꧓. ꦥꦫꦶꦚ꧀ꦚꦴꦮꦴꦫꦮꦟ꧀ꦟꦤꦴ

꧔꧓꧕-꧔꧘꧒. ꦥꦫꦶꦚ꧀ꦚꦴꦮꦴꦫꦺ ꦭꦺꦴꦏꦶꦪꦄꦧ꧀ꦪꦴꦏꦠꦩꦶꦱ꧀ꦱꦏꦴꦤꦶ ꦕꦴꦠꦶ ꦢꦸꦏ꧀ꦑꦱꦕ꧀ꦕꦥꦫꦶꦪꦴꦥꦤ꧀ꦤꦺꦲꦶ ꦌꦏꦤ꧀ꦠꦥꦫꦶꦚ꧀ꦚꦺꦪ꧀ꦪꦺꦲꦶ ꦭꦺꦴꦏꦶꦪꦄꦧ꧀ꦪꦴꦏꦠꦺꦲꦶ ꦩꦶꦱ꧀ꦱꦏꦠ꧀ꦠꦴ ꦠꦴꦤꦶ ꦈꦥꦴꦢꦴꦪ ꦩꦤꦶꦤ꧀ꦢ꧀ꦫꦶꦪꦴꦢꦷꦤꦁ ꦮꦺꦢꦤꦴꦏ꧀ꦑꦤ꧀ꦣꦴꦢꦷꦤꦁ ꦮꦶꦪ ꦥꦫꦶꦚ꧀ꦚꦺꦪ꧀ꦪꦠꦴ ꦕ ꦮꦸꦠ꧀ꦠꦴ. ꦪꦢꦶ ꦥꦫꦶꦚ꧀ꦚꦺꦪ꧀ꦪꦩꦶꦱ꧀ꦱꦏꦠ꧀ꦠꦴ ꦥꦫꦶꦚ꧀ꦚꦺꦪ꧀ꦪꦠꦴ ꦲꦺꦴꦠꦶ, ꦏꦱ꧀ꦩꦴ ꦣꦩ꧀ꦩꦪꦩꦏꦺ ‘‘ꦪꦺꦴ ꦏꦸꦱꦭꦁ ꦣꦩ꧀ꦩꦁ ꦨꦴꦮꦺꦠꦶ, ꦱꦺꦴ ꦄꦧ꧀ꦪꦴꦏꦠꦁ ꦣꦩ꧀ꦩꦁ ꦥꦫꦶꦗꦴꦤꦴꦠꦷ’’ꦠꦶꦄꦴꦢꦶꦤꦴ ꦄꦧ꧀ꦪꦴꦏꦠꦥꦢꦺꦤ ꦪꦺꦴꦗꦺꦠ꧀ꦮꦴ ꦪꦩꦏꦴꦤꦶ ꦤ ꦮꦸꦠ꧀ꦠꦴꦤꦷꦠꦶ? ꦪꦡꦴ ‘‘ꦏꦸꦱꦭꦁ ꦨꦴꦮꦺꦩꦶ, ꦄꦏꦸꦱꦭꦁ ꦥꦗꦲꦴꦩꦷ’’ꦠꦶ ꦏꦸꦱꦭꦴꦏꦸꦱꦭꦺꦱꦸ ꦨꦴꦮꦤꦴꦥꦲꦴꦤꦴꦨꦶꦤꦶꦮꦺꦱꦺꦴ ꦲꦺꦴꦠꦶ, ꦠꦡꦴ ‘‘ꦮꦺꦢꦤꦴꦏ꧀ꦑꦤ꧀ꦣꦺꦴ ꦄꦤꦶꦕ꧀ꦕꦺꦴ, ꦣꦩ꧀ꦩꦴꦪꦠꦤꦁ ꦄꦤꦶꦕ꧀ꦕ’’ꦤ꧀ꦠꦶꦄꦴꦢꦶꦤꦴ ꦑꦤ꧀ꦣꦴꦢꦷꦱꦸ ꦥꦫꦶꦗꦴꦤꦴꦨꦶꦤꦶꦮꦺꦱꦺꦴ ꦲꦺꦴꦠꦶ, ꦠꦠ꧀ꦡ ꦮꦺꦢꦤꦴꦏ꧀ꦑꦤ꧀ꦣꦴꦢꦪꦺꦴ ‘‘ꦄꦤꦶꦕ꧀ꦕ’’ꦤ꧀ꦠꦶꦄꦴꦢꦶꦤꦴ ꦥꦫꦶꦗꦴꦤꦶꦠꦧ꧀ꦧꦴ, ꦠꦺ ꦕ ꦮꦺꦢꦤꦴꦏ꧀ꦑꦤ꧀ꦣꦴꦢꦶꦨꦴꦮꦁ ꦒꦲꦺꦠ꧀ꦮꦴ ꦥꦫꦶꦗꦴꦤꦶꦠꦧ꧀ꦧꦴ, ꦤ ꦄꦧ꧀ꦪꦴꦏꦠꦨꦴꦮꦤ꧀ꦠꦶ.

ꦏꦱ꧀ꦩꦴ ꦥꦤꦺꦠ꧀ꦡ ꦢꦸꦏ꧀ꦑꦱꦕ꧀ꦕꦨꦴꦗꦤꦷꦪꦺ ꦄꦴꦒꦠꦱ꧀ꦱ ꦢꦺꦴꦩꦤꦱ꧀ꦱꦱ꧀ꦱ ꦥꦲꦴꦠꦧ꧀ꦧꦠꦴꦮ ꦮꦸꦠ꧀ꦠꦴ, ꦤ ꦥꦫꦶꦚ꧀ꦚꦺꦪ꧀ꦪꦠꦴ, ꦤꦤꦸ ꦢꦸꦏ꧀ꦑꦱꦕ꧀ꦕꦥꦫꦶꦪꦴꦥꦤ꧀ꦤꦴ ꦮꦺꦢꦤꦴꦏ꧀ꦑꦤ꧀ꦣꦴꦢꦪꦺꦴ ꦏꦸꦱꦭꦴꦏꦸꦱꦭꦨꦴꦮꦺꦤ ꦄꦒ꧀ꦒꦲꦶꦠꦴ ꦏꦸꦱꦭꦴꦏꦸꦱꦭꦴꦥꦶ ꦥꦫꦶꦚ꧀ꦚꦺꦪ꧀ꦪꦴꦠꦶ? ꦱꦕ꧀ꦕꦁ, ꦪꦡꦴ ꦥꦤ ꦮꦺꦢꦤꦴꦏ꧀ꦑꦤ꧀ꦣꦴꦢꦶꦨꦴꦮꦺꦴ ꦨꦴꦮꦺꦠꦧ꧀ꦧꦥꦲꦴꦠꦧ꧀ꦧꦨꦴꦮꦺꦲꦶ ꦮꦶꦤꦴꦥꦶ ꦲꦺꦴꦠꦶ, ꦤ ꦌꦮꦁ ꦢꦺꦴꦩꦤꦱ꧀ꦱꦶꦤ꧀ꦢ꧀ꦫꦶꦪꦨꦴꦮꦺꦴ ꦥꦲꦴꦠꦧ꧀ꦧꦨꦴꦮꦺꦤ ꦮꦶꦤꦴ ꦲꦺꦴꦠꦷꦠꦶ ꦆꦩꦁ ꦮꦶꦱꦺꦱꦁ ꦢꦱ꧀ꦱꦺꦠꦸꦁ ꦢꦺꦴꦩꦤꦱ꧀ꦱꦶꦤ꧀ꦢ꧀ꦫꦶꦪꦱ꧀ꦱ ꦥꦲꦴꦠꦧ꧀ꦧꦠꦴꦮ ꦆꦣ ꦮꦸꦠ꧀ꦠꦴ, ꦤ ꦥꦫꦶꦚ꧀ꦚꦺꦪ꧀ꦪꦨꦴꦮꦱ꧀ꦱ ꦄꦨꦴꦮꦠꦺꦴꦠꦶ ꦢꦛ꧀ꦜꦧ꧀ꦧꦺꦴ. ꦄꦏꦸꦱꦭꦁ ꦌꦏꦤ꧀ꦠꦠꦺꦴ ꦥꦲꦴꦠꦧ꧀ꦧꦩꦺꦮꦴꦠꦶ ꦌꦠꦺꦤ ꦥꦲꦴꦠꦧ꧀ꦧꦩꦺꦮ, ꦤ ꦄꦥ꧀ꦥꦲꦴꦠꦧ꧀ꦧꦤ꧀ꦠꦶ ꦄꦥ꧀ꦥꦲꦴꦠꦧ꧀ꦧꦩꦺꦮ ꦤꦶꦮꦴꦫꦺꦠꦶ, ꦤ ꦥꦫꦶꦚ꧀ꦚꦺꦪ꧀ꦪꦨꦴꦮꦤ꧀ꦠꦶ ꦢꦛ꧀ꦜꦧ꧀ꦧꦁ. ꦄꦚ꧀ꦚꦶꦤ꧀ꦢ꧀ꦫꦶꦪꦁ ꦨꦴꦮꦺꦠꦧ꧀ꦧꦤꦶꦛ꧀ꦜꦁ, ꦤ ꦥꦤ ꦱꦕ꧀ꦖꦶꦏꦴꦠꦧ꧀ꦧꦤꦶꦛ꧀ꦜꦤ꧀ꦠꦶ ꦨꦴꦮꦺꦠꦧ꧀ꦧꦨꦴꦮꦺꦴ ꦌꦮ ꦠꦱ꧀ꦱ ꦒꦲꦶꦠꦺꦴꦠꦶ. ‘‘ꦢ꧀ꦮꦺ ꦥꦸꦒ꧀ꦒꦭꦴ’’ꦠꦶꦄꦴꦢꦶ ‘‘ꦕꦏ꧀ꦑꦸꦤ꧀ꦢ꧀ꦫꦶꦪꦁ ꦤ ꦥꦫꦶꦗꦴꦤꦴꦠꦷ’’ꦠꦶꦄꦴꦢꦶꦏꦱ꧀ꦱ ꦥꦫꦠꦺꦴ ꦭꦶꦑꦶꦠꦧ꧀ꦧꦁ ꦈꦥ꧀ꦥꦛꦶꦥꦴꦛꦶꦪꦴ ꦭꦶꦑꦶꦠꦤ꧀ꦠꦶ ꦢꦛ꧀ꦜꦧ꧀ꦧꦁ. ꦕꦏ꧀ꦑꦸꦤ꧀ꦢ꧀ꦫꦶꦪꦩꦹꦭꦏꦚ꧀ꦲꦶ ꦄꦠꦶꦏ꧀ꦏꦩꦶꦠ꧀ꦮꦴ ꦢꦺꦴꦩꦤꦱ꧀ꦱꦶꦤ꧀ꦢ꧀ꦫꦶꦪꦩꦹꦭꦏꦺ ꦆꦢꦁ ꦮꦸꦠ꧀ꦠꦁ ‘‘ꦢ꧀ꦮꦺ ꦥꦸꦒ꧀ꦒꦭꦴ ꦢꦺꦴꦩꦤꦱ꧀ꦱꦶꦤ꧀ꦢ꧀ꦫꦶꦪꦁ ꦤ ꦥꦗꦲꦤ꧀ꦠꦶ ꦤꦺꦴ ꦕ ꦄꦚ꧀ꦚꦶꦤ꧀ꦢ꧀ꦫꦶꦪꦁ ꦤ ꦨꦴꦮꦺꦤ꧀ꦠꦷ’’ꦠꦶ (ꦪꦩ. ꧓.ꦆꦤ꧀ꦢ꧀ꦫꦶꦪꦪꦩꦏ.꧔꧔꧐).

ꦌꦠ꧀ꦡ ꦕ ꦥꦸꦡꦸꦗ꧀ꦗꦤꦺꦴ, ꦄꦛ꧀ꦜ ꦕ ꦄꦫꦶꦪꦴꦠꦶ ꦤꦮ ꦥꦸꦒ꧀ꦒꦭꦴ. ꦠꦺꦱꦸ ꦥꦸꦡꦸꦗ꧀ꦗꦤꦺꦴ ꦨꦧ꧀ꦧꦴꦨꦧ꧀ꦧꦮꦱꦺꦤ ꦢꦸꦮꦶꦣꦺꦴ, ꦱꦺꦴ ‘‘ꦥꦸꦡꦸꦗ꧀ꦗꦤꦺꦴ’’ꦠꦶ ꦄꦴꦒꦠꦛ꧀ꦜꦴꦤꦺꦱꦸ ‘‘ꦖ ꦥꦸꦒ꧀ꦒꦭꦴ ꦕꦏ꧀ꦑꦸꦤ꧀ꦢ꧀ꦫꦶꦪꦚ꧀ꦕ ꦤ ꦥꦫꦶꦗꦴꦤꦶꦠ꧀ꦡ ꦢꦺꦴꦩꦤꦱ꧀ꦱꦶꦤ꧀ꦢ꧀ꦫꦶꦪꦚ꧀ꦕ ꦤ ꦥꦗꦲꦶꦠ꧀ꦡꦴ’’ꦠꦶꦄꦴꦢꦷꦱꦸ ꦕ ꦄꦨꦶꦤ꧀ꦢꦶꦠ꧀ꦮꦴ ꦒꦲꦶꦠꦺꦴ. ‘‘ꦪꦺ ꦥꦸꦡꦸꦗ꧀ꦗꦤꦴ ꦩꦒ꧀ꦒꦁ ꦥꦛꦶꦭꦨꦶꦱ꧀ꦱꦤ꧀ꦠꦷ’’ꦠꦶ (ꦪꦩ. ꧑.ꦱꦕ꧀ꦕꦪꦩꦏ.꧔꧙, ꧕꧑-꧕꧒) ꦄꦴꦒꦠꦛ꧀ꦜꦴꦤꦺꦱꦸ ‘‘ꦥꦚ꧀ꦕ ꦥꦸꦒ꧀ꦒꦭꦴ ꦕꦏ꧀ꦑꦸꦤ꧀ꦢ꧀ꦫꦶꦪꦚ꧀ꦕ ꦥꦫꦶꦗꦴꦤꦶꦱ꧀ꦱꦤ꧀ꦠꦶ ꦢꦺꦴꦩꦤꦱ꧀ꦱꦶꦤ꧀ꦢ꧀ꦫꦶꦪꦚ꧀ꦕ ꦥꦗꦲꦶꦱ꧀ꦱꦤ꧀ꦠꦷ’’ꦠꦶꦄꦴꦢꦷꦱꦸ (ꦪꦩ. ꧓.ꦆꦤ꧀ꦢ꧀ꦫꦶꦪꦪꦩꦏ.꧔꧕꧑) ꦕ ꦨꦧ꧀ꦧꦺꦴ ꦌꦮ ꦨꦶꦤ꧀ꦢꦶꦠ꧀ꦮꦴ ꦒꦲꦶꦠꦺꦴ. ‘‘ꦪꦺ ꦕ ꦥꦸꦡꦸꦗ꧀ꦗꦤꦴ ꦩꦒ꧀ꦒꦁ ꦤ ꦥꦛꦶꦭꦨꦶꦱ꧀ꦱꦤ꧀ꦠꦷ’’ꦠꦶ (ꦪꦩ. ꧑.ꦱꦕ꧀ꦕꦪꦩꦏ.꧕꧑) ꦄꦴꦒꦠꦛ꧀ꦜꦴꦤꦺꦱꦸ ‘‘ꦠꦪꦺꦴ ꦥꦸꦒ꧀ꦒꦭꦴ ꦢꦺꦴꦩꦤꦱ꧀ꦱꦶꦤ꧀ꦢ꧀ꦫꦶꦪꦚ꧀ꦕ ꦤꦥ꧀ꦥꦗꦲꦶꦱ꧀ꦱꦤ꧀ꦠꦶ ꦕꦏ꧀ꦑꦸꦤ꧀ꦢ꧀ꦫꦶꦪꦚ꧀ꦕ ꦤ ꦥꦫꦶꦗꦴꦤꦶꦱ꧀ꦱꦤ꧀ꦠꦷ’’ꦠꦶꦄꦴꦢꦷꦱꦸ (ꦪꦩ. ꧓.ꦆꦤ꧀ꦢ꧀ꦫꦶꦪꦪꦩꦏ.꧔꧕꧕) ꦕ ꦄꦨꦧ꧀ꦧꦺꦴ ꦌꦮ. ꦄꦒ꧀ꦒꦦꦭꦱꦩꦔ꧀ꦒꦷ ꦕ ꦥꦜꦩꦦꦭꦱꦩꦔ꧀ꦒꦷ ꦄꦫꦲꦴ ꦕꦴꦠꦶ ꦢꦸꦮꦶꦣꦺꦴ. ꦱꦺꦴꦥꦶ ‘‘ꦄꦫꦲꦴ’’ꦠꦶ ꦄꦴꦒꦠꦛ꧀ꦜꦴꦤꦺꦱꦸ ‘‘ꦠꦪꦺꦴ ꦥꦸꦒ꧀ꦒꦭꦴ ꦄꦤꦚ꧀ꦚꦴꦠꦚ꧀ꦚꦱ꧀ꦱꦴꦩꦷꦠꦶꦤ꧀ꦢ꧀ꦫꦶꦪꦚ꧀ꦕ ꦨꦴꦮꦶꦠ꧀ꦡ ꦢꦺꦴꦩꦤꦱ꧀ꦱꦶꦤ꧀ꦢ꧀ꦫꦶꦪꦚ꧀ꦕ ꦥꦗꦲꦶꦠ꧀ꦡꦴ’’ꦠꦶꦄꦴꦢꦷꦱꦸ (ꦪꦩ. ꧓.ꦆꦤ꧀ꦢ꧀ꦫꦶꦪꦪꦩꦏ.꧔꧔꧔) ꦕ ꦄꦨꦶꦤ꧀ꦢꦶꦠ꧀ꦮꦴ ꦒꦲꦶꦠꦺꦴ. ‘‘ꦪꦺꦴ ꦄꦒ꧀ꦒꦦꦭꦁ ꦱꦕ꧀ꦖꦶꦏꦫꦺꦴꦠꦷ’’ꦠꦶ (ꦪꦩ. ꧓.ꦆꦤ꧀ꦢ꧀ꦫꦶꦪꦪꦩꦏ.꧔꧔꧖) ꦄꦴꦒꦠꦛ꧀ꦜꦴꦤꦺꦱꦸ ‘‘ꦠꦪꦺꦴ ꦥꦸꦒ꧀ꦒꦭꦴ ꦢꦺꦴꦩꦤꦱ꧀ꦱꦶꦤ꧀ꦢ꧀ꦫꦶꦪꦁ ꦥꦗꦲꦶꦠ꧀ꦡ, ꦤꦺꦴ ꦕ ꦄꦚ꧀ꦚꦴꦠꦴꦮꦶꦤ꧀ꦢ꧀ꦫꦶꦪꦁ ꦱꦕ꧀ꦖꦶꦏꦫꦶꦠ꧀ꦡꦴ’’ꦠꦶꦄꦴꦢꦷꦱꦸ (ꦪꦩ. ꧓.ꦆꦤ꧀ꦢ꧀ꦫꦶꦪꦪꦩꦏ.꧔꧔꧔) ꦕ ꦥꦜꦩꦦꦭꦱꦩꦔ꧀ꦒꦷ ꦕ ꦨꦶꦤ꧀ꦢꦶꦠ꧀ꦮꦴ ꦒꦲꦶꦠꦺꦴ. ‘‘ꦪꦺꦴ ꦄꦒ꧀ꦒꦦꦭꦁ ꦱꦕ꧀ꦖꦴꦏꦴꦱꦷ’’ꦠꦶ (ꦪꦩ. ꧓.ꦆꦤ꧀ꦢ꧀ꦫꦶꦪꦪꦩꦏ.꧔꧔꧓, ꧔꧔꧖) ꦄꦴꦒꦠꦛ꧀ꦜꦴꦤꦺꦱꦸ ꦆꦠꦫꦺꦴꦮꦴꦠꦶ ꦌꦮꦁ ꦥꦸꦒ꧀ꦒꦭꦨꦺꦢꦁ ꦚꦠ꧀ꦮꦴ ꦠꦠ꧀ꦡ ꦠꦠ꧀ꦡ ꦱꦤ꧀ꦤꦶꦛ꧀ꦜꦴꦤꦺꦤ ꦒꦲꦶꦠꦥꦸꦒ꧀ꦒꦭꦺ ꦤꦶꦢ꧀ꦣꦴꦫꦺꦠ꧀ꦮꦴ ꦮꦶꦱ꧀ꦱꦗ꧀ꦗꦤꦁ ꦪꦺꦴꦗꦺꦠꦧ꧀ꦧꦤ꧀ꦠꦶ.

ꦥꦫꦶꦚ꧀ꦚꦴꦮꦴꦫꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦆꦤ꧀ꦢ꧀ꦫꦶꦪꦪꦩꦏꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦪꦩꦏꦥꦏꦫꦟ-ꦩꦹꦭꦛꦷꦏꦴ ꦱꦩꦠ꧀ꦠꦴ.