꧑. ꦥꦜꦩꦫꦲꦺꦴꦒꦠꦱꦸꦠ꧀ꦠꦁ

꧘꧙꧙. ꦌꦮꦁ ꦩꦺ ꦱꦸꦠꦁ – ꦌꦏꦁ ꦱꦩꦪꦁ ꦄꦴꦪꦱ꧀ꦩꦴ ꦄꦤꦸꦫꦸꦢ꧀ꦣꦺꦴ ꦱꦴꦮꦠ꧀ꦡꦶꦪꦁ ꦮꦶꦲꦫꦠꦶ ꦗꦺꦠꦮꦤꦺ ꦄꦤꦴꦡꦥꦶꦟ꧀ꦝꦶꦏꦱ꧀ꦱ ꦄꦴꦫꦴꦩꦺ. ꦄꦡ ꦑꦺꦴ ꦄꦴꦪꦱ꧀ꦩꦠꦺꦴ ꦄꦤꦸꦫꦸꦢ꧀ꦣꦱ꧀ꦱ ꦫꦲꦺꦴꦒꦠꦱ꧀ꦱ ꦥꦛꦶꦱꦭ꧀ꦭꦷꦤꦱ꧀ꦱ ꦌꦮꦁ ꦕꦺꦠꦱꦺꦴ ꦥꦫꦶꦮꦶꦠꦏ꧀ꦏꦺꦴ ꦈꦢꦥꦴꦢꦶ – ‘‘ꦪꦺꦱꦁ ꦏꦺꦱꦚ꧀ꦕꦶ ꦕꦠ꧀ꦠꦴꦫꦺꦴ ꦱꦠꦶꦥꦛ꧀ꦜꦴꦤꦴ ꦮꦶꦫꦢ꧀ꦣꦴ, ꦮꦶꦫꦢ꧀ꦣꦺꦴ ꦠꦺꦱꦁ ꦄꦫꦶꦪꦺꦴ ꦩꦒ꧀ꦒꦺꦴ ꦱꦩ꧀ꦩꦴ ꦢꦸꦏ꧀ꦑꦏ꧀ꦑꦪꦒꦴꦩꦷ. ꦪꦺꦱꦁ ꦏꦺꦱꦚ꧀ꦕꦶ ꦕꦠ꧀ꦠꦴꦫꦺꦴ ꦱꦠꦶꦥꦛ꧀ꦜꦴꦤꦴ ꦄꦴꦫꦢ꧀ꦣꦴ, ꦄꦴꦫꦢ꧀ꦣꦺꦴ ꦠꦺꦱꦁ ꦄꦫꦶꦪꦺꦴ ꦩꦒ꧀ꦒꦺꦴ ꦱꦩ꧀ꦩꦴ ꦢꦸꦏ꧀ꦑꦏ꧀ꦑꦪꦒꦴꦩꦷ’’ꦠꦶ.

ꦄꦡ ꦑꦺꦴ ꦄꦴꦪꦱ꧀ꦩꦴ ꦩꦲꦴꦩꦺꦴꦒ꧀ꦒꦭ꧀ꦭꦴꦤꦺꦴ ꦄꦴꦪꦱ꧀ꦩꦠꦺꦴ ꦄꦤꦸꦫꦸꦢ꧀ꦣꦱ꧀ꦱ ꦕꦺꦠꦱꦴ ꦕꦺꦠꦺꦴꦥꦫꦶꦮꦶꦠꦏ꧀ꦏꦩꦚ꧀ꦚꦴꦪ – ꦱꦺꦪ꧀ꦪꦡꦴꦥꦶ ꦤꦴꦩ ꦧꦭꦮꦴ ꦥꦸꦫꦶꦱꦺꦴ ꦱꦩꦶꦚ꧀ꦗꦶꦠꦁ ꦮꦴ ꦧꦴꦲꦁ ꦥꦱꦴꦫꦺꦪ꧀ꦪ, ꦥꦱꦴꦫꦶꦠꦁ ꦮꦴ ꦧꦴꦲꦁ ꦱꦩꦶꦚ꧀ꦗꦺꦪ꧀ꦪ, ꦌꦮꦩꦺꦮ – ꦄꦴꦪꦱ꧀ꦩꦠꦺꦴ ꦄꦤꦸꦫꦸꦢ꧀ꦣꦱ꧀ꦱ ꦱꦩ꧀ꦩꦸꦑꦺ ꦥꦴꦠꦸꦫꦲꦺꦴꦱꦶ. ꦄꦡ ꦑꦺꦴ ꦄꦴꦪꦱ꧀ꦩꦴ ꦩꦲꦴꦩꦺꦴꦒ꧀ꦒꦭ꧀ꦭꦴꦤꦺꦴ ꦄꦴꦪꦱ꧀ꦩꦤ꧀ꦠꦁ ꦄꦤꦸꦫꦸꦢ꧀ꦣꦁ ꦌꦠꦢꦮꦺꦴꦕ – ‘‘ꦏꦶꦠ꧀ꦠꦴꦮꦠꦴ ꦤꦸ ꦑꦺꦴ, ꦄꦴꦮꦸꦱꦺꦴ ꦄꦤꦸꦫꦸꦢ꧀ꦣ, ꦨꦶꦏ꧀ꦑꦸꦤꦺꦴ ꦕꦠ꧀ꦠꦴꦫꦺꦴ ꦱꦠꦶꦥꦛ꧀ꦜꦴꦤꦴ ꦄꦴꦫꦢ꧀ꦣꦴ ꦲꦺꦴꦤ꧀ꦠꦷ’’ꦠꦶ?

‘‘ꦆꦣꦴꦮꦸꦱꦺꦴ, ꦨꦶꦏ꧀ꦑꦸ ꦄꦗ꧀ꦙꦠ꧀ꦠꦁ ꦏꦴꦪꦺ ꦱꦩꦸꦢꦪꦣꦩ꧀ꦩꦴꦤꦸꦥꦱ꧀ꦱꦷ ꦮꦶꦲꦫꦠꦶ, ꦄꦗ꧀ꦙꦠ꧀ꦠꦁ ꦏꦴꦪꦺ ꦮꦪꦣꦩ꧀ꦩꦴꦤꦸꦥꦱ꧀ꦱꦷ ꦮꦶꦲꦫꦠꦶ, ꦄꦗ꧀ꦙꦠ꧀ꦠꦁ ꦏꦴꦪꦺ ꦱꦩꦸꦢꦪꦮꦪꦣꦩ꧀ꦩꦴꦤꦸꦥꦱ꧀ꦱꦷ ꦮꦶꦲꦫꦠꦶ ꦄꦴꦠꦴꦥꦷ ꦱꦩ꧀ꦥꦗꦴꦤꦺꦴ ꦱꦠꦶꦩꦴ, ꦮꦶꦤꦺꦪ꧀ꦪ ꦭꦺꦴꦏꦺ ꦄꦨꦶꦗ꧀ꦙꦴꦢꦺꦴꦩꦤꦱ꧀ꦱꦁ. ꦧꦲꦶꦢ꧀ꦣꦴ ꦏꦴꦪꦺ ꦱꦩꦸꦢꦪꦣꦩ꧀ꦩꦴꦤꦸꦥꦱ꧀ꦱꦷ ꦮꦶꦲꦫꦠꦶ, ꦧꦲꦶꦢ꧀ꦣꦴ ꦏꦴꦪꦺ ꦮꦪꦣꦩ꧀ꦩꦴꦤꦸꦥꦱ꧀ꦱꦷ ꦮꦶꦲꦫꦠꦶ, ꦧꦲꦶꦢ꧀ꦣꦴ ꦏꦴꦪꦺ ꦱꦩꦸꦢꦪꦮꦪꦣꦩ꧀ꦩꦴꦤꦸꦥꦱ꧀ꦱꦷ ꦮꦶꦲꦫꦠꦶ ꦄꦴꦠꦴꦥꦷ ꦱꦩ꧀ꦥꦗꦴꦤꦺꦴ ꦱꦠꦶꦩꦴ, ꦮꦶꦤꦺꦪ꧀ꦪ ꦭꦺꦴꦏꦺ ꦄꦨꦶꦗ꧀ꦙꦴꦢꦺꦴꦩꦤꦱ꧀ꦱꦁ. ꦄꦗ꧀ꦙꦠ꧀ꦠꦧꦲꦶꦢ꧀ꦣꦴ ꦏꦴꦪꦺ ꦱꦩꦸꦢꦪꦣꦩ꧀ꦩꦴꦤꦸꦥꦱ꧀ꦱꦷ ꦮꦶꦲꦫꦠꦶ, ꦄꦗ꧀ꦙꦠ꧀ꦠꦧꦲꦶꦢ꧀ꦣꦴ ꦏꦴꦪꦺ ꦮꦪꦣꦩ꧀ꦩꦴꦤꦸꦥꦱ꧀ꦱꦷ ꦮꦶꦲꦫꦠꦶ, ꦄꦗ꧀ꦙꦠ꧀ꦠꦧꦲꦶꦢ꧀ꦣꦴ ꦏꦴꦪꦺ ꦱꦩꦸꦢꦪꦮꦪꦣꦩ꧀ꦩꦴꦤꦸꦥꦱ꧀ꦱꦷ ꦮꦶꦲꦫꦠꦶ ꦄꦴꦠꦴꦥꦷ ꦱꦩ꧀ꦥꦗꦴꦤꦺꦴ ꦱꦠꦶꦩꦴ, ꦮꦶꦤꦺꦪ꧀ꦪ ꦭꦺꦴꦏꦺ ꦄꦨꦶꦗ꧀ꦙꦴꦢꦺꦴꦩꦤꦱ꧀ꦱꦁ.

‘‘ꦱꦺꦴ ꦱꦕꦺ ꦄꦴꦏꦔ꧀ꦑꦠꦶ – ‘ꦄꦥ꧀ꦥꦛꦶꦏꦹꦭꦺ ꦥꦛꦶꦏꦹꦭꦱꦚ꧀ꦚꦷ ꦮꦶꦲꦫꦺꦪ꧀ꦪ’ꦤ꧀ꦠꦶ, ꦥꦛꦶꦏꦹꦭꦱꦚ꧀ꦚꦷ ꦠꦠ꧀ꦡ ꦮꦶꦲꦫꦠꦶ; ꦱꦕꦺ ꦄꦴꦏꦔ꧀ꦑꦠꦶ – ‘ꦥꦛꦶꦏꦹꦭꦺ ꦄꦥ꧀ꦥꦛꦶꦏꦹꦭꦱꦚ꧀ꦚꦷ ꦮꦶꦲꦫꦺꦪ꧀ꦪ’ꦤ꧀ꦠꦶ, ꦄꦥ꧀ꦥꦛꦶꦏꦹꦭꦱꦚ꧀ꦚꦷ ꦠꦠ꧀ꦡ ꦮꦶꦲꦫꦠꦶ; ꦱꦕꦺ ꦄꦴꦏꦔ꧀ꦑꦠꦶ – ‘ꦄꦥ꧀ꦥꦛꦶꦏꦹꦭꦺ ꦕ ꦥꦛꦶꦏꦹꦭꦺ ꦕ ꦥꦛꦶꦏꦹꦭꦱꦚ꧀ꦚꦷ ꦮꦶꦲꦫꦺꦪ꧀ꦪ’ꦤ꧀ꦠꦶ, ꦥꦛꦶꦏꦹꦭꦱꦚ꧀ꦚꦷ ꦠꦠ꧀ꦡ ꦮꦶꦲꦫꦠꦶ; ꦱꦕꦺ ꦄꦴꦏꦔ꧀ꦑꦠꦶ – ‘ꦥꦛꦶꦏꦹꦭꦺ ꦕ ꦄꦥ꧀ꦥꦛꦶꦏꦹꦭꦺ ꦕ ꦄꦥ꧀ꦥꦛꦶꦏꦹꦭꦱꦚ꧀ꦚꦷ ꦮꦶꦲꦫꦺꦪ꧀ꦪ’ꦤ꧀ꦠꦶ, ꦄꦥ꧀ꦥꦛꦶꦏꦹꦭꦱꦚ꧀ꦚꦷ ꦠꦠ꧀ꦡ ꦮꦶꦲꦫꦠꦶ; ꦱꦕꦺ ꦄꦴꦏꦔ꧀ꦑꦠꦶ – ‘ꦄꦥ꧀ꦥꦛꦶꦏꦹꦭꦚ꧀ꦕ ꦥꦛꦶꦏꦹꦭꦚ꧀ꦕ ꦠꦢꦸꦨꦪꦁ ꦄꦨꦶꦤꦶꦮꦗ꧀ꦗꦺꦠ꧀ꦮꦴ ꦈꦥꦺꦏ꧀ꦑꦏꦺꦴ ꦮꦶꦲꦫꦺꦪ꧀ꦪꦁ ꦱꦠꦺꦴ ꦱꦩ꧀ꦥꦗꦴꦤꦺꦴ’ꦠꦶ, ꦈꦥꦺꦏ꧀ꦑꦏꦺꦴ ꦠꦠ꧀ꦡ ꦮꦶꦲꦫꦠꦶ ꦱꦠꦺꦴ ꦱꦩ꧀ꦥꦗꦴꦤꦺꦴ.

‘‘ꦄꦗ꧀ꦙꦠ꧀ꦠꦁ ꦮꦺꦢꦤꦴꦱꦸ ꦱꦩꦸꦢꦪꦣꦩ꧀ꦩꦴꦤꦸꦥꦱ꧀ꦱꦷ ꦮꦶꦲꦫꦠꦶ, ꦄꦗ꧀ꦙꦠ꧀ꦠꦁ ꦮꦺꦢꦤꦴꦱꦸ ꦮꦪꦣꦩ꧀ꦩꦴꦤꦸꦥꦱ꧀ꦱꦷ ꦮꦶꦲꦫꦠꦶ, ꦄꦗ꧀ꦙꦠ꧀ꦠꦁ ꦮꦺꦢꦤꦴꦱꦸ ꦱꦩꦸꦢꦪꦮꦪꦣꦩ꧀ꦩꦴꦤꦸꦥꦱ꧀ꦱꦷ ꦮꦶꦲꦫꦠꦶ ꦄꦴꦠꦴꦥꦷ ꦱꦩ꧀ꦥꦗꦴꦤꦺꦴ ꦱꦠꦶꦩꦴ, ꦮꦶꦤꦺꦪ꧀ꦪ ꦭꦺꦴꦏꦺ ꦄꦨꦶꦗ꧀ꦙꦴꦢꦺꦴꦩꦤꦱ꧀ꦱꦁ. ꦧꦲꦶꦢ꧀ꦣꦴ ꦮꦺꦢꦤꦴꦱꦸ ꦱꦩꦸꦢꦪꦣꦩ꧀ꦩꦴꦤꦸꦥꦱ꧀ꦱꦷ ꦮꦶꦲꦫꦠꦶ, ꦧꦲꦶꦢ꧀ꦣꦴ ꦮꦺꦢꦤꦴꦱꦸ ꦮꦪꦣꦩ꧀ꦩꦴꦤꦸꦥꦱ꧀ꦱꦷ ꦮꦶꦲꦫꦠꦶ, ꦧꦲꦶꦢ꧀ꦣꦴ ꦮꦺꦢꦤꦴꦱꦸ ꦱꦩꦸꦢꦪꦮꦪꦣꦩ꧀ꦩꦴꦤꦸꦥꦱ꧀ꦱꦷ ꦮꦶꦲꦫꦠꦶ ꦄꦴꦠꦴꦥꦷ ꦱꦩ꧀ꦥꦗꦴꦤꦺꦴ ꦱꦠꦶꦩꦴ, ꦮꦶꦤꦺꦪ꧀ꦪ ꦭꦺꦴꦏꦺ ꦄꦨꦶꦗ꧀ꦙꦴꦢꦺꦴꦩꦤꦱ꧀ꦱꦁ. ꦄꦗ꧀ꦙꦠ꧀ꦠꦧꦲꦶꦢ꧀ꦣꦴ ꦮꦺꦢꦤꦴꦱꦸ ꦱꦩꦸꦢꦪꦣꦩ꧀ꦩꦴꦤꦸꦥꦱ꧀ꦱꦷ ꦮꦶꦲꦫꦠꦶ, ꦄꦗ꧀ꦙꦠ꧀ꦠꦧꦲꦶꦢ꧀ꦣꦴ ꦮꦺꦢꦤꦴꦱꦸ ꦮꦪꦣꦩ꧀ꦩꦴꦤꦸꦥꦱ꧀ꦱꦷ ꦮꦶꦲꦫꦠꦶ, ꦄꦗ꧀ꦙꦠ꧀ꦠꦧꦲꦶꦢ꧀ꦣꦴ ꦮꦺꦢꦤꦴꦱꦸ ꦱꦩꦸꦢꦪꦮꦪꦣꦩ꧀ꦩꦴꦤꦸꦥꦱ꧀ꦱꦷ ꦮꦶꦲꦫꦠꦶ ꦄꦴꦠꦴꦥꦷ ꦱꦩ꧀ꦥꦗꦴꦤꦺꦴ ꦱꦠꦶꦩꦴ, ꦮꦶꦤꦺꦪ꧀ꦪ ꦭꦺꦴꦏꦺ ꦄꦨꦶꦗ꧀ꦙꦴꦢꦺꦴꦩꦤꦱ꧀ꦱꦁ.

‘‘ꦱꦺꦴ ꦱꦕꦺ ꦄꦴꦏꦔ꧀ꦑꦠꦶ – ‘ꦄꦥ꧀ꦥꦛꦶꦏꦹꦭꦺ ꦥꦛꦶꦏꦹꦭꦱꦚ꧀ꦚꦷ ꦮꦶꦲꦫꦺꦪ꧀ꦪ’ꦤ꧀ꦠꦶ, ꦥꦛꦶꦏꦹꦭꦱꦚ꧀ꦚꦷ ꦠꦠ꧀ꦡ ꦮꦶꦲꦫꦠꦶ; ꦱꦕꦺ ꦄꦴꦏꦔ꧀ꦑꦠꦶ – ‘ꦥꦛꦶꦏꦹꦭꦺ ꦄꦥ꧀ꦥꦛꦶꦏꦹꦭꦱꦚ꧀ꦚꦷ ꦮꦶꦲꦫꦺꦪ꧀ꦪ’ꦤ꧀ꦠꦶ, ꦄꦥ꧀ꦥꦛꦶꦏꦹꦭꦱꦚ꧀ꦚꦷ ꦠꦠ꧀ꦡ ꦮꦶꦲꦫꦠꦶ; ꦱꦕꦺ ꦄꦴꦏꦔ꧀ꦑꦠꦶ – ‘ꦄꦥ꧀ꦥꦛꦶꦏꦹꦭꦺ ꦕ ꦥꦛꦶꦏꦹꦭꦺ ꦕ ꦥꦛꦶꦏꦹꦭꦱꦚ꧀ꦚꦷ ꦮꦶꦲꦫꦺꦪ꧀ꦪ’ꦤ꧀ꦠꦶ, ꦥꦛꦶꦏꦹꦭꦱꦚ꧀ꦚꦷ ꦠꦠ꧀ꦡ ꦮꦶꦲꦫꦠꦶ; ꦱꦕꦺ ꦄꦴꦏꦔ꧀ꦑꦠꦶ – ‘ꦥꦛꦶꦏꦹꦭꦺ ꦕ ꦄꦥ꧀ꦥꦛꦶꦏꦹꦭꦺ ꦕ ꦄꦥ꧀ꦥꦛꦶꦏꦹꦭꦱꦚ꧀ꦚꦷ ꦮꦶꦲꦫꦺꦪ꧀ꦪ’ꦤ꧀ꦠꦶ, ꦄꦥ꧀ꦥꦛꦶꦏꦹꦭꦱꦚ꧀ꦚꦷ ꦠꦠ꧀ꦡ ꦮꦶꦲꦫꦠꦶ; ꦱꦕꦺ ꦄꦴꦏꦔ꧀ꦑꦠꦶ – ‘ꦄꦥ꧀ꦥꦛꦶꦏꦹꦭꦚ꧀ꦕ ꦥꦛꦶꦏꦹꦭꦚ꧀ꦕ ꦠꦢꦸꦨꦪꦁ ꦄꦨꦶꦤꦶꦮꦗ꧀ꦗꦺꦠ꧀ꦮꦴ ꦈꦥꦺꦏ꧀ꦑꦏꦺꦴ ꦮꦶꦲꦫꦺꦪ꧀ꦪꦁ ꦱꦠꦺꦴ ꦱꦩ꧀ꦥꦗꦴꦤꦺꦴ’ꦠꦶ, ꦈꦥꦺꦏ꧀ꦑꦏꦺꦴ ꦠꦠ꧀ꦡ ꦮꦶꦲꦫꦠꦶ ꦱꦠꦺꦴ ꦱꦩ꧀ꦥꦗꦴꦤꦺꦴ.

‘‘ꦄꦗ꧀ꦙꦠ꧀ꦠꦁ ꦕꦶꦠ꧀ꦠꦺ…ꦥꦺ… ꦧꦲꦶꦢ꧀ꦣꦴ ꦕꦶꦠ꧀ꦠꦺ…ꦥꦺ… ꦄꦗ꧀ꦙꦠ꧀ꦠꦧꦲꦶꦢ꧀ꦣꦴ ꦕꦶꦠ꧀ꦠꦺ ꦱꦩꦸꦢꦪꦣꦩ꧀ꦩꦴꦤꦸꦥꦱ꧀ꦱꦷ ꦮꦶꦲꦫꦠꦶ… ꦄꦗ꧀ꦙꦠ꧀ꦠꦧꦲꦶꦢ꧀ꦣꦴ ꦕꦶꦠ꧀ꦠꦺ ꦮꦪꦣꦩ꧀ꦩꦴꦤꦸꦥꦱ꧀ꦱꦷ ꦮꦶꦲꦫꦠꦶ… ꦄꦗ꧀ꦙꦠ꧀ꦠꦧꦲꦶꦢ꧀ꦣꦴ ꦕꦶꦠ꧀ꦠꦺ ꦱꦩꦸꦢꦪꦮꦪꦣꦩ꧀ꦩꦴꦤꦸꦥꦱ꧀ꦱꦷ ꦮꦶꦲꦫꦠꦶ ꦄꦴꦠꦴꦥꦷ…ꦥꦺ… ꦄꦨꦶꦗ꧀ꦙꦴꦢꦺꦴꦩꦤꦱ꧀ꦱꦁ.

‘‘ꦱꦺꦴ ꦱꦕꦺ ꦄꦴꦏꦔ꧀ꦑꦠꦶ – ‘ꦄꦥ꧀ꦥꦛꦶꦏꦹꦭꦺ ꦥꦛꦶꦏꦹꦭꦱꦚ꧀ꦚꦷ ꦮꦶꦲꦫꦺꦪ꧀ꦪ’ꦤ꧀ꦠꦶ, ꦥꦛꦶꦏꦹꦭꦱꦚ꧀ꦚꦷ ꦠꦠ꧀ꦡ ꦮꦶꦲꦫꦠꦶ…ꦥꦺ… ꦈꦥꦺꦏ꧀ꦑꦏꦺꦴ ꦠꦠ꧀ꦡ ꦮꦶꦲꦫꦠꦶ ꦱꦠꦺꦴ ꦱꦩ꧀ꦥꦗꦴꦤꦺꦴ.

‘‘ꦄꦗ꧀ꦙꦠ꧀ꦠꦁ ꦣꦩ꧀ꦩꦺꦱꦸ…ꦥꦺ… ꦧꦲꦶꦢ꧀ꦣꦴ ꦣꦩ꧀ꦩꦺꦱꦸ…ꦥꦺ… ꦄꦗ꧀ꦙꦠ꧀ꦠꦧꦲꦶꦢ꧀ꦣꦴ ꦣꦩ꧀ꦩꦺꦱꦸ ꦱꦩꦸꦢꦪꦣꦩ꧀ꦩꦴꦤꦸꦥꦱ꧀ꦱꦷ ꦮꦶꦲꦫꦠꦶ… ꦄꦗ꧀ꦙꦠ꧀ꦠꦧꦲꦶꦢ꧀ꦣꦴ ꦣꦩ꧀ꦩꦺꦱꦸ ꦮꦪꦣꦩ꧀ꦩꦴꦤꦸꦥꦱ꧀ꦱꦷ ꦮꦶꦲꦫꦠꦶ… ꦄꦗ꧀ꦙꦠ꧀ꦠꦧꦲꦶꦢ꧀ꦣꦴ ꦣꦩ꧀ꦩꦺꦱꦸ ꦱꦩꦸꦢꦪꦮꦪꦣꦩ꧀ꦩꦴꦤꦸꦥꦱ꧀ꦱꦷ ꦮꦶꦲꦫꦠꦶ ꦄꦴꦠꦴꦥꦷ ꦱꦩ꧀ꦥꦗꦴꦤꦺꦴ ꦱꦠꦶꦩꦴ, ꦮꦶꦤꦺꦪ꧀ꦪ ꦭꦺꦴꦏꦺ ꦄꦨꦶꦗ꧀ꦙꦴꦢꦺꦴꦩꦤꦱ꧀ꦱꦁ.

‘‘ꦱꦺꦴ ꦱꦕꦺ ꦄꦴꦏꦔ꧀ꦑꦠꦶ – ‘ꦄꦥ꧀ꦥꦛꦶꦏꦹꦭꦺ ꦥꦛꦶꦏꦹꦭꦱꦚ꧀ꦚꦷ ꦮꦶꦲꦫꦺꦪ꧀ꦪ’ꦤ꧀ꦠꦶ, ꦥꦛꦶꦏꦹꦭꦱꦚ꧀ꦚꦷ ꦠꦠ꧀ꦡ ꦮꦶꦲꦫꦠꦶ…ꦥꦺ… ꦈꦥꦺꦏ꧀ꦑꦏꦺꦴ ꦠꦠ꧀ꦡ ꦮꦶꦲꦫꦠꦶ ꦱꦠꦺꦴ ꦱꦩ꧀ꦥꦗꦴꦤꦺꦴ. ꦌꦠ꧀ꦠꦴꦮꦠꦴ ꦑꦺꦴ, ꦄꦴꦮꦸꦱꦺꦴ, ꦨꦶꦏ꧀ꦑꦸꦤꦺꦴ ꦕꦠ꧀ꦠꦴꦫꦺꦴ ꦱꦠꦶꦥꦛ꧀ꦜꦴꦤꦴ ꦄꦴꦫꦢ꧀ꦣꦴ ꦲꦺꦴꦤ꧀ꦠꦷ’’ꦠꦶ. ꦥꦜꦩꦁ.