꧓-꧖. ꦆꦟꦱꦸꦠ꧀ꦠꦴꦢꦶꦮꦟ꧀ꦟꦤꦴ

꧔꧕-꧔꧘. ꦠꦠꦶꦪꦺ ꦢꦭꦶꦢ꧀ꦢꦺꦴ ꦤꦴꦩ ꦢꦸꦒ꧀ꦒꦠꦺꦴ, ꦠꦱ꧀ꦱ ꦨꦴꦮꦺꦴ ꦢꦴꦭꦶꦢ꧀ꦢꦶꦪꦁ. ꦤ ꦌꦠꦱ꧀ꦱ ꦱꦏꦁ ꦱꦴꦥꦠꦺꦪ꧀ꦪꦤ꧀ꦠꦶ ꦄꦱ꧀ꦱꦏꦺꦴ, ꦄꦱꦴꦥꦠꦺꦪ꧀ꦪꦺꦴ. ꦠꦺꦤꦴꦲ ‘‘ꦄꦠ꧀ꦠꦤꦺꦴ ꦱꦤ꧀ꦠꦏꦺꦤ ꦫꦲꦶꦠꦺꦴ’’ꦠꦶ. ‘‘ꦧꦸꦢ꧀ꦣꦺꦴ ꦣꦩ꧀ꦩꦺꦴ ꦱꦔ꧀ꦓꦺꦴ’’ꦠꦶ ꦮꦸꦠ꧀ꦠꦺ ‘‘ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ ꦨꦒꦮꦴ, ꦱ꧀ꦮꦴꦏ꧀ꦑꦴꦠꦺꦴ ꦣꦩ꧀ꦩꦺꦴ, ꦱꦸꦥ꧀ꦥꦛꦶꦥꦤ꧀ꦤꦺꦴ ꦱꦔ꧀ꦓꦺꦴ’’ꦠꦶ ꦏꦺꦤꦕꦶ ꦄꦏꦩ꧀ꦥꦶꦪꦨꦴꦮꦺꦤ ꦎꦏꦥ꧀ꦥꦤꦁ ꦫꦠꦤꦠ꧀ꦠꦪꦒꦸꦟꦺ ꦎꦒꦴꦲꦺꦠ꧀ꦮꦴ ꦏꦥ꧀ꦥꦤꦁ ꦎꦏꦥ꧀ꦥꦤꦱꦢ꧀ꦣꦴ ꦤꦴꦩ. ‘‘ꦆꦢꦁ ꦄꦏꦸꦱꦭꦁ ꦏꦩ꧀ꦩꦁ ꦤꦺꦴ ꦱꦏꦁ, ꦆꦢꦁ ꦥꦤ ꦏꦩ꧀ꦩꦁ ꦱꦏ’’ꦤ꧀ꦠꦶ ꦌꦮꦁ ꦧ꧀ꦪꦠꦶꦫꦺꦏꦠꦺꦴ ꦄꦤ꧀ꦮꦪꦠꦺꦴ ꦕ ꦏꦩ꧀ꦩꦱ꧀ꦱꦏꦠꦗꦴꦤꦤꦥꦚ꧀ꦚꦴ ꦏꦩ꧀ꦩꦱ꧀ꦱꦏꦠꦥꦚ꧀ꦚꦴ. ꦠꦶꦮꦶꦣꦚ꧀ꦲꦶ ꦢꦸꦕ꧀ꦕꦫꦶꦠꦁ ꦄꦠ꧀ꦠꦤꦴ ꦏꦠꦩ꧀ꦥꦶ ꦱꦏꦏꦩ꧀ꦩꦁ ꦤꦴꦩ ꦤ ꦲꦺꦴꦠꦶ ꦄꦠ꧀ꦡꦨꦚ꧀ꦗꦤꦠꦺꦴ. ꦱꦸꦕꦫꦶꦠꦁ ꦱꦏꦏꦩ꧀ꦩꦁ ꦤꦴꦩ ꦄꦠ꧀ꦡꦗꦤꦤꦠꦺꦴ. ꦆꦟꦴꦢꦴꦤꦱ꧀ꦩꦶꦤ꧀ꦠꦶ ꦥꦕ꧀ꦕꦠ꧀ꦠꦮꦕꦤꦠ꧀ꦡꦺ ꦌꦠꦁ ꦨꦸꦩ꧀ꦩꦤ꧀ꦠꦶ ꦄꦴꦲ ‘‘ꦆꦟꦒ꧀ꦒꦲꦟꦁ ꦮꦢꦴꦩꦷ’’ꦠꦶ.

ꦏꦛꦒ꧀ꦒꦴꦲꦺꦴꦠꦶ ꦏꦠꦁ ꦱꦧ꧀ꦧꦱꦺꦴ ꦱꦶꦢ꧀ꦣꦩꦺꦮ ꦏꦠ꧀ꦮꦴ ꦒꦲꦟꦁ. ꦱꦺꦴ ꦥꦤ ꦮꦶꦗꦪꦭꦴꦨꦺꦴ ꦲꦺꦴꦠꦷꦠꦶ ꦄꦴꦲ ‘‘ꦗꦪꦒ꧀ꦒꦴꦲꦺꦴ’’ꦠꦶ. ꦲꦶꦫꦶꦩꦤꦺꦴ ꦌꦠꦱ꧀ꦱꦴꦠꦶ ꦲꦶꦫꦶꦩꦤꦺꦴꦠꦶ ꦄꦴꦲ ‘‘ꦲꦶꦫꦶꦱꦩ꧀ꦥꦪꦸꦠ꧀ꦠꦕꦶꦠ꧀ꦠꦺꦴ’’ꦠꦶ, ꦥꦴꦥꦗꦶꦒꦸꦕ꧀ꦖꦤꦭꦏ꧀ꦑꦟꦴꦪ ꦲꦶꦫꦶꦪꦴ ꦱꦩ꧀ꦥꦪꦸꦠ꧀ꦠꦕꦶꦠ꧀ꦠꦺꦴꦠꦶ ꦄꦠ꧀ꦡꦺꦴ. ꦎꦠ꧀ꦠꦥ꧀ꦥꦠꦶ ꦈꦧ꧀ꦧꦶꦗ꧀ꦗꦠꦶ ꦨꦴꦪꦠꦶ ꦱꦷꦭꦺꦤꦴꦠꦶ ꦎꦠ꧀ꦠꦥ꧀ꦥꦷ, ꦎꦠ꧀ꦠꦥ꧀ꦥꦺꦤ ꦱꦩꦤ꧀ꦤꦴꦒꦠꦺꦴ. ꦤꦶꦫꦴꦩꦶꦱꦁ ꦱꦸꦑꦤ꧀ꦠꦶ ꦠꦠꦶꦪꦗ꧀ꦙꦴꦤꦱꦸꦑꦁ ꦢꦹꦫꦱꦩꦸꦱ꧀ꦱꦴꦫꦶꦠꦏꦴꦩꦴꦩꦶꦱꦠ꧀ꦠꦴ. ꦈꦥꦺꦏ꧀ꦑꦤ꧀ꦠꦶ ꦕꦠꦸꦠ꧀ꦡꦗ꧀ꦙꦴꦤꦸꦥꦺꦏ꧀ꦑꦁ, ꦤ ꦪꦁ ꦏꦶꦚ꧀ꦕꦶ ꦈꦥꦺꦏ꧀ꦑꦴꦮꦺꦢꦤꦤ꧀ꦠꦶ ꦄꦴꦲ ‘‘ꦕꦠꦸꦠ꧀ꦡꦗ꧀ꦙꦴꦤꦸꦥꦺꦏ꧀ꦑ’’ꦤ꧀ꦠꦶ. ꦄꦴꦫꦢ꧀ꦣꦮꦷꦫꦶꦪꦺꦴꦠꦶ ꦥꦒ꧀ꦒꦲꦶꦠꦥꦫꦶꦥꦸꦟ꧀ꦟꦏꦴꦪꦶꦏꦕꦺꦠꦱꦶꦏꦮꦷꦫꦶꦪꦺꦴꦠꦶ ꦄꦠ꧀ꦡꦺꦴ. ꦪꦺꦴ ꦒꦟꦱꦔ꧀ꦒꦟꦶꦏꦁ ꦮꦶꦤꦺꦴꦢꦺꦠ꧀ꦮꦴ ꦕꦠꦹꦱꦸ ꦆꦫꦶꦪꦴꦥꦡꦺꦱꦸ ꦄꦛ꧀ꦜꦄꦴꦫꦩ꧀ꦨꦮꦠ꧀ꦡꦸꦮꦱꦺꦤ ꦌꦏꦏꦺꦴ ꦲꦺꦴꦠꦶ, ꦠꦱ꧀ꦱ ꦏꦴꦪꦶꦏꦁ ꦮꦷꦫꦶꦪꦁ ꦄꦴꦫꦢ꧀ꦣꦁ ꦤꦴꦩ ꦲꦺꦴꦠꦶ. ꦕꦶꦠ꧀ꦠꦱꦔ꧀ꦒꦟꦶꦏꦁ ꦮꦶꦤꦺꦴꦢꦺꦠ꧀ꦮꦴ ꦄꦛ꧀ꦜꦱꦩꦴꦥꦠ꧀ꦠꦶꦮꦱꦺꦤ ꦌꦏꦏꦺꦴ ꦲꦺꦴꦠꦶ. ꦒꦩꦤꦺ ꦈꦥ꧀ꦥꦤ꧀ꦤꦏꦶꦭꦺꦱꦱ꧀ꦱ ꦜꦴꦤꦁ ꦥꦴꦥꦸꦟꦶꦠꦸꦁ ꦤ ꦢꦺꦠꦶ, ꦜꦴꦤꦺ ꦈꦥ꧀ꦥꦤ꧀ꦤꦏꦶꦭꦺꦱꦱ꧀ꦱ ꦤꦶꦱꦗ꧀ꦗꦁ, ꦤꦶꦱꦗ꧀ꦗꦴꦪ ꦈꦥ꧀ꦥꦤ꧀ꦤꦏꦶꦭꦺꦱꦱ꧀ꦱ ꦱꦪꦤꦁ ꦥꦴꦥꦸꦟꦶꦠꦸꦁ ꦤ ꦢꦺꦠꦶ, ꦈꦥ꧀ꦥꦤ꧀ꦤꦛ꧀ꦜꦴꦤꦺꦪꦺꦮ ꦏꦶꦭꦺꦱꦺ ꦤꦶꦒ꧀ꦒꦟ꧀ꦲꦴꦠꦶ. ꦄꦪꦁ ꦕꦺꦠꦱꦶꦏꦁ ꦮꦷꦫꦶꦪꦁ ꦄꦴꦫꦢ꧀ꦣꦁ ꦤꦴꦩ ꦲꦺꦴꦠꦶ. ꦥꦛꦶꦥꦏ꧀ꦑꦢꦹꦫꦷꦨꦴꦮꦺꦤ ꦱꦺꦛ꧀ꦜꦛ꧀ꦜꦺꦤ ꦕ ꦌꦏꦺꦴ ꦈꦢꦺꦠꦷꦠꦶ ꦌꦏꦺꦴꦢꦶ, ꦌꦏꦒ꧀ꦒꦠꦴ. ꦠꦱ꧀ꦱ ꦪꦺꦴꦒꦠꦺꦴ ꦌꦏꦒ꧀ꦒꦕꦶꦠ꧀ꦠꦺꦴ ꦆꦣ ꦌꦏꦺꦴꦢꦶ. ꦥꦛꦶꦥꦏ꧀ꦑꦠꦺꦴ ꦄꦠ꧀ꦠꦴꦤꦁ ꦤꦶꦥꦴꦠꦶ, ꦠꦁ ꦮꦴ ꦤꦶꦥꦪꦠꦶ ꦮꦶꦱꦺꦴꦱꦺꦠꦷꦠꦶ ꦤꦶꦥꦏꦺꦴ. ꦄꦚ꧀ꦚꦠꦫꦁ ꦏꦴꦪꦴꦢꦶꦨꦺꦢꦁ ꦄꦴꦫꦩ꧀ꦩꦟꦁ ꦱꦴꦠꦶꦱꦪꦴꦪ ꦱꦠꦶꦪꦴ ꦱꦫꦠꦷꦠꦶ ꦱꦠꦺꦴ. ꦠꦺꦤꦴꦲ ‘‘ꦌꦏꦒ꧀ꦒꦕꦶꦠ꧀ꦠꦺꦴ’’ꦠꦶꦄꦴꦢꦶ.

ꦄꦏꦸꦥ꧀ꦥꦴ ꦩꦺ ꦮꦶꦩꦸꦠ꧀ꦠꦷꦠꦶ ꦩꦪ꧀ꦲꦁ ꦄꦫꦲꦠ꧀ꦠꦦꦭꦮꦶꦩꦸꦠ꧀ꦠꦶ ꦄꦏꦸꦥ꧀ꦥꦠꦴꦪ ꦄꦏꦸꦥ꧀ꦥꦴꦫꦩ꧀ꦩꦟꦠꦴꦪ ꦕ ꦄꦏꦸꦥ꧀ꦥꦴ. ꦱꦴ ꦲꦶ ꦫꦴꦒꦴꦢꦷꦲꦶ ꦤ ꦏꦸꦥ꧀ꦥꦠꦷꦠꦶ ꦄꦏꦸꦥ꧀ꦥꦠꦴꦪꦥꦶ ꦄꦏꦸꦥ꧀ꦥꦴ. ꦄꦏꦸꦥ꧀ꦥꦁ ꦤꦶꦧ꧀ꦧꦴꦤꦩꦱ꧀ꦱꦴ ꦄꦴꦫꦩ꧀ꦩꦟꦤ꧀ꦠꦶ ꦄꦏꦸꦥ꧀ꦥꦴꦫꦩ꧀ꦩꦟꦠꦴꦪꦥꦶ ꦄꦏꦸꦥ꧀ꦥꦴ. ꦠꦺꦤꦺꦮꦴꦲ ‘‘ꦄꦏꦸꦥ꧀ꦥꦴꦫꦩ꧀ꦩꦟꦠ꧀ꦠꦴ’’ꦠꦶꦄꦴꦢꦶ. ꦨꦮꦱꦁꦪꦺꦴꦗꦤꦴꦤꦤ꧀ꦠꦶ ꦏꦴꦩꦫꦴꦒꦥꦛꦶꦓꦩꦴꦤꦢꦶꦛ꧀ꦜꦶꦮꦶꦕꦶꦏꦶꦕ꧀ꦖꦴꦱꦷꦭꦧ꧀ꦧꦠꦥꦫꦴꦩꦴꦱꦨꦮꦫꦴꦒꦆꦱ꧀ꦱꦴꦩꦕ꧀ꦖꦫꦶꦪ- ꦄꦮꦶꦗ꧀ꦗꦴꦱꦔ꧀ꦑꦴꦠꦴꦤꦁ ꦢꦱꦤ꧀ꦤꦁ ꦱꦁꦪꦺꦴꦗꦤꦴꦤꦁ. ꦆꦩꦴꦤꦶ ꦲꦶ ꦱꦠ꧀ꦠꦺ ꦨꦮꦺꦱꦸ ꦱꦁꦪꦺꦴꦗꦺꦤ꧀ꦠꦶ ꦈꦥꦤꦶꦧꦤ꧀ꦣꦤ꧀ꦠꦶ ꦨꦮꦴꦨꦮꦺꦤ ꦱꦁꦪꦺꦴꦗꦺꦤ꧀ꦠꦶ, ꦠꦱ꧀ꦩꦴ ꦨꦮꦱꦁꦪꦺꦴꦗꦤꦴꦤꦷꦠꦶ ꦮꦸꦕ꧀ꦕꦤ꧀ꦠꦶ. ꦑꦷꦟꦴꦱꦮꦺꦴ ꦈꦠ꧀ꦠꦩꦄꦟꦟꦺꦴ ꦏꦶꦭꦺꦱꦆꦟꦴꦤꦁ ꦄꦨꦴꦮꦠꦺꦴ. ꦄꦚ꧀ꦚꦺ ꦲꦶ ꦱꦠ꧀ꦠꦴ ꦪꦴꦮ ꦤ ꦏꦶꦭꦺꦱꦴ ꦥꦲꦷꦪꦤ꧀ꦠꦶ, ꦠꦴꦮ ꦱꦆꦟꦴ ꦤꦴꦩ ꦄꦱꦺꦫꦶꦮꦶꦲꦴꦫꦨꦴꦮꦠꦺꦴ. ꦕꦠꦸꦠ꧀ꦡꦴꦢꦷꦤꦶ ꦈꦠ꧀ꦠꦴꦤꦠ꧀ꦡꦴꦤꦶ.

ꦆꦟꦱꦸꦠ꧀ꦠꦴꦢꦶꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.