꧗. ꦣꦩ꧀ꦩꦏꦡꦴꦮꦟ꧀ꦟꦤꦴ

꧘꧘꧗-꧘꧘꧘. ꦣꦩ꧀ꦩꦏꦡꦴꦪꦁ ꦫꦹꦥꦛ꧀ꦜꦠꦺꦴ ꦄꦚ꧀ꦚꦱ꧀ꦱ ꦫꦹꦥꦱ꧀ꦱ ꦄꦨꦴꦮꦴꦠꦶ ꦪꦺꦴ ꦫꦹꦥꦱ꧀ꦱ ꦤꦶꦪꦴꦩꦺꦴ ꦮꦸꦕ꧀ꦕꦺꦪ꧀ꦪ, ꦱꦺꦴ ꦫꦹꦥꦛ꧀ꦜꦺꦴ ꦤꦴꦩ ꦏꦺꦴꦕꦶ ꦫꦹꦥꦠꦺꦴ ꦄꦚ꧀ꦚꦺꦴ ꦤꦠ꧀ꦡꦷꦠꦶ ꦫꦹꦥꦛ꧀ꦜꦠꦺꦴ ꦄꦚ꧀ꦚꦁ ꦫꦹꦥꦚ꧀ꦕ ꦤ ꦲꦺꦴꦠꦶ, ꦠꦱ꧀ꦩꦴ ꦫꦹꦥꦁ ꦫꦹꦥꦩꦺꦮ, ꦤ ꦮꦺꦢꦤꦴꦢꦶꦱꦨꦴꦮꦤ꧀ꦠꦶ ꦄꦣꦶꦥ꧀ꦥꦴꦪꦺꦤ ‘‘ꦫꦹꦥꦁ ꦫꦹꦥꦛ꧀ꦜꦺꦤ ꦤꦶꦪꦠ’’ꦤ꧀ꦠꦶ ꦮꦠ꧀ꦠꦧ꧀ꦧꦁ, ꦤ ꦄꦚ꧀ꦚꦡꦴ ꦫꦹꦥꦛ꧀ꦜꦺꦤ ꦤꦶꦪꦴꦩꦺꦤꦴꦠꦶ ꦄꦣꦶꦥ꧀ꦥꦴꦪꦺꦴ. ꦠꦠ꧀ꦡ ꦫꦹꦥꦠꦺꦴ ꦄꦚ꧀ꦚꦱ꧀ꦱ ꦫꦹꦥꦛ꧀ꦜꦱ꧀ꦱ ꦄꦨꦴꦮꦺ ꦢꦱ꧀ꦱꦶꦠꦺ ꦫꦹꦥꦛ꧀ꦜꦠꦺꦴ ꦄꦚ꧀ꦚꦱ꧀ꦱ ꦫꦹꦥꦱ꧀ꦱ ꦄꦨꦴꦮꦺꦴ ꦢꦱ꧀ꦱꦶꦠꦺꦴꦪꦺꦮ ꦤꦴꦩ ꦲꦺꦴꦠꦷꦠꦶ ꦠꦩꦺꦮ ꦫꦹꦥꦠꦺꦴ ꦄꦚ꧀ꦚꦱ꧀ꦱ ꦫꦹꦥꦛ꧀ꦜꦱ꧀ꦱ ꦄꦨꦴꦮꦁ ꦢꦱ꧀ꦱꦺꦤ꧀ꦠꦺꦴ ‘‘ꦫꦹꦥꦱꦨꦴꦮꦺꦴ ꦲꦷ’’ꦠꦶꦄꦴꦢꦶꦩꦴꦲ. ꦌꦱ ꦮꦺꦴꦲꦴꦫꦺꦴꦠꦶ ꦫꦹꦥꦱ꧀ꦱ ꦱꦨꦴꦮꦺꦴ ꦫꦹꦥꦱꦨꦴꦮꦺꦴ, ꦫꦹꦥꦱ꧀ꦱ ꦄꦠ꧀ꦡꦺꦴ ꦫꦹꦥꦛ꧀ꦜꦺꦴꦠꦶ ꦌꦮꦁ ꦄꦚ꧀ꦚꦠ꧀ꦠꦁ ꦒꦲꦺꦠ꧀ꦮꦴ ꦮꦶꦪ ꦥꦮꦠ꧀ꦠꦺꦴ ꦫꦹꦥꦱꦨꦴꦮꦮꦺꦴꦲꦴꦫꦺꦴ ꦫꦹꦥꦛ꧀ꦜꦮꦺꦴꦲꦴꦫꦺꦴ ꦮꦴ ꦮꦺꦢꦤꦴꦢꦷꦲꦶ ꦤꦴꦤꦠ꧀ꦠꦩꦺꦮ ꦱꦺꦴ ꦱꦨꦴꦮꦺꦴꦠꦶ ꦤꦴꦤꦠ꧀ꦠꦱꦚ꧀ꦚꦴꦥꦤꦠ꧀ꦡꦁ ꦲꦺꦴꦠꦷꦠꦶ ꦄꦠ꧀ꦡꦺꦴ. ꦠꦱ꧀ꦩꦴꦠꦶ ꦫꦹꦥꦱ꧀ꦱ ꦫꦹꦥꦛ꧀ꦜꦺꦤ ꦄꦤꦚ꧀ꦚꦠ꧀ꦠꦴ. ‘‘ꦫꦹꦥꦁ ꦫꦹꦥꦩꦺꦮ, ꦤ ꦮꦺꦢꦤꦴꦢꦶꦱꦨꦴꦮ’’ꦤ꧀ꦠꦶ ꦄꦮꦠ꧀ꦮꦴ ‘‘ꦫꦹꦥꦁ ꦫꦹꦥꦛ꧀ꦜꦺꦤ ꦤꦶꦪꦠ’’ꦤ꧀ꦠꦶ ꦮꦢꦠꦺꦴ ꦠꦚ꧀ꦕ ꦮꦕꦤꦁ ꦮꦸꦠ꧀ꦠꦥ꧀ꦥꦏꦴꦫꦺꦤ ꦱꦢꦺꦴꦱꦁ, ꦄꦡ ꦏꦱ꧀ꦩꦴ ‘‘ꦫꦹꦥꦚ꧀ꦲꦶ ꦫꦹꦥꦛ꧀ꦜꦺꦤ ꦤꦶꦪꦠꦤ꧀ꦠꦶ ꦫꦹꦥꦁ ꦫꦹꦥꦩꦺꦮ, ꦤ ꦮꦺꦢꦤꦴꦢꦶꦱꦨꦴꦮꦤ꧀ꦠꦶ ꦄꦣꦶꦥ꧀ꦥꦴꦪꦺꦤ ꦮꦠ꧀ꦠꦧ꧀ꦧ’’ꦤ꧀ꦠꦶ ꦮꦢꦤ꧀ꦠꦺꦴ ‘‘ꦫꦹꦥꦁ ꦫꦹꦥꦛ꧀ꦜꦺꦤ ꦤꦶꦪꦠ’’ꦤ꧀ꦠꦶ ꦥꦛꦶꦗꦴꦤꦴꦠꦷꦠꦶ ꦄꦠ꧀ꦡꦺꦴ ꦢꦛ꧀ꦜꦧ꧀ꦧꦺꦴ. ꦤꦤꦸ ꦕꦺꦠꦁ ꦄꦠ꧀ꦠꦤꦴꦮ ꦮꦸꦠ꧀ꦠꦁ, ꦤ ꦥꦫꦺꦤꦴꦠꦶ ꦥꦛꦶꦗꦴꦤꦴꦠꦷꦠꦶ ꦤ ꦮꦠ꧀ꦠꦧ꧀ꦧꦤ꧀ꦠꦶ? ꦤ, ꦄꦠ꧀ꦠꦴꦤꦩ꧀ꦥꦶ ꦥꦫꦁ ꦮꦶꦪ ꦮꦕꦤꦠꦺꦴ. ꦮꦠ꧀ꦠꦧ꧀ꦧꦤ꧀ꦠꦶ ꦮꦴ ꦱꦏꦮꦴꦢꦶꦤꦴ ꦮꦠ꧀ꦠꦧ꧀ꦧꦤ꧀ꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦪꦢꦶ ꦕ ꦠꦺꦤ ꦮꦠ꧀ꦠꦧ꧀ꦧꦁ ꦥꦛꦶꦗꦴꦤꦴꦠꦶ ꦕ ꦱꦺꦴ ꦌꦠꦩꦠ꧀ꦡꦤ꧀ꦠꦶ, ꦄꦡ ꦏꦱ꧀ꦩꦴ ꦥꦛꦶꦗꦴꦤꦴꦠꦶ ꦱꦏꦮꦴꦢꦷꦠꦶ ꦄꦪꦩꦺꦠ꧀ꦡ ꦄꦠ꧀ꦡꦺꦴ. ꦄꦠ꧀ꦡꦤ꧀ꦠꦫꦮꦱꦺꦤꦴꦠꦶ ꦠꦠ꧀ꦡ ꦮꦸꦠ꧀ꦠꦩꦺꦮ ꦏꦴꦫꦟꦁ ꦤꦶꦒꦹꦲꦶꦠ꧀ꦮꦴ ꦥꦫꦺꦤ ꦕꦺꦴꦢꦶꦠꦤ꧀ꦠꦶ ꦠꦩꦺꦮ ꦏꦴꦫꦟꦁ ꦢꦱ꧀ꦱꦺꦠ꧀ꦮꦴ ꦕꦺꦴꦢꦤꦁ ꦤꦶꦮꦠ꧀ꦠꦺꦠꦶ. ꦆꦠꦺꦴ ꦄꦚ꧀ꦚꦡꦴꦠꦶ ꦫꦹꦥꦴꦢꦶꦱꦨꦴꦮꦩꦠ꧀ꦠꦁ ꦩꦸꦚ꧀ꦕꦶꦠ꧀ꦮꦴ ꦠꦺꦤ ꦥꦫꦶꦏꦥ꧀ꦥꦶꦠꦁ ꦤꦶꦪꦠꦁ ꦤꦠ꧀ꦡꦷꦠꦶ ꦠꦱ꧀ꦱ ꦥꦫꦶꦏꦥ꧀ꦥꦶꦠꦱ꧀ꦱ ꦤꦶꦮꦠ꧀ꦠꦤꦠ꧀ꦡꦁ ꦥꦸꦤ ꦠꦺꦤꦺꦮ ꦤꦪꦺꦤ ꦕꦺꦴꦢꦺꦠꦸꦁ ‘‘ꦩꦶꦕ꧀ꦖꦠ꧀ꦠꦤꦶꦪꦠ’’ꦤ꧀ꦠꦶꦄꦴꦢꦶꦩꦴꦲꦴꦠꦶ ꦄꦠ꧀ꦡꦺꦴ.

ꦣꦩ꧀ꦩꦏꦡꦴꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦌꦏꦮꦷꦱꦠꦶꦩꦮꦒ꧀ꦒꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.