꧙. ꦌꦏꦣꦩ꧀ꦩꦱꦸꦠ꧀ꦠꦁ

꧒꧑꧐. ‘‘ꦤꦴꦲꦁ, ꦨꦶꦏ꧀ꦑꦮꦺ, ꦄꦚ꧀ꦚꦁ ꦌꦏꦣꦩ꧀ꦩꦩ꧀ꦥꦶ ꦱꦩꦤꦸꦥꦱ꧀ꦱꦴꦩꦶ, ꦪꦺꦴ ꦌꦮꦁ ꦨꦴꦮꦶꦠꦺꦴ ꦧꦲꦸꦭꦷꦏꦠꦺꦴ ꦱꦁꦪꦺꦴꦗꦤꦷꦪꦴꦤꦁ ꦣꦩ꧀ꦩꦴꦤꦁ ꦥꦲꦴꦤꦴꦪ ꦱꦁꦮꦠ꧀ꦠꦠꦶ, ꦪꦡꦪꦶꦢꦁ, ꦨꦶꦏ꧀ꦑꦮꦺ, ꦱꦠ꧀ꦠ ꦧꦺꦴꦗ꧀ꦙꦔ꧀ꦒꦴ. ꦏꦠꦩꦺ ꦱꦠ꧀ꦠ? ꦱꦠꦶꦱꦩ꧀ꦧꦺꦴꦗ꧀ꦙꦔ꧀ꦒꦺꦴ…ꦥꦺ… ꦈꦥꦺꦏ꧀ꦑꦴꦱꦩ꧀ꦧꦺꦴꦗ꧀ꦙꦔ꧀ꦒꦺꦴ. ꦏꦡꦁ ꦨꦴꦮꦶꦠꦴ ꦕ, ꦨꦶꦏ꧀ꦑꦮꦺ, ꦱꦠ꧀ꦠ ꦧꦺꦴꦗ꧀ꦙꦔ꧀ꦒꦴ ꦏꦡꦁ ꦧꦲꦸꦭꦷꦏꦠꦴ ꦱꦁꦪꦺꦴꦗꦤꦷꦪꦴꦤꦁ ꦣꦩ꧀ꦩꦴꦤꦁ ꦥꦲꦴꦤꦴꦪ ꦱꦁꦮꦠ꧀ꦠꦤ꧀ꦠꦶ?

‘‘ꦆꦣ, ꦨꦶꦏ꧀ꦑꦮꦺ, ꦨꦶꦏ꧀ꦑꦸ ꦱꦠꦶꦱꦩ꧀ꦧꦺꦴꦗ꧀ꦙꦔ꧀ꦒꦁ ꦨꦴꦮꦺꦠꦶ ꦮꦶꦮꦺꦏꦤꦶꦱ꧀ꦱꦶꦠꦁ…ꦥꦺ… ꦈꦥꦺꦏ꧀ꦑꦴꦱꦩ꧀ꦧꦺꦴꦗ꧀ꦙꦔ꧀ꦒꦁ ꦨꦴꦮꦺꦠꦶ ꦮꦶꦮꦺꦏꦤꦶꦱ꧀ꦱꦶꦠꦁ ꦮꦶꦫꦴꦒꦤꦶꦱ꧀ꦱꦶꦠꦁ ꦤꦶꦫꦺꦴꦣꦤꦶꦱ꧀ꦱꦶꦠꦁ ꦮꦺꦴꦱ꧀ꦱꦒ꧀ꦒꦥꦫꦶꦟꦴꦩꦶꦁ. ꦌꦮꦁ ꦨꦴꦮꦶꦠꦴ ꦑꦺꦴ, ꦨꦶꦏ꧀ꦑꦮꦺ, ꦱꦠ꧀ꦠ ꦧꦺꦴꦗ꧀ꦙꦔ꧀ꦒꦴ ꦌꦮꦁ ꦧꦲꦸꦭꦷꦏꦠꦴ ꦱꦁꦪꦺꦴꦗꦤꦷꦪꦴꦤꦁ ꦣꦩ꧀ꦩꦴꦤꦁ ꦥꦲꦴꦤꦴꦪ ꦱꦁꦮꦠ꧀ꦠꦤ꧀ꦠꦶ.

‘‘ꦏꦠꦩꦺ ꦕ, ꦨꦶꦏ꧀ꦑꦮꦺ, ꦱꦁꦪꦺꦴꦗꦤꦷꦪꦴ ꦣꦩ꧀ꦩꦴ? ꦕꦏ꧀ꦑꦸ, ꦨꦶꦏ꧀ꦑꦮꦺ, ꦱꦁꦪꦺꦴꦗꦤꦷꦪꦺꦴ ꦣꦩ꧀ꦩꦺꦴ. ꦌꦠ꧀ꦡꦺꦠꦺ ꦈꦥ꧀ꦥꦗ꧀ꦗꦤ꧀ꦠꦶ ꦱꦁꦪꦺꦴꦗꦤꦮꦶꦤꦶꦧꦤ꧀ꦣꦴ ꦄꦗ꧀ꦙꦺꦴꦱꦴꦤꦴ…ꦥꦺ… ꦗꦶꦮ꧀ꦲꦴ ꦱꦁꦪꦺꦴꦗꦤꦷꦪꦴ ꦣꦩ꧀ꦩꦴ. ꦌꦠ꧀ꦡꦺꦠꦺ ꦈꦥ꧀ꦥꦗ꧀ꦗꦤ꧀ꦠꦶ ꦱꦁꦪꦺꦴꦗꦤꦮꦶꦤꦶꦧꦤ꧀ꦣꦴ ꦄꦗ꧀ꦙꦺꦴꦱꦴꦤꦴ…ꦥꦺ… ꦩꦤꦺꦴ ꦱꦁꦪꦺꦴꦗꦤꦷꦪꦺꦴ ꦣꦩ꧀ꦩꦺꦴ. ꦌꦠ꧀ꦡꦺꦠꦺ ꦈꦥ꧀ꦥꦗ꧀ꦗꦤ꧀ꦠꦶ ꦱꦁꦪꦺꦴꦗꦤꦮꦶꦤꦶꦧꦤ꧀ꦣꦴ ꦄꦗ꧀ꦙꦺꦴꦱꦴꦤꦴ. ꦆꦩꦺ ꦮꦸꦕ꧀ꦕꦤ꧀ꦠꦶ, ꦨꦶꦏ꧀ꦑꦮꦺ, ꦱꦁꦪꦺꦴꦗꦤꦷꦪꦴ ꦣꦩ꧀ꦩꦴ’’ꦠꦶ. ꦤꦮꦩꦁ.