꧑꧐. ꦄꦴꦥꦟꦱꦸꦠ꧀ꦠꦁ

꧕꧒꧐. ꦌꦮꦁ ꦩꦺ ꦱꦸꦠꦁ – ꦌꦏꦁ ꦱꦩꦪꦁ ꦨꦒꦮꦴ ꦄꦔ꧀ꦒꦺꦱꦸ ꦮꦶꦲꦫꦠꦶ ꦄꦴꦥꦟꦁ ꦤꦴꦩ ꦄꦔ꧀ꦒꦴꦤꦁ ꦤꦶꦒꦩꦺꦴ. ꦠꦠ꧀ꦫ ꦑꦺꦴ ꦨꦒꦮꦴ ꦄꦴꦪꦱ꧀ꦩꦤ꧀ꦠꦁ ꦱꦴꦫꦶꦥꦸꦠ꧀ꦠꦁ ꦄꦴꦩꦤ꧀ꦠꦺꦱꦶ – ‘‘ꦪꦺꦴ ꦱꦺꦴ, ꦱꦴꦫꦶꦥꦸꦠ꧀ꦠ, ꦄꦫꦶꦪꦱꦴꦮꦏꦺꦴ ꦠꦡꦴꦒꦠꦺ ꦌꦏꦤ꧀ꦠꦒꦠꦺꦴ [ꦌꦏꦤ꧀ꦠꦶꦒꦠꦺꦴ (ꦱꦷ.)] ꦄꦨꦶꦥ꧀ꦥꦱꦤ꧀ꦤꦺꦴ, ꦤ ꦱꦺꦴ ꦠꦡꦴꦒꦠꦺ ꦮꦴ ꦠꦡꦴꦒꦠꦱꦴꦱꦤꦺ ꦮꦴ ꦏꦔ꧀ꦑꦺꦪ꧀ꦪ ꦮꦴ ꦮꦶꦕꦶꦏꦶꦕ꧀ꦖꦺꦪ꧀ꦪ ꦮꦴ’’ꦠꦶ?

‘‘ꦪꦺꦴ ꦱꦺꦴ, ꦨꦤ꧀ꦠꦺ, ꦄꦫꦶꦪꦱꦴꦮꦏꦺꦴ ꦠꦡꦴꦒꦠꦺ ꦌꦏꦤ꧀ꦠꦒꦠꦺꦴ ꦄꦨꦶꦥ꧀ꦥꦱꦤ꧀ꦤꦺꦴ, ꦤ ꦱꦺꦴ ꦠꦡꦴꦒꦠꦺ ꦮꦴ ꦠꦡꦴꦒꦠꦱꦴꦱꦤꦺ ꦮꦴ ꦏꦔ꧀ꦑꦺꦪ꧀ꦪ ꦮꦴ ꦮꦶꦕꦶꦏꦶꦕ꧀ꦖꦺꦪ꧀ꦪ ꦮꦴ. ꦱꦢ꧀ꦣꦱ꧀ꦱ ꦲꦶ, ꦨꦤ꧀ꦠꦺ, ꦄꦫꦶꦪꦱꦴꦮꦏꦱ꧀ꦱ ꦌꦮꦁ ꦥꦴꦛꦶꦏꦔ꧀ꦑꦁ ꦪꦁ ꦄꦴꦫꦢ꧀ꦣꦮꦷꦫꦶꦪꦺꦴ ꦮꦶꦲꦫꦶꦱ꧀ꦱꦠꦶ – ꦄꦏꦸꦱꦭꦴꦤꦁ ꦣꦩ꧀ꦩꦴꦤꦁ ꦥꦲꦴꦤꦴꦪ, ꦏꦸꦱꦭꦴꦤꦁ ꦣꦩ꧀ꦩꦴꦤꦁ ꦈꦥꦱꦩ꧀ꦥꦢꦴꦪ, ꦡꦴꦩꦮꦴ ꦢꦭ꦳꧀ꦲꦥꦫꦏ꧀ꦏꦩꦺꦴ ꦄꦤꦶꦏ꧀ꦑꦶꦠ꧀ꦠꦣꦸꦫꦺꦴ ꦏꦸꦱꦭꦺꦱꦸ ꦣꦩ꧀ꦩꦺꦱꦸ. ꦪꦁ ꦲꦶꦱ꧀ꦱ, ꦨꦤ꧀ꦠꦺ, ꦮꦷꦫꦶꦪꦁ ꦠꦢꦱ꧀ꦱ ꦮꦷꦫꦶꦪꦶꦤ꧀ꦢ꧀ꦫꦶꦪꦁ.

‘‘ꦱꦢ꧀ꦣꦱ꧀ꦱ ꦲꦶ, ꦨꦤ꧀ꦠꦺ, ꦄꦫꦶꦪꦱꦴꦮꦏꦱ꧀ꦱ ꦄꦴꦫꦢ꧀ꦣꦮꦷꦫꦶꦪꦱ꧀ꦱ ꦌꦠꦁ ꦥꦴꦛꦶꦏꦔ꧀ꦑꦁ ꦪꦁ ꦱꦠꦶꦩꦴ ꦨꦮꦶꦱ꧀ꦱꦠꦶ, ꦥꦫꦩꦺꦤ ꦱꦠꦶꦤꦺꦥꦏ꧀ꦏꦺꦤ ꦱꦩꦤ꧀ꦤꦴꦒꦠꦺꦴ, ꦕꦶꦫꦏꦠꦩ꧀ꦥꦶ ꦕꦶꦫꦨꦴꦱꦶꦠꦩ꧀ꦥꦶ ꦱꦫꦶꦠꦴ ꦄꦤꦸꦱ꧀ꦱꦫꦶꦠꦴ. ꦪꦴ ꦲꦶꦱ꧀ꦱ, ꦨꦤ꧀ꦠꦺ, ꦱꦠꦶ ꦠꦢꦱ꧀ꦱ ꦱꦠꦶꦤ꧀ꦢ꧀ꦫꦶꦪꦁ.

‘‘ꦱꦢ꧀ꦣꦱ꧀ꦱ ꦲꦶ, ꦨꦤ꧀ꦠꦺ, ꦄꦫꦶꦪꦱꦴꦮꦏꦱ꧀ꦱ ꦄꦴꦫꦢ꧀ꦣꦮꦷꦫꦶꦪꦱ꧀ꦱ ꦈꦥꦛ꧀ꦜꦶꦠꦱ꧀ꦱꦠꦶꦤꦺꦴ ꦌꦠꦁ ꦥꦴꦛꦶꦏꦔ꧀ꦑꦁ ꦪꦁ ꦮꦺꦴꦱ꧀ꦱꦒ꧀ꦒꦴꦫꦩ꧀ꦩꦟꦁ ꦏꦫꦶꦠ꧀ꦮꦴ ꦭꦨꦶꦱ꧀ꦱꦠꦶ ꦱꦩꦴꦣꦶꦁ, ꦭꦨꦶꦱ꧀ꦱꦠꦶ ꦕꦶꦠ꧀ꦠꦱ꧀ꦱ ꦌꦏꦒ꧀ꦒꦠꦁ. ꦪꦺꦴ ꦲꦶꦱ꧀ꦱ, ꦨꦤ꧀ꦠꦺ, ꦱꦩꦴꦣꦶ ꦠꦢꦱ꧀ꦱ ꦱꦩꦴꦣꦶꦤ꧀ꦢ꧀ꦫꦶꦪꦁ.

‘‘ꦱꦢ꧀ꦣꦱ꧀ꦱ ꦲꦶ, ꦨꦤ꧀ꦠꦺ, ꦄꦫꦶꦪꦱꦴꦮꦏꦱ꧀ꦱ ꦄꦴꦫꦢ꧀ꦣꦮꦷꦫꦶꦪꦱ꧀ꦱ ꦈꦥꦛ꧀ꦜꦶꦠꦱ꧀ꦱꦠꦶꦤꦺꦴ ꦱꦩꦴꦲꦶꦠꦕꦶꦠ꧀ꦠꦱ꧀ꦱ ꦌꦠꦁ ꦥꦴꦛꦶꦏꦔ꧀ꦑꦁ ꦪꦁ ꦌꦮꦁ ꦥꦗꦴꦤꦶꦱ꧀ꦱꦠꦶ – ꦄꦤꦩꦠꦒ꧀ꦒꦺꦴ ꦑꦺꦴ ꦱꦁꦱꦴꦫꦺꦴ. ꦥꦸꦧ꧀ꦧꦴ ꦏꦺꦴꦛꦶ ꦤ ꦥꦚ꧀ꦚꦴꦪꦠꦶ ꦄꦮꦶꦗ꧀ꦗꦴꦤꦷꦮꦫꦟꦴꦤꦁ ꦱꦠ꧀ꦠꦴꦤꦁ ꦠꦟ꧀ꦲꦴꦱꦁꦪꦺꦴꦗꦤꦴꦤꦁ ꦱꦤ꧀ꦣꦴꦮꦠꦁ ꦱꦁꦱꦫꦠꦁ. ꦄꦮꦶꦗ꧀ꦗꦴꦪ ꦠ꧀ꦮꦺꦮ ꦠꦩꦺꦴꦏꦴꦪꦱ꧀ꦱ ꦄꦱꦺꦱꦮꦶꦫꦴꦒꦤꦶꦫꦺꦴꦣꦺꦴ ꦱꦤ꧀ꦠꦩꦺꦠꦁ ꦥꦢꦁ ꦥꦟꦷꦠꦩꦺꦠꦁ ꦥꦢꦁ, ꦪꦢꦶꦢꦁ – ꦱꦧ꧀ꦧꦱꦔ꧀ꦑꦴꦫꦱꦩꦡꦺꦴ ꦱꦧ꧀ꦧꦹꦥꦣꦶꦥꦛꦶꦤꦶꦱ꧀ꦱꦒ꧀ꦒꦺꦴ ꦠꦟ꧀ꦲꦴꦏ꧀ꦑꦪꦺꦴ ꦮꦶꦫꦴꦒꦺꦴ ꦤꦶꦫꦺꦴꦣꦺꦴ ꦤꦶꦧ꧀ꦧꦴꦤꦁ [ꦤꦶꦧ꧀ꦧꦴꦤꦤ꧀ꦠꦶ (?)]. ꦪꦴ ꦲꦶꦱ꧀ꦱ, ꦨꦤ꧀ꦠꦺ, ꦥꦚ꧀ꦚꦴ ꦠꦢꦱ꧀ꦱ ꦥꦚ꧀ꦚꦶꦤ꧀ꦢ꧀ꦫꦶꦪꦁ.

‘‘ꦱꦢ꧀ꦣꦺꦴ ꦱꦺꦴ [ꦱ ꦑꦺꦴ ꦱꦺꦴ (ꦱꦷ. ꦱ꧀ꦪꦴ. ꦏꦁ.)], ꦨꦤ꧀ꦠꦺ, ꦄꦫꦶꦪꦱꦴꦮꦏꦺꦴ ꦌꦮꦁ ꦥꦢꦲꦶꦠ꧀ꦮꦴ ꦥꦢꦲꦶꦠ꧀ꦮꦴ ꦌꦮꦁ ꦱꦫꦶꦠ꧀ꦮꦴ ꦱꦫꦶꦠ꧀ꦮꦴ ꦌꦮꦁ ꦱꦩꦴꦢꦲꦶꦠ꧀ꦮꦴ ꦱꦩꦴꦢꦲꦶꦠ꧀ꦮꦴ ꦌꦮꦁ ꦥꦗꦴꦤꦶꦠ꧀ꦮꦴ ꦥꦗꦴꦤꦶꦠ꧀ꦮꦴ ꦌꦮꦁ ꦄꦨꦶꦱꦢ꧀ꦢꦲꦠꦶ – ‘ꦆꦩꦺ ꦑꦺꦴ ꦠꦺ ꦣꦩ꧀ꦩꦴ ꦪꦺ ꦩꦺ ꦥꦸꦧ꧀ꦧꦺ ꦱꦸꦠꦮꦴ ꦄꦲꦺꦱꦸꦁ. ꦠꦺꦤꦴꦲꦁ ꦌꦠꦫꦲꦶ ꦏꦴꦪꦺꦤ ꦕ ꦦꦸꦱꦶꦠ꧀ꦮꦴ ꦮꦶꦲꦫꦴꦩꦶ, ꦥꦚ꧀ꦚꦴꦪ ꦕ ꦄꦠꦶꦮꦶꦗ꧀ꦙ [ꦥꦛꦶꦮꦶꦗ꧀ꦙ (ꦱꦷ. ꦏ.) ꦠꦢꦛ꧀ꦜꦏꦡꦴꦱꦸ ꦥꦤ ꦄꦠꦶꦮꦶꦗ꧀ꦙꦶꦠ꧀ꦮꦴꦠꦶ ꦮꦟ꧀ꦟꦶꦠꦁ] ꦥꦱ꧀ꦱꦴꦩꦷ’ꦠꦶ. ꦪꦴ ꦲꦶꦱ꧀ꦱ, ꦨꦤ꧀ꦠꦺ, ꦱꦢ꧀ꦣꦴ ꦠꦢꦱ꧀ꦱ ꦱꦢ꧀ꦣꦶꦤ꧀ꦢ꧀ꦫꦶꦪ’’ꦤ꧀ꦠꦶ.

‘‘ꦱꦴꦣꦸ ꦱꦴꦣꦸ, ꦱꦴꦫꦶꦥꦸꦠ꧀ꦠ! ꦪꦺꦴ ꦱꦺꦴ, ꦱꦴꦫꦶꦥꦸꦠ꧀ꦠ, ꦄꦫꦶꦪꦱꦴꦮꦏꦺꦴ ꦠꦡꦴꦒꦠꦺ ꦌꦏꦤ꧀ꦠꦒꦠꦺꦴ ꦄꦨꦶꦥ꧀ꦥꦱꦤ꧀ꦤꦺꦴ, ꦤ ꦱꦺꦴ ꦠꦡꦴꦒꦠꦺ ꦮꦴ ꦠꦡꦴꦒꦠꦱꦴꦱꦤꦺ ꦮꦴ ꦏꦔ꧀ꦑꦺꦪ꧀ꦪ ꦮꦴ ꦮꦶꦕꦶꦏꦶꦕ꧀ꦖꦺꦪ꧀ꦪ ꦮꦴ. ꦱꦢ꧀ꦣꦱ꧀ꦱ ꦲꦶ, ꦱꦴꦫꦶꦥꦸꦠ꧀ꦠ, ꦄꦫꦶꦪꦱꦴꦮꦏꦱ꧀ꦱ ꦌꦠꦁ ꦥꦴꦛꦶꦏꦔ꧀ꦑꦁ ꦪꦁ ꦄꦴꦫꦢ꧀ꦣꦮꦷꦫꦶꦪꦺꦴ ꦮꦶꦲꦫꦶꦱ꧀ꦱꦠꦶ – ꦄꦏꦸꦱꦭꦴꦤꦁ ꦣꦩ꧀ꦩꦴꦤꦁ ꦥꦲꦴꦤꦴꦪ, ꦏꦸꦱꦭꦴꦤꦁ ꦣꦩ꧀ꦩꦴꦤꦁ ꦈꦥꦱꦩ꧀ꦥꦢꦴꦪ, ꦡꦴꦩꦮꦴ ꦢꦭ꦳꧀ꦲꦥꦫꦏ꧀ꦏꦩꦺꦴ ꦄꦤꦶꦏ꧀ꦑꦶꦠ꧀ꦠꦣꦸꦫꦺꦴ ꦏꦸꦱꦭꦺꦱꦸ ꦣꦩ꧀ꦩꦺꦱꦸ. ꦪꦁ ꦲꦶꦱ꧀ꦱ, ꦱꦴꦫꦶꦥꦸꦠ꧀ꦠ, ꦮꦷꦫꦶꦪꦁ ꦠꦢꦱ꧀ꦱ ꦮꦷꦫꦶꦪꦶꦤ꧀ꦢ꧀ꦫꦶꦪꦁ.

‘‘ꦱꦢ꧀ꦣꦱ꧀ꦱ ꦲꦶ, ꦱꦴꦫꦶꦥꦸꦠ꧀ꦠ, ꦄꦫꦶꦪꦱꦴꦮꦏꦱ꧀ꦱ ꦄꦴꦫꦢ꧀ꦣꦮꦷꦫꦶꦪꦱ꧀ꦱ ꦌꦠꦁ ꦥꦴꦛꦶꦏꦔ꧀ꦑꦁ ꦪꦁ ꦱꦠꦶꦩꦴ ꦨꦮꦶꦱ꧀ꦱꦠꦶ, ꦥꦫꦩꦺꦤ ꦱꦠꦶꦤꦺꦥꦏ꧀ꦏꦺꦤ ꦱꦩꦤ꧀ꦤꦴꦒꦠꦺꦴ, ꦕꦶꦫꦏꦠꦩ꧀ꦥꦶ ꦕꦶꦫꦨꦴꦱꦶꦠꦩ꧀ꦥꦶ ꦱꦫꦶꦠꦴ ꦄꦤꦸꦱ꧀ꦱꦫꦶꦠꦴ. ꦪꦴ ꦲꦶꦱ꧀ꦱ, ꦱꦴꦫꦶꦥꦸꦠ꧀ꦠ, ꦱꦠꦶ ꦠꦢꦱ꧀ꦱ ꦱꦠꦶꦤ꧀ꦢ꧀ꦫꦶꦪꦁ.

‘‘ꦱꦢ꧀ꦣꦱ꧀ꦱ ꦲꦶ, ꦱꦴꦫꦶꦥꦸꦠ꧀ꦠ, ꦄꦫꦶꦪꦱꦴꦮꦏꦱ꧀ꦱ ꦄꦴꦫꦢ꧀ꦣꦮꦷꦫꦶꦪꦱ꧀ꦱ ꦈꦥꦛ꧀ꦜꦶꦠꦱ꧀ꦱꦠꦶꦤꦺꦴ ꦌꦠꦁ ꦥꦴꦛꦶꦏꦔ꧀ꦑꦁ ꦪꦁ ꦮꦺꦴꦱ꧀ꦱꦒ꧀ꦒꦴꦫꦩ꧀ꦩꦟꦁ ꦏꦫꦶꦠ꧀ꦮꦴ ꦭꦨꦶꦱ꧀ꦱꦠꦶ ꦱꦩꦴꦣꦶꦁ, ꦭꦨꦶꦱ꧀ꦱꦠꦶ ꦕꦶꦠ꧀ꦠꦱ꧀ꦱ ꦌꦏꦒ꧀ꦒꦠꦁ. ꦪꦺꦴ ꦲꦶꦱ꧀ꦱ, ꦱꦴꦫꦶꦥꦸꦠ꧀ꦠ, ꦱꦩꦴꦣꦶ ꦠꦢꦱ꧀ꦱ ꦱꦩꦴꦣꦶꦤ꧀ꦢ꧀ꦫꦶꦪꦁ.

‘‘ꦱꦢ꧀ꦣꦱ꧀ꦱ ꦲꦶ, ꦱꦴꦫꦶꦥꦸꦠ꧀ꦠ, ꦄꦫꦶꦪꦱꦴꦮꦏꦱ꧀ꦱ ꦄꦴꦫꦢ꧀ꦣꦮꦷꦫꦶꦪꦱ꧀ꦱ ꦈꦥꦛ꧀ꦜꦶꦠꦱ꧀ꦱꦠꦶꦤꦺꦴ ꦱꦩꦴꦲꦶꦠꦕꦶꦠ꧀ꦠꦱ꧀ꦱ ꦌꦠꦁ ꦥꦴꦛꦶꦏꦔ꧀ꦑꦁ ꦪꦁ ꦌꦮꦁ ꦥꦗꦴꦤꦶꦱ꧀ꦱꦠꦶ – ꦄꦤꦩꦠꦒ꧀ꦒꦺꦴ ꦑꦺꦴ ꦱꦁꦱꦴꦫꦺꦴ. ꦥꦸꦧ꧀ꦧꦴ ꦏꦺꦴꦛꦶ ꦤ ꦥꦚ꧀ꦚꦴꦪꦠꦶ ꦄꦮꦶꦗ꧀ꦗꦴꦤꦷꦮꦫꦟꦴꦤꦁ ꦱꦠ꧀ꦠꦴꦤꦁ ꦠꦟ꧀ꦲꦴꦱꦁꦪꦺꦴꦗꦤꦴꦤꦁ ꦱꦤ꧀ꦣꦴꦮꦠꦁ ꦱꦁꦱꦫꦠꦁ. ꦄꦮꦶꦗ꧀ꦗꦴꦪ ꦠ꧀ꦮꦺꦮ ꦠꦩꦺꦴꦏꦴꦪꦱ꧀ꦱ ꦄꦱꦺꦱꦮꦶꦫꦴꦒꦤꦶꦫꦺꦴꦣꦺꦴ ꦱꦤ꧀ꦠꦩꦺꦠꦁ ꦥꦢꦁ ꦥꦟꦷꦠꦩꦺꦠꦁ ꦥꦢꦁ, ꦪꦢꦶꦢꦁ – ꦱꦧ꧀ꦧꦱꦔ꧀ꦑꦴꦫꦱꦩꦡꦺꦴ ꦱꦧ꧀ꦧꦹꦥꦣꦶꦥꦛꦶꦤꦶꦱ꧀ꦱꦒ꧀ꦒꦺꦴ ꦠꦟ꧀ꦲꦴꦏ꧀ꦑꦪꦺꦴ ꦮꦶꦫꦴꦒꦺꦴ ꦤꦶꦫꦺꦴꦣꦺꦴ ꦤꦶꦧ꧀ꦧꦴꦤꦁ. ꦪꦴ ꦲꦶꦱ꧀ꦱ, ꦱꦴꦫꦶꦥꦸꦠ꧀ꦠ, ꦥꦚ꧀ꦚꦴ ꦠꦢꦱ꧀ꦱ ꦥꦚ꧀ꦚꦶꦤ꧀ꦢ꧀ꦫꦶꦪꦁ.

‘‘ꦱꦢ꧀ꦣꦺꦴ ꦱꦺꦴ [ꦱ ꦑꦺꦴ ꦱꦺꦴ (ꦱꦷ. ꦱ꧀ꦪꦴ. ꦏꦁ. ꦥꦷ.)], ꦱꦴꦫꦶꦥꦸꦠ꧀ꦠ, ꦄꦫꦶꦪꦱꦴꦮꦏꦺꦴ ꦌꦮꦁ ꦥꦢꦲꦶꦠ꧀ꦮꦴ ꦥꦢꦲꦶꦠ꧀ꦮꦴ ꦌꦮꦁ ꦱꦫꦶꦠ꧀ꦮꦴ ꦱꦫꦶꦠ꧀ꦮꦴ ꦌꦮꦁ ꦱꦩꦴꦢꦲꦶꦠ꧀ꦮꦴ ꦱꦩꦴꦢꦲꦶꦠ꧀ꦮꦴ ꦌꦮꦁ ꦥꦗꦴꦤꦶꦠ꧀ꦮꦴ ꦥꦗꦴꦤꦶꦠ꧀ꦮꦴ ꦌꦮꦁ ꦄꦨꦶꦱꦢ꧀ꦢꦲꦠꦶ – ‘ꦆꦩꦺ ꦑꦺꦴ ꦠꦺ ꦣꦩ꧀ꦩꦴ ꦪꦺ ꦩꦺ ꦥꦸꦧ꧀ꦧꦺ ꦱꦸꦠꦮꦴ ꦄꦲꦺꦱꦸꦁ. ꦠꦺꦤꦴꦲꦁ ꦌꦠꦫꦲꦶ ꦏꦴꦪꦺꦤ ꦕ ꦦꦸꦱꦶꦠ꧀ꦮꦴ ꦮꦶꦲꦫꦴꦩꦶ, ꦥꦚ꧀ꦚꦴꦪ ꦕ ꦄꦠꦶꦮꦶꦗ꧀ꦙ [ꦥꦛꦶꦮꦶꦗ꧀ꦙ (ꦏ. ꦱꦷ. ꦏ.)] ꦥꦱ꧀ꦱꦴꦩꦷ’ꦠꦶ. ꦪꦴ ꦲꦶꦱ꧀ꦱ, ꦱꦴꦫꦶꦥꦸꦠ꧀ꦠ, ꦱꦢ꧀ꦣꦴ ꦠꦢꦱ꧀ꦱ ꦱꦢ꧀ꦣꦶꦤ꧀ꦢ꧀ꦫꦶꦪ’’ꦤ꧀ꦠꦶ. ꦢꦱꦩꦁ.

ꦗꦫꦴꦮꦒ꧀ꦒꦺꦴ ꦥꦚ꧀ꦕꦩꦺꦴ.

ꦠꦱ꧀ꦱꦸꦢ꧀ꦢꦴꦤꦁ –

ꦗꦫꦴ ꦈꦟ꧀ꦟꦴꦨꦺꦴ ꦧ꧀ꦫꦴꦲ꧀ꦩꦟꦺꦴ, ꦱꦴꦏꦺꦠꦺꦴ ꦥꦸꦧ꧀ꦧꦏꦺꦴꦛ꧀ꦜꦏꦺꦴ;

ꦥꦸꦧ꧀ꦧꦴꦫꦴꦩꦺ ꦕ ꦕꦠ꧀ꦠꦴꦫꦶ, ꦥꦶꦟ꧀ꦝꦺꦴꦭꦺꦴ ꦄꦴꦥꦟꦺꦤ ꦕꦴꦠꦶ [ꦱꦢ꧀ꦣꦺꦤ ꦠꦺ ꦢꦱꦴꦠꦶ (ꦱ꧀ꦪꦴ. ꦏꦁ. ꦏ.)].