(꧙) ꧔. ꦩꦕꦭꦮꦒ꧀ꦒꦺꦴ

꧑-꧖. ꦥꦴꦟꦴꦠꦶꦥꦴꦠꦱꦸꦠ꧀ꦠꦴꦢꦶꦮꦟ꧀ꦟꦤꦴ

꧘꧑-꧘꧖. ꦕꦠꦸꦠ꧀ꦡꦱ꧀ꦱ ꦥꦜꦩꦴꦢꦷꦤꦶ ꦈꦠ꧀ꦠꦴꦤꦠ꧀ꦡꦴꦤꦺꦮ. ꦥꦚ꧀ꦕꦩꦺ (ꦱꦁ. ꦤꦶ. ꦛꦷ. ꧑.꧑.꧑꧓꧒) ‘‘ꦤꦷꦕꦺ ꦏꦸꦭꦺ ꦥꦕ꧀ꦕꦴꦗꦴꦠꦺꦴ’’ꦠꦶꦄꦴꦢꦶꦏꦺꦤ ꦄꦥ꧀ꦥꦏꦴꦱꦨꦴꦮꦺꦤ ꦠꦩꦠꦷꦠꦶ ꦠꦩꦺꦴ, ꦠꦺꦤ ꦠꦩꦺꦤ ꦪꦸꦠ꧀ꦠꦺꦴꦠꦶ ꦠꦩꦺꦴ ꦥꦸꦒ꧀ꦒꦭꦺꦴ ꦮꦸꦕ꧀ꦕꦠꦶ. ꦠꦡꦴ ꦲꦶ ꦠꦁꦪꦺꦴꦒꦠꦺꦴ ꦥꦸꦒ꧀ꦒꦭꦱ꧀ꦱ ꦠꦧ꧀ꦧꦺꦴꦲꦴꦫꦺꦴ ꦪꦡꦴ ‘‘ꦩꦕ꧀ꦖꦺꦫꦪꦺꦴꦒꦠꦺꦴ ꦩꦕ꧀ꦖꦫꦺꦴ’’ꦠꦶ, ꦠꦱ꧀ꦩꦴ ꦠꦩꦺꦴꦠꦶ ꦄꦥ꧀ꦥꦏꦴꦱꦨꦴꦮꦺꦤ ꦠꦩꦺꦴ ꦠꦩꦨꦹꦠꦺꦴ ꦄꦤ꧀ꦣꦏꦴꦫꦁ ꦮꦶꦪ ꦗꦴꦠꦺꦴ, ꦄꦤ꧀ꦣꦏꦴꦫꦠ꧀ꦠꦁ ꦮꦴ ꦥꦠ꧀ꦠꦺꦴꦠꦶ ꦄꦠ꧀ꦡꦺꦴ. ꦮꦸꦠ꧀ꦠꦭꦏ꧀ꦑꦟꦁ ꦠꦩꦩꦺꦮ ꦥꦫꦩ꧀ꦥꦫꦠꦺꦴ ꦄꦪꦤꦁ ꦒꦠꦶ ꦤꦶꦛ꧀ꦜꦴ ꦌꦠꦱ꧀ꦱꦴꦠꦶ ꦠꦩꦥꦫꦴꦪꦟꦺꦴ. ꦈꦨꦪꦺꦤꦥꦶ ꦠꦩꦒ꧀ꦒꦲꦟꦺꦤ ꦑꦤ꧀ꦣꦠꦩꦺꦴ ꦏꦡꦶꦠꦺꦴ, ꦤ ꦄꦤ꧀ꦣꦏꦴꦫꦠꦩꦺꦴ. ꦑꦤ꧀ꦣꦠꦩꦺꦴꦠꦶ ꦕ ꦱꦩ꧀ꦥꦠ꧀ꦠꦶꦫꦲꦶꦠꦴ ꦑꦤ꧀ꦣꦥꦮꦠ꧀ꦠꦶꦪꦺꦮ ꦢꦛ꧀ꦜꦧ꧀ꦧꦴ. ‘‘ꦈꦕ꧀ꦕꦺ ꦏꦸꦭꦺ ꦥꦕ꧀ꦕꦴꦗꦴꦠꦺꦴ’’ꦠꦶꦄꦴꦢꦶꦏꦺꦤ ꦥꦏꦴꦱꦨꦴꦮꦺꦤ ꦗꦺꦴꦠꦺꦠꦷꦠꦶ ꦗꦺꦴꦠꦶ, ꦠꦺꦤ ꦗꦺꦴꦠꦶꦤꦴꦪꦸꦠ꧀ꦠꦺꦴꦠꦶꦄꦴꦢꦶ ꦱꦧ꧀ꦧꦁ ꦮꦸꦠ꧀ꦠꦤꦪꦺꦤ ꦮꦺꦢꦶꦠꦧ꧀ꦧꦁ. ꦆꦠꦫꦺ ꦢ꧀ꦮꦺꦠꦶ ꦗꦺꦴꦠꦶꦠꦩꦥꦫꦴꦪꦟꦺꦴ, ꦗꦺꦴꦠꦶꦗꦺꦴꦠꦶꦥꦫꦴꦪꦟꦺꦴꦠꦶ ꦆꦠꦫꦺ ꦢ꧀ꦮꦺ ꦥꦸꦒ꧀ꦒꦭꦺ.

ꦮꦺꦟꦸꦮꦺꦠ꧀ꦠꦴꦢꦶꦮꦶꦭꦷꦮꦺꦲꦶ ꦥꦺꦭ꦳ꦨꦴꦗꦤꦴꦢꦶꦏꦴꦫꦏꦴ ꦮꦶꦭꦷꦮꦏꦴꦫꦏꦴ. ꦩꦶꦒꦩꦕ꧀ꦖꦴꦢꦷꦤꦁ ꦤꦶꦱꦴꦢꦤꦠꦺꦴ ꦤꦺꦱꦴꦢꦴ, ꦩꦴꦒꦮꦶꦏꦩꦕ꧀ꦖꦧꦤ꧀ꦣꦴꦢꦪꦺꦴ. ꦫꦡꦺꦱꦸ ꦕꦩ꧀ꦩꦺꦤ ꦤꦲꦟꦏꦫꦟꦠꦺꦴ ꦫꦡꦏꦴꦫꦴ, ꦕꦩ꧀ꦩꦏꦴꦫꦴ. ꦥꦸꦆꦠꦶ ꦏꦫꦷꦱꦱ꧀ꦱ ꦤꦴꦩꦁ, ꦠꦁ ꦏꦸꦱꦺꦤ꧀ꦠꦶ ꦄꦥꦤꦺꦤ꧀ꦠꦷꦠꦶ ꦥꦸꦏ꧀ꦏꦸꦱꦴ, ꦥꦸꦥ꧀ꦦꦖꦝ꧀ꦝꦏꦴ. ꦢꦸꦧ꧀ꦧꦟ꧀ꦟꦺꦴꦠꦶ ꦮꦶꦫꦹꦥꦺꦴ. ꦎꦏꦺꦴꦛꦶꦩꦏꦺꦴꦠꦶ ꦄꦴꦫꦺꦴꦲꦴꦨꦴꦮꦺꦤ ꦲꦺꦛ꧀ꦜꦶꦩꦏꦺꦴ, ꦫꦱ꧀ꦱꦏꦴꦪꦺꦴꦠꦶ ꦄꦠ꧀ꦡꦺꦴ. ꦠꦺꦤꦴꦲ ‘‘ꦭꦏꦸꦟ꧀ꦝꦏꦺꦴ’’ꦠꦶ. ꦭꦏꦸ ꦮꦶꦪ ꦓꦛꦶꦏꦴ ꦮꦶꦪ ꦝꦺꦠꦶ ꦥꦮꦠ꧀ꦠꦠꦷꦠꦶ ꦭꦏꦸꦟ꧀ꦝꦏꦺꦴ, ꦫꦱ꧀ꦱꦺꦴ. ꦏꦟꦠꦶ ꦤꦶꦩꦷꦭꦠꦷꦠꦶ ꦏꦴꦟꦺꦴ. ꦠꦁ ꦥꦤꦱ꧀ꦱ ꦤꦶꦩꦷꦭꦤꦁ ꦌꦏꦺꦤ ꦄꦏ꧀ꦑꦶꦤꦴ ꦢ꧀ꦮꦷꦲꦶꦥꦶ ꦮꦴꦠꦶ ꦄꦴꦲ ‘‘ꦌꦏꦕ꧀ꦖꦶꦏꦴꦟꦺꦴ ꦮꦴ ꦈꦨꦪꦕ꧀ꦖꦶꦏꦴꦟꦺꦴ ꦮꦴ’’ꦠꦶ. ꦏꦸꦟꦤꦁ ꦏꦸꦟꦺꦴ, ꦲꦠ꧀ꦡꦮꦺꦏꦭ꧀ꦭꦁ, ꦱꦺꦴ ꦌꦠꦱ꧀ꦱ ꦄꦠ꧀ꦡꦷꦠꦶ ꦏꦸꦟꦷ. ꦑꦚ꧀ꦗꦺꦴ ꦮꦸꦕ꧀ꦕꦠꦶ ꦥꦴꦢꦮꦶꦏꦭꦺꦴ. ꦲꦺꦛ꧀ꦜꦶꦩꦏꦴꦪꦱꦔ꧀ꦑꦴꦠꦺꦴ ꦱꦫꦷꦫꦱ꧀ꦱ ꦥꦏ꧀ꦑꦺꦴ ꦥꦢꦺꦱꦺꦴ ꦲꦠꦺꦴ ꦄꦱ꧀ꦱꦴꦠꦶ ꦥꦏ꧀ꦑꦲꦠꦺꦴ. ꦠꦺꦤꦴꦲ ‘‘ꦥꦷꦜꦱꦥ꧀ꦥꦷ’’ꦠꦶ. ꦥꦢꦷꦥꦺ ꦥꦢꦷꦥꦤꦺ ꦌꦠꦧ꧀ꦧꦁ ꦤꦺꦠꦧ꧀ꦧꦤ꧀ꦠꦶ ꦥꦢꦷꦥꦺꦪ꧀ꦪꦁ, ꦠꦺꦭꦏꦥꦴꦭꦴꦢꦶꦈꦥꦏꦫꦟꦁ. ꦮꦸꦠ꧀ꦠꦤ꧀ꦠꦶ ꦄꦛ꧀ꦜꦏꦡꦴꦪꦁ ꦮꦸꦠ꧀ꦠꦁ.

ꦄꦴꦒꦩꦤꦮꦶꦥꦠ꧀ꦠꦷꦠꦶ ꦄꦴꦒꦩꦤꦛ꧀ꦜꦴꦤꦮꦱꦺꦤ ꦮꦶꦥꦠ꧀ꦠꦶ ‘‘ꦄꦴꦒꦩꦺꦴ ꦌꦠ꧀ꦡꦴ’’ꦠꦶ ꦏꦠ꧀ꦮꦴ. ꦥꦸꦧ꧀ꦧꦸꦥ꧀ꦥꦤ꧀ꦤꦥꦕ꧀ꦕꦪꦮꦶꦥꦠ꧀ꦠꦷꦠꦶ ꦥꦜꦩꦸꦥ꧀ꦥꦤ꧀ꦤꦥꦕ꧀ꦕꦪꦮꦱꦺꦤ ꦮꦶꦥꦫꦴꦮꦠ꧀ꦠꦶ. ꦕꦟ꧀ꦝꦴꦭꦴꦢꦶꦱꦨꦴꦮꦴ ꦲꦶꦱ꧀ꦱ ꦩꦴꦠꦴꦥꦶꦠꦫꦺꦴ ꦥꦜꦩꦸꦥ꧀ꦥꦤ꧀ꦤꦥꦕ꧀ꦕꦪꦺꦴ. ꦥꦮꦠ꧀ꦠꦥꦕ꧀ꦕꦪꦮꦶꦥꦠ꧀ꦠꦷꦠꦶ ꦥꦮꦠ꧀ꦠꦺ ꦱꦸꦑꦥꦕ꧀ꦕꦪꦮꦶꦥꦠ꧀ꦠꦶ. ꦠꦴꦢꦶꦱꦺ ꦤꦶꦲꦷꦤꦏꦸꦭꦺ ꦈꦥ꧀ꦥꦤ꧀ꦤꦺꦴꦥꦶ ꦏꦺꦴꦕꦶ ꦮꦶꦨꦮꦱꦩ꧀ꦥꦤ꧀ꦤꦺꦴ ꦱꦶꦪꦴ, ꦄꦪꦁ ꦥꦤ ꦢꦸꦒ꧀ꦒꦠꦺꦴ ꦢꦸꦫꦹꦥꦺꦴ. ꦄꦴꦗꦷꦮꦸꦥꦴꦪꦮꦶꦥꦠ꧀ꦠꦷꦠꦶ ꦄꦴꦗꦷꦮꦤꦸꦥꦴꦪꦮꦱꦺꦤ ꦮꦶꦥꦠ꧀ꦠꦶ. ꦱꦸꦑꦺꦤ ꦲꦶ ꦗꦷꦮꦶꦏꦁ ꦥꦮꦠ꧀ꦠꦺꦠꦸꦁ ꦈꦥꦴꦪꦨꦹꦠꦴ ꦲꦠ꧀ꦡꦶꦱꦶꦥ꧀ꦥꦴꦢꦪꦺꦴ ꦆꦩꦱ꧀ꦱ ꦤꦠ꧀ꦡꦶ, ꦥꦸꦥ꧀ꦦꦖꦝ꧀ꦝꦤꦱꦶꦭꦴꦏꦺꦴꦛ꧀ꦛꦤꦴꦢꦶꦏꦩ꧀ꦩꦁ ꦥꦤ ꦏꦠ꧀ꦮꦴ ꦗꦷꦮꦶꦏꦁ ꦥꦮꦠ꧀ꦠꦺꦠꦶ. ꦠꦺꦤꦴꦲ ‘‘ꦏꦱꦶꦫꦮꦸꦠ꧀ꦠꦶꦏꦺ’’ꦠꦶ. ꦄꦠ꧀ꦠꦨꦴꦮꦮꦶꦥꦠ꧀ꦠꦷꦠꦶ ꦈꦥꦣꦶꦮꦶꦥꦠ꧀ꦠꦶ. ꦢꦸꦏ꧀ꦑꦏꦴꦫꦟꦱꦩꦴꦪꦺꦴꦒꦺꦴꦠꦶ ꦏꦴꦪꦶꦏꦕꦺꦠꦱꦶꦏꦢꦸꦏ꧀ꦑꦸꦥ꧀ꦥꦠ꧀ꦠꦶꦪꦴ ꦥꦕ꧀ꦕꦪꦱꦩꦺꦴꦣꦴꦤꦁ. ꦱꦸꦑꦏꦴꦫꦟꦮꦶꦥꦠ꧀ꦠꦷꦠꦶ ꦱꦸꦑꦥꦕ꧀ꦕꦪꦥꦫꦶꦲꦴꦤꦶ. ꦈꦥꦨꦺꦴꦒꦮꦶꦥꦠ꧀ꦠꦷꦠꦶ ꦈꦥꦨꦺꦴꦒꦱꦸꦑꦱ꧀ꦱ ꦮꦶꦤꦴꦱꦺꦴ ꦄꦤꦸꦥꦭꦢ꧀ꦣꦶ. ꦗꦺꦴꦠꦶ ꦕꦺꦮ ꦗꦺꦴꦠꦶꦥꦫꦴꦪꦟꦨꦴꦮꦺꦴ ꦕ ꦱꦸꦏ꧀ꦏꦥꦏ꧀ꦑꦺꦴ. ꦖꦛ꧀ꦜꦁ ꦈꦠ꧀ꦠꦴꦤꦩꦺꦮ.

ꦥꦴꦟꦴꦠꦶꦥꦴꦠꦱꦸꦠ꧀ꦠꦴꦢꦶꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧗. ꦥꦸꦠ꧀ꦠꦱꦸꦠ꧀ꦠꦮꦟ꧀ꦟꦤꦴ

꧘꧗. ꦱꦠ꧀ꦠꦩꦺ ꦩ-ꦏꦴꦫꦺꦴ ꦥꦢꦱꦤ꧀ꦣꦶꦏꦫꦺꦴ ‘‘ꦄꦚ꧀ꦚꦩꦚ꧀ꦚ’’ꦤ꧀ꦠꦶꦄꦴꦢꦷꦱꦸ ꦮꦶꦪ. ꦤꦶꦕ꧀ꦕꦭꦱꦩꦟꦺꦴꦠꦶ ꦡꦶꦫꦱꦩꦟꦺꦴ. ꦄꦨꦶꦱꦶꦚ꧀ꦕꦶꦠꦧ꧀ꦧꦺꦴꦠꦶ ꦄꦨꦶꦱꦺꦏꦺꦴꦠꦶ ꦏꦩ꧀ꦩꦱꦴꦣꦤꦺꦴ ꦄꦨꦶꦱꦺꦏꦱꦢ꧀ꦢꦺꦴ. ꦠꦺꦤꦴꦲ ‘‘ꦄꦨꦶꦱꦺꦏꦁ ꦏꦴꦠꦸꦁ ꦪꦸꦠ꧀ꦠꦺꦴ’’ꦠꦶ.

ꦧꦴꦏꦸꦭꦠ꧀ꦡꦺꦫꦺꦴ ꦮꦶꦪꦴꦠꦶ ꦡꦺꦫꦺꦴ ꦲꦶ ꦩꦲꦴꦪꦱꦱ꧀ꦱꦷ, ꦠꦱ꧀ꦱ ꦥꦸꦠ꧀ꦠꦣꦷꦠꦫꦺꦴ ꦤꦠ꧀ꦠꦸꦥꦤꦠ꧀ꦠꦏꦴ ꦱꦸꦑꦸꦩꦱꦴꦛꦏꦺꦲꦶ ꦕꦷꦮꦫꦴꦤꦶ ꦏꦴꦫꦺꦠ꧀ꦮꦴ ꦫꦗꦴꦥꦺꦠ꧀ꦮꦴ ꦱꦩꦸꦒ꧀ꦒꦺ ꦥꦏ꧀ꦑꦶꦥꦶꦠ꧀ꦮꦴ ꦥꦲꦶꦟꦤ꧀ꦠꦶ. ꦡꦺꦫꦱ꧀ꦱ ꦤꦲꦴꦤꦏꦴꦭꦺ ꦤꦲꦴꦤꦏꦺꦴꦛ꧀ꦜꦏꦺ ꦜꦥꦺꦤ꧀ꦠꦶ. ꦡꦺꦫꦺꦴ ꦠꦴꦤꦶ ꦤꦶꦮꦴꦱꦺꦠꦶ ꦕꦺꦮ ꦥꦴꦫꦸꦥꦠꦶ ꦕ. ꦠꦺꦤꦺꦮꦺꦠꦁ ꦮꦸꦠ꧀ꦠꦁ.

ꦑꦢꦶꦫꦮꦤꦩꦒ꧀ꦒꦺ ꦱꦷꦮꦭꦶꦠ꧀ꦡꦺꦫꦺꦴ ꦮꦶꦪꦴꦠꦶ ꦱꦠ꧀ꦡꦫꦶ ꦏꦶꦫ ꦠꦁ ꦩꦒ꧀ꦒꦁ ꦥꦛꦶꦥꦤ꧀ꦤꦺ ꦢꦺꦮꦠꦴ ‘‘ꦄꦩ꧀ꦲꦴꦏꦁ ꦄꦪ꧀ꦪꦱ꧀ꦱ ꦱꦷꦮꦭꦶꦠ꧀ꦡꦺꦫꦱ꧀ꦱ ꦱꦏ꧀ꦏꦴꦫꦁ ꦏꦫꦶꦱ꧀ꦱꦴꦩꦴ’’ꦠꦶ ꦕꦶꦤ꧀ꦠꦺꦠ꧀ꦮꦴ ꦌꦏꦺꦏꦪꦺꦴꦗꦤꦺ ꦮꦶꦲꦴꦫꦁ ꦏꦴꦫꦺꦠ꧀ꦮꦴ ꦌꦏꦪꦺꦴꦗꦤꦠꦺꦴ ꦈꦢ꧀ꦣꦁ ꦒꦤ꧀ꦠꦸꦁ ꦄꦢꦠ꧀ꦮꦴ ꦥꦴꦠꦺꦴꦮ ꦈꦛ꧀ꦜꦴꦪ ꦢꦶꦧ꧀ꦧꦴꦤꦶ ꦪꦴꦒꦸꦄꦴꦢꦷꦤꦶ ꦒꦲꦺꦠ꧀ꦮꦴ ‘‘ꦄꦩ꧀ꦲꦴꦏꦁ ꦄꦪ꧀ꦪꦺꦴ ꦱꦷꦮꦭꦶꦠ꧀ꦡꦺꦫꦺꦴ ꦏꦲꦁ ꦤꦶꦱꦶꦤ꧀ꦤꦺꦴ’’ꦠꦶ ꦮꦶꦕꦫꦤ꧀ꦠꦶ. ꦡꦺꦫꦺꦴ ꦄꦠ꧀ꦠꦤꦺꦴ ꦄꦨꦶꦲꦛꦁ ꦧꦸꦢ꧀ꦣꦥ꧀ꦥꦩꦸꦑꦱ꧀ꦱ ꦨꦶꦏ꧀ꦑꦸꦱꦔ꧀ꦓꦱ꧀ꦱ ꦢꦴꦥꦺꦱꦶ. ꦌꦮꦁ ꦱꦠ꧀ꦡꦴ ꦱꦥꦫꦶꦮꦴꦫꦺꦴ ꦠꦶꦁꦱꦪꦺꦴꦗꦤꦶꦏꦁ ꦏꦤ꧀ꦠꦴꦫꦁ ꦱꦷꦮꦭꦶꦠ꧀ꦡꦺꦫꦱ꧀ꦱ ꦥꦸꦚ꧀ꦚꦦꦭꦁ ꦄꦤꦸꦨꦮꦩꦴꦤꦺꦴꦮ ꦄꦒꦩꦴꦱꦶ. ꦠꦺꦤꦺꦮꦺꦠꦁ ꦮꦸꦠ꧀ꦠꦁ.

ꦄꦛ꧀ꦜꦏꦤꦴꦒꦫꦱꦸꦠ꧀ꦠꦺ ꦄꦴꦤꦤ꧀ꦢꦠ꧀ꦡꦺꦫꦺꦴ ꦮꦶꦪꦴꦠꦶ ꦄꦛ꧀ꦜꦏꦤꦴꦒꦫꦏꦺꦴ ꦏꦶꦫ ꦒꦲꦥꦠꦶ ꦡꦺꦫꦱ꧀ꦱ ꦣꦩ꧀ꦩꦢꦺꦱꦤꦴꦪ ꦥꦱꦷꦢꦶꦠ꧀ꦮꦴ ꦥꦚ꧀ꦕꦱꦠꦒ꧀ꦓꦤꦏꦁ ꦮꦶꦲꦴꦫꦁ ꦏꦴꦫꦺꦠ꧀ꦮꦴ ꦄꦢꦴꦱꦶ. ꦠꦁ ꦱꦤ꧀ꦣꦴꦪꦺꦠꦁ ꦮꦸꦠ꧀ꦠꦁ.

ꦥꦶꦭꦶꦤ꧀ꦢꦮꦕ꧀ꦖꦠ꧀ꦡꦺꦫꦺꦴ ꦮꦶꦪꦴꦠꦶ ꦡꦺꦫꦱ꧀ꦱ ꦏꦶꦫ ꦆꦢ꧀ꦣꦴꦤꦸꦨꦴꦮꦺꦤ ꦥꦱꦤ꧀ꦤꦴ ꦩꦤꦸꦱ꧀ꦱꦴ ꦱꦥ꧀ꦥꦶꦄꦴꦢꦷꦤꦶ ꦧꦲꦹꦤꦶ ꦨꦺꦱꦗ꧀ꦗꦴꦤꦶ ꦄꦨꦶꦲꦫꦶꦁꦱꦸ. ꦥꦏꦠꦶꦪꦴꦥꦶ ꦕ ꦄꦴꦪꦱ꧀ꦩꦴ ꦥꦶꦭꦶꦤ꧀ꦢꦮꦕ꧀ꦖꦺꦴ ꦭꦴꦨꦷ ꦲꦺꦴꦠꦶ ꦥꦚ꧀ꦕꦤ꧀ꦤꦁ ꦨꦺꦱꦗ꧀ꦗꦴꦤꦁ, ꦭꦢ꧀ꦣꦁ ꦭꦢ꧀ꦣꦁ ꦥꦫꦶꦱꦴꦪ ꦮꦶꦱ꧀ꦱꦗ꧀ꦗꦺꦠꦶ. ꦠꦺꦤꦺꦠꦁ ꦮꦸꦠ꧀ꦠꦁ ‘‘ꦒꦶꦭꦴꦤꦥꦕ꧀ꦕꦪꦁ ꦥꦶꦭꦶꦤ꧀ꦢꦮꦕ꧀ꦖꦠ꧀ꦡꦺꦫꦺꦴ ꦮꦶꦪꦴ’’ꦠꦶ.

ꦠꦶꦟ꧀ꦟꦩ꧀ꦥꦶ ꦱꦤ꧀ꦤꦶꦥꦴꦠꦺꦤ ꦤꦶꦧ꧀ꦧꦠ꧀ꦠꦴꦤꦷꦠꦶ ꦥꦶꦠ꧀ꦠꦴꦢꦷꦤꦁ ꦠꦶꦟ꧀ꦟꦩ꧀ꦥꦶ ꦮꦶꦱꦩꦴꦤꦁ ꦱꦤ꧀ꦤꦶꦥꦴꦠꦺꦤ ꦗꦴꦠꦴꦤꦶ. ꦄꦠꦶꦱꦷꦠꦴꦢꦶꦨꦴꦮꦺꦤ ꦈꦠꦹꦤꦁ ꦥꦫꦶꦟꦴꦩꦺꦴꦠꦶ ꦄꦴꦲ ‘‘ꦄꦠꦶꦱꦷꦠꦄꦠꦶꦈꦟ꧀ꦲꦈꦠꦸꦠꦺꦴ ꦗꦴꦠꦴꦤꦷ’’ꦠꦶ. ꦥꦸꦫꦶꦩꦈꦠꦸꦠꦺꦴ ꦮꦶꦱꦢꦶꦱꦺꦴ ꦈꦠꦸ ꦈꦠꦸꦥꦫꦶꦟꦴꦩꦺꦴ, ꦠꦠꦺꦴ ꦗꦴꦠꦴꦤꦶ ꦈꦠꦸꦥꦫꦶꦟꦴꦩꦗꦴꦤꦶ, ꦮꦶꦱꦨꦴꦒꦈꦠꦸꦠꦺꦴ ꦗꦴꦠꦴꦤꦷꦠꦶ ꦄꦠ꧀ꦡꦺꦴ. ꦗꦔ꧀ꦒꦭꦢꦺꦱꦮꦴꦱꦷꦤꦚ꧀ꦲꦶ ꦄꦤꦹꦥꦢꦺꦱꦺ ꦮꦱꦤ꧀ꦠꦴꦤꦁ ꦮꦶꦱꦨꦴꦒꦺꦴꦮ ꦈꦠꦸ ꦈꦥ꧀ꦥꦗ꧀ꦗꦠꦶ, ꦄꦤꦹꦥꦢꦺꦱꦮꦴꦱꦷꦤꦚ꧀ꦕ ꦗꦔ꧀ꦒꦭꦢꦺꦱꦺꦠꦶ. ꦌꦮꦁ ꦩꦭꦪꦱꦩꦸꦢ꧀ꦢꦠꦷꦫꦴꦢꦶꦮꦱꦺꦤꦥꦶ ꦈꦠꦸꦮꦶꦱꦨꦴꦒꦠꦴ ꦈꦥ꧀ꦥꦗ꧀ꦗꦠꦶꦪꦺꦮ. ꦠꦠꦺꦴ ꦗꦴꦠꦴꦤꦶ ꦈꦠꦸꦥꦫꦶꦟꦴꦩꦗꦴꦤꦶ ꦤꦴꦩ.

ꦄꦠ꧀ꦠꦤꦺꦴ ꦥꦏꦠꦶꦕꦫꦶꦪꦴꦤꦁ ꦮꦶꦱꦩꦁ ꦏꦴꦪꦱ꧀ꦱ ꦥꦫꦶꦲꦫꦟꦮꦱꦺꦤ ꦮꦶꦱꦩꦥꦫꦶꦲꦴꦫꦗꦴꦤꦶ. ꦠꦴꦤꦶ ꦥꦤ ꦄꦕ꧀ꦕꦴꦱꦤꦄꦠꦶꦛ꧀ꦜꦴꦤꦴꦢꦶꦤꦴ ꦮꦺꦢꦶꦠꦧ꧀ꦧꦴꦤꦷꦠꦶ ꦄꦴꦲ ‘‘ꦄꦕ꧀ꦕꦴꦱꦤꦄꦠꦶꦛ꧀ꦜꦴꦤꦴꦢꦶꦏꦴ’’ꦠꦶ. ꦄꦴꦢꦶ-ꦱꦢ꧀ꦢꦺꦤ ꦩꦲꦴꦨꦴꦫꦮꦲꦟꦱꦸꦣꦴꦏꦺꦴꦛ꧀ꦛꦤꦄꦢꦺꦱꦏꦴꦭꦕꦫꦟꦴꦢꦷꦤꦶ ꦱꦔ꧀ꦒꦟ꧀ꦲꦴꦠꦶ. ꦥꦫꦱ꧀ꦱ ꦈꦥꦏ꧀ꦏꦩꦠꦺꦴ ꦤꦶꦧ꧀ꦧꦠ꧀ꦠꦴꦤꦶ ꦎꦥꦏ꧀ꦏꦩꦶꦏꦴꦤꦶ, ꦄꦪꦁ ꦕꦺꦴꦫꦺꦴꦠꦶ ꦮꦴ ꦥꦴꦫꦢꦴꦫꦶꦏꦺꦴꦠꦶ ꦮꦴ ꦒꦲꦺꦠ꧀ꦮꦴ ꦗꦟ꧀ꦟꦸꦏꦏꦥ꧀ꦥꦫꦩꦸꦒ꧀ꦒꦫꦴꦢꦷꦲꦶ ꦤꦶꦥ꧀ꦥꦺꦴꦡꦤꦈꦥꦏ꧀ꦏꦩꦁ ꦥꦕ꧀ꦕꦪꦁ ꦏꦠ꧀ꦮꦴ ꦈꦥ꧀ꦥꦤ꧀ꦤꦴꦤꦷꦠꦶ ꦄꦠ꧀ꦡꦺꦴ. ꦠꦺꦤꦴꦲ ‘‘ꦮꦣꦧꦤ꧀ꦣꦤꦴꦢꦶꦈꦥꦏ꧀ꦏꦩꦺꦤ ꦤꦶꦧ꧀ꦧꦠ꧀ꦠꦴꦤꦷ’’ꦠꦶ. ꦏꦺꦮꦭꦤ꧀ꦠꦶ ꦧꦴꦲꦶꦫꦁ ꦥꦕ꧀ꦕꦪꦁ ꦄꦤꦥꦺꦏ꧀ꦑꦶꦠ꧀ꦮꦴ ꦏꦺꦮꦭꦁ, ꦠꦺꦤ ꦮꦶꦤꦴꦠꦶ ꦄꦠ꧀ꦡꦺꦴ. ꦠꦺꦤꦴꦲ ‘‘ꦥꦸꦧ꧀ꦧꦺꦏꦠꦏꦩ꧀ꦩꦮꦶꦥꦴꦏꦮꦱꦺꦤꦺꦮ ꦗꦴꦠꦴꦤꦷ’’ꦠꦶ.

ꦥꦸꦠ꧀ꦠꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

꧘-꧑꧐. ꦱꦁꦪꦺꦴꦗꦤꦱꦸꦠ꧀ꦠꦴꦢꦶꦮꦟ꧀ꦟꦤꦴ

꧘꧘-꧙꧐. ꦄꦛ꧀ꦜꦩꦺ ꦱꦺꦴꦠꦴꦥꦤ꧀ꦤꦺꦴ ꦕꦠꦹꦲꦶ ꦮꦴꦠꦺꦲꦶ ꦆꦤ꧀ꦢꦑꦷꦭꦺꦴ ꦮꦶꦪ ꦥꦫꦥ꧀ꦥꦮꦴꦢꦺꦲꦶ ꦄꦏꦩ꧀ꦥꦶꦪꦺꦴ ꦄꦕꦭꦱꦢ꧀ꦣꦴꦪ ꦱꦩꦤ꧀ꦤꦴꦒꦠꦠ꧀ꦠꦴ ꦱꦴꦱꦤꦺ ꦭꦢ꧀ꦣꦥ꧀ꦥꦠꦶꦛ꧀ꦜꦺꦴ ꦱꦩꦟꦩꦕꦭꦺꦴ ꦤꦴꦩꦴꦠꦶ ꦄꦴꦲ ‘‘ꦱꦴꦱꦤꦺ ꦭꦢ꧀ꦣꦥ꧀ꦥꦠꦶꦛ꧀ꦜꦠ꧀ꦠꦴ’’ꦠꦶꦄꦴꦢꦶ. ꦡꦢ꧀ꦣꦨꦴꦮꦏꦫꦴꦤꦁ ꦏꦶꦭꦺꦱꦴꦤꦁ ꦱꦧ꧀ꦧꦱꦺꦴ ꦱꦩꦸꦕ꧀ꦖꦶꦤ꧀ꦤꦠ꧀ꦠꦴꦠꦶ ꦕꦶꦠ꧀ꦠꦱ꧀ꦱ ꦡꦢ꧀ꦣꦨꦴꦮꦏꦫꦴꦤꦁ ꦈꦢ꧀ꦣꦩ꧀ꦨꦴꦒꦶꦪꦏꦶꦭꦺꦱꦴꦤꦁ ꦱꦧ꧀ꦧꦱꦺꦴ ꦄꦨꦴꦮꦴ ꦱꦩꦟꦱꦸꦑꦸꦩꦴꦭꦺꦴ ꦤꦴꦩ ꦱꦸꦑꦸꦩꦴꦭꦨꦴꦮꦥ꧀ꦥꦠ꧀ꦠꦶꦠꦺꦴ. ꦤꦮꦩꦢꦱꦩꦴꦤꦶ ꦱꦸꦮꦶꦚ꧀ꦚꦺꦪ꧀ꦪꦴꦤꦺꦮ.

ꦱꦁꦪꦺꦴꦗꦤꦱꦸꦠ꧀ꦠꦴꦢꦶꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦩꦕꦭꦮꦒ꧀ꦒꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.