(꧗) ꧒. ꦥꦠ꧀ꦠꦏꦩ꧀ꦩꦮꦒ꧀ꦒꦺꦴ

꧑-꧔. ꦥꦠ꧀ꦠꦏꦩ꧀ꦩꦱꦸꦠ꧀ꦠꦴꦢꦶꦮꦟ꧀ꦟꦤꦴ

꧖꧑-꧖꧔. ꦢꦸꦠꦶꦪꦱ꧀ꦱ ꦥꦜꦩꦺ ꦪꦺ ꦄꦤꦶꦛ꧀ꦜꦴ ꦤ ꦲꦺꦴꦤ꧀ꦠꦶ, ꦠꦺ ꦆꦛ꧀ꦜꦴꦠꦶ ꦄꦣꦶꦥ꧀ꦥꦺꦠꦴꦠꦶ ꦄꦴꦲ ‘‘ꦄꦤꦶꦛ꧀ꦜꦥꦛꦶꦏ꧀ꦑꦺꦥꦺꦤ ꦆꦛ꧀ꦜꦴ’’ꦠꦶ. ꦆꦛ꧀ꦜꦴꦠꦶ ꦕ ꦥꦫꦶꦪꦶꦛ꧀ꦜꦴ ꦮꦴ ꦲꦺꦴꦠꦸ ꦩꦴ ꦮꦴ, ꦆꦛ꧀ꦜꦴꦫꦩ꧀ꦩꦟꦨꦹꦠꦴꦠꦶ ꦄꦠ꧀ꦡꦺꦴ. ꦒꦮꦺꦱꦶꦠꦩ꧀ꦥꦶ ꦲꦶ ꦆꦛ꧀ꦜꦤ꧀ꦠꦶ ꦮꦸꦕ꧀ꦕꦠꦶ, ꦠꦁ ꦆꦣ ꦤꦴꦣꦶꦥ꧀ꦥꦺꦠꦁ. ꦩꦤꦺꦠꦶ ꦩꦤꦱ꧀ꦩꦶꦁ. ꦏꦤ꧀ꦠꦴꦠꦶ ꦮꦴ ꦏꦩꦤꦷꦪꦴ, ꦏꦴꦩꦺꦠꦧ꧀ꦧꦴꦠꦶ ꦄꦠ꧀ꦡꦺꦴ. ꦩꦤꦁ ꦄꦥ꧀ꦥꦴꦪꦤ꧀ꦠꦷꦠꦶ ꦆꦛ꧀ꦜꦨꦴꦮꦺꦤ ꦩꦤꦁ ꦮꦝ꧀ꦞꦺꦤ꧀ꦠꦶ. ꦏꦩ꧀ꦩꦱꦴꦣꦤꦺꦴ ꦆꦣ ꦨꦺꦴꦒ-ꦱꦢ꧀ꦢꦺꦴꦠꦶ ꦄꦴꦲ ‘‘ꦨꦺꦴꦒꦴꦠꦶ ꦨꦸꦚ꧀ꦗꦶꦠꦧ꧀ꦧꦴ’’ꦠꦶꦄꦴꦢꦶ. ꦣꦩ꧀ꦩꦹꦥꦓꦴꦠꦁ ꦏꦠ꧀ꦮꦴ ꦏꦸꦱꦭꦣꦩ꧀ꦩꦁ ꦮꦶꦤꦺꦴꦢꦺꦠ꧀ꦮꦴ. ꦈꦥꦤꦶꦗ꧀ꦙꦴꦪꦷꦪꦤ꧀ꦠꦷꦠꦶ ꦈꦥꦗ꧀ꦙꦴꦪꦴꦠꦶ ꦄꦴꦲ ‘‘ꦱꦸꦑꦢꦸꦏ꧀ꦑꦺꦱꦸ ꦈꦥꦤꦶꦗ꧀ꦙꦴꦪꦶꦠꦧ꧀ꦧꦠ꧀ꦠꦴ’’ꦠꦶ, ꦱꦸꦑꦢꦸꦏ꧀ꦑꦺꦱꦸ ꦈꦥ꧀ꦥꦤ꧀ꦤꦺꦱꦸ ꦄꦤꦸꦱ꧀ꦱꦫꦶꦠꦧ꧀ꦧꦠ꧀ꦠꦴꦠꦶ ꦄꦠ꧀ꦡꦺꦴ. ꦱꦤ꧀ꦢꦶꦛ꧀ꦜꦱꦩ꧀ꦨꦠ꧀ꦠꦺꦲꦷꦠꦶ ꦌꦠ꧀ꦡ ꦠꦠ꧀ꦡ ꦠꦠ꧀ꦡ ꦱꦔ꧀ꦒꦩ꧀ꦩ ꦢꦶꦛ꧀ꦜꦩꦠ꧀ꦠꦴ ꦤꦴꦠꦶꦢꦭ꦳꧀ꦲꦩꦶꦠ꧀ꦠꦴ ꦱꦤ꧀ꦢꦶꦛ꧀ꦜꦴ, ꦱꦸꦛ꧀ꦜꦸ ꦨꦠ꧀ꦠꦴ ꦱꦶꦤꦺꦲꦮꦤ꧀ꦠꦺꦴ ꦢꦭ꦳꧀ꦲꦩꦶꦠ꧀ꦠꦴ ꦱꦩ꧀ꦨꦠ꧀ꦠꦴ.

ꦮꦶꦱꦩꦭꦺꦴꦨꦤ꧀ꦠꦶ ꦧꦭꦮꦭꦺꦴꦨꦁ. ꦱꦸꦑꦶꦠꦤ꧀ꦠꦶ ꦱꦚ꧀ꦗꦴꦠꦱꦸꦑꦁ. ꦥꦷꦟꦶꦠꦤ꧀ꦠꦶ ꦣꦴꦠꦁ ꦱꦸꦲꦶꦠꦁ. ꦠꦡꦴꦨꦹꦠꦺꦴ ꦥꦤ ꦪꦱ꧀ꦩꦴ ꦧꦭꦱꦩ꧀ꦥꦤ꧀ꦤꦺꦴ ꦲꦺꦴꦠꦶ, ꦠꦱ꧀ꦩꦴ ‘‘ꦧꦭꦱꦩ꧀ꦥꦤ꧀ꦤꦁ ꦏꦫꦺꦴꦠꦷ’’ꦠꦶ ꦮꦸꦠ꧀ꦠꦁ.

ꦱꦺꦴꦨꦤꦺ ꦏꦴꦪꦶꦏꦮꦴꦕꦱꦶꦏꦏꦩ꧀ꦩꦺ ꦫꦠꦺꦴꦠꦶ ꦱꦹꦫꦠꦺꦴ ꦈꦏꦴꦫꦱ꧀ꦱ ꦢꦷꦓꦁ ꦏꦠ꧀ꦮꦴ, ꦠꦱ꧀ꦱ ꦨꦴꦮꦺꦴ ꦱꦺꦴꦫꦕ꧀ꦕꦁ, ꦏꦴꦪꦶꦏꦮꦴꦕꦱꦶꦏꦺꦴ ꦄꦮꦷꦠꦶꦏ꧀ꦏꦩꦺꦴ. ꦱꦺꦴ ꦥꦤ ꦄꦠ꧀ꦡꦠꦺꦴ ꦱꦸꦱꦷꦭꦨꦴꦮꦺꦴꦠꦶ ꦄꦴꦲ ‘‘ꦑꦤ꧀ꦠꦶꦱꦺꦴꦫꦕ꧀ꦕꦺ ꦤꦶꦮꦶꦛ꧀ꦜꦴꦠꦶ ꦄꦣꦶꦮꦴꦱꦤꦏ꧀ꦑꦤ꧀ꦠꦶꦪꦚ꧀ꦕ ꦱꦸꦱꦷꦭꦠꦴꦪ ꦕ ꦤꦶꦮꦶꦛ꧀ꦜꦴ’’ꦠꦶ. ꦌꦏꦩꦠ꧀ꦠꦴꦤꦤ꧀ꦠꦶ ꦌꦏꦁ ꦕꦶꦠ꧀ꦠꦤ꧀ꦠꦶ ꦄꦠ꧀ꦡꦺꦴ. ꦫꦴꦒꦴꦢꦷꦤꦚ꧀ꦲꦶ ꦥꦸꦧ꧀ꦧꦨꦴꦒꦶꦪꦁ ꦢꦩꦤꦴꦢꦶ ꦥꦕ꧀ꦕꦺꦏꦁ ꦆꦕ꧀ꦖꦶꦠꦧ꧀ꦧꦁ, ꦤ ꦩꦒ꧀ꦒꦏ꧀ꦑꦟꦺ ꦮꦶꦪ ꦌꦏꦗ꧀ꦙꦁ ꦥꦛꦶꦱꦔ꧀ꦑꦴꦤꦩꦸꦑꦺꦤ ꦥꦗꦲꦤꦠꦺꦴ. ꦌꦏꦩꦠ꧀ꦠꦴꦤꦤ꧀ꦠꦶ ꦮꦴ ꦮꦶꦮꦺꦏꦮꦱꦺꦤ ꦌꦏꦁ ꦌꦏꦴꦏꦶꦤꦁ ꦄꦠ꧀ꦠꦴꦤꦁ. ꦠꦺꦤꦺꦮꦴꦲ ‘‘ꦌꦏꦁ ꦄꦠ꧀ꦠꦤꦺꦴꦮ ꦄꦠ꧀ꦠꦨꦴꦮ’’ꦤ꧀ꦠꦶꦄꦴꦢꦶ. ꦈꦥꦫꦹꦥꦫꦶꦨꦹꦩꦷꦱꦹꦠꦶ ꦖꦏꦴꦩꦱꦒ꧀ꦒꦱꦔ꧀ꦑꦴꦠꦴꦱꦸ ꦈꦥꦫꦹꦥꦫꦶꦏꦴꦩꦨꦹꦩꦷꦱꦸ. ꦏꦩ꧀ꦩꦱ꧀ꦱ ꦦꦭꦁ ꦄꦒ꧀ꦒꦁ ꦤꦴꦩ. ꦠꦁ ꦥꦤꦺꦠ꧀ꦡ ꦈꦕ꧀ꦕꦒꦴꦩꦷꦠꦶ ꦄꦴꦲ ‘‘ꦈꦢ꧀ꦣꦩꦒ꧀ꦒꦩꦱ꧀ꦱꦴ’’ꦠꦶ. ꦱꦸꦮꦒ꧀ꦒꦺ ꦤꦶꦪꦸꦠ꧀ꦠꦴ, ꦱꦸꦮꦒ꧀ꦒꦥ꧀ꦥꦪꦺꦴꦗꦤꦴꦠꦶ ꦮꦴ ꦱꦺꦴꦮꦒ꧀ꦒꦶꦏꦴ. ꦢꦱꦤ꧀ꦤꦁ ꦮꦶꦱꦺꦱꦴꦤꦤ꧀ꦠꦶ ꦢꦶꦧ꧀ꦧꦄꦴꦪꦸꦮꦟ꧀ꦟꦪꦱꦱꦸꦑꦄꦴꦣꦶꦥꦠꦺꦪ꧀ꦪꦴꦤꦚ꧀ꦕꦺꦮ ꦆꦛ꧀ꦜꦫꦹꦥꦴꦢꦷꦤꦚ꧀ꦕ ꦦꦭꦮꦶꦱꦺꦱꦴꦤꦁ. ꦮꦟ꧀ꦟꦒ꧀ꦒꦲꦟꦺꦤ ꦕꦺꦠ꧀ꦡ ꦱꦏꦺꦴ ꦄꦠ꧀ꦠꦨꦴꦮꦮꦟ꧀ꦟꦺꦴ ꦒꦲꦶꦠꦺꦴ, ꦫꦹꦥꦒ꧀ꦒꦲꦟꦺꦤ ꦧꦲꦶꦢ꧀ꦣꦴ ꦫꦹꦥꦴꦫꦩ꧀ꦩꦟꦁ. ꦢꦸꦠꦶꦪꦠꦠꦶꦪꦕꦠꦸꦠ꧀ꦡꦴꦤꦶ ꦈꦠ꧀ꦠꦴꦤꦠ꧀ꦡꦴꦤꦺꦮ.

ꦥꦠ꧀ꦠꦏꦩ꧀ꦩꦱꦸꦠ꧀ꦠꦴꦢꦶꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧕. ꦫꦹꦥꦱꦸꦠ꧀ꦠꦮꦟ꧀ꦟꦤꦴ

꧖꧕. ꦥꦚ꧀ꦕꦩꦺ ꦥꦩꦶꦤꦺꦴꦠꦶ ꦈꦭ꦳ꦴꦫꦠꦴꦢꦶꦮꦶꦱꦺꦱꦁ ꦌꦠꦺꦤꦴꦠꦶ ꦥꦩꦴꦟꦁ, ꦫꦸꦥꦏꦴꦪꦺꦴ ꦥꦩꦴꦟꦁ ꦌꦠꦱ꧀ꦱꦴꦠꦶ ꦫꦹꦥꦥ꧀ꦥꦩꦴꦟꦺꦴ. ꦠꦠꦺꦴ ꦌꦮ ꦫꦹꦥꦺ ꦥꦱꦤ꧀ꦤꦺꦴꦠꦶ ꦫꦹꦥꦥ꧀ꦥꦱꦤ꧀ꦤꦺꦴ. ꦓꦺꦴꦱꦺꦴꦠꦶ ꦕꦺꦠ꧀ꦡ ꦡꦸꦠꦶꦓꦺꦴꦱꦺꦴ. ꦭꦹꦑꦤ꧀ꦠꦶ ꦥꦕ꧀ꦕꦪꦭꦹꦑꦠꦴ. ꦣꦩ꧀ꦩꦴꦠꦶ ꦱꦷꦭꦴꦢꦪꦺꦴ ꦒꦸꦟꦣꦩ꧀ꦩꦴ ꦄꦣꦶꦥ꧀ꦥꦺꦠꦴ. ꦆꦩꦺꦱꦁ ꦥꦤ ꦕꦠꦸꦤ꧀ꦤꦁ ꦥꦸꦒ꧀ꦒꦭꦴꦤꦁ ꦤꦴꦤꦴꦏꦫꦟꦁ ꦥꦴꦭ꦳ꦶꦪꦁꦪꦺꦮ ꦄꦴꦒꦠꦁ. ꦮꦸꦠ꧀ꦠꦚ꧀ꦲꦺꦠꦁ –

‘‘ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦫꦹꦥꦥ꧀ꦥꦩꦴꦟꦺꦴ ꦫꦹꦥꦥ꧀ꦥꦱꦤ꧀ꦤꦺꦴ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦄꦴꦫꦺꦴꦲꦁ ꦮꦴ ꦥꦱ꧀ꦱꦶꦠ꧀ꦮꦴ ꦥꦫꦶꦟꦴꦲꦁ ꦮꦴ ꦥꦱ꧀ꦱꦶꦠ꧀ꦮꦴ ꦱꦟ꧀ꦜꦴꦤꦁ ꦮꦴ ꦥꦱ꧀ꦱꦶꦠ꧀ꦮꦴ ꦥꦴꦫꦶꦥꦹꦫꦶꦁ ꦮꦴ ꦥꦱ꧀ꦱꦶꦠ꧀ꦮꦴ ꦠꦠ꧀ꦡ ꦥꦩꦴꦟꦁ ꦒꦲꦺꦠ꧀ꦮꦴ ꦥꦱꦴꦢꦁ ꦗꦤꦺꦠꦶ. ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ꦫꦹꦥꦥ꧀ꦥꦩꦴꦟꦺꦴ ꦫꦹꦥꦥ꧀ꦥꦱꦤ꧀ꦤꦺꦴ.

‘‘ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦓꦺꦴꦱꦥ꧀ꦥꦩꦴꦟꦺꦴ ꦓꦺꦴꦱꦥ꧀ꦥꦱꦤ꧀ꦤꦺꦴ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦥꦫꦮꦟ꧀ꦟꦤꦴꦪ ꦥꦫꦡꦺꦴꦩꦤꦴꦪ ꦥꦫꦥꦱꦁꦱꦤꦴꦪ ꦥꦫꦮꦟ꧀ꦟꦲꦴꦫꦶꦏꦴꦪ ꦠꦠ꧀ꦡ ꦥꦩꦴꦟꦁ ꦒꦲꦺꦠ꧀ꦮꦴ ꦥꦱꦴꦢꦁ ꦗꦤꦺꦠꦶ. ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ꦓꦺꦴꦱꦥ꧀ꦥꦩꦴꦟꦺꦴ ꦓꦺꦴꦱꦥ꧀ꦥꦱꦤ꧀ꦤꦺꦴ.

‘‘ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦭꦹꦑꦥ꧀ꦥꦩꦴꦟꦺꦴ ꦭꦹꦑꦥ꧀ꦥꦱꦤ꧀ꦤꦺꦴ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦕꦷꦮꦫꦭꦹꦑꦁ ꦮꦴ ꦥꦱ꧀ꦱꦶꦠ꧀ꦮꦴ ꦥꦠ꧀ꦠꦭꦹꦑꦁ ꦮꦴ ꦥꦱ꧀ꦱꦶꦠ꧀ꦮꦴ ꦱꦺꦤꦴꦱꦤꦭꦹꦑꦁ ꦮꦴ ꦥꦱ꧀ꦱꦶꦠ꧀ꦮꦴ ꦮꦶꦮꦶꦣꦁ ꦮꦴ ꦢꦸꦏ꧀ꦏꦫꦏꦴꦫꦶꦏꦁ ꦥꦱ꧀ꦱꦶꦠ꧀ꦮꦴ ꦠꦠ꧀ꦡ ꦥꦩꦴꦟꦁ ꦒꦲꦺꦠ꧀ꦮꦴ ꦥꦱꦴꦢꦁ ꦗꦤꦺꦠꦶ. ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ꦭꦹꦑꦥ꧀ꦥꦩꦴꦟꦺꦴ ꦭꦹꦑꦥ꧀ꦥꦱꦤ꧀ꦤꦺꦴ.

‘‘ꦏꦠꦩꦺꦴ ꦕ ꦥꦸꦒ꧀ꦒꦭꦺꦴ ꦣꦩ꧀ꦩꦥ꧀ꦥꦩꦴꦟꦺꦴ ꦣꦩ꧀ꦩꦥ꧀ꦥꦱꦤ꧀ꦤꦺꦴ? ꦆꦣꦺꦏꦕ꧀ꦕꦺꦴ ꦥꦸꦒ꧀ꦒꦭꦺꦴ ꦱꦷꦭꦁ ꦮꦴ ꦥꦱ꧀ꦱꦶꦠ꧀ꦮꦴ ꦱꦩꦴꦣꦶꦁ ꦮꦴ ꦥꦱ꧀ꦱꦶꦠ꧀ꦮꦴ ꦥꦚ꧀ꦚꦁ ꦮꦴ ꦥꦱ꧀ꦱꦶꦠ꧀ꦮꦴ ꦠꦠ꧀ꦡ ꦥꦩꦴꦟꦁ ꦒꦲꦺꦠ꧀ꦮꦴ ꦥꦱꦴꦢꦁ ꦗꦤꦺꦠꦶ. ꦄꦪꦁ ꦮꦸꦕ꧀ꦕꦠꦶ ꦥꦸꦒ꧀ꦒꦭꦺꦴ ꦣꦩ꧀ꦩꦥ꧀ꦥꦩꦴꦟꦺꦴ ꦣꦩ꧀ꦩꦥ꧀ꦥꦱꦤ꧀ꦤꦺꦴ’’ꦠꦶ (ꦥꦸ. ꦥ. ꧑꧗꧑-꧑꧗꧒).

ꦠꦠ꧀ꦡ ꦄꦴꦫꦺꦴꦲꦤ꧀ꦠꦶ ꦈꦕ꧀ꦕꦠꦁ. ꦱꦴ ꦕ ꦑꦺꦴ ꦠꦱ꧀ꦩꦶꦁ ꦠꦱ꧀ꦩꦶꦁ ꦏꦴꦭꦺ ꦥꦩꦴꦟꦪꦸꦠ꧀ꦠꦴ ꦢꦛ꧀ꦜꦧ꧀ꦧꦴ. ꦥꦫꦶꦟꦴꦲꦤ꧀ꦠꦶ ꦤꦴꦠꦶꦏꦶꦱꦡꦹꦭꦠꦴꦮꦱꦺꦤ ꦥꦷꦟꦠꦁ. ꦱꦟ꧀ꦜꦴꦤꦤ꧀ꦠꦶ ꦠꦺꦱꦁ ꦠꦺꦱꦁ ꦄꦔ꧀ꦒꦥꦕ꧀ꦕꦔ꧀ꦒꦴꦤꦁ ꦱꦸꦱꦟ꧀ꦜꦶꦠꦠꦁ ꦢꦷꦓꦫꦱ꧀ꦱꦮꦛ꧀ꦛꦴꦢꦶꦪꦸꦠ꧀ꦠꦛ꧀ꦜꦴꦤꦺꦱꦸ ꦠꦡꦴꦨꦴꦮꦁ. ꦥꦴꦫꦶꦥꦹꦫꦶꦤ꧀ꦠꦶ ꦱꦧ꧀ꦧꦺꦱꦁ ꦱꦫꦷꦫꦴꦮꦪꦮꦴꦤꦁ ꦥꦫꦶꦥꦸꦟ꧀ꦟꦠꦁ ꦄꦮꦶꦏꦭꦠꦁ. ꦠꦠ꧀ꦡ ꦥꦩꦴꦟꦁ ꦒꦲꦺꦠ꧀ꦮꦴꦠꦶ ꦠꦱ꧀ꦩꦶꦁ ꦫꦹꦥꦺ ꦫꦹꦥꦱꦩ꧀ꦥꦠ꧀ꦠꦶꦪꦁ ꦥꦩꦴꦟꦨꦴꦮꦁ ꦈꦥꦴꦢꦴꦪ. ꦥꦱꦴꦢꦁ ꦗꦤꦺꦠꦷꦠꦶ ꦄꦣꦶꦩꦺꦴꦏ꧀ꦑꦁ ꦗꦤꦺꦠꦶ ꦈꦥ꧀ꦥꦴꦢꦺꦠꦶ.

ꦥꦫꦮꦟ꧀ꦟꦤꦴꦪꦴꦠꦶ ‘‘ꦄꦱꦸꦏꦺꦴ ꦌꦢꦶꦱꦺꦴ ꦕ ꦌꦢꦶꦱꦺꦴ ꦕꦴ’’ꦠꦶ ꦥꦫꦱ꧀ꦱ ꦒꦸꦟꦮꦕꦤꦺꦤ. ꦥꦫꦡꦺꦴꦩꦤꦴꦪꦴꦠꦶ ꦥꦫꦩ꧀ꦩꦸꦑꦴ ꦥꦫꦱ꧀ꦱ ꦱꦶꦭꦴꦓꦸꦥ꧀ꦥꦴꦢꦏꦺꦤ ꦄꦨꦶꦠ꧀ꦡꦮꦤꦺꦤ ꦥꦫꦺꦤ ꦡꦸꦠꦶꦮꦱꦺꦤ, ꦒꦴꦡꦴꦢꦶꦈꦥꦤꦶꦧꦤ꧀ꦣꦤꦺꦤ ꦮꦸꦠ꧀ꦠꦴꦪ ꦡꦺꦴꦩꦤꦴꦪꦴꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦥꦫꦥꦱꦁꦱꦤꦴꦪꦴꦠꦶ ꦥꦫꦩ꧀ꦩꦸꦑꦴ ꦥꦫꦱ꧀ꦱ ꦒꦸꦟꦱꦁꦏꦶꦠ꧀ꦠꦤꦺꦤ. ꦥꦫꦮꦟ꧀ꦟꦲꦴꦫꦶꦏꦴꦪꦴꦠꦶ ꦥꦫꦩ꧀ꦥꦫꦮꦟ꧀ꦟꦲꦴꦫꦶꦏꦴꦪ ꦥꦫꦩ꧀ꦥꦫꦴꦪ ꦥꦫꦱ꧀ꦱ ꦏꦶꦠ꧀ꦠꦤꦱꦢ꧀ꦢꦱ꧀ꦱ ꦈꦥꦱꦁꦲꦴꦫꦺꦤ. ꦠꦠ꧀ꦡꦴꦠꦶ ꦠꦱ꧀ꦩꦶꦁ ꦡꦸꦠꦶꦓꦺꦴꦱꦺ.

ꦕꦷꦮꦫꦭꦹꦑꦤ꧀ꦠꦶ ꦡꦹꦭꦗꦶꦟ꧀ꦟꦧꦲꦸꦠꦸꦤ꧀ꦤꦏꦠꦴꦢꦶꦕꦷꦮꦫꦱ꧀ꦱ ꦭꦹꦑꦨꦴꦮꦁ. ꦥꦠ꧀ꦠꦭꦹꦑꦤ꧀ꦠꦶ ꦄꦤꦺꦏꦒꦤ꧀ꦡꦶꦏꦴꦲꦛꦠꦴꦢꦶꦥꦠ꧀ꦠꦱ꧀ꦱ ꦭꦹꦑꦨꦴꦮꦁ. ꦮꦶꦮꦶꦣꦁ ꦮꦴ ꦢꦸꦏ꧀ꦏꦫꦏꦴꦫꦶꦏꦤ꧀ꦠꦶ ꦣꦸꦠꦔ꧀ꦒꦴꦢꦶꦮꦱꦺꦤ ꦥꦮꦠ꧀ꦠꦤꦴꦤꦴꦮꦶꦣꦁ ꦢꦸꦏ꧀ꦏꦫꦕꦫꦶꦪꦁ. ꦱꦷꦭꦁ ꦮꦴ ꦥꦱ꧀ꦱꦶꦠ꧀ꦮꦴꦠꦶ ꦱꦷꦭꦥꦴꦫꦶꦥꦹꦫꦶꦮꦱꦺꦤ ꦮꦶꦱꦸꦢ꧀ꦣꦁ ꦏꦴꦪꦮꦕꦷꦱꦸꦕꦫꦶꦠꦁ ꦚꦴꦟꦕꦏ꧀ꦑꦸꦤꦴ ꦥꦱ꧀ꦱꦶꦠ꧀ꦮꦴ, ꦙꦴꦤꦴꦢꦶꦄꦣꦶꦒꦩꦱꦸꦢ꧀ꦣꦶꦱꦩꦴꦣꦶꦁ ꦮꦴ ꦮꦶꦥꦱ꧀ꦱꦤꦴꦨꦶꦚ꧀ꦚꦴꦱꦔ꧀ꦑꦴꦠꦁ ꦥꦚ꧀ꦚꦁ ꦮꦴ ꦥꦱ꧀ꦱꦶꦠ꧀ꦮꦴꦠꦶ ꦄꦠ꧀ꦡꦺꦴ.

ꦌꦮꦩꦺꦠꦱ꧀ꦩꦶꦁ ꦕꦠꦸꦥ꧀ꦥꦩꦴꦟꦺ ꦭꦺꦴꦏꦱꦤ꧀ꦤꦶꦮꦴꦱꦺ ꦧꦸꦢ꧀ꦣꦺꦱꦸ ꦄꦥ꧀ꦥꦱꦤ꧀ꦤꦴ ꦩꦤ꧀ꦢꦴ, ꦥꦱꦤ꧀ꦤꦴ ꦧꦲꦸꦏꦴ. ꦫꦹꦥꦥ꧀ꦥꦩꦴꦟꦱ꧀ꦱ ꦲꦶ ꦧꦸꦢ꧀ꦣꦫꦹꦥꦠꦺꦴ ꦈꦠ꧀ꦠꦫꦶ ꦥꦱꦴꦢꦴꦮꦲꦁ ꦫꦹꦥꦁ ꦤꦴꦩ ꦤꦠ꧀ꦡꦶ. ꦓꦺꦴꦱꦥ꧀ꦥꦩꦴꦟꦱ꧀ꦱ ꦧꦸꦢ꧀ꦣꦴꦤꦁ ꦏꦶꦠ꧀ꦠꦶꦓꦺꦴꦱꦠꦺꦴ ꦈꦠ꧀ꦠꦫꦶ ꦥꦱꦴꦢꦴꦮꦲꦺꦴ ꦓꦺꦴꦱꦺꦴ ꦤꦴꦩ ꦤꦠ꧀ꦡꦶ. ꦭꦹꦑꦥ꧀ꦥꦩꦴꦟꦱ꧀ꦱ ꦏꦴꦱꦶꦏꦴꦤꦶ ꦮꦠ꧀ꦡꦴꦤꦶ ꦩꦲꦴꦫꦲꦴꦤꦶ ꦏꦚ꧀ꦕꦤꦨꦴꦗꦤꦴꦤꦶ ꦠꦶꦟ꧀ꦟꦁ ꦈꦠꦹꦤꦁ ꦄꦤꦸꦕ꧀ꦖꦮꦶꦏꦺ ꦱꦧ꧀ꦧꦱꦩ꧀ꦥꦠ꧀ꦠꦶꦪꦸꦠ꧀ꦠꦺ ꦥꦴꦱꦴꦢꦮꦫꦺ ꦥꦲꦴꦪ ꦥꦁꦱꦸꦏꦹꦭꦕꦷꦮꦫꦱꦺꦭꦩꦪꦥꦠ꧀ꦠꦫꦸꦏ꧀ꦑꦩꦹꦭꦴꦢꦶꦱꦺꦤꦴꦱꦤꦱꦺꦮꦶꦤꦺꦴ ꦧꦸꦢ꧀ꦣꦱ꧀ꦱ ꦨꦒꦮꦠꦺꦴ ꦭꦹꦑꦠꦺꦴ ꦈꦠ꧀ꦠꦫꦶ ꦥꦱꦴꦢꦴꦮꦲꦁ ꦄꦚ꧀ꦚꦁ ꦭꦹꦑꦁ ꦤꦴꦩ ꦤꦠ꧀ꦡꦶ. ꦣꦩ꧀ꦩꦥ꧀ꦥꦩꦴꦟꦱ꧀ꦱ ꦱꦢꦺꦮꦏꦺ ꦭꦺꦴꦏꦺ ꦄꦱꦴꦣꦴꦫꦟꦱꦷꦭꦴꦢꦶꦒꦸꦟꦱ꧀ꦱ ꦠꦡꦴꦒꦠꦱ꧀ꦱ ꦱꦷꦭꦴꦢꦶꦒꦸꦟꦠꦺꦴ ꦈꦠ꧀ꦠꦫꦶ ꦥꦱꦴꦢꦴꦮꦲꦺꦴ ꦄꦚ꧀ꦚꦺꦴ ꦱꦷꦭꦴꦢꦶꦒꦸꦟꦺꦴ ꦤꦴꦩ ꦤꦠ꧀ꦡꦶ. ꦆꦠꦶ ꦨꦒꦮꦴ ꦆꦩꦁ ꦕꦠꦸꦥ꧀ꦥꦩꦴꦟꦶꦏꦁ ꦭꦺꦴꦏꦱꦤ꧀ꦤꦶꦮꦴꦱꦁ ꦩꦸꦛ꧀ꦜꦶꦤꦴ ꦒꦲꦺꦠ꧀ꦮꦴ ꦮꦶꦪ ꦜꦶꦠꦺꦴꦠꦶ.

ꦥꦩꦴꦟꦶꦁꦱꦹꦠꦶ ꦥꦩꦴꦟꦁ ꦄꦒ꧀ꦒꦲꦺꦱꦸꦁ. ꦤꦶꦪꦏꦗ꧀ꦙꦠ꧀ꦠꦺ ꦠꦱ꧀ꦱ ꦒꦸꦟꦁ ꦤ ꦗꦴꦤꦴꦠꦷꦠꦶ ꦠꦱ꧀ꦱ ꦄꦧ꧀ꦨꦤ꧀ꦠꦫꦺ ꦥꦮꦠ꧀ꦠꦩꦴꦤꦁ ꦱꦷꦭꦴꦢꦶꦒꦸꦟꦁ ꦤ ꦗꦴꦤꦴꦠꦶ. ꦱꦺꦱꦁ ꦱꦸꦮꦶꦚ꧀ꦚꦺꦪ꧀ꦪꦩꦺꦮ.

ꦫꦹꦥꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧗. ꦄꦲꦶꦫꦴꦗꦱꦸꦠ꧀ꦠꦮꦟ꧀ꦟꦤꦴ

꧖꧗. ꦱꦠ꧀ꦠꦩꦺ ꦢꦛ꧀ꦜꦮꦶꦱꦴꦤꦺꦮꦴꦠꦶ ꦄꦮꦣꦴꦫꦟꦺꦤ ꦢꦶꦛ꧀ꦜꦮꦶꦱꦴꦢꦪꦺꦴ ꦤꦶꦮꦠ꧀ꦠꦺꦠꦶ. ꦏꦛ꧀ꦜꦩꦸꦑꦴꦢꦪꦺꦴ ꦲꦶ ꦕꦠ꧀ꦠꦴꦫꦺꦴ ꦄꦴꦱꦷꦮꦶꦱꦴ ꦢꦛ꧀ꦜꦮꦶꦱꦺꦴ, ꦢꦶꦛ꧀ꦜꦮꦶꦱꦺꦴ, ꦦꦸꦛ꧀ꦜꦮꦶꦱꦺꦴ, ꦮꦴꦠꦮꦶꦱꦺꦴꦠꦶ ꦥꦕ꧀ꦕꦺꦏꦁ ꦕꦠꦸꦧ꧀ꦧꦶꦣꦴ ꦲꦺꦴꦤ꧀ꦠꦷꦠꦶ ꦮꦶꦱꦮꦺꦒꦮꦶꦏꦴꦫꦮꦱꦺꦤ ꦱꦺꦴꦭ꦳ꦱ ꦮꦸꦠ꧀ꦠꦴ. ꦠꦺꦱꦸ ꦢꦛ꧀ꦜꦮꦶꦱꦴꦤꦁꦪꦺꦮ ꦆꦣ ꦒꦲꦟꦁ, ꦤ ꦆꦠꦫꦺꦱꦤ꧀ꦠꦶ ꦢꦱ꧀ꦱꦺꦠꦶ. ꦱꦺꦱꦁ ꦱꦸꦮꦶꦚ꧀ꦚꦺꦪ꧀ꦪꦩꦺꦮ.

ꦄꦲꦶꦫꦴꦗꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧘. ꦢꦺꦮꦢꦠ꧀ꦠꦱꦸꦠ꧀ꦠꦮꦟ꧀ꦟꦤꦴ

꧖꧘. ꦄꦛ꧀ꦜꦩꦺ ꦏꦴꦭꦺ ꦱꦩ꧀ꦥꦠ꧀ꦠꦺꦠꦶ ꦒꦧ꧀ꦨꦱ꧀ꦱ ꦥꦫꦶꦥꦴꦏꦒꦠꦠ꧀ꦠꦴ ꦮꦶꦗꦴꦪꦤꦏꦴꦭꦺ ꦱꦩ꧀ꦥꦠ꧀ꦠꦺ. ꦥꦺꦴꦠꦏꦤ꧀ꦠꦶ ꦄꦱ꧀ꦱꦠꦫꦶꦪꦴ ꦥꦸꦠ꧀ꦠꦁ. ‘‘ꦦꦭꦁ ꦮꦺ ꦏꦢꦭꦶꦁ ꦲꦤ꧀ꦠꦷ’’ꦠꦶꦄꦴꦢꦶꦒꦴꦡꦴꦪ ꦏꦸꦏ꧀ꦏꦸꦗꦏꦺꦤꦺꦮ ꦥꦠ꧀ꦠꦮꦛ꧀ꦛꦶꦥꦱꦮꦱ꧀ꦱ ꦈꦕ꧀ꦖꦶꦤ꧀ꦤꦠ꧀ꦠꦴ ꦦꦭꦸꦥ꧀ꦥꦠ꧀ꦠꦶ ꦏꦢꦭꦶꦪꦴ ꦥꦫꦴꦨꦮꦴꦪ ꦲꦺꦴꦠꦷꦠꦶ ꦄꦴꦲ ‘‘ꦦꦭꦁ ꦮꦺ ꦏꦢꦭꦶꦁ ꦲꦤ꧀ꦠꦷ’’ꦠꦶ. ꦏꦸꦏ꧀ꦏꦸꦗꦏꦁ ꦤꦴꦩ ꦏꦢꦭꦶꦪꦴ ꦥꦸꦥ꧀ꦦꦤꦴꦭ꦳ꦁ. ꦠꦡꦴ ꦦꦭꦥꦴꦏꦥꦫꦶꦪꦺꦴꦱꦴꦤꦠ꧀ꦠꦴ ꦎꦱꦣꦷꦤꦁ ‘‘ꦦꦭꦁ ꦮꦺꦭ꦳ꦸꦁ ꦤꦭ꦳’’ꦤ꧀ꦠꦶ ꦮꦸꦠ꧀ꦠꦁ. ꦄꦪꦁ ꦥꦤꦺꦠ꧀ꦡ ꦥꦶꦟ꧀ꦝꦠ꧀ꦡꦺꦴ – ꦪꦡꦴ ꦄꦠ꧀ꦠꦤꦺꦴ ꦦꦭꦁ ꦏꦢꦭꦶꦮꦺꦭ꦳ꦸꦤꦭ꦳ꦺ ꦮꦶꦤꦴꦱꦺꦠꦶ, ꦒꦧ꧀ꦨꦺꦴ ꦕ ꦄꦱ꧀ꦱꦠꦫꦶꦁ, ꦌꦮꦁ ꦄꦠ꧀ꦠꦤꦺꦴ ꦏꦩ꧀ꦩꦨꦹꦠꦺꦴ ꦱꦏ꧀ꦏꦴꦫꦺꦴ ꦄꦱꦥ꧀ꦥꦸꦫꦶꦱꦁ ꦮꦶꦤꦴꦱꦺꦠꦷꦠꦶ.

ꦢꦺꦮꦢꦠ꧀ꦠꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧙. ꦥꦣꦴꦤꦱꦸꦠ꧀ꦠꦮꦟ꧀ꦟꦤꦴ

꧖꧙. ꦤꦮꦩꦺ ꦥꦢꦲꦠꦶ ꦌꦠꦺꦲꦷꦠꦶ ꦥꦣꦴꦤꦴꦤꦶ. ꦈꦠ꧀ꦠꦩꦮꦷꦫꦶꦪꦴꦤꦶ ꦱꦺꦛ꧀ꦜꦮꦷꦫꦶꦪꦴꦤꦶ ꦮꦶꦱꦶꦛ꧀ꦜꦱ꧀ꦱ ꦄꦠ꧀ꦡꦱ꧀ꦱ ꦱꦴꦣꦤꦠꦺꦴ. ꦏꦶꦭꦺꦱꦴꦤꦁ ꦱꦁꦮꦫꦠ꧀ꦡꦴꦪꦴꦠꦶ ꦪꦡꦴ ꦄꦨꦶꦗ꧀ꦙꦴꦢꦪꦺꦴ ꦤ ꦈꦥ꧀ꦥꦗ꧀ꦗꦤ꧀ꦠꦶ, ꦌꦮꦁ ꦱꦠꦶꦪꦴ ꦈꦥꦛ꧀ꦜꦴꦤꦺꦤ ꦏꦶꦭꦺꦱꦴꦤꦁ ꦱꦁꦮꦫꦟꦠ꧀ꦡꦴꦪ. ꦥꦗꦲꦤꦠ꧀ꦡꦴꦪꦴꦠꦶ ꦏꦴꦩꦮꦶꦠꦏ꧀ꦏꦴꦢꦷꦤꦁ ꦮꦶꦤꦺꦴꦢꦤꦠ꧀ꦡꦴꦪ. ꦥꦣꦴꦤꦤ꧀ꦠꦶ ꦠꦱ꧀ꦱꦺꦮ ꦥꦗꦲꦤꦱ꧀ꦱ ꦱꦴꦣꦤꦮꦱꦺꦤ ꦥꦮꦠ꧀ꦠꦮꦷꦫꦶꦪꦁ. ꦏꦸꦱꦭꦴꦤꦁ ꦣꦩ꧀ꦩꦴꦤꦁ ꦧ꧀ꦫꦹꦲꦤꦠ꧀ꦡꦴꦪꦴꦠꦶ ꦧꦺꦴꦗ꧀ꦙꦔ꧀ꦒꦱꦔ꧀ꦑꦴꦠꦴꦤꦁ ꦏꦸꦱꦭꦣꦩ꧀ꦩꦴꦤꦁ ꦮꦝ꧀ꦞꦤꦠ꧀ꦡꦴꦪ. ꦥꦣꦴꦤꦤ꧀ꦠꦶ ꦠꦱ꧀ꦱꦺꦮ ꦮꦝ꧀ꦞꦤꦱ꧀ꦱ ꦱꦴꦣꦤꦮꦱꦺꦤ ꦥꦮꦠ꧀ꦠꦮꦷꦫꦶꦪꦁ.

ꦥꦣꦴꦤꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧑꧐. ꦄꦣꦩ꧀ꦩꦶꦏꦱꦸꦠ꧀ꦠꦮꦟ꧀ꦟꦤꦴ

꧗꧐. ꦢꦱꦩꦺ ꦮꦶꦱꦩꦤ꧀ꦠꦶ ꦨꦴꦮꦤꦥꦸꦁꦱꦏꦩꦺꦠꦁ. ꦠꦺꦤꦴꦲ ‘‘ꦮꦶꦱꦩꦴ ꦲꦸꦠ꧀ꦮꦴ’’ꦠꦶ. ꦄꦱꦩꦪꦺꦤꦴꦠꦶ ꦄꦏꦴꦭꦺ. ꦨꦸꦩ꧀ꦩꦠ꧀ꦡꦺ ꦲꦺꦠꦁ ꦏꦫꦟꦮꦕꦤꦁ. ꦥꦏꦛ꧀ꦜꦁ ꦥꦣꦴꦤꦁ ꦄꦚ꧀ꦗꦱꦁ ꦌꦠꦺꦱꦤ꧀ꦠꦶ ꦥꦚ꧀ꦗꦱꦴ, ꦄꦚ꧀ꦗꦱꦁ ꦥꦒꦠꦴ ꦥꦛꦶꦥꦤ꧀ꦤꦴꦠꦶ ꦮꦴ ꦥꦚ꧀ꦗꦱꦴ, ꦥꦏꦠꦶꦩꦒ꧀ꦒꦒꦴꦩꦶꦤꦺꦴ. ꦤ ꦥꦚ꧀ꦗꦱꦴ ꦄꦥꦚ꧀ꦗꦱꦴ, ꦄꦩꦒ꧀ꦒꦥ꧀ꦥꦛꦶꦥꦤ꧀ꦤꦴ. ꦠꦺ ꦥꦤ ꦪꦱ꧀ꦩꦴ ꦩꦒ꧀ꦒꦠꦺꦴ ꦄꦥꦒꦠꦴ ꦤꦴꦩ ꦲꦺꦴꦤ꧀ꦠꦶ, ꦠꦱ꧀ꦩꦴ ꦮꦸꦠ꧀ꦠꦁ ‘‘ꦩꦒ꧀ꦒꦠꦺꦴ ꦄꦥꦒꦠꦴ’’ꦠꦶꦄꦴꦢꦶ.

ꦒꦴꦡꦴꦱꦸ ꦥꦤ ꦌꦮꦩꦺꦠ꧀ꦡ ꦱꦩ꧀ꦧꦤ꧀ꦣꦺꦴ ꦮꦺꦢꦶꦠꦧ꧀ꦧꦺꦴ. ꦒꦸꦤ꧀ꦤꦁ ꦕꦺ ꦠꦫꦩꦴꦤꦴꦤꦤ꧀ꦠꦶ ꦒꦴꦮꦷꦱꦸ ꦩꦲꦺꦴꦓꦁ ꦠꦫꦤ꧀ꦠꦷꦱꦸ. ꦗꦶꦩ꧀ꦲꦁ ꦒꦕ꧀ꦖꦠꦶ ꦥꦸꦔ꧀ꦒꦮꦺꦴꦠꦶ ꦪꦢꦶ ꦪꦹꦡꦥꦠꦶ ꦈꦱꦨꦺꦴ ꦏꦸꦛꦶꦭꦁ ꦒꦕ꧀ꦖꦠꦶ. ꦱꦧ꧀ꦧꦴ ꦠꦴ ꦗꦶꦩ꧀ꦲꦁ ꦒꦕ꧀ꦖꦤ꧀ꦠꦷꦠꦶ ꦱꦧ꧀ꦧꦴ ꦠꦴ ꦒꦴꦮꦶꦪꦺꦴ ꦏꦸꦛꦶꦭꦩꦺꦮ ꦒꦕ꧀ꦖꦤ꧀ꦠꦶ. ꦏꦱ꧀ꦩꦴ? ꦤꦺꦠ꧀ꦠꦺ ꦗꦶꦩ꧀ꦲꦁ ꦒꦠꦺ ꦱꦠꦶ ꦠꦱ꧀ꦱ ꦏꦸꦛꦶꦭꦒꦠꦠ꧀ꦠꦴ. ꦱꦺꦴ ꦲꦶ ꦠꦴꦱꦁ ꦥꦕ꧀ꦕꦪꦶꦏꦺꦴ ꦈꦥꦢ꧀ꦢꦮꦲꦫꦺꦴ ꦕ. ꦌꦮꦩꦺꦮꦤ꧀ꦠꦶ ꦪꦡꦴ ꦕꦺꦠꦁ, ꦌꦮꦩꦺꦮ ꦪꦺꦴ ꦩꦤꦸꦱ꧀ꦱꦺꦱꦸ ꦥꦣꦴꦤꦱꦩ꧀ꦩꦠꦺꦴ, ꦪꦢꦶ ꦱꦺꦴ ꦄꦣꦩ꧀ꦩꦕꦴꦫꦷ ꦱꦶꦪꦴ, ꦪꦺ ꦠꦱ꧀ꦱ ꦄꦤꦸꦗꦷꦮꦶꦤꦺꦴ, ꦱꦧ꧀ꦧꦺꦥꦶ ꦄꦣꦩ꧀ꦩꦶꦏꦴ ꦲꦺꦴꦤ꧀ꦠꦶ. ꦱꦴꦩꦶꦱꦩ꧀ꦥꦢꦴ ꦲꦶ ꦥꦏꦠꦶꦱꦩ꧀ꦥꦢꦁ ꦱꦩ꧀ꦥꦴꦢꦺꦠꦶ. ꦪꦱ꧀ꦩꦴ ꦌꦠꦢꦺꦮꦁ, ꦠꦱ꧀ꦩꦴ ꦱꦧ꧀ꦧꦁ ꦫꦛ꧀ꦜꦁ ꦢꦸꦏ꧀ꦑꦁ ꦱꦺꦠꦶ, ꦫꦴꦗꦴ ꦕꦺ ꦲꦺꦴꦠꦶ ꦄꦣꦩ꧀ꦩꦶꦏꦺꦴ.

ꦄꦣꦩ꧀ꦩꦶꦏꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦥꦠ꧀ꦠꦏꦩ꧀ꦩꦮꦒ꧀ꦒꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.