꧓. ꦠꦠꦶꦪꦺꦴ ꦥꦫꦶꦕ꧀ꦖꦺꦢꦺꦴ

ꦕꦺꦠꦱꦶꦏꦮꦶꦨꦴꦒꦤꦶꦢ꧀ꦢꦺꦱꦺꦴ

꧘꧙. ꦱꦧ꧀ꦧꦺ ꦕꦺꦠꦱꦶꦏꦴ ꦮꦸꦠ꧀ꦠꦴ, ꦧꦸꦢ꧀ꦣꦺꦤꦴꦢꦶꦕ꧀ꦕꦧꦤ꧀ꦣꦸꦤꦴ;

ꦤꦴꦩꦱꦴꦩꦚ꧀ꦚꦠꦺꦴꦪꦺꦮ, ꦢ꧀ꦮꦺꦥꦚ꧀ꦚꦴꦱ ꦨꦮꦤ꧀ꦠꦶ ꦠꦺ.

ꦱꦺꦪ꧀ꦪꦡꦶꦢꦁ – ꦦꦱ꧀ꦱꦺꦴ ꦮꦺꦢꦤꦴ ꦱꦚ꧀ꦚꦴ ꦕꦺꦠꦤꦴ ꦮꦶꦠꦏ꧀ꦏꦺꦴ ꦮꦶꦕꦴꦫꦺꦴ ꦥꦷꦠꦶ ꦕꦶꦠ꧀ꦠꦺꦏꦒ꧀ꦒꦠꦴ ꦮꦷꦫꦶꦪꦁ ꦗꦷꦮꦶꦠꦁ ꦖꦤ꧀ꦢꦺꦴ ꦄꦣꦶꦩꦺꦴꦏ꧀ꦑꦺꦴ ꦩꦤꦱꦶꦏꦴꦫꦺꦴ ꦠꦠ꧀ꦫꦩꦗ꧀ꦙꦠ꧀ꦠꦠꦴ ꦱꦢ꧀ꦣꦴ ꦱꦠꦶ ꦲꦶꦫꦷ ꦎꦠ꧀ꦠꦥ꧀ꦥꦁ ꦄꦭꦺꦴꦨꦺꦴ ꦄꦢꦺꦴꦱꦺꦴ ꦄꦩꦺꦴꦲꦺꦴ ꦏꦴꦪꦥ꧀ꦥꦱ꧀ꦱꦢ꧀ꦣꦶꦄꦴꦢꦷꦤꦶ ꦖ ꦪꦸꦒꦴꦤꦶ, ꦠꦶꦱ꧀ꦱꦺꦴ ꦮꦶꦫꦠꦶꦪꦺꦴ, ꦏꦫꦸꦟꦴ ꦩꦸꦢꦶꦠꦴ ꦭꦺꦴꦨꦺꦴ ꦢꦺꦴꦱꦺꦴ ꦩꦺꦴꦲꦺꦴ ꦈꦢ꧀ꦣꦕ꧀ꦕꦁ ꦩꦴꦤꦺꦴ ꦢꦶꦛ꧀ꦜꦶ ꦆꦱ꧀ꦱꦴ ꦩꦕ꧀ꦖꦫꦶꦪꦁ ꦏꦸꦏ꧀ꦏꦸꦕ꧀ꦕꦁ ꦡꦶꦤꦁ ꦩꦶꦢ꧀ꦣꦁ ꦮꦶꦕꦶꦏꦶꦕ꧀ꦖꦴ ꦄꦲꦶꦫꦶꦏꦁ ꦄꦤꦺꦴꦠ꧀ꦠꦥ꧀ꦥꦚ꧀ꦕꦴꦠꦶ.

꧙꧐. ꦕꦠꦸꦥꦚ꧀ꦚꦴꦱꦣꦴ ꦏꦴꦩꦺ, ꦫꦹꦥꦺ ꦥꦚ꧀ꦕꦢꦱꦺꦫꦶꦠꦴ;

ꦠꦺ ꦲꦺꦴꦤ꧀ꦠꦶ ꦢ꧀ꦮꦴꦢꦱꦴꦫꦹꦥꦺ, ꦕꦠ꧀ꦠꦴꦭꦷꦱꦩꦤꦴꦱꦮꦴ.

꧙꧑. ꦌꦏꦮꦷꦱꦱꦠꦁ ꦱꦧ꧀ꦧꦺ, ꦕꦶꦠ꧀ꦠꦸꦥ꧀ꦥꦴꦢꦴ ꦱꦩꦴꦱꦠꦺꦴ;

ꦌꦠꦺꦱꦸ ꦠꦺꦱꦩꦸꦥ꧀ꦥꦠ꧀ꦠꦶꦁ, ꦈꦢ꧀ꦣꦫꦶꦠ꧀ꦮꦴ ꦥꦤꦺꦏꦏꦁ.

꧙꧒. ꦦꦱ꧀ꦱꦴꦢꦷꦤꦁ ꦠꦸ ꦣꦩ꧀ꦩꦴꦤꦁ, ꦥꦮꦏ꧀ꦑꦴꦩꦶ ꦆꦠꦺꦴ ꦥꦫꦁ;

ꦥꦴꦛꦮꦠ꧀ꦡꦴꦪ ꦨꦶꦏ꧀ꦑꦹꦤꦁ, ꦕꦶꦠ꧀ꦠꦕꦺꦠꦱꦶꦏꦺꦱ꧀ꦮꦲꦁ.

꧙꧓. ꦌꦏꦒ꧀ꦒꦠꦴ ꦩꦤꦏ꧀ꦏꦴꦫꦺꦴ, ꦗꦷꦮꦶꦠꦁ ꦦꦱ꧀ꦱꦥꦚ꧀ꦕꦏꦁ;

ꦄꦛ꧀ꦜꦺꦠꦺ ꦄꦮꦶꦤꦶꦧ꧀ꦨꦺꦴꦒꦴ, ꦌꦏꦸꦥ꧀ꦥꦴꦢꦴ ꦱꦲꦏ꧀ꦑꦪꦴ.

꧙꧔. ꦦꦱ꧀ꦱꦺꦴ ꦕ ꦮꦺꦢꦤꦴ ꦱꦚ꧀ꦚꦴ, ꦕꦺꦠꦤꦴ ꦗꦷꦮꦶꦠꦶꦤ꧀ꦢ꧀ꦫꦶꦪꦁ;

ꦌꦏꦒ꧀ꦒꦠꦴ ꦩꦤꦏ꧀ꦏꦴꦫꦺꦴ, ꦱꦧ꧀ꦧꦱꦴꦣꦴꦫꦟꦴ ꦆꦩꦺ.

꧙꧕. ꦮꦶꦠꦏ꧀ꦏꦺꦴ ꦥꦚ꧀ꦕꦥꦚ꧀ꦚꦴꦱ-ꦕꦶꦠ꧀ꦠꦺꦱꦸ ꦱꦩꦸꦢꦷꦫꦶꦠꦺꦴ;

ꦕꦴꦫꦺꦴ ꦖꦱꦛ꧀ꦜꦶꦕꦶꦠ꧀ꦠꦺꦱꦸ, ꦗꦴꦪꦠꦺ ꦤꦠ꧀ꦡꦶ ꦱꦁꦱꦪꦺꦴ.

꧙꧖. ꦌꦏꦥꦚ꧀ꦚꦴꦱꦕꦶꦠ꧀ꦠꦺꦱꦸ, ꦥꦷꦠꦶ ꦠꦺꦱꦛ꧀ꦜꦶꦪꦴ ꦱꦸꦑꦁ;

ꦈꦥꦺꦏ꧀ꦑꦴ ꦥꦚ꧀ꦕꦥꦚ꧀ꦚꦴꦱ-ꦕꦶꦠ꧀ꦠꦺ ꦢꦸꦏ꧀ꦑꦁ ꦠꦸ ꦠꦷꦱꦸ ꦲꦶ.

꧙꧗. ꦲꦺꦴꦠꦶ ꦢ꧀ꦮꦴꦱꦛ꧀ꦜꦶꦕꦶꦠ꧀ꦠꦺꦱꦸ, ꦱꦺꦴꦩꦤꦱ꧀ꦱꦶꦤ꧀ꦢ꧀ꦫꦶꦪꦁ ꦥꦤ;

ꦢꦸꦏ꧀ꦑꦶꦤ꧀ꦢ꧀ꦫꦶꦪꦁ ꦥꦤꦺꦏꦱ꧀ꦩꦶꦁ, ꦠꦡꦺꦏꦩ꧀ꦲꦶ ꦱꦸꦑꦶꦤ꧀ꦢ꧀ꦫꦶꦪꦁ.

꧙꧘. ꦥꦚ꧀ꦕꦸꦠ꧀ꦠꦫꦱꦠꦺ ꦕꦶꦠ꧀ꦠꦺ, ꦮꦷꦫꦶꦪꦁ ꦄꦴꦲ ꦤꦴꦪꦏꦺꦴ;

ꦕꦠꦸꦠ꧀ꦠꦫꦱꦠꦺ ꦕꦶꦠ꧀ꦠꦺ, ꦱꦩꦴꦣꦶꦤ꧀ꦢ꧀ꦫꦶꦪꦩꦧ꧀ꦫꦮꦶ.

꧙꧙. ꦱꦧ꧀ꦧꦴꦲꦺꦠꦸꦏꦕꦶꦠ꧀ꦠꦴꦤꦶ, ꦜꦥꦺꦠ꧀ꦮꦴ ꦕꦺꦏꦲꦺꦠꦸꦏꦺ;

ꦌꦏꦸꦠ꧀ꦠꦫꦱꦠꦺ ꦕꦶꦠ꧀ꦠꦺ, ꦖꦤ꧀ꦢꦱ꧀ꦱꦸꦥ꧀ꦥꦠ꧀ꦠꦶꦩꦸꦢ꧀ꦢꦶꦱꦺ.

꧑꧐꧐. ꦜꦥꦺꦠ꧀ꦮꦴ ꦢꦱ ꦮꦶꦚ꧀ꦚꦴꦟꦺ, ꦮꦶꦕꦶꦏꦶꦕ꧀ꦖꦴꦪꦸꦠꦩ꧀ꦥꦶ ꦕ;

ꦢꦱꦸꦠ꧀ꦠꦫꦱꦠꦺ ꦕꦶꦠ꧀ꦠꦺ, ꦄꦣꦶꦩꦺꦴꦏ꧀ꦑꦺꦴ ꦈꦢꦷꦫꦶꦠꦺꦴ.

꧑꧐꧑. ꦱꦢ꧀ꦣꦴ ꦱꦠꦶ ꦲꦶꦫꦺꦴꦠ꧀ꦠꦥ꧀ꦥꦁ, ꦄꦭꦺꦴꦨꦴꦢꦺꦴꦱꦩꦗ꧀ꦙꦠꦴ;

ꦖꦭ꦳ꦺꦮ ꦪꦸꦒꦭ꦳ꦴ ꦕꦴꦠꦶ, ꦣꦩ꧀ꦩꦴ ꦌꦏꦹꦤꦮꦷꦱꦠꦶ.

꧑꧐꧒. ꦌꦏꦤꦮꦸꦠꦶꦪꦴ ꦕꦶꦠ꧀ꦠꦺ, ꦗꦴꦪꦤ꧀ꦠꦶ ꦤꦶꦪꦠꦴ ꦆꦩꦺ;

ꦄꦲꦺꦠꦸꦏꦺꦱꦸ ꦕꦶꦠ꧀ꦠꦺꦱꦸ, ꦄꦥꦸꦚ꧀ꦚꦺꦱꦸ ꦤ ꦗꦴꦪꦫꦺ.

꧑꧐꧓. ꦌꦏꦹꦤꦴꦱꦷꦠꦶꦪꦴ ꦕꦶꦠ꧀ꦠꦺ, ꦥꦚ꧀ꦚꦴ ꦗꦴꦪꦠꦶ ꦱꦧ꧀ꦧꦢꦴ;

ꦄꦛ꧀ꦜꦮꦷꦱꦠꦶꦪꦴ ꦕꦶꦠ꧀ꦠꦺ, ꦏꦫꦸꦟꦴꦩꦸꦢꦶꦠꦴ ꦱꦶꦪꦸꦁ.

꧑꧐꧔. ꦏꦴꦩꦴꦮꦕꦫꦥꦸꦚ꧀ꦚꦺꦱꦸ, ꦱꦧ꧀ꦧꦭꦺꦴꦏꦸꦠ꧀ꦠꦫꦺꦱꦸ ꦕ;

ꦕꦠ꧀ꦠꦴꦭꦷꦱꦮꦶꦣꦺ ꦕꦶꦠ꧀ꦠꦺ, ꦱꦴꦛ꧀ꦜꦏꦺ ꦮꦶꦫꦠꦶꦠ꧀ꦠꦪꦁ.

꧑꧐꧕. ꦱꦢ꧀ꦣꦴ ꦱꦠꦶ ꦲꦶꦫꦺꦴꦠ꧀ꦠꦥ꧀ꦥꦁ, ꦄꦭꦺꦴꦨꦴꦢꦶꦠ꧀ꦠꦪꦩ꧀ꦥꦶ ꦕ;

ꦪꦸꦒꦭ꦳ꦴꦤꦶ ꦖ ꦩꦗ꧀ꦙꦠ꧀ꦠꦁ, ꦏꦫꦸꦟꦴꦩꦸꦢꦶꦠꦴꦥꦶ ꦕ.

꧑꧐꧖. ꦠꦡꦴ ꦮꦶꦫꦠꦶꦪꦺꦴ ꦠꦶꦱ꧀ꦱꦺꦴ, ꦱꦧ꧀ꦧꦺ ꦠꦺ ꦥꦚ꧀ꦕꦮꦷꦱꦠꦶ;

ꦏꦸꦱꦭꦴꦧ꧀ꦪꦴꦏꦠꦴ ꦕꦴꦥꦶ, ꦏꦸꦱꦭꦺꦤ ꦥꦏꦴꦱꦶꦠꦴ.

꧑꧐꧗. ꦄꦲꦶꦫꦷꦏꦩꦤꦺꦴꦠ꧀ꦠꦥ꧀ꦥꦁ, ꦩꦺꦴꦲꦺꦴ ꦈꦢ꧀ꦣꦕ꧀ꦕꦩꦺꦮ ꦕ;

ꦢ꧀ꦮꦴꦢꦱꦴꦥꦸꦚ꧀ꦚꦕꦶꦠ꧀ꦠꦺꦱꦸ, ꦤꦶꦪꦠꦴꦪꦺꦮ ꦗꦴꦪꦫꦺ.

꧑꧐꧘. ꦭꦺꦴꦨꦺꦴ ꦢꦺꦴꦱꦺꦴ ꦕ ꦩꦺꦴꦲꦺꦴ ꦕ, ꦩꦴꦤꦺꦴ ꦢꦶꦛ꧀ꦜꦶ ꦕ ꦱꦁꦱꦪꦺꦴ;

ꦩꦶꦢ꧀ꦣꦩꦸꦢ꧀ꦣꦕ꧀ꦕꦏꦸꦏ꧀ꦏꦸꦕ꧀ꦕꦁ, ꦡꦶꦤꦁ ꦩꦕ꧀ꦖꦫꦶꦪꦩ꧀ꦥꦶ ꦕ.

꧑꧐꧙. ꦄꦲꦶꦫꦷꦏꦩꦤꦺꦴꦠ꧀ꦠꦥ꧀ꦥꦁ, ꦆꦱ꧀ꦱꦴ ꦕ ꦢꦺꦴꦩꦤꦱ꧀ꦱꦏꦁ;

ꦌꦠꦺ ꦄꦏꦸꦱꦭꦴ ꦮꦸꦠ꧀ꦠꦴ, ꦌꦏꦤ꧀ꦠꦺꦤ ꦩꦲꦺꦱꦶꦤꦴ.

꧑꧑꧐. ꦭꦺꦴꦨꦺꦴ ꦄꦛ꧀ꦜꦱꦸ ꦤꦶꦢ꧀ꦢꦶꦛ꧀ꦜꦺꦴ, ꦮꦸꦠ꧀ꦠꦴ ꦕꦠꦹꦱꦸ ꦢꦶꦛ꧀ꦜꦶꦠꦸ;

ꦩꦴꦤꦺꦴ ꦢꦶꦛ꧀ꦜꦶꦮꦶꦪꦸꦠ꧀ꦠꦺꦱꦸ, ꦢꦺꦴꦱꦺꦴꦢ꧀ꦮꦷꦱ꧀ꦮꦺꦮ ꦗꦴꦪꦠꦺ.

꧑꧑꧑. ꦆꦱ꧀ꦱꦴꦩꦕ꧀ꦖꦺꦫꦏꦸꦏ꧀ꦏꦸꦕ꧀ꦕꦴ, ꦢ꧀ꦮꦷꦱꦸ ꦗꦴꦪꦤ꧀ꦠꦶ ꦤꦺꦴ ꦱꦲ;

ꦮꦶꦕꦶꦏꦶꦕ꧀ꦖꦴ ꦥꦤꦺꦏꦱ꧀ꦩꦶꦁ, ꦡꦶꦤꦩꦶꦢ꧀ꦣꦁ ꦠꦸ ꦥꦚ꧀ꦕꦱꦸ.

꧑꧑꧒. ꦦꦱ꧀ꦱꦺꦴ ꦕ ꦮꦺꦢꦤꦴ ꦱꦚ꧀ꦚꦴ, ꦕꦺꦠꦤꦴ ꦗꦷꦮꦶꦠꦁ ꦩꦤꦺꦴ;

ꦮꦶꦠꦏ꧀ꦏꦺꦴ ꦕ ꦮꦶꦕꦴꦫꦺꦴ ꦕ, ꦥꦷꦠꦶ ꦮꦷꦫꦶꦪꦱꦩꦴꦣꦶ ꦕ.

꧑꧑꧓. ꦖꦤ꧀ꦢꦺꦴ ꦕꦺꦮꦴꦣꦶꦩꦺꦴꦏ꧀ꦑꦺꦴ ꦕ, ꦩꦤꦱꦶꦏꦴꦫꦺꦴ ꦕ ꦕꦸꦢ꧀ꦢꦱ;

ꦏꦸꦱꦭꦴꦏꦸꦱꦭꦴ ꦕꦺꦮ, ꦲꦺꦴꦤ꧀ꦠꦶ ꦄꦧ꧀ꦪꦴꦏꦠꦴꦥꦶ ꦕ.

꧑꧑꧔. ꦌꦏꦹꦤꦠꦶꦁꦱꦕꦶꦠ꧀ꦠꦺꦱꦸ, ꦙꦴꦤꦁ ꦥꦚ꧀ꦕꦔ꧀ꦒꦶꦏꦁ ꦩꦠꦁ;

ꦕꦠꦸꦙꦴꦤꦔ꧀ꦒꦪꦸꦠ꧀ꦠꦴꦤꦶ, ꦱꦠ꧀ꦠꦠꦶꦁꦱꦴꦠꦶ ꦤꦶꦢ꧀ꦢꦶꦱꦺ.

꧑꧑꧕. ꦌꦏꦴꦢꦱꦮꦶꦣꦁ ꦕꦶꦠ꧀ꦠꦁ, ꦠꦶꦮꦔ꧀ꦒꦶꦏꦩꦸꦢꦷꦫꦶꦠꦁ;

ꦕꦠꦸꦠꦶꦁꦱꦮꦶꦣꦁ ꦕꦶꦠ꧀ꦠꦁ, ꦢꦸꦮꦔ꧀ꦒꦶꦏꦩꦸꦢꦷꦫꦶꦠꦁ.

꧑꧑꧖. ꦱꦨꦴꦮꦺꦤꦴꦮꦶꦠꦏ꧀ꦏꦺꦱꦸ, ꦙꦴꦤꦔ꧀ꦒꦴꦤꦶ ꦤ ꦈꦢ꧀ꦣꦫꦺ;

ꦱꦧ꧀ꦧꦴꦲꦺꦠꦸꦏꦕꦶꦠ꧀ꦠꦺꦱꦸ, ꦩꦒ꧀ꦒꦔ꧀ꦒꦴꦤꦶ ꦤ ꦈꦢ꧀ꦣꦫꦺ.

꧑꧑꧗. ꦠꦷꦟꦶ ꦱꦺꦴꦭ꦳ꦱꦕꦶꦠ꧀ꦠꦺꦱꦸ, ꦆꦤ꧀ꦢ꧀ꦫꦶꦪꦴꦤꦶ ꦮꦢꦺ ꦧꦸꦣꦺꦴ;

ꦌꦏꦱ꧀ꦩꦶꦁ ꦥꦤ ꦕꦠ꧀ꦠꦴꦫꦶ, ꦥꦚ꧀ꦕ ꦠꦺꦫꦱꦱꦸꦢ꧀ꦣꦫꦺ.

꧑꧑꧘. ꦱꦠ꧀ꦠ ꦢ꧀ꦮꦴꦢꦱꦕꦶꦠ꧀ꦠꦺꦱꦸ, ꦆꦤ꧀ꦢ꧀ꦫꦶꦪꦴꦤꦶ ꦗꦶꦤꦺꦴꦧ꧀ꦫꦮꦶ;

ꦌꦏꦺꦤꦹꦤꦺꦱꦸ ꦄꦛ꧀ꦜꦺꦮ, ꦕꦠ꧀ꦠꦴꦭꦷꦱꦩꦤꦺꦱꦸ ꦕ.

꧑꧑꧙. ꦕꦠ꧀ꦠꦴꦭꦷꦱꦴꦪ ꦕꦶꦠ꧀ꦠꦺꦱꦸ, ꦤꦮꦏꦁ ꦤꦴꦪꦏꦺꦴꦧ꧀ꦫꦮꦶ;

ꦌꦮꦁ ꦆꦤ꧀ꦢ꧀ꦫꦶꦪꦪꦺꦴꦒꦺꦴꦥꦶ, ꦮꦺꦢꦶꦠꦧ꧀ꦧꦺꦴ ꦮꦶꦨꦴꦮꦶꦤꦴ.

꧑꧒꧐. ꦄꦩꦒ꧀ꦒꦔ꧀ꦒꦴꦤꦶ ꦤꦴꦩꦺꦠ꧀ꦡ, ꦄꦛ꧀ꦜꦴꦫꦱ ꦄꦲꦺꦠꦸꦏꦴ;

ꦙꦴꦤꦔ꧀ꦒꦴꦤꦶ ꦤ ꦮꦶꦗ꧀ꦗꦤ꧀ꦠꦶ, ꦮꦶꦚ꧀ꦚꦴꦟꦺꦱꦸ ꦢ꧀ꦮꦶꦥꦚ꧀ꦕꦱꦸ.

꧑꧒꧑. ꦌꦏꦁ ꦕꦶꦠ꧀ꦠꦁ ꦢꦸꦩꦒ꧀ꦒꦔ꧀ꦒꦁ, ꦠꦶꦩꦒ꧀ꦒꦔ꧀ꦒꦴꦤꦶ ꦱꦠ꧀ꦠꦱꦸ;

ꦕꦠ꧀ꦠꦴꦭꦷꦱꦴꦪ ꦕꦶꦠ꧀ꦠꦺꦱꦸ, ꦩꦒ꧀ꦒꦺꦴ ꦱꦺꦴ ꦕꦠꦸꦫꦔ꧀ꦒꦶꦏꦺꦴ.

꧑꧒꧒. ꦥꦚ꧀ꦕꦢ꧀ꦢꦱꦱꦸ ꦕꦶꦠ꧀ꦠꦺꦱꦸ, ꦩꦒ꧀ꦒꦺꦴ ꦥꦚ꧀ꦕꦔ꧀ꦒꦶꦏꦺꦴ ꦩꦠꦺꦴ;

ꦮꦸꦠ꧀ꦠꦺꦴ ꦢ꧀ꦮꦠ꧀ꦠꦶꦁꦱꦕꦶꦠ꧀ꦠꦺꦱꦸ, ꦩꦒ꧀ꦒꦺꦴ ꦱꦠ꧀ꦠꦔ꧀ꦒꦶꦏꦺꦴꦥꦶ ꦕ.

꧑꧒꧓. ꦩꦒ꧀ꦒꦺꦴ ꦄꦛ꧀ꦜꦱꦸ ꦕꦶꦠ꧀ꦠꦺꦱꦸ, ꦩꦠꦺꦴ ꦄꦛ꧀ꦜꦔ꧀ꦒꦶꦏꦺꦴꦠꦶ ꦲꦶ;

ꦌꦮꦁ ꦠꦸ ꦱꦧ꧀ꦧꦕꦶꦠ꧀ꦠꦺꦱꦸ, ꦩꦒ꧀ꦒꦔ꧀ꦒꦴꦤꦶ ꦱꦩꦸꦢ꧀ꦣꦫꦺ.

꧑꧒꧔. ꦧꦭꦴꦤꦶ ꦢ꧀ꦮꦺ ꦢ꧀ꦮꦶꦕꦶꦠ꧀ꦠꦺꦱꦸ, ꦌꦏꦱ꧀ꦩꦶꦁ ꦠꦷꦟꦶ ꦢꦷꦥꦪꦺ;

ꦌꦏꦴꦢꦱꦱꦸ ꦕꦠ꧀ꦠꦴꦫꦶ, ꦖ ꦢ꧀ꦮꦴꦢꦱꦱꦸ ꦤꦶꦢ꧀ꦢꦶꦱꦺ.

꧑꧒꧕. ꦌꦏꦹꦤꦴꦱꦷꦠꦶꦪꦴ ꦱꦠ꧀ꦠ, ꦱꦺꦴꦭ꦳ꦱꦺꦮꦴꦧꦭꦴꦤꦶ ꦠꦸ;

ꦕꦶꦠ꧀ꦠꦩꦺꦮꦁ ꦠꦸ ꦮꦶꦚ꧀ꦚꦺꦪ꧀ꦪꦁ, ꦱꦧꦭꦁ ꦄꦧꦭꦩ꧀ꦥꦶ ꦕ.

꧑꧒꧖. ꦙꦴꦤꦔ꧀ꦒꦩꦒ꧀ꦒꦔ꧀ꦒꦧꦭꦶꦤ꧀ꦢ꧀ꦫꦶꦪꦴꦤꦶ,

ꦕꦶꦠ꧀ꦠꦺꦱꦸ ꦗꦴꦪꦤ꧀ꦠꦶ ꦲꦶ ꦪꦺꦱꦸ ꦪꦴꦤꦶ;

ꦩꦪꦴ ꦱꦩꦴꦱꦺꦤ ꦱꦩꦸꦢ꧀ꦣꦫꦶꦠ꧀ꦮꦴ,

ꦮꦸꦠ꧀ꦠꦴꦤꦶ ꦱꦧ꧀ꦧꦴꦤꦶꦥꦶ ꦠꦴꦤꦶ ꦠꦺꦱꦸ.

ꦆꦠꦶ ꦄꦨꦶꦣꦩ꧀ꦩꦴꦮꦠꦴꦫꦺ ꦕꦺꦠꦱꦶꦏꦮꦶꦨꦴꦒꦤꦶꦢ꧀ꦢꦺꦱꦺꦴ ꦤꦴꦩ

ꦠꦠꦶꦪꦺꦴ ꦥꦫꦶꦕ꧀ꦖꦺꦢꦺꦴ.