꧙. ꦏꦴꦭꦄꦠꦶꦏ꧀ꦏꦩꦤꦱꦶꦏ꧀ꦑꦴꦥꦢꦮꦟ꧀ꦟꦤꦴ

ꦤꦮꦩꦺ ꦢꦸꦧ꧀ꦧꦭꦕꦷꦮꦫꦥꦕ꧀ꦕꦴꦱꦴꦪꦴꦠꦶ ꦢꦸꦧ꧀ꦧꦭꦴꦪ ꦕꦷꦮꦫꦥꦕ꧀ꦕꦴꦱꦴꦪ, ‘‘ꦱꦕꦺ ꦱꦏ꧀ꦏꦺꦴꦩ ꦢꦱ꧀ꦱꦴꦩꦴ’’ꦠꦶ ꦌꦠ꧀ꦠꦏꦩꦠ꧀ꦠꦁ ꦱꦸꦠ꧀ꦮꦴ ꦈꦥ꧀ꦥꦴꦢꦶꦠꦴꦪ ꦄꦴꦱꦴꦪꦴꦠꦶ ꦄꦠ꧀ꦡꦺꦴ. ꦕꦷꦮꦫꦏꦴꦭꦱꦩꦪꦁ ꦄꦠꦶꦏ꧀ꦏꦴꦩꦺꦪ꧀ꦪꦴꦠꦶ ꦮꦱ꧀ꦱꦁꦮꦸꦛ꧀ꦜꦨꦶꦏ꧀ꦑꦸꦤꦷꦲꦶ ꦏꦴꦭꦕꦷꦮꦫꦺ ꦨꦴꦗꦶꦪꦩꦴꦤꦺ ‘‘ꦄꦴꦒꦩꦺꦪ꧀ꦪꦴꦡ, ꦄꦪ꧀ꦪꦺ, ꦄꦠ꧀ꦡꦶ ꦱꦔ꧀ꦓꦱ꧀ꦱ ꦕꦷꦮꦫꦥꦕ꧀ꦕꦴꦱꦴ’’ꦠꦶ ꦮꦠ꧀ꦮꦴ ꦠꦁ ꦕꦷꦮꦫꦮꦶꦨꦔ꧀ꦒꦁ ꦕꦷꦮꦫꦏꦴꦭꦁ ꦄꦠꦶꦏ꧀ꦏꦴꦩꦺꦪ꧀ꦪ, ꦠꦱ꧀ꦱꦴ ꦄꦤꦠ꧀ꦡꦠꦺ ꦏꦡꦶꦤꦺ ꦮꦱ꧀ꦱꦴꦤꦱ꧀ꦱ ꦥꦕ꧀ꦖꦶꦩꦩꦴꦱꦁ, ꦄꦠ꧀ꦡꦠꦺ ꦏꦡꦶꦤꦺ ꦏꦡꦶꦤꦸꦧ꧀ꦨꦴꦫꦢꦶꦮꦱꦁ ꦄꦠꦶꦏ꧀ꦏꦴꦩꦺꦤ꧀ꦠꦶꦪꦴ ꦥꦴꦕꦶꦠ꧀ꦠꦶꦪꦁ.

ꦱꦴꦮꦠ꧀ꦡꦶꦪꦁ ꦡꦸꦭ꧀ꦭꦤꦤ꧀ꦢꦁ ꦄꦴꦫꦧ꧀ꦨ ꦢꦸꦧ꧀ꦧꦭꦕꦷꦮꦫꦥꦕ꧀ꦕꦴꦱꦴꦪ ꦕꦷꦮꦫꦏꦴꦭꦱꦩꦪꦁ ꦄꦠꦶꦏ꧀ꦏꦩꦤꦮꦠ꧀ꦡꦸꦱ꧀ꦩꦶꦁ ꦥꦚ꧀ꦚꦠ꧀ꦠꦁ, ꦢꦸꦧ꧀ꦧꦭꦕꦷꦮꦫꦺ ꦮꦺꦩꦠꦶꦏꦴꦪ, ꦄꦢꦸꦧ꧀ꦧꦭꦕꦷꦮꦫꦺ ꦢꦸꦧ꧀ꦧꦭꦕꦷꦮꦫꦱꦚ꧀ꦚꦴꦪ ꦕꦺꦮ ꦮꦺꦩꦠꦶꦏꦴꦪ ꦕ ꦢꦸꦏ꧀ꦏꦛꦁ. ꦈꦨꦪꦠ꧀ꦡ ꦄꦢꦸꦧ꧀ꦧꦭꦕꦷꦮꦫꦱꦚ꧀ꦚꦴꦪ, ꦏꦶꦚ꧀ꦕꦴꦥꦶ ‘ꦤ ꦱꦏ꧀ꦏꦺꦴꦩꦴ’ꦠꦶ ꦮꦢꦤ꧀ꦠꦶ, ‘‘ꦆꦢꦴꦤꦶ ꦥꦤ ꦠꦺꦱꦁ ꦏꦥ꧀ꦥꦴꦱꦺꦴ ꦮꦴ ꦈꦥ꧀ꦥꦗ꧀ꦗꦶꦱ꧀ꦱꦠꦶ, ꦱꦢ꧀ꦣꦺꦴ ꦮꦴ ꦥꦸꦫꦶꦱꦺꦴ ꦄꦴꦒꦩꦶꦱ꧀ꦱꦠꦶ, ꦠꦱ꧀ꦩꦶꦁ ꦄꦴꦒꦠꦺ ꦄꦢ꧀ꦣꦴ ꦢꦱ꧀ꦱꦤ꧀ꦠꦷ’’ꦠꦶ ꦌꦮꦁ ꦄꦴꦤꦶꦱꦁꦱꦁ ꦢꦱ꧀ꦱꦺꦠ꧀ꦮꦴ ꦤꦶꦮꦴꦫꦺꦤ꧀ꦠꦶꦪꦴ, ꦈꦩ꧀ꦩꦠ꧀ꦠꦶꦏꦴꦢꦷꦤꦚ꧀ꦕ ꦄꦤꦴꦥꦠ꧀ꦠꦶ. ꦢꦸꦧ꧀ꦧꦭꦕꦷꦮꦫꦠꦴ, ꦢꦸꦧ꧀ꦧꦭꦱꦚ꧀ꦚꦶꦠꦴ, ꦮꦶꦤꦴ ꦄꦴꦤꦶꦱꦁꦱꦺꦤ ꦤꦶꦮꦴꦫꦟꦤ꧀ꦠꦶ ꦆꦩꦴꦤꦺꦠ꧀ꦡ ꦠꦷꦟꦶ ꦄꦔ꧀ꦒꦴꦤꦶ. ꦱꦩꦸꦛ꧀ꦜꦴꦤꦴꦢꦷꦤꦶ ꦄꦢꦶꦤ꧀ꦤꦴꦢꦴꦤꦱꦢꦶꦱꦴꦤꦷꦠꦶ.

ꦏꦴꦭꦄꦠꦶꦏ꧀ꦏꦩꦤꦱꦶꦏ꧀ꦑꦴꦥꦢꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.