꧕. ꦈꦥꦚ꧀ꦚꦴꦠꦱꦸꦠ꧀ꦠꦮꦟ꧀ꦟꦤꦴ

꧕. ꦥꦚ꧀ꦕꦩꦺ ꦆꦩꦚ꧀ꦲꦶ ꦣꦩ꧀ꦩꦢ꧀ꦮꦪꦤ꧀ꦠꦶ ꦏꦸꦱꦭꦺꦱꦸ ꦣꦩ꧀ꦩꦺꦱꦸ ꦄꦱꦤ꧀ꦠꦸꦛ꧀ꦜꦶꦠꦴ, ꦥꦣꦴꦤꦱ꧀ꦩꦶꦁ ꦄꦤꦺꦴꦱꦏ꧀ꦏꦤꦱꦔ꧀ꦑꦴꦠꦁ ꦣꦩ꧀ꦩꦢ꧀ꦮꦪꦁ. ꦆꦩꦶꦤꦴꦠꦶ ‘‘ꦄꦱꦤ꧀ꦠꦸꦛ꧀ꦜꦶꦠꦴ ꦏꦸꦱꦭꦺꦱꦸ ꦣꦩ꧀ꦩꦺꦱꦹ’’ꦠꦶ ꦮꦕꦤꦺꦤ. ꦆꦩꦁ ꦢꦷꦥꦺꦠꦷꦠꦶ ‘‘ꦪꦴꦮ ꦱꦺꦴ ꦈꦥ꧀ꦥꦗ꧀ꦗꦠꦶ, ꦤ ꦠꦴꦮꦴꦲꦁ ꦱꦤ꧀ꦠꦸꦛ꧀ꦜꦺꦴ ꦄꦲꦺꦴꦱꦶ’’ꦤ꧀ꦠꦶ ꦌꦠꦁ ꦥꦫꦶꦪꦤ꧀ꦠꦁ ꦏꦠ꧀ꦮꦴ ꦮꦏ꧀ꦑꦩꦴꦤꦠ꧀ꦡꦁ ꦢꦷꦥꦺꦠꦶ. ꦥꦣꦴꦤꦱ꧀ꦩꦶꦤ꧀ꦠꦶ ꦮꦷꦫꦶꦪꦴꦫꦩ꧀ꦨꦺ. ꦆꦩꦩꦠ꧀ꦡꦤ꧀ꦠꦶ ‘‘ꦥꦣꦴꦤꦱ꧀ꦩꦶꦚ꧀ꦕꦴ’’ꦠꦶꦄꦴꦢꦶꦤꦴ ꦮꦸꦠ꧀ꦠꦩꦠ꧀ꦡꦁ. ꦮꦷꦫꦶꦪꦥ꧀ꦥꦮꦴꦲꦺ ꦮꦠ꧀ꦠꦩꦴꦤꦺ ꦄꦤ꧀ꦠꦫꦴ ꦌꦮ ꦥꦛꦶꦒꦩꦤꦁ ꦤꦶꦮꦠ꧀ꦠꦤꦁ ꦥꦛꦶꦮꦴꦤꦁ, ꦠꦢꦱ꧀ꦱ ꦄꦠ꧀ꦡꦷꦠꦶ ꦥꦛꦶꦮꦴꦤꦷ, ꦤ ꦥꦛꦶꦮꦴꦤꦷ ꦄꦥ꧀ꦥꦛꦶꦮꦴꦤꦷ, ꦠꦱ꧀ꦱ ꦨꦴꦮꦺꦴ ꦄꦥ꧀ꦥꦛꦶꦮꦴꦤꦶꦠꦴ, ꦄꦤꦺꦴꦱꦏ꧀ꦏꦤꦴꦠꦶ ꦄꦴꦲ ‘‘ꦄꦥ꧀ꦥꦛꦶꦮꦴꦤꦶꦠꦴꦠꦶ ꦄꦥ꧀ꦥꦛꦶꦏ꧀ꦏꦩꦤꦴ ꦄꦤꦺꦴꦱꦏ꧀ꦏꦤꦴ’’ꦠꦶ. ꦠꦠ꧀ꦡ ꦄꦤꦺꦴꦱꦏ꧀ꦏꦤꦴꦠꦶ ꦄꦥ꧀ꦥꦛꦶꦤꦶꦮꦠ꧀ꦠꦶ.

ꦄꦴꦒꦩꦤꦷꦪꦥꦛꦶꦥꦢꦴꦠꦶ ꦱꦩꦡꦮꦶꦥꦱ꧀ꦱꦤꦴꦱꦔ꧀ꦑꦴꦠꦴ ꦥꦸꦧ꧀ꦧꦨꦴꦒꦥꦛꦶꦥꦠ꧀ꦠꦶ. ꦱꦴ ꦲꦶ ꦄꦴꦒꦕ꧀ꦖꦤ꧀ꦠꦶ ꦮꦶꦱꦺꦱꦩꦣꦶꦒꦕ꧀ꦖꦤ꧀ꦠꦶ ꦌꦠꦴꦪ, ꦄꦴꦒꦕ꧀ꦖꦠꦶ ꦮꦴ ꦮꦶꦱꦺꦱꦴꦣꦶꦒꦩꦺꦴ ꦌꦠꦴꦪꦴꦠꦶ ꦄꦴꦒꦩꦤꦷꦪꦴ, ꦱꦴ ꦌꦮ ꦥꦛꦶꦥꦗ꧀ꦗꦶꦠꦧ꧀ꦧꦠꦺꦴ ꦥꦛꦶꦥꦢꦴꦠꦶ ꦄꦴꦒꦩꦤꦷꦪꦥꦛꦶꦥꦢꦴ. ꦄꦥ꧀ꦥꦛꦶꦮꦴꦤꦥꦣꦴꦤꦤ꧀ꦠꦶ ꦎꦱꦏ꧀ꦏꦤꦴꦫꦲꦶꦠꦥ꧀ꦥꦣꦴꦤꦁ, ꦄꦤ꧀ꦠꦫꦴ ꦄꦤꦺꦴꦱꦏ꧀ꦏꦶꦠ꧀ꦮꦴ ꦏꦠꦮꦷꦫꦶꦪꦤ꧀ꦠꦶ ꦄꦠ꧀ꦡꦺꦴ.

ꦈꦥꦚ꧀ꦚꦴꦠꦱꦸꦠ꧀ꦠꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.