ꦱꦸꦠ꧀ꦠꦤ꧀ꦠꦶꦏꦢꦸꦏꦩꦴꦠꦶꦏꦠ꧀ꦡꦮꦟ꧀ꦟꦤꦴ

ꦱꦸꦠ꧀ꦠꦤ꧀ꦠꦶꦏꦢꦸꦏꦺꦱꦸ ꦮꦺꦢꦺꦠꦶ, ꦮꦶꦮꦶꦣꦺꦤ ꦮꦴ ꦄꦴꦏꦴꦫꦺꦤ ꦗꦴꦤꦴꦠꦷꦠꦶ ꦮꦶꦗ꧀ꦗꦴ, ꦮꦶꦥꦱ꧀ꦱꦤꦴꦚꦴꦟꦩꦤꦺꦴꦩꦪꦶꦢ꧀ꦣꦶꦖꦄꦨꦶꦚ꧀ꦚꦴꦮꦱꦥ꧀ꦥꦮꦠ꧀ꦠꦴ ꦥꦚ꧀ꦚꦴ, ꦠꦱ꧀ꦩꦶꦁ ꦮꦶꦗ꧀ꦗꦴꦨꦴꦒꦺ ꦮꦶꦗ꧀ꦗꦴꦏꦺꦴꦛ꧀ꦜꦴꦱꦺ ꦮꦶꦗ꧀ꦗꦴꦱꦨꦴꦮꦺ ꦮꦠ꧀ꦠꦤ꧀ꦠꦷꦠꦶ ꦮꦶꦗ꧀ꦗꦴꦨꦴꦒꦶꦤꦺꦴ. ꦠꦴ ꦌꦮ ꦮꦶꦗ꧀ꦗꦴ, ꦠꦁ ꦮꦴ ꦮꦶꦗ꧀ꦗꦁ ꦱꦩ꧀ꦥꦪꦺꦴꦒꦮꦱꦺꦤ ꦨꦗꦤ꧀ꦠꦷꦠꦶꦥꦶ ꦮꦶꦗ꧀ꦗꦴꦨꦴꦒꦶꦤꦺꦴ, ꦄꦛ꧀ꦜꦮꦶꦣꦮꦶꦗ꧀ꦗꦴꦱꦩ꧀ꦥꦪꦸꦠ꧀ꦠꦣꦩ꧀ꦩꦴ. ꦠꦴꦱꦸ ꦪꦴ ꦏꦴꦕꦶ ꦌꦏꦴ ꦮꦶꦗ꧀ꦗꦴ ꦮꦶꦗ꧀ꦗꦴ, ꦱꦺꦱꦴ ꦮꦶꦗ꧀ꦗꦴꦨꦴꦒꦶꦤꦺꦴꦠꦶ ꦌꦮꦁ ꦮꦶꦗ꧀ꦗꦴꦥꦶ ꦮꦶꦗ꧀ꦗꦴꦱꦩ꧀ꦥꦪꦸꦠ꧀ꦠꦣꦩ꧀ꦩꦴꦥꦶ ꦮꦶꦗ꧀ꦗꦴꦨꦴꦒꦶꦤꦺꦴꦠ꧀ꦮꦺꦮ ꦮꦺꦢꦶꦠꦧ꧀ꦧꦴ, ꦆꦣ ꦥꦤ ꦮꦶꦗ꧀ꦗꦴꦱꦩ꧀ꦥꦪꦸꦠ꧀ꦠꦴ ꦣꦩ꧀ꦩꦴꦮ ꦄꦣꦶꦥ꧀ꦥꦺꦠꦴ. ꦤ ꦮꦶꦗꦴꦤꦴꦠꦷꦠꦶ ꦄꦮꦶꦗ꧀ꦗꦴ, ꦕꦠꦸꦱꦕ꧀ꦕꦕ꧀ꦖꦴꦢꦏꦮꦱꦺꦤ ꦕꦠꦸꦧ꧀ꦧꦶꦣꦺꦴ ꦩꦺꦴꦲꦺꦴ, ꦠꦱ꧀ꦩꦶꦁ ꦄꦮꦶꦗ꧀ꦗꦴꦨꦴꦒꦺ ꦄꦮꦶꦗ꧀ꦗꦴꦏꦺꦴꦛ꧀ꦜꦴꦱꦺ ꦄꦮꦶꦗ꧀ꦗꦴꦱꦨꦴꦮꦺ ꦮꦠ꧀ꦠꦤ꧀ꦠꦷꦠꦶ ꦄꦮꦶꦗ꧀ꦗꦴꦨꦴꦒꦶꦤꦺꦴ. ꦠꦴ ꦌꦮ ꦄꦮꦶꦗ꧀ꦗꦴ, ꦠꦁ ꦮꦴ ꦄꦮꦶꦗ꧀ꦗꦁ ꦱꦩ꧀ꦥꦪꦺꦴꦒꦮꦱꦺꦤ ꦨꦗꦤ꧀ꦠꦷꦠꦶꦥꦶ ꦄꦮꦶꦗ꧀ꦗꦴꦨꦴꦒꦶꦤꦺꦴ, ꦄꦮꦶꦗ꧀ꦗꦴꦱꦩ꧀ꦥꦪꦸꦠ꧀ꦠꦣꦩ꧀ꦩꦴ. ꦌꦮꦁ ꦄꦮꦶꦗ꧀ꦗꦴꦥꦶ ꦄꦮꦶꦗ꧀ꦗꦴꦱꦩ꧀ꦥꦪꦸꦠ꧀ꦠꦣꦩ꧀ꦩꦴꦥꦶ ꦄꦮꦶꦗ꧀ꦗꦴꦨꦴꦒꦶꦤꦺꦴꦠ꧀ꦮꦺꦮ ꦮꦺꦢꦶꦠꦧ꧀ꦧꦴ, ꦆꦣ ꦥꦤ ꦄꦮꦶꦗ꧀ꦗꦴꦱꦩ꧀ꦥꦪꦸꦠ꧀ꦠꦣꦩ꧀ꦩꦴꦮ ꦄꦣꦶꦥ꧀ꦥꦺꦠꦴ.

ꦠꦠ꧀ꦡ ꦄꦫꦲꦠ꧀ꦠꦩꦒ꧀ꦒꦕꦶꦠ꧀ꦠꦁ, ꦥꦚ꧀ꦚꦴꦮꦶꦫꦲꦶꦠꦠꦁꦱꦩ꧀ꦥꦪꦸꦠ꧀ꦠꦴ ꦕ ꦮꦶꦗ꧀ꦗꦴꦨꦴꦒꦶꦤꦺꦴ ꦕ ꦚꦴꦟꦱꦩ꧀ꦥꦪꦸꦠ꧀ꦠꦏꦴꦩꦴꦮꦕꦫꦗꦮꦤꦴꦤꦶ, ꦚꦴꦟꦮꦶꦫꦲꦶꦠꦠꦁꦱꦩ꧀ꦥꦪꦸꦠ꧀ꦠꦴ ꦕ ꦮꦶꦥꦱ꧀ꦱꦤꦴꦨꦴꦮꦺꦤ ꦥꦮꦠ꧀ꦠꦶꦪꦁ ꦮꦶꦗ꧀ꦗꦴꦨꦴꦒꦶꦤꦺꦴ, ꦄꦚ꧀ꦚꦢꦴ ꦤ ꦮꦠ꧀ꦠꦧ꧀ꦧꦴ. ꦫꦹꦥꦴꦮꦕꦫꦕꦠꦸꦠ꧀ꦡꦗ꧀ꦙꦴꦤꦶꦏꦗꦮꦤꦕꦶꦠ꧀ꦠꦴꦤꦶ, ꦥꦚ꧀ꦚꦴꦮꦶꦫꦲꦶꦠꦠꦁꦱꦩ꧀ꦥꦪꦸꦠ꧀ꦠꦴ ꦕ ꦩꦤꦺꦴꦩꦪꦶꦢ꧀ꦣꦶꦨꦴꦮꦺꦤ ꦕ ꦥꦚ꧀ꦕꦴꦨꦶꦚ꧀ꦚꦴꦨꦴꦮꦺꦤ ꦕ ꦥꦮꦠ꧀ꦠꦶꦪꦁ ꦮꦶꦗ꧀ꦗꦴꦨꦴꦒꦶꦤꦺꦴ, ꦄꦚ꧀ꦚꦢꦴ ꦤ ꦮꦠ꧀ꦠꦧ꧀ꦧꦴ. ꦠꦠ꧀ꦡ ꦢ꧀ꦮꦴꦢꦱꦴꦏꦸꦱꦭꦕꦶꦠ꧀ꦠꦴꦤꦶ, ꦄꦮꦶꦗ꧀ꦗꦴꦮꦶꦫꦲꦶꦠꦠꦁꦱꦩ꧀ꦥꦪꦸꦠ꧀ꦠꦴ ꦕ ꦄꦮꦶꦗ꧀ꦗꦴꦨꦴꦒꦶꦤꦺꦴꦮ, ꦆꦣ ꦥꦤ ꦄꦮꦶꦗ꧀ꦗꦴ, ꦱꦺꦱꦕꦶꦠ꧀ꦠꦫꦹꦥꦤꦶꦧ꧀ꦧꦴꦤꦴꦤꦶ ꦕ ꦤ ꦮꦠ꧀ꦠꦧ꧀ꦧꦴꦮ. ꦕꦺꦠꦱꦶꦏꦺꦱꦸ ꦥꦤ ꦩꦺꦴꦲꦄꦥ꧀ꦥꦩꦚ꧀ꦚꦴ ꦤ ꦮꦠ꧀ꦠꦧ꧀ꦧꦴꦮ, ꦱꦺꦱꦴ ꦏꦸꦱꦭꦴꦧ꧀ꦪꦴꦏꦠꦴ ꦱꦶꦪꦴ ꦮꦶꦗ꧀ꦗꦴꦨꦴꦒꦶꦤꦺꦴ, ꦱꦶꦪꦴ ꦤ ꦮꦠ꧀ꦠꦧ꧀ꦧꦴ, ꦠꦶꦗꦴꦠꦶꦏꦴ ꦢ꧀ꦮꦶꦣꦴꦥꦶ ꦤ ꦮꦠ꧀ꦠꦧ꧀ꦧꦴ ꦕ. ꦱꦺꦱꦁ ꦱꦸꦮꦶꦚ꧀ꦚꦺꦪ꧀ꦪꦩꦺꦮ. ꦥꦜꦩꦁ.

ꦥꦸꦤ ꦄꦤꦗ꧀ꦙꦺꦴꦠ꧀ꦡꦫꦟꦮꦱꦺꦤ ꦏꦶꦭꦺꦱꦤ꧀ꦣꦏꦴꦫꦁ ꦮꦶꦢ꧀ꦣꦁꦱꦺꦠꦸꦁ ꦄꦱꦩꦠ꧀ꦡꦠꦴꦪ ꦮꦶꦗ꧀ꦗꦸ ꦈꦥꦩꦴ ꦌꦠꦺꦱꦤ꧀ꦠꦶ ꦮꦶꦗ꧀ꦗꦹꦥꦩꦴ, ꦄꦴꦢꦶꦠꦺꦴ ꦠꦷꦱꦸ ꦩꦒ꧀ꦒꦺꦱꦸ ꦚꦴꦟꦁꦮ. ꦤꦶꦱ꧀ꦱꦺꦱꦁ ꦮꦶꦢ꧀ꦣꦁꦱꦤꦱꦩꦠ꧀ꦡꦠꦴꦪ ꦮꦗꦶꦫꦁ ꦈꦥꦩꦴ ꦌꦠꦺꦱꦤ꧀ꦠꦶ ꦮꦗꦶꦫꦹꦥꦩꦴ, ꦄꦫꦲꦠ꧀ꦠꦩꦒ꧀ꦒꦺ ꦚꦴꦟꦁ. ꦪꦡꦴ ꦲꦶ ꦩꦺꦓꦤ꧀ꦣꦏꦴꦫꦺ ꦩꦒ꧀ꦒꦥꦛꦶꦥꦤ꧀ꦤꦱ꧀ꦱ ꦥꦛꦶꦕ꧀ꦖꦴꦢꦤꦄꦤ꧀ꦣꦏꦴꦫꦁ ꦮꦶꦣꦩꦶꦠ꧀ꦮꦴ ꦮꦶꦗ꧀ꦗꦸꦪꦴ ꦈꦥ꧀ꦥꦤ꧀ꦤꦏ꧀ꦑꦟꦺ ꦕꦴꦠꦸꦢꦶꦱꦴ ꦩꦒ꧀ꦒꦴ ꦥꦴꦏꦛꦴ ꦲꦺꦴꦤ꧀ꦠꦶ, ꦮꦶꦗ꧀ꦗꦸꦪꦴ ꦤꦶꦫꦸꦢ꧀ꦣꦴꦪ ꦥꦸꦤ ꦄꦤ꧀ꦣꦏꦴꦫꦺꦴ ꦎꦠ꧀ꦡꦫꦶꦠ꧀ꦮꦴ ꦩꦒ꧀ꦒꦁ ꦥꦛꦶꦕ꧀ꦖꦴꦢꦺꦠꦶ, ꦌꦮꦁ ꦮꦶꦥꦱ꧀ꦱꦤꦴꦪꦴꦤꦶꦏꦱ꧀ꦱ ꦪꦡꦴꦱꦏꦁ ꦱꦕ꧀ꦕꦕ꧀ꦖꦴꦢꦏꦏꦶꦭꦺꦱꦤ꧀ꦣꦏꦴꦫꦁ ꦮꦶꦣꦩꦶꦠ꧀ꦮꦴ ꦠꦷꦱꦸ ꦩꦒ꧀ꦒꦺꦱꦸ ꦪꦡꦴꦏ꧀ꦏꦩꦁ ꦈꦥ꧀ꦥꦤ꧀ꦤꦺꦱꦸ ꦕꦠ꧀ꦠꦴꦫꦶ ꦱꦕ꧀ꦕꦴꦤꦶ ꦥꦴꦏꦛꦴꦤꦶ ꦲꦺꦴꦤ꧀ꦠꦶ, ꦠꦺꦱꦸ ꦤꦶꦫꦸꦢ꧀ꦣꦺꦱꦸ ꦥꦸꦤ ꦄꦮꦱꦶꦛ꧀ꦜꦏꦶꦭꦺꦱꦤ꧀ꦣꦏꦴꦫꦺꦴ ꦕꦠꦸꦱꦕ꧀ꦕꦁ ꦥꦛꦶꦕ꧀ꦖꦴꦢꦺꦠꦶ, ꦠꦱ꧀ꦩꦴ ꦠꦷꦱꦸ ꦩꦒ꧀ꦒꦺꦱꦸ ꦥꦚ꧀ꦚꦴ ꦮꦶꦗ꧀ꦗꦹꦥꦩꦴ ꦮꦸꦠ꧀ꦠꦴ. ꦪꦡꦴ ꦥꦤ ꦮꦗꦶꦫꦱ꧀ꦱ ꦄꦨꦺꦗ꧀ꦗꦺꦴ ꦥꦴꦱꦴꦟꦺꦴ ꦤꦴꦩ ꦤꦠ꧀ꦡꦶ, ꦠꦚ꧀ꦕ ꦤꦶꦱ꧀ꦱꦺꦱꦠꦺꦴ ꦮꦗꦶꦫꦁ ꦑꦺꦥꦺꦠꦶ, ꦮꦗꦶꦫꦺꦤ ꦕ ꦒꦠꦩꦒ꧀ꦒꦺ ꦥꦴꦱꦴꦟꦱ꧀ꦱ ꦥꦸꦤ ꦥꦴꦏꦠꦶꦏꦨꦴꦮꦺꦴ ꦤꦠ꧀ꦡꦶ, ꦌꦮꦁ ꦄꦫꦲꦠ꧀ꦠꦩꦒ꧀ꦒꦚꦴꦟꦱ꧀ꦱ ꦄꦮꦗ꧀ꦙꦏꦶꦭꦺꦱꦺꦴ ꦤꦴꦩ ꦤꦠ꧀ꦡꦶ, ꦠꦚ꧀ꦕ ꦤꦶꦱ꧀ꦱꦺꦱꦠꦺꦴ ꦄꦫꦲꦠ꧀ꦠꦩꦒ꧀ꦒꦚꦴꦟꦁ ꦑꦺꦥꦺꦠꦶ, ꦠꦺꦤ ꦕ ꦑꦺꦥꦶꦠꦺ ꦏꦶꦭꦺꦱꦺ ꦄꦮꦱꦶꦛ꧀ꦜꦏꦶꦭꦺꦱꦴꦨꦴꦮꦠꦺꦴ ꦠꦱ꧀ꦱ ꦥꦸꦤ ꦥꦕ꧀ꦕꦸꦢꦴꦮꦠ꧀ꦠꦤꦁ ꦤꦴꦩ ꦤꦠ꧀ꦡꦶ, ꦠꦱ꧀ꦩꦴ ꦕꦠꦸꦠ꧀ꦡꦩꦒ꧀ꦒꦺ ꦥꦚ꧀ꦚꦴ ꦮꦗꦶꦫꦹꦥꦩꦴ ꦮꦸꦠ꧀ꦠꦴ. ꦥꦚ꧀ꦚꦴ ꦌꦮ ꦲꦺꦠ꧀ꦡ ꦱꦶꦪꦴ ꦮꦶꦗ꧀ꦗꦹꦥꦩꦴ, ꦱꦶꦪꦴ ꦤ ꦮꦠ꧀ꦠꦧ꧀ꦧꦴ ꦕ ꦲꦺꦴꦠꦶ. ꦱꦺꦱꦕꦺꦠꦱꦶꦏꦕꦶꦠ꧀ꦠꦫꦹꦥꦤꦶꦧ꧀ꦧꦴꦤꦴꦤꦶ ꦥꦤ ꦱꦧ꧀ꦧꦴꦤꦶ ꦤ ꦮꦠ꧀ꦠꦧ꧀ꦧꦴꦤꦺꦮ. ꦢꦸꦠꦶꦪꦁ.

ꦧꦴꦭꦺꦱꦸ ꦜꦶꦠꦠ꧀ꦠꦴ, ꦪꦠ꧀ꦡ ꦜꦶꦠꦴ ꦠꦢꦸꦥꦕꦴꦫꦺꦤ ꦧꦴꦭꦴ, ꦧꦴꦭꦏꦫꦠ꧀ꦠꦴ ꦮꦴ ꦧꦴꦭꦴ, ꦢ꧀ꦮꦴꦢꦱꦴꦏꦸꦱꦭꦕꦶꦠ꧀ꦠꦴꦤꦶ. ꦆꦣ ꦥꦤ ꦄꦲꦶꦫꦶꦏꦚ꧀ꦕ ꦄꦤꦺꦴꦠ꧀ꦠꦥ꧀ꦥꦚ꧀ꦕ ꦧꦴꦭꦴ ꦤꦴꦩ. ꦥꦟ꧀ꦝꦶꦠꦺꦱꦸ ꦜꦶꦠꦠ꧀ꦠꦴ ꦥꦟ꧀ꦝꦶꦠꦴ, ꦥꦟ꧀ꦝꦶꦠꦏꦫꦠ꧀ꦠꦴ ꦮꦴ ꦥꦟ꧀ꦝꦶꦠꦴ, ꦌꦏꦮꦷꦱꦠꦶ ꦏꦸꦱꦭꦕꦶꦠ꧀ꦠꦴꦤꦶ. ꦆꦣ ꦥꦤ ꦲꦶꦫꦷ ꦕ ꦎꦠ꧀ꦠꦥ꧀ꦥꦚ꧀ꦕ ꦥꦟ꧀ꦝꦶꦠꦴ ꦤꦴꦩ. ꦱꦺꦱꦕꦶꦠ꧀ꦠꦫꦹꦥꦤꦶꦧ꧀ꦧꦴꦤꦴꦤꦶ ꦤ ꦮꦠ꧀ꦠꦧ꧀ꦧꦴꦤꦶ. ꦱꦺꦱꦁ ꦱꦸꦮꦶꦚ꧀ꦚꦺꦪ꧀ꦪꦩꦺꦮ. ꦠꦠꦶꦪꦁ.

ꦏꦟ꧀ꦲꦴꦠꦶ ꦏꦴꦭ꦳ꦏꦴ, ꦕꦶꦠ꧀ꦠꦱ꧀ꦱ ꦄꦥꦨꦱ꧀ꦱꦫꦨꦴꦮꦏꦫꦟꦴ. ꦱꦸꦏ꧀ꦏꦴꦠꦶ ꦎꦢꦴꦠꦴ, ꦥꦨꦱ꧀ꦱꦫꦨꦴꦮꦏꦫꦟꦴ. ꦱꦺꦱꦁ ꦱꦧ꧀ꦧꦁ ꦧꦴꦭꦢꦸꦏꦱꦢꦶꦱꦩꦺꦮ. ꦕꦠꦸꦠ꧀ꦡꦁ.

ꦆꦣ ꦕꦺꦮ ꦱꦩ꧀ꦥꦫꦴꦪꦺ ꦕ ꦠꦥꦺꦤ꧀ꦠꦷꦠꦶ ꦠꦥꦤꦷꦪꦴ. ꦤ ꦠꦥꦤꦷꦪꦴ ꦄꦠꦥꦤꦷꦪꦴ. ꦱꦺꦱꦁ ꦧꦴꦭꦢꦸꦏꦱꦢꦶꦱꦩꦺꦮ. ꦥꦚ꧀ꦕꦩꦁ.

‘‘ꦱꦶꦫꦶꦮꦝ꧀ꦞꦏꦺꦴ ꦣꦤꦮꦝ꧀ꦞꦏꦺꦴ’’ꦠꦶꦄꦴꦢꦪꦺꦴ ꦮꦶꦪ ꦮꦕꦤꦩꦠ꧀ꦠꦩꦺꦮ ꦄꦣꦶꦏꦴꦫꦁ ꦏꦠ꧀ꦮꦴ ꦥꦮꦠ꧀ꦠꦴ ꦄꦣꦶꦮꦕꦤꦴ ꦤꦴꦩ. ꦤꦴꦩꦣꦺꦪ꧀ꦪꦤ꧀ꦠꦶ ꦠꦺꦱꦁ ꦠꦺꦱꦁ ꦣꦩ꧀ꦩꦴꦤꦁ ꦤꦴꦩꦴꦤꦶ. ꦠꦴꦤꦶ ꦕꦠꦸꦧ꧀ꦧꦶꦣꦴꦤꦶ ꦱꦴꦩꦚ꧀ꦚꦤꦴꦩꦁ ꦒꦸꦟꦤꦴꦩꦁ ꦏꦶꦠ꧀ꦠꦶꦩꦤꦴꦩꦁ ꦎꦥꦥꦴꦠꦶꦏꦤꦴꦩꦤ꧀ꦠꦶ. ꦠꦠ꧀ꦡ ꦥꦜꦩꦏꦥ꧀ꦥꦶꦏꦺꦱꦸ ꦩꦲꦴꦗꦤꦺꦤ ꦱꦩ꧀ꦩꦤ꧀ꦤꦶꦠ꧀ꦮꦴ ꦜꦥꦶꦠꦠ꧀ꦠꦴ ‘‘ꦩꦲꦴꦱꦩ꧀ꦩꦠꦺꦴ’’ꦠꦶ ꦫꦚ꧀ꦚꦺꦴ ꦤꦴꦩꦤ꧀ꦠꦶ ꦌꦮꦫꦹꦥꦁ ꦱꦴꦩꦚ꧀ꦚꦤꦴꦩꦁ ꦤꦴꦩ. ‘‘ꦣꦩ꧀ꦩꦏꦡꦶꦏꦺꦴ ꦥꦁꦱꦸꦏꦹꦭꦶꦏꦺꦴ ꦏꦴꦭ꦳ꦺꦴ ꦫꦱ꧀ꦱꦺꦴ’’ꦠꦶ ꦌꦮꦫꦹꦥꦁ ꦒꦸꦟꦠꦺꦴ ꦄꦴꦒꦠꦁ, ‘‘ꦨꦒꦮꦴ ꦄꦫꦲꦁ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ’’ꦠꦶꦄꦴꦢꦷꦤꦶꦥꦶ ꦠꦡꦴꦒꦠꦱ꧀ꦱ ꦄꦤꦺꦏꦴꦤꦶ ꦤꦴꦩꦱꦠꦴꦤꦶ ꦒꦸꦟꦤꦴꦩꦁ ꦤꦴꦩ. ꦪꦁ ꦥꦤ ꦗꦴꦠꦱ꧀ꦱ ꦏꦸꦩꦴꦫꦱ꧀ꦱ ꦚꦴꦠꦏꦴ ꦏꦥ꧀ꦥꦺꦠ꧀ꦮꦴ ꦥꦏꦥ꧀ꦥꦺꦠ꧀ꦮꦴ ‘‘ꦄꦪꦁ ꦄꦱꦸꦏꦺꦴ ꦤꦴꦩꦴ’’ꦠꦶ ꦤꦴꦩꦁ ꦏꦫꦺꦴꦤ꧀ꦠꦶ, ꦆꦢꦁ ꦏꦶꦠ꧀ꦠꦶꦩꦤꦴꦩꦁ ꦤꦴꦩ. ꦪꦴ ꦥꦤ ꦥꦸꦫꦶꦩꦥꦚ꧀ꦚꦠ꧀ꦠꦶ ꦄꦥꦫꦥꦚ꧀ꦚꦠ꧀ꦠꦶꦪꦁ ꦤꦶꦥꦠꦠꦶ, ꦱꦺꦪ꧀ꦪꦡꦶꦢꦁ – ꦥꦸꦫꦶꦩꦏꦥ꧀ꦥꦺꦥꦶ ꦕꦤ꧀ꦢꦺꦴ ꦕꦤ꧀ꦢꦺꦴ ꦌꦮ, ꦌꦠꦫꦲꦶꦥꦶ ꦄꦤꦴꦒꦠꦺꦥꦶ ꦕꦤ꧀ꦢꦺꦴ ꦌꦮ. ꦠꦡꦴ ‘‘ꦱꦹꦫꦶꦪꦺꦴ ꦱꦩꦸꦢ꧀ꦢꦺꦴ ꦥꦡꦮꦷ ꦫꦹꦥꦁ ꦮꦺꦢꦤꦴ ꦱꦚ꧀ꦚꦴ ꦱꦔ꧀ꦑꦴꦫꦴ ꦮꦶꦚ꧀ꦚꦴꦟꦁ ꦤꦶꦧ꧀ꦧꦴꦤ’’ꦤ꧀ꦠꦶꦌꦮꦩꦴꦢꦶ ꦎꦥꦥꦴꦠꦶꦏꦤꦴꦩꦁ ꦤꦴꦩ. ꦠꦴꦤꦶ ꦥꦸꦤ ꦮꦶꦗ꧀ꦗꦩꦴꦤꦥꦚ꧀ꦚꦠ꧀ꦠꦶ ꦄꦮꦶꦗ꧀ꦗꦩꦴꦤꦥꦚ꧀ꦚꦠ꧀ꦠꦶ ꦮꦶꦗ꧀ꦗꦩꦴꦤꦺꦤꦄꦮꦶꦗ꧀ꦗꦩꦴꦤꦥꦚ꧀ꦚꦠ꧀ꦠꦶ ꦄꦮꦶꦗ꧀ꦗꦩꦴꦤꦺꦤꦮꦶꦗ꧀ꦗꦩꦴꦤꦥꦚ꧀ꦚꦠ꧀ꦠꦶ ꦮꦶꦗ꧀ꦗꦩꦴꦤꦺꦤꦮꦶꦗ꧀ꦗꦩꦴꦤꦥꦚ꧀ꦚꦠ꧀ꦠꦶ ꦄꦮꦶꦗ꧀ꦗꦩꦴꦤꦺꦤꦄꦮꦶꦗ꧀ꦗꦩꦴꦤꦥꦚ꧀ꦚꦠ꧀ꦠꦷꦠꦶ ꦌꦮꦁ ꦤꦴꦩꦥꦚ꧀ꦚꦠ꧀ꦠꦶꦮꦱꦺꦤ ꦖꦧ꧀ꦧꦶꦣꦴꦤꦶ ꦲꦺꦴꦤ꧀ꦠꦶ.

ꦠꦠ꧀ꦡ ꦥꦫꦩꦠ꧀ꦡꦠꦺꦴ ꦈꦥꦭꦧ꧀ꦨꦩꦴꦤꦴ ꦪꦡꦴꦮꦸꦠ꧀ꦠꦢ꧀ꦮꦴꦱꦠ꧀ꦠꦠꦶꦮꦶꦣꦴ ꦤꦴꦩꦫꦹꦥꦣꦩ꧀ꦩꦴ ꦮꦶꦗ꧀ꦗꦩꦴꦤꦴ ꦤꦴꦩ, ꦠꦺꦱꦁ ꦥꦏꦴꦫꦺꦲꦶ ꦚꦴꦥꦤꦠꦺꦴ ꦥꦚ꧀ꦚꦠ꧀ꦠꦶ ꦮꦶꦗ꧀ꦗꦩꦴꦤꦥꦚ꧀ꦚꦠ꧀ꦠꦶ ꦤꦴꦩ, ‘‘ꦕꦶꦠ꧀ꦠꦁ ꦦꦱ꧀ꦱꦺꦴ ꦥꦡꦮꦷ ꦫꦹꦥꦁ ꦤꦶꦧ꧀ꦧꦴꦤ’’ꦤ꧀ꦠꦶꦄꦴꦢꦪꦺꦴ ꦥꦫꦩꦠ꧀ꦡꦮꦴꦕꦏꦴ ꦱꦢ꧀ꦢꦴ. ꦈꦥꦴꦢꦶꦤ꧀ꦤꦤꦴꦩꦫꦹꦥꦣꦩ꧀ꦩꦺ ꦥꦤ ꦈꦥꦴꦢꦴꦪ ꦥꦚ꧀ꦚꦠ꧀ꦠꦴ ꦱꦠ꧀ꦠꦥꦸꦒ꧀ꦒꦭꦆꦠ꧀ꦡꦶꦥꦸꦫꦶꦱꦢꦺꦮꦩꦤꦸꦱ꧀ꦱꦠꦶꦫꦕ꧀ꦖꦴꦤꦴꦢꦶꦨꦺꦢꦴ, ꦄꦤꦸꦥꦴꦢꦶꦤ꧀ꦤꦫꦹꦥꦣꦩ꧀ꦩꦺ ꦈꦥꦴꦢꦴꦪ ꦥꦚ꧀ꦚꦠ꧀ꦠꦴ ꦨꦹꦩꦶꦥꦧ꧀ꦧꦠꦫꦸꦏ꧀ꦑꦱꦏꦛꦕꦤ꧀ꦢꦱꦹꦫꦶꦪꦤꦏ꧀ꦑꦠ꧀ꦠꦢꦶꦱꦴꦏꦴꦭꦏꦱꦶꦟꦴꦢꦶꦨꦺꦢꦴ ꦕ ꦥꦫꦩꦠ꧀ꦡꦠꦺꦴ ꦄꦤꦸꦥꦭꦧ꧀ꦨꦩꦴꦤꦴ ꦄꦮꦶꦗ꧀ꦗꦩꦴꦤꦴ ꦤꦴꦩ, ꦠꦺꦱꦁ ꦥꦚ꧀ꦚꦠ꧀ꦠꦶ ꦄꦮꦶꦗ꧀ꦗꦩꦴꦤꦥꦚ꧀ꦚꦠ꧀ꦠꦶ ꦤꦴꦩ. ꦠꦡꦴ ‘‘ꦄꦠ꧀ꦠꦴ ꦨꦹꦩꦷ’’ꦠꦶꦄꦴꦢꦪꦺꦴ ꦄꦠ꧀ꦡꦥꦚ꧀ꦚꦠ꧀ꦠꦶꦮꦴꦕꦏꦴ ꦱꦢ꧀ꦢꦴ ꦕ ꦕꦶꦠ꧀ꦠꦱꦤ꧀ꦠꦠꦶꦮꦟ꧀ꦟꦸꦥꦒꦤ꧀ꦠꦶꦄꦴꦢꦶ ꦮꦶꦗ꧀ꦗꦩꦴꦤꦠ꧀ꦡꦮꦴꦕꦏꦴ ꦱꦢ꧀ꦢꦴ ꦮꦶꦗ꧀ꦗꦩꦴꦤꦺꦤꦄꦮꦶꦗ꧀ꦗꦩꦴꦤꦥꦚ꧀ꦚꦠ꧀ꦠꦶ ꦤꦴꦩ. ‘‘ꦥꦸꦫꦶꦱꦱ꧀ꦱ ꦕꦶꦠ꧀ꦠꦁ, ꦩꦺꦓꦮꦟ꧀ꦟꦺꦴ’’ꦠꦶꦄꦴꦢꦷꦱꦸ ꦄꦮꦶꦗ꧀ꦗꦩꦴꦤꦺꦤꦮꦶꦗ꧀ꦗꦩꦴꦤꦥꦚ꧀ꦚꦠ꧀ꦠꦶ ꦤꦴꦩ. ‘‘ꦕꦶꦠ꧀ꦠꦭꦲꦸꦠꦴ ꦥꦡꦮꦷꦒꦤ꧀ꦣꦺꦴ’’ꦠꦶꦄꦴꦢꦶ ꦮꦶꦗ꧀ꦗꦩꦴꦤꦺꦤꦮꦶꦗ꧀ꦗꦩꦴꦤꦥꦚ꧀ꦚꦠ꧀ꦠꦶ ꦤꦴꦩ. ‘‘ꦩꦤꦸꦱ꧀ꦱꦱꦫꦷꦫꦁ ꦫꦸꦏ꧀ꦑꦱꦴꦑꦴ’’ꦠꦶꦄꦴꦢꦶ ꦄꦮꦶꦗ꧀ꦗꦩꦴꦤꦺꦤꦄꦮꦶꦗ꧀ꦗꦩꦴꦤꦥꦚ꧀ꦚꦠ꧀ꦠꦶ ꦤꦴꦩ. ꦌꦮꦁ ꦖꦧ꧀ꦧꦶꦣꦴꦥꦶ ꦕꦺꦠꦴ ꦄꦣꦶꦥ꧀ꦥꦴꦪꦁ ꦮꦶꦚ꧀ꦚꦴꦥꦺꦠꦸꦏꦴꦩꦠꦴꦕꦶꦠ꧀ꦠꦱꦩꦸꦛ꧀ꦜꦴꦥꦶꦠꦱꦮꦶꦚ꧀ꦚꦠ꧀ꦠꦶꦱꦢ꧀ꦢꦴꦤꦸꦱꦴꦫꦺꦤ ꦚꦴꦠꦱꦔ꧀ꦏꦺꦠꦱ꧀ꦱ ꦱꦺꦴꦠꦮꦶꦚ꧀ꦚꦴꦟꦮꦷꦡꦶꦄꦤꦤ꧀ꦠꦫꦁ ꦈꦥ꧀ꦥꦤ꧀ꦤꦺꦲꦶ ꦩꦤꦺꦴꦢ꧀ꦮꦴꦫꦶꦏꦮꦶꦚ꧀ꦚꦴꦟꦺꦲꦶ ‘‘ꦆꦩꦱ꧀ꦱꦺꦢꦁ ꦤꦴꦩ’’ꦤ꧀ꦠꦶ ꦄꦤꦺꦏꦱꦢ꧀ꦢꦺꦱꦸ ꦌꦏꦠ꧀ꦠꦩꦴꦫꦺꦴꦥꦺꦠ꧀ꦮꦴ ꦮꦮꦠ꧀ꦡꦴꦥꦶꦠꦴ ꦄꦠ꧀ꦡꦴꦨꦶꦩꦸꦑꦁ ꦤꦩꦤꦠꦺꦴ ꦥꦏꦴꦫꦺꦲꦶ ꦄꦠ꧀ꦡꦱ꧀ꦱ ꦚꦴꦥꦤꦠꦺꦴ ‘‘ꦤꦴꦩꦥꦚ꧀ꦚꦠ꧀ꦠꦷ’’ꦠꦶ ꦮꦸꦕ꧀ꦕꦤ꧀ꦠꦶ, ꦠꦺꦱꦁ ꦄꦣꦶꦮꦕꦤꦴꦤꦁ ꦥꦡꦴ ꦄꦠ꧀ꦡꦴ ꦄꦣꦶꦮꦕꦤꦥꦡꦴ, ꦱꦩ꧀ꦩꦸꦠꦶꦥꦫꦩꦠ꧀ꦡꦨꦺꦢꦴ ꦱꦧ꧀ꦧꦺ ꦣꦩ꧀ꦩꦴ ꦱꦢ꧀ꦢꦮꦕꦤꦷꦪꦱꦨꦴꦮꦴ. ꦖꦛ꧀ꦜꦁ.

ꦆꦠꦺꦴ ꦥꦫꦁ ꦢ꧀ꦮꦺ ꦢꦸꦏꦴ ꦄꦣꦶꦮꦕꦤꦢꦸꦏꦱꦢꦶꦱꦴꦮ, ꦏꦺꦮꦭꦁ ꦥꦢꦠ꧀ꦡꦩꦠ꧀ꦠꦩꦺꦮ ꦮꦶꦱꦺꦱꦺꦴ. ꦠꦠ꧀ꦡ ꦄꦨꦶꦱꦔ꧀ꦑꦫꦺꦴꦤ꧀ꦠꦷꦠꦶ ꦱꦔ꧀ꦑꦴꦫꦴꦠꦶ ꦌꦮꦁ ꦤꦶꦢ꧀ꦣꦴꦫꦺꦠ꧀ꦮꦴ ꦱꦲꦺꦠꦸꦏꦁ ꦏꦠ꧀ꦮꦴ ꦮꦸꦕ꧀ꦕꦩꦴꦤꦴ ꦤꦶꦫꦸꦠ꧀ꦠꦶ ꦤꦴꦩ, ‘‘ꦠꦏ꧀ꦏꦺꦴ ꦮꦶꦠꦏ꧀ꦏꦺꦴ ꦱꦔ꧀ꦏꦥ꧀ꦥꦺꦴ’’ꦠꦶ ꦌꦮꦁ ꦠꦺꦤ ꦠꦺꦤ ꦥꦏꦴꦫꦺꦤ ꦚꦴꦥꦤꦠꦺꦴ ꦥꦚ꧀ꦚꦠ꧀ꦠꦶ ꦤꦴꦩ, ꦪꦡꦴꦮꦸꦠ꧀ꦠꦤꦴꦩꦥꦚ꧀ꦚꦠ꧀ꦠꦶꦪꦺꦴꦮ. ꦤ ꦲꦶ ꦄꦣꦶꦮꦕꦤꦤꦶꦫꦸꦠ꧀ꦠꦶꦥꦚ꧀ꦚꦠ꧀ꦠꦷꦱꦸ ꦄꦠ꧀ꦡꦠꦺꦴ ꦏꦺꦴꦕꦶꦥꦶ ꦨꦺꦢꦺꦴ ꦄꦠ꧀ꦡꦶ, ꦤꦶꦧ꧀ꦧꦠ꧀ꦠꦶꦤꦶꦩꦶꦠ꧀ꦠꦨꦺꦢꦢꦱ꧀ꦱꦤꦠ꧀ꦡꦁ ꦥꦤ ꦤꦺꦱꦁ ꦮꦶꦨꦴꦒꦺꦤ ꦥꦢꦠ꧀ꦡꦺꦴ ꦢꦱ꧀ꦱꦶꦠꦺꦴ. ꦆꦩꦺꦱꦸ ꦕ ꦠꦷꦱꦸ ꦢꦸꦏꦺꦱꦸ ꦥꦚ꧀ꦚꦠ꧀ꦠꦶꦱꦲꦶꦠꦴ ꦱꦧ꧀ꦧꦺ ꦣꦩ꧀ꦩꦴ ꦭꦧ꧀ꦨꦤ꧀ꦠꦶ, ꦄꦤꦤ꧀ꦠꦫꦺ ꦤꦴꦩꦫꦹꦥꦢꦸꦏꦺ ꦥꦚ꧀ꦚꦠ꧀ꦠꦶꦫꦲꦶꦠꦴꦠꦶ ꦆꦩꦺ ꦕꦠ꧀ꦠꦴꦫꦺꦴ ꦢꦸꦏꦴ ꦆꦩꦺꦱꦸ ꦱꦸꦠ꧀ꦠꦤ꧀ꦠꦶꦏꦢꦸꦏꦺꦱꦸ ꦤꦶꦥ꧀ꦥꦢꦺꦱꦴ, ꦱꦺꦱꦴ ꦥꦤ ꦄꦛ꧀ꦜꦠꦶꦁꦱꦴꦥꦶ ꦱꦥ꧀ꦥꦢꦺꦱꦴꦠꦶ ꦮꦺꦢꦶꦠꦧ꧀ꦧꦴ. ꦱꦠ꧀ꦠꦩꦛ꧀ꦜꦩꦴꦤꦶ.

ꦤꦴꦩꦏꦫꦟꦛ꧀ꦜꦺꦤ, ꦤꦩꦤꦛ꧀ꦜꦺꦤ, ꦤꦴꦩꦤꦛ꧀ꦜꦺꦤ ꦕ ꦤꦴꦩꦁ, ꦄꦫꦹꦥꦏ꧀ꦑꦤ꧀ꦣꦤꦶꦧ꧀ꦧꦴꦤꦴꦤꦶ. ꦠꦴꦤꦶ ꦲꦶ ꦱꦧ꧀ꦧꦢꦴꦥꦶ ꦮꦺꦢꦤꦴ ꦱꦚ꧀ꦚꦴ ꦱꦔ꧀ꦑꦴꦫꦴ ꦮꦶꦚ꧀ꦚꦴꦟꦁ ꦤꦶꦧ꧀ꦧꦴꦤꦤ꧀ꦠꦶ ꦎꦥꦥꦴꦠꦶꦏꦤꦴꦩꦮꦱꦺꦤ ꦄꦠ꧀ꦠꦤꦺꦴ ꦤꦴꦩꦁ ꦏꦫꦺꦴꦤ꧀ꦠꦴꦮ ꦥꦮꦠ꧀ꦠꦤ꧀ꦠꦶ ꦕꦤ꧀ꦢꦱꦹꦫꦶꦪꦴꦢꦪꦺꦴ ꦮꦶꦪ. ꦤ ꦲꦶ ꦠꦺꦱꦁ ꦱꦴꦩꦚ꧀ꦚꦒꦸꦟꦏꦶꦠ꧀ꦠꦶꦩꦮꦱꦺꦤ ꦤꦴꦩꦏꦫꦟꦏꦶꦕ꧀ꦕꦁ ꦄꦠ꧀ꦡꦷꦠꦶ. ꦌꦮꦁ ꦤꦴꦩꦏꦫꦟꦛ꧀ꦜꦺꦤ ꦤꦴꦩꦁ ꦮꦺꦢꦶꦠꦧ꧀ꦧꦁ. ꦄꦴꦫꦩ꧀ꦩꦟꦴꦨꦶꦩꦸꦑꦁ ꦥꦤ ꦤꦩꦤꦛ꧀ꦜꦺꦤ, ꦄꦚ꧀ꦚꦩꦚ꧀ꦚꦁ ꦠꦠ꧀ꦡ ꦤꦴꦩꦤꦛ꧀ꦜꦺꦤ ꦕ ꦕꦠ꧀ꦠꦴꦫꦺꦴ ꦄꦫꦹꦥꦏ꧀ꦑꦤ꧀ꦣꦴꦮ ꦤꦴꦩꦁ. ꦤꦶꦧ꧀ꦧꦴꦤꦁ ꦥꦤ ꦄꦴꦫꦩ꧀ꦩꦟꦴꦣꦶꦥꦠꦶꦥꦕ꧀ꦕꦪꦠꦴꦪ ꦄꦠ꧀ꦠꦤꦶ ꦄꦤꦮꦗ꧀ꦗꦣꦩ꧀ꦩꦴꦤꦁ ꦤꦴꦩꦤꦛ꧀ꦜꦺꦤꦺꦮ ꦤꦴꦩꦁ ꦮꦺꦢꦶꦠꦧ꧀ꦧꦁ. ꦫꦸꦥ꧀ꦥꦤꦛ꧀ꦜꦺꦤ ꦫꦹꦥꦁ, ꦫꦹꦥꦏ꧀ꦑꦤ꧀ꦣꦺꦴ. ꦤꦮꦩꦁ.

ꦄꦮꦶꦗ꧀ꦗꦴꦠꦶ ꦢꦸꦏ꧀ꦑꦴꦢꦶꦥꦛꦶꦕ꧀ꦖꦴꦢꦏꦺꦴ ꦱꦧ꧀ꦧꦺꦴ ꦩꦺꦴꦲꦺꦴ. ꦨꦮꦠꦟ꧀ꦲꦴꦠꦶ ꦨꦮꦥꦠ꧀ꦡꦤꦴꦮꦱꦺꦤ ꦥꦮꦠ꧀ꦠꦺꦴ ꦭꦺꦴꦨꦺꦴ. ꦠꦡꦴ ꦄꦥ꧀ꦥꦮꦠ꧀ꦠꦺꦴ ꦥꦤꦺꦠ꧀ꦡ ꦭꦺꦴꦨꦺꦴ, ꦱꦺꦱꦕꦺꦠꦱꦶꦏꦕꦶꦠ꧀ꦠꦫꦹꦥꦤꦶꦧ꧀ꦧꦴꦤꦴꦤꦶ ꦕ ꦤ ꦮꦠ꧀ꦠꦧ꧀ꦧꦴꦤꦶ. ꦆꦠꦺꦴ ꦥꦫꦁ ꦥꦤ ꦌꦮꦁ ꦤꦮꦠ꧀ꦠꦧ꧀ꦧꦮꦶꦨꦴꦒꦁ ꦄꦢꦱ꧀ꦱꦺꦠ꧀ꦮꦴ ꦥꦢꦠ꧀ꦡꦱꦫꦹꦥꦩꦠ꧀ꦠꦩꦺꦮ ꦢꦱ꧀ꦱꦪꦶꦱ꧀ꦱꦴꦩ, ꦢꦱ꧀ꦱꦶꦠꦴꦮꦱꦺꦱꦴ ꦤ ꦮꦠ꧀ꦠꦧ꧀ꦧꦴꦠꦶ ꦒꦲꦺꦠꦧ꧀ꦧꦴ. ꦢꦱꦩꦁ.

ꦨꦮꦺꦴ ꦮꦸꦕ꧀ꦕꦠꦶ ꦱꦱ꧀ꦱꦠꦁ. ‘‘ꦨꦮꦶꦱ꧀ꦱꦠꦶ ꦄꦠ꧀ꦠꦴ ꦕ ꦭꦺꦴꦏꦺꦴ ꦕꦴ’’ꦠꦶ ꦱꦱ꧀ꦱꦠꦮꦱꦺꦤ ꦈꦥ꧀ꦥꦗ꧀ꦗꦤꦏꦢꦶꦛ꧀ꦜꦶ ꦨꦮꦢꦶꦛ꧀ꦜꦶ ꦤꦴꦩ. ꦮꦶꦨꦮꦺꦴ ꦮꦸꦕ꧀ꦕꦠꦶ ꦈꦕ꧀ꦖꦺꦢꦺꦴ. ‘‘ꦤ ꦨꦮꦶꦱ꧀ꦱꦠꦶ ꦄꦠ꧀ꦠꦴ ꦕ ꦭꦺꦴꦏꦺꦴ ꦕꦴ’’ꦠꦶ ꦈꦕ꧀ꦖꦺꦢꦮꦱꦺꦤ ꦈꦥ꧀ꦥꦗ꧀ꦗꦤꦏꦢꦶꦛ꧀ꦜꦶ ꦮꦶꦨꦮꦢꦶꦛ꧀ꦜꦶ ꦤꦴꦩ. ꦈꦨꦪꦺꦤꦴꦥꦶ ꦩꦶꦕ꧀ꦖꦴꦢꦶꦛ꧀ꦜꦶ ꦒꦲꦶꦠꦴ. ꦠꦡꦴ ꦄꦤꦤ꧀ꦠꦫꦺꦱꦸꦥꦶ ꦠꦷꦱꦸ ꦢꦸꦏꦺꦱꦸ. ꦌꦏꦴꦢꦱꦩꦁ.

ꦑꦤ꧀ꦣꦥꦚ꧀ꦕꦏꦁ ‘‘ꦄꦠ꧀ꦠꦴ ꦕ ꦭꦺꦴꦏꦺꦴ ꦕꦴ’’ꦠꦶ ꦒꦲꦺꦠ꧀ꦮꦴ ‘‘ꦱꦱ꧀ꦱꦠꦺꦴ ꦄꦠ꧀ꦠꦴ ꦕ ꦭꦺꦴꦏꦺꦴ ꦕꦴ’’ꦠꦶ ꦥꦮꦠ꧀ꦠꦴ ꦢꦶꦛ꧀ꦜꦶ ꦱꦱ꧀ꦱꦠꦢꦶꦛ꧀ꦜꦶ ꦤꦴꦩ. ꦠꦡꦴ ‘‘ꦈꦕ꧀ꦖꦶꦗ꧀ꦗꦶꦱ꧀ꦱꦠꦷ’’ꦠꦶ ꦥꦮꦠ꧀ꦠꦴ ꦢꦶꦛ꧀ꦜꦶ ꦈꦕ꧀ꦖꦺꦢꦢꦶꦛ꧀ꦜꦶ ꦤꦴꦩ. ‘‘ꦄꦤ꧀ꦠꦮꦴ’’ꦠꦶ ꦥꦮꦠ꧀ꦠꦴ ꦄꦤ꧀ꦠꦮꦴꦢꦶꦛ꧀ꦜꦶ ꦤꦴꦩ. ‘‘ꦄꦤꦤ꧀ꦠꦮꦴ’’ꦠꦶ ꦥꦮꦠ꧀ꦠꦴ ꦄꦤꦤ꧀ꦠꦮꦴꦢꦶꦛ꧀ꦜꦶ ꦤꦴꦩ. ꦥꦸꦧ꧀ꦧꦤ꧀ꦠꦁ ꦄꦤꦸꦒꦠꦴ ꦧ꧀ꦫꦲ꧀ꦩꦗꦴꦭꦺ ꦮꦸꦠ꧀ꦠꦤꦪꦺꦤ ꦄꦠꦷꦠꦏꦺꦴꦛ꧀ꦜꦴꦱꦁ ꦄꦴꦫꦩ꧀ꦩꦟꦁ ꦏꦠ꧀ꦮꦴ ꦥꦮꦠ꧀ꦠꦴ ꦄꦛ꧀ꦜꦴꦫꦱꦮꦶꦣꦴ ꦥꦸꦧ꧀ꦧꦤ꧀ꦠꦴꦤꦸꦢꦶꦛ꧀ꦜꦶ ꦤꦴꦩ. ꦄꦥꦫꦤ꧀ꦠꦁ ꦄꦤꦸꦒꦠꦴ ꦠꦠ꧀ꦡꦺꦮ ꦄꦴꦒꦠꦤꦪꦺꦤ ꦄꦤꦴꦒꦠꦏꦺꦴꦛ꧀ꦜꦴꦱꦁ ꦄꦴꦫꦩ꧀ꦩꦟꦁ ꦏꦠ꧀ꦮꦴ ꦥꦮꦠ꧀ꦠꦴ ꦕꦠꦸꦕꦠ꧀ꦠꦴꦭꦷꦱꦮꦶꦣꦴ ꦄꦥꦫꦤ꧀ꦠꦴꦤꦸꦢꦶꦛ꧀ꦜꦶ ꦤꦴꦩ. ꦄꦪꦩꦺꦠ꧀ꦡ ꦱꦔ꧀ꦑꦺꦥꦺꦴ, ꦮꦶꦠ꧀ꦡꦴꦫꦺꦴ ꦥꦤ ꦧ꧀ꦫꦲ꧀ꦩꦗꦴꦭꦺ (ꦢꦷ. ꦤꦶ. ꧑.꧒꧘), ꦠꦢꦛ꧀ꦜꦏꦡꦴꦪ (ꦢꦷ. ꦤꦶ. ꦄꦛ꧀ꦜ. ꧑.꧒꧘) ꦕ ꦮꦺꦢꦶꦠꦧ꧀ꦧꦺꦴ. ꦢ꧀ꦮꦴꦢꦱꦩꦠꦺꦫꦱꦩꦕꦸꦢ꧀ꦢꦱꦩꦴꦤꦶ.

ꦄꦲꦶꦫꦶꦏꦢꦸꦏꦁ, ꦲꦶꦫꦶꦢꦸꦏꦚ꧀ꦕ ꦱꦸꦮꦶꦚ꧀ꦚꦺꦪ꧀ꦪꦩꦺꦮ. ꦥꦚ꧀ꦕꦢꦱꦩꦱꦺꦴꦭ꦳ꦱꦩꦴꦤꦶ.

ꦢꦸꦏ꧀ꦑꦁ ꦮꦕꦺꦴ ꦌꦠꦱ꧀ꦩꦶꦁ ꦮꦶꦥ꧀ꦥꦛꦶꦏꦹꦭꦒꦴꦲꦶꦩ꧀ꦲꦶ ꦮꦶꦥꦕ꧀ꦕꦤꦷꦏꦱꦴꦠꦺ ꦄꦤꦴꦢꦫꦺ ꦥꦸꦒ꧀ꦒꦭꦺꦠꦶ ꦢꦸꦧ꧀ꦧꦕꦺꦴ, ꦱꦲꦣꦩ꧀ꦩꦶꦏꦁ ꦢꦱ꧀ꦱꦺꦠ꧀ꦮꦴ ꦎꦮꦢꦶꦪꦩꦴꦤꦺ ꦄꦤꦴꦢꦫꦏꦴꦫꦏꦺꦴ ꦥꦸꦒ꧀ꦒꦭꦺꦴ, ꦠꦱ꧀ꦱ ꦏꦩ꧀ꦩꦁ ꦢꦺꦴꦮꦕꦱ꧀ꦱꦁ, ꦠꦱ꧀ꦱ ꦨꦴꦮꦺꦴ ꦢꦺꦴꦮꦕꦱ꧀ꦱꦠꦴ, ꦄꦤꦴꦢꦫꦮꦱꦺꦤ ꦥꦮꦠ꧀ꦠꦴ ꦢ꧀ꦮꦺ ꦥꦛꦶꦓꦕꦶꦠ꧀ꦠꦴ, ꦠꦁꦱꦩ꧀ꦥꦪꦸꦠ꧀ꦠꦴ ꦕ. ꦥꦴꦥꦴ ꦄꦱ꧀ꦱꦢ꧀ꦣꦴꦢꦪꦺꦴ ꦥꦸꦒ꧀ꦒꦭꦴ ꦌꦠꦱ꧀ꦱ ꦩꦶꦠ꧀ꦠꦴꦠꦶ ꦥꦴꦥꦩꦶꦠ꧀ꦠꦺꦴ, ꦠꦱ꧀ꦱ ꦨꦴꦮꦺꦴ ꦥꦴꦥꦩꦶꦠ꧀ꦠꦠꦴ, ꦥꦴꦥꦥꦸꦒ꧀ꦒꦭꦺꦱꦸ ꦢꦭ꦳꧀ꦲꦨꦠ꧀ꦠꦶꦮꦱꦺꦤ, ꦏꦴꦪꦕꦶꦠ꧀ꦠꦺꦲꦶ ꦠꦁꦱꦺꦮꦤꦴꦠꦤ꧀ꦤꦶꦤ꧀ꦤꦠꦴꦮꦱꦺꦤ ꦕ ꦥꦮꦠ꧀ꦠꦴꦤꦶ ꦄꦛ꧀ꦜ ꦭꦺꦴꦨꦕꦶꦠ꧀ꦠꦴꦤꦶ. ꦱꦠ꧀ꦠꦫꦱꦩꦁ.

ꦱꦺꦴꦮꦕꦱ꧀ꦱꦠꦴ, ꦏꦭ꧀ꦪꦴꦟꦩꦶꦠ꧀ꦠꦠꦴ ꦕ ꦮꦸꦠ꧀ꦠꦥꦛꦶꦥꦏ꧀ꦑꦮꦱꦺꦤ ꦮꦺꦢꦶꦠꦧ꧀ꦧꦴ. ꦄꦠ꧀ꦡꦠꦺꦴ ꦥꦤ ꦠꦡꦴꦥꦮꦠ꧀ꦠꦴꦤꦶ ꦱꦲꦺꦠꦸꦏꦏꦴꦩꦴꦮꦕꦫꦏꦸꦱꦭꦏꦶꦫꦶꦪꦕꦶꦠ꧀ꦠꦴꦤꦶ. ꦄꦛ꧀ꦜꦴꦫꦱꦩꦁ.

ꦥꦚ꧀ꦕꦱꦸ, ꦱꦠ꧀ꦠꦱꦸ ꦮꦴ ꦄꦴꦥꦠ꧀ꦠꦷꦱꦸ ꦏꦸꦱꦭꦨꦴꦮꦺꦴ ꦄꦴꦥꦠ꧀ꦠꦶꦏꦸꦱꦭꦠꦴ, ꦱꦲ ꦮꦠ꧀ꦡꦸꦤꦴ ꦠꦴꦱꦁ ꦄꦴꦥꦠ꧀ꦠꦷꦤꦁ ꦄꦴꦥꦗ꧀ꦗꦤꦥꦫꦶꦕ꧀ꦖꦺꦢꦗꦴꦤꦤꦮꦱꦺꦤ ꦥꦮꦠ꧀ꦠꦴ ꦏꦴꦩꦴꦮꦕꦫꦗꦮꦤꦥꦚ꧀ꦚꦴ. ꦄꦴꦥꦠ꧀ꦠꦷꦲꦶ ꦮꦸꦛ꧀ꦜꦴꦤꦺ ꦏꦸꦱꦭꦨꦴꦮꦺꦴ ꦄꦴꦥꦠ꧀ꦠꦶꦮꦸꦛ꧀ꦜꦴꦤꦏꦸꦱꦭꦠꦴ, ꦮꦸꦛ꧀ꦜꦴꦤꦮꦶꦣꦴꦤꦺꦤ ꦱꦢ꧀ꦣꦶꦁ ꦄꦴꦥꦠ꧀ꦠꦶꦮꦸꦛ꧀ꦜꦴꦤꦥꦫꦶꦕ꧀ꦖꦺꦢꦗꦴꦤꦤꦮꦱꦺꦤ ꦥꦮꦠ꧀ꦠꦴ ꦪꦡꦴꦮꦸꦠ꧀ꦠꦕꦶꦠ꧀ꦠꦱꦩ꧀ꦥꦪꦸꦠ꧀ꦠꦥꦚ꧀ꦚꦴꦮ. ꦌꦏꦹꦤꦮꦷꦱꦠꦶꦩꦁ.

ꦱꦩꦴꦥꦗ꧀ꦗꦶꦠꦧ꧀ꦧꦠꦺꦴ ꦱꦩꦴꦥꦠ꧀ꦠꦶ, ꦠꦴꦱꦸ ꦭꦺꦴꦏꦶꦪꦭꦺꦴꦏꦸꦠ꧀ꦠꦫꦴꦱꦸ ꦱꦮꦶꦠꦏ꧀ꦏꦱꦮꦶꦕꦴꦫꦴꦢꦷꦱꦸ ꦱꦩꦴꦥꦠ꧀ꦠꦷꦱꦸ ꦏꦸꦱꦭꦠꦴ ꦱꦩꦴꦥꦠ꧀ꦠꦶꦏꦸꦱꦭꦠꦴ, ꦱꦲ ꦥꦫꦶꦏꦩ꧀ꦩꦺꦤ ꦄꦥ꧀ꦥꦤꦴꦥꦫꦶꦕ꧀ꦖꦺꦢꦗꦴꦤꦤꦮꦱꦺꦤ ꦥꦮꦠ꧀ꦠꦴ ꦥꦚ꧀ꦚꦴ. ꦱꦩꦴꦥꦠ꧀ꦠꦷꦲꦶ ꦮꦸꦛ꧀ꦜꦴꦤꦺ ꦏꦸꦱꦭꦨꦴꦮꦺꦴ ꦱꦩꦴꦥꦠ꧀ꦠꦶꦮꦸꦛ꧀ꦜꦴꦤꦏꦸꦱꦭꦠꦴ, ꦪꦡꦴꦥꦫꦶꦕ꧀ꦖꦶꦤ꧀ꦤꦏꦴꦭꦺꦪꦺꦮ ꦠꦴꦲꦶ ꦮꦸꦛ꧀ꦜꦴꦤꦏꦥꦚ꧀ꦚꦴ ꦏꦴꦩꦴꦮꦕꦫꦗꦮꦤꦥꦚ꧀ꦚꦴꦮ. ꦮꦷꦱꦠꦶꦩꦁ.

ꦄꦛ꧀ꦜꦴꦫꦱꦱꦸ ꦣꦴꦠꦹꦱꦸ ꦏꦸꦱꦭꦨꦴꦮꦺꦴ ꦣꦴꦠꦸꦏꦸꦱꦭꦠꦴ, ꦱꦮꦤꦣꦴꦫꦟꦥꦛꦶꦮꦺꦣꦥꦕ꧀ꦕꦮꦺꦏ꧀ꦑꦟꦥꦚ꧀ꦚꦴ. ꦠꦴꦱꦚ꧀ꦚꦺꦮ ꦣꦴꦠꦹꦤꦁ ꦩꦤꦱꦶꦏꦴꦫꦺ ꦏꦸꦱꦭꦨꦴꦮꦺꦴ ꦩꦤꦱꦶꦏꦴꦫꦏꦸꦱꦭꦠꦴ, ꦠꦴꦱꦁ ꦱꦩ꧀ꦩꦱꦤꦥꦛꦶꦮꦺꦣꦥꦕ꧀ꦕꦮꦺꦏ꧀ꦑꦟꦥꦚ꧀ꦚꦴ. ꦌꦱ ꦤꦪꦺꦴ ꦄꦴꦪꦠꦤꦏꦸꦱꦭꦠꦴꦪꦥꦶ. ꦠꦠ꧀ꦡ ꦲꦶ ꦱꦮꦤꦣꦴꦫꦟꦥꦕ꧀ꦕꦮꦺꦏ꧀ꦑꦟꦴ ꦏꦴꦩꦴꦮꦕꦫꦴꦮ, ꦥꦛꦶꦮꦺꦣꦺꦴ ꦭꦺꦴꦏꦸꦠ꧀ꦠꦫꦺꦴꦮ, ꦱꦩ꧀ꦩꦱꦤꦁ ꦏꦴꦩꦴꦮꦕꦫꦭꦺꦴꦏꦸꦠ꧀ꦠꦫꦁ. ꦄꦚ꧀ꦚꦩꦚ꧀ꦚꦁ ꦥꦛꦶꦕ꧀ꦕ ꦱꦲꦶꦠꦁ ꦦꦭꦁ ꦈꦥ꧀ꦥꦴꦢꦺꦠꦷꦠꦶ ꦥꦛꦶꦕ꧀ꦕꦱꦩꦸꦥ꧀ꦥꦴꦢꦺꦴ, ꦄꦮꦶꦗ꧀ꦗꦴꦢꦷꦲꦶ ꦤꦶꦢ꧀ꦢꦶꦛ꧀ꦜꦺꦴ ꦥꦕ꧀ꦕꦪꦱꦩꦹꦲꦺꦴ, ꦠꦱ꧀ꦩꦶꦁ ꦢ꧀ꦮꦴꦢꦱꦔ꧀ꦒꦺ ꦄꦤꦸꦭꦺꦴꦩꦥꦛꦶꦕ꧀ꦕꦱꦩꦸꦥ꧀ꦥꦴꦢꦺ ꦏꦸꦱꦭꦨꦴꦮꦺꦴ ꦥꦛꦶꦕ꧀ꦕꦱꦩꦸꦥ꧀ꦥꦴꦢꦏꦸꦱꦭꦠꦴ, ‘‘ꦆꦩꦶꦤꦴ ꦥꦕ꧀ꦕꦪꦺꦤ ꦆꦢꦁ ꦲꦺꦴꦠꦷ’’ꦠꦶ ꦗꦴꦤꦤꦮꦱꦺꦤ ꦥꦮꦠ꧀ꦠꦴ ꦭꦺꦴꦏꦶꦪꦗꦮꦤꦥꦚ꧀ꦚꦴꦮ. ꦌꦏꦮꦷꦱꦠꦶꦩꦢ꧀ꦮꦴꦮꦷꦱꦠꦶꦩꦴꦤꦶ.

ꦠꦶꦛ꧀ꦜꦠꦶ ꦌꦠ꧀ꦡ ꦦꦭꦁ ꦠꦢꦴꦪꦠ꧀ꦠꦮꦸꦠ꧀ꦠꦶꦠꦴꦪꦴꦠꦶ ꦜꦴꦤꦁ, ꦏꦴꦫꦟꦁ, ꦠꦱ꧀ꦩꦶꦁ ꦜꦴꦤꦺ ꦏꦸꦱꦭꦠꦴ ꦜꦴꦤꦏꦸꦱꦭꦠꦴ. ꦤ ꦜꦴꦤꦺ ꦏꦸꦱꦭꦠꦴ ꦄꦛ꧀ꦜꦴꦤꦏꦸꦱꦭꦠꦴ. ꦠꦺꦮꦷꦱꦠꦶꦩꦁ.

ꦈꦗꦸꦨꦴꦮꦺꦴ ꦄꦗ꧀ꦗꦮꦺꦴ. ꦩꦸꦢꦸꦨꦴꦮꦺꦴ ꦩꦢ꧀ꦢꦮꦺꦴ. ꦏꦴꦪꦕꦶꦠ꧀ꦠꦸꦗꦸꦏꦠꦴꦩꦸꦢꦸꦏꦠꦴꦢ꧀ꦮꦪꦁ. ꦕꦠꦸꦮꦷꦱꦠꦶꦩꦁ.

ꦄꦣꦶꦮꦴꦱꦤꦱꦔ꧀ꦑꦴꦠꦴ ꦑꦩꦤꦁ ꦑꦤ꧀ꦠꦶ, ꦠꦡꦴꦥꦮꦠ꧀ꦠꦏꦴꦩꦴꦮꦕꦫꦗꦮꦤꦴꦤꦶ. ꦥꦴꦥꦠꦺꦴ ꦱꦸꦛ꧀ꦜꦸ ꦎꦫꦠꦺꦴ ꦮꦶꦫꦠꦺꦴꦠꦶ ꦱꦺꦴꦫꦠꦺꦴ, ꦠꦱ꧀ꦱ ꦨꦴꦮꦺꦴ ꦱꦺꦴꦫꦕ꧀ꦕꦁ. ꦏꦴꦪꦮꦕꦷꦩꦤꦺꦴꦱꦁꦮꦫꦱꦷꦭꦱꦔ꧀ꦑꦴꦠꦴꦤꦶ ꦭꦺꦴꦏꦶꦪꦭꦺꦴꦏꦸꦠ꧀ꦠꦫꦗꦮꦤꦴꦤꦶ. ꦥꦚ꧀ꦕꦮꦷꦱꦠꦶꦩꦁ.

ꦱꦩ꧀ꦩꦺꦴꦢꦏꦥꦶꦪꦮꦴꦢꦶꦠꦴꦱꦔ꧀ꦑꦴꦠꦺꦴ ꦱꦑꦶꦭꦨꦴꦮꦺꦴ ꦱꦴꦑꦭ꧀ꦪꦁ, ꦪꦡꦴ ꦥꦫꦺꦲꦶ ꦱꦢ꧀ꦣꦶꦁ ꦄꦠ꧀ꦠꦤꦺꦴ ꦖꦶꦢ꧀ꦢꦁ ꦮꦶꦮꦫꦁ ꦤ ꦲꦺꦴꦠꦶ, ꦌꦮꦁ ꦣꦩ꧀ꦩꦴꦩꦶꦱꦺꦲꦶ ꦥꦛꦶꦱꦤ꧀ꦡꦫꦟꦁ ꦥꦛꦶꦕ꧀ꦖꦴꦢꦤꦁ ꦥꦛꦶꦱꦤ꧀ꦡꦴꦫꦺꦴ. ꦄꦴꦒꦤ꧀ꦠꦸꦏꦱ꧀ꦱ ꦲꦶ ꦥꦕ꧀ꦕꦸꦒ꧀ꦒꦩꦤꦥꦠ꧀ꦠꦕꦷꦮꦫꦥꦛꦶꦒ꧀ꦒꦲꦟꦄꦴꦱꦤꦢꦴꦤꦧꦷꦗꦤꦥꦴꦢꦣꦺꦴꦮꦤꦩꦏ꧀ꦑꦤꦴꦢꦶꦤꦴ, ꦥꦴꦤꦷꦪꦺꦤ ꦄꦴꦥꦸꦕ꧀ꦖꦤꦺꦤ, ꦏꦴꦭꦺ ꦄꦴꦒꦠꦱ꧀ꦱ ꦪꦴꦒꦸꦄꦴꦢꦷꦤꦁ, ꦮꦶꦏꦴꦭꦺ ꦥꦴꦤꦏꦴꦢꦷꦤꦚ꧀ꦕ ꦢꦴꦤꦺꦤ, ꦥꦸꦤꦢꦶꦮꦱꦺ ꦥꦶꦟ꧀ꦝꦴꦪ ꦕꦫꦟꦛ꧀ꦜꦴꦤꦢꦱ꧀ꦱꦤꦥꦮꦺꦱꦤꦤꦶꦏ꧀ꦑꦩꦤꦏꦴꦭꦴꦫꦺꦴꦕꦤꦴꦢꦶꦤꦴ ꦕ ꦥꦧ꧀ꦧꦗꦶꦠꦴ, ꦒꦲꦛ꧀ꦜꦴꦤꦚ꧀ꦕ ꦮꦶꦤꦪꦺ ꦄꦴꦒꦠꦤꦪꦺꦤ ꦪꦡꦴꦤꦸꦫꦹꦥꦁ ꦄꦴꦩꦶꦱꦥꦛꦶꦱꦤ꧀ꦡꦴꦫꦺꦴ ꦏꦴꦠꦧ꧀ꦧꦺꦴ. ꦄꦴꦒꦤ꧀ꦠꦸꦏꦁ ꦥꦤ ꦈꦥꦱꦔ꧀ꦏꦩꦶꦠ꧀ꦮꦴ ‘‘ꦠꦸꦩ꧀ꦲꦺ ꦏꦠꦫꦨꦴꦟꦏꦴ’’ꦠꦶ ꦄꦥꦸꦕ꧀ꦖꦶꦠ꧀ꦮꦴ ‘‘ꦄꦴꦕꦫꦶꦪꦸꦥꦗ꧀ꦙꦴꦪꦴ ꦮꦺꦴ ꦏꦠꦫꦁ ꦒꦤ꧀ꦡꦁ ꦮꦭ꦳ꦚ꧀ꦗꦺꦤ꧀ꦠꦷ’’ꦠꦶ ꦥꦸꦕ꧀ꦖꦶꦠ꧀ꦮꦴ ꦠꦱ꧀ꦱ ꦮꦶꦱꦪꦺ ꦥꦚ꧀ꦲꦥꦸꦕ꧀ꦖꦤꦺꦤ ꦱꦕꦺ ꦤ ꦱꦏ꧀ꦏꦺꦴꦠꦶ, ꦱꦪꦁ ꦏꦡꦺꦠ꧀ꦮꦴ ꦢꦴꦤꦺꦤ, ꦣꦩ꧀ꦩꦏꦡꦤꦥꦚ꧀ꦲꦮꦶꦱ꧀ꦱꦗ꧀ꦗꦤꦏꦩ꧀ꦩꦛ꧀ꦜꦴꦤꦏꦡꦤꦏꦸꦏ꧀ꦏꦸꦕ꧀ꦕꦢꦶꦛ꧀ꦜꦶꦮꦶꦤꦺꦴꦢꦤꦴꦢꦶꦤꦴ, ꦥꦫꦶꦮꦴꦱꦴꦢꦶꦮꦶꦤꦪꦏꦩ꧀ꦩꦏꦫꦟꦺꦤ, ꦥꦧ꧀ꦧꦴꦗꦤꦈꦥꦱꦩ꧀ꦥꦢꦴꦢꦶꦤꦴ ꦕ ꦣꦩ꧀ꦩꦥꦛꦶꦱꦤ꧀ꦡꦴꦫꦺꦴ ꦏꦴꦠꦧ꧀ꦧꦺꦴ. ꦄꦪꦩꦺꦠ꧀ꦡ ꦱꦔ꧀ꦑꦺꦥꦺꦴ, ꦮꦶꦠ꧀ꦡꦴꦫꦠꦺꦴ ꦥꦤꦴꦪꦁ ꦱꦢ꧀ꦣꦶꦁ ꦄꦴꦤꦶꦱꦁꦱꦢꦷꦥꦏꦮꦠ꧀ꦡꦹꦲꦶ ꦄꦛ꧀ꦜꦱꦴꦭꦶꦤꦶꦪꦁ (ꦣ. ꦱ. ꦄꦛ꧀ꦜ. ꧑꧓꧕꧑) ꦚꦴꦠꦧ꧀ꦧꦺꦴ. ꦌꦠꦱ꧀ꦩꦶꦁ ꦢꦸꦮꦶꦣꦺ ꦥꦛꦶꦱꦤ꧀ꦡꦴꦫꦺ ꦏꦸꦱꦭꦨꦴꦮꦺꦴ ꦥꦛꦶꦱꦤ꧀ꦡꦴꦫꦏꦸꦱꦭꦠꦴ, ꦠꦡꦴꦥꦮꦠ꧀ꦠꦏꦴꦩꦴꦮꦕꦫꦗꦮꦤꦴꦤꦶ ꦌꦮ. ꦖꦧ꧀ꦧꦷꦱꦠꦶꦩꦁ.

ꦆꦤ꧀ꦢ꧀ꦫꦶꦪꦺꦱꦸ ꦩꦤꦕ꧀ꦖꦛ꧀ꦜꦺꦱꦸ ꦄꦴꦥꦴꦡꦒꦠꦫꦹꦥꦴꦢꦷꦱꦸ ꦄꦴꦫꦩ꧀ꦩꦟꦺꦱꦸ ꦤꦶꦩꦶꦠ꧀ꦠꦒꦲꦟꦴꦢꦶꦤꦴ ꦆꦤ꧀ꦢ꧀ꦫꦶꦪꦱꦁꦮꦫꦨꦺꦢꦱꦔ꧀ꦑꦴꦠꦺꦴ ꦄꦒꦸꦠ꧀ꦠꦢ꧀ꦮꦴꦫꦨꦴꦮꦺꦴ ꦆꦤ꧀ꦢ꧀ꦫꦶꦪꦺꦱꦸ ꦄꦒꦸꦠ꧀ꦠꦢ꧀ꦮꦴꦫꦠꦴ. ꦥꦛꦶꦒ꧀ꦒꦲꦟꦥꦫꦶꦨꦺꦴꦒꦮꦱꦺꦤ ꦨꦺꦴꦗꦤꦺ ꦩꦠ꧀ꦠꦁ ꦄꦗꦴꦤꦤꦨꦴꦮꦺꦴ ꦨꦺꦴꦗꦤꦺ ꦄꦩꦠ꧀ꦠꦚ꧀ꦚꦸꦠꦴ, ꦠꦡꦴꦥꦮꦠ꧀ꦠꦄꦏꦸꦱꦭꦕꦶꦠ꧀ꦠꦴꦤꦶ. ꦱꦠ꧀ꦠꦮꦷꦱꦠꦶꦩꦁ.

ꦄꦤꦤ꧀ꦠꦫꦢꦸꦏꦺꦥꦶ ꦮꦸꦠ꧀ꦠꦥꦛꦶꦥꦏ꧀ꦑꦮꦱꦺꦤ ꦏꦴꦩꦴꦮꦕꦫꦱꦲꦺꦠꦸꦏꦏꦸꦱꦭꦏꦶꦫꦶꦪꦕꦶꦠ꧀ꦠꦴꦤꦶ ꦮꦺꦢꦶꦠꦧ꧀ꦧꦴꦤꦶ. ꦄꦛ꧀ꦜꦮꦷꦱꦠꦶꦩꦁ.

ꦱꦠꦶꦮꦶꦥ꧀ꦥꦮꦴꦱꦱꦔ꧀ꦑꦴꦠꦺꦴ ꦩꦸꦛ꧀ꦜꦱꦠꦶꦨꦴꦮꦺꦴ ꦩꦸꦛ꧀ꦜꦱ꧀ꦱꦕ꧀ꦕꦁ, ꦱꦧ꧀ꦧꦺ ꦄꦏꦸꦱꦭꦴ ꦣꦩ꧀ꦩꦴ, ꦄꦱꦩ꧀ꦥꦗꦴꦤꦤꦨꦴꦮꦺꦴ ꦄꦱꦩ꧀ꦥꦗꦚ꧀ꦚꦁ, ꦩꦺꦴꦲꦺꦴ. ꦌꦏꦹꦤꦠꦶꦁꦱꦠꦶꦩꦁ.

ꦄꦤꦤ꧀ꦠꦫꦢꦸꦏꦺ ꦕꦠꦸꦨꦹꦩꦶꦏꦴ ꦱꦠꦶꦥꦚ꧀ꦚꦴꦮ ꦮꦸꦠ꧀ꦠꦴ. ꦠꦶꦁꦱꦠꦶꦩꦁ.

ꦄꦥ꧀ꦥꦛꦶꦱꦔ꧀ꦑꦴꦤꦺ ꦄꦥ꧀ꦥꦛꦶꦮꦴꦤꦱꦔ꧀ꦑꦴꦠꦺ ꦄꦏꦩ꧀ꦥꦶꦪꦛ꧀ꦜꦺꦤ ꦪꦺꦴꦤꦶꦱꦺꦴꦢꦱ꧀ꦱꦤꦱꦔ꧀ꦑꦴꦠꦁ ꦥꦛꦶꦱꦔ꧀ꦑꦴꦤꦩꦺꦮ ꦧꦭꦤ꧀ꦠꦶ ꦥꦛꦶꦱꦔ꧀ꦑꦴꦤꦧꦭꦁ, ꦏꦴꦩꦴꦮꦕꦫꦥꦚ꧀ꦚꦴꦮ. ꦱꦠ꧀ꦠꦧꦺꦴꦗ꧀ꦙꦔ꧀ꦒꦴꦢꦶꦨꦴꦮꦤꦴꦮꦱꦺꦤ ꦥꦮꦠ꧀ꦠꦴ ꦕꦠꦸꦨꦹꦩꦏꦣꦩ꧀ꦩꦴ ꦨꦴꦮꦤꦴꦧꦭꦁ. ꦌꦏꦠꦶꦁꦱꦠꦶꦩꦁ.

ꦥꦕ꧀ꦕꦤꦷꦏꦣꦩ꧀ꦩꦺ ꦱꦩꦺꦠꦷꦠꦶ ꦱꦩꦡꦺꦴ, ꦱꦺꦴ ꦠꦶꦮꦶꦣꦺꦴ ꦕꦶꦠ꧀ꦠꦱꦩꦡꦺꦴ ꦄꦣꦶꦏꦫꦟꦱꦩꦡꦺꦴ ꦱꦧ꧀ꦧꦱꦔ꧀ꦑꦴꦫꦱꦩꦡꦺꦴꦠꦶ. ꦠꦠ꧀ꦡ ꦕ ꦥꦸꦧ꧀ꦧꦨꦴꦒꦴꦱꦸ ꦄꦛ꧀ꦜꦱꦩꦴꦥꦠ꧀ꦠꦷꦱꦸ ꦌꦏꦒ꧀ꦒꦠꦴ ꦕꦶꦠ꧀ꦠꦱꦩꦡꦺꦴ ꦤꦴꦩ, ꦱꦩ꧀ꦩꦸꦑꦴꦮꦶꦤꦪꦴꦢꦶ ꦱꦠ꧀ꦠꦮꦶꦣꦺꦴ ꦄꦣꦶꦏꦫꦟꦱꦩꦡꦺꦴ ꦤꦴꦩ, ꦤꦶꦧ꧀ꦧꦴꦤꦁ ꦱꦧ꧀ꦧꦱꦔ꧀ꦑꦴꦫꦱꦩꦡꦺꦴ ꦤꦴꦩ. ꦆꦣ ꦥꦤ ꦕꦠꦸꦨꦹꦩꦏꦺꦴ ꦱꦩꦴꦣꦶ ꦄꦣꦶꦥ꧀ꦥꦺꦠꦺꦴ. ꦄꦤꦶꦕ꧀ꦕꦴꦢꦶꦮꦱꦺꦤ ꦮꦶꦮꦶꦣꦺꦤꦴꦏꦴꦫꦺꦤ ꦥꦱ꧀ꦱꦠꦷꦠꦶ ꦮꦶꦥꦱ꧀ꦱꦤꦴ, ꦭꦺꦴꦏꦶꦪꦭꦺꦴꦏꦸꦠ꧀ꦠꦫꦴ ꦮꦶꦥꦱ꧀ꦱꦤꦴꦥꦚ꧀ꦚꦴꦮ. ꦧꦴꦠ꧀ꦠꦶꦁꦱꦠꦶꦩꦁ.

ꦱꦩꦡꦺꦴꦮ ꦠꦁ ꦄꦴꦏꦴꦫꦁ ꦒꦲꦺꦠ꧀ꦮꦴ ꦥꦸꦤ ꦥꦮꦠ꧀ꦠꦺꦠꦧ꧀ꦧꦱ꧀ꦱ ꦱꦩꦡꦱ꧀ꦱ ꦤꦶꦩꦶꦠ꧀ꦠꦤ꧀ꦠꦶ ꦱꦩꦡꦤꦶꦩꦶꦠ꧀ꦠꦁ. ꦥꦒ꧀ꦒꦴꦲꦤꦶꦩꦶꦠ꧀ꦠꦺꦥꦶ ꦌꦱꦺꦮ ꦤꦪꦺꦴ. ꦕꦠꦸꦨꦹꦩꦏꦱꦩꦴꦣꦶꦮꦷꦫꦶꦪꦴꦤꦶ ꦌꦮ. ꦠꦺꦠ꧀ꦠꦶꦁꦱꦠꦶꦩꦁ.

ꦄꦤꦤ꧀ꦠꦫꦢꦸꦏꦺꦥꦶ ꦮꦷꦫꦶꦪꦱꦩꦴꦣꦷ ꦌꦮ ꦮꦸꦠ꧀ꦠꦴ. ꦕꦠꦸꦠ꧀ꦠꦶꦁꦱꦠꦶꦩꦁ.

ꦱꦷꦭꦮꦶꦤꦴꦱꦶꦏꦴ ꦄꦱꦁꦮꦫꦱꦔ꧀ꦑꦴꦠꦴ ꦱꦷꦭꦱ꧀ꦱ ꦮꦶꦥꦠ꧀ꦠꦷꦠꦶ ꦱꦷꦭꦮꦶꦥꦠ꧀ꦠꦶ, ꦠꦡꦴꦥꦮꦠ꧀ꦠꦴ ꦄꦏꦸꦱꦭꦣꦩ꧀ꦩꦴ. ꦱꦩ꧀ꦩꦴꦢꦶꦛ꧀ꦜꦶꦪꦴ ꦮꦶꦥꦠ꧀ꦠꦶ ꦢꦶꦛ꧀ꦜꦶꦮꦶꦥꦠ꧀ꦠꦶ, ꦩꦶꦕ꧀ꦖꦴꦢꦶꦛ꧀ꦜꦶ ꦌꦮ. ꦥꦚ꧀ꦕꦠꦶꦁꦱꦠꦶꦩꦁ.

ꦱꦺꦴꦫꦕ꧀ꦕꦩꦺꦮ ꦱꦷꦭꦱ꧀ꦱ ꦱꦩ꧀ꦥꦴꦢꦤꦠꦺꦴ ꦱꦷꦭꦥꦫꦶꦥꦹꦫꦟꦠꦺꦴ ꦱꦷꦭꦱ꧀ꦱ ꦱꦩ꧀ꦥꦢꦴꦠꦶ ꦱꦷꦭꦱꦩ꧀ꦥꦢꦴ. ꦢꦶꦛ꧀ꦜꦶꦥꦴꦫꦶꦥꦹꦫꦶꦨꦹꦠꦁ ꦚꦴꦟꦩꦺꦮ ꦢꦶꦛ꧀ꦜꦶꦪꦴ ꦱꦩ꧀ꦥꦢꦴꦠꦶ ꦢꦶꦛ꧀ꦜꦶꦱꦩ꧀ꦥꦢꦴ. ꦕꦠꦸꦨꦹꦩꦏꦴ ꦱꦷꦭꦥꦚ꧀ꦚꦴꦮ. ꦠꦡꦴ ꦄꦤꦤ꧀ꦠꦫꦢꦸꦏꦺꦥꦶ. ꦖꦠ꧀ꦠꦶꦁꦱꦠꦶꦩꦁ.

ꦮꦶꦱꦸꦢ꧀ꦣꦶꦨꦴꦮꦁ ꦱꦩ꧀ꦥꦠ꧀ꦠꦴ ꦱꦷꦭꦱꦔ꧀ꦑꦴꦠꦴ ꦱꦷꦭꦱ꧀ꦱ ꦮꦶꦱꦸꦢ꧀ꦣꦶ ꦱꦷꦭꦮꦶꦱꦸꦢ꧀ꦣꦶ. ꦤꦶꦧ꧀ꦧꦴꦤꦱꦔ꧀ꦑꦴꦠꦁ ꦮꦶꦱꦸꦢ꧀ꦣꦶꦁ ꦥꦴꦥꦺꦠꦸꦁ ꦱꦩꦠ꧀ꦡꦴ ꦢꦱ꧀ꦱꦤꦱꦔ꧀ꦑꦴꦠꦴ ꦢꦶꦛ꧀ꦜꦶꦪꦴ ꦮꦶꦱꦸꦢ꧀ꦣꦶ ꦢꦶꦛ꧀ꦜꦶꦮꦶꦱꦸꦢ꧀ꦣꦶ. ꦱꦠ꧀ꦠꦠ꧀ꦠꦶꦁꦱꦠꦶꦩꦁ.

ꦏꦩ꧀ꦩꦱ꧀ꦱꦏꦠꦴꦱꦕ꧀ꦕꦴꦤꦸꦭꦺꦴꦩꦶꦏꦩꦒ꧀ꦒꦦꦭꦱꦩ꧀ꦥꦪꦸꦠ꧀ꦠꦥꦚ꧀ꦚꦴ ꦢꦶꦛ꧀ꦜꦶ ꦮꦶꦱꦸꦢ꧀ꦣꦶ ꦤꦴꦩ. ꦪꦡꦴꦢꦶꦛ꧀ꦜꦶꦱ꧀ꦱ ꦠꦢꦤꦸꦫꦹꦥꦁ ꦥꦣꦴꦤꦁ ꦪꦡꦴꦢꦶꦛ꧀ꦜꦶꦱ꧀ꦱ ꦕ ꦥꦣꦴꦤꦁ ꦤꦴꦩ. ꦄꦛ꧀ꦜꦠꦶꦁꦱꦠꦶꦩꦁ.

ꦱꦁꦮꦺꦒꦗꦤꦏꦴꦤꦶ ꦗꦴꦠꦶꦗꦫꦴꦧ꧀ꦪꦴꦣꦶꦩꦫꦟꦱꦔ꧀ꦑꦴꦠꦴꦤꦶ ꦏꦴꦫꦟꦴꦤꦶ ꦱꦁꦮꦺꦗꦤꦷꦪꦛ꧀ꦜꦴꦤꦴꦤꦶ ꦤꦴꦩ, ꦠꦺꦱꦸ ꦗꦴꦠꦶꦄꦴꦢꦶꦥꦛꦶꦕ꧀ꦕꦱꦩꦸꦥ꧀ꦥꦤ꧀ꦤꦨꦪꦱꦔ꧀ꦑꦴꦠꦁ ꦱꦁꦮꦶꦗꦤꦁ ꦱꦁꦮꦺꦒꦺꦴ ꦤꦴꦩ, ꦠꦡꦴꦥꦮꦠ꧀ꦠꦏꦸꦱꦭꦴꦢꦶ ꦌꦮ. ꦌꦮꦁ ꦱꦁꦮꦺꦒꦗꦴꦠꦱ꧀ꦱ ꦪꦺꦴꦤꦶꦱꦺꦴ ꦈꦥꦴꦪꦺꦤ ꦥꦣꦴꦤꦁ ꦱꦁꦮꦶꦒ꧀ꦒꦱ꧀ꦱ ꦪꦺꦴꦤꦶꦱꦺꦴ ꦥꦣꦴꦤꦁ, ꦭꦺꦴꦏꦶꦪꦭꦺꦴꦏꦸꦠ꧀ꦠꦫꦮꦷꦫꦶꦪꦩꦺꦮ. ꦌꦏꦹꦤꦕꦠ꧀ꦠꦴꦭꦷꦱꦠꦶꦩꦁ.

ꦏꦸꦱꦭꦣꦩ꧀ꦩꦥꦹꦫꦟꦺ ꦄꦱꦤ꧀ꦠꦸꦛ꧀ꦜꦶꦨꦴꦮꦺꦴ ꦄꦱꦤ꧀ꦠꦸꦛ꧀ꦜꦶꦠꦴ. ꦪꦺꦴ ꦥꦤ ꦢꦴꦤꦁ ꦢꦠ꧀ꦮꦴ ꦠꦠꦺꦴ ꦠꦺꦤ ꦄꦱꦤ꧀ꦠꦸꦛ꧀ꦜꦺꦴ ꦲꦸꦠ꧀ꦮꦴ ꦱꦫꦟꦒꦩꦤꦁ ꦄꦴꦏꦔ꧀ꦑꦠꦶ, ꦠꦠꦺꦴ ꦥꦚ꧀ꦕꦱꦷꦭꦴꦢꦶꦁ, ꦥꦧ꧀ꦧꦗ꧀ꦗꦁ, ꦧꦸꦢ꧀ꦣꦮꦕꦤꦴꦤꦁ ꦈꦒ꧀ꦒꦟ꧀ꦲꦤꦁ, ꦱꦩꦡꦮꦶꦥꦱ꧀ꦱꦤꦁ, ꦠꦠꦺꦴ ꦠꦺꦤꦴꦥꦶ ꦄꦱꦤ꧀ꦠꦸꦛ꧀ꦜꦺꦴ ꦄꦤꦸꦏ꧀ꦏꦩꦺꦤ ꦄꦫꦲꦠ꧀ꦠꦁ ꦒꦟ꧀ꦲꦴꦠꦶ, ꦄꦪꦁ ꦄꦱꦤ꧀ꦠꦸꦛ꧀ꦜꦶꦠꦴ ꦏꦸꦱꦭꦺꦱꦸ ꦣꦩ꧀ꦩꦺꦱꦸ. ꦄꦣꦶꦏꦸꦱꦭꦣꦩ꧀ꦩꦴꦤꦁ ꦨꦴꦮꦤꦴꦪ ꦈꦏ꧀ꦏꦟ꧀ꦜꦩꦴꦤꦺꦴ ꦥꦣꦴꦤꦁ ꦥꦛꦶꦮꦴꦥꦺꦠꦶ ꦤꦶꦮꦠ꧀ꦠꦴꦥꦺꦠꦷꦠꦶ ꦥꦛꦶꦮꦴꦤꦶ, ꦤ ꦥꦛꦶꦮꦴꦤꦶ ꦄꦥ꧀ꦥꦛꦶꦮꦴꦤꦶ, ꦠꦱ꧀ꦱ ꦨꦮꦺꦴ ꦄꦥ꧀ꦥꦛꦶꦮꦴꦤꦶꦠꦴ. ꦄꦫꦲꦠ꧀ꦠꦁ ꦄꦥ꧀ꦥꦠ꧀ꦮꦴ ꦥꦣꦴꦤꦱ꧀ꦩꦶꦁ ꦄꦤꦶꦮꦠ꧀ꦠꦤꦠꦴ ꦄꦤꦺꦴꦱꦏ꧀ꦏꦤꦠꦴ, ꦠꦡꦴꦥꦮꦠ꧀ꦠꦭꦺꦴꦏꦶꦪꦭꦺꦴꦏꦸꦠ꧀ꦠꦫꦏꦸꦱꦭꦴ ꦣꦩ꧀ꦩꦴ. ꦕꦠ꧀ꦠꦴꦭꦷꦱꦠꦶꦩꦁ.

ꦮꦶꦗꦴꦤꦤꦠꦺꦴ ꦮꦶꦗ꧀ꦗꦴ, ꦥꦸꦧ꧀ꦧꦺꦤꦶꦮꦴꦱꦕꦸꦠꦹꦥꦥꦴꦠꦄꦴꦱꦮꦏ꧀ꦑꦪꦚꦴꦟꦴꦤꦶ. ꦮꦶꦩꦸꦕ꧀ꦕꦤꦠꦺꦴ ꦮꦶꦩꦸꦠ꧀ꦠꦶ, ꦄꦛ꧀ꦜ ꦱꦩꦴꦥꦠ꧀ꦠꦶꦪꦺꦴ, ꦤꦶꦧ꧀ꦧꦴꦤꦚ꧀ꦕ. ꦄꦛ꧀ꦜ ꦱꦩꦴꦥꦠ꧀ꦠꦶꦪꦺꦴ ꦲꦶ ꦄꦴꦫꦩ꧀ꦩꦟꦺ ꦄꦣꦶꦩꦸꦕ꧀ꦕꦤꦠꦺꦴ, ꦱꦪꦁ ꦮꦶꦏ꧀ꦑꦩ꧀ꦨꦶꦠꦏꦶꦭꦺꦱꦺꦲꦶ ꦮꦶꦩꦸꦕ꧀ꦕꦤꦛ꧀ꦜꦺꦤ ꦕ ꦮꦶꦩꦸꦠ꧀ꦠꦷꦠꦶ ꦮꦸꦠ꧀ꦠꦴ, ꦤꦶꦧ꧀ꦧꦴꦤꦁ ꦥꦤ ꦱꦧ꧀ꦧꦏꦶꦭꦺꦱꦺꦲꦶ ꦄꦕ꧀ꦕꦤ꧀ꦠꦮꦶꦩꦸꦕ꧀ꦕꦤꦛ꧀ꦜꦺꦤ. ꦌꦏꦕꦠ꧀ꦠꦴꦭꦷꦱꦠꦶꦩꦁ.

ꦏꦶꦭꦺꦱꦏ꧀ꦑꦪꦏꦫꦺꦱꦸ ꦕꦠꦹꦱꦸ ꦄꦫꦶꦪꦩꦒ꧀ꦒꦺꦱꦸ ꦚꦴꦟꦁ ꦑꦪꦺ ꦚꦴꦟꦁ ꦤꦴꦩ. ꦥꦛꦶꦱꦤ꧀ꦣꦶꦮꦱꦺꦤ ꦄꦤꦸꦥ꧀ꦥꦴꦢꦨꦹꦠꦺ ꦠꦁꦠꦁꦩꦒ꧀ꦒꦮꦗ꧀ꦙꦏꦶꦭꦺꦱꦴꦤꦁ ꦄꦤꦸꦥ꧀ꦥꦴꦢꦥꦫꦶꦪꦺꦴꦱꦴꦤꦺ ꦈꦥ꧀ꦥꦤ꧀ꦤꦄꦫꦶꦪꦦꦭꦺ ꦚꦴꦟꦁ ꦄꦤꦸꦥ꧀ꦥꦴꦢꦺ ꦚꦴꦟꦁ ꦤꦴꦩ. ꦱꦺꦱꦁ ꦱꦧ꧀ꦧꦠ꧀ꦡ ꦱꦸꦮꦶꦚ꧀ꦚꦺꦪ꧀ꦪꦩꦺꦮ. ꦢ꧀ꦮꦴꦕꦠ꧀ꦠꦴꦭꦷꦱꦠꦶꦩꦁ.

ꦱꦸꦠ꧀ꦠꦤ꧀ꦠꦶꦏꦢꦸꦏꦩꦴꦠꦶꦏꦠ꧀ꦡꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.

ꦩꦺꦴꦲꦮꦶꦕ꧀ꦖꦺꦢꦤꦶꦪꦴ ꦄꦨꦶꦣꦩ꧀ꦩꦩꦴꦠꦶꦏꦠ꧀ꦡꦮꦟ꧀ꦟꦤꦴꦪ

ꦣꦩ꧀ꦩꦱꦔ꧀ꦒꦟꦷꦩꦴꦠꦶꦏꦠ꧀ꦡꦮꦟ꧀ꦟꦤꦴ ꦤꦶꦛ꧀ꦜꦶꦠꦴ.