꧑꧐. ꦤꦶꦱ꧀ꦱꦴꦫꦟꦷꦪꦱꦸꦠ꧀ꦠꦮꦟ꧀ꦟꦤꦴ

꧒꧐꧐. ꦢꦱꦩꦺ ꦤꦶꦱ꧀ꦱꦫꦤ꧀ꦠꦷꦠꦶ ꦤꦶꦱ꧀ꦱꦫꦟꦷꦪꦴꦠꦶ ꦮꦠ꧀ꦠꦧ꧀ꦧꦺ ꦢꦷꦓꦁ ꦏꦠ꧀ꦮꦴ ꦤꦶꦢ꧀ꦢꦺꦱꦺꦴ. ꦏꦠ꧀ꦠꦫꦶ ꦲꦺꦱ ꦄꦤꦷꦪ-ꦱꦢ꧀ꦢꦺꦴ ꦪꦡꦴ ‘‘ꦤꦶꦪ꧀ꦪꦴꦤꦶꦪꦴ’’ꦠꦶ. ꦠꦺꦤꦴꦲ ‘‘ꦤꦶꦱ꧀ꦱꦛꦴ’’ꦠꦶ. ꦏꦸꦠꦺꦴ ꦥꦤ ꦤꦶꦱ꧀ꦱꦛꦴ? ꦪꦡꦴꦱꦏꦁ ꦥꦛꦶꦥꦏ꧀ꦑꦠꦺꦴ. ꦤꦶꦗ꧀ꦗꦷꦮꦛ꧀ꦜꦺꦤ ꦣꦴꦠꦸꦪꦺꦴꦠꦶ ꦄꦴꦲ ‘‘ꦄꦠ꧀ꦠꦱꦸꦚ꧀ꦚꦱꦨꦴꦮꦴ’’ꦠꦶ. ꦄꦠ꧀ꦡꦠꦺꦴ ꦥꦤ ꦣꦩ꧀ꦩꦣꦴꦠꦸꦩꦤꦺꦴꦮꦶꦚ꧀ꦚꦴꦟꦣꦴꦠꦸꦮꦶꦱꦺꦱꦺꦴ. ꦠꦴꦢꦶꦱꦱ꧀ꦱ ꦨꦶꦏ꧀ꦑꦸꦤꦺꦴ ꦏꦶꦭꦺꦱꦮꦱꦺꦤ ꦏꦴꦩꦺꦱꦸ ꦩꦤꦱꦶꦏꦴꦫꦺꦴ ꦤꦠ꧀ꦡꦷꦠꦶ ꦄꦴꦲ ‘‘ꦮꦷꦩꦁꦱꦤꦠ꧀ꦡ’’ꦤ꧀ꦠꦶ, ‘‘ꦤꦺꦏ꧀ꦑꦩ꧀ꦩꦤꦶꦪꦠꦁ ꦆꦢꦴꦤꦶ ꦩꦺ ꦕꦶꦠ꧀ꦠꦁ, ꦏꦶꦁ ꦤꦸ ꦑꦺꦴ ꦏꦴꦩꦮꦶꦠꦏ꧀ꦏꦺꦴꦥꦶ ꦈꦥ꧀ꦥꦗ꧀ꦗꦶꦱ꧀ꦱꦠꦷ’’ꦠꦶ ꦮꦷꦩꦁꦱꦤ꧀ꦠꦱ꧀ꦱꦴꦠꦶ ꦄꦠ꧀ꦡꦺꦴ. ꦥꦏ꧀ꦑꦤ꧀ꦢꦤꦁ ꦤꦴꦩ ꦄꦤꦸꦥ꧀ꦥꦮꦺꦱꦺꦴ. ꦱꦺꦴ ꦥꦤ ꦠꦠ꧀ꦡ ꦤꦠ꧀ꦡꦷꦠꦶ ꦄꦴꦲ ‘‘ꦤꦥ꧀ꦥꦮꦶꦱꦠꦷ’’ꦠꦶ. ꦥꦱꦷꦢꦤꦁ ꦤꦴꦩ ꦄꦨꦶꦫꦸꦕꦶ. ꦱꦤ꧀ꦠꦶꦛ꧀ꦜꦤꦁ ꦥꦠꦶꦛ꧀ꦜꦴꦤꦁ. ꦮꦶꦩꦸꦕ꧀ꦕꦤꦁ ꦄꦣꦶꦩꦸꦕ꧀ꦕꦤꦤ꧀ꦠꦶ. ꦠꦁ ꦱꦧ꧀ꦧꦁ ꦥꦛꦶꦏ꧀ꦑꦶꦥꦤ꧀ꦠꦺꦴ ꦮꦢꦠꦶ ‘‘ꦥꦱꦴꦢꦁ ꦤꦴꦥꦗ꧀ꦗꦠꦷ’’ꦠꦶꦄꦴꦢꦶ. ꦌꦮꦁꦨꦹꦠꦁ ꦥꦤꦱ꧀ꦱ ꦕꦶꦠ꧀ꦠꦁ ꦠꦱ꧀ꦱ ꦏꦡꦁ ꦠꦶꦛ꧀ꦜꦠꦷꦠꦶ ꦄꦴꦲ ‘‘ꦪꦡꦴ’’ꦠꦶꦄꦴꦢꦶ.

ꦠꦤ꧀ꦠꦶ ꦥꦜꦩꦗ꧀ꦙꦴꦤꦁ. ꦄꦱ꧀ꦱꦴꦠꦶ ꦨꦶꦏ꧀ꦑꦸꦤꦺꦴ. ꦕꦶꦠ꧀ꦠꦁ ꦥꦏ꧀ꦑꦤ꧀ꦢꦠꦷꦠꦶ ꦥꦫꦶꦏꦩ꧀ꦩꦕꦶꦠ꧀ꦠꦺꦤ ꦱꦢ꧀ꦣꦶꦁ ꦙꦴꦤꦕꦶꦠ꧀ꦠꦁ ꦌꦏꦠ꧀ꦠꦮꦱꦺꦤ ꦌꦏꦗ꧀ꦙꦁ ꦏꦠ꧀ꦮꦴ ꦮꦢꦠꦶ. ꦒꦺꦴꦕꦫꦺ ꦒꦠꦠ꧀ꦠꦴꦠꦶ ꦄꦠ꧀ꦠꦤꦺꦴ ꦄꦴꦫꦩ꧀ꦩꦟꦺ ꦌꦮ ꦥꦮꦠ꧀ꦠꦠ꧀ꦠꦴ. ꦄꦲꦴꦤꦨꦴꦒꦶꦪꦠ꧀ꦠꦴꦠꦶ ꦜꦶꦠꦶꦨꦴꦒꦶꦪꦠ꧀ꦠꦴ. ꦱꦸꦛ꧀ꦜꦸ ꦮꦶꦩꦸꦠ꧀ꦠꦤ꧀ꦠꦶ ꦮꦶꦏ꧀ꦑꦩ꧀ꦨꦤꦮꦶꦩꦸꦠ꧀ꦠꦶꦪꦴ ꦱꦩ꧀ꦩꦢꦺꦮ ꦮꦶꦩꦸꦠ꧀ꦠꦁ. ꦕꦶꦠ꧀ꦠꦱ꧀ꦱ ꦕ ꦏꦴꦪꦱ꧀ꦱ ꦕ ꦮꦶꦲꦤꦤꦠꦺꦴ ꦮꦶꦓꦴꦠꦺꦴ. ꦢꦸꦏ꧀ꦑꦁ ꦥꦫꦶꦢꦲꦤꦠꦺꦴ ꦥꦫꦶꦭ꦳ꦴꦲꦺꦴ. ꦏꦴꦩꦮꦺꦢꦤꦁ ꦤ ꦮꦺꦢꦶꦪꦠꦶ ꦄꦤꦸꦥ꧀ꦥꦗ꧀ꦗꦤꦠꦺꦴ. ꦤꦶꦱ꧀ꦱꦫꦤ꧀ꦠꦶ ꦠꦠꦺꦴꦠꦶ ꦤꦶꦱ꧀ꦱꦫꦟꦁ. ꦏꦺ ꦤꦶꦱ꧀ꦱꦫꦤ꧀ꦠꦶ? ꦏꦴꦩꦴ. ꦌꦮꦚ꧀ꦕ ꦏꦴꦩꦴꦤꦤ꧀ꦠꦶ ꦏꦠ꧀ꦠꦸꦱꦴꦩꦶꦮꦕꦤꦁ ꦱꦸꦛ꧀ꦜꦸ ꦪꦸꦗ꧀ꦗꦠꦶ. ꦪꦢꦒ꧀ꦒꦺꦤ ꦏꦴꦩꦴ ꦠꦠꦺꦴ ꦤꦶꦱ꧀ꦱꦛꦴꦠꦶ ꦮꦸꦕ꧀ꦕꦤ꧀ꦠꦶ, ꦠꦢꦒ꧀ꦒꦺꦤ ꦙꦴꦤꦩ꧀ꦥꦶ ꦏꦴꦩꦠꦺꦴ ꦤꦶꦱ꧀ꦱꦛꦤ꧀ꦠꦶ ꦮꦠ꧀ꦠꦧ꧀ꦧꦠꦁ ꦭꦨꦠꦷꦠꦶ ꦮꦸꦠ꧀ꦠꦁ ‘‘ꦏꦴꦩꦺꦲꦶ ꦤꦶꦱ꧀ꦱꦛꦠ꧀ꦠꦴ’’ꦠꦶ. ꦌꦮꦁ ꦮꦶꦏ꧀ꦑꦩ꧀ꦨꦤꦮꦱꦺꦤ ꦏꦴꦩꦤꦶꦱ꧀ꦱꦫꦟꦁ ꦮꦠ꧀ꦮꦴ ꦆꦢꦴꦤꦶ ꦱꦩꦸꦕ꧀ꦖꦺꦢꦮꦱꦺꦤ ꦄꦕ꧀ꦕꦤ꧀ꦠꦠꦺꦴ ꦤꦶꦱ꧀ꦱꦫꦟꦁ ꦢꦱ꧀ꦱꦺꦠꦸꦁ ‘‘ꦪꦺꦴ ꦥꦤꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦱꦺꦱꦥꦢꦺꦱꦹꦠꦶ ꦱꦺꦱꦏꦺꦴꦛ꧀ꦜꦴꦱꦺꦱꦸ.

ꦄꦪꦁ ꦥꦤ ꦮꦶꦱꦺꦱꦺꦴꦠꦶ ꦮꦶꦱꦺꦱꦁ ꦮꦢꦤ꧀ꦠꦺꦤ ꦠꦁ ꦙꦴꦤꦁ ꦥꦴꦢꦏꦁ ꦏꦠ꧀ꦮꦴꦠꦶꦄꦴꦢꦶꦏꦺꦴ ꦄꦮꦶꦱꦺꦱꦺꦴꦠꦶ ꦏꦠ꧀ꦮꦴ ꦢꦸꦠꦶꦪꦠꦠꦶꦪꦮꦴꦫꦺꦱꦸ ꦱꦧ꧀ꦧꦱꦺꦴ ꦄꦤꦴꦩꦛ꧀ꦜꦺꦴ, ꦕꦠꦸꦠ꧀ꦡꦮꦴꦫꦺ ꦥꦤ ꦄꦪꦩ꧀ꦥꦶ ꦮꦶꦱꦺꦱꦺꦴꦠꦶ ꦢꦱ꧀ꦱꦺꦠꦸꦁ ‘‘ꦄꦕ꧀ꦕꦤ꧀ꦠꦤꦶꦱ꧀ꦱꦫꦟꦚ꧀ꦕꦺꦠ꧀ꦡ ꦄꦫꦲꦠ꧀ꦠꦦꦭꦁ ꦪꦺꦴꦗꦺꦠꦧ꧀ꦧ’’ꦤ꧀ꦠꦶ ꦮꦸꦠ꧀ꦠꦁ. ꦪꦱ꧀ꦩꦴ ꦄꦫꦹꦥꦗ꧀ꦙꦴꦤꦁ ꦥꦴꦢꦏꦁ ꦏꦠ꧀ꦮꦴ ꦄꦒ꧀ꦒꦩꦒ꧀ꦒꦁ ꦄꦣꦶꦒꦤ꧀ꦠ꧀ꦮꦴ ꦄꦫꦲꦠ꧀ꦠꦺ ꦜꦶꦠꦱ꧀ꦱ ꦕꦶꦠ꧀ꦠꦁ ꦱꦧ꧀ꦧꦱꦺꦴ ꦫꦹꦥꦺꦲꦶ ꦤꦶꦱ꧀ꦱꦛꦁ ꦤꦴꦩ ꦲꦺꦴꦠꦶ. ꦠꦱ꧀ꦱ ꦲꦶ ꦦꦭꦱꦩꦴꦥꦠ꧀ꦠꦶꦠꦺꦴ ꦮꦸꦛ꧀ꦜꦴꦪ ꦮꦷꦩꦁꦱꦤꦠ꧀ꦡꦁ ꦫꦹꦥꦴꦨꦶꦩꦸꦑꦁ ꦕꦶꦠ꧀ꦠꦁ ꦥꦺꦱꦺꦤ꧀ꦠꦱ꧀ꦱ. ꦆꦢꦩꦏ꧀ꦑꦴꦠꦤ꧀ꦠꦶ ꦱꦩꦡꦪꦴꦤꦶꦏꦴꦤꦁ ꦮꦱꦺꦤ ꦲꦺꦛ꧀ꦜꦴ ꦕꦠ꧀ꦠꦴꦫꦺꦴ ꦮꦴꦫꦴ ꦒꦲꦶꦠꦴ. ꦆꦢꦁ ꦥꦤ ꦱꦸꦏ꧀ꦑꦮꦶꦥꦱ꧀ꦱꦏꦱ꧀ꦱ ꦮꦱꦺꦤꦴꦠꦶ ꦄꦴꦲ ‘‘ꦱꦸꦢ꧀ꦣꦱꦔ꧀ꦑꦴꦫꦺ’’ꦠꦶꦄꦴꦢꦶ. ‘‘ꦥꦸꦤ ꦱꦏ꧀ꦏꦴꦪꦺꦴ ꦤꦠ꧀ꦡꦷ’’ꦠꦶ ꦈꦥ꧀ꦥꦤ꧀ꦤꦤ꧀ꦠꦶ ‘‘ꦆꦢꦴꦤꦶ ꦩꦺ ꦱꦏ꧀ꦏꦴꦪꦥ꧀ꦥꦧꦤ꧀ꦣꦺꦴ ꦤꦠ꧀ꦡꦷ’’ꦠꦶ ꦮꦷꦩꦁꦱꦤ꧀ꦠꦱ꧀ꦱ ꦈꦥ꧀ꦥꦤ꧀ꦤꦁ.

ꦤꦶꦱ꧀ꦱꦴꦫꦟꦷꦪꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦧ꧀ꦫꦴꦲ꧀ꦩꦟꦮꦒ꧀ꦒꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦕꦠꦸꦠ꧀ꦡꦥꦟ꧀ꦟꦴꦱꦏꦁ ꦤꦶꦛ꧀ꦜꦶꦠꦁ.