꧔. ꦱꦺꦴꦟꦢꦟ꧀ꦝꦱꦸꦠ꧀ꦠꦮꦟ꧀ꦟꦤꦴ

꧓꧐꧐. ꦱꦸꦤ꧀ꦢꦫꦨꦴꦮꦺꦤ ꦱꦴꦠꦶꦱꦪꦴꦤꦶ ꦄꦔ꧀ꦒꦴꦤꦶ ꦌꦠꦺꦱꦁ ꦄꦠ꧀ꦡꦷꦠꦶ ꦄꦔ꧀ꦒꦴ, ꦫꦴꦗꦏꦸꦩꦴꦫꦴꦠꦶ ꦄꦴꦲ ‘‘ꦄꦔ꧀ꦒꦴ ꦤꦴꦩ ꦄꦔ꧀ꦒꦥꦴꦱꦴꦢꦶꦏꦠꦴꦪꦴ’’ꦠꦶꦄꦴꦢꦶ. ꦆꦣꦴꦥꦶ ꦄꦣꦶꦥ꧀ꦥꦺꦠꦴ, ꦤ ꦄꦩ꧀ꦧꦛ꧀ꦜꦱꦸꦠ꧀ꦠꦺ ꦌꦮ. ꦄꦴꦒꦤ꧀ꦠꦸꦁ ꦤ ꦢꦱ꧀ꦱꦤ꧀ꦠꦷꦠꦶ ꦄꦴꦒꦩꦤꦺ ꦄꦴꦢꦷꦤꦮꦁ ꦢꦱ꧀ꦱꦺꦠ꧀ꦮꦴ ꦥꦛꦶꦏ꧀ꦑꦶꦥꦤꦮꦱꦺꦤ ꦄꦴꦒꦤ꧀ꦠꦸꦁ ꦤ ꦢꦱ꧀ꦱꦤ꧀ꦠꦶ, ꦤꦴꦤꦸꦗꦴꦤꦶꦱ꧀ꦱꦤ꧀ꦠꦷꦠꦶ ꦄꦣꦶꦥ꧀ꦥꦴꦪꦺꦴ. ꦤꦷꦭꦴꦱꦺꦴꦏꦏꦟꦶꦏꦴꦫꦏꦺꦴꦮꦶꦭ꦳ꦴꦫꦏꦸꦤ꧀ꦢꦫꦴꦗꦫꦸꦏ꧀ꦑꦺꦲꦶ ꦱꦩ꧀ꦩꦶꦱ꧀ꦱꦠꦴꦪ ꦠꦁ ꦕꦩ꧀ꦥꦏꦮꦤꦁ ‘‘ꦤꦷꦭꦴꦢꦶꦥꦚ꧀ꦕꦮꦟ꧀ꦟꦏꦸꦱꦸꦩꦥꦛꦶꦩꦟ꧀ꦝꦶꦠ’’ꦤ꧀ꦠꦶ ꦢꦛ꧀ꦜꦧ꧀ꦧꦁ. ꦤ ꦕꦩ꧀ꦥꦏꦫꦸꦏ꧀ꦑꦴꦤꦁꦪꦺꦮ ꦤꦷꦭꦴꦢꦶꦥꦚ꧀ꦕꦏꦸꦱꦸꦩꦠꦴꦪꦴꦠꦶ ꦮꦢꦤ꧀ꦠꦶ. ‘‘ꦨꦒꦮꦴ ꦏꦸꦱꦸꦩꦒꦤ꧀ꦣꦱꦸꦒꦤ꧀ꦣꦺ ꦕꦩ꧀ꦥꦏꦮꦤꦺ ꦮꦶꦲꦫꦠꦷ’’ꦠꦶ ꦆꦩꦶꦤꦴ ꦤ ꦩꦴꦥꦤꦏꦴꦭꦺ ꦌꦮ ꦠꦱ꧀ꦩꦶꦁ ꦤꦒꦫꦺ ꦕꦩ꧀ꦥꦏꦫꦸꦏ꧀ꦑꦴ ꦈꦱ꧀ꦱꦤ꧀ꦤꦴ, ꦄꦡ ꦑꦺꦴ ꦄꦥꦫꦨꦴꦒꦺ ꦥꦷꦠꦶ ꦢꦱ꧀ꦱꦺꦠꦶ. ꦩꦴꦥꦤꦏꦴꦭꦺ ꦲꦶ ꦕꦩ꧀ꦥꦏꦴꦤꦁ ꦈꦱ꧀ꦱꦤ꧀ꦤꦠꦴꦪ ꦱꦴ ꦤꦒꦫꦷ ‘‘ꦕꦩ꧀ꦥꦴ’’ꦠꦶ ꦤꦴꦩꦁ ꦭꦨꦶ. ꦆꦱ꧀ꦱꦫꦠ꧀ꦠꦴꦠꦶ ꦄꦣꦶꦥꦠꦶꦨꦴꦮꦠꦺꦴ. ꦱꦺꦤꦴ ꦌꦠꦱ꧀ꦱ ꦄꦠ꧀ꦡꦷꦠꦶ ꦱꦺꦤꦶꦏꦺꦴ, ꦱꦺꦤꦶꦏꦺꦴ ꦌꦮ ꦱꦺꦤꦶꦪꦺꦴ, ꦄꦠ꧀ꦡꦶꦠꦴ ꦕꦺꦠ꧀ꦡ ꦧꦲꦸꦨꦴꦮꦮꦶꦱꦶꦛ꧀ꦜꦴꦠꦶ ꦮꦸꦠ꧀ꦠꦁ ‘‘ꦩꦲꦠꦶꦪꦴ ꦱꦺꦤꦴꦪ ꦱꦩꦤ꧀ꦤꦴꦒꦠꦠ꧀ꦠꦴ’’ꦠꦶ.

꧓꧐꧑-꧒. ꦱꦁꦲꦠꦴꦠꦶ ꦱꦤ꧀ꦤꦶꦥꦠꦶꦠꦴ, ‘‘ꦱꦔ꧀ꦓꦶꦤꦺꦴ’’ꦠꦶ ꦮꦠ꧀ꦠꦧ꧀ꦧꦺ ‘‘ꦱꦔ꧀ꦓꦷ’’ꦠꦶ ꦥꦸꦡꦸꦠ꧀ꦡꦺ ꦌꦏꦮꦕꦤꦁ ꦧ꧀ꦫꦴꦲ꧀ꦩꦟꦒꦲꦥꦠꦶꦏꦴꦤꦁ ꦄꦣꦶꦥ꧀ꦥꦺꦠꦠ꧀ꦠꦴ, ꦠꦺꦤꦴꦲ ‘‘ꦌꦠꦺꦱ’’ꦤ꧀ꦠꦶ. ꦫꦴꦗꦫꦴꦗꦚ꧀ꦚꦴꦢꦷꦤꦁ ꦨꦟ꧀ꦝꦣꦫꦴ ꦥꦸꦫꦶꦱꦴ ꦑꦠꦴ, ꦤꦺꦱꦁ ꦠꦴꦪꦤꦠꦺꦴ ꦑꦠ꧀ꦠꦴ. ꦱꦺꦴ ꦲꦶ ꦪꦺꦲꦶ ꦪꦠ꧀ꦡ ꦥꦺꦱꦶꦠꦺꦴ, ꦠꦠ꧀ꦡ ꦠꦺꦱꦁ ꦢꦺꦴꦱꦁ ꦥꦫꦶꦲꦫꦤ꧀ꦠꦺꦴ ꦪꦸꦠ꧀ꦠꦥꦠ꧀ꦠꦮꦱꦺꦤ ꦥꦸꦕ꧀ꦖꦶꦠꦩꦠ꧀ꦡꦁ ꦏꦡꦺꦠꦶ, ꦠꦺꦤꦴꦲ ‘‘ꦥꦸꦕ꧀ꦖꦶꦠꦥꦚ꧀ꦲꦺ ꦧ꧀ꦪꦴꦏꦫꦟꦱꦩꦠ꧀ꦡꦺꦴ’’ꦠꦶ. ꦏꦸꦭꦴꦥꦢꦺꦱꦴꦢꦶꦤꦴ ꦩꦲꦠꦷ ꦩꦠ꧀ꦠꦴ ꦌꦠꦱ꧀ꦱꦴꦠꦶ ꦩꦲꦴꦩꦠ꧀ꦠꦺꦴ.

ꦱꦺꦴꦟꦢꦟ꧀ꦝꦒꦸꦟꦏꦡꦴꦮꦟ꧀ꦟꦤꦴ

꧓꧐꧓. ꦮꦶꦱꦶꦛ꧀ꦜꦁ ꦫꦗ꧀ꦗꦁ ꦮꦶꦫꦗ꧀ꦗꦁ, ꦮꦶꦫꦗ꧀ꦗꦩꦺꦮ ꦮꦺꦫꦗ꧀ꦗꦁ ꦪꦡꦴ ‘‘ꦮꦺꦏꦠꦁ ꦮꦺꦱꦪ’’ꦤ꧀ꦠꦶ, ꦤꦴꦤꦴꦮꦶꦣꦁ ꦮꦺꦫꦗ꧀ꦗꦁ ꦤꦴꦤꦴꦮꦺꦫꦗ꧀ꦗꦁ, ꦠꦠ꧀ꦡ ꦗꦴꦠꦴꦠꦶꦄꦴꦢꦶꦤꦴ ꦱꦧ꧀ꦧꦁ ꦮꦸꦠ꧀ꦠꦤꦪꦺꦤꦺꦮ ꦮꦺꦢꦶꦠꦧ꧀ꦧꦁ. ꦈꦠ꧀ꦠꦩꦧ꧀ꦫꦴꦲ꧀ꦩꦟꦺꦴꦠꦶ ꦄꦨꦶꦗꦤꦱꦩ꧀ꦥꦠ꧀ꦠꦶꦪꦴ ꦮꦶꦠ꧀ꦠꦱꦩ꧀ꦥꦠ꧀ꦠꦶꦪꦴ ꦮꦶꦗ꧀ꦗꦴꦱꦩ꧀ꦥꦠ꧀ꦠꦶꦪꦴ ꦈꦒ꧀ꦒꦠꦠꦫꦺꦴ, ꦈꦭ꦳ꦴꦫꦺꦴ ꦮꦴ ꦧ꧀ꦫꦴꦲ꧀ꦩꦟꦺꦴ. ꦄꦱꦤ꧀ꦤꦶꦥꦴꦠꦺꦴꦠꦶ ꦭꦴꦨꦩꦕ꧀ꦖꦫꦺꦤ ꦤꦶꦥ꧀ꦥꦷꦭ꦳ꦶꦠꦠꦴꦪ ꦄꦱꦤ꧀ꦤꦶꦥꦴꦠꦺꦴ ꦮꦶꦪ ꦨꦮꦶꦱ꧀ꦱꦠꦶ.

‘‘ꦄꦔ꧀ꦒꦺꦠꦶ ꦒꦩꦺꦠꦶ ꦚꦴꦥꦺꦠꦷꦠꦶ ꦄꦔ꧀ꦒꦁ, ꦲꦺꦠꦹꦠꦶ ꦄꦴꦲ ‘‘ꦆꦩꦶꦤꦴꦥꦶ ꦏꦴꦫꦟꦺꦤꦴ’’ꦠꦶ. ‘‘ꦈꦨꦠꦺꦴ ꦱꦸꦗꦴꦠꦺꦴ’’ꦠꦶ ꦌꦠ꧀ꦠꦏꦺ ꦮꦸꦠ꧀ꦠꦺ ꦪꦺꦲꦶ ꦏꦺꦲꦶꦕꦶ ꦢ꧀ꦮꦷꦲꦶ ꦨꦴꦒꦺꦲꦶ ꦱꦸꦗꦴꦠꦠꦴ ꦮꦶꦚ꧀ꦚꦴꦪꦺꦪ꧀ꦪ. ꦱꦸꦗꦴꦠ-ꦱꦢ꧀ꦢꦺꦴ ꦕ ‘‘ꦱꦸꦗꦴꦠꦺꦴ ꦕꦴꦫꦸꦢꦱ꧀ꦱꦤꦺꦴ’’ꦠꦶꦄꦴꦢꦷꦱꦸ (ꦡꦺꦫꦒꦴ. ꧘꧑꧘) ꦄꦴꦫꦺꦴꦲꦱꦩ꧀ꦥꦠ꧀ꦠꦶꦥꦫꦶꦪꦴꦪꦺꦴꦠꦶ ꦗꦴꦠꦶꦮꦱꦺꦤꦺꦮ ꦱꦸꦗꦴꦠꦠꦁ ꦮꦶꦨꦴꦮꦺꦠꦸꦁ ‘‘ꦩꦴꦠꦶꦠꦺꦴ ꦕ ꦥꦶꦠꦶꦠꦺꦴ ꦕꦴ’’ꦠꦶ ꦮꦸꦠ꧀ꦠꦁ. ꦄꦤꦺꦴꦫꦱꦥꦸꦠ꧀ꦠꦮꦱꦺꦤꦴꦥꦶ ꦭꦺꦴꦏꦺ ꦩꦴꦠꦸꦥꦶꦠꦸꦱꦩꦚ꧀ꦚꦴ ꦢꦶꦱ꧀ꦱꦠꦶ, ꦆꦣ ꦥꦤꦱ꧀ꦱ ꦎꦫꦱꦥꦸꦠ꧀ꦠꦮꦱꦺꦤꦺꦮ ꦆꦕ꧀ꦖꦶꦠꦴꦠꦶ ꦢꦱ꧀ꦱꦺꦠꦸꦁ ‘‘ꦱꦁꦱꦸꦢ꧀ꦣꦒꦲꦟꦶꦏꦺꦴ’’ꦠꦶ ꦮꦸꦠ꧀ꦠꦁ. ꦒꦧ꧀ꦨꦁ ꦒꦟ꧀ꦲꦴꦠꦶ ꦣꦴꦫꦺꦠꦷꦠꦶ ꦒꦲꦟꦷ, ꦒꦧ꧀ꦨꦴꦱꦪꦱꦚ꧀ꦚꦶꦠꦺꦴ ꦩꦴꦠꦸꦏꦸꦕ꧀ꦖꦶꦥ꧀ꦥꦢꦺꦱꦺꦴ. ꦪꦡꦴꦨꦸꦠ꧀ꦠꦱ꧀ꦱ ꦄꦴꦲꦴꦫꦱ꧀ꦱ ꦮꦶꦥꦴꦕꦤꦮꦱꦺꦤ ꦒꦟ꧀ꦲꦤꦠꦺꦴ ꦄꦖꦝ꧀ꦝꦤꦠꦺꦴ ꦒꦲꦟꦷ, ꦏꦩ꧀ꦩꦗꦠꦺꦗꦺꦴꦣꦴꦠꦸ.

ꦥꦶꦠꦴ ꦕ ꦩꦴꦠꦴ ꦕ ꦥꦶꦠꦫꦺꦴ, ꦥꦶꦠꦹꦤꦁ ꦥꦶꦠꦫꦺꦴ ꦥꦶꦠꦴꦩꦲꦴ, ꦠꦺꦱꦁ ꦪꦸꦒꦺꦴ ꦢ꧀ꦮꦤ꧀ꦢꦺꦴ ꦥꦶꦠꦴꦩꦲꦪꦸꦒꦺꦴ, ꦠꦱ꧀ꦩꦴ, ꦪꦴꦮ ꦱꦠ꧀ꦠꦩꦴ ꦥꦶꦠꦴꦩꦲꦪꦸꦒꦴ ꦥꦶꦠꦴꦩꦲꦢ꧀ꦮꦤ꧀ꦢꦴꦠꦶ ꦌꦮꦩꦺꦠ꧀ꦡ ꦄꦠ꧀ꦡꦺꦴ ꦢꦛ꧀ꦜꦧ꧀ꦧꦺꦴ. ꦌꦮꦚ꧀ꦲꦶ ꦥꦶꦠꦴꦩꦲꦒ꧀ꦒꦲꦟꦺꦤꦺꦮ ꦩꦴꦠꦴꦩꦲꦺꦴꦥꦶ ꦒꦲꦶꦠꦺꦴꦠꦶ. ꦱꦺꦴ ꦄꦛ꧀ꦜꦏꦡꦴꦪꦁ ꦮꦶꦱꦸꦁ ꦤ ꦈꦢ꧀ꦣꦛꦺꦴ. ꦪꦸꦒ-ꦱꦢ꧀ꦢꦺꦴ ꦕꦺꦠ꧀ꦡ ꦌꦏꦱꦺꦱꦤꦪꦺꦤ ꦢꦛ꧀ꦜꦧ꧀ꦧꦺꦴ ‘‘ꦪꦸꦒꦺꦴ ꦕ ꦪꦸꦒꦺꦴ ꦕ ꦪꦸꦒꦴ’’ꦠꦶ. ꦌꦮꦚ꧀ꦲꦶ ꦠꦠ꧀ꦡ ꦠꦠ꧀ꦡ ꦢ꧀ꦮꦤ꧀ꦢꦁ ꦒꦲꦶꦠꦩꦺꦮ ꦲꦺꦴꦠꦶ, ꦠꦺꦤꦴꦲ ‘‘ꦠꦠꦺꦴ ꦈꦢ꧀ꦣꦁ ꦱꦧ꧀ꦧꦺꦥꦶ ꦥꦸꦧ꧀ꦧꦥꦸꦫꦶꦱꦴ ꦥꦶꦠꦴꦩꦲꦒ꧀ꦒꦲꦟꦺꦤꦺꦮ ꦒꦲꦶꦠꦴ’’ꦠꦶ. ꦥꦸꦫꦶꦱꦒ꧀ꦒꦲꦟꦚ꧀ꦕꦺꦠ꧀ꦡ ꦈꦏ꧀ꦏꦛ꧀ꦜꦤꦶꦢ꧀ꦢꦺꦱꦮꦱꦺꦤ ꦏꦠꦤ꧀ꦠꦶ ꦢꦛ꧀ꦜꦧ꧀ꦧꦁ. ꦌꦮꦚ꧀ꦲꦶ ‘‘ꦩꦴꦠꦶꦠꦺꦴ’’ꦠꦶ ꦥꦴꦭ꦳ꦶꦮꦕꦤꦁ ꦱꦩꦠ꧀ꦡꦶꦠꦁ ꦲꦺꦴꦠꦶ. ꦄꦏ꧀ꦑꦶꦠ꧀ꦠꦺꦴꦠꦶ ꦄꦥ꧀ꦥꦠ꧀ꦠꦑꦺꦥꦺꦴ. ꦄꦤꦮꦏ꧀ꦑꦶꦠ꧀ꦠꦺꦴꦠꦶ ꦱꦢ꧀ꦣꦡꦴꦭꦶꦥꦴꦏꦴꦢꦷꦱꦸ ꦤ ꦄꦮꦏ꧀ꦑꦶꦠ꧀ꦠꦺꦴ ꦤ ꦖꦝ꧀ꦝꦶꦠꦺꦴ. ꦗꦴꦠꦶꦮꦴꦢꦺꦤꦴꦠꦶ ꦲꦺꦠꦸꦩ꧀ꦲꦶ ꦏꦫꦟꦮꦕꦤꦤ꧀ꦠꦶ ꦢꦱ꧀ꦱꦺꦠꦸꦁ ‘‘ꦏꦺꦤ ꦏꦴꦫꦟꦺꦤꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦌꦠ꧀ꦡ ꦕ ‘‘ꦈꦨꦠꦺꦴ…ꦥꦺ… ꦥꦶꦠꦴꦩꦲꦪꦸꦒꦴ’’ꦠꦶ ꦌꦠꦺꦤ ꦧ꧀ꦫꦴꦲ꧀ꦩꦟꦱ꧀ꦱ ꦪꦺꦴꦤꦶꦢꦺꦴꦱꦴꦨꦴꦮꦺꦴ ꦢꦱ꧀ꦱꦶꦠꦺꦴ ꦱꦁꦱꦸꦢ꧀ꦣꦒꦲꦟꦶꦏꦨꦴꦮꦏꦶꦠ꧀ꦠꦤꦠꦺꦴ, ‘‘ꦄꦏ꧀ꦑꦶꦠ꧀ꦠꦺꦴ’’ꦠꦶ ꦆꦩꦶꦤꦴ ꦏꦶꦫꦶꦪꦴꦥꦫꦴꦣꦴꦨꦴꦮꦺꦴ. ꦏꦶꦫꦶꦪꦴꦥꦫꦴꦣꦺꦤ ꦲꦶ ꦱꦠ꧀ꦠꦴ ꦑꦺꦥꦁ ꦥꦴꦥꦸꦟꦤ꧀ꦠꦶ. ‘‘ꦄꦤꦸꦥꦏ꧀ꦏꦸꦛ꧀ꦜꦺꦴ’’ꦠꦶ ꦆꦩꦶꦤꦴ ꦄꦪꦸꦠ꧀ꦠꦱꦁꦱꦒ꧀ꦒꦴꦨꦴꦮꦺꦴ. ꦄꦪꦸꦠ꧀ꦠꦱꦁꦱꦒ꧀ꦒꦩ꧀ꦥꦶ ꦲꦶ ꦥꦛꦶꦕ꧀ꦕ ꦱꦠ꧀ꦠꦴ ꦄꦏ꧀ꦏꦺꦴꦱꦁ ꦭꦨꦤ꧀ꦠꦶ.

ꦆꦱ꧀ꦱꦫꦺꦴꦠꦶ ꦄꦴꦣꦶꦥꦠꦺꦪ꧀ꦪꦱꦁꦮꦠ꧀ꦠꦤꦶꦪꦏꦩ꧀ꦩꦧꦭꦺꦤ ꦇꦱꦤꦱꦷꦭꦺꦴ, ꦱꦴ ꦥꦤꦱ꧀ꦱ ꦆꦱ꧀ꦱꦫꦠꦴ ꦮꦶꦨꦮꦱꦩ꧀ꦥꦠ꧀ꦠꦶꦥꦕ꧀ꦕꦪꦴ ꦥꦴꦏꦛꦴ ꦗꦴꦠꦴꦠꦶ ꦄꦝ꧀ꦞꦠꦴꦥꦫꦶꦪꦴꦪꦨꦴꦮꦺꦤꦺꦮ ꦮꦢꦤ꧀ꦠꦺꦴ ‘‘ꦄꦝ꧀ꦞꦺꦴꦠꦶ ꦆꦱ꧀ꦱꦫꦺꦴ’’ꦠꦶ ꦄꦴꦲ. ꦩꦲꦤ꧀ꦠꦁ ꦣꦤꦁ ꦄꦱ꧀ꦱ ꦨꦹꦩꦶꦒꦠꦚ꧀ꦕꦺꦮ ꦮꦺꦲꦴꦱꦛ꧀ꦜꦚ꧀ꦕꦴꦠꦶ ꦩꦲꦢ꧀ꦣꦤꦺꦴ. ꦠꦱ꧀ꦱꦴꦠꦶ ꦠꦱ꧀ꦱ ꦠꦱ꧀ꦱ. ꦮꦢꦤ꧀ꦠꦶ ‘‘ꦄꦤ꧀ꦮꦪꦠꦺꦴ, ꦧ꧀ꦪꦠꦶꦫꦺꦏꦠꦺꦴ ꦕ ꦄꦤꦸꦥꦱꦔ꧀ꦏꦩꦤꦏꦴꦫꦟꦁ ꦏꦶꦠ꧀ꦠꦺꦩꦴ’’ꦠꦶ.

ꦄꦣꦶꦏꦫꦹꦥꦺꦴꦠꦶ ꦮꦶꦱꦶꦛ꧀ꦜꦫꦹꦥꦺꦴ ꦈꦠ꧀ꦠꦩꦱꦫꦷꦫꦺꦴ. ꦢꦱ꧀ꦱꦤꦁ ꦄꦫꦲꦠꦷꦠꦶ ꦢꦱ꧀ꦱꦤꦷꦪꦺꦴ, ꦠꦺꦤꦴꦲ ‘‘ꦢꦱ꧀ꦱꦤꦪꦺꦴꦒ꧀ꦒꦺꦴ’’ꦠꦶ. ꦥꦱꦴꦢꦁ ꦄꦴꦮꦲꦠꦷꦠꦶ ꦥꦴꦱꦴꦢꦶꦏꦺꦴ, ꦠꦺꦤꦴꦲ ‘‘ꦕꦶꦠ꧀ꦠꦥ꧀ꦥꦱꦴꦢꦗꦤꦤꦠꦺꦴ’’ꦠꦶ. ꦮꦟ꧀ꦟꦱ꧀ꦱꦴꦠꦶ ꦮꦟ꧀ꦟꦣꦴꦠꦸꦪꦴ. ꦱꦫꦷꦫꦤ꧀ꦠꦶ ꦱꦤ꧀ꦤꦶꦮꦺꦱꦮꦶꦱꦶꦛ꧀ꦜꦁ ꦏꦫꦕꦫꦟꦒꦷꦮꦴꦱꦷꦱꦴꦢꦶꦄꦮꦪꦮꦱꦩꦸꦢꦴꦪꦁ, ꦱꦺꦴ ꦕ ꦱꦟ꧀ꦜꦴꦤꦩꦸꦑꦺꦤ ꦒꦪ꧀ꦲꦠꦷꦠꦶ ‘‘ꦥꦫꦩꦴꦪ ꦮꦟ꧀ꦟꦥꦺꦴꦏ꧀ꦑꦫꦠꦴꦪꦴꦠꦶ…ꦥꦺ… ꦱꦩ꧀ꦥꦠ꧀ꦠꦶꦪꦴ ꦕꦴ’’ꦠꦶ ꦮꦸꦠ꧀ꦠꦁ. ꦱꦧ꧀ꦧꦮꦟ꧀ꦟꦺꦱꦸ ꦱꦸꦮꦟ꧀ꦟꦮꦟ꧀ꦟꦺꦴꦮ ꦈꦠ꧀ꦠꦩꦺꦴꦠꦶ ꦮꦸꦠ꧀ꦠꦁ ‘‘ꦱꦺꦛ꧀ꦜꦺꦤ ꦱꦸꦮꦟ꧀ꦟꦮꦟ꧀ꦟꦺꦤ ꦱꦩꦤ꧀ꦤꦴꦒꦠꦺꦴ’’ꦠꦶ. ꦠꦡꦴ ꦲꦶ ꦧꦸꦢ꧀ꦣꦴ, ꦕꦏ꧀ꦏꦮꦠ꧀ꦠꦶꦤꦺꦴ ꦕ ꦱꦸꦮꦟ꧀ꦟꦮꦟ꧀ꦟꦴꦮ ꦲꦺꦴꦤ꧀ꦠꦶ. ꦧ꧀ꦫꦲ꧀ꦩꦮꦕ꧀ꦖꦱꦷꦠꦶ ꦈꦠ꧀ꦠꦩꦱꦫꦷꦫꦴꦨꦺꦴ, ꦱꦸꦮꦟ꧀ꦟꦴꦨꦺꦴ ꦆꦕ꧀ꦕꦺꦮ ꦄꦠ꧀ꦡꦺꦴ. ꦆꦩꦩꦺꦮ ꦲꦶ ꦄꦠ꧀ꦡꦁ ꦱꦤ꧀ꦣꦴꦪ ‘‘ꦩꦲꦴꦧ꧀ꦫꦲ꧀ꦩꦸꦤꦺꦴ ꦱꦫꦷꦫꦱꦢꦶꦱꦺꦤꦺꦮ ꦱꦫꦷꦫꦺꦤ ꦱꦩꦤ꧀ꦤꦴꦒꦠꦺꦴ’’ꦠꦶ ꦮꦸꦠ꧀ꦠꦁ, ꦤ ꦧ꧀ꦫꦲ꧀ꦩꦸꦗꦸꦒꦠ꧀ꦠꦠꦁ. ꦄꦑꦸꦢ꧀ꦢꦴꦮꦏꦴꦱꦺꦴ ꦢꦱ꧀ꦱꦤꦴꦪꦴꦠꦶ ꦄꦴꦫꦺꦴꦲꦥꦫꦶꦟꦴꦲꦱꦩ꧀ꦥꦠ꧀ꦠꦶꦪꦴ, ꦄꦮꦪꦮꦥꦴꦫꦶꦥꦹꦫꦶꦪꦴ ꦕ ꦢꦱ꧀ꦱꦤꦴꦪ ꦎꦏꦴꦱꦺꦴ ꦤ ꦑꦸꦢ꧀ꦢꦏꦺꦴ, ꦠꦺꦤꦴꦲ ‘‘ꦱꦧ꧀ꦧꦴꦤꦺꦮꦴ’’ꦠꦶꦄꦴꦢꦶ.

ꦪꦩꦤꦶꦪꦩꦭꦏ꧀ꦑꦟꦁ ꦱꦷꦭꦩꦱ꧀ꦱ ꦄꦠ꧀ꦡꦷꦠꦶ ꦱꦷꦭꦮꦴ. ꦠꦁ ꦥꦤꦱ꧀ꦱ ꦫꦠ꧀ꦠꦚ꧀ꦚꦸꦠꦴꦪ ꦮꦸꦢ꧀ꦣꦁ ꦮꦝ꧀ꦞꦶꦠꦁ ꦄꦠ꧀ꦡꦷꦠꦶ ꦮꦸꦢ꧀ꦣꦱꦷꦭꦷ. ꦠꦺꦤ ꦕ ꦱꦧ꧀ꦧꦢꦴ ꦱꦩ꧀ꦩꦴꦪꦺꦴꦒꦠꦺꦴ ꦮꦸꦢ꧀ꦣꦱꦷꦭꦺꦤ ꦱꦩꦤ꧀ꦤꦴꦒꦠꦺꦴ. ꦱꦧ꧀ꦧꦩꦺꦠꦁ ꦥꦚ꧀ꦕꦱꦷꦭꦩꦠ꧀ꦠꦩꦺꦮ ꦱꦤ꧀ꦣꦴꦪ ꦮꦢꦤ꧀ꦠꦶ ꦠꦠꦺꦴ ꦥꦫꦁ ꦱꦷꦭꦱ꧀ꦱ ꦠꦠ꧀ꦡ ꦄꦨꦴꦮꦠꦺꦴ, ꦠꦺꦱꦚ꧀ꦕ ꦄꦗꦴꦤꦤꦠꦺꦴ.

ꦜꦴꦤꦏꦫꦟꦱꦩ꧀ꦥꦠ꧀ꦠꦶꦪꦴ, ꦱꦶꦏ꧀ꦑꦴꦱꦩ꧀ꦥꦠ꧀ꦠꦶꦪꦴ ꦕ ꦏꦠ꧀ꦡꦕꦶꦥꦶ ꦄꦤꦹꦤꦠꦴꦪ ꦥꦫꦶꦩꦟ꧀ꦝꦭꦥꦢꦴꦤꦶ ꦧ꧀ꦪꦚ꧀ꦗꦤꦴꦤꦶ ꦄꦏ꧀ꦑꦫꦴꦤꦶ ꦌꦠꦶꦱ꧀ꦱꦴꦠꦶ ꦥꦫꦶꦩꦟ꧀ꦝꦭꦥꦢꦧ꧀ꦪꦚ꧀ꦗꦤꦴ. ꦄꦡ ꦮꦴ ꦥꦗ꧀ꦗꦠꦶ ꦄꦠ꧀ꦡꦺꦴ ꦌꦠꦺꦤꦴꦠꦶ ꦥꦢꦁ, ꦤꦴꦩꦴꦢꦶ. ꦪꦡꦴꦣꦶꦥ꧀ꦥꦺꦠꦩꦠ꧀ꦡꦁ ꦧ꧀ꦪꦚ꧀ꦗꦺꦠꦷꦠꦶ ꦧ꧀ꦪꦚ꧀ꦗꦤꦁ, ꦮꦴꦏ꧀ꦪꦁ. ꦠꦺꦱꦁ ꦥꦫꦶꦥꦸꦟ꧀ꦟꦠꦴꦪ ꦥꦫꦶꦩꦟ꧀ꦝꦭꦥꦢꦧ꧀ꦪꦚ꧀ꦗꦤꦴ. ꦄꦠ꧀ꦡꦚꦴꦥꦤꦺ ꦱꦴꦣꦤꦠꦴꦪ ꦮꦴꦕꦴꦮ ꦏꦫꦟꦤ꧀ꦠꦶ ꦮꦴꦏ꧀ꦏꦫꦟꦁ, ꦈꦢꦴꦲꦴꦫꦓꦺꦴꦱꦺꦴ. ꦒꦸꦟꦥꦫꦶꦥꦸꦟ꧀ꦟꦨꦴꦮꦺꦤ ꦠꦱ꧀ꦱ ꦧ꧀ꦫꦴꦲ꧀ꦩꦟꦱ꧀ꦱ, ꦠꦺꦤ ꦮꦴ ꦨꦴꦱꦶꦠꦧ꧀ꦧꦄꦠ꧀ꦡꦱ꧀ꦱ. ꦥꦹꦫꦺ ꦥꦸꦟ꧀ꦟꦨꦴꦮꦺ. ꦥꦹꦫꦺꦠꦶ ꦕ ꦥꦸꦫꦶꦩꦱ꧀ꦩꦶꦁ ꦄꦠ꧀ꦡꦺ ꦄꦴꦣꦴꦫꦺ ꦨꦸꦩ꧀ꦩꦁ, ꦢꦸꦠꦶꦪꦱ꧀ꦩꦶꦁ ꦮꦶꦱꦪꦺ. ‘‘ꦱꦸꦑꦸꦩꦴꦭꦠ꧀ꦠꦤꦺꦤꦴ’’ꦠꦶ ꦆꦩꦶꦤꦴ ꦠꦱ꧀ꦱꦴ ꦮꦴꦕꦴꦪ ꦩꦸꦢꦸꦱꦟ꧀ꦲꦨꦴꦮꦩꦴꦲ. ꦄꦥꦭꦶꦧꦸꦢ꧀ꦣꦴꦪ ꦥꦶꦠ꧀ꦠꦱꦺꦩ꧀ꦲꦴꦢꦷꦲꦶ. ꦱꦤ꧀ꦢꦶꦛ꧀ꦜꦁ ꦱꦧ꧀ꦧꦁ ꦢꦱ꧀ꦱꦺꦠ꧀ꦮꦴ ꦮꦶꦪ ꦌꦏꦢꦺꦱꦁ ꦏꦡꦤꦁ. ꦮꦶꦭꦩ꧀ꦧꦶꦠꦁ ꦱꦟꦶꦏꦁ ꦕꦶꦫꦴꦪꦶꦠ꧀ꦮꦴ ꦏꦡꦤꦁ. ‘‘ꦱꦤ꧀ꦢꦶꦢ꧀ꦣꦮꦶꦭꦩ꧀ꦧꦶꦠꦴꦢꦷ’’ꦠꦶ ꦮꦴ ꦥꦴꦜꦺꦴ. ꦠꦠ꧀ꦡ ꦱꦤ꧀ꦢꦶꦢ꧀ꦣꦁ ꦱꦤ꧀ꦢꦺꦲꦗꦤꦏꦁ. ꦄꦴꦢꦶ-ꦱꦢ꧀ꦢꦺꦤ ꦢꦸꦏ꧀ꦑꦭꦶꦠꦴꦤꦸꦏꦝ꧀ꦞꦶꦠꦴꦢꦶꦁ ꦱꦔ꧀ꦒꦟ꧀ꦲꦴꦠꦶ. ‘‘ꦄꦴꦢꦶꦩꦗ꧀ꦙꦥꦫꦶꦪꦺꦴꦱꦴꦤꦁ ꦥꦴꦏꦛꦁ ꦏꦠ꧀ꦮꦴ’’ꦠꦶ ꦆꦩꦶꦤꦴ ꦠꦱ꧀ꦱꦴ ꦮꦴꦕꦴꦪ ꦄꦠ꧀ꦡꦥꦴꦫꦶꦥꦹꦫꦶꦁ ꦮꦢꦤ꧀ꦠꦶ.

‘‘ꦗꦶꦟ꧀ꦟꦺꦴ’’ꦠꦶꦄꦴꦢꦷꦤꦶ ꦥꦢꦴꦤꦶ ꦱꦸꦮꦶꦚ꧀ꦚꦺꦪ꧀ꦪꦴꦤꦶ, ꦲꦺꦛ꧀ꦜꦴ ꦮꦸꦠ꧀ꦠꦠ꧀ꦡꦴꦤꦶ ꦕ. ꦢꦸꦠꦶꦪꦤꦪꦺ ꦥꦤ ꦗꦶꦟ꧀ꦟꦺꦴꦠꦶ ꦤꦴꦪꦁ ꦗꦶꦟ꧀ꦟꦠꦴ ꦮꦪꦺꦴꦩꦠ꧀ꦠꦺꦤ, ꦄꦡ ꦑꦺꦴ ꦏꦸꦭꦥꦫꦶꦮꦛ꧀ꦛꦺꦤ ꦥꦸꦫꦴꦟꦠꦴꦠꦶ ꦄꦴꦲ ‘‘ꦗꦶꦟ꧀ꦟꦺꦴꦠꦶ ꦥꦺꦴꦫꦴꦟꦺꦴ’’ꦠꦶꦄꦴꦢꦶ, ꦠꦺꦤ ꦠꦱ꧀ꦱ ꦧ꧀ꦫꦴꦲ꧀ꦩꦟꦱ꧀ꦱ ꦏꦸꦭꦮꦱꦺꦤ ꦈꦢꦶꦠꦺꦴꦢꦶꦠꦨꦴꦮꦩꦴꦲ. ꦗꦴꦠꦶꦮꦸꦢ꧀ꦣꦶꦪꦴ ‘‘ꦮꦪꦺꦴꦄꦤꦸꦥ꧀ꦥꦠ꧀ꦠꦺꦴ’’ꦠꦶ ꦮꦏ꧀ꦑꦩꦴꦤꦠ꧀ꦠꦴ, ꦒꦸꦟꦮꦸꦢ꧀ꦣꦶꦪꦴ ꦠꦠꦺꦴ ꦱꦴꦠꦶꦱꦪꦠ꧀ꦠꦴ ꦕ ‘‘ꦮꦸꦢ꧀ꦣꦺꦴꦠꦶ ꦱꦷꦭꦴꦕꦴꦫꦴꦢꦶꦒꦸꦟꦮꦸꦢ꧀ꦣꦶꦪꦴ ꦪꦸꦠ꧀ꦠꦺꦴ’’ꦠꦶ ꦄꦴꦲ. ꦠꦡꦴ ꦗꦴꦠꦶꦩꦲꦭ꧀ꦭꦏꦠꦴꦪ ꦮꦏ꧀ꦑꦩꦴꦤꦠ꧀ꦠꦴ ‘‘ꦩꦲꦭ꧀ꦭꦏꦺꦴ’’ꦠꦶ ꦥꦢꦺꦤ ꦮꦶꦨꦮꦩꦲꦠ꧀ꦠꦠꦴ ꦪꦺꦴꦗꦶꦠꦴ. ꦩꦒ꧀ꦒꦥꦛꦶꦥꦤ꧀ꦤꦺꦴꦠꦶ ꦧ꧀ꦫꦴꦲ꧀ꦩꦟꦴꦤꦁ ꦥꦛꦶꦥꦠ꧀ꦠꦶꦮꦷꦡꦶꦁ ꦈꦥꦒꦠꦺꦴ ꦠꦁ ꦄꦮꦺꦴꦏ꧀ꦏꦩ꧀ꦩ ꦕꦫꦟꦠꦺꦴ. ꦄꦤ꧀ꦠꦶꦩꦮꦪꦤ꧀ꦠꦶ ꦥꦕ꧀ꦖꦶꦩꦮꦪꦁ.

ꦧꦸꦢ꧀ꦣꦒꦸꦟꦏꦡꦴꦮꦟ꧀ꦟꦤꦴ

꧓꧐꧔. ꦠꦴꦢꦶꦱꦺꦲꦶ ꦩꦲꦴꦤꦸꦨꦴꦮꦺꦲꦶ ꦱꦢ꧀ꦣꦶꦁ ꦪꦸꦒꦒ꧀ꦒꦴꦲꦮꦱꦺꦤꦥꦶ ꦢꦲꦤꦁ ꦤ ꦩꦴꦢꦶꦱꦴꦤꦁ ꦄꦤꦸꦕ꧀ꦖꦮꦶꦏꦁ, ꦏꦸꦠꦺꦴ ꦥꦤ ꦈꦏ꧀ꦏꦁꦱꦤꦤ꧀ꦠꦶ ꦆꦢꦁ ꦧ꧀ꦫꦴꦲ꧀ꦩꦟꦱ꧀ꦱ ꦤ ꦪꦸꦠ꧀ꦠꦫꦹꦥꦤ꧀ꦠꦶ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦤ ꦑꦺꦴ ꦥꦤ ꦩꦺꦠꦁ ꦪꦸꦠ꧀ꦠ’’ꦤ꧀ꦠꦶꦄꦴꦢꦶ. ꦱꦢꦶꦱꦴꦠꦶ ꦌꦏꦢꦺꦱꦺꦤ ꦱꦢꦶꦱꦴ. ꦤ ꦲꦶ ꦧꦸꦢ꧀ꦣꦴꦤꦁ ꦒꦸꦟꦺꦲꦶ ꦱꦧ꧀ꦧꦡꦴ ꦱꦢꦶꦱꦴ ꦏꦺꦕꦶꦥꦶ ꦒꦸꦟꦴ ꦄꦚ꧀ꦚꦺꦱꦸ ꦭꦧ꧀ꦨꦤ꧀ꦠꦶ. ꦆꦠꦫꦺꦠꦶ ꦄꦠ꧀ꦠꦤꦺꦴ ꦒꦸꦟꦺꦲꦶ ꦄꦱꦢꦶꦱꦒꦸꦟꦺ. ꦆꦢꦤ꧀ꦠꦶ ꦆꦢꦁ ꦄꦠ꧀ꦡꦗꦴꦠꦁ. ꦒꦺꦴꦥꦢꦏꦤ꧀ꦠꦶ ꦒꦴꦮꦶꦪꦴ ꦥꦢꦺ ꦜꦶꦠꦈꦢꦏꦁ.

ꦱꦛ꧀ꦜꦶꦏꦸꦭꦱꦠꦱꦲꦱ꧀ꦱꦤ꧀ꦠꦶ ꦱꦛ꧀ꦜꦶꦱꦲꦱ꧀ꦱꦴꦣꦶꦏꦁ ꦏꦸꦭꦱꦠꦱꦲꦱ꧀ꦱꦁ ꦏꦸꦭꦥꦫꦶꦪꦴꦪꦺꦤꦴꦠꦶ ꦱꦸꦢ꧀ꦣꦺꦴꦢꦤꦩꦲꦴꦫꦴꦗꦱ꧀ꦱ ꦏꦸꦭꦴꦤꦸꦏ꧀ꦏꦩꦺꦤ ꦄꦴꦒꦠꦁ. ꦠꦺꦱꦸꦥꦷꦠꦶ ꦠꦺꦱꦸꦥꦶ ꦕꦠꦹꦱꦸ ꦤꦶꦣꦷꦱꦸ. ꦒꦲꦶꦠꦒꦲꦶꦠꦤ꧀ꦠꦶ ꦒꦲꦶꦠꦁ ꦒꦲꦶꦠꦁ ꦜꦴꦤꦁ ꦥꦹꦫꦠꦶꦪꦺꦮ ꦣꦤꦺꦤ ꦥꦛꦶꦥꦴꦏꦠꦶꦏꦩꦺꦮ ꦲꦺꦴꦠꦶ. ꦄꦥꦫꦶꦩꦴꦟꦺꦴꦪꦺꦮꦴꦠꦶ ‘‘ꦌꦠ꧀ꦠꦏꦺꦴ ꦌꦱꦺꦴ’’ꦠꦶ ꦏꦺꦤꦕꦶ ꦥꦫꦶꦕ꧀ꦖꦶꦤ꧀ꦢꦶꦠꦸꦁ ꦄꦱꦏ꧀ꦏꦸꦟꦺꦪ꧀ꦪꦠꦴꦪ ꦄꦥꦫꦶꦕ꧀ꦖꦶꦤ꧀ꦤꦺꦴ ꦌꦮ.

ꦠꦠ꧀ꦡꦴꦠꦶ ꦩꦚ꧀ꦕꦏꦺ. ꦱꦷꦲꦱꦺꦪ꧀ꦪꦁ ꦏꦥ꧀ꦥꦺꦱꦷꦠꦶ ꦪꦡꦴ ꦫꦴꦲꦸ ꦄꦱꦸꦫꦶꦤ꧀ꦢꦺꦴ ꦄꦴꦪꦴꦩꦠꦺꦴ, ꦮꦶꦠ꧀ꦡꦴꦫꦠꦺꦴ ꦈꦧ꧀ꦧꦺꦣꦠꦺꦴ ꦕ ꦨꦒꦮꦠꦺꦴ ꦫꦹꦥꦏꦴꦪꦱ꧀ꦱ ꦥꦫꦶꦕ꧀ꦖꦺꦢꦁ ꦒꦲꦺꦠꦸꦁ ꦤ ꦱꦏ꧀ꦏꦺꦴꦠꦶ, ꦠꦡꦴ ꦫꦹꦥꦁ ꦆꦢ꧀ꦣꦴꦨꦶꦱꦔ꧀ꦑꦴꦫꦁ ꦄꦨꦶꦱꦔ꧀ꦑꦫꦺꦴꦤ꧀ꦠꦺꦴ ꦱꦷꦲꦱꦺꦪ꧀ꦪꦁ ꦏꦥ꧀ꦥꦺꦱꦶ.

ꦏꦶꦭꦺꦱꦺꦲꦶ ꦄꦴꦫꦏꦠ꧀ꦠꦴ ꦥꦫꦶꦱꦸꦢ꧀ꦣꦛ꧀ꦜꦺꦤ ꦄꦫꦶꦪꦤ꧀ꦠꦶ ꦄꦴꦲ ‘‘ꦄꦫꦶꦪꦁ ꦈꦠ꧀ꦠꦩꦁ ꦥꦫꦶꦱꦸꦢ꧀ꦣ’’ꦤ꧀ꦠꦶ. ꦄꦤꦮꦗ꧀ꦗꦛ꧀ꦜꦺꦤ ꦏꦸꦱꦭꦁ, ꦤ ꦱꦸꦑꦮꦶꦥꦴꦏꦛ꧀ꦜꦺꦤ. ꦏꦠ꧀ꦡꦕꦶ ꦕꦠꦸꦫꦴꦱꦷꦠꦶꦥꦴꦟꦱꦲꦱ꧀ꦱꦴꦤꦶ, ꦏꦠ꧀ꦡꦕꦶ ꦄꦥꦫꦶꦩꦴꦟꦴꦥꦶ ꦢꦺꦮꦩꦤꦸꦱ꧀ꦱꦴ ꦪꦱ꧀ꦩꦴ ꦕꦠꦸꦮꦷꦱꦠꦶꦪꦴ ꦜꦴꦤꦺꦱꦸ ꦄꦱꦔ꧀ꦑ꧀ꦪꦺꦪ꧀ꦪꦴ ꦄꦥꦫꦶꦩꦺꦪ꧀ꦪꦴ ꦢꦺꦮꦩꦤꦸꦱ꧀ꦱꦴ ꦩꦒ꧀ꦒꦦꦭꦴꦩꦠꦁ ꦥꦶꦮꦶꦁꦱꦸ, ꦏꦺꦴꦛꦶꦱꦠꦱꦲꦱ꧀ꦱꦴꦢꦶꦥꦫꦶꦩꦴꦟꦺꦤꦥꦶ ꦧꦲꦹ ꦌꦮ, ꦠꦱ꧀ꦩꦴ ꦄꦤꦸꦠ꧀ꦠꦫꦴꦕꦴꦫꦱꦶꦏ꧀ꦑꦴꦥꦤꦮꦱꦺꦤ ꦨꦒꦮꦴ ꦧꦲꦹꦤꦁ ꦄꦴꦕꦫꦶꦪꦺꦴ. ꦠꦺꦠꦶ ꦏꦴꦩꦫꦴꦒꦠꦺꦴ ꦄꦚ꧀ꦚꦺ ꦨꦒꦮꦠꦺꦴ ꦥꦲꦷꦤꦏꦶꦭꦺꦱꦺ. ꦏꦺꦭ꦳ꦤꦴꦠꦶ ꦏꦺꦭ꦳ꦴꦪꦤꦴ ꦣꦤꦴꦪꦤꦴ.

ꦄꦥꦴꦥꦥꦸꦫꦺꦏ꧀ꦑꦴꦫꦺꦴꦠꦶ ꦄꦥꦴꦥꦺ ꦥꦸꦫꦺ ꦏꦫꦺꦴꦠꦶ, ꦤ ꦮꦴ ꦥꦴꦥꦁ ꦥꦸꦫꦠꦺꦴ ꦏꦫꦺꦴꦠꦷꦠꦶꦥꦶ ꦄꦥꦴꦥꦥꦸꦫꦺꦏ꧀ꦑꦴꦫꦺꦴꦠꦶ ꦆꦩꦩꦠ꧀ꦡꦁ ꦢꦱ꧀ꦱꦺꦠꦸꦁ ‘‘ꦄꦥꦴꦥꦺ ꦤꦮꦭꦺꦴꦏꦸꦠ꧀ꦠꦫꦣꦩ꧀ꦩꦺ’’ꦠꦶꦄꦴꦢꦶ ꦮꦸꦠ꧀ꦠꦁ. ꦠꦠ꧀ꦡ ꦄꦥꦴꦥꦺꦠꦶ ꦥꦴꦥꦥꦛꦶꦥꦏ꧀ꦑꦺ, ꦥꦴꦥꦫꦲꦶꦠꦺ ꦕ. ꦧ꧀ꦫꦲ꧀ꦩꦤꦶ ꦱꦺꦛ꧀ꦜꦺ ꦧꦸꦢ꧀ꦣꦺ ꦨꦒꦮꦠꦶ ꦨꦮꦴ ꦠꦱ꧀ꦱ ꦣꦩ꧀ꦩꦢꦺꦱꦤꦴꦮꦱꦺꦤ ꦄꦫꦶꦪꦴꦪ ꦗꦴꦠꦶꦪꦴ ꦗꦴꦠꦠ꧀ꦠꦴ, ꦧ꧀ꦫꦲ꧀ꦩꦸꦤꦺꦴ ꦮꦴ ꦨꦒꦮꦠꦺꦴ ꦲꦶꦠꦴ ꦒꦫꦸꦏꦫꦟꦴꦢꦶꦤꦴ, ꦪꦡꦴꦤꦸꦱꦶꦛ꧀ꦜꦥꦛꦶꦥꦠ꧀ꦠꦶꦪꦴ ꦕ, ꦧ꧀ꦫꦲ꧀ꦩꦁ ꦮꦴ ꦱꦺꦛ꧀ꦜꦁ ꦄꦫꦶꦪꦩꦒ꧀ꦒꦁ ꦗꦴꦤꦴꦠꦷꦠꦶ ꦧ꧀ꦫꦲ꧀ꦩꦚ꧀ꦚꦴ, ꦄꦫꦶꦪꦱꦴꦮꦏꦱꦔ꧀ꦑꦴꦠꦴ ꦥꦗꦴ, ꦠꦺꦤꦴꦲ ‘‘ꦱꦴꦫꦶꦥꦸꦠ꧀ꦠꦴ’’ꦠꦶꦄꦴꦢꦶ. ꦥꦏꦠꦶꦧ꧀ꦫꦴꦲ꧀ꦩꦟꦗꦴꦠꦶꦮꦱꦺꦤꦴꦥꦶ ‘‘ꦧ꧀ꦫꦲ꧀ꦩꦚ꧀ꦚꦴꦪ ꦥꦗꦴꦪꦴ’’ꦠꦶ ꦥꦢꦱ꧀ꦱ ꦄꦠ꧀ꦡꦺꦴ ꦮꦺꦢꦶꦠꦧ꧀ꦧꦺꦴꦠꦶ ꦢꦱ꧀ꦱꦺꦠꦸꦁ ‘‘ꦄꦥꦶꦕꦴ’’ꦠꦶꦄꦴꦢꦶ ꦮꦸꦠ꧀ꦠꦁ.

ꦠꦶꦫꦺꦴꦫꦛ꧀ꦜꦴ ꦠꦶꦫꦺꦴꦗꦤꦥꦢꦴꦠꦶ ꦌꦠ꧀ꦡ ꦫꦗ꧀ꦗꦁ ꦫꦛ꧀ꦜꦁ, ꦫꦴꦗꦤ꧀ꦠꦶ ꦫꦴꦗꦴꦤꦺꦴ ꦌꦠꦺꦤꦴꦠꦶ, ꦠꦢꦺꦏꦢꦺꦱꦨꦹꦠꦴ ꦥꦢꦺꦱꦴ ꦥꦤ ꦗꦤꦥꦢꦺꦴ,ꦗꦤꦴ ꦥꦗ꧀ꦗꦤ꧀ꦠꦶ ꦌꦠ꧀ꦡ ꦱꦸꦑꦗꦷꦮꦶꦏꦁ ꦥꦴꦥꦸꦟꦤ꧀ꦠꦷꦠꦶ. ꦥꦸꦕ꧀ꦖꦴꦪ ꦮꦴ ꦢꦺꦴꦱꦁ ꦱꦭ꧀ꦭꦏ꧀ꦑꦺꦠ꧀ꦮꦴꦠꦶ ꦱꦩ꧀ꦧꦤ꧀ꦣꦺꦴ. ꦄꦱꦩꦠ꧀ꦡꦠꦤ꧀ꦠꦶ ꦄꦠ꧀ꦠꦤꦺꦴ ꦄꦱꦩꦠ꧀ꦡꦠꦁ. ꦨꦒꦮꦴ ꦮꦶꦱ꧀ꦱꦗ꧀ꦗꦺꦠꦶ ꦠꦺꦱꦁ ꦈꦥꦤꦶꦱ꧀ꦱꦪꦱꦩ꧀ꦥꦠ꧀ꦠꦶꦁ, ꦚꦴꦟꦥꦫꦶꦥꦴꦏꦁ, ꦕꦶꦠ꧀ꦠꦴꦕꦴꦫꦚ꧀ꦕ ꦚꦠ꧀ꦮꦴꦠꦶ ꦄꦣꦶꦥ꧀ꦥꦴꦪꦺꦴ.

‘‘ꦌꦲꦶ ꦱ꧀ꦮꦴꦒꦠꦮꦴꦢꦷ’’ꦠꦶ ꦆꦩꦶꦤꦴ ꦱꦸꦑꦱꦩ꧀ꦨꦴꦱꦥꦸꦧ꧀ꦧꦏꦁ ꦥꦶꦪꦮꦴꦢꦶꦠꦁ ꦢꦱ꧀ꦱꦺꦠꦶ, ‘‘ꦱꦑꦶꦭꦺꦴ’’ꦠꦶ ꦆꦩꦶꦤꦴ ꦱꦟ꧀ꦲꦮꦴꦕꦠꦁ, ‘‘ꦱꦩ꧀ꦩꦺꦴꦢꦏꦺꦴ’’ꦠꦶ ꦆꦩꦶꦤꦴ ꦥꦛꦶꦱꦤ꧀ꦣꦴꦫꦏꦸꦱꦭꦠꦁ, ‘‘ꦄꦨꦴꦏꦸꦛꦶꦏꦺꦴ’’ꦠꦶ ꦆꦩꦶꦤꦴ ꦱꦧ꧀ꦧꦠ꧀ꦡꦺꦮ ꦮꦶꦥ꧀ꦥꦱꦤ꧀ꦤꦩꦸꦑꦠꦁ, ‘‘ꦈꦠ꧀ꦠꦴꦤꦩꦸꦑꦺꦴ’’ꦠꦶ ꦆꦩꦶꦤꦴ ꦱꦸꦑꦴꦭꦴꦥꦠꦁ, ‘‘ꦥꦸꦧ꧀ꦧꦨꦴꦱꦷ’’ꦠꦶ ꦆꦩꦶꦤꦴ ꦣꦩ꧀ꦩꦴꦤꦸꦒ꧀ꦒꦲꦱ꧀ꦱ ꦎꦏꦴꦱꦏꦫꦟꦠꦺꦴ ꦲꦶꦠꦗ꧀ꦙꦴꦱꦪꦠꦁ ꦨꦒꦮꦠꦺꦴ ꦮꦶꦨꦴꦮꦺꦠꦶ.

ꦪꦠ꧀ꦡ ꦏꦶꦫꦴꦠꦶ ꦏꦶꦫ-ꦱꦢ꧀ꦢꦺꦴ ꦄꦫꦸꦕꦶꦱꦹꦕꦤꦠ꧀ꦡꦺꦴ, ꦠꦺꦤ ꦨꦒꦮꦠꦴ ꦄꦣꦶꦮꦸꦠ꧀ꦡꦥꦢꦺꦱꦺ ꦤ ꦢꦺꦮꦠꦴꦤꦸꦨꦴꦮꦺꦤ ꦩꦤꦸꦱ꧀ꦱꦴꦤꦁ ꦄꦤꦸꦥꦢ꧀ꦢꦮꦠꦴ, ꦄꦡ ꦑꦺꦴ ꦧꦸꦢ꧀ꦣꦴꦤꦸꦨꦴꦮꦺꦤꦴꦠꦶ ꦢꦱ꧀ꦱꦺꦠꦶ. ꦠꦺꦤꦴꦲ ‘‘ꦄꦥꦶꦕꦴ’’ꦠꦶꦄꦴꦢꦶ.

ꦄꦤꦸꦱꦴꦱꦶꦠꦧ꧀ꦧꦺꦴꦠꦶ ꦮꦶꦤꦺꦪ꧀ꦪꦗꦤꦱꦩꦹꦲꦺꦴ ꦒꦪ꧀ꦲꦠꦷꦠꦶ ꦤꦶꦧ꧀ꦧꦠ꧀ꦠꦶꦠꦁ ꦄꦫꦶꦪꦱꦔ꧀ꦓꦩꦺꦮ ꦢꦱ꧀ꦱꦺꦠꦸꦁ ‘‘ꦱꦪꦁ ꦮꦴ’’ꦠꦶꦄꦴꦢꦶ ꦮꦸꦠ꧀ꦠꦁ, ꦄꦤꦤ꧀ꦠꦫꦱ꧀ꦱ ꦮꦶꦣꦶ ꦥꦛꦶꦱꦺꦣꦺꦴ ꦮꦴꦠꦶ ꦏꦠ꧀ꦮꦴ. ‘‘ꦠꦴꦢꦶꦱꦺꦴꦮꦴ’’ꦠꦶ ꦆꦩꦶꦤꦴ ‘‘ꦱꦪꦁ ꦮꦴ’’ꦠꦶꦄꦴꦢꦶꦤꦴ ꦮꦸꦠ꧀ꦠꦮꦶꦏꦥ꧀ꦥꦺꦴ ꦌꦮ ꦥꦕ꧀ꦕꦴꦩꦛ꧀ꦜꦺꦴꦠꦶ. ‘‘ꦥꦸꦫꦶꦩꦥꦢꦱ꧀ꦱꦺꦮ ꦮꦴ’’ꦠꦶ ꦮꦶꦏꦥ꧀ꦥꦤ꧀ꦠꦫꦒ꧀ꦒꦲꦟꦁ. ꦧꦲꦹꦤꦁ ꦠꦶꦠ꧀ꦡꦏꦫꦴꦤꦤ꧀ꦠꦶ ꦥꦹꦫꦟꦴꦢꦷꦤꦁ ꦄꦤꦺꦏꦺꦱꦁ ꦠꦶꦠ꧀ꦡꦏꦫꦴꦤꦁ, ꦤꦶꦢ꧀ꦣꦴꦫꦟꦺ ꦕꦺꦠꦁ ꦱꦴꦩꦶꦮꦕꦤꦁ. ꦏꦴꦫꦟꦺꦤꦴꦠꦶ ꦄꦥ꧀ꦥꦶꦕ꧀ꦖꦱꦤ꧀ꦠꦸꦛ꧀ꦜꦠꦴꦢꦶꦱꦩꦴꦫꦺꦴꦥꦤꦭꦏ꧀ꦑꦟꦺꦤ ꦏꦴꦫꦟꦺꦤ. ꦄꦴꦒꦤ꧀ꦠꦸꦏꦴ ꦤꦮꦏꦴꦠꦶ ꦄꦨꦶꦤꦮꦴ ꦄꦴꦒꦤ꧀ꦠꦸꦏꦴ ꦄꦧ꧀ꦨꦴꦒꦠꦴ. ꦥꦫꦶꦪꦴꦥꦸꦟꦴꦩꦷꦠꦶ ꦥꦫꦶꦕ꧀ꦖꦶꦤ꧀ꦢꦶꦠꦸꦁ ꦗꦴꦤꦴꦩꦶ ꦱꦏ꧀ꦏꦺꦴꦩꦶ, ꦠꦺꦤꦴꦲ ‘‘ꦗꦴꦤꦴꦩꦷ’’ꦠꦶ. ‘‘ꦏꦥ꧀ꦥꦩ꧀ꦥꦶ ꦕꦺ ꦄꦚ꧀ꦚꦩꦨꦴꦱꦩꦴꦤꦺꦴ’’ꦠꦶ ꦄꦨꦹꦠꦥꦫꦶꦏꦥ꧀ꦥꦤꦮꦕꦤꦩꦺꦠꦁ ꦠꦡꦴ ꦨꦴꦱꦩꦴꦤꦱ꧀ꦱ ꦄꦨꦴꦮꦠꦺꦴ.

꧓꧐꧕. ꦄꦭꦁ-ꦱꦢ꧀ꦢꦺꦴ ꦄꦫꦲꦠ꧀ꦠꦺꦴꦥꦶ ꦲꦺꦴꦠꦶ ‘‘ꦄꦭꦩꦺꦮ ꦤꦶꦧ꧀ꦧꦶꦤ꧀ꦢꦶꦠꦸ’’ꦤ꧀ꦠꦶꦄꦴꦢꦷꦱꦸ (ꦱꦁ. ꦤꦶ. ꧑.꧑꧒꧔) ꦮꦶꦪꦴꦠꦶ ꦄꦴꦲ ‘‘ꦄꦭꦩꦺꦮꦴꦠꦶ ꦪꦸꦠ꧀ꦠꦩꦺꦮꦴ’’ꦠꦶ. ꦥꦸꦛꦺꦤ ꦤꦺꦠ꧀ꦮꦴ ꦄꦱꦶꦠꦧ꧀ꦧꦠꦺꦴ ꦥꦫꦶꦨꦸꦚ꧀ꦗꦶꦠꦧ꧀ꦧꦠꦺꦴ ꦥꦸꦛꦺꦴꦱꦁ ꦮꦸꦕ꧀ꦕꦠꦶ ꦥꦴꦡꦺꦪ꧀ꦪꦁ. ꦥꦸꦛꦁꦱꦺꦤ ꦥꦸꦫꦶꦱꦺꦤ.

ꦱꦺꦴꦟꦢꦟ꧀ꦝꦥꦫꦶꦮꦶꦠꦏ꧀ꦏꦮꦟ꧀ꦟꦤꦴ

꧓꧐꧗. ꦈꦨꦠꦺꦴꦥꦏ꧀ꦑꦶꦏꦴꦠꦶ ꦩꦶꦕ꧀ꦖꦴꦢꦶꦛ꧀ꦜꦶꦱꦩ꧀ꦩꦴꦢꦶꦛ꧀ꦜꦷꦤꦁ ꦮꦱꦺꦤ ꦈꦨꦪꦥꦏ꧀ꦑꦶꦏꦴ. ꦏꦺꦫꦴꦛꦶꦏꦴꦠꦶ ꦱꦜꦴ.

ꦧ꧀ꦫꦴꦲ꧀ꦩꦟꦥꦚ꧀ꦚꦠ꧀ꦠꦶꦮꦟ꧀ꦟꦤꦴ

꧓꧐꧙. ꦮꦶꦓꦴꦠꦤ꧀ꦠꦶ ꦕꦶꦠ꧀ꦠꦢꦸꦏ꧀ꦑꦁ.

꧓꧑꧑-꧓. ꦱꦸꦗꦤ꧀ꦠꦶ ꦲꦺꦴꦩꦢꦧ꧀ꦧꦶꦁ ꦥꦒ꧀ꦒꦟ꧀ꦲꦤ꧀ꦠꦺꦱꦹꦠꦶ ꦗꦸꦲꦤꦠ꧀ꦡꦁ ꦒꦟ꧀ꦲꦤꦏꦺꦱꦸ, ꦆꦫꦸꦧ꧀ꦧꦶꦗ꧀ꦗꦺꦱꦹꦠꦶ ꦄꦠ꧀ꦡꦺꦴ. ꦥꦜꦩꦺꦴ ꦮꦴꦠꦶ ꦠꦠ꧀ꦡ ꦱꦤ꧀ꦤꦶꦥꦠꦶꦠꦺꦱꦸ ꦪꦗꦤꦏꦶꦫꦶꦪꦴꦪꦁ ꦱꦧ꧀ꦧꦥꦣꦴꦤꦺꦴ ꦮꦴ. ꦢꦸꦠꦶꦪꦺꦴ ꦮꦴꦠꦶ ꦠꦢꦤꦤ꧀ꦠꦫꦺꦴ ꦮꦴ. ‘‘ꦱꦸꦗ’’ꦤ꧀ꦠꦶ ꦏꦫꦟꦺ ꦌꦠꦁ ꦈꦥꦪꦺꦴꦒꦮꦕꦤꦤ꧀ꦠꦶ ꦄꦴꦲ ‘‘ꦱꦸꦗꦴꦪꦴ’’ꦠꦶ. ꦄꦒ꧀ꦒꦶꦲꦸꦠ꧀ꦠꦥꦩꦸꦑꦠꦴꦪ ꦪꦚ꧀ꦚꦱ꧀ꦱ ꦪꦚ꧀ꦚꦺ ꦢꦶꦪ꧀ꦪꦩꦴꦤꦁ ꦱꦸꦗꦴꦩꦸꦑꦺꦤ ꦢꦷꦪꦠꦷꦠꦶ ꦄꦴꦲ ‘‘ꦱꦸꦗꦴꦪ ꦢꦶꦪ꧀ꦪꦩꦴꦤ’’ꦤ꧀ꦠꦶ. ꦥꦺꦴꦫꦴꦟꦴꦠꦶ ꦄꦛ꧀ꦜꦏꦡꦴꦕꦫꦶꦪꦴ. ꦮꦶꦱꦺꦱꦠꦺꦴꦠꦶ ꦮꦶꦗ꧀ꦗꦴꦕꦫꦟꦮꦶꦱꦺꦱꦠꦺꦴ, ꦤ ꦧ꧀ꦫꦴꦲ꧀ꦩꦟꦺꦲꦶ ꦆꦕ꧀ꦖꦶꦠꦮꦶꦗ꧀ꦗꦴꦕꦫꦟꦩꦠ꧀ꦠꦠꦺꦴ. ꦈꦠ꧀ꦠꦩꦧ꧀ꦫꦴꦲ꧀ꦩꦟꦱ꧀ꦱꦴꦠꦶ ꦄꦤꦸꦠ꧀ꦠꦫꦢꦏ꧀ꦑꦶꦟꦺꦪ꧀ꦪꦠꦴꦪ ꦈꦏ꧀ꦏꦛ꧀ꦜꦧ꧀ꦫꦴꦲ꧀ꦩꦟꦱ꧀ꦱ. ꦧ꧀ꦫꦴꦲ꧀ꦩꦟꦱꦩꦪꦤ꧀ꦠꦶ ꦧ꧀ꦫꦴꦲ꧀ꦩꦟꦱꦶꦢ꧀ꦣꦤ꧀ꦠꦁ. ꦩꦴ ꦨꦶꦤ꧀ꦢꦶ ꦩꦴ ꦮꦶꦤꦴꦱꦺꦱꦶ.

꧓꧑꧖. ꦱꦩꦱꦩꦺꦴꦠꦶ ꦱꦩꦺꦴꦪꦺꦮ ꦲꦸꦠ꧀ꦮꦴ ꦱꦩꦺꦴ. ꦲꦷꦤꦺꦴꦥꦩꦮꦱꦺꦤꦥꦶ ꦱꦩꦠꦴ ꦮꦸꦕ꧀ꦕꦠꦷꦠꦶ ꦠꦁ ꦤꦶꦮꦠ꧀ꦠꦺꦤ꧀ꦠꦺꦴ ‘‘ꦜꦥꦺꦠ꧀ꦮꦴ ꦌꦏꦢꦺꦱꦱꦩꦠ꧀ꦠ’’ꦤ꧀ꦠꦶꦄꦴꦢꦶꦩꦴꦲ. ꦏꦸꦭꦏꦺꦴꦛꦶꦥꦫꦶꦢꦷꦥꦤꦤ꧀ꦠꦶ ꦏꦸꦭꦄꦴꦢꦶꦥꦫꦶꦢꦷꦥꦤꦁ ꦄꦡꦴꦥꦶ ꦱꦶꦪꦴꦠꦶ ꦄꦡꦴꦥꦶ ꦠꦸꦩ꧀ꦲꦴꦏꦁ ꦌꦮꦁ ꦥꦫꦶꦮꦶꦠꦏ꧀ꦏꦺꦴ ꦱꦶꦪꦴ. ꦧ꧀ꦫꦴꦲ꧀ꦩꦟꦨꦴꦮꦁ ꦱꦴꦣꦺꦠꦶ ꦮꦟ꧀ꦟꦺꦴ. ꦩꦤ꧀ꦠꦗꦴꦠꦷꦱꦸꦥꦶ ꦌꦱꦺꦮ ꦤꦪꦺꦴ. ꦱꦷꦭꦩꦺꦮ ꦱꦴꦣꦺꦱ꧀ꦱꦠꦶ ꦧ꧀ꦫꦴꦲ꧀ꦩꦟꦨꦴꦮꦁ. ꦏꦱ꧀ꦩꦴꦠꦶ ꦕꦺ? ꦄꦴꦲ ‘‘ꦠꦱ꧀ꦩꦶꦚ꧀ꦲꦶꦱ꧀ꦱꦴ’’ꦠꦶꦄꦴꦢꦶ. ꦱꦩ꧀ꦩꦺꦴꦲꦩꦠ꧀ꦠꦁ ꦮꦟ꧀ꦟꦴꦢꦪꦺꦴꦠꦶ ꦮꦟ꧀ꦟꦩꦤ꧀ꦠꦗꦴꦠꦶꦪꦺꦴ ꦲꦶ ꦧ꧀ꦫꦴꦲ꧀ꦩꦟꦨꦴꦮꦱ꧀ꦱ ꦄꦔ꧀ꦒꦤ꧀ꦠꦶ ꦱꦩ꧀ꦩꦺꦴꦲꦩꦠ꧀ꦠꦩꦺꦠꦁ ꦄꦱꦩꦮꦺꦏ꧀ꦑꦶꦠꦴꦨꦶꦩꦴꦤꦨꦴꦮꦠꦺꦴ.

ꦱꦷꦭꦥꦚ꧀ꦚꦴꦏꦡꦴꦮꦟ꧀ꦟꦤꦴ

꧓꧑꧗. ꦏꦡꦶꦠꦺꦴ ꦧ꧀ꦫꦴꦲ꧀ꦩꦟꦺꦤ ꦥꦚ꧀ꦲꦺꦴꦠꦶ ‘‘ꦱꦷꦭꦮꦴ ꦕ ꦲꦺꦴꦠꦷ’’ꦠꦶꦄꦴꦢꦶꦤꦴ ꦢ꧀ꦮꦶꦤ꧀ꦤꦩꦺꦮ ꦄꦔ꧀ꦒꦴꦤꦁ ꦮꦱꦺꦤ ꦪꦡꦴꦥꦸꦕ꧀ꦖꦶꦠꦺꦴ ꦥꦚ꧀ꦲꦺꦴ ꦪꦴꦡꦴꦮꦠꦺꦴ ꦮꦶꦱ꧀ꦱꦗ꧀ꦗꦶꦠꦺꦴ ꦌꦠ꧀ꦡꦴꦠꦶ ꦌꦠꦱ꧀ꦩꦶꦁ ꦪꦡꦴꦮꦶꦱ꧀ꦱꦗ꧀ꦗꦶꦠꦺ ꦄꦠ꧀ꦡꦺ. ꦠꦱ꧀ꦱꦴꦠꦶ ꦱꦺꦴꦟꦢꦟ꧀ꦝꦱ꧀ꦱ. ꦱꦷꦭꦥꦫꦶꦱꦸꦢ꧀ꦣꦴꦠꦶ ꦱꦷꦭꦱꦩ꧀ꦥꦠ꧀ꦠꦶꦪꦴ ꦱꦧ꧀ꦧꦱꦺꦴ ꦱꦸꦢ꧀ꦣꦴ ꦄꦤꦸꦥꦏ꧀ꦏꦶꦭꦶꦛ꧀ꦜꦴ. ꦏꦸꦠꦺꦴ ꦢꦸꦱ꧀ꦱꦷꦭꦺ ꦥꦚ꧀ꦚꦴ ꦄꦱꦩꦴꦲꦶꦠꦠ꧀ꦠꦴ ꦠꦱ꧀ꦱ. ꦗꦭ꦳ꦺ ꦌꦭ꦳ꦩꦹꦒꦺ ꦏꦸꦠꦺꦴ ꦱꦷꦭꦤ꧀ꦠꦶ ꦗꦭ꦳ꦺ ꦌꦭ꦳ꦩꦹꦒꦺ ꦢꦸꦥ꧀ꦥꦚ꧀ꦚꦺ ꦏꦸꦠꦺꦴ ꦱꦷꦭꦁ ꦱꦷꦭꦮꦶꦨꦴꦒꦱ꧀ꦱ, ꦱꦷꦭꦥꦫꦶꦱꦺꦴꦣꦤꦹꦥꦴꦪꦱ꧀ꦱ ꦕ ꦄꦗꦴꦤꦤꦠꦺꦴ. ꦥꦏꦛ꧀ꦜꦁ ꦈꦏ꧀ꦏꦛ꧀ꦜꦁ ꦚꦴꦟꦁ ꦥꦚ꧀ꦚꦴꦟꦤ꧀ꦠꦶ, ꦥꦴꦏꦠꦶꦏꦁ ꦚꦴꦟꦁ ꦤꦶꦮꦠ꧀ꦠꦺꦠꦸꦁ ‘‘ꦥꦚ꧀ꦚꦴꦟ’’ꦤ꧀ꦠꦶ ꦮꦸꦠ꧀ꦠꦤ꧀ꦠꦶ ꦠꦪꦶꦢꦁ ꦥꦏꦴꦫꦺꦲꦶ ꦗꦴꦤꦤꦠꦺꦴ ꦥꦚ꧀ꦚꦴꦮꦴꦠꦶ ꦄꦴꦲ ‘‘ꦥꦚ꧀ꦚꦴꦟꦤ꧀ꦠꦶ ꦥꦚ꧀ꦚꦴ ꦪꦺꦮꦴ’’ꦠꦶ.

ꦱꦷꦭꦺꦤꦣꦺꦴꦠꦴꦠꦶ ꦱꦩꦴꦣꦶꦥꦢꦛ꧀ꦜꦴꦤꦺꦤ ꦱꦷꦭꦺꦤ ꦱꦏꦭꦱꦁꦏꦶꦭꦺꦱꦩꦭꦮꦶꦱꦸꦢ꧀ꦣꦶꦪꦴ ꦣꦺꦴꦠꦴ ꦮꦶꦱꦸꦢ꧀ꦣꦴ, ꦠꦺꦤꦴꦲ ‘‘ꦏꦡꦁ ꦥꦤꦴ’’ꦠꦶꦄꦴꦢꦶ. ꦠꦠ꧀ꦡ ꦣꦺꦴꦮꦠꦷꦠꦶ ꦱꦸꦗ꧀ꦙꦠꦶ. ꦩꦲꦴꦱꦛ꧀ꦜꦶꦮꦱ꧀ꦱꦠ꧀ꦡꦺꦫꦺꦴ ꦮꦶꦪꦴꦠꦶ ꦱꦛ꧀ꦜꦶꦮꦱ꧀ꦱꦩꦲꦴꦡꦺꦫꦺꦴ ꦮꦶꦪ. ꦮꦺꦢꦤꦴꦥꦫꦶꦒ꧀ꦒꦲꦩꦠ꧀ꦠꦩ꧀ꦥꦷꦠꦶ ꦌꦠ꧀ꦡ ꦮꦺꦢꦤꦴꦥꦫꦶꦒ꧀ꦒꦲꦺꦴ ꦤꦴꦩ ꦪꦡꦴꦈꦥ꧀ꦥꦤ꧀ꦤꦁ ꦮꦺꦢꦤꦁ ꦱꦨꦴꦮꦫꦱꦠꦺꦴ ꦈꦥꦣꦴꦫꦺꦠ꧀ꦮꦴ ‘‘ꦄꦪꦁ ꦮꦺꦢꦤꦴ ꦦꦱ꧀ꦱꦁ ꦥꦛꦶꦕ꧀ꦕ, ꦱꦺꦴ ꦦꦱ꧀ꦱꦺꦴ ꦄꦤꦶꦕ꧀ꦕꦺꦴ ꦢꦸꦏ꧀ꦑꦺꦴ ꦮꦶꦥꦫꦶꦟꦴꦩꦣꦩ꧀ꦩꦺꦴ’’ꦠꦶ ꦭꦏ꧀ꦑꦟꦠ꧀ꦠꦪꦁ ꦄꦴꦫꦺꦴꦥꦺꦠ꧀ꦮꦴ ꦥꦮꦠ꧀ꦠꦶꦠꦮꦶꦥꦱ꧀ꦱꦤꦴ. ꦌꦮꦁ ꦮꦶꦥꦱ꧀ꦱꦤ꧀ꦠꦺꦤ ‘‘ꦱꦸꦑꦺꦤ ꦱꦏ꧀ꦏꦴ ꦱꦴ ꦮꦺꦢꦤꦴ ꦄꦣꦶꦮꦴꦱꦺꦠꦸꦁ ‘‘ꦮꦺꦢꦤꦴ ꦌꦮ ꦮꦺꦢꦶꦪꦠꦷ’’ꦠꦶ. ꦮꦺꦢꦤꦁ ꦮꦶꦏ꧀ꦑꦩ꧀ꦨꦺꦠ꧀ꦮꦴꦠꦶ ꦪꦡꦴꦈꦥ꧀ꦥꦤ꧀ꦤꦁ ꦢꦸꦏ꧀ꦑꦁ ꦮꦺꦢꦤꦁ ꦄꦤꦤꦸꦮꦠ꧀ꦠꦶꦠ꧀ꦮꦴ ꦮꦶꦥꦱ꧀ꦱꦤꦁ ꦄꦴꦫꦨꦶꦠ꧀ꦮꦴ ꦮꦷꦡꦶꦁ ꦥꦛꦶꦥꦤ꧀ꦤꦴꦪ ꦮꦶꦥꦱ꧀ꦱꦤꦴꦪ ꦠꦁ ꦮꦶꦤꦺꦴꦢꦺꦠ꧀ꦮꦴ. ꦱꦁꦱꦸꦩꦴꦫꦥꦠꦶꦠꦺꦤꦴꦠꦶ ꦏꦸꦩ꧀ꦨꦷꦭꦺꦤ ꦮꦶꦪ ꦨꦹꦩꦶꦪꦁ ꦈꦫꦺꦤ ꦤꦶꦥꦗ꧀ꦗꦤꦺꦤ. ꦥꦚ꧀ꦚꦴꦪ ꦱꦷꦭꦁ ꦣꦺꦴꦮꦶꦠ꧀ꦮꦴꦠꦶ ꦄꦑꦟ꧀ꦝꦴꦢꦶꦨꦴꦮꦴꦥꦴꦢꦤꦺꦤ ꦱꦷꦭꦁ ꦄꦴꦢꦶꦩꦗ꧀ꦙꦥꦫꦶꦪꦺꦴꦱꦴꦤꦺꦱꦸ ꦥꦚ꧀ꦚꦴꦪ ꦱꦸꦮꦶꦱꦺꦴꦣꦶꦠꦁ ꦏꦠ꧀ꦮꦴ.

꧓꧑꧘. ‘‘ꦏꦱ꧀ꦩꦴ ꦄꦴꦲꦴ’’ꦠꦶ ꦈꦥꦫꦶꦢꦺꦱꦤꦴꦪ ꦏꦴꦫꦟꦁ ꦥꦸꦕ꧀ꦖꦠꦶ. ꦭꦗ꧀ꦗꦴ ꦤꦴꦩ ‘‘ꦱꦷꦭꦱ꧀ꦱ ꦗꦴꦠꦶꦪꦴ ꦕ ꦒꦸꦟꦢꦺꦴꦱꦥꦏꦴꦱꦤꦺꦤ ꦱꦩꦟꦺꦤ ꦒꦺꦴꦠꦩꦺꦤ ꦥꦸꦕ꧀ꦖꦶꦠꦥꦚ꧀ꦲꦁ ꦮꦶꦱ꧀ꦱꦗ꧀ꦗꦺꦱꦷ’’ꦠꦶ ꦥꦫꦶꦱꦴꦪ ꦥꦚ꧀ꦚꦴꦠꦠꦴ. ꦌꦠ꧀ꦠꦏꦥꦫꦩꦴꦠꦶ ꦌꦠ꧀ꦠꦏꦈꦏ꧀ꦏꦁꦱꦏꦺꦴꦛꦶꦏꦴ ꦥꦚ꧀ꦕ ꦱꦷꦭꦴꦤꦶ, ꦮꦺꦢꦠ꧀ꦠꦪꦮꦶꦨꦴꦮꦤꦁ ꦥꦚ꧀ꦚꦚ꧀ꦕ ꦭꦏ꧀ꦑꦟꦴꦢꦶꦠꦺꦴ ꦤꦶꦢ꧀ꦣꦴꦫꦺꦠ꧀ꦮꦴ ꦗꦴꦤꦤꦁ ꦤꦠ꧀ꦡꦶ, ꦏꦺꦮꦭꦁ ꦠꦠ꧀ꦡ ꦮꦕꦷꦥꦫꦩꦴ ꦩꦪꦤ꧀ꦠꦶ ꦢꦱ꧀ꦱꦺꦠꦷꦠꦶ ꦄꦴꦲ ‘‘ꦱꦷꦭꦥꦚ꧀ꦚꦴꦟꦤ꧀ꦠꦶ ꦮꦕꦤꦩꦺꦮ ꦥꦫꦩꦁ ꦄꦩ꧀ꦲꦴꦏ’’ꦤ꧀ꦠꦶ. ‘‘ꦄꦪꦁ ꦥꦤ ꦮꦶꦱꦺꦱꦺꦴ’’ꦠꦶ ꦆꦢꦁ ꦤꦶꦪ꧀ꦪꦴꦠꦤꦴꦥꦺꦏ꧀ꦑꦁ ꦱꦷꦭꦤꦶꦢ꧀ꦢꦺꦱꦺ, ꦠꦺꦤꦴꦲ ‘‘ꦱꦷꦭꦩꦶꦕ꧀ꦕꦺꦮ ꦤꦶꦪ꧀ꦪꦴꦠꦶꦠ’’ꦤ꧀ꦠꦶ. ꦱꦴꦩꦚ꧀ꦚꦦꦭꦺ ꦥꦤ ‘‘ꦱꦴꦩꦚ꧀ꦚꦦꦭ’’ ꦩꦶꦕ꧀ꦕꦺꦮ ꦤꦶꦪ꧀ꦪꦴꦠꦶꦠꦁ, ꦥꦚ꧀ꦚꦴꦤꦶꦢ꧀ꦢꦺꦱꦺ ꦥꦤ ꦙꦴꦤꦥꦚ꧀ꦚꦁ ꦄꦣꦶꦛ꧀ꦜꦴꦤꦁ ꦏꦠ꧀ꦮꦴ ꦮꦶꦥꦱ꧀ꦱꦤꦴꦥꦚ꧀ꦚꦴꦮꦱꦺꦤꦺꦮ ꦥꦚ꧀ꦚꦴꦤꦶꦪ꧀ꦪꦴꦠꦤꦁ ꦏꦠꦁ, ꦠꦺꦤꦴꦲ ‘‘ꦥꦜꦩꦗ꧀ꦙꦴꦤꦴꦢꦷꦤꦷ’’ꦠꦶ.

ꦱꦺꦴꦟꦢꦟ꧀ꦝꦈꦥꦴꦱꦏꦠ꧀ꦠꦥꦛꦶꦮꦺꦢꦤꦴꦏꦡꦴꦮꦟ꧀ꦟꦤꦴ

꧓꧒꧑-꧒. ꦤꦠ꧀ꦠꦴꦠꦶ ꦥꦸꦠ꧀ꦠꦥꦸꦠ꧀ꦠꦺꦴ. ꦄꦒꦴꦫꦮꦁ ꦤꦴꦩ ꦤꦠ꧀ꦡꦶ, ꦤ ꦕꦴꦪꦁ ꦨꦒꦮꦠꦶ ꦄꦒꦴꦫꦮꦺꦤ ‘‘ꦄꦲꦚ꧀ꦕꦺꦮ ꦑꦺꦴ ꦥꦤꦴ’’ꦠꦶꦄꦴꦢꦶꦩꦴꦲ, ꦄꦡ ꦑꦺꦴ ꦄꦠ꧀ꦠꦭꦴꦨꦥꦫꦶꦲꦴꦤꦶꦨꦪꦺꦤ. ꦄꦪꦚ꧀ꦲꦶ ꦪꦡꦴ ꦠꦡꦴ ꦄꦠ꧀ꦠꦤꦺꦴ ꦩꦲꦴꦗꦤꦱ꧀ꦱ ꦱꦩ꧀ꦨꦴꦮꦤꦁ ꦈꦥ꧀ꦥꦴꦢꦺꦠ꧀ꦮꦴ ꦏꦺꦴꦲꦚ꧀ꦚꦺꦤ ꦥꦫꦺ ꦮꦶꦩ꧀ꦲꦴꦥꦺꦠ꧀ꦮꦴ ꦭꦴꦨꦸꦥ꧀ꦥꦴꦢꦁ ꦤꦶꦗꦶꦒꦶꦱꦤ꧀ꦠꦺꦴ ꦮꦶꦕꦫꦠꦶ, ꦠꦱ꧀ꦩꦴ ꦠꦡꦴ ꦄꦮꦺꦴꦕ, ꦠꦺꦤꦴꦲ ‘‘ꦆꦩꦶꦤꦴ ꦏꦶꦫꦴ’’ꦠꦶꦄꦴꦢꦶ.

ꦠꦔ꧀ꦑꦟꦴꦤꦸꦫꦹꦥꦴꦪꦴꦠꦶ ꦪꦴꦢꦶꦱꦷ ꦠꦢꦴ ꦠꦱ꧀ꦱ ꦄꦗ꧀ꦙꦴꦱꦪꦥ꧀ꦥꦮꦠ꧀ꦠꦶ, ꦠꦢꦤꦸꦫꦹꦥꦴꦪꦴꦠꦶ ꦄꦠ꧀ꦡꦺꦴ. ꦠꦱ꧀ꦱ ꦠꦢꦴ ꦠꦴꦢꦶꦱꦱ꧀ꦱ ꦮꦶꦮꦛ꧀ꦛꦱꦤ꧀ꦤꦶꦱ꧀ꦱꦶꦠꦱ꧀ꦱ ꦚꦴꦟꦱ꧀ꦱ ꦥꦫꦶꦥꦴꦏꦱ꧀ꦱ ꦄꦨꦴꦮꦠꦺꦴ ꦏꦺꦮꦭꦁ ꦄꦧ꧀ꦨꦸꦢꦪꦤꦶꦱ꧀ꦱꦶꦠꦺꦴ ꦌꦮ ꦄꦠ꧀ꦡꦺꦴ ꦢꦱ꧀ꦱꦶꦠꦺꦴꦠꦶ ꦄꦴꦲ ‘‘ꦢꦶꦛ꧀ꦜꦣꦩ꧀ꦩꦶꦏꦱꦩ꧀ꦥꦫꦴꦪꦶꦏꦩꦠ꧀ꦡꦁ ꦱꦤ꧀ꦢꦱ꧀ꦱꦺꦠ꧀ꦮꦴ’’ꦠꦶ, ꦥꦕ꧀ꦕꦏ꧀ꦑꦠꦺꦴ ꦮꦶꦨꦴꦮꦺꦠ꧀ꦮꦴꦠꦶ ꦄꦠ꧀ꦡꦺꦴ. ꦏꦸꦱꦭꦺ ꦣꦩ꧀ꦩꦺꦠꦶ ꦠꦺꦨꦹꦩꦏꦺ ꦏꦸꦱꦭꦺ ꦣꦩ꧀ꦩꦺ, ‘‘ꦕꦠꦸꦨꦹꦩꦏꦺ’’ꦠꦶꦥꦶ ꦮꦠ꧀ꦠꦸꦁ ꦮꦛ꧀ꦛꦠꦶꦪꦺꦮ, ꦠꦺꦤꦺꦮꦴꦲ ‘‘ꦄꦴꦪꦠꦶꦁ ꦤꦶꦧ꧀ꦧꦴꦤꦠ꧀ꦡꦴꦪ ꦮꦴꦱꦤꦴꦨꦴꦒꦶꦪꦴ ꦮꦴ’’ꦠꦶ. ꦠꦠ꧀ꦡꦴꦠꦶ ꦏꦸꦱꦭꦣꦩ꧀ꦩꦺ ꦪꦡꦴ ꦱꦩꦴꦢꦥꦶꦠꦺ. ꦤꦤ꧀ꦠꦶ ꦧ꧀ꦫꦴꦲ꧀ꦩꦟꦁ ꦱꦩꦸꦠ꧀ꦠꦺꦗꦺꦠ꧀ꦮꦴꦠꦶ ꦱꦩ꧀ꦩꦢꦺꦮ ꦈꦥꦫꦹꦥꦫꦶ ꦤꦶꦱꦴꦤꦺꦠ꧀ꦮꦴ ꦥꦸꦚ꧀ꦚꦏꦶꦫꦶꦪꦴꦪ ꦠꦶꦏ꧀ꦑꦮꦶꦱꦢꦨꦴꦮꦁ ꦄꦴꦥꦴꦢꦺꦠ꧀ꦮꦴ. ꦠꦁ ꦥꦤ ꦄꦠ꧀ꦡꦠꦺꦴ ꦠꦠ꧀ꦡ ꦈꦱ꧀ꦱꦴꦲꦗꦤꦤꦁ ꦲꦺꦴꦠꦷꦠꦶ ꦄꦴꦲ ‘‘ꦱꦈꦱ꧀ꦱꦴꦲꦁ ꦏꦠ꧀ꦮꦴ’’ꦠꦶ. ꦌꦮꦁ ꦥꦸꦚ꧀ꦚꦏꦶꦫꦶꦪꦴꦪ ꦱꦈꦱ꧀ꦱꦴꦲꦠꦴ, ꦌꦮꦫꦹꦥꦁ ꦒꦸꦟꦱꦩꦔ꧀ꦒꦶꦠꦴ ꦕ ꦤꦶꦪꦩꦠꦺꦴ ꦢꦶꦛ꧀ꦜꦣꦩ꧀ꦩꦶꦏꦴ ꦄꦠ꧀ꦡꦱꦩ꧀ꦥꦴꦢꦤꦷꦠꦶ ꦌꦮꦁ ꦱꦈꦱ꧀ꦱꦴꦲꦠꦴꦪ, ꦄꦚ꧀ꦚꦺꦲꦶ ꦕ ꦠꦱ꧀ꦩꦶꦁ ꦮꦶꦗ꧀ꦗꦩꦴꦤꦒꦸꦟꦺꦲꦶ ꦱꦩ꧀ꦥꦲꦁꦱꦺꦠ꧀ꦮꦴ ꦱꦩ꧀ꦩꦢꦺꦮ ꦲꦛ꧀ꦜꦠꦸꦛ꧀ꦜꦨꦴꦮꦁ ꦄꦴꦥꦴꦢꦺꦠ꧀ꦮꦴ.

ꦪꦢꦶ ꦨꦒꦮꦴ ꦣꦩ꧀ꦩꦫꦠꦤꦮꦱ꧀ꦱꦁ ꦮꦱ꧀ꦱꦶ, ꦄꦡ ꦏꦱ꧀ꦩꦴ ꦱꦺꦴ ꦮꦶꦱꦺꦱꦁ ꦤꦴꦣꦶꦒꦕ꧀ꦖꦠꦷꦠꦶ ꦄꦴꦲ ‘‘ꦧ꧀ꦫꦴꦲ꧀ꦩꦟꦺꦴ ꦥꦤꦴ’’ꦠꦶꦄꦴꦢꦶ. ꦪꦢꦶ ꦌꦮꦁ ꦏꦱ꧀ꦩꦴ ꦨꦒꦮꦴ ꦠꦱ꧀ꦱ ꦠꦡꦴ ꦣꦩ꧀ꦩꦫꦠꦤꦮꦱ꧀ꦱꦁ ꦮꦱ꧀ꦱꦷꦠꦶ ꦄꦴꦲ ‘‘ꦏꦺꦮꦭꦩꦱ꧀ꦱꦴ’’ꦠꦶꦄꦴꦢꦶ. ꦤ ꦲꦶ ꦨꦒꦮꦠꦺꦴ ꦤꦶꦫꦠ꧀ꦡꦏꦴ ꦢꦺꦱꦤꦴ ꦲꦺꦴꦠꦷꦠꦶ.

ꦱꦺꦴꦟꦢꦟ꧀ꦝꦱꦸꦠ꧀ꦠꦮꦟ꧀ꦟꦤꦴꦪ ꦭꦷꦤꦠ꧀ꦡꦥ꧀ꦥꦏꦴꦱꦤꦴ.