꧔. ꦩꦒ꧀ꦒꦱꦕ꧀ꦕꦤꦶꦢ꧀ꦢꦺꦱꦮꦟ꧀ꦟꦤꦴ

꧒꧐꧕. ꦄꦚ꧀ꦚꦩꦒ꧀ꦒꦥꦛꦶꦏ꧀ꦑꦺꦥꦤꦠ꧀ꦡꦤ꧀ꦠꦶ ꦠꦶꦠ꧀ꦡꦶꦪꦺꦲꦶ ꦏꦥ꧀ꦥꦶꦠꦱ꧀ꦱ ꦩꦒ꧀ꦒꦱ꧀ꦱ ꦢꦸꦏ꧀ꦑꦤꦶꦫꦺꦴꦣꦒꦴꦩꦶꦤꦶꦥꦛꦶꦥꦢꦴꦨꦴꦮꦁ ꦥꦛꦶꦏ꧀ꦑꦺꦥꦺꦠꦸꦤ꧀ꦠꦶ ꦄꦠ꧀ꦡꦺꦴ, ꦄꦚ꧀ꦚꦱ꧀ꦱ ꦮꦴ ꦩꦒ꧀ꦒꦨꦴꦮꦥꦛꦶꦏ꧀ꦑꦺꦥꦺꦴ ꦄꦚ꧀ꦚꦩꦒ꧀ꦒꦥꦛꦶꦏ꧀ꦑꦺꦥꦺꦴ. ꦥꦸꦒ꧀ꦒꦭꦱ꧀ꦱ ꦄꦫꦶꦪꦨꦴꦮꦏꦫꦠ꧀ꦠꦴ ꦄꦫꦶꦪꦁ ꦏꦫꦺꦴꦠꦷꦠꦶ ꦄꦫꦶꦪꦺꦴ, ꦄꦫꦶꦪꦦꦭꦥꦛꦶꦭꦴꦨꦏꦫꦠ꧀ꦠꦴ ꦄꦫꦶꦪꦁ ꦭꦨꦴꦥꦺꦠꦶ ꦗꦤꦺꦠꦷꦠꦶ ꦄꦫꦶꦪꦺꦴ. ꦄꦠ꧀ꦠꦤꦺꦴ ꦏꦶꦕ꧀ꦕꦮꦱꦺꦤ ꦦꦭꦮꦱꦺꦤ ꦕ ꦄꦫꦶꦪꦤꦴꦩꦭꦴꦨꦺꦴ ꦌꦮ ꦮꦸꦠ꧀ꦠꦺꦴꦠꦶ ꦢꦛ꧀ꦜꦧ꧀ꦧꦺꦴ. ꦄꦛ꧀ꦜ ꦄꦔ꧀ꦒꦴꦤꦶ ꦄꦱ꧀ꦱꦴꦠꦶ ꦄꦚ꧀ꦚꦥꦢꦠ꧀ꦡꦱꦩꦴꦱꦁ ꦄꦏꦠ꧀ꦮꦴ ‘‘ꦄꦛ꧀ꦜꦔ꧀ꦒꦴꦤꦶ ꦄꦱ꧀ꦱ ꦱꦤ꧀ꦠꦷꦠꦶ ꦄꦛ꧀ꦜꦔ꧀ꦒꦶꦏꦺꦴ’’ꦠꦶ ꦥꦢꦱꦶꦢ꧀ꦣꦶ ꦢꦛ꧀ꦜꦧ꧀ꦧꦴ.

ꦕꦠꦸꦫꦔ꧀ꦒꦱꦩꦤ꧀ꦤꦴꦒꦠꦴ ꦮꦴꦕꦴ ꦗꦤꦁ ꦱꦔ꧀ꦒꦟ꧀ꦲꦴꦠꦷꦠꦶ ꦠꦧ꧀ꦧꦶꦥꦏ꧀ꦑꦮꦶꦫꦠꦶꦱꦨꦴꦮꦴ ꦱꦩ꧀ꦩꦴꦮꦴꦕꦴ ꦨꦺꦢꦏꦫꦩꦶꦕ꧀ꦖꦴꦮꦴꦕꦴꦥꦲꦴꦤꦺꦤ ꦗꦤꦺ ꦱꦩ꧀ꦥꦪꦸꦠ꧀ꦠꦺ ꦕ ꦥꦫꦶꦒ꧀ꦒꦟ꧀ꦲꦤꦏꦶꦕ꧀ꦕꦮꦠꦷ ꦲꦺꦴꦠꦷꦠꦶ ‘‘ꦥꦫꦶꦒ꧀ꦒꦲꦭꦏ꧀ꦑꦟꦴ’’ꦠꦶ ꦮꦸꦠ꧀ꦠꦴ. ꦪꦡꦴ ꦕꦷꦮꦫꦏꦩ꧀ꦩꦴꦢꦶꦏꦺꦴ ꦏꦩ꧀ꦩꦤ꧀ꦠꦺꦴ ꦌꦏꦁ ꦏꦴꦠꦧ꧀ꦧꦁ ꦱꦩꦸꦛ꧀ꦜꦴꦥꦺꦠꦶ ꦤꦶꦥ꧀ꦦꦴꦢꦺꦠꦶ, ꦠꦁꦠꦁꦏꦶꦫꦶꦪꦴꦤꦶꦥ꧀ꦦꦴꦢꦏꦺꦴ ꦮꦴ ꦕꦺꦠꦤꦴꦱꦔ꧀ꦑꦴꦠꦺꦴ ꦏꦩ꧀ꦩꦤ꧀ꦠꦺꦴ ꦲꦠ꧀ꦡꦥꦴꦢꦕꦭꦤꦴꦢꦶꦏꦁ ꦏꦶꦫꦶꦪꦁ ꦱꦩꦸꦛ꧀ꦜꦴꦥꦺꦠꦶ, ꦌꦮꦁ ꦱꦴꦮꦗ꧀ꦗꦏꦠ꧀ꦠꦧ꧀ꦧꦏꦶꦫꦶꦪꦴꦱꦩꦸꦛ꧀ꦜꦴꦥꦏꦩꦶꦕ꧀ꦖꦴꦏꦩ꧀ꦩꦤ꧀ꦠꦥ꧀ꦥꦲꦴꦤꦺꦤ ꦱꦩ꧀ꦩꦴꦏꦩ꧀ꦩꦤ꧀ꦠꦺꦴ ꦤꦶꦫꦮꦗ꧀ꦗꦱꦩꦸꦛ꧀ꦜꦴꦥꦤꦏꦶꦕ꧀ꦕꦮꦴ ꦲꦺꦴꦠꦶ, ꦱꦩ꧀ꦥꦪꦸꦠ꧀ꦠꦣꦩ꧀ꦩꦺ ꦕ ꦱꦩꦸꦛ꧀ꦜꦴꦥꦺꦤ꧀ꦠꦺꦴ ꦌꦮ ꦥꦮꦠ꧀ꦠꦠꦷꦠꦶ ‘‘ꦱꦩꦸꦛ꧀ꦜꦴꦥꦤꦭꦏ꧀ꦑꦟꦺꦴ’’ꦠꦶ ꦮꦸꦠ꧀ꦠꦺꦴ. ꦏꦴꦪꦮꦴꦕꦴꦤꦁ ꦑꦤ꧀ꦣꦱꦤ꧀ꦠꦴꦤꦱ꧀ꦱ ꦕ ꦱꦁꦏꦶꦭꦺꦱꦨꦹꦠꦩꦶꦕ꧀ꦖꦴꦄꦴꦗꦷꦮꦥ꧀ꦥꦲꦴꦤꦺꦤ ꦱꦩ꧀ꦩꦴꦄꦴꦗꦷꦮꦺꦴ ‘‘ꦮꦺꦴꦢꦴꦥꦤꦭꦏ꧀ꦑꦟꦺꦴ’’ꦠꦶ ꦮꦸꦠ꧀ꦠꦺꦴ.

ꦄꦠ꧀ꦠꦤꦺꦴ ꦥꦕ꧀ꦕꦤꦷꦏꦏꦶꦭꦺꦱꦴ ꦢꦶꦛ꧀ꦜꦺꦏꦛ꧀ꦜꦴ ꦄꦮꦶꦗ꧀ꦗꦴꦢꦪꦺꦴ. ꦥꦱ꧀ꦱꦠꦷꦠꦶ ꦥꦏꦴꦱꦺꦠꦷꦠꦶ ꦄꦠ꧀ꦡꦺꦴ. ꦠꦺꦤꦺꦮ ꦲꦶ ꦄꦔ꧀ꦒꦺꦤ ꦠꦠ꧀ꦡ ꦥꦕ꧀ꦕꦮꦺꦏ꧀ꦑꦟꦴ ꦥꦮꦠ꧀ꦠꦠꦷꦠꦶ. ꦠꦡꦺꦮꦴꦠꦶ ꦄꦠ꧀ꦠꦤꦺꦴ ꦥꦕ꧀ꦕꦤꦷꦏꦏꦶꦭꦺꦱꦺꦲꦶ ꦱꦢ꧀ꦣꦶꦤ꧀ꦠꦶ ꦄꦠ꧀ꦡꦺꦴ.

ꦏꦶꦕ꧀ꦕꦠꦺꦴꦠꦶ ꦥꦸꦧ꧀ꦧꦨꦴꦒꦺꦲꦶ ꦢꦸꦏ꧀ꦑꦴꦢꦶꦚꦴꦟꦺꦲꦶ ꦏꦠ꧀ꦠꦧ꧀ꦧꦏꦶꦕ꧀ꦕꦱ꧀ꦱ ꦆꦣ ꦤꦶꦥ꧀ꦦꦠ꧀ꦠꦶꦠꦺꦴ, ꦆꦩꦱ꧀ꦱꦺꦮ ꦮꦴ ꦚꦴꦟꦱ꧀ꦱ ꦢꦸꦏ꧀ꦑꦴꦢꦶꦥ꧀ꦥꦏꦴꦱꦤꦏꦶꦕ꧀ꦕꦠꦺꦴ. ꦠꦷꦟꦶ ꦤꦴꦩꦴꦤꦶ ꦭꦨꦠꦶ ꦏꦴꦩꦱꦔ꧀ꦏꦥ꧀ꦥꦴꦢꦶꦥ꧀ꦥꦲꦴꦤꦏꦶꦕ꧀ꦕꦤꦶꦥ꧀ꦦꦠ꧀ꦠꦶꦠꦺꦴ. ꦱꦶꦏ꧀ꦑꦴꦥꦢꦮꦶꦨꦔ꧀ꦒꦺ (ꦮꦶꦨ. ꧗꧐꧓ ꦄꦴꦢꦪꦺꦴ) ‘‘ꦮꦶꦫꦠꦶꦕꦺꦠꦤꦴ ꦱꦧ꧀ꦧꦺ ꦱꦩ꧀ꦥꦪꦸꦠ꧀ꦠꦣꦩ꧀ꦩꦴ ꦕ ꦱꦶꦏ꧀ꦑꦴꦥꦢꦴꦤꦷ’’ꦠꦶ ꦮꦸꦠ꧀ꦠꦴꦠꦶ ꦠꦠ꧀ꦡ ꦥꦣꦴꦤꦴꦤꦁ ꦮꦶꦫꦠꦶꦕꦺꦠꦤꦴꦤꦁ ꦮꦱꦺꦤ ‘‘ꦮꦶꦫꦠꦶꦪꦺꦴꦥꦶ ꦲꦺꦴꦤ꧀ꦠꦶ ꦕꦺꦠꦤꦴꦪꦺꦴꦥꦷ’’ꦠꦶ ꦄꦴꦲ. ꦩꦸꦱꦴꦮꦴꦢꦴꦢꦷꦲꦶ ꦮꦶꦫꦩꦟꦏꦴꦭꦺ ꦮꦴ ꦮꦶꦫꦠꦶꦪꦺꦴ ꦱꦸꦨꦴꦱꦶꦠꦴꦢꦶꦮꦴꦕꦴꦨꦴꦱꦤꦴꦢꦶꦏꦴꦭꦺ ꦕ ꦕꦺꦠꦤꦴꦪꦺꦴ ꦪꦺꦴꦗꦺꦠꦧ꧀ꦧꦴ, ꦩꦒ꧀ꦒꦏ꧀ꦑꦟꦺ ꦮꦶꦫꦠꦶꦪꦺꦴꦮ ꦕꦺꦠꦤꦴꦤꦁ ꦄꦩꦒ꧀ꦒꦔ꧀ꦒꦠ꧀ꦠꦴ ꦌꦏꦱ꧀ꦱ ꦚꦴꦟꦱ꧀ꦱ ꦢꦸꦏ꧀ꦑꦴꦢꦶꦚꦴꦟꦠꦴ ꦮꦶꦪ ꦌꦏꦴꦪ ꦮꦶꦫꦠꦶꦪꦴ ꦩꦸꦱꦴꦮꦴꦢꦴꦢꦶꦮꦶꦫꦠꦶꦨꦴꦮꦺꦴ ꦮꦶꦪ ꦕ ꦌꦏꦴꦪ ꦕꦺꦠꦤꦴꦪ ꦱꦩ꧀ꦩꦴꦮꦴꦕꦴꦢꦶꦏꦶꦕ꧀ꦕꦠ꧀ꦠꦪꦱꦴꦣꦤꦱꦨꦴꦮꦴꦨꦴꦮꦴ ꦱꦩ꧀ꦩꦴꦮꦴꦕꦴꦢꦶꦨꦴꦮꦴꦱꦶꦢ꧀ꦣꦶꦠꦺꦴ, ꦠꦁꦱꦶꦢ꧀ꦣꦶꦪꦚ꧀ꦕ ꦄꦔ꧀ꦒꦠ꧀ꦠꦪꦠ꧀ꦠꦴꦱꦶꦢ꧀ꦣꦶꦠꦺꦴ ꦕ.

ꦥꦸꦧ꧀ꦧꦨꦴꦒꦺꦥꦶ ꦩꦒ꧀ꦒꦏ꧀ꦑꦟꦺꦥꦶ ꦱꦩ꧀ꦩꦴꦱꦩꦴꦣꦶ ꦌꦮꦴꦠꦶ ꦪꦢꦶꦥꦶ ꦱꦩꦴꦣꦶꦈꦥꦏꦴꦫꦏꦴꦤꦁ ꦄꦨꦶꦤꦶꦫꦺꦴꦥꦤꦴꦤꦸꦩꦗ꧀ꦗꦤꦱꦩ꧀ꦥꦶꦪꦴꦪꦤꦧ꧀ꦫꦹꦲꦤꦱꦤ꧀ꦠꦱꦸꦑꦴꦤꦁ ꦮꦶꦠꦏ꧀ꦏꦴꦢꦷꦤꦁ ꦮꦱꦺꦤ ꦕꦠꦹꦲꦶ ꦙꦴꦤꦺꦲꦶ ꦱꦩ꧀ꦩꦴꦱꦩꦴꦣꦶ ꦮꦶꦨꦠ꧀ꦠꦺꦴ, ꦠꦡꦴꦥꦶ ꦮꦴꦪꦴꦩꦺꦴ ꦮꦶꦪ ꦄꦤꦸꦥ꧀ꦥꦤ꧀ꦤꦴꦏꦸꦱꦭꦴꦤꦸꦥ꧀ꦥꦴꦢꦤꦴꦢꦶꦕꦠꦸꦮꦴꦪꦴꦩꦏꦶꦕ꧀ꦕꦁ, ꦱꦠꦶ ꦮꦶꦪ ꦕ ꦄꦱꦸꦨꦴꦱꦸꦑꦴꦤꦶꦕ꧀ꦕꦴꦤꦠ꧀ꦠꦺꦱꦸ ꦏꦴꦪꦴꦢꦷꦱꦸ ꦱꦸꦨꦴꦢꦶꦱꦚ꧀ꦚꦴꦥꦲꦴꦤꦕꦠꦸꦱꦠꦶꦏꦶꦕ꧀ꦕꦁ, ꦌꦏꦺꦴ ꦱꦩꦴꦣꦶ ꦕꦠꦸꦏ꧀ꦏꦗ꧀ꦙꦴꦤꦱꦩꦴꦣꦶꦏꦶꦕ꧀ꦕꦁ ꦤ ꦱꦴꦣꦺꦠꦷꦠꦶ ꦥꦸꦧ꧀ꦧꦨꦴꦒꦺꦥꦶ ꦥꦜꦩꦗ꧀ꦙꦴꦤꦱꦩꦴꦣꦶꦕꦶꦠ꧀ꦠꦺ ꦙꦴꦤꦱꦩꦴꦣꦶ ꦥꦜꦩꦗ꧀ꦙꦴꦤꦱꦩꦴꦣꦶ ꦌꦮ ꦩꦒ꧀ꦒꦏ꧀ꦑꦟꦺꦥꦶ, ꦠꦡꦴ ꦥꦸꦧ꧀ꦧꦨꦴꦒꦺꦥꦶ ꦕꦠꦸꦠ꧀ꦡꦗ꧀ꦙꦴꦤꦱꦩꦴꦣꦶꦕꦶꦠ꧀ꦠꦺ ꦙꦴꦤꦱꦩꦴꦣꦶ ꦕꦠꦸꦠ꧀ꦡꦗ꧀ꦙꦴꦤꦱꦩꦴꦣꦶ ꦌꦮ ꦩꦒ꧀ꦒꦏ꧀ꦑꦟꦺꦥꦷꦠꦶ ꦄꦠ꧀ꦡꦺꦴ.

ꦮꦕꦷꦨꦺꦢꦱ꧀ꦱ ꦈꦥꦏꦴꦫꦏꦺꦴ ꦮꦶꦠꦏ꧀ꦏꦺꦴ ꦱꦴꦮꦗ꧀ꦗꦴꦤꦮꦗ꧀ꦗꦮꦕꦷꦨꦺꦢꦤꦶꦮꦠ꧀ꦠꦤꦥꦮꦠ꧀ꦠꦤꦏꦫꦴꦪ ꦱꦩ꧀ꦩꦴꦮꦴꦕꦴꦪꦥꦶ ꦈꦥꦏꦴꦫꦏꦺꦴ ꦌꦮꦴꦠꦶ ‘‘ꦱ꧀ꦮꦴꦪ’’ꦤ꧀ꦠꦶꦄꦴꦢꦶꦩꦴꦲ. ꦮꦕꦷꦨꦺꦢꦤꦶꦪꦴꦩꦶꦏꦴ ꦮꦴꦕꦴ ꦏꦴꦪꦶꦏꦏꦶꦫꦶꦪꦴꦤꦶꦪꦴꦩꦏꦱ꧀ꦱ ꦱꦩ꧀ꦩꦴꦏꦩ꧀ꦩꦤ꧀ꦠꦱ꧀ꦱ ꦈꦥꦏꦴꦫꦶꦏꦴ. ꦆꦢꦁ ꦮꦷꦫꦶꦪꦤ꧀ꦠꦶ ꦕꦠꦸꦱꦩ꧀ꦩꦥ꧀ꦥꦣꦴꦤꦮꦷꦫꦶꦪꦁ. ꦒꦠꦶꦪꦺꦴꦠꦶ ꦤꦶꦥ꧀ꦦꦠ꧀ꦠꦶꦪꦺꦴ, ꦏꦶꦕ꧀ꦕꦴꦢꦶꦱꦨꦴꦮꦺ ꦮꦴ. ꦱꦩꦤ꧀ꦮꦺꦱꦶꦠ꧀ꦮꦴꦠꦶ ꦈꦥꦣꦴꦫꦺꦠ꧀ꦮꦴ.

ꦥꦸꦫꦶꦩꦴꦤꦶ ꦢ꧀ꦮꦺ ꦱꦕ꧀ꦕꦴꦤꦶ ꦈꦒ꧀ꦒꦟ꧀ꦲꦶꦠ꧀ꦮꦴꦠꦶ ꦱꦩ꧀ꦧꦤ꧀ꦣꦺꦴ. ꦆꦛ꧀ꦜꦁ ꦏꦤ꧀ꦠꦤ꧀ꦠꦶ ꦤꦶꦫꦺꦴꦣꦩꦒ꧀ꦒꦺꦱꦸ ꦤꦶꦤ꧀ꦤꦨꦴꦮꦁ ꦢꦱ꧀ꦱꦺꦠꦶ, ꦤ ꦄꦨꦶꦤꦤ꧀ꦢꦤꦁ, ꦠꦤ꧀ꦤꦶꦤ꧀ꦤꦨꦴꦮꦺꦴꦪꦺꦮ ꦕ ꦠꦠ꧀ꦡ ꦏꦩ꧀ꦩꦏꦫꦟꦁ ꦢꦛ꧀ꦜꦧ꧀ꦧꦁ.

ꦏꦶꦕ꧀ꦕꦠꦺꦴꦠꦶ ꦥꦫꦶꦚ꧀ꦚꦴꦢꦶꦠꦺꦴ. ꦄꦴꦫꦩ꧀ꦩꦟꦥꦛꦶꦮꦺꦣꦺꦴꦠꦶ ꦱꦕ꧀ꦖꦶꦏꦶꦫꦶꦪꦴꦥꦛꦶꦮꦺꦣꦩꦴꦲ. ꦱꦧ꧀ꦧꦩ꧀ꦥꦶ ꦥꦛꦶꦮꦺꦣꦚꦴꦟꦁ ꦭꦺꦴꦏꦸꦠ꧀ꦠꦫꦤ꧀ꦠꦶ ꦏꦱ꧀ꦩꦴ ꦮꦸꦠ꧀ꦠꦁ, ꦤꦤꦸ ꦈꦒ꧀ꦒꦲꦴꦢꦶꦥꦛꦶꦮꦺꦣꦺꦴ ꦕ ꦥꦛꦶꦮꦺꦣꦺꦴꦮ, ꦤ ꦕ ꦱꦺꦴ ꦭꦺꦴꦏꦸꦠ꧀ꦠꦫꦺꦴꦠꦶ? ꦤ, ꦏꦺꦮꦭꦺꦤ ꦥꦛꦶꦮꦺꦣ-ꦱꦢ꧀ꦢꦺꦤ ꦈꦒ꧀ꦒꦲꦴꦢꦶꦥꦛꦶꦮꦺꦣꦴꦤꦁ ꦄꦮꦕꦤꦷꦪꦠ꧀ꦠꦴ, ꦥꦛꦶꦮꦺꦣꦤꦶꦩꦶꦠ꧀ꦠꦠ꧀ꦠꦴ ꦮꦴ ꦈꦒ꧀ꦒꦲꦴꦢꦶꦮꦱꦺꦤ ꦥꦮꦠ꧀ꦠꦁ ꦢꦸꦏ꧀ꦑꦴꦢꦷꦱꦸ ꦥꦸꦧ꧀ꦧꦨꦴꦒꦺ ꦚꦴꦟꦁ ‘‘ꦥꦛꦶꦮꦺꦣꦺꦴ’’ꦠꦶ ꦮꦸꦠ꧀ꦠꦁ, ꦤ ꦥꦛꦶꦮꦺꦣꦠ꧀ꦠꦴ, ꦥꦛꦶꦮꦺꦣꦨꦹꦠꦩꦺꦮ ꦥꦤ ꦚꦴꦟꦁ ꦱꦤ꧀ꦣꦴꦪꦴꦲ ‘‘ꦱꦧ꧀ꦧꦩ꧀ꦥꦶ ꦥꦛꦶꦮꦺꦣꦚꦴꦟꦁ ꦭꦺꦴꦏꦸꦠ꧀ꦠꦫ’’ꦤ꧀ꦠꦶ. ꦈꦒ꧀ꦒꦲꦥꦫꦶꦥꦸꦕ꧀ꦖꦴꦚꦴꦟꦴꦤꦶꦥꦶ ꦱꦮꦤꦚꦴꦟꦺ ꦌꦮ ꦄꦮꦫꦺꦴꦣꦁ ꦒꦕ꧀ꦖꦤ꧀ꦠꦷꦠꦶ ‘‘ꦱꦮꦤꦣꦴꦫꦟꦱꦩ꧀ꦩꦱꦤꦚꦴꦟꦁ ꦭꦺꦴꦏꦶꦪ’’ꦤ꧀ꦠꦶ ꦠꦶꦮꦶꦣꦩꦺꦮ ꦚꦴꦟꦩꦴꦲ. ꦈꦒ꧀ꦒꦲꦴꦢꦷꦲꦶ ꦱꦕ꧀ꦕꦥꦫꦶꦒ꧀ꦒꦟ꧀ꦲꦤꦁ ꦥꦫꦶꦒ꧀ꦒꦲꦺꦴ.

ꦥꦪꦺꦴꦒꦺꦴꦠꦶ ꦏꦶꦫꦶꦪꦴ, ꦮꦴꦪꦴꦩꦺꦴ ꦮꦴ. ꦠꦱ꧀ꦱ ꦩꦲꦤ꧀ꦠꦠꦫꦱ꧀ꦱ ꦆꦕ꧀ꦖꦶꦠꦧ꧀ꦧꦠꦁ ꦢꦸꦏ꧀ꦏꦫꦠꦫꦠꦚ꧀ꦕ ꦈꦥꦩꦴꦲꦶ ꦢꦱ꧀ꦱꦺꦠꦶ ‘‘ꦨꦮꦒ꧀ꦒꦒꦲꦟꦠ꧀ꦡ’’ꦤ꧀ꦠꦶꦄꦴꦢꦶꦤꦴ.

ꦥꦢꦓꦴꦠꦤ꧀ꦠꦶ ꦌꦠ꧀ꦡ ꦒꦠꦩꦒ꧀ꦒꦺꦴ ‘‘ꦥꦢ’’ꦤ꧀ꦠꦶ ꦮꦸꦕ꧀ꦕꦠꦶ. ꦪꦺꦤ ꦕꦸꦥꦴꦪꦺꦤ ꦏꦴꦫꦟꦺꦤ ꦏꦴꦩꦮꦶꦠꦏ꧀ꦏꦺꦴ ꦈꦥ꧀ꦥꦗ꧀ꦗꦠꦶ, ꦱꦺꦴ ꦠꦱ꧀ꦱ ꦒꦠꦩꦒ꧀ꦒꦺꦴꦠꦶ ꦠꦱ꧀ꦱ ꦓꦴꦠꦺꦴ ꦥꦢꦓꦴꦠꦺꦴ. ꦈꦱ꧀ꦱꦸꦏ꧀ꦏꦴꦥꦺꦠ꧀ꦮꦴꦠꦶ ꦈꦢ꧀ꦣꦁ ꦈꦢ꧀ꦣꦁ ꦱꦤ꧀ꦠꦶꦮꦶꦱꦺꦱꦪꦸꦠ꧀ꦠꦁ ꦏꦠ꧀ꦮꦴ, ꦮꦝ꧀ꦞꦺꦠ꧀ꦮꦴꦠꦶ ꦄꦠ꧀ꦡꦺꦴ.

ꦥꦴꦭ꦳ꦶꦪꦁ ꦮꦶꦨꦠ꧀ꦠꦺꦱꦹꦠꦶ ꦏꦠꦫꦥꦴꦭ꦳ꦶꦪꦁ? ꦣꦩ꧀ꦩꦱꦔ꧀ꦒꦲꦺ ꦠꦴꦮ ꦄꦛ꧀ꦜ ꦏꦱꦶꦟꦴꦤꦶ ꦢꦱ ꦄꦱꦸꦨꦴ ꦕꦠ꧀ꦠꦴꦫꦺꦴ ꦧ꧀ꦫꦲ꧀ꦩꦮꦶꦲꦴꦫꦴ ꦕꦠ꧀ꦠꦴꦫꦶ ꦄꦴꦫꦸꦥ꧀ꦥꦴꦤꦶ ꦮꦶꦨꦠ꧀ꦠꦴꦤꦶ, ꦄꦴꦒꦩꦺꦱꦸ ꦢꦱ ꦄꦤꦸꦱ꧀ꦱꦠꦶꦪꦺꦴ ꦄꦴꦲꦴꦫꦺ ꦥꦛꦶꦏꦹꦭꦱꦚ꧀ꦚꦴ ꦕꦠꦸꦣꦴꦠꦸꦮꦮꦠ꧀ꦡꦴꦤꦤ꧀ꦠꦶ ꦆꦩꦴꦤꦶ ꦕꦴꦠꦶ ꦠꦠ꧀ꦡ ꦠꦠ꧀ꦡ ꦮꦶꦨꦠ꧀ꦠꦁ. ꦆꦩꦺꦱꦸ ꦠꦷꦱꦹꦠꦶ ꦏꦴꦩꦴꦢꦷꦱꦸ ꦠꦷꦱꦸ ꦜꦴꦤꦺꦱꦸ.

ꦩꦶꦕ꧀ꦖꦴꦮꦴꦕꦴꦱꦔ꧀ꦑꦴꦠꦴꦪꦴꦠꦶ ꦌꦠꦺꦤ ꦌꦏꦴꦪ ꦕꦺꦠꦤꦴꦪ ꦥꦲꦴꦠꦧ꧀ꦧꦌꦏꦠ꧀ꦠꦁ ꦢꦱ꧀ꦱꦺꦠꦶ. ꦆꦣ ꦄꦫꦶꦪꦱꦴꦮꦏꦺꦴ ꦱꦏꦭ꧀ꦪꦴꦟꦥꦸꦡꦸꦗ꧀ꦗꦤꦏꦺꦴ ꦱꦺꦏ꧀ꦑꦺꦴ. ꦏꦴꦪꦢ꧀ꦮꦴꦫꦮꦷꦠꦶꦏ꧀ꦏꦩꦴꦠꦶ ꦄꦴꦗꦷꦮꦲꦺꦠꦸꦏꦠꦺꦴ ꦥꦴꦟꦴꦠꦶꦥꦴꦠꦴꦢꦶꦠꦺꦴ ꦮꦶꦱꦸꦁ ꦮꦶꦱꦸꦁ ꦮꦶꦫꦩꦟꦁ ꦪꦺꦴꦗꦺꦠꦧ꧀ꦧꦁ.

ꦄꦪꦁ ꦥꦤꦱ꧀ꦱꦴꦠꦶ ꦩꦒ꧀ꦒꦨꦴꦮꦺꦤ ꦕꦠꦸꦧ꧀ꦧꦶꦣꦩ꧀ꦥꦶ ꦌꦏꦠ꧀ꦠꦺꦤ ꦒꦲꦺꦠ꧀ꦮꦴ ꦄꦱ꧀ꦱ ꦩꦒ꧀ꦒꦱ꧀ꦱ ꦄꦪꦁ ꦙꦴꦤꦮꦱꦺꦤ ꦱꦧ꧀ꦧꦱꦢꦶꦱꦱꦧ꧀ꦧꦴꦱꦢꦶꦱꦌꦏꦕ꧀ꦕꦱꦢꦶꦱꦠꦴ ꦮꦶꦱꦺꦱꦺꦴ. ꦥꦴꦢꦏꦗ꧀ꦙꦴꦤꦤꦶꦪꦴꦩꦺꦤ ꦲꦺꦴꦠꦷꦠꦶ ꦆꦣ ꦥꦴꦢꦏꦗ꧀ꦙꦴꦤꦤꦶꦪꦴꦩꦁ ꦣꦸꦫꦁ ꦏꦠ꧀ꦮꦴ ꦄꦴꦲ, ꦄꦛ꧀ꦜꦱꦴꦭꦶꦤꦶꦪꦁ ꦥꦤ ꦮꦶꦥꦱ꧀ꦱꦤꦴꦤꦶꦪꦴꦩꦁ ꦠꦠ꧀ꦡ ꦱꦧ꧀ꦧꦮꦴꦢꦴꦮꦶꦫꦺꦴꦣꦠꦺꦴ, ꦆꦣ ꦥꦤ ꦱꦩ꧀ꦩꦱꦶꦠꦗ꧀ꦙꦴꦤꦥꦸꦒ꧀ꦒꦭꦗ꧀ꦙꦴꦱꦪꦮꦴꦢꦤꦶꦮꦠ꧀ꦠꦤꦠꦺꦴ ꦥꦴꦢꦏꦗ꧀ꦙꦴꦤꦤꦶꦪꦴꦩꦁ. ꦮꦶꦥꦱ꧀ꦱꦤꦴꦤꦶꦪꦴꦩꦺꦴ ꦥꦤ ꦱꦴꦣꦴꦫꦟꦠ꧀ꦠꦴ ꦆꦣꦴꦥꦶ ꦤ ꦥꦛꦶꦏ꧀ꦑꦶꦠ꧀ꦠꦺꦴꦠꦶ ꦢꦛ꧀ꦜꦧ꧀ꦧꦺꦴ. ꦄꦚ꧀ꦚꦺ ꦕꦴꦕꦫꦶꦪꦮꦴꦢꦴ ꦮꦏ꧀ꦑꦩꦴꦤꦴ ꦮꦶꦨꦗꦶꦠꦧ꧀ꦧꦴꦠꦶ ꦪꦡꦴꦮꦸꦠ꧀ꦠꦩꦺꦮ ꦠꦴꦮ ꦥꦴꦢꦏꦗ꧀ꦙꦴꦤꦤꦶꦪꦴꦩꦁ ꦮꦶꦨꦗꦤ꧀ꦠꦺꦴ ꦄꦴꦲ ‘‘ꦥꦴꦢꦏꦗ꧀ꦙꦴꦤꦤꦶꦪꦴꦩꦺꦤ ꦠꦴꦮꦴ’’ꦠꦶ.

ꦄꦴꦫꦸꦥ꧀ꦥꦺ ꦕꦠꦸꦏ꧀ꦏꦥꦚ꧀ꦕꦏ…ꦥꦺ… ꦮꦸꦠ꧀ꦠꦁ ꦄꦛ꧀ꦜꦱꦴꦭꦶꦤꦶꦪꦤ꧀ꦠꦶ ꦄꦣꦶꦥ꧀ꦥꦴꦪꦺꦴ. ꦤꦤꦸ ꦠꦠ꧀ꦡ ‘‘ꦄꦴꦫꦸꦥ꧀ꦥꦺ ꦠꦶꦏꦕꦠꦸꦏ꧀ꦏꦗ꧀ꦙꦴꦤꦁ ꦈꦥ꧀ꦥꦗ꧀ꦗꦠꦷ’’ꦠꦶ ꦮꦸꦠ꧀ꦠꦁ, ꦤ ‘‘ꦕꦠꦸꦏ꧀ꦏꦥꦚ꧀ꦕꦏꦗ꧀ꦙꦴꦤ’’ꦤ꧀ꦠꦶ? ꦱꦕ꧀ꦕꦁ, ꦪꦺꦱꦸ ꦥꦤ ꦱꦁꦱꦪꦺꦴ ꦄꦠ꧀ꦡꦶ, ꦠꦺꦱꦁ ꦈꦥ꧀ꦥꦠ꧀ꦠꦶꦢꦱ꧀ꦱꦤꦺꦤ, ꦠꦺꦤꦠ꧀ꦡꦠꦺꦴ ꦕꦠꦸꦏ꧀ꦏꦥꦚ꧀ꦕꦏꦗ꧀ꦙꦴꦤꦁ ꦈꦥ꧀ꦥꦗ꧀ꦗꦠꦷꦠꦶ ꦮꦸꦠ꧀ꦠꦩꦺꦮ ꦲꦺꦴꦠꦷꦠꦶ ꦌꦮꦩꦴꦲꦴꦠꦶ ꦮꦺꦢꦶꦠꦧ꧀ꦧꦁ. ꦱꦩꦸꦢꦴꦪꦚ꧀ꦕ ꦄꦥꦺꦏ꧀ꦑꦶꦠ꧀ꦮꦴ ‘‘ꦠꦚ꧀ꦕ ꦭꦺꦴꦏꦸꦠ꧀ꦠꦫꦁ, ꦤ ꦭꦺꦴꦏꦶꦪ’’ꦤ꧀ꦠꦶ ꦄꦴꦲ. ꦕꦠꦸꦠ꧀ꦡꦗ꧀ꦙꦴꦤꦩꦺꦮ ꦲꦶ ꦭꦺꦴꦏꦶꦪꦁ ꦠꦠ꧀ꦡ ꦈꦥ꧀ꦥꦗ꧀ꦗꦠꦶ, ꦤ ꦕꦠꦸꦏ꧀ꦏꦁ ꦥꦚ꧀ꦕꦏꦚ꧀ꦕꦴꦠꦶ. ꦌꦠ꧀ꦡ ꦏꦡꦤ꧀ꦠꦶ ꦥꦴꦢꦏꦗ꧀ꦙꦴꦤꦱ꧀ꦱ ꦄꦨꦴꦮꦴ ꦏꦡꦁ ꦢꦛ꧀ꦜꦧ꧀ꦧꦤ꧀ꦠꦶ ꦄꦠ꧀ꦡꦺꦴ. ꦠꦁꦙꦴꦤꦶꦏꦴꦮ ꦠꦱ꧀ꦱ ꦠꦠ꧀ꦡ ꦠꦪꦺꦴ ꦩꦒ꧀ꦒꦴ ꦈꦥ꧀ꦥꦗ꧀ꦗꦤ꧀ꦠꦶ ꦠꦗ꧀ꦙꦴꦤꦶꦏꦁ ꦥꦜꦩꦦꦭꦴꦢꦶꦁ ꦥꦴꦢꦏꦁ ꦏꦠ꧀ꦮꦴ ꦈꦥꦫꦶꦩꦒ꧀ꦒꦨꦴꦮꦤꦴꦪꦴꦠꦶ ꦄꦣꦶꦥ꧀ꦥꦴꦪꦺꦴ, ꦠꦶꦏꦕꦠꦸꦏ꧀ꦏꦗ꧀ꦙꦴꦤꦶꦏꦁ ꦥꦤ ꦩꦒ꧀ꦒꦁ ꦨꦴꦮꦺꦠ꧀ꦮꦴ ꦠꦠ꧀ꦡꦸꦥ꧀ꦥꦤ꧀ꦤꦱ꧀ꦱ ꦄꦫꦹꦥꦗ꧀ꦙꦴꦤꦁ ꦠꦗ꧀ꦙꦴꦤꦶꦏꦁ ꦦꦭꦚ꧀ꦕ ꦥꦴꦢꦏꦁ ꦏꦠ꧀ꦮꦴ ꦈꦥꦫꦶꦩꦒ꧀ꦒꦨꦴꦮꦤꦴꦪ ꦄꦚ꧀ꦚꦙꦴꦤꦶꦏꦴꦥꦶ ꦈꦥ꧀ꦥꦗ꧀ꦗꦤ꧀ꦠꦷꦠꦶ ꦙꦴꦤꦔ꧀ꦒꦴꦢꦶꦤꦶꦪꦴꦩꦶꦏꦴ ꦥꦸꦧ꧀ꦧꦴꦨꦶꦱꦔ꧀ꦑꦴꦫꦱꦩꦴꦥꦠ꧀ꦠꦶ ꦥꦴꦢꦏꦁ, ꦤ ꦱꦩ꧀ꦩꦱꦶꦠꦧ꧀ꦧꦴꦠꦶ ꦦꦭꦱ꧀ꦱꦥꦶ ꦥꦴꦢꦏꦠꦴ ꦢꦛ꧀ꦜꦧ꧀ꦧꦴ.

ꦢꦸꦏ꧀ꦑꦚꦴꦟꦴꦢꦷꦤꦁ ꦫꦹꦥꦴꦢꦶꦖꦭ꦳ꦴꦫꦩ꧀ꦩꦟꦠ꧀ꦠꦴ ꦤꦺꦏ꧀ꦑꦩ꧀ꦩꦱꦔ꧀ꦏꦥ꧀ꦥꦴꦢꦷꦤꦁ ꦏꦱꦶꦟꦴꦢꦶꦠꦁꦠꦁꦏꦸꦱꦭꦴꦫꦩ꧀ꦩꦟꦴꦫꦩ꧀ꦩꦟꦠ꧀ꦠꦴ ꦱꦩ꧀ꦩꦴꦮꦴꦕꦴꦢꦷꦤꦁ ꦄꦔ꧀ꦒꦴꦤꦁ ꦠꦁꦠꦁꦮꦶꦫꦩꦶꦠꦧ꧀ꦧꦴꦢꦶꦄꦴꦫꦩ꧀ꦩꦟꦠ꧀ꦠꦴ ‘‘ꦪꦡꦴꦤꦸꦫꦹꦥ’’ꦤ꧀ꦠꦶ ꦄꦴꦲ. ꦠꦢꦤꦸꦫꦹꦥꦺꦴꦠꦶ ꦄꦮꦶꦥ꧀ꦥꦛꦶꦱꦴꦫꦏꦫꦱꦷꦭꦁ ꦮꦴꦪꦴꦩꦱ꧀ꦱ ꦮꦶꦱꦺꦱꦥꦕ꧀ꦕꦪꦺꦴꦠꦶ ꦱꦷꦭꦴꦤꦸꦫꦹꦥꦠꦴ ꦮꦴꦪꦴꦩꦱ꧀ꦱ ꦮꦸꦠ꧀ꦠꦴ ꦱꦩ꧀ꦥꦪꦸꦠ꧀ꦠꦱ꧀ꦱꦥꦶ, ꦱꦩ꧀ꦥꦪꦸꦠ꧀ꦠꦱ꧀ꦱꦺꦮ ꦕ ꦮꦕꦤꦠꦺꦴ ‘‘ꦱꦷꦭꦨꦹꦩꦶꦪꦁ ꦥꦠꦶꦛ꧀ꦜꦶꦠꦱ꧀ꦱꦴ’’ꦠꦶ ꦄꦮꦠ꧀ꦮꦴ ‘‘ꦥꦠꦶꦛ꧀ꦜꦩꦴꦤꦱ꧀ꦱꦴ’’ꦠꦶ ꦮꦸꦠ꧀ꦠꦁ. ꦕꦺꦠꦱꦺꦴ ꦄꦱꦩ꧀ꦩꦺꦴꦱꦺꦴꦠꦶ ‘‘ꦌꦏꦴꦫꦏ꧀ꦑꦺꦴ’’ꦠꦶ ꦌꦠ꧀ꦡ ꦮꦸꦠ꧀ꦠꦺꦤ ꦱꦠꦴꦫꦏ꧀ꦑꦺꦤ ꦕꦺꦠꦱꦺꦴ ꦫꦏ꧀ꦑꦶꦠꦠꦴ. ꦠꦺꦤꦴꦲ ‘‘ꦆꦠꦶ…ꦥꦺ… ꦱꦸꦮꦶꦲꦶꦠꦕꦶꦠ꧀ꦠꦴꦫꦏ꧀ꦑꦱ꧀ꦱꦴ’’ꦠꦶ.

ꦄꦴꦱꦮꦏ꧀ꦑꦪꦚꦴꦟꦱ꧀ꦱ ꦮꦶꦗ꧀ꦗꦴꦨꦴꦮꦺꦴ ꦮꦸꦠ꧀ꦠꦺꦴꦠꦶ ꦄꦴꦱꦮꦏ꧀ꦑꦪꦱꦔ꧀ꦑꦴꦠꦺ ꦩꦒ꧀ꦒꦺ ꦠꦷꦲꦶ ꦑꦤ꧀ꦣꦺꦲꦶ ꦱꦔ꧀ꦒꦲꦶꦠꦺ ꦥꦚ꧀ꦚꦴꦏ꧀ꦑꦤ꧀ꦣꦺꦴ ꦮꦶꦗ꧀ꦗꦴ, ꦱꦷꦭꦱ꧀ꦱ ꦕꦠꦸꦤ꧀ꦤꦚ꧀ꦕ ꦙꦴꦤꦴꦤꦁ ꦕꦫꦟꦨꦴꦮꦺꦴ ꦮꦸꦠ꧀ꦠꦺꦴꦠꦶ ꦆꦠꦫꦺ ꦢ꧀ꦮꦺ ꦑꦤ꧀ꦣꦴ ꦕꦫꦟꦁ. ꦪꦤ꧀ꦠꦶ ꦌꦠꦺꦤ ꦤꦶꦧ꧀ꦧꦴꦤꦁ ꦒꦕ꧀ꦖꦤ꧀ꦠꦷꦠꦶ ꦪꦴꦤꦁ, ꦮꦶꦥꦱ꧀ꦱꦤꦴꦮ ꦪꦴꦤꦁ ꦮꦶꦥꦱ꧀ꦱꦤꦴꦪꦴꦤꦁ. ꦱꦷꦭꦁ ꦱꦩꦴꦣꦶꦱ꧀ꦱ ꦮꦶꦱꦺꦱꦥꦕ꧀ꦕꦪꦺꦴ, ꦱꦩꦴꦣꦶ ꦮꦶꦥꦱ꧀ꦱꦤꦴꦪꦴꦠꦶ ꦱꦩꦡꦱ꧀ꦱ ꦈꦥꦏꦴꦫꦠ꧀ꦠꦴ ꦱꦷꦭꦏ꧀ꦑꦤ꧀ꦣꦺꦴ ꦕ ꦱꦩꦡꦪꦴꦤꦺꦤ ꦱꦔ꧀ꦒꦲꦶꦠꦺꦴ. ꦮꦶꦥꦱ꧀ꦱꦤꦴꦪꦴꦤꦺꦤ ꦏꦴꦩꦺꦱꦸ ꦄꦴꦢꦷꦤꦮꦁ ꦮꦶꦨꦴꦮꦺꦤ꧀ꦠꦺꦴ ꦱꦩꦡꦪꦴꦤꦺꦤ ꦤꦶꦫꦴꦩꦶꦱꦁ ꦙꦴꦤꦱꦸꦑꦁ ꦄꦥꦫꦶꦕ꧀ꦕꦗꦤ꧀ꦠꦺꦴ ꦄꦤ꧀ꦠꦢ꧀ꦮꦪꦏꦸꦩ꧀ꦩꦒ꧀ꦒꦁ ꦮꦶꦮꦗ꧀ꦗꦺꦠꦶ. ꦥꦚ꧀ꦚꦴ ꦮꦶꦪ ꦩꦺꦴꦲꦱ꧀ꦱ, ꦱꦷꦭꦱꦩꦴꦣꦪꦺꦴ ꦕ ꦢꦺꦴꦱꦭꦺꦴꦨꦴꦤꦁ ꦈꦗꦸꦮꦶꦥꦕ꧀ꦕꦤꦷꦏꦴ ꦄꦢꦺꦴꦱꦴꦭꦺꦴꦨꦺꦲꦶ ꦱꦴꦣꦺꦠꦧ꧀ꦧꦠ꧀ꦠꦴ. ꦱꦷꦭꦱꦩꦴꦣꦶꦥꦚ꧀ꦚꦴꦪꦺꦴꦒꦠꦺꦴ ꦄꦴꦢꦶꦩꦗ꧀ꦙꦥꦫꦶꦪꦺꦴꦱꦴꦤꦏꦭ꧀ꦪꦴꦟꦁ. ꦱꦷꦭꦴꦢꦷꦤꦶ ꦲꦶ ꦱꦴꦱꦤꦱ꧀ꦱ ꦄꦴꦢꦶꦩꦗ꧀ꦙꦥꦫꦶꦪꦺꦴꦱꦴꦤꦤ꧀ꦠꦶ. ꦪꦱ꧀ꦩꦶꦁ ꦜꦶꦠꦺꦴ ꦩꦒ꧀ꦒꦛ꧀ꦜꦺꦴ ꦦꦭꦛ꧀ꦜꦺꦴ ꦕ ꦄꦫꦶꦪꦺꦴ ꦲꦺꦴꦠꦶ, ꦠꦁ ꦩꦒ꧀ꦒꦦꦭꦱꦔ꧀ꦑꦴꦠꦁ ꦑꦤ꧀ꦣꦠ꧀ꦠꦪꦱꦔ꧀ꦒꦲꦶꦠꦁ ꦱꦴꦱꦤꦁ ꦄꦫꦶꦪꦨꦹꦩꦶ.

ꦩꦒ꧀ꦒꦱꦕ꧀ꦕꦤꦶꦢ꧀ꦢꦺꦱꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦱꦸꦠ꧀ꦠꦤ꧀ꦠꦨꦴꦗꦤꦷꦪꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.