꧓. ꦠꦠꦶꦪꦥꦴꦫꦴꦗꦶꦏꦮꦟ꧀ꦟꦤꦴ

ꦠꦠꦶꦪꦺ ꦱꦚ꧀ꦕꦶꦕ꧀ꦕꦴꦠꦶ ꦱꦁꦕꦺꦠꦺꦠ꧀ꦮꦴ ꦱꦢ꧀ꦣꦶꦁ ꦕꦺꦠꦺꦠ꧀ꦮꦴ. ‘‘ꦥꦴꦟꦺꦴ’’ꦠꦶꦱꦚ꧀ꦚꦴꦪ ꦱꦢ꧀ꦣꦶꦁꦪꦺꦮ ‘‘ꦮꦣꦴꦩꦶ ꦤ’’ꦤ꧀ꦠꦶ ꦮꦣꦏꦕꦺꦠꦤꦴꦪ ꦕꦺꦠꦺꦠ꧀ꦮꦴ ꦥꦏꦥ꧀ꦥꦺꦠ꧀ꦮꦴ. ꦩꦤꦸꦱ꧀ꦱꦮꦶꦒ꧀ꦒꦲꦤ꧀ꦠꦶ ꦏꦭꦭꦠꦺꦴ ꦥꦛ꧀ꦜꦴꦪ ꦗꦷꦮꦩꦴꦤꦏꦩꦤꦸꦱ꧀ꦱꦗꦴꦠꦶꦏꦱꦫꦷꦫꦁ. ꦗꦷꦮꦶꦠꦴ ꦮꦺꦴꦫꦺꦴꦥꦺꦪ꧀ꦪꦴꦠꦶ ꦏꦭꦭꦏꦴꦭꦺꦥꦶ ꦠꦴꦥꦤꦩꦢ꧀ꦢꦤꦺꦲꦶ ꦮꦴ ꦨꦺꦱꦗ꧀ꦗꦱꦩ꧀ꦥꦢꦴꦤꦺꦤ ꦮꦴ ꦠꦠꦺꦴ ꦮꦴ ꦈꦢ꧀ꦣꦩ꧀ꦥꦶ ꦠꦢꦤꦸꦫꦹꦥꦺꦤ ꦈꦥꦏ꧀ꦏꦩꦺꦤ ꦗꦷꦮꦶꦠꦴ ꦮꦶꦪꦺꦴꦗꦺꦪ꧀ꦪ. ꦆꦩꦱ꧀ꦱ ꦥꦤꦠ꧀ꦡꦱ꧀ꦱ ꦄꦴꦮꦶꦨꦴꦮꦠ꧀ꦡꦁ ꦥꦴꦟꦺꦴ ꦮꦺꦢꦶꦠꦧ꧀ꦧꦺꦴ, ꦥꦴꦟꦴꦠꦶꦥꦴꦠꦺꦴ ꦮꦺꦢꦶꦠꦧ꧀ꦧꦺꦴ, ꦥꦴꦟꦴꦠꦶꦥꦴꦠꦷ ꦮꦺꦢꦶꦠꦧ꧀ꦧꦺꦴ, ꦥꦴꦟꦴꦠꦶꦥꦴꦠꦱ꧀ꦱ ꦥꦪꦺꦴꦒꦺꦴ ꦮꦺꦢꦶꦠꦧ꧀ꦧꦺꦴ. ꦠꦠ꧀ꦡ ꦥꦴꦟꦺꦴꦠꦶ ꦮꦺꦴꦲꦴꦫꦠꦺꦴ ꦱꦠ꧀ꦠꦺꦴ, ꦥꦫꦩꦠ꧀ꦡꦠꦺꦴ ꦗꦷꦮꦶꦠꦶꦤ꧀ꦢ꧀ꦫꦶꦪꦁ. ꦥꦴꦟꦴꦠꦶꦥꦴꦠꦺꦴꦠꦶ ꦪꦴꦪ ꦕꦺꦠꦤꦴꦪ ꦗꦷꦮꦶꦠꦶꦤ꧀ꦢ꧀ꦫꦶꦪꦸꦥꦕ꧀ꦖꦺꦢꦏꦥꦪꦺꦴꦒꦁ ꦱꦩꦸꦛ꧀ꦜꦴꦥꦺꦠꦶ, ꦱꦴ ꦕꦺꦠꦤꦴ. ꦥꦴꦟꦴꦠꦶꦥꦴꦠꦷꦠꦶ ꦮꦸꦠ꧀ꦠꦕꦺꦠꦤꦴꦪ ꦱꦩꦔ꧀ꦒꦶꦥꦸꦒ꧀ꦒꦭꦺꦴ. ꦥꦴꦟꦴꦠꦶꦥꦴꦠꦱ꧀ꦱ ꦥꦪꦺꦴꦒꦺꦴꦠꦶ ꦥꦴꦟꦴꦠꦶꦥꦴꦠꦱ꧀ꦱ ꦖ ꦥꦪꦺꦴꦒꦴ ꦱꦴꦲꦠ꧀ꦡꦶꦏꦺꦴ ꦤꦶꦱ꧀ꦱꦒ꧀ꦒꦶꦪꦺꦴ ꦄꦴꦟꦠ꧀ꦠꦶꦏꦺꦴ ꦡꦴꦮꦫꦺꦴ ꦮꦶꦗ꧀ꦗꦴꦩꦪꦺꦴ ꦆꦢ꧀ꦣꦶꦩꦪꦺꦴꦠꦶ. ꦠꦠ꧀ꦡ ꦱꦴꦲꦠ꧀ꦡꦶꦏꦺꦴꦠꦶ ꦱꦪꦁ ꦩꦴꦫꦺꦤ꧀ꦠꦱ꧀ꦱ ꦏꦴꦪꦺꦤ ꦮꦴ ꦏꦴꦪꦥ꧀ꦥꦛꦶꦧꦢ꧀ꦣꦺꦤ ꦮꦴ ꦥꦲꦫꦟꦁ. ꦤꦶꦱ꧀ꦱꦒ꧀ꦒꦶꦪꦺꦴꦠꦶ ꦢꦹꦫꦺ ꦜꦶꦠꦁ ꦩꦴꦫꦺꦠꦸꦏꦴꦩꦱ꧀ꦱ ꦏꦴꦪꦺꦤ ꦮꦴ ꦏꦴꦪꦥ꧀ꦥꦛꦶꦧꦢ꧀ꦣꦺꦤ ꦮꦴ ꦈꦱꦸꦱꦠ꧀ꦠꦶꦪꦤ꧀ꦠꦥꦴꦱꦴꦟꦴꦢꦷꦤꦁ ꦤꦶꦱ꧀ꦱꦗ꧀ꦗꦤꦁ. ꦠꦠ꧀ꦡ ꦌꦏꦺꦏꦺꦴ ꦈꦢ꧀ꦢꦶꦱ꧀ꦱꦴꦤꦸꦢ꧀ꦢꦶꦱ꧀ꦱꦨꦺꦢꦠꦺꦴ ꦢꦸꦮꦶꦣꦺꦴ. ꦠꦠ꧀ꦡ ꦈꦢ꧀ꦢꦶꦱ꧀ꦱꦏꦺ ꦪꦁ ꦈꦢ꧀ꦢꦶꦱ꧀ꦱ ꦥꦲꦫꦠꦶ, ꦠꦱ꧀ꦱꦺꦮ ꦩꦫꦟꦺꦤ ꦏꦩ꧀ꦩꦧꦢ꧀ꦣꦺꦴ. ‘‘ꦪꦺꦴ ꦏꦺꦴꦕꦶ ꦩꦫꦠꦹ’’ꦠꦶ ꦌꦮꦁ ꦄꦤꦸꦢ꧀ꦢꦶꦱ꧀ꦱꦏꦺ ꦥꦲꦴꦫꦥ꧀ꦥꦕ꧀ꦕꦪꦴ ꦪꦱ꧀ꦱ ꦏꦱ꧀ꦱꦕꦶ ꦩꦫꦟꦺꦤ ꦏꦩ꧀ꦩꦧꦢ꧀ꦣꦺꦴ. ꦈꦨꦪꦠ꧀ꦡꦴꦥꦶ ꦕ ꦥꦲꦫꦶꦠꦩꦠ꧀ꦠꦺ ꦮꦴ ꦩꦫꦠꦸ, ꦥꦕ꧀ꦖꦴ ꦮꦴ ꦠꦺꦤꦺꦮ ꦫꦺꦴꦒꦺꦤ, ꦥꦲꦫꦶꦠꦏ꧀ꦑꦟꦺꦪꦺꦮ ꦏꦩ꧀ꦩꦧꦢ꧀ꦣꦺꦴ. ꦄꦴꦟꦠ꧀ꦠꦶꦏꦺꦴꦠꦶ ‘‘ꦄꦱꦸꦏꦁ ꦤꦴꦩ ꦩꦴꦫꦺꦲꦷ’’ꦠꦶ ꦄꦚ꧀ꦚꦁ ꦄꦴꦟꦴꦥꦺꦤ꧀ꦠꦱ꧀ꦱ ꦄꦴꦟꦴꦥꦤꦁ.

ꦠꦠ꧀ꦡ –

ꦮꦠ꧀ꦡꦸ ꦏꦴꦭꦺꦴ ꦕ ꦎꦏꦴꦱꦺꦴ, ꦄꦴꦮꦸꦣꦁ ꦆꦫꦶꦪꦴꦥꦡꦺꦴ;

ꦏ꧀ꦫꦶꦪꦴꦮꦶꦱꦺꦱꦺꦴꦠꦶ ꦆꦩꦺ, ꦖ ꦄꦴꦟꦠ꧀ꦠꦶ ꦤꦶꦪꦴꦩꦏꦴ.

ꦠꦠ꧀ꦡ ꦮꦠ꧀ꦡꦹꦠꦶ ꦥꦸꦒ꧀ꦒꦭꦺꦴ. ꦪꦚ꧀ꦲꦶ ꦥꦸꦒ꧀ꦒꦭꦁ ‘‘ꦩꦴꦫꦺꦲꦷ’’ꦠꦶ ꦄꦴꦟꦠ꧀ꦠꦺꦴ ꦱꦕꦺ ꦠꦩꦺꦮ ꦩꦴꦫꦺꦠꦶ, ꦄꦴꦟꦴꦥꦏꦱ꧀ꦱ ꦄꦴꦥꦠ꧀ꦠꦶ. ꦄꦡ ꦄꦚ꧀ꦚꦁ ꦩꦴꦫꦺꦠꦶ, ꦠꦁꦩꦚ꧀ꦚꦩꦴꦤꦺꦴ ꦮꦴ ꦄꦚ꧀ꦚꦁ ꦩꦴꦫꦺꦠꦶ, ꦄꦴꦟꦴꦥꦏꦺꦴ ꦩꦸꦕ꧀ꦕꦠꦶ. ‘‘ꦆꦩꦁ ꦩꦴꦫꦺꦲꦷ’’ꦠꦶ ꦄꦴꦟꦠ꧀ꦠꦺ ꦥꦤ ꦄꦴꦟꦴꦥꦏꦱ꧀ꦱ ꦢꦸꦏ꧀ꦏꦛꦁ. ꦏꦴꦭꦺꦴꦠꦶ ꦥꦸꦫꦺꦨꦠ꧀ꦠꦴꦢꦶꦏꦴꦭꦺꦴ. ꦱꦕꦺ ꦲꦶ ‘‘ꦥꦸꦫꦺꦨꦠ꧀ꦠꦁ ꦩꦴꦫꦺꦲꦷ’’ꦠꦶ ꦄꦴꦟꦠ꧀ꦠꦺꦴ ꦥꦸꦫꦺꦨꦠ꧀ꦠꦩꦺꦮ ꦩꦴꦫꦺꦠꦶ, ꦄꦴꦟꦴꦥꦏꦱ꧀ꦱ ꦄꦴꦥꦠ꧀ꦠꦶ. ꦄꦡ ꦪꦁ ꦥꦸꦫꦺꦨꦠ꧀ꦠꦁ ꦤꦶꦪꦴꦩꦶꦠꦁ, ꦠꦠꦺꦴ ꦥꦕ꧀ꦖꦴ ꦮꦴ ꦥꦸꦫꦺ ꦮꦴ ꦩꦴꦫꦺꦠꦶ, ꦄꦴꦟꦴꦥꦏꦺꦴ ꦩꦸꦕ꧀ꦕꦠꦶ. ꦆꦩꦶꦤꦴ ꦤꦪꦺꦤ ꦱꦧ꧀ꦧꦠ꧀ꦡ ꦮꦶꦤꦶꦕ꧀ꦖꦪꦺꦴ ꦮꦺꦢꦶꦠꦧ꧀ꦧꦺꦴ. ꦡꦴꦮꦫꦺꦴꦠꦶ ꦄꦱꦁꦲꦴꦫꦶꦩꦺꦤ ꦈꦥꦏꦫꦟꦺꦤ ꦩꦴꦫꦺꦠꦸꦏꦴꦩꦱ꧀ꦱ ꦎꦥꦴꦠꦏ꧀ꦑꦟꦤꦁ ꦄꦥꦱ꧀ꦱꦺꦤꦱꦁꦮꦶꦣꦴꦤꦁ ꦄꦱꦶꦄꦴꦢꦷꦤꦁ ꦈꦥꦤꦶꦏ꧀ꦑꦶꦥꦤꦁ ꦠꦭ꦳ꦴꦏꦴꦢꦷꦱꦸ ꦮꦶꦱꦱꦩ꧀ꦥꦪꦺꦴꦗꦤꦁ ꦫꦹꦥꦹꦥꦲꦴꦫꦺꦴꦠꦶꦌꦮꦩꦴꦢꦶ. ꦮꦸꦠ꧀ꦠꦤꦪꦺꦤꦺꦮ ꦕꦺꦠ꧀ꦡꦴꦥꦶ ꦈꦢ꧀ꦢꦶꦱ꧀ꦱꦴꦤꦸꦢ꧀ꦢꦶꦱ꧀ꦱꦨꦺꦢꦺꦴ ꦮꦺꦢꦶꦠꦧ꧀ꦧꦺꦴ. ꦮꦶꦗ꧀ꦗꦴꦩꦪꦺꦴꦠꦶ ꦩꦴꦫꦟꦠ꧀ꦡꦁ ꦮꦶꦗ꧀ꦗꦴꦥꦫꦶꦗꦥ꧀ꦥꦤꦁ. ꦆꦢ꧀ꦣꦶꦩꦪꦺꦴꦠꦶ ꦏꦩ꧀ꦩꦮꦶꦥꦴꦏꦗꦴꦪ ꦆꦢ꧀ꦣꦶꦪꦴ ꦥꦪꦺꦴꦗꦤꦁ.

ꦱꦠ꧀ꦡꦲꦴꦫꦏꦁ ꦮꦴꦱ꧀ꦱ ꦥꦫꦶꦪꦺꦱꦺꦪ꧀ꦪꦴꦠꦶ ꦌꦠ꧀ꦡ ꦲꦫꦠꦷꦠꦶ ꦲꦴꦫꦏꦁ, ꦏꦶꦁ ꦲꦫꦠꦶ? ꦗꦷꦮꦶꦠꦁ. ꦄꦡ ꦮꦴ ꦲꦫꦶꦠꦧ꧀ꦧꦤ꧀ꦠꦶ ꦲꦴꦫꦏꦁ, ꦈꦥꦤꦶꦏ꧀ꦑꦶꦥꦶꦠꦧ꧀ꦧꦤ꧀ꦠꦶ ꦄꦠ꧀ꦡꦺꦴ. ꦱꦠ꧀ꦡꦚ꧀ꦕ ꦠꦁ ꦲꦴꦫꦏꦚ꧀ꦕꦴꦠꦶ ꦱꦠ꧀ꦡꦲꦴꦫꦏꦁ. ꦄꦱ꧀ꦱꦴꦠꦶ ꦩꦤꦸꦱ꧀ꦱꦮꦶꦒ꧀ꦒꦲꦱ꧀ꦱ. ꦥꦫꦶꦪꦺꦱꦺꦪ꧀ꦪꦴꦠꦶ ꦪꦡꦴ ꦭꦨꦠꦶ, ꦠꦡꦴ ꦏꦫꦺꦪ꧀ꦪ, ꦈꦥꦤꦶꦏ꧀ꦑꦶꦥꦺꦪ꧀ꦪꦴꦠꦶ ꦄꦠ꧀ꦡꦺꦴ. ꦌꦠꦺꦤ ꦡꦴꦮꦫꦥꦪꦺꦴꦒꦁ ꦢꦱ꧀ꦱꦺꦠꦶ. ꦆꦠꦫꦡꦴ ꦲꦶ ꦥꦫꦶꦪꦶꦛ꧀ꦜꦶꦩꦠ꧀ꦠꦺꦪꦺꦮ ꦥꦴꦫꦴꦗꦶꦏꦺꦴ ꦨꦮꦺꦪ꧀ꦪ, ꦤ ꦕꦺꦠꦁ ꦪꦸꦠ꧀ꦠꦁ. ꦥꦢꦨꦴꦗꦤꦺ ꦥꦤꦱ꧀ꦱ ꦧ꧀ꦪꦚ꧀ꦗꦤꦁ ꦄꦤꦴꦢꦶꦪꦶꦠ꧀ꦮꦴ ꦪꦁ ꦌꦠ꧀ꦡ ꦡꦴꦮꦫꦥꦪꦺꦴꦒꦱꦔ꧀ꦒꦲꦶꦠꦁ ꦱꦠ꧀ꦡꦁ, ꦠꦢꦺꦮ ꦢꦱ꧀ꦱꦺꦠꦸꦁ ‘‘ꦄꦱꦶꦁ ꦮꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦩꦫꦟꦮꦟ꧀ꦟꦁ ꦮꦴ ꦱꦁꦮꦟ꧀ꦟꦺꦪ꧀ꦪꦴꦠꦶ ꦮꦴꦕꦴꦪ ꦮꦴ ꦠꦴꦭꦥꦟ꧀ꦟꦴꦢꦷꦱꦸ ꦭꦶꦑꦶꦠ꧀ꦮꦴ ꦮꦴ ‘‘ꦪꦺꦴ ꦌꦮꦁ ꦩꦫꦠꦶ, ꦱꦺꦴ ꦣꦤꦁ ꦮꦴ ꦭꦨꦠꦷ’’ꦠꦶꦄꦴꦢꦶꦤꦴ ꦤꦪꦺꦤ ꦩꦫꦟꦺ ꦒꦸꦟꦁ ꦥꦏꦴꦱꦺꦪ꧀ꦪ. ꦌꦠꦺꦤ ꦪꦡꦴ ‘‘ꦄꦢꦶꦤ꧀ꦤꦴꦢꦴꦤꦺ ꦄꦴꦢꦶꦪꦺꦪ꧀ꦪꦴ’’ꦠꦶ ꦮꦸꦠ꧀ꦠꦠ꧀ꦠꦴ ꦥꦫꦶꦪꦴꦪꦏꦡꦴꦪ ꦩꦸꦕ꧀ꦕꦠꦶ, ꦤꦪꦶꦣ, ꦌꦮꦁ ‘‘ꦱꦁꦮꦟ꧀ꦟꦺꦪ꧀ꦪꦴ’’ꦠꦶ ꦮꦕꦤꦠꦺꦴ ꦥꦤ ꦆꦣ ꦥꦫꦶꦪꦴꦪꦏꦡꦴꦪꦥꦶ ꦤ ꦩꦸꦕ꧀ꦕꦠꦷꦠꦶ ꦄꦪꦩꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ. ꦩꦫꦟꦴꦪ ꦮꦴ ꦱꦩꦴꦢꦥꦺꦪ꧀ꦪꦴꦠꦶ ‘‘ꦱꦠ꧀ꦡꦁ ꦮꦴ ꦄꦴꦲꦫꦴ’’ꦠꦶꦄꦴꦢꦶꦤꦴ (ꦥꦴꦫꦴ. ꧑꧗꧒) ꦤꦪꦺꦤ ꦩꦫꦟꦠ꧀ꦡꦴꦪ ꦈꦥꦴꦪꦁ ꦒꦴꦲꦴꦥꦺꦪ꧀ꦪ. ꦌꦠꦺꦤ ꦄꦴꦟꦠ꧀ꦠꦶꦏꦥ꧀ꦥꦪꦺꦴꦒꦁ ꦢꦱ꧀ꦱꦺꦠꦶ. ꦄꦩ꧀ꦨꦺꦴ ꦥꦸꦫꦶꦱꦴꦠꦶ ꦄꦴꦭꦥꦤꦩꦺꦠꦁ. ꦏꦶꦁ ꦠꦸꦪ꧀ꦲꦶꦩꦶꦤꦴꦠꦶꦄꦴꦢꦶ ꦱꦁꦮꦟ꧀ꦟꦤꦴꦏꦴꦫꦤꦶꦢꦱ꧀ꦱꦤꦁ. ꦆꦠꦶ ꦕꦶꦠ꧀ꦠꦩꦤꦺꦴꦠꦶ ꦆꦠꦶ ꦕꦶꦠ꧀ꦠꦺꦴ ꦆꦠꦶ ꦩꦤꦺꦴ. ‘‘ꦩꦠꦁ ꦠꦺ ꦗꦷꦮꦶꦠꦴ ꦱꦺꦪ꧀ꦪꦺꦴ’’ꦠꦶꦌꦠ꧀ꦡ ꦮꦸꦠ꧀ꦠꦩꦫꦟꦕꦶꦠ꧀ꦠꦺꦴ ꦩꦫꦟꦩꦤꦺꦴꦠꦶ ꦄꦠ꧀ꦡꦺꦴ. ꦌꦠ꧀ꦡ ꦕ ‘‘ꦩꦤꦺꦴ’’ꦠꦶꦆꦢꦁ ꦕꦶꦠ꧀ꦠꦱ꧀ꦱ ꦄꦠ꧀ꦡꦢꦷꦥꦤꦠ꧀ꦡꦁ ꦮꦸꦠ꧀ꦠꦁ. ꦠꦺꦤꦺꦮꦱ꧀ꦱ ꦥꦢꦨꦴꦗꦤꦺ ‘‘ꦪꦁ ꦕꦶꦠ꧀ꦠꦁ ꦠꦁ ꦩꦤꦺꦴ’’ꦠꦶ (ꦥꦴꦫꦴ. ꧑꧗꧒) ꦄꦴꦲ. ꦕꦶꦠ꧀ꦠꦱꦔ꧀ꦏꦥ꧀ꦥꦺꦴꦠꦶ ꦮꦶꦕꦶꦠ꧀ꦠꦱꦔ꧀ꦏꦥ꧀ꦥꦺꦴ. ꦌꦠ꧀ꦡꦴꦥꦶ ꦆꦠꦶ-ꦱꦢ꧀ꦢꦺꦴ ꦄꦴꦲꦫꦶꦠꦧ꧀ꦧꦺꦴ. ‘‘ꦱꦔ꧀ꦏꦥ꧀ꦥꦺꦴ’’ꦠꦶ ꦕ ꦱꦁꦮꦶꦢꦲꦤꦩꦠ꧀ꦠꦱ꧀ꦱꦺꦠꦁ ꦤꦴꦩꦁ, ꦤ ꦮꦶꦠꦏ꧀ꦏꦱ꧀ꦱꦺꦮ. ꦠꦚ꧀ꦕ ꦱꦁꦮꦶꦢꦲꦤꦁ ꦆꦩꦱ꧀ꦩꦶꦁ ꦄꦠ꧀ꦡꦺ ꦱꦚ꧀ꦚꦴꦕꦺꦠꦤꦴꦣꦶꦥ꧀ꦥꦴꦪꦺꦲꦶ ꦱꦔ꧀ꦒꦲꦁ ꦒꦕ꧀ꦖꦠꦶ, ꦠꦱ꧀ꦩꦴ ‘‘ꦆꦠꦶ ꦕꦶꦠ꧀ꦠꦱꦔ꧀ꦏꦥ꧀ꦥꦺꦴ’’ꦠꦶ ‘‘ꦩꦠꦁ ꦠꦺ ꦗꦷꦮꦶꦠꦴ ꦱꦺꦪ꧀ꦪꦺꦴ’’ꦠꦶꦌꦠ꧀ꦡ ꦮꦸꦠ꧀ꦠꦩꦫꦟꦱꦚ꧀ꦚꦷ ꦩꦫꦟꦕꦺꦠꦤꦺꦴ ꦩꦫꦟꦴꦣꦶꦥ꧀ꦥꦴꦪꦺꦴꦠꦶ ꦌꦮꦩꦺꦠ꧀ꦡ ꦄꦠ꧀ꦡꦺꦴ ꦢꦛ꧀ꦜꦧ꧀ꦧꦺꦴ. ꦥꦢꦨꦴꦗꦤꦺꦥꦶ ꦲꦶ ꦄꦪꦩꦺꦮ ꦤꦪꦺꦴ ꦢꦱ꧀ꦱꦶꦠꦺꦴ. ꦌꦠꦺꦤ ꦩꦫꦟꦕꦶꦠ꧀ꦠꦴꦢꦷꦲꦶ ꦮꦶꦤꦴ ‘‘ꦌꦏꦴꦲꦁ ꦗꦷꦮꦶꦠꦁ ꦱꦺꦪ꧀ꦪꦺꦴ, ꦮꦷꦫꦶꦪꦩꦴꦫꦨꦠꦺꦴ ꦢꦭ꦳꧀ꦲ’’ꦤ꧀ꦠꦶꦄꦴꦢꦶꦤꦴ (ꦣ. ꦥ. ꧑꧑꧒) ꦤꦪꦺꦤ ꦣꦩ꧀ꦩꦁ ꦨꦴꦱꦤ꧀ꦠꦱ꧀ꦱ ꦱꦁꦮꦟ꧀ꦟꦤꦴ ꦤꦴꦩ ꦤ ꦲꦺꦴꦠꦷꦠꦶ ꦢꦱ꧀ꦱꦺꦠꦶ. ꦄꦤꦺꦏꦥꦫꦶꦪꦴꦪꦺꦤꦴꦠꦶ ꦤꦴꦤꦥ꧀ꦥꦏꦴꦫꦺꦤ ꦈꦕ꧀ꦕꦴꦮꦕꦺꦤ ꦏꦴꦫꦟꦺꦤ. ꦥꦸꦤ ꦩꦫꦟꦮꦟ꧀ꦟꦤ꧀ꦠꦶꦄꦴꦢꦶ ꦤꦶꦒꦩꦤꦮꦕꦤꦁ. ꦥꦴꦫꦴꦗꦶꦏꦺꦴ ꦲꦺꦴꦠꦷꦠꦶ ꦠꦔ꧀ꦑꦟꦹꦥꦥꦤ꧀ꦤꦩ꧀ꦥꦶ ꦩꦤꦸꦱ꧀ꦱꦮꦶꦒ꧀ꦒꦲꦁ ꦮꦸꦠ꧀ꦠꦤꦪꦺꦤ ꦗꦷꦮꦶꦠꦴ ꦮꦺꦴꦫꦺꦴꦥꦺꦤ꧀ꦠꦺꦴ ꦥꦴꦫꦴꦗꦶꦏꦺꦴ ꦲꦺꦴꦠꦷꦠꦶ.

ꦮꦺꦱꦴꦭꦶꦪꦁ ꦱꦩ꧀ꦧꦲꦸꦭꦺ ꦨꦶꦏ꧀ꦑꦹ ꦄꦴꦫꦧ꧀ꦨ ꦄꦚ꧀ꦚꦩꦚ꧀ꦚꦁ ꦗꦷꦮꦶꦠꦴ ꦮꦺꦴꦫꦺꦴꦥꦤꦮꦠ꧀ꦡꦸꦱ꧀ꦩꦶꦁ ꦥꦚ꧀ꦚꦠ꧀ꦠꦁ, ‘‘ꦩꦫꦟꦮꦟ꧀ꦟꦁ ꦮꦴ’’ꦠꦶ ꦄꦪꦩꦺꦠ꧀ꦡ ꦄꦤꦸꦥꦚ꧀ꦚꦠ꧀ꦠꦶ, ꦱꦴꦣꦴꦫꦟꦥꦚ꧀ꦚꦠ꧀ꦠꦶ, ꦱꦴꦟꦠ꧀ꦠꦶꦏꦁ, ꦩꦴꦫꦟꦠ꧀ꦡꦴꦪ ꦎꦥꦴꦠꦏ꧀ꦑꦟꦤꦴꦢꦷꦱꦸ ꦢꦸꦏ꧀ꦏꦛꦁ, ꦄꦤꦺꦴꦢꦶꦱ꧀ꦱ ꦑꦠꦺ ꦎꦥꦴꦠꦺ ꦪꦱ꧀ꦱ ꦏꦱ꧀ꦱꦕꦶ ꦥꦠꦤꦺꦥꦶ ꦢꦸꦏ꧀ꦏꦛꦁ, ꦪꦏ꧀ꦑꦥꦺꦠꦠꦶꦫꦕ꧀ꦖꦴꦤꦒꦠꦩꦤꦸꦱ꧀ꦱꦮꦶꦒ꧀ꦒꦲꦴꦤꦁ ꦠꦶꦫꦕ꧀ꦖꦴꦤꦒꦠꦱ꧀ꦱ ꦕ ꦢꦸꦏ꧀ꦑꦸꦥ꧀ꦥꦠ꧀ꦠꦶꦪꦁ ꦢꦸꦏ꧀ꦏꦛꦩꦺꦮ, ꦩꦤꦸꦱ꧀ꦱꦗꦴꦠꦶꦏꦱ꧀ꦱ ꦢꦸꦏ꧀ꦑꦸꦥ꧀ꦥꦠ꧀ꦠꦶꦪꦁ ꦡꦸꦭ꧀ꦭꦕ꧀ꦕꦪꦁ, ꦠꦡꦴ ꦪꦏ꧀ꦑꦴꦢꦷꦤꦁ ꦩꦫꦟꦺ, ꦠꦶꦫꦕ꧀ꦖꦴꦤꦒꦠꦩꦫꦟꦺ ꦥꦤ ꦥꦴꦕꦶꦠ꧀ꦠꦶꦪꦁ, ꦩꦤꦸꦱ꧀ꦱꦩꦫꦟꦺ ꦥꦴꦫꦴꦗꦶꦏꦤ꧀ꦠꦶ. ꦆꦩꦶꦤꦴ ꦤꦪꦺꦤ ꦱꦧ꧀ꦧꦠ꧀ꦡ ꦥꦪꦺꦴꦒꦨꦺꦢꦮꦱꦺꦤ ꦄꦴꦥꦠ꧀ꦠꦶꦨꦺꦢꦺꦴ ꦮꦺꦢꦶꦠꦧ꧀ꦧꦺꦴ. ꦄꦱꦚ꧀ꦕꦶꦕ꧀ꦕ ꦩꦴꦫꦺꦤ꧀ꦠꦱ꧀ꦱ ꦄꦗꦴꦤꦤ꧀ꦠꦱ꧀ꦱ ꦤꦩꦫꦟꦴꦣꦶꦥ꧀ꦥꦴꦪꦱ꧀ꦱ ꦈꦩ꧀ꦩꦠ꧀ꦠꦏꦴꦢꦷꦤꦚ꧀ꦕ ꦄꦤꦴꦥꦠ꧀ꦠꦶ. ꦠꦠ꧀ꦡ ꦄꦱꦚ꧀ꦕꦶꦕ꧀ꦕꦴꦠꦶ ‘‘ꦆꦩꦶꦤꦴ ꦈꦥꦏ꧀ꦏꦩꦺꦤ ꦆꦩꦁ ꦩꦴꦫꦺꦩꦷ’’ꦠꦶ ꦄꦕꦺꦠꦺꦠ꧀ꦮꦴ ꦏꦠꦺꦤ ꦈꦥꦏ꧀ꦏꦩꦺꦤ ꦩꦸꦱꦭꦸꦱ꧀ꦱꦴꦥꦤꦮꦠ꧀ꦡꦸꦱ꧀ꦩꦶꦁ (ꦥꦴꦫꦴ. ꧑꧘꧐ ꦄꦴꦢꦪꦺꦴ) ꦮꦶꦪ ꦥꦫꦺ ꦩꦠꦺꦥꦶ ꦄꦤꦴꦥꦠ꧀ꦠꦶ. ꦄꦗꦴꦤꦤ꧀ꦠꦱ꧀ꦱꦴꦠꦶ ‘‘ꦆꦩꦶꦤꦴ ꦄꦪꦁ ꦩꦫꦶꦱ꧀ꦱꦠꦷ’’ꦠꦶ ꦄꦗꦴꦤꦤ꧀ꦠꦱ꧀ꦱ ꦈꦥꦏ꧀ꦏꦩꦺꦤ ꦮꦶꦱꦒꦠꦥꦶꦟ꧀ꦝꦥꦴꦠꦮꦠ꧀ꦡꦸꦱ꧀ꦩꦶꦁ (ꦥꦴꦫꦴ. ꧑꧘꧑) ꦮꦶꦪ ꦥꦫꦺ ꦩꦠꦺꦥꦶ ꦄꦤꦴꦥꦠ꧀ꦠꦶ. ꦤꦩꦫꦟꦴꦣꦶꦥ꧀ꦥꦴꦪꦱ꧀ꦱꦴꦠꦶ ꦩꦫꦟꦁ ꦄꦤꦶꦕ꧀ꦖꦤ꧀ꦠꦱ꧀ꦱ ꦈꦥꦏ꧀ꦏꦩꦺꦤ ꦨꦺꦱꦗ꧀ꦗꦮꦠ꧀ꦡꦸꦱ꧀ꦩꦶꦁ (ꦥꦴꦫꦴ. ꧑꧘꧗) ꦮꦶꦪ ꦥꦫꦺ ꦩꦠꦺꦥꦶ ꦄꦤꦴꦥꦠ꧀ꦠꦶ. ꦌꦮꦁ ꦄꦱꦚ꧀ꦕꦶꦕ꧀ꦕꦴꦠꦶꦄꦴꦢꦷꦱꦸ ꦮꦶꦤꦶꦕ꧀ꦖꦪꦺꦴ ꦮꦺꦢꦶꦠꦧ꧀ꦧꦺꦴ. ꦱꦷꦭꦮꦶꦥꦠ꧀ꦠꦶ, ꦩꦤꦸꦱ꧀ꦱꦗꦴꦠꦶꦏꦥꦴꦟꦺꦴ, ꦥꦴꦟꦱꦚ꧀ꦚꦶꦠꦴ, ꦮꦣꦏꦕꦶꦠ꧀ꦠꦁ, ꦈꦥꦏ꧀ꦏꦩꦺꦴ, ꦠꦺꦤ ꦩꦫꦟꦤ꧀ꦠꦶ ꦆꦩꦴꦤꦺꦠ꧀ꦡ ꦥꦚ꧀ꦕ ꦄꦔ꧀ꦒꦴꦤꦶ. ꦄꦢꦶꦤ꧀ꦤꦴꦢꦴꦤꦱꦩꦈꦛ꧀ꦜꦴꦤꦁ, ꦏꦶꦫꦶꦪꦁ, ꦱꦚ꧀ꦚꦴꦮꦶꦩꦺꦴꦏ꧀ꦑꦁ, ꦱꦕꦶꦠ꧀ꦠꦏꦁ, ꦭꦺꦴꦏꦮꦗ꧀ꦗꦁ, ꦏꦴꦪꦏꦩ꧀ꦩꦁ, ꦮꦕꦷꦏꦩ꧀ꦩꦁ, ꦄꦏꦸꦱꦭꦕꦶꦠ꧀ꦠꦁ, ꦢꦸꦏ꧀ꦑꦮꦺꦢꦤꦤ꧀ꦠꦶ.

ꦠꦠꦶꦪꦥꦴꦫꦴꦗꦶꦏꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.