꧙. ꦱꦸꦑꦸꦩꦴꦭꦱꦸꦠ꧀ꦠꦮꦟ꧀ꦟꦤꦴ

꧓꧙. ꦤꦮꦩꦺ ꦤꦶꦢ꧀ꦢꦸꦏ꧀ꦑꦺꦴꦠꦶ ꦏꦴꦪꦶꦏꦕꦺꦠꦱꦶꦏꦢꦸꦏ꧀ꦑꦮꦶꦫꦲꦶꦠꦺꦴ. ꦱꦢꦸꦏ꧀ꦑꦺ ꦲꦶ ꦱꦮꦶꦓꦴꦠꦺ ꦱꦸꦑꦸꦩꦴꦭꦠ꧀ꦠꦴ ꦄꦤꦮꦱꦫꦴ, ꦠꦱ꧀ꦩꦴ ꦱꦸꦑꦶꦠꦺꦴ ꦤꦶꦢ꧀ꦢꦸꦏ꧀ꦑꦠꦴꦪ ꦱꦸꦑꦸꦩꦴꦭꦺꦴ ꦤꦴꦩ. ꦪꦴꦮꦱ꧀ꦱ ꦱꦸꦑꦸꦩꦴꦭꦠ꧀ꦠꦴ ꦥꦫꦩꦸꦏ꧀ꦏꦁꦱꦒꦠꦴꦠꦶ ꦄꦴꦲ ‘‘ꦥꦫꦩꦱꦸꦑꦸꦩꦴꦭꦺꦴ’’ꦠꦶ. ꦄꦠꦶꦮꦶꦪ ꦱꦸꦑꦸꦩꦴꦭꦺꦴꦠꦶ ꦄꦠ꧀ꦡꦺꦴ. ꦄꦤ꧀ꦠꦩꦠꦷꦠꦁ ꦄꦕ꧀ꦕꦤ꧀ꦠꦁ. ꦱꦧ꧀ꦧꦢꦴ ꦱꦸꦑꦸꦩꦴꦭꦺꦴꦠꦶ ꦄꦴꦲ ‘‘ꦱꦠꦠꦤꦶꦢ꧀ꦢꦸꦏ꧀ꦑꦺꦴ’’ꦠꦶ. ꦕꦫꦶꦪꦏꦴꦭꦺꦠꦶ ꦧꦺꦴꦣꦶꦕꦫꦶꦪꦴꦪ ꦕꦫꦟꦏꦴꦭꦺ. ꦠꦺꦤꦴꦠꦶ ꦧꦺꦴꦣꦶꦱꦠ꧀ꦠꦺꦤ. ꦄꦚ꧀ꦚꦠ꧀ꦡ ꦥꦤ ꦥꦢꦸꦩꦤ꧀ꦠꦶ ꦫꦠ꧀ꦠꦁ ꦏꦩꦭꦁ. ꦥꦸꦟ꧀ꦝꦫꦷꦏꦤ꧀ꦠꦶ ꦱꦺꦠꦁ ꦮꦸꦕ꧀ꦕꦠꦶ. ꦆꦠꦫꦴꦠꦶ ꦆꦠꦫꦥꦺꦴꦏ꧀ꦑꦫꦟꦶꦪꦺꦴ. ‘‘ꦧꦺꦴꦣꦶꦱꦠ꧀ꦠꦱ꧀ꦱ ꦏꦶꦫꦴ’’ꦠꦶꦄꦴꦢꦶꦏꦁ ꦥꦺꦴꦏ꧀ꦑꦫꦟꦷꦤꦁ ꦈꦥ꧀ꦥꦠ꧀ꦠꦶꦢꦱ꧀ꦱꦤꦁ. ꦏꦸꦢ꧀ꦢꦴꦭꦏꦩ꧀ꦩꦏꦴꦫꦺꦠꦶ ꦑꦟꦏꦺ. ꦥꦺꦴꦏ꧀ꦑꦫꦟꦶꦛ꧀ꦜꦴꦤꦴꦤꦷꦠꦶ ꦥꦺꦴꦏ꧀ꦑꦫꦟꦶꦑꦟꦤꦪꦺꦴꦒ꧀ꦒꦛ꧀ꦜꦴꦤꦴꦤꦶ. ꦒꦟ꧀ꦲꦴꦥꦺꦱꦷꦠꦶ ꦑꦟꦴꦥꦺꦱꦶ. ꦥꦺꦴꦏ꧀ꦑꦫꦟꦶꦱꦢ꧀ꦢꦺꦴ ꦕꦺꦠ꧀ꦡ ꦠꦴꦢꦶꦱꦺ ꦗꦭꦴꦱꦪꦺ ꦤꦶꦫꦸꦭ꦳꧀ꦲꦺꦴ ꦢꦛ꧀ꦜꦧ꧀ꦧꦺꦴ ꦥꦔ꧀ꦏꦗꦴꦢꦶꦱꦢ꧀ꦢꦴ ꦮꦶꦪ. ꦱꦺꦴꦥꦴꦤꦧꦴꦲꦸꦏꦴꦤꦁ ꦩꦠ꧀ꦡꦏꦛ꧀ꦜꦴꦤꦁ ꦈꦟ꧀ꦲꦷꦱꦤ꧀ꦠꦶ ꦄꦣꦶꦥ꧀ꦥꦺꦠꦁ. ꦈꦢꦏꦱꦺꦕꦤꦤꦴꦭ꦳ꦶꦏꦴꦠꦶ ꦈꦢꦏꦕ꧀ꦖꦛꦴꦮꦶꦱ꧀ꦱꦗ꧀ꦗꦤꦤꦴꦭ꦳ꦶꦪꦤ꧀ꦠꦴꦤꦶ. ꦥꦚ꧀ꦕꦮꦶꦣꦴꦠꦶ ꦮꦟ꧀ꦟꦮꦱꦺꦤ ꦗꦴꦠꦶꦮꦱꦺꦤ ꦕ.

ꦑꦺꦴ ꦥꦤꦱ꧀ꦱꦴꦠꦶ ꦤꦶꦥꦴꦠꦩꦠ꧀ꦠꦁ. ꦏꦴꦱꦶꦏ-ꦱꦢ꧀ꦢꦺꦴ ꦄꦠꦶꦮꦶꦪ ꦱꦟ꧀ꦲꦺ ꦱꦸꦑꦸꦩꦺ ꦩꦲꦒ꧀ꦓꦮꦠ꧀ꦡꦺ ꦤꦶꦫꦸꦭ꦳꧀ꦲꦺꦴ, ꦄꦚ꧀ꦚꦱ꧀ꦩꦶꦩ꧀ꦥꦶ ꦠꦡꦴꦗꦴꦠꦶꦏꦺ ꦫꦸꦭ꦳꧀ꦲꦶꦮꦱꦺꦤ ꦥꦮꦠ꧀ꦠꦠꦷꦠꦶ ꦢꦛ꧀ꦜꦧ꧀ꦧꦁ. ꦠꦺꦤꦴꦲ ‘‘ꦄꦏꦴꦱꦶꦏꦁ ꦕꦤ꧀ꦢꦤ’’ꦤ꧀ꦠꦶ. ꦲꦺꦩꦤ꧀ꦠꦺ ꦮꦴꦱꦺꦴ ꦲꦺꦩꦤ꧀ꦠꦁ, ꦲꦺꦩꦤ꧀ꦠꦁ ꦄꦫꦲꦠꦷꦠꦶ ꦲꦺꦩꦤ꧀ꦠꦶꦏꦺꦴ, ꦥꦴꦱꦴꦢꦺꦴ. ‘‘ꦆꦠꦫꦺꦱꦸꦥꦶ ꦌꦱꦺꦮ ꦤꦪꦺꦴ’’ꦠꦶ ꦮꦠ꧀ꦮꦴ ꦠꦢꦺꦮ ꦤꦺꦱꦁ ꦄꦫꦲꦠꦁ ꦢꦱ꧀ꦱꦺꦠꦸꦁ ‘‘ꦠꦠ꧀ꦡ ꦲꦺꦩꦤ꧀ꦠꦶꦏꦺꦴ’’ꦠꦶꦄꦴꦢꦶ ꦮꦸꦠ꧀ꦠꦁ. ꦱꦗꦴꦭꦴꦤꦷꦠꦶ ꦱꦗꦴꦭꦮꦴꦠꦥꦴꦤꦴꦤꦶ, ꦈꦢꦏꦪꦤ꧀ꦠꦴꦤꦷꦠꦶ ꦈꦢꦏꦣꦴꦫꦴꦮꦶꦱ꧀ꦱꦤ꧀ꦢꦤꦏꦪꦤ꧀ꦠꦴꦤꦶ. ꦥꦴꦱꦴꦢꦩꦠ꧀ꦡꦏꦺꦠꦶ ꦥꦴꦱꦴꦢꦱ꧀ꦱ ꦈꦥꦫꦶꦄꦴꦏꦴꦱꦠꦭꦺ. ꦧꦤ꧀ꦣꦶꦠ꧀ꦮꦴꦠꦶ ꦥꦪꦺꦴꦗꦶꦠꦪꦤ꧀ꦠꦺ ꦱꦸꦏ꧀ꦑꦩꦲꦶꦁꦱꦕꦩ꧀ꦩꦁ ꦧꦤ꧀ꦣꦶꦠ꧀ꦮꦴ. ꦪꦤ꧀ꦠꦁ ꦥꦫꦶꦮꦠ꧀ꦠꦺꦠ꧀ꦮꦴꦠꦶ ꦪꦡꦴꦥꦪꦺꦴꦗꦶꦠꦁ ꦪꦤ꧀ꦠꦁ ꦥꦴꦱꦴꦟꦴꦫꦺꦴꦥꦤꦠ꧀ꦡꦚ꧀ꦕꦺꦮ ꦥꦸꦤ ꦠꦺꦱꦁ ꦮꦶꦱ꧀ꦱꦗ꧀ꦗꦤꦠ꧀ꦡꦚ꧀ꦕ ꦥꦫꦶꦮꦠ꧀ꦠꦺꦠ꧀ꦮꦴ. ꦠꦱ꧀ꦩꦶꦁ ꦮꦶꦱ꧀ꦱꦗ꧀ꦗꦺꦤ꧀ꦠꦷꦠꦶ ꦖꦢꦤꦥꦶꦛ꧀ꦜꦺ ꦧꦢ꧀ꦣꦱꦸꦏ꧀ꦑꦩꦲꦶꦁꦱꦕꦩ꧀ꦩꦺ ꦮꦶꦱ꧀ꦱꦗ꧀ꦗꦺꦤ꧀ꦠꦶ.

ꦱꦲꦱ꧀ꦱꦡꦴꦩꦤ꧀ꦠꦶ ꦥꦸꦫꦶꦱꦱꦲꦱ꧀ꦱꦧꦭꦁ, ꦥꦸꦫꦶꦱꦱꦲꦱ꧀ꦱꦺꦤ ꦮꦲꦶꦠꦧ꧀ꦧꦨꦴꦫꦮꦲꦁ. ꦥꦭ꧀ꦭꦔ꧀ꦏꦺ ꦤꦶꦱꦶꦤ꧀ꦤꦺꦴꦮꦴꦠꦶ ꦫꦠꦤꦩꦪꦥꦭ꧀ꦭꦔ꧀ꦏꦺ ꦪꦡꦴꦤꦶꦱꦶꦤ꧀ꦤꦺꦴ ꦌꦮ. ꦈꦥ꧀ꦥꦠꦤꦴꦏꦴꦫꦥꦠ꧀ꦠꦤ꧀ꦠꦶ ꦈꦥ꧀ꦥꦠꦶꦠ꧀ꦮꦴ ꦜꦶꦠꦁ ꦮꦶꦪ. ꦗꦶꦪꦁ ꦥꦺꦴꦡꦺꦤ꧀ꦠꦱ꧀ꦱꦴꦠꦶ ꦗꦶꦪꦴꦓꦴꦠꦁ ꦏꦫꦺꦴꦤ꧀ꦠꦱ꧀ꦱ. ꦗꦶꦪꦥ꧀ꦥꦲꦴꦫꦱꦢ꧀ꦢꦺꦴꦠꦶ ꦗꦶꦪꦴꦓꦴꦠꦱꦢ꧀ꦢꦺꦴ. ꦪꦤ꧀ꦠꦺ ꦧꦢ꧀ꦣꦤ꧀ꦠꦶ ꦪꦤ꧀ꦠꦧꦢ꧀ꦣꦁ ꦏꦠ꧀ꦮꦴ ꦜꦥꦶꦠꦁ. ꦱꦢ꧀ꦢꦤ꧀ꦠꦫꦺꦠꦶ ꦡꦴꦩꦩꦗ꧀ꦙꦶꦩꦱ꧀ꦱ ꦥꦸꦫꦶꦱꦱ꧀ꦱ ꦱꦢ꧀ꦢꦱꦮꦤꦛ꧀ꦜꦴꦤꦺ. ꦒꦴꦮꦸꦠꦱ꧀ꦱ ꦕꦠꦸꦠ꧀ꦡꦺꦴ ꦨꦴꦒꦺꦴ ꦏꦺꦴꦱꦺꦴꦠꦶꦥꦶ ꦮꦸꦕ꧀ꦕꦠꦶ ꦢ꧀ꦮꦶꦱꦲꦱ꧀ꦱꦢꦟ꧀ꦝꦥ꧀ꦥꦩꦴꦟꦛ꧀ꦜꦴꦤꦁ.

ꦱꦧ꧀ꦧꦛ꧀ꦜꦴꦤꦴꦤꦷꦠꦶ ꦩꦲꦴꦥꦸꦫꦶꦱꦱ꧀ꦱ ꦠꦴꦤꦶ ꦠꦴꦤꦶ ꦱꦧ꧀ꦧꦴꦤꦶ ꦮꦱꦤꦛ꧀ꦜꦴꦤꦴꦤꦶ. ꦱꦶꦑꦴꦧꦢ꧀ꦣꦺꦴꦠꦶ ꦥꦸꦫꦶꦱꦱꦨꦴꦮꦱ꧀ꦱꦺꦮ ꦮꦶꦱꦺꦱꦠꦺꦴ ꦢꦱ꧀ꦱꦤꦩꦺꦠꦁ. ꦤ ꦈꦥ꧀ꦥꦶꦭꦴꦮꦶꦠꦨꦴꦮꦠ꧀ꦡꦤ꧀ꦠꦶ ꦈꦥ꧀ꦥꦶꦭꦴꦮꦶꦠꦨꦴꦮꦱꦔ꧀ꦑꦴꦠꦁ ꦄꦠ꧀ꦡꦁ ꦤ ꦏꦡꦺꦱꦷꦠꦶ ꦄꦠ꧀ꦡꦺꦴ. ꦠꦱ꧀ꦱ ꦲꦶ ꦧꦺꦴꦣꦶꦩꦹꦭꦺꦪꦺꦮ ꦱꦺꦠꦸꦓꦴꦠꦺꦴ. ꦠꦺꦤꦺꦮꦴꦠꦶ ꦄꦥ꧀ꦥꦩꦴꦢꦭꦏ꧀ꦑꦟꦱ꧀ꦱ ꦢꦷꦥꦤꦠꦺꦴ ꦌꦮ. ꦄꦠ꧀ꦠꦴꦤꦁ ꦄꦠꦶꦏ꧀ꦏꦩꦶꦠ꧀ꦮꦴꦠꦶ ꦄꦠ꧀ꦠꦤꦺꦴ ꦗꦫꦴꦥꦠ꧀ꦠꦶꦁ ꦄꦕꦶꦤ꧀ꦠꦺꦠ꧀ꦮꦴ ꦄꦛ꧀ꦛꦷꦪꦠꦶ. ꦤ ꦥꦤꦺꦱ ꦩꦒ꧀ꦒꦺꦤ ꦥꦲꦷꦤꦺꦴ ꦠꦢꦴ ꦩꦒ꧀ꦒꦱ꧀ꦱ ꦄꦤꦣꦶꦒꦠꦠ꧀ꦠꦴ. ꦱꦶꦏ꧀ꦑꦁ ꦥꦛꦶꦏ꧀ꦑꦶꦥꦶꦠ꧀ꦮꦴꦠꦶ ꦪꦡꦴꦱꦩꦴꦢꦶꦤ꧀ꦤꦱꦶꦏ꧀ꦑꦁ ꦥꦲꦴꦪ.

ꦄꦮꦶꦥꦫꦷꦠꦧ꧀ꦪꦴꦣꦶꦄꦴꦢꦶꦱꦨꦴꦮꦴꦮꦴꦠꦶ ꦌꦏꦤ꧀ꦠꦺꦤ ꦧ꧀ꦪꦴꦣꦶꦄꦴꦢꦶꦱꦨꦴꦮꦴ ꦌꦮ. ꦌꦮꦁ ꦗꦶꦒꦸꦕ꧀ꦖꦴꦮꦶꦲꦴꦫꦺꦤꦴꦠꦶ ꦌꦮꦁ ꦱꦏꦭꦱ꧀ꦱꦺꦮ ꦮꦛ꧀ꦛꦢꦸꦏ꧀ꦑꦱ꧀ꦱ ꦗꦶꦒꦸꦕ꧀ꦖꦤꦮꦶꦲꦴꦫꦺꦤ ꦮꦶꦲꦫꦤ꧀ꦠꦱ꧀ꦱ. ꦌꦮꦁ ꦗꦶꦒꦸꦕ꧀ꦖꦤꦤ꧀ꦠꦶ ꦌꦮꦁ ꦥꦫꦱ꧀ꦱ ꦗꦶꦒꦸꦕ꧀ꦖꦤꦁ. ꦥꦫꦁ ꦄꦗꦶꦒꦸꦕ꧀ꦖꦩꦴꦤꦺꦴꦠꦶ ꦏꦫꦸꦟꦴꦪꦤꦺꦤ ꦌꦮꦁ ꦥꦫꦁ ꦄꦗꦶꦒꦸꦕ꧀ꦖꦤ꧀ꦠꦺꦴ. ꦄꦨꦶꦨꦺꦴꦱ꧀ꦩꦷꦠꦶ ꦄꦨꦶꦨꦮꦶꦠꦴ ꦄꦱ꧀ꦩꦶ. ꦈꦱ꧀ꦱꦴꦲꦺꦴ ꦄꦲꦹꦠꦶ ꦕꦠꦸꦫꦔ꧀ꦒꦱꦩꦤ꧀ꦤꦴꦒꦠꦁ ꦮꦷꦫꦶꦪꦩꦺꦮ ꦕꦠꦸꦧ꧀ꦧꦶꦣꦱꦩ꧀ꦩꦥ꧀ꦥꦣꦴꦤꦮꦷꦫꦶꦪꦚ꧀ꦕ ꦄꦲꦺꦴꦱꦶ, ꦪꦺꦤ ꦩꦒ꧀ꦒꦧ꧀ꦫꦲ꧀ꦩꦕꦫꦶꦪꦥꦫꦴꦪꦟꦺꦴ ꦗꦴꦠꦺꦴ.

ꦱꦸꦑꦸꦩꦴꦭꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.