꧑-꧔. ꦱꦺꦤꦴꦱꦤꦱꦸꦠ꧀ꦠꦴꦢꦶꦮꦟ꧀ꦟꦤꦴ

꧑꧑-꧑꧔. ꦢꦸꦠꦶꦪꦱ꧀ꦱ ꦥꦜꦩꦺ ꦤꦴꦠꦶꦢꦹꦫꦤ꧀ꦠꦶ ꦒꦺꦴꦕꦫꦛ꧀ꦜꦴꦤꦠꦺꦴ ꦄꦝ꧀ꦞꦒꦴꦮꦸꦠꦠꦺꦴ ꦎꦫꦨꦴꦒꦠꦴꦪ ꦤꦴꦠꦶꦢꦹꦫꦁ. ꦤꦴꦕ꧀ꦕꦴꦱꦤ꧀ꦤꦤ꧀ꦠꦶ ꦥꦕ꧀ꦖꦶꦩꦺꦤ ꦥꦩꦴꦟꦺꦤ ꦒꦺꦴꦕꦫꦛ꧀ꦜꦴꦤꦠꦺꦴ ꦥꦚ꧀ꦕꦣꦤꦸꦱꦠꦶꦏꦠꦴꦪ ꦤ ꦄꦠꦶꦄꦴꦱꦤ꧀ꦤꦁ. ꦠꦴꦪ ꦕ ꦥꦤ ꦤꦴꦠꦶꦢꦹꦫꦤꦴꦕ꧀ꦕꦴꦱꦤ꧀ꦤꦠꦴꦪ ꦒꦺꦴꦕꦫꦛ꧀ꦜꦴꦤꦥꦛꦶꦥꦫꦶꦱ꧀ꦱꦪꦴꦢꦶꦫꦲꦶꦠꦩꦒ꧀ꦒꦠꦴꦪ ꦕ ꦒꦩꦤꦱ꧀ꦱ ꦕ ꦄꦴꦒꦩꦤꦱ꧀ꦱ ꦕ ꦪꦸꦠ꧀ꦠꦫꦹꦥꦠ꧀ꦠꦴ ꦒꦩꦤꦴꦒꦩꦤꦱꦩ꧀ꦥꦤ꧀ꦤꦁ. ꦢꦶꦮꦱꦨꦴꦒꦺ ꦩꦲꦴꦗꦤꦱꦁꦏꦶꦟ꧀ꦟꦠꦴꦨꦴꦮꦺꦤ ꦢꦶꦮꦴ ꦄꦥ꧀ꦥꦴꦏꦶꦟ꧀ꦟꦁ. ꦄꦨꦴꦮꦠ꧀ꦡꦺꦴ ꦲꦶ ꦄꦪꦁ ꦄꦥ꧀ꦥ-ꦱꦢ꧀ꦢꦺꦴ ‘‘ꦄꦥ꧀ꦥꦶꦕ꧀ꦖꦺꦴ’’ꦠꦶꦄꦴꦢꦷꦱꦸ ꦮꦶꦪ. ꦫꦠ꧀ꦠꦶꦪꦁ ꦩꦤꦸꦱ꧀ꦱꦱꦢ꧀ꦢꦴꦨꦴꦮꦺꦤ ꦫꦠ꧀ꦠꦶꦁ ꦄꦥ꧀ꦥꦱꦢ꧀ꦢꦁ. ꦱꦧ꧀ꦧꦢꦴꦥꦶ ꦗꦤꦱꦤ꧀ꦤꦶꦥꦴꦠꦤꦶꦒ꧀ꦓꦺꦴꦱꦴꦨꦴꦮꦺꦤ ꦄꦥ꧀ꦥꦤꦶꦒ꧀ꦓꦺꦴꦱꦁ.

ꦄꦥ꧀ꦥꦏꦱꦶꦫꦺꦤꦴꦠꦶ ꦄꦏꦱꦶꦫꦺꦤ ꦱꦸꦑꦺꦤꦺꦮ. ꦱꦷꦭꦴꦢꦶꦒꦸꦟꦴꦤꦁ ꦡꦶꦫꦨꦴꦮꦥ꧀ꦥꦠ꧀ꦠꦶꦪꦴ ꦡꦺꦫꦴ. ꦱꦸꦠ꧀ꦠꦒꦺꦪ꧀ꦪꦴꦢꦶ ꦧꦲꦸ ꦱꦸꦠꦁ ꦌꦠꦺꦱꦤ꧀ꦠꦶ ꦧꦲꦸꦱ꧀ꦱꦸꦠꦴ. ꦠꦩꦸꦒ꧀ꦒꦲꦣꦴꦫꦟꦺꦤ ꦱꦩ꧀ꦩꦢꦺꦮ ꦒꦫꦹꦤꦁ ꦱꦤ꧀ꦠꦶꦏꦺ ꦄꦴꦒꦩꦶꦠꦨꦴꦮꦺꦤ ꦕ ꦄꦴꦒꦠꦺꦴ ꦥꦫꦶꦪꦠ꧀ꦠꦶꦣꦩ꧀ꦩꦱꦔ꧀ꦑꦴꦠꦺꦴ ꦄꦴꦒꦩꦺꦴ ꦌꦠꦺꦱꦤ꧀ꦠꦶ ꦄꦴꦒꦠꦴꦒꦩꦴ. ꦱꦸꦠ꧀ꦠꦴꦨꦶꦣꦩ꧀ꦩꦱꦔ꧀ꦑꦴꦠꦱ꧀ꦱ ꦣꦩ꧀ꦩꦱ꧀ꦱ ꦣꦴꦫꦟꦺꦤ ꦣꦩ꧀ꦩꦣꦫꦴ. ꦮꦶꦤꦪꦱ꧀ꦱ ꦣꦴꦫꦟꦺꦤ ꦮꦶꦤꦪꦣꦫꦴ. ꦠꦺꦱꦁ ꦣꦩ꧀ꦩꦮꦶꦤꦪꦴꦤꦁ ꦩꦴꦠꦶꦏꦴꦪ ꦣꦴꦫꦟꦺꦤ ꦩꦴꦠꦶꦏꦴꦣꦫꦴ. ꦠꦠ꧀ꦡ ꦠꦠ꧀ꦡ ꦣꦩ꧀ꦩꦥꦫꦶꦥꦸꦕ꧀ꦖꦴꦪ ꦥꦫꦶꦥꦸꦕ꧀ꦖꦠꦶ. ꦄꦠ꧀ꦡꦥꦫꦶꦥꦸꦕ꧀ꦖꦴꦪ ꦥꦫꦶꦥꦚ꧀ꦲꦠꦶ ꦮꦷꦩꦁꦱꦠꦶ ꦮꦶꦕꦴꦫꦺꦠꦶ. ꦆꦢꦁ, ꦨꦤ꧀ꦠꦺ, ꦏꦡꦁ, ꦆꦩꦱ꧀ꦱ ꦏꦺꦴ ꦄꦠ꧀ꦡꦺꦴꦠꦶ ꦥꦫꦶꦥꦸꦕ꧀ꦖꦴꦥꦫꦶꦥꦚ꧀ꦲꦴꦏꦴꦫꦢꦱ꧀ꦱꦤꦁ. ꦄꦮꦶꦮꦛꦚ꧀ꦕꦺꦮ ꦥꦴꦭ꦳ꦶꦪꦴ ꦄꦠ꧀ꦡꦁ ꦥꦢꦺꦱꦤ꧀ꦠꦫꦥꦴꦭ꦳ꦶꦢꦱ꧀ꦱꦤꦺꦤ ꦄꦴꦒꦩꦠꦺꦴ ꦮꦶꦮꦫꦤ꧀ꦠꦶ. ꦄꦤꦸꦠ꧀ꦠꦴꦤꦷꦏꦠꦚ꧀ꦕ ꦪꦸꦠ꧀ꦠꦶꦮꦶꦨꦴꦮꦤꦺꦤ ꦈꦠ꧀ꦠꦴꦤꦶꦁ ꦏꦫꦺꦴꦤ꧀ꦠꦶ. ꦏꦔ꧀ꦑꦴꦜꦴꦤꦶꦪꦺꦱꦸ ꦣꦩ꧀ꦩꦺꦱꦸ ꦱꦁꦱꦪꦸꦥ꧀ꦥꦠ꧀ꦠꦶꦪꦴ ꦲꦺꦠꦸꦠꦴꦪ ꦒꦟ꧀ꦜꦶꦛ꧀ꦜꦴꦤꦨꦹꦠꦺꦱꦸ ꦥꦴꦭ꦳ꦶꦥ꧀ꦥꦢꦺꦱꦺꦱꦸ ꦪꦴꦡꦴꦮꦠꦺꦴ ꦮꦶꦤꦶꦕ꧀ꦖꦪꦥ꧀ꦥꦢꦴꦤꦺꦤ ꦏꦔ꧀ꦑꦁ ꦥꦛꦶꦮꦶꦤꦺꦴꦢꦺꦤ꧀ꦠꦶ.

ꦌꦠ꧀ꦡ ꦕ ꦤꦴꦠꦶꦢꦹꦫꦁ ꦤꦴꦕ꧀ꦕꦴꦱꦤ꧀ꦤꦁ ꦒꦩꦤꦴꦒꦩꦤꦱꦩ꧀ꦥꦤ꧀ꦤꦤ꧀ꦠꦶ ꦌꦏꦁ ꦄꦔ꧀ꦒꦁ, ꦢꦶꦮꦴ ꦄꦥ꧀ꦥꦴꦏꦶꦟ꧀ꦟꦁ, ꦫꦠ꧀ꦠꦶꦁ ꦄꦥ꧀ꦥꦱꦢ꧀ꦢꦁ, ꦄꦥ꧀ꦥꦤꦶꦒ꧀ꦓꦺꦴꦱꦤ꧀ꦠꦶ ꦌꦏꦁ, ꦄꦥ꧀ꦥꦝꦁꦱꦩꦏꦱꦮꦴꦠꦴꦠꦥꦱꦫꦷꦱꦥꦱꦩ꧀ꦦꦱ꧀ꦱꦤ꧀ꦠꦶ ꦌꦏꦁ, ꦠꦱ꧀ꦩꦶꦁ ꦑꦺꦴ ꦥꦤ ꦱꦺꦤꦴꦱꦤꦺ ꦮꦶꦲꦫꦤ꧀ꦠꦱ꧀ꦱ…ꦥꦺ… ꦥꦫꦶꦏ꧀ꦑꦴꦫꦴꦠꦶ ꦌꦏꦁ, ꦠꦱ꧀ꦩꦶꦁ ꦑꦺꦴ ꦥꦤ ꦱꦺꦤꦴꦱꦤꦺ ꦡꦺꦫꦴ…ꦥꦺ… ꦏꦔ꧀ꦑꦁ ꦥꦛꦶꦮꦶꦤꦺꦴꦢꦺꦤ꧀ꦠꦷꦠꦶ ꦌꦏꦁ. ꦌꦮꦁ ꦥꦚ꧀ꦕ ꦄꦔ꧀ꦒꦴꦤꦶ ꦮꦺꦢꦶꦠꦧ꧀ꦧꦴꦤꦶ. ꦢꦸꦠꦶꦪꦴꦢꦷꦤꦶ ꦈꦠ꧀ꦠꦴꦤꦠ꧀ꦡꦴꦤꦶ.

ꦱꦺꦤꦴꦱꦤꦱꦸꦠ꧀ꦠꦴꦢꦶꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.