꧑꧓. ꦄꦥ꧀ꦥꦩꦚ꧀ꦚꦴꦮꦶꦨꦔ꧀ꦒꦺꦴ

꧑. ꦱꦸꦠ꧀ꦠꦤ꧀ꦠꦨꦴꦗꦤꦷꦪꦮꦟ꧀ꦟꦤꦴ

꧖꧔꧒. ꦢꦶꦱꦴꦢꦺꦱꦺꦴꦣꦶꦤꦴꦠꦶ ‘‘ꦌꦏꦁ ꦢꦶꦱ’’ꦤ꧀ꦠꦶꦄꦴꦢꦶꦢꦶꦱꦺꦴꦣꦶꦤꦴ, ꦮꦶꦲꦴꦫꦒꦴꦩꦤꦶꦒꦩꦤꦒꦫꦗꦤꦥꦢꦫꦗ꧀ꦗꦴꦢꦶꦢꦺꦱꦺꦴꦣꦶꦤꦴ ꦕ. ꦱꦠ꧀ꦠꦺꦴꦣꦶꦤꦴꦠꦶ ‘‘ꦱꦧ꧀ꦧꦴ ꦆꦠ꧀ꦡꦶꦪꦺꦴ, ꦱꦧ꧀ꦧꦺ ꦥꦸꦫꦶꦱꦴ, ꦄꦫꦶꦪꦴ, ꦄꦤꦫꦶꦪꦴ’’ꦠꦶꦄꦴꦢꦶꦮꦱꦥ꧀ꦥꦮꦠ꧀ꦠꦺꦤ ꦱꦠ꧀ꦠꦺꦴꦣꦶꦤꦴ. ꦌꦠꦱ꧀ꦱꦴꦠꦶ ꦌꦠꦱ꧀ꦱ ꦥꦢꦱ꧀ꦱ, ꦥꦢꦠ꧀ꦡꦱ꧀ꦱ ꦮꦴ. ꦄꦤꦸꦮꦠ꧀ꦠꦏꦤ꧀ꦠꦶ ꦄꦣꦶꦏꦴꦫꦮꦱꦺꦤ ꦥꦮꦠ꧀ꦠꦏꦁ. ꦠꦁ ꦢ꧀ꦮꦪꦤ꧀ꦠꦶ ꦠꦡꦴ-ꦱꦢ꧀ꦢꦺꦴ, ꦆꦠꦶ-ꦱꦢ꧀ꦢꦺꦴꦠꦶ ꦈꦨꦪꦁ. ‘‘ꦠꦡꦴ ꦢꦸꦠꦶꦪ’’ꦤ꧀ꦠꦶ ꦲꦶ ꦮꦸꦠ꧀ꦠꦺ ‘‘ꦠꦡꦴ-ꦱꦢ꧀ꦢꦺꦴ ꦪꦡꦴ ꦩꦺꦠ꧀ꦠꦴꦱꦲꦒꦠꦺꦤ ꦕꦺꦠꦱꦴ ꦥꦸꦫꦠ꧀ꦡꦶꦩꦴꦢꦷꦱꦸ ꦌꦏꦁ ꦢꦶꦱꦁ ꦦꦫꦶꦠ꧀ꦮꦴ ꦮꦶꦲꦫꦠꦶ, ꦠꦡꦴ ꦢꦸꦠꦶꦪꦩ꧀ꦥꦶ ꦢꦶꦱꦁ ꦩꦺꦠ꧀ꦠꦴꦱꦲꦒꦠꦺꦤ ꦕꦺꦠꦱꦴ ꦦꦫꦶꦠ꧀ꦮꦴ ꦮꦶꦲꦫꦠꦷ’’ꦠꦶ ꦆꦩꦩꦠ꧀ꦡꦁ ꦢꦷꦥꦺꦠꦶ. ꦱꦺꦱꦢ꧀ꦮꦪꦺꦥꦶ ꦌꦱꦺꦮ ꦤꦪꦺꦴ. ꦪꦱ꧀ꦩꦴ ꦆꦠꦷꦠꦶ ꦄꦪꦁ ꦆꦠꦶ-ꦱꦢ꧀ꦢꦺꦴ ꦥꦏꦴꦫꦠ꧀ꦡꦺ, ꦌꦮꦤ꧀ꦠꦶ ꦮꦸꦠ꧀ꦠꦁ ꦲꦺꦴꦠꦶ, ꦠꦱ꧀ꦩꦴ ‘‘ꦪꦡꦴ ꦩꦺꦠ꧀ꦠꦴꦱꦲꦒꦠꦺꦤ ꦕꦺꦠꦱꦴ ꦌꦏꦁ, ꦢꦸꦠꦶꦪꦁ, ꦠꦠꦶꦪꦁ, ꦕꦠꦸꦠ꧀ꦡꦁ ꦢꦶꦱꦁ ꦦꦫꦶꦠ꧀ꦮꦴ ꦮꦶꦲꦫꦠꦶ, ꦌꦮꦁ ꦈꦢ꧀ꦣꦁ, ꦄꦣꦺꦴ, ꦠꦶꦫꦶꦪꦁ ꦩꦺꦠ꧀ꦠꦴꦱꦲꦒꦠꦺꦤ ꦕꦺꦠꦱꦴ ꦦꦫꦶꦠ꧀ꦮꦴ ꦮꦶꦲꦫꦠꦷ’’ꦠꦶ ꦆꦩꦩꦠ꧀ꦡꦁ ꦢꦷꦥꦺꦠꦶ. ꦠꦺꦤ ꦮꦸꦠ꧀ꦠꦁ ‘‘ꦩꦺꦠ꧀ꦠꦴ…ꦥꦺ… ꦠꦁ ꦢ꧀ꦮꦪ’’ꦤ꧀ꦠꦶ. ꦠꦱ꧀ꦱꦴꦠꦶ ꦢ꧀ꦮꦪꦱ꧀ꦱ. ꦦꦫꦟꦤ꧀ꦠꦫꦴꦢꦶꦛ꧀ꦜꦴꦤꦤ꧀ꦠꦶ ꦦꦫꦟꦠꦺꦴ ꦄꦚ꧀ꦚꦁ ꦦꦫꦟꦤ꧀ꦠꦫꦁ, ꦠꦁ ꦄꦴꦢꦶ ꦪꦱ꧀ꦱ, ꦠꦁ ꦦꦫꦟꦤ꧀ꦠꦫꦴꦢꦶ. ꦦꦫꦟꦤ꧀ꦠꦫꦚ꧀ꦲꦺꦠꦁ ꦩꦺꦠ꧀ꦠꦴꦨꦴꦮꦤꦴꦪ, ꦪꦢꦶꦢꦁ ꦮꦶꦥꦸꦭꦠꦴ. ꦄꦴꦢꦶ-ꦱꦢ꧀ꦢꦺꦤ ꦨꦸꦩ꧀ꦩꦤ꧀ꦠꦫꦥꦒꦸꦟꦨꦴꦮꦴꦢꦶ ꦒꦪ꧀ꦲꦠꦶ, ꦠꦱ꧀ꦱ ꦦꦫꦟꦤ꧀ꦠꦫꦴꦢꦶꦤꦺꦴ ꦜꦴꦤꦁ ꦜꦴꦤꦨꦹꦠꦺꦴ ‘‘ꦮꦶꦥꦸꦭꦺꦤꦴ’’ꦠꦶꦄꦴꦢꦶꦤꦴ ꦮꦸꦕ꧀ꦕꦩꦴꦤꦺꦴ ꦩꦺꦠ꧀ꦠꦴꦨꦴꦮꦤꦴꦮꦶꦱꦺꦱꦺꦴ. ꦮꦸꦠ꧀ꦠꦥ꧀ꦥꦏꦴꦫꦩꦠ꧀ꦠꦥꦫꦴꦩꦱꦤꦱ꧀ꦱ ꦠꦱ꧀ꦱ ꦢ꧀ꦮꦪꦱ꧀ꦱ ꦄꦛ꧀ꦜꦴꦤꦁ ꦄꦤꦺꦴꦏꦴꦱꦺꦴꦠꦶ. ꦆꦠꦶ ꦏꦠ꧀ꦮꦴ ꦆꦩꦶꦤꦴ ꦏꦴꦫꦟꦺꦤ ꦤ ꦮꦸꦠ꧀ꦠꦁ ꦠꦁ ꦢ꧀ꦮꦪꦤ꧀ꦠꦶ ꦄꦠ꧀ꦡꦺꦴ.

꧖꧔꧓. ꦫꦴꦒꦱ꧀ꦱꦴꦠꦶ ꦏꦴꦩꦫꦴꦒꦱ꧀ꦱ. ꦱꦶꦤꦺꦲꦱ꧀ꦱꦴꦠꦶ ꦥꦸꦠ꧀ꦠꦱꦶꦤꦺꦲꦴꦢꦶꦱꦶꦤꦺꦲꦱ꧀ꦱ. ꦮꦶꦥꦠ꧀ꦠꦶꦪꦴꦠꦶ ꦫꦴꦒꦱꦶꦤꦺꦲꦱꦔ꧀ꦑꦴꦠꦴꦪ ꦩꦺꦠ꧀ꦠꦴꦨꦴꦮꦤꦴꦪ ꦮꦶꦥꦠ꧀ꦠꦶꦪꦴ ꦮꦶꦤꦴꦱꦱ꧀ꦱ. ꦄꦤꦸꦥ꧀ꦥꦠ꧀ꦠꦶꦠꦺꦴ ꦲꦶꦫꦺꦴꦠ꧀ꦠꦥ꧀ꦥꦧꦭꦺꦤ ꦄꦤꦸꦥ꧀ꦥꦗ꧀ꦗꦤꦠꦺꦴ.

꧖꧔꧕. ꦄꦣꦶꦩꦸꦚ꧀ꦕꦶꦠ꧀ꦮꦴꦠꦶ ꦨꦴꦮꦤꦴꦕꦶꦠ꧀ꦠꦁ ꦄꦴꦫꦩ꧀ꦩꦟꦺ ꦱꦸꦛ꧀ꦜꦸ ꦮꦶꦱ꧀ꦱꦗ꧀ꦗꦺꦠ꧀ꦮꦴ, ꦠꦁ ꦥꦤꦺꦠ꧀ꦡ ꦄꦣꦶꦩꦸꦕ꧀ꦕꦤꦁ ꦪꦱ꧀ꦩꦴ ꦦꦫꦟꦮꦱꦺꦤꦺꦮ ꦲꦺꦴꦠꦶ, ꦠꦱ꧀ꦩꦴ ꦮꦸꦠ꧀ꦠꦁ ‘‘ꦱꦸꦛ꧀ꦜꦸ ꦥꦱꦴꦫꦺꦠ꧀ꦮꦴ’’ꦠꦶ. ꦪꦱ꧀ꦩꦴ ꦥꦤ ꦄꦴꦫꦩ꧀ꦩꦟꦺ ꦱꦸꦛ꧀ꦜꦸ ꦄꦱꦁꦱꦥ꧀ꦥꦤꦮꦱꦺꦤꦺꦮ ꦠꦁ ꦩꦺꦠ꧀ꦠꦴꦨꦴꦮꦤꦴꦪ ꦄꦣꦶꦩꦸꦕ꧀ꦕꦤꦁ ꦲꦺꦴꦠꦶ, ꦠꦱ꧀ꦩꦴ ‘‘ꦧꦭꦮꦠꦴ ꦮꦴ ꦄꦣꦶꦩꦺꦴꦏ꧀ꦑꦺꦤ ꦄꦣꦶꦩꦸꦕ꧀ꦕꦶꦠ꧀ꦮꦴ’’ꦠꦶ ꦕ ꦮꦸꦠ꧀ꦠꦁ.

꧖꧔꧘. ꦌꦠꦺꦱꦁ ꦥꦢꦴꦤꦁ ꦱꦧ꧀ꦧꦺꦤ ꦱꦏꦭꦺꦤ ꦢꦶꦱꦴꦢꦺꦱꦴꦢꦶꦨꦺꦢꦺꦤ ꦄꦮꦣꦶꦤꦴ. ꦱꦧ꧀ꦧꦴꦮꦣꦶꦢꦶꦱꦴꦢꦶꦦꦫꦟꦴꦏꦴꦫꦺꦲꦷꦠꦶ ꦱꦧ꧀ꦧꦴꦮꦣꦶꦨꦹꦠꦢꦶꦱꦴꦢꦺꦱꦥꦸꦒ꧀ꦒꦭꦦꦫꦟꦥ꧀ꦥꦏꦴꦫꦺꦲꦶ.

꧖꧕꧐. ꦮꦶꦓꦴꦠꦮꦱꦺꦤꦴꦠꦶ ꦮꦶꦏ꧀ꦑꦩ꧀ꦨꦤꦮꦱꦺꦤ.

ꦱꦸꦠ꧀ꦠꦤ꧀ꦠꦨꦴꦗꦤꦷꦪꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧓. ꦥꦚ꧀ꦲꦥꦸꦕ꧀ꦖꦏꦮꦟ꧀ꦟꦤꦴ

꧖꧙꧙. ꦏꦡꦶꦠꦴꦤꦁ ꦏꦸꦱꦭꦴꦢꦶꦣꦩ꧀ꦩꦴꦤꦁ. ꦆꦩꦱ꧀ꦩꦶꦁ ꦥꦤ ꦄꦥ꧀ꦥꦩꦚ꧀ꦚꦴꦮꦶꦨꦔ꧀ꦒꦺ ꦏꦡꦶꦠꦴ ꦄꦥ꧀ꦥꦩꦚ꧀ꦚꦴ, ꦠꦴ ꦕ ꦱꦨꦴꦮꦠꦺꦴ ꦭꦺꦴꦏꦶꦪꦴ ꦌꦮ, ꦤ ꦑꦤ꧀ꦣꦮꦶꦨꦔ꧀ꦒꦴꦢꦷꦱꦸ ꦏꦡꦶꦠꦴ ꦑꦤ꧀ꦣꦴꦢꦪꦺꦴ ꦮꦶꦪ ꦭꦺꦴꦏꦸꦠ꧀ꦠꦫꦴꦥꦷꦠꦶ ꦌꦏꦁꦱꦠꦺꦴ ꦱꦧ꧀ꦧꦴꦱꦁ ꦄꦥ꧀ꦥꦩꦚ꧀ꦚꦴꦤꦁ ꦭꦺꦴꦏꦶꦪꦨꦴꦮꦩꦺꦮ ꦢꦷꦥꦺꦠꦸꦁ ꦄꦛ꧀ꦜꦏꦡꦴꦪꦁ ‘‘ꦆꦩꦱ꧀ꦩꦶꦁ ꦥꦤꦴ’’ꦠꦶꦄꦴꦢꦶ ꦮꦸꦠ꧀ꦠꦤ꧀ꦠꦶ ꦆꦩꦩꦠ꧀ꦡꦁ ꦢꦱ꧀ꦱꦺꦤ꧀ꦠꦺꦴ ꦄꦴꦲ ‘‘ꦆꦩꦱ꧀ꦩꦶꦁ ꦥꦤ…ꦥꦺ… ꦲꦺꦴꦠꦷ’’ꦠꦶ.

ꦥꦚ꧀ꦲꦥꦸꦕ꧀ꦖꦏꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦄꦥ꧀ꦥꦩꦚ꧀ꦚꦴꦮꦶꦨꦔ꧀ꦒꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.