꧓. ꦄꦱꦸꦨꦱꦸꦠ꧀ꦠꦮꦟ꧀ꦟꦤꦴ

꧑꧖꧓. ꦠꦠꦶꦪꦺ ‘‘ꦪꦡꦴ ꦌꦠꦁ, ꦠꦡꦴ ꦆꦢ’’ꦤ꧀ꦠꦶ ꦆꦩꦶꦤꦴ ꦤꦪꦺꦤꦴꦠꦶ ꦌꦠꦺꦤ –

‘‘ꦪꦡꦴ ꦆꦢꦁ ꦠꦡꦴ ꦌꦠꦁ, ꦪꦡꦴ ꦌꦠꦁ ꦠꦡꦴ ꦆꦢꦁ;

ꦄꦗ꧀ꦙꦠ꧀ꦠꦚ꧀ꦕ ꦧꦲꦶꦢ꧀ꦣꦴ ꦕ, ꦏꦴꦪꦺ ꦖꦤ꧀ꦢꦁ ꦮꦶꦫꦴꦗꦪꦺ’’ꦠꦶ. (ꦱꦸ. ꦤꦶ. ꧒꧐꧕); –

ꦆꦩꦁ ꦢꦺꦱꦤꦴꦤꦪꦁ ꦱꦔ꧀ꦒꦟ꧀ꦲꦴꦠꦶ. ꦠꦱ꧀ꦱꦠ꧀ꦡꦺꦴ – ꦪꦡꦴ ꦆꦢꦁ ꦱꦮꦶꦚ꧀ꦚꦴꦟꦏꦴꦱꦸꦨꦁ ꦄꦴꦪꦸꦈꦱ꧀ꦩꦴꦮꦶꦚ꧀ꦚꦴꦟꦴꦤꦁ ꦄꦤꦥꦒꦩꦴ ꦕꦫꦠꦶ ꦠꦶꦛ꧀ꦜꦠꦶ ꦤꦶꦱꦷꦢꦠꦶ ꦱꦪꦠꦶ, ꦠꦡꦴ ꦌꦠꦁ ꦌꦠꦫꦲꦶ ꦱꦸꦱꦴꦤꦺ ꦱꦪꦶꦠꦁ ꦄꦮꦶꦚ꧀ꦚꦴꦟꦏꦩ꧀ꦥꦶ ꦥꦸꦧ꧀ꦧꦺ ꦠꦺꦱꦁ ꦣꦩ꧀ꦩꦴꦤꦁ ꦄꦤꦥꦒꦩꦴ ꦄꦲꦺꦴꦱꦶ. ꦪꦡꦴ ꦕ ꦌꦠꦁ ꦌꦠꦫꦲꦶ ꦩꦠꦱꦫꦷꦫꦁ ꦠꦺꦱꦁ ꦣꦩ꧀ꦩꦴꦤꦁ ꦄꦥꦒꦩꦴ ꦤ ꦕꦫꦠꦶ ꦤ ꦠꦶꦛ꧀ꦜꦠꦶ ꦤ ꦤꦶꦱꦷꦢꦠꦶ ꦤ ꦱꦺꦪ꧀ꦪꦁ ꦏꦥ꧀ꦥꦺꦠꦶ, ꦠꦡꦴ ꦆꦢꦁ ꦱꦮꦶꦚ꧀ꦚꦴꦟꦏꦩ꧀ꦥꦶ ꦠꦺꦱꦁ ꦣꦩ꧀ꦩꦴꦤꦁ ꦄꦥꦒꦩꦴ ꦨꦮꦶꦱ꧀ꦱꦠꦶ. ꦪꦡꦴ ꦕ ꦆꦢꦁ ꦱꦮꦶꦚ꧀ꦚꦴꦟꦏꦁ ꦤꦺꦠꦫꦲꦶ ꦱꦸꦱꦴꦤꦺ ꦩꦠꦁ ꦱꦺꦠꦶ ꦤ ꦈꦢ꧀ꦣꦸꦩꦴꦠꦏꦴꦢꦶꦨꦴꦮꦩꦸꦥꦒꦠꦁ, ꦠꦡꦴ ꦌꦠꦁ ꦌꦠꦫꦲꦶ ꦩꦠꦱꦫꦷꦫꦩ꧀ꦥꦶ ꦥꦸꦧ꧀ꦧꦺ ꦄꦲꦺꦴꦱꦶ. ꦪꦡꦴ ꦥꦤꦺꦠꦁ ꦌꦠꦫꦲꦶ ꦄꦮꦶꦚ꧀ꦚꦴꦟꦏꦴꦱꦸꦨꦁ ꦩꦠꦏꦱꦸꦱꦴꦤꦺ ꦱꦺꦠꦶ ꦈꦢ꧀ꦣꦸꦩꦴꦠꦏꦴꦢꦶꦨꦴꦮꦚ꧀ꦕ ꦈꦥꦒꦠꦁ, ꦠꦡꦴ ꦆꦢꦁ ꦱꦮꦶꦚ꧀ꦚꦴꦟꦏꦩ꧀ꦥꦶ ꦨꦮꦶꦱ꧀ꦱꦠꦷꦠꦶ. ꦠꦠ꧀ꦡ ꦪꦡꦴ ꦆꦢꦁ ꦠꦡꦴ ꦌꦠꦤ꧀ꦠꦶ ꦄꦠ꧀ꦠꦤꦴ ꦩꦠꦱꦫꦷꦫꦱ꧀ꦱ ꦱꦩꦴꦤꦨꦴꦮꦁ ꦏꦫꦺꦴꦤ꧀ꦠꦺꦴ ꦧꦴꦲꦶꦫꦺ ꦢꦺꦴꦱꦁ ꦥꦗꦲꦠꦶ. ꦪꦡꦴ ꦌꦠꦁ ꦠꦡꦴ ꦆꦢꦤ꧀ꦠꦶ ꦩꦠꦱꦫꦷꦫꦺꦤ ꦄꦠ꧀ꦠꦤꦺꦴ ꦱꦩꦴꦤꦨꦴꦮꦁ ꦏꦫꦺꦴꦤ꧀ꦠꦺꦴ ꦄꦗ꧀ꦙꦠ꧀ꦠꦶꦏꦺ ꦫꦴꦒꦁ ꦥꦗꦲꦠꦶ. ꦪꦺꦤꦴꦏꦴꦫꦺꦤ ꦈꦨꦪꦁ ꦱꦩꦁ ꦏꦫꦺꦴꦠꦶ, ꦠꦁ ꦱꦩ꧀ꦥꦗꦴꦤꦤ꧀ꦠꦺꦴ ꦈꦨꦪꦠ꧀ꦡ ꦩꦺꦴꦲꦁ ꦥꦗꦲꦠꦶ.

ꦧꦲꦶꦢ꧀ꦣꦴ ꦢꦶꦛ꧀ꦜꦴꦤꦤ꧀ꦠꦶ ꦧꦲꦶꦢ꧀ꦣꦴ ꦱꦸꦱꦴꦤꦴꦢꦷꦱꦸ ꦢꦶꦛ꧀ꦜꦴꦤꦁ ꦈꦢ꧀ꦣꦸꦩꦴꦠꦏꦴꦢꦶꦢꦱꦤ꧀ꦤꦁ ꦄꦱꦸꦨꦴꦤꦁ. ‘‘ꦤꦮꦤ꧀ꦤꦁ ꦥꦴꦛꦶꦏꦸꦭ꧀ꦪꦴꦤꦁ ꦮꦱꦺꦤꦴ’’ꦠꦶ ꦏꦱ꧀ꦩꦴ ꦮꦸꦠ꧀ꦠꦁ, ꦤꦤꦸ ꦄꦤ꧀ꦠꦶꦩꦗꦷꦮꦶꦏꦴꦨꦴꦮꦠꦺꦴ ꦥꦶꦟ꧀ꦝꦥꦴꦠꦱ꧀ꦱ ꦄꦭꦴꦨꦭꦴꦨꦺꦱꦸ ꦥꦫꦶꦠꦱ꧀ꦱꦤꦒꦺꦣꦴꦢꦶꦱꦩꦸꦥ꧀ꦥꦠ꧀ꦠꦶꦠꦺꦴ ꦨꦠ꧀ꦠꦱ꧀ꦱ ꦱꦩ꧀ꦩꦢꦗꦤꦤꦠꦺꦴ ꦏꦶꦩꦶꦏꦸꦭꦱꦁꦮꦢ꧀ꦣꦤꦠꦺꦴꦠꦶ ꦌꦮꦩꦴꦢꦷꦲꦶꦥꦶ ꦄꦴꦏꦴꦫꦺꦲꦶ ꦄꦴꦲꦴꦫꦺꦥꦛꦶꦏꦹꦭꦠꦴ ꦥꦕ꧀ꦕꦮꦺꦏ꧀ꦑꦶꦠꦧ꧀ꦧꦴ. ꦮꦸꦠ꧀ꦠꦚ꧀ꦲꦺꦠꦁ – ‘‘ꦄꦤ꧀ꦠꦩꦶꦢꦁ, ꦨꦶꦏ꧀ꦑꦮꦺ, ꦗꦷꦮꦶꦏꦴꦤꦁ ꦪꦢꦶꦢꦁ ꦥꦶꦟ꧀ꦝꦺꦴꦭ꧀ꦪꦁ ꦄꦠꦶꦥꦴꦥꦺꦴꦪꦁ ꦭꦺꦴꦏꦱ꧀ꦩꦶꦁ ꦪꦢꦶꦢꦁ ꦥꦶꦟ꧀ꦝꦺꦴꦭ꧀ꦪꦺꦴ ꦮꦶꦕꦫꦠꦶ ꦥꦠ꧀ꦠꦥꦴꦟꦷꦠꦶ (ꦱꦁ. ꦤꦶ. ꧓.꧘꧐; ꦆꦠꦶꦮꦸ. ꧙꧑). ꦄꦭꦢ꧀ꦣꦴ ꦕ ꦥꦶꦟ꧀ꦝꦥꦴꦠꦁ ꦥꦫꦶꦠꦱ꧀ꦱꦠꦶ, ꦭꦢ꧀ꦣꦴ ꦕ ꦥꦶꦟ꧀ꦝꦥꦴꦠꦁ ꦒꦣꦶꦠꦺꦴ ꦩꦸꦕ꧀ꦖꦶꦠꦺꦴ ꦄꦗ꧀ꦙꦺꦴꦥꦤ꧀ꦤꦺꦴ ꦄꦤꦴꦢꦷꦤꦮꦢꦱ꧀ꦱꦴꦮꦷ ꦄꦤꦶꦱ꧀ꦱꦫꦟꦥꦚ꧀ꦚꦺꦴ ꦥꦫꦶꦨꦸꦚ꧀ꦗꦠꦷꦠꦶ (ꦄ. ꦤꦶ. ꧓.꧑꧒꧔). ꦨꦸꦠ꧀ꦠꦺꦴ ꦕ ꦄꦴꦲꦴꦫꦺꦴ ꦏꦱ꧀ꦱꦕꦶ ꦏꦢꦴꦕꦶ ꦩꦫꦟꦁ ꦮꦴ ꦩꦫꦟꦩꦠ꧀ꦠꦁ ꦮꦴ ꦢꦸꦏ꧀ꦑꦁ ꦄꦴꦮꦲꦠꦷ’’ꦠꦶ.

ꦏꦛꦸꦏꦷꦛꦏꦴꦢꦪꦺꦴ ꦢ꧀ꦮꦠ꧀ꦠꦶꦁꦱꦏꦸꦭꦥ꧀ꦥꦨꦺꦢꦴ ꦏꦶꦩꦶꦪꦺꦴ ꦤꦁ ꦈꦥꦤꦶꦱ꧀ꦱꦴꦪ ꦗꦷꦮꦤ꧀ꦠꦷꦠꦶ? ꦮꦸꦕ꧀ꦕꦠꦺ – ꦄꦤ꧀ꦠꦶꦩꦗꦷꦮꦶꦏꦴꦨꦴꦮꦺꦴ ꦠꦴꦮ ꦕꦶꦠ꧀ꦠꦱꦁꦏꦶꦭꦺꦱꦮꦶꦱꦺꦴꦣꦤꦠ꧀ꦡꦁ ꦏꦩ꧀ꦩꦛ꧀ꦜꦴꦤꦴꦨꦶꦤꦶꦮꦺꦱꦤꦠꦺꦴ ꦥꦒꦺꦮ ꦩꦤꦱꦶ ꦏꦴꦠꦧ꧀ꦧꦺꦴ ‘‘ꦩꦴꦲꦁ ꦖꦮꦴꦭꦴꦠꦱꦢꦶꦱꦺꦴ ꦨꦮꦺꦪ꧀ꦪ’’ꦤ꧀ꦠꦶ. ꦠꦡꦴ ꦥꦶꦟ꧀ꦝꦥꦴꦠꦱ꧀ꦱ ꦄꦭꦴꦨꦭꦴꦨꦺꦱꦸ ꦥꦫꦶꦠꦱ꧀ꦱꦤꦒꦺꦣꦴꦢꦶꦱꦩꦸꦥ꧀ꦥꦠ꧀ꦠꦶꦤꦶꦮꦴꦫꦟꦁ ꦥꦒꦺꦮ ꦄꦤꦸꦛ꧀ꦜꦴꦠꦧ꧀ꦧꦁ ꦱꦸꦥꦫꦶꦱꦸꦢ꧀ꦣꦱꦷꦭꦱ꧀ꦱ ꦥꦛꦶꦱꦔ꧀ꦑꦴꦤꦮꦠꦺꦴ ꦠꦢꦨꦴꦮꦠꦺꦴ. ꦨꦠ꧀ꦠꦱꦩ꧀ꦩꦢꦺꦴ ꦄꦤꦺꦏꦤ꧀ꦠꦶꦏꦺꦴ ꦥꦫꦶꦨꦺꦴꦒꦺ ꦄꦤ꧀ꦠꦺꦴꦒꦣꦺꦴꦮꦴꦠꦶ ꦮꦺꦢꦶꦠꦧ꧀ꦧꦺꦴ. ꦏꦶꦩꦶꦏꦸꦭꦱꦁꦮꦢ꧀ꦣꦤꦁ ꦥꦤ ꦱꦔ꧀ꦒꦲꦺꦠꦧ꧀ꦧꦁ, ꦱꦔ꧀ꦒꦲꦶꦠꦩꦺꦮ ꦮꦴ ‘‘ꦤꦮꦤ꧀ꦤꦁ ꦥꦴꦛꦶꦏꦸꦭ꧀ꦪꦴꦤꦁ ꦮꦱꦺꦤꦴ’’ꦠꦶ ꦌꦠ꧀ꦡ ꦤꦶꦪꦩꦱ꧀ꦱ ꦄꦏꦠꦠ꧀ꦠꦴ. ꦆꦩꦶꦤꦴ ꦮꦴ ꦤꦪꦺꦤ ꦆꦠꦫꦺꦱꦩ꧀ꦥꦺꦠ꧀ꦡ ꦱꦔ꧀ꦒꦲꦺꦴ ꦢꦛ꧀ꦜꦧ꧀ꦧꦺꦴ ꦪꦡꦴꦱꦩ꧀ꦨꦮꦩꦺꦠ꧀ꦡ ꦥꦛꦶꦏꦹꦭꦠꦴꦥꦕ꧀ꦕꦮꦺꦏ꧀ꦑꦟꦱ꧀ꦱ ꦄꦣꦶꦥ꧀ꦥꦺꦠꦠ꧀ꦠꦴ.

ꦌꦮꦚ꧀ꦕ ꦏꦠ꧀ꦮꦴ ꦮꦶꦱꦸꦢ꧀ꦣꦶꦩꦒ꧀ꦒꦺ (ꦮꦶꦱꦸꦢ꧀ꦣꦶ. ꧑.꧒꧙꧔-꧒꧙꧕) ꦢꦱꦲꦶ ꦄꦴꦏꦴꦫꦺꦲꦶ ꦥꦛꦶꦏꦹꦭꦠꦴ ꦮꦺꦢꦶꦠꦧ꧀ꦧꦴ. ꦱꦺꦪ꧀ꦪꦡꦶꦢꦁ – ꦒꦩꦤꦠꦺꦴ, ꦥꦫꦶꦪꦺꦱꦤꦠꦺꦴ, ꦥꦫꦶꦨꦺꦴꦒꦠꦺꦴ, ꦄꦴꦱꦪꦠꦺꦴ, ꦤꦶꦣꦴꦤꦠꦺꦴ, ꦄꦥꦫꦶꦥꦏ꧀ꦏꦠꦺꦴ, ꦥꦫꦶꦥꦏ꧀ꦏꦠꦺꦴ, ꦦꦭꦠꦺꦴ, ꦤꦶꦱ꧀ꦱꦤ꧀ꦢꦠꦺꦴ, ꦱꦩ꧀ꦩꦏ꧀ꦑꦤꦠꦺꦴꦠꦶ. ꦌꦮꦁ ꦢꦱꦤ꧀ꦤꦁ ꦮꦱꦺꦤ ꦥꦴꦛꦶꦏꦸꦭ꧀ꦪꦮꦕꦤꦺꦤꦥꦶ ꦆꦣ ‘‘ꦤꦮꦤ꧀ꦤ’’ꦤ꧀ꦠꦶ ꦮꦕꦤꦁ ꦤ ꦮꦶꦫꦸꦗ꧀ꦙꦠꦶ, ꦱꦩ꧀ꦩꦏ꧀ꦑꦤꦱ꧀ꦱ ꦥꦫꦶꦨꦺꦴꦒꦴꦢꦷꦱꦸ ꦭꦧ꧀ꦨꦩꦴꦤꦨꦴꦮꦴ ꦮꦶꦱꦸꦁ ꦠꦁ ꦄꦒ꧀ꦒꦲꦺꦠ꧀ꦮꦴ ꦤ ꦮꦢꦤ꧀ꦠꦶ. ꦮꦶꦱꦸꦢ꧀ꦣꦶꦩꦒ꧀ꦒꦺ (ꦮꦶꦱꦸꦢ꧀ꦣꦶ. ꧑.꧓꧐꧔) ꦥꦤ ꦱꦩ꧀ꦩꦏ꧀ꦑꦤꦁ ꦥꦫꦶꦨꦺꦴꦒꦴꦢꦷꦱꦸ ꦭꦧ꧀ꦨꦩꦴꦤꦩ꧀ꦥꦶ ꦤꦶꦱ꧀ꦱꦤ꧀ꦢꦮꦱꦺꦤ ꦮꦶꦱꦺꦱꦠꦺꦴ ꦥꦛꦶꦏꦹꦭꦤ꧀ꦠꦶ ꦢꦱ꧀ꦱꦺꦠꦸꦁ ꦱꦧ꧀ꦧꦥꦕ꧀ꦖꦴ ꦜꦥꦶꦠꦴ.

ꦈꦏ꧀ꦏꦟ꧀ꦜꦶꦠꦱꦚ꧀ꦚꦴꦪ ꦱꦩꦤ꧀ꦤꦴꦒꦠꦺꦴꦠꦶ ꦠꦷꦱꦸ ꦨꦮꦺꦱꦸ ꦄꦫꦸꦕ꧀ꦕꦤꦮꦱꦺꦤ ꦥꦮꦠ꧀ꦠꦴꦪ ꦮꦶꦥꦱ꧀ꦱꦤꦴꦥꦚ꧀ꦚꦴꦪ ꦱꦩꦤ꧀ꦤꦴꦒꦠꦺꦴ. ꦤꦶꦧ꧀ꦧꦶꦢꦴꦤꦸꦥꦱ꧀ꦱꦤꦴ ꦲꦺꦱꦴ ꦱꦚ꧀ꦚꦴꦱꦷꦱꦺꦤ ꦮꦸꦠ꧀ꦠꦴ. ꦱꦺꦱꦩꦺꦠ꧀ꦡ ꦈꦠ꧀ꦠꦴꦤꦩꦺꦮ.

ꦄꦱꦸꦨꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.