꧙-꧑꧐. ꦈꦥꦴꦭꦶꦱꦸꦠ꧀ꦠꦴꦢꦶꦮꦟ꧀ꦟꦤꦴ

꧙꧙-꧑꧐꧐. ꦤꦮꦩꦺ ꦄꦗ꧀ꦙꦺꦴꦒꦴꦲꦺꦠ꧀ꦮꦴ ꦄꦣꦶꦥ꧀ꦥꦺꦠꦩꦠ꧀ꦡꦁ ꦱꦩ꧀ꦨꦮꦶꦠꦸꦁ ꦱꦴꦣꦺꦠꦸꦁ ꦢꦸꦏ꧀ꦑꦴꦤꦶ ꦢꦸꦫꦨꦶꦱꦩ꧀ꦨꦮꦴꦤꦶ. ꦄꦛ꧀ꦜꦏꦡꦴꦪꦁ ꦥꦤ ꦠꦠ꧀ꦡ ꦤꦶꦮꦴꦱꦺꦴꦪꦺꦮ ꦢꦸꦏ꧀ꦑꦺꦴꦠꦶ ꦢꦱ꧀ꦱꦺꦠꦸꦁ ‘‘ꦱꦩ꧀ꦨꦮꦶꦠꦸꦁ ꦢꦸꦏ꧀ꦑꦴꦤꦶ ꦢꦸꦱ꧀ꦱꦲꦴꦤꦷ’’ꦠꦶ ꦮꦸꦠ꧀ꦠꦁ. ꦄꦫꦚ꧀ꦚꦮꦤꦥꦠ꧀ꦡꦴꦤꦷꦠꦶ ꦄꦫꦚ꧀ꦚꦭꦏ꧀ꦑꦟꦥ꧀ꦥꦠ꧀ꦠꦴꦤꦶ ꦮꦤꦱꦟ꧀ꦝꦴꦤꦶ. ꦮꦤꦥꦠ꧀ꦡꦱꦢ꧀ꦢꦺꦴ ꦲꦶ ꦱꦟ꧀ꦝꦨꦹꦠꦺ ꦫꦸꦏ꧀ꦑꦱꦩꦹꦲꦺꦥꦶ ꦮꦠ꧀ꦠꦠꦷꦠꦶ ꦄꦫꦚ꧀ꦚꦒ꧀ꦒꦲꦟꦁ. ꦥꦮꦶꦮꦺꦏꦤ꧀ꦠꦶ ꦥꦏꦴꦫꦠꦺꦴ, ꦥꦏꦴꦫꦺꦲꦶ ꦮꦴ ꦮꦶꦮꦺꦕꦤꦁ, ꦫꦹꦥꦴꦢꦶꦥꦸꦡꦸꦠ꧀ꦠꦴꦫꦩ꧀ꦩꦟꦺ ꦥꦏꦴꦫꦠꦺꦴ ꦒꦩꦤꦴꦢꦶꦆꦫꦶꦪꦴꦥꦡꦥ꧀ꦥꦏꦴꦫꦺꦲꦶ ꦄꦠ꧀ꦠꦤꦺꦴ ꦏꦴꦪꦱ꧀ꦱ ꦮꦶꦮꦺꦕꦤꦁ, ꦒꦕ꧀ꦖꦠꦺꦴꦥꦶ ꦠꦶꦛ꧀ꦜꦠꦺꦴꦥꦶ ꦤꦶꦱꦗ꧀ꦗꦠꦺꦴꦥꦶ ꦤꦶꦥꦗ꧀ꦗꦠꦺꦴꦥꦶ ꦌꦏꦱ꧀ꦱꦺꦮ ꦥꦮꦠ꧀ꦠꦶ. ꦠꦺꦤꦺꦮ ꦲꦶ ꦮꦶꦮꦺꦕꦺꦠꦧ꧀ꦧꦴꦤꦁ ꦮꦶꦮꦺꦕꦤꦴꦏꦴꦫꦱ꧀ꦱ ꦕ ꦨꦺꦢꦠꦺꦴ ꦧꦲꦸꦮꦶꦣꦠ꧀ꦠꦴ ꦠꦺ ꦌꦏꦠ꧀ꦠꦺꦤ ꦒꦲꦺꦠ꧀ꦮꦴ ‘‘ꦥꦮꦶꦮꦺꦏ’’ꦤ꧀ꦠꦶ ꦌꦏꦮꦕꦤꦺꦤ ꦮꦸꦠ꧀ꦠꦁ. ꦢꦸꦏ꧀ꦏꦫꦁ ꦥꦮꦶꦮꦺꦏꦤ꧀ꦠꦶ ꦮꦴ ꦥꦮꦶꦮꦺꦏꦁ ꦏꦠ꧀ꦠꦸꦁ ꦤ ꦱꦸꦑꦤ꧀ꦠꦶ ꦄꦠ꧀ꦡꦺꦴ. ꦌꦏꦷꦨꦴꦮꦺꦠꦶ ꦌꦏꦠ꧀ꦠꦨꦴꦮꦺ. ꦢ꧀ꦮꦪꦁꦢ꧀ꦮꦪꦴꦫꦴꦩꦺꦴꦠꦶ ꦢ꧀ꦮꦶꦤ꧀ꦤꦁ ꦢ꧀ꦮꦶꦤ꧀ꦤꦁ ꦨꦴꦮꦴꦨꦶꦫꦠꦺꦴ. ꦲꦫꦤ꧀ꦠꦶ ꦮꦶꦪꦴꦠꦶ ꦱꦁꦲꦫꦤ꧀ꦠꦶ ꦮꦶꦪ ꦮꦶꦓꦴꦠꦸꦥ꧀ꦥꦴꦢꦤꦺꦤ. ꦠꦺꦤꦴꦲ ‘‘ꦓꦱꦤ꧀ꦠꦶ ꦮꦶꦪꦴ’’ꦠꦶ. ꦨꦪꦱꦤ꧀ꦠꦴꦱꦸꦥ꧀ꦥꦴꦢꦤꦺꦤ ꦑꦴꦢꦶꦠꦸꦁ ꦄꦴꦒꦠꦴ ꦪꦏ꧀ꦑꦫꦏ꧀ꦑꦱꦥꦶꦱꦴꦕꦴꦢꦪꦺꦴ ꦮꦶꦪꦴꦠꦶ ꦄꦣꦶꦥ꧀ꦥꦴꦪꦺꦴ. ꦇꦢꦶꦱꦱ꧀ꦱꦴꦠꦶ ꦄꦭꦢ꧀ꦣꦱꦩꦴꦣꦶꦤꦺꦴ. ꦠꦶꦟꦥꦟ꧀ꦟꦩꦶꦒꦴꦢꦶꦱꦢ꧀ꦢꦺꦲꦷꦠꦶ ꦮꦴꦠꦺꦫꦶꦠꦴꦤꦁ ꦠꦶꦟꦥꦟ꧀ꦟꦴꦢꦷꦤꦁ ꦩꦶꦒꦥꦏ꧀ꦑꦶꦄꦴꦢꦷꦤꦚ꧀ꦕ ꦨꦷꦱꦤꦏꦺꦲꦶ ꦨꦺꦫꦮꦺꦲꦶ ꦱꦢ꧀ꦢꦺꦲꦶ. ꦮꦶꦮꦶꦣꦺꦲꦶ ꦕ ꦄꦚ꧀ꦚꦺꦲꦶ ꦑꦴꦟꦸꦄꦴꦢꦷꦲꦶ ꦪꦏ꧀ꦑꦴꦢꦶꦄꦴꦏꦴꦫꦺꦲꦶ ꦈꦥꦛ꧀ꦜꦶꦠꦺꦲꦶ ꦨꦷꦱꦤꦏꦺꦲꦶ. ꦓꦛꦺꦤ ꦏꦷꦭ꦳ꦴ ꦓꦛꦶꦏꦴꦠꦶ ꦌꦏꦺ. ꦢꦱꦩꦁ ꦈꦠ꧀ꦠꦴꦤꦩꦺꦮ.

ꦈꦥꦴꦭꦶꦱꦸꦠ꧀ꦠꦴꦢꦶꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦈꦥꦴꦭꦶꦮꦒ꧀ꦒꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦢꦸꦠꦶꦪꦥꦟ꧀ꦟꦴꦱꦏꦁ ꦤꦶꦛ꧀ꦜꦶꦠꦁ.