꧘. ꦩꦲꦴꦱꦷꦲꦤꦴꦢꦱꦸꦠ꧀ꦠꦮꦟ꧀ꦟꦤꦴ

ꦄꦕꦺꦭꦏꦱ꧀ꦱꦥꦮꦠ꧀ꦡꦸꦮꦟ꧀ꦟꦤꦴ

꧓꧘꧑. ꦪꦱ꧀ꦩꦶꦁ ꦫꦛ꧀ꦜꦺ ꦠꦁ ꦤꦒꦫꦁ, ꦠꦱ꧀ꦱ ꦫꦛ꧀ꦜꦱ꧀ꦱꦥꦶ ꦪꦱ꧀ꦩꦶꦁ ꦤꦒꦫꦺ ꦠꦢꦴ ꦨꦒꦮꦴ ꦮꦶꦲꦴꦱꦶ, ꦠꦱ꧀ꦱ ꦤꦒꦫꦱ꧀ꦱꦥꦶ ꦌꦠꦢꦺꦮ ꦤꦴꦩꦁ, ꦠꦱ꧀ꦩꦴ ꦈꦫꦸꦚ꧀ꦚꦴꦪꦤ꧀ꦠꦶ ꦈꦫꦸꦚ꧀ꦚꦴꦗꦤꦥꦢꦺ ꦈꦫꦸꦚ꧀ꦚꦴꦱꦔ꧀ꦑꦴꦠꦺ ꦤꦒꦫꦺꦠꦶ ꦄꦠ꧀ꦡꦺꦴ. ꦫꦩꦟꦷꦪꦺꦴꦠꦶ ꦩꦤꦺꦴꦲꦫꦨꦹꦩꦶꦨꦴꦒꦠꦴꦪ ꦖꦴꦪꦹꦢꦏꦱꦩ꧀ꦥꦠ꧀ꦠꦶꦪꦴ, ꦗꦤꦮꦶꦮꦶꦠ꧀ꦠꦠꦴꦪ ꦕ ꦩꦤꦺꦴꦫꦩꦺꦴ. ꦤꦴꦩꦤ꧀ꦠꦶ ꦒꦺꦴꦠ꧀ꦠꦤꦴꦩꦁ. ꦠꦥꦤꦁ ꦱꦤ꧀ꦠꦥꦤꦁ ꦏꦴꦪꦱ꧀ꦱ ꦑꦺꦢꦤꦁ ꦠꦥꦺꦴ, ꦱꦺꦴ ꦌꦠꦱ꧀ꦱ ꦄꦠ꧀ꦡꦷꦠꦶ ꦠꦥꦱ꧀ꦱꦷ, ꦠꦁ ꦠꦥꦱ꧀ꦱꦶꦁ. ꦪꦱ꧀ꦩꦴ ꦠꦡꦴꦨꦹꦠꦺꦴ ꦠꦥꦁ ꦤꦶꦱ꧀ꦱꦶꦠꦺꦴ, ꦠꦥꦺꦴ ꦮꦴ ꦠꦁ ꦤꦶꦱ꧀ꦱꦶꦠꦺꦴ, ꦠꦱ꧀ꦩꦴ ꦄꦴꦲ ‘‘ꦠꦥꦤꦶꦱ꧀ꦱꦶꦠꦏ’’ꦤ꧀ꦠꦶ. ꦭꦹꦑꦁ ꦮꦴ ꦦꦫꦸꦱꦁ ꦱꦴꦣꦸꦱꦩ꧀ꦩꦠꦴꦕꦴꦫꦮꦶꦫꦲꦠꦺꦴ ꦤꦥꦱꦴꦢꦤꦷꦪꦁ ꦄꦴꦗꦷꦮꦠꦶ ꦮꦠ꧀ꦠꦠꦷꦠꦶ ꦭꦹꦑꦴꦗꦷꦮꦷ, ꦠꦁ ꦭꦹꦑꦴꦗꦷꦮꦶꦁ. ꦩꦸꦠ꧀ꦠꦴꦕꦴꦫꦴꦢꦷꦠꦶ ꦄꦴꦢꦶ-ꦱꦢ꧀ꦢꦺꦤ ꦥꦫꦠꦺꦴ ꦥꦴꦭ꦳ꦶꦪꦁ (ꦢꦷ. ꦤꦶ. ꧑.꧓꧙꧗) ꦄꦴꦒꦠꦴ ꦲꦠ꧀ꦡꦴꦥꦭꦺꦑꦤꦴꦢꦪꦺꦴ ꦱꦔ꧀ꦒꦲꦶꦠꦴ. ꦈꦥ꧀ꦥꦟ꧀ꦝꦺꦠꦷꦠꦶ ꦈꦲꦱꦤꦮꦱꦺꦤ ꦥꦫꦶꦨꦴꦱꦠꦶ. ꦈꦥꦮꦢꦠꦷꦠꦶ ꦄꦮꦚ꧀ꦚꦴꦥꦸꦧ꧀ꦧꦏꦁ ꦄꦥꦮꦢꦠꦶ, ꦠꦺꦤꦴꦲ ‘‘ꦲꦷꦭ꦳ꦺꦠꦶ ꦮꦩ꧀ꦨꦺꦠꦷ’’ꦠꦶ. ꦣꦩ꧀ꦩꦱ꧀ꦱ ꦕ ꦄꦤꦸꦣꦩ꧀ꦩꦁꦠꦶ ꦌꦠ꧀ꦡ ꦣꦩ꧀ꦩꦺꦴ ꦤꦴꦩ ꦲꦺꦠꦸ ‘‘ꦲꦺꦠꦸꦩ꧀ꦲꦶ ꦚꦴꦟꦁ ꦣꦩ꧀ꦩꦥꦛꦶꦱꦩ꧀ꦨꦶꦢꦴ’’ꦠꦶꦄꦴꦢꦷꦱꦸ (ꦮꦶꦨ. ꧗꧒꧐) ꦮꦶꦪꦴꦠꦶ ꦄꦴꦲ ‘‘ꦏꦴꦫꦟꦱ꧀ꦱ ꦄꦤꦸꦏꦴꦫꦟ’’ꦤ꧀ꦠꦶ. ꦏꦴꦫꦟꦤ꧀ꦠꦶ ꦕꦺꦠ꧀ꦡ ꦠꦡꦴꦥꦮꦠ꧀ꦠꦱ꧀ꦱ ꦱꦢ꧀ꦢꦱ꧀ꦱ ꦄꦠ꧀ꦡꦺꦴ ꦄꦣꦶꦥ꧀ꦥꦺꦠꦺꦴ ꦠꦱ꧀ꦱ ꦥꦮꦠ꧀ꦠꦶꦲꦺꦠꦸꦨꦴꦮꦠꦺꦴ. ꦄꦠ꧀ꦡꦥ꧀ꦥꦪꦸꦠ꧀ꦠꦺꦴ ꦲꦶ ꦱꦢ꧀ꦢꦥ꧀ꦥꦪꦺꦴꦒꦺꦴ. ꦄꦤꦸꦏꦴꦫꦟꦤ꧀ꦠꦶ ꦕ ꦱꦺꦴ ꦌꦮ ꦥꦫꦺꦲꦶ ꦠꦡꦴ ꦮꦸꦕ꧀ꦕꦩꦴꦤꦺꦴ. ꦥꦫꦺꦲꦷꦠꦶ ‘‘ꦪꦺ ꦠꦺ’’ꦠꦶ ꦮꦸꦠ꧀ꦠꦱꦠ꧀ꦠꦺꦲꦶ ꦥꦫꦺꦲꦶ. ꦮꦸꦠ꧀ꦠꦏꦴꦫꦟꦺꦤꦴꦠꦶ ꦪꦡꦴ ꦠꦺꦲꦶ ꦮꦸꦠ꧀ꦠꦁ, ꦠꦡꦴ ꦕꦺ ꦠꦸꦩ꧀ꦲꦺꦲꦶ ꦤ ꦮꦸꦠ꧀ꦠꦁ, ꦌꦮꦁ ꦱꦠꦶ ꦠꦺꦲꦶ ꦮꦸꦠ꧀ꦠꦏꦴꦫꦟꦺꦤ ꦱꦏꦴꦫꦟꦺꦴ ꦲꦸꦠ꧀ꦮꦴ ꦠꦸꦩ꧀ꦲꦴꦏꦁ ꦮꦴꦢꦺꦴ ꦮꦴ ꦠꦠꦺꦴ ꦥꦫꦁ ꦠꦱ꧀ꦱ ꦄꦤꦸꦮꦴꦢꦺꦴ ꦏꦺꦴꦕꦶ ꦄꦥ꧀ꦥꦩꦠ꧀ꦠꦏꦺꦴꦥꦶ ꦮꦶꦚ꧀ꦚꦹꦲꦶ ꦒꦫꦲꦶꦠꦧ꧀ꦧꦁ ꦜꦴꦤꦁ ꦏꦴꦫꦟꦁ ꦤꦴꦒꦕ꧀ꦖꦺꦪ꧀ꦪ, ꦏꦶꦩꦺꦮꦁ ꦤꦴꦒꦕ꧀ꦖꦠꦷꦠꦶ ꦪꦺꦴꦗꦤꦴ. ‘‘ꦆꦢꦁ ꦮꦸꦠ꧀ꦠꦁ ꦲꦺꦴꦠꦷ’’ꦠꦶꦄꦴꦢꦶꦤꦴ ꦠꦩꦺꦮꦠ꧀ꦡꦁ ꦱꦔ꧀ꦑꦺꦥꦠꦺꦴ ꦢꦱ꧀ꦱꦺꦠꦶ.

꧓꧘꧒. ꦆꦢꦴꦤꦶ ꦪꦁ ꦮꦶꦨꦗ꧀ꦗꦮꦴꦢꦁ ꦱꦤ꧀ꦣꦴꦪ ꦨꦒꦮꦠꦴ ‘‘ꦤ ꦩꦺ ꦠꦺ ꦮꦸꦠ꧀ꦠꦮꦴꦢꦶꦤꦺꦴ’’ꦠꦶ ꦱꦔ꧀ꦑꦺꦥꦠꦺꦴ ꦮꦠ꧀ꦮꦴ ꦠꦁ ꦮꦶꦨꦗꦶꦠ꧀ꦮꦴ ꦢꦱ꧀ꦱꦺꦠꦸꦁ ‘‘ꦆꦣꦴꦲꦁ ꦏꦱ꧀ꦱꦥꦴ’’ꦠꦶꦄꦴꦢꦶ ꦮꦸꦠ꧀ꦠꦁ, ꦠꦁ ꦮꦶꦨꦴꦒꦺꦤ ꦢꦱ꧀ꦱꦺꦤ꧀ꦠꦺꦴ ‘‘ꦆꦣꦺꦏꦕ꧀ꦕꦺꦴ’’ꦠꦶꦄꦴꦢꦶꦩꦴꦲ. ꦨꦒꦮꦴ ꦲꦶ ꦤꦶꦫꦠ꧀ꦡꦏꦁ ꦄꦤꦸꦥꦱꦩꦱꦁꦮꦠ꧀ꦠꦤꦶꦏꦁ ꦏꦴꦪꦏꦶꦭꦩꦡꦁ ‘‘ꦄꦠ꧀ꦠꦏꦶꦭꦩꦡꦴꦤꦸꦪꦺꦴꦒꦺꦴ ꦢꦸꦏ꧀ꦑꦺꦴ ꦄꦤꦫꦶꦪꦺꦴ ꦄꦤꦠ꧀ꦡꦱꦁꦲꦶꦠꦺꦴ’’ꦠꦶꦄꦴꦢꦶꦤꦴ (ꦱꦁ. ꦤꦶ. ꧓.꧑꧐꧘꧑; ꦩꦲꦴꦮ. ꧑꧓; ꦥꦛꦶ. ꦩ. ꧒.꧓꧐) ꦒꦫꦲꦠꦶ. ꦱꦴꦠ꧀ꦡꦏꦁ ꦥꦤ ꦈꦥꦱꦩꦱꦁꦮꦠ꧀ꦠꦤꦶꦏꦁ ‘‘ꦄꦴꦫꦚ꧀ꦚꦶꦏꦺꦴ ꦲꦺꦴꦠꦶ, ꦥꦁꦱꦸꦏꦹꦭꦶꦏꦺꦴ ꦲꦺꦴꦠꦷ’’ꦠꦶꦄꦴꦢꦶꦤꦴ ꦮꦟ꧀ꦟꦺꦠꦶ. ꦄꦥ꧀ꦥꦥꦸꦚ꧀ꦚꦠꦴꦪꦴꦠꦶ ꦄꦥꦸꦚ꧀ꦚꦠꦴꦪ. ꦠꦷꦟꦶ ꦢꦸꦕ꧀ꦕꦫꦶꦠꦴꦤꦶ ꦥꦹꦫꦺꦠ꧀ꦮꦴꦠꦶ ꦩꦶꦕ꧀ꦖꦴꦢꦶꦛ꧀ꦜꦶꦨꦴꦮꦠꦺꦴ ꦏꦩ꧀ꦩꦦꦭꦁ ꦥꦛꦶꦏ꧀ꦑꦶꦥꦤ꧀ꦠꦺꦴ ‘‘ꦤꦠ꧀ꦡꦶ ꦢꦶꦤ꧀ꦤ’’ꦤ꧀ꦠꦶꦄꦴꦢꦶꦤꦴ (ꦢꦷ. ꦤꦶ. ꧑.꧑꧗꧑; ꦩ. ꦤꦶ. ꧑.꧔꧔꧕; ꧒.꧙꧔, ꧙꧕, ꧒꧒꧕; ꧓.꧙꧑, ꧑꧑꧕; ꦱꦁ. ꦤꦶ. ꧓.꧒꧑꧐; ꦣ. ꦱ. ꧑꧒꧒꧑; ꦮꦶꦨ. ꧙꧓꧘) ꦩꦶꦕ꧀ꦖꦴꦢꦶꦛ꧀ꦜꦶꦁ ꦥꦸꦫꦏ꧀ꦑꦠ꧀ꦮꦴ ꦠꦡꦴ ꦠꦡꦴ ꦠꦷꦟꦶ ꦢꦸꦕ꧀ꦕꦫꦶꦠꦴꦤꦶ ꦥꦹꦫꦺꦠ꧀ꦮꦴ. ꦄꦤꦺꦱꦤꦮꦱꦺꦤꦴꦠꦶ ꦏꦺꦴꦲꦚ꧀ꦚꦺ ꦜꦠ꧀ꦮꦴ ꦄꦱꦤ꧀ꦠꦒꦸꦟꦱꦩ꧀ꦨꦴꦮꦤꦶꦕ꧀ꦖꦴꦪ ꦩꦶꦕ꧀ꦖꦴꦗꦷꦮꦮꦱꦺꦤ. ꦆꦩꦺ ꦢ꧀ꦮꦺꦠꦶ ‘‘ꦄꦥ꧀ꦥꦥꦸꦚ꧀ꦚꦺꦴ ꦥꦸꦚ꧀ꦚꦮꦴ’’ꦠꦶ ꦕ ꦮꦸꦠ꧀ꦠꦺ ꦢꦸꦕ꧀ꦕꦫꦶꦠꦏꦴꦫꦶꦤꦺꦴ ꦢ꧀ꦮꦺ ꦥꦸꦒ꧀ꦒꦭꦺ ꦱꦤ꧀ꦣꦴꦪ.

‘‘ꦆꦩꦺ ꦢ꧀ꦮꦺ ꦱꦤ꧀ꦣꦴꦪꦴ’’ꦠꦶ ꦌꦠ꧀ꦡ ꦥꦤ ꦢꦸꦠꦶꦪꦤꦪꦺ ‘‘ꦄꦥ꧀ꦥꦥꦸꦚ꧀ꦚꦺꦴ, ꦥꦸꦚ꧀ꦚꦮꦴ’’ꦠꦶ ꦕ ꦮꦸꦠ꧀ꦠꦺ ꦱꦸꦕꦫꦶꦠꦏꦴꦫꦶꦤꦺꦴꦠꦶ ꦄꦴꦢꦶꦤꦴ ꦪꦺꦴꦗꦺꦠꦧ꧀ꦧꦁ. ꦏꦩ꧀ꦩꦏꦶꦫꦶꦪꦮꦴꦢꦶꦤꦺꦴ ꦲꦶ ꦆꦩꦺ ꦢ꧀ꦮꦺ ꦥꦸꦒ꧀ꦒꦭꦴ. ꦆꦠꦶ ꦥꦜꦩꦢꦸꦠꦶꦪꦤꦪꦺꦱꦸ ꦮꦸꦠ꧀ꦠꦤꦪꦺꦤꦺꦮ ꦠꦠꦶꦪꦕꦠꦸꦠ꧀ꦡꦤꦪꦺꦱꦸ ꦪꦺꦴꦗꦤꦴ ꦮꦺꦢꦶꦠꦧ꧀ꦧꦴ.

ꦧꦴꦲꦶꦫꦏꦴꦕꦴꦫꦪꦸꦠ꧀ꦠꦺꦴ ꦠꦶꦠ꧀ꦡꦶꦪꦴꦕꦴꦫꦪꦸꦠ꧀ꦠꦺꦴ, ꦤ ꦮꦶꦩꦸꦠ꧀ꦠꦴꦕꦴꦫꦺꦴ. ꦄꦠ꧀ꦠꦴꦤꦁ ꦱꦸꦑꦺꦠ꧀ꦮꦴꦠꦶ ꦄꦣꦩ꧀ꦩꦶꦏꦺꦤ ꦱꦸꦑꦺꦤ ꦄꦠ꧀ꦠꦴꦤꦁ ꦱꦸꦑꦺꦠ꧀ꦮꦴ, ꦠꦺꦤꦴꦲ ‘‘ꦢꦸꦕ꧀ꦕꦫꦶꦠꦴꦤꦶ ꦥꦹꦫꦺꦠ꧀ꦮꦴ’’ꦠꦶ. ‘‘ꦤ ꦢꦴꦤꦶ ꦩꦪꦴ ꦱꦢꦶꦱꦺꦴ ꦄꦠ꧀ꦡꦷ’’ꦠꦶꦄꦴꦢꦶꦤꦴ ꦠꦶꦱ꧀ꦱꦤ꧀ꦤꦁ ꦩꦚ꧀ꦚꦤꦴꦤꦁ ꦮꦱꦺꦤ ꦢꦸꦕ꧀ꦕꦫꦶꦠꦥꦹꦫꦟꦩꦴꦲ. ꦩꦶꦕ꧀ꦖꦴꦢꦶꦛ꧀ꦜꦶꦮꦱꦺꦤꦴꦠꦶ ‘‘ꦤꦠ꧀ꦡꦶ ꦏꦴꦩꦺꦱꦸ ꦢꦺꦴꦱꦺꦴ’’ꦠꦶ ꦌꦮꦁ ꦥꦮꦠ꧀ꦠꦩꦶꦕ꧀ꦖꦴꦢꦶꦛ꧀ꦜꦶꦮꦱꦺꦤ. ꦥꦫꦶꦧ꧀ꦧꦴꦗꦶꦏꦴꦪꦴꦠꦶ ꦥꦧ꧀ꦧꦗ꧀ꦗꦁ ꦈꦥꦒꦠꦴꦪ ꦠꦴꦥꦱꦢꦴꦫꦶꦏꦴꦪ. ꦢꦲꦫꦴꦪꦴꦠꦶ ꦠꦫꦸꦟꦴꦪ. ꦩꦸꦢꦸꦏꦴꦪꦴꦠꦶ ꦱꦸꦑꦸꦩꦴꦭꦴꦪ. ꦭꦺꦴꦩꦱꦴꦪꦴꦠꦶ ꦠꦤꦸꦠꦩ꧀ꦧꦭꦺꦴꦩꦠꦴꦪ ꦄꦥ꧀ꦥꦭꦺꦴꦩꦴꦪ. ꦏꦴꦩꦺꦱꦹꦠꦶ ꦮꦠ꧀ꦡꦸꦏꦴꦩꦺꦱꦸ. ꦥꦴꦠꦧ꧀ꦪꦠꦤ꧀ꦠꦶ ꦥꦫꦶꦨꦸꦚ꧀ꦗꦶꦠꦧ꧀ꦧꦁ, ꦥꦴꦠꦧ꧀ꦪꦠꦤ꧀ꦠꦶ ꦮꦴ ꦥꦫꦶꦨꦸꦚ꧀ꦗꦤꦏꦠꦁ. ꦄꦴꦥꦗ꧀ꦗꦤ꧀ꦠꦺꦴꦠꦶ ꦈꦥꦒꦕ꧀ꦖꦤ꧀ꦠꦺꦴ. ꦥꦫꦶꦨꦺꦴꦒꦠ꧀ꦡꦺꦴ ꦲꦶ ꦄꦪꦁ ꦥꦴ-ꦱꦢ꧀ꦢꦺꦴ, ꦏꦠ꧀ꦠꦸꦱꦴꦣꦤꦺꦴ ꦕ ꦠꦧ꧀ꦧ-ꦱꦢ꧀ꦢꦺꦴ, ꦪꦡꦴꦫꦸꦕꦶ ꦥꦫꦶꦨꦸꦚ꧀ꦗꦤ꧀ꦠꦺꦴꦠꦶ ꦄꦠ꧀ꦡꦺꦴ. ꦏꦶꦭꦺꦱꦏꦴꦩꦺꦴꦥꦶ ꦲꦶ ꦄꦱ꧀ꦱꦴꦢꦶꦪꦩꦴꦤꦺꦴ ꦮꦠ꧀ꦡꦸꦏꦴꦩꦤ꧀ꦠꦺꦴꦒꦣꦺꦴꦪꦺꦮ.

ꦆꦢꦤ꧀ꦠꦶ ꦪꦡꦴꦮꦸꦠ꧀ꦠꦁ ꦄꦠ꧀ꦡꦥ꧀ꦥꦨꦺꦢꦁ ꦮꦶꦨꦗ꧀ꦗꦤꦁ. ꦠꦶꦠ꧀ꦡꦶꦪꦮꦱꦺꦤ ꦄꦴꦒꦠꦁ ꦄꦛ꧀ꦜꦏꦡꦴꦪꦁ ꦠꦡꦴ ꦮꦶꦨꦠ꧀ꦠꦠ꧀ꦠꦴ. ꦱꦴꦱꦤꦺꦥꦷꦠꦶ ꦆꦩꦱ꧀ꦩꦶꦁ ꦱꦴꦱꦤꦺꦥꦶ.

ꦄꦫꦲꦠ꧀ꦠꦁ ꦮꦴ ꦄꦠ꧀ꦠꦤꦶ ꦄꦱꦤ꧀ꦠꦁ ‘‘ꦄꦠ꧀ꦡꦷ’’ꦠꦶ ꦮꦶꦥ꧀ꦥꦛꦶꦗꦴꦤꦶꦠ꧀ꦮꦴ. ꦱꦴꦩꦤ꧀ꦠꦗꦥ꧀ꦥꦤꦁ, ꦥꦕ꧀ꦕꦪꦥꦛꦶꦱꦺꦮꦤꦁ, ꦆꦫꦶꦪꦴꦥꦡꦤꦶꦱ꧀ꦱꦶꦠꦤ꧀ꦠꦶ ꦆꦩꦴꦤꦶ ꦠꦷꦟꦶ ꦮꦴ ꦏꦸꦲꦤꦮꦠ꧀ꦡꦹꦤꦶ. ꦠꦴꦢꦶꦱꦺꦴ ꦮꦴꦠꦶ ꦣꦸꦠꦔ꧀ꦒ- (ꦩꦶ. ꦥ. ꧔.꧒; ꦮꦶꦱꦸꦢ꧀ꦣꦶ. ꧑.꧒꧒) ꦱꦩꦴꦢꦴꦤꦮꦱꦺꦤ ꦭꦹꦑꦴꦗꦷꦮꦷ ꦌꦮ. ꦢꦸꦭ꧀ꦭꦨꦱꦸꦑꦺꦴ ꦨꦮꦶꦱ꧀ꦱꦴꦩꦶ ꦢꦸꦒ꧀ꦒꦠꦷꦱꦸ ꦈꦥꦥꦠ꧀ꦠꦶꦪꦴꦠꦶ ꦄꦣꦶꦥ꧀ꦥꦴꦪꦺꦴ.

꧓꧘꧓. ꦄꦱꦸꦏꦛ꧀ꦜꦴꦤꦠꦺꦴꦠꦶ ꦄꦱꦸꦏꦨꦮꦠꦺꦴ. ꦄꦴꦒꦠꦴꦠꦶ ꦤꦶꦧ꧀ꦧꦠ꧀ꦠꦤꦮꦱꦺꦤ ꦆꦣꦴꦒꦠꦴ. ꦆꦢꦴꦤꦶ ꦒꦤ꧀ꦠꦧ꧀ꦧꦛ꧀ꦜꦴꦤꦤ꧀ꦠꦶ ꦄꦴꦪꦠꦶꦁ ꦤꦶꦧ꧀ꦧꦠ꧀ꦠꦤꦛ꧀ꦜꦴꦤꦁ. ꦥꦸꦤ ꦈꦥꦥꦠ꧀ꦠꦶꦤ꧀ꦠꦶ ꦄꦴꦪꦠꦶꦁ ꦄꦤꦤ꧀ꦠꦫꦨꦮꦠꦺꦴ ꦠꦠꦶꦪꦁ ꦈꦥꦥꦠ꧀ꦠꦶꦁ, ꦥꦸꦤ ꦈꦥꦥꦠ꧀ꦠꦷꦠꦶ ꦥꦸꦤꦥ꧀ꦥꦸꦤꦁ ꦤꦶꦧ꧀ꦧꦠ꧀ꦠꦶ. ꦏꦺꦤ ꦏꦴꦫꦟꦺꦤꦴꦠꦶ ꦪꦡꦴꦨꦹꦠꦁ ꦄꦗꦴꦤꦤ꧀ꦠꦺꦴ ꦲꦶ ꦆꦕ꧀ꦖꦴꦢꦺꦴꦱꦮꦱꦺꦤ ꦪꦁ ꦏꦶꦚ꧀ꦕꦶ ꦒꦫꦲꦺꦪ꧀ꦪ, ꦄꦲꦁ ꦥꦤ ꦪꦡꦴꦨꦹꦠꦁ ꦗꦴꦤꦤ꧀ꦠꦺꦴ ꦱꦧ꧀ꦧꦁ ꦠꦁ ꦏꦺꦤ ꦏꦴꦫꦟꦺꦤ ꦒꦫꦲꦶꦱ꧀ꦱꦴꦩꦶ, ꦠꦁ ꦏꦴꦫꦟꦁ ꦤꦠ꧀ꦡꦷꦠꦶ ꦄꦣꦶꦥ꧀ꦥꦴꦪꦺꦴ, ꦠꦺꦤꦴꦲ ‘‘ꦒꦫꦲꦶꦠꦧ꧀ꦧꦩꦺꦮꦴ’’ꦠꦶꦄꦴꦢꦶ. ꦠꦩꦠ꧀ꦡꦤ꧀ꦠꦶ ꦒꦫꦲꦶꦠꦧ꧀ꦧꦱ꧀ꦱꦺꦮ ꦒꦫꦲꦟꦁ, ꦥꦱꦁꦱꦶꦠꦧ꧀ꦧꦱ꧀ꦱ ꦕ ꦥꦱꦁꦱꦤꦁ.

ꦤ ꦏꦺꦴꦕꦶ ‘‘ꦤ ꦱꦴꦣꦹ’’ꦠꦶ ꦮꦢꦠꦶ ꦢꦶꦛ꧀ꦜꦣꦩ꧀ꦩꦶꦏꦱ꧀ꦱ, ꦱꦩ꧀ꦥꦫꦴꦪꦶꦏꦱ꧀ꦱ ꦕ ꦄꦠ꧀ꦡꦱ꧀ꦱ ꦱꦴꦣꦤꦮꦱꦺꦤꦺꦮ ꦥꦮꦠ꧀ꦠꦶꦪꦴ ꦨꦢ꧀ꦢꦏꦠ꧀ꦠꦴ. ꦥꦚ꧀ꦕꦮꦶꦣꦁ ꦮꦺꦫꦤ꧀ꦠꦶ ꦥꦴꦟꦴꦠꦶꦥꦴꦠꦴꦢꦶꦥꦚ꧀ꦕꦮꦶꦣꦁ ꦮꦺꦫꦁ. ꦠꦚ꧀ꦲꦶ ꦥꦚ꧀ꦕꦮꦶꦣꦱ꧀ꦱ ꦱꦷꦭꦱ꧀ꦱ ꦥꦛꦶꦱꦠ꧀ꦠꦸꦨꦴꦮꦠꦺꦴ, ꦱꦠ꧀ꦠꦴꦤꦁ ꦮꦺꦫꦲꦺꦠꦸꦠꦴꦪ ꦕ ‘‘ꦮꦺꦫ’’ꦤ꧀ꦠꦶ ꦮꦸꦕ꧀ꦕꦠꦶ. ꦠꦠꦺꦴ ꦌꦮ ꦠꦁ ꦤ ꦏꦺꦴꦕꦶ ‘‘ꦱꦴꦣꦹ’’ꦠꦶ ꦮꦢꦠꦶ, ꦠꦡꦴ ꦢꦶꦛ꧀ꦜꦣꦩ꧀ꦩꦶꦏꦴꦢꦶꦄꦠ꧀ꦡꦴꦤꦁ ꦄꦱꦴꦣꦤꦠꦺꦴ, ꦱꦠ꧀ꦠꦴꦤꦁ ꦱꦴꦣꦸꦨꦴꦮꦱ꧀ꦱ ꦕ ꦢꦹꦱꦤꦠꦺꦴ. ꦤ ꦤꦶꦫꦸꦤ꧀ꦣꦶꦠꦧ꧀ꦧꦤ꧀ꦠꦶ ꦫꦹꦥꦒ꧀ꦒꦲꦟꦺ ꦤ ꦤꦶꦮꦴꦫꦺꦠꦧ꧀ꦧꦁ. ꦢꦱ꧀ꦱꦤꦷꦪꦢꦱ꧀ꦱꦤꦠ꧀ꦡꦺꦴ ꦲꦶ ꦕꦏ꧀ꦑꦸꦥꦛꦶꦭꦴꦨꦺꦴꦠꦶ ꦠꦺꦱꦁ ꦄꦣꦶꦥ꧀ꦥꦴꦪꦺꦴ. ꦪꦢꦒ꧀ꦒꦺꦤ ꦠꦺꦱꦁ ꦥꦚ꧀ꦕꦢ꧀ꦮꦴꦫꦺ ꦄꦱꦁꦮꦫꦺꦴ ꦱꦴꦣꦸ, ꦠꦢꦒ꧀ꦒꦺꦤ ꦠꦠ꧀ꦡ ꦱꦁꦮꦫꦺꦴ ꦤ ꦱꦴꦣꦹꦠꦶ ꦄꦴꦲ ‘‘ꦥꦸꦤ ꦪꦁ ꦠꦺ ꦌꦏꦕ꧀ꦕꦤ꧀ꦠꦶ ꦥꦚ꧀ꦕꦢ꧀ꦮꦴꦫꦺ ꦱꦁꦮꦫ’’ꦤ꧀ꦠꦶ.

ꦄꦡ ꦮꦴ ꦪꦁ ꦠꦺ ꦌꦏꦕ꧀ꦕꦁ ꦮꦢꦤ꧀ꦠꦶ ‘‘ꦱꦴꦣꦹ’’ꦠꦶ ꦠꦺ ‘‘ꦌꦏꦺ ꦱꦩꦟꦧ꧀ꦫꦴꦲ꧀ꦩꦟꦴ’’ꦠꦶ ꦮꦸꦠ꧀ꦠꦴ ꦠꦶꦠ꧀ꦡꦶꦪꦴ ꦪꦁ ꦄꦠ꧀ꦠꦏꦶꦭꦩꦡꦴꦤꦸꦪꦺꦴꦒꦴꦢꦶꦁ ‘‘ꦱꦴꦣꦹ’’ꦠꦶ ꦮꦢꦤ꧀ꦠꦶ, ꦩꦪꦁ ꦠꦁ ꦤ ‘‘ꦱꦴꦣꦹ’’ꦠꦶ ꦮꦢꦴꦩ. ꦪꦁ ꦠꦺ ꦌꦏꦕ꧀ꦕꦁ ꦮꦢꦤ꧀ꦠꦶ ‘‘ꦤ ꦱꦴꦣꦹ’’ꦠꦶ ꦪꦁ ꦥꦤ ꦠꦺ ꦄꦤꦮꦗ꧀ꦗꦥꦕ꧀ꦕꦪꦥꦫꦶꦨꦺꦴꦒꦁ, ꦱꦸꦤꦶꦮꦠ꧀ꦡꦱꦸꦥꦴꦫꦸꦥꦤꦴꦢꦶꦱꦩ꧀ꦩꦴꦥꦛꦶꦥꦠ꧀ꦠꦶꦚ꧀ꦕ ‘‘ꦤ ꦱꦴꦣꦹ’’ꦠꦶ ꦮꦢꦤ꧀ꦠꦶ, ꦠꦁ ꦩꦪꦁ ‘‘ꦱꦴꦣꦹ’’ꦠꦶ ꦮꦢꦴꦩꦴꦠꦶ ꦌꦮꦁ ꦥꦺꦠ꧀ꦡ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴ.

ꦌꦮꦁ ꦪꦁ ꦥꦫꦮꦴꦢꦩꦹꦭꦏꦁ ꦕꦠꦸꦏ꧀ꦏꦁ ꦢꦱ꧀ꦱꦶꦠꦁ, ꦠꦢꦺꦮ ꦥꦸꦤ ꦱꦏꦮꦴꦢꦩꦹꦭꦏꦁ ꦏꦠ꧀ꦮꦴ ꦢꦱ꧀ꦱꦶꦠꦤ꧀ꦠꦶ ꦥꦏꦴꦱꦺꦤ꧀ꦠꦺꦴ ‘‘ꦌꦮ’’ꦤ꧀ꦠꦶꦄꦴꦢꦶꦩꦴꦲ. ꦪꦚ꧀ꦲꦶ ꦏꦶꦚ꧀ꦕꦶ ꦏꦺꦤꦕꦶ ꦱꦩꦴꦤꦁ, ꦠꦺꦤꦥꦶ ꦠꦁ ꦱꦩꦴꦤꦩꦺꦮ, ꦠꦡꦴ ꦄꦱꦩꦴꦤꦁ ꦥꦷꦠꦶ. ꦱꦩꦴꦤꦴꦱꦩꦴꦤꦠꦤ꧀ꦠꦶ ꦱꦩꦴꦤꦴꦱꦩꦴꦤꦠꦴꦩꦠ꧀ꦠꦁ. ꦄꦤꦮꦱꦺꦱꦠꦺꦴ ꦲꦶ ꦥꦲꦴꦠꦧ꧀ꦧꦴꦤꦁ ꦣꦩ꧀ꦩꦴꦤꦁ ꦥꦲꦴꦤꦁ ꦱꦏꦮꦴꦢꦺ ꦢꦶꦱ꧀ꦱꦠꦶ, ꦤ ꦥꦫꦮꦴꦢꦺ. ꦠꦡꦴ ꦥꦫꦶꦥꦸꦟ꧀ꦟꦩꦺꦮ ꦕ ꦈꦥꦱꦩ꧀ꦥꦴꦢꦺꦠꦧ꧀ꦧꦣꦩ꧀ꦩꦴꦤꦁ ꦈꦥꦱꦩ꧀ꦥꦴꦢꦤꦁ ꦱꦏꦮꦴꦢꦺ, ꦤ ꦥꦫꦮꦴꦢꦺ. ꦠꦺꦤ ꦮꦸꦠ꧀ꦠꦁ ‘‘ꦠ꧀ꦪꦴꦲ’’ꦤ꧀ꦠꦶꦄꦴꦢꦶ.

ꦱꦩꦤꦸꦪꦸꦚ꧀ꦗꦴꦥꦤꦏꦡꦴꦮꦟ꧀ꦟꦤꦴ

꧓꧘꧕. ꦭꦢ꧀ꦣꦶꦁ ꦥꦸꦕ꧀ꦖꦤ꧀ꦠꦺꦴꦠꦶ ‘‘ꦏꦶꦁ ꦱꦩꦟꦺꦴ ꦒꦺꦴꦠꦩꦺꦴ ꦱꦁꦏꦶꦭꦺꦱꦣꦩ꧀ꦩꦺ ꦄꦤꦮꦱꦺꦱꦁ ꦥꦲꦴꦪ ꦮꦠ꧀ꦠꦠꦶ, ꦈꦢꦴꦲꦸ ꦥꦫꦺ ꦒꦟꦴꦕꦫꦶꦪꦴ. ꦌꦠ꧀ꦡ ꦠꦴꦮ ꦄꦠ꧀ꦠꦤꦺꦴ ꦭꦢ꧀ꦣꦶꦁ ꦮꦢꦴ’’ꦠꦶ ꦭꦢ꧀ꦣꦶꦁ ꦥꦸꦕ꧀ꦖꦤ꧀ꦠꦺꦴ. ꦏꦴꦫꦟꦁ ꦥꦸꦕ꧀ꦖꦤ꧀ꦠꦺꦴꦠꦶ ‘‘ꦱꦩꦟꦺꦴ ꦒꦺꦴꦠꦩꦺꦴ ꦱꦁꦏꦶꦭꦺꦱꦣꦩ꧀ꦩꦺ ꦄꦤꦮꦱꦺꦱꦁ ꦥꦲꦴꦪ ꦮꦠ꧀ꦠꦠꦷ’’ꦠꦶ ꦮꦸꦠ꧀ꦠꦺ ‘‘ꦏꦺꦤ ꦏꦴꦫꦟꦺꦤ ꦌꦮꦩꦠ꧀ꦡꦁ ꦒꦴꦲꦪꦴ’’ꦠꦶ ꦏꦴꦫꦟꦁ ꦥꦸꦕ꧀ꦖꦤ꧀ꦠꦺꦴ. ꦈꦨꦪꦁ ꦥꦸꦕ꧀ꦖꦤ꧀ꦠꦺꦴꦠꦶ ‘‘ꦆꦢꦁ ꦤꦴꦩꦺꦠ꧀ꦡ ꦏꦴꦫꦟ’’ꦤ꧀ꦠꦶ ꦏꦴꦫꦟꦁ ꦮꦠ꧀ꦮꦴ ꦥꦛꦶꦚ꧀ꦚꦴꦠꦺ ꦄꦠ꧀ꦡꦺ ꦱꦴꦣꦶꦪꦩꦴꦤꦺ ꦄꦤ꧀ꦮꦪꦠꦺꦴ, ꦧ꧀ꦪꦠꦶꦫꦺꦏꦠꦺꦴ ꦕ ꦏꦴꦫꦟꦁ ꦱꦩꦠ꧀ꦡꦺꦠꦸꦁ ꦱꦢꦶꦱꦴꦱꦢꦶꦱꦨꦺꦢꦁ ꦈꦥꦩꦺꦴꦢꦴꦲꦫꦟꦢ꧀ꦮꦪꦁ ꦥꦸꦕ꧀ꦖꦤ꧀ꦠꦺꦴ, ꦈꦨꦪꦁ ꦥꦸꦕ꧀ꦖꦤ꧀ꦠꦺꦴ ꦏꦴꦫꦟꦱ꧀ꦱ ꦕ ꦠꦶꦭꦏ꧀ꦑꦟꦱꦩ꧀ꦥꦠ꧀ꦠꦶꦪꦴ ꦪꦡꦴꦥꦛꦶꦚ꧀ꦚꦴꦠꦺ ꦄꦠ꧀ꦡꦺ ꦱꦴꦣꦶꦠꦺ ꦱꦩ꧀ꦩꦢꦺꦮ ꦄꦤꦸꦥꦕ꧀ꦖꦴ ꦨꦴꦱꦤ꧀ꦠꦺꦴ ꦤꦶꦒꦩꦺꦤ꧀ꦠꦺꦴ ꦱꦩꦤꦸꦨꦴꦱꦠꦶ ꦤꦴꦩ. ꦈꦥꦱꦁꦲꦫꦶꦠ꧀ꦮꦴꦠꦶ ꦈꦥꦤꦺꦠ꧀ꦮꦴ. ‘‘ꦏꦶꦁ ꦠꦺ’’ꦠꦶꦄꦴꦢꦶ ꦈꦥꦱꦁꦲꦫꦟꦴꦏꦴꦫꦢꦱ꧀ꦱꦤꦁ. ꦢꦸꦠꦶꦪꦥꦢꦺꦠꦶ ‘‘ꦱꦔ꧀ꦓꦺꦤ ꦮꦴ ꦱꦔ꧀ꦓ’’ꦤ꧀ꦠꦶ ꦆꦩꦱ꧀ꦩꦶꦁ ꦥꦢꦺ.

ꦠꦩꦠ꧀ꦡꦤ꧀ꦠꦶ ꦠꦁ ꦥꦲꦴꦠꦧ꧀ꦧꦣꦩ꧀ꦩꦴꦤꦁ ꦄꦤꦮꦱꦺꦱꦁ ꦥꦲꦴꦪ ꦮꦠ꧀ꦠꦤꦱꦔ꧀ꦑꦴꦠꦚ꧀ꦕ ꦱꦩꦴꦢꦴꦠꦧ꧀ꦧꦣꦩ꧀ꦩꦴꦤꦁ ꦄꦤꦮꦱꦺꦱꦁ ꦱꦩꦴꦢꦴꦪ ꦮꦠ꧀ꦠꦤꦱꦔ꧀ꦑꦴꦠꦚ꧀ꦕ ꦄꦠ꧀ꦡꦁ. ꦪꦺꦴꦗꦺꦠ꧀ꦮꦴꦠꦶ ꦄꦏꦸꦱꦭꦴꦢꦶꦥꦢꦺꦲꦶ ꦪꦺꦴꦗꦺꦠ꧀ꦮꦴ. ꦄꦏꦺꦴꦱꦭ꧀ꦭꦱꦩ꧀ꦨꦹꦠꦛ꧀ꦜꦺꦤ ꦄꦏꦸꦱꦭꦴ ꦕꦺꦮ ꦠꦠꦺꦴꦪꦺꦮ ꦄꦏꦸꦱꦭꦴꦠꦶ ꦕ ꦱꦔ꧀ꦑꦁ ꦒꦠꦴꦠꦶ ꦱꦔ꧀ꦑꦴꦠꦴ ꦠꦠ꧀ꦡ ꦥꦸꦫꦶꦩꦥꦢꦺꦤ ꦌꦏꦤ꧀ꦠꦴꦏꦸꦱꦭꦺ ꦮꦢꦠꦶ, ꦢꦸꦠꦶꦪꦥꦢꦺꦤ ꦠꦁꦱꦲꦒꦠꦺ, ꦠꦁꦥꦏ꧀ꦑꦶꦪꦺ ꦕ, ꦠꦺꦤꦴꦲ ‘‘ꦏꦺꦴꦛ꧀ꦜꦴꦱꦁ ꦮꦴ ꦏꦠ꧀ꦮꦴ ꦜꦥꦶꦠꦴ’’ꦠꦶ, ꦄꦏꦸꦱꦭꦥꦏ꧀ꦑꦶꦪꦨꦴꦮꦺꦤ ꦮꦮꦠ꧀ꦡꦴꦥꦶꦠꦴꦠꦶ ꦄꦠ꧀ꦡꦺꦴ. ꦄꦮꦗ꧀ꦗꦛ꧀ꦜꦺꦴ ꦢꦺꦴꦱꦛ꧀ꦜꦺꦴ ꦒꦴꦫꦪ꧀ꦲꦥꦫꦶꦪꦴꦪꦠ꧀ꦠꦴꦠꦶ ꦄꦴꦲ ‘‘ꦱꦴꦮꦗ꧀ꦗꦴꦠꦶ ꦱꦢꦺꦴꦱꦴ’’ꦠꦶ. ꦄꦫꦶꦪꦴ ꦤꦴꦩ ꦤꦶꦢ꧀ꦢꦺꦴꦱꦴ, ꦆꦩꦺ ꦥꦤ ꦏꦠ꧀ꦡꦕꦶꦥꦶ ꦤꦶꦢ꧀ꦢꦺꦴꦱꦴ ꦤ ꦲꦺꦴꦤ꧀ꦠꦷꦠꦶ ꦤꦶꦢ꧀ꦢꦺꦴꦱꦛ꧀ꦜꦺꦤ ꦄꦫꦶꦪꦴ ꦨꦮꦶꦠꦸꦁ ꦤꦴꦭꦁ ꦄꦱꦩꦠ꧀ꦡꦴ.

꧓꧘꧖-꧓꧙꧒. ꦪꦤ꧀ꦠꦶ ꦏꦴꦫꦟꦺ ꦌꦠꦁ ꦥꦕ꧀ꦕꦠ꧀ꦠꦮꦕꦤꦤ꧀ꦠꦶ ꦄꦴꦲ ‘‘ꦪꦺꦤ ꦮꦶꦚ꧀ꦚꦹ’’ꦠꦶ. ꦪꦁ ꦮꦴ ꦥꦤꦴꦠꦶ ‘‘ꦪꦁ ꦥꦤ ꦏꦶꦚ꧀ꦕꦷ’’ꦠꦶ ꦄꦱꦩ꧀ꦨꦴꦮꦤꦮꦕꦤꦩꦺꦠꦤ꧀ꦠꦶ ꦄꦴꦲ ‘‘ꦪꦁ ꦮꦴ ꦠꦁ ꦮꦴ ꦄꦥ꧀ꦥꦩꦠ꧀ꦠꦏ’’ꦤ꧀ꦠꦶ. ꦒꦟꦴꦕꦫꦶꦪꦴ ꦥꦹꦫꦟꦴꦢꦪꦺꦴ. ꦱꦠ꧀ꦡꦸꦥ꧀ꦥꦨꦮꦠ꧀ꦠꦴ ꦱꦔ꧀ꦓꦱ꧀ꦱ ꦱꦔ꧀ꦓꦱꦩ꧀ꦥꦠ꧀ꦠꦶꦪꦴꦥꦶ ꦱꦠ꧀ꦡꦸꦱꦩ꧀ꦥꦠ꧀ꦠꦶ ꦮꦶꦨꦴꦮꦷꦪꦠꦷꦠꦶ ꦄꦴꦲ ‘‘ꦱꦔ꧀ꦓꦥꦱꦁꦱꦴꦪꦥꦶ ꦱꦠ꧀ꦡꦸꦪꦺꦮ ꦥꦱꦁꦱꦴꦱꦶꦢ꧀ꦣꦶꦠꦺꦴ’’ꦠꦶ. ꦱꦴ ꦥꦤ ꦥꦱꦁꦱꦴ ꦥꦱꦴꦢꦲꦺꦠꦸꦏꦴꦠꦶ ꦥꦱꦴꦢꦩꦸꦑꦺꦤ ꦠꦁ ꦢꦱ꧀ꦱꦺꦠꦸꦁ ‘‘ꦥꦱꦷꦢꦩꦴꦤꦴꦥꦶ ꦲꦷ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦠ꧀ꦡ ꦥꦶ-ꦱꦢ꧀ꦢꦺꦤ ꦪꦡꦴ ꦄꦤ꧀ꦮꦪꦠꦺꦴ ꦥꦱꦁꦱꦴ ꦱꦩꦸꦕ꧀ꦕꦷꦪꦠꦶ, ꦌꦮꦁ ꦱꦠ꧀ꦡꦸꦮꦶꦥ꧀ꦥꦛꦶꦥꦠ꧀ꦠꦶꦪꦴ ꦱꦴꦮꦏꦺꦱꦸ, ꦱꦴꦮꦏꦮꦶꦥ꧀ꦥꦛꦶꦥꦠ꧀ꦠꦶꦪꦴ ꦕ ꦱꦠ꧀ꦡꦫꦶ ꦄꦥ꧀ꦥꦱꦴꦢꦺꦴ ꦱꦩꦸꦕ꧀ꦕꦷꦪꦠꦷꦠꦶ ꦢꦛ꧀ꦜꦧ꧀ꦧꦁ. ꦱꦫꦷꦫꦱꦩ꧀ꦥꦠ꧀ꦠꦶꦤ꧀ꦠꦶ ꦫꦹꦥꦱꦩ꧀ꦥꦠ꧀ꦠꦶꦁ, ꦫꦹꦥꦏꦴꦪꦥꦴꦫꦶꦥꦹꦫꦶꦤ꧀ꦠꦶ ꦄꦠ꧀ꦡꦺꦴ. ꦨꦮꦤ꧀ꦠꦶ ꦮꦠ꧀ꦠꦴꦫꦺꦴ ꦫꦹꦥꦥ꧀ꦥꦩꦴꦟꦴ, ꦓꦺꦴꦱꦣꦩ꧀ꦩꦥ꧀ꦥꦩꦴꦟꦴ ꦕ. ꦥꦸꦤ ꦨꦮꦤ꧀ꦠꦶ ꦮꦠ꧀ꦠꦴꦫꦺꦴꦠꦶ ꦣꦩ꧀ꦩꦥ꧀ꦥꦩꦴꦟꦮꦱꦺꦤꦺꦮ ꦪꦺꦴꦗꦺꦠꦧ꧀ꦧꦁ. ꦪꦴ ꦱꦔ꧀ꦓꦱ꧀ꦱ ꦥꦱꦁꦱꦴꦠꦶ ꦄꦴꦤꦺꦠ꧀ꦮꦴ ꦱꦩ꧀ꦧꦤ꧀ꦣꦺꦴ.

ꦠꦠ꧀ꦡ ꦪꦴ ꦧꦸꦢ꧀ꦣꦴꦤꦁ, ꦧꦸꦢ꧀ꦣꦱꦴꦮꦏꦴꦤꦁꦪꦺꦮ ꦕ ꦥꦴꦱꦁꦱꦠꦴ, ꦄꦚ꧀ꦚꦺꦱꦚ꧀ꦕ ꦠꦢꦨꦴꦮꦺꦴ ꦗꦺꦴꦠꦶꦠꦺꦴ, ꦠꦁ ꦮꦶꦫꦠꦶꦥ꧀ꦥꦲꦴꦤꦱꦁꦮꦫꦸꦢ꧀ꦢꦺꦱꦮꦱꦺꦤ ꦤꦷꦲꦫꦶꦠ꧀ꦮꦴ ꦢꦱ꧀ꦱꦺꦠꦸꦁ ‘‘ꦄꦪꦩꦣꦶꦥ꧀ꦥꦴꦪꦺꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦠ꧀ꦡ ꦱꦺꦠꦸꦓꦴꦠꦮꦶꦫꦠꦶ ꦤꦴꦩ ꦄꦫꦶꦪꦩꦒ꧀ꦒꦮꦶꦫꦠꦶ. ꦮꦶꦥꦱ꧀ꦱꦤꦴꦩꦠ꧀ꦠꦮꦱꦺꦤꦴꦠꦶ ‘‘ꦄꦤꦶꦕ꧀ꦕ’’ꦤ꧀ꦠꦶ ꦮꦴ ‘‘ꦢꦸꦏ꧀ꦑ’’ꦤ꧀ꦠꦶ ꦮꦴ ꦮꦶꦮꦶꦣꦁ ꦢꦱ꧀ꦱꦤꦩꦠ꧀ꦠꦮꦱꦺꦤ, ꦤ ꦥꦤ ꦤꦴꦩꦫꦹꦥꦮꦮꦠ꧀ꦡꦴꦤꦥꦕ꧀ꦕꦪꦥꦫꦶꦒ꧀ꦒꦟ꧀ꦲꦤꦥꦸꦧ꧀ꦧꦏꦁ ꦭꦏ꧀ꦑꦟꦠ꧀ꦠꦪꦁ ꦄꦴꦫꦺꦴꦥꦺꦠ꧀ꦮꦴ ꦱꦔ꧀ꦑꦴꦫꦴꦤꦁ ꦱꦩ꧀ꦩꦱꦤꦮꦱꦺꦤ. ꦆꦠꦫꦴꦤꦷꦠꦶ ꦱꦩꦸꦕ꧀ꦖꦺꦢꦥꦛꦶꦥ꧀ꦥꦱ꧀ꦱꦢ꧀ꦣꦶꦤꦶꦱ꧀ꦱꦫꦟꦥ꧀ꦥꦲꦴꦤꦴꦤꦶ. ‘‘ꦱꦺꦱ’’ꦤ꧀ꦠꦶ ꦥꦚ꧀ꦕꦱꦷꦭꦠꦺꦴ ꦄꦚ꧀ꦚꦺꦴ ꦱꦧ꧀ꦧꦺꦴ ꦱꦷꦭꦱꦁꦮꦫꦺꦴ, ‘‘ꦑꦩꦺꦴ ꦲꦺꦴꦠꦷ’’ꦠꦶꦄꦴꦢꦶꦤꦴ (ꦩ. ꦤꦶ. ꧑.꧒꧔; ꧓.꧑꧕꧙; ꦄ. ꦤꦶ. ꧔.꧑꧑꧔) ꦮꦸꦠ꧀ꦠꦺꦴ ꦱꦸꦥꦫꦶꦱꦸꦢ꧀ꦣꦺꦴ ꦑꦤ꧀ꦠꦶꦱꦁꦮꦫꦺꦴ, ‘‘ꦥꦚ꧀ꦚꦴꦪꦺꦠꦺ ꦥꦶꦣꦶꦪ꧀ꦪꦫꦺ’’ꦠꦶ (ꦱꦸ. ꦤꦶ. ꧑꧐꧔꧑; ꦕꦹꦭ꦳ꦤꦶ. ꧖꧐) ꦌꦮꦁ ꦮꦸꦠ꧀ꦠꦺꦴ ꦏꦶꦭꦺꦱꦴꦤꦁ ꦱꦩꦸꦕ꧀ꦖꦺꦢꦏꦺꦴ ꦩꦒ꧀ꦒꦚꦴꦟꦱꦔ꧀ꦑꦴꦠꦺꦴ ꦚꦴꦟꦱꦁꦮꦫꦺꦴ, ꦩꦤꦕ꧀ꦖꦛ꧀ꦜꦴꦤꦁ ꦆꦤ꧀ꦢ꧀ꦫꦶꦪꦴꦤꦁ ꦥꦶꦢꦲꦤꦮꦱꦺꦤ ꦥꦮꦠ꧀ꦠꦺꦴ ꦥꦫꦶꦱꦸꦢ꧀ꦣꦺꦴ ꦆꦤ꧀ꦢ꧀ꦫꦶꦪꦱꦁꦮꦫꦺꦴ, ‘‘ꦄꦤꦸꦥ꧀ꦥꦤ꧀ꦤꦴꦤꦁ ꦥꦴꦥꦏꦴꦤꦁ ꦄꦏꦸꦱꦭꦴꦤꦁ ꦣꦩ꧀ꦩꦴꦤꦁ ꦄꦤꦸꦥ꧀ꦥꦴꦢꦴꦪꦴ’’ꦠꦶꦄꦴꦢꦶꦤꦴ (ꦢꦷ. ꦤꦶ. ꧒.꧔꧐꧒; ꦩ. ꦤꦶ. ꧑.꧑꧓꧕; ꦱꦁ. ꦤꦶ. ꧕.꧘; ꦮꦶꦨ. ꧒꧐꧕) ꦮꦸꦠ꧀ꦠꦺꦴ ꦱꦩ꧀ꦩꦥ꧀ꦥꦣꦴꦤꦱꦔ꧀ꦑꦴꦠꦺꦴ ꦮꦷꦫꦶꦪꦱꦁꦮꦫꦺꦴꦠꦶ ꦆꦩꦁ ꦱꦁꦮꦫꦥꦚ꧀ꦕꦏꦁ ꦱꦤ꧀ꦣꦴꦪꦴꦲ. ꦥꦚ꧀ꦕ ꦑꦺꦴ ꦥꦤꦶꦩꦺ ꦥꦴꦠꦶꦩꦺꦴꦏ꧀ꦑꦸꦢ꧀ꦢꦺꦱꦴꦠꦶꦄꦴꦢꦶ ꦱꦴꦱꦤꦺ ꦱꦷꦭꦱ꧀ꦱ ꦧꦲꦸꦨꦴꦮꦁ ꦢꦱ꧀ꦱꦺꦠ꧀ꦮꦴ ꦠꦢꦺꦏꦢꦺꦱꦺ ꦌꦮ ꦥꦫꦺꦱꦁ ꦄꦮꦛ꧀ꦜꦴꦤꦢꦱ꧀ꦱꦤꦠ꧀ꦡꦁ ꦪꦡꦴꦮꦸꦠ꧀ꦠꦱꦷꦭꦱꦁꦮꦫꦱ꧀ꦱꦺꦮ ꦥꦸꦤ ꦒꦲꦟꦁ.

ꦄꦫꦶꦪꦄꦛ꧀ꦜꦔ꧀ꦒꦶꦏꦩꦒ꧀ꦒꦮꦟ꧀ꦟꦤꦴ

꧓꧙꧓. ꦱꦷꦲꦤꦴꦢꦤ꧀ꦠꦶ ꦱꦺꦛ꧀ꦜꦤꦴꦢꦁ, ꦄꦨꦷꦠꦤꦴꦢꦁ ꦏꦺꦤꦕꦶ ꦄꦥ꧀ꦥꦛꦶꦮꦠ꧀ꦠꦶꦪꦤꦴꦢꦤ꧀ꦠꦶ ꦄꦠ꧀ꦡꦺꦴ. ‘‘ꦄꦪꦁ ꦪꦡꦴꦮꦸꦠ꧀ꦠꦺꦴ ꦩꦩ ꦮꦴꦢꦺꦴ ꦄꦮꦶꦥꦫꦷꦠꦺꦴ, ꦠꦱ꧀ꦱ ꦄꦮꦶꦥꦫꦷꦠꦨꦴꦮꦺꦴ ꦆꦩꦁ ꦩꦒ꧀ꦒꦁ ꦥꦛꦶꦥꦗ꧀ꦗꦶꦠ꧀ꦮꦴ ꦄꦥꦫꦥ꧀ꦥꦕ꧀ꦕꦪꦠꦺꦴ ꦗꦴꦤꦶꦠꦧ꧀ꦧꦺꦴ’’ꦠꦶ ꦌꦮꦁ ꦄꦮꦶꦥꦫꦷꦠꦨꦴꦮꦴꦮꦧꦺꦴꦣꦤꦠ꧀ꦡꦁ. ‘‘ꦄꦠ꧀ꦡꦶ ꦏꦱ꧀ꦱꦥꦴ’’ꦠꦶꦄꦴꦢꦷꦱꦸ ꦪꦁ ꦩꦒ꧀ꦒꦁ ꦥꦛꦶꦥꦤ꧀ꦤꦺꦴ ꦱꦩꦟꦺꦴ ꦒꦺꦴꦠꦩꦺꦴ ꦮꦢꦤ꧀ꦠꦺꦴ ꦪꦸꦠ꧀ꦠꦥꦠ꧀ꦠꦏꦴꦭꦺ, ꦠꦡꦨꦴꦮꦠꦺꦴ ꦨꦹꦠꦁ, ꦌꦏꦁꦱꦠꦺꦴ ꦲꦶꦠꦴꦮꦶꦲꦨꦴꦮꦺꦤ ꦄꦠ꧀ꦡꦁ, ꦣꦩ꧀ꦩꦠꦺꦴ ꦄꦤꦥꦺꦠꦠ꧀ꦠꦴ ꦣꦩ꧀ꦩꦁ, ꦮꦶꦤꦪꦪꦺꦴꦒꦠꦺꦴ ꦥꦫꦺꦱꦁ ꦮꦶꦤꦪꦤꦠꦺꦴ ꦕ ꦮꦶꦤꦪꦁ ꦮꦢꦠꦷꦠꦶ ꦱꦴꦩꦁꦪꦺꦮ ꦄꦠ꧀ꦠꦥꦕ꧀ꦕꦏ꧀ꦑꦠꦺꦴꦮ ꦗꦴꦤꦶꦱ꧀ꦱꦠꦶ, ꦱꦺꦴ ꦩꦪꦴ ꦱꦪꦁ ꦄꦨꦶꦚ꧀ꦚꦴ ꦱꦕ꧀ꦖꦶꦏꦠ꧀ꦮꦴ ꦥꦮꦺꦢꦶꦠꦺꦴ ꦱꦏꦭꦮꦛ꧀ꦛꦢꦸꦏ꧀ꦑꦤꦶꦱ꧀ꦱꦫꦟꦨꦹꦠꦺꦴ ꦄꦠ꧀ꦡꦶ ꦏꦱ꧀ꦱꦥ ꦩꦒ꧀ꦒꦺꦴ, ꦠꦱ꧀ꦱ ꦕ ꦄꦣꦶꦒꦩꦹꦥꦴꦪꦨꦹꦠꦴ ꦥꦸꦧ꧀ꦧꦨꦴꦒꦥꦛꦶꦥꦢꦴꦠꦶ ꦄꦪꦩꦺꦠ꧀ꦡ ꦪꦺꦴꦗꦤꦴ. ꦠꦺꦤ ‘‘ꦱꦩꦟꦺꦴ ꦒꦺꦴꦠꦩꦺꦴ ꦆꦩꦺ ꦣꦩ꧀ꦩꦺ’’ꦠꦶꦄꦴꦢꦶꦤꦪꦥ꧀ꦥꦮꦠ꧀ꦠꦺꦴ ꦮꦴꦢꦺꦴ ꦏꦺꦤꦕꦶ ꦄꦱꦁꦏꦩ꧀ꦥꦶꦪꦺꦴ ꦪꦡꦴꦨꦹꦠꦱꦷꦲꦤꦴꦢꦺꦴꦠꦶ ꦢꦱ꧀ꦱꦺꦠꦶ.

‘‘ꦌꦮꦩꦺꦠꦁ ꦪꦡꦴꦨꦹꦠꦁ ꦱꦩ꧀ꦩꦥ꧀ꦥꦚ꧀ꦚꦴꦪ ꦥꦱ꧀ꦱꦠꦷ’’ꦠꦶꦄꦴꦢꦷꦱꦸ (ꦄ. ꦤꦶ. ꧓.꧑꧓꧔) ꦮꦶꦪ ꦩꦒ꧀ꦒꦚ꧀ꦕ ꦥꦛꦶꦥꦢꦚ꧀ꦕ ꦌꦏꦠꦺꦴ ꦏꦠ꧀ꦮꦴ ꦢꦱ꧀ꦱꦺꦤ꧀ꦠꦺꦴ. ‘‘ꦄꦪꦩꦺꦮꦴ’’ꦠꦶ ꦮꦕꦤꦁ ꦩꦒ꧀ꦒꦱ꧀ꦱ ꦥꦸꦡꦸꦨꦴꦮꦥꦛꦶꦏ꧀ꦑꦺꦥꦤꦠ꧀ꦡꦁ, ꦱꦧ꧀ꦧꦄꦫꦶꦪꦱꦴꦣꦴꦫꦟꦨꦴꦮꦢꦱ꧀ꦱꦤꦠ꧀ꦡꦁ, ꦱꦴꦱꦤꦺ ꦥꦴꦏꦛꦨꦴꦮꦢꦱ꧀ꦱꦤꦠ꧀ꦡꦚ꧀ꦕ. ꦠꦺꦤꦴꦲ ‘‘ꦌꦏꦴꦪꦤꦺꦴ ꦄꦪꦁ ꦨꦶꦏ꧀ꦑꦮꦺ ꦩꦒ꧀ꦒꦺꦴ’’ꦠꦶ, (ꦢꦷ. ꦤꦶ. ꧒.꧓꧗꧓; ꦩ. ꦤꦶ. ꧑.꧑꧐꧖; ꦱꦁ. ꦤꦶ. ꧕.꧓꧖꧗, ꧓꧘꧔, ꧔꧐꧙)‘‘ꦌꦱꦺꦮ ꦩꦒ꧀ꦒꦺꦴ ꦤꦠ꧀ꦡꦚ꧀ꦚꦺꦴ ꦢꦱ꧀ꦱꦤꦱ꧀ꦱ ꦮꦶꦱꦸꦢ꧀ꦣꦶꦪꦴ’’ꦠꦶ (ꦣ. ꦥ. ꧒꧗꧔),

‘‘ꦌꦏꦴꦪꦤꦁ ꦗꦴꦠꦶꦑꦪꦤ꧀ꦠꦢꦱ꧀ꦱꦷ,

ꦩꦒ꧀ꦒꦁ ꦥꦗꦴꦤꦴꦠꦶ ꦲꦶꦠꦴꦤꦸꦏꦩ꧀ꦥꦷ;

ꦌꦠꦺꦤ ꦩꦒ꧀ꦒꦺꦤ ꦠꦫꦶꦁꦱꦸ ꦥꦸꦧ꧀ꦧꦺ,

ꦠꦫꦶꦱ꧀ꦱꦤ꧀ꦠꦶ ꦪꦺ ꦕ ꦠꦫꦤ꧀ꦠꦶ ꦎꦓ’’ꦤ꧀ꦠꦶ. (ꦱꦁ. ꦤꦶ. ꧕.꧓꧘꧔, ꧔꧐꧙; ꦩꦲꦴꦤꦶ. ꧑꧙꧑; ꦕꦹꦭ꦳ꦤꦶ. ꧑꧐꧗, ꧑꧒꧑; ꦤꦺꦠ꧀ꦠꦶ. ꧑꧗꧐);

ꦱꦧ꧀ꦧꦺꦱꦸ ꦱꦸꦠ꧀ꦠꦥꦢꦺꦱꦺꦱꦸ ꦄꦨꦶꦣꦩ꧀ꦩꦥꦢꦺꦱꦺꦱꦸ ꦕ ꦌꦏꦺꦴꦮꦴꦪꦁ ꦩꦒ꧀ꦒꦺꦴ ꦥꦴꦏꦛꦺꦴ ꦥꦚ꧀ꦚꦴꦠꦺꦴ ꦄꦴꦒꦠꦺꦴ ꦕꦴꦠꦶ.

ꦠꦥꦺꦴꦥꦏ꧀ꦏꦩꦏꦡꦴꦮꦟ꧀ꦟꦤꦴ

꧓꧙꧔. ꦠꦥꦺꦴꦪꦺꦮ ꦈꦥꦏ꧀ꦏꦩꦶꦠꦧ꧀ꦧꦠꦺꦴ ꦄꦴꦫꦨꦶꦠꦧ꧀ꦧꦠꦺꦴ ꦠꦥꦺꦴꦥꦏ꧀ꦏꦩꦺꦴꦠꦶ ꦄꦴꦲ ‘‘ꦠꦥꦴꦫꦩ꧀ꦨꦴ’’ꦠꦶ. ꦄꦴꦫꦩ꧀ꦨꦤꦚ꧀ꦕꦺꦠ꧀ꦡ ꦏꦫꦟꦩꦺꦮꦴꦠꦶ ꦄꦴꦲ ‘‘ꦠꦥꦺꦴꦏꦩ꧀ꦩꦴꦤꦷꦠꦶ ꦄꦠ꧀ꦡꦺꦴ’’ꦠꦶ. ꦱꦩꦟꦏꦩ꧀ꦩꦱꦔ꧀ꦑꦴꦠꦴꦠꦶ ꦱꦩꦟꦺꦲꦶ ꦏꦠ꧀ꦠꦧ꧀ꦧꦏꦩ꧀ꦩꦱꦚ꧀ꦚꦶꦠꦴ. ꦤꦶꦕ꧀ꦕꦺꦴꦭꦺꦴꦠꦶ ꦤꦶꦱ꧀ꦱꦛ꧀ꦜꦕꦺꦭꦺꦴ ꦱꦧ꧀ꦧꦺꦤ ꦱꦧ꧀ꦧꦁ ꦥꦛꦶꦏ꧀ꦑꦶꦠ꧀ꦠꦕꦺꦭꦺꦴ. ꦤꦒ꧀ꦒꦶꦪꦮꦠꦱꦩꦴꦢꦴꦤꦺꦤ ꦤꦒ꧀ꦒꦺꦴ. ‘‘ꦜꦶꦠꦏꦺꦴꦮ ꦈꦕ꧀ꦕꦴꦫꦁ ꦏꦫꦺꦴꦠꦷ’’ꦠꦶꦄꦴꦢꦶ ꦤꦶꦢꦱ꧀ꦱꦤꦩꦠ꧀ꦠꦁ, ꦮꦩꦶꦠ꧀ꦮꦴ ꦩꦸꦑꦮꦶꦏ꧀ꦑꦴꦭꦤꦴꦢꦶꦄꦴꦕꦴꦫꦱ꧀ꦱꦥꦶ ꦠꦺꦤ ꦮꦶꦱ꧀ꦱꦛ꧀ꦜꦠ꧀ꦠꦴ. ꦗꦶꦮ꧀ꦲꦴꦪ ꦲꦠ꧀ꦡꦁ ꦄꦥꦭꦶꦑꦠꦶ ꦄꦥꦭꦶꦲꦠꦶ ꦈꦢꦏꦺꦤ ꦄꦣꦺꦴꦮꦤꦠꦺꦴ. ꦢꦸꦠꦶꦪꦮꦶꦏꦥ꧀ꦥꦺꦥꦶ ꦌꦱꦺꦮ ꦤꦪꦺꦴ. ‘‘ꦌꦲꦶ ꦨꦢ꧀ꦢꦤ꧀ꦠꦺ’’ꦠꦶ ꦮꦸꦠ꧀ꦠꦺ ꦈꦥꦒꦩꦤꦱꦔ꧀ꦑꦴꦠꦺꦴ ꦮꦶꦣꦶ ꦌꦲꦶꦨꦢ꧀ꦢꦤ꧀ꦠꦺꦴ, ꦠꦁ ꦕꦫꦠꦷꦠꦶ ꦌꦲꦶꦨꦢ꧀ꦢꦤ꧀ꦠꦶꦏꦺꦴ, ꦠꦥ꧀ꦥꦛꦶꦏ꧀ꦑꦺꦥꦺꦤ ꦤ ꦌꦲꦶꦨꦢ꧀ꦢꦤ꧀ꦠꦶꦏꦺꦴ. ꦤ ꦏꦫꦺꦴꦠꦶ ꦱꦩꦟꦺꦤ ꦤꦴꦩ ꦥꦫꦱ꧀ꦱ ꦮꦕꦤꦏꦫꦺꦤ ꦤ ꦨꦮꦶꦠꦧ꧀ꦧꦤ꧀ꦠꦶ ꦄꦣꦶꦥ꧀ꦥꦴꦪꦺꦤ. ꦥꦸꦫꦺꦠꦫꦤ꧀ꦠꦶ ꦠꦁ ꦜꦴꦤꦁ ꦄꦠ꧀ꦠꦤꦺꦴ ꦈꦥꦒꦩꦤꦠꦺꦴ ꦥꦸꦫꦺꦠꦫꦁ. ꦠꦁ ꦏꦶꦫ ꦱꦺꦴ ‘‘ꦨꦶꦏ꧀ꦑꦸꦤꦴ ꦤꦴꦩ ꦪꦴꦢꦶꦕ꧀ꦖꦏꦷ ꦌꦮ ꦨꦶꦏ꧀ꦑꦴ ꦒꦲꦺꦠꦧ꧀ꦧꦴ’’ꦠꦶ ꦄꦣꦶꦥ꧀ꦥꦴꦪꦺꦤ ꦤ ꦒꦟ꧀ꦲꦴꦠꦶ. ꦈꦢ꧀ꦢꦶꦱ꧀ꦱꦏꦠꦁ ‘‘ꦩꦩ ꦤꦶꦩꦶꦠ꧀ꦠꦨꦴꦮꦺꦤ ꦧꦲꦹ ꦑꦸꦢ꧀ꦢꦏꦴ ꦥꦴꦟꦴ ꦱꦔ꧀ꦓꦴꦠꦁ ꦄꦴꦥꦴꦢꦶꦠꦴ’’ꦠꦶ ꦤ ꦒꦟ꧀ꦲꦴꦠꦶ. ꦤꦶꦩꦤ꧀ꦠꦤꦁ ꦤ ꦱꦴꦢꦶꦪꦠꦶ ‘‘ꦌꦮꦁ ꦠꦺꦱꦁ ꦮꦕꦤꦁ ꦏꦠꦁ ꦨꦮꦶꦱ꧀ꦱꦠꦷ’’ꦠꦶ. ꦏꦸꦩ꧀ꦨꦷꦄꦴꦢꦷꦱꦸꦥꦶ ꦱꦺꦴ ꦱꦠ꧀ꦠꦱꦚ꧀ꦚꦷꦠꦶ ꦄꦴꦲ ‘‘ꦏꦸꦩ꧀ꦨꦷꦏꦭ꦳ꦺꦴꦥꦶꦪꦺꦴ’’ꦠꦶꦄꦴꦢꦶ.

ꦏꦧꦭ꦳ꦤ꧀ꦠꦫꦴꦪꦺꦴꦠꦶ ꦏꦧꦭ꦳ꦱ꧀ꦱ ꦄꦤ꧀ꦠꦫꦴꦪꦺꦴ ꦲꦺꦴꦠꦷꦠꦶ. ꦒꦴꦩꦱꦨꦴꦒꦴꦢꦶꦮꦱꦺꦤ ꦱꦔ꧀ꦒꦩ꧀ꦩ ꦏꦶꦠ꧀ꦠꦺꦤ꧀ꦠꦶ ꦌꦠꦶꦱ꧀ꦱꦴꦠꦶ ꦱꦔ꧀ꦏꦶꦠ꧀ꦠꦶ, ꦠꦡꦴ ꦱꦁꦲꦛꦠꦟ꧀ꦝꦸꦭꦴꦢꦶꦱꦚ꧀ꦕꦪꦺꦴ. ꦩꦤꦸꦱ꧀ꦱꦴꦠꦶ ꦮꦺꦪ꧀ꦪꦴꦮꦕ꧀ꦕꦏꦫꦩꦤꦸꦱ꧀ꦱꦴ.

ꦱꦸꦫꦴꦥꦴꦤꦩꦺꦮꦴꦠꦶ ꦩꦗ꧀ꦗꦭꦏ꧀ꦑꦟꦥ꧀ꦥꦠ꧀ꦠꦴꦪ ꦱꦸꦫꦴꦪ ꦥꦴꦤꦩꦺꦮ ꦱꦸꦫꦴꦒ꧀ꦒꦲꦟꦺꦤ ꦕꦺꦠ꧀ꦡ ꦩꦺꦫꦪꦩ꧀ꦥꦶ ꦱꦔ꧀ꦒꦲꦶꦠꦁ. ꦌꦏꦴꦒꦴꦫꦩꦺꦮ ꦈꦚ꧀ꦖꦠꦷꦠꦶ ꦌꦏꦴꦒꦴꦫꦶꦏꦺꦴ. ꦌꦏꦴꦭꦺꦴꦥꦺꦤꦺꦮ ꦮꦠ꧀ꦠꦠꦷꦠꦶ ꦌꦏꦴꦭꦺꦴꦥꦶꦏꦺꦴ. ꦢꦷꦪꦠꦶ ꦌꦠꦴꦪꦴꦠꦶ ꦢꦠ꧀ꦠꦶ, ꦢ꧀ꦮꦠ꧀ꦠꦶꦄꦴꦭꦺꦴꦥꦩꦠ꧀ꦠꦒꦴꦲꦶ ꦑꦸꦢ꧀ꦢꦏꦁ ꦨꦶꦏ꧀ꦑꦴꦢꦴꦤꦨꦴꦗꦤꦁ, ꦠꦺꦤꦴꦲ ‘‘ꦑꦸꦢ꧀ꦢꦏꦥꦴꦠꦷ’’ꦠꦶ. ꦄꦨꦸꦚ꧀ꦗꦤꦮꦱꦺꦤ ꦌꦏꦺꦴ ꦄꦲꦺꦴ ꦌꦠꦱ꧀ꦱ ꦄꦠ꧀ꦡꦷꦠꦶ ꦌꦏꦴꦲꦶꦏꦺꦴ, ꦄꦴꦲꦴꦫꦺꦴ. ꦠꦁ ꦌꦏꦴꦲꦶꦏꦁ, ꦱꦺꦴ ꦥꦤ ꦄꦠ꧀ꦡꦠꦺꦴ ꦌꦏꦢꦶꦮꦱꦭꦔ꧀ꦓꦏꦺꦴꦠꦶ ꦄꦴꦲ ‘‘ꦌꦏꦢꦶꦮꦱꦤ꧀ꦠꦫꦶꦏ’’ꦤ꧀ꦠꦶ. ‘‘ꦢ꧀ꦮꦷꦲꦶꦏ’’ꦤ꧀ꦠꦶꦄꦴꦢꦷꦱꦸꦥꦶ ꦌꦱꦺꦮ ꦤꦪꦺꦴ. ꦌꦏꦴꦲꦁ ꦄꦨꦸꦚ꧀ꦗꦶꦠ꧀ꦮꦴ ꦌꦏꦴꦲꦁ ꦨꦸꦚ꧀ꦗꦤꦁ ꦌꦏꦴꦲꦮꦴꦫꦺꦴ, ꦠꦁ ꦌꦏꦴꦲꦶꦏꦩꦺꦮ ꦄꦠ꧀ꦡꦠꦺꦴ. ꦢ꧀ꦮꦷꦲꦁ ꦄꦨꦸꦚ꧀ꦗꦶꦠ꧀ꦮꦴ ꦢ꧀ꦮꦷꦲꦁ ꦨꦸꦚ꧀ꦗꦤꦁ ꦢ꧀ꦮꦷꦲꦮꦴꦫꦺꦴ. ꦱꦺꦱꦢ꧀ꦮꦪꦺꦥꦶ ꦌꦱꦺꦮ ꦤꦪꦺꦴ. ꦈꦏ꧀ꦏꦛ꧀ꦜꦺꦴ ꦥꦤ ꦥꦫꦶꦪꦴꦪꦨꦠ꧀ꦠꦨꦺꦴꦗꦤꦶꦏꦺꦴ ꦢ꧀ꦮꦷꦲꦁ ꦄꦨꦸꦚ꧀ꦗꦶꦠ꧀ꦮꦴ ꦌꦏꦴꦲꦩꦺꦮ ꦨꦸꦚ꧀ꦗꦠꦶ. ꦱꦺꦱꦢ꧀ꦮꦪꦺꦥꦶ ꦌꦱꦺꦮ ꦤꦪꦺꦴ.

꧓꧙꧕. ꦏꦸꦟ꧀ꦝꦏꦤ꧀ꦠꦶ ꦠꦤꦸꦠꦫꦁ ꦠꦟ꧀ꦝꦸꦭꦱꦏꦭꦁ.

꧓꧙꧖. ꦱꦟꦺꦲꦶ ꦱꦟꦮꦴꦏꦺꦲꦶ ꦤꦶꦧ꧀ꦧꦠ꧀ꦠꦮꦠ꧀ꦡꦴꦤꦶ ꦱꦴꦟꦴꦤꦶ. ꦩꦶꦱ꧀ꦱꦱꦴꦟꦴꦤꦶ ꦩꦱꦴꦟꦴꦤꦶ, ꦤ ꦨꦔ꧀ꦒꦴꦤꦶ. ꦌꦫꦏꦠꦶꦟꦴꦢꦷꦤꦷꦠꦶ ꦄꦴꦢꦶ-ꦱꦢ꧀ꦢꦺꦤ ꦄꦏ꧀ꦏꦩꦏꦕꦶꦏꦢꦭꦷꦮꦴꦏꦴꦢꦷꦤꦁ ꦱꦔ꧀ꦒꦲꦺꦴ. ꦌꦫꦏꦴꦢꦷꦲꦶ ꦏꦠꦴꦤꦶ ꦲꦶ ꦖꦮꦴꦤꦶ ꦭꦴꦩꦏꦴꦤꦶ ꦢꦸꦱ꧀ꦱꦴꦤꦷꦠꦶ ꦮꦠ꧀ꦠꦧ꧀ꦧꦠꦁ ꦭꦨꦤ꧀ꦠꦶ.

ꦩꦶꦕ꧀ꦖꦴꦮꦴꦪꦴꦩꦮꦱꦺꦤꦺꦮ ꦈꦏ꧀ꦏꦸꦛꦶꦏꦮꦠꦴꦤꦸꦪꦺꦴꦒꦺꦴꦠꦶ ꦄꦴꦲ ‘‘ꦈꦏ꧀ꦏꦸꦛꦶꦏꦮꦷꦫꦶꦪꦁ ꦄꦤꦸꦪꦸꦠ꧀ꦠꦺꦴ’’ꦠꦶ. ꦡꦟ꧀ꦝꦶꦭꦤ꧀ꦠꦶ ꦮꦴ ꦱꦩꦴ ꦥꦏꦠꦶꦨꦹꦩꦶ ꦮꦸꦕ꧀ꦕꦠꦶ ‘‘ꦥꦠ꧀ꦡꦟ꧀ꦝꦶꦭꦺ ꦥꦴꦠꦸꦫꦲꦺꦴꦱꦷ’’ꦠꦶꦄꦴꦢꦷꦱꦸ (ꦩ. ꦤꦶ. ꧔.꧑꧐) ꦮꦶꦪ, ꦠꦱ꧀ꦩꦴ ꦡꦟ꧀ꦝꦶꦭꦱꦺꦪ꧀ꦪꦤ꧀ꦠꦶ ꦄꦤꦤ꧀ꦠꦫꦲꦶꦠꦴꦪ ꦥꦏꦠꦶꦨꦹꦩꦶꦪꦁ ꦱꦺꦪ꧀ꦪꦤ꧀ꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦭꦢ꧀ꦣꦁ ꦄꦴꦱꦤꦤ꧀ꦠꦶ ꦤꦶꦱꦷꦢꦶꦠꦸꦁ ꦪꦡꦴꦭꦢ꧀ꦣꦁ ꦄꦴꦱꦤꦁ. ꦄꦏꦺꦴꦥꦺꦠ꧀ꦮꦴꦠꦶ ꦄꦚ꧀ꦚꦠ꧀ꦡ ꦄꦤꦸꦥꦒꦤ꧀ꦠ꧀ꦮꦴ, ꦠꦺꦤꦴꦲ ‘‘ꦠꦠ꧀ꦡꦺꦮ ꦤꦶꦱꦷꦢꦤꦱꦷꦭꦺꦴ’’ꦠꦶ. ꦱꦺꦴ ꦲꦶ ꦠꦁ ꦄꦖꦝ꧀ꦝꦺꦤ꧀ꦠꦺꦴ ꦄꦥꦫꦶꦕ꧀ꦕꦗꦤ꧀ꦠꦺꦴ ꦄꦏꦺꦴꦥꦺꦤ꧀ꦠꦺꦴ ꦤꦴꦩ ꦲꦺꦴꦠꦶ. ꦮꦶꦏꦛꦤ꧀ꦠꦶ ꦒꦹꦡꦁ ꦮꦸꦕ꧀ꦕꦠꦶ ꦄꦴꦱꦪꦮꦱꦺꦤ ꦮꦶꦫꦹꦥꦁ ꦗꦴꦠꦤ꧀ꦠꦶ ꦏꦠ꧀ꦮꦴ.

ꦌꦠ꧀ꦡ ꦕ ‘‘ꦄꦕꦺꦭꦏꦺꦴ ꦲꦺꦴꦠꦷ’’ꦠꦶꦄꦴꦢꦷꦤꦶ ꦮꦠꦥꦢꦴꦤꦶ ꦪꦴꦮ ‘‘ꦤ ꦡꦸꦱꦺꦴꦢꦏꦁ ꦥꦶꦮꦠꦷ’’ꦠꦶ ꦌꦠꦴꦤꦶ ꦌꦏꦮꦴꦫꦴꦤꦶ. ‘‘ꦌꦏꦴꦒꦴꦫꦶꦏꦺꦴ ꦮꦴ’’ꦠꦶꦄꦴꦢꦷꦤꦶ ꦤꦴꦤꦴꦮꦴꦫꦴꦤꦶ, ꦤꦴꦤꦴꦏꦴꦭꦶꦏꦴꦤꦶ ꦮꦴ. ꦠꦡꦴ ‘‘ꦱꦴꦏꦨꦏ꧀ꦑꦺꦴ ꦮꦴ’’ꦠꦶꦄꦴꦢꦷꦤꦶ, ‘‘ꦱꦴꦟꦴꦤꦶꦥꦶ ꦣꦴꦫꦺꦠꦷ’’ꦠꦶꦄꦴꦢꦷꦤꦶ ꦕ. ꦠꦡꦴ ꦲꦺꦠ꧀ꦡ ꦮꦴ-ꦱꦢ꧀ꦢꦒ꧀ꦒꦲꦟꦁ, ꦥꦶ-ꦱꦢ꧀ꦢꦒ꧀ꦒꦲꦟꦚ꧀ꦕ ꦏꦠꦁ. ꦥꦶ-ꦱꦢ꧀ꦢꦺꦴꦥꦶ ꦮꦶꦏꦥ꧀ꦥꦠ꧀ꦡꦺꦴ ꦌꦮ ꦢꦛ꧀ꦜꦧ꧀ꦧꦺꦴ. ꦥꦸꦫꦶꦩꦺꦱꦸ ꦥꦤ ꦤ ꦏꦠꦁ. ꦌꦮꦚ꧀ꦕ ꦏꦠ꧀ꦮꦴ ‘‘ꦄꦕꦺꦭꦏꦺꦴ ꦲꦺꦴꦠꦷ’’ꦠꦶ ꦮꦠ꧀ꦮꦴ ‘‘ꦱꦴꦟꦴꦤꦶꦥꦶ ꦣꦴꦫꦺꦠꦷ’’ꦠꦶꦄꦴꦢꦶ ꦮꦕꦤꦱ꧀ꦱ, ‘‘ꦫꦗꦺꦴꦗꦭ꧀ꦭꦣꦫꦺꦴ ꦲꦺꦴꦠꦷ’’ꦠꦶ ꦮꦠ꧀ꦮꦴ ‘‘ꦈꦢꦏꦺꦴꦫꦺꦴꦲꦤꦴꦤꦸꦪꦺꦴꦒꦁ ꦄꦤꦸꦪꦸꦠ꧀ꦠꦺꦴ’’ꦠꦶ ꦮꦕꦤꦱ꧀ꦱ ꦕ ꦄꦮꦶꦫꦺꦴꦣꦺꦴ ꦱꦶꦢ꧀ꦣꦺꦴ ꦲꦺꦴꦠꦶ. ꦄꦡ ꦮꦴ ꦏꦶꦩꦺꦠ꧀ꦡ ꦄꦮꦶꦫꦺꦴꦣꦕꦶꦤ꧀ꦠꦴꦪ. ꦈꦩ꧀ꦩꦠ꧀ꦠꦏꦥꦕ꧀ꦖꦶꦱꦢꦶꦱꦺꦴ ꦲꦶ ꦠꦶꦠ꧀ꦡꦶꦪꦮꦴꦢꦺꦴ. ꦄꦡ ꦮꦴ ‘‘ꦄꦕꦺꦭꦏꦺꦴ ꦲꦺꦴꦠꦷ’’ꦠꦶ ꦄꦴꦫꦨꦶꦠ꧀ꦮꦴ ꦠꦥ꧀ꦥꦱꦔ꧀ꦒꦺꦤ ꦱꦧ꧀ꦧꦩ꧀ꦥꦶ ꦄꦠ꧀ꦠꦏꦶꦭꦩꦡꦴꦤꦸꦪꦺꦴꦒꦁ ꦢꦱ꧀ꦱꦺꦤ꧀ꦠꦺꦤ ‘‘ꦱꦴꦟꦴꦤꦶꦥꦶ ꦣꦴꦫꦺꦠꦷ’’ꦠꦶꦄꦴꦢꦶ ꦮꦸꦠ꧀ꦠꦤ꧀ꦠꦶ ꦢꦛ꧀ꦜꦧ꧀ꦧꦁ.

ꦠꦥꦺꦴꦥꦏ꧀ꦏꦩꦤꦶꦫꦠ꧀ꦡꦏꦡꦴꦮꦟ꧀ꦟꦤꦴ

꧓꧙꧗. ꦱꦷꦭꦱꦩ꧀ꦥꦢꦴꦢꦷꦲꦶ ꦮꦶꦤꦴꦠꦶ ꦱꦷꦭꦱꦩ꧀ꦥꦢꦴ, ꦱꦩꦴꦣꦶꦱꦩ꧀ꦥꦢꦴ, ꦥꦚ꧀ꦚꦴꦱꦩ꧀ꦥꦢꦴꦠꦶ ꦆꦩꦴꦲꦶ ꦭꦺꦴꦏꦸꦠ꧀ꦠꦫꦴꦲꦶ ꦱꦩ꧀ꦥꦢꦴꦲꦶ ꦮꦶꦤꦴ ꦤ ꦏꦢꦴꦕꦶ ꦱꦴꦩꦚ꧀ꦚꦁ ꦮꦴ ꦧ꧀ꦫꦲ꧀ꦩꦚ꧀ꦚꦁ ꦮꦴ ꦱꦩ꧀ꦨꦮꦠꦶ, ꦪꦱ꧀ꦩꦴ ꦕ ꦠꦢꦺꦮꦁ, ꦠꦱ꧀ꦩꦴ ꦠꦺꦱꦁ ꦠꦥꦺꦴꦥꦏ꧀ꦏꦩꦴꦤꦁ ꦤꦶꦫꦠ꧀ꦡꦏꦠꦁ ꦢꦱ꧀ꦱꦺꦤ꧀ꦠꦺꦴꦠꦶ ꦪꦺꦴꦗꦤꦴ. ‘‘ꦢꦺꦴꦱꦮꦺꦫꦮꦶꦫꦲꦶꦠ’’ꦤ꧀ꦠꦶ ꦆꦢꦁ ꦢꦺꦴꦱꦱ꧀ꦱ ꦩꦺꦠ꧀ꦠꦴꦪ ꦈꦗꦸꦥꦛꦶꦥꦏ꧀ꦑꦠꦴꦪ ꦮꦸꦠ꧀ꦠꦁ. ꦢꦺꦴꦱ-ꦒ꧀ꦒꦲꦟꦺꦤ ꦮꦴ ꦱꦧ꧀ꦧꦺꦥꦶ ꦙꦴꦤꦥꦛꦶꦥꦏ꧀ꦑꦴ ꦱꦁꦏꦶꦭꦺꦱꦣꦩ꧀ꦩꦴ ꦒꦲꦶꦠꦴ, ꦮꦺꦫ-ꦒ꧀ꦒꦲꦟꦺꦤ ꦥꦕ꧀ꦕꦠ꧀ꦡꦶꦏꦨꦹꦠꦴ ꦱꦠ꧀ꦠꦴ. ꦪꦢꦒ꧀ꦒꦺꦤ ꦲꦶ ꦢꦺꦴꦱꦫꦲꦶꦠꦁ, ꦠꦢꦒ꧀ꦒꦺꦤ ꦮꦺꦫꦫꦲꦶꦠꦤ꧀ꦠꦶ.

꧓꧙꧘. ꦥꦴꦏꦛꦨꦴꦮꦺꦤ ꦏꦴꦪꦠꦶ ꦒꦩꦺꦠꦷꦠꦶ ꦥꦏꦠꦶ, ꦭꦺꦴꦏꦱꦶꦢ꧀ꦣꦮꦴꦢꦺꦴ, ꦠꦺꦤꦴꦲ ‘‘ꦥꦏꦠꦶ ꦑꦺꦴ ꦌꦱꦴꦠꦶ ꦥꦏꦠꦶꦏꦡꦴ ꦌꦱꦴ’’ꦠꦶ. ꦩꦠ꧀ꦠꦴꦪꦴꦠꦶ ꦩꦠ꧀ꦠꦴ-ꦱꦢ꧀ꦢꦺꦴ ‘‘ꦩꦠ꧀ꦠꦴ ꦱꦸꦑꦥꦫꦶꦕ꧀ꦕꦴꦒꦴ’’ꦠꦶꦄꦴꦢꦷꦱꦸ (ꦣ. ꦥ. ꧒꧙꧐) ꦮꦶꦪ ꦄꦥ꧀ꦥꦠ꧀ꦡꦁ ꦄꦤ꧀ꦠꦺꦴꦤꦷꦠꦁ ꦏꦠ꧀ꦮꦴ ꦥꦩꦴꦟꦮꦴꦕꦏꦺꦴꦠꦶ ꦄꦴꦲ ‘‘ꦆꦩꦶꦤꦴ ꦥꦩꦴꦟꦺꦤ ꦌꦮꦁ ꦥꦫꦶꦠ꧀ꦠꦏꦺꦤꦴ’’ꦠꦶ. ꦠꦺꦤ ꦥꦤ ꦥꦩꦴꦟꦺꦤ ꦥꦲꦴꦠꦧ꧀ꦧꦺꦴ ꦥꦏꦫꦟꦥ꧀ꦥꦠ꧀ꦠꦺꦴ ꦥꦛꦶꦥꦠ꧀ꦠꦶꦏ꧀ꦏꦩꦺꦴꦠꦶ ꦄꦴꦲ ‘‘ꦥꦛꦶꦥꦠ꧀ꦠꦶꦏ꧀ꦏꦩꦺꦤꦴ’’ꦠꦶ. ꦱꦧ꧀ꦧꦠ꧀ꦡꦴꦠꦶ ꦱꦧ꧀ꦧꦮꦴꦫꦺꦱꦸ.

꧓꧙꧙. ꦄꦚ꧀ꦚꦡꦴ ꦮꦢꦡꦴꦠꦶ ꦪꦢꦶ ꦄꦕꦺꦭꦏꦨꦴꦮꦴꦢꦶꦤꦴ ꦱꦴꦩꦚ꧀ꦚꦁ ꦮꦴ ꦧ꧀ꦫꦲ꧀ꦩꦚ꧀ꦚꦁ ꦮꦴ ꦄꦨꦮꦶꦱ꧀ꦱ, ꦱꦸꦮꦶꦗꦴꦤꦺꦴꦮ ꦱꦩꦟꦺꦴ ꦱꦸꦮꦶꦗꦴꦤꦺꦴ ꦧ꧀ꦫꦴꦲ꧀ꦩꦟꦺꦴ. ꦪꦱ꧀ꦩꦴ ꦥꦤ ꦠꦸꦩ꧀ꦲꦺ ꦆꦠꦺꦴ ꦄꦚ꧀ꦚꦡꦴꦮ ꦱꦴꦩꦚ꧀ꦚꦁ ꦧ꧀ꦫꦲ꧀ꦩꦚ꧀ꦚꦚ꧀ꦕ ꦮꦢꦡ, ꦠꦱ꧀ꦩꦴ ꦢꦸꦗ꧀ꦗꦴꦤꦺꦴꦮ ꦱꦩꦟꦺꦴ ꦢꦸꦗ꧀ꦗꦴꦤꦺꦴ ꦧ꧀ꦫꦴꦲ꧀ꦩꦟꦺꦴ, ꦠꦺꦤꦴꦲ ‘‘ꦆꦢꦁ ꦱꦤ꧀ꦣꦴꦪꦴꦲꦴ’’ꦠꦶ. ꦠꦁ ꦥꦏꦠꦶꦮꦴꦢꦁ ꦥꦛꦶꦏ꧀ꦑꦶꦥꦶꦠ꧀ꦮꦴꦠꦶ ꦥꦸꦧ꧀ꦧꦺ ꦪꦁ ꦥꦴꦏꦠꦶꦏꦁ ꦱꦴꦩꦚ꧀ꦚꦁ ꦧ꧀ꦫꦲ꧀ꦩꦚ꧀ꦚꦚ꧀ꦕ ꦲꦢꦪꦺ ꦜꦥꦺꦠ꧀ꦮꦴ ꦠꦺꦤ ‘‘ꦢꦸꦏ꧀ꦏꦫ’’ꦤ꧀ꦠꦶꦄꦴꦢꦶ ꦮꦸꦠ꧀ꦠꦁ, ꦠꦩꦺꦮ ꦱꦤ꧀ꦣꦴꦪ ꦨꦒꦮꦠꦴꦥꦶ ‘‘ꦥꦏꦠꦶ ꦑꦺꦴ ꦌꦱꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦆꦣ ꦥꦤ ꦠꦁ ꦥꦏꦠꦶꦮꦴꦢꦁ ꦥꦴꦏꦠꦶꦏꦱꦩꦟꦧ꧀ꦫꦴꦲ꧀ꦩꦟꦮꦶꦱꦪꦁ ꦏꦡꦁ ꦥꦛꦶꦏ꧀ꦑꦶꦥꦶꦠ꧀ꦮꦴ ꦥꦛꦶꦱꦁꦲꦫꦶꦠ꧀ꦮꦴ ꦱꦨꦴꦮꦠꦺꦴꦮ ꦥꦫꦩꦠ꧀ꦡꦠꦺꦴꦮ ꦱꦩꦟꦱ꧀ꦱ ꦧ꧀ꦫꦴꦲ꧀ꦩꦟꦱ꧀ꦱ ꦕ ꦢꦸꦗ꧀ꦗꦴꦤꦨꦴꦮꦁ ꦄꦴꦮꦶꦏꦫꦺꦴꦤ꧀ꦠꦺꦴ ꦥꦏꦴꦱꦺꦤ꧀ꦠꦺꦴ. ꦠꦠ꧀ꦫꦴꦥꦷꦠꦶ ꦱꦩꦟꦧ꧀ꦫꦴꦲ꧀ꦩꦟꦮꦴꦢꦺꦥꦶ ꦮꦸꦠ꧀ꦠꦤꦪꦺꦤꦺꦮ.

ꦱꦷꦭꦱꦩꦴꦣꦶꦥꦚ꧀ꦚꦴꦱꦩ꧀ꦥꦢꦴꦮꦟ꧀ꦟꦤꦴ

꧔꧐꧐-꧑. ꦥꦟ꧀ꦝꦶꦠꦺꦴꦠꦶ ꦲꦺꦠꦸꦱꦩ꧀ꦥꦠ꧀ꦠꦶꦱꦶꦢ꧀ꦣꦺꦤ ꦥꦟ꧀ꦝꦶꦕ꧀ꦕꦺꦤ ꦱꦩꦤ꧀ꦤꦴꦒꦠꦺꦴ, ꦏꦡꦁ ꦈꦒ꧀ꦒꦲꦺꦱꦶ ꦥꦫꦶꦥꦏ꧀ꦏꦚꦴꦟꦠ꧀ꦠꦴ ꦓꦛꦺ ꦥꦢꦷꦥꦺꦤ ꦮꦶꦪ ꦄꦧ꧀ꦨꦤ꧀ꦠꦫꦺ ꦱꦩꦸꦗ꧀ꦗꦭꦤ꧀ꦠꦺꦤ ꦥꦚ꧀ꦚꦴꦮꦺꦪ꧀ꦪꦠ꧀ꦠꦶꦪꦺꦤ ꦠꦠ꧀ꦡ ꦠꦠ꧀ꦡ ꦨꦒꦮꦠꦴ ꦢꦺꦱꦶꦠꦩꦠ꧀ꦡꦁ ꦥꦫꦶꦒ꧀ꦒꦟ꧀ꦲꦤ꧀ꦠꦺꦴ ꦠꦩ꧀ꦥꦶ ꦢꦺꦱꦤꦁ ꦈꦥꦣꦴꦫꦺꦱꦶ. ꦠꦱ꧀ꦱ ꦕꦴꦠꦶ ꦪꦺꦴ ꦄꦕꦺꦭꦏꦺꦴ ꦲꦺꦴꦠꦶ ꦪꦴꦮ ꦈꦢꦏꦺꦴꦫꦺꦴꦲꦤꦴꦤꦸꦪꦺꦴꦒꦁ ꦄꦤꦸꦪꦸꦠ꧀ꦠꦺꦴ ꦮꦶꦲꦫꦠꦶ, ꦠꦱ꧀ꦱ ꦕ. ꦠꦴ ꦱꦩ꧀ꦥꦠ꧀ꦠꦶꦪꦺꦴ ꦥꦸꦕ꧀ꦖꦴꦩꦶ, ꦪꦴꦲꦶ ꦱꦩꦟꦺꦴ ꦕ ꦲꦺꦴꦠꦷꦠꦶ ꦄꦣꦶꦥ꧀ꦥꦴꦪꦺꦴ. ꦱꦷꦭꦱꦩ꧀ꦥꦢꦴꦪꦴꦠꦶ ꦆꦠꦶ-ꦱꦢ꧀ꦢꦺꦴ ꦄꦴꦢꦶꦄꦠ꧀ꦡꦺꦴ, ꦠꦺꦤ ‘‘ꦕꦶꦠ꧀ꦠꦱꦩ꧀ꦥꦢꦴꦪ ꦥꦚ꧀ꦚꦴꦱꦩ꧀ꦥꦢꦴꦪꦴ’’ꦠꦶ ꦥꦢꦢ꧀ꦮꦪꦁ ꦱꦔ꧀ꦒꦟ꧀ꦲꦴꦠꦶ ꦄꦱꦺꦏ꧀ꦑꦱꦷꦭꦴꦢꦶꦑꦤ꧀ꦣꦠ꧀ꦠꦪꦱꦔ꧀ꦒꦲꦶꦠꦚ꧀ꦲꦶ ꦄꦫꦲꦠ꧀ꦠꦁ, ꦠꦺꦤꦴꦲ ‘‘ꦄꦫꦲꦠ꧀ꦠꦦꦭꦩꦺꦮ ꦱꦤ꧀ꦣꦴꦪ ꦮꦸꦠ꧀ꦠ’’ꦤ꧀ꦠꦶꦄꦴꦢꦶ. ꦠꦠ꧀ꦡ ꦆꦢꦤ꧀ꦠꦶ ꦆꦢꦁ ꦮꦕꦤꦁ.

ꦱꦷꦲꦤꦴꦢꦏꦡꦴꦮꦟ꧀ꦟꦤꦴ

꧔꧐꧒. ꦄꦤꦚ꧀ꦚꦱꦴꦣꦴꦫꦟꦠꦴꦪ, ꦄꦤꦚ꧀ꦚꦱꦴꦣꦴꦫꦟꦠ꧀ꦡꦮꦶꦱꦪꦠꦴꦪ ꦕ ꦄꦤꦸꦠ꧀ꦠꦫꦁ ꦧꦸꦢ꧀ꦣꦱꦷꦲꦤꦴꦢꦁ ꦤꦢꦤ꧀ꦠꦺꦴ. ꦄꦠꦶꦮꦶꦪ ꦄꦕ꧀ꦕꦤ꧀ꦠꦮꦶꦱꦸꦢ꧀ꦣꦠꦴꦪ ꦥꦫꦩꦮꦶꦱꦸꦢ꧀ꦣꦁ. ꦥꦫꦩꦤ꧀ꦠꦶ ꦈꦏ꧀ꦏꦛ꧀ꦜꦁ, ꦠꦺꦤꦴꦲ ‘‘ꦈꦠ꧀ꦠꦩ’’ꦤ꧀ꦠꦶ. ꦱꦷꦭꦩꦺꦮ ꦭꦺꦴꦏꦶꦪꦱꦷꦭꦠ꧀ꦠꦴ. ꦪꦡꦴ ꦄꦤꦚ꧀ꦚꦱꦴꦣꦴꦫꦟꦁ ꦨꦒꦮꦠꦺꦴ ꦭꦺꦴꦏꦸꦠ꧀ꦠꦫꦱꦷꦭꦁ ꦱꦮꦴꦱꦤꦁ ꦥꦛꦶꦥꦏ꧀ꦑꦮꦶꦢ꧀ꦣꦁꦱꦤꦠꦺꦴ, ꦌꦮꦁ ꦭꦺꦴꦏꦶꦪꦱꦷꦭꦩ꧀ꦥꦶ ꦠꦱ꧀ꦱ ꦄꦤꦸꦕ꧀ꦖꦮꦶꦏꦨꦴꦮꦺꦤ ꦱꦩ꧀ꦨꦹꦠꦠ꧀ꦠꦴ, ꦱꦩꦺꦤ ꦱꦩꦤ꧀ꦠꦶ ꦱꦩꦱꦩꦤ꧀ꦠꦶ ꦄꦪꦩꦺꦠ꧀ꦡ ꦄꦠ꧀ꦡꦺꦴꦠꦶ ꦄꦴꦲ ‘‘ꦩꦩ ꦱꦷꦭꦱꦩꦺꦤ ꦱꦷꦭꦺꦤ ꦩꦪꦴ ꦱꦩ’’ꦤ꧀ꦠꦶ. ‘‘ꦪꦢꦶꦢꦁ ꦄꦣꦶꦱꦷꦭ’’ꦤ꧀ꦠꦶ ꦭꦺꦴꦏꦶꦪꦁ, ꦭꦺꦴꦏꦸꦠ꧀ꦠꦫꦚ꧀ꦕꦴꦠꦶ ꦢꦸꦮꦶꦣꦩ꧀ꦥꦶ ꦧꦸꦢ꧀ꦣꦱꦷꦭꦁ ꦌꦏꦗ꧀ꦙꦁ ꦏꦠ꧀ꦮꦴ ꦮꦸꦠ꧀ꦠꦁ. ꦠꦺꦤꦴꦲ ‘‘ꦱꦷꦭꦺꦥꦷ’’ꦠꦶ. ꦆꦠꦶ ꦆꦩꦤ꧀ꦠꦶ ꦌꦮꦁ ꦆꦩꦁ ꦱꦷꦭꦮꦶꦱꦪꦁ. ꦥꦜꦩꦁ ꦥꦮꦠ꧀ꦠꦠ꧀ꦠꦴ ꦥꦜꦩꦁ.

ꦠꦥꦠꦷꦠꦶ ꦱꦤ꧀ꦠꦥ꧀ꦥꦠꦶ, ꦮꦶꦣꦩꦠꦷꦠꦶ ꦄꦠ꧀ꦡꦺꦴ. ꦗꦶꦒꦸꦕ꧀ꦖꦠꦷꦠꦶ ꦲꦷꦭ꦳ꦺꦠꦶ ꦭꦴꦩꦏꦠꦺꦴ ꦜꦥꦺꦠꦶ. ꦤꦶꦢ꧀ꦢꦺꦴꦱꦠ꧀ꦠꦴ ꦄꦫꦶꦪꦴ ꦄꦴꦫꦏꦴ ꦏꦶꦭꦺꦱꦺꦲꦷꦠꦶ. ꦩꦒ꧀ꦒꦦꦭꦱꦩ꧀ꦥꦪꦸꦠ꧀ꦠꦴ ꦮꦷꦫꦶꦪꦱꦔ꧀ꦑꦴꦠꦴ ꦠꦥꦺꦴꦗꦶꦒꦸꦕ꧀ꦖꦴꦠꦶ ꦄꦴꦤꦺꦠ꧀ꦮꦴ ꦱꦩ꧀ꦧꦤ꧀ꦣꦺꦴ. ꦥꦫꦩꦴ ꦤꦴꦩ ꦱꦧ꧀ꦧꦸꦏ꧀ꦏꦛ꧀ꦜꦨꦴꦮꦠꦺꦴ. ꦪꦡꦴ ꦪꦸꦮꦶꦤꦺꦴ ꦨꦴꦮꦺꦴ ꦪꦺꦴꦧ꧀ꦧꦤꦁ, ꦌꦮꦁ ꦗꦶꦒꦸꦕ꧀ꦖꦶꦤꦺꦴ ꦨꦴꦮꦺꦴ ꦗꦺꦒꦸꦕ꧀ꦖꦁ. ꦏꦶꦭꦺꦱꦴꦤꦁ ꦱꦩꦸꦕ꧀ꦖꦶꦤ꧀ꦢꦤꦥꦛꦶꦥ꧀ꦥꦱ꧀ꦱꦩ꧀ꦨꦤꦴꦤꦶ ꦱꦩꦸꦕ꧀ꦖꦺꦢꦥꦛꦶꦥꦱ꧀ꦱꦢ꧀ꦣꦶꦮꦶꦩꦸꦠ꧀ꦠꦶꦪꦺꦴ. ꦤꦶꦱ꧀ꦱꦫꦟꦮꦶꦩꦸꦠ꧀ꦠꦶ ꦤꦶꦧ꧀ꦧꦴꦤꦁ. ꦄꦡ ꦮꦴ ꦱꦩ꧀ꦩꦴꦮꦴꦕꦴꦢꦷꦤꦁ ꦄꦣꦶꦱꦷꦭꦒ꧀ꦒꦲꦟꦺꦤ, ꦱꦩ꧀ꦩꦴꦮꦴꦪꦴꦩꦱ꧀ꦱ ꦄꦣꦶꦗꦺꦒꦸꦕ꧀ꦖꦒ꧀ꦒꦲꦟꦺꦤ, ꦱꦩ꧀ꦩꦴꦢꦶꦛ꧀ꦜꦶꦪꦴ ꦄꦣꦶꦥꦚ꧀ꦚꦴꦒ꧀ꦒꦲꦟꦺꦤ ꦒꦲꦶꦠꦠ꧀ꦠꦴ ꦄꦒ꧀ꦒꦲꦶꦠꦒ꧀ꦒꦲꦟꦺꦤ ꦱꦩ꧀ꦩꦴꦱꦔ꧀ꦏꦥ꧀ꦥꦱꦠꦶꦱꦩꦴꦣꦪꦺꦴ ꦩꦒ꧀ꦒꦦꦭꦥꦫꦶꦪꦴꦥꦤ꧀ꦤꦴ ꦱꦩꦸꦕ꧀ꦖꦺꦢꦥꦛꦶꦥꦱ꧀ꦱꦢ꧀ꦣꦶꦮꦶꦩꦸꦠ꧀ꦠꦶꦪꦺꦴ ꦢꦛ꧀ꦜꦧ꧀ꦧꦴ. ꦤꦶꦱ꧀ꦱꦫꦟꦮꦶꦩꦸꦠ꧀ꦠꦶ ꦥꦤ ꦤꦶꦧ꧀ꦧꦴꦤꦩꦺꦮ.

꧔꧐꧓. ꦪꦁ ꦏꦶꦚ꧀ꦕꦶ ꦗꦤꦮꦶꦮꦶꦠ꧀ꦠꦁ ꦜꦴꦤꦁ ꦆꦣ ‘‘ꦱꦸꦚ꧀ꦚꦴꦒꦴꦫ’’ꦤ꧀ꦠꦶ ꦄꦣꦶꦥ꧀ꦥꦺꦠꦁ. ꦠꦠ꧀ꦡ ꦤꦢꦤ꧀ꦠꦺꦤ ꦮꦶꦤꦴ ꦤꦴꦢꦺꦴ ꦤꦠ꧀ꦡꦷꦠꦶ ꦄꦴꦲ ‘‘ꦌꦏꦠꦺꦴꦮ ꦤꦶꦱꦷꦢꦶꦠ꧀ꦮꦴ’’ꦠꦶ. ꦄꦛ꧀ꦜꦱꦸ ꦥꦫꦶꦱꦴꦱꦹꦠꦶ ꦑꦠ꧀ꦠꦶꦪꦥꦫꦶꦱꦴ, ꦧ꧀ꦫꦴꦲ꧀ꦩꦟꦥꦫꦶꦱꦴ, ꦒꦲꦥꦠꦶꦥꦫꦶꦱꦴ, ꦱꦩꦟꦥꦫꦶꦱꦴ, ꦕꦴꦠꦸꦩꦲꦴꦫꦴꦗꦶꦏꦥꦫꦶꦱꦴ, ꦠꦴꦮꦠꦶꦁꦱꦥꦫꦶꦱꦴ, ꦩꦴꦫꦥꦫꦶꦱꦴ, ꦧ꧀ꦫꦲ꧀ꦩꦥꦫꦶꦱꦴꦠꦶ ꦆꦩꦴꦱꦸ ꦄꦛ꧀ꦜꦱꦸ ꦥꦫꦶꦱꦴꦱꦸ.

ꦮꦺꦱꦴꦫꦗ꧀ꦗꦴꦤꦷꦠꦶ ꦮꦶꦱꦴꦫꦢꦨꦴꦮꦴ ꦚꦴꦟꦥ꧀ꦥꦲꦴꦤꦱꦩ꧀ꦥꦢꦴꦤꦶꦩꦶꦠ꧀ꦠꦁ ꦏꦸꦠꦺꦴꦕꦶ ꦄꦱꦤ꧀ꦠꦱ꧀ꦱꦤꦨꦴꦮꦴ ꦤꦶꦧ꧀ꦨꦪꦨꦴꦮꦴꦠꦶ ꦄꦠ꧀ꦡꦺꦴ. ꦄꦴꦱꦨꦁ ꦜꦴꦤꦤ꧀ꦠꦶ ꦱꦺꦛ꧀ꦜꦁ ꦜꦴꦤꦁ, ꦈꦠ꧀ꦠꦩꦁ ꦜꦴꦤꦤ꧀ꦠꦶ ꦄꦠ꧀ꦡꦺꦴ. ꦄꦴꦱꦨꦴ ꦮꦴ ꦥꦸꦧ꧀ꦧꦧꦸꦢ꧀ꦣꦴ, ꦠꦺꦱꦁ ꦜꦴꦤꦤ꧀ꦠꦶ ꦄꦠ꧀ꦡꦺꦴ.

ꦄꦥꦶꦕ ꦈꦱꦨꦱ꧀ꦱ ꦆꦢꦤ꧀ꦠꦶ ꦄꦴꦱꦨꦁ, ꦄꦴꦱꦨꦁ ꦮꦶꦪꦴꦠꦶ ꦄꦴꦱꦨꦁ. ꦪꦡꦴ ꦲꦶ ꦤꦶꦱꦨꦱꦔ꧀ꦑꦴꦠꦺꦴ ꦈꦱꦨꦺꦴ ꦄꦠ꧀ꦠꦤꦺꦴ ꦈꦱꦨꦧꦭꦺꦤ ꦕꦠꦹꦲꦶ ꦥꦴꦢꦺꦲꦶ ꦥꦡꦮꦶꦁ ꦈꦥ꧀ꦥꦷꦭ꦳ꦺꦠ꧀ꦮꦴ ꦄꦕꦭꦛ꧀ꦜꦴꦤꦺꦤ ꦠꦶꦛ꧀ꦜꦠꦶ, ꦌꦮꦁ ꦠꦡꦴꦒꦠꦺꦴꦥꦶ ꦢꦱꦲꦶ ꦠꦡꦴꦒꦠꦧꦭꦺꦲꦶ ꦱꦩꦤ꧀ꦤꦴꦒꦠꦺꦴ ꦕꦠꦹꦲꦶ ꦮꦺꦱꦴꦫꦗ꧀ꦗꦥꦴꦢꦺꦲꦶ ꦄꦛ꧀ꦜꦥꦫꦶꦱꦴꦥꦡꦮꦶꦁ ꦈꦥ꧀ꦥꦷꦭ꦳ꦺꦠ꧀ꦮꦴ ꦱꦢꦺꦮꦏꦺ ꦭꦺꦴꦏꦺ ꦏꦺꦤꦕꦶ ꦥꦕ꧀ꦕꦠ꧀ꦡꦶꦏꦺꦤ ꦄꦏꦩ꧀ꦥꦶꦪꦺꦴ ꦄꦕꦭꦺꦤ ꦜꦴꦤꦺꦤ ꦠꦶꦛ꧀ꦜꦠꦶ. ꦌꦮꦁ ꦠꦶꦛ꧀ꦜꦩꦴꦤꦺꦴꦮ ꦠꦁ ꦄꦴꦱꦨꦁ ꦜꦴꦤꦁ ꦥꦛꦶꦗꦴꦤꦴꦠꦶ ꦈꦥꦒꦕ꧀ꦖꦠꦶ ꦤ ꦥꦕ꧀ꦕꦏ꧀ꦑꦴꦠꦶ ꦄꦠ꧀ꦠꦤꦶ ꦄꦴꦫꦺꦴꦥꦺꦠꦶ. ꦠꦺꦤ ꦮꦸꦠ꧀ꦠꦁ ‘‘ꦄꦴꦱꦨꦁ ꦜꦴꦤꦁ ꦥꦛꦶꦗꦴꦤꦴꦠꦷ’’ꦠꦶ.

ꦱꦷꦲꦤꦴꦢꦁ ꦤꦢꦠꦷꦠꦶ ꦪꦡꦴ ꦩꦶꦒꦫꦴꦗꦴ ꦥꦫꦶꦱ꧀ꦱꦪꦴꦤꦁ ꦱꦲꦤꦠꦺꦴ, ꦮꦤꦩꦲꦶꦁꦱꦩꦠ꧀ꦠꦮꦴꦫꦟꦴꦢꦷꦤꦁ ꦲꦤꦤꦠꦺꦴ ꦕ ‘‘ꦱꦷꦲꦺꦴ’’ꦠꦶ ꦮꦸꦕ꧀ꦕꦠꦶ, ꦌꦮꦁ ꦠꦡꦴꦒꦠꦺꦴ ꦭꦺꦴꦏꦣꦩ꧀ꦩꦴꦤꦁ ꦱꦲꦤꦠꦺꦴ, ꦥꦫꦥ꧀ꦥꦮꦴꦢꦴꦤꦁ ꦲꦤꦤꦠꦺꦴ ꦕ ‘‘ꦱꦷꦲꦺꦴ’’ꦠꦶ ꦮꦸꦕ꧀ꦕꦠꦶ. ꦌꦮꦁ ꦮꦸꦠ꧀ꦠꦱ꧀ꦱ ꦱꦷꦲꦱ꧀ꦱ ꦤꦴꦢꦁ ꦱꦷꦲꦤꦴꦢꦁ. ꦠꦠ꧀ꦡ ꦪꦡꦴ ꦱꦷꦲꦺꦴ ꦱꦷꦲꦧꦭꦺꦤ ꦱꦩꦤ꧀ꦤꦴꦒꦠꦺꦴ ꦱꦧ꧀ꦧꦠ꧀ꦡ ꦮꦶꦱꦴꦫꦢꦺꦴ ꦮꦶꦒꦠꦭꦺꦴꦩꦲꦁꦱꦺꦴ ꦱꦷꦲꦤꦴꦢꦁ ꦤꦢꦠꦶ, ꦌꦮꦁ ꦠꦡꦴꦒꦠꦱꦷꦲꦺꦴꦥꦶ ꦢꦱꦲꦶ ꦠꦡꦴꦒꦠꦧꦭꦺꦲꦶ ꦱꦩꦤ꧀ꦤꦴꦒꦠꦺꦴ ꦄꦛ꧀ꦜꦱꦸ ꦥꦫꦶꦱꦴꦱꦸ ꦮꦶꦱꦴꦫꦢꦺꦴ ꦮꦶꦒꦠꦭꦺꦴꦩꦲꦁꦱꦺꦴ ‘‘ꦆꦠꦶ ꦫꦹꦥ’’ꦤ꧀ꦠꦶꦄꦴꦢꦶꦤꦴ (ꦱꦁ. ꦤꦶ. ꧓.꧗꧘; ꦄ. ꦤꦶ. ꧘.꧒) ꦤꦪꦺꦤ ꦤꦴꦤꦴꦮꦶꦭꦴꦱꦱꦩ꧀ꦥꦤ꧀ꦤꦁ ꦱꦷꦲꦤꦴꦢꦁ ꦤꦢꦠꦶ.

ꦥꦚ꧀ꦲꦁ ꦄꦨꦶꦱꦔ꧀ꦑꦫꦶꦠ꧀ꦮꦴꦠꦶ ꦚꦴꦠꦸꦁ ꦆꦕ꧀ꦖꦶꦠꦩꦠ꧀ꦡꦁ ꦄꦠ꧀ꦠꦤꦺꦴ ꦚꦴꦟꦧꦭꦴꦤꦸꦫꦹꦥꦁ ꦄꦨꦶꦫꦕꦶꦠ꧀ꦮꦴ ꦠꦔ꧀ꦑꦟꦁꦪꦺꦮꦴꦠꦶ ꦥꦸꦕ꧀ꦖꦶꦠꦏ꧀ꦑꦟꦺꦪꦺꦮ ꦜꦴꦤꦸꦥ꧀ꦥꦠ꧀ꦠꦶꦏꦥꦛꦶꦨꦴꦤꦺꦤ ꦮꦶꦱ꧀ꦱꦗ꧀ꦗꦺꦠꦶ. ꦕꦶꦠ꧀ꦠꦁ ꦥꦫꦶꦠꦺꦴꦱꦺꦠꦶꦪꦺꦮ ꦄꦗ꧀ꦙꦴꦱꦪꦴꦤꦸꦫꦹꦥꦁ ꦮꦶꦱ꧀ꦱꦗ꧀ꦗꦤꦠꦺꦴ. ꦱꦺꦴꦠꦧ꧀ꦧꦚ꧀ꦕꦱ꧀ꦱ ꦩꦚ꧀ꦚꦤ꧀ꦠꦶ ꦄꦛ꧀ꦜꦏ꧀ꦑꦟꦮꦗ꧀ꦗꦶꦠꦺꦤ ꦤꦮꦩꦺꦤ ꦑꦟꦺꦤ ꦭꦧ꧀ꦨꦩꦴꦤꦠ꧀ꦠꦴ. ‘‘ꦪꦁ ꦤꦺꦴ ꦱꦠ꧀ꦡꦴ ꦨꦴꦱꦠꦶ, ꦠꦁ ꦤꦺꦴ ꦱꦺꦴꦱ꧀ꦱꦴꦩꦴ’’ꦠꦶ ꦄꦴꦢꦫꦒꦴꦫꦮꦗꦴꦠꦴ ꦩꦲꦤ꧀ꦠꦺꦤ ꦈꦱ꧀ꦱꦴꦲꦺꦤ ꦱꦺꦴꦠꦧ꧀ꦧꦁ ꦱꦩ꧀ꦥꦛꦶꦕ꧀ꦖꦶꦠꦧ꧀ꦧꦁ ꦩꦚ꧀ꦚꦤ꧀ꦠꦶ. ꦱꦸꦥ꧀ꦥꦱꦤ꧀ꦤꦴ ꦥꦱꦴꦢꦴꦨꦶꦧꦸꦢ꧀ꦣꦶꦪꦴ ꦮꦶꦒꦠꦸꦥꦏ꧀ꦏꦶꦭꦺꦱꦠꦴꦪ ꦏꦭ꧀ꦭꦕꦶꦠ꧀ꦠꦴ ꦩꦸꦢꦸꦕꦶꦠ꧀ꦠꦴ ꦲꦺꦴꦤ꧀ꦠꦶ. ꦥꦱꦤ꧀ꦤꦏꦴꦫꦤ꧀ꦠꦶ ꦥꦱꦤ꧀ꦤꦺꦲꦶ ꦏꦴꦠꦧ꧀ꦧꦱꦏ꧀ꦏꦴꦫꦁ, ꦣꦩ꧀ꦩꦴꦩꦶꦱꦥꦹꦗꦤ꧀ꦠꦶ ꦄꦠ꧀ꦡꦺꦴ. ꦠꦠ꧀ꦡ ꦄꦴꦩꦶꦱꦥꦹꦗꦁ ꦢꦱ꧀ꦱꦺꦤ꧀ꦠꦺꦴ ‘‘ꦥꦟꦷꦠꦴꦤꦷ’’ꦠꦶꦄꦴꦢꦶꦩꦴꦲ. ꦣꦩ꧀ꦩꦥꦹꦗꦴ ꦥꦤ ‘‘ꦠꦡꦠ꧀ꦠꦴꦪꦴ’’ꦠꦶ ꦆꦩꦶꦤꦴ ꦢꦱ꧀ꦱꦶꦠꦴ. ꦠꦡꦴꦨꦴꦮꦴꦪꦴꦠꦶ ꦪꦡꦠ꧀ꦠꦴꦪ ꦪꦱ꧀ꦱ ꦮꦛ꧀ꦛꦢꦸꦏ꧀ꦑꦤꦶꦱ꧀ꦱꦫꦟꦠ꧀ꦡꦴꦪ ꦣꦩ꧀ꦩꦺꦴ ꦢꦺꦱꦶꦠꦺꦴ, ꦠꦡꦴꦨꦴꦮꦴꦪ, ꦠꦺꦤꦴꦲ ‘‘ꦣꦩ꧀ꦩꦴꦤꦸꦣꦩ꧀ꦩꦥꦛꦶꦥꦠ꧀ꦠꦶꦥꦹꦫꦟꦠ꧀ꦡꦴꦪꦴ’’ꦠꦶ. ꦱꦴ ꦕ ꦣꦩ꧀ꦩꦴꦤꦸꦣꦩ꧀ꦩꦥꦛꦶꦥꦠ꧀ꦠꦶ ꦪꦴꦪ ꦄꦤꦸꦥꦸꦧ꧀ꦧꦶꦪꦴ ꦥꦛꦶꦥꦗ꧀ꦗꦶꦠꦧ꧀ꦧꦴ, ꦥꦛꦶꦥꦗ꧀ꦗꦤ꧀ꦠꦴꦤꦚ꧀ꦕ ꦱꦠꦶ ꦄꦗ꧀ꦙꦠ꧀ꦠꦶꦏꦔ꧀ꦒꦱꦩꦮꦴꦪꦺ ꦌꦏꦁꦱꦶꦏꦴ ꦠꦱ꧀ꦱꦴ ꦥꦴꦫꦶꦥꦹꦫꦷꦠꦶ ꦠꦁ ꦄꦤꦸꦥꦸꦧ꧀ꦧꦶꦁ ꦢꦱ꧀ꦱꦺꦠꦸꦁ ‘‘ꦏꦺꦕꦶ ꦱꦫꦟꦺꦱꦹ’’ꦠꦶꦄꦴꦢꦶ ꦮꦸꦠ꧀ꦠꦁ.

ꦆꦩꦱ꧀ꦩꦶꦁ ꦥꦤꦺꦴꦏꦴꦱꦺ ꦜꦠ꧀ꦮꦴꦠꦶ ‘‘ꦥꦛꦶꦥꦤ꧀ꦤꦴ ꦕ ꦄꦴꦫꦴꦣꦺꦤ꧀ꦠꦷ’’ꦠꦶ ꦌꦠꦱ꧀ꦩꦶꦁ ꦱꦷꦲꦤꦴꦢꦏꦶꦕ꧀ꦕꦥꦴꦫꦶꦥꦹꦫꦶꦢꦷꦥꦤꦺ ꦥꦴꦭ꦳ꦶꦥꦢꦺꦱꦺ ꦜꦠ꧀ꦮꦴ. ꦱꦩꦺꦴꦣꦴꦤꦺꦠꦧ꧀ꦧꦴꦠꦶ ꦱꦔ꧀ꦏꦭꦶꦠꦧ꧀ꦧꦴ. ꦌꦏꦺꦴ ꦱꦷꦲꦤꦴꦢꦺꦴ ꦄꦱꦴꦣꦴꦫꦟꦺꦴ ꦄꦚ꧀ꦚꦺꦲꦶ ꦄꦥ꧀ꦥꦛꦶꦮꦠ꧀ꦠꦶꦪꦺꦴ ꦱꦺꦛ꧀ꦜꦤꦴꦢꦺꦴ ꦄꦨꦷꦠꦤꦴꦢꦺꦴꦠꦶ ꦏꦠ꧀ꦮꦴ. ꦌꦱ ꦤꦪꦺꦴ ꦱꦺꦱꦺꦱꦸꦥꦶ. ꦥꦸꦫꦶꦩꦴꦤꦁ ꦢꦱꦤ꧀ꦤꦤ꧀ꦠꦶꦄꦴꦢꦶꦠꦺꦴ ꦥꦛ꧀ꦜꦴꦪ ꦪꦴꦮ ‘‘ꦮꦶꦩꦸꦠ꧀ꦠꦶꦪꦴ ꦩꦪ꧀ꦲꦁ ꦱꦢꦶꦱꦺꦴ ꦤꦠ꧀ꦡꦷ’’ꦠꦶ ꦌꦠꦺꦱꦁ ꦥꦸꦫꦶꦩꦴꦤꦁ ꦢꦱꦤ꧀ꦤꦁ ꦱꦷꦲꦤꦴꦢꦴꦤꦁ, ꦤꦶꦢ꧀ꦣꦴꦫꦟꦺ ꦕꦺꦠ꧀ꦡ ꦱꦴꦩꦶꦮꦕꦤꦁ, ꦠꦺꦤꦴꦲ ‘‘ꦌꦏꦺꦏꦱ꧀ꦱꦴ’’ꦠꦶ. ‘‘ꦥꦫꦶꦱꦴꦱꦸ ꦕ ꦤꦢꦠꦷ’’ꦠꦶ ꦄꦴꦢꦪꦺꦴ ꦥꦫꦶꦮꦴꦫꦴ ‘‘ꦌꦏꦕ꧀ꦕꦁ ꦠꦥꦱ꧀ꦱꦶꦁ ꦤꦶꦫꦪꦺ ꦤꦶꦧ꧀ꦧꦠ꧀ꦠꦁ ꦥꦱ꧀ꦱꦴꦩꦷ’’ꦠꦶ ꦱꦷꦲꦤꦴꦢꦁ ꦤꦢꦤ꧀ꦠꦺꦴ ꦨꦒꦮꦴ ꦥꦫꦶꦱꦴꦪꦁ ꦤꦢꦠꦶ ꦮꦶꦱꦴꦫꦢꦺꦴ ꦤꦢꦠꦶ ꦪꦴꦮ ‘‘ꦥꦛꦶꦥꦤ꧀ꦤꦴ ꦄꦴꦫꦴꦣꦺꦤ꧀ꦠꦷ’’ꦠꦶ ꦄꦠ꧀ꦡꦪꦺꦴꦗꦤꦴꦪ ꦱꦩ꧀ꦨꦮꦠꦺꦴ. ꦠꦡꦴ ꦱꦺꦱꦺꦱꦸꦥꦶ ꦤꦮꦱꦸ.

‘‘ꦌꦮ’’ꦤ꧀ꦠꦶꦄꦴꦢꦶ ꦪꦡꦴꦮꦸꦠ꧀ꦠꦴꦤꦁ ꦠꦺꦱꦁ ꦱꦔ꧀ꦏꦭꦺꦠ꧀ꦮꦴ ꦢꦱ꧀ꦱꦤꦁ. ꦠꦺ ꦢꦱꦴꦠꦶ ꦠꦺ ‘‘ꦥꦫꦶꦱꦴꦱꦸ ꦕ ꦤꦢꦠꦷ’’ꦠꦶ ꦄꦴꦢꦪꦺꦴ ꦱꦷꦲꦤꦴꦢꦴ. ꦥꦸꦫꦶꦩꦴꦤꦁ ꦢꦱꦤ꧀ꦤꦤ꧀ꦠꦶ ꦪꦡꦴꦮꦸꦠ꧀ꦠꦴꦤꦁ ꦥꦸꦫꦶꦩꦴꦤꦁ ꦢꦱꦤ꧀ꦤꦁ. ꦥꦫꦶꦮꦴꦫꦮꦱꦺꦤꦴꦠꦶ ꦥꦕ꧀ꦕꦺꦏꦁ ꦥꦫꦶꦮꦴꦫꦮꦱꦺꦤ ꦪꦺꦴꦗꦶꦪꦩꦴꦤꦴ ꦱꦠꦁ ꦱꦷꦲꦤꦴꦢꦴ. ꦥꦸꦫꦶꦩꦴ ꦕ ꦢꦱꦴꦠꦶ ꦠꦡꦴ ꦄꦪꦺꦴꦗꦶꦪꦩꦴꦤꦴ ꦥꦸꦫꦶꦩꦴ ꦕ ꦢꦱꦴꦠꦶ ꦌꦮꦁ ꦢꦱꦴꦣꦶꦏꦁ ꦱꦷꦲꦤꦴꦢꦱꦠꦁ ꦲꦺꦴꦠꦶ. ꦌꦮꦁ ꦮꦴꦢꦷꦤꦁ ꦮꦴꦢꦤ꧀ꦠꦶ ꦌꦮꦁ ꦥꦮꦠ꧀ꦠꦮꦴꦢꦴꦤꦁ ꦠꦶꦠ꧀ꦡꦶꦪꦴꦤꦁ ꦮꦴꦢꦁ. ꦥꦛꦶꦱꦺꦣꦺꦠ꧀ꦮꦴꦠꦶ ꦠꦡꦴꦨꦴꦮꦴꦨꦴꦮꦢꦱ꧀ꦱꦤꦺꦤ ꦥꦛꦶꦏ꧀ꦑꦶꦥꦶꦠ꧀ꦮꦴ. ꦪꦁ ꦨꦒꦮꦴ ꦈꦢꦸꦩ꧀ꦧꦫꦶꦏꦱꦸꦠ꧀ꦠꦺ ‘‘ꦆꦣ ꦤꦶꦒ꧀ꦫꦺꦴꦣ ꦠꦥꦱ꧀ꦱꦷ’’ꦠꦶꦄꦴꦢꦶꦤꦴ (ꦢꦷ. ꦤꦶ. ꧓.꧓꧓) ꦈꦥꦏ꧀ꦏꦶꦭꦺꦱꦮꦶꦨꦴꦒꦁ, ꦥꦴꦫꦶꦱꦸꦢ꧀ꦣꦶꦮꦶꦨꦴꦒꦚ꧀ꦕ ꦢꦱ꧀ꦱꦺꦤ꧀ꦠꦺꦴ ꦱꦥꦫꦶꦱꦱ꧀ꦱ ꦤꦶꦒ꧀ꦫꦺꦴꦣꦱ꧀ꦱ ꦥꦫꦶꦧ꧀ꦧꦴꦗꦏꦱ꧀ꦱ ꦥꦸꦫꦠꦺꦴ ꦱꦷꦲꦤꦴꦢꦁ ꦤꦢꦶ, ꦠꦁ ꦢꦱ꧀ꦱꦺꦠꦸꦁ ‘‘ꦆꦢꦴꦤꦶ ꦥꦫꦶꦱꦠꦶ ꦤꦢꦶꦠꦥꦸꦧ꧀ꦧꦁ ꦱꦷꦲꦤꦴꦢꦁ ꦢꦱ꧀ꦱꦺꦤ꧀ꦠꦺꦴ’’ꦠꦶꦄꦴꦢꦶ ꦮꦸꦠ꧀ꦠꦁ.

ꦠꦶꦠ꧀ꦡꦶꦪꦥꦫꦶꦮꦴꦱꦏꦡꦴꦮꦟ꧀ꦟꦤꦴ

꧔꧐꧔. ꦆꦢꦤ꧀ꦠꦶ ‘‘ꦫꦴꦗꦒꦲꦺ ꦒꦶꦗ꧀ꦙꦏꦹꦛꦺ ꦥꦧ꧀ꦧꦠꦺ ꦮꦶꦲꦫꦤ꧀ꦠꦁ ꦩꦁ…ꦥꦺ… ꦥꦚ꧀ꦲꦁ ꦥꦸꦕ꧀ꦖꦷ’’ꦠꦶ ꦆꦢꦁ ꦮꦕꦤꦁ. ꦏꦴꦩꦁ ꦪꦢꦴ ꦤꦶꦒ꧀ꦫꦺꦴꦣꦺꦴ ꦥꦚ꧀ꦲꦁ ꦥꦸꦕ꧀ꦖꦶ, ꦨꦒꦮꦴ ꦕꦱ꧀ꦱ ꦮꦶꦱ꧀ꦱꦗ꧀ꦗꦺꦱꦶ, ꦤ ꦠꦢꦴ ꦒꦶꦗ꧀ꦙꦏꦹꦛꦺ ꦥꦧ꧀ꦧꦠꦺ ꦮꦶꦲꦫꦠꦶ, ꦫꦴꦗꦒꦲꦱꦩꦷꦥꦺ ꦥꦤ ꦮꦶꦲꦫꦠꦷꦠꦶ ꦏꦠ꧀ꦮꦴ ‘‘ꦫꦴꦗꦒꦲꦺ ꦒꦶꦗ꧀ꦙꦏꦹꦛꦺ ꦥꦧ꧀ꦧꦠꦺ ꦮꦶꦲꦫꦤ꧀ꦠꦁ ꦩ’’ꦤ꧀ꦠꦶ ꦮꦸꦠ꧀ꦠꦁ, ꦒꦶꦗ꧀ꦙꦏꦹꦛꦺ ꦮꦶꦲꦫꦟꦚ꧀ꦕꦱ꧀ꦱ ꦠꦢꦴ ꦄꦮꦶꦕ꧀ꦖꦶꦤ꧀ꦤꦤ꧀ꦠꦶ, ꦠꦺꦤꦴꦲ ‘‘ꦪꦁ ꦠꦁ ꦨꦒꦮꦴ’’ꦠꦶꦄꦴꦢꦶ. ꦪꦺꦴꦒꦺꦠꦶ ꦤꦪꦺ, ꦢꦸꦏ꧀ꦑꦤꦶꦱ꧀ꦱꦫꦟꦹꦥꦴꦪꦺꦠꦶ ꦄꦠ꧀ꦡꦺꦴ.

꧔꧐꧕. ꦪꦁ ꦥꦫꦶꦮꦴꦱꦁ ꦱꦴꦩꦟꦺꦫꦨꦹꦩꦶꦪꦁ ꦜꦶꦠꦺꦴ ꦥꦫꦶꦮꦱꦠꦷꦠꦶ ꦪꦺꦴꦗꦤꦴ. ꦪꦱ꧀ꦩꦴ ꦱꦴꦩꦟꦺꦫꦨꦹꦩꦶꦪꦁ ꦜꦶꦠꦺꦤ ꦥꦫꦶꦮꦱꦶꦠꦧ꧀ꦧꦁ, ꦤ ꦒꦶꦲꦶꦨꦹꦠꦺꦤ, ꦠꦱ꧀ꦩꦴ ꦄꦥꦫꦶꦮꦱꦶꦠ꧀ꦮꦴꦪꦺꦮ ꦥꦧ꧀ꦧꦗ꧀ꦗꦁ ꦭꦨꦠꦶ. ꦄꦴꦏꦔ꧀ꦑꦠꦶ ꦥꦧ꧀ꦧꦗ꧀ꦗꦁ, ꦄꦴꦏꦔ꧀ꦑꦠꦶ ꦈꦥꦱꦩ꧀ꦥꦢꦤ꧀ꦠꦶ ꦌꦠ꧀ꦡ ꦥꦤ ꦥꦧ꧀ꦧꦗ꧀ꦗꦴ-ꦒ꧀ꦒꦲꦟꦁ ꦮꦕꦤꦱꦶꦭꦶꦛ꧀ꦜꦠꦴꦮꦱꦺꦤꦺꦮ ‘‘ꦢꦶꦫꦠ꧀ꦠꦠꦶꦫꦠ꧀ꦠꦁ ꦱꦲꦱꦺꦪ꧀ꦪ’’ꦤ꧀ꦠꦶ (ꦥꦴꦕꦶ. ꧕꧐) ꦌꦠ꧀ꦡ ꦢꦶꦫꦠ꧀ꦠꦒ꧀ꦒꦲꦟꦁ ꦮꦶꦪ. ꦒꦴꦩꦥ꧀ꦥꦮꦺꦱꦤꦴꦢꦷꦤꦷꦠꦶ ꦄꦴꦢꦶ-ꦱꦢ꧀ꦢꦺꦤ ꦮꦺꦱꦶꦪꦴꦮꦶꦣꦮꦴꦡꦸꦭ꧀ꦭꦏꦸꦩꦴꦫꦶꦥꦟ꧀ꦝꦏꦨꦶꦏ꧀ꦑꦸꦤꦶꦒꦺꦴꦕꦫꦠꦴ, ꦱꦧ꧀ꦫꦲ꧀ꦩꦕꦴꦫꦷꦤꦁ ꦈꦕ꧀ꦕꦴꦮꦕꦺꦱꦸ ꦏꦶꦁꦏꦫꦟꦷꦪꦺꦱꦸ ꦢꦏ꧀ꦑꦴꦤꦭꦱꦴꦢꦶꦠꦴ, ꦈꦢ꧀ꦢꦺꦱꦥꦫꦶꦥꦸꦕ꧀ꦖꦴꦢꦷꦱꦸ ꦠꦶꦧ꧀ꦧꦖꦤ꧀ꦢꦠꦴ, ꦪꦱ꧀ꦱ ꦠꦶꦠ꧀ꦡꦴꦪꦠꦤꦠꦺꦴ ꦆꦣꦴꦒꦠꦺꦴ, ꦠꦱ꧀ꦱ ꦄꦮꦟ꧀ꦟꦺ, ꦫꦠꦤꦠ꧀ꦠꦪꦱ꧀ꦱ ꦕ ꦮꦟ꧀ꦟꦺ ꦄꦤꦠ꧀ꦠꦩꦤꦠꦴ, ꦠꦢꦸꦨꦪꦁ ꦪꦡꦴꦏ꧀ꦏꦩꦁ ꦮꦟ꧀ꦟꦺ ꦕ ꦄꦮꦟ꧀ꦟꦺ ꦕ ꦄꦠ꧀ꦠꦩꦤꦠꦴꦠꦶ ꦆꦩꦺꦱꦁ ꦱꦔ꧀ꦒꦲꦺꦴ ꦮꦺꦢꦶꦠꦧ꧀ꦧꦺꦴ, ꦠꦺꦤꦴꦲ ‘‘ꦄꦛ꧀ꦜ ꦮꦠ꧀ꦠꦴꦤꦶ ꦥꦹꦫꦺꦤ꧀ꦠꦺꦤꦴ’’ꦠꦶ. ꦓꦁꦱꦶꦠ꧀ꦮꦴ ꦏꦺꦴꦛ꧀ꦛꦺꦠ꧀ꦮꦴꦠꦶ ꦄꦗ꧀ꦙꦴꦱꦪꦱ꧀ꦱ ꦮꦷꦩꦁꦱꦤꦮꦱꦺꦤ ꦱꦸꦮꦟ꧀ꦟꦁ ꦮꦶꦪ ꦓꦁꦱꦶꦠ꧀ꦮꦴ ꦏꦺꦴꦛ꧀ꦛꦺꦠ꧀ꦮꦴ.

ꦒꦟꦩꦗ꧀ꦙꦺ ꦤꦶꦱꦷꦢꦶꦠ꧀ꦮꦴꦠꦶ ꦈꦥꦱꦩ꧀ꦥꦢꦴꦏꦩ꧀ꦩꦱ꧀ꦱ ꦒꦟꦥ꧀ꦥꦲꦺꦴꦤꦏꦴꦤꦁ ꦨꦶꦏ꧀ꦑꦹꦤꦁ ꦩꦗ꧀ꦙꦺ ꦱꦔ꧀ꦓꦠ꧀ꦡꦺꦫꦺꦴ ꦮꦶꦪ ꦠꦱ꧀ꦱ ꦄꦤꦸꦒ꧀ꦒꦲꦠ꧀ꦡꦁ ꦤꦶꦱꦷꦢꦶꦠ꧀ꦮꦴ. ꦮꦹꦥꦏꦛ꧀ꦜꦺꦴꦠꦶ ꦮꦶꦮꦶꦠ꧀ꦠꦺꦴ. ꦠꦴꦢꦶꦱꦱ꧀ꦱ ꦱꦷꦭꦮꦶꦱꦺꦴꦣꦤꦺ ꦄꦥ꧀ꦥꦩꦴꦢꦺꦴ ꦄꦮꦸꦠ꧀ꦠꦱꦶꦢ꧀ꦣꦺꦴꦠꦶ ꦄꦴꦲ ‘‘ꦏꦩ꧀ꦩꦛ꧀ꦜꦴꦤꦺ ꦱꦠꦶꦁ ꦄꦮꦶꦗꦲꦤ꧀ꦠꦺꦴ’’ꦠꦶ. ꦥꦺꦱꦶꦠꦕꦶꦠ꧀ꦠꦺꦴꦠꦶ ꦤꦶꦧ꧀ꦧꦴꦤꦁ ꦥꦠꦶ ꦥꦺꦱꦶꦠꦕꦶꦠ꧀ꦠꦺꦴ ꦠꦁꦤꦶꦤ꧀ꦤꦺꦴ ꦠꦥ꧀ꦥꦺꦴꦟꦺꦴ ꦠꦥ꧀ꦥꦧ꧀ꦨꦴꦫꦺꦴ. ꦗꦴꦠꦶꦏꦸꦭꦥꦸꦠ꧀ꦠꦴꦥꦶ ꦄꦴꦕꦴꦫꦱꦩ꧀ꦥꦤ꧀ꦤꦴ ꦌꦮ ꦄꦫꦲꦠ꧀ꦠꦴꦣꦶꦒꦩꦴꦪ ꦥꦧ꧀ꦧꦗ꧀ꦗꦴꦥꦺꦏ꧀ꦑꦴ ꦲꦺꦴꦤ꧀ꦠꦷꦠꦶ ꦠꦺꦥꦶ ꦠꦺꦲꦶ ꦌꦏꦱꦔ꧀ꦒꦲꦺ ꦏꦫꦺꦴꦤ꧀ꦠꦺꦴ ꦄꦴꦲ ‘‘ꦏꦸꦭꦥꦸꦠ꧀ꦠꦴꦠꦶ ꦄꦴꦕꦴꦫꦏꦸꦭꦥꦸꦠ꧀ꦠꦴ’’ꦠꦶ, ꦠꦺꦤꦴꦲ ‘‘ꦱꦩ꧀ꦩꦢꦺꦮꦴꦠꦶ ꦲꦺꦠꦸꦤꦴꦮ ꦏꦴꦫꦟꦺꦤꦺꦮꦴ’’ꦠꦶ. ‘‘ꦎꦠꦶꦟ꧀ꦟꦺꦴꦩ꧀ꦲꦶ ꦗꦴꦠꦶꦪꦴ’’ꦠꦶꦄꦴꦢꦶꦤꦴ ꦤꦪꦺꦤ ꦲꦶ ꦱꦁꦮꦺꦒꦥꦸꦧ꧀ꦧꦶꦏꦁ ꦪꦡꦴꦤꦸꦱꦶꦛ꧀ꦜꦁ ꦥꦧ꧀ꦧꦗ꧀ꦗꦁ ꦱꦤ꧀ꦣꦴꦪ ꦆꦣ ‘‘ꦱꦩ꧀ꦩꦢꦺꦮꦴ’’ꦠꦶ ꦮꦸꦠ꧀ꦠꦁ. ꦲꦺꦠꦸꦤꦴꦠꦶ ꦚꦴꦪꦺꦤ. ꦥꦴꦥꦸꦟꦶꦠ꧀ꦮꦴꦠꦶ ꦥꦠ꧀ꦮꦴ ꦄꦣꦶꦒꦤ꧀ꦠ꧀ꦮꦴ. ꦱꦩ꧀ꦥꦴꦢꦺꦠ꧀ꦮꦴꦠꦶ ꦄꦱꦺꦏ꧀ꦑꦴ ꦱꦷꦭꦱꦩꦴꦣꦶꦥꦚ꧀ꦚꦴ ꦤꦶꦥ꧀ꦦꦴꦢꦺꦠ꧀ꦮꦴ, ꦥꦫꦶꦥꦹꦫꦺꦠ꧀ꦮꦴ ꦮꦴꦠꦶ ꦄꦠ꧀ꦡꦺꦴ.

ꦤꦶꦛ꧀ꦜꦴꦥꦺꦠꦸꦤ꧀ꦠꦶ ꦤꦶꦒꦩꦤꦮꦱꦺꦤ ꦥꦫꦶꦪꦺꦴꦱꦴꦥꦺꦠꦸꦁ. ‘‘ꦧ꧀ꦫꦲ꧀ꦩꦕꦫꦶꦪꦥꦫꦶꦪꦺꦴꦱꦴꦤꦁ…ꦥꦺ… ꦮꦶꦲꦴꦱꦷ’’ꦠꦶ ꦆꦩꦶꦤꦴ ꦌꦮ ꦲꦶ ꦄꦫꦲꦠ꧀ꦠꦤꦶꦏꦹꦛꦺꦤ ꦢꦺꦱꦤꦴ ꦥꦫꦶꦪꦺꦴꦱꦴꦥꦶꦠꦴ. ꦠꦁ ꦥꦤ ꦤꦶꦒꦩꦺꦤ꧀ꦠꦺꦴ ‘‘ꦄꦚ꧀ꦚꦠꦫꦺꦴ ꦑꦺꦴ ꦥꦤꦴ…ꦥꦺ… ꦄꦲꦺꦴꦱꦷ’’ꦠꦶ ꦮꦸꦠ꧀ꦠꦁ ꦣꦩ꧀ꦩꦱꦔ꧀ꦒꦴꦲꦏꦺꦲꦶ. ꦪꦁ ꦥꦤꦺꦠ꧀ꦡ ꦄꦠ꧀ꦡꦠꦺꦴ ꦤ ꦮꦶꦨꦠ꧀ꦠꦁ, ꦠꦁ ꦱꦸꦮꦶꦚ꧀ꦚꦺꦪ꧀ꦪꦩꦺꦮ.

ꦩꦲꦴꦱꦷꦲꦤꦴꦢꦱꦸꦠ꧀ꦠꦮꦟ꧀ꦟꦤꦴꦪ ꦭꦷꦤꦠ꧀ꦡꦥ꧀ꦥꦏꦴꦱꦤꦴ.