꧒. ꦈꦥ꧀ꦥꦠ꧀ꦠꦴꦤꦸꦥ꧀ꦥꦠ꧀ꦠꦶꦮꦴꦫꦮꦟ꧀ꦟꦤꦴ

꧙꧙꧑. ‘‘ꦏꦴꦩꦨꦮꦺ’’ꦠꦶ ꦆꦢꦁ ꦎꦏꦴꦱꦮꦱꦺꦤ ꦮꦠ꧀ꦮꦴ ꦥꦸꦤ ꦱꦠ꧀ꦠꦱꦤ꧀ꦠꦴꦤꦮꦱꦺꦤ ꦮꦠ꧀ꦠꦸꦁ ‘‘ꦏꦴꦩꦣꦴꦠꦸꦱꦩ꧀ꦨꦹꦠꦴꦤꦚ꧀ꦕꦴ’’ꦠꦶ ꦮꦸꦠ꧀ꦠꦤ꧀ꦠꦶ ꦠꦩꦠ꧀ꦡꦮꦶꦱꦺꦱꦁ ꦢꦱ꧀ꦱꦺꦤ꧀ꦠꦺꦴ ‘‘ꦆꦢ꧀ꦣꦶꦪꦴ…ꦥꦺ… ꦄꦠ꧀ꦡꦺꦴ’’ꦠꦶ ꦄꦴꦲ. ‘‘ꦤ ꦮꦠ꧀ꦠꦧ꧀ꦧꦁ ꦱꦶꦪꦴ’’ꦠꦶ ꦏꦱ꧀ꦩꦴ ꦮꦸꦠ꧀ꦠꦁ, ꦪꦢꦶꦥꦶ ꦄꦱꦚ꧀ꦚꦱꦠ꧀ꦠꦴꦤꦁ ꦄꦕꦏ꧀ꦑꦸꦏꦠ꧀ꦠꦴ ꦫꦹꦥꦴꦪꦠꦤꦁ ꦄꦕ꧀ꦕꦤ꧀ꦠꦱꦸꦑꦸꦩꦠ꧀ꦠꦴ ꦲꦺꦛ꧀ꦜꦶꦩꦨꦹꦩꦶꦏꦴꦤꦚ꧀ꦕ ꦄꦒꦺꦴꦕꦫꦺꦴ, ꦱꦩꦴꦤꦨꦹꦩꦶꦏꦴꦤꦁ ꦥꦤ ꦮꦺꦲꦥ꧀ꦦꦭꦴꦤꦁ, ꦈꦥꦫꦶꦨꦹꦩꦶꦏꦴꦤꦚ꧀ꦕ ꦱꦸꦢ꧀ꦣꦴꦮꦴꦱꦴꦤꦁ ꦕꦏ꧀ꦑꦴꦪꦠꦤꦱ꧀ꦱ ꦒꦺꦴꦕꦫꦺꦴ ꦲꦺꦴꦠꦷꦠꦶ ꦄꦴꦪꦠꦤꦴꦢꦶꦏꦶꦕ꧀ꦕꦁ ꦏꦫꦺꦴꦠꦶꦪꦺꦮꦴꦠꦶ ꦱꦏ꧀ꦏꦴ ꦮꦠ꧀ꦠꦸꦁ. ꦪꦁ ꦥꦤꦺꦠ꧀ꦡ ꦮꦶꦠ꧀ꦡꦴꦫꦠꦺꦴ ꦮꦠ꧀ꦠꦧ꧀ꦧꦁ, ꦠꦁ ꦲꦺꦛ꧀ꦜꦴ ꦮꦸꦠ꧀ꦠꦩꦺꦮ. ‘‘ꦲꦺꦛ꧀ꦜꦠꦺꦴ ꦄꦮꦷꦕꦶꦤꦶꦫꦪꦁ ꦥꦫꦶꦪꦤ꧀ꦠꦁ ꦏꦠ꧀ꦮꦴ ꦈꦥꦫꦶꦠꦺꦴ ꦥꦫꦤꦶꦩ꧀ꦩꦶꦠꦮꦱꦮꦠ꧀ꦠꦶꦢꦺꦮꦺ ꦄꦤ꧀ꦠꦺꦴꦏꦫꦶꦠ꧀ꦮꦴ ꦪꦁ ꦌꦠꦱ꧀ꦩꦶ’’ꦤ꧀ꦠꦶꦄꦴꦢꦶꦤꦴ (ꦣ. ꦱ. ꧑꧒꧘꧗) ꦮꦸꦠ꧀ꦠꦥꦢꦺꦱꦴ ꦏꦴꦩꦴꦮꦕꦫꦴꦢꦶꦎꦏꦴꦱꦴ. ꦠꦺ ꦱꦠ꧀ꦠꦤꦶꦏꦴꦪꦴ ꦕ ꦣꦴꦠꦹꦠꦶ ꦮꦸꦕ꧀ꦕꦤ꧀ꦠꦶ ꦱꦩꦸꦢꦴꦪꦱ꧀ꦱ ꦄꦮꦪꦮꦴꦣꦴꦫꦨꦴꦮꦠꦺꦴ ꦪꦡꦴ ‘‘ꦩꦴꦱꦥꦸꦚ꧀ꦗꦺꦴ ꦩꦴꦱꦺꦴ’’ꦠꦶ. ꦱꦠ꧀ꦠꦴ ꦈꦥ꧀ꦥꦗ꧀ꦗꦤ꧀ꦠꦶ ꦌꦠ꧀ꦡꦴꦠꦶ ꦱꦠ꧀ꦠꦸꦥ꧀ꦥꦠ꧀ꦠꦶ, ꦈꦥ꧀ꦥꦗ꧀ꦗꦤꦛ꧀ꦜꦺꦤ ꦱꦠ꧀ꦠꦴꦮ ꦈꦥ꧀ꦥꦠ꧀ꦠꦶ ꦱꦠ꧀ꦠꦸꦥ꧀ꦥꦠ꧀ꦠꦷꦠꦶ ꦌꦮꦁ ꦎꦏꦴꦱꦱꦠ꧀ꦠꦭꦺꦴꦏꦢ꧀ꦮꦪꦱ꧀ꦱ ꦱꦠ꧀ꦠꦸꦥ꧀ꦥꦠ꧀ꦠꦶꦥꦫꦶꦪꦴꦪꦺꦴ ꦮꦺꦢꦶꦠꦧ꧀ꦧꦺꦴ. ꦱꦠ꧀ꦠꦨꦴꦮꦺꦤ ꦈꦥ꧀ꦥꦠ꧀ꦠꦶ, ꦤ ꦄꦤꦸꦥꦴꦢꦶꦤ꧀ꦤꦏ꧀ꦑꦤ꧀ꦣꦴ ꦮꦶꦪ ꦱꦔ꧀ꦑꦴꦫꦨꦴꦮꦺꦤꦺꦮꦴꦠꦶ ꦄꦣꦶꦥ꧀ꦥꦴꦪꦺꦴ. ꦏꦺ ꦥꦤ ꦠꦺꦠꦶ ꦄꦴꦲ ‘‘ꦱꦠ꧀ꦠꦴꦮꦴꦱꦮꦱꦺꦤ…ꦥꦺ… ꦈꦥꦴꦢꦶꦤ꧀ꦤꦏꦏ꧀ꦑꦤ꧀ꦣꦴ’’ꦠꦶ. ꦠꦁꦠꦁꦥꦫꦶꦪꦴꦥꦤ꧀ꦤꦴꦤꦤ꧀ꦠꦶ ꦠꦁꦠꦁꦱꦠ꧀ꦠꦴꦮꦴꦱꦥꦫꦶꦪꦴꦥꦤ꧀ꦤꦴꦤꦁ ꦱꦠ꧀ꦠꦴꦤꦁ, ꦱꦔ꧀ꦑꦴꦫꦴꦤꦩꦺꦮ ꦮꦴ. ꦱꦢꦶꦱꦴꦣꦶꦛ꧀ꦜꦴꦤꦨꦴꦮꦺꦤꦴꦠꦶ ꦱꦢꦶꦱꦴꦏꦴꦫꦺꦤ ꦥꦮꦠ꧀ꦠꦩꦴꦤꦴꦤꦁ ꦑꦤ꧀ꦣꦴꦤꦁ ꦥꦠꦶꦛ꧀ꦜꦴꦤꦨꦴꦮꦺꦤ. ꦪꦺꦨꦸꦪ꧀ꦪꦺꦤ ꦲꦶ ꦠꦱ꧀ꦩꦶꦁ ꦱꦠ꧀ꦠꦴꦮꦴꦱꦺ ꦣꦩ꧀ꦩꦴ ꦱꦩꦴꦤꦴꦏꦴꦫꦺꦤ ꦥꦮꦠ꧀ꦠꦤ꧀ꦠꦶ.

ꦈꦥ꧀ꦥꦠ꧀ꦠꦴꦤꦸꦥ꧀ꦥꦠ꧀ꦠꦶꦮꦴꦫꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.