꧒. ꦄꦨꦶꦣꦩ꧀ꦩꦨꦴꦗꦤꦷꦪꦮꦟ꧀ꦟꦤꦴ

꧗꧒꧕. ꦄꦮꦸꦠ꧀ꦠꦠ꧀ꦠꦴꦠꦶ ‘‘ꦠꦺꦱꦁ ꦮꦶꦥꦴꦏꦺ ꦚꦴꦟ’’ꦤ꧀ꦠꦶ ꦱꦴꦩꦚ꧀ꦚꦺꦤ ꦮꦠ꧀ꦮꦴ ꦮꦶꦱꦺꦱꦺꦤ ꦄꦮꦸꦠ꧀ꦠꦠ꧀ꦠꦴꦠꦶ ꦄꦣꦶꦥ꧀ꦥꦴꦪꦺꦴ. ꦌꦠ꧀ꦡ ꦕ ꦏꦶꦫꦶꦪꦴꦤꦁ ꦄꦮꦶꦥꦴꦏꦠ꧀ꦠꦴ ꦣꦩ꧀ꦩꦨꦴꦮꦺꦴ ꦤ ꦮꦸꦠ꧀ꦠꦺꦴꦠꦶ. ꦪꦢꦶ ꦌꦮꦁ ꦮꦶꦥꦴꦏꦴ ꦤ ꦲꦺꦴꦤ꧀ꦠꦷꦠꦶ ꦄꦠ꧀ꦡꦨꦴꦮꦺꦴ ꦕ ꦤ ꦮꦠ꧀ꦠꦧ꧀ꦧꦺꦴꦠꦶ? ꦤ, ꦥꦕ꧀ꦕꦪꦸꦥ꧀ꦥꦤ꧀ꦤꦠ꧀ꦠꦴ. ꦌꦮꦚ꧀ꦕꦺ ꦏꦸꦱꦭꦴꦏꦸꦱꦭꦴꦤꦩ꧀ꦥꦶ ꦄꦠ꧀ꦡꦨꦴꦮꦺꦴ ꦄꦴꦥꦗ꧀ꦗꦠꦷꦠꦶ. ꦤꦥ꧀ꦥꦛꦶꦱꦶꦢ꧀ꦣꦺꦴ, ꦮꦶꦥꦴꦏꦱ꧀ꦱ ꦥꦤ ꦥꦣꦴꦤꦲꦺꦠꦸꦠꦴꦪ ꦥꦴꦏꦛꦠ꧀ꦠꦴ ꦣꦩ꧀ꦩꦨꦴꦮꦺꦴꦮ ꦠꦺꦱꦁ ꦮꦸꦠ꧀ꦠꦺꦴ. ꦏꦶꦫꦶꦪꦴꦤꦁ ꦥꦕ꧀ꦕꦪꦠ꧀ꦠꦴ ꦣꦩ꧀ꦩꦨꦴꦮꦺꦴ ꦄꦴꦥꦗ꧀ꦗꦠꦷꦠꦶ ꦕꦺ? ꦤꦴꦪꦁ ꦢꦺꦴꦱꦺꦴ ꦄꦥ꧀ꦥꦛꦶꦱꦶꦢ꧀ꦣꦠ꧀ꦠꦴ, ꦏꦩ꧀ꦩꦦꦭꦱꦩ꧀ꦧꦤ꧀ꦣꦱ꧀ꦱ ꦥꦤ ꦄꦲꦺꦠꦸꦠ꧀ꦠꦴ ꦣꦩ꧀ꦩꦨꦴꦮꦺꦴ ꦤ ꦮꦸꦠ꧀ꦠꦺꦴ. ꦄꦥꦶꦕ ‘‘ꦄꦪꦁ ꦆꦩꦱ꧀ꦱ ꦥꦕ꧀ꦕꦪꦺꦴ, ꦆꦢꦁ ꦥꦕ꧀ꦕꦪꦸꦥ꧀ꦥꦤ꧀ꦤ’’ꦤ꧀ꦠꦶ ꦌꦮꦁ ꦨꦺꦢꦁ ꦄꦏꦠ꧀ꦮꦴ ꦏꦺꦮꦭꦁ ꦏꦸꦱꦭꦴꦏꦸꦱꦭꦺ ꦮꦶꦥꦴꦏꦏꦶꦫꦶꦪꦣꦩ꧀ꦩꦺ ꦕ ꦱꦨꦴꦮꦠꦺꦴ ꦥꦕ꧀ꦕꦮꦺꦏ꧀ꦑꦤ꧀ꦠꦱ꧀ꦱ ꦣꦩ꧀ꦩꦥꦛꦶꦱꦩ꧀ꦨꦶꦢꦴ ꦄꦠ꧀ꦡꦥꦛꦶꦱꦩ꧀ꦨꦶꦢꦴ ꦕ ꦲꦺꦴꦠꦷꦠꦶꦥꦶ ꦠꦺꦱꦁ ꦄꦠ꧀ꦡꦣꦩ꧀ꦩꦠꦴ ꦤ ꦮꦸꦠ꧀ꦠꦴꦠꦶ ꦮꦺꦢꦶꦠꦧ꧀ꦧꦴ. ꦏꦸꦱꦭꦴꦏꦸꦱꦭꦮꦴꦫꦺꦱꦸ ꦕ ꦣꦩ꧀ꦩꦥꦛꦶꦱꦩ꧀ꦨꦶꦢꦴ ꦏꦸꦱꦭꦴꦏꦸꦱꦭꦴꦤꦁ ꦥꦕ꧀ꦕꦪꦨꦴꦮꦁ ꦱꦠ꧀ꦠꦶꦮꦶꦱꦺꦱꦁ ꦱꦤꦶꦥ꧀ꦦꦴꦢꦺꦠꦧ꧀ꦧꦠꦁ ꦥꦱ꧀ꦱꦤ꧀ꦠꦷ ꦤꦶꦥ꧀ꦦꦴꦢꦺꦠꦧ꧀ꦧꦴꦥꦺꦏ꧀ꦑꦴ ꦲꦺꦴꦠꦷꦠꦶ ꦠꦁꦱꦩ꧀ꦧꦤ꧀ꦣꦺꦤꦺꦮ ‘‘ꦠꦺꦱꦁ ꦮꦶꦥꦴꦏꦺ ꦚꦴꦟꦁ ꦄꦠ꧀ꦡꦥꦛꦶꦱꦩ꧀ꦨꦶꦢꦴ’’ꦠꦶ ꦮꦸꦠ꧀ꦠꦁ. ꦱꦨꦴꦮꦢꦱ꧀ꦱꦤꦩꦠ꧀ꦠꦩꦺꦮ ꦥꦤ ꦄꦠ꧀ꦡꦥꦛꦶꦱꦩ꧀ꦨꦶꦢꦴꦪ ꦏꦶꦕ꧀ꦕꦁ ꦤꦶꦥ꧀ꦦꦤ꧀ꦤꦦꦭꦩꦠ꧀ꦠꦢꦱ꧀ꦱꦤꦠꦺꦴꦠꦶ ꦠꦱ꧀ꦱꦴ ꦤꦶꦥ꧀ꦦꦴꦢꦏꦴꦤꦥꦺꦏ꧀ꦑꦠ꧀ꦠꦴ ꦮꦶꦥꦴꦏꦮꦴꦫꦺ ‘‘ꦠꦺꦱꦁ ꦮꦶꦥꦕ꧀ꦕꦤꦏꦺ ꦚꦴꦟꦁ ꦣꦩ꧀ꦩꦥꦛꦶꦱꦩ꧀ꦨꦶꦢꦴ’’ꦠꦶ ꦤ ꦮꦸꦠ꧀ꦠꦤ꧀ꦠꦶ ꦮꦺꦢꦶꦠꦧ꧀ꦧꦁ.

ꦱꦨꦴꦮꦥꦚ꧀ꦚꦠ꧀ꦠꦶꦪꦴꦠꦶ ꦤ ꦱꦠ꧀ꦠꦴꦢꦶꦥꦚ꧀ꦚꦠ꧀ꦠꦶꦪꦴ, ꦄꦮꦶꦥꦫꦷꦠꦥꦚ꧀ꦚꦠ꧀ꦠꦶꦪꦴ ꦮꦴ. ꦑꦺꦴꦨꦺꦠ꧀ꦮꦴꦠꦶ ꦭꦺꦴꦩꦲꦁꦱꦗꦤꦤꦱꦴꦣꦸꦏꦴꦫꦢꦴꦤꦴꦢꦷꦲꦶ ꦑꦺꦴꦨꦺꦠ꧀ꦮꦴ. ꦥꦸꦤ ꦣꦩ꧀ꦩꦱ꧀ꦱꦮꦤꦺ ꦗꦴꦤꦶꦱ꧀ꦱꦡꦴꦠꦶ ꦄꦥ꧀ꦥꦱ꧀ꦱꦸꦠꦠ꧀ꦠꦴ ꦢꦸꦠꦶꦪꦮꦴꦫꦁ ꦏꦡꦺꦤ꧀ꦠꦺꦴ ꦠꦢꦺꦮ ꦏꦡꦺꦱ꧀ꦱꦠꦷꦠꦶ ꦄꦣꦶꦥ꧀ꦥꦴꦪꦺꦴ.

꧗꧔꧖. ꦨꦹꦩꦶꦢꦱ꧀ꦱꦤꦠ꧀ꦡꦤ꧀ꦠꦶ ꦌꦠ꧀ꦡ ꦏꦴꦩꦴꦮꦕꦫꦴ ꦭꦺꦴꦏꦸꦠ꧀ꦠꦫꦴ ꦕ ꦨꦹꦩꦶ ‘‘ꦨꦹꦩꦷ’’ꦠꦶ ꦮꦺꦢꦶꦠꦧ꧀ꦧꦴ, ꦕꦶꦠ꧀ꦠꦸꦥ꧀ꦥꦴꦢꦴ ꦮꦴꦠꦶ.

ꦄꦨꦶꦣꦩ꧀ꦩꦨꦴꦗꦤꦷꦪꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.