꧙. ꦆꦢ꧀ꦣꦶꦥꦴꦢꦮꦶꦨꦔ꧀ꦒꦺꦴ

꧑. ꦱꦸꦠ꧀ꦠꦤ꧀ꦠꦨꦴꦗꦤꦷꦪꦮꦟ꧀ꦟꦤꦴ

꧔꧓꧑. ꦆꦢ꧀ꦣꦶ-ꦱꦢ꧀ꦢꦱ꧀ꦱ ꦥꦜꦩꦺꦴ ꦏꦠ꧀ꦠꦸꦄꦠ꧀ꦡꦺꦴ, ꦢꦸꦠꦶꦪꦺꦴ ꦏꦫꦟꦠ꧀ꦡꦺꦴ ꦮꦸꦠ꧀ꦠꦺꦴ, ꦥꦴꦢ-ꦱꦢ꧀ꦢꦱ꧀ꦱ ꦌꦏꦺꦴ ꦏꦫꦟꦩꦺꦮꦠ꧀ꦡꦺꦴ ꦮꦸꦠ꧀ꦠꦺꦴ. ꦥꦗ꧀ꦗꦶꦠꦧ꧀ꦧꦴꦮ ꦆꦢ꧀ꦣꦶ ꦮꦸꦠ꧀ꦠꦴ, ꦤ ꦕ ꦆꦗ꧀ꦙꦤ꧀ꦠꦷ ꦥꦗ꧀ꦗꦶꦠꦧ꧀ꦧꦴ ꦕ ꦆꦢ꧀ꦣꦶ ꦥꦗ꧀ꦗꦤꦏꦫꦟꦺꦤ ꦥꦴꦢꦺꦤ ꦱꦩꦴꦤꦴꦣꦶꦏꦫꦟꦴ ꦲꦺꦴꦠꦷꦠꦶ ‘‘ꦥꦜꦩꦺꦤꦠ꧀ꦡꦺꦤ ꦆꦢ꧀ꦣꦶ ꦌꦮ ꦥꦴꦢꦺꦴ ꦆꦢ꧀ꦣꦶꦥꦴꦢꦺꦴ’’ꦠꦶ ꦤ ꦱꦏ꧀ꦏꦴ ꦮꦠ꧀ꦠꦸꦁ, ꦠꦡꦴ ꦆꦢ꧀ꦣꦶꦏꦶꦫꦶꦪꦴꦏꦫꦟꦺꦤ ꦱꦴꦣꦺꦠꦧ꧀ꦧꦴ ꦕ ꦮꦸꦢ꧀ꦣꦶꦱꦔ꧀ꦑꦴꦠꦴ ꦆꦢ꧀ꦣꦶ ꦥꦗ꧀ꦗꦤꦏꦶꦫꦶꦪꦴꦏꦫꦟꦺꦤ ꦥꦗ꧀ꦗꦶꦠꦧ꧀ꦧꦴꦠꦶ ꦢ꧀ꦮꦶꦤ꧀ꦤꦁ ꦏꦫꦟꦴꦤꦁ ꦤ ꦄꦱꦩꦴꦤꦴꦣꦶꦏꦫꦟꦠꦴ ꦱꦩ꧀ꦨꦮꦠꦷꦠꦶ ‘‘ꦢꦸꦠꦶꦪꦺꦤꦠ꧀ꦡꦺꦤ ꦆꦢ꧀ꦣꦶꦪꦴ ꦥꦴꦢꦺꦴ ꦆꦢ꧀ꦣꦶꦥꦴꦢꦺꦴ’’ꦠꦶ ꦕ ꦤ ꦱꦏ꧀ꦏꦴ ꦮꦠ꧀ꦠꦸꦁ, ꦠꦱ꧀ꦩꦴ ꦥꦜꦩꦺꦤꦠ꧀ꦡꦺꦤ ꦆꦢ꧀ꦣꦶꦪꦴ ꦥꦴꦢꦺꦴ ꦆꦢ꧀ꦣꦶꦥꦴꦢꦺꦴ, ꦢꦸꦠꦶꦪꦺꦤꦠ꧀ꦡꦺꦤ ꦆꦢ꧀ꦣꦶ ꦌꦮ ꦥꦴꦢꦺꦴ ꦆꦢ꧀ꦣꦶꦥꦴꦢꦺꦴꦠꦶ ꦌꦮꦁ ꦪꦺꦴꦗꦤꦴ ꦪꦸꦗ꧀ꦗꦠꦶ.

‘‘ꦖꦤ꧀ꦢꦁ ꦕꦺ…ꦥꦺ… ꦄꦪꦁ ꦮꦸꦕ꧀ꦕꦠꦶ ꦖꦤ꧀ꦢꦱꦩꦴꦣꦷ’’ꦠꦶ ꦆꦩꦴꦪ ꦥꦴꦭ꦳ꦶꦪꦴ ꦖꦤ꧀ꦢꦴꦣꦶꦥꦠꦶ ꦱꦩꦴꦣꦶ ꦖꦤ꧀ꦢꦱꦩꦴꦣꦷꦠꦶ ꦄꦣꦶꦥꦠꦶ-ꦱꦢ꧀ꦢꦭꦺꦴꦥꦁ ꦏꦠ꧀ꦮꦴ ꦱꦩꦴꦱꦺꦴ ꦮꦸꦠ꧀ꦠꦺꦴꦠꦶ ꦮꦶꦚ꧀ꦚꦴꦪꦠꦶ, ꦄꦣꦶꦥꦠꦶ-ꦱꦢ꧀ꦢꦠ꧀ꦡꦢꦱ꧀ꦱꦤꦮꦱꦺꦤ ꦥꦤ ‘‘ꦖꦤ꧀ꦢꦲꦺꦠꦸꦏꦺꦴ ꦖꦤ꧀ꦢꦴꦣꦶꦏꦺꦴ ꦮꦴ ꦱꦩꦴꦣꦶ ꦖꦤ꧀ꦢꦱꦩꦴꦣꦷ’’ꦠꦶ ꦄꦛ꧀ꦜꦏꦡꦴꦪꦁ ꦮꦸꦠ꧀ꦠꦤ꧀ꦠꦶ ꦮꦺꦢꦶꦠꦧ꧀ꦧꦁ. ꦥꦣꦴꦤꦨꦹꦠꦴꦠꦶ ꦮꦷꦫꦶꦪꦨꦹꦠꦴꦠꦶ ꦏꦺꦕꦶ ꦮꦢꦤ꧀ꦠꦶ. ꦱꦔ꧀ꦑꦠꦱꦔ꧀ꦑꦴꦫꦴꦢꦶꦤꦶꦮꦠ꧀ꦠꦤꦠ꧀ꦡꦚ꧀ꦲꦶ ꦥꦣꦴꦤꦒ꧀ꦒꦲꦟꦤ꧀ꦠꦶ. ꦄꦡ ꦮꦴ ꦠꦁ ꦠꦁ ꦮꦶꦱꦺꦱꦁ ꦱꦔ꧀ꦑꦫꦺꦴꦠꦷꦠꦶ ꦱꦔ꧀ꦑꦴꦫꦺꦴ, ꦱꦧ꧀ꦧꦁ ꦮꦷꦫꦶꦪꦁ. ꦠꦠ꧀ꦡ ꦕꦠꦸꦏꦶꦕ꧀ꦕꦱꦴꦣꦏꦠꦺꦴ ꦄꦚ꧀ꦚꦱ꧀ꦱ ꦤꦶꦮꦠ꧀ꦠꦤꦠ꧀ꦡꦁ ꦥꦣꦴꦤꦒ꧀ꦒꦲꦟꦤ꧀ꦠꦶ ꦥꦣꦴꦤꦨꦹꦠꦴ ꦱꦺꦛ꧀ꦜꦨꦹꦠꦴꦠꦶ ꦄꦠ꧀ꦡꦺꦴ. ꦕꦠꦸꦧ꧀ꦧꦶꦣꦱ꧀ꦱ ꦥꦤ ꦮꦷꦫꦶꦪꦱ꧀ꦱ ꦄꦣꦶꦥ꧀ꦥꦺꦠꦠ꧀ꦠꦴ ꦧꦲꦸꦮꦕꦤꦤꦶꦢ꧀ꦢꦺꦱꦺꦴ ꦏꦠꦺꦴ. ꦄꦣꦶꦛ꧀ꦜꦴꦤꦛ꧀ꦜꦺꦤꦴꦠꦶ ꦢꦸꦮꦶꦣꦠ꧀ꦡꦴꦪꦥꦶ ꦆꦢ꧀ꦣꦶꦪꦴ ꦄꦣꦶꦛ꧀ꦜꦴꦤꦠ꧀ꦡꦺꦤ. ꦥꦴꦢꦨꦹꦠꦤ꧀ꦠꦶ ꦆꦩꦶꦤꦴ ꦮꦶꦱꦸꦁ ꦱꦩꦴꦱꦪꦺꦴꦗꦤꦴꦮꦱꦺꦤ ꦥꦤ ꦪꦺꦴ ꦥꦸꦧ꧀ꦧꦺ ꦆꦢ꧀ꦣꦶꦥꦴꦢꦠ꧀ꦡꦺꦴ ꦥꦴꦢ-ꦱꦢ꧀ꦢꦱ꧀ꦱ ꦈꦥꦴꦪꦠ꧀ꦡꦠꦁ ꦒꦲꦺꦠ꧀ꦮꦴ ꦪꦡꦴꦪꦸꦠ꧀ꦠꦺꦴ ꦮꦸꦠ꧀ꦠꦺꦴ, ꦱꦺꦴ ꦮꦏ꧀ꦑꦩꦴꦤꦴꦤꦁ ꦥꦛꦶꦭꦴꦨꦥꦸꦧ꧀ꦧꦨꦴꦒꦴꦤꦁ ꦏꦠ꧀ꦠꦸꦏꦫꦟꦶꦢ꧀ꦣꦶꦨꦴꦮꦁ, ꦈꦠ꧀ꦠꦫꦕꦹꦭ꦳ꦨꦴꦗꦤꦷꦪꦺ ꦮꦴ ꦮꦸꦠ꧀ꦠꦺꦲꦶ ꦖꦤ꧀ꦢꦴꦢꦷꦲꦶ ꦆꦢ꧀ꦣꦶꦥꦴꦢꦺꦲꦶ ꦱꦴꦣꦺꦠꦧ꧀ꦧꦴꦪ ꦆꦢ꧀ꦣꦶꦪꦴ ꦏꦠ꧀ꦠꦶꦢ꧀ꦣꦶꦨꦴꦮꦁ, ꦖꦤ꧀ꦢꦴꦢꦷꦤꦚ꧀ꦕ ꦏꦫꦟꦶꦢ꧀ꦣꦶꦨꦴꦮꦁ ꦱꦤ꧀ꦣꦴꦪ ꦮꦸꦠ꧀ꦠꦺꦴꦠꦶ ꦮꦺꦢꦶꦠꦧ꧀ꦧꦺꦴ.

ꦮꦷꦫꦶꦪꦶꦢ꧀ꦣꦶꦥꦴꦢꦤꦶꦢ꧀ꦢꦺꦱꦺ ‘‘ꦮꦷꦫꦶꦪꦱꦩꦴꦣꦶꦥꦣꦴꦤꦱꦔ꧀ꦑꦴꦫꦱꦩꦤ꧀ꦤꦴꦒꦠ’’ꦤ꧀ꦠꦶ ꦢ꧀ꦮꦶꦏ꧀ꦑꦠ꧀ꦠꦸꦁ ꦮꦷꦫꦶꦪꦁ ꦄꦴꦒꦠꦁ. ꦠꦠ꧀ꦡ ꦥꦸꦫꦶꦩꦁ ꦱꦩꦴꦣꦶꦮꦶꦱꦺꦱꦤꦁ ‘‘ꦮꦷꦫꦶꦪꦴꦣꦶꦥꦠꦶ ꦱꦩꦴꦣꦶ ꦮꦷꦫꦶꦪꦱꦩꦴꦣꦷ’’ꦠꦶ, ꦢꦸꦠꦶꦪꦁ ꦱꦩꦤ꧀ꦤꦴꦒꦩꦔ꧀ꦒꦢꦱ꧀ꦱꦤꦁ. ꦢ꧀ꦮꦺꦪꦺꦮ ꦲꦶ ꦱꦧ꧀ꦧꦠ꧀ꦡ ꦱꦩꦤ꧀ꦤꦴꦒꦩꦔ꧀ꦒꦴꦤꦶ ꦱꦩꦴꦣꦶ ꦥꦣꦴꦤꦱꦔ꧀ꦑꦴꦫꦺꦴ ꦕ, ꦖꦤ꧀ꦢꦴꦢꦪꦺꦴ ꦱꦩꦴꦣꦶꦮꦶꦱꦺꦱꦤꦴꦤꦶ, ꦥꦣꦴꦤꦱꦔ꧀ꦑꦴꦫꦺꦴ ꦥꦤ ꦥꦣꦴꦤꦮꦕꦤꦺꦤꦺꦮ ꦮꦶꦱꦺꦱꦶꦠꦺꦴ, ꦤ ꦖꦤ꧀ꦢꦴꦢꦷꦲꦷꦠꦶ ꦤ ꦆꦣ ꦮꦷꦫꦶꦪꦴꦣꦶꦥꦠꦶꦠꦴ ꦥꦣꦴꦤꦱꦔ꧀ꦑꦴꦫꦱ꧀ꦱ ꦮꦸꦠ꧀ꦠꦴ ꦲꦺꦴꦠꦶ. ꦮꦷꦫꦶꦪꦚ꧀ꦕ ꦱꦩꦴꦣꦶꦁ ꦮꦶꦱꦺꦱꦺꦠ꧀ꦮꦴ ꦜꦶꦠꦩꦺꦮ ꦱꦩꦤ꧀ꦤꦴꦒꦩꦔ꧀ꦒꦮꦱꦺꦤ ꦥꦣꦴꦤꦱꦔ꧀ꦑꦴꦫꦮꦕꦤꦺꦤ ꦮꦸꦠ꧀ꦠꦤ꧀ꦠꦶ ꦤꦴꦥꦶ ꦢ꧀ꦮꦷꦲꦶ ꦮꦷꦫꦶꦪꦺꦲꦶ ꦱꦩꦤ꧀ꦤꦴꦒꦩꦺꦴ ꦮꦸꦠ꧀ꦠꦺꦴ ꦲꦺꦴꦠꦷꦠꦶ. ꦪꦱ꧀ꦩꦴ ꦥꦤ ꦖꦤ꧀ꦢꦴꦢꦷꦲꦶ ꦮꦶꦱꦶꦛ꧀ꦜꦺꦴ ꦱꦩꦴꦣꦶ, ꦠꦡꦴ ꦮꦶꦱꦶꦛ꧀ꦜꦺꦤꦺꦮ ꦕ ꦠꦺꦤ ꦱꦩ꧀ꦥꦪꦸꦠ꧀ꦠꦺꦴ ꦥꦣꦴꦤꦱꦔ꧀ꦑꦴꦫꦺꦴ ꦱꦺꦱꦣꦩ꧀ꦩꦴ ꦕ, ꦠꦱ꧀ꦩꦴ ꦱꦩꦴꦣꦶꦮꦶꦱꦺꦱꦤꦴꦤꦁ ꦮꦱꦺꦤ ꦕꦠ꧀ꦠꦴꦫꦺꦴ ꦆꦢ꧀ꦣꦶꦥꦴꦢꦴ ꦮꦸꦠ꧀ꦠꦴ. ꦮꦶꦱꦺꦱꦤꦨꦴꦮꦺꦴ ꦕ ꦖꦤ꧀ꦢꦴꦢꦷꦤꦁ ꦠꦁꦠꦁꦄꦮꦱ꧀ꦱꦪꦤꦮꦱꦺꦤ ꦲꦺꦴꦠꦷꦠꦶ ‘‘ꦖꦤ꧀ꦢꦱꦩꦴꦣꦶ…ꦥꦺ… ꦆꦢ꧀ꦣꦶꦥꦴꦢ’’ꦤ꧀ꦠꦶ ꦌꦠ꧀ꦡ ꦤꦶꦱ꧀ꦱꦪꦠ꧀ꦡꦺꦥꦶ ꦥꦴꦢ-ꦱꦢ꧀ꦢꦺ ꦈꦥꦴꦪꦠ꧀ꦡꦺꦤ ꦖꦤ꧀ꦢꦴꦢꦷꦤꦁ ꦆꦢ꧀ꦣꦶꦥꦴꦢꦠꦴ ꦮꦸꦠ꧀ꦠꦴ ꦲꦺꦴꦠꦶ. ꦠꦺꦤꦺꦮ ꦈꦠ꧀ꦠꦫꦕꦹꦭ꦳ꦨꦴꦗꦤꦷꦪꦺ ‘‘ꦕꦠ꧀ꦠꦴꦫꦺꦴ ꦆꦢ꧀ꦣꦶꦥꦴꦢꦴ ꦖꦤ꧀ꦢꦶꦢ꧀ꦣꦶꦥꦴꦢꦺꦴ’’ꦠꦶꦄꦴꦢꦶꦤꦴ ꦖꦤ꧀ꦢꦴꦢꦷꦤꦩꦺꦮ ꦆꦢ꧀ꦣꦶꦥꦴꦢꦠꦴ ꦮꦸꦠ꧀ꦠꦴ. ꦥꦚ꧀ꦲꦥꦸꦕ꧀ꦖꦏꦺ ꦕ ‘‘ꦕꦠ꧀ꦠꦴꦫꦺꦴ ꦆꦢ꧀ꦣꦶꦥꦴꦢꦴ ꦆꦣ ꦨꦶꦏ꧀ꦑꦸ ꦖꦤ꧀ꦢꦱꦩꦴꦣꦷ’’ꦠꦶꦄꦴꦢꦶꦤꦴꦮ (ꦮꦶꦨ. ꧔꧖꧒) ꦈꦢ꧀ꦢꦺꦱꦁ ꦏꦠ꧀ꦮꦴꦥꦶ ꦥꦸꦤ ꦖꦤ꧀ꦢꦴꦢꦷꦤꦁꦪꦺꦮ ꦏꦸꦱꦭꦴꦢꦶꦨꦴꦮꦺꦴ ꦮꦶꦨꦠ꧀ꦠꦺꦴꦠꦶ. ꦈꦥꦴꦪꦶꦢ꧀ꦣꦶꦥꦴꦢꦢꦱ꧀ꦱꦤꦠ꧀ꦡꦩꦺꦮ ꦲꦶ ꦤꦶꦱ꧀ꦱꦪꦶꦢ꧀ꦣꦶꦥꦴꦢꦢꦱ꧀ꦱꦤꦁ ꦏꦠꦁ, ꦄꦚ꧀ꦚꦡꦴ ꦕꦠꦸꦧ꧀ꦧꦶꦣꦠꦴ ꦤ ꦲꦺꦴꦠꦷꦠꦶ ꦄꦪꦩꦺꦠ꧀ꦡ ꦥꦴꦭ꦳ꦶꦮꦱꦺꦤ ꦄꦠ꧀ꦡꦮꦶꦤꦶꦕ꧀ꦖꦪꦺꦴ ꦮꦺꦢꦶꦠꦧ꧀ꦧꦺꦴ.

꧔꧓꧓. ꦫꦡꦣꦸꦫꦺꦠꦶ ꦫꦡꦱ꧀ꦱ ꦥꦸꦫꦠꦺꦴ. ꦲꦷꦤꦗꦴꦠꦶꦏꦺꦴ ꦕꦟ꧀ꦝꦴꦭꦺꦴ ꦈꦥꦛ꧀ꦜꦴꦤꦴꦢꦶꦒꦸꦟꦪꦺꦴꦒꦺꦥꦶ ꦱꦺꦤꦴꦥꦠꦶꦛ꧀ꦜꦴꦤꦴꦢꦷꦤꦶ ꦤ ꦭꦨꦠꦷꦠꦶ ꦄꦴꦲ ‘‘ꦗꦴꦠꦶꦁ ꦱꦺꦴꦣꦺꦠ꧀ꦮꦴ…ꦥꦺ… ꦗꦴꦠꦶꦁ ꦄꦮꦱ꧀ꦱꦪꦠꦷ’’ꦠꦶ. ꦄꦩꦤ꧀ꦠꦤꦷꦪꦺꦴꦠꦶ ꦲꦶꦠꦴꦲꦶꦠꦩꦤ꧀ꦠꦤꦺ ꦤ ꦄꦫꦲꦺꦴ.

ꦫꦛ꧀ꦜꦥꦴꦭꦠ꧀ꦡꦺꦫꦺꦴ ꦖꦤ꧀ꦢꦺ ꦱꦠꦶ ꦏꦡꦁ ꦤꦴꦤꦸꦗꦴꦤꦶꦱ꧀ꦱꦤ꧀ꦠꦷꦠꦶ ꦱꦠ꧀ꦠꦥꦶ ꦨꦠ꧀ꦠꦴꦤꦶ ꦄꦨꦸꦚ꧀ꦗꦶꦠ꧀ꦮꦴ ꦩꦴꦠꦴꦥꦶꦠꦫꦺꦴ ꦄꦤꦸꦗꦴꦤꦴꦥꦺꦠ꧀ꦮꦴ ꦥꦧ꧀ꦧꦗꦶꦠ꧀ꦮꦴ ꦖꦤ꧀ꦢꦩꦺꦮ ꦄꦮꦱ꧀ꦱꦴꦪ ꦭꦺꦴꦏꦸꦠ꧀ꦠꦫꦣꦩ꧀ꦩꦁ ꦤꦶꦧ꧀ꦧꦠ꧀ꦠꦺꦱꦷꦠꦶ ꦄꦴꦲ ‘‘ꦫꦛ꧀ꦜꦥꦴꦭꦠ꧀ꦡꦺꦫꦺꦴ ꦮꦶꦪꦴ’’ꦠꦶ.

ꦩꦺꦴꦓꦫꦴꦗꦠ꧀ꦡꦺꦫꦺꦴ ꦮꦷꦩꦁꦱꦁ ꦄꦮꦱ꧀ꦱꦪꦷꦠꦶ ꦠꦱ꧀ꦱ ꦨꦒꦮꦴ ‘‘ꦱꦸꦚ꧀ꦚꦠꦺꦴ ꦭꦺꦴꦏꦁ ꦄꦮꦺꦏ꧀ꦑꦱ꧀ꦱꦹ’’ꦠꦶ (ꦱꦸ. ꦤꦶ. ꧑꧑꧒꧕) ꦱꦸꦚ꧀ꦚꦠꦴꦏꦡꦁ ꦏꦡꦺꦱꦶ, ꦥꦚ꧀ꦚꦴꦤꦶꦱ꧀ꦱꦶꦠꦩꦴꦤꦤꦶꦒ꧀ꦒꦲꦠ꧀ꦡꦚ꧀ꦕ ꦢ꧀ꦮꦶꦏ꧀ꦑꦠ꧀ꦠꦸꦁ ꦥꦸꦕ꧀ꦖꦶꦠꦺꦴ ꦥꦚ꧀ꦲꦁ ꦤ ꦏꦡꦺꦱꦶ. ꦠꦠ꧀ꦡ ꦥꦸꦤꦥ꧀ꦥꦸꦤꦁ ꦖꦤ꧀ꦢꦸꦥ꧀ꦥꦴꦢꦤꦁ ꦠꦺꦴꦱꦤꦁ ꦮꦶꦪ ꦲꦺꦴꦠꦷꦠꦶ ꦖꦤ꧀ꦢꦱ꧀ꦱ ꦈꦥꦛ꧀ꦜꦴꦤꦱꦢꦶꦱꦠꦴ ꦮꦸꦠ꧀ꦠꦴ, ꦡꦴꦩꦨꦴꦮꦠꦺꦴ ꦮꦷꦫꦶꦪꦱ꧀ꦱ ꦱꦹꦫꦠ꧀ꦠꦱꦢꦶꦱꦠꦴ, ‘‘ꦖꦢ꧀ꦮꦴꦫꦴꦣꦶꦥꦠꦶ ꦫꦴꦗꦴ’’ꦠꦶ (ꦣ. ꦥ. ꦄꦛ꧀ꦜ. ꧒.꧑꧘꧑ ꦌꦫꦏꦥꦠ꧀ꦠꦤꦴꦒꦫꦴꦗꦮꦠ꧀ꦡꦸ) ꦮꦕꦤꦠꦺꦴ ꦥꦸꦧ꧀ꦧꦔ꧀ꦒꦩꦠ꧀ꦠꦴ ꦕꦶꦠ꧀ꦠꦱ꧀ꦱ ꦮꦶꦱꦶꦛ꧀ꦜꦗꦴꦠꦶꦱꦢꦶꦱꦠꦴ.

ꦄꦨꦺꦢꦠꦺꦴꦠꦶ ꦖꦤ꧀ꦢꦴꦢꦶꦏꦺ ꦠꦪꦺꦴ ꦠꦪꦺꦴ ꦣꦩ꧀ꦩꦺ ꦱꦩ꧀ꦥꦶꦟ꧀ꦝꦺꦠ꧀ꦮꦴ, ꦆꦢ꧀ꦣꦶꦆꦢ꧀ꦣꦶꦥꦴꦢꦺ ꦄꦩꦶꦱ꧀ꦱꦺꦠ꧀ꦮꦴ ꦮꦴ ꦏꦡꦤꦤ꧀ꦠꦶ ꦄꦠ꧀ꦡꦺꦴ. ꦠꦠ꧀ꦡ ꦖꦤ꧀ꦢꦮꦷꦫꦶꦪꦴꦢꦪꦺꦴ ꦮꦶꦱꦺꦱꦺꦤ ꦆꦗ꧀ꦙꦤ꧀ꦠꦶ ꦌꦠꦴꦪꦴꦠꦶ ꦆꦢ꧀ꦣꦷꦠꦶ ꦮꦸꦕ꧀ꦕꦤ꧀ꦠꦶ, ꦆꦗ꧀ꦙꦠꦷꦠꦶ ꦆꦢ꧀ꦣꦷꦠꦶ ꦄꦮꦶꦱꦺꦱꦺꦤ ꦱꦩꦴꦣꦶꦥꦣꦴꦤꦱꦔ꧀ꦑꦴꦫꦴꦥꦷꦠꦶ.

ꦖꦤ꧀ꦢꦶꦢ꧀ꦣꦶꦥꦴꦢꦱꦩꦴꦣꦶꦢ꧀ꦣꦶꦥꦴꦢꦴꦢꦪꦺꦴ ꦮꦶꦱꦶꦛ꧀ꦜꦴ, ꦥꦴꦢꦺꦴ ꦱꦧ꧀ꦧꦶꦢ꧀ꦣꦷꦤꦁ ꦱꦴꦣꦴꦫꦟꦠ꧀ꦠꦴ ꦄꦮꦶꦱꦶꦛ꧀ꦜꦺꦴ, ꦠꦱ꧀ꦩꦴ ꦮꦶꦱꦶꦛ꧀ꦜꦺꦱ꧀ꦮꦺꦮ ꦥꦮꦺꦱꦁ ꦄꦮꦠ꧀ꦮꦴ ꦄꦮꦶꦱꦶꦛ꧀ꦜꦺ ꦕ ꦥꦮꦺꦱꦁ ꦮꦠ꧀ꦠꦸꦁ ꦪꦸꦠ꧀ꦠꦤ꧀ꦠꦶ ꦢꦱ꧀ꦱꦺꦠꦸꦁ ꦱꦧ꧀ꦧꦠ꧀ꦡ ‘‘ꦥꦴꦢꦺ ꦥꦠꦶꦛ꧀ꦜꦴꦠꦶꦥꦶ ꦮꦠ꧀ꦠꦸꦁ ꦮꦛ꧀ꦛꦠꦷ’’ꦠꦶ ꦄꦴꦲ. ꦠꦠ꧀ꦡꦺꦮꦴꦠꦶ ꦖꦤ꧀ꦢꦱꦩꦴꦣꦶꦥꦣꦴꦤꦱꦔ꧀ꦑꦴꦫꦆꦢ꧀ꦣꦶꦥꦴꦢꦺꦱꦸ, ꦕꦠꦹꦱꦸ ꦖꦤ꧀ꦢꦴꦢꦶꦏꦺꦱ꧀ꦮꦺꦮꦴꦠꦶ ꦄꦠ꧀ꦡꦺꦴ. ‘‘ꦖꦤ꧀ꦢꦮꦠꦺꦴ ꦏꦺꦴ ꦱꦩꦴꦣꦶ ꦤ ꦆꦗ꧀ꦙꦶꦱ꧀ꦱꦠꦷ’’ꦠꦶ ꦱꦩꦴꦣꦶꦨꦴꦮꦤꦴꦩꦸꦑꦺꦤ ꦨꦴꦮꦶꦠꦴ ꦱꦩꦴꦣꦶꦨꦴꦮꦶꦠꦴ.

ꦌꦠ꧀ꦡ ꦥꦤꦴꦠꦶ ꦨꦺꦢꦏꦡꦴꦪꦁ ꦄꦨꦺꦢꦏꦡꦤꦠꦺꦴ ꦄꦨꦶꦤꦮꦁ ꦤꦠ꧀ꦡꦷꦠꦶ ꦄꦠ꧀ꦡꦺꦴ. ꦪꦺ ꦲꦶ ꦠꦪꦺꦴ ꦣꦩ꧀ꦩꦴ ꦄꦨꦺꦢꦏꦡꦴꦪꦁ ꦆꦢ꧀ꦣꦶꦆꦢ꧀ꦣꦶꦥꦴꦢꦺꦴꦠ꧀ꦮꦺꦮ ꦮꦸꦠ꧀ꦠꦴ, ꦠꦺ ꦌꦮ ꦨꦺꦢꦏꦡꦴꦪꦁ ꦆꦢ꧀ꦣꦷꦥꦶ ꦲꦺꦴꦤ꧀ꦠꦶ ꦆꦢ꧀ꦣꦶꦥꦴꦢꦴꦥꦶ, ꦱꦺꦱꦴ ꦆꦢ꧀ꦣꦶꦥꦴꦢꦴ ꦌꦮꦴꦠꦶ ꦌꦮꦁ ꦄꦨꦶꦤꦮꦴꦨꦴꦮꦁ ꦢꦱ꧀ꦱꦺꦤ꧀ꦠꦺꦴ ‘‘ꦖꦤ꧀ꦢꦺꦴ ꦱꦩꦴꦣꦷ’’ꦠꦶꦄꦴꦢꦶꦩꦴꦲ. ꦆꦩꦺ ꦲꦶ ꦠꦪꦺꦴ…ꦥꦺ… ꦤ ꦮꦶꦤꦴ, ꦠꦱ꧀ꦩꦴ ꦱꦺꦱꦴ ꦱꦩ꧀ꦥꦪꦸꦠ꧀ꦠꦏꦴ ꦕꦠ꧀ꦠꦴꦫꦺꦴ ꦑꦤ꧀ꦣꦴ ꦠꦺꦱꦁ ꦠꦶꦟ꧀ꦟꦁ ꦆꦗ꧀ꦙꦤꦺꦤ ꦆꦢ꧀ꦣꦶ ꦤꦴꦩ ꦨꦮꦺꦪ꧀ꦪꦸꦁ, ꦤ ꦄꦠ꧀ꦠꦤꦺꦴ ꦱꦨꦴꦮꦺꦤꦴꦠꦶ ꦠꦺ ꦆꦢ꧀ꦣꦶꦥꦴꦢꦴ ꦌꦮ ꦲꦺꦴꦤ꧀ꦠꦶ, ꦤ ꦆꦢ꧀ꦣꦷꦠꦶ ꦌꦮꦩꦶꦢꦁ ꦥꦸꦫꦶꦩꦱ꧀ꦱ ꦏꦴꦫꦟꦨꦴꦮꦺꦤ ꦮꦸꦠ꧀ꦠꦤ꧀ꦠꦶ ꦮꦺꦢꦶꦠꦧ꧀ꦧꦁ. ꦄꦡ ꦮꦴ ꦠꦶꦟ꧀ꦟꦁ ꦆꦢ꧀ꦣꦶꦠꦴ ꦆꦢ꧀ꦣꦶꦥꦴꦢꦠꦴ ꦕ ꦮꦸꦠ꧀ꦠꦴ, ꦱꦺꦱꦴꦤꦚ꧀ꦕ ꦆꦢ꧀ꦣꦶꦥꦴꦢꦠꦴꦮ, ꦠꦁ ꦱꦧ꧀ꦧꦁ ꦱꦴꦣꦺꦠꦸꦁ ‘‘ꦆꦩꦺ ꦲꦶ ꦠꦪꦺꦴ…ꦥꦺ… ꦤ ꦮꦶꦤꦴ’’ꦠꦶ ꦄꦴꦲ. ꦠꦺꦤ ꦪꦱ꧀ꦩꦴ ꦆꦗ꧀ꦙꦤ꧀ꦠꦶ, ꦠꦱ꧀ꦩꦴ ꦆꦢ꧀ꦣꦶ. ꦆꦗ꧀ꦙꦩꦴꦤꦴ ꦕ ꦪꦱ꧀ꦩꦴ ꦱꦩ꧀ꦥꦪꦸꦠ꧀ꦠꦏꦺꦲꦶ ꦱꦲꦺꦮ ꦆꦗ꧀ꦙꦤ꧀ꦠꦶ, ꦤ ꦮꦶꦤꦴ, ꦠꦱ꧀ꦩꦴ ꦱꦩ꧀ꦥꦪꦸꦠ꧀ꦠꦏꦴ ꦆꦢ꧀ꦣꦶꦥꦴꦢꦴ, ꦠꦢꦤ꧀ꦠꦺꦴꦒꦣꦠ꧀ꦠꦴ ꦥꦤ ꦠꦺ ꦠꦪꦺꦴ ꦣꦩ꧀ꦩꦴ ꦆꦢ꧀ꦣꦶꦥꦴꦢꦴꦥꦶ ꦲꦺꦴꦤ꧀ꦠꦷꦠꦶ ꦢꦱ꧀ꦱꦺꦠꦶ. ꦱꦩ꧀ꦥꦪꦸꦠ꧀ꦠꦏꦴꦤꦩ꧀ꦥꦶ ꦥꦤ ꦑꦤ꧀ꦣꦴꦤꦁ ꦆꦢ꧀ꦣꦶꦨꦴꦮꦥꦫꦶꦪꦴꦪꦺꦴ ꦄꦠ꧀ꦡꦷꦠꦶ ꦢꦱ꧀ꦱꦺꦠꦸꦁ ‘‘ꦱꦩ꧀ꦥꦪꦸꦠ꧀ꦠꦏꦴ ꦥꦤꦴ’’ꦠꦶꦄꦴꦢꦶꦩꦴꦲ. ꦕꦠꦹꦱꦸ ꦑꦤ꧀ꦣꦺꦱꦸ ꦌꦏꦢꦺꦱꦱ꧀ꦱ ꦆꦢ꧀ꦣꦶꦠꦴ, ꦕꦠꦸꦤ꧀ꦤꦩ꧀ꦥꦶ ‘‘ꦆꦢ꧀ꦣꦶꦪꦴ ꦥꦴꦢꦺꦴ ꦆꦢ꧀ꦣꦶꦥꦴꦢꦺꦴ’’ꦠꦶ ꦆꦩꦶꦤꦴ ꦄꦠ꧀ꦡꦺꦤ ꦆꦢ꧀ꦣꦶꦥꦴꦢꦠꦴ, ꦥꦸꦤꦥꦶ ꦕꦠꦸꦤ꧀ꦤꦁ ꦑꦤ꧀ꦣꦴꦤꦁ ‘‘ꦆꦢ꧀ꦣꦶ ꦌꦮ ꦥꦴꦢꦺꦴ ꦆꦢ꧀ꦣꦶꦥꦴꦢꦺꦴ’’ꦠꦶ ꦆꦩꦶꦤꦴ ꦄꦠ꧀ꦡꦺꦤ ꦆꦢ꧀ꦣꦶꦥꦴꦢꦠꦴ ꦕ ꦢꦱ꧀ꦱꦶꦠꦴ, ꦤ ꦄꦚ꧀ꦚꦱ꧀ꦱꦴꦠꦶ ꦏꦠ꧀ꦮꦴ ꦄꦴꦲ ‘‘ꦤ ꦄꦚ꧀ꦚꦱ꧀ꦱ ꦏꦱ꧀ꦱꦕꦶ ꦄꦣꦶꦮꦕꦤ’’ꦤ꧀ꦠꦶ. ꦆꦩꦶꦤꦴ ‘‘ꦆꦢ꧀ꦣꦶ ꦤꦴꦩ ꦄꦤꦶꦥ꧀ꦦꦤ꧀ꦤꦴ’’ꦠꦶ ꦆꦢꦁ ꦮꦴꦢꦁ ꦥꦛꦶꦱꦺꦣꦺꦠꦶ.

ꦥꦛꦶꦭꦴꦨꦥꦸꦧ꧀ꦧꦨꦴꦒꦴꦤꦁ ꦥꦛꦶꦭꦴꦨꦱ꧀ꦱꦺꦮ ꦕ ꦆꦢ꧀ꦣꦶꦆꦢ꧀ꦣꦶꦥꦴꦢꦠꦴꦮꦕꦤꦁ ꦄꦥꦸꦧ꧀ꦧꦤ꧀ꦠꦶ ꦏꦠ꧀ꦮꦴ ꦥꦸꦕ꧀ꦖꦠꦶ ‘‘ꦏꦺꦤꦛ꧀ꦜꦺꦤ ꦆꦢ꧀ꦣꦶ, ꦏꦺꦤꦛ꧀ꦜꦺꦤ ꦥꦴꦢꦺꦴ’’ꦠꦶ. ꦥꦛꦶꦭꦴꦨꦺꦴ ꦥꦸꦧ꧀ꦧꦨꦴꦒꦺꦴ ꦕꦴꦠꦶ ꦮꦕꦤꦱꦺꦱꦺꦴ. ꦈꦥꦴꦪꦺꦴ ꦕ ꦈꦥꦴꦪꦨꦴꦮꦺꦤꦺꦮ ꦄꦠ꧀ꦠꦤꦺꦴ ꦦꦭꦱ꧀ꦱ ꦥꦠꦶꦛ꧀ꦜꦴ ꦲꦺꦴꦠꦷꦠꦶ ꦄꦴꦲ ‘‘ꦥꦠꦶꦛ꧀ꦜꦴꦤꦛ꧀ꦜꦺꦤꦺꦮ ꦥꦴꦢꦺꦴ’’ꦠꦶ. ꦖꦤ꧀ꦢꦺꦴꦪꦺꦮ…ꦥꦺ… ꦮꦷꦩꦁꦱꦴꦮ ꦮꦷꦩꦁꦱꦶꦢ꧀ꦣꦶꦥꦴꦢꦺꦴꦠꦶ ꦏꦡꦶꦠꦁ, ꦠꦱ꧀ꦩꦴ ꦤ ꦕꦠ꧀ꦠꦴꦫꦺꦴ ꦑꦤ꧀ꦣꦴ ꦆꦢ꧀ꦣꦶꦪꦴ ꦱꦩꦴꦤꦏꦴꦭꦶꦏꦴ ꦤꦴꦤꦴꦏ꧀ꦑꦟꦶꦏꦴ ꦮꦴ ꦆꦢ꧀ꦣꦶꦥꦴꦢꦴ, ꦗꦺꦛ꧀ꦜꦏꦨꦹꦠꦴ ꦥꦤ ꦖꦤ꧀ꦢꦴꦢꦪꦺꦴ ꦌꦮ ꦱꦧ꧀ꦧꦠ꧀ꦡ ꦆꦢ꧀ꦣꦶꦥꦴꦢꦴꦠꦶ ꦄꦪꦩꦺꦮ ꦠꦺꦱꦁ ꦄꦛ꧀ꦜꦏꦡꦴꦕꦫꦶꦪꦴꦤꦁ ꦄꦣꦶꦥ꧀ꦥꦴꦪꦺꦴ. ꦱꦸꦠ꧀ꦠꦤ꧀ꦠꦨꦴꦗꦤꦷꦪꦺ ꦲꦶ ꦄꦨꦶꦣꦩ꧀ꦩꦨꦴꦗꦤꦷꦪꦺ ꦕ ꦱꦩꦴꦣꦶꦮꦶꦱꦺꦱꦤꦮꦱꦺꦤ ꦢꦱ꧀ꦱꦶꦠꦴꦤꦁ ꦈꦥꦴꦪꦨꦹꦠꦴꦤꦁ ꦆꦢ꧀ꦣꦶꦥꦴꦢꦴꦤꦁ ꦥꦴꦏꦛꦏꦫꦟꦠ꧀ꦡꦁ ꦈꦠ꧀ꦠꦫꦕꦹꦭ꦳ꦨꦴꦗꦤꦷꦪꦁ ꦮꦸꦠ꧀ꦠꦤ꧀ꦠꦶ. ꦏꦺꦕꦷꦠꦶ ꦈꦠ꧀ꦠꦫꦮꦶꦲꦴꦫꦮꦴꦱꦶꦡꦺꦫꦴ ꦏꦶꦫ.

ꦱꦸꦠ꧀ꦠꦤ꧀ꦠꦨꦴꦗꦤꦷꦪꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧒. ꦄꦨꦶꦣꦩ꧀ꦩꦨꦴꦗꦤꦷꦪꦮꦟ꧀ꦟꦤꦴ

꧔꧔꧔. ꦄꦨꦶꦣꦩ꧀ꦩꦨꦴꦗꦤꦷꦪꦺ ‘‘ꦆꦢ꧀ꦣꦶꦥꦴꦢꦺꦴꦠꦶ ꦠꦡꦴꦨꦹꦠꦱ꧀ꦱ ꦦꦱ꧀ꦱꦺꦴ…ꦥꦺ… ꦥꦒ꧀ꦒꦴꦲꦺꦴ ꦄꦮꦶꦏ꧀ꦑꦺꦥꦺꦴ’’ꦠꦶ (ꦮꦶꦨ. ꧔꧔꧗) ꦆꦢ꧀ꦣꦶꦆꦢ꧀ꦣꦶꦥꦴꦢꦠ꧀ꦡꦢꦱ꧀ꦱꦤꦠ꧀ꦡꦁ ꦥꦒ꧀ꦒꦴꦲꦴꦮꦶꦏ꧀ꦑꦺꦥꦴ ꦮꦸꦠ꧀ꦠꦴ, ꦕꦶꦠ꧀ꦠꦥꦚ꧀ꦚꦴ ꦕ ꦱꦔ꧀ꦑꦶꦥꦶꦠ꧀ꦮꦴꦠꦶ. ꦕꦠ꧀ꦠꦴꦫꦶ ꦤꦪꦱꦲꦱ꧀ꦱꦴꦤꦶ ꦮꦶꦨꦠ꧀ꦠꦴꦤꦷꦠꦶ ꦆꦢꦁ ꦱꦴꦣꦶꦥꦠꦶꦮꦴꦫꦴꦤꦁ ꦥꦫꦶꦥꦸꦟ꧀ꦟꦴꦤꦁ ꦄꦨꦴꦮꦴ ꦮꦶꦕꦴꦫꦺꦠꦧ꧀ꦧꦁ. ꦤ ꦲꦶ ꦄꦣꦶꦥꦠꦷꦤꦁ ꦄꦣꦶꦥꦠꦪꦺꦴ ꦮꦶꦗ꧀ꦗꦤ꧀ꦠꦶ, ꦌꦏꦺꦏꦱ꧀ꦩꦶꦁ ꦥꦤ ꦆꦢ꧀ꦣꦶꦥꦴꦢꦤꦶꦢ꧀ꦢꦺꦱꦺ ꦌꦏꦺꦏꦺꦴ ꦄꦣꦶꦥꦠꦶꦮꦴꦫꦺꦴ ꦭꦧ꧀ꦨꦠꦷꦠꦶ ꦱꦺꦴꦭ꦳ꦱ ꦱꦺꦴꦭ꦳ꦱ ꦤꦪꦱꦠꦴꦤꦶ ꦭꦧ꧀ꦨꦤ꧀ꦠꦶ.

ꦄꦨꦶꦣꦩ꧀ꦩꦨꦴꦗꦤꦷꦪꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧓. ꦥꦚ꧀ꦲꦥꦸꦕ꧀ꦖꦏꦮꦟ꧀ꦟꦤꦴ

ꦤꦤꦸ ꦕ ꦕꦠ꧀ꦠꦴꦫꦺꦴꦥꦶ ꦄꦣꦶꦥꦠꦪꦺꦴ ꦌꦏꦏ꧀ꦑꦟꦺ ꦭꦧ꧀ꦨꦤ꧀ꦠꦶ, ꦄꦚ꧀ꦚꦩꦚ꧀ꦚꦱ꧀ꦱ ꦥꦤ ꦄꦣꦶꦥꦠꦪꦺꦴ ꦤ ꦨꦮꦤ꧀ꦠꦶ ‘‘ꦕꦠ꧀ꦠꦴꦫꦺꦴ ꦆꦢ꧀ꦣꦶꦥꦴꦢꦴ ꦤ ꦩꦒ꧀ꦒꦴꦣꦶꦥꦠꦶꦤꦺꦴ’’ꦠꦶ ꦮꦸꦠ꧀ꦠꦠ꧀ꦠꦴ. ꦫꦴꦗꦥꦸꦠ꧀ꦠꦺꦴꦥꦩꦴꦥꦶ ꦲꦶ ꦌꦠꦩꦠ꧀ꦡꦁ ꦢꦷꦥꦺꦠꦷꦠꦶ? ꦤ, ꦌꦏꦏ꧀ꦑꦟꦺ ꦢꦸꦠꦶꦪꦱ꧀ꦱ ꦄꦣꦶꦥꦠꦶꦤꦺꦴ ꦄꦨꦴꦮꦠꦺꦴ ꦌꦮ, ‘‘ꦤ ꦩꦒ꧀ꦒꦴꦣꦶꦥꦠꦶꦤꦺꦴ’’ꦠꦶ ꦮꦸꦠ꧀ꦠꦠ꧀ꦠꦴ ꦫꦴꦗꦥꦸꦠ꧀ꦠꦺꦴꦥꦩꦴ ꦄꦣꦶꦥꦠꦶꦁ ꦤ ꦏꦫꦺꦴꦤ꧀ꦠꦷꦠꦶ ꦆꦩꦩꦺꦮꦠ꧀ꦡꦁ ꦢꦷꦥꦺꦠꦶ, ꦤ ꦄꦣꦶꦥꦠꦷꦤꦁ ꦱꦲꦨꦴꦮꦁ. ꦠꦁ ꦏꦡꦁ ꦗꦴꦤꦶꦠꦧ꧀ꦧꦤ꧀ꦠꦶ? ꦥꦛꦶꦏ꧀ꦑꦶꦠ꧀ꦠꦠ꧀ꦠꦴ. ꦄꦣꦶꦥꦠꦶꦥꦕ꧀ꦕꦪꦤꦶꦢ꧀ꦢꦺꦱꦺ ꦲꦶ ꦄꦛ꧀ꦜꦏꦡꦴꦪꦁ (ꦥꦛ꧀ꦜꦴ. ꦄꦛ꧀ꦜ. ꧑.꧓) ꦮꦸꦠ꧀ꦠꦴ ‘‘ꦏꦱ꧀ꦩꦴ ꦥꦤ ꦪꦡꦴ ꦲꦺꦠꦸꦥꦕ꧀ꦕꦪꦤꦶꦢ꧀ꦢꦺꦱꦺ ‘ꦲꦺꦠꦹ ꦲꦺꦠꦸꦱꦩ꧀ꦥꦪꦸꦠ꧀ꦠꦏꦴꦤ’ꦤ꧀ꦠꦶ ꦮꦸꦠ꧀ꦠꦁ, ꦌꦮꦩꦶꦣ ‘ꦄꦣꦶꦥꦠꦷ ꦄꦣꦶꦥꦠꦶꦱꦩ꧀ꦥꦪꦸꦠ꧀ꦠꦏꦴꦤ’ꦤ꧀ꦠꦶ ꦄꦮꦠ꧀ꦮꦴ ‘ꦖꦤ꧀ꦢꦴꦣꦶꦥꦠꦶ ꦖꦤ꧀ꦢꦱꦩ꧀ꦥꦪꦸꦠ꧀ꦠꦏꦴꦤ’ꦤ꧀ꦠꦶꦄꦴꦢꦶꦤꦴ ꦤꦪꦺꦤ ꦢꦺꦱꦤꦴ ꦏꦠꦴꦠꦶ? ꦌꦏꦏ꧀ꦑꦟꦺ ꦄꦨꦴꦮꦠꦺꦴ’’ꦠꦶ. ꦱꦠꦶ ꦕ ꦕꦠꦸꦤ꧀ꦤꦁ ꦄꦣꦶꦥꦠꦷꦤꦁ ꦱꦲꦨꦴꦮꦺ ‘‘ꦄꦫꦶꦪꦩꦒ꧀ꦒꦱꦩꦔ꧀ꦒꦶꦱ꧀ꦱ ꦮꦷꦩꦁꦱꦴꦣꦶꦥꦠꦺꦪ꧀ꦪꦁ ꦩꦒ꧀ꦒꦁ ꦨꦴꦮꦺꦤ꧀ꦠꦱ꧀ꦱꦴ’’ꦠꦶ ꦮꦶꦱꦺꦱꦤꦁ ꦤ ꦏꦠ꧀ꦠꦧ꧀ꦧꦁ ꦱꦶꦪꦴ ꦄꦮꦷꦩꦁꦱꦴꦣꦶꦥꦠꦶꦏꦱ꧀ꦱ ꦩꦒ꧀ꦒꦱ꧀ꦱ ꦄꦨꦴꦮꦴ. ꦖꦤ꧀ꦢꦴꦢꦷꦤꦁ ꦄꦚ꧀ꦚꦩꦚ꧀ꦚꦴꦣꦶꦥꦠꦶꦏꦫꦟꦨꦴꦮꦺ ꦕ ‘‘ꦮꦷꦩꦁꦱꦁ ꦜꦥꦺꦠ꧀ꦮꦴ ꦠꦁꦱꦩ꧀ꦥꦪꦸꦠ꧀ꦠꦺꦴ’’ꦠꦶꦄꦴꦢꦶꦤꦴ ꦖꦤ꧀ꦢꦴꦢꦷꦤꦁ ꦮꦷꦩꦁꦱꦴꦣꦶꦥꦠꦶꦏꦠ꧀ꦠꦮꦕꦤꦁ ꦤ ꦮꦠ꧀ꦠꦧ꧀ꦧꦁ ꦱꦶꦪꦴ. ꦠꦡꦴ ‘‘ꦕꦠ꧀ꦠꦴꦫꦺꦴ ꦄꦫꦶꦪꦩꦒ꧀ꦒꦴ ꦱꦶꦪꦴ ꦩꦒ꧀ꦒꦴꦣꦶꦥꦠꦶꦤꦺꦴ, ꦱꦶꦪꦴ ꦤ ꦮꦠ꧀ꦠꦧ꧀ꦧꦴ ꦩꦒ꧀ꦒꦴꦣꦶꦥꦠꦶꦤꦺꦴ’’ꦠꦶ (ꦣ. ꦱ. ꧑꧔꧒꧙) ꦌꦮꦩꦴꦢꦷꦲꦶꦥꦶ ꦄꦣꦶꦥꦠꦷꦤꦁ ꦱꦲꦨꦴꦮꦺꦴ ꦥꦛꦶꦏ꧀ꦑꦶꦠ꧀ꦠꦺꦴ ꦌꦮꦴꦠꦶ.

ꦥꦚ꧀ꦲꦥꦸꦕ꧀ꦖꦏꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦆꦢ꧀ꦣꦶꦥꦴꦢꦮꦶꦨꦔ꧀ꦒꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.