꧒. ꦕꦺꦴꦫꦶꦮꦸꦛ꧀ꦜꦴꦥꦶꦏꦴꦱꦶꦏ꧀ꦑꦴꦥꦢꦮꦟ꧀ꦟꦤꦴ

ꦢꦸꦠꦶꦪꦺ ꦪꦴꦪ ꦥꦚ꧀ꦕꦩꦴꦱꦒ꧀ꦓꦤꦏꦠꦺꦴ ꦥꦛ꧀ꦜꦴꦪ ꦪꦁꦏꦶꦚ꧀ꦕꦶ ꦥꦫꦱꦤ꧀ꦠꦏꦁ ꦄꦮꦲꦫꦶꦠꦁ, ꦄꦪꦁ ꦕꦺꦴꦫꦷ ꦤꦴꦩ, ꦠꦁ ꦕꦺꦴꦫꦶꦁ. ꦮꦗ꧀ꦙꦁ ꦮꦶꦢꦶꦠꦤ꧀ꦠꦶ ꦠꦺꦤ ꦏꦩ꧀ꦩꦺꦤ ‘‘ꦮꦣꦴꦫꦲꦴ ꦄꦪ’’ꦤ꧀ꦠꦶ ꦌꦮꦁ ꦮꦶꦢꦶꦠꦁ. ꦄꦤꦥꦭꦺꦴꦏꦺꦠ꧀ꦮꦴꦠꦶ ꦄꦤꦴꦥꦸꦕ꧀ꦖꦴ. ꦒꦟꦤ꧀ꦠꦶ ꦩꦭ꧀ꦭꦒꦟꦨꦛꦶꦥꦸꦠ꧀ꦠꦒꦟꦴꦢꦶꦏꦁ. ꦥꦹꦒꦤ꧀ꦠꦶ ꦣꦩ꧀ꦩꦒꦟꦁ. ꦱꦺꦟꦶꦤ꧀ꦠꦶ ꦒꦤ꧀ꦣꦶꦏꦱꦺꦟꦶꦢꦸꦱ꧀ꦱꦶꦏꦱꦺꦟꦶꦄꦴꦢꦶꦏꦁ. ꦪꦠ꧀ꦡ ꦪꦠ꧀ꦡ ꦲꦶ ꦫꦴꦗꦴꦤꦺꦴ ꦒꦟꦴꦢꦷꦤꦁ ꦒꦴꦩꦤꦶꦒꦩꦺ ꦤꦶꦪ꧀ꦪꦴꦠꦺꦤ꧀ꦠꦶ ‘‘ꦠꦸꦩ꧀ꦲꦺꦮ ꦌꦠ꧀ꦡ ꦄꦤꦸꦱꦴꦱꦡꦴ’’ꦠꦶ, ꦠꦠ꧀ꦡ ꦠꦠ꧀ꦡ ꦠꦺꦪꦺꦮ ꦆꦱ꧀ꦱꦫꦴ ꦲꦺꦴꦤ꧀ꦠꦶ, ꦠꦱ꧀ꦩꦴ ꦠꦺ ꦱꦤ꧀ꦣꦴꦪ ꦆꦢꦁ ꦮꦸꦠ꧀ꦠꦁ. ꦌꦠ꧀ꦡ ꦕ ꦫꦴꦗꦴꦤꦁ ꦮꦴ ꦒꦟꦴꦢꦶꦏꦺ ꦮꦴ ꦄꦥꦭꦺꦴꦏꦺꦠ꧀ꦮꦴꦥꦶ ꦨꦶꦏ꧀ꦑꦸꦤꦶꦱꦔ꧀ꦓꦺꦴ ꦄꦥꦭꦺꦴꦏꦺꦠꦧ꧀ꦧꦺꦴꦮ. ꦄꦚ꧀ꦚꦠ꧀ꦫ ꦏꦥ꧀ꦥꦴꦠꦶ ꦠꦶꦠ꧀ꦡꦶꦪꦺꦱꦸ ꦮꦴ ꦄꦚ꧀ꦚꦨꦶꦏ꧀ꦑꦸꦤꦷꦱꦸ ꦮꦴ ꦥꦧ꧀ꦧꦗꦶꦠꦥꦸꦧ꧀ꦧꦴ ꦏꦥ꧀ꦥꦴ ꦤꦴꦩ, ꦠꦁ ꦜꦥꦺꦠ꧀ꦮꦴ ꦄꦚ꧀ꦚꦁ ꦈꦥꦱꦩ꧀ꦥꦴꦢꦺꦤ꧀ꦠꦶꦪꦴ ꦒꦟꦄꦴꦕꦫꦶꦤꦷ ꦥꦠ꧀ꦠꦕꦷꦮꦫꦥꦫꦶꦪꦺꦱꦤꦺꦱꦸ ꦱꦷꦩꦴꦱꦩ꧀ꦩꦸꦠꦶꦪꦴ ꦚꦠ꧀ꦠꦶꦪꦴ ꦕ ꦢꦸꦏ꧀ꦏꦛꦁ, ꦢ꧀ꦮꦷꦲꦶ ꦏꦩ꧀ꦩꦮꦴꦕꦴꦲꦶ ꦡꦸꦭ꧀ꦭꦕ꧀ꦕꦪꦁ, ꦏꦩ꧀ꦩꦮꦴꦕꦴꦥꦫꦶꦪꦺꦴꦱꦴꦤꦺ ꦱꦔ꧀ꦓꦴꦢꦶꦱꦺꦱꦺꦴ.

ꦱꦴꦮꦠ꧀ꦡꦶꦪꦁ ꦡꦸꦭ꧀ꦭꦤꦤ꧀ꦢꦁ ꦄꦴꦫꦧ꧀ꦨ ꦕꦺꦴꦫꦶꦁ ꦮꦸꦛ꧀ꦜꦴꦥꦤꦮꦠ꧀ꦡꦸꦱ꧀ꦩꦶꦁ ꦥꦚ꧀ꦚꦠ꧀ꦠꦁ, ꦕꦺꦴꦫꦶꦪꦴ ꦮꦺꦩꦠꦶꦏꦴꦪ ꦢꦸꦏ꧀ꦏꦛꦁ, ꦠꦡꦴ ꦄꦕꦺꦴꦫꦶꦪꦴ ꦕꦺꦴꦫꦶꦱꦚ꧀ꦚꦴꦪ ꦕꦺꦮ ꦮꦺꦩꦠꦶꦏꦴꦪ ꦕ. ꦄꦕꦺꦴꦫꦶꦱꦚ꧀ꦚꦴꦪ, ꦄꦗꦴꦤꦤ꧀ꦠꦶꦪꦴ, ꦄꦥꦭꦺꦴꦏꦺꦠ꧀ꦮꦴ ꦮꦸꦛ꧀ꦜꦴꦥꦺꦤ꧀ꦠꦶꦪꦴ, ꦏꦥ꧀ꦥꦁ ꦮꦸꦛ꧀ꦜꦴꦥꦺꦤ꧀ꦠꦶꦪꦴ, ꦈꦩ꧀ꦩꦠ꧀ꦠꦶꦏꦴꦢꦷꦤꦚ꧀ꦕ ꦄꦤꦴꦥꦠ꧀ꦠꦶ. ꦕꦺꦴꦫꦶꦠꦴ, ꦕꦺꦴꦫꦶꦱꦚ꧀ꦚꦶꦠꦴ, ꦄꦚ꧀ꦚꦠ꧀ꦫ ꦄꦤꦸꦚ꧀ꦚꦴꦠꦏꦴꦫꦟꦴ ꦮꦸꦛ꧀ꦜꦴꦥꦤꦤ꧀ꦠꦶ, ꦆꦩꦴꦤꦺꦠ꧀ꦡ ꦠꦷꦟꦶ ꦄꦔ꧀ꦒꦴꦤꦶ. ꦕꦺꦴꦫꦶꦮꦸꦛ꧀ꦜꦴꦥꦤꦱꦩꦸꦛ꧀ꦜꦴꦤꦁ, ꦏꦶꦫꦶꦪꦴꦏꦶꦫꦶꦪꦁ, ꦱꦚ꧀ꦚꦴꦮꦶꦩꦺꦴꦏ꧀ꦑꦁ, ꦱꦕꦶꦠ꧀ꦠꦏꦁ, ꦥꦟ꧀ꦟꦠ꧀ꦠꦶꦮꦗ꧀ꦗꦁ, ꦏꦴꦪꦏꦩ꧀ꦩꦁ, ꦮꦕꦷꦏꦩ꧀ꦩꦁ, ꦠꦶꦕꦶꦠ꧀ꦠꦁ, ꦠꦶꦮꦺꦢꦤꦤ꧀ꦠꦶ.

ꦕꦺꦴꦫꦶꦮꦸꦛ꧀ꦜꦴꦥꦶꦏꦴꦱꦶꦏ꧀ꦑꦴꦥꦢꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.