꧙. ꦱꦩ꧀ꦥꦤ꧀ꦤꦱꦸꦠ꧀ꦠꦁ

꧔꧘꧙. ꦄꦡ ꦑꦺꦴ ꦄꦚ꧀ꦚꦠꦫꦺꦴ ꦨꦶꦏ꧀ꦑꦸ ꦪꦺꦤ ꦨꦒꦮꦴ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦨꦒꦮꦤ꧀ꦠꦁ ꦄꦨꦶꦮꦴꦢꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦺꦴ ꦑꦺꦴ ꦱꦺꦴ ꦨꦶꦏ꧀ꦑꦸ ꦨꦒꦮꦤ꧀ꦠꦁ ꦌꦠꦢꦮꦺꦴꦕ –

‘‘‘ꦆꦤ꧀ꦢ꧀ꦫꦶꦪꦱꦩ꧀ꦥꦤ꧀ꦤꦺꦴ, ꦆꦤ꧀ꦢ꧀ꦫꦶꦪꦱꦩ꧀ꦥꦤ꧀ꦤꦺꦴ’ꦠꦶ, ꦨꦤ꧀ꦠꦺ, ꦮꦸꦕ꧀ꦕꦠꦶ. ꦏꦶꦠ꧀ꦠꦴꦮꦠꦴ ꦤꦸ ꦑꦺꦴ, ꦨꦤ꧀ꦠꦺ, ꦆꦤ꧀ꦢ꧀ꦫꦶꦪꦱꦩ꧀ꦥꦤ꧀ꦤꦺꦴ ꦲꦺꦴꦠꦷ’’ꦠꦶ? ‘‘ꦆꦣ, ꦨꦶꦏ꧀ꦑꦸ, ꦨꦶꦏ꧀ꦑꦸ ꦱꦢ꧀ꦣꦶꦤ꧀ꦢ꧀ꦫꦶꦪꦁ ꦨꦴꦮꦺꦠꦶ ꦈꦥꦱꦩꦒꦴꦩꦶꦁ ꦱꦩ꧀ꦧꦺꦴꦣꦒꦴꦩꦶꦁ, ꦮꦷꦫꦶꦪꦶꦤ꧀ꦢ꧀ꦫꦶꦪꦁ ꦨꦴꦮꦺꦠꦶ ꦈꦥꦱꦩꦒꦴꦩꦶꦁ ꦱꦩ꧀ꦧꦺꦴꦣꦒꦴꦩꦶꦁ, ꦱꦠꦶꦤ꧀ꦢ꧀ꦫꦶꦪꦁ ꦨꦴꦮꦺꦠꦶ ꦈꦥꦱꦩꦒꦴꦩꦶꦁ ꦱꦩ꧀ꦧꦺꦴꦣꦒꦴꦩꦶꦁ, ꦱꦩꦴꦣꦶꦤ꧀ꦢ꧀ꦫꦶꦪꦁ ꦨꦴꦮꦺꦠꦶ ꦈꦥꦱꦩꦒꦴꦩꦶꦁ ꦱꦩ꧀ꦧꦺꦴꦣꦒꦴꦩꦶꦁ, ꦥꦚ꧀ꦚꦶꦤ꧀ꦢ꧀ꦫꦶꦪꦁ ꦨꦴꦮꦺꦠꦶ ꦈꦥꦱꦩꦒꦴꦩꦶꦁ ꦱꦩ꧀ꦧꦺꦴꦣꦒꦴꦩꦶꦁ. ꦌꦠ꧀ꦠꦴꦮꦠꦴ ꦑꦺꦴ, ꦨꦶꦏ꧀ꦑꦸ, ꦨꦶꦏ꧀ꦑꦸ ꦆꦤ꧀ꦢ꧀ꦫꦶꦪꦱꦩ꧀ꦥꦤ꧀ꦤꦺꦴ ꦲꦺꦴꦠꦷ’’ꦠꦶ. ꦤꦮꦩꦁ.