꧙. ꦄꦚ꧀ꦚꦨꦴꦒꦶꦪꦱꦶꦏ꧀ꦑꦴꦥꦢꦮꦟ꧀ꦟꦤꦴ

ꦤꦮꦩꦺ ꦄꦚ꧀ꦚꦨꦴꦒꦶꦪꦱ꧀ꦱꦴꦠꦶꦄꦴꦢꦷꦱꦸ ꦄꦚ꧀ꦚꦨꦴꦒꦱ꧀ꦱ ꦆꦢꦁ, ꦄꦚ꧀ꦚꦨꦴꦒꦺꦴ ꦮꦴ ꦄꦱ꧀ꦱ ꦄꦠ꧀ꦡꦷꦠꦶ ꦄꦚ꧀ꦚꦨꦴꦒꦶꦪꦁ. ꦄꦣꦶꦏꦫꦟꦤ꧀ꦠꦶ ꦄꦴꦣꦴꦫꦺꦴ ꦮꦺꦢꦶꦠꦧ꧀ꦧꦺꦴ, ꦮꦠ꧀ꦡꦸ ꦄꦣꦶꦛ꧀ꦜꦴꦤꦤ꧀ꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦪꦺꦴ ꦲꦶ ꦱꦺꦴ ꦄꦛ꧀ꦜꦸꦥ꧀ꦥꦠ꧀ꦠꦶꦪꦁ ‘‘ꦢꦧ꧀ꦧꦺꦴ ꦩꦭ꧀ꦭꦥꦸꦠ꧀ꦠꦺꦴ ꦤꦴꦩꦴ’’ꦠꦶ ꦖꦒꦭꦏꦺꦴ ꦮꦸꦠ꧀ꦠꦺꦴ. ꦱꦺꦴ ꦪ꧀ꦮꦴꦪꦁ ꦄꦴꦪꦱ꧀ꦩꦠꦺꦴ ꦢꦧ꧀ꦧꦱ꧀ꦱ ꦩꦭ꧀ꦭꦥꦸꦠ꧀ꦠꦱ꧀ꦱ ꦨꦴꦒꦺꦴ ꦏꦺꦴꦛ꧀ꦜꦴꦱꦺꦴ ꦥꦏ꧀ꦑꦺꦴ ꦩꦤꦸꦱ꧀ꦱꦗꦴꦠꦶ ꦕꦺꦮ ꦨꦶꦏ꧀ꦑꦸꦨꦴꦮꦺꦴ ꦕ, ꦠꦠꦺꦴ ꦄꦚ꧀ꦚꦱ꧀ꦱ ꦨꦴꦒꦱ꧀ꦱ ꦏꦺꦴꦛ꧀ꦜꦴꦱꦱ꧀ꦱ ꦥꦏ꧀ꦑꦱ꧀ꦱ ꦲꦺꦴꦠꦶ ꦠꦶꦫꦕ꧀ꦖꦴꦤꦗꦴꦠꦶꦪꦴ ꦕꦺꦮ ꦖꦒꦭꦏꦨꦴꦮꦱ꧀ꦱ ꦕ, ꦱꦺꦴ ꦮꦴ ꦄꦚ꧀ꦚꦨꦴꦒꦺꦴ ꦄꦱ꧀ꦱ ꦄꦠ꧀ꦡꦶ, ꦠꦱ꧀ꦩꦴ ꦄꦚ꧀ꦚꦨꦴꦒꦶꦪꦱꦔ꧀ꦑ꧀ꦪꦁ ꦭꦨꦠꦶ. ꦪꦱ꧀ꦩꦴ ꦕ ꦠꦺꦱꦁ ‘‘ꦆꦩꦁ ꦩꦪꦁ ꦢꦧ꧀ꦧꦁ ꦩꦭ꧀ꦭꦥꦸꦠ꧀ꦠꦁ ꦤꦴꦩ ꦏꦫꦺꦴꦩꦴ’’ꦠꦶ ꦮꦢꦤ꧀ꦠꦴꦤꦁ ꦠꦱ꧀ꦱ ꦤꦴꦩꦏꦫꦟꦱꦚ꧀ꦚꦴꦪ ꦄꦴꦣꦴꦫꦺꦴ ꦮꦠ꧀ꦡꦸ ꦄꦣꦶꦛ꧀ꦜꦴꦤꦁ, ꦠꦱ꧀ꦩꦴ ‘‘ꦄꦣꦶꦏꦫꦟ’’ꦤ꧀ꦠꦶ ꦮꦺꦢꦶꦠꦧ꧀ꦧꦺꦴ. ꦠꦚ꧀ꦲꦶ ꦱꦤ꧀ꦣꦴꦪ ‘‘ꦱꦕ꧀ꦕꦁ ꦏꦶꦫ ꦠꦸꦩ꧀ꦲꦺ, ꦨꦶꦏ꧀ꦑꦮꦺ, ꦢꦧ꧀ꦧꦁ ꦩꦭ꧀ꦭꦥꦸꦠ꧀ꦠꦁ ꦄꦚ꧀ꦚꦨꦴꦒꦶꦪꦱ꧀ꦱ ꦄꦣꦶꦏꦫꦟꦱ꧀ꦱꦴ’’ꦠꦶꦄꦴꦢꦶ (ꦥꦴꦫꦴ. ꧓꧙꧑) ꦮꦸꦠ꧀ꦠꦁ. ꦤ ꦮꦶꦮꦴꦢꦴꦣꦶꦏꦫꦟꦴꦢꦷꦱꦸ ꦄꦚ꧀ꦚꦠꦫꦁ, ꦏꦱ꧀ꦩꦴ? ꦄꦱꦩ꧀ꦨꦮꦠꦺꦴ. ꦤ ꦲꦶ ꦩꦺꦠ꧀ꦠꦶꦪꦨꦹꦩꦗꦏꦴ ꦕꦠꦸꦤ꧀ꦤꦁ ꦄꦣꦶꦏꦫꦟꦴꦤꦁ ꦏꦱ꧀ꦱꦕꦶ ꦄꦚ꧀ꦚꦨꦴꦒꦶꦪꦱ꧀ꦱ ꦄꦣꦶꦏꦫꦟꦱ꧀ꦱ ꦏꦶꦚ꧀ꦕꦶꦢꦺꦱꦁ ꦭꦺꦱꦩꦠ꧀ꦠꦁ ꦈꦥ꧀ꦥꦴꦢꦶꦪꦶꦁꦱꦸ, ꦤ ꦕ ꦕꦠꦸꦤ꧀ꦤꦁ ꦄꦣꦶꦏꦫꦟꦴꦤꦁ ꦭꦺꦱꦺꦴ ꦤꦴꦩ ꦄꦠ꧀ꦡꦶ. ꦗꦴꦠꦶꦭꦺꦱꦴꦢꦪꦺꦴ ꦲꦶ ꦥꦸꦒ꧀ꦒꦭꦴꦤꦁꦪꦺꦮ ꦭꦺꦱꦴ ꦮꦸꦠ꧀ꦠꦴ, ꦤ ꦮꦶꦮꦴꦢꦴꦣꦶꦏꦫꦟꦴꦢꦷꦤꦁ. ꦠꦚ꧀ꦕ ‘‘ꦢꦧ꧀ꦧꦺꦴ ꦩꦭ꧀ꦭꦥꦸꦠ꧀ꦠꦺꦴ’’ꦠꦶ ꦤꦴꦩꦁ ꦠꦱ꧀ꦱ ꦄꦚ꧀ꦚꦨꦴꦒꦶꦪꦴꦣꦶꦏꦫꦟꦨꦴꦮꦺ ꦜꦶꦠꦱ꧀ꦱ ꦖꦒꦭꦏꦱ꧀ꦱ ꦏꦺꦴꦕꦶ ꦢꦺꦱꦺꦴ ꦲꦺꦴꦠꦶ ꦡꦺꦫꦁ ꦥꦴꦫꦴꦗꦶꦏꦺꦤ ꦣꦩ꧀ꦩꦺꦤ ꦄꦤꦸꦢ꧀ꦣꦁꦱꦺꦠꦸꦁ ꦭꦺꦱꦩꦠ꧀ꦠꦺꦴ, ꦌꦠ꧀ꦡ ꦕ ꦢꦶꦱ꧀ꦱꦠꦶ ꦄꦥꦢꦶꦱ꧀ꦱꦠꦶ ‘‘ꦄꦱ꧀ꦱ ꦄꦪ’’ꦤ꧀ꦠꦶ ꦮꦺꦴꦲꦫꦷꦪꦠꦷꦠꦶ ꦢꦺꦱꦺꦴ, ꦗꦴꦠꦶꦄꦴꦢꦷꦱꦸ ꦄꦚ꧀ꦚꦠꦫꦏꦺꦴꦛ꧀ꦜꦴꦱꦱ꧀ꦱꦺꦠꦁ ꦄꦣꦶꦮꦕꦤꦁ. ꦄꦚ꧀ꦚꦩ꧀ꦥꦶ ꦮꦠ꧀ꦡꦸꦁ ꦭꦶꦱ꧀ꦱꦠꦶ ꦱꦶꦭꦶꦱ꧀ꦱꦠꦶ ꦮꦺꦴꦲꦴꦫꦩꦠ꧀ꦠꦺꦤꦺꦮ ꦇꦱꦏꦁ ꦄꦭ꧀ꦭꦷꦪꦠꦷꦠꦶ ꦭꦺꦱꦺꦴ, ꦗꦴꦠꦶꦄꦴꦢꦷꦤꦁꦪꦺꦮ ꦄꦚ꧀ꦚꦠꦫꦏꦺꦴꦛ꧀ꦜꦴꦱꦱ꧀ꦱꦺꦠꦁ ꦄꦣꦶꦮꦕꦤꦁ. ꦥꦢꦨꦴꦗꦤꦺ (ꦥꦴꦫꦴ. ꧓꧙꧓) ꦥꦤ ꦪꦱ꧀ꦱ ꦄꦚ꧀ꦚꦨꦴꦒꦶꦪꦱ꧀ꦱ ꦄꦣꦶꦏꦫꦟꦱ꧀ꦱ ꦏꦶꦚ꧀ꦕꦶꦢꦺꦱꦁ ꦭꦺꦱꦩꦠ꧀ꦠꦁ ꦈꦥꦴꦢꦴꦪ ꦥꦴꦫꦴꦗꦶꦏꦺꦤ ꦣꦩ꧀ꦩꦺꦤ ꦄꦤꦸꦢ꧀ꦣꦁꦱꦺꦪ꧀ꦪ, ꦠꦁ ꦪꦱ꧀ꦩꦴ ꦄꦛ꧀ꦜꦸꦥ꧀ꦥꦠ꧀ꦠꦶꦮꦱꦺꦤꦺꦮ ꦄꦴꦮꦶꦨꦹꦠꦁ, ꦠꦱ꧀ꦩꦴ ꦠꦁ ꦄꦮꦶꦨꦗꦶꦠ꧀ꦮꦴ ꦪꦴꦤꦶ ‘‘ꦄꦣꦶꦏꦫꦟ’’ꦤ꧀ꦠꦶ ꦮꦕꦤꦱꦴꦩꦚ꧀ꦚꦠꦺꦴ ꦄꦠ꧀ꦡꦸꦢ꧀ꦣꦴꦫꦮꦱꦺꦤ ꦥꦮꦠ꧀ꦠꦴꦤꦶ ꦕꦠ꧀ꦠꦴꦫꦶ ꦄꦣꦶꦏꦫꦟꦴꦤꦶ, ꦠꦺꦱꦁ ꦄꦚ꧀ꦚꦨꦴꦒꦶꦪꦠꦴ ꦕ ꦠꦧ꧀ꦨꦴꦒꦶꦪꦠꦴ ꦕ ꦪꦱ꧀ꦩꦴ ꦄꦥꦴꦏꦛꦴ, ꦗꦴꦤꦶꦠꦧ꧀ꦧꦴ ꦕ ꦮꦶꦤꦪꦣꦫꦺꦲꦶ, ꦠꦱ꧀ꦩꦴ ꦠꦚ꧀ꦕ ꦄꦮꦱꦴꦤꦺ ꦄꦴꦥꦠ꧀ꦠꦚ꧀ꦚꦨꦴꦒꦶꦪꦺꦤ ꦕꦺꦴꦢꦤꦚ꧀ꦕ ꦄꦴꦮꦶꦏꦴꦠꦸꦁ ‘‘ꦄꦚ꧀ꦚꦨꦴꦒꦶꦪꦱ꧀ꦱ ꦄꦣꦶꦏꦫꦟꦱ꧀ꦱꦴꦠꦶ ꦄꦴꦥꦠ꧀ꦠꦚ꧀ꦚꦨꦴꦒꦶꦪꦁ ꦮꦴ ꦲꦺꦴꦠꦶ ꦄꦣꦶꦏꦫꦟꦚ꧀ꦚꦨꦴꦒꦶꦪꦁ ꦮꦴ’’ꦠꦶꦄꦴꦢꦶ ꦮꦸꦠ꧀ꦠꦁ, ꦱꦺꦱꦴ ꦮꦶꦤꦶꦕ꧀ꦖꦪꦏꦡꦴ ꦄꦛ꧀ꦜꦩꦺ ꦮꦸꦠ꧀ꦠꦱꦢꦶꦱꦴꦪꦺꦮ. ꦄꦪꦁ ꦥꦤ ꦮꦶꦱꦺꦱꦺꦴ – ꦆꦢꦁ ꦄꦚ꧀ꦚꦨꦴꦒꦶꦪꦱ꧀ꦱ ꦄꦣꦶꦏꦫꦟꦱ꧀ꦱ ꦏꦶꦚ꧀ꦕꦶꦢꦺꦱꦁ ꦭꦺꦱꦩꦠ꧀ꦠꦁ ꦈꦥꦴꦢꦴꦪ ꦥꦴꦫꦴꦗꦶꦏꦺꦤ ꦣꦩ꧀ꦩꦺꦤ ꦄꦤꦸꦢ꧀ꦣꦁꦱꦤꦮꦠ꧀ꦡꦸꦱ꧀ꦩꦶꦁ ꦥꦚ꧀ꦚꦠ꧀ꦠꦁ, ꦆꦣ ꦕ ꦄꦴꦥꦠ꧀ꦠꦚ꧀ꦚꦨꦴꦒꦶꦪꦕꦺꦴꦢꦤꦴꦪ ꦠꦡꦴꦱꦚ꧀ꦚꦶꦤꦺꦴꦥꦶ ꦄꦤꦴꦥꦠ꧀ꦠꦶ. ꦄꦔ꧀ꦒꦺꦱꦸ ꦕ ꦄꦚ꧀ꦚꦨꦴꦒꦶꦪꦱ꧀ꦱ ꦄꦣꦶꦏꦫꦟꦱ꧀ꦱ ꦏꦶꦚ꧀ꦕꦶꦢꦺꦱꦁ ꦭꦺꦱꦩꦠ꧀ꦠꦁ ꦈꦥꦴꦢꦶꦪꦤꦠꦴ ꦄꦣꦶꦏꦴꦠꦶ.

ꦄꦚ꧀ꦚꦨꦴꦒꦶꦪꦱꦶꦏ꧀ꦑꦴꦥꦢꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.