ ꦲꦺꦴꦠꦶ ꦒꦕ꧀ꦖꦠꦶ ꦮꦴ ꦒꦠꦺꦴ ꦮꦴ, ꦄꦪꦁ ꦄꦢ꧀ꦣꦴꦤꦒꦩꦤꦱꦩꦪꦺꦴ. ꦤꦴꦮꦴꦨꦶꦫꦸꦲꦤꦱꦩꦪꦺꦥꦶ ꦌꦱꦺꦮ ꦤꦪꦺꦴ. ꦪꦢꦴ ꦒꦺꦴꦕꦫꦒꦴꦩꦺ ꦕꦠ꧀ꦠꦴꦫꦺꦴ ꦨꦶꦏ꧀ꦑꦹ ꦥꦶꦟ꧀ꦝꦴꦪ ꦕꦫꦶꦠ꧀ꦮꦴ ꦤ ꦪꦴꦥꦺꦤ꧀ꦠꦶ, ꦄꦪꦁ ꦩꦲꦴꦱꦩꦪꦺꦴ. ꦪꦢꦴ ꦪꦺꦴꦏꦺꦴꦕꦶ ꦥꦧ꧀ꦧꦗꦶꦠꦺꦴ ꦨꦠ꧀ꦠꦺꦤ ꦤꦶꦩꦤ꧀ꦠꦺꦠꦶ, ꦄꦪꦁ ꦱꦩꦟꦨꦠ꧀ꦠꦱꦩꦪꦺꦴ, ꦌꦠꦺꦱꦸ ꦱꦩꦪꦺꦱꦸ ꦨꦸꦚ꧀ꦗꦶꦠꦸꦁ ꦮꦛ꧀ꦛꦠꦶ.

ꦫꦴꦗꦒꦲꦺ ꦢꦺꦮꦢꦠ꧀ꦠꦁ ꦄꦴꦫꦧ꧀ꦨ ꦮꦶꦚ꧀ꦚꦴꦥꦺꦠ꧀ꦮꦴ ꦨꦸꦚ꧀ꦗꦤꦮꦠ꧀ꦡꦸꦱ꧀ꦩꦶꦁ ꦥꦚ꧀ꦚꦠ꧀ꦠꦁ, ‘‘ꦄꦚ꧀ꦚꦠ꧀ꦫ ꦱꦩꦪꦴ’’ꦠꦶ ꦄꦪꦩꦺꦠ꧀ꦡ ꦱꦠ꧀ꦠꦮꦶꦣꦴ ꦄꦤꦸꦥꦚ꧀ꦚꦠ꧀ꦠꦶ, ꦱꦴꦣꦴꦫꦟꦥꦚ꧀ꦚꦠ꧀ꦠꦶ, ꦄꦤꦴꦟꦠ꧀ꦠꦶꦏꦁ, ꦠꦶꦏꦥꦴꦕꦶꦠ꧀ꦠꦶꦪꦁ, ꦤꦒꦟꦨꦺꦴꦗꦤꦺ ꦒꦟꦨꦺꦴꦗꦤꦱꦚ꧀ꦚꦶꦱ꧀ꦱ ꦮꦺꦩꦠꦶꦏꦱ꧀ꦱ ꦮꦴ ꦢꦸꦏ꧀ꦏꦛꦁ. ꦤꦒꦟꦨꦺꦴꦗꦤꦱꦚ꧀ꦚꦶꦱ꧀ꦱ ꦥꦤ, ꦪꦺ ꦕ ꦢ꧀ꦮꦺ ꦠꦪꦺꦴ ꦌꦏꦠꦺꦴ ꦒꦟ꧀ꦲꦤ꧀ꦠꦶ, ꦧꦲꦹꦤꦁ ꦥꦶꦟ꧀ꦝꦴꦪ ꦕꦫꦶꦠ꧀ꦮꦴ ꦌꦏꦠꦺꦴ ꦨꦸꦚ꧀ꦗꦤ꧀ꦠꦴꦤꦁ, ꦤꦶꦕ꧀ꦕꦨꦠ꧀ꦠꦶꦏꦴꦢꦷꦱꦸ, ꦥꦚ꧀ꦕ ꦨꦺꦴꦗꦤꦴꦤꦶ ꦜꦥꦺꦠ꧀ꦮꦴ ꦱꦧ꧀ꦧꦠ꧀ꦡ, ꦈꦩ꧀ꦩꦠ꧀ꦠꦏꦴꦢꦷꦤꦚ꧀ꦕ ꦄꦤꦴꦥꦠ꧀ꦠꦶ. ꦒꦟꦨꦺꦴꦗꦤꦠꦴ, ꦱꦩꦪꦴꦨꦴꦮꦺꦴ, ꦄꦗ꧀ꦙꦺꦴꦲꦫꦟꦤ꧀ꦠꦶ ꦆꦩꦴꦤꦺꦠ꧀ꦡ ꦠꦷꦟꦶ ꦄꦔ꧀ꦒꦴꦤꦶ. ꦱꦩꦸꦛ꧀ꦜꦴꦤꦴꦢꦷꦤꦶ ꦌꦭ꦳ꦏꦭꦺꦴꦩꦱꦢꦶꦱꦴꦤꦺꦮꦴꦠꦶ.

ꦒꦟꦨꦺꦴꦗꦤꦱꦶꦏ꧀ꦑꦴꦥꦢꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.