꧖. ꦥꦜꦩꦱꦶꦏ꧀ꦑꦴꦱꦸꦠ꧀ꦠꦮꦟ꧀ꦟꦤꦴ

꧘꧗. ꦖꦛ꧀ꦜꦺ ꦱꦩꦠ꧀ꦠꦏꦴꦫꦷꦠꦶ ꦄꦤꦹꦤꦺꦤ ꦥꦫꦶꦥꦹꦫꦺꦤ ꦄꦴꦏꦴꦫꦺꦤ ꦱꦩꦤ꧀ꦤꦴꦒꦠꦺꦴ. ꦱꦶꦏ꧀ꦑꦴꦥꦢꦴꦤꦁ ꦑꦸꦢ꧀ꦢꦴꦤꦸꦑꦸꦢ꧀ꦢꦏꦠ꧀ꦠꦁ ꦄꦥꦺꦏ꧀ꦑꦴꦱꦶꦢ꧀ꦣꦤ꧀ꦠꦶ ꦄꦴꦲ ‘‘ꦠꦠ꧀ꦫꦴꦥꦶ ꦱꦔ꧀ꦓꦴꦢꦶꦱꦺꦱꦁ ꦑꦸꦢ꧀ꦢꦏ’’ꦤ꧀ꦠꦶꦄꦴꦢꦶ. ꦄꦔ꧀ꦒꦸꦠ꧀ꦠꦫꦩꦲꦴꦤꦶꦏꦴꦪꦮꦭ꦳ꦚ꧀ꦗꦤꦏꦄꦴꦕꦫꦶꦪꦴꦠꦶ ꦄꦔ꧀ꦒꦸꦠ꧀ꦠꦫꦤꦶꦏꦴꦪꦁ ꦥꦫꦶꦲꦫꦤ꧀ꦠꦴ ꦄꦴꦕꦫꦶꦪꦴ, ꦄꦔ꧀ꦒꦸꦠ꧀ꦠꦫꦨꦴꦟꦏꦴꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦭꦺꦴꦏꦮꦗ꧀ꦗꦁ ꦤꦴꦥꦗ꧀ꦗꦠꦶ ꦭꦺꦴꦏꦮꦗ꧀ꦗꦱꦶꦏ꧀ꦑꦴꦥꦢꦴꦤꦁ ꦮꦷꦠꦶꦏ꧀ꦏꦩꦱꦴꦣꦏꦱ꧀ꦱ ꦏꦶꦭꦺꦱꦒꦲꦤꦱ꧀ꦱ ꦱꦧ꧀ꦧꦱꦺꦴ ꦥꦲꦷꦤꦠ꧀ꦠꦴ. ꦥꦟ꧀ꦟꦠ꧀ꦠꦶꦮꦗ꧀ꦗꦩꦺꦮ ꦄꦴꦥꦗ꧀ꦗꦠꦶ ꦥꦟ꧀ꦟꦠ꧀ꦠꦶꦮꦷꦠꦶꦏ꧀ꦏꦩꦁ ꦮꦴ ꦄꦗꦴꦤꦠꦺꦴꦥꦶ ꦄꦴꦥꦠ꧀ꦠꦶꦱꦩ꧀ꦨꦮꦠꦺꦴ. ꦕꦶꦠ꧀ꦠꦺꦤ ꦄꦴꦥꦗ꧀ꦗꦤ꧀ꦠꦺꦴ ꦫꦹꦥꦶꦪꦥ꧀ꦥꦛꦶꦒ꧀ꦒꦲꦟꦁ ꦄꦴꦥꦗ꧀ꦗꦠꦷꦠꦶ ꦈꦥꦤꦶꦏ꧀ꦑꦶꦠ꧀ꦠꦱꦴꦢꦶꦪꦺꦤ ꦄꦴꦥꦗ꧀ꦗꦠꦶ.

ꦧ꧀ꦫꦲ꧀ꦩꦕꦫꦶꦪꦱ꧀ꦱ ꦄꦴꦢꦶꦨꦹꦠꦴꦤꦶ ꦄꦴꦢꦶꦧ꧀ꦫꦲ꧀ꦩꦕꦫꦶꦪꦴꦤꦶ, ꦠꦴꦤꦶ ꦌꦮ ꦄꦴꦢꦶꦧ꧀ꦫꦲ꧀ꦩꦕꦫꦶꦪꦏꦴꦤꦶ ꦪꦡꦴ ‘‘ꦮꦶꦤꦪꦺꦴ ꦌꦮ ꦮꦺꦤꦪꦶꦏꦺꦴ’’ꦠꦶ ꦄꦴꦲ ‘‘ꦩꦒ꧀ꦒꦧ꧀ꦫꦲ꧀ꦩꦕꦫꦶꦪꦱ꧀ꦱꦴ’’ꦠꦶꦄꦴꦢꦶ. ꦕꦠ꧀ꦠꦴꦫꦶ ꦩꦲꦴꦱꦷꦭꦱꦶꦏ꧀ꦑꦴꦥꦢꦴꦤꦷꦠꦶ ꦕꦠ꧀ꦠꦴꦫꦶ ꦥꦴꦫꦴꦗꦶꦏꦴꦤꦶ ꦱꦤ꧀ꦣꦴꦪ ꦮꦢꦠꦶ. ꦥꦛꦶꦥꦏ꧀ꦑꦣꦩ꧀ꦩꦴꦤꦁ ꦄꦤꦮꦱꦺꦱꦠꦺꦴ ꦱꦮꦤꦠꦺꦴ ꦥꦒ꧀ꦓꦫꦟꦠꦺꦴ ꦱꦺꦴꦠꦺꦴ, ꦄꦫꦶꦪꦩꦒ꧀ꦒꦺꦴꦠꦶ ꦄꦴꦲ ‘‘ꦱꦺꦴꦠꦱꦔ꧀ꦑꦴꦠꦺꦤ ꦩꦒ꧀ꦒꦺꦤꦴ’’ꦠꦶ. ꦮꦶꦤꦶꦥꦴꦠꦺꦠꦶ ꦮꦶꦫꦹꦥꦁ ꦱꦢꦸꦏ꧀ꦑꦁ ꦱꦈꦥꦴꦪꦴꦱꦁ ꦤꦶꦥꦴꦠꦺꦠꦷꦠꦶ ꦮꦶꦤꦶꦥꦴꦠꦺꦴ, ꦄꦥꦴꦪꦢꦸꦏ꧀ꦑꦺ ꦑꦶꦥꦤꦏꦺꦴ. ꦣꦩ꧀ꦩꦺꦴꦠꦶ ꦱꦨꦴꦮꦺꦴ. ꦤꦴꦱ꧀ꦱ ꦮꦶꦤꦶꦥꦴꦠꦺꦴ ꦣꦩ꧀ꦩꦺꦴꦠꦶ ꦄꦮꦶꦤꦶꦥꦴꦠꦣꦩ꧀ꦩꦺꦴ, ꦤ ꦄꦠ꧀ꦠꦴꦤꦁ ꦄꦥꦴꦪꦺꦱꦸ ꦮꦶꦤꦶꦥꦴꦠꦤꦱꦨꦴꦮꦺꦴꦠꦶ ꦮꦸꦠ꧀ꦠꦁ ꦲꦺꦴꦠꦶ. ꦏꦱ꧀ꦩꦴ? ꦪꦺ ꦣꦩ꧀ꦩꦴ ꦄꦥꦴꦪꦒꦩꦤꦷꦪꦴ, ꦠꦺꦱꦁ ꦥꦲꦷꦤꦠ꧀ꦠꦴ. ꦠꦺꦤꦴꦲ ‘‘ꦄꦮꦶꦤꦶꦥꦴꦠꦣꦩ꧀ꦩꦺꦴꦠꦶ ꦕꦠꦹꦱꦸ ꦄꦥꦴꦪꦺꦱꦸ ꦄꦥꦠꦤꦱꦨꦴꦮꦺꦴ’’ꦠꦶ. ꦠꦠ꧀ꦡ ꦄꦥꦠꦤꦱꦨꦴꦮꦺꦴꦠꦶ ꦄꦤꦸꦥ꧀ꦥꦗ꧀ꦗꦤꦱꦨꦴꦮꦺꦴ. ꦱꦺꦴꦠꦴꦥꦠ꧀ꦠꦶꦩꦒ꧀ꦒꦤꦶꦪꦴꦩꦺꦤ ꦤꦶꦪꦠꦺꦴꦠꦶ ꦈꦥꦫꦶꦩꦒ꧀ꦒꦴꦣꦶꦒꦩꦱ꧀ꦱ ꦄꦮꦱ꧀ꦱꦁꦨꦴꦮꦷꦨꦴꦮꦠꦺꦴ ꦤꦶꦪꦠꦺꦴ. ꦠꦺꦤꦺꦮꦴꦲ ‘‘ꦱꦩ꧀ꦧꦺꦴꦣꦶꦥꦫꦴꦪꦟꦺꦴ’’ꦠꦶ. ꦲꦺꦛ꧀ꦜꦶꦩꦤ꧀ꦠꦠꦺꦴ ꦱꦠ꧀ꦠꦩꦨꦮꦠꦺꦴ ꦈꦥꦫꦶ ꦄꦤꦸꦥ꧀ꦥꦗ꧀ꦗꦤꦣꦩ꧀ꦩꦠꦴꦪ ꦮꦴ ꦤꦶꦪꦠꦺꦴ. ꦱꦩ꧀ꦧꦸꦗ꧀ꦙꦠꦷꦠꦶ ꦱꦩ꧀ꦧꦺꦴꦣꦶ, ꦄꦫꦶꦪꦩꦒ꧀ꦒꦺꦴ. ꦱꦺꦴ ꦥꦤ ꦥꦜꦩꦩꦒ꧀ꦒꦱ꧀ꦱ ꦄꦣꦶꦒꦠꦠ꧀ꦠꦴ ꦄꦮꦱꦶꦛ꧀ꦜꦺꦴ ꦕ ꦄꦣꦶꦒꦤ꧀ꦠꦧ꧀ꦧꦨꦴꦮꦺꦤ ꦆꦕ꧀ꦖꦶꦠꦧ꧀ꦧꦺꦴꦠꦶ ꦈꦥꦫꦶꦩꦒ꧀ꦒꦠ꧀ꦠꦪꦱꦔ꧀ꦑꦴꦠꦴ ꦱꦩ꧀ꦧꦺꦴꦣꦶ ꦥꦫꦁ ꦄꦪꦤꦁ ꦥꦫꦴ ꦒꦠꦶ ꦄꦱ꧀ꦱꦴꦠꦶ ꦱꦩ꧀ꦧꦺꦴꦣꦶꦥꦫꦴꦪꦟꦺꦴ. ꦠꦺꦤꦴꦲ ‘‘ꦈꦥꦫꦶꦩꦒ꧀ꦒꦠ꧀ꦠꦪꦱꦩ꧀ꦧꦺꦴꦣꦶꦥꦫꦴꦪꦟꦺꦴ’’ꦠꦶ.

ꦠꦤꦸꦨꦴꦮꦴꦠꦶ ꦥꦫꦶꦪꦸꦛ꧀ꦜꦴꦤꦩꦤ꧀ꦢꦠꦴꦪ ꦕ ꦏꦢꦴꦕꦶ ꦏꦫꦲꦕꦶ ꦈꦥ꧀ꦥꦠ꧀ꦠꦶꦪꦴ ꦕ ꦠꦤꦸꦨꦴꦮꦺꦤ. ꦠꦤꦸꦠ꧀ꦠꦚ꧀ꦲꦶ ꦢ꧀ꦮꦷꦲꦶ ꦏꦴꦫꦟꦺꦲꦶ ꦮꦺꦢꦶꦠꦧ꧀ꦧꦁ ꦄꦣꦶꦕ꧀ꦕꦸꦥ꧀ꦥꦠ꧀ꦠꦶꦪꦴ ꦕ ꦥꦫꦶꦪꦸꦛ꧀ꦜꦴꦤꦩꦤ꧀ꦢꦠꦴꦪ ꦕ. ꦱꦏꦢꦴꦒꦴꦩꦶꦱ꧀ꦱ ꦲꦶ ꦮꦛ꧀ꦛꦴꦤꦸꦱꦴꦫꦶꦩꦲꦴꦗꦤꦱ꧀ꦱ ꦮꦶꦪ ꦏꦶꦭꦺꦱꦴ ꦄꦨꦶꦟ꧀ꦲꦁ ꦤ ꦈꦥ꧀ꦥꦗ꧀ꦗꦤ꧀ꦠꦶ, ꦏꦢꦴꦕꦶ ꦏꦫꦲꦕꦶ ꦈꦥ꧀ꦥꦗ꧀ꦗꦤ꧀ꦠꦶ ꦮꦶꦫꦭ꦳ꦴꦏꦴꦫꦴ ꦲꦸꦠ꧀ꦮꦴ ꦮꦶꦫꦭ꦳ꦮꦴꦥꦶꦠꦺ ꦑꦺꦠ꧀ꦠꦺ ꦄꦔ꧀ꦏꦸꦫꦴ ꦮꦶꦪ. ꦈꦥ꧀ꦥꦗ꧀ꦗꦩꦴꦤꦴꦥꦶ ꦕ ꦮꦛ꧀ꦛꦴꦤꦸꦱꦴꦫꦶꦩꦲꦴꦗꦤꦱ꧀ꦱꦺꦮ ꦩꦢ꧀ꦢꦤ꧀ꦠꦴ ꦦꦫꦤ꧀ꦠꦴ ꦖꦴꦢꦺꦤ꧀ꦠꦴ ꦄꦤ꧀ꦣꦏꦴꦫꦁ ꦏꦫꦺꦴꦤ꧀ꦠꦴ ꦤ ꦈꦥ꧀ꦥꦗ꧀ꦗꦤ꧀ꦠꦶ, ꦩꦤ꧀ꦢꦩꦤ꧀ꦢꦴ ꦈꦥ꧀ꦥꦗ꧀ꦗꦤ꧀ꦠꦶ ꦠꦤꦸꦏꦴꦏꦴꦫꦴ ꦲꦸꦠ꧀ꦮꦴ ꦄꦧ꧀ꦨꦥꦛꦭꦩꦶꦮ ꦩꦏ꧀ꦑꦶꦏꦴꦥꦠ꧀ꦠꦩꦶꦮ ꦕ. ꦠꦠ꧀ꦡ ꦏꦺꦕꦶ ꦡꦺꦫꦴ ꦨꦟꦤ꧀ꦠꦶ ‘‘ꦱꦏꦢꦴꦒꦴꦩꦶꦱ꧀ꦱ ꦏꦶꦭꦺꦱꦴ ꦏꦶꦚ꧀ꦕꦴꦥꦶ ꦕꦶꦫꦺꦤ ꦈꦥ꧀ꦥꦗ꧀ꦗꦤ꧀ꦠꦶ, ꦧꦲꦭꦴꦮ ꦈꦥ꧀ꦥꦗ꧀ꦗꦤ꧀ꦠꦶ. ꦠꦡꦴ ꦲꦶꦱ꧀ꦱ ꦥꦸꦠ꧀ꦠꦴ ꦕ ꦣꦷꦠꦫꦺꦴ ꦕ ꦢꦶꦱ꧀ꦱꦤ꧀ꦠꦷ’’ꦠꦶ. ꦌꦠꦁ ꦥꦤ ꦄꦥ꧀ꦥꦩꦴꦟꦁ. ꦥꦸꦠ꧀ꦠꦣꦷꦠꦫꦺꦴ ꦲꦶ ꦄꦔ꧀ꦒꦥꦕ꧀ꦕꦔ꧀ꦒꦥꦫꦴꦩꦱꦤꦩꦠ꧀ꦠꦺꦤꦥꦶ ꦲꦺꦴꦤ꧀ꦠꦷꦠꦶ. ꦢ꧀ꦮꦷꦲꦶꦪꦺꦮ ꦏꦴꦫꦟꦺꦲꦶꦱ꧀ꦱ ꦏꦶꦭꦺꦱꦴꦤꦁ ꦠꦤꦸꦠ꧀ꦠꦁ ꦮꦺꦢꦶꦠꦧ꧀ꦧꦁ ꦄꦣꦶꦕ꧀ꦕꦸꦥ꧀ꦥꦠ꧀ꦠꦶꦪꦴ ꦕ ꦥꦫꦶꦪꦸꦛ꧀ꦜꦴꦤꦩꦤ꧀ꦢꦠꦴꦪ ꦕꦴꦠꦶ.

ꦲꦺꦛ꧀ꦜꦴꦨꦴꦒꦶꦪꦴꦤꦤ꧀ꦠꦶ ꦌꦠ꧀ꦡ ꦲꦺꦛ꧀ꦜꦴꦠꦶ ꦩꦲꦒ꧀ꦒꦠꦨꦹꦩꦶꦠꦺꦴ ꦲꦺꦛ꧀ꦜꦴ, ꦏꦴꦩꦨꦹꦩꦶꦪꦤ꧀ꦠꦶ ꦄꦠ꧀ꦡꦺꦴ. ꦠꦺꦱꦁ ꦥꦕ꧀ꦕꦪꦨꦴꦮꦺꦤ ꦲꦺꦛ꧀ꦜꦴꦨꦴꦒꦱ꧀ꦱ ꦲꦶꦠꦴꦠꦶ ꦲꦺꦛ꧀ꦜꦴꦨꦴꦒꦶꦪꦴ, ꦠꦺꦱꦁ ꦲꦺꦛ꧀ꦜꦴꦨꦴꦒꦶꦪꦴꦤꦁ, ꦲꦺꦛ꧀ꦜꦴꦨꦴꦒꦱ꧀ꦱ ꦏꦴꦩꦨꦮꦱ꧀ꦱ ꦥꦕ꧀ꦕꦪꦨꦴꦮꦺꦤ ꦒꦲꦶꦠꦴꦤꦤ꧀ꦠꦶ ꦄꦠ꧀ꦡꦺꦴ. ꦱꦁꦪꦺꦴꦗꦺꦤ꧀ꦠꦶ ꦧꦤ꧀ꦣꦤ꧀ꦠꦶ ꦑꦤ꧀ꦣꦒꦠꦶꦨꦮꦴꦢꦷꦲꦶ ꦑꦤ꧀ꦣꦒꦠꦶꦨꦮꦴꦢꦪꦺꦴ, ꦏꦩ꧀ꦩꦁ ꦮꦴ ꦦꦭꦺꦤꦴꦠꦶ ꦱꦁꦪꦺꦴꦗꦤꦴꦤꦷꦠꦶ ꦄꦴꦲ ‘‘ꦱꦁꦪꦺꦴꦗꦤꦴꦤꦤ꧀ꦠꦶ ꦧꦤ꧀ꦣꦤꦴꦤ’’ꦤ꧀ꦠꦶ. ꦄꦱꦩꦸꦕ꧀ꦖꦶꦤ꧀ꦤꦫꦴꦒꦴꦢꦶꦏꦱ꧀ꦱ ꦲꦶ ꦌꦠꦫꦲꦶ ꦑꦤ꧀ꦣꦴꦢꦷꦤꦁ ꦄꦴꦪꦠꦶꦁ ꦑꦤ꧀ꦣꦴꦢꦷꦲꦶ ꦱꦩ꧀ꦧꦤ꧀ꦣꦺꦴ, ꦱꦩꦸꦕ꧀ꦖꦶꦤ꧀ꦤꦫꦴꦒꦴꦢꦶꦏꦱ꧀ꦱ ꦥꦤ ꦠꦁ ꦤꦠ꧀ꦡꦶ, ꦏꦠꦴꦤꦩ꧀ꦥꦶ ꦏꦩ꧀ꦩꦴꦤꦁ ꦄꦱꦩꦠ꧀ꦡꦨꦴꦮꦴꦥꦠ꧀ꦠꦶꦠꦺꦴ ꦫꦴꦒꦴꦢꦷꦤꦁ ꦄꦤ꧀ꦮꦪꦠꦺꦴ ꦧ꧀ꦪꦠꦶꦫꦺꦏꦠꦺꦴ ꦕ ꦱꦁꦪꦺꦴꦗꦤꦛ꧀ꦜꦺꦴ ꦱꦶꦢ꧀ꦣꦺꦴ. ꦥꦫꦶꦏ꧀ꦑꦪꦺꦤꦴꦠꦶ ꦱꦩꦸꦕ꧀ꦖꦺꦢꦺꦤ.

ꦎꦥꦥꦴꦠꦶꦏꦺꦴꦠꦶ ꦈꦥꦥꦴꦠꦶꦏꦪꦺꦴꦤꦶꦏꦺꦴ ꦈꦥꦥꦠꦤꦺ ꦱꦴꦣꦸꦏꦴꦫꦷ. ꦱꦺꦱꦪꦺꦴꦤꦶꦥꦛꦶꦏ꧀ꦑꦺꦥꦮꦕꦤꦩꦺꦠꦁ. ꦠꦺꦤ ꦒꦧ꧀ꦨꦮꦴꦱꦢꦸꦏ꧀ꦑꦴꦨꦴꦮꦩꦴꦲ. ꦠꦠ꧀ꦡ ꦥꦫꦶꦤꦶꦧ꧀ꦧꦴꦪꦷꦠꦶ ꦆꦩꦶꦤꦴ ꦱꦺꦱꦢꦸꦏ꧀ꦑꦴꦨꦴꦮꦁ. ꦠꦠ꧀ꦡ ꦥꦫꦶꦤꦶꦧ꧀ꦧꦴꦪꦶꦠꦴ ꦕꦱ꧀ꦱ ꦏꦴꦩꦭꦺꦴꦏꦺ ꦑꦤ꧀ꦣꦧꦷꦗꦱ꧀ꦱ ꦄꦥꦸꦤꦴꦒꦩꦤꦮꦱꦺꦤꦺꦮꦴꦠꦶ ꦢꦱ꧀ꦱꦺꦠꦸꦁ ‘‘ꦄꦤꦴꦮꦠ꧀ꦠꦶꦣꦩ꧀ꦩꦺꦴ’’ꦠꦶ ꦮꦸꦠ꧀ꦠꦁ. ꦈꦥꦫꦶꦪꦺꦮꦴꦠꦶ ꦧ꧀ꦫꦲ꧀ꦩꦭꦺꦴꦏꦺꦪꦺꦮ. ꦄꦤꦴꦮꦠ꧀ꦠꦶꦣꦩ꧀ꦩꦺꦴꦠꦶ ꦠꦠꦺꦴ ꦧ꧀ꦫꦲ꧀ꦩꦭꦺꦴꦏꦴ ꦥꦸꦤꦥ꧀ꦥꦸꦤꦁ ꦥꦛꦶꦱꦤ꧀ꦣꦶꦮꦱꦺꦤ ꦤ ꦄꦴꦮꦠ꧀ꦠꦤꦣꦩ꧀ꦩꦺꦴ. ꦠꦺꦤꦴꦲ ‘‘ꦪꦺꦴꦤꦶꦒꦠꦶꦮꦱꦺꦤ ꦄꦤꦴꦒꦩꦤꦣꦩ꧀ꦩꦺꦴ’’ꦠꦶ.

ꦥꦢꦺꦱꦁ ꦥꦢꦺꦱꦏꦴꦫꦷ ꦄꦴꦫꦴꦣꦺꦠꦷꦠꦶ ꦱꦷꦭꦏ꧀ꦑꦤ꧀ꦣꦴꦢꦷꦤꦁ ꦥꦴꦫꦶꦥꦹꦫꦶꦪꦴ ꦌꦏꦢꦺꦱꦨꦹꦠꦁ ꦲꦺꦛ꧀ꦜꦶꦩꦩꦒ꧀ꦒꦠ꧀ꦠꦪꦁ ꦥꦢꦺꦱꦺꦴ, ꦠꦁ ꦏꦫꦺꦴꦤ꧀ꦠꦺꦴ ꦥꦢꦺꦱꦁ ꦌꦏꦢꦺꦱꦨꦹꦠꦁ ꦲꦺꦛ꧀ꦜꦶꦩꦁ ꦦꦭꦠ꧀ꦠꦪꦩꦺꦮ ꦄꦴꦫꦴꦣꦺꦠꦶ, ꦤꦶꦥ꧀ꦦꦴꦢꦺꦠꦷꦠꦶ ꦄꦠ꧀ꦡꦺꦴ. ꦠꦺꦤꦴꦲ ‘‘ꦥꦢꦺꦱꦏꦴꦫꦷ ꦥꦸꦒ꧀ꦒꦭꦺꦴ ꦤꦴꦩ ꦱꦺꦴꦠꦴꦥꦤ꧀ꦤꦺꦴ’’ꦠꦶꦄꦴꦢꦶ. ꦥꦫꦶꦥꦹꦫꦁ ꦥꦫꦶꦥꦹꦫꦏꦴꦫꦷꦠꦶ ꦱꦷꦭꦏ꧀ꦑꦤ꧀ꦣꦴꦢꦷꦲꦶ ꦱꦢ꧀ꦣꦶꦤ꧀ꦢ꧀ꦫꦶꦪꦴꦢꦷꦲꦶ ꦕ ꦥꦫꦶꦠꦺꦴ ꦥꦹꦫꦟꦺꦤ ꦥꦫꦶꦥꦹꦫꦱꦔ꧀ꦑꦴꦠꦁ ꦄꦫꦲꦠ꧀ꦠꦩꦒ꧀ꦒꦁ ꦏꦫꦺꦴꦤ꧀ꦠꦺꦴ ꦤꦶꦧ꧀ꦧꦠ꧀ꦠꦺꦤ꧀ꦠꦺꦴ ꦥꦫꦶꦥꦹꦫꦁ ꦄꦫꦲꦠ꧀ꦠꦦꦭꦁ ꦄꦴꦫꦴꦣꦺꦠꦶ, ꦤꦶꦥ꧀ꦦꦴꦢꦺꦠꦷꦠꦶ ꦄꦠ꧀ꦡꦺꦴ. ꦠꦺꦤꦴꦲ ‘‘ꦥꦫꦶꦥꦹꦫꦏꦴꦫꦷ ꦤꦴꦩ ꦄꦫꦲꦴ’’ꦠꦶꦄꦴꦢꦶ.

ꦥꦜꦩꦱꦶꦏ꧀ꦑꦴꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.